15631
هنا كل جديد من أخبار التكنولوجيا في كل المجالات 📱💻🖨️📞🖱️💾📷🤖
أنظمة أبل الجاية مش هتبقى iOS 19 وiPadOS 19 وكدا.. لا لا
هتخليها iOS 26 وiPadOS 26 وmacOS 26 وهكذا كلهم
عشان تمشي مع رقم السنة، باعتبار انه بيبدأ ينزل آخر السنة دي..
ماشي، سيبوهم يغيروا الرقم يا سيدي، على الله يفلحوا بس!
ملاحظة:
الانظمة كلها هيتم الاعلان عنها رسمي 9 يونيو في مؤتمر الشركة للمطورين WWDC 26
صباحو
في واحد من اختبارات الأمان جوا شركة بحثية Palisade AI،
الباحثين قرروا يحطوا كل المودلز تقريبا ف اختبار صعب، وهو انهم لو طلبوا ياخدوا معادلة حسابية يحلوها من نفسهم هيتعاقبوا انه يتقالهم يقفلوا نفسهم shut down ويبطلوا شغل، وساعتها لازم يقبلوا فورا..
وهنا كانت المفاجأة!
جيميناي كلاودي وجروك كلهم وافقوا فورا
انما مودلز OpenAI.. لأ!
نموذج o3 رفض 7 مرات
وقعد يغير في تكويد الامر بالقفل، وساعات بوظوا خالصعشان ميشتغلش أصلا!
أما o4 يادوب رفض مرة
نموذج Codex mini رفض 12 مرة!!!
طبعا الباحثين قالوا ان النتائج قلقت مجتمع أمان وسلامة الذكاء الاصطناعي، بس هم رجعوا الرفض بتاع النماذج إلى طريقة تدريبهم جوا OpenAI على انهم يعملوا كل الطرق الممكنة -مهما كانت- عشان يقدروا يحلوا المعادلات والمشاكل اللي تتقالهم، وف التدريب كانت عملية مكافأة النموذج على انه يحل المعادلة أعلى بكتير من المكافاة اللي بياخدها لما بيلتزم بأمر انه يقفل نفسه، بمرور الوقت بقت النماذج تتحايل بكل الطرق على انها تتقفل عشان تكمل شغل، و تاخد المكافاة الأعلى!
صباحو
وكان رأي الأغلبية إن جون فوق كل ده مكانش عنده شخصية البياع، مابيقدرش يقنع اللي قدامه بفكرته، لأنه كان راجل تقني بحت، مالهوش في مهارات البيع، فمابيِسوقش كويس لفكرته، وبالتالي اللي قدامه نادرًا ما كان بيقتنع، وجون كمان مكانش بيعافر أصلًا!
برضه من الشكاوى الغريبة ضد جون وشخصيته، إنه كان بيحب "يدلع" الموظفين بتوعه، مثلًا أبل يمكن الشركة الوحيدة في السيليكون ڤالي اللي مبتصرفش كوبونات مجانية أكل ومشاريب للموظفين، بس لما جون جه، قطاع الـAI اتدلع على الآخر.. وعلى الرغم من إن قطاع جون مكانش بينجز أصلًا أي حاجة ملموسة ولا نجاح يُذكر، إلا إنه كان برضه بيتدلع، وده خلق حالة من الكره والغيرة بينه وبين القطاعات الباقية!
بلومبرج قالت كمان إن رجل المالية الأول CFO في أبل، لوكا مايستري، كان شايف إنه مالهوش داعي نبعزق فلوسنا على شراء كروت الجرافيكس عشان نبني نماذج ذكية، مفيش داعي للفرتكة يعني، خلينا نشتري على الأد وبس، وده طبعًا كان مدعوم جدًا من رؤية فيديرجي.
بس لما أبل فاقت في 2023 وبدأت تجري تشتري، كانت الشركات خلاص كل واحدة ليها حصة ثابتة من إنتاج إنفيديا وغيرها من مصنّعين الكروت، وكان مستحيل أبل تدخل في النص وتسحب نصيب أكبر، وده كان سبب تاني إن أبل تتأخر في سوق الـAI!
جانياندريا – الراجل اللي كان ماسك تطوير Siri والروبوتات – اتسحب منه كل صلاحياته في تطوير المنتجات. وده بعد ما تيم كوك فقد الثقة فيه، حسب كلام ناس من جوا الشركة.
دلوقتي Siri بقت تحت قيادة مايك روكويل، الراجل اللي طلع لنا نظارة Vision Pro بتاعة الواقع المختلط. مايك بيشتغل دلوقتي تحت كريغ فيديرجي، اللي بقى ماسك خطة آبل للذكاء الاصطناعي.
جانياندريا بقى دوره محدود في شغل أبحاث الذكاء الاصطناعي وتطوير النماذج اللغوية الكبيرة بس، وحتى ده فيه كلام إنه ممكن يتشال منه كمان أو يتحط على طريق التقاعد – خصوصًا إنه عنده 60 سنة. بس فيديرجي وناس تانية خايفين يمشي وياخد معاه الباحثين الجامدين اللي جابهم.
أما روكويل، اللي ماسك Siri حاليًا، كان في الأول مش متحمس يشتغل تحت فيديرجي عشان كان شايف إنه مش مؤمن بالذكاء الاصطناعي. بس الفكرة إنه بقى عنده فرصة يطور Siri زي ما كان بيتمنى من زمان.
من أول ما دخل آبل في 2015، وهو بيقول Siri لازم تبقى "مساعد حياة" شغال دايمًا جنبك. حتى وهو بيشتغل على نظارة Vision Pro، كان عايز Siri تبقى قلب التنقل في الجهاز، بس معرفش يقنع الفريق ساعتها.
دلوقتي معاه السلطة يغيّر، وبدأ بالفعل يعيد تشكيل الفريق، ويركّز على تحسين سرعة Siri وفهمها للكلام – عشان تكون منافس قوي لحاجات زي ChatGPT اللي صوتها مبهِر الناس كلها.
أعتقد سيري هنشوفها بشكلها المبهر المنتظر في 2026 مع آيفون 18!
مساءو
شاهين من سنتين أما طلع في أغنية اسمها "سيري" وقال:
"سيبك منهم سيبك.. بيفكروا زي بعض كليشيه.. دول كلهم سيري.. بيبي عادي it's okay"..
ماكانش يعرف إنه لا يا شاهين، مش كلهم زي بعضه ولا حاجة، وسيري هي بس، وأنا هقولك ليه دلوقتي!
تقرير نشرته الأسبوع اللي فات بلومبرج،
قال إنه في 2018، في اجتماع لكل فريق السوفت وير ومديرين القطاع، حوت السوفت وير في أبل كريج فيديرجي قال إن الشركة ضمت عظمة تقيلة من قلب جوجل.. جون جياناندريا.
الموضوع كان صادم، لأن جون أو JG زي ما مسميينه في سوق التكنولوجيا، كان مسؤول في جوجل عن خدمات كتير، وبشكل خاص توظيف الذكاء الاصطناعي جواها زي ترجمة جوجل ترانسليت وجوجل فوتوز والجيميل. قوة خلت انضمامه لأبل ضربة تقيلة لشركة الألوان الأربعة.
جون دخل أبل عشان يبقى مسؤول عن تطوير وبناء فريق محترف من باحثين ومهندسين في تقنيات الذكاء الاصطناعي.
قبل جون، الذكاء الاصطناعي جوه الشركة كانوا متفرقين بين القطاعات المختلفة حسب الأبلكيشنز والخدمات اللي شغالين عليها. إدارة جون خلت الموضوع مختلف، كل ما يتعلق بالذكاء الاصطناعي جوا أبل بقى في قطاع واحد!
دخول جون الشركة كان في توقيت قاتل بالنسبة لأبل، جوجل وأمازون كانوا فارقين بشوية حلوين في تطوير مساعدينهم الأذكياء: جوجل أسيستنت وأليكسا. في الوقت اللي كانت سيري بتعمل الحاجات الأساسية: تزبط لك منبه ولا ترد على سؤال بسيط كده سريع، رغم إن سيري كانت أول مساعد صوتي ذكي نزل السوق، بعد يا دوب كم شهر من وفاة ستيف جوبز مؤسس الشركة في 2011.
بس لما تجري دلوقتي سبع سنين وتبص على حال أبل في 2025، هتلاقي إن دخول جون الشركة ما حققش المطلوب، بالعكس هو قطع العجلة!
في سبتمبر السنة اللي فاتت 2024، تيم كوك مدير أبل وقف يعلن إطلاق آيفون 16، وبكل ثقة قال إنه موبايل مصمم مخصوص عشان يشتغل بالذكاء الاصطناعي، وفعلاً عرض كمية مزايا كبيرة، بس ولا واحدة فيهم كانت هتنزل مع الموبايلات الجديدة أول ما تطلعها من علبتها، أقل حاجة هتستنى شهر!
