Вясна / Правы чалавека ў Беларусі

20 June 2025 14:33

«Ты цяпер тут і застанешся». Як былога палітвязня сілавікі дапытвалі ў лесе

«Мы выехалі з майго двара і паехалі ў процілеглы бок ад міліцыі. Я кажу: "Куды мы едзем?" Адзін з супрацоўнікаў, што сядзеў на пярэднім сядзенні, сказаў, што я зараз там і даведаюся. Я бачу, як мы збочваем у лес за пілараму. Я спытаў, чаго мы сюды прыехалі, а ён мне: "Ты цяпер тут і застанешся"».

«Я разумеў, што супраціўляцца нельга, таму што рэальна прастрэляць ногі — скажуць, што бег. І я стаю, быццам мяне толькі што памыямі аблілі. Разумею, што не магу даць здачы і кажу: "Гэта я дазваляю табе сябе біць". Тут з другога боку мне зноў прылятае са словам "не п*здзі". Потым яшчэ некалькі разоў далі, і па носе. Я нават не думаў, што ён будзе зламаны, цяпер толькі адна наздра дыхае. Нос тады быў падпухлым, невялікія ранкі».

Вясна / Правы чалавека ў Беларусі

20 June 2025 12:50

Начальнік магілёўскай калоніі Аляксей Лазарэнка, які здзекваўся з палітвязняў, ідзе на пенсію

У кастрычніку 2024 года менавіта ў магілёўскай калоніі загінуў 22-гадовы палітвязень Дзмітрый Шлетгаўэр. Вось што пра Лазарэнку распавядалі вязні:

🔹«З шалёным начальнікам калоніі — гэта Лазарэнка, які лічыў сваім абавязкам здзекавацца і палохаць. Калі ён крычаў, у яго вачах была асалода. Маё прыбыццё адразу ж туды было такім: я, нават не патрапіўшы на каранцін, ужо трапіў у ШІЗА на 10 сутак»;

🔹«Начальнік турмы Лазарэнка адразу ўбачыў што ў справе ёсць фотка, дзе я стаю са сцягам “Народнай Грамады” і запытаўся што гэта за сцяг? Адказваю яму, што гэта партыя Статкевіча. Тады ён усхваляваўся, стаў казаць, што са Статкевічам у яго даўні рахунак, маўляў у 2010 годзе ён са сваёй “шалёнай” жонкай дастаў яго сваімі скаргамі так, што ледзьве не страціў працу»;

🔹«Начальнік калоніі казаў Уладзіславу, што той "пайшоў супраць бацькі і здрадзіў радзіме", і пазбавіў яго перадачы. А на трэція суткі адправіў хлопца ў ШІЗА».

Вясна / Правы чалавека ў Беларусі

20 June 2025 11:45

У «Спіс экстрэмістаў» дадалі яшчэ 27 прозвішчаў — цяпер у ім 5434 чалавекі

20 чэрвеня МУС зрабіла традыцыйны пятнічны апдэйт «Пераліка грамадзян Беларусі, замежных грамадзян або асоб без грамадзянства, якія маюць дачыненне да экстрэмісцкай дзейнасці».

Сярод іншых, у спіс дадалі затрыманага пасля вяртання з Польшчы Васіля Арэшку і былога палітвязня Ігара Неміровіча.

Да допіса далучаны апошні «Пералік грамадзян, якія маюць дачыненне да экстрэмісцкай дзейнасці».

⁉️«Мама, я экстрэміст». Якія абмежаванні накладаюцца на асоб, уключаных у «Спіс экстрэмістаў»

Вясна / Правы чалавека ў Беларусі

20 June 2025 10:32

Былога міліцыянера асудзілі за распальванне варожасці і назвалі «тэрарыстам»

Аляксандру Мазурыну 44 гады. Ён адвучыўся ў Акадэміі МУС і пайшоў працаваць у міліцыю. Даслужыўся да дзяжурнага інспектара ГУУС Мінгарвыканкама і звання капітана. У 2012-м быў звольнены з міліцыі.

У 2013-м Мазурын уладкаваўся начальнікам аддзела аховы ў дрэваапрацоўчае прадпрыемства «Інтэрдорс». На прадпрыемстве працуе больш за 150 чалавек. Таксама Аляксандр мае статус ІП, сфера дзейнасці якога — распрацоўка праграмнага забеспячэння і кансультаванне ў гэтай галіне, піша «Наша Ніва».

Мазурына асудзілі па абвінавачанні ў распальванні варожасці (артыкул 130 КК). 16 чэрвеня яго дадалі ў спіс «тэрарыстаў», які робіць КДБ. Сутнасць абвінавачання, як і прысуд невядомыя.

