571
«مهد تمدن» گۆننامه‌سی‌نین تۆرکجه صفحه‌لری بیزیمله بو آدرسدن ایلگی قۇرا بیلرسینیز: @Susenrazi @Buqday @tansu6252 تۆرکجه تایپ، کؤچۆرمه ترجمه سفارشلرینیز قبول اوْلونور. @Susenrazi
✏️✏️آند اوْلسون قلمه و یازدێقلارینا
قلم، انسانێن وارلێغی، هويّتی و ایکينجی دیلی سایێلیر. چۆنکو انسانێن کۆلتور، ادبیات، دیل و دینی‌نی دۆنیایا تانێتدیران و بئله‌لیکله انسانێن عقل، معرفت و دویغوسونون دیلی سایێلان، قلم‌دیر.
۱۴. قوْرا پیشیرن‌آی (تیر)، قلم گۆنو، بو ساحه‌ده چالێشانلارا موبارك اوْلسون.🌻💐
@SancaqDergisi
@MuncuqAz
/channel/Sancaq_media/7511
🔴⚫️🔴
⭕️پلاستیک ایچه‌جک قابلارێ‌نین سوْنو هارا گئدیب چێخیر؟!
🔶بو کلیپی ایزله‌یین، عاشورا و تاسوعا گۆنلرینده یاشام چئوره‌سی حمایتچیلرینه قوْشولون.
🔷ناغێل‌لار! اوشاقلار و یئنی‌یئتمه‌لر اۆچون! (آذربایجان تۆرکجه‌سینده سسلی ناغێل‌لار و کارتون)
@SancaqDergisi
@MuncuqAz
@bilimsesi
/channel/Sancaq_media/7507
.
✍️#سوسن_نواده‌رضی
تاريخين درسين بوراخ، آد – سانێ بوْشلا، سن منی
سئوگی جغرافیسینه عنوان دڲـيل، سولطان گتیر!
سیزه چوْخ دارێخیریق عزیز استادێمیز. هر گۆندن داها دینج یاتاسێز.🖤🥀
@SancaqDergisi
@MuncuqAz
/channel/Sancaq_media/7505
⭕️سارا ایدی، قارا ایدی، من ایدیم!
✍️یازان: #عزیز_سلیمانی (آراز)
سارا ایدی، قارا ایدی، من ایدیم! ایسته‌دیک گئدک یوْلمایا، من دوردوم، اوْنلار اوْتوردو! اوْنلار دوردو، من اوْتوردوم! بیر بیریمیزین اۆزونه باخێب، یارێم ساعات دورون – دورون دئییب، سوْنوندا آللّه آللّه‌لا قُل هو وآللّه‌لا دوردوق آیاغا! بیر آددێم آتدێم، سارا آسقێردی! اوْتوروب صلوات چؤیۆردوک! قالخێب قاپێدان چێخاندا، بیر آددێم آتدێم، قارا اێشقیردی!
اوْتوروب حمد سوره اوْخودوق! دوروب قاپێدان چێخاندا، قاباغێمیزا قارا ایت چێخدی! آللّه و اکبر! قایێدیب گیردیک ائوه! یارێم ساعات آللّه آخرین آیدێنلیق ائله، دئیه‌ندن سوْنرا دوروب چێخدیق تنگییه...
گؤردۆم اوْراق قالێب، دئدیم:
- سارا! گئت اوْراغێ گتیر.
گئدیب کَرکینی گتیردی! باشێنا بیر قاپاز سالدێم. دئدیم:
- قارا! گئت اوْراغی گتیر.
گئدیب دَرگازی گتیردی. بئکۆرروغونا قالدێم! درگازی الیندن آلدێم. دئدیم:
- داش گۆنوزه! آستا گئدین، اوْراغێ گؤتۆروم گلیم.
یئیین‌لشیب اوْراغێ گؤتۆروب، قاپێدان چێخاندا گؤردۆم سارا گلیر! مئزر یادێندان چێخمیشدی! گۆددوم گؤتۆروب گلدی، آیاقلاشاندا قاباغێمیبزا قارا گلدی! یابا یادێندان چێخمیشدی! گۆددوک گؤتۆردو گلدی.
تنگه‌دن چیخاندا گۆن گؤزۆموزه تۆشدو، گؤردۆک چئشتی سوْیوشوب! قایێتدیق چای قوْیوب گئدک. سارایا دئدیم:
- اوْجاغێ یاندێر.
قارایا دئدیم:
- سو گتیر.
چایدانێ آساندا گؤردۆم گؤ...ۆ یوْخدور! سارایا دئدیم:
- گئت ائویزدن چایدان گتیر.
گئتدی گلدی، دئدی:
- قولپو یوْخدور!
قارایا دئدیم:
- چایدان گتیر.
گئتدی قایێتدی، دئدی:
- قاپاغێ یوْخدور!
گؤردۆم اۆچو بیره، بیری هئچه دڲمز! دئدیم:
- گلین سو آپاراق.
کۆزه‌نی دوْلدوروب چێناغیما قوْیاندا قولپو تۆشدو! وئردیم سارایا، سارانێن الیندن تۆشدو اوْووق اوْووق اوْلدو! باخدێم قارایا، دئدی:
- سویو بوْشلایێن ساعات اۆچدو!
قایێدیق ناهار قوْیاق، ایکی یومورتا چالدێم. بیری لاخ چێخدی، بیرین تاوا سێخدی! سارایا دئدیم، گئتدی ایکیسین گتیردی. چالاندا بیری بیجه چێخدی، بیریندن جۆجه چێخدی! قارایا دئدیم! دئدی:
- توْیوغوم یومورتادێ، یومورتاسێن تێخدی!
گلدیک قێزارتما قوْیاق، دئدیم:
- یئرآلما مندن، سوْغان قارادان، یاغ سارادان!
یئرآلمانێ سوْیدوم. قارادا سوْغان اوْلمادی! سارادا یاغ! اۆز – اۆزه باخدێق! آج سوسوز یوْلا تۆشدوک. ایکی آددێم آتمامێشدیق، گۆن باتدێ ائوه قایێتدیق! قارانێ ائششک یێخدی! سارانێ ایت قاپدێ! من ده قالدێم باشێما دؤڲه - دؤڲه!
@SancaqDergisi
/channel/Sancaq_media/7504
«#سانجاق»، سیاسی- اجتماعی مهدتمدن گۆنده‌لیگی‌نین ۲۴۹۶. سایینداکی تۆرکجه صفحه
@SancaqDergisi
🌐 https://www.instagram.com/sancaq2
🌐 https://instagram.com/asanews.ir
⭕️قره قوْچاق «پَریزاد»
✍️یازار: عیسی غریبی کلیبر
🔷تۆرکجه‌یه چئویرن: #سوسن_نواده‌رضی
✏️یازییا گئچن: #شبنم_توحیدی ـ سانجاق گۆننامه‌سی‌نین سوْروملوسو
📸عکاس: اۆلکر تبریزلی
۲۳. بؤلۆم
پریزاد باشێنی ایکی اوْوجونون آراسێندا توتوب، برک برک سێخارکن، اؤز – اؤزۆنه دئدی: «آجلێقدان می اؤله‌جَـڲیک؟! یوْخسا کندیمیزین ایشی بیتیب، هر شئی و هر کس یوْخ اوْلوب، گئده‌جک می؟ نه یامان بلایا دۆشدوک یوْخ! بیر ایشلر گؤرمه‌لی، چاره‌سینی بولمالێ‌ییق. بونجا آرواد – اوشاغێ چؤلده گۆنشین آلتێندا اؤز باشێنا بوراخماق اوْلماز کی!
پریزاد، بیر آز اؤزۆنه گلینجه، اوجادان تحکّم‌آمیز سسله دئدی:
- قالخێن آیاغا، باجێ‌لار! چوْخ ایشیمیز وار. اوْنلار گئتدیلر، بو تئزلیکده ده گلمه‌یه‌جکلر. بیز بۆتون ایشلری اؤزۆموز اله آلمالێ‌ییق.
هئی مارال! قایغێ‌لانماغینا گرک یوْخ. بو گئجه‌دن گلیب، بیزیمله قالاجاقسان.
تیمور بابا! گئت آللّهێنا شۆکر ائله، جوان اوْلسایدێن سنی ده آپاراجاقدێلار.
سئوگی خالا! غصّه ائیله‌مه، اوْغلانلارێن گئتسه ده، اؤزۆم وارام، نیگران اوْلما. هم‌ده نوه‌ن «تاپدێق»، کیچیک اوْلسا دا، بیرر ارکك سایێلیر یئنه...
