13121
السلام على الحسين وعلى علي بن الحسين وعلى أولاد الحسين وعلى أصحاب الحسين عليه السلام قناة لنشر قصائد في رثاء محمد وآل محمد عليهم السلام
الامام علي السجاد عليهالسلام
صعبه يالتنشد عليه
متت بس مو بالمنيه
من شفت زينب سبيه
من شفت زينب سبيه
...............
آنه زين العابدين ودمعي يجري
بالمناحه والدمع گضّيت عمري
عالسبيه عمّتي مكسور ظهري
صبّرت روحي ومتت مافاد صبري
عالهزل چتفوا اديها
تنظر الوادم عليها
ماتن متوني واديه
من شفت زينب سبيه
......
روحي ذابت من شفتهم چتفوها
عالهزل للشام ياوسفه خذوها
لمجلس يزيد النذل من دخّلوها
كون اموت ولاشفتهم شتموها
من عكب كافل خدرها
ما رحم بيها دهرها
هاجت الآلام بيه
من شفت زينب سبيه
.......
عن علي السجاد يالتسئل جوابي
متت مو بالسم يسائل من مصابي
المن اشكي ولابعد ينفع عتابي
الموت من ازمان منتظره عله بابي
فاگد احبابي الأحبهم
شمعه وتذوب بدربهم
روحي تطلع كل مسيه
من شفت زينب سبيه
........
من بعد هاي المصايب والأذيه
سمموا چبدي بحقدهم آل اميه
متت مسموم وخذت روحي المنيه
ما شفه بالروح جرح الغاضريه
عمري خلّصته بمناحه
بالمصايب ماكو راحه
اكثر جروحي اذيه
من شفت زينب سبيه
.......
انه زين العابدين وهذا حالي
عشت مظلوم ومتت مسموم تالي
شسوت بگلبي المصايب والليالي
ما جَرَه بواحد ابد ضيم الجرالي
غمضت عيوني بعذابي
ما طفت جمرة مصابي
ميت بذيج المسيه
من شفت زينب سبيه
سيد زيد الفحام
_______________________________
يا صاحب الزمان مولاي عظم الله اجرك بمصاب جدك الحسين عليه السلام
ون وبچي بهداي
وجروحك هواي
يالمهدي مولاي
من ياجرح نوحك
...................
لمصاب جدك سيدي عينك تهل العبره
الف وتسعميّة جرح ما بين طعنه وطبره
چنّك تشوفه بكربله متوذّر عله الغبره
عالرمح راسه تشاهده والخيل داست صدره
دم دمعك يسيل
عالسحگته الخيل
لا صبح لا ليل
تهجع بعد روحك
...............
شسوّت مصايب كربله يبن الزچية بحالك
تتنفس جروح وألم دوم المصيبه ابّالك
شيّبت من جرح السبي ودمع الصبر چتالك
ورموش جفنك شيّبن والحزن ظل يبرالك
بالعبره مخنوگ
عالراحن بنوگ
عالطبن بسوگ
تتنازف جروحك
..........................
حيلك يموت وينهدم يالمنتظر يوميه
من تسمع بزينب مشت ويه الشمر مسبيه
الچانت بعزها مدلله وعن البشر مخفيه
تاليهه تطلع عالهزل متچتّفه العلويه
يالمهدي ام عون
تتچتف شلون
گدام لعيون
تذكرها بدموعك
............
ياريت نتگابل سوه يالمهدي آني وانته
آني ابچي لجلك سيدي وسأل ظهورك يمته
وانت عله جدك دمعتك الداست الخيل بجثته
صبح ومسه تبچي دمه طول الزمن عاهدتّه
اتمنّه اواسيك
وبكلشي افديك
انشدمن عليك
اتنقّل بسوحك
............
چم ثار الك ياسيدي چم نايبه وچم لوعه
جدك سليب بكربله ومكسّرات ظلوعه
وعبدالله دم نحره يصب من رگبته المگطوعه
ومحنة رقية الطاهره الماتت قهر مفجوعه
ما تنطفي النار
ياصاحب الثار
وين الوعد صار
ينتظره مذبوحك
.............
