808
Носиржон ЖЎРАЕВ ижодига мансуб 📝 Шеърлар 🎙 Аудиолар 🎶 Мусиқалар 🎬 Кўрсатувлар t.me/Ijodiydavra
ТИНЧЛИК ҚАЙҒУСИДА ТЕБРАНАР ЗАМИН
#Достон_давоми
IV.
Уч-тўртта нонкўрнинг, ватангадонинг
Ҳаддан ортиб борса одамкушлиги,
Қани авлодлари Одам Атонинг,
Қани Инсоният яхлит кучлиги?
Ҳар тонгда дунёни уйғотса таҳдид,
Ҳар шом кўнгилларга кирса ваҳима.
Қон ва кўз ёш билан тўлса шу тахлит
Бу Янги мингйиллик деган саҳифа...
Минг лаънатлар бўлсин илмни жангга
Йўналтирган қурол кашшофлигига,
Совуқ атамалар киритиб фанга
Доғ солди шуурнинг шаффофлигига.
Тиллаҳал гардишли кўзойнак билан
Оламга қаҳрли боқар у олим,
Оллоҳга қанча терс кетса шак билан,
Кўксига унвонлар тақар у олим.
Кимё ё ал-жабр формуласидан
Дунё тамаддунга эришган чоғи,
Битта илмфуруш тор кулбасидан
Бошланар оламга ажал сўқмоғи.
Бу ўйин полвоннинг полвонга қарши
Майдондаги ҳалол беллашувимас.
Бу ўйин (эҳтимол, шу таъриф яхши)
Илон билан чаён тиллашуви, бас!
V.
Хас тушмасин дея кўнгил боғига
Ва кўрмасин дея эли ғам-ҳасрат,
Ота ва ўғилнинг иттифоқига
Кафиллик қилганди Навоий ҳазрат.
Ҳозир иттифоқнинг номи кўп, бироқ
Аъмоли – хунрезлик, сўзи – совуқлик.
Худди қўзғалгандек эски жинчироқ,
Тутунга ўралиб чиқар ёвузлик.
Бир тўда очофат нафс қутқусида
Тўрт томонга чангал солар – аждаҳо.
Худодан қўрқиш йўқ қалбу юзида,
Лекин бойлик учун борар саждага.
На Таврот,
На Инжил,
На Қуръон ҳаққи,
На Мусо,
На Исо,
На Муҳаммад деб,
Яҳудий, насроний ва ислом аҳли
Қон тўкиш ҳуқуқин олмаган сотиб.
Пашшага ҳам озор йўқ, деган таълим
Рухсат бермагайдир ундан нарига.
Аммо икки ҳовуч чаламуаллим
Шарҳ тўқир эътиқод аҳкомларига.
Шунга қаратилган ҳамма амаллар,
Уларга қўйсанг. Ер қурумга тўлса...
Нечукким, бойқушга боғу чаманлар,
Гулханий айтгандек, вайрона бўлса.
VI.
Ҳар нарсадан устун эзгу дуоси
Бўлган бир миллатнинг фуқаросиман.
Атомдан кучлидир шоир нидоси,
Мен шоир аҳлининг бир овозиман.
Бойнинг ҳамёнию қашшоқ қозони
Ўртасида фитна тузаётган ким,
Махфий ҳужжатларга гажак имзони
Қўйиб, халқлар тинчин бузаётган ким?
Мен билиб тураман, сувнинг бошида
Оёқ юваётган ғаламис кимдир,
Ё ҳаёт, ё мамот – жон талошида
Бечора Ер шари – онамиз жимдир!
Бир ўғли қиморбоз, бир ўғли каззоб
Чиққан волидадек эзилар замин.
Тўнғичи кенжага бергандек азоб,
Ўртада қолгандек сезилар замин.
Мен шу она Ернинг онгли ўғлони,
Мушфиқ табиатнинг уйғоқ одами.
Бағримда жафокаш эллар туғёни
Ва етти миллиард инсоннинг ғами.
Киритмоқ истайман манфур эсини,
Ётмасман ўзимнинг ҳузурим ўйлаб.