🔹Cупрацоўніца банка, шматдзетны бацька: хто трапіў у абноўлены «спіс тэрарыстаў»

Вясна / Правы чалавека ў Беларусі

20 June 2025 09:05

📝Нобелеўскі камітэт з вялікай занепакоенасцю сочыць за сітуацыяй з Алесем Бяляцкім і палітвязнямі ў Беларусі

У сваім лісце Павел Латушка звярнуўся з просьбай разгледзець магчымасць больш шырокай і паслядоўнай публічнай падтрымкі вызвалення лаўрэата Нобелеўскай прэміі міру і кіраўніка «Вясны» Алеся Бяляцкага, а таксама ўсіх палітычных зняволеных у Беларусі.

У сваім адказе Нарвежскі Нобелеўскі камітэт адзначыў, што просьба Латушкі «будзе перададзена для звароту ўвагі Камітэта падчас наступнага пасяджэння», піша @latushka.

І хаця Нобелеўскі камітэт адзначыў, што вельмі рэдка выказвае сваё меркаванне, але ў тых нешматлікіх выпадках, калі гэта адбываецца, увага засяроджана на сітуацыі лаўрэата Нобелеўскай прэміі міру Алеся Бяляцкага.

Нобелеўскі камітэт падкрэсліў, што «старшыня, а таксама члены Камітэта з вялікай занепакоенасцю сочаць за сітуацыяй у Беларусі».

Вясна / Правы чалавека ў Беларусі

19 June 2025 17:04

Віцебскі палітзняволены арт-менеджар Уладзімір Булаўскі з'ехаў з Беларусі і знаходзіцца ў бяспецы

Уладзіміру прызначылі 2 гады зняволення паводле арт. 342-2 КК (Неаднаразовае парушэнне парадку арганізацыі або правядзення масавых мерапрыемстваў). Ён іх цалкам адбыў і выйшаў на волю ў лістападзе 2024-га году.

Вядома, што падчас знаходжання ў СІЗА-2 у мужчыны памёр бацька, але адміністрацыя не адпусціла Уладзіміра на пахаванне.

Цяпер Уладзімір легалізуецца ў Польшчы. Ён збіраецца вучыцца па спецыяльнасці «Гісторыя і культурная спадчына», працягваючы свой віцебскі прафесійны кірунак, піша «Наша Ніва».

Вясна / Правы чалавека ў Беларусі

19 June 2025 15:57

❗️«Будзеш дзёргацца — страляць будзем». Гісторыя Дзмітрыя Сушчыка, экстрадаванага з Расіі

Былы палітвязень Дзмітрый Сушчык ужо месяц знаходзіцца ў Варшаве. У Беларусі жыхар Навагрудка правёў у зняволенні амаль 2,5 года. За гэты час ён перажыў сыход жонкі і смерць мамы. Большую частку свайго тэрміну мужчына правёў у штрафных ізалятарах за адмову падпарадкоўвацца рэжыму ў турмах і калоніі. Пасля заканчэння першага тэрміну мужчыну не вызвалілі, а перавялі пад следства ў межах новай крымінальнай справы. Пра новы артыкул ён даведаўся праз два дні пасля навіны пра смерць маці.

Дзмітрый распавёў «Вясне» пра допыт у лесе, уцёкі з расійскай турмы і экстрадыцыю ў Беларусь, дзікі холад у ШІЗА, пра зносіны з Алесем Пушкіным і пра складанасці, з якімі мужчына сутыкнуўся пасля вызвалення.

«На мяне апранаюць кайданкі, садзяць у машыну і разбіваюць аб машыну брыво».

Вясна / Правы чалавека ў Беларусі

19 June 2025 13:20

Палітзняволенага Максіма Урбановіча пачнуць судзіць на наступным тыдні

Справу супраць Максіма Урбановіча, малодшага брата беларускага добраахвотніка Дзяніса Урбановіча, пачнуць разглядаць 27 чэрвеня ў судзе Заводскага раёну Мінска.

Як паведамляе «Белсат», Максіма абвінавачваюць паводле «народнага» артыкулу 342 Крымінальнага кодэксу (арганізацыя або ўдзел у дзеяннях, якія парушаюць грамадскі парадак).

У справе яшчэ некалькі артыкулаў, але якія менавіта, пакуль не вядома. Сваякі не маюць канкрэтнай інфармацыі, а Максімаў брат больш за два гады не мае з ім стасункаў.