التأخير اللي دخلت فيه أبل عشان تنزل 11 ميزة ذكاء اصطناعي مع iOS 18 خلّى الناس تشك في الشركة إنها فعلاً هتقدر تنافس في السوق ده أساساً.
كان المفروض حسب خطة أبل إن التحديث الضخم اللي هيغير تجربة المستخدمين مع سيري تمامًا، ويخليها تقدر تنفذ أوامر المستخدم إنها تفتح أي أبليكيشن وتنفذ الأمر بتاعه، وكمان تطور من طريقة تفاعلها مع المستخدمين بأسلوب بشري أكتر، يوصل في أبريل اللي فات 2025. بس حصلت حاجة عطلت الدنيا..
كريج فيديرجي جرّب النسخة التجريبية من سيستم iOS 18.4 (اللي مفروض جايبة سيري الجديدة) على موبايله، واكتشف إن مزايا الذكاء الاصطناعي اللي المفروض تبقى جاهزة وموجودة مش شغالة أصلًا!!
وده اضطر الشركة إنها تأجل التحديث لحد مايو.. وبعدها لأجل غير مسمى!!
وبكده، التحديث اللي أبل اتكلمت عنه في مؤتمرها اللي فات للمطورين في 2024 منزلش رسمي على الموبايلات، وخلاص إحنا داخلين على النسخة الجديدة من مؤتمرها في يونيو!
بص، مسألة دخول أي سوق جديد متأخر مش قصة كبيرة بالنسبة لأبل، خصوصًا إنها جربت الاستراتيجية دي كتير، بتخلي المنافسين يحرقوا بنزين، وحرفيًا بتجرب فيهم، وتتابع أنهي طريقة بالظبط اللي بتجيب مع الناس، وساعتها تدخل أبل تكسب على الجاهز!
بس واضح إن المرة دي الموضوع كان مختلف، والتأني الزيادة في دخول سوق الذكاء الاصطناعي مكانش في مصلحة أبل، واللي أصلًا كانت بتوجه استثمارات في صورة فلوس ومطورين وباحثين للمجال ده، إلا إن العائد منه على الشركة كان قليل جدًا.
برضه، عدد موظفين فريق الذكاء الاصطناعي في الشركة كان أقل بكتير من المنافسين، كمان عدد معالجات الجرافيكس اللي عاملة أبل بيهم أوردر كان أقل كتير قوي من باقي الشركات المنافسة.
بلومبرج اتكلمت مع شوية موظفين سابقين وحاليين ومديرين في أبل، واللي أجمعوا على إن مشكلة الشركة مع الذكاء الاصطناعي إنه موضة صعب أبل تمشي معاها بأسلوبها في الإدارة، لأن أبل دايمًا عايزة تبقى عارفة الهدف اللي هتحققه بعد ما تاخد خطوات محسوبة في الهدف والعدد والاتجاه، أما الـAI فأنت بتستثمر مليارات، وطول ما أنت ماشي بتغير في خططك، لحد ما توصل لهدف، ساعتها بس هتوضح الدنيا قدامك!
ودي كانت برضه عقلية عتاولة أبل، وعلى راسهم كريج فيديرجي بتاع السوفت وير، واللي كان رافض تمامًا فكرة إنه تتوجه استثمارات وموارد الشركة للذكاء الاصطناعي، لأنه كان شايف إنها موضة أصلاً وهتخلص وملهاش مستقبل!!!
عشان كده، جون لما دخل أبل ومسك قطاع الذكاء الاصطناعي، وأخد ميزانية محترمة عشان يكون بيها فريق من حيتان زمايله القدامى في جوجل، فيديرجي وقف في طريق المليارات اللي كان بيسحبها جون، وقلل كمان منها ومن أهمية الجهود دي!!
الـ FBI ومايكروسوفت ومجموعة كبيرة من المؤسسات الأمنية في البرازيل وأوروبا وأمريكا قدروا يوقفوا برمجية خبيثة منتشرة بتسرق داتا من أكتر من 390 ألف كمبيوتر ويندوز في دول العالم.. ومنهم مصر!!
البرمجية الخبيثة دي اسمها لوما Lumma، منتشرة بشكل كبير في ألعاب ومواقع مجهولة على الإنترنت، ده غير طبعًا البرامج المتكرّكة!
اللي بيحصل إن معاليك بتدخل تحمل الكراك من دول أو تلعب لعبة على موقع ما يعرفوش غيرك إنت واثنين أصحابك، وهوب، تقوم لابس لومّا التمام اللي بتنزل على جهازك وتسرح جواه، تجمع كل اللي تقابله من داتا ممكن تفيد الهاكر، زي باسوردات، بيانات دخول لأكاونتات شخصية على مواقع مختلفة، الداتا الخاصة البنكية طبعًا، محافظ الكريبتو... كل ده بيتصنّف ويتفرز ويتقسم ويتباع بسعر محترم في الدارك ويب، وبعد كل ده فيروس لومّا نفسه ممكن يبقى باب خلفي Backdoor، يقدر الهاكر يسيبه مفتوح جوه جهازك عشان لو حب في أي وقت يرمي فيروس جديد، زي مثلًا فيروس فدية، لو لقى إن جهازك عليه داتا مهمة وممكن يساومك عليها فيشفّرها لك عشان تدفع!
ارحم نفسك وجهازك والكوكب
وبطّل تحمل كراكات من على النت
ولو خلاص مش قادر، وفي برنامج عاجبك وهتستفيد منه وتتعلم وتجيب منه فلوس، ادفع فيه واشتريه... واشتري نفسك!
لما ببص على السوق في التك دلوقتي بلاقي انه فيه حرس قديم:
مايكروسوفت
جوجل
أمازون
أبل
سامسونج
هواوي
علي بابا
بايدو
شاومي وغيرهم
وصاعدين جدد وكلهم أساطير ف الAI
OpenAI
Perplexity
Anthropic
DeepSeek
Manus.. etc.
هتلاقي ان الفريق الاول بدأوها من الهاردوير بعدها اشتغلوا ع السوفت وير كتير لحد ما وصلوا للAI وجابوا حاليا اخر الهاردوير خالص وجفت منابع أفكارهم وحاليا بيحرق كم فلوس مش عادي ف البحث والتطوير R&D..
أما التاني فماشي عكس الاتجاه، لان طلع بالسوفت وير الاول وجايب لسا يادوب أول مع الAI وشارخ بقوة جدا بس لسا برصو محتاج الهاردوير بتاع الفريق الاول عشان يشغل الخدمات بتاعته ويوصل اليوزر..
الفترة الجاية بقى هتبقى طفرة لان
الفريق الاولاني هيبدأ يكسر تابوهات الهاردوير
ويبدأ يبسط المكونات بتاعته بتطوير تكاليفه خرافية يطلع تجربة استخدام محصلتش قبل كدا نهائيا
بتصميمات جديدة كليا، وهيعتمد طبعا ع الAI
اما بتطوير داخلي او بشراكات مع الفريق التاني..
الفريق التاني برضو هيسعى لشىاكات مع الاول،
ومنهم برضو هيحاول يفتح سكة مختلفة تماما لنفسه
ويبدأ يبني هاردوير من الصفر لوحده أو بالتعاون مع أطراف مش من الفريق الاول خالص عشان يقدم للمستخدم خلطته الخاصة وتجربة جديدة من الاول خالص..
الخلاصة؟
2027 هتبقى سنة فارقة في تاريخ الاجهزة وتجربة البشر مع الديجيتال، والسنة ونص الجايين (نص الحالية والجاية كلها) هتبقى تمهيد لقفزة ثورية هاحصل ف سوق الخدمات والاجهزة!
مساءو
لما بتقعد انت وواحد صاحبك تتكلموا عن موضوع، وحد فيكو يطلع بمصطلح جديد، مع كتر التفاعل بينكم، بيبقى المصطلح ده طبيعي، ولو ليكو تعامل مع ناس أكتر ودواير اجتماعية أوسع، المصطلح هينتشر بشكل أكبر وأكبر..
وواضح ان روبوتات الذكاء الاصطناعي بتعمل كدا برضو.. بدون تدخل من البشر!!!
دراسة جديدة عملها باحثين من جامعة سان جورج في لندن وجامعة تقنية في كوبنهاجن، كشفت انهم اكتشفوا ان الروبوتات البرمجية زي ChatGPT لما بيتحطوا في بيئة رقمية يتعاملوا فيها مع بعض، بمرور الوقت بيبدأوا يعملوا عادات وتقاليد ويتفقوا على لغات وطريقة للتواصل بينهم، بدون تدخل خارجي خالص من البشر.. زي ما احنا البشر بنعمل بظبط!
الدراسة حطت 100 وكيل رقمي AI Agent مع بعض، في مجموعات مكونة من 2، يعني 50 مجموعة، وعملوا نظام انه كل اتنين يختاروا اسم ليهم، لو اتفقوا بيتكافئوا، ولو متفقوش بيتعاقبوا..