Байроғимга ёзиб ТИНЧЛИК сўзини,
Югурмоқ истайман Ер шари бўйлаб.
#битди
📆 11.12.2015.
✍ Носиржон ЖЎРАЕВ
#Тинчлик_қайғусида_тебранар_замин
Уруш олови дунёнинг ҳали у, ҳали бу минтақасига ёйилиб, боғ-роғларни култепага айлантириб бораётгани, миллионлаб қочоқлар болаларини бағрига маҳкам босганича, бегона юртларда жон ҳовучлаб юргани ўзини тўлақонли инсон деб билувчи бирон-бир кишини бефарқ қолдиролмайди. Жаҳон миқёсида олиб қаралганда ҳам, ТИНЧЛИК деб аталмиш неъмат, ҳатто, тўқчиликдан кўра муҳимроқ аҳамият касб этиб бораётгани сираям ажабланарли ҳол эмас.
Қаламкаш тенгдошлари орасида алоҳида бўй кўрсатиб, кўзга яққолроқ ташланиб бораётган Носиржон Жўраевнинг тинчликка, унинг беқиёс нафосатига бағишланган шеърини ўқиган кишининг юраги ларзага тушмоғи табиий. Бу мўъжаз асар бутун инсониятни огоҳликка, тотувликка чорлаши, осойишта кунларга шукроналик туйғусини алангалатуви беҳад долзарб ва қимматлидир.
Фуқаролик бурчини ҳар лаҳзада ҳис этиб яшаш саодати, энг аввало, барча ёшларимизга бирдек насиб этаверсин!
Анвар ОБИДЖОН,
Ўзбекистон халқ шоири.
2015 йил.
ТИНЧЛИК ҚАЙҒУСИДА ТЕБРАНАР ЗАМИН
I.
“Ҳар неки рост эрур, дегулик эмас” –
Ҳазрат Навоийнинг олтин ўгити.
Аммо жим турмоқни истамадим, бас,
Мен –
Янги асрнинг ўктам йигити.
Ахир мен тақдирнинг мукаммал иши,
Бошимда онг уйғоқ, кўксимда қалб бор.
Ана шу онгимда дунё ташвиши,
Ана шу юракда титраган зарб бор.
Термулсам оламнинг харитасига,
Самодан боққандай ҳаммаси аён.
Ер шарининг бугун ва эртасига
Изоҳ тополмасдан турибман ҳайрон.
Кўм-кўк дарёларда лойқа билан қон,
Ям-яшил боғларда алвон аланга.
Қора қузғунлардан доғдир оқ осмон,
Кўзим тўлиб кетар тескари рангга.
О, мўътабар замин, яралганингда
Кутган эдингми сен шунча низони?
Ё турфа тил билан аталганингда
Бўлсин деганмидинг қирғин тўзони?
Гилос данагидай келмайди юкинг
Чексиз коинотнинг ҳайбати аро.
Бироқ не ҳасратки, бир ўзинг бу кенг
Ҳудудсиз маъвода энг бахти қаро!
#Достон_давоми_бор
✍ Носиржон ЖЎРАЕВ
ИЗДОШЎғлим Шоҳидбекка
Вазмин судралади томиримда қон,
Эринчоқ булутдек кўчар ҳар бир иш.
Кун сайин сочимни бўямоқда қор,
Кун сайин бошимни босиб келар қиш.
Аммо бир таскин бор, тасалли шуки —
Менинг умрим учун берганча баҳо
Ва писанд этмасдан ҳаётнинг юкин,
Ортимда улғайиб келмоқда баҳор.
✍ Носиржон ЖЎРАЕВ
📖 МУҲАББАТДАН СЎНГ
👉👉👉 @Nosirjon_Jorayev
✍ Носиржон ЖЎРАЕВ
🔊 Шеърни муаллиф ўқиган
Каналга уланиш учун👉👉👉 @Nosirjon_Jorayev
ТУШ. ОНАМ. ОВОЗ
Гўдакликдан ўжар эдинг, терс эдинг,
Лек юраги пардек юмшоқ, таъсирчан.
Шамоллардек бетизгин ва тез эдинг,
Шамоллар тиндими энди, Носиржон?!