پریزاد، هر کسی اؤز دیلی ایله دیندیریب، دیله توتور، اوْووندوروردو. و بئله‌لیکله جماعتی ائوینه – ائشیڲینه گئتمه‌ڲه یوْللاندێردی.
فوْجا قوْشولوب، گئتمه‌ین تکجه گنج ارکك «سولدوز» ایدی. اوْ، بیر بوجاقدا گیزلنمیشدی و فوْج گئدیب گؤزدن ایتمه‌یینجه ده، گؤزه گؤرسنمه‌دی. قوْناقلێغین ایلک گۆنونده بایێلیب، یئره یێخیلماسی اۆزوندن علیمراد خانێن غضبینه گلن سولدوز، اوزاقدان – اوزاغا وضعیتی گؤرۆردو و هامێ داغێلیشاندان سوْنرا، پریزادێن یانێنا گلیب، دئدی:
- قارداشێن منی کنددن قوْوموشدو. سن منی باغێشلایاجاقسان مێ؟
پریزاد، سولدوزو گؤرۆنجه سئوینیب، دئدی:
- هله‌لیک سن بو کندین بیریجیک گنج ارکَـڲی‌سن، و بلکه ده أن عقللی‌سی، نه یاخشێ کی، گؤنۆللو ایسته‌ینده سن اوْردا یوْخیدین، چوْخ سئویندیم. نه ایسه، بو سؤزلرین یئری دڲیل، ال – اله وئریب، امکداشلێغیمیزلا کندیمیزی اداره ائتمه‌لی‌ییک.
سولدوز دئدی:
- علیمراد خانێ، منیم آهێم توتودو کی، شن‌لیکمراسمی بؤیله عزایا دؤنۆشدو.
پریزاد، اوْنون سؤزۆندن اینجیییب، اوْنو قێنادی:
- سولدوز! بو نه سؤزدۆر؟ اوْ منیم قارداشێم‌دیر.
سولدوز، پشیمانچێلیق دویوب، دئدی:
- باغێشلا پریزاد. آللّه سنه عمر وئرسین کی، تقصیریمدن گئچدین.
پریزاد جواب وئردی:
- البته کی، سنی باغێشلاییرام. آنجاق بو گۆندن اعتباراً سنین یۆکون چوْخ آغێر، ایشین اوْلدوقجا چتین‌دیر. سن اللی ارکك‌جه ایشله‌ییب، ایکی یۆز ارکك یئرینه فیکرلشه‌جکسن! ایندی یاردێم ائت، تسکین‌لیك وئره‌رک، ائولرینه سارێ یؤنه‌لسینلر.
اوْ گۆن اوْلدوقجا زوْر بیر گۆن اوْلدو. پریزاد، یۆز یئره بؤلۆنموشدو. اؤنجه‌کی گۆنلر، یعنی قوْناقلێق سێراسینداکی کیمی هر طرفدن ساز – آواز سسی دڲیل، هر ائودن آغلایێب، اوْخشایێب، سێزیلداماق سسی ائشیدیلیردی. مال – داوارلار کۆچه‌لرده، اؤرۆشلرده صاحبسیز قالێب، آوارا – سرگردان دوْلاشێردیلار. تارلالاردا، اوْرمانلێقدا هیچکیمسه چالێشمیردی.
اوْجاقلار توتمه‌ییب، ائولردن پیشیر – دۆشور قوْخوسو گلمه‌ییردی. در – دیواردان، یئر – گؤڲدن، غم – غصّه یاغێردی. اوشاقلار بیر تینده مێسیب، دیزلرینی قوجاقلایێب، سانکی آتالارێ‌نین یاسێنا بوْغولموشدولار.
کند، ماتم قوْخویوردو. دیری‌لری بئله اؤلۆیه بنزه‌ییردیلر. اومودلا سئوینج کنددن کؤچمۆشدو. پریزاد، کند اهلی‌نین حال و روزوندان خبر آلسشێن دییه، بیر به بیر ائولره باش چکیب، عائله‌لری یوْخلایێردی و اومود وئریجی سؤزلری ایله آرواد – اوشاقلارێ اۆرک – دیرک اوْلوردو.
اوْ، پروانه کیمی کندین باشێنا دوْلانێب، ائولری گزیردی.
اوْ گئجه، سحره کیمی یاتمادێ پریزاد. سانکی آیێق اوْلارکن، جماعتین امن – آمانلێقدا اوْلماسێندان امین اوْلوردو. ائرته‌سی گۆن، مصلحت – مشورت ائدیب، عمومی راحاتلاتماق اۆچون پریزاد، هر کسی علیمراد خانێن قوْناقلێغی اوْلان یئره چاغیردی. هامێ اوْردا توْپلاشدێقدان سوْنرا، پریزاد آیاغا قالخێب، دئدی:
- قارداش‌لار، باجێ‌لار، عزیز بالالارێم! بیز هر زمان بوردا راحات حیات یاشامێشیق. بوندان بؤیله ایسه، حیاتێمیز داها دا چتین‌لشه‌جک. ارکك‌لریمیز، اؤز ایستکلریله ساواشا گئتدیلر و بو بیزیم اۆچون شرفیمیز سایێلمالی‌دیر.
🔻قایناق؛ «مهد آزادی» نشریه‌سی – چهارشنبه ۳۰ مهر ۱۳۷۶
#آردی_گلن_ساییدا...
@SancaqDergisi
/channel/Sancaq_media/7500
«#سانجاق»، سیاسی- اجتماعی مهدتمدن گۆنده‌لیگی‌نین ۲۴۹۵. سایینداکی تۆرکجه صفحه
@SancaqDergisi
🌐 https://www.instagram.com/sancaq2
🌐 https://instagram.com/asanews.ir
⭕️یازێب، اوْخوماق أن گؤزل مشغولیتدیر
✍️یازان: #منصور_فتوحی
دئییرم امکلی (بازنشسته) اوْلماق دا چتین درددیر. آدامێن ایش – پئشه‌سینی الیندن آلێب، ائوه گؤندَریرلر. سن ده باشقا بیر ایش قوْشابیلمه‌سن، گئدیب، ائوده آروادلا دیز – دیزه اوْتوروب، یا اوْنون ایشلرینه قارێشیب، اؤز یئرینی آجێ سالێرسان! یاداکی بیر گۆشه‌ده اوْتوروب، اؤز – اؤزۆنه دانێشیرسان!
ائله بونا گؤره قادێنلار دا ائوده اوْتوران کیشی‌لری سئومیرلر. هله من بازنشسته اوْلدوقدان سوْنرا بؤیۆک باجیم منیم امکلی اوْلدوغومو ائشیدیب، منه تبریک دئدی، خانێمیما تسلیت!
سببینی ده سوْروشاندا «کیشی چؤل قوشودور. کیشی دئدیڲین گۆن چێخاندا چێخار، گۆن باتاندا باتار. نه‌دی آخێ! سحردن آخشاما خانێمین دیزی‌‌نین دیبینده اوْتوروب، گؤردۆڲو هر ایشه قارێشیرلار!
حیطی یویورسان، دئیینیر! بیر چێراق اضافه یانێرسا دانێشیر. هارا گئتمک ایسته‌ییرسن مانع اوْلور. بیریله تلفوْنلا دانێشیرسان «بو قدر ده تلفوْنلا دانێشماق اوْلار!» - دئییب، آدامێن قانێنی قارالدێر. هله ائوه قوْناق گلن خانێملارلا بئش – آلتی کلمه خصوصی دانێشماق ایسته‌سن، اوْنو دا بیلمک ایسته‌ییر.
من بیلمیرم، بیرینه قارغێش ائتمک ایسته‌سن «اللّه اَرینی ائوده اوْتوراق ائله‌سین، دئسن یئتر» - دئییب، یوْلداشێمین اۆره‌ڲینی اۆزدو.
سوْنرا دا «باخ، ائوده اوْتوران کیشی‌نین بیری لیلا خانێمین اَری‌دیر. یازێق امکلی اوْلدوقدان سوْنرا، ائوده اوْتورماسێ‌نین اۆستونده هر گۆن بیر بیریله ساواشدێلار.
ایش اوْ یئره چاتدێ کی، یازێق کیشی «سن منی یوْخ سای! سن منی اؤلمۆش بیل!» - دئدی. سوْنرا دا حیاتدان استعفا وئریب، بیر اوْتاغا گیردی، سحردن آخشاما، آخشامدان دا سحره، ساده‌جه یاتماقلا مشغول اوْلدو!
اوشاقلاری بو وضعیتدن نگران اوْلوب، «بو قدر ده یاتماق اوْلماز آخێ!» - دئییب، مسئله‌نی آراشدێردیلار. نهایت، بللی اوْلدو کی، کیشی یوخودان آیێلاندا یئنه ده یوخو داواسێ آتێب، دوباره یاتێرمیش!
