492
قناة خاصة بنشر قصائد اهل البيت عليهم السلام للتواصل مع الشاعر @Alshmree89
لا حنه ورد وشموع
عرسه دموع بس دموع
لا هلهوله لا صفكه
لا خوانه لا رفكه
لا اهلهة الاجو ويا
بس صوت البجي مسموع
-------------
الله يعين كلب امه
كبال اعيونهه ادمه
ضل فوك الثره ممدود
ومن حر الشمس ويلوع
-------------
متحني بدمه المنحر
نص نحره السهم كبر
ما رد سالم العريس
متكسرات بي اضلوع
------------
لاحنه ولا صفكات
تتفرج فقط شمات
ابن الحسن ما زفو
زفو الشماته جموع
-----------
حلمة بسهم هل مذبوح
وراسه اعله الرمح ويلوح
حركو بي كلب أمة
كلب امه صبح موجوع
-----------
صاحت يمه يل الواحد
تمشي عني وتباعد
انته الخيمة وانته فياي
راس من الجسد منزوع
@mohand8989
تانيت عرسك صابرة سنين
افرح ييمه ويه النساوين
تالي ازفك بيدي للموت
ومنين اجتني كربله منين
أمـك گبـل سهــرت لـيالـي
وطبع التعب يثمـر يغـالـي
عريس اشوفك چان بالـي
وافـرح گلت واخذ نـوالـي
هيج واشوف الحنه بيدك
تالي شفت ينزف وريدك
وسفه يموت الورد ياناس
ومنين اجتني كربله منين
-----------------------
تـانيت عمـري وطـول الايام
أصفـن ييمـه وارسـم احلام
واكـف أصدلك بين الاعمـام
ويگولون باچر عرس جسام
تلبس اشوفك حلوه الثياب
ماشوف دمك فوك التراب
يوجع يعالم كسر الوليد
ومنين اجتني كربله منين
----------------------
چانت فرحتي وضنّتي هاي
لاخـر حـياتـي اتعيش وياي
بـيـدك تـغـمّض ردت عينـاي
تـعب العمـر يـالبيك رجـواي
جسام يا كلشي بحياتي
رتك ذخر ساعة مماتي
تدفني بيدك توصل وياي
ومنين اجتني كربله منين
--------------------
كلشي تحظر حتى الشموع
وجان الفرح بس هذا موضوع
مسموع كلبي بدكته مسموع
يدري الفرح تاليته بدموع
ربعك ييمه بس ينشدون
مدري شجاوب كلي وشلون
محتار فكري وتايهه الراي
ومنين اجتني كربله منين
--------------------
ماشوف انته اعيوني تدري
ياضوه اعيوني انطيك عمري
ركضت اسنين وتالي ثمري
فوك الرمح والدمة يجري
عكبك ييمه ما فرحنه
كون بمكانك چا ذبحنه
ولاشوف يمه الصار والصار
ومنين اجتني كربله منين
مهند الشمري
@mohand8989
ياراعي العلم والجود
وينك خويه لو موجود
خويه العازه الك عازه
كلبي رادك اتوازه
زينب اختك اجنازه
وعرف ابراسك العامود
--------------------
هجمو وصلت النه الخيل
حرمه وحدي نص اليل
عكبك شفنه كل الويل
وينك لو ترد اردود
--------------------
حركوهه الخيم بالنار
اجتنه الناس تطلب ثار
ابونه مكلفك الكرار
وهل جتنه اليالي السود
-------------------
عوف الماي رد النه
بنص روحي الف ونه
كربت خيلهم منه
لا تتعذر بعامود
------------------
ياعباس حاجيني
لاانته ولا حسيني
دربي من يدليني
انه انطيك مني زنود
-----------------
ياوالي الحرم وينك
جر السهم من عينك
هواي البيني وبيك
عدنه ايام عدنه اعهود
------------------
هاي النومه الك متلوك
وراس عل رمح ليفوك
ميت عل رمل عافوك
وجفي بحبل هل مشدود
مهند الشمري
@mohand8989
قصيدة كعدية للانصار
أنصار وخدم يحسين كلنه
منذورين الك احنه واهلنه
نموت بحافر الخيل---وتتوزع وصلنه
وكفو بعاشور وكفه---كالو حسين بحمانه
حاشه تدنه الخيل منه---اله تسحكنه بدمانه
احنه عدنه حسين دنيا---كلشي خلينا ورانه
حسين اغلى من النفس
حسين باجر والامس
المال فدوه والنفس---حسين بالركبه امانه
أصحابه ونضل منة عزمنه
وبماي الذهب خطينه اسمنه
بس يزول هل ليل----وتتوزع وصلنه
---------------------
غيرو كلشي النعرفه---بيهم اشهد يازمن
للشدايد والكلافه--- ماتهزهم اي محن
نموت لجل حسين نحيا---حسين ياعلم وطن
للوطن فدوه الدمه
هذا ابن حامي الحمه
الزهره امه فاطمه----راچبه بأول ضعن
يازينب يختنه لا تهمين
مدام بيمنتج هل ميامين
منج ناخذ الحيل---وتتوزع وصلنه
-------------------
هناك يم خيمة الحره---هوسو عدهه بعزم
هزو الراية اعكدوهه--ستعرضو بيهه الزلم
حاشه مسبيه وبعدنة---هذا اقرب للحلم
نقسم براعي العلم
بالدمه نفدي الخيم
صدورنه ترد السهم---جن علي ماننهزم
سجل يازمن مالحظه عفنا
وبكول وفعل من كلنه ويا
نعوفك حاشه ونميل----وتتوزع وصلنه
-----------------
ياحبيب وشحجي عنه--شكم درس ودا النه
كال الحسين وطريقه--مختصر للراد جنه
وعن برير شلون اوصفه--من دمه نحره تحنه
حسين مولاي ابتشر
جوه رجلينه الشمر
اي عذر ما نعتذر----الموت لهل البيت سنه
عابس والرياحي وكل الصحاب
ضن حسين بيهم ابد ما خاب
