13121
السلام على الحسين وعلى علي بن الحسين وعلى أولاد الحسين وعلى أصحاب الحسين عليه السلام قناة لنشر قصائد في رثاء محمد وآل محمد عليهم السلام
يوم عاشوراء
شحالهه الذبحو اخوها شحالهه
تشوف خيل ادوس صدره گبالهه
٠٠٠٠٠
تشوف جسم حسين اخوها الطاهر
گطّعوه بسيوف ظُهر العاشر
بصدره وبظهره انطبع چم حافر
شلون توصل والشمر يبرالهه
٠٠٠٠٠٠
شلون توصل خيل بينه وبينها
گبالهه طايح تشوفه بعينها
شصار بيهه شصار الله يعينها
بين اخوها محيّره وطفالهه
٠٠٠٠٠٠٠
تشوف شمر شلون حز اوريده
وشال راس حسين ينزف بيده
شبيدها وشتسوي هيه الوحيده
مذبحه عله الكاع كل رجالهه
٠٠٠٠٠٠٠٠٠٠
هاي زينب يالسئلتوا عليها
بچتل اخوها وبالسبي معذبيها
بجمر الخيام انچوت رجليها
تركض عله النار تحمي عيالهه
٠٠٠٠٠٠
بين خيل ونار تركض خايفه
تحمي الأطفال الرعب ماشايفه
جم اخو عالگاع ينزف عايفه
بلا ولي المحّد نظر لخيالهه
٠٠٠٠٠٠
هجموا عله خيامها وسلبوها
عاليتامه وعالحرم حركوها
جم يتيمه الشردت وسحكوها
رد سلب خدر الحرم چتالهه
٠٠٠٠٠٠
حسين ظل عله الثره مگطعينه
والكفلهه گطّعوا چفينه
وينهه باقي الهواشم وينهه
عالهزل راحت عكب كفّالهه
سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
نزلة/ ليلة الوداع
اعظم جروح الگلب. جرح الوداع
٠٠٠٠٠٠٠٠٠٠٠٠٠٠٠٠٠٠٠٠٠
كل جرح لابد اله فتره ويطيب
إلا جرح الرايد يودع حبيب
واني هاي الليله بجروحي اشيب
راح اودع حسين بدموع ونجيب
يهضم وكلش صعب. جرح الوداع
اعظم جروح الگلب. جرح الوداع
٠٠٠٠٠٠٠٠٠٠٠٠٠٠٠٠٠٠٠٠٠٠
شلون اودع حسين يا عالم شگول
ودري باجر تسحك بصدره الخيول
ريت ليل العاشر اعلينه يطول
ولا يروح حسين والهيبه تزول
اول جروح الحرب. جرح الوداع
اعظم جروح الگلب. جرح الوداع
٠٠٠٠٠٠٠٠٠٠٠٠٠٠٠٠٠٠٠٠٠٠
شلون اودع الكافل وحامي الظعن
چفوفه يم شاطي النهر يتكطعن
كبل ابوالغيره يذبحوني عسن
ولا اشوف چفوفه دم يتسايلن
خَلّه دمعي دم يصب. جرح الوداع
اعظم جروح الگلب. جرح الوداع
٠٠٠٠٠٠٠٠٠٠٠٠٠٠٠٠٠٠٠٠٠٠
ليلة اوداع اخوتي ليلة جرح
راح أظل سهرانه وبچي للصبح
باجر ابن امي وحبيبي ينذبح
وراس اخويه حسين ينشال برمح
بسمه بعيون الغرب جرح الوداع
اعظم جروح الگلب. جرح الوداع
٠٠٠٠٠٠٠٠٠٠٠٠٠٠٠٠٠٠٠٠٠٠
آنه مو أي مره زينب بت علي
من يعوفوني خوتي منهو الألي
جابني العباس گلّي ادلّلي
لا تعوفيني غريبه يا هلي
يعصر دموعي غصب. جرح الوداع
اعظم جروح الگلب. جرح الوداع
٠٠٠٠٠٠٠٠٠٠٠٠٠٠٠٠٠٠٠٠٠٠
هذه آخر ليله ملتم الشمل
كلها باجر تنذبح حتى الطفل
والمصيبه الكبره والماتنعقل
انسلب ياوسفه ونجر بحبل
علّتي بطول الدرب. جرح الوداع
اعظم جروح الگلب. جرح الوداع
سيد زيد الفحام
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
عبدالله الرضيع عليه السلام
شلون الراي. ماظل ماي. بيش اسگيك حاچيني
٠٠٠٠٠٠٠٠٠٠٠٠
آنه امّـك يعبــدالله. دهري بيك صوبني
رضيع بيا ذنب حرموك. من ماي النهر يبني
شعنـده حــرمـله ويّاك. بسهمه الجاني شيّبني
عسه انشلّت يمينه وريت امـوت ولا يعذبني
سهمك صاب. گلبي وذاب. من شفتك يضي عيني
٠٠٠٠٠٠٠٠٠٠٠
منو المثلك يعبدالله. رضيع وينذبح نحره
يويلي والأشد من هاي. ضامي وماشرب گطره
اجيت امخضب بدمك ييُمّه ورگبتك حمره
إبدال الماي من دمك. سكوك وچبدتك جمره
آه عليك. شصاير بيك. اناغي وما تناغيني
٠٠٠٠٠٠٠٠٠٠٠٠٠
نبلة حرملة بطولك ذبحوا رگبتك بيها
لا اگـــــــدر اطلّعها. ولا اگــــدر اخلّيها
اصيح بصوت عبدالله. امك ما تحاچيها
الطم عالوجه والعين لحدما عيني اعميها
اشبگنّك. وشمّنّك بعد منهو اليسلّيني
٠٠٠٠٠٠٠٠٠٠٠
يبني مفطّره اشفافك. من كثر العطش يُمّه
جسمك ذابل ونحلان. من گد ما نزف دمه
ضامي وحرمله الملعون. رماك وصوبك سهمه
جابك والدك مذبوح. وعن عيني السهم ضمّه
ما رحموك من ذبحوك ذبحو حلمي وسنيني
٠٠٠٠٠٠٠٠٠٠٠٠
يعبدالله الرمل يچويك. نام بحضني وتهنّه
مو مالت رمل وتراب. خدك خل اشمّنّه
اشوفك بالمهد هيهات. أئيّس وگطع الظنّه
عطشان ومتت عطشان. الماي منين اجيبنّه
بيني وبين. گلب حسين. نار النبلة تچويني
٠٠٠٠٠٠٠٠٠٠٠٠٠
ينبضي الماعشت لولاه. ينسمه التنعش الريّه
اهزّك بالمهد ورتاح. لحدما تغفه يوميّه
يعبدالله وغفل مني. خذاك المارحم بيّه
نمت مو بالمعهد بتراب. وعفتني بجرحي مسبيه
شلون انساك. روحي وياك. اواسيك وتواسيني
سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
نزله علي الاكبر عليه السلام
انا عليُّ ابنُ الحُسين ابنُ علي
٠٠٠٠٠٠٠٠٠
نزل والسيف بيمينـه ورتجل بالحومه
علي آنه وجدي حيدر لو نسيتو علومه
راح اراويـــكم قتــاله ذولفقاره ويومه
جيوشـكم يا آل اميه بالحرب مهزومه
في طاعةِ الرحمنِ اهوى مَقتَلي
انا عليُّ ابنُ الحُسين ابنُ علي
٠٠٠٠٠٠٠٠٠
خيبـر اكلبــها عليــكم وآنه قالــع بابها
شما تزيد اعداد عدكم إلّا اكص ارگابها
مرحب وبكـر ابن غانم والبطوله حسابها
راح اكص راسه ودوسه يندفـن بتـرابها
إلاّ بسَيفي شَـرّهُ لا ينجَلي