واللّه منجه بو پروْبلملرله اَل‌به‌یاخا اوْلماقدانسا، یازێب – اوْخوماق نعمتیندن فایدالانما أن گؤزل مشغولیتدیر.
(۱۴۰۴/۱/۶)
@SancaqDergisi
/channel/Sancaq_media/7497
📚مین ایل ناغێل کتابیندان
⭕️قار کرالیچه‌سی
✍️فارسجایا چئویرن: زهرا سعید بهر
🔷تۆرکجه‌یه چئویرن: #گۆنش_امانی
🔶«انجمن تدوین برنامه‌ریزی شده متون» تألیفی، «هزار سال قصه» کتابێندان ترجمه اوْلمۇش
آلتێنجی بؤلۆم
مارال دئدی: اوْرا هر زمان قار- بوزلا دوْلودر. اوْرانێن قارلێ دۆزلرینده اؤزگۆرجسینه قاچماغێن نه قدر لذتلی اوْلدوغونو بیلمیرسیز! کرالیچه‌نین یایلێق ائوی اوْردادێر. آما سارایێ قوزئی قوطوبا یاخێن «اسپیتزبِرگ» آدێندا بیر آدا دادێر.
گرتا بیرآه چکیب دئدی: یازێق کای! یوْل کسه‌نین قێزی دئدی: «سوس! دینمه یاتێم، یوْخسا بو پیچاغێ سوْخارام سنین قارنێنا!»
سحر گرتا گؤڲرچینلرله، مارالێن دئدیکلرینی یوْل کسه‌نین قێزینا دئدی. یوْل کسنلرین هامێسی گئدندن سوْنرا قیز مارالا دئدی: «چوْخ گؤیلۆم ایستردی هر گۆن بوْغازێنی بو پیچاقلا قێدیقلییام، آخی بیلمیسن قوْرخاندا نه گۆلمه‌لی اوْلورسان. اما اوْلسون من سنی بوراخێرام بو قێزی لاپونی‌ده قار کیرالیچه‌سی‌نین سارایێنا یئتیره‌سن.»
مارال سئوینجیندن اؤز ایچینه سێغماییردی. قێز گرتانێ قالخێزیب، مارالێن دالێنا میندیریب، اوْنو برکدن باغلایێب دئدی: گل چکمه‌لرینی گئی، هاوا چوْخ سوْیوقدور. اما من بو ألجکلری سنه وئره بیلمه‌رم بولار چوْخ گؤزلدی. بولارێن یئرینه آنامێن ألجکلرینی سنه وئریرم، ایسته‌میرم سنه سوْیوق دڲسین.»
گرتا سئوینجیندن آغلایێردی. قێز دئدی: «آغلاماق یئتر! من سنین آغلاماغێنی سئومیرم، سن گره‌ک گۆله‌سن. گل بو دا ایکی چؤرک له بوریان اوْلموش بیر قوزو بودودور. یوْلدا آجلێقدان سینسیمه‌یه‌سن.» سوْنرا قاپێنی آچێب، مارالی بوراخدێ کی یوْلونو توتوب، گئتسین: «گئت! قاچ گئت! آنجاق بو بالاجا قێزدان موغایات اوْل.»
گرتا قێزا أل ساللادێ، مارال کوْللوقدان گئچیب، مئشه‌نی، باتاقلێغی*، آلاقلێغی* گئچیب، وار گۆجویله قاچێب، نئچه گۆندن سوْنرا لاپونی‌یه یئتیشدی.
لاپونی‌ده ائولرین هئچ بیری‌نین قاپێسی یوْخ‌ایدی. بو اۆزدن گرتا مارال‌لا اوْرا چاتاندا، ائوین بوْروسونو تێققیلداداراق، چالدێلار. بیر خانێم اوْنلارا «بویور» دێییب ائوه گئچیرتدی. ائو چوْخ سێجاق* ایدی، بو اۆزدن گرتا چکمه‌لریله ألجکلرینی چێخارتدی. مارال اؤنجه اؤزو، سوْنرا دا گرتانێن باشێنا گلنلری خانێما سؤیله‌دی. خانێم مارالێ دینله‌دیکدن سوْنرا دئدی: کرالیچه‌نین باغێنا چاتماغا هله اوْن‌بئش کیلومتر ده گئتمه‌لیسیز. بالاجا قێزی اوْرایا آپار، اوْنو قێرمیزی توت کوْللاری‌نێن یانێندا ائندیر، سوْنرا حێزلی* بورایا گئری دؤن.
خانێم یئنیدن گرتانێ مارالا میندیردی. مارال چاپاراق اوْرادان اوزاقلاشدێ. بیردن گرتا اوشودو، دئدی: وای! چکمه‌لریمله ألجکلریم قالدێ. آما مارال اۆره‌ک ائله‌مدی* دورماغا. او قاچدی- قاچدی قێرمیزی توتلارێن کوْلونا یئتیشدی. اوْرادا گرتانێ ائندیردی. اوْنلار قوْل- بوْیون اوْلوب آغلاشدێلار. سوْنرا مارال دورمادان، آرخاسێنا باخمادان، گلدیڲی یوْلو قایێتدی.
یازێق گرتانێن او سوْیوقدا نه آیاغێندا چکمه‌سی وارایدی، نه ألینده ألجه‌ڲی. او باشاردێغی قدر قاچدی. آنجاق بیر توْپبا قار قاباغێنی توتموشدو، قوْیموردی قاچسێن. هاوا دورو ایدی. قار یاغماقدان بیر ایز گؤرۆنموردو، سانکی قار یئردن قاینایێب چێخیردی و ائله‌جه انایین شکیل‌لرده گؤرۆنوردو. بعضی قار دانه‌لری قوْرخمالی کیرپی‌لر گؤرۆنوشونده گؤرۆنوردولر. بعضی‌لر ایلان کیمی قێوریلمیشدی، بعضی‌لری آیێ بالاسێنا بنزه‌ییردی. اوْنلارێن هامێسی پارلایێردی، قار کیمی آغ- آپباق ایدی. بونلار کرالیچه‌نین قوْروقچولاری ایدی.
🔶ایضاحلار:
باتاقلێق: فا. مرداب
آلاقلێق: فا. علفزار
سێجاق: ایستی
حێزلی: سرعتله، فا. سریع
اۆره‌ک ائله‌مدی: جرأت ائتمه‌دی
#آردی_گلن_سایێدا...
@MuncuqAz
/channel/Sancaq_media/7495
«#سانجاق»، سیاسی- اجتماعی مهد تمدن گۆنده‌لیگی‌نین ۲۴۹۳. سایێنداکی تۆرکجه صفحه
«مونجوق» صفحه‌سی، تۆرکجه یازێب - اوْخوماغێ سئون اوشاقلار و یئنی‌یئتمه‌لریمیز اۆچون چیخیر.
@SancaqDergisi
@MuncuqAz
🌐 https://www.instagram.com/sancaq2
🌐 https://instagram.com/asanews.ir
■ 2492 مین شماره روزنامه سیاسی واجتماعی مهدتمدن در 8 صفحه به زبان های ترکی و فارسی روز یکشنبه 8 تیرماه 1404
🔹فایل pdf صفحات نشریه در لینک کانال تلگرام مهدتمدن⬇️
/channel/mtnewspaper
🌐 www.mtnews.ir
🌐 www.asanews.ir
☎️ 04135550663
📳 09362822918
🆔 @asanews
⭕️دیلنچی و خسیس ( شفاهی خَلق ادبیاتی)
✍️کؤچۆرن: #تانسو_خیاوی
قوْجا دیلنچی تانێمادیغی بیر کنده گله‌رک بؤیۆك، قشنگ بیر ائوین قاپێسینی دؤڲدۆ. بو ائوین یانێندا قاپێسیندان یئکه قێفیل آسێلان هۆندور بیر یئر واردێ. بو ائوده ایسه اؤز خسیس‌لیڲی ایله بۆتون محلّه‌ده یاخشی تانێنان بیر وارلێ یاشایێردیلار. اوْ چوْخ وارلێ اوْلماغێنا باخمایاراق، هئچ واخت، هئچ کسه ال توتمازدی.
- سن منه بیر پارچا پیی، یا بیر آز سۆد وئره بیلرسنمی؟ - دییه دیلنچی اوْنا آغێز آچدی.
- یوْخ، وئره بیلمه‌رم! – دییه خسیس آجێقلاندی. ردّ اوْل بوردان!