قرّب محرم سيدي الله يكون بعونك
من حزنك وصب الدمع ذبلن رموش عيونك
وين ابمحرم تـتّـجه احبابك يسألونك
يم جدك تنوح وتون لو عالنهر يلگونك
نحسبلك حساب
طوّلت لغياب
يانسل الاطياب
لوح الحزن لوحك
سيد زيد الفحام
_____________________________'_____________
https://youtu.be/luwjUcE7TyA
دورتك يغالي
الرادود جهاد الظالمي
الشاعر سيد زيد الفحام
#دفن_الاجساد_الطاهرة
من درب السبي رديت لرض الغاضريه
ادفن والدي المذبوح عفته عله الوطيه
بچفوفي حضنته
بدموعي دفنته
وصرخ وا حسيناه. وصرخ وا حسيناه
.............
رديـت بعــذابي. وبدمعـة مصــابي ادفن والدي حسين
اعثر بالمسافات. حيلي من الألم مات. وهمل دمعة العين
وصلت الغاضريه وشاهدت منظر
ابويه حسين جسمه عله الثره موذر
وشفت جاسم ذبيح بجانب الأكبر
وشفت عبدالله دامي بنبلة المنحر
جثّه بلايه راس حسين ويلي بعيني شفته
من كثر الجروح البيه هزني وما عرفته
مجروحه رگبته
بدموعي دفنته
وصرخ وا حسيناه. وصرخ وا حسيناه
............
چم خسفه عله صدره مطبوگه عله ظهره. حافر خيل اميه
ظلـــوعـه مكسّـريـهه. جثتــه مسلّبيـــهه. لمّيته بأديه
حفرت لوالدي گبره وشلت جسمه
بحصيره ونزّليته ونزلت يمه
خد ماعنده ابويه بنحره اشتمّه
لن صوت النحر حاچاني هالكلمه
يبني ياعلي السجاد ادفن طفلي وياي
عبدالله انذبح عطشان مثلي ماشرب ماي
حاچاني وسمعته
بدموعي دفنته
وصرخ وا حسيناه. وصرخ وا حسيناه
..............
والأكبر عضيدي. دامي وشلته بيدي. موذر جسمه توذير
بصوابه وخضابه. هلت عليه ترابه. راح بروحته الخير
علي الأكبر اخويه الأغله من روحي
دفنته شلون بيدي وهاجت جروحي
كسر ظهري مصابه وما نفع نوحي
جبل صبري نهدم ونهارت سفوحي
والفاگد اخو مكسور ظهره ويشفه هيهات
شحال اليدفن عضيده مخضّب بالجراحات
بعيوني نظرته
بدموعي دفنته
وصرخ وا حسيناه. وصرخ وا حسيناه
.................
حسراتي عله جاسم عريس الهواشم. شاب وذبحو الشاب
بـدم نحـره تحنّه. سيوف الگطّعنّه. گلبي بمصرعه انصاب
شباب وضحّه لحسين وبذل نفسه
جاسم هذا واملاك السمه تقدسه
دفنته بگبره ويلي وغوربت شمسه
ابن عمي اذكره ولحظه ما انسه
بهدوم العرس واريت عريس الشهاده
هذا ابن الحسن ياناس تحلاله السياده
طفوها شمعّته
بدموعي دفنته
وصرخ وا حسيناه. وصرخ وا حسيناه
...............
الصحبه تشكّرتهم. بالحفره ادفنتهم وفّو كل الاصحاب
ضحو دون لحسين. بالدم نصرو الدين. زغير وشايب وشاب
وتعنّيت بدمعتي للگمر عباس
جثّه بلايه راس عله النهر ياناس
صحت ياعمي بعدك طحنه بين ارجاس
وسبو زينب اخبرنّك يبوالنوماس
بچفوفي دفنت عباس يم شاطي الشريعه
قبّلت النحر بدموع وچفوفه الگطيعه
بجروحي شبگته
بدموعي دفنته
وصرخ وا حسيناه. وصرخ وا حسيناه
سيد زيد الفحام
____________________________________________
موشح في مسير السبايا 💔😥
هاي زينب مادريت شلونها
عالهزل راحت ينور عيونها
............