طاري اسماهم هيل---وتتوزع وصلنه
-------------------
كلشي بيد الباري كلشي--اختارهم ربك اله
بعالم الذر محصاهم---عرف مالت كربله
خاطبو رب الجلاله--صوتهم فوك اعتله
نعيش ونموت اعله دينه
حبه هل معجون بينه
بعنه كلشي وشترينه---الما اله الوالي شله
شكرا ياللهي النعمتك هاي
مثله نموت هم مانشرب الماي
تدوس اجسادنه الخيل---وتتوزع وصلنه
مهند الشمري
@mohand8989
خامس محرم يبتدي بدمعة غزيره
اليله مسلم وحده مامش عشيره
بالكوفه واكف وحده محد يعينه
عنده رسالة للخلك من اجل دينه
خانو جن حيدر علي نفس السنينه
الموت بالكوفه اله قرر مصيره
-------------------
مرسال انه من السبط جيتي عليكم
انه سفيره ووحدي متنخي بيكم
نتعاهد ونمشي سوه انطوني اديكم
للاسف يحجي والبشر ميت ضميره
--------------------
لاغيره عدهم لاشرف محد فزعله
صلى لتفت محد لكه يديله بهله
بس طوعه ياناس اصبحت للعين كحله
كالتله يمه بيتي الك ماتلكه غيره
-------------------
عطشان محد شربه كطرة اميه
ماشاف من عدهم فقط بس الاذيه
الكوفه ديره بلاشرف وبلا حميه
يحسين بس لاقصرة كلمة اخيره
--------------------
هجمو عليه الوحده هل كوم الارجاس
هيهات كدرو وعلي جن حيدر الباس
ماخذ شهامة حيدره وصولات عباس
اسهام حلوهه عليه حلت ظفيره
مهند الشمري
@mohand8989
كربلاء
كون بسمج وحدج يسمونهه
وبالسماء
صورتج وسط السمه يعلكونهه
موقفج ماله مثيل
اربعه عندج دليل
عدنه بالعشر مواقف خالده رغم السنين
تسولف الصار بوكتهه منهو ضحه للحسين
كلب التاريخ كله من الشمال من اليمين
منين متباوع تشاهد فقط بس ام البنين
بالوفاء
أنطت ادروس وندرس بيهه
بالعطاء
تعزب ابربع ولد ندريهه
ونعم ام الكفيل
اربعة عندج دليل
----------------------
لليضدهم سيف باشط لليتامه هناك غيمه
بثوبه رد النار بالطف حتى لا يحركله خيمه
يفرش اضلوعه بدربهم حتى لاتعثر يتيمه
المهم زينب توصي خاف يدنوهه هضيمه
للحسين
كلشي يرخص فقط هوه الغالي
معدلين
حسين اول وانتو بعده التالي
والله ماالهه مثيل
اربعه عندج دليل
----------------------
روح يم صوب الشريعه تشاهد بعينك ولدهه
هناك اثار الوصيه والارض تشهد بعدهه
وفوو وانطو ركبهم بالحرف سوو وعدهه
صارت الغيره فرسهم صعدت بكصته ولكدهه
مو غريب
ربت ازلام وتزامط بيهم
للحبيت
فدوه كالت ولدي من انطيهم
من ظهر طيب اصيل
اربعه عندج دليل
-----------------------
عدهه بالعباس ايه والنهر يشهد عليهه
شايل الجربه بضميره انطه دمه ومشتريهه
ضحه بشماله ويمينه شكد شهم ماينطي بيهه
عدهه هيج ازلام عدهه ذوله من تربات اديهه
بالطفوف
حتى شمس العاشر يحجبوهه
لليشوف
دكول حيدر والشمس ردوهه
شالت الحمل الثجيل
اربعه عندج دليل
----------------------
شرد سولف انه شترك انه اوصفلي سمه
كل قوافي الشعر تاهت من ذكرتج فاطمه
المايقيم هل مواقف هذا مصيوب بعمه
الله رادج بلطفوف اختارج لهاي السمه
بعالي صوت
لبن حذلم نشدت اعله الولي
بالقنوت
ادعي لحسين ونسيت اعيالي
بالنسه مالج جبيل
اربعه عندج دليل
مهند الشمري
@mohand8989
هاي أخر ليله عندي---باجر دموعي اعله خدي
باجر مسافر ضعنكم--وانه بنتك ابقه وحدي
أنتو يمي وكلبي يسالني عليكم
شلون باجر المن انشد حتى اجيكم
ما انامن راسي فاركهه اديكم
وانه اعرف بعد مامش جيه بيكم
شلون اصبر الروح صعبه--وكلبي ماضلوله ربعه
موحش الدار وحزينه--وانه بنتك ابقه وحدي
------------------------
والله صعبه زغيره ومودعه الغوالي
وينه ذنبي انه كل هذا الجرالي
جنهه برزخ هيجي مرتني اليالي
هذا حالي يالتعرف شلون حالي
والاهل كسره جبيره--بيش اجبره شلون حيره
خلصت عيوني عليكم--وانه بنتك ابقه وحدي
-----------------------
المن اشكي لوردت اشكي الوجعني
شلون بيه بوية وفراكك فجعني
نوحي غرب اخر الديره وسمعني
كال اعذرج بويه بصوركم جمعني
كمت اعاتبهن صوركم--بلكي لن يرجع عمركم
الوحده صعبه لليفارك--وانه بنتك ابقه وحدي
-----------------------
ياللهي حتى لو بالطيف ردهم
ارد سولف شنهو المسوي بعدهم
الدنيه ضلمه والله ماتسوه بعدهم
وارجع اكعد هيج بحضاني ولمهم
صاحبت دمعي ونيني--وينه طيفك خل يجيني
والله مشتاكة الدلالك--وانه بنتك ابقه وحدي
-----------------------
وين أبوج وين اهلج يسالوني
وانه كابر والدمع يفضح عيوني
طالت الغيبة يبويه ما تجوني
شويه من همي وعذابي ترحموني
جنهه مكتوبه اليه--ابجي كل صبح ومسيه
هذا مكتوب واشوفه--وانه بنتك ابقه وحدي