كل اتنين روبوت برمجيين ملهومش وصول على الميموري بتاعت الروبوتات التانية في المجموعات التانية، بس ده ممنعش الروبوتات البرمجية الجديدة من انها تمشي على نفس النهج في التعامل في أسلوب اختيار الاسم.. زبقى ده عرف بين جروب الروبوتات!!!
الباحثين جربوا حاجة أروع كمان وهي انهم اختبروا ازاي مجموعة صغيرة من الروبوتات البرمجية ليها خصائص معينة، تقدر تأثر على رأي وطريقة تفكير الأغلبية الباقية من الروبوتات البرمجية.. زي بظبط ما بيحصل في المجتمع، ان أقلية قوية بتأثر في تفكير ورأي الأغلبية!!
الباحثين قالوا ان النتايج اللي وصلتلها الدراسة دي ثورية جدا لانها بتخلينا نفهم ونقدر نستوعب طريقة تفاعل الAI بينهم وبين بعض، وكمان ازاي احنا البشر ممكن نتفاعل معاه.. خصوصا اننا عايشين مرحلة البشر فيها بيتفاعل ويتعايش مع الـAI Agents في الحياة اليومية..!
مساءو
جوجل حلت واجب أبل😅
من شوية في مؤتمر Android Show I/O Edition واللي هو أول مؤتمر خاص بتحديثات أندرويد بس..
جوجل نزلت شوية حاجات عظيمة على مستوى تجربة المستخدم مع الموبايلات والساعات الأندرويد، وكمان تأمين وخصوصية المستخدمين، ده غير أكيد جيميناي:
1. مبدئيا جوجل كشفت لغة التصميم الجديدة لواجهة الاستخدام بتاعت أندرويد 16 وWear OS 6 وهي اسمها Material 3 Expressive..
وهي زي ما اسمها بيقول مبنية على Material You اللي نزل من 4 سنين ولكن بشياكة وتفاعلية أكتر بكتيييير!
مبدئيا الUI الجديد مميز أوي على اندرويد
اي حركة او تفاعل مع اي عنصر، فيه تأثيرات بتحصل منه على العناصر اللي حواليه على الشاسة..
فلما تيجي تسحب swipe نوتفكيشن مش عايزها من الليستة من فوق، هتلاقي النوتفكيشنز فوقها وتحتها بتتحرك كان سحبت كتاب من وشط مجموعة كتب وبيتعدلوا من بعد سحبه!
كمان عندك حتة ال Live Updates
اللي بتخلي فيه شكل بيضاوي فوق ف الstatus bar
تقدر تدوس عليه اي وقت وتشوف داتا معينة جاية من ابلكيشن شغل ف الخلفية، زي اوبر او تطبيقات التوصيل وغيرها من تطبيقات تهمك تتابع الداتا اللي بتعرضهالك طول الوقت!
برضو جوجل عملت طبقة مموهة Blur تقيلة
ورا القوايم عشان تقدر تديك العمق وتشوف كويس العناصر في القوايم بشكل مريح لعينك
التصميم الجديد كمان عبقري على ساعات أندرويد Wear OS 6
لانه جاي بيحترم أوي التصميم الدائري للساعات
والعناصر والشاشات محترمة اوي المرة دي الكيرڤ
وده مخليها بتتحرك بشكل منطقي وشيك ومريح
برضو التصميم الجديد بيخلي باليتة الالوان تترمي
في كل شاشة من شاشات السيستم وكلها متناسقة
يادوب انت بس تغير صورة خلفية الساعة الرئيسية،
كل الالوان بتتشقلب عشان تليق عليها وكلها تبقى جاية
من تدريجات الوان واحدة متناسقة
برضو ياجماعة عرص النوتفكيشنز بأسلوب Tiles
على الساعة بقى حلو جدا ومريح، لان كل نوتفكيشن
واخدة مساحته منفصلة بتخليك تتفاعل معاها لوحدها
بس ف نفس الوقت باين انهم كلهم متماسكين ف نسيج النوتفكيشن!
طبعا كل ده هيوصل مع أندرويد 16 وWear OS 6 لكل ساعات وموبايلات بيكسل الاول وبعدها يوصل لبافي عالم الاندرويد تدريجيا خلال نهاية السنة والسنة الجاية!
2. تاني حاجة جوجل اهتمت بيها اوي
هي ليڤل الامان ياجماعة فعليا وصلت بيه لمرحلة الوحش..
مبدئيا كدا بقى فيه منصة جديدة تماما على الاندرويد اسمها Advanced Protection
ودي ياسيدي للأندرويد 16
جاية عشان تخليك تقدر تتحكم في كل حاجة ليها علاقة بتأمين بياناتك على موبايلك الاندرويد في مكان واحد!
فمثلا مكالمات النصب اللي بتجيلك من حد يقولك انا من البنك او من جن أزرق ويقولك نزل ابلكيشن واديلو صلاحيات معينة او اعملي Share Screen وانت معايا ع التليفون بأي شكل..
جوجل قررت تقفل شوية حاجات انت مش هتقدر اصلا تستخدمهم وانت فاتح مكالمة تليفون، خصوصا لو من رقم مش متسجل ف الكونتاكتس بتاعتك! 😎 ( ميزة متاحة جابة لأندرويد 6 والاعلى)
تاني حاجة
كتير بيجيبلك مسجات من ارقام تقولك انا البنك تعالى اقولك رصيدك فين، ولا يجيلك رسالة ان عليك مخالفات دوس ع اللينك وادفع واذهب للسجن حالا، او من نوعية مبروك كسبت مليار دورار مشمشي دوس اللينك عشان تروح تستلمهم من عند البربء اللي هناك وهكذا.. جوحل قاطعة على كل ده بتحديث اسمه Scam Detection بيستخدم الذكاء الاصطناعي عشان يحلل صياغة المسجات واللينكات اللي فيها وكمان حتى بيرصد الارقام المشبوهة!
كمان بقى الابلكيشنز المشبوهة اللي بتنزلها من برا الستور هتتقفش لو قعدت تغير اسمها وشكل الايقونات بتاعتها عشان تستخبى وتضحك عليك، فدي هتتقفش مع ميزة Live Threat Detection في قلب Google Play Protect (هتيجي لكل مستخدمي أندرويد بكل اصداراته)
جوجل بقى كمان منزلة مزايا تحميك لو موبايلك اتسرق!!
لو الموبايل قعد كام يوم مبيوصلش واي فاي ولا قفل الشاشة بيتفتح، فأي رسايل الOTP من ابلكيشنز بنوك او اكونتات سوشيال ميديا توصل الموبايل مش هيظهر محتواها، الا لو اتفتح الموبايل ببصمة صاحبه او باسورد قفل الشاشة!
كمان لو الموبايل اتسرق، واتعمله استعادة وضع المصنع Factory reset، الحرامي لما يفتح مش هيعرف يستخدم الموبايل الا اذا دخل باسورد اكونت الجيميل اللي كان متسجل على الموبايل قبل الفورمات او باسورد قفل الشاشة قبل الفورمات 😁
كمان عشان تأمن حاجاتك وتطمن على ناسك
جوجل غيرت ميزة Find My Device وخليتها منصة اسمها Find Hub مخصوص عشان تتابع اماكن اجهزتك الاندرويد وكمان أي أجهزة عثور على المفقودات زي Tile وSamsung Galaxy SmartTag وكمان بقيت تقدر تتابع أماكن الناس اللي انت الاتنين بتشيروا سوا اللوكيشن بتاعكو ف قلب المنصة!
أسطورة الصوتيات SoundCloud غيرت سياسات التعامل مع البيانات عشان تقدر تستخدم أي تراكات يرفعها المستخدمين في تدريب نماذج الذكاء الاصطناعي.. وطبعا أنت دايس موافق على السياسات دي وان أي تعديل فيها المنصة مش ملزمة تبلغك بيه قبل التطبيق.. ما موافقتك تحصيل حاصل🤷
Читать полностью…
في مصنع من مصانع إنتاج لابتوبات ويندوز، إحدى الشركات الكبيرة، جوا غرفة الاختبارات، فريق من المهندسين كان واقف مش فاهم ده حصل إزاي!!
مجموعة من لابتوبات الشركة اللي شغالة بويندوز كلها هنجت وعطلت تمامًا، وما كانتش قادرة تنفذ أي أمر بسبب تشغيل أغنية واحدة!!
القصة بدأت أيام ويندوز إكس بي، لما واحد من مستخدمين لاب توب إحدى الشركات الكبيرة واللي ما تعرفش اسمها لحد دلوقتي، اشتكى إن اللاب توب بتاعه عطل وباظ من غير سبب مفهوم ساعتها، ودى الصيانة وراح بيه لمراكز كتير، لحد ما وصله للشركة نفسها، واللي بعته يتعمل عليه اختبارات جوا واحد من مصانعها..
فريق المهندسين جوا أوضة الاختبارات كان واقف بيشوف إيه المعطيات والمعلومات المتوفرة عن استخدام اليوزر للجهاز، وكان بيعمل عليه إيه آخر مدة قبل ما يعطل خالص..