2 красавіка ў кватэру, што арандаваў Максім, уварваліся сілавікі. Пасля ператрусу яго адвезлі на допыт у КДБ. Спачатку хлопца трымалі ў СІЗА КДБ, а потым перавезлі ў СІЗА № 1, што ў Калядзічах.

Вясна / Правы чалавека ў Беларусі

19 June 2025 11:45

«Мы не заклікалі ні да якіх забастовак»: кіраўнік незалежнага прафсаюза пра сваё зняволенне

Лідар незалежнага прафсаюза Дзяніс (імя зменена) працаваў інжынерам у адным з буйных беларускіх прадпрыемстваў. Летам 2023 года яго разам з прафсаюзнымі паплечнікамі затрымалі і абвінавацілі ў «закліках да забастовак». Прафсаюзнік правёў паўгода ў адным з беларускіх СІЗА і вызваліўся з траўмаванай псіхікай. У камеры ізалятара ён пабіў суседа, а падчас начных праверак на волі думаў, як прыдушыць даішніка.

Дзяніс распавёў «Вясне», як пасля затрымання ў бусе сілавікі яго катавалі, а пасля КДБ схіляў да супрацы, пра радыё «Суіцыд» і турэмныя метады «перавыхавання», пра дзёрзскія размовы з прадольнымі, за якія ён патрапіў у карцар, а таксама пра цяжкасці з адаптацыяй на волі.

«Я заўсёды разумеў, што мяне таксама могуць затрымаць, але вырашыў, што бегаць я не буду. Хтосьці ж мусіць застацца. Напэўна, я патрыёт ці дурак, не ведаю».

Вясна / Правы чалавека ў Беларусі

19 June 2025 10:00

📝Нагадваем кантакты Праваабарончага цэнтру «Вясна»

🔹Паведаміць пра затрыманне, даслаць інфармацыю з судовых пасяджэнняў: Telegram-бот @viasna_bot | @ViasnaSOS, @SOSViasna;
🔹Звярнуцца па дапамогу па юрыдычных пытаннях, абскардзіць дзеянні дзяржаўных органаў: @zvarot96 | zvarot@spring96.org;
🔹Калі вы пацярпелі ад катаванняў з боку сілавікоў ці сутыкнуліся з жорсткім абыходжаннем за кратамі: @ViasnaDOC | viasnadoc@spring96.org;
🔹Распавесці сваю гісторыю журналістам «Вясны»: @Viasnainfo | viasna@spring96.org.

📍Кантакты рэгіянальных прадстаўніцтваў «Вясны»: Бабруйск — @babrujskspring; Барысаў — @Spring_help_r; Брэст — @Nadbuzanski, @BrestSOS; Гомель — @homelspring; Магілёў — @maydayhelp, @mspring_help; Маладэчна — @Maladecza_help; Наваполацк — @impaynes; Віцебск — @Viciebsk_spring; Светлагорск — @svietlahorskspring

❗️Афіцыйныя кантакты ПЦ «Вясна» можна паглядзець у апісанні @viasna96 ці на старонцы «Кантакты» на spring96.org

⁉️«Вясну» прызналі «экстрэмісцкім фармаваннем»: як цяпер супрацоўнічаць з намі?

Вясна / Правы чалавека ў Беларусі

18 June 2025 17:05

🔗Паведамляйце праваабаронцам пра затрыманні па «справе Гаюна»

Паводле звестак «Вясны», апошнія месяцы ў Беларусі працягваюцца затрыманні ў межах крымінальнай справы за перадачу інфармацыі «Беларускаму Гаюну». Як паведамлялі былыя вязні Акрэсціна, затрыманні адбываюцца ў межах арт. 361-4 Крымінальнага кодэкса (садзейнічанне экстрэмісцкай дзейнасці). Большасць затрыманых — мужчыны.

Паводле інфармацыі «Вясны», у бліжэйшы час ужо распачнуцца першыя судовыя працэсы па гэтай справе.

Праваабаронцам вядома пра як мінімум 23 пацверджаных(!) фігурантаў «справы Гаюна», якіх змясцілі пад варту. Агульная ж лічба затрыманых значна больш.

🔹Затрыманыя пераведзены ў СІЗА за «садзейнічанне экстрэмізму»: што вядома пра «справу Гаюна»

🌿Калі вашых блізкіх затрымалі па гэтай справе, паведаміце, калі ласка, праваабаронцам праз тэлеграм @Viasnainfo

Вясна / Правы чалавека ў Беларусі

18 June 2025 13:45

🗣Калі вы знаходзіцеся ў бяспецы — распавядзіце пра палітычны пераслед, з якім сутыкнуліся вы ці вашыя блізкія ў Беларусі

Калі вас арыштоўвалі, судзілі па палітычных матывах, калі вашых блізкіх ці сяброў звальнялі, прымушалі «каяцца» на камеру, калі вы былі вымушаныя бегчы з краіны праз страх — гэта важна.