مهند الشمري
@mohand8989
يامحرم ياربيع اشهورنه
دمعي يفرح من يجينه يزورنه
نخدم ونمشي اله
شلون نعمه معدله
خلهه تحجي الناس عنه
هواي نسمع هل الكلام
احنه اصحاب العقيده
همه ماعدهم امام
خلي يحجي وبمكانه
واحنه نمشي للاامام
وبالنهايه ياهو يربح
احنه نربح والسلام
يادمعنه من يكحل خدودنه
كون جمعه كل اسبوع يعودنه
ياهلا ومية هلا
شلون نعمه معدله
----------------------
رادو نعوف القضيه
من الشعائر نفترك
حكه مايعرف معزتك
هذا اليسولف صدك
لاتشوف ثياب عندنه
احنه عابس بالعشك
نشكك الثوب وكلبنه
لونسه بحبه يدك
اترك الموضوع كله وعوفه
عقلي قافل غيره ابد ميشوفه
كلبي عقلي كربله
شلون نعمه معدله
----------------------
حافظ حاجيه واجاني
ثنين قاريله كتب
هيج كال فلان عنكم
كفو عن هذا الدرب
يقرأ بس بعينه باقي
هذا اعور بالكلب
انه سلاما لليسالم
لليضدك اي حرب
ياللهي شلون تالي وياهم
من طبر دكول من ادماهم
اسمي بالخدمه عله
شلون نعمه معدله
---------------------
اني موضد الشعائر
لكن العبره اهم
ينظر براسي ويسولف
وهو عايش بالوهم
روح ميز حتى تعرف
ياهو عدنه احنه الاهم
كلشي بحسين وطريقه
واضح وعدنه انفهم
عيوني اثقفهه بدمع متعلمه
ومن تعوف الدمعه تنصاب بعمه
بعيني غيرة ما حله
شلون نعمه معدله
--------------------
استمع هاي الرساله
وركز بذهنك عليه
ولتصير الدنيه ضدي
ماتهز شعره من اديه
اني شعي وعقلي قافل
ابجي حد يوم المنيه
انه مثل الحجة ناوي
اندب بصبح ومسيه
الف نعمه والف شكرا للحسين
هيج وفقني لخدمتة بهل سنين
والكلب هل صار اله
شلون نعمه معدله
مهند الشمري
@mohand8989
عهد خطينه وياك---صعب دنيه بلياك
حياتي انته ومماتي--فقط دربك نجاتي
عهد يحسين غافي وي الضمائر
ابد منحيد ونعوف الشعائر
مله وخادم وتلكاني زاير
يقين العاف دربك هذا خاسر
هويناك وهوينه---يل مفصل علينه
خذت منك صفاتي--فقط دربك نجاتي
--------------------
نذز لحسين هاي الروح اخلهه
يستاهل لان بس هو اهلهه
يعرف البيهه ويطيب عللهه
املهه يصير بالمجلس اجلهه
يلمعدل حجينه---يلمكثر بجينه
مولاي واغاتي---فقط دربك نجاتي
-------------------
عشكناك ولكينه الدنيه حلوه
اصيرله عبد هل مولة يسوه
دنيه واخره للكلب سلوه
بلوه هل عشك ياخلك بلوه
خلهم خل يكولون--اقرن انه مجنون
يل مجمع شتاتي--فقط دربك نجاتي
--------------------
حقيقه ومو روايه بنص الكتاب
انته حسين دمعه ونيه وحجاب
توصلنه وتجينه وي الهوى الهاب
الراد يضم هويتك حمل وخاب
من اضيك اكصدك--وسولف ويه كبتك
أضن بيدك وفاتي--فقط دربك نجاتي
-------------------
فقط عاشور من عمري احسبه
بي دمعه وعلي من الله احبه
كل شيعي ومولاي مربي كلبه
طريق احسين يعرف هذا دربه
تخبل هاي الايام--خدمه واحنه خدام
ضواي انته بحياتي--فقط دربك نجاتي
مهند الشمري
@mohand8989
نعي للسيدة زينب….عليها السلام…
لتمن عليه لتمن هواي
فوك الذبح ما شارب الماي
كل ضن يخوي وجان منواي
وياك ارد وتسكت اعداي
بيمن اجيت وبيش رديت
ترجع ايامي وياك ياريت
وترد يخوي وتارس البيت
حنيت الك ياخوي حنيت
انكت اترابك كوم يحسين
زينب اخيتك نص دواوين
ومنين اجتني كربله منين
كلبي نفطر هل صار نصين
محتار كلبي ومن يدلي
بعد الاخو ياهو اليحس بي
عد النهر منهو اليودي
اشكي البكلبي ويسمع اشكاي
مهند الشمري
@mohand8989
ابو ذية للعليلة
مشتاكة بكثر حزني وبعدهم
مايسوه الهوى شمه بعدهم
سولفت شكثر همي وبعد هم
ياوادم مصيبة الصار بيه
عظم الله لك الاجر مولاي ياصاحب الزمان
قصيدة بمناسبة هدم قبور أئمة البقيع عليهم السلام…
كبه الهم بالكب معموره
ويا دكات الكلب انزوره
الكبه معناهه العقيده
حيدر امشيدهة بيده
صفح التاريخ واقراه شكاتبين
احنه أصحاب العقيده من سنين
بعالم الارواح نصرخ ياحسين
وجنه من انزور ننطيهه الادين
ما اكابر بالهدم هدمونه
من جديد انخضر ايعرفونه
هدم الاحجار شيفيده
حيدر مشيدهة بيده
--------------------------
انه شيعي وحيدري بالعالمين
وسط روحي عايشه ام البنين
انته تفكيرك بعيد وانه وين
انه انطر يومهم وبجيلي عين
بعالم الاصلاب حبهم طابع
بينه غيره ادكول يوم السابع
عوف البالك بعيده
حيدر مشيدهة بيده
------------------------
منهج الصادق نعرفه من الزغر
ماتغير منهجه بهدم الكبر
شوف قبلك شنهو سوا الشمر
وشوف غير حسين ياهو الينذكر
الله يعرف وين يوضع سره
ماتسمعون الحقيقه ومره
ربك أختار اليريده
وحيدر مشيدهة بيده