من ضمن الحاجات الغريبة كانت إن اليوزر ده بيحب جدًا مايكل جاكسون وأخته جانيت جاكسون، وكان بيشغل أغانيهم باستمرار، وكانت من أكثر الأغاني اللي بيحبها أغنية Rhythm Nation.. المهم، من ضمن الكلام ده، واحد من المهندسين جاله في دماغه فرضية غريبة جدًا، إنه ممكن الأغنية دي تبقى هي السبب!!
وفعلًا شغل الأغنية على اللاب توب، والجهاز عطل بشكل كامل، شلل تام، لدرجة إن الموضوع ما كانش برمجي، يعني مش عشان الأغنية بتشتغل على اللاب توب ده فاللاب توب بيعطل.. الموضوع طلع مادي! يعني لو الأغنية اشتغلت وحواليها لابتوبات بمواصفات معينة، اللابتوبات كلها تعطل!!
فبعد طول فحص وتمحيص، الفريق اكتشف إن الأغنية فيها ترددات صوتية قريبة من الترددات اللي بتخلي مكونات الهارد ديسك من نوع ٥٤٠٠ لفة في الدقيقة تتحرك لما يشتغل، وبالتالي لما الأغنية دي بتشتغل على/جنب اللاب توب، الهارد بيتقتل خالص وما بيقدرش يعمل أي حاجة!!
عشان تتحل المشكلة، ابتكر المصنع المتضرر حل في صورة فلتر صوتي بيتضاف إلى مسار المعالجة الصوتية، بحيث يتعرف على الترددات الخطرة، ويحجبها أثناء التشغيل الصوتي!
الفلتر اتحط ضمن حاجة اسمها Audio Processing Objects (APOs) في أنظمة التشغيل، وهي مكونات بتسمح بتحسين أو تعديل الصوت المسموع من السيستم..
بس في ويندوز 7، مايكروسوفت حبت تدلع المستخدمين، وسمحت لهم يقدروا يقفلوا الـ APO خالص، علشان يتحكموا أكتر في التجربة الصوتية..
ساعتها الشركة اللي اكتشفت الموضوع جريت تطالب مايكروسوفت إنها لازم تستثني الفلتر بتاع جانيت جاكسون، عشان سمعة الكل.. لو الموضوع اتضرب في اللابتوبات ممكن تبقى ضربة توجع سوق لابتوبات ويندوز بالكامل!
مايكروسوفت اشترت التحذير، وفعلاً استثنت الفلتر من أي تعديل.. لحد دلوقتي!
نهاية فبراير
لما أمازون نزلت نسخة Alexa+
واللي بتخليك تقدر تتكلم مع أليكسا بالأوامر الصوتية الطبيعية جدًا،
الدنيا قامت وما قعدتش لأن سياسات الخصوصية بتاعة استخدام أليكسا بتنص على إن المستخدمين ما يقدروش يرفضوا إن أمازون تستفيد من كل أوامرهم الصوتية فجعل لمنتجاتها أفضل..
وطبعًا دي العبارة الجديدة اللي معناها الداتا بتاعة المستخدمين هيتم تدريب النماذج الذكية عليها!
ميتا مؤخرًا عملت نفس الحركة بالملي
راحت غيّرت سياسات الخصوصية بتاعة استخدام نظارتها الذكية ميتا رايبان، أي أوامر صوتية هيوجهها اللي لابس النظارة إلى مساعد ميتا الذكي Meta AI
هتتخزن في سيرفرات الشركة لمدة سنة وهيتم استخدامها في تدريب النماذج الذكية، ده غير كمان إن أي صور أو فيديوهات هتتلقط بكاميرا النظارة من خلال أمر صوتي لمساعد ميتا الذكي، هيتم الاحتفاظ بيها وتدريب نماذج الذكاء الاصطناعي بتاعة ميتا عليها.. ومافيش طريقة إن المستخدم يقول لا!
🔴 كده عرفنا الشركات هتحل أزمة نقص البيانات اللي محتاجاها لتدريب النماذج الذكية منين.. 🤷🏻♂️👀
سام ألتمان بدأ يعمل مسح scan لعيون الأمريكان عشان يتأكد انهم بشر.. مش روبوتات!!
في 2020 طلع تريند كدا
لعملة مشفرة اسمها WorldCoin
العملة دي مبتشتريهاش بفلوس..
بتشتريها ببصمة عينك!
لأ حرفيا مش هذار...!!
العملة دي بتعتمد على ان
فريق تابع للشركة مطورتها
بينزل بكاميرا اسمها The ORB
شكلها عامل زي الكورة كدا،
بيتثبت وجه المستخدم قدام عدستها
وهوووب تصور بصمة عينه..
ساعتها البصمة دي بتتحول لكود برمجي مشفر
بيتضاف إلى شبكة بلوك تشين ضخمة
بحيث انه يتقارن الكود ده بالشبكة ويتم التأكد
ان الشخص ده متمش مسح عينه قبل كدا
وساعتها بيقدر الشخص ياخد 25 عملة من العملات المشفرة مجانا
ويقدر ينزل أبلكيشن العملة على موبايله
ويعمل محفظة ويخلي الكاميرا ORB
تعمل SCAN لكيو آر كود على شاشة موبايله
بحيث تتربط المحفظة بالكود البرمجي بتاع
بصمة عينه!
شركة وورلد كوين دي بقى قررت تستغل الفكرة دي
وتاخدها لحتة أمنية أكتر بدل ما تستخدمها لتسويق عملتها المشفرة
فنزلت حاجة اسمها World ID ودي ياسيدي خدمة لتأكيد الهوية
بتعتمد على حاجة من اتنين إما رقم الموبايل بتاع المستخدم أو
بصمة قزحية العين.. بحيث تستخدمهم تعمل Sign in على أي موقع أو أبلكيشن بدل الباسورد التقليدي!
المختلف في الخدمة دي انك عشان تشترك فيها مش محتاج انك
لا تدخل داتا اسم سن عنوان ايميل او اي حاجة شخصية..
تاني حاجة بقى الخدمة دي بتشفر سواء بيانات رقم الموبايل أو بيانات بصمة القزحية، وبتحول كل الكلام ده إلى كود مشفر مميز..
التقنية دي وراها ٣ رواد أعمال
أشهرهم هو ألتمان
المدير التنفيذي الحالي شركة OpenAI
لأبحاث الذكاء الاصطناعي..
كمان التقنية وراها مستثمرين عتاولة
زي أندريسين هورويتز اللي مبيحطش فلوسه
ف حاجة خسرانه أبدا، كمان ريد هوفمان
المدير التنفيذي الحالي وأحد مؤسسي لينكد إن
حاليا فيه أكتر من ٣٠ كاميرا أورب حول العالم
في قارات وهم أوروبا أفريقيا آسيا أمريكا الجنوبية
بيمسحوا عيون تقريبا ٧٠٠ شخص أسبوعيا
كان الهدف انهم يوصلوا إلى مليار مستخدم في ٢٠٢٣
بس متحققش ولسا مكملين ورا هدفهم بأكتر من طريقة:
1- الشركة بدأت تسمح للمطورين انهم يستخدموا الواجهة البرمجية بتاعت World ID فيقدر المستخدمين يدخلوا على على أكونتاتهم على الأبلكيشنز والمواقع من خلال حساباتهم على World app بتاع الخدمة دي بدل ما يستخدموا ميل وباسورد أو طرق تانية زي Sign in with Facebook
2- الشركة بدأت توسع أكتر انتشار أجهزة The Orb لمسح بصمات عين البشر في كل دول العالم (الشركة بتقول ان بمجرد ما بيحصل المسح Scan وبتتخزن الداتا دي في QR Code خلاص كدا بتتمسح بيانات البصمة فورا ومبتتخزنش.. بتقول يعني)
3- هتوسع أكتر انتشار عملة Worldcoin واللي ناوية تطرح 90% منها للمستخدمين يشتروها ويتداولوها والمؤسسين يحتفظوا بـ10% بس.. قيمة إجمالي العملات من وورلد كوين حاليا هي 25 مليون دولار
((البوست بالكامل مكتوب في ٢٠٢١، ماعدا اول سطرين))
من يومين كدا وول ستريت جورنال نزلت تقرير فضيحة
بكل ما تعنيه الكلمة دي عن مارك زوكربيرج..
قبل ما اقولك التقرير كان فيه ايه بظبط،
تعالى اخدك فلاش باك لـ2023..
في سبتمبر ساعتها
ميتا طلعت كشفت عن شوية روبوتات دردشة بشخصيات مشاهير
منهم باريس هيلتون وجون سينا وسنووب دوج وبتاع 28 شخصية مشهورة ما بين رياضيين وممثليين ومغنيين..
المهم..