هاي زينب عالهزل راحت سبي
ترضه ياعباس يحديها اجنبي
خدر ماظل والستر بس بالعبي
عالهزل بت فاطمه يشوفونها
............
الچانت وياك بخدرها مدلله
هسّه طلعت عالهزل من كربله
بس عليل وياها ظل بالعايله
بلا كفاله زينب تعوفونها
............
بلا خدر تتعثّر الناگه وتميل
وبالحبل مچتوفه زينب يالكفيل
شلون لو وگعت يبن حامي الدخيل
وآل امية تدري ميّرحمونها
.........
راسك براس الرمح يبره الظعن
وزينب تصدلك يعباس بشجن
اتعاتبت ويّاك بالمدمع اظن
وتنظر شلون العده يأذّونها
...........
ترضه ياعباس ياليث الحرب
بيها يتشمّت شمر طول الدرب
زينب ابين الزلم موقف صعب
ولو نخت بسمك تره يسبونها
...........
شلون لو بالسوگ مرّوها العده
عليها تتفرج الناس الحاقده
نظرة الشامت سهام امحدّده
والكلام الجارح يسمعونها
..........
والاشد من هاي بنت المصطفه
تدخل لديوان امية مچتّفه
يابوفاضل والعدو بيها اشتفه
حاولوا ما گدروا يذلّونها
سيد زيد الفحام
___
قصيدة ابا الفضل العباس عليه السلام
صلّى اللهُ على العباسُ الكفيل
_____
هذا ابوالغيره كفيل الهاشميه
طلعت وياه من طلع للغاضريه
هيبته هيبة علي حامي الحميه
قاهر العدوان صگّار آل اميه
اذّاها. وبچّاها. عالشاطي الزلم
بصولاته. وضرباته. يرجمهم رجم
والحومه. بعلومه. صاحت والنعم
عنده الحل بالشدد ماكو مستحيل
صلّى اللهُ على العباسُ الكفيل
_____
ابو راس الحار ما يرحم عدوّه
بنار سيفه چم بطل مات وتچوّه
خوّة العباس وكت الشده خوّه
ضامي گبل حسين بالطف ما تروّه
لعضيده سيف ايده. وحزام الظهر
ماعافه. وبچتافه. شال اكبر خطر
صد عينه. لحسينه. من طب النهر
ما أشرب گلّه والقدمته قليل
صلّى اللهُ على العباسُ الكفيل
______
كافل اخته زينب وحارس خدرها
ومن يجنّ الليل يتحوّل گمرها
يخاف حتى الهوى يم زينب يمرها
لاشك يگطعه ابوالغيره بأثرها
دلّلهه. وصار الهه. حمّاي واخو
وي زينب مايتعب. كفّال وكفو
وشحدّه يتعدّه. بوجوده العدو
وصّاه بيها علي حمّاي الدخيل
صلّى اللهُ على العباسُ الكفيل
_______
من تنخّت زينب بأسمه وتحزّم
اغضب العباس سل سيفه وتقدّم
سوه من روس آل امية بحر من دم
جيش امية بضربه من سيفه تهدّم
رد صايل. والعايل. داس بجثّته
لخيامه. وايتامه. تارس جربته
فرحانه. ولهفانه. اخته تلگّته
روّه طفال وحرم ماء السلسبيل
صلّى اللهُ على العباسُ الكفيل
_______
يبوفاضل احنه خدامك هتفنه
بحبك وبفعالك الحلوه انشغفنه
سيدي خدمتكم وحبكم شرفنه
بهالمجالس نرضي قائمكم هدفنه
ندعيله. بكل ليله. للمهدي الفرج
نشكيله. ونفديله. ارواح ومهج
مهدينه. متانينه. مبعوث الحجج
من يظهر تعتلي اصوات الأصيل
صلّى اللهُ على العباسُ الكفيل
سيد زيد الفحام
____________________________________
https://youtu.be/8JgqUPYu7pI
اغله من الدنيا
الرادود فارس الجنابي
الشاعر سيد زيد الفحام
كربلاء المقدسة
محرم 2023م
قصيدة لنصرت كتاب الله الكريم
كتاب الله ونبيه
يظل هوه الهويه
ابد ما نقبل بواحد يهينه
........