• Нават калі вы цяпер у бяспечнай краіне — ваш голас мае значэнне.
• Нават калі прайшлі месяцы ці гады — ваша гісторыя важная.
• Нават калі здаецца, што нічога не змяніць — ваша праўда будуе сведчанні супраць беззаконня.

❗️Па вашым жаданні, інфармацыя, якую вы дашлеце, не будзе нідзе апублікаваная і будзе выкарыстоўвацца толькі для статыстыкі. Мы не патрабуем ад вас асабістай ці ўразлівай інфармацыі — паведамляйце толькі тое, што лічыце важным і бяспечным для сябе і для людзей у Беларусі.

Кожная гісторыя — гэта кавалачак вялікай карціны таго, што адбываецца ў Беларусі.

@ViasnaSOS | @SOSViasna | @Viasnainfo

Вясна / Правы чалавека ў Беларусі

18 June 2025 11:50

Знакамітую мінскую «Валадарку», праз якую прайшлі тысячы палітвязняў, перабудуюць у гістарычную славутасць

Пішчалаўскаму замку сёлета спаўняецца 200 гадоў. Паведамляецца, што ў планах на юбілей — рэканструяваць былое СІЗА ў частку экскурсійнага маршруту па гістарычным цэнтры сталіцы. Комплекс зробяць больш адкрытым, там з'явіцца плошча для мерапрыемстваў, канцэртаў, гістарычных рэканструкцый, прагулачныя зоны і паркоўка.

У будынках размесцяць месцы для харчавання, адміністрацыйныя памяшканні ад розных арганізацый.

Магчыма, будаўніцтва пачнуць ужо сёлета.

Вясна / Правы чалавека ў Беларусі

18 June 2025 10:33

📝«Тыдзень супраць катаванняў»: анонс мерапрыемстваў

З 23 па 29 чэрвеня каманда Прававой ініцыятывы і Міжнароднага камітэта па расследаванні катаванняў у Беларусі сёмы раз праводзіць кампанію «Тыдзень супраць катаванняў», прымеркаваны да Міжнароднага дня ААН у падтрымку ахвяр катаванняў.

Сумесна з партнёрамі арганізатары падрыхтавалі цыкл мерапрыемстваў анлайн і афлайн (Варшава/Вільня). Яны запрашаюць далучыцца да іх, каб як мага больш людзей ведала і памятала пра тое, што ў Беларусі адбываецца сістэмны гвалт і што гэта прамое парушэнне правоў чалавека.

Анонс мерапрыемстваў 👉 https://spring96.org/be/news/118144

*Увага: праграма абнаўляецца

Вясна / Правы чалавека ў Беларусі

18 June 2025 09:03

💔Палітзняволеныя Віктар і Эдуард Бабарыка роўна пяць гадоў утрымліваюцца за кратамі

Экс-кіраўнік Белгазпрамбанка і былы кандыдат на пасаду прэзідэнта Беларусі Віктар Бабарыка быў затрыманы 18 чэрвеня 2020 года разам з сынам Эдуардам, калі накіроўваўся ў ЦВК для здачы сабраных подпісаў.

Віктара прызналі вінаватым паводле двух крымінальных артыкулаў і асудзілі да 14 гадоў калоніі. У ноч з 24 на 25 красавіка 2023 года Бабарыку ў стане сярэдняй цяжкасці даставілі ў аддзяленне хірургіі наваполацкага шпіталю: у яго была вадкасць у лёгкіх.

Эдуарда ў ліпені 2023 года асудзілі да 8 гадоў зняволенні. Пры гэтым у тэрмін не залічылі час утрымання ў СІЗА КДБ па першапачатковаму абвінавачванню — паўтара года. У мінулым ліпені яму дадалі яшчэ 2 гады зняволення за «злоснае непадпарадкаванне». У лютым палітвязня асудзілі яшчэ раз паводле ч. 2 арт. 411 КК, але вынік справы невядомы.

