Вясна / Правы чалавека ў Беларусі

14 February 2025 13:46

❗️«Такіх гісторый шмат: мяне знялі з аўтобуса». Распавядаем, як беларусаў працягваюць затрымліваць на мяжы

За першыя паўтара месяца 2025 года па вяртанні ў Беларусь былі затрыманыя некалькі дзясяткаў чалавек. Напачатку лютага стала вядома, што з аднаго рэйсавага аўтобуса затрымалі адразу шэсць чалавек.

«Вясне» вядомыя выпадкі, калі чалавек шмат разоў перасякаў мяжы цягам апошніх некалькі гадоў і ніколі не сутыкаўся з дадатковымі праверкамі, падчас знаходжання ў Беларусі не затрымліваўся, але ў выніку пры чарговай спробе заехаць у Беларусь адразу пасля пашпартнага кантролю быў затрыманы.

«Яны правяраюць перапіскі. У адной дзяўчыны знайшлі фразу: "Давай сустрэнемся, я перадам табе грошы". Проста яе сяброўка праз яе перадала грошы маці. І яны прычапіліся да яе, маўляў, якія грошы. То-бок "фінансаванне з-за мяжы" для іх — чырвоная ануча. І за любое згадванне кантактаў, грошай, перадач яны пачынаюць крычаць: "Ты сядзеш на 25 гадоў"».

Вясна / Правы чалавека ў Беларусі

14 February 2025 12:32

⚖️Былы вайсковец, мытнік, маці палітвязня: каго судзілі на гэтым тыдні

З 10 па 14 лютага ў беларускіх судах разглядалі як мінімум 52 крымінальныя палітычныя справы, у межах якіх судзілі 66 чалавек.

Мінімум 11 судовых працэсаў праходзілі ў закрытым рэжыме. У палітычных судах у згаданы перыяд прымалі ўдзел мінімум 43 суддзі. Найбольш распаўсюджаным палітычным крымінальным артыкулам з'яўляецца «народны» 342 КК. Па ім судзілі 25 асобаў. За «заклікі да санкцый» на гэтым тыдні судзілі мінімум пяць чалавек. Агулам паводле дыфамацыйных артыкулаў судзілі 42 чалавекі.

Распавядаем пра палітычна матываваныя крымінальныя суды за мінулы тыдзень.

Чытаць па спасылцы 👉 https://spring96.org/be/news/117437

Вясна / Правы чалавека ў Беларусі

14 February 2025 11:16

⚖️Шасцёра суддзяў Берасцейшчыны, якія судзяць палітвязняў амаль пяць гадоў

Па стане на 14 лютага 2025 года «Вясне» вядома не меней за 6619 асуджаных паводле крымінальных «пратэсных» артыкулах. Імёны некаторых суддзяў, якія датычныя да рэпрэсій, вядомыя з 2020 года, а некаторыя — яшчэ раней.

«Вясна» распавядае пра шасцёх самых рэпрэсіўных суддзяў Берасцейшчыны, якія ўжо амаль пяць гадоў вядуць крымінальныя палітычныя справы.

• Яўген Брэган — мінімум 82 асуджаныя
• Аляксандр Семянчук — мінімум 60 асуджаных
• Вера Філонік — мінімум 46 асуджаных
• Андрэй Грушко — мінімум 40 асуджаных
• Святаслаў Каліна — мінімум 39 асуджаных
• Сяргей Маручак — мінімум 37 асуджаных

Чытаць па спасылцы 👉 https://spring96.org/be/news/117436

Вясна / Правы чалавека ў Беларусі

14 February 2025 10:15

У «Спіс экстрэмістаў» дадалі яшчэ 18 чалавек — цяпер у ім 4948 прозвішчаў

14 лютага МУС зрабіла традыцыйны пятнічны апдэйт «Пераліка грамадзян Беларусі, замежных грамадзян або асоб без грамадзянства, якія маюць дачыненне да экстрэмісцкай дзейнасці».

Сярод іншых, у спіс дадалі блогерку Вікторыю Гусараву, а таксама затрыманую падчас «рэйду па салідарнасці» Алу Кісель.