اعظم واقدس كتاب الباري سواه
هوه قرآن النبي ودستور خلّاه
بي كلامه ومنهج الاسلام فحواه
اليعتدي عليه يعتدي عله الباري معناه
كتاب الله اليضده
فرض واجب نردّه
ولانسمحله يتجاوز علينه
........
احنه من هاي المجالس النه وقفه
ضد فعل هذا اللعين الما نعرفه
يحرگ القرآن تافه والله وسفه
واجب القانون يگطع كون چفه
يشوف العالم الصار
يحرگه الظالم بنار
ولا ستنكار منهم ما لگينه
........
حسين والقرآن واحد ما يفرقون
للهداية وللعدل والخير يهدون
امس بالطف ذبحو القران يدرون
مو جديده وهذا منهم شاب ملعون
اذا محّد يمنعه
يظل بهذا وضعه
نريد الرافضي اليكسر يمينه
.........
امس بالطف گطّعوا آيات لكتاب
جسم ابوالسجاد من ظل فوگ لتراب
حسين قران الله ليش بگلبه ينصاب
لأن ضد الظلم ثار وضد الارهاب
ذبيح ويقـره آيات
يذل لو ينصه هيهات
كبرنه بحب ابواليمّه وربينه
.........
حسين ضحّه بدم وريده بكربلائه
يحفظ القرآن والدين بدمائه
احنه هذا اليوم من مجلس عزائه
اندين فعل الناصبي وضد عتدائه
ببواليمّه وقراره
انرفع اسمه وشعاره
بقه القرآن متفضّل علينه
سيد زيد الفحام
__________
موشح في شجاعة اباالفضل العباس عليه السلام
ماي من عباس زينب طالبه
صعدت الغيره وغضب رف شاربه
..........
ويلي من لاح عله مهره وجاها
المشرعه بغيرة علي اتعنّاها
الخيل تركب عالزلم خلّاها
سيفه گام يلوح حتى الهاربه
..........
ابوفاضل طبها عجّ ترابها
الخيل وي الناس گص رگابها
والتريد تعيش ترمي ثيابها
تنجه من عباس چانت حاسبه
.......
ختنگت الحومه ولزم مشرادها
وبوفاضل بالحرب صيّادها
يلحگ الماتلّحِگ بطرادها
برجله يسحگ شارب الماعاجبه
..........
الداعيه عليه امه يبقه گباله
يسطره سطره الهاشمي چتّاله
ابوفاضل زَحّف الخيّاله
وگام يتبرّه العدو من صاحبه
..........
اخو زينب والنعم من زوده
گالهه وطب للنهر بزنوده
مِلَه من ماي الشريعه جِوِده
وگطّع رگاب الأجتله تحاربه
.........
من طلع شردت زلمهه وخيلهه
ابوفاضل خزرة موّت حيلهه
عالعساكر سيفه رجّع ليلهه
عليهم الميدان بالطف گالبه
........
للخيم رد ويرف بالرايه
روه عبدالله الطفل من مايه
هلا بالدگ صدره ونطه حچايه
لزينب اخته وعهده بالدم كاتبه
سيد زيد الفحام
__________________________________________
تلث دگات
عالمشرعه العباس گطعوا يمينه
يازينب الوفاي راح امن ادينه
.....
يازينب بيا حال لمّن وصلته
متگطع العباس ياخويه شفته
حاولت اجيبه وگال خليني عفته
شلون ارجع بلا ماي لختي الحنينه
......
صدره انترس بسهام والنبله بالعين
الله يعينه شلون من طاح اخو حسين
يتلگّه بيش الگاع ما عنده چفين
راح وبعد هيهات يرجع علينه
......
ظل مستحي العباس ما يرجع وياي
چيه ردتّي منه الماي وتعذّر الماي
گلي اعتذرلي ومات من زينب هواي
آخر كلامه وياج وتفارگينه
......