--------------------------
واهم ورايح بعيد العنده ضن
اليهدم الكبه ويفلش كل صحن
ينهي موضوع العقيدة ويطمأن
حبهم بنص الكلب مثل الوطن
ما تفرقونة ابد لا مستحيل
من فروع الدين حبهم بالدليل
مسلم وحن الحميده
وحيدر مشيدهة بيده
---------------------------
باجر المهدي يرد يبني القبور
ونكطع جفوف الكفر شيعه ونثور
وحق عباس الكفل ننطي النحور
ونلغي كل واحد دخيل وماله دور
يالثارات البقيع بهل شعار
ناخذ مربع ابد ماننسه ثار
المهدي كل حقنه يعيده
وحيدر مشيدهه بيده
مهند الشمري
@mohand8989
فركاك ترك بالروح حسرة
فركاك الم ياهو اليفسرة
صعب توديع الاحباب
صعب كلش صعب دفن الغوالي
ينوح البيت بعدة يبقة خالي
حقي ولو اون فاكد حلالي
فاكدلي أبو مو سهلة والي
ذكراك تضل غصة بكلبنة
ذكراك بعباتك من تلمنة
الجرح لليوم ماطاب
*******
مدفون وعلية تراب نايم
ما تمم صيامة وبعدة صايم
شيصبر كلبنة بعشكة هايم
لون راسي انطبر لا يلوم ليم
هيهات منو يعوض حميتك
هيهات الدمة تارس لحيتك
بعد ميفيد الاعتاب
*******
يم بابة تضل تبجي اليتامة
يدعولك علي دكوم بسلامة
ما طابر علي ذاك بحسامة
انطبر رابع ركن اعني الامامة
جبريل ينوح بهل مسية
جبريل اله ناصب عزية
يرتل دمع سجاب
*******
محرباك يضل خالي مكانة
ما يلكة بشر ساجد زمانة
امام وقائد وشايل لوانة
بول طيحتك كلشي سبانة
ياحيف زلم صارو علينة
ياحيف شيردك يا علينة
العدل ويا هل غاب
*******
ياحيدر علي فكدك خسارة
فقط أسمك علي هز الامارة
أمام المنتظر ما ينسة ثارة
لون لحظة تضل يشهر فقارة
للثار امر ربك ينطره
للثار اشوف بكلبة حصره
الكلب من الصبر ذاب
مهند الشمري
@mohand8989
لم دمعك وراك هواي
اول سهم كَطع الماي
شطر راسي شَطر بالطف
إذا عل الموت موتي اترف
لم دمعك وشد حيلك باجر بالطفوف شلون
وحدك وحنه مو يمك وعليك الناس يلتمون
ربعك خنصرك ثوبك كلهن منك يسلبون
انه الماي يم جفي باجر ماي متشربون
اخوك الحسن يم راسي
ربعي هواي انه وناسي
حتى الوجع بيهم خف
إذا عل موت موتي اترف
---------------------
كف دمعك وشد رايك تحتاج الصبر همه
جرح واحد بنص راسي باجر الف من يمه
صدري بلا نبل لا خيل صدرك بي اثر لجمه
كلهه تريد راس حسين كون مخضب بدمه
بعد يحسين احجيلك
بكد دمعك مجاتيلك
الم راسي من اشوفك كف
إذا عل موت موتي اترف
------------------
واكف وحدك تنادي لا من ناصرا ينصر
وعبدالله الطفل بيدك دمه من النحر يكطر
فوك الرمح وتشاهد هذاك النذل من يسطر
اختك بالحبل والسوط وكلب الرمح يتفطر
يمك كل مصيبه تهون
وحيد وربعك يودعون
اليتامه باليسر جم صف
إذا عل موت موتي اترف
--------------------
فرق بين اليموت هنا وبين اليضل عل تربان
ثلاث تيام مامدفون وجسمه مسلب وعريان
فوك الناس شالتني وتصيح خلفي النسوان
بويه حسين من تموت ميشيعك ولا انسان
راسك عل رمح مشيول
وفوك الجسد خيل اجول
من دمك تضل تغرف
إذا عل موت موتي اترف
----------------
هين جرح البراسي يحسين الجرح يمك
تتوذر تفاصيلك محد يوصل ايلمك
لم دمعك يأذيني عليك بكسر ضلع امك
باجر اه من باجر ميت والعدو يذمك
لا ولدك ولا عباس
ماترحم هذيج الناس
يشمت يدك بالدف
إذا عل موت موتي اترف
مهند الشمري
@mohand8989
حيدر حيدر ياوالينه
وين مسافر يابو العتره
اخضر بينه صواب الزهره
ردنة امراد انطينه الغتره
مانعرف غيرك تدرينه
--------------------
ماصدك غمضت اعيونك
يا حيدر وتغير لونك
ايتامك تبجي ويردونك
كون مصابك طايح بينه
---------------------
بمحرابك طكك ما ثنه
دمك طاح ابنص الجنه
طاهر دمك مامش منه
حتى الموت انكسرت عينه
---------------------
الله يعين اكلوب احبابك
كلهه ايتام الليله ابابك
مو وكتك ياموت اشجابك
ماترحم تندل العينه
---------------------
كلشي اخلافك ماضل هوه
مايردونك حيدر كوه
ضلت ناس بدون امروه
نار افراكك تلهب بينه
----------------------
كلشي اتغير حتى النسمه
وسط الريه صارت نقمه
هسه اعرفنه انفاسك نعمه
كلهه تصيح حيدر وينه
--------------------
كلشي الليله ناصب مأتم
شفت النجم بغيم ملثم
فز ياجرحي مات البلسم
جنهن فرحه بسرعه سنينه
مهند الشمري
@mohand8989
كعدية بحق القاسم---علية السلام
لا ويا اخوتة ولا رفكه
هذا اول عرس من دون صفكه
الحنه بدمع العيون---هيج من اعجنوهة
هوه هل واحد يدنيه--ليش من عرسه انحرم
والمه البسمه وتنطره-- وكلشي والم بالخيم
ردت بثيابه يتكشخ --- تالي يكشخ بالسهم