Да допіса далучаны апошні «Пералік грамадзян, якія маюць дачыненне да экстрэмісцкай дзейнасці».

⁉️«Мама, я экстрэміст». Якія абмежаванні накладаюцца на асоб, уключаных у «Спіс экстрэмістаў»

Вясна / Правы чалавека ў Беларусі

14 February 2025 09:02

💔3 гады і 7 месяцаў таму затрымалі Алеся Бяляцкага, Валянціна Стэфановіча і Уладзіміра Лабковіча

14 ліпеня 2021 года да іх і іншых «вясноўцаў» прыйшлі з ператрусамі. Праваабаронцаў абвінавачвалі ў «кантрабандзе» і «фінансаванні групавых дзеяннях, якія груба парушаюць грамадскі парадак».

У пазамінулым сакавіку суддзя Марына Запаснік прысудзіла «вясноўцам» вялікія тэрміны: Уладзю — 7 гадоў калоніі, Валянціну — 9 гадоў калоніі, Алесю — 10 гадоў калоніі. Праваабаронцы не прызналі віну ні па адным артыкуле, які ставіўся ім у віну.

Пазней праваабаронцаў унеслі ў «спіс экстрэмістаў».

💌Месца ўтрымання «вясноўцаў»:
- ПК № 9, 213410, Горкі, Дабралюбава, 16, Аляксандру Віктаравічу Бяляцкаму
- ПК № 15, 213105, Магілёў, п/а Вейна, Слаўгарадская шаша 183, Валянціну Канстанцінавічу Стэфановічу
- ПК № 17, 213004, Шклоў, 1-я Заводская, 8, Уладзіміру Мікалаевічу Лабковічу
💻Напісаць анлайн
💳Падтрымаць «Вясну» на Patreon | Аднаразовым данатам

Вясна / Правы чалавека ў Беларусі

14 February 2025 08:00

У камерах туалет пад відэакамерамі — у якіх умовах беларуска адбывала суткі ў невялікім горадзе Мінскай вобласці

Святлана была арыштаваная напачатку 2025 года ў невялікім горадзе Мінскай вобласці. «Суткі» жанчына адбывала ў мясцовым ІЧУ разам з яшчэ некалькімі «палітычнымі».

«Ежа — жэсць. Кашы камкамі, катлеты — хлебныя, але з дадаткам ці то рыбы, ці то каўбасы. Паліць у камерах нельга, толькі падчас шпацыру. Сігарэты захоўваюцца на складзе, таму ўзяць іх можна толькі калі выходзіш з камеры — раз у дзень».

Вясна / Правы чалавека ў Беларусі

13 February 2025 16:00

❗️Палітвязня, які заплаціў уладам 31 біткоін кампенсацыі і зняўся ў фільме БТ, асудзілі яшчэ на 9 гадоў

Палітзняволенага айцішніка Аляксандра Зіязэтдзінава восенню 2022 года ўжо асудзілі паводле ч. 1 арт. 361-2 (фінансаванне экстрэмісцкай дзейнасці) да трох гадоў калоніі за перавод крыптавалюты ў BYPOL.

У сярэдзіне кастрычніка 2023 года яго знялі ў прапагандысцкім фільме, дзе ён распавёў, што пакрыў шкоду за новы выяўлены эпізод і напісаў на памілаванне. Але негледзячы на гэта, у лютым 2024 года ў Мінскім гарадскім судзе яго зноўку пачалі судзіць. Айцішніка абвінавачвалі паводле ч. 1 арт. 361-2 (фінансаванне экстрэмісцкай дзейнасці) і ч. 2 арт. 290-1 (фінансаванне тэрарыстычнай дзейнасці).

Стала вядома, што суддзя Алена Шылько вынесла прысуд — дзевяць гадоў зняволення.