انا عليُّ ابنُ الحُسين ابنُ علي
٠٠٠٠٠٠٠٠٠
هذا ابوي حسين هذا وعلي الأكبر آني
كـربله أخسفـها بيـكم ما يظل سفياني
ويله يا ويله اليجيني وبالحرب لاگاني
إلا اطـر راسـه وذبحه كلمن اتحــدّاني
يا ارضُ ميدي بالعِدا وزَلزِلي
انا عليُّ ابنُ الحُسين ابنُ علي
٠٠٠٠٠٠٠٠٠
ما يهمني الموت راحه في سبيل الباري
يا بني سفيان منكم خذت حقي وثاري
نترست الكاع بجثثكم والقتـل اجبـاري
نهـر وسط الغاضـريه من دمـاكم جـاري
من بَحرِ طه مَنبَعي ومَنهَلي
انا عليُّ ابنُ الحُسين ابنُ علي
٠٠٠٠٠٠٠٠٠
ما طحت لوما غـدركم بالغـدر صبتوني
المهـم عنـد الله مرضي ما يهم كطعوني
علي الاكبر يبقى اسمي. والله ما تمحوني
درس للأجيـــــــال ابقه. كل زمن يقروني
وذكْرُنا لا ينطمس سَيعتَلي
انا عليُّ ابنُ الحُسين ابنُ علي
٠٠٠٠٠٠٠٠٠
لا يزيد يدوم حكمه ولا ابن مرجانه
بس ابوي حسين يبقى. خالد بعنوانه
احنه أهل البيت احنه خاسر العادانه
يم رسول الله عرشنه واليحبنه ويانه
بجَنبِ جدي في المعالي مَنزِلي
انا عليُّ ابنُ الحُسين ابنُ علي
سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
مقدمه علي الأكبر عليه السلام
منين الصبر اجيبه. ارحم گلب غريبه
ما تحمل المصيبه. ارحم گلب غريبه
٠٠٠٠٠٠٠٠٠٠٠٠٠٠٠٠٠٠٠٠
كل والده تحن للأبن. ما تحتمل غيابه
صبح ومسه تهلّ الدمع تشتم عطر ثيابه
شحال التشوفه عله الثره. متكطع بترابه
مثلك گلب امك تره يتكطع بعذابه
لا ياعلي دخيلك. اتعذّب برحيلك
ياجرحي ياطبيبه. ارحم گلب غريبه
٠٠٠٠٠٠٠٠٠٠٠٠٠٠٠٠٠٠٠٠
يا وارث اوصاف النبي من مشيته وجماله
وتشبه علي حامي الحمه. بالهيبه والجلاله
مثلك علي الاكبر ابد. يحصل بشر محاله
ابني وحبيبي وسلوتي. يالماكو من خصاله
من حگي ما اعوفك. وتمسّك بچفوفك
كلمن يحب نصيبه. ارحم گلب غريبه
٠٠٠٠٠٠٠٠٠٠٠٠٠٠٠٠٠٠٠٠
أمّ ونبض كلبي وكف من فاركت اديه
ما عندي غيرك يا علي. ومتعنّي للمنيه
گلبك تفطّر بالضمه. گلبي انمله اذيه
ادري يقتلونك علي. ما ترحم آل اميه
مو بس جرح يجرحك. سيف الشمر يذبحك
يالساعتك قريبه. ارحم گلب غريبه
٠٠٠٠٠٠٠٠٠٠٠٠٠٠٠٠٠٠٠٠
تعب الربه وليل السهر. وسنيني والمصاعب
ياوسفه تاليهه انفجِع. وتذبحك النواصب
يوليدي ما ينفع حچي المـن بعـد اعـاتب
ضامي وطحت بين العده بيك اشتفت كتايب
سيوف الاعادي كَثرَه. طبره باثرها طبره
دم النحر خضيبه. ارحم گلب غريبه
٠٠٠٠٠٠٠٠٠٠٠٠٠٠٠٠٠٠٠٠
جابوك الية امن الحرب وعيوني غمّضتهه
امك أنه وگلبي انجرح بجروحك الشفتهه
يوليدي متگطّع وذر هاللحظه ما ردتهه
مذبوح اشوفك يا علي. والربّتك عفتهه
ياجرح إشد نزيفه. وياهو السكن وعيفه
يالجثّتك سليبه. ارحم گلب غريبه
٠٠٠٠٠٠٠٠٠٠٠٠٠٠٠٠٠٠٠٠
اتمنّه ميته ولا شفت دم منحرك يغالي
تتگطّع بطف كربله. ما مرت عله بالي
مذهوله ولطم عالوجه. ما تدري بالجرالي
مهضومة بمصابك صرت. حال الغريبة حالي
يوليدي تدري بية. بعدك رحت سبية
امشي بهزل عجيبه. ارحم گلب غريبه
سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
رئيسية للقاسم عليه السلام
آنه القاسم يا عمي. افديك بروحي ودمي
عايش بحماك للموت وياك.
٠٠٠٠٠٠٠٠٠٠٠٠
آنه ابن الحسن معروف. ما واحد وصل صيته
تميّـــز بالكـرم والجـود. ومنبـــع للكــــرم بيتـه
ربيت بحجـــره يا عمي وكبــرت بزود تربيتـه
اقاتل دونك العــــدوان. يعمي چانت أمنيتـــه
آنه ابنه وشايل اسمه. اسمحلي احقق حلمه
ما هاب عداك للموت وياك.
٠٠٠٠٠٠٠٠٠٠٠٠٠٠٠٠
وصيّة امن الحسن هذه. يعمّي وبيـــــها وصاني
انصرك لو شفت بالطف يحيطك جيش سفياني
الحسن هيهـات يتخلّه. لهـــــــــــذا اليوم ربّاني
ارخصلي اموت وياك. شهـــــم بالحومه تلگاني
افديك بدم المنحر. وستشهد مثل الأكبر
يكتل فرگاك للموت وياك.
٠٠٠٠٠٠٠٠٠٠٠٠٠٠٠
اذا تسألني عنّ الموت. مثل طعم الشهد عندي
اموت وما يمسّك سوء عهــــد ما اخلف بعهدي
اقاتل دونك العــدوان يعمـي لو أظـل وحدي
شبابي وعمري وسنيني. فـده لدين النبي جدي
ما اخشه سيوف الظالم. عد عينك وآنه القاسم
الجنة بمسراك. للموت وياك.
٠٠٠٠٠٠٠٠٠٠٠٠٠٠٠٠
رسالة اكتبها للأجيال. خل تفهــم معانيــــها
الشاب الملتــزم نفسه. يهـــــذّبها ويزكّيــــها
وذا حان الوعـــــد للّه. ينصره وروحه يفديها
لا يركـض وره الدنــيا. نـدامـــه وذلّه تاليــــها
كل شاب الينشد عني. خل يقرة ويفهم مني
إعرف مولاك. للموت وياك.
٠٠٠٠٠٠٠٠٠٠٠٠٠٠٠٠
رخصلي القائد المعصوم. دخلت بسيفي للميدان
أنه القاسم ربيب حسين. اذلكم يا بنـي سفيـــان
نجل المجتبـى وسيفـــه. هذا البيدي يا عـــدوان
ادافـــــع عن حـرم عمي. لحدما ينزف الشـريان
ياويله اليگرب يمي. من حيدر وارث عزمي
عالحق شفناك. للموت وياك.
٠٠٠٠٠٠٠٠٠٠٠٠٠٠٠٠
طعنتوني غدر بالسيف. صحت يا عمي ادركني
اجـاني وگلبـه متــــألم. يصيـــح بصوت آ يبني
لگاني امگطـــــع ودمي. يسيل وجرحي لاچمني
خذاني لخيمتي بياحال. ذبيـــــــح لأمّي سلمني
مذبوح وينزف دمي. شبكتني وطاحت امي
لا ما عفناك. للموت وياك.
سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
نزلة للأنصار عليهم السلام
راية الأنصار تنتظرك حبيب
٠٠٠٠٠٠٠٠
يا حبيب ابن مظاهر رايتك
بيد ابواليمه اليتاني جيّتك
حسين ابو السجاد يطلب نصرتك
بالحرب مذخور لحسين الغريب
٠٠٠٠٠٠٠
يالله شيل الرايه يا شيخ الزلم
قائد الأنصار تنطيهم عزم
آل اميه تهاب سيفك يا شهم
واليطيع حسين يربح ما يخيب
٠٠٠٠٠٠٠٠
يالله هزّ الرايه يم باب الخيم
خل تشوفك زينب وكل الحرم
جَمّع الأنصار وهتف بالعَلَم
ما نعوف حسين وحده بلا صحيب
٠٠٠٠٠٠٠٠
قائد الأنصار والرقم الصعب
يالله سلّ السيف ونزل للحرب
تقتدي الانصار بيك ومن تطب
تركض عله الموت مثلك مهيب
٠٠٠٠٠٠٠٠٠
انت والأنصار ما خنتو العهد
صرت للمظلوم بالحومه سند
حجر سجّيل عله عدوانه وأشد
قلّه لكن موقف القلّه عجيب
٠٠٠٠٠٠٠٠٠٠٠
يا حبيب ابدمك الطاهر نلت
منزله ويمّ الحُسين اتخلّدت
باب من ابواب ابواليمه صرت
والمريض اليوكف ابابك يطيب
٠٠٠٠٠٠٠٠٠٠
دفتر الزوار بيدك والقلم
واليزور حسين تكتبله نعم
سجّل الزوار كلها والخَدَم
البعيد هواي واليمّه قريب
سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
مقدمة للأنصار عليهم السلام
احجي بالنيابة. كلمة الصحابة
ما نعوفك والله. يا أبا عبد الله
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
سيدي آنه حبيب ابن مظاهر
بالنيابة احچي عن اهل المنابر
ذوله اصحابك يبوالاكبر جواهر
ما نعوفك سيدي لگطع المناحر
لا حكم بدونك. والله ما نخونك
منهجك تبعناه. يا أبا عبد الله
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
راي واحد راينه وخل يسمع ايزيد
لغير شخصك ما نبايع ما نمد ايد
احنه ندري غير حبك كلشي ميفيد
بكربله موقف حسيني انسجل نريد
شما يقل عددنه. نثبت بعهدنه
كلشي لجلك عفناه. يا أبا عبد الله
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
هذا جون وهذا عابس هذا نافع
كلها ملهوفه اجت عنك تدافع
يا حُسين وآنه راية بچفي رافع
لجلك نقاتل بلا غايه ومنافع
هذه مو نهاية بكربله البداية
نصرك افتتحناه. يا أبا عبد الله
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
طاعتك واجب مثل طاعة نبينه
بيك آمنه يبواليمه ورضينه
شيعتك موقفنه واحد تدري بينه
بس ألك يبن النبي مدّينه ادينه
صحبتك سعاده. نعشك الشهاده
داعيك لبّيناه. يا أبا عبد الله
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
احنه انصارك ولا نخشه المنيه
ما يخوفونه بعددهم آل اميه
إلّا نگطع روسهم بالغاضريه
انطِينه رخصه وشوف ياروح الزجيه
بالحرب نذلهم. نِكثر بقتِلِهم
جم شمر ذبحناه. يا أبا عبد الله
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
فدوه دمنه لدمك ودم الهواشم
خل يكطعونه ولا سبي الفواطم
ظالم ابن زياد ما نخضعله ظالم
يريد يغرينه بطمع دنياته واهم
بحبك التزمنه. غيره ما يهمنه
بالدمه اشتريناه. يا أبا عبد الله
سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
العباس عليه السلام
لا تعتذر حامي الخدر. اسمك يراعي الغيره
يابالفضل. لا ما تذل اختك تظل اميره
يعباس يالوفيت اويايه
يعباس. فزعتك بالرايه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
ما قصّرت بعيونك امخليني
منّ المدينة لكربله امباريني
جان العهد ما بينك ومابيني
لآخر نفس يابالفضل تحميني
هذا الحصل بالطف ينور سنيني
بگطع الچفوف بكربله توافيني
نعم الاخو. والله وكفو. كافل خدر خواتك
بيك افتخر. سور وستر. ياخويه من صفاتك
يعباس. يالجمالك آيه
يعباس. فزعتك بالرايه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
وارث علي يمرجّف الخيّاله
حد الخيم محّد كدر يدناله
سيفك مثل يوم الحشر وهواله
هز عسكر يزيد وعبر زلزاله
يحصد رگاب اهل الكفر بفعاله
موت الزلم يالخزرتك چتاله
يوم الحرب اسمك رعب ما يثبت اليسمعه
نار وغضب. تكطع رگب. اكبر عدو تصرعه
يعباس. مو قليل هوايه
يعباس. فزعتك بالرايه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
لمن رحت والراية فوك امتونك
لماي النهر ما كدروا يمنعونك
كلّ آل اميه شردوا يهابونك
يابالفضل ما ترحم ايعرفونك
وجه لوجه ما كدروا يلاگونك
غير الغدر ما عدهم يصدونك
لوله الغدر. ما ظل شمر. يم النهر تفنيهم
ما تنثني. ولا تنحني نازل غضب عليهم
يعباس. ما خلفت حچايه
يعباس. فزعتك بالرايه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
زينب أنه وكافلني انت بزودك
ما مسنه ضيم ولا ضمه بوجودك
ما نعطش ونروه بفضل مجهودك
حدما طحت نشرب عذب من جودك
اعرف غدر كطعوا يخويه زنودك
عالمشرعه بالدم وفيت عهودك
تارك اثـر. يم النهـر. عهد اختك الوفيته
انتي الوفي. وبيك اكتفي. غيرك فلا نخيته
يعباس. حققتها الغايه
يعباس. فزعتك بالرايه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
لمن طحت عالمشرعه وطاح الواك
للمشرعه حسين الغريب اتعنّاك
خويه انكسر ظهري ابمصابك ناداك
تمدد على جرف النهر خويه وياك
انت الطلبت عله النهر تبقى هناك
ما قصّرت يابالفضل ما ننساك
مهما حصل. كافل تظل. ميت عدل كفيلي
مثلك ابد ما صح سند. نعم الاخو وخليلي
يعباس. هاشميتك هايه
يعباس. فزعتك بالرايه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
مسامحتك آني باليصير علية
زينب أنه وما انكسر علوية
لا ما اذل والراضية المرضية
تعرف مقامي والشموخ البية
صح عالهزل متچتّفه ومسبية
ابقى الاميره بكل زمن محمية
رغم السبي. بنت النبي. يكفيني راسي عالي
لبوة علي موقف الي ما ينمحي يغالي
يعباس. مثلك امربايه
يعباس. فزعتك بالرايه
سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
نزلة مسلم بن عقيل عليه السلام
يا مسلم انهض بالسيف شد حيلك ولا تهتم
٠٠٠٠٠
عمك علي حامي الحمه وحامي الجار
ذكّــرهم بصولاته درع المختار
يوم الضرب عمرو بن ود بالفقّار
يا مسلم بهذا الصيت. سل صارمك وتقدّم
٠٠٠٠
تدري بأبن مرجانه خاين خوّاف