- بلکه سنده بیر اوْووج بوغدادان، پاخلادان تاپێلدی! – دییه آجێندان رحمسیز آداملارێن قارشێسیندا آلچالماغا مجبور اوْلان قوْجا سؤزۆنه دوام ائتدی.
- منیم هئچ نه‌ییم یوْخدور! – دییه خسیس جواب وئردی.
- اوْندا منه بیر تیکه چؤرک وئر، سنه دوعاچێ اوْلارام! – دییه دیلنچی اوْندان خواهش ائیله‌دی.
- گئت! منیم چؤره‌ڲیم یوْخدور! – جوابێنی ائشیتدی.
- اوْندا هئچ اوْلماسا منه بیرجه قۇرتوم سۇ وئر. سوسوزلوقدان جیڲریم یانێر. – دییه خسیس جواب وئردی.
دیلنچی دئدی:
- آی اوْغول! اوْندا داها بورادا نییه اوْتورموسان! دور آیاغا، دۆش قاپێ‌لارا، مرحمتلی آداملاردان پای دیله!! سن کی، مندن ده کاسێبسان!
(یکشنبه ۱۱ شهریور ۱۴۰۳ – خیاو شهری)
@MuncuqAz
/channel/Sancaq_media/7490
«#سانجاق»، سیاسی- اجتماعی مهدتمدن گۆنده‌لیگی‌نین ۲۴۹۱. سایینداکی تۆرکجه صفحه
@SancaqDergisi
🌐 https://www.instagram.com/sancaq2
🌐 https://instagram.com/asanews.ir
⭕️هفته‌لیک فالینیز
✍حاضیرلان: #اوْلجای_مرآتی
🔸قۇیرۇق دوْغان (آسلان، مرداد): بو هفته قازانان سیز اوْلاجاقسێز. توتدوغوز یوْل دوْغرو نظره گلیر. سارسێلماز ارادده ایله ایره‌لی گئدین، آنجاق باشقالارێن ان کیچیک حقیندن بئله، غفلت ائتمه‌یین، شاعر دئییر: مین کؤنۆل هؤرمۆشدوم، بیرینی قێردیم/ دئدیلر بیر- بیرین اؤده‌دی، پاهوْوْوْ! آلێش- وئریش فکرینده اوْلساز، تانێنماز- بیلینمز آداملا معامله‌یه گیرمه‌یین همی ده، تلسمه‌یین، دورومون یاخجێلاشماغێنا اومودوز اوْلسون. صدقه ده یادێزدان چێخماسین.
🔸زۇمار (باشاق، شهریور): بو هفته دینی یێغینجاقلاردا بولوندوغوزدا، اۆره‌ڲـیزی صاف ائله‌یین. دینین حسابینی دینچی‌لره قاتمایێن. سانێرام بیرآز ایناملا یاناشسانێز نئچه ایللیک آرزێز حیاتا گئچه بیلر. بو آرادا دۆنیادان گئدنلریزین ده حقینده احسانی اونوتمایێن. بیر قوْنشونون ایشی سیزین الیزله حل اوْلا بیلر، اوْنون دا خئیر دوعاسێنی قازانماغا چالێشین. ساغلاملێغیزلا باغلێ، یای میوه‌لریندن اوْلدوقجا فایدالانێن ایللاه دا اریک دنه‌سی!
🔸خزل (ترازی، مهر): بو هفته مکتبلی‌لر و اؤڲره‌نجیلره خبرلر گله‌جک البته کی سئویندیریجی خبرلر! چوْخدان‌دیر سیزده اوْلان بیر قابلیتی، باجارێغی نمایش ائتدیرمک فکرینده‌سیز آنجاق بیرآز اوتانجدان، بیرآز دا اوغورلو آلێنماماق قوْرخوسوندان اؤزۆزه جرأت وئره بیلمیرسیز، منجه بو هفته وختی و یئری‌دیر! نظره آلساز کی هر یئنیلمک اوغورا بیر پیله‌دیر، داها دا جسارتلی اوْلاجاقسێز. یاشێنیز 50-دن یوخارێ‌دیرسا، ایلک فرصتده ساغلاملێغیزی بیر طبی مرکزده یوْخلادێن.
🔸قیروْو (عقرب، آبان): بو هفته داغچی اوْلساز بئله، داغا گئتمکدن چکینین، سیزین نظرده توتدوغوز داغدا قاسێرغا باش وئره‌جک، بونو من دئمیرم، گؤیون بولوتلارێ دا یوخ، اولدوزلارێ دئییر! مذهبی دسته‌لر یاخود دا هئیئته نذیریز وارسا بو گۆنلر یئرینه یئتیرین، بیلیرم، بیرآز الیم دالێدی- دئییرسیز! آما برکتین وئر‌ر آللاه. بیر ایتگی ده طالعیزده گؤرۆنور، انشاللاه کی خئیر اوْلار، آتا- آنازا محبت ائمک، (دیری یا اؤلۆ اوْلدوقلاری‌نێن فرقێ یوْخدور) طالعیزی دڲـیشه بیلر.
#آردی_وار...
@SancaqDergisi
/channel/Sancaq_media/7488
⭕️منیم یوخوم
✍️یازان: #آیدین_خلفی_زینگیر
گؤردۆم اطرافیمی آلێبلار، منه سارێ باخان گؤزلرین شولوقلوغوندا بوْغولوردوم. سانکی درین بیر سویا دۆشموشدوم «نفس چکسم، ایچیمه سو دوْلاجاق، بوْغولاجاغام!» - دئیه، نفس آلماقدان قوْرخوردوم.
غیری ارادی اوْلاراق آرادا قێریق بیر نفس چکیردیم، هر آغێزدان بیر سس چێخیردی، سسلره باخێنجا باشێم گیجه‌لیردی.
بیری دئییردی: من آتالارێ‌نین روحویام، نییه ناخلف چێخدین!
بیری دئییردی: من ائلینی تمثیل ائدیرم، نییه منه دؤنۆک چێخدین!
اوْ بیریسی دئییردی: من آتالارێندان قالان میراثینی تمثیل ائدیرم، نییه منه صاحیب چێخمادین!
باشقا بیریسی دئییردی: من وارلێغینام، نییه منی اونودوب، باشقا وارلێغا قۇشاندێن.
اؤزۆم – اؤزۆمه «بو نه ایش ایدی من قالدێم! راحات – راحات یاشایێردیم، بونلار کیم ایدی، هاردان چێخدی! منیم راحاتلێغیما آجێ قاتدێلار.» دئیه، بو حالێملا دۆشونوردوم.
...
أن سوْندا بیری گلدی «من سنین آنا دیلینم. نییه منه باخمێرسان؟ دانێشمیرسان، یازمێرسان!» - دئیه بارماغێنی دۆز گؤزۆمه سارێ گتیردی «اوْیان – بویانا باخما، منه باخ، لاپ گؤزۆمون ایچینه باخ!» - دئدی.
بارماغێ گؤزۆمو دئشه‌جکدی، یوخودان آیێلماسایدیم!
...
منی تر گؤتۆرموشدو. بیر آز سو ایچیب، سرینله‌دیکدن سوْنرا، ناخلف، دؤنۆک، ساتقێن، مانقورد، قارێن‌قولو، سَرسری، باشێ‌بوْش، یاراماز چێخماییم دئیه، قلمی آلێب، باشێما گلنلری سیزه آنا دیلیمده / تۆرکجه / یازدێم.
@SancaqDergisi
/channel/Sancaq_media/7485
⚫️عاشورا، آزادلێق و حرّیت مکتبی...
✍️حاضرلایان: #شبنم_توحیدی – سانجاق گۆننامه‌سی‌نین سوْروملوسو
ایکینجی بؤلۆم
کیمیسی مسجد قارشێسیندا میز چێخارداراق، دفتر – قلمله سلاحلانێر، بؤیۆك ازدحامێن گلمه‌سیندن استفاده ائد‌ه‌رک، جماعتدن پول قوْپارێر کی، اؤلۆلرینیزی «یاسین»له یاد ائده‌جـڲم! نئچه – نئچه قلملر همین گۆن چؤرک آغاجێنا چئوریلیر. کیمیسی حقیقی احتیاجلی‌لارا قارێشاراق، مادّی وضعیتینی بیر آز دا اوْلسا، یاخشێلاشدیریر. دیلنچی‌لیڲی اؤزۆنه حرفه ائتمیش طایفالارێن اصل بایرام گۆنو ایمیش بو گۆن! هله بو ازدحاما ساپ – ساغلام گلیب، اؤزۆنو شکست کیمی قلمه وئرن، بوْینونو، قوْلونو أڲیب، صفتینی عیبه‌جر حالا سالان ماهر اوْیونچولارێ دئمیریک! «امام حسینه خاطر!» شعاری ایله معنوی دڲرلرین مادّی‌لشمیش حاللاری باش وئریر. کیمیسی قوْلا باغلانان قارا پارچا ساتێشینا گیریر، کیمیسی داها هانسێ یوْللارلا عاشورادان فایدا‌لانماغا چالێشیر. البته، اؤز مادّی منفعتی نامێنا! نه برکتلی ایمیش بو عاشورا!