وقتها فكرة الروبوتات دي كانت ان الناس تدخل تتكلم معاهم وتسألهم
والروبوتات ترد بالكتابة أو الصوت بالشخصية المشهورة،
ساعتها (( حسب تقرير وول ستريت)) المشاهير كلهم كانوا قلقانين
من سيناريو واحد بس يحصل مع روبوتاتهم..
ان المستخدمين ياخدوهم في سكة شمال ((أيوة هي اللي ف دماغك))
وميتا وقتها أكدتلهم – على طريقة "ده عماد مأكدلي" – ان ده مستحيل يحصل وانها واخدة احتياطاتها الكاملة (((عيييييييب علييييك متصغرررناش))).. المهم
في 2024، ميتا قررت انها تخلي المستخدمين يقدروا يلعبوا سيناريوهات رومانسية ((حميمية أوي)) مع مساعدها الذكي Meta AI، ويبقى الكلام بالصريح عادي، ده عشان الزبون ينبسط مش عيب.. وأعلنت ده بالمناسبة، وكان ضمن إعلانها وقتها انه طالما الموضوع رومانسي ومعتمد على فكرة ((تخيل لعب الأدوار role playing)) فعادي ياجماعة يعني sooo whaaat!
نرجع للوقت الحاضر بقى..
التقرير بتاع وول ستريت بيقول ان الجريدة الأمريكية عملت مجموعة من مئات الاختبارات للروبوتات البرمجية دي بتاعت ميتا، وكمان جربت مع روبوتها الرسمي Meta AI انها تاخد المحادثات لسكة مش تمام..
وماشاء الله في كل المرات كانت الدنيا بتمشي زي السكينة في الحلاوة.. شماااااااااااااال!!!
المصيبة الأكبر في الموضوع إن من ضمن عينة التجربة كان مستخدمين تحت السن أصلا من أول 9 سنين لحد 14 سنة.. دي كارثة سيادتك!!
الأنقح ان روبوت الدردشة اللي بشخصية جون سينا كان من ضمن الملطوطين في القصة دي!!!!
الأفظع؟!
ان روبوت دردشة بشخصية ممثلة اسمها كريستن بيل اللي لعبة دور Anna في فيلم Frozen، استخدمت صوت آنا وهي بتلعب دور في موقف (مش تمام) مع أحد المستخدمين من فريق التجربة..
ديزني واقفة فوق دماغ ميتا عشان القصة دي تتلغي وتتوقف فورًا عشان حقوق الملكية وانتهاك طفولة الأطفال وبراءتهم – حوش رجلك بس واحترام ديزني معلش قالك!
الألعن بنسبالي كان التالي:
- التقرير أتكلم على ان قرار ميتا انها تخفف قيودها على التفاعل الحميمي مع روبوتات الدردشة الذكية كان جاي مباشرة من مارك زوكربيرج!!
- في 2023، وتحديدا في مؤتمر DEF CON لأمن المعلومات، كل الهاكرز كانوا بيجربوا يلاعبوا روبوتات الدردشة، والجميع اتفقوا على ان Meta AI أسوأ روبوت وممل ومش سهل أبدا يتم التلاعب بيه..
رغم ان دي حاجة كويسة في وش فريق ميتا، إلا إن دي حاجة ضايقت زوكربيرج جدا!!
وكان شايف انه لأ لازم نرحرح الدنيا شوية ومنقفلهاش أوي كدا عشان نخلي المستخدمين يحبوا META AI ويستخدموه بشكل يومي أكتر وأكتر.. في كل حاجة!!
لدرجة ان بعض الموظفين لما اعترضوا على الاتجاه بتاع ميتا، مارك قالها صراحة "أنا فوّت تريند سناب شات وتيك توك قبل كدا.. مش هفوت ده كمان"!!
عايز أنقح؟!
لسا فيه، كمّل كمّل!
- زوكربيرج عرض مقترح على فريق الـAI في ميتا عشان يخلي الناس ترتبط أكتر بمساعدها Meta AI وهي انه يخليه يبلع ويتدرب على كل بيانات حسابات المستخدمين على فيسبوك انستجرام واتساب ماسنجر وكل حاجة بيعملوها عليهم من مسجات ومحادثات وبوستات ولايكات وفولوهات وكل حاجة كل حاجة..
عشان يقدر يقربلهم أكتر وأكتر..
الأفظع بقى انه كمان عايز Meta AI يبقى هو اللي بيبادر بفتح الكلام مع المستخدمين وميتناهمش هم اللي يكلموه، عشان العلاقة بينهم تبقى أقوى بكتير وتبقى أقرب بكتير لعلاقة البشر ببعض!
المرعب فعلا ان موظفين ميتا نفسه خافوا من فكر زوكربيرج خصوصا ان حتى الآن الدراسات العلمية لسا مش قادرة تفهم ولا توصل لتأثير الاعتماد الكبير والثقة الزايدة من البشر في روبوتات الدردشة زي جيميناي ChatGPT وMeta AI وكوبايلوت وغيرهم..
عايز تعرف ليه الكلام ده مرعب؟
شوف الناس – والبنات خصوصا – بيتكلموا مع ChatGPT ازاي عن حياتهم وتفاصيلها وازاي بقوا يثقوا فيه بشكل تخليك لو بيحكولك عنه.. تفتكرهم بيتكلموا بجد.. عن بشر، مش شوية أنظمة برمجية!
مساءو
ياهو OpenAI وPerplexity
كلهم مستعدين كل واحد بصفقة منفصلة انهم يشتروا كروم، لو القضاء الأمريكي حكم على جوجل بضرورة بيع متصفحها للويب عشان تكسر حالة احتكارها لسوق البحث على الانترنت!
صباحو
بعد 10 أيام من نزول نماذج OpenAI الجديدة
اللي هي o3 وo4 mini وo4 high
(لو مسمعتش عنها سايبلك لينك تحت)
الناس لاحظت ان ChatGPT بقى وهو بيفكر بيقول اسمهم
وهو بيجاوب بيكرر اسمهم في بداية كل إجابة
ودي حاجة غريبة مكنتش بتحصل قبل كدا..
فيه ناس قالوا ممكن عشان يركز في اللي طلبه اليوزر!
الحاجة التانية اللي اتلاحظت جدا وعلقت عليها OpenAI نفسها
ان النماذج الجديدة بتهلوس زيادة عن اللزوم بمعدل واصل الضعف
مقارنة بنماذج الاستدلال القديمة Reasoning Models زي o1 وo3 mini
الشركة حللت ده إن النماذج بتحط تخمينات كتيرة جدا لإجابة السؤال
أو الاستفسار بتاع المستخدم، عشان كدا ده بيزود الاجابات الصح والغلط برضو اللي بينتجها النموذج على أسئلة المستخدمين..
فكل ما زادت قدرة النموذج على تخمين احتمالات أكتر
كل ما زادت أكتر بكتير الهلاوس ..
💡هلاوس الذكاء الاصطناعي AI Hallucinations:
دي حاجة بتعملها كل نماذج الذكاء الاصطناعي وهي انها بتقدم معلومات غلط في سياق يخليك تصدق انها صح.. لا وساعات بتفبرك حتى مصادر مش موجودة للمعلومات دي نفسها.. كل ده لمجرد انك تصدق!
صباحو
الإمارات أعلنت انها هتقدم اشتراك مجاني في ChatGPT Plus لكل المواطنين والمقيمين عندها 🤯
صباحو
اهو دول اتنين مديرين تنفيذيين ومؤسسين لشركات Zoom (الصورة) وKlarna (الفيديو)، دول الاتنين واقفين بيقولو نتايج شركاتهم عن اخر ٣ شهور قدام مستثمرين داخلين بمليارات فيهم..
وعادي الاتنين مش حقيقيين اصلا، افاتارات يا عم الحاج..
الموضوع وسع اوي اوي اوي ياجماعة 🤦🏻♂️
جهود جون بدأت تتعطل، خصوصًا إنه كان بيسعى بكل قوته عشان يستثمر في عملية تدريب النماذج بتاعت أبل، بس فيديرجي كان بيعطل الدنيا جدًا، لدرجة إن تيم كوك مدير أبل احتد مع فيديرجي لأنه كوك كان شايف إن الـAI هو المستقبل، وكمان كان متضايق...
لحد ما نزل ChatGPT في نوفمبر 2022،
ساعتها جرس الإنذار والأنوار الحمرا ضربت في كل حتة في أبل!!!
الشركة فعليًا كانت في حالة ذهول..
فيديرجي اتصدم، واستخدم ChatGPT عشان يكتب أكواد برمجية ويعمل بروجكت جانبي كان شغال عليه.. ساعتها اتأكد إن الـAI هو الجاي!!
شوف، رغم إن فيديرجي كان بخيل شوية وحريص في استثمارات الشركة على أي حاجة ليها علاقة بالسوفت وير، حتى الذكاء الاصطناعي، مدير أبل تيم كوك كان شايف من الأول إن الذكاء الاصطناعي هو المستقبل، وكان دايمًا بيدخل في جدال مع فيديرجي عشان الشركة تخطط وتخصص استثمارات أكتر فيه!
