7993
خدمة الزهراء والحسين (عليهما السلام) للعزاء قناة متميزة منوًهة بخبرة عالية تعتمد على أساس دراسي وتطبيقي من قبل خطباء متميزين وأكبر الشعراء والرواديد
لوفاة ام البنين عليها السلام
عام اربعه وستين عام الحزن
لأم البنين الدار ضلت تون
,★★★★★
نيران موماي المدامع تهل
لازينب ولحسين لا ابو الفضل
ضلت وحيده عگب ذاك الشمل
يحضرها ياهو من يحل الدفن
★★★★★
حتما تضل دار الوصي مظلمه
فاطمة راحت من بعد فاطمه
ام البنين العارفه العالمه
كسرة گلبها مثل كسر الغصن
★★★★★
بعد الوصي مايوم راحه لگت
سبطين من بعد الوصي فارگت
وبفگد زينب روحها اتلوعت
يكتل حنين الشوگ الهم تحن
★★★★★
چم فاجعه مرت بعد فاجعه
بدور الليالي فارگت اربعه
ابدورها فوگ الثرى امگطعه
كسرت ظهر والله فگد الأبن
★★★★★
عام النوايب والحزن والدمع
يعني بعد كل شمل ما ينجمع
غياب اهلها والگلب منفجع
وبالعين دمعه من تغمض الجفن
الشاعر حسن لعيبي الحريشاوي
/channel/tajalzahraa1
(( #ام_البنين_و_الزهراء ))
……………………………………………………………
ولله خجلانه اشكثر . شلون باجر اعتذر
بهاي كلش قصرت يا فاطم
سالمه آنه وابنج الما سالم
آه يبني .. آه يبني
……………………………………………………………
تدرين اليجي خجلان . يعصر بيده و بروحه
وي ذبحة ابو سجاد . مفروض انا مذبوحه
شلون اتمدد اعل ابساط.وجثه ابرمل مطروحه
وانزف گلبي وي الروح . گبل لا تنزف جروحه
خجل ملگه . اجي امدنگه . تصب عيني
شنو نوحي . اطش روحي . على حسيني
اعليج امشي محسنج . بالضلوع و عصرتج
العذر يا سلطانه فوگ الوادم
سالمه آنه وابنج الما سالم
آه يبني .. آه يبني
……………………………………………………………
أجيج امطر خجل عالگاع .امحنبه واجر بذيالي
راسي امركب اعل أجتاف.وراسه اعالرمح عالي
ابعني مو رسم منقوش . هالمنظر تراوالي
الرمح من الحديد و حار . بايگ ضحكة الغالي
غده اصفر . شعر احمر . ابنزف دمه
وسط راسه . الرمح جاسه . بالف لچمه
ريت راسي المنگطع . وي رمحه المرتفع
كون هم مثله الهوانه ولا شم
سالمه آنه و ابنج الما سالم
آه يبني .. آه يبني
……………………………………………………………
ماي الكوثر العندج . امن ايدچ يلمع امذهب
احجاية ابني اعيدنها . عذرا منّه ما اشرب
اواسي ابنج يمولاتي . الظل گلبه جمر يلهب
اذا شربيت لو عطشيت . بالامرين اتعذب
عمت عيني . على حسيني . و على اوليده
ابعطش فاير . سهم داير . على اوريده
كون ميته اوي الوِلِد . وهو مو وسط اللحد
بالمهد يلعب او وجهه الباسم
سالمه آنه و ابنج المو سالم
آه يبني .. آه يبني
……………………………………………………………
مثل عصر الجذع والباب.اجيج بروح معصوره
لا ساحگني حافر خيل . و لا اشلائي منثوره
يگلولي الخيول اهواي . دارن عالجسد دوره
وكثر ماهنه حيل اثگال .الكاع الحدره مكسوره
اطبگت صدري . على ظهري . الف مره
ولا داست . طبع عافت . على نحره
صرت كلما اصد فرس . بيه الف رمح انغرس
والحديد ابجسمه حافر راسم
سالمه آنه و ابنج الما سالم
آه يبني .. آه يبني
……………………………………………………………
اعليه البيت سگفه اظلال . وهو الجثه منصهره
ثلث تيام ماكو افياي .شمس حرگت عظم نحره
جروحه ولونها اتغير . صارت سوده مو حمره
اتغطه ابغطه وحسين.اسهام اتغطي كل صدره
على اصبعه . اهل دمعه . بدمه جاري
الرمل حدره . أكل ظهره . و هو عاري
شلون خلوه بالكبر . اسهامه لچمنه اشكثر
الرمل حار النحره اصبح لاچم
سالمه آنه وابنج الما سالم
آه يبني .. آه يبني
……………………………………………………………
جان بودي اروح اوياه . و اصيرله مثل ظِله
لچن ردت الكمر عباس . ابزينب ينشغل كله
ومثلي ومستحي منج.اعل جوده الذبحته النبله
ثواب الضلعج الچفين . سهم نص عينه اتخله
گبل موته . عِله صوته . اعذريني
انسلب منج . تره خدرج . يضي عيني
وراح اضل ابمصرعي . يمچ اوصل استحي
الج سوط و حبل زينب قادم
سالمه آنه وابنج الما سالم
آه يبني .. آه يبني
……………………………………………………………