اؤزۆ ده بۆتون بونلار مسجدلرین حیطینده، بیر چوْخ حاللاردا دین خادملریمیزین گؤزۆ اؤنۆنده، اوْنلارێن اشتراکی ایله باش وئریر! بس بو مراسملره آخێشان ازدحام، عاشورا گۆنۆ باش وئرمیش حادثه‌لر باره‌ده نَسه اؤڲرنه بیلیرمی؟ غریبه‌دیر کی، بیر چوْخلارێئمیز «امام حسین»ـی آنماق اۆچون اؤز آیاغێمیزلا مسجده گئدیریک، اوْرادا «عاشورا بیزنِسی‌‌نین» شاهدی اوْلوروق، نذر – نیاز ائدیریک، آما کربلا فاجعه‌سی‌نین ماهیتینی آچێقلایاجاق بیریسینی گؤرمۆروك!
تاریخیمیزه نظر سالاق. اوّللر مسجدلرین حیطینده، یاخود شهرین مرکزی میدانلارێندا آتا – بابالارێمیز طرفیندن کربلا فاجعه‌سی صحنه‌لشدیریلیردی. «شَبیـه» آدلانان تئاتر صحنه‌سی قورولوردو. انسانلار گلیب بو صحنه ایله تانێش اوْلور، سانکی کربلا فاجعه‌سی‌نین جانلی اشتراکچێسینا چئوریلیردی. بو صحنه‌لر عؤمۆرلوک اوْلاراق اوْنلارێن یادداشێنا حکّ اوْلوردو. سوْنرا مسجد اماملارێ، آخوندلار، دین عالِملری منبره چێخیب، ازدحام قارشێسیندا «امام حسین»ین قهرمانلێغینی آنلادێردی.
ملّی فوْلکلوْروموزدا، ادبیاتێمیزدا و موسیقی مدنیتیمیزده یئر آلان مرثیه‌لر، نوحه‌لر بو بیلگی‌لرین سوْنوندا جوشا گتیریردی حسین عاشقلرینی...
گۆنوموزون عاشورا مجلسلرینده معین قدر بی‌برنامه‌لیک، قارما – قارێشیقلیق حکم سۆرور، آغێز دییه‌نی قولاق ائشیتمیر. کیمیسی «اماملارێمیزی قتله یئتیریبلر»، کیمیسی «امام حسینی سوسوز قوْیوبلار» دئییب، بو «بیلیکلریله» یوْلا وئریر عاشورانی!.
چاغداش جمعیتیمیزده ایسه امام حسین مکتبی لازمینجه تانێنمادیغی اۆچون، «ایکی عمی‌اوْغلو بیر بیرینی قێریب»، «حاکمیت دعواسی گئدیب»، کیمی یانلێش فیکرلر دیله گتیریلیر. هرچند کی، گئچمیشله مقایسه‌ده، ایندی گئنیش تبلیغات واسطه‌لری موجوددور.
عاشورا مراسملری، اؤزۆنده «امام حسین»ین بؤیۆك انسانلێق، توحید، تقوا، فداکارلێق، قهرمانلێق، حق – عدالت، شجاعت، غیرت، صداقت، شهادت مکتبی‌نین روحونو عکس ائتدیرمه‌لی‌دیر...
عاشورا، آذربایجان مدنیتینده باشقا جۆره آنێلیر. انسانلار عصرلردن بری گؤنۆللو اوْلاراق، ائل شن‌لیکلریندن، توْی – بایرام ائتمکدن چکینیرلر. عاشورا گۆنو، اوْلدوغو کیمی، بو گۆن ده آذربایجاندا عموم‌ملی حُزن گۆنودور.
یۆز مینلرله وطنداشێمیز همین گۆن مسجدلره، امام حسین مجلسلرینه قاتێلماغا تلَـسیر. هر خلقین، هر ملّتین اؤزۆنه عزیز سایدێغی، یاشاتدێغی بایرام و ماتم گۆنلری وار. اینانجێمیزدان قایناقلانان رمضان (فطر) و قوربان بایرامێمیز اوْلدوغو کیمی، عاشورا ماتمیمیز ده وار. بیز بئله‌ییک! امام حسینی تانێیاق! امام حسین، میلادی تقویمله 8 ژانویه، 626.جی ایل، هجری قمری تقویمله 3 شعبان 4.جۆ ایل تاریخینده مدینه شهرینده دوْغولوب. سئویملی پیغمبریمیز حضرت محمدین(ص) نوه‌سی، حضرت علی‌نین (ع) و پیغمبر قیزی حضرت فاطمه‌نین اوْغلودور. اوْ، 680.جی ایل تاریخینده، محرّم آیێ‌نین 10.جۆ گۆنو، یزیدین امری ایله شهید ائدیلیب.
تاریخده‌کی روْلو حیله‌گرلیکله اسلام خلافتینه یییه‌لنمیش و دیندن اوزاق حیات سۆرَن ظلمکار «یزید ابن معاویه» اسلامی جمعیتده حقیقی محوریندن اوزاقلاشدێریب، حاکیم دایره‌لرین الینده بیر آلتـه چئوریلمَـڲه چالێشیردی. اوْ، جمعیتین بۆتون نفوذلو شخصیتلرینی ده اؤز حاکمیت و اراده‌لرینه تابع ائتدیرمک، خلافتی‌نین ثبوتونو قبول ائتدیرمک ایسته‌ییردی.
حضرت حسین (ع) دورانی‌نین امامی اوْلاراق دینی تحریفلردن قوْرونماق، انسانلارێ دوْغرو یوْلا – صاف اسلاما، یالنێز آللّها بنده اوْلماغا، لیاقتلی حیات سۆرمـڲه دعوت ائتمک، حقیقی، الهی دڲرلری بیان ائتمک مضمونونو گرچکلشدیره‌رک، ظلم و حاقسێزلیغا بوْیون أڲمه‌ییب، اسلامین بیزلره اللّه بویوردوغو کیمی و پیغمبریمیز (ص) اؤڲره‌تدیڲی کیمی چاتماسێنی تأمین ائتدی.
#آردی_وار...
@SancaqDergisi
/channel/Sancaq_media/7510
⚫️عاشورا، آزادلێق و حرّیت مکتبی...
✍️حاضرلایان: #شبنم_توحیدی – سانجاق گۆننامه‌سی‌نین سوْروملوسو
بیرینجی بؤلوم
محرم، مسلمان آذربایجان خلقی اوْچون بیر حُزن آیێ‌دیر. آذربایجان مدنیتینده «محرّملیک» و بو آیێن اوْنونجو گۆنو - عاشورا - بنزری اوْلمایان بیر حادثه‌دیر: ایکی آیا یاخێن ائل شن‌لیکلری گئچیریلمیر، «امام حسین»ین شهادته یئتیریلدیڲی گۆن، یۆز مینلرله مسلمان وطنداشلارێمیز مجلسلره، امامزاده‌لره زیارت آخێشیر، عزادارلیق مجلسلری گئچیریلیر، شربت پایلانێلیر، حالوا چالێنیر، احسانلار وئریلیر... بیر سؤزله، رسما قید اوْلونماسا دا، بو، اصل ائل ماتمی کیمی گئچیریلیر. عاشورا گۆنو کربلادا، پیغمبریمیز حضرت محمّدین (ص) سئویملی عائله عضولری‌نین قانلارێ سو یئرینه آخێدیلیب!
پیغمبر نوه‌سی امام حسین‌ین (ع) ظلمکارلێق قارشێسیندا مردلیک گؤستریب، بوْیون اڲمه‌مه‌‌سی گله‌جک نسللری آزغێنلیقدان، دین آدییلا انسانلێغا دیوان توتان ظالملره، اطاعتکارلێق عنعنه‌سیندن قوْرودو. امام حسین کربلا چؤلۆنده هر شئیندن گئچدی، اسلامی، یاشاتماق اۆچون! بؤیۆک آزادلیق و حرّیت مکتبی یاراداراق، بشریتی آزادلێغا سسله‌مک اۆچون! «امام حسین» ظلمکارلێغا قارشی حقّین – عدالتین مبارزه‌سی سیمبوْلو کیمی تاریخه دۆشدو. اوْ، شعورلو شکیلده لیاقتسیز «خلیفه»یه اطاعت ائتمه‌ییب، اؤلۆمو سئچدی و اصلینده ابدی اؤلمزلیک قازاندێ!..