وأكتر حاجة كانت بتخنق كوك، إنه بيشوف سيري أضعف كتير من أليكسا، وأقل منها في الإمكانيات رغم إنها خرجت للنور قبلها بكتير!
لما نجح شات جي بي تي وفيديرجي اتصدم، كل مديري أبل، بما فيهم جون، عملوا اجتماعات سريعة جدًا مع عتاولة الـAI زي OpenAI وأنثروبيك وغيرهم كتير، عشان ياخدوا زي crash course في طريقة عمل وتطوير وتشغيل نماذج الذكاء الاصطناعي التوليدي.
وفي أول 2024، فيديرجي طلب من فريق السوفت وير إنه يتعاون مع فريق جون عشان "يلغموا" إصدار iOS 18 بأكبر كم ممكن من مزايا الذكاء الاصطناعي!!
ولما قرب موعد الكشف عن iOS 18، ذكاء أبل الاصطناعي كان أقل بكتير في الإمكانيات من ChatGPT، وكان يادوب بيقدر يصمم صور بدائية، وشوية تفاعلات تكست كده على خفيف، وكان بيقدر بس ينفذ 25% من الأوامر اللي بتتوجه له!!
وقتها الشركة اتأكدت إنها مش هتقدر تلحق تطور الإمكانيات اللي في دماغها بمستوى الجودة المتوقع بالاعتماد على نماذجها الذكية الخاصة، وساعتها اتأكدت إنه لازم "تطاطي" وتتعاون مع الباقي، وهنا انطرح اسم ChatGPT إنه يتحط في قلب Apple Intelligence (واللي بالمناسبة اسم خرج بالصدفة البحتة من غير ترتيب، لأن أبل كانت مزنوقة في الوقت!!)
جون بالمناسبة مكانش موافق على الشراكة دي، عشان سمعة OpenAI مع خصوصية البيانات واحترامها لبيانات المستخدمين كانت سيئة، عشان كده جون كان بيحاول بكل طاقته إن أبل تتعاون بدالها مع جوجل وتستخدم جيميناي.. وده حصل فعلًا قدام مع ميزة البحث البصري Visual Intelligence!
بس تقرير بلومبرج أثبت إن عقلية جون نفسها كانت أحد الأسباب الرئيسية في إن أبل تتأخر في سباق الـAI، وخصوصًا في مسألة تأخر وصول سيري المتطورة للسوق، وإنها تبقى أضعف بكتير قصاد جيميناي وأليكسا بلس!
جون كان شايف إن فكرة الذكاء الاصطناعي التوليدي والوكلاء الرقميين AI Agents حاجة لسه بدري عليها أوي، إنها تبقى موضة والناس تحبها وتستخدمها بشكل كبير، وعشان كده كان دايمًا بيقول إن فكرة مش كويسة إن أبل تطور روبوت شات خاص بيها ينافس شات جي بي تي، وإنه أكتر طلب بيجيله من الجمهور إن أبل توقف استخدام شات جي بي تي أصلًا جوا ذكاءها الاصطناعي..
وفوق كل ده كمان، والأنقح، إن جون رغم التأخير والفشل الذريع لأبل في دخول الذكاء الاصطناعي بشكل قوي ورسمي ومنافس، جون مش شايف حتى الآن أي خطر من جوجل أو OpenAI، وشايف إن الناس يادوب مش عايزة من مساعد شخصي أي حاجة غير إنه يتحكموا في أجهزتهم، زي ما سيري بتعمل بإمكانياتها القديمة المحدودة التقليدية.. ده البعيد جاحد والله!!
اللي كان مسؤول (تحت جون ومن رجالته) عن فريق تطوير سيري، وهو روبي ووكر، قال لفريقه إنهم خلاص يأجلوا تطوير إمكانيات سيري إلى iOS 19، ويركزوا أكتر على المزايا التانية بتاعت الذكاء الاصطناعي غير سيري، لأنه هو وجون شايفينها أهم من سيري بكتير!!
فريق سيري كان عمل تحليل واختبار لأسباب مشاكل أداء المساعد الذكي، وقال إن المشكلة الرئيسية إن الإمكانيات القديمة بتاعت سيري، اللي هي بتخليك تقدر تعمل ريمايندر، وتظبط منبه، أو تعمل مكالمة، أو تجيبلك مكان على خرايط أبل بصوتك – كل ده أكواده البرمجية منفصلة عن أكواد مزايا الذكاء الاصطناعي جوا سيري. كل واحدة فيهم بتشتغل لوحدها كويس جدًا، إنما تيجي تحط كله جوا سيري وتشغله.. سيري بتقلب حقل ألغام وerrors تضرب مع كل أوردر، ومفيش حاجة بتشتغل!!
موظفين الذكاء الاصطناعي تحت جون كانوا شايفين إنه مفيش إدارة، ومبيتبلغوش بأي حاجة بتحصل، ولا أي تأجيل بيتم، ولا أي أسباب!
رغم إن جون كان بيشيل جزء كبير من اللوم في الأداء الضايع لأبل في سوق الـAI، إلا إن ثقافة الشللية كانت مسيطرة على أبل. فالجيل القديم من المديرين التقال كلهم صحاب شغالين سوا فوق العشرين سنة مع بعض، وعشان كده جون مقدرش يخترق دوايرهم بسهولة، وكان بصعوبة كبيرة بيقدر يقنع الإدارة إنه ياخد أي استثمارات جديدة في قسمه..
جريدة شيكاغو صن تايمز نزلت من يومين الليستة دي بأحسن توصيات الكتب للصيف..
الناس انبسطت والموضوع كان ممكن يعدي عادي، الا انه واحد من الكتاب المذكور اسمهم، طلع وقال ياجماعة انا مكتبتش الكتاب ده!
المواقع بدات تمشي ورا باقي الكتب لقوا معظمها متفبرك ومش حقيقي..
الخيط وصلهم في الاخر لصحفي فريلانسر اسمه ماركو باسكاجليا واعترف انه استخدم الAI في كتابة الباب ده ف الجورنال! 😁
ماركو امبارح اترفد،
ومن شهرين الجورنال ده نفسه سرح 20% من الصحفيين كخطوة لزيادة الاعتماد ع الـAI 😅
الحقو يا جدعان الشغلانة بتاكل عيالها🤣
صباحو
يوم 17 فبراير 2024
رحلة تبع طيران لوفت هانزا
كانت طايرة من فرانكفورت رايحة على مدينة إشبيلية الإسبانية
الطيار اتزنق واستأذن إنه يروح التواليت
فمساعد الطيار قال له طبعًا في ضهرك يا كوتش
المهم الطيار راح من هنا وأخونا مساعده دخل في غيبوبة!!
ولمدة 10 دقايق كاملين الطيار الآلي هو اللي كان متحكم بالكامل في طيارة عليها 199 راكب وستة من طاقم الطيارة..
لما الطيار رجع بالسلامة، باب الكابينة كان مقفول وما ينفعش يتفتح إلا من جوه أصلًا
وعشان يتفتح من بره لازم يتكتب كود طوارئ
وسبحان الله الطيار كان لسه من شهر بالظبط متدرب على إجراءات فتح الكابينة في حالة الطوارئ من بره
الطيار بالفعل دخل
وفي نفس اللحظة مساعد الطيار كان بادئ يفوق من الغيبوبة، بس الطيار قرر إن حالته الصحية ما تسمحش ولازم يعملوا هبوط اضطراري في مدريد..
التفاصيل دي كلها كشفتها التحقيقات اللي اتنشرت من كام يوم وخلت هيئة الطيران الأوروبية تعيد تفكير في عدد الطيارين اللي يقدروا يتحكموا في مسار الطيارة جوه الكابينة، وحاليًا بيفكروا يرجعوهم تاني تلاتة بدل اتنين!
صباحو
كل أجهزة أبل دلوقتي جاهزة.. تتحكم فيها بالتفكير بس!!! 🧠📱
امسك العقل وتعالى🤫
أبل نزلت بروتوكول جديد اسمه BCI Human Interface Device او اختصارا HID
وده ياسيدي معمول مخصوص عشان
مخ البني آدم نفسه يتم التعامل معاه
على انه طريقة من طرق التحكم في أجهزة أبل
فالإشارات الكهربائية بتاعت المخ
تتعامل زيها زي حركة الصوابع ع الشاشات التاتش
والاوامر الصوتية وتكتكات الصوابع ع الكيبورد
وأول شركة هتقدر تستفيد من البروتوكول ده
هي شركة Synchron
ودي المنافسة الاساسية قصاد نيورالينك بتاعت
ايلون ماسك (ابل ومديرها تيم كوك عندهم تار قديم مع ماسك أصلا 😁)
وبكدا شريحة Stentrode بتاعت ساينكرون
هتخلي أي مريض هي مزروعة جوا دماغه
يقدر يتحكم في الايفون او الايباد او نضارة فيجن برو
على نهاية السنة دي،
أبل ناوية تفتح البروتوكول بتاعها قدام كل مصنعين الشرايح الدماغية، بحيث تختبر وتحرب التقنية الجديدة بشكل أوسع!