لا فرح لاشاف بسمه
ماتحقق وسفه حلمه
بطوله صار اكدار دمه---وكل حلم جان انهدم
لا عمه احظره ولاحنه اصبعه
شعلوهه الخيم ماشعل شمعه
خابت كل الضنون---هيج من اعجنوهة
--------------
جانت احلامي ييمه--تلبس اثياب العرس
بيدي اكحل ارموش عينك--ما تكحلهه الشمس
بصدرك نخلي الجنيته--تالي ملعب للفرس
هذا المقدر جنيته
غارك بدمه لكيته
شحال كلبي وشاهديته---السهم بعيونه نغرس
من دون الشباب ازفه الاسهام
نايم عل ترب يمه يجسام
لطمت بحركة المتون---هيج من اعجنوهه
---------
ازغير وعمرك ليالي---هسه بعيوني حله
والكلب لو مات كلبه--بعد بدنيه شله
الحزن خيم عليه--والفرح شال وجله
يكلي يرمله هلهلي
منهو مثلي مبتلي
فاكده وليدي وهلي---هيجي سوت كربله
وليدي وشفته يا عالم توذر
وكلبي من الصدر فز وتعذر
اعوفه امدد اشلون---هيج من اعجنوهه
------------
وينه اليواسيني وينه--عندي بس وليد واحد
كلبي ماضل بمجانه--الله يدري وفوكي شاهد
ابني ياناس وضنوتي--هذا نص الكلب كاعد
ظهري مكسور انحنه
اللحظه مرتني بسنه
ماكو اغلى من الضنه---وانه ماكو وليدي باعد
بس ردو اليه وكلشي ماريد
طوله وشوفته تسوه الف عيد
بمعزته همه يدرون---هيج من اعجنوهه
------------
مودع والله اليصبر---نام يمه ودمعي جاري
عيوني عكبك حلفتهه--لانمت ليلي ونهاري
كلبي بيت احزان عبك--اظلم ومايسوه داري
اه يافكد الولد
الدنيه ماتسوه بعد
حكي امه الله احد---والدمع بس اختياري
ما جوز واضل انعه واذكرك
ازغير وماشفت يايمه عمرك
اصيح وخل يسمعون---هيج من اعجنوهه
مهند الشمري
@mohand8989
واكف عل نهر عباس---يازلمه يتدنالة
يم النهر شنهو الصار
العاقل صافن ومحتار
الواكف يشبه الكرار
لمعت سيفه ذل فقار
ياهو اليوصل يرده
محد ما وصل حده
زلمتهم وصل مده
السمه تكداره وبكده
روس معلكه بسيفه---شايل سيف لو فاله
-----------------
من بعيد يجدح نار
عيونه دكول يطلب ثار
غار ومن عليهم غار
ساكت سولف البتار
رد الخيل والخيال
سامع عيله بالعيال
شنهو الحرب لعب عيال
مثله تريد كون ثكال
خله الروس فوك الروس---بزود اليمنه وشماله
----------------
بحملت فارس ادنو
وصلو يمنه لن عرفو
شردو بعد ما لكو
صيته واصل وسمعو
شال الشاطي بالجربه
ميت من زمن كلبه
يمشي ويدعي من ربه
زلمتهم يصل دربه
راوي ورايته خضره---من كد الوفه الشاله
--------------
بالخيل تعثر هل خيل
عباس وعليه تعيل
غيمهه امطرت سجيل
صارت ليل مو باليل
فارس من ظهر فارس
يم المرتضى دارس
موصه وعل خيم حارس
شكم راس وخشم دايس
همه الالف من جبلو---وعباس وعلي الحاله
مهند الشمري
@mohand8989
احساس وهل اجاني شلون مدري
يمكن عل نهر مكسور ظهري
شنهو الصار بيه
سبيه وموسبيه
احس ظهري انحنه وفوكاي جم هم
كلت عباس كلت الله اعلم
احس من عيني مو دمعات جن دم
واحس وياي ضل يبجي المخيم
تعوذت وكلت عباس موجود
اعرفنه كلف بيناتنه وعود
لازم يرد ليه
سبيه ومو سبيه
----------------------
احس عيني غمضت ماشوف كلشي
افك بيهه بدي مايرضه رمشي
واحس اجدام رجلي ادكلي نمشي
أنتهى الطف وبعد ماضلج اي شي
تخيلته مشه وشلون بيه
جن نار بعباتي اجوي اديه
اضن ساعة منيه
سبيه وموسبيه
----------------------
بحساس الكلب دورت الطفوف
لكه رايه ووعد وزنود وجفوف
دكاتة اسرعن ماضله كل شوف
عرفت عباس ميت جاسه الف خوف
لو عندك وفه ياكلبي لاترد
كون تموت يمه وهيج تبرد
ماعندك حميه
سبيه وموسبيه
----------------------
هسه شلون والكافل مشه بعيد
دضل صايم بعد لو مر الف عيد
لاتسلوف يكلبي ومني شتريد
تره الديوان كصبه بلا اجاويد
تيهنه الفكر ماضلي كل راي
تضل يم النهر لو تمشي وياي
هم شورك عليه
سبيه وموسبيه
----------------------
المصيبه شلون لوعنك يسألون
اكلهم ما اجه شضن يقنعون
كلهة تصيح عمي عليك يبجون
اكابر والمصيبه شلون العيون
نهرين بوجنتي تركن اثار
وشوف الشيب كمت بوجه الاصغار
عفتك عل وطيه
سبيه ومو سبيه
مهند الشمري
@mohand8989
صافي ماخابط لبنهم--اي ثلاثت انعام منهم
بيضو وجه الزمن--كون منهم للحسن
شما اسولف انه عنهم مقصر وياهم اكيد
ذولة افعال وشهامة مطروهه بلا رعيد
ذوله بسم الله همه ذولة ايات الوعيد
جون عابس والرياحي بعد مايحتاج اعيد
لهسه ونسولف عليهم--وبسوالف لذه بيهم
كطعو حبل الفتن---كون منهم للحسن
--------------------
باليلة العاشر يعالم سطرو موقف عجيب
استعرضو يم الهواشم اه فد موقف رهيب
بجفه بيده الرايه رفت بحيله مايتعب حبيب