گالتله خويه حسين وديني يمّه
مشتاگه للعباس خليني اشمّه
نتعاتب آنه وياه اگعد وكلّمه
من گطعو الچفين يعني انسبينه
......
گاللهه لو شفتيه اقسم تموتين
من خيمتج حاچيه ليث الميادين
بس عله كيف وياه لمن تعتبين
عتبج تره يأذّيه يختي الحزينه
......
صاحت يبوالنوماس جاوب عليه
ترضاها يا عباس اطلع سبيه
بت فاطمة الزهراء بين آل اميه
بديوان امية شلون ادخل رهينه
سيد زيد الفحام
''_'_
شوط كربلائي ليلة الوداع
زينب ليلة العاشر. تودع اخوتها مهضومه
بين حسين والعباس. بالتـوديــــــع مالومه
..........
كصدت زينب بهمهه لخوها حسين ابوالعتره
تگلّه حسين يبن امي. خويه وتسجب العبره
بس هالليله ماشوفك. صدك يامهجة الزهره
باجر تنذبح ضامي
وراسك ينرفع دامي
وشوف النار بخيامي
وشوفن جسمك بلا راس. يخويه مسلّبه هدومه
........
ما عندي گلب يحسين. اودعك ياضوه عيوني
يريت الصبح ما يطلع. ولا بيكم يفجعوني
تدري بآل اميه ارجاس. وحقّك ما يرحموني
باجر لو طحت يحسين
علينه تهجم الصوبين
وين انروح نركض وين
وانت الخيل تسحگ بيك. ظلوعك كلها مهشومه
..........
يگلها حسين يازينب. هذا مقدّر ومكتوب
راسي عله الرمح مرفوع. وجسمي مگطع ومسلوب
باجر من تشوفيني. دامي وعالوجه مگلوب
اصبري لمحنتي وحالي
وحفظي امن العده طفالي
وراسج خل يضل عالي
يزينب لا يشوفونج. بعد غيابي مهمومه
...........
زينب سمعته وصاحت. يليل العاشر ارحمني
طوّل خل اودع حسين. گبل لا جرحه يلچمني
گبل لا ينذبح عطشان. وسيف الجاني يهظمني
باجر ما تظل خيمه
وتضيع اطفاله بالهيمه
اهل الغيره والشيمه
باجر تنذبح كلها. بظِهِر العاشر ويومه
...........
طلعت زينب وراحت. لخوها الكافل تودعه
صدك تتركتي يا عباس طبت سألته بدمعه.
انت تكفّلت بية. ورايك لازم انسمعه
يگلها ورفرف الرايه
يزينب انتي بحمايه
إنه المايخلف حچايه
لحدما توگع چفوفي. يزينب يختي محشومه
............
باجر من يغدروني و تطيح ايساري ويميني
يضربون بعَمَد راسي. وتنسد بالسهم عيني
اطيح وما ارد ليكم. يزينب يختي عذريني
بچت من سمعت جوابه
ونزل بعيونها صوابه
سبيه تروح بغيابه
مچتوفه بحبل للشام. باجر تمشي مظلومه
سيد زيد الفحام
_____'________________________________________
نزلة العزاء [ وينك يراعي الغيرة عباس ]
الشاعر: سيد زيد الفحام
🏴
ليلة ١٦ محرم ١٤٤٥ أحيا ليالي عاشوراء
في حسينية و موكب ام الحسن - البصرة
#اللهم_عجل_لوليك_الفرج
💠telegram
/channel/m7bebasim
طريق السبي
من طحت يابالفضل
حطوا بچفي الحبل
حضروا نوگ الهزل للسبي للسبي
.......
يالچنت خيمه عله راسي ورايتك چانت ستر
سمعـــاً وطـاعـة تگـلّي وماگلت مرّه اعتِذر
من طحت يم الشريعه بطيحتك راح الخدر
وسفه ياعباس بعدك يحدي بظعوني الشمر
خويه ياراعي العلم
نظرة الشامت سهم
واحنا كاتلنه الخجل. للسبي للسبي
.............