Чытаць па спасылцы 👉 https://spring96.org/be/news/117431

Вясна / Правы чалавека ў Беларусі

13 February 2025 15:30

«Ён увесь перабіты, паламаны быў». Беларус распавёў, як сядзеў на «сутках» з «вагнераўцам»

Кірыл (імя зменена ў мэтах бяспекі) адбываў арышт на Акрэсціна ў Мінску напрыканцы 2024 года. За ўвесь час арышту хлопец налічыў 52 сукамернікаў, якія былі асуджаныя па «палітыцы». Прыкладна 10 з іх патрапілі пад так званую «карусель» — гэта значыць, што пасля заканчэння аднаго тэрміну, іх перазатрымлівалі і зноў кідалі на «суткі».

Часам у камеру падсаджваюць «качак», якія супрацоўнічаюць з адміністрацыяй, кажа Кірыл.

«Таксама быў там "вагнеравец", беларус, якія ваяваў на баку Расіі ў "Вагнеры" [расійскае недзяржаўнае ўзброенае фармаванне, якое ўдзельнічае ў вайне супраць Украіны]. Ён увесь перабіты, паламаны быў. Ён там ударыў нейкага міліцыянта, а яго толькі па адміністрацыйнай справе затрымалі, не па крыміналцы. Ён быў у вайсковай форме з шаўронамі Расіі, са сцягамі гэтымі».

Вясна / Правы чалавека ў Беларусі

13 February 2025 13:46

У Оршы ў вышук абвясцілі мужчыну, старонку якога ў «Аднакласніках» раней прызналі «экстрэмісцкай»

Партрэт 49-гадовага Ігара Селіханава вывешаны на стэндзе «Увага, вышук». У абвестцы паведамляецца, што аршанец хаваецца ад следства і што супраць яго распачата крымінальная справа паводле ч. 1 арт. 369 КК (Абраза Лукашэнкі).

У жніўні 2024 году ў «Рэспубліканскі спіс экстрэмісцкіх матэрыялаў» уключылі старонку Ігара ў «Аднакласніках».

Апошняя актыўнасць Селіханава на сваёй старонцы ў «Аднакласніках» зафіксавана ў верасні 2022 году. Пазней, у іншых сацыяльных сетках, ён паведамляе пра сябе, што жыве ў Варшаве.

Крыніца: Віцебская Вясна

Вясна / Правы чалавека ў Беларусі

13 February 2025 12:05

❗️Былога мужа Крысціны Ціманоўскай, які знаходзіцца ў Беларусі, правяраюць на «экстрэмізм»

Пра гэта паведамляе Следчы камітэт.

«Паводле звестак следства, у лютым бягучага года ў сетцы Інтэрнет, у тым ліку ў сацыяльных сетках, з'явілася інфармацыя аб тым, што ў Беларусі знаходзіцца Арсеній Зданевіч, які, зыходзячы з тэкстаў публікацый, браў удзел у экстрэмісцкіх акцыях, накіраваных на дыскрэдытацыю Рэспублікі Беларусь і дзейнай улады, выкарыстоўваў адпаведную сімволіку, здзяйсняў дзеянні, накіраваныя на распальванне варожасці.

Карыстальнікі сеткі спасылаюцца на крыніцу ў асобе былой жонкі Зданевіча — удзельніцу аднаго з экстрэмісцкіх фармаванняў Крысціну Ціманоўскую, якая цяпер знаходзіцца за межамі Беларусі».

Вясна / Правы чалавека ў Беларусі

13 February 2025 11:04

📻Сёння — Сусветны дзень радыё. Менавіта 13 лютага 1946 года распачало працу Радыё Арганізацыі Аб'яднаных Нацый

Радыё ААН было заснавана для пашырэння і папулярызацыі ідэалаў Аб'яднаных Нацый: умацавання міру, павагі да правоў чалавека, забяспячэння роўнасці палоў, талерантнасці і непахіснасці міжнароднага права.