صار واحدهم حقيقه لكلمة الهل من مجيب
نصرو حسين بدماهم--وكلشي ماخلو وراهم
ونعم زلم المحن--كون منهم للحسن
--------------------
بيهم الماخله ثوبه وسوه بالعاشر عجب
حب الحسين بجنونه وبالعشك عقله نسلب
وبيهم الانطت كلبهه هاي افعال ام وهب
جانت الغيره علامه وبالعشك عدهم رتب
الرياحه الذاع صيته--بالحظه من غير هويته
حصل الجنه أذن--كون منهم للحسن
-------------------
يازهير وشحجي عنه شكم درس ودا النه
كال الحسين وطريقه مختصر للراد جنه
وعن برير شلون اوصفه من دمه نحره تحنه
صاح انه حسين بهويتي ياخلك هذا وطنه
خلد اسمه بكل جداره--بكل فخر ماكو خساره
مات من اجل الوطن--كون منهم للحسن
-------------------
صفح التاريخ يشهد مسقط وهاني ونعيم
غيرو كلشي النعرفه كربله صارت جحيم
دكول جن سورة التوبه بدون رحمه ولارحيم
هذا بس هذا الوصلنه الباقي عد ربنه العليم
البخيت وحضه جابه--والله هم رزق الصحابه
باليقين وماكو ضن--كون منهم للحسن
مهند الشمري
@mohand8989
ما خاف ولا رمشت عينه
كالو موت وكلهم وينه
طب الكوفه بصوت وناده
تتراجف من عنده القاده
زلمه بكيفه سوه الراده
كلشي اليملك لجل حسينه
----------------------
كلمة حق بعين الباطل
صوت حسين براسك شايل
غيرة من العباس الكافل
مايرجع واهله مكلفينه
----------------------
يامسلم تنعاك الكوفه
والشوفت عينك ملهوفه
صولاتك حق ومعروفه
ميجامل عل حق ودينه
----------------------
ابن زياد احتار بفكره
عل موت ومافارك ذكره
جن حيدر لو فوك الشكره
انشد عنه ودور سنينه
-----------------------
انطه اولاده وضحه بروحه
يرتاح شما زاد اجروحه
لو ما الكثره منهو يلوحه
وطايح سيفه من جفينه
-----------------------
بس طوعه تحشم يم راسه
ثكل الغربه الجوه احساسه
لايم اهله ولايم ناسه
مسلم وحده والله يعينه
مهند الشمري
@mohand8989
عليله واهلي بالحسرات عافوني
فگدت الراي وين الراي دلوني
يا هالناس وين امچودره الركبان
راح حسين ابويه گاطع الوديان
ياهو الشاف يمشي عالارض قرآن
مثل يعگوب حالي بيضت عيوني
-------------------
ماشفتو ضعن بي نقص علويه
ونشدوهم يوادم وين الابنيه
بلجي وعينه تدمع يرجع اعليه
ويربي اعله الضعن لنهم يفكدوني
------------------
دلوني عليهم وين مرساهم
دلوني دربهم ومشي وياهم
ساعات وكتلني بويه فركاهم
بنيران الهجر اعترف جووني
------------------
ياحال اليوصف حالتي ياحال
مو سهله البعد كلمت التنكال
ترد روحي لون يوصلي مرسال
دلوني عليهم فدوه عينوني
--------------------
نذرت سنين عمري لليدليني
منو العنده وصف لحسين ينطني
مشتاكة لبوي وخلصت عيني
ملتني الخلك حت مايسمعوني
مهند الشمري
@mohand8989
فتحنه ابيوتنه والم دمعنه
وليمنه الشمل حظرو ربعنه
شهر حسين اجانه
وهل حاظر عزانه
بيض اكلوبنه بثيابنه السود
ونعزب بالدمع والهلا موجود
مجلس للحسين اليله معقود
ولي كل الشرف بي انه رادود
فرصه ولاتفوتك سجل اسمك
شيعي معدل ومعروف لطمك
ترخصله دمانه
وهل حاظر عزانه
-----------------------
موكبنه انصب والرايه رفت
وملائكة السمه هل بينه حفت
ربع حسين كلهه اليوم هل جت
ولطمت عل صدر حد ما تدمت
يحسين الصدك لو لاك انته
چاجبنه العمر صفنات سكته
يضل عالي لوانه
وهل حاظر عزانه
-----------------------
ردت من جديد واحنه الهه
الخدمه واللطم بس احنه اهلهه
شيعه ومعتقد بس هذا املهه
وكون بمجلسه يوصل اجلهه
جمره وبلكلب ماتطفه بينه
احنه اولدك ذاك الينطي ادينه
اللهي اقبل دعانه
وهل حاظر عزانه
-----------------------
فرشنه اكلوبنه ونعزب الجاي
ونركض لليجينه بجدم حفاي
هذا الزاد والم حاظر الچاي
تسبك بالخدامة اليسرى يمناي
شدينه الحزم اصغار وكبار
ومثل فزعت حبيب وربعه الانصار
بس ذكرك دوانه
وهل حاظر عزانه
-----------------------
تحزمنه وفه ونحسب ب الايام
شوكت يجبل علينه نصير خدام
شهر حسين يعني شهر الاسلام
الصلاء بالموكب تعادل الف عام
تعادل الف حجه والف عمره
واليترك صلاته شنهو عمره
هوانه انته هوانه
وهل حاظر عزانه
مهند الشمري
@mohand8989
جنهه نفس اليله جنهه--واضحه مبين حزنهه
وينك الحك اه يموتي--ليله باكت كل اخوتي
من اباوع عل نجم يسرح خيالي
وامشي حيل بعيد تاخذني اليالي
من مشيت مخدره وياي الغوالي
ومن رجع ليه المهر والمهر خالي
هيه هاي اليله هيه--خلفت چم جرح بيه
وسفة بيهه نسمع صوتي
-------------------------
ويامن اشكي الحال ياهو الاشتكيله