خويه جاب الحبل بيده چتّف ابنات النبي
ماكو عباس اليجيچن يالله گومن للسبي
لا خدر لا خيم ظلت ما بقت بس العبي
شلون تقبل زينب اختك يحدي بيها الاجنبي
يالطحت يم النهر
ما وصل ليك الخبر
رحنه والمدمع يهل. للسبي للسبي
................
رادوا يجرحوني اكثر مرّوا عله المشرعه
حتى اشوفك يابوفاضل ونفجع بالفاجعه
ما گدرت اغمض عيوني جسمك وعن مصرعه
شفتك بلا راس خويه والچفوف مگطعه
من عله الناگه صحت
خويه مسبية رحت
وي عدوّك ارتِحِل للسبي للسبي
................
من طريق السبي متنه تدري كل خطوه بجرح
ويانه ياعباس عالي راسك براس الرمح
خويه كل سوط عله متني يهتز ودمك يسح
ابچي سكته ومااسَمّعك خاف جرحك ينفتح
احمل سياط العدو
وما اجرحك. يالاخو
ابقه زينب ما اذل للسبي للسبي
.................
شلون لو طبّينه خويه الكوفه گلي شتعتقد
ناس تتفــرّج علينـه وناس تتشمّت حقد
اتوقّـعـت يستقبلـونه بالحجـر مو بالورد
الموت اهون يابوفاضل ولا الي شامت يصد
تغيّرت كوفة علي
ماكو بيها ادلّلي
منها للشام انتقل للسبي للسبي
....................
لمجلس ابن زياد گالوا لازم يطب الظعن
هاي اعظم كل مصيبه من مصايبنه المضن
شلون اطب ديوان خويه وانه بت حامي السنن
گبال ابن مرجانه اوگف وين ودّاني الزمن
حسبي الله يالگمر
اصبر وگلبي انكسر
بية ياموقف يحل للسبي للسبي
سيد زيد الفحام
_______________________________________
دفن الاجساد 2023
يالتسئلني عن حالي
شحاله اليدفن الغالي
للطف جيت بدمع مصابي
ادفن عَودي وكل احبابي
شحاله اليدفن الغالي
........
آنه السجاد المتصوّب بجروح هواي
جرح الوالد جرح اخواني وعمي الوفاي
ضلوا صرعى وجيت ادفنهم وجروحي وياي
يالتسأل عن وضعي وحالي اتصوّر هاي
جيت لدفنت الضامي
شفته موذّر ودامي
ردّيت اتعثّــر بثيابي
ادفن عَودي وكل احبابي
شحاله اليدفن الغالي
.....
جسم حسين مگطع شفته وينزف نحره
گمت اجمع بجفوفي اوصاله واسچب عبره
اصرخ يابويه واتحسّر وحفر گبره
نزّلته بلحده بدمعاتي واشتم عطره
يبني ويابقايه اهلي
خلّي عله الصدر طفلي
بدمعاتي التحرگ بهدابي
ادفن عَودي وكل احبابي
شحاله اليدفن الغالي
........
يم رجلين حسين الوالد جبت الأكبر
نزّلته بگبره اوّدعته وگلبي تفسّر
ردت انهض حسيت بكسري وناري التسعر
من طاح الأكبر هَد حيلي وشكلي اتغيّر
يالتسأل گمت بيدي
ادفن جثّة عضيدي
ابچي وماحاسب بحسابي
ادفن عَودي وكل احبابي
شحاله اليدفن الغالي
..........
مذبوح القاسم شاهدته وينزف آلام
متحنّي بدم مو بالحِنّه ومتروس سهام
عريس اتمنّينه انشوفه وننشرله اعلام
لكن ذبحوه واني ادفنته بدم جرح الهام
كل انصار ابوالعتره
ادفنهم سوه بحفره
محني ومتوشّح بترابي
ادفن عَودي وكل احبابي
شحاله اليدفن الغالي
.......
تعنّيت لكافل عمّتنه البي رفعة راس
مگطوعه چفوفه ومتوذر عمّي العباس
بچفوفي نزّلته بگبره راعي النوماس
يا عم زينب گتله انشافت بعيون الناس
كافل زينب الحره
يم جاري النهر گبره
مخنوگ ومنهَد بصوابي
ادفن عَودي وكل احبابي
شحاله اليدفن الغالي
.......