Нагадаем, «Вясна» у супрацы з Беларускім радыё Рацыя стварае Праваабарончую праграму «Вясна». Яна асвятляе падзеі, датычныя правоў чалавека. Спіс выпускаў можна знайсці на сайце 👉 https://spring96.org/be/viasna

Вясна / Правы чалавека ў Беларусі

13 February 2025 09:50

❗️72-гадовага Васіля Дземідовіча напрыканцы лютага будуць судзіць дзявяты раз

У судзе Смалявіцкага раёна 20 лютага будуць разглядаць ужо дзявятую крымінальную справу супраць пенсіянера. Гэтым разам яго абвінавачваюць паводле арт. 369 КК (абраза прадстаўніка ўлады). Справу будзе весці суддзя Аляксандр Казлоўскі.

Агулам Васіля асудзілі да сямі гадоў пазбаўлення волі, пры гэтым вынік апошніх трох судоў пакуль невядомы. У зняволенні Васіля Іванавіча ўтрымліваюць амаль тры гады.

Цяпер Дземідовіч адбывае тэрмін у івацэвіцкай калоніі № 22. У сувязі з тым, што палітзняволенага ўнеслі ў «спіс тэрарыстаў», яму нельга рабіць грашовыя пераводы. Адзначым, што за апошнія гады пенсіянер перажыў дзясяткі этапаў. Этапуюць палітвязняў у цяжкіх умовах — таму гэта пакідае вельмі дрэнны адбітак на здароўі Васіля.

(Не) апошняе слова Васіля Іванавіча на адным з судоў

Вясна / Правы чалавека ў Беларусі

13 February 2025 08:50

Жыхар Дзятлаўскага раёна сарваў чырвона-зялёны сцяг — распачата крымінальная справа

Як расказалі ў СК, паводле следства, днём 27 студзеня невядомы з фасада крамы вёскі Сачыўляны Дзятлаўскага раёна сарваў дзяржсцяг. Адсутнасць сімволікі заўважылі наведвальнікі гандлёвага аб'екта, аб чым і паведамілі прадаўцу.

На месцы здарэння працавала следча-аператыўная група. Пазней сілавікі затрымалі мужчыну, які нібыта гэта зрабіў — ім аказаўся 29-гадовы мясцовы жыхар.

🔹«Усход сонца над балотам»: у Беларусі за чырвона-зялёны сцяг асудзілі мінімум 211 чалавек

Вясна / Правы чалавека ў Беларусі

13 February 2025 07:46

Вызвалены ў Беларусі грамадзянін ЗША — не палітзняволены адвакат Юры Зянковіч

Пра гэта стала вядома праваабаронцам.

Таксама гэтую інфармацыю пацвердзіў супрацоўнік Дзярждэпа Крыс Сміт, які прыязджаў у Мінск весці перамовы аб вызваленні палітвязняў. Паводле яго, быў вызвалены грамадзянін ЗША, арыштаваны ў верасні 2024 года.

Нагадаем, учора стала вядома пра вызваленне журналіста Андрэя Кузнечыка, актывісткі Алены Маўшук і грамадзяніна ЗША, імя якога пакуль не раскрываецца.

Вясна / Правы чалавека ў Беларусі

12 February 2025 19:06

💔Вось як змянілася палітзняволеная Алена Маўшук за 4,5 гады за кратамі

Алена была затрыманая ўначы 10 жніўня 2020 году ў Пінску ў межах крымінальнай справы аб «масавых беспарадках». Са слоў міліцыянтаў, жанчына нібыта з палкай замахваліся на супрацоўнікаў міліцыі. Пазней яе асудзілі да 6 гадоў калоніі.

Яе мужа — Сяргея Маўшука — асудзілі на 6,5 гадоў калоніі ўзмоцненага рэжыма.

Сёння стала вядома пра вызваленне Алены — яна ўжо знаходзіцца ў Вільні. Фотаздымак жанчыны пасля вызвалення публікуе Франак Вячорка.

Вясна / Правы чалавека ў Беларусі

14 February 2025 13:16

🗣«Пасля размовы ў мяне пачаліся панічныя атакі». Як да школьнай настаўніцы прыйшоў на размову КДБ

Зімою 2024 года да Таццяны Крапіневіч на працу прыйшлі супрацоўнікі КДБ са спісам супрацоўнікаў, якіх планавалі апытваць.