Йиқилган устундек юзтубан тушдинг,
Шунча арзон бўпкетганми ҳозир жон!
Қайси тош уюмнинг устидан тушдинг,
Бўйларинг синдими энди, Носиржон?!
Онанг гулмас, гулхан туққан эканда,
Ёлғиз ёниш – Худо берган хос ҳижрон.
Ҳамма сенга суянаман деганда,
Сўнмоқ мумкинмиди энди, Носиржон?!
Сен – дунёга ҳеч сиғмаган шамолим,
Шамоллар тиндими энди, Носиржон?!
📆 15.05.2019.
✍ Носиржон ЖЎРАЕВ
«Жўнатилмаган мактублар»
Шеърни муаллиф ўқиган.
(3-қисм)
Каналга уланиш⤵️⤵️⤵️
/channel/Nosirjon_Jorayev
«Жўнатилмаган мактублар»
Шеърни муаллиф ўқиган.
(2-қисм)
Каналга уланиш⤵️⤵️⤵️
/channel/Nosirjon_Jorayev
#Оқшомингиз_хайрли_ўтсин😊***
Узун-узун ўйлардан
Қисқа-қисқа ёд қолди.
Узуқ-узуқ йўллардан
Бир чигал ҳаёт қолди.
Ҳеч тушунмадик — умр,
Ундик-унмадик — умр,
Эски кундалик — умр,
Гоҳ кулги, гоҳ дод қолди.
Қалбларни ўз эркига
Қўйдиг-у, аммо нега
Севги кетди. Севгига
Мангу эътиқод қолди.
Юракдаги юкларим,
Худо берган мулкларим:
Ёлғиз қизим — ҳулкарим
Ва бир жуфт қанот қолди.
Буёғи куз. Хазон. Дард.
Хўрсиниқлар пишган вақт.
Кўнглим ичида фақат
Аллоҳ деган зот қолди.26.09.2020
✍ Носиржон ЖЎРАЕВ
🎙 Рустам МУҲАММАД
#Muxlisdan
#fonotekaga
✍ Nosirjon JO‘RAYEV
🎙 Zarnigor BOZOROVA
* * *
Bir yonda bahorlar gullab yotsa-yu,
Koʻrki koʻzlaringga behad yoqsa-yu,
Umuman, boshingga baxtlar yogʻsa-yu,
Baxtli boʻlmoq uchun haqqing boʻlmasa...
Taqdir yuragingni qilsa bir gul-u,
Guldek oʻsaversa keyin koʻngil-u,
Sen qanday shoirsan, tiling bulbul-u,
Bulbulni tinglashga xalqing boʻlmasa...
Ey hayot, azaldan sen-ku, men-ku jim,
Nega bu ishqning ham ogʻzi mangu jim,
Osmonga termulib yigʻlasangu jim,
Yo Alloh deyishga hadding boʻlmasa...
Bir baxtli boʻlmoqqa haqqing boʻlmasa...
📆 10.04.2022
👉 /channel/Nosirjon_Jorayev
#ХАЗИНА🤩
Мана, шоир Носиржон ЖЎРАЕВнинг ҳозиргача чоп этилган барча китоблари битта суратда😊
📚ТЎПЛАМ✍
#ЯНГИ_ШЕЪР
* * *
Боғлар гуллаб бўлди ва кейин
Юлиб сочди оппоқ рангларни,
Гулламади бу йил ҳам кўнгил!
Хазон ҳиди босган руҳимни
Аввал онам, сўнг отам сезди,
Наманганга чўзилди йўллар!
Хаёлимни ҳаммадан уздим
Ва уларга енгил бўлсин деб
Чиқиб кетдим юракларидан.
Ҳажр – ҳаётимда шу қолди,
Тозаладим пешонамни ҳам
Арзимаган барча одамдан!
2.04.2025.
✍ Носиржон ЖЎРАЕВ
👉 «Facebook»да ҳам ўқиш ва улашиш учун 👈
ДИЙДОР
Қуёшни айланиб йил ўтказдик биз,
Ерни айлантириб ўтказдик кунни.