ردّيت لزينب بجروحي ودمع الاحزان
شافتني وصاحن وياها. كل النسوان
جاوب يالسجاد احچيلي دفنت العطشان؟
عفناه مذبوح ومتگطّع فوك التربان
اي يا عمّه واريته
بگبره وكل اهل بيته
بالطف عنج چان غيابي
ادفن عَودي وكل احبابي
شحاله اليدفن الغالي
سيد زيد الفحام
____________________________________
https://youtu.be/55vuckuYOzY
(غفت عينك)
الرادود عمار الكناني
الشاعر سيد زيد الفحام
استوديو
محرم2023م
علي الأكبر عليه السلام.
تمنّيت المنيّه. ولا تبعد عليّه
***
علي الأكبر حبيبي ويانبض گلبي
يسلوة دنيتي وروحي وثمر تعبي
طلبتك دُرّة افرح بيها من ربّي
تزيح اهمومي رتّك ياعلي وكربي
اشُبگبنّك بديّه. ولا تبعد عليّه
***
اودعك ياحبيبي شلون ما اگدر
مثل شمّ الهوى محتاجتك وكثر
يهون عليك تبعد ياعلي الاكبر
بسيوف النواصب يُمّه تتوذّر
اموت بهالمسيّه. ولا تبعد عليّه
***
تموت الأم اذا عنها الابن ابعد
شگول بحالي اني وگلبي يتمرّد
اشوفك عالوطيّه گبالي تتوسّد
ذبيح ودم جبينك ينزف عله الخد
يريت الطعنه بيّه. ولا تبعد عليّه
***
قدر مكتوب لازم ينسفك دمك
وشوف سيوف اميّه التنتظر جسمك
يريت ابدال ذبحك تنذبح امّك
ولا يفجعني يبني بذبحتك خصمك
اصيرلّك ضحيّه. ولا تبعد عليّه
***
جمالك يُمّه من جدك رسول الدين
عجيبه شگد يحبك يبني ابوك حسين
اخاف عليك يُمّه من سهام العين
يريدك للحرب ياوسفه ليش البين
اخذ روحي جزيّه. ولا تبعد عليّه
***
گبل لا تمشي عنّي خل اودعنّك
اريد ابمنحرك يوليدي اشمنّك
بعد لحظه البواتر ما يرحمنّك
يگطعن گلبي يبني من يگطعنّك
ردت موتك اليّه. ولا تبعد عليّه
سيد زيد الفحام
_________
https://youtu.be/QcaiNiwzoho
بويه لا تنساني
الرادود سيد محمد الموسوي
الشاعر سيد زيد الفحام
ايران
محرم 2023م
قصيدة كعديه ليلة الوحشة
راسك عله الرمح والجثّه سليبه
جيت ادوّر عنك بدمع المصيبه
من بعد نوم اليتامه
بآخر الليل وضلامه
جيت ادوّر عنك بدمع المصيبه
............
حسين يبن امي وحبيبي ما دريت اشصار بينه
من بعد ذبحك يخويه. ولية يحسين انولينه
وهذا ليل الغاضريه. چلچل وخيّم علينه
حركوها يبن امي الخيم
امن عيالي ما واحد سلَم
سوط وزجر خوف وألم
حرم وطفال انتهينه
نامت عله ارماد المخيّم رقيه
سلّبوا منها التراچي آل اميه
وللسبي بانت علامه
بآخر الليل وضلامه
جيت ادوّر عنك بدمع المصيبه
............
خويه ما خلّاني گلبي. اصبر وما اعتنيلك
نوّمت كلّ اليتامه وجيت يحسين اشتكيلك
اعثر بجدمي وعباتي منين من ياصوب اجيلك
دلّيني ضيّعت الدرب
ممشاي بالحومه صعب
ومشغول بمصابه الگلب
مثل ما صابوا دليلك
ريحة الخوّه لعد جسمك خذتني
الليل موحش والمصايب دوهنتني
ضيّعت اهلي النشامه
بآخر الليل وضلامه
جيت ادوّر عنك بدمع المصيبه
.........