«Кдбшнікі адразу загадалі паказаць ім тэлефон. Сказалі так: "Мы канешне вас не прымушаем, але можам да шасці месяцаў затрымаць да высвятлення абставінаў". Прымусілі адкрыць Instagram. У акаўнце на аватарцы маёй сваячкі, якая даўно з’ехала ў Амерыку, яны ўбачылі жоўта-блакітнае сэрца на знак салідарнасці з Украінай. Таксама прычапіліся да дзіцячых украінскіх груп у Instagram. Сказалі, што ў мяне не мусіць гэтага быць у сацсетках, і прымусілі адпісацца.

Да 2019 года мы ездзілі ва Украіну і ў мяне заставаліся адтуль некалькі кантактаў, з якімі я даўно не камунікавала. Праз гэта мяне пачалі абвінавачваць у працы на ўкраінскія спецслужбы, нібы мяне завербавалі. Пачалі пытаць, колькі мне плаціць СБУ».

Вясна / Правы чалавека ў Беларусі

14 February 2025 11:46

Палітзняволенага Кірыла Вавеля пачалі судзіць па новай крымінальнай справе

Мужчына працаваў на розных заводах і прадпрыемствах, якія займаюцца продажам прамысловага абсталявання. Таксама ў 2015 годзе ён заснаваў невялікую кампанію «Грыфком-вектар», якая прадавала камплектуючыя для канвеераў. Кірыл піша музыку і сцэнары для фільмаў. Ён таксама лічыцца ў рэестры нацыянальных праваўладальнікаў, піша «Наша Ніва»

У верасні 2024-га году яму прызначылі 3 гады калоніі за «заклікі да дзеянняў, скіраваных на прычыненне шкоды нацыянальнай бяспецы Рэспублікі Беларусь» (арт. 361 КК).

У Мінскім гарадскім судзе 14 лютага пачаўся новы суд над палітвязнем. Цяпер Вевелю інкрымінуецца ўдзел у «экстрэмісцкім фармаванні» (ч. 3 арт. 361-1 КК), а таксама «распальванне варожасці» (ч. 1 арт. 130 КК). Суддзя — Жанна Брысіна.

Вясна / Правы чалавека ў Беларусі

14 February 2025 10:45

❗️Аляксандра Францкевіча другі раз за год будуць судзіць за "непадпарадкаванне адміністрацыі калоніі"

У судзе Аршанскага раёна і г. Оршы 27 лютага над анархістам Аляксандрам Францкевічам адбудзецца другі запар суд паводле ч. 2 арт. 411 Крымінальнага кодэкса (злоснае непадпарадкаванне адміністрацыі калоніі). Паўгода таму Аляксандра ўжо асудзілі да года пазбаўлення волі па гэтым артыкуле. Цяпер яму зноў могуць дадаць тэрмін зняволення. Акрамя гэтага, палітвязня некалькі месяцаў утрымлівалі ў рэжыме інкамунікада. 

Падрабязнасці 👉 https://spring96.org/be/news/117434

Вясна / Правы чалавека ў Беларусі

14 February 2025 09:45

Былому вайскоўцу Дзмітрыю Пазнякову збіраюцца ўзмацніць пакаранне

Дзмітрый — ураджэнец Узбекістана. Служыў у 38-й асобнай гвардзейскай дэсантна-штурмавой брыгадзе, потым працаваў намеснікам каменданта ў Брэсцкай ваеннай камендатуры, а таксама выкладаў на вайсковым факультэце БДУ. Яго затрымалі 9 жніўня 2023 года. Паводле прапагандыстаў, Пазднякоў быў завербаваны польскімі спецслужбамі. У лістападзе 2023-га палітвязня асудзілі за «здраду дзяржаве» да 19 гадоў калоніі ва ўмовах узмоцненага рэжыму. Адбываць тэрмін яго адправілі ў наваполацкую калонію № 1.

Паводле інфармацыі «Вясны», у калоніі палітвязня катавалі з ужываннем электрашокера, прымушалі падпісваць дакументы і пустыя аркушы. Акрамя гэтага, яго неаднаразова адпраўлялі ў штрафны ізалятар (ШІЗА) і памяшканне камернага тыпу (ПКТ). Дома Дзмітрыя чакаюць жонка і двое дзяцей.