«امام حسین»ین اؤلمز مکتبی ائله بیر دَڲردیر کی، انسانا آزاد اوْلماغێ، ظلمکار قارشێسیندا دیز چؤکمه‌مَـڲی، حقسیزلیکله بارێشماماغی، دیکته قبول ائتمه‌مَـڲی اؤڲره‌دیر! البته کی، قۇل اوْلماغا، اوْنون – بونون نؤکرچیلیغینی ائتمـڲه آلێشانلار، اللّه رضاسێنی دڲیل، اوْنون – بونون گؤزۆنده خوْش اوْلماغێ دۆشوننلر اۆچون عاشورا دَڲر دڲیل، اوْلا دا بیلمز!
آزادلێق مکتبی‌نین دوامچێلاری یالنێز آزاد، حرّ اوْلماق ایسته‌ینلر اوْلابیلر. عاشورا انسانا اؤز اوْلماغێ و اؤزۆنو یالنێز اللّها بنده ائتمـڲی اؤڲره‌دیر! اؤز اوْلماغێ ایستمه‌ینلر اۆچون بو مکتب یاددیر. اوْنا گؤره ده بئله‌لری امام حسین‌له ساواشیبلار و ائله گۆنوموزده ده ساواشێرلار. اوْنون گرچک دڲرینی، ماهیتینی گیزلدیر، عوام‌لارێن عنعنه‌لرینی «عاشورا» کیمی قلمه وئرمکله، کربلا مکتبینه کؤلڲه سالماغا چالێشیرلار. گویا عاشورا ائله باش یارماق، زنجیر وورماق گۆنو ایمیش.
البته، غیرت مکتبی اوْلان اؤلکه‌میزده، گئچیریلن عاشورا مراسمینده کربلا شهیدلرینه گؤز یاشلارێ دا آخێدیلیر. بعضاً «امام حسین»ـه آغلایانلارا طعنه وورورلار: «کیشی ده آغلایار!؟»
پیغمبریمیزدن بئله بیر حدیث روایت ائدیلیر: «اللّهیم، آغلامایان گؤزدن، سنه سێغینیرام!». بو کلامدا دۆشوننلر اۆچون بیر چوْخ مطلبلر گیزلنیر. حدیثی عبث (بیهوده) یئره خاطیرلامادێق. اوّللر عزادارلێق مجلسلری ائله گئچیریلیردی کی، اوْرا عاجز بیریسی بئله گلسه‌یدی، اوْرادان بیر جنگاور کیمی آیرێلمیشدی. عاشورا گۆنو باش وئرن حادثه‌لری، آردێندان اسیر گؤتۆرولن قادێن و اوشاقلارێن فاجعه‌لرینی خاطیرلاماقلا، اوْنلارێن حسّلرینی یاشاییب، گؤز یاشێ آخێتماقلا دویغوسوز آداملار، بیر جنگاوره چئوریلیر.
گؤزدن آخان یاشلارلا قلبلرده‌کی شیطانی حسّلر، دنیاپرستلیک بدنی ترک ائدیر، داش اۆرک‌لر یوموشالێر، اَریییر. آما عاجزلشمیر، عکسینه، داملا – داملا آخان گؤز یاشلارێ سانکی بیر غیرت گؤلـۆ، مردلیک دریاسی یارادێر. آما مسئله گؤز یاشلاریلا بیتمیر! بو مراسملر ساده‌جه آغلاشماق اۆچون گئچیریلمیر آخێ!..
بو مجلسه قاتیلان درک ائدیرلر؛ بیزی احاطه ائدن رئاللێقدان داها اۆستون دڲرلر موجوددور؛ اللّه سئوگیسی، حق و عدالت، مردلیک، غیرت، ابدی سعادت!.. اوْ شئیلر کی، اوْنلارێن یوْلوندا امام حسین و طرفدارلاری هر شئیلرینی قوربان وئریبلر. بونلارێ درک ائدن کیشی‌نین عزادارلێق مجلسینده آغلاماسێ ضعیفلیک علامتی دڲیل و اوْلا دا بیلمز! عکسینه، عرشه یۆکسلن فریاد سسلری، یانغێلی اینیلتی‌لر هر کسین قلبینده بیر شجاعت، امام حسین مکتبیندن قایناقلانان بیر آلوْو شعله‌سی‌دیر. عاشورادا آخان گؤز یاشلارێ اصلینده انسانلێغا قارشێ ائدیلن ظلملرین، وحشی‌لیکلرین قوربانێنا چئوریلمیش گناهسێز انسانلارا گؤره آخێدیلان گؤز یاشلارێ‌دیر.
گؤره‌سن گۆنوموزده بیزیم عاشورا مراسملرینده آخێدیلان گؤز یاشلارێ دا، عینی اِفکتی (اثری) وئریرمی؟.. بیزلر... بیزلر بو بؤیۆک مکتبی یاشاتمێشیق‌سا دا، هر بیر مسئله‌ده اوْلدوغو کیمی، بوندان دا شخصی منفعت اۆچون استفاده ائدنلریمیز آشکار اوْلوب. آرتێق آز قالا عنعنه‌یه چئوریلمیش بیر سێرا حاللار عاشورا گۆنونده «امام حسین»ین آدێنا و مکتبینه اصلاً اویغون اوْلمایان بیر منظره یارادێب قارشێمیزدا!!
#آردی_وار...
@SancaqDergisi
/channel/Sancaq_media/7508
⚫️محرّم آیێ‌نین ایلک اوْن گۆنو و عاشورا گۆنونده نه‌لر یاشاندێ؟
✍️یازان: #شبنم_توحیدی
بیرینجی بؤلۆم
عزیز اوشاقلار! حتماً محرّم آیێندا بؤیۆکلرین قارا پالتار گئیدیڲینی، محلّه هیئت‌لرینه گئتمکلرینی و عزادارلێق ائله‌دیکلرینی گؤرۆبسوز. بلکه اؤزۆنوز ده بو عزادارلێقلاردا شرکت ائله‌ییب، و یا یاخێندان زنجیر وۇران دسته‌لری گؤرۆبسوز. امّا بیلیرسینیز بو ماتَم و عزا کیمه گؤره‌دیر؟ عاشورا گۆنون حکایه‌سینی ائشیدیبسینیز می؟
محرّم آیێ و عاشورا گۆنونده نه‌لر یاشاندێ و هابئله بو ماتَمین سببینی سیزلرله دانێشماق ایستیرم.
***
بیری وار ایدی، بیری یوْخ ایدی. قدیم زمانلاردا «یزید» آدلێ خلیفه، جماعته ظلم ائدیر، پیس ایشلر گؤرۆردو. بو خلیفه‌نین زمانێندا بیزیم اۆچونجو امامێمیز، «امام حسین (ع)» یاشایێردی.
امام حسین (ع)، امام علی و حضرت فاطمه‌نین اوْغلو و «حضرت محمّد»ین نوه‌سی ایدی. امام حسین (ع) یئر اۆزونده أن یاخجێ انسانلاردان بیری ایدی. انسانلارێ همیشه یاخجێ ایشلره دعوت ائدیب، اوشاقلارێ چوْخ سئویردی. بو مهربان امامێمیز، «یزید»ین، جماعته ظلمۆنو گؤرنده، ناراحات اوْلوردولار و اوْنلارا دئییردیلر:
- «همیشه چیرکین ایشلر گؤرن، جماعته ظلم ائله‌ین انسانلاردان اوزاق دورون.»
جماعتین «امام حسین»ی سئودیڲی، یزیدین پیس حرکتلرینه گؤره، اوْندان نفرت ائتدیکلری سبب اوْلدو اوْ، امام حسین‌ین بؤیۆک دۆشمنینه چئوریلسین.
جماعته کؤمک ائتمک ایسته‌ین امام، «کوفه» اهالی‌سیندن چوْخلو مکتوبلار* آلدێقدان سوْنرا، عائله‌سی و صادق یوْلداشلارێ ایله بیرلیکده کوفه‌یه دوْغرو حرکت ائتدیلر.
امام حسین و اوْنون صَحابه‌لری‌نین* کاروانێ، کوفه یاخێنلیغیندا یئرلشن «کَربلا» آدلێ توْرپاغا چاتاراق دَوه‌لردن یۆکلری بوْشالدێب، چادێرلار قوردولار. کاروانێن یاخێنلیغیندا بیر چای وار ایدی کی، کاروانێن آغ‌‌ساققال‌لارێ اوْ چایێن سویو ایله سو تولوق‌لارێنی* دوْلدوروردیلار.