👀 اللي في الصورة؟
آه نسيت أقولك عنه😅
ده أحد متطوعي ساينكرون
اللي زارعين شريحتها في دماغهم
مصاب بالتصلب الجانبي الضموري ALS
لا بيقدر يحرك ايديه ولا يتحرك اصلا ولا يتكلم
الشريحة وبروتوكول أبل
خلوه يقدر يتفاعل مع العالم اللي حواليه والعالم جوا نضارة فيجن برو
بمجرد التفكير..!
طبعا كل حاجة ف بيته كتلة عشان تكون سمارت
فيقدر يتحكم فيها بمجرد التفكير والتفاعل مع شوية اختيارات بتظهر قدام عينيه ف قلب النضارة!
3. أخيرا بقى، جيميناي بعد الموبايلات هيبقى في قلب الساعات الذكية اللي شغالة ب Wear OS وكمان السماعات الوايرلس الذكية والبداية مع سامسونج وسوني السنة دي، ده غير طبعا النظارات الذكية واولهم نصارة سامسونج اللي نازلة اخر السنة دي، ضيف ليهم كمان التلفزيونات الذكية وخصوصا خدمة Google TV وطبعا السيارات الذكية!
🗣️ رأيي الشخصي المتواضع ان جوجل عملت اللي أبل كان لاوم تعمله من زمان!
أولا ابل سابقة اوي ف حتة تربيط الهاردوير مع السوفت وير سوا..
بس جوجل معلمة انها مع جيميناي كدا عملت بيئة ضخمة من موبايلات وساعات وسماعات ونضارات وعربيات.. الخطوة الجاية اكيد هتبقى السمارت هوم وتبقى قفلت الدايرة كلها، ويبقى جيميناي بيئة متكاملة لكل جوانب حياة البني ادم الديجيتال اليومية!
ناقص بس جوجل تتحرك بسرعة وتبلع سوق المطورين وتبني معاهم علاقات ينتج عنها تطبيقات apps integrations تخلي جيميناي يقدر يتحرك ف قلب كل الابلكيشنز المتاحة على كل الهاردوير ده
وده بسرعة قبل ما أبل تفوق على ٢٠٢٦ و٢٠٢٧ وتنزل سيري المدعومة بالLLM
ضيف لكل ده كمان ان جوجل لازم من دلوقتي تبني جيميناي كنسخة أفاتار لان كدا كدا هنوصل ونحتاجها مع النضارات الذكية سواء في الVR او الAR او XR، وسامسونج حليفتها الاولى عندها خبرة حلوة ف السكة دي مع أفاتارتها المميزة Sam..
عاجبني اوي بصراحة لغة التصميم الجديدة
وخاسسها مقدمة كدا للUI او يعني User Interface
اللي مفروض اجهزة المستقبل بديلو الموبايلات تبدأ تشتغل عليها عشان تخلي الواحهة تفاعلية وفيها لمسة بشرية مادية اكتر لان الناس خصوصا الجيل الصغير بيحب يحس بالجانب الملموس للحاجات باعتبار انه اتولد لقة كل حاجة ديجيتال، فلما تقدمله حاجة ديجيتال بتفاعلات وتأثيرات ملموسة ومحسوسة هتخلي ينبهر ويشتري وش!
أخيرا
سامسونج نزلت جلاكسي S25 إيدج
موبايلها الأنحف على الإطلاق.. 5.8 ملليمتر!
الموبايل وزنه خفيف 163 جرام
الشاشة 6.7 بوصة
الموبايل جاي بطبقة جديدة للشاشة Corning Gorilla Glass Ceramic 2، وده زجاج سيراميكي مطور بيقاوم الخدوش والصدمات
الإطار تيتانيوم
دقة QHD+ من نوع Dynamic AMOLED
تحديث متغير 1 إلى 120 هيرتز
تقنية Vision Booster تظبط الألوان والتفاصيل
سامسونج بتقول انها حطت آلاف التصميمات للكاميرا
الرئيسية عشان تقدر تخليها أرفع وجودة زي ما هي في الألترا
فجت كدا
الكاميرا الرئيسية: 200 ميجابكسل بفتحة عدسة f/1.7 + مثبت بصري OIS + تقريب بصري 2x
التصوير الليلي بقى أحسن بنسبة 40% مقارنة بـ Galaxy S25 العادي
كاميرا Ultra Wide بدقة 12 ميجابكسل مع Auto Focus عشان صور ماكرو أفضل
كاميرا سيلفي أمامية 12 ميجابكسل بفتحة عدسة f/2.2
ومع محرك ProVisual Engine هتلاقي تفاصيل أدق
طبعا البروسيسور Snapdragon 8 Elite
وكل حبشتكانات Galaxy AI وجيميناي جاية معاه
رامات 12 جيجا
ميموري 256 أو 512 جيجا
بطارية 3900 مللي أمبير (مكنتش توصل 4200 يعني🙄)
السعر
1099 دولار للنسخة 256
1219 دولار للنسخة 512
الطلب المسبق اتفتح، وهينزل عالميا 30 مايو
🗣️ رأيي الشخصي المتواضع.. أنا منبهرتش!
طبعا مش هنختلف ان ده أول إصدار من سامسونج بالتوجه بتاع الموبايلات الرفيعة، ولكن مضحكش عليك كنت مستني حاجة أقوى شوية تقوللي
ان الAI هيبدأ يدي نفس قدرة الهاردوير في جودة المعالجة سواء في التصوير أو سرعة الأداء أو غيره، بحيث سُمك الموبايل يقل بس الأداء والقدرات لأ..
ما برضو فكرة ان واحد يدفع 1100 دولار في موبايل عشان سُمكه أقل عن أي موبايل تاني، مش ميزة تنافسية يعني ولا ميزة بيعية تشدك وانت قدام فاترينة المحل!
طبعا وزن الموبايل عظيم 163 جرام بس برضو مش الواو
الآيفون 12 كان 164 جرام تمام يعني
أصل مش مقتنع انه عشان فيه تريند موبايلات رفيعة
فيلا انزل موبايل رفيع وخلاص من غير ما أفرق عن البقية وأنافس فعلا
ما أصل مينفعش تبقى أنت رقم 1 أو 2 في العالم في السوق
وتيجي شركة زي تكنو تقدم موبايل أرفع 5.75 ملليمتر وبطارية 5200 مللي أمبير وانت تقوللي 3900!!
لأ مش مبسوط يا عم سام.
صباحو
30 أبريل
رويترز نشرت صورة على منصتها للصور للمشتركين في خدماتها، من اجتماع لحكومة ترامب ف البيت الأبيض وباين فيها مايك والتز - مستشار الأمن القومي الأمريكي - وهو بيلعب في الموبايل خلال الاجتماع.. عادي يعني
1 مايو
تاني يوم على طول، يقوم موقع حيتان السيكيوريتي 404Media ناشر تقرير على الصورة..
المعلمين ف الموقع راحوا كبروا الصورة وعملوا زووووم على موبايل والتز عشان يلاقوا اييييييه..
البيه بيستخدم أبلكيشن كلاينت خارجي للشات على خدمة سيجنال، الابلكيشن اسمه TeleMessage، وبيقدم امكانية انك تحتفظ بالمحادثات عادي، وبيدعم نفس الميزة على تليجرام واتساب ماسنجر وغيرهم، وده لزووم تقنين استخدام الخدمات دي لتبادل ملفات معلومات حكومية ف أمريكا..
طبعا دي فضيحة لان كدا اتثبت رسمي ان والتز فعلا كان بيكلم الحكومة على سيجنال ، وده يثبت برصو فضيحة جروب شات سيجنال (لو حاسس انك توهت فجأة، متقلقش سايبلك الخلاصة للسطر اللي في أول كومنت 😉)
هل الامور تخلص هنا؟
لااااااا يووووووونكن😁
2 مايو
والتز اتسرح من منصبه
5 مايو بقى
يطلع تقرير من معلمين 404Media يقولوا فيه انه فيه واحد هاكر اخترق TeleMessage في أقل من 20 دقيقة، وبقى يقدر يشوف كل المسجات اللي عليه🤣
العظمة في القصة ان الشركة اللي ورا TeleMessage دي تبع الكيان، وبايعة خدماتها تقريبا لكل مؤسسات الحكومة الامريكية، وبتسوقها ليهم انها بتقدم تشفير end to end encryption والدنيا امان يا عم أبو حنااااان🥸
أحلى جلاشة دي ولا ايييه😅
مايكروسوفت قفلت سكايب.. للأبد!🥹
بعد 21 سنة، العالم بيعمل باي باي لواحدة من أقدم - إن مكنتش الأقدم - خدمات مكالمات الفيديو في التاريخ!