دزلك يمسلم مو الف جيش آلاف
اتباع امية اهل الخيانه الاجلاف
لن يدري بيك انت الحيد. ما تنثني ولا تُهزَم
٠٠٠٠٠
گلهه يطوعه الهاشمي عد عيناج
انتي الوگفتي وياي اوكف ويّاج
يوم الحشر اشفعلج وما انساج
ياطوعه من سيفي اليوم. خيل وزلم ما تسلم
٠٠٠٠٠
مسلم أنه وللذل ابد ما انگاد
اگلب الكوفه بثورتي عله ابن زياد
ميهمني جيشه شما تسلّح وزداد
سيفي بيميني وهيهات. انسه العهد وتوهّم
٠٠٠٠٠
ياطوعه حان الثار من دارج حان
إلا اترس بروس وجثثها الكيعان
هذا آنه مسلم بالحرب والميدان
انشر مناحه بكل بيت. والكوفه تغرك بالدم
٠٠٠٠٠
كلا لبن مرجانه كلا ليّزيد
ولغير ابو السجاد ما مد الايد
ما عوفه لا بالموت لا بالتهديد
متمسّك بحبل حسين. لا اخسر ولا اندم
٠٠٠٠٠٠
گالتله يا مسلم اعرفك وفاي
ما قصّرت لحسين وفيت بهاي
عطشان حدما متت ما ضگت الماي
اسمك يضل نور ونار. والكوفه بي تتكلّم
سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
رئيسية مسلم بن عقيل عليه السلام
هاشمي روح وعقيده. ما يخوّفني بوعيده
لا وحگ دمعة حميده. ما تذلّوني
٠٠٠٠٠٠٠٠٠٠٠٠٠٠٠٠٠٠٠٠٠٠٠٠
آنه من نسل الهواشم غيره وخلاق وحميه
راسي عالي ويبقه عالي. ما اطخ راسي لأميه
لا يبن مرجانه اسمع ما تخوّفني المنيه
آنه مسلم ما اساوم. عالعقيده الحيدريه
مسلم وثابت ولائي. حب علي يسري بدمائي
ويبقه لحسين انتمائي. ما تذلّوني
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
آنه مبعوث الامامه. خادم حسين وسفيره
حسين ابن جده مُحمّد. ماكو مثله ولا نظيره
ما ابايع غيره واحد. هاشمي وشيخ العشيره
لا تظن ليزيد أخضع فاسق وبايع ضميره
مؤمن وبالله عتصامي. جيت ابلغ عن امامي
اول وآخر كلامي. ما تذلّوني
٠٠٠٠٠٠٠٠٠٠٠٠٠٠٠٠٠٠٠٠٠٠
ندري يهل الكوفه ندري. ما تعوفون الخيانه
ما تريدون اليعزكم. عشتو عالذل والمهانه
لا عهد لا ذمه عدكم. لا كرامه ولا امانه
آخره ودنيه خسرتو. من طعنتونه بگفانه
مسلم تعرفوني كلكم. ما ادنّگ راسي الكم
يالغدرتوني بفعلكم. ما تذلّوني
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
لن ابن مرجانه ناده. إلّا يا مسلم اقتلك
لو تبـايع آل اميـه. لو تموت وما امهلك
گلّه مسلم لا يظالم. چف صلح هيهات امدلك
يا حلاة الموت عندي. ولا ابايع طاغي مثلك
الله ينطيها الشهاده. مكرمه لأشرف عباده
من بعد موتي السعاده. ما تذلّوني
٠٠٠٠٠٠٠٠٠٠٠٠٠٠٠٠٠٠٠٠
آني اول واحد انطي. في سبيل حسين دمي
اسمك وقصرك امسحه. وينذكر بالكوفه اسمي
وَهَم يبن زياد حكمك. يفنه والمايفنه نجمي
لا تظن يرهبني سيفك. لكن عله حسين همي
من يجي تغدرونه ادري. هذا هوه الكسر ظهري
فدوه للمعصوم عمري. ما تذلّوني
٠٠٠٠٠٠٠٠٠٠٠٠٠٠٠٠٠٠٠٠٠٠٠٠
ما اذل لا والخلقني آنه من بيت الامامه
يبقى يبن زياد ذكري. خالد ليوم القيامه
آنه مسلم خاف ناسي. رابي عالعز والشهامه
الدنيا ويّاكم مذلّه. موتي لجل الحق كرامه
ما خنت عهدي وضميري. اعلم واعرف مصيري
قائدي حسين واميري. ما تذلّوني
سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
نزلة ام البنين عليها السلام
للوفه صح امّهات هوايه
ماكو مثل ام الگمر وفايه
٠٠٠٠٠٠٠٠٠٠
ماكو مثل ام الكفيل بكل زمن
فاقت الحرة بوفاها عله الوفن
ضحّت بأربع ولد لمّ الحسن
فاطمه ام ابوفاضل هايه
٠٠٠٠٠٠٠٠٠٠٠
فاطمه ام ابوفاضل عارفه
ماكو منها بالسخاء وبالوفه
سيّدتها فقط بنت المصطفه
فاطمه الزهراء أعظم ايه
٠٠٠٠٠٠٠٠٠٠٠
من مثل ام البنين امن النِسَه
للوفه وللطيب صارت مدرَسَه
لأن جانت للحُسين اتقدّسَه
الله شرّفها ورفعها لهايه
٠٠٠٠٠٠٠٠٠٠٠٠٠
لجل ابواليمه الذبيح بنينوه
ضحّت باولادها كلهم سوه
للنهر عباس من طب ما روه
اتذكّر امّه الوصته بحچايه
٠٠٠٠٠٠٠٠٠٠٠٠
اتذكّر امّه وما شرب ماي النهر
من وكع عالمشرعه دامي الگمر
حسين من يم الخيم ظهره انكسر
بطيحت الكافل تطيح الرايه
٠٠٠٠٠٠٠٠٠٠٠٠٠
من اجاها الناعي وگفت سألته
عن ابنها بالطفوف وفزعته
گلها وفّه بالعهد من ندبته
زينب وسوه الطفوف ادمايه
٠٠٠٠٠٠٠٠٠٠٠٠٠٠
فرحت بتضحيت ابنها وزوده
لزينب العباس وفّه عهوده
چفوفه وجروح السيوف شهوده
الغايه يرضي حسين اشرف غايه
سيد زيد الفحام
محرم ١٤٤٧هـ
____________________________________
مقدمه ام البنين عليها السلام
شلتك بعيني ضوه. روحي وغله امن الهوى
انت لجروحي دوه. يا حُسين
٠٠٠٠٠٠٠٠٠٠٠٠٠٠٠٠٠٠٠
آنه ام البنين امك يضي عيني
حسين حسين يبني وشمعة سنيني
عني تريد تبعد ليش حاچيني
خاف البين يحجب بينك وبيني
يبني يا نبض الگلب. تدري بفراگك صعب
گلبي من هسه نچوه. يا حُسين
٠٠٠٠٠٠٠٠٠٠٠٠٠٠٠٠٠٠٠
ما اكدر اودعك يا اعز ولدي
غيرك يا حُسين بدنيتي شعندي
وين بهالهواشم والظعن تحدي
خوفي امن الزمن من ينگلب ضدي
آه من غدر الزمن. عيوني من هسه بچن
يعني ناوي لنينوه. يا حُسين
٠٠٠٠٠٠٠٠٠٠٠٠٠٠٠٠٠٠٠٠
يبني وياك أخذهم اربع اولادي
فدوه لشوفتك يبن النبي الهادي
بيهم ارد حقّق عهدي ومجادي
أهل البيت انتم قاده وسيادي
آنه الكم خــادمـه. ولدي فدوه لفاطمه
گلبي بس حبك حوه يا حُسين
٠٠٠٠٠٠٠٠٠٠٠٠٠٠٠٠٠٠٠٠٠٠
فديتك بالبنين الاربعه وضحّيت
سالم من عدوّك ترجع تمنّيت
ابچي اباب دارك ونتظر ظليت
لا بيّن خبر منك ولا ردّيت
ما بچيت عله الگمر. دمعي لغيابك نهر
يجري ماي ودم سوه. يا حُسين
٠٠٠٠٠٠٠٠٠٠٠٠٠٠٠٠٠٠٠٠٠٠٠٠
صحت يحسين يبني طالت السفره
لن بشر ابن حذلم يصرخ بعبره
حسين بكربله ضامي انگطع نحره
بخيول آل أمية كسّروا صدره
ينزف بصدره الجرح. وراسه مرفوع برمح
الطم وظهري انطوه. يا حُسين
سيد زيد الفحام
محرم ١٤٤٧هـ
_______________________________________&
نزله للعليلة عليها السلام
يابويه حاچيني
عدمن تخلّيني
يشتد عذابي يشتد عذابي
يا بويه ما احمل هجر طفله وعليله
فراگك جرح يدمي الگلب ما بية حيله
تدري بحياتي من بعدكم مستحيله
دمعي بغيابك لا تظن ينشف مسيله
هجرك يأذيني
عدمن تخلّيني
يشتد عذابي يشتد عذابي
يالعوّدتني بكل صبح تنشد علية
يشفه المرض لمن تحط. ايدك بدية