عزیز اوشاقلار! لاکین مکتوبلار یازان کوفه اهالیسی، «امام حسین»ی قارشێلاماغا گلمک عوضینه، یزیددن پول – خلعت آلاراق، اوْنون دۆشمینه قوْشولوب، امام حسین و اوْنون دوْستلاریلا ساواشا گئتمـڲه حاضیرلاشیردیلار!
امام حسین (ع) و یوْلداشلارێ کی، اوْ زمانێن أن گۆجلو و جسور آداملارێندان حساب اوْلونوردولار، اوشاقلار و قادێنلاری قوْروماغێن فیکرینده ایدیلر. امّا دۆشمنین اوْردوسو چوْخ بؤیۆک ایدی و امام حسین (ع) اوْردوسو جمعی ۷۲ نفر ایدی.
امام حسین و صَحابه‌لری بیر نئچه گۆن کربلادا ایدیلر و دۆشمن سویون آخێشینی اوْنلارا طرف باغلامێشدی! هامێ سوسوز ایدی و اوشاقلار سو ایسته‌ییردیلر!
داش‌اۆرک و آجێماسیز دۆشمنلر، امامێن و اوْنون آداملارێ‌نین چایا گلیب، اوْردان سو گتیرمه‌سینه امکان وئرمیردیلر. اوشاقلار کی، هامێدان چوْخ سوسوز ایدیلر، أن جسور و دۆشمنلردن قوْرخمایان عمی‌لری «حضرت عباس (ع)»ین یانێنا گئدیب، اوْنا دئدیلر:
- عمی جان! بیز سوسوزوق و سو ایسته‌ییریک.
🔷آچێقلامالار؛
مکتوب: نامه
صحابه: یاران
سو تولوغو: مَشکِ آب
#آردی_گلن_سایێدا...
@MuncuqAz
/channel/Sancaq_media/7503
■ 2496 مین شماره روزنامه سیاسی واجتماعی مهدتمدن در 8 صفحه به زبان های ترکی و فارسی روز پنجشنبه 12 تیرماه 1404
🔹فایل pdf صفحات نشریه در لینک کانال تلگرام مهدتمدن⬇️
/channel/mtnewspaper
🌐 www.mtnews.ir
🌐 www.asanews.ir
☎️ 04135550663
📳 09362822918
🆔 @asanews
🔘🔘شاخـسِی؛ آذربایجانێـن محرّم دَبـی
🔻قایناق: ایشیق قاپیسی
@SancaqDergisi
/channel/Sancaq_media/7501
■ 2495 مین شماره روزنامه سیاسی واجتماعی مهدتمدن در 8 صفحه به زبان های ترکی و فارسی روز چهارشنبه 11 تیرماه 1404
🔹فایل pdf صفحات نشریه در لینک کانال تلگرام مهدتمدن⬇️
/channel/mtnewspaper
🌐 www.mtnews.ir
🌐 www.asanews.ir
☎️ 04135550663
📳 09362822918
🆔 @asanews
■ 2494 مین شماره روزنامه سیاسی واجتماعی مهدتمدن در 8 صفحه به زبان های ترکی و فارسی روز سه شنبه 10 تیرماه 1404
🔹فایل pdf صفحات نشریه در لینک کانال تلگرام مهدتمدن⬇️
/channel/mtnewspaper
🌐 www.mtnews.ir
🌐 www.asanews.ir
☎️ 04135550663
📳 09362822918
🆔 @asanews
«#سانجاق»، سیاسی- اجتماعی مهدتمدن گۆنده‌لیگی‌نین ۲۴۹۴. سایینداکی تۆرکجه صفحه
@SancaqDergisi
🌐 https://www.instagram.com/sancaq2
🌐 https://instagram.com/asanews.ir
■ 249،3 مین شماره روزنامه سیاسی واجتماعی مهدتمدن در 8 صفحه به زبان های ترکی و فارسی روز دوشنبه 9 تیرماه 1404
🔹فایل pdf صفحات نشریه در لینک کانال تلگرام مهدتمدن⬇️
/channel/mtnewspaper
🌐 www.mtnews.ir
🌐 www.asanews.ir
☎️ 04135550663
📳 09362822918
🆔 @asanews
⭕️هر زاد داغێلدیغیندا
✍️تۆرکجه‌یه چئویرن: #صادق_کریمی
اۆزونتو ایله اۆمیدسیزلیک بوْمبالانماسێ‌نین اوْرتاسێندا نه ائتمه‌لی‌ییک؟ / آمریکالێ اؤڲرتمن «پِما چُدرُن»ـێن هر زاد داغێلدیغیندا کتابێندان بیر پارچا
***
یاشادێغیمیز چتین گۆنلرده اؤزۆموز هابئله سئودیڲیمیز انسانلارێ قوْروماق اۆچون «پِما چُدرُن»ـێن بو دڲرلی سؤزلرینی یاشامێمیز اۆچون تمل قوْیمالێ‌ییق.
هر زاد داغێلدیغیندا بیر داها نه وقتسه بئله یئنیدن سئوینجی دۇیا بیله‌جـڲیمیزی اؤزۆموزدن سوْروشدوغوموز قدر قایغێ ایله اۆمیدسیزلیڲین سۆرکلی بوْمباسێ اۆزونتولو اوْلا بیلر. ایشلر داغێلاندا یاشامێن مقصدی قایغێ و اضطرابا سوْن قوْیماق و یا آرمانلی یئره یئتیشمک دڲیل. دوْغروسو قاچماغا هئچ بیر یئر یوْخدور و دئمک آغرێ گرچکلیڲین بیر پارچاسێ‌دیر. بوندا عجیبه بیر اؤڲره‌‌نیش وار؛ آیاغێ‌نین آلتێ بوْش اوْلسا بئله، اؤزۆنده سێغاناجاقسێزلیغی دۇیورسانسا، بیر آنلێغا ال ساخلا.
اۆزونتونون بیته‌جـڲینی گؤزلمه‌دن باخ گؤر اؤزۆنله بیر آز داها مهربان اوْلا بیلرسنمی؟
بعضاً شفا آغرێ‌نین یوْخ اوْلماسێ و یا هر نه‌یین اؤز یئرینه قایێتماسی دڲیل. اؤزۆموزده اۆزونتو، دینجه‌لیش، آغرێ هابئله سئوینج اۆچون یئر آچدێغیمیز زامان شفا گله‌جکدیر.
بو چتین گۆنلرده، کَدَر و اۆزونتونو بوْغما. اؤزۆن هابئله سنه گرک‌لیڲی اوْلانلاری گؤزدن قوْیما. نَفَس آل، اؤزۆنه گؤره مهربان اوْل. بو یئترلی قَدَر چوْخدور.
۱۴۰۴/۰۴/۰۵
@SancaqDergisi
/channel/Sancaq_media/7492
«#سانجاق»، سیاسی- اجتماعی مهدتمدن گۆنده‌لیگی‌نین ۲۴۹۲. سایینداکی تۆرکجه صفحه
@SancaqDergisi
🌐 https://www.instagram.com/sancaq2
🌐 https://instagram.com/asanews.ir
■ 2491 مین شماره روزنامه سیاسی واجتماعی مهدتمدن در 8 صفحه به زبان های ترکی و فارسی روز شنبه 7 تیرماه 1404
🔹فایل pdf صفحات نشریه در لینک کانال تلگرام مهدتمدن⬇️
/channel/mtnewspaper
🌐 www.mtnews.ir
🌐 www.asanews.ir
☎️ 04135550663
📳 09362822918
🆔 @asanews
⭕️هفته‌لیک فالینیز
✍حاضیرلایان: #اوْلجای_مرآتی
🔸آزر (یای ، آذر): بو هفته سیز ایکی باشلێ منفعت ائلییه‌جکسیز. الیزه گلن مالێن- پولون شۆکرانه‌سی اوْلاراق، باجی- قارداش پایێ یادێزدان چێخماسین. دیش آغرێسیندان اذیت چکسه‌نیز دیش حکیمینه مراجغت ائدین، بیر ده کولر قاباغێندا اوتورماقدان، یاتماقدان مطلق چکینین. آتا- آنالار اوشاقلارێنا گئجه گزینتی‌لرینه احتیاطلا اجازه وئرسینلر. مقدس مکانلارێن زیارتی کؤنلۆزدن گئچیرسه، بو قوْنویا اوْداقلانماق یاخجی‌دێر، اؤرنک اۆچون بو نیّته ایکی تسبیح صلوات ختم ائدین، ان‌شاء الله تئزلیکده قسمت اوْلار.