Қандай хушхабар бор бизларга, Наврўз,
Бобомни жаннатда кўрганинг чинми?!
Оппоқ ҳовур пуркаб келди бир тулпор,
Келди-ю депсиниб ерни уйғотди.
Сенинг юрагингда нима гап, баҳор,
Сенга етолмасдан яна ким ўтди?!
Қаҳратон қадами шунчалар майда,
Йиқилган кўп бўлди, толган кўп бўлди.
Менга дардингни ёр, титраган майса,
Қайси бир мозорга борган кўп бўлди?
Барин била туриб сўраш телбалик,
Бўлак ниманиям айтайин, кўклам.
Аслида, кўнглимда бошқа бир ҳадик —
Ҳали хушхабарлар бормикан кўкдан?
✍ Носиржон ЖЎРАЕВ
📖 Муҳаббатдан сўнг
#ЯНГИ_ШЕЪР
* * *
Ҳар баҳор қайтанга ҳасрат кўпайди,
Оятдек пичирлаб келдим исмингни.
Шамолга сочайми, ерга кўмайми
Қалбимнинг яшалмай қолган қисмини.
Дўмбоқ куртакларда ҳеч йўқ исён бор –
Бугунми, эртами портлайди бир сир.
Ҳой, менинг ичимда ахир инсон бор,
Бир марта гулламоқ учун мунтазир!
Ҳаёт кўзларимга қараб безовта,
Дунё қадамимга ҳушёр ҳар нафас –
Куртак тугмасин деб биронта новдам,
Бирон-бир баҳорда гулламасам бас.
Мен – барча хотиржам бўлиши учун
Ва бош эгган бўлиб тақдир измига,
Эътибор бермасдан юрибман, тушун,
Қалбимнинг яшалмай қолган қисмига…
📆 19.3.2025.
✍️ Носиржон ЖЎРАЕВ
#Байрам_муборак
КЎҲНА ВАСИЯТ
Қатра табассум ва нуқрадек кўзёш
Дунёни ажратар икки қутбга.
Аммо аёл зоти топиб бир илож,
Иккисин сиғдирди битта мактубга.
Бу нома ўтмишдан келажакка хат,
Момо Ҳаво имзо қўйган ҳужжат шул:
Йиғласанг қувончдан йиғлагин фақат,
Кулсанг ҳам кўзингдан ёш чиққунча кул.
✍ Носиржон ЖЎРАЕВ
📖 ШАРҲ
#Мухлисдан
#аудиошеър
Бунча маҳзун кириб келмоқда баҳор...
✍️ Носиржон ЖЎРАЕВ
🎙️Нодира🌹
ТИНЧЛИК ҚАЙҒУСИДА ТЕБРАНАР ЗАМИН
#Достон_давоми
II.
Зангор майсаларга кўмилиб ётиб
Ўйлайман (шабнамдек муаллақ ёшим)
Араб саҳросида қумларга ботиб
Жизғанак ва ташна юрган Ердошим.
Биламан – отаси, онаси ҳалок,
Уйда аллақачон сўнган ўт-ўчоқ.
У энди ўз жонин асрашга ҳалак,
У энди одаммас,
У энди – қочоқ.
Жаҳолатга ётдир шафқат, андиша,
Жоҳилнинг қўлида машъум ҳукм бор.
Жаллодлар ниқобда бўлар ҳамиша,
Билиб бўлмас ниқоб ортида ким бор.
Ойболта фарқламас яхши ё ёмон,
Мусулмон, насроний, буддавийни ҳам.
Нафс ҳам танламайди (ахир у ўпқон)
Амриқо қоғози, олтин ё дирҳам.
Мана шу ўпқоннинг гирдибодида
Ойболта тиликлаб борар Ер юзин.
Қаттол адашмайди ҳеч ҳисобида,
Унинг қонли қўли бунчалар узун?!
Юрак хуружига ҳакимлар масъул,
Аммо ким тўхтатар фитна хуружин.
Бугун ким хоҳласа тузиб бир дастур,
Бошлаб кетаверса жаҳон урушин...
III.
Майизни қирқ бўлган шу одамзотнинг
Тариқни минг парча қилар ядроси,
Қамчи ва қанд бериб ўйнатар отни,
Ўзича ҳаммаси дунёга қози.