Сёння, 14 лютага, у Наваполацку адбудзецца суд па замене Дзмітрыю рэжыму на турэмны. Справу будзе разглядаць суддзя Таццяна Хрыпач.

Вясна / Правы чалавека ў Беларусі

14 February 2025 08:34

За «здраду дзяржаве» пачынаюць судзіць мытніка

У Мінскім гарадскім судзе 14 лютага за «здраду дзяржаве» пачынаюць судзіць 29-гадовага мытніка Віктара Вараб'ёва. Працэс будзе праходзіць у закрытым рэжыме пад старшынствам Сяргея Хрыпача.

Апроч ч. 1 арт. 356 КК, мужчыне таксама ставяць у віну «перавышэнне ўлады або службовых паўнамоцтваў» (ч. 1 арт. 426 КК), «садзейнічанне экстрэмісцкай дзейнасці» (ч. 1 арт. 361-4 КК), «удзел у экстрэмісцкім фармаванні» (ч. 3 арт. 361-1 КК), «арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх» (ч. 1 арт. 342 КК). Яму пагражае да 15 гадоў зняволення.

На старонцы Linkedin пазначана, што з 2018-га года Віктар працаваў старэйшым інжынерам сувязі на мытні. Верагодна, з гэтым і звязана крымінальная справа супраць мужчына за «перавышэнне ўлады або службовых паўнамоцтваў».

Чытаць па спасылцы 👉 https://spring96.org/be/news/117346

🗣Калі вам вядомая інфармацыя пра Віктара — калі ласка, паведамляйце праваабаронцам на @Viasnainfo

Вясна / Правы чалавека ў Беларусі

13 February 2025 16:35

🔗«Яны проста смяяліся». Як у зняволенні абыходзяцца з людзьмі з псіхічнымі разладамі

Людзі, якія жывуць з псіхічнымі разладамі ў беларускай пенітэнцыярнай сістэме, нярэдка становяцца аб’ектамі кпінаў, ізаляцыі і рэпрэсій, а не медыцынскай дапамогі. Іх могуць трымаць у ШІЗА, выкарыстоўваць як інструмент ціску на іншых зняволеных або проста ігнараваць.

Былыя палітвязні распавялі «Вясне» пра страшныя ўмовы, у якіх апынуліся тыя, хто меў патрэбу ў лячэнні і падтрымцы, але замест гэтага сутыкнуўся з жорсткасцю і абыякавасцю. А ўрач-псіхіятр Павел Перапёлкін, які раней працаваў у СІЗА, пракаментаваў пачутае.

«Гэтыя людзі былі для іх, як клоуны, яны проста смяяліся з іх і нічога не рабілі, не дапамагалі. У санчастцы таксама – там ніхто нікому не дапамагаў».

Вясна / Правы чалавека ў Беларусі

13 February 2025 15:45

Чарговае папаўненне Спіса экстрэмісцкіх матэрыялаў

У яго трапілі YouTube-канал «revolutionofconsciousens», а таксама Telegram-старонкі «ЗВЫЧАЙНЫЯ ЛЮД3I» і «Беларусь Выборы 2025 BY».

Вясна / Правы чалавека ў Беларусі

13 February 2025 14:15

Адміністратару пабліка «Падслухана Глыбокае» прызначылі 2 гады «хіміі»

У судзе Глыбоцкага раёна 7 лютага асудзілі Ігара Шкетава паводле ч. 1 арт. 342 (актыўны ўдзел у дзеяннях, што груба парушаюць грамадскі парадак) Крымінальнага кодэкса. Справу разглядаў суддзя Андрэй Тарасевіч.

Як паведаміў @bajmedia, Ігару прызначылі два гады абмежавання волі з накіраваннем у папраўчую ўстанову адкрытага тыпу («хіміі»).

Інфармацыйны паблік «Падслухана Глыбокае» папулярны сярод жыхароў раённага цэнтра. У сацсетцы «Укантакце» на яго падпісана больш за 26000 чалавек.