يا بويه يحسين الألم. شمسوي بية
يعصرني هجرك وختنك كل مغربية
بعدك يضي عيني
عدمن تخلّيني
يشتد عذابي يشتد عذابي
طفله وعليله لياوكت. اصبر وتاني
لا عيني تغفه ولا دمع. ينشف ثواني
يا بويه خوفي امن الزمن غادر زماني
طالت علية سفرتك وشتد حناني
يالماخذ سنيني
عدمن تخلّيني
يشتد عذابي يشتد عذابي
عيني عله دربك وانتظر ترجع يغالي
حال اليتيمه بلا أهل يابويه حالي
مرتاحه بعدك لا تظن سود الليالي
يا طفله مثلي لا اهل. لا عدها والي
چفك يداويني
عدمن تخلّيني
يشتد عذابي يشتد عذابي
يابويه طوّلت السفر يبن الزجيه
لن بشر ابن حذلم اجه ناعي الرزيه
يا أهل يثرب من صرخ صوت المنيه
ذبحَوا ابواليمه السبط گوم آل اميه
وينه اليواسيني
عدمن تخلّيني
يشتد عذابي يشتد عذابي
يا بويه هد حيلي وطحت لمن سمعته
حاچيني يا ناعي اشّفت بعيونك أنته
جاوبني شفته مگطع ومسلوبه جثته
هذا الخفت منه حصل هذا العرفته
منهو اليباريني
عدمن تخلّيني
يشتد عذابي يشتد عذابي
سيد زيد الفحام
محرم ١٤٤٧هـ
_________________________________&__
كعدية يوم العاشر من محرم الحرام
وينك ياعلي هجموا علينه
حركوها الخيم وحنه نسبينه
ألحك ذبحوا حسين. ياحامي الحمية
٠٠٠٠٠٠٠٠٠٠٠
يوم عاشر من محرم يا علي ريتك تجينه
تشوف حال حسين بويه. بالسيوف امگطعينه
عالرمح مرفوع راسه. وحنه يابويه انولينه
مذبوح سلبوا جثّته
خيل آل اميه داسته
من يحمي ظعنه وعيلته. ونذبح حامي الظعينه
ما ظل لا اخو لا والي يمنه
احضر يا علي حركو خيمنه
وينك يا علي وين. عنّ الغاضريه
٠٠٠٠٠٠٠٠٠٠٠٠٠٠٠٠٠٠٠
بعيني شفت الشمر بويه من كطع بالسيف نحره
ضامي ويحزّ بوريده. يا علي ومحّد ينصره
ما كفَو يا علي بذبحه. داست الخيل عله صدره
الحك على حسين انذبح
بألف وتسعمية انجرح
ودم نحره عالكاع انسفح ونسحك بخيول عشرة
نفس اللي كطع نحره اجانه
يسلبنه الخدر بويه وسبانه
دربك يا علي منين تنتظرك رقيه
٠٠٠٠٠٠٠٠٠٠٠٠٠٠٠٠
زينب المهضومه اني حايره بجمع اليتامه
بين خيل ونار اركض. والدرب ما بي سلامه
من يطفي النار بويه. من عكب اهل النشامه
چم طفله سحكوها وطفل
وجم حرمه چتفوها بحبل
ما ظل اخو عندي عدل. وچلچل الليل بضلامه
لو گتلي على العباس وينه
بويه عله النهر كطعوا يمينه
دامي بلايه چفين. طاح عله الوطيه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
النار مستعره بخيمنه. وفرّت الأيتام منها
چم اخت فكدت اخوها. وضيّعت جم ام ابنها
التخلص امن النار بويه. تنضرب سوط ابمتنها
محتاره بين احمي الحرم
لو اطفي نيران الخيم
اتعثّر وحيلي انهدم. يا مصيبه الاحچي عنها
من يطفي الخيم مستعره بينه
وعباس الگمر گطعوا يمينه
اشكي بدمعة العين. من ينغر علية
٠٠٠٠٠٠٠٠٠٠٠٠٠٠
ناس تسلب ناس تحرك. ناس تتفرج علينه
يا علي ما عدنه غيرك احضر بساع انتهينه
آل اميه وتدري بيهم. والله ميرحمون بينه
عباس مرمي عله النهر
وحسين مگطوع النحر
معقول ما عندك خبر. يا علي بيك انتخينه
جم طفله وطفل سحكتهم الخيل
وينك يا علي مو چلچل الليل
آنه ويه لنساوين من باجر سبيه
سيد زيد الفحام
محرم ١٤٤٧هـ
طور. آنه ام البنين ودهري ذبني
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
ليلة الوداع
ليلة اوداع الهواشم
صعبه صعبه عله الفواطم
بين الاحباب
دمعه وعتاب
صعبه صعبه عله الفواطم
٠٠٠٠٠٠٠٠٠٠٠٠
ليلة العاشـر محـــــرم ليلة اوداع وهضُم
دمعة وجروح ومناحه والألم طك بالعظُم
بين اخت تشكي لخوها. وبين ابن شابگله اُم
ضجة صارت بالمخيّم دمعه وموادع يضُم
بين ابواليمه وعياله
وزينب وراعي الكفاله
والگلب ذاب
دمعه وعتاب
صعبه صعبه عله الفواطم
٠٠٠٠٠٠٠٠٠٠٠٠
يم اخوها حسين زينب والگمر حامي الظعن
تودّع اخوتها بدمعها. وكل مصايبها اجن
عيونها لوداع اهلها مو دمع من دم بچن
ساعه للعباس تشكي. وساعه لبن امها بشجَن
من يطر فجر المصيبه
زينب تصير الغريبه
عگب الاطياب
دمعه وعتاب
صعبه صعبه عله الفواطم
٠٠٠٠٠٠٠٠٠٠٠٠
ليله راحت يم ابنها. يم علي الاكبر تون
تگلّه يبني شلون اودعك گلبي من هسّا يحن
ياعلي ساعه ابغيابك اكدر اصبر لا تظن
لو عفتني شلون بية. گلبي ما يحمل حزن
يا علي الاكبر حبيبي
يا دوه جروحي وطبيبي
والهوى الهاب
دمعه وعتاب
صعبه صعبه عله الفواطم
٠٠٠٠٠٠٠٠٠٠٠٠
رمله للقاسم ابنها. تحجي وتصب الدمع
مُنيتـي تكبـر وزفّك. وبيدي اشعلّك شمع
ما حسبت حساب جرحي كربله وبيها انفجع
تنـذبح كـدام عينـي وحبل وصلك ينكطع
خل اشبگك خل اشمّك
گبل لا ينسفك دمك
فوك الاتراب
دمعه وعتاب
صعبه صعبه عله الفواطم
٠٠٠٠٠٠٠٠٠٠٠٠
والرباب اشتد حزنها تبجي يم مهد الطفل
تناغي عبدالله ابنها. تلولي والمدمع يهل
هذه آخر ليله يمها ضامي باجر ينچتل
تودعه وتقبّل وريده. من گبل لا ينفصل
للصبح سهرانه أمه
شبگ شابگته وتشمّه
تدري ينصاب
دمعه وعتاب
صعبه صعبه عله الفواطم
٠٠٠٠٠٠٠٠٠٠٠٠
حگها زينب والفواطم. ما ينامن للصبح
باجر حسين وبنينه. والهــواشم تنـــذبح
يا مصيبه يصد گلبها. وينفجع من چم جرح
تنسبي لمن تشاهد راس اخوها عله الرمح
بت علي حامي الحميه
بيا زمن زينب سبيه
بين الاجناب
دمعه وعتاب
صعبه صعبه عله الفواطم
سيد زيد الفحام
محرم ١٤٤٧ًهـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
عبدالله الرضيع عليه السلام
الماي الماشربته. من بعدك كرهته
٠٠٠٠٠٠٠٠
يا عبدالله يوليدي. عطشان انت وشبيدي
توصل للنهر عيدي. ما يحصل عرفته2
٠٠٠٠٠٠٠٠
تبچي وتنظر بعيني. وبدموعك تحاچيني
ضامي تگلّي روّيني. ما عندي الطلبته2
٠٠٠٠٠٠٠٠٠
مايك عد بني سفيان. منعوه يبني يا عطشان
علينه وحتى عالرضعان. هم مثلك فگدته2
٠٠٠٠٠٠٠٠٠
روح بحضن ابوالعتره. بلكت تشرب الگطره
تروه وتبرد الجمره. گلب امك فجعته2
٠٠٠٠٠٠٠٠٠
يا عبدالله يا يُمّه. عدوانك بلا رحمه
حتى اليرضع تظلمه. ما ترحم دمعته2
٠٠٠٠٠٠٠٠٠
لنحرك حرمله الجاني. محضر سهمه ومتاني
ما يطلب طفل ثاني. لو اكدر منعته2
٠٠٠٠٠٠٠٠٠
ضامي وصابك بسهمه. وانت بحضن ابواليمه
تفيّض نحرك بدمه. ودلّالي لچمته2