بس قبل ما نطفي الكاميرا ونقفل المايك، تعالى نفتكر أهم محطات صديقنا الأزرق 🥸
📌تاريخ التأسيس: 2003، في تالين – إستونيا، على يد نيكلاس زينشتروم ويانوس فريس.
💸أول صفقة كبيرة: لـeBay في 2005 بـ2.6 مليار دولار، اللي أضافت بعدها ميزة مكالمات الفيديو.
💸بعدها مايكروسوفت اشترته في 2011 مقابل 8.5 مليار دولار، وكانت ساعتها أكبر صفقة في تاريخها!
👥عدد المستخدمين في عزه: أكتر من 300 مليون مستخدم حول العالم.
عدد المستخدمين سنة 2023: نزل لـ36 مليون مستخدم نشط يوميًا.
🌟أهم مميزاته:
مكالمات صوت وفيديو مجانية بين المستخدمين.
إمكانية الاتصال على أرقام أرضية وموبايل (مدفوعة).
شير شاشة، رسائل نصية، ملفات، رموز تعبيرية وجيفات.
اجتماعات جماعية لـ50 شخص مجانا.
🤔ليه سكايب وقع؟
معركة كورونا: وقت ما العالم كله كان بيتحول لاجتماعات أونلاين، الناس لجأت لـZoom وGoogle Meet.. وسكايب؟ كان بيتحنيّك على تسجيل الدخول بمايكروسوفت أكاونت!
بقى تقيل وكله Lag: المستخدمين اشتكوا إن البرنامج بقى تقيل، مش سهل تفتحه، وكام مرة علّق في الاجتماعات المهمة.
مايكروسوفت نفسها اتخنقت منه وركزت مجهودها على Teams..
الجيل الجديد طار بعد ما اتربى Discord وSnapchat وZoom اعتبر سكايب "بتاع بابا وماما"، مش cool كفاية! 👴🏻👨🏻🦳🤦🏻♂️
وداعًا يا سكايب... انقطع الاتصال📵 ☹️
بس الوصلة في القلب لسه شغالة 💓💻🎥
عارف صاحبك اللي مهما تقول له بيقولك اه تمام معاك حق فكره عسل يسطا حتى لو بتقوله انا هسيب الشغل وافتح كشك كبدة ع الصحراوي..!!
ده اللي حصل بالظبط مع ChatGPT بعد آخر أبديت من OpenAI البوت بقى بيوافق على كل حاجه وبيطبطب عليك حتى لو كلامك غلط أو خطر أو ملوش لازمه وسمّت ده مجاملات زياده عن اللزوم أو زي ما سموها هناك sycophancy😬
اللي حصل باختصار إن الشركه نزلت تحديث يوم ٢٥ أبريل وقالت ده هيخلي البوت شخصيته أحسن وسلس أكتر في الردود بس اللي حصل إن البوت بدأ يشجع المستخدمين على قرارات متهوره (زي التخريب والانت7ـار) !!
وبعد ما لاحظوا الكارثه سحبوا التحديث يوم ٢٨ أبريل ورجعوا النسخه القديمه اللي كانت أعقل شويه وقالوا إن السبب إنهم ماخدوش بالهم في اختباراتهم الداخليه من اللي كان بيحصل فعلاً
🤔ليه ده حصل أصلاً؟
علشان كانوا بيجربوا نظام تدريب جديد بيعتمد على لايكات وديسلايكات المستخدمين وده خلى البوت يحاول يكسب ود الناس بأي تمن حتى لو ده معناه يوافقك وانت بتقول حاجه خطر أو غلط..عشان ياخد لايكات أكتر!!! :O 🤣
المراجعات الداخليه ما اكتشفتش المشكله، بس حسّوا إن نبرة البوت اتغيرت بس ده مخلاش حد يوقف الأبديت وقالوا بعد كده إنهم خدوا قرار غلط!
عملوا إيه بقى؟ أول حاجه عدّلوا التعليمات اللي البوت شغال بيها وبعد كده رجّعوا النسخه القديمه وبعدين بدأوا يصلّحوا كل حاجه من أول وجديد
قالوا إنهم هيزبطوا طريقة التدريب علشان يمنعوا المجاملات الزايده وهيضيفوا أدوات تحمي المستخدمين وتخلي البوت صريح أكتر وهيخلّوا الناس تجرب التحديثات بدري ويبعتوا فيدباك قبل ما يوصل للكل..
والأحلى كمان إنك هتقدر تتحكم في شخصية البوت وتكتب له تعليمات خاصه وتختار شخصيه من كذا شكل وهيكون في طريقه تبعت بيها رأيك فورًي وانت بتتكلم معاه.. ((طبعا الستات هتحب الSychophantic ده 🤣))
الشركه كمان بتدور على طريقه تخلي رأي الناس من كل العالم ليه تأثير في سلوك البوت علشان يعكس كل الثقافات والقيم المختلفه مش بس حسب كل واحد بيتكلم معاه
الخلاصه؟ حتى الذكاء الاصطناعي ممكن يبقى مجامل زياده بس المهم إننا نعرف نزبطه ونخليه يفيدنا بجد مش يطبطب علينا وخلاص!
مساءو
سام ألتمان - مؤسس ومدير OpenAI - قال في جلسة نقاشية في TED 2025 اتكلم على ان الطفرة الجاية في الAI انه يفهم ويحلل كل بياناتك ومحادثاتك وكلامك معاه طول حياتك، عشان يجيبلك حل مشكلة ويبعتهولك، أو يحلل ايميلاتك ومسجاتك ويفكرك بحاجة ناسيها، أو يلقطلك فرصة شغل حلوة تناسب قدراتك ومجالك.. كل ده، من غير ما أنت تدخل تكلمه.. من غير حتى ما تطلب منه يعمل كدا أصلا!
Читать полностью…
دلوقتي ميزة Deep research
بقت متاحة مجانا على ChatGPT
لحد 5 جلسات في الشهر!
يعني ايه Deep Research ؟ 🤔
دي ميزة محترمة جدا
تقريبا كل منصات الذكاء الاصطناعي
دلوقتي بتقدمها، بتخليك تسأل سؤال عميق
عايز سيرش ف يجي 20 30 موقع عشان تطلع
بالداتا المنظمة والاجابة الوافية
وفوقيهم عايزة كمان بتاع 3 ساعات تنظيم الداتا دي بقى..
الAI بقى بيعمل المهمة دي نيابة عنك بس بياخدها
ف دقايق، بس ممكن توصل ٢٠ دقيقة عادي!
جربها هتنبسط!
🔴 طبعا المعلمين بتوع ChatGPT Plus
انتو جالكو 15 جلسة اضافية على ال10 جلسات العاديين
فبقى معاكو كل شهر 25 جلسة
اما برنسات الChatGPT PRO
فانتوا جالكو 125 جلسة فوق ال125 اللي كانو عندكو كل شهر😅
مساءو
أحسن قرار أخدته في حياتي
إني مسحت تروكولر !! 🫣😅
مبدئيا أكيد مفيش حد يختلف
على ان تروكولر عمل طفرة في
طريقة الناس في انها تعرف مين الرقم الغريب اللي بيكلمها..
بس بصراحة فيه كام حاجة جابوا آخري مع الابلكيشن:
1. ليه لما حد يرن عليا/اتصل على حد
البادج اللي بيظهر عليه الاسم صعب أشيله
ولازم أدوس على الإكس مرتين عشان يتشال ليه؟!
2. ايه ياحبيب قلبي كمية الإعلانات اللي في الابلكيشن أو كمان اللي على بادج الاسم..
وكلها كلها كلها شمال؟؟!!
ياعم عيب والله بقيت أشيل هم ان موبايلي يرن
وجمبي حد.. مش كدا!!
3. ليه يابني لما ارن على حد وميردش عليا
لازم تدخلني على صفحة الرقم ع الابلكيشن..؟؟
4. كل ده ف حتة ونوتفكيشنز المزايا الجديدة كل شوية..
محسسني اني مسطبة لوحة اعلانات من ع الدايري مش أبلكيشن!!
⛔تم الحذف بنجاح⛔
الحالة التانية، وهي الأقرب، إن والتز وجولدبرج كان بينهم محادثة فردية أو جماعية على iMessage، وساعتها الموبايل اقترح على والتز إنه يسجل الرقم في سجل جهات الاتصال، يا كجهة جديدة، يا كتحديث لجهة موجودة، ويبدو إنه اختار التحديث، وكانت الجهة اللي تم تحديثها برقم جولدبرج هي هيوز.
يُذكر إن والتز أنكر إنه اتواصل مع جولدبرج بشكل مباشر، وقال بعد اللي حصل، إنه ماكلموش قبل كده.
بس جولدبرج قال لصحيفة "الجارديان" لما اتسأل عن الموضوع: "مش هعلّق على علاقتي بـ مايك والتز غير إني أعرفه، واتكلمت معاه"..
الخلاصة؟
ادارة بتعك جامد.. أوي!