شفتك بيا حال خويه وذره وذره مگطعينك
صدك هذا حسين انت. ياحبيبي امسلبينك
آنه زينب رد علية. وين چا خنصر يمينك
ضلوعك يخويه مكسّرَه
مطشّــرات عله الثره
ومن كل جرح دمك جرَه
وما حصل واحد يعينك
من كثر طعنات جسمك ما عرفتك
عالرمح راسك يخويه وهاي جثتك
احسب جروحك قيامه
بآخر الليل وضلامه
جيت ادوّر عنك بدمع المصيبه
.........
شلون الم عظام جسمك. حرت ياروح الزجية
عفتك بهالحال وبچي. ومسح دمومك بدية
لاشك تگلّي ارجعي. کبل لا تگعد رقية
شلون ارجع وجسمك وذر
متگطع ويجري النحر
وللحافر بصدرك اثر
يصعب فراگك علية
ليلة الوحشة گضت دمعه ومناحه
حضروا نوگ السبي المابيها راحه
والدهر وجّه سهامه
بآخر الليل وضلامه
جيت ادوّر عنك بدمع المصيبه
.........
حرم وطفال ويتامه. راح ارد ليهم يغالي
خويه مجبوره اعوفك. ماكو من يحرس بدالي
خاف تفگدني رقيه. وباقي اطفالي وعيالي
لو بيدي ما عوف الجسد
ابقه بجوارك للابــد
ماظل الي والي وسند
يحن للعيله ولحالي
بس عليل امن المرض ما يگدر يكوم
شلون لو حان السبي بجروحه ملچوم
رجعي ياعمّه كلامه
بآخر الليل وضلامه
جيت ادوّر عنك بدمع المصيبه
سيد زيد الفحام
__________________________________________
#جرح_العاشر
يا عباس ما تدري انهضمنه
.........
طايح عالنهر وحنه انولينه
يا عباس ما تدري انهضمنه
حرگوها الخيم طاحت علينه
يا عباس ما تدري انهضمنه
سلّبنه الشمر ما تدري بينه
يا عباس ما تدري انهضمنه
ألحگ طفي بچفوفك خيمنه
يا عباس ما تدري انهضمنه
...........
صرنه ابّين نار وبين عدوان
يا عباس ما تدري انهضمنه
وحسين انذبح مظلوم عطشان
يا عباس ما تدري انهضمنه
هاي اطفال تصرخ هاي نسوان
يا عباس ما تدري انهضمنه
ضعنه ومنهو بغيابك يلمنه
يا عباس ما تدري انهضمنه
.............
داست عاليتامه وغارت الخيل
يا عباس ما تدري انهضمنه
لا ظل راي عندي ولا بقه حيل
يا عباس ما تدري انهضمنه
من يحرسنه خويه وچلچل الليل
يا عباس ما تدري انهضمنه
ما ظل والي بس اعليل يمنه
يا عباس ما تدري انهضمنه
..........
سلبو فاطمه وسلبو رقيه
يا عباس ما تدري انهضمنه
چتفونه بحبلهم آل اميه
يا عباس ما تدري انهضمنه
وين انروح صحره الغاضريه
يا عباس ما تدري انهضمنه
شيل الواك ياخويه انظلمنه
يا عباس ما تدري انهضمنه
...........
زينب آنه ما تنهض يعباس
يا عباس ما تدري انهضمنه
ترضه شلون شافت اختك الناس
يا عباس ما تدري انهضمنه
وين الرايه وين السيف والطاس
يا عباس ما تدري انهضمنه
ألحگ لينه ياخويه انشتمنه
يا عباس ما تدري انهضمنه
..........
حرگوا خيمتي ونهبوا خدرنه
يا عباس ما تدري انهضمنه
وين انروح يا عباس حرنه
يا عباس ما تدري انهضمنه
راح حسين راح وياه سترنه
يا عباس ما تدري انهضمنه
مسبيات نمشي وي خصمنه
يا عباس ما تدري انهضمنه
سيد زيد الفحام
_____________________________________________