Чытаць па спасылцы 👉 https://spring96.org/be/news/117428

Вясна / Правы чалавека ў Беларусі

13 February 2025 13:03

📍Былую настаўніцу не прапусцілі ў фінал конкурсу «Настаўнік года» з-за подпісу за Бабарыку

Восенню 2023 года Таццяна Крапіневіч брала ўдзел у рэспубліканскім конкурсе «Настаўнік года». Але далей за фінал яе не прапусцілі, кажа суразмоўца. Яна звязвае гэта з выказваннем ёю грамадска-палітычнай пазіцыі.

«Я лічу, што гэта звязана з тым, што падчас прэзідэнцкіх выбараў я паставіла подпіс за альтэрнатыўнага кандытата Віктара Бабарыку. Такіх людзей у нас называюць "падпісант". Так, напрыклад, мяне называлі ў Мінскай раённай адміністрацыі. Да таго ж мая старэйшая дачка вучыцца ў Нямеччыне. Мяркую, гэта таксама была адна з прычынаў».

Вясна / Правы чалавека ў Беларусі

13 February 2025 11:33

❗️«Іх маглі абліць вядром вады, а потым ударыць электрашокерам». Гісторыі былых палітычных арыштантаў

У беларускіх ізалятарах ужо пяты гад запар затрыманых паводле палітычных матываў утрымліваюць у жахлівых умовах утрымання, якія можна расцэньваць, як катаванні. Рэжым Лукашэнкі стварае горшыя ўмовы для арыштантаў не толькі ў Мінску, але ў рэгіёнах. Дзясяткі людзей штодзённа пакутуюць ад холаду ў бетонных камерах, ад алергіі на ўкусы клапоў, ад здзекаў падчас праверак.

«Вясна» паразмаўляла з чатырма беларусамі, асуджанымі па адміністрацыйных справах напрыканцы 2024-га — напачатку 2025-га, і распытала ў іх пра ўмовы ўтрымання для «палітычных» у розных гарадах Беларусі.

Яны распавялі, як прымушаюць прысядаць голым падчас праверак, як робяць уколы праз кармушкі, як катуюць холадам у камерах РУУСа, пра беларуса-«вагнераўца» на Акрэсціна і пра тое, якія сродкі катаванняў выкарыстоўваюць у КДБ і ГУБАЗіКу.

Чытаць па спасылцы 👉 https://spring96.org/be/news/117425

Вясна / Правы чалавека ў Беларусі

13 February 2025 10:15

🕊Білі дубінкамі, ставілі на расцяжку, цкавалі сабакамі: як катавалі за намер удзельнічаць у антываенным мітынгу

Пасля памятных падзеяў 2020 года, калі тысячы беларусаў упершыню прайшлі праз затрыманні, арышты і рэпрэсіі з боку сілавых структур, жыхару Мінска Канстанціну (прозвішча ў мэтах бяспекі не публікуецца) нейкі час шанцавала — на той час яго мінуў гэты жахлівы досвед.

Але 27 лютага 2022 года, у дзень рэферэндума, ён сабраўся на антываенны мітынг супраць расійскага ўварвання ва Ўкраіну. З гэтай даты ў ягоным жыцці ўсё змянілася кардынальна. Канстанцін пагадзіўся распавесці «Вясне» пра свае ўражанні і перажаванні, якія і дагэтуль пакідаюць прыкметны адбітак на ягонае жыццё.

«Супрацоўніца ў Першамайскім РУУСе крычала на нас за тое, што мы выйшлі супраць вайны, што кожнага б сама вывела на двор і застрэліла ўласнаручна».