٠٠٠٠٠٠٠٠٠٠
رديت بنحر دامي. مذبوح بسهم ضامي
دمك يجري گدامي. كل حيلي هدمته2
سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
رئيسية علي الاكبر عليه السلام
علي ياشمعــة البيت. يروحي وامنياتي
ينبض الينعش الروح. يلمنــــــوّر حياتي
يعافيتي. هوى لريتي. يروحي وامنياتي
٠٠٠٠٠٠٠٠٠٠٠
يا علي الأكبر يا نبض گلبي واعز من گلبي
ربّيتــك سنيـــن وگلت تكبر تعوٌض تعبي
كل ظني يبني بشوفتك. اتهنّه وانت بقربي
ما حسّبت غدر الزمن يفجعني ياضي دربي
ابــد ما مـر على البال. مصاب الغاضريه
صدك يوليدي عطشان يذبحوك آل اميه
يتربيتي هوى لريتي. يروحي وامنياتي
٠٠٠٠٠٠٠٠٠٠٠
ما بيه اودعك يا علي. وشلون اعيش بدونك
بعيوني ما شوف الدرب. لوما اصد بعيونك
هيبة مُحمّـــــد هيبتك. يا خوفي ليّحسدونك
يا علي يبني بيا ذنب. عدوانك يذبحونك
يريت ابدالك السيف. اخذ روحي وذبحني
دريت بأمّك شــــلون. جرح فگدك جرحني
يضي بيتي هوى لريتي. يروحي وامنياتي
٠٠٠٠٠٠٠٠٠٠٠
آنه امك البيك أتعبت. ونطيتك اغله سنيني
تاليهه يبني بكـــــربله. تودّعنـي وتخلّينـي
يا علي الأكبر چم سنه. ما بينـــك ومابينـي
سنين الربه وذاك العمر. لحظه اختفن من عيني
وداع الغربه والموت. اودعـــك ياحبيبي
انوح شينفـــع النوح. يجرحي وياطبيبي
يحنّيتي. هوى لريتي. يروحي وامنياتي
٠٠٠٠٠٠٠٠٠٠٠
صح اغله من روحي واعز. يالفـــرگتك چتّاله
لكـن حسين بكــــــــربله يكسر الخاطر حاله
اوكـف لبـوك ابغـــربتــه يا دنيتــــه وآماله
يوليـــدي انزل للحـرب. يمرجـف الخيّاله
اريـــدك تهـــــزم الگوم تراويهم جهنم
جثث فوك الجثث كون. على باب المخيّم
يئمنيتي. هوى لريتي. يروحي وامنياتي
٠٠٠٠٠٠٠٠٠٠٠٠٠٠
مكتوب اشوفك تنذبح بالطف يزهرة عمري
ياريت ميته ولا شفت. بالخيمه دمك يجري
ما عندي غيرك يا علي. شحجي وشعاتب دهري
مني خذاك وكربله. يوليدي كسرت ظهري
اجيت مگطع جروح. يبعد امك يغالي
اشبگك وانت مذبوح. ولا مر عله بالي
ولا نيتي. هوى لريتي. يروحي وامنياتي
سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
نزلة للقاسم عليه السلام
رايح يذبحونك من فدوه لعيونك
امك يجسام. امك يجسام
٠٠٠٠٠٠٠٠٠٠٠٠٠
انت الهوى وانت النفس يوليدي يا جاسم
شايل صفــــات المجتبه شمعة بني هاشم
رايح ييُمّه للحــــــــــرب ما ترحــم الوادم
ادعيلك الله بغـــــــربتـي تروح وترد سالم
احذر يغدرونك. من فدوه لعيونك
امك يجسام. امك يجسام
٠٠٠٠٠٠٠٠٠٠٠٠٠
بعدك زغير عله الحرب يا نبضي ونفاسي
طعنة رمح تكسر ظهر جـرح الإبن قاسي
احساسي گلّي تنذبح ما يخطأ احساسي
رغم المصيبة والجرح بيك ارفعت راسي
جاسم يحسدونك. من فدوه لعيونك
امك يجسام. امك يجسام
٠٠٠٠٠٠٠٠٠٠٠٠٠
حـلم العمــــر تكبر الي وبرسومك اتهنّه
من تلبس ثياب العرس وعجـنـلّك الحنّه
ما حسّبت طف كــربله واللـــوعه والونّه
اتمنّه گبلك انـذبــــــح يا جاســــمـ اتمنّه
يا راحه من دونك من فدوه لعيونك
امك يجسام. امك يجسام
٠٠٠٠٠٠٠٠٠٠٠٠٠
رايح يجاسم للحـــرب گلب امك اتگطّع
ما ترحم سيوف العدو اتمنّه لو ترجـــــع
امك وصيـــح بخيمتي يوليدي ما تسمع
گالولي رمـــح الناصبي منّ الظهــر يطلع
غدراً يطعنونك. من فدوه لعيونك
امك يجسام. امك يجسام
٠٠٠٠٠٠٠٠٠٠٠٠٠
احسبني ميته لو شفت نحرك يصب دمه
مو تدري ادعي عله الهوى لو غثّتك نسمه
وشلون اشوفك منـــذبـح جاوبنـي يا يُمّه
يارب اخــذ روحـــي گبل لا ينطعن جسمه
لتظن يرحمونك. من فدوه لعيونك
امك يجسام. امك يجسام
٠٠٠٠٠٠٠٠٠٠٠٠٠
يوليــــدي شيصبر الگلب من ترجـع موذّر
بعيوني اشوفك منـــذبح صدگني ما اگدر
مثل البـدر وجهـك يشــع تاليهـــه يتعفّـــر
مو تدري گلب الأم يحس زاد الألـم أكثــر
نشمي ويعرفونك. من فدوه لعيونك
امك يجسام. امك يجسام
سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
مقدمة للقاسم عليه السلام
شوفة وجهك. اعذب منّ الماي
شلّي بعمري. لوما انت وياي
٠٠٠٠٠٠٠٠٠٠٠٠٠
يا نبض الروح يا تعبي وحلمي
ما تبقى جروح. من تكرب يمي
لا ما مسموح. تتركني ابهمّي
ما يكفي النوح افديلك دمي
جاسم يبني. حنّة عرسك هاي
شلّي بعمري. لوما انت وياي
٠٠٠٠٠٠٠٠٠٠٠٠٠
ما اتحمّل بُعدك يا جسام
انت مدلل. مو مالت آلام
جسمك ينحل. بسيوف وبسهام
گلبك يقبل. تسبيني الظلام
أم ومنك. اطلب حگ رباي
شلّي بعمري. لوما انت وياي
٠٠٠٠٠٠٠٠٠٠٠٠٠
چنت اتمنّه. عريس انشوفك
مو دم حنّه. تتحنّه چفوفك
راحه وجنّه. وجهك وطيوفك
ترجع النّه. سالم ونطوفك
من ودعتك. مذهوله بلا راي
شلّي بعمري. لوما انت وياي
٠٠٠٠٠٠٠٠٠٠٠٠٠
يقبل عمك؟ للموت امشي وياك
تدري بامك. ما تحمل فركاك
تسفك دمك. من تنزل لعداك
تجرح جسمك. تتخضب بدماك
وياك اتكطّع. ما ريدن دنياي
شلّي بعمري. لوما انت وياي
٠٠٠٠٠٠٠٠٠٠٠٠٠
يكتل هجرك. ياروح وريحان
ذبحو نحرك يوليدي العدوان
طعنة بصدرك. يالچبدك عطشان
باكو عمرك. يا أحله الشبّان
آخ جروحك. جاسم يبني هواي
شلّي بعمري. لوما انت وياي
٠٠٠٠٠٠٠٠٠٠٠٠٠
اكضي سنيني. بدموع وآهات
يهده ونيني. لو اسكت هيهات
شيهدّيني. ابني الغالي ومات
تبقى بعيني. للموت المأسات
بلسم روحي. بعدك ضاع دواي
شلّي بعمري. لوما انت وياي
سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
رئيسية للأنصار عليهم السلام
صرخة من الطف صداها. يوصل لقصرك مداها
يا يزيد ومحتواها. لا حياة بلا حُسين
٠٠٠٠٠٠٠٠٠٠٠٠٠٠٠٠٠٠٠
احنه انصار ابواليمه. نهتف من وعي الوجدان
رسالة اندزها لبن زياد. وليّزيد وبني سفيان
غير حسين منبايع. لا ظالم ولا شيطان
احنه الواحد وسبعين. بالطف فتية الإيمان
احنه انصار الامامه. ما نعيش بلا كرامه
نتبع حسين وكلامه. لا حياة بلا حُسين
٠٠٠٠٠٠٠٠٠٠٠٠٠
لو مو مرّه تذبحنه. يظالم لو الف مرّه
نظل أنصار ابو السجاد. عهد هيهات نتبرّه
منهو البيكم عله حسين. كلمه تجرحه يتجرّه
نكص راسه وندوس عليه. ونكطع بالرمح شَرّه
سمعوا يا اهل الخيانه. نحمي ابواليمه بدمانه
چن رسول الله بزمانه. لا حياة بلا حُسين
٠٠٠٠٠٠٠٠٠٠٠٠٠
حبيب وعابس ومسلم. زهير وأسلم ونافع
شبيب وحنضلة وجندب. سعيد ومالك ورافع
عنّ حسين ابو السجاد. اجينه بكربله اندافع
ليزيد الناصبي الملعون. ابد لا والله منبايع
هذا ابواليمه وعياله. نبتعد عنه استحاله
وصلو ليّزيد الرساله. لا حياة بلا حُسين
٠٠٠٠٠٠٠٠٠٠٠٠٠٠
هذا ابن النبي الهادي. من لحم النبي ودمه
ما رايد حكم يا ناس. رايد يصلح الأمه
طالع ضد بني سفيان. يزيد الفاسق وظلمه
شلون يبايع ابن زياد. هذا البلعرش اسمه
احنه ما نخلف قراره. براي ابواليمه ومساره
شيعه كل واحد شعاره. لا حياة بلا حُسين
٠٠٠٠٠٠٠٠٠٠٠٠٠٠٠٠٠٠٠٠٠٠٠
احنه عله العهد باقين. ما دام النفس بينه
انموت ولا نعوف حسين. شيعه وهوه والينه
يا محله الشهاده وياه. كاس الجنة يروينه
وي اسمه الشريف نعيش. تتخلّد اسامينه
نبرز بثوب الشهاده. ونشعر بطعم السعاده
بس لبواليمه القياده. لا حياة بلا حُسين
سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
نزلة للعباس عليه السلام
يعباس يعباس. يبوالغيره يا گمر
يعباس يعباس. عطشنه وچفك نهر
٠٠٠٠٠٠٠٠٠٠٠٠٠٠
يكافل اشرف خدر. يرايه وسيف وستر
اخونه الما يعتذر. ابد هيهات
عطاشى طفال وحرم. ولا گطره بالخيم
مدد يا راعي العلَم. يبوالكلفات
علينه الماي انمنع يابالفضل ترضاها
دسل سيفك للحرب والمشرعه تعناها
دوه طفالك جربتك تدري العطش اذّاها
يعباس يعباس. كفيل وعندك خبر
يعباس يعباس. عطشنه وچفك نهر
٠٠٠٠٠٠٠٠٠٠٠٠٠٠٠
سمع زينب ونتفَض. عِرِگ هاشم بي نُبَض
نهض للنخوه نهض. گمر عدنان
نزل عباس الشهم. سحگهم خيل وزلم
يطشّر بيها ويلم. على التربان
اسد من طب النهر راية علي بمتونه
نزل يترس جربته. ما گدروا يمنعونه
اذا سل سيفه وهجم. ما يرحم يعرفونه
يعباس يعباس. سند لحسين وظهر
يعباس يعباس. عطشنه وچفك نهر
٠٠٠٠٠٠٠٠٠٠٠٠٠٠٠٠٠٠
الجيوش المتجمّعَه تظن تگدر تِمنَعَه
فناها عله المشرعه ابو النوماس
يگصّ بسيفه الرگب. بلا راحه ولا تعب
عذاب الله لو غضب هو العباس
قسم لو ما ينغدر لا ما تطيح الرايه
هزم آلاف الزلم. ما منعته الرمّايه
عهد يوصل للخيم. يروي الرضيع ابمايه
يعباس يعباس. كفيل لگطع النحر
يعباس يعباس. عطشنه وچفك نهر
٠٠٠٠٠٠٠٠٠٠٠٠٠٠٠٠٠
مثل حيدر بالحرب. عنيد ويهوه الصعب
على العسكر من يطب. عذاب وموت
فناهم گدها وكفو. زرع خوفه بالعدو
أنه الكافل والأخو. يصيح بصوت
هزم آلاف البشر عالمشرعه وطب ليهه
مِلَه الجربه وماشرب من يكدر يسوّيهه
ابو فاضل والنعم اطفال اخوه يرويهه
يعباس يعباس. يدرع اليجلي الخطر
يعباس يعباس. عطشنه وچفك نهر
٠٠٠٠٠٠٠٠٠٠٠٠٠٠٠٠٠
غدر گطعوا يمنته. ولزم جِوِده بيسرته
اجت نبله صابته. تبدّه الماي
وكف شامخ ما خضع على چفوفه ما جزع
حزَن عالماي الوگع تأذه هواي
يويلي بهذا الوضع صابه العَمَد عالهامه
وگع من مهره الگمر. لاگه الارض بسهامه
بقى مگطع عالنهر. لا ما رجع لخيامه
يعباس يعباس. عليك حسين انكسر
يعباس يعباس. عطشنه وچفك نهر
سيد زيد الفحام
محرم ١٤٤٧هـ
______________________________________________
مقدمه للعباس عليه السلام
عباس الگمر. يم جرف النهر
لا تنتظرينه. طاحن چفينه. يم جرف النهر
٠٠٠٠٠٠٠٠٠٠
يزينب يختي جيتج والظهر مكسور
عفت عباس يم جرف النهر منحور
يزينب لا تعتبين الگمر معذور
چفوفه مكطّعه وراسه بعَمَد مطبور
بلا جود وعلَم. ميرد للخيم
كون تشوفينه. طاحن چفينه. يم جرف النهر
٠٠٠٠٠٠٠٠٠٠٠٠
يزينب من وصلت المشرعه وشفته
مگطع بالسيوف وخيل دايسته
انحنيت عليه اودعه وللخيم شلته
اعتذر من عندي يختي وعالنهر عفته
من صابه السهم. نص حيلي انهدم
لا مو بس عينه. طاحن چفينه. يم جرف النهر
٠٠٠٠٠٠٠٠٠٠٠٠٠
اشد موقف فجعني وحيل اذّاني
شفته وردنه واحد يشبگ الثاني
شبگته وماكدر يشبگني بچّاني
يگلي اعذرني طاحن منّي ذرعاني
شم نحري وبچه. مات وما حچه
مابيني وبينه. طاحن چفينه. يم جرف النهر
٠٠٠٠٠٠٠٠٠٠٠
صاحت زينب آ يحسين يبن امي
راح الچان يكشف همك وهمي
أنشدك خويه منهو اليحرس خيمّي
اذا عباس طاح وانت مو يمي
ابقى بلا اخو. ويسبيني العدو
والكافل وينه. طاحن چفينه. يم جرف النهر
٠٠٠٠٠٠٠٠٠٠٠٠٠
يزينب يختي لو شفتي الجره بحالي
جسمي مكطّع وراسي برمح عالي
أنتي تكفّلي بالعيله وطفالي
وعينج عالعليل ابني علي الغالي
صبرج لا يقل. دمعج لا يهل
راح التنخينه. طاحن چفينه. يم جرف النهر
٠٠٠٠٠٠٠٠٠٠٠٠٠
راح الچان درعي وسيفي بالشده
صرت وحدي وغريب بلا اخو بعده
شحال اليبقه مابين العدو وحده
لا ناصر ينصره ولا اخو عنده
لكن ما اذل. حدما انقتل
ما يرجع لينه. طاحن چفينه. يم جرف النهر
سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
مسلم بن عقيل عليه السلام
يالفارگتني. ريتك شفتني
مفجوعه والمدمع يصب. ريتك شفتني
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
مسلم يبويه بحيرتي. رحت وعفتني بهمي/ آنه حميده
طفله وهظم گلبي الدهر. وشكي الجرالي لعمي/.متمسكه بيده
يواسيني كلما انهظم بچفوفه يبرد دمي / بعدك وحيده
يشتد حنيني. يمته تجيني
يابويه ذوبت الگلب يمته تجيني
٠٠٠٠٠٠٠٠٠٠
ظليت اتاني عله الدرب. ما غمضتها عيوني/ ترجعلي يمته
مسلم يبويه امن الحزن. بعدك تغير لوني./ نورك فگدته
يا خوفي غدروك العده. بمصابك يفجعوني/ هذا العرفته
اول ضحيه. بين آل اميه
يابويه وحدك بالحرب. بين آل اميه
٠٠٠٠٠٠٠٠٠٠٠٠٠
يا بويه طولت السفر. ما بينك ومابيني/ غدرت زماني
ادعيلك بدمع الفجر. وتمنّه ما ناسيني./ لشخصك اتاني
كل غايب يعود لهلَه. بس انت ما تلفيني/ جرحك سباني
ارحم دليلي سهرانه ليلي
يا بويه ما عفت الدرب سهرانه ليلي
٠٠٠٠٠٠٠٠٠٠٠٠٠٠٠٠
كالولي غدروك العده. بالكوفه مسلم وحدك./ نقضت عهدها
ناس الاجتّك بايعت. يا بويه أمست ضدك./ نزعت جلدها
تبعت يزيد وعافتك. خانت ونكرت عهدك./ لا ذمة عدها
أهل الضلاله. تصلح محاله
العاشت على الذل والرعب تصلح محاله
٠٠٠٠٠٠٠٠٠٠٠٠٠٠٠٠٠٠
ذبوك من سطح القصر ودمك نزف عالغبره/ ما بايعتهم
جسمك يجرونه بحبل فدوه لحبيب الزهره/ ما ساومتهم