كعدن اجروح الكلب ليله ثكيله
بيهه دمعات وسبي ورحله طويله
وعفنه بيهة هناك مكسوره العليله
انتي ياليله عذابي--طفت عيوني وشبابي
غمضت منيمي فوتي
--------------------------
اتذكرت بيهه مصاب الغاضريه
رغم مالحظه نسيته وباقي بيه
اتذكرت من هجمت الوادم عليه
وكلهه كلهه تصيح هاي الهاشميه
شحجي عنهه وشرد اكول--انشتم صهر الرسول
جني يونس وانتي حوتي
--------------------------
ردن ابالي ورجع جرحي يتجدد
وبيه صار النفس خنكه والله يشهد
غيمت عيني دمع والعبره ترعد
وجهي ماخذ من عباتي لونه اسود
دمعي صاير لونه احمر--صلى بيه الحزن كبر
حيلي يرجف ماكوقوتي
------------------------
اذن أذان الحزن بجه المسامع
بين اهلال الحزن كثرن مدامع
كربله ردت علينه والمصارع
نجدد احزان الشهر لازم نبايع
حرمه والوادم تعيل--وعل رمح راس الكفيل
وشكبر جرحي وبلوتي
مهند الشمري
@mohand8989
هاي السنة مثلك دليلي
فاگد أخو وفارگني حيلي
هاي السنة مو مثل الاعوام
بصدري احس متكسره اعظام
أتمنى اشوفنهم بالاحلام
تدرون ليل المرني ما نام
يبدي الوجع من يلفي ليلي
فاگد اخو وفارگني حيلي
------------------
سابع محرّم من وكت جاي
ظهري انحنه وما اشتهي الماي
كسر الاخو ياعالم هواي
صوتي من اسولف يشبه الناي
يمك اجي خويه اندعيلي
فاگد اخو وفاركني حيلي
--------------------
والله الصبر لو ينشره اشري
هسه اعرفت بالفاكد شبيه
خد اليتامه الدمع يجوي
بدرب المكابر لا تدلي
درب النجف صاير دليلي
فاگد اخو وفارگني حيلي
---------------------
يبدي الوجع لو مرني طاريك
طال البعد ما ترجع اشبيك
كلك فضل وشلون اجازيك
فوك الكبر زحمه من اسميك
مره بحلم كونك تجيلي
فاگد اخو وفاركني حيلي
--------------------
فاكد نظر يالفاكد أخوان
متيهه المشي ومتيهه المجان
ينشدني ليش الوكت بطران
كلي احترك من غير دخان
السابع سلف واصل عويلي
فاگد اخو وفارگني حيلي
مهند الشمري
@mohand8989
يافاطمة سجليني… شور للخدمة
شهرك حلات ايامي---خادم انه للضامي
وخدم وصيرن خادم--ويتحقق احلامي
وشد احزامي وشيل الرايه
وكحل ايامي ونول الغايه
----------------------
يارزقي يا عافيتي---انته المسوي صيتي
ما اسوه انه بدونك--ياهوى التارس ريتي
بغلات اعيوني اليدلني دربي
ترست ماعوني يزادي وشربي
----------------------
أنحسب خادم يمه---وتنقبل مني الخدمه
افتخر انه ابروحي--اسمي اقترن ويه اسمه
عشك بالفطره عشكته بروحي
يا أبن الزهره دوه لجروحي
-----------------------
شكد لذه بيهه قرايتك--ثوبي نوخذ من صايك
مواهلي ربوني بصدك--لا والله انه اسوايتك
جبتي الدربك برحمتك اني
يفدوه الكلبك انه وخواني
-----------------------
خليني اموت من الدمع--تتحول بكبري شمع
دماعتي ادريهه غدآ--ياناس بس هنه النفع
هذن دمعاتي هذني متاعي
ينادي هناكه عرفت اتباعي
مهند الشمري
2021
@mohand8989
يامهدي البعد طال
وتعرف البعد جتال
العشك مايرحم انسان
صحيح المثل لْـۆ كال
اعاين عل درب بلكت تجينه
يامهدي الفرج بس حن علينه
عجزنه من البجي كد ما بجينه
دشوف اعيونه وكعت بدينه
ٲعرفة الامل يمك
شوكت تظهر وشمك
وسولفلك حجي ثكال
صحيح المثل لْـۆ كال
----------------------
دعاء الندبة بي يلهج لساني
اتانيك وجبت عمر اتاني
يسوهه البخت يشهد زماني
وشوفن طلتك رايد ثواني
اكحل عين الٲعيون
ويقين اتصير الٲضنون
الشرف كله بحظورك
صحيح المثل لو كال
----------------------
يامهدي شوكت كلي وتانيك
تعرف ارواحنه متعلقه بيك
عليك بكل فرض انشد انه عليك
احلفك يا امامي بذاك غاليك
عليك بنحر الحسين
وٲصحابه الميامين
تكحل ناظري بيك
صحيح المثل لْـوكال
-------------------------
صارت للخلك معروفه قصتي
يعيبوني بكثر شوكي ولهفتي
ما يدرون بس الدمع حصتي
اثر فركاك بين شوف كصتي
جفي ايدي طبعته
يمته الفرج يمته
همي يعادل اجبال
صحيح المثل لْـۆ كال
------------------------
نذرت الروح بس اطل يموعود
واعرفك لا ابد متخالف اوعود
يا يوسف اظن بالبير موجود
ما اشمر حبل اشمرلك زنود
عزيزة تصير البلاد
وبعد ما يبقه جلاد
بخيرك وانته ابو الخير
صحيح المثل لو كال
مهند الشمري
@mohand8989
لاتمشي بوية بعيد
باجر يجينة العيد
والطفل فرحة يريد
يابو اليتامة
ريض يملج الموت ريض ثواني
بس هذا ابو الحسنين ماعدنة ثاني
خليني ٲشبع شوف دمعي سباني
طكني الحزن بصواب غفله ٲورماني
ٲحبابك ٲينادون
ع فركة بوية شلون
نبجي عليك عيون
يابو اليتامة..