🔹Пяць гадоў за кратамі: гісторыі палітвязняў, з якіх пачаліся масавыя рэпрэсіі ў Беларусі

Вясна / Правы чалавека ў Беларусі

20 June 2025 13:30

🧳Ад Канвецый да чалавечых лёсаў. Сусветны дзень уцекачоў адзначаецца 20 чэрвеня

20 чэрвеня — Сусветны дзень уцекачоў (Word Refugee Day). Гэты дзень накіраваны на тое, каб прызнаць сілу бежанцаў, якія ўцяклі ад канфлікту і пераследу сваёй краіны ў надзеі знайсці прытулак і лепшую долю.

Як фармаваліся правы уцекачоў і якія гісторыі тых, хто вымушаны быў пакінуць свой дом? «Вясна» паразмаўляла з праваабаронцай з Human Constanta Энірай Браніцкай, двойчы ўцекачом Севай ды падарожнікам Аляксандрам Гойшыкам.

«Хлопец, які прымаў мяне па каўчсёрфінгу ў Куска — галоўным гістарычным горадзе Перу — ён адразу мне напісаў: "Што ты думаеш пра Лукашэнку?" І я сказаў, што ненавіджу гэтую сістэму, таму што гэта таксама вялікія сябры Чавеса былі, і я ездзіў у Венесуэлу паглядзець сумную будучыню Беларусі. І ён адразу ж, літаральна праз некалькі секунд, мне напісаў: "Я запрашаю цябе, я буду вельмі чакаць, будзе вельмі прыемна з табой пазнаёміцца"».

Вясна / Правы чалавека ў Беларусі

20 June 2025 12:15

📸«Буду паказваць сваім дзецям, каб ведалі, якім коштам даецца свабода»

«Вясна» працягвае збіраць фотаздымкі палітвязняў з месцаў няволі і дакументаваць сведчанні пра працэс фотаздымкі, пачуцці і эмоцыі палітвязняў пра яе. Былы палітвязень Ілля Бохан, які за ўдзел у акцыі пратэсту ў Пінску быў асуджаны на 3,5 года калоніі, падзяліўся з праектам «Магшоты палітвязняў» фотаздымкам са спраўкі аб вызваленні і распавёў пра тое, што ён значыць для яго:

«Гэты фотаздымак цяжкі, але важны напамін пра час, калі я быў палітвязнем. Гэта частка не толькі маёй асабістай гісторыі, але і гісторыі ўсёй краіны. Я буду захоўваць яе заўсёды. Калі Беларусь стане свабоднай ад дыктатуры, я вярнуся дадому і буду паказваць фатаграфію сваім дзецям, каб яны ведалі, якім коштам даецца свабода і чаму яе трэба берагчы».

Вясна / Правы чалавека ў Беларусі

20 June 2025 11:15

«Амапаўцы не краналі, білі кдбшнікі». Як затрымлівалі прафсаюзнага актывіста

Па дарозе кдбшнікі пагражалі мужчыну: «Пі*да табе. Сядзеш надоўга». Сілавікі спрабавалі ціснуць на мужчыну псіхалагічна, суправаджаючы гэта ўдарамі рукамі па галаве. Усю дарогу, пакуль прафсаюзніка везлі ў СІЗА, ён стаяў у бусе на каленях з рукамі ў кайданках за спінаю.

«Казалі,што да допыта ў КДБ я не даеду. За кожны мой “няправільны” адказ на пытанне мяне білі па галаве. Дарэчы, самі амапаўцы мяне не краналі, сядзелі спакойна.

Калі мяне прывезлі ў КДБ, яны адкрываюць дзверы, і я адразу атрымліваю ў лоб. Пасля мяне пасадзілі ў крэсла і працягвалі біць па патыліцы. Гэта ўсё рабілі кдбшные апяра».

Вясна / Правы чалавека ў Беларусі

20 June 2025 09:45

Жыхар Мастоўскага раёну чытаў «экстрэмісцкія» рэсурсы — яго звольнілі з працы і аштрафавалі

Пра гэта адсправаздачыліся гродзенскія прапагандысты. Паводле іх, у Беларусі працягваюць здзяйсняцца «злачынствы экстрэмісцкага і тэрарыстычнага характару».

Яны прывялі ў прыклад гісторыю з Мастоўскага раёну:

«Устаноўлены мужчына ў Мастоўскім раёне, які на працягу некалькіх гадоў з'яўляўся актыўным спажыўцом і карыстальнікам чатырох дэструктыўных інтэрнет-рэсурсаў.

Нажаль, у яго апраўданне сказаць няма чаго. Казаць у 2025 годзе аб тым, што паддаўся на маніпуляцыі экстрэмісцкіх тэлеграм-каналаў, наіўна і недарэчна. Чалавек даўно выйшаў з узросту "яны ж дзеці", адукаваны, меў важкі сацыяльны статус. Ён добра разумеў, што робіць.

У выніку яго чакае страта добрай працы і буйны штраф».

Вясна / Правы чалавека ў Беларусі

19 June 2025 17:30

🌿«Правы чалавека парушаюцца, пакуль мы застаемся бязмоўнымі». У Варшаве адкрылася арт-інсталяцыя, прысвечаная палітзняволеным вясноўцам

У цэнтры Варшавы 17 чэрвеня пачала дзейнічаць арт-інсталяцыя «Нязломныя», прысвечаная палітзняволеным праваабаронцам «Вясны» Валянціну Стэфановічу, Алесю Бяляцкаму, Уладзю Лабковічу. Упершыню інсталяцыя адбываецца без партрэту Андрэя Чапюка — 18 красавіка ён выйшаў на волю.

«Вясна» спытала ў актывісткі Amnesty International Poland Яанны Растоўскай пра салідарнасць з палітвязнямі Беларусі, крызіс правоў чалавека ў нашай краіне і запланаваныя акцыі ў падтрымку беларусаў. А праваабаронца «Вясны» Марына Кастылянчанка пракаментавала адкрыццё інсталяцыі і адзначыла, што важна, каб як мага больш людзей даведалася пра лёс нашых калегаў.

Чытаць па спасылцы 👉 https://spring96.org/be/news/118155

📍Наведаць інсталяцыю можна да 7 ліпеня ў Кракаўскім прадмесці каля помніка Мікалаю Каперніку (Krakowskie Przedmieście, Pomnik Mikołaja Kopernika).

Вясна / Правы чалавека ў Беларусі

19 June 2025 16:30

«Не вытрымаў і ударыў чалавека». Як у СІЗА хутка псуецца псіхічнае здароўе

«Аднойчы я нават ударыў аднаго неахайнага зэка. Асобная "забава" у СІЗА – да палітычных у камеру падсажваюць "засранцаў" у прамым сэнсе, якія ўвесь час ходзяць пад сябе і не мыюцца. Нам якраз патрапіўся такі чалавек – алкаголік, які раней ужо сядзець за “цяжкія цялесныя”. Ён пырнуў нажом суседа па п’янцы. Спачатку я даў яму свой пральны парашок, ён неяк пачысціў сваё адзенне. Але хадзіць у баню і мыцца ён адмовіўся. Нібы баяўся там прастудзіцца. Пры гэтым ён вельмі агрэсіўна сябе паводзіў і моцна смярдзеў.

За паўгода я таксама стаў да чысціні ставіцца максімальна строга. А тут з’явіўся такі задрыпа, які зусім не рэагуе на нашыя ўгаворванні. У выніку я не вытрымаў і ўдарыў чалавека, даў яму па мордзе. Гэта паўплывала і той чалавек адразу памыўся. Праз дзень хтосьці, відаць, данёс пра гэты выпадак і мяне перакінулі ў іншую хату».

Вясна / Правы чалавека ў Беларусі

19 June 2025 15:16

⁉️За подпіс пад петыцыяй пагражае крымінальная адказнасць? Petitions.bу прызналі «экстрэмісцкім фармаваннем»

Рэжым Лукашэнкі працягвае наступ на грамадзянскую актыўнасць: чарговым «ворагам дзяржавы» стала платформа, якая доўгі час заставалася адным з нешматлікіх інструментаў калектыўнага выказвання. 18 чэрвеня Міністэрства ўнутраных справаў прызнала праект Petitions.bу «экстрэмісцкім фармаваннем». Паводле ведамства, дачыненне да праекту мае Уладзімір Кавалкін.

Юрыстка «Вясны» Вікторыя Рудзянкова каментуе сітуацыю і ацэньвае рызыку пераследу падпісантаў петыцый.

«Пры наяўнасці палітычнай волі, улады могуць палічыць, што подпіс з'яўляецца "формай удзелу" ў дзейнасці фармавання. Ужо хапае выпадкаў, калі людзей прыцягвалі да адказнасці за дзеянні, якія адбыліся да прызнання ініцыятывы экстрэмісцкай — напрыклад, за падпіску, каментар або лайк».

Вясна / Правы чалавека ў Беларусі

19 June 2025 12:36

❗️Праект «Petitions.bу» прызнаны «экстрэмісцкім фармаваннем»

Адпаведнае рашэнне было прынятае МУС 18 чэрвеня. Паводле ведамства, дачыненне да праекту мае Уладзімір Кавалкін.

Таксама ў спіс «экстрэмісцкіх фармаванняў» дадалі праект «Adu.plасе» — паводле КДБ, дачыненне да яго маюць Дар'я Рублеўская, Кацярына Буніна, Ганна Комлач і Вера Моніна.

Акрамя таго, КДБ абнавіў датычных да «экстрэмісцкага фармавання» «Честные люди» — у спіс дадалі Алену Жылачкіну (Жываглод), Зарыну Сарокіну (Жываглод), Цімафея Малахоўскага, Алега Давыдчыка.

Вясна / Правы чалавека ў Беларусі

19 June 2025 11:02

✊ Падтрымайце «Вясну» на Patreon альбо аднаразовым данатам

На сёння за кратамі знаходзіцца чацвёра праваабаронцаў «Вясны» — іх асудзілі да пазбаўлення волі толькі за тое, што яны абаранялі правы беларусаў. Нягледзячы на гэта, праваабаронцы і валанцёры «Вясны» працягваюць сваю працу па абароне і фіксацыі парушэнняў правоў чалавека ў Беларусі.

Акрамя магчымасці падтрымаць «Вясну» падпіскай на Patreon, ёсць магчымасць зрабіць і аднаразовы данат праваабаронцам.

Усе сабраныя ахвяраванні будуць накіраваныя на падтрымку дзейнасці арганізацыі, а таксама палітзняволеных вясноўцаў.

❗️Калі ласка, рабіце пераводы толькі, калі для вас гэта бяспечна. Мы настойліва просім не рабіць пераводаў з картак беларускіх ці расійскіх банкаў

💵Падтрымаць «Вясну» аданаразовым данатам
💶Падтрымаць Вясну на Patreon
⁉️«Вясну» прызналі «экстрэмісцкім фармаваннем»: як цяпер супрацоўнічаць з намі?

Вясна / Правы чалавека ў Беларусі

19 June 2025 09:03

Шматдзетную маці, якая працавала ў банку і вяла блог, асудзілі па палітычнай справе і прызналі тэрарысткай

Ганне Папай 45 гадоў. Родам яна са Жлобіна. Скончыла Мінскі дзяржаўны лінгвістычны ўніверсітэт і з таго часу жыве ў Мінску. Доўгі час жанчына працавала ў банкаўскай сферы — у аддзелах па абслугоўванні кліентаў.

Ганна любіць выпякаць, а таксама вядзе тыкток-канал, дзе распавядае пра тое, як лепш узяць крэдыт на кватэру, як абраць добрае жытло. У Ганны трое дзяцей — два непаўналетнія сыны і дарослая дачка, піша «Наша Ніва».

Жанчыну затрымалі ў кастрычніку 2024 года. Ганну асудзілі па трох артыкулах — «заклікі да прычынення шкоды Беларусі» (ч. 3 арт. 361 КК), «распальванне варожасці» (ч. 1 арт. 130 КК) і «ўдзел у дзеяннях, якія груба парушаюць грамадскі парадак» (ч. 1 арт. 342 КК). Пасля прысуду Ганну дадалі ў спісы «экстрэмістаў» і «тэрарыстаў»

Паводле інфармацыі «Вясны», яе асудзілі да 2,5 гадоў пазбаўлення волі.

🔹Cупрацоўніца банка, шматдзетны бацька: хто трапіў у абноўлены «спіс тэрарыстаў»

Вясна / Правы чалавека ў Беларусі

18 June 2025 15:35

🌿«У турмы не жаночае аблічча». Праваабаронцы запрашаюць на канферэнцыю ў Вільні

Праваабарончая ўстанова «Лекары за праўду і справядлівасць» запрашае на канферэнцыю «Жанчыны ў зняволенні: нябачны боль пенітэнцыярнай сістэмы Беларусі» для ўдзелу ў дыскусіі аб крызісным становішчы зняволеных жанчын у Беларусі. Канферэнцыя пройдзе 25 чэрвеня ў Вільні.

На канферэнцыі каманда «Лекараў за праўду і справядлівасць» прэзентуе вынікі комплекснага даследавання пра стан здароўя і правы жанчын у зняволенні; сведчанні тых, хто прайшоў праз турмы; экспертаў і экспертак з галіны медыцыны, права і псіхалогіі. Праграма канферэнцыі таксама прадугледжвае дыскусію на згаданыя тэмы.

Уваход на канферэнцыю вольны, але дзеля забяспячэння спрыяльных умоў ўдзельнікаў просяць прайсці папярэднюю рэгістрацыю па спасылцы.