✍️ ( سيد خضر الزاملي )
/channel/tajalzahraa1
ندبة لأم البنين عليها السلام (( ناخيه ام عباس ))
ناخيه ام عباس واترجاها
تشفي كل وجعان من ادواها
ناخيه ام عباس تنطينه الدوه
عدنه مرضه وضايگ اعليهه الهوه
واگفين ابابهه انحشم سوه
وبالغريب حسين حلفناها
نقسم اعليهه بمصابه وغربته
هاذه ابو السجاد هيه الربته
انريد كل وجعان يشفي وجعته
والعليل اتعالجه بيمناها
انريدهه بچفهه اليمين اتعالجه
ابابهه اموگفين نترجه رجه
دارن اعلينه النوايب والشجه
والهضايم حيل مليناها
والله ملينه النوايب والهضم
بالگلب باتن اوصلن للعظم
خلصينه اعمارنه نوح ولطم
ماتت الفرحه ولاشفناها
بس حزن بعمارنه ومات الفرح
وكل گلب مجروح بالمية جرح
والزمان امسلح اعلينه سلح
مارحم برواحنه وبچاها
مارحم برواحنه وقاسي الزمان
لامحنه اليوم ضلت لاامان
انصيح يم عباس من هاذه المچان
واحنه للشدات ضميناها
للشدايد ضامين ام الوفه
لكل مريض انريد من عدهه شفه
غير واحد مانروح نكلفه
الربت الشجعان كلفناها
شاعرة اهل البيت
ام غصون العمارچيه
ديوان ايات الشهاده جزء ١٨
غير مبري الذمه من يمحي اسم الشاعره او يغيره او يتلاعب بالقصيده وينسبها لشخص اخر
/channel/tajalzahraa1
( الزهراء تستقبل ام البنين في الجنه )
……………………………………………………………
يلا يا حور . وياي خل نستقبل اختي
يلا يا حور . الجنه ما توسع لهفتي
بالورد واسم الوفيه انرتله
هله ام عباس الگمر مية هله
……………………………………………………………
يحوريات اعرفچن . ابهاي السيده الگبلت
الوفاء الها سجد تكريم . عليها التضحيه صلت
اعز من روحها هاي المره اتعزني
اربع ولد نذرتهم فده لبني
وتكول اشويه كاتلها الخجل مني
الگمر وحسين جن اشبگها وتشمني
يلا جبريل . أخذ بجناحك تحيه
يلا جبريل . لم الاخلاص الوفيه
اعليها انثر عطر من طف كربله
هله ام عباس الگمر مية هله
……………………………………………………………
يحور او وصل بيها الحال. اسمها لخاطري اتغيره
عاشت خادمه ابيتي . و رفضت تنحسب ضره
ابوقت كلش قياسي وحصّلت كلمه
نادوها الحسن و حسين يا يمه
شمس نزلت ابيتي وطردت الظلمه
حمامه و رسمت ابجنحينها البسمه
اتحاچي زينب . الوگت كله اگظيه يمج
اتحاچي زينب . حتى اشمن ريحة امج
يل خدمتج ليّه اكبر منزله
هله ام عباس الگمر مية هله
……………………………………………………………
حضرن الها طاسة ماي . تره ام عباس ذبلانه
مثل ابنيها لأجل لحسين . ماتت حيل عطشانه
رفضت عل الوساده اتخلي هامتها
ولا خلت افراش الحدر نومتها
تواسي حسين جثه التربه غطتها
ومثل مرواح خير ابركض ذرّتها
و أمنيتها . يحضر حسين وعضيده
وامنيتها . عينها ايغمضها بيده
والنعش جاسم والاكبر حامله
هله ام عباس الگمر مية هله
……………………………………………………………
تلاگن والدمع مدرار . الملائك كطعت الانفاس
اجت واتصيح يمه حسين . الزهره تصيح يا عباس
تكلها ام البنين ارتاحي يالزهره
اخاف اعليج ضلعج يلّچم كسره
وعلى عينج اخاف البضرب حمره
خليني انا الطم عالوَلد واقره
ميته من يوم . ناده يا اهل المدينه
ميته من يوم . حسين بالطف ذابحينه
بالشمس مطروح مامش ظل اله
هله ام عباس الگمر مية هله
……………………………………………………………
قصرها ابصف قصر فاطم .في اعلى السمه السبعه
وعلى بابه كتب جبريل . بيت الخدمه و الدمعه
واول يوم سوّت مجلس اقرايه
سمعن واجت مريم والنسه اعنايه
سألن يم حسن ياهي المره هايه
هاي ام العطش بس ما شرب مايه
يا اميرات . هاي عدها حسين نسمه
يا أميرات . نثرت ارواح اعل جدمه
معجزه بصورة مره متمثله
هله ام عباس الگمر مية هله
……………………………………………………………
الزهره و خاطبت ربها . اريد الحره اوافيها
عوض عن رگبة العباس . باب الدعه اتسويها
واريدن تنذكر باليوم الف مره
اليسافر لازم الها الفاتحه يقره
و لأن شاركت بنتي الدمعه والحسره
ابطبق جفين ابنها الكافل امحضره
يا إلهي . بالشكايه وابدي بيهن
يا إلهي . ابدمع عيني انثر عليهن
جفوف راعