Telegram-канал sancaqdergisi - سانجاق SANCAQ: Unsorted

سانجاق SANCAQ

23 July 2025 22:55

⭕️قوْناق
✍️یازان: #حسن‌پور – دۆزه‌قول

تانێشلاردان بیری بئش- آلتی یاشێندا اوْلان اوشاغی و بیر ده حیات‌یوْلداشیله بیرلیکده بیزیم ائوه بیر گئجه‌لیڲه قوْناق گلمیشلر. اوشاق طبیعی اوْلاراق بیر یئرده بند اوْلمایان، هر ایشدن باش تاپماق ایسته‌ین، هر بیرزادا ال اوزالدان، دوْغرو دئسک بیرآز دا شلوغلوق ائدن دادلێ- دوزلو بیر اوْغلان اوشاغی ایدی کی، هر بیر زادا ال اوزالتماسیله میز اۆستونده اوْلان میوه قابێن دا سالێب سێندیردی.

اوشاغێن آناسی اوتانجاق اۆز ایله، سێنان قابێن تیکه‌لرینی زیبیل قابێنا و یئره داغێلان میوه‌لری باشقا قابا توْپلادێغی حالدا، آتاسی اۆزونو منه توتاراق دئدی:
- واللاه بو اوشاغێن ایشلرینه لاپ مات قالمێشیق، هئچ نه یئمه‌دن- ایچمه‌دن، بئلنچی یاراماز ایشلرله باشێنی قاتێر، هارایا دا گئدیریک، بو شلوغ‌لوغویلا بیزی باشێ آشاغێ و شرمنده ائدیر.

دئدیم:
- اولا هئچ ده راحاتسێز اوْلمایێن، بیز ده اوشاق گؤرمه‌میش دڲـیلیک، بیلیریک کی اوشاقلاردا بئلنچی ایشلر طبیعی دیر. قالدی اوْ کی سیز بو قدر اصرارلا نلری ایستیرسینیز اوشاغا یئدیره‌سینیز کی اوْ دا یئمه‌ییر؟
دئدی:
- هرنه کی هامی یئییر، اوْ دا یئسین.
دئدیم:
- یوْخ قارداش، بو یازێق، معصوم اوشاغی ایندی‌دن هامێیا قاتما! ائله زادلار وار کی، یئمه‌مڲی یئمه‌ڲیندن چوْخ یاخشی‌دێر و بو اوشاغا دا هله‌لیک یاراشمێر کی اوْنلارین یئمه‌ڲینه عادت ائله‌سین. چۆنکو هر یئمه‌ڲین اؤزۆنه گؤره اؤزل آدامی وار و هر آدام هر زادی یئیه بیلمز.

اوشاغێن آتاسی آیری کۆره‌لردن گلمیش آداملار کیمی، منه باخێب، هویوخموش حالدا دئدی:
- مثلاً نه‌لر و هانکی یئمکلر؟
دئدیم:
- آخی ایندی‌دن بوآز یاشێندا اوشاق تانرێدان یا ائلدن اوتانمایێب، حقی آیاقلاماقلا رۆشوت آلێب یئسین؟ بانکلار کیمی اوْتوز فاییز بهره ایله وام وئریب، ربا آلێب یئسین؟
نعنا قورصو کیمی نفت دکلین یئرلی- دیبلی ایچه‌ری اؤتۆرسون اوف دا دئمه‌سین؟
قرض‌الحسنه‌لرده ایشدن دۆشموش قوْجالارێن یامان گۆنلرینه ساخلانمێش وار- یوْخلارێنی یئسین؟
ائل مالێن اختلاس ائدیب تیلیارد- تیلیارد پوللاری یئسین؟ یوْخسا پلاسکودا یانێب- کۆل اوْلانلارێن، دئپرم‌لرده ائولری داغێلیب آوارا گور قالانلارێن، دۆشموش اوچاقلاردا توْزا دؤنۆب ایزلری قالمایان انسانلارێن، یاغێش یاغمایان بؤلگه‌لرده سوسوزلوقدان لَح – لَح ووران یارانمێشلارین، یاغان یئرلرده اؤزلری و بۆتون وار- یوْخلارێنی سئل آپارمێش انسانلارین، یئمه‌ییب یئدیرمکله، گئیمه‌ییب گئیدیرمکله، نئچه اوْغول- قێز بؤڲۆدندن سوْنرا، گل- گئتسیز ائولرین بوجاقلارێندا یالنێز و تک باشلارێنا بوراخێلمیش قارێمیش و قوْجالمێش آنالارین، آتالارین غم – غصه‌لرین یئسین؟ آجلێقدان و یوْخلوقدان زارا گلیب، خیاوانلاردا مئیدانلاردا های سالێب باغێرماقلا حق‌لرینی ایسته‌ینلره قارێشیب باتوم، کابل، تسمه، مرمی یئسین؟

یازێق قوْناق دقتله منیم سؤزلریمی دینله‌یندن سوْنرا هوشا گئتمیش آداملار کیمی گؤزلرینی تکجه بیر نقطه‌یه زیلله‌میش هۆروت- هۆروت باخێردی. اوشاق دا آناسیله باشێن قاتمێشدی.

@SancaqDergisi
/channel/Sancaq_media/7560