📍25 чэрвеня, 10.00 – 16.30
🔹Канферэнц-зала Conti Hotel — Raugyklos g. 7

Падрабязнасці 👉 https://spring96.org/be/news/118110

Вясна / Правы чалавека ў Беларусі

18 June 2025 12:31

«Абурала беззаконне». У 17 гадоў беларус выйшаў на пратэсты і патрапіў у калонію — яму патрэбная дапамога на эміграцыі

Ілля Бохан быў асуджаны да 3,5 гадоў калоніі паводле гучнай «пінскай справы». У зняволенні ён паспеў ажаніцца і развесціся, адчуць сапраўдную падтрымку родных, і адначасова — поўнае бяссілле перад сістэмай. Яго прыніжалі, каралі за любую дробязь, кляймілі як «палітычнага» і трымалі ў карцарах ды ШІЗА ў сценах з цвіллю.

Пасля выхаду на волю Ілля быў вымушаны з'ехаць з Беларусі, бо яму пагражалі новым зняволеннем.

«Адразу пасля вызвалення да мяне прыехаў ГУБАЗіК. Пасля праверкі тэлефона яны сказалі, што калі яшчэ раз мяне заўважаць на такіх мерапрыемствах [акцыях пратэсту], то прастрэляць калені».

Вясна / Правы чалавека ў Беларусі

18 June 2025 11:15

Выставілі на продаж аўтамабіль завочна засуджанага Вадзіма Саранчукова

Ягоны Opel хацелі прадаць яшчэ 27 траўня, але тады не атрымалася. Новыя таргі прызначаныя на 1 ліпеня. Судовы выканаўца — Карунас Кацярына Алегаўна.

Актывіста і выканаўцу абавязкаў старшыні БНФ Вадзіма Саранчукова завочна асудзілі да 4 гадоў пазбаўлення волі. Таксама яму прызначылі штраф у 24 000 рублёў.

Саранчукова абвінавачвалі паводле ч. 1 і ч. 2 арт. 361-4 КК (Садзейнічанне экстрэмісцкай дзейнасці). Судовы працэс праходзіў у Гродзенскім абласным судзе. Суддзя — Аляксандр Козел.

Яшчэ перад судом быў накладзены арышт на маёмасць Саранчукова: ягоную кватэру ў Гродне, на дом і ўчастак зямлі ў вёсцы Грабяні пад Гродна, а таксама на аўтамабілі, бэнзапілу, матаблок, лядоўню, пральную машыну, тэлевізар, піша «Гарадзенская праваабарона».

Вясна / Правы чалавека ў Беларусі

18 June 2025 09:45

Маладую мінскую юрыстку, якая цяпер займаецца дызайнам інтэр'ераў, асудзілі за ўдзел у пратэстах

Валерыі Аршаўскай 27 гадоў. Яна паходзіць з Клімавічаў Магілёўскай вобласці. Падчас навучання ў школе была лаўрэткай рэспубліканскага конкурсу творчых і навукова-даследчых прац.

Пасля дзяўчына пераехала ў Мінск, скончыла юрыдычны факультэт Беларускага дзяржаўнага ўніверсітэта.

Цяпер яна працуе менеджаркай праектаў у бюро інтэр'ераў Алены Булатай. Заснаванае ў Беларусі, яно цяпер працуе для розных краін свету — у афіцыйным інстаграме пазначана, што бюро пераехала ў Дубай.

Валерыю нядаўна асудзілі па артыкуле 342 Крымінальнага кодэксу — удзел у пратэстах. Верагодна, ёй прысудзілі «хатнюю хімію», піша «Наша Ніва». 13 чэрвеня дзяўчыну дадалі ў міліцэйскі «спіс экстрэмістаў».

Вясна / Правы чалавека ў Беларусі

17 June 2025 17:00

Старонку ў Instagram дырэктаркі «Прававой ініцыятывы» Вікторыі Фёдаравай прызналі «экстрэмісцкай»

Адпаведнае рашэнне было прынятае судом Пухавічскага раёну 13 чэрвеня. На старонку Вікторыі падпісаныя 670 чалавек.

Таксама «экстрэмісцкі» спіс папоўніў Telegram-канал «Адольф Гитлер кф».

🌿Зусім нядаўна Вікторыя стала гераіняй падкаста «Вясна прыйдзе». Мы пагаварылі з ёй пра справядлівасць і пра магчымыя шляхі прыцягнення да адказнасці вінаватых у катаваннях, а таксама пра яе саму і яе шлях да праваабароны. Падкаст можна паслухаць на YouTube ці іншых пляцоўках.