Харитага чизиб қизил қаламда
Улушин ажратар гегемонлари,
Ернинг ҳар нуқтаси (менинг чамамда)
Ядро ва ахборот полигонлари.
Олмани қиличда арчиб ейилмас,
Ёнғоқ қоқилмайди найзалар билан.
Анжирга милтиқдан тиргак қўйилмас,
Гул узилмас қонли панжалар билан.
Бир тишлам олма еб кўрмаган гўдак,
Бир дона гул узиб улгурмаган қиз
Жувонмарг бўлмоқда, уволдир демак,
Уларга бир ҳўплам ҳаво ҳам танқис.
Қандайдир кўринмас куч хоҳишидан
Тутунга тўлмоқда уйи ва кўнгли,
Мен бошқа иқлимда турган кишиман,
Лек яққол илғайман ундаги мунгни.
Қандай сезмай ахир, Ернинг томири
Менинг юртимга ҳам чирмашган бўлса,
Уларнинг бузилган ҳар бир томини
Ўйлаб, юрак бирга титрашган бўлса...
#Давоми_бор
✍ Носиржон ЖЎРАЕВ
#ЯНГИ_ШЕЪР
* * *
Ким юрак шаклида қирқиб
Гўё осмиш дарахтга япроқ,
Мен барг мисол юрагимни
Хазонлиғдан ўтдим аяброқ.
Ким бир ҳовуч изтиробдан
Кўзларимга сочдию тупроқ,
Мен қум тўлган нигоҳимни
Очдим вале умрим ўтиброқ.
Ким бу елкам узра дардлар
Отиб, шодон эди вақтлироқ,
Мен эса шу ғамда пишдим
Ва юрагим урди бахтлироқ.
Ким бахт ҳақда сўзлаётиб
Кўзларини кўрсатар камроқ,
Мен англайман, ўз қалбида
У ҳам азобларга маҳкумроқ.
📆 15.05.2025.
✍ Носиржон ЖЎРАЕВ
👉 «Facebook»да ҳам ўқиш ва улашиш учун 👈
МЕЪЁР
Тортиброқ боғласам одатдагидан,
Сиртмоққа айланиб қолар бўйинбоғ.
Ҳатто меъёр сақлаб чойнинг рангида
Ичмасам, тушармиш жигаримга доғ.
Қара, ҳар нарсада ўлчов бор шаксиз,
Ҳаддидан ошмайди ҳаёт дегани.
Аммо нега сенинг қийноғинг чексиз,
Нега меъёр билмай севаман сени.
✍️ Носиржон ЖЎРАЕВ
📖 МУҲАББАТДАН СЎНГ
@Nosirjon_Jorayev
“Олис келажакми, бугун-эртами,
Бир кун юрак бир бор санчади. Тамом.
Якунин кўришга ажиб эртакни
Мен таклиф қиламан барчани. Тамом.
Гарчи кўп алмашди эътиқоду дин,
Мен ишққа тақвода яшаётгандим.
Алмисоқдан бери яшаётган дил
Сенга қайтиб-қайтиб чарчади. Тамом!”
Ва чўчиб қарайсан ушбу шеър учун,
Бу – сени аяган қарғишим, тушун.
Сабрим Арастунинг ақлидек узун,
Қаҳрим Искандарнинг ханжари. Тамом.
📆 16.04.2020.
✍️ Носиржон ЖЎРАЕВ
@Nosirjon_Jorayev
* * *
Шукр, хоҳишингга боғлиқмас баҳор,
Шукр, сенинг раъйинг бир пул ҳаётга.
Яхшиям, Худодан ҳар битта қарор,
Яхшиям, туширдинг Худони ёдга.
Шукр, бундан бошқа нимаям дердим,
Тангрим турибди-ку ёнимни олиб.
Шукр, мен мард бўлиб жонимни бердим,
Шукр, улгурмадинг жонимни олиб.
📆 21.04.2020.
✍️ Носиржон ЖЎРАЕВ
#ЯНГИ_ШЕЪР
* * *
Мен қаҳва ичаман бамайлихотир,
Оқбилак қўлимда инкичка сигар.
Тўғри, ҳижронларга чидайман ҳозир,
Ҳар қанча ҳасрат ҳам юракка сиғар.
Устимдан кулса-да баҳор ранглари,
Ҳаёт гўзал бўлса аксига олиб,
Қаҳва симираман атай тонглари –
Атай оғриқлардан кетмайман ўлиб...
Пўрим кийинаман қалбимни ёпиб,
Ҳамма изтироблар костюмдан ичда.
Мабодо келсанг ҳам юрагим топиб,
Қўлимда қаҳва ва сигар – ингичка...
Мен ҳузур қиламан ахир зулмингда...
Аммо бир кичкина муаммо, яъни
Қаҳрамон эмасман ахир умрингда,
Шунча дард чекиб ҳам ўлмай тургани!
📆 8.05.2025.
✍ Носиржон ЖЎРАЕВ
👉 «Facebook»да ҳам ўқиш ва улашиш учун 👈
«Жўнатилмаган мактублар»
Шеърни муаллиф ўқиган. (1-қисм)
Каналга уланиш⤵️⤵️⤵️
/channel/Nosirjon_Jorayev
* * *
Чарм креслога вужудим ботиб,
Оқ, енгил қанотлар ҳақда ўйлайман.
Ҳеч қачон қўймаган ақлин йўқотиб
Ва қалби ҳаётлар ҳақда ўйлайман.
Жанговар руҳимни муте ва синиқ
Қилмоққа уринган ишлар ўлдирди!
Гарчи ниҳояси дард ва хўрсиниқ,
Юракда ўйнаган ишқлар ўлдирди!
Бу ҳасрат йўқмиди мендан олдин ҳам,
Минг йиллик фарёдлар ҳақда ўйлайман.
Умримни ютқазиб боряпман мен ҳам,
Ҳақ олдида мотлар ҳақда ўйлайман.
Ҳаётга нима ғам – у ўз ҳолича
Боғларни баҳору гулларга кўмди.
Олам яшнаётган шундай бир кеча
Онам ночор, унсиз нурашга кўнди.
Тавба-ю, оҳларим етмасмикин деб,
Келмаган имдодлар ҳақда ўйлайман.
Кўзимдан тирқираб кетмасмикин деб,
Кўксимдаги додлар ҳақда ўйлайман.
📆 17.05.2022
✍ Носиржон ЖЎРАЕВ
* * *📆
Гулу хасниям ўз эрки бор, жаноб,
Тангрининг ҳукмида – неки бор, жаноб,
Эй лўттивоз жаноб, эй кибор жаноб,
Ахир сиздан сўраб келмайди баҳор!
Умримиз зах эди қор ва кўз ёшдан,
Не-не қаҳратонлар кечмади бошдан,
Кўзингиз қамашиб кетсин қуёшдан,
Ниҳоят толедек жилмайди баҳор!
Биллур кўзойнакни артиб, бир боқинг,
Ҳужжатларга сиғмас тартиб, бир боқинг –
Ўйлайсиз имзомга зор деб, бир боқинг,
Ҳатто бор-йўғингиз билмайди баҳор.
Гарчи бўғзим узра бўйинбоғ таранг,
Аммо моғор босган ҳисга боғламанг,
Сиз қанча уринманг, қанча хоҳламанг,
Менинг юрагимда ўлмайди баҳор!
9.03.2022
* * *
Гулин тўкиб бўлган настарин ёки📆
Оҳорин йўқотган баҳор сингари
Муҳаббатнинг ранги ўчди, ҳаттоки
Ўтди ҳайратларга муносиблари!
Оҳанглар пасайди, аланга сўнди,
Ўйга толган бошим ойдек оғирдир.
Юрагим ҳасратдан санчиса энди,
Илгари фақат ишқ сабаб оғрирди!
Бир калима каби ёд эди исминг,
Шу калом боиси мулло бўлгандим.
Ўзга бир ўчоққа отдингу жисминг,
Сен олов ичраю, мен ёмон ёндим.
Гарчи кўзларингда муҳташам ҳаёт,
Оҳори тўкилган баҳор сингари
Ишқсиз ва ўзингни қилиб эҳтиёт
Яшаб бораяпсан ёлғизлик сари.
Мен эса калима қайтариб ўтдим…
17.04.2024.
#Айём_муборак
ҲАЙИТ
Бу кун ҳар мўминга зарраи эъзоз,
Бу кун қадр топди курраи замин.
Кўнгилда айланар сураи ихлос,
Илоҳо омин, илоҳо омин.
Ҳар битта хонақо, ҳар битта ҳужра...
Ниятлар жам бўлди жойнамоз узра.
Бугун йиғлаш мумкин хаёлни бузмай,
Илоҳо омин, илоҳо омин.
Ўйинқароқ, яланг-юпун болалар,
Юзида гарди йўқ дуркун болалар,
Асли сиз ҳаммадан мўмин, болалар,
Илоҳо омин, илоҳо омин.
Иймон танламайди гадо деб, шоҳ деб —
Гина сақламанг, дўст, эски бир доғ деб.
Қўлимни узатдим раҳматуллоҳ деб,
Илоҳо омин, илоҳо омин.
Муҳаббатдан сўнг
Читать полностью…
МАКТУБ
Кўксим аро совуқ шамол эсган дам
Сенинг томонларда илиқмиш ҳаво.
Ташлаган эмишсан кўкламга қадам,
Ўтли вужудингга тўлганмиш наво.
Наволар қўйнида юраркан сархуш,
Қўлларинг титрармиш китоб варақлаб.
Ҳар тонг турармишсан кўриб бир хил туш —
Севгини шарафлаб — дардни шарафлаб.
Шараф бўлсин, демак, сенга муҳаббат,
Сизга таъзим бўлсин, гўзал оҳанглар!
Шу умрим ҳурмати сизга ҳам раҳмат,
Баҳор номи билан тўкилган ранглар!
Ранглар қамаштирган кўзларимда нам,
Йўлингга термулиб ўтяпман ҳамон.
Боғларга қўшилиб кетган азизам,
Куз оёқ босмасин асло сен томон.
Кўксим аро илиқ шамол эсган дам,
Билмам, қандай экан сен ёқда ҳаво...
Бир ҳадик кетмайди бугун дилимдан —
Этмоқдами-йўқми баҳоринг давом!
✍ Носиржон ЖЎРАЕВ
📖 Энг қудратли зарра
#Мухлисдан
#аудиошеър
Асфальтга урилиб чақилар ёмғир,
Бетон йўлакларда қайралар шамол.
Боғларда заъфарон ва заиф ёнғин,
Ўлимнинг сурати бунча баркамол!
✍️ Носиржон ЖЎРАЕВ
🎙️ SOLIYA
ЁПИҚ ЭШИКЛАР ҲАҚИДА ШЕЪР
Уйғонаман.
(Тонг отди бахтсиз!)
Руҳда ҳамон ёлғизлик, танглик.
Сен борсану олиссан, тафтсиз –
Декабрнинг қуёши янглиғ.
Оқиб ётар қонимда муздек
Янги йилни бошлаган январь.
Сен борсану хизматкор қиздек
Бир ёт уйда дамлайсан қаҳва.
Кир чаясан.
Уй супурасан.
Кун кўрасан эрингни севмай
Ва мен ҳақда ўйлаб юрасан...
Ташқарида эрийди февраль.
Иккимизнинг хаёлимиз бир,
Бир хил тепар юрагимиз ҳам.
Агар эшик очсакми ҳозир,
Ичкарига ёприлар кўклам.
Аммо...
Биз қўрқамиз баҳордан,
Остонада тугаб қолар йўл.
Ўзимизни алдаган ҳолда
Эшик томон узатмаймиз қўл.
✍ Носиржон ЖЎРАЕВ
📖 ШАРҲ
@Nosirjon_Jorayev
#мухлисдан
#аудиошеър
...Сиз менга эртамни шарҳламанг нисбий,
Сиз менда умидлар уйғотманг, шартмас.
Кун келиб хор бўлса шу куртак жисми,
Баҳор ҳам бахтмас!
