Telegram-канал sancaqdergisi - سانجاق SANCAQ: Unsorted

سانجاق SANCAQ

14 July 2025 22:52

⭕️دیرسه‌خان اوْغلو، بوغاچ خان داستانی

🔷(تۆرکیه منبعلریندن)

✍️کؤچۆرن: #محمود_بنی‌آدم‌_دیزج

بیرینجی بؤلۆم

خانلار خانی بایاندێرخان، ایلده بیر دفعه هامێنی باشێنا یێغیب، قدیملرین اوْیونجاق دئدیڲی بؤیۆک بیر مجلس و اَڲلنجه تشکیل ائدردی. یئمک یئییلردی، خالق ماهنێلاری اوْخونوب، ناغێل‌لار دانێشیلاردی.

بیر گۆن بایاندێرخان داها بیر بؤیۆک توْی تشکیلی ائتمک قرارینا گلیر. اوْ، بۆتون بڲ‌لری بو توْیا دعوت ائدیر. دعوت اوْلونان هر کس چوْخ هیجانلێ‌دیر، حتّی اوْلادی اوْلان بڲ‌لر ده، اوْلادلارێنی اؤزلری ایله گتیریر کی، عادت – عنعنه‌لری اؤڲرنسینلر. دعوت اوْلونان بڲ‌لردن بیری دیرسه‌خان‌دیر. لاکین تأسف کی، دیرسه‌‌خانین نه اوْغلو و نه ده قیزی وار. بایندێرخانین ایسته‌دیڲینه گؤره اوْغلان اوْلانلار آغ چادێردا، قیزی اوْلانلار قێرمیزی چادێردا، نه اوْغلو، نه قیزی اوْنلار قارا چادێردا اوْتورور. دیرسه‌خان ائوه گلنده سئویملی حیات‌یوْلداشێندان شکایت‌لنیر:

- «منیم گؤزل اۆزوم!» منه دئیین: «نئیه بیزیم هامێ کیمین اوشاغێمیز یوْخدور؟» «بوگۆن اوشاق صاحبی اوْلان کیشی‌لرین گؤزۆنده چوْخ کدرلندیم. بیزیم‌ ده اوشاغێمیز اوْلسا، نه اوْلاردی؟» ـ دئییر.

آروادێ اوْنا دئییر کی:
- آج‌لارێ یئدیرت، کاسیبی گئییندیر، بوْرجلو اوْلانلارێن بوْرجونو اؤده، آللّها دعا ائت.

دیرسه‌خان آروادێ‌نین مصلحتینه عمل ائدیر. اوْ، تئز بیر زاماندا أن باجارێقلی آشپازلارا مختلف یئمکلر حاضێرلاماغی امر ائدیر و مؤحتشم قوْناقلێق تشکیل ائدیر. اوْ قدر یئمک – ایچمک وار، بۆتون آج‌لار دوْیور. قوْناقلار گئدنده بوْرجو اوْنلانلارا بیر کیسه قێزیل وئریر کی، بوْرجلارینی باغلاسێنلار. سوْنرا مجلیسده اشتراک ائدن هر کسله بیرلیکده آللّها دعا ائدیر.

گۆنلر، گۆنلری ایزله‌ییر. نهایت، بیر پاییزدا دیرسه‌خان‌نین بیر اوْغلان اوشاغێ دنیایا گلدی. اوْغلانی سئوینجله قارشێلاییرلار. هم‌ ده بؤیۆک دعوتلر وئریرلر، آج‌لارێ یئدیزدیریرلر. احتیاجی اوْلانلارا کؤمک ائدیرلر، دوْغومو بیرلیکده قئد ائدیرلر.

خوْشبخت گۆنلردن سوْنرا واخت تئز کئچیر، دئییرلر! سوْنرا گؤرۆرلر کی، دیرسه‌خان‌نین اوْغلو اوْن‌بئش(15) یاشلێ گنجدیر! اوْ واختلار اوشاقلارا دوْغولان کیمی درحال آد وئرمیردیلر. اوشاق قهرمانلیق گؤسترندن سوْنرا طایفانێن أن حؤرمتلی آدامێ «دده قورقود» گلیب، اوْنا آد وئرردی.

دیرسه‌خان‌نین اوْغلو هله هئچ بیر قهرمانلێق گؤسترمه‌دیڲی اۆچون آدێ یوْخدور. آنوْنیم* اوْغلان دوْستلاری ایله گزیر. اوْ واخت یای چاغلارێندا «بایاندێرخان»‌نین اؤکۆزلری و دوه‌لری گۆلَش اۆچون سربست بوراخێلیردی. بئله یای گۆنلری‌نین بیرینده آدسێز اوْغلانێمیز دوْستلاری ایله گۆلش میدانچاسێنا توْپلاشیب، رقص ائدیرلر. سئوگیلینی کیمین سئودیره‌جَـڲینی گؤرۆمک اۆچون هیجانلا اوْینادێقلاری حالدا، دنیادا نه باش وئردیڲیندن خبرلری یوْخودور. بو زامان بایندێرخانین داشا دَڲسه، اونا چئوریله‌جک أن گۆجلو اؤکۆزو هؤنکور - - هؤنکور سرعتله اوشاقلارا دوْغرو گلمه‌ڲه باشلادێ. دیگر اوشاقلار وضعیتی بیر آز اوّل آنلایێب قاچێرلار.

#آردێ_آشاغێدا....👇

@SancaqDergisi
/channel/Sancaq_media/7536