خلي نتواعد زين خليني ٲشمة
باجر يضمة تراب وسفة ويلمة
ٲبجيلة جن مفطوم من ودع امة
وبكلبي كبل الروح حيدرنة ٲضمة
ما ريدة بعد الدار
عكب الجره والصار
ضل الفكر محتار
يابو اليتامة
ٲيتامة وسط البيت ضلو يونون
للذكرة والضحكات كامو يحنون
ضنهم يجي الكرار وتصيب الضنون
خلصو كل الليل دمعة ويصلون
يونس نجة من الحوت
موسى رجعلة الصوت
والوالي بالتابوت
يابو اليتامة
لا تسلوف ٲب اي عيد ياعيد الاسود
هو الكحل للعين شيفيد الارمد
ٲشتد علينة الضيم يادنية وشتد
حيدر فراغة الكون ميسدة ٲحد
يارب ولو لحظات
تكدر ترجع المات
عدنة بعد كلفات
يابو اليتامة
محرابة ضل مهجور ينشد عليه وين
يومية نص الليل وياي ابو حسين
ٲشعطلة وما بان حاسبلة يومين
دلوني دربة منين ارد اوصل الزين
كل لحظة جن بيام
عشرتنة مال ٲعوام
حيدر هو الاسلام
يابو اليتامة
مهند الشمري
@mohand8989
جبريل نادة بصوتة
فزز ضمير الموتة
حيدر علي ياحيدر
نادة وندائة شعلوة
ياعظم هاي البلوة
ياربي شنهي السلوى
اعلة افراكة ابد مانكدر
*******
ضل يصفك بجنحانة
وكل السمة حزنانة
حيدرنة موش ويانة
هذا القدر المكدر
*******
مسرع اجة بخطواتة
ويترادفن اهاتة
مثل الحسن حسراتة
مثل الورك يتكسر
*******
يصرخ فكدنة الوالي
ياحالي بعدك حااالي
موسهلة حيدر غاالي
ودموعة جنهة الخدر
*******
وبجنحة راف جروحة
بلكت ثواب يلوحة
بلكوة حابس نووحة
يدريهة زينب تنظر
*******
رد وتسبكة الدمعات
وبروحة شايل حسرات
يصرخ علي يا هيهات
عل كاع دمك يمطر
*******
غيم السمة ضل يدمع
جبريل ينعة ويسمع
حيدر علي ما يرجع
حتى النجم يتحسر
*******
مهند الشمري
@mohand8989
بيا حال اليتامه بهل مسيه
طاح اليوم حماي الحميه
بيا حال اليتامه شلون بينه
بعد اليوم من يترس ادينه
راح الجان يفكدنه ويجينه
مثل امنه علي ويحن علينه
دارك ياعلي ضلت خليه
طاح اليوم حماي الحميه
------------------
باجر عيد ويعيدون الاسلام
ويتيمك ياعلي للصبح مانام
ثوبه مشكك ومالت قبل عام
يسأل ما اجه بلليل ابو الثام
عظيمه وشكبرهه هل رزيه
طاح اليوم حماي الحميه
--------------------
يم دارك اجو جنهم حمامه
كلهه أتصيح يابويه بسلامه
ارجع ياعلي يابو اليتامه
أصول الدين تنعى اعله الامامه
يملك الموت خذنا ويا سويه
طاح اليوم حماي الحميه
-------------------
طاح الجان بالشده سندنه
زغار وسافرت بويه بعدنه
وينك ياعلي عكبك وحدنه
اشتاكينه ننام احنه اعله متنه
اللهي بحيدره رد المنيه
طاح اليوم حماي الحميه
--------------------
رحيلك ياعلي كسره جبيره
حرت لاوين بعدك وجهي اديره
حيره ومن صدك يابويه حيره
مو سهله اندفن عود العشيره
حصتي الضيم بس افرك بديه
طاح اليوم حماي الحميه
---------------------
مشه وسافر علي مامنه ضنه
اختنك حتى الهوى انته الهوى النه
بيوت الكوفه تسمع بيهه ونه
يستاهل دمع ماكو ابد منه
صعب تدفن علي خير البريه
طاح اليوم حماي الحميه
مهند الشمري
@mohand8989
كلام انطيك اخذه وهذا مضمونه
لان والد علي رادو يكفرونه
كالو رافضي ومات
وصحنه بصوت هيهات
يااهل العقل وهل المصادر
اليخلف علي معقوله كافر
البكلهن تصدى وسيفه حاضر
من ذاك الوكت زلمة سواتر
لان هدم فكرهم كله بيده
ولان كال العدل محد يريده
خلف زلم كلفات
وصحنه بصوت هيهات
---------------------
رادو كلشي رادو وحنه ردنه
ابو طالب مقدس جن حشدنه
بعده بظهر ابو المنه يدنه
بقلم وبسيوف متحزمه ولدنه
شيعه ومارضينه بكلمه تنجاس
واليمسك عصابه وكومه انجاس
عقيده وموش چلمات
وصحنه بصوت هيهات
----------------------
رادو بالولي يدورون خله
لان بالسيف شبعهم مذله
نور الله وجلاله بي تجله
ابو طالب حضاره شكم مسله
هم شعر وفصاحه وهم رجوله
ابو طالب سمه محد ينوله
شحده العبر والفات
وصحنه بصوت هيهات
----------------------
نجم سهيل اسمه ويلمع أبليل
مثل عين الشمس ميصده غربيل
هم عدهم سقيفه بهيئة الفيل
وهم عدنه علي ومطرهه سجيل
صاحب منزله وصاحب كرامه
الدليل بهاي خلفلك نشامه
طاهر طيب الذات
وصحنه بصوت هيهات
---------------------
ماهمنه الحجه خل يحجي عنه
اليغرف بالبحر ما أخذ منه
اليريد النار عوفه انريد جنه
ابو طالب ابونه ولم شملنه
فكرك باقي بينه او ولدك احنه
ولي وابنك ولي وبصوت صحنه
وسفه نخلي شمات
وصحنه بصوت هيهات
مهند الشمري
@mohand8989