Вясна / Правы чалавека ў Беларусі

13 February 2025 09:05

🇺🇸Дзярждэп ЗША заклікаў вызваліць усіх палітвязняў у Беларусі

У Злучаных Штатах віталі вызваленне дваіх палітычных зняволеных у Беларусі. Інфармацыйнае паведамленне дзяржаўнага сакратара Марка Рубіё Дзяржаўны дэпартамэнт ЗША апублікаваў на сваім сайце:

«Моцнае кіраванне прэзідэнта Трампа прывяло да вызвалення амэрыканца, несправядліва затрыманага ў Беларусі, і дваіх палітычных зняволеных. Я хачу асабліва падзякаваць ураду Літвы за супрацоўніцтва і дапамогу — яны застаюцца сапраўдным хаўруснікам і сябрам. Я таксама хачу падзякаваць сваёй камандзе ў консульскіх справах, офісу спецыяльнага ўпаўнаважанага прэзідэнта ў справах закладнікаў і Бюро ў справах Эўропы і Эўразіі за ўсю цяжкую працу, якая была праведзена для забеспячэньня гэтых вызваленняў.

Мы па-ранейшаму адданыя справе вызвалення іншых грамадзян ЗША ў Беларусі і ў іншых месцах. Мы заклікаем вызваліць амаль 1300 палітвязняў, якія застаюцца ў турмах па ўсёй Беларусі».

Вясна / Правы чалавека ў Беларусі

13 February 2025 08:15

У Лепелі мужчыну асудзілі да 1,5 года «хатняй хіміі» за сарваны дзяржаўны сцяг

У судзе Лепельскага раёна паводле арт. 370 КК (здзек з дзяржаўных сімвалаў) да аднаго года і шасці месяцаў абмежававання волі без накіравання ва ўстанову адкрытага тыпу («хатняй хіміі») 41-гадовага Аляксея Маладыка. Прысуд вынес Міхаіл Юрчанка.

Мясцовая раёнка распавяла дэталі абвінавачвання. Знаходзячыся ў Лепелі і будучы на падпітку, як сцвярджае газета, мужчына навідавоку ў людзей падскочыў і вырваў рукамі прымацаванае на сцяне адміністрацыйнага будынка драўлянае дрэўка з дзяржсцягам. Пры гэтым ён сарваў кранштэйн з месца яго мацавання і пашкодзіў дрэўка, пасля чаго сцяг з дрэўкам аднёс на вуліцу Валадарскага ў Лепелі, дзе пакінуў на вуліцы і ўцёк.

Агулам у Беларусі паводле артыкула 370 КК (здзек з дзяржаўных сімвалаў) асудзілі мінімум 215 чалавек.

Чытаць па спасылцы 👉 https://spring96.org/be/news/117417

Вясна / Правы чалавека ў Беларусі

12 February 2025 19:11

Палітзняволены журналіст Свабоды Андрэй Кузнечык упершыню за доўгі час змог абняць родных

47-гадовы Андрэй Кузнечык, які правёў за кратамі больш за тры гады, сёння прыбыў у Вільню. Яго сустракалі жонка Алеся і дзеці — 5-гадовы Мацвей і 11-гадовая Яніна.

Відэа: @radiosvaboda

Вясна / Правы чалавека ў Беларусі

12 February 2025 17:59

⚡️Палітзняволеныя Андрэй Кузнечык і Алена Маўшук выйшлі на волю

Пра гэта паведамляе @tsikhanouskaya.

«Цудоўныя навіны. Сёння мы сустракаем на волі трох закладнікаў рэжыму – журналіста Андрэя Кузнечыка, актывістку Алену Маўшук і грамадзяніна ЗША, імя якога пакуль не раскрываецца. 

Мне паведамілі, што ўсе трое ўжо ў бяспецы, у Вільні. Ім дапамагаюць прадстаўнікі амерыканскай амбасады, а Алену Маўшук прадстаўнікі Офіса і Кабінета ўжо вязуць у бяспечнае месца, дзе яна атрымае ўсю неабходную падтрымку.

Я вельмі ўдзячная Прэзідэнту Трампу, дзяржсакратару Рубіа і дзярждэпартаменту ЗША за супольныя намаганні, якія зрабілі гэта магчымым. 

Радая, што зняволеныя зноў змогуць пабачыць сем’і і блізкіх пасля доўгіх дзён за кратамі. Нарэшце кожны абдыме сваіх родных. Мы будзем змагацца за вызваленне кожнага!».