🔸چیلله (اوْغلاق، دی): بو هفته سفرده اوْلاجاقسێز، آنجاق یوْلدا، جاده‌ده چای قێراقلاریندا اوْتورماقدان چکینین. ساغلاملێغیزلا باغلێD ویتامینی اوْلان یئمکلردن قوللانێن، ان آزی سحر گۆنشی شعالاری آلتێندا قالماغێ اونوتمایێن. آللاهین حلالێنی اؤزۆزه حرام ائتمه‌یین! کیمه‌سه یاخجێلیق ائتسه‌نیز گؤزله‌یین دیله گتیرمه‌یین. طبابت اۆچون یاخێنلاریزدان بیرینه پول احتیاج اوْلاجاق، باجاردێغیز قدر یاردیم ائدین. سئودیڲـینیز طرفی، بالاجا بیر هدیه ایله ده اوْلموش اوْلسا سئویندیرین.
🔸دوْندۇران آی (قوْوا، بهمن): بو هفته آدێزا هاردانسا، نه‌سه چیخاجاق، بونو اوغورلو بیلین، آما یئرسیز غرورلانمایێن. بوگۆنلر یئرسیز، بوْش سؤزلر اۆسته یاخێنلاریزی، دوْغمالارێزی چوْخ اینجدیرسیز، بو سیزه یاراشان دڲـیل، همی ده اؤزۆزو یئییب تؤکۆرسوز، آدام هرزادا حساس اوْلماز! باشقالارێن حقینه گیرمه‌یین لطفاً! ایشدن، گۆنده‌لیک فعالیتلردن یوْرقون نظره گلیرسیز، طبیعتین قوْینونا دا چێخانماساز، باری بیر پارکا زادا گئدین اوْتورون دینجه‌لین. تیلفونلا دا چوْخ اوغراشمایین!
🔸بایرام (بالێـقلار، اسفند): بو هفته سیزه یاخجێ بیر هفته اوْلاجاق، هم مالی باخێمدان همی ده معنوی باخێمدان. بو گۆنلرین قدرینی بیلین. ساغلاملێغیزلا باغلێ پیادا گزین. کۆچه- باجادان گلن سسلردن اینجیمه‌یین. اصلینده حق سیزینله‌دیر آما گاهدان دڲـیشمه‌ڲـینه گۆجونوز چاتمایان و سیزی ناراحات ائدن زادلارا اعتناسیز یاناشماغێز سیزی راحاتلادا بیلر. 17 رقمینی ده یادێزدا ساخلایێن، بو رقمله باغلێ سیزین اۆچون ماراقلی اوْلایلار باش وئره‌جک. بو بیر هفته‌ده سیرّیزی ده هئچ کیمه دئمه‌یین!
@SancaqDergisi
/channel/Sancaq_media/7488
⭕️هفته‌لیک فالینیز
✍حاضێرلایان: #اوْلجای_مرآتی
🔸آغلار- گۆلر (قوْچ، فروردین): بو هفته چالێشین اؤزۆز اوْلاسیز! اؤزۆزو اوْلدوغوزدان چوْخ یا آز گؤسترمڲـه گره‌ک یوْخدور. سیزی تانێیانلار آرتێق تانێییر، تانێمایانلار ایسه گئج- تئز تانێیاجاقلار. فکریزی، اؤزۆزو سربست بوراخێن. اۆره‌ڲـیزین سؤزۆنه باخماق چوْخ یئرده سیزی داردان قورتارا بیلر! نئچه گۆندور بیر حقیتی دئمڲـه چتین‌لیک چکیرسیز، اشاره ایله دئییرم نه قدر تئز بیر او قدر یاخجی! امانت صاحبی‌نین ده امانتینی، اۆز- گؤز اوْلمادان قایتارین وئرین. یاخجی گۆنلر سیزی گؤزله‌ییر.
🔸گۆلن‌آی (بۇغا، اردیبهشت): بو هفته باشێزا گلن بلالری اونوتماغا چالێشین. چوْخدان باشلادێغیز چالێشمانیزا اوْداقلانێن. سیزه گؤره چئوره‌نیزده‌کی انسانلار دانلاق آلتدادێر، اوْنلاری دا دۆشونون. ساغلاملێغیزلا باغلێ آیاق‌اۆسته چوْخ دورماقدان چکینین. ایش یئرینده صندل اۆسته اوْتورماق زوْرونداسێزسا، آیاغێزین آلتێنا آیاق‌آلتێ قوْیون. یاخێن قوْهوملارێزدان بیری سیزدن بیر قوْناقلێق یاخود دا یێغینجاقدا چوْخ اینجییب، اوْنون اۆره‌ڲینی اله گتیرین، آچێق دئییرم، دۆنیا اؤلوم- ایتیمدی.
🔸قێـزاران آی (ائکیزلر، خرداد): بو هفته اوزون سۆره‌جلی بیر یوْرقونلوقدان جانێز قورتولاجاق. دارێخمالی هئچ نه یوْخدور. هر شئی اؤز قایداسێنا دۆشه‌جک. قدیم دئیردیلر بئشه دؤزن اوْن‌بئشه ده دؤزر، آما سیز اوْن‌بئشه دؤزموسوز، بئشه ده دؤزۆن. گئچمیشین اوْلوم‌سوز اوْلایلارێنا فکر وئرمکله، ایندی و گله‌جک حیاتیزی پوْزمایێن. تانێمادێغز آداملارلا گؤرۆشنده، احتیاطلی اوْلون. حیات یوْلداشێزین حمایه و آرخازدا دورماغێ، اؤزگۆوه‌نیزی چوْخالدێب، استرس‌لریزه غلبه ائتمه‌ڲیزی راحاتلاشدێراجاق. البته سیز استرس چکدیکجه گۆجلنیرسیز و داها سارسێلمازجا دوام ائدرسیز.
🔸قوْرا پیشیرن (یئنگج، تیر): بو هفته سیزه دئیه‌جک سؤزۆم یوْخدور! اؤنجه‌لر ده دئمیشم «باغێشلاماق»! سیز انسانلارێن سهولرینی باغێشلاماغێ تمرین ائتمه‌یینجه، ایشیزی گۆنو- گۆندن دۆڲونه سالاجاقسێز. دۆنیانێن هئچه، انسان عؤمرۆنون‌سه پۆفه بند اوْلدوغونو ائله بو اؤتن فێرتینالی گۆنلرده گؤردۆز دا! قاچانێ قۆومازلار- دئمیشلر آتالارێمیز. مالی مسأله‌لره گلدیکده، بیرآز اوزاق‌گؤره‌نلیڲـیز اوْلسا داها یاخجی اوْلار. دۆزدور قاباقدا هئچ بیر چتینلیک‌له اۆزلشمییه‌جکسیز آما یئنه دا، احتیاط ایڲیدین یوْلداشی‌دیر.
#آردی_وار...
@SancaqDergisi
/channel/Sancaq_media/7488
⭕️من بیر آغاجام!
✍️یازان: #جلیل_یاری
یێخیلمیش بیر قوْجا آغاجام، چؤلۆن اوْرتاسێندا، یوْل قێراغیندا. بئلیم اَڲـریلیب، باشێم یئر ایله باش‌باشا قالسا دا، هله ده یام یاشێل یاپراقلارێم وار. چاتلامێش قارا قابێقلاریم چیرکین اوْلسا دا، گۆلدن گؤزل، سئوگی ایله دوْلو، گئنیش بیر اۆره‌ڲیم وار.
بئله آجێناجاقلی باخما منه! بو آجی باخێشلار اوْخ کیمی یوْرقون اۆره‌ڲیمه تاخێلیر. سانما کی من قوروموش بیر یازێق اوْدونام. درین کؤکلریم توْپراق آنانێن امجکلریندن سۆت امیر. اوزون دامارلارێمدا یاشام آخێر! اسن یئللر ایچیمده‌کی جوْشغونو دالغالاندێریر. یوْرولموش گؤزلریم هله ده دیم‌دیک گله‌جڲـه باخێر! من اوْلماسام یاندێریب- یاخان گۆنشین آلتێندا هارادا دالدالاناجاقسان؟ من اوْلماسام یئلدن- کۆلک‌دن قاچاندا کیمه سێغیناجاقسان؟
الینه بالتا آلێب بوداقلارێمی بیر- بیر سێندیرما. منی چوْخ سێخیشدیریب گؤیچک گؤوده‌می آجێماسیزجا پارچالاما. گۆن گلر کؤلگه‌سینده اوْتوروب دینجلمه‌ڲه سرین بیر یئر تاپا بیلمزسن. من یاشایێشام، یاشامێن اؤزۆ. من بیر آغاجام! یاشام آغاجی!
@SancaqDergisi
/channel/Sancaq_media/7484