ماشفتك وگلبي انجرح. خنگتني بويه العبره/ يالعذبتهم
بزغري هضيمه. اصبح يتيمه
مو هيّن الموقف صعب. اصبح يتيمه
٠٠٠٠٠٠٠٠٠٠٠٠٠٠٠٠٠٠
لا راحه بعدك لا فرح ولا تطفه نار جروحي./ ما تدري بية
طفله وهظم گلبي الحزن. والحسره تچوي بروحي/ صبح ومسية
مسلم يبويه مصيبتك. زيدّت ونّي ونوحي./ ليوم المنية
هذا الجرالي. بعدك يغالي
راح امشي لديار الغرب. بعدك يغالي
سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
مقدمه مسلم عليه السلام
سهرانه الليالي. ودعيلك يغالي
ترجع بالسلامه. يالشاغلّي بالي
٠٠٠٠٠٠٠٠٠٠٠٠٠٠
عزيزة گلبك وروحك. حميده الدلّلتني هواي
أحله سنيني وأيامي. ايامي العشتهه وياي
يمسلم بويه وعيونك. لا ظل لا فكر لا راي
من يوم الرحت عني. ظلمه ابغيبتك دنياي
طولت السفر ليش. بعدك تدري ماعيش
ابچي وانحب عليك. حال الثَكلَه حالي
٠٠٠٠٠٠٠٠٠٠٠٠٠٠٠٠
كل ليله بصلاة الليل. ادعيلك يبويه تعود
دمعي وسبحت مصلّاي. ونجوم الليالي شهود
هم ترجع بعد للدار. وتفتح بابك المسدود
تكعد وكعد بحضنك ترجعلي الليالي اردود
بعدك ماكو راحه. بس دمعه ومناحه
طفله وفارگتني. ما تدري شجرالي
٠٠٠٠٠٠٠٠٠٠٠٠٠٠٠٠٠
كالو بويه للكوفه. رحت ونگطعت اخبارك
لا طارش ولا مرسال منّك يرجع لدارك
بين ظلوعي وبگلبي. تدوي وما طفت نارك
خذت آمالي وسنيني. وبقت بعيوني آثارك
يمسهّرني وينك مشتاگه لحنينك
مسلم ياهوى الروح. عن حالك سؤالي
٠٠٠٠٠٠٠٠٠٠٠٠٠٠٠٠٠
أهل الكوفة غدارين. ما عدهم وفه وإيمان
إلا القلّه من عدهم عدهم شيمة الصحبان
يمسلم لا يغدرونك. احذر من بني سفيان
ما عدهم وفه ولادين. هواهم يتبع الشيطان
حس گلبي بهضيمه. راح اصبح يتيمه
أهل الكوفة غدروك. واقع مو خيالي
٠٠٠٠٠٠٠٠٠٠٠٠٠٠٠٠٠٠٠٠٠
عمّي حسين ناداني. لاشكّ الخبر عنده
بويه بحجره خلاني. وعنك دمعتي تنشده
ظل يمسح على راسي ونزلت دمعته بخده
يعني اتيتّمت ويلاه. بويه وزادت الشده
مسلم يا حميده. ضحّه بدم وريده
هذا اني ابمچانه. ارعاج ابدلالي
٠٠٠٠٠٠٠٠٠٠٠٠٠٠٠٠٠٠٠٠٠٠٠
تكتل قصّة مصابك يابويه وسفك دمك
من سطح القصر للگاع. آمر تنرمي خصمك
مسلم بويه والاعظم. ينجر بالحبل جسمك
الله يلعن ابن زياد. وكلمن خانك وذمّك
مفجوعه بمصابك. مهضومه ابغيابك
طفله ويتّمتني. يا بويه شبقالي
سيد زيد الفحام
محرم ١٤٤٧هـ
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
رئيسية ام البنين عليها السلام
هاي الوفيه. لحامي الحميه
وضحّت ولدها. لِبِن الزجيه
٠٠٠٠٠٠٠٠٠٠٠٠٠٠٠٠٠٠
ام البنين الاربعه ما صح مثلهه
حرة وعظيمه وطاهره طيب نسلهه
الله بعلي حامي الحمه حقق املهه
زوجة علي وام الگمر ماكو بفضلهه
ربّت ضياغم. اربع هواشم
لحسين ابنها. كلهم هديه
٠٠٠٠٠٠٠٠٠٠٠٠٠٠٠٠٠
لحسين ابواليمّه السبط طيب وفاها
تنجب ولدها لنصرته الله اصطفاها
ربّتله عباس الگمر يوفي برباها
حادي الظعينه لكربله شايل لواها
زينب گمرها. كافل خدرها
ناذر چفوفه. للهاشميه
٠٠٠٠٠٠٠٠٠٠٠٠٠٠٠٠٠٠٠٠
ام البنين تكاملت خدمتها لحسين
من ضحّت براس الگمر وچفوفه والعين
حرة ومثلها بهالبشر يحصل بعد وين
وفّت لبواليمه بصدق أم الميامين
لحسين ابنها. ونها وحزنها
يهمل دمعها. صبح ومسيه
٠٠٠٠٠٠٠٠٠٠٠٠٠٠٠٠٠٠٠٠٠٠
ظلت حزينه وتنتظر واحد يجيها
يخبرها عن حال المشه ومارد عليها
تنشد على حسين وتون. مو عن بنيها
كل مغربية وكل صبح ترفع اديها
يارب تنــادي. طمّن فـؤادي
مشتاگه لحسين. انت ادره بيه
٠٠٠٠٠٠٠٠٠٠٠٠٠٠٠
لن بشر ابن حذلم اجه ناعي الرزيه
يا اهل يثرب لا يظل. منكم بقيه
حسين الغريب بكربله بين آل اميه
يم النهر ضامي انذبح شبل الزجيه
وحامي الظعينه. گطعوا يمينه
وزينب بعدهم. راحت سبيه
٠٠٠٠٠٠٠٠٠٠٠٠٠٠٠٠٠٠
صاحت يناعي شهالخبر زوّد ونيني
أخبرني عن سبط النبي. وترك بنيني
گاللهه راسه عله الرمح تنظرله عيني
عن جسمه بخيول انسحگ لا تسأليني
صاحت اويلاه. ذبحوا حُسيناه
گطّع دليلي. سيف المنيه
سيد زيد الفحام
محرم ١٤٤٧هـ
______________________________________
/channel/Star_Khafaji
قناة الشاعر ستار الخفاجي اليحب يشترك
قناة الشاعر الموفق حيدر حسين الكرعاوي
اليحب يشترك بيها وله الأجر والثواب
رئيسية للعليلة عليها السلام
لا يگلبي لا تكابر تدري بالرايد يسافر
اغله من روحي علية. لا تظل بغيابه حاير
٠٠٠٠٠٠٠٠٠٠٠٠٠٠٠
لا يگلبي شلون تتقبّل رحيله
وآنه طفله حايره بهمي وعليله
والهجر مثل الجبل ما بية حيله
بلا ابوي حسين اصبر مستحيله
كل صبح متعوده اشوفه. شلون أظل وحدي وعوفه
كل كسر يحصل شفائه. بس يضل جرح المشاعر
٠٠٠٠٠٠٠٠٠٠٠٠٠٠٠٠٠٠٠
ليش من ودعني يا گلبي وشبگته
خنگتك دمعات عيني وما سألته
ليش ما ياخذني وياه اني بنته
گلي متگدرين عالسفره وتركته
ما شلت من عينه عيني. رايح وما ظن يجيني
من مسح چفه عله راسي. روحي حست بالمخاطر
٠٠٠٠٠٠٠٠٠٠٠٠٠٠٠٠٠٠٠٠٠٠
راح ابوي وأخذ وياه كل خواتي
عافني مجروحه آنه وذكرياتي
داري ظلمه وظلمه صارت كل حياتي
يا گلب اتمنّه كل لحظة وفاتي
عالدرب ظليت اتاني. وحسب لجيته ثواني
ليلي ما نمته بغيابه. للصبح كل يوم اساهر
٠٠٠٠٠٠٠٠٠٠٠٠٠٠٠٠٠٠٠٠٠٠٠٠
الطفله لو ما يمها ابوها من يلمهه
من يخفف جرح وحدتها وألمهه
لاشك الطفله اليتيمه يصير اسمهه
هذا حالي وروحي يتزايد هظمهه
لا خبر لا من رساله. لا اجه راعي الكفاله
لا علي الأكبر اجاني. لياوكت ابقه اناطر
٠٠٠٠٠٠٠٠٠٠٠٠٠٠٠٠٠٠٠٠٠٠٠
ليلي ونهاري كمت ابچي عليهم
اهلي وين بيا بلد ما ادري بيهم
من يوصلني صحت يا ناس ليهم
حيل ما بيه اسافر وعتنيهم
لياوكت ابقه انتظرهم. طوّل علية سفرهم
خوفي من غدر آل اميه. والزمن ويانه غادر
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
يا گلب هذا الخفت منه وعرفته
ناعي ابوي حسين هذا اللي سمعته
ذبحوا حسين آل اميه وهل دمعته
عالرمح راسه وبقت مطروحه جثته
گتله يا ناعي المصيبه. ارحم بحالي غريبه
وين ابوي حسين وينه. گلي سحگوه بالحوافر
سيد زيد الفحام
محرم ١٤٤٧هـ
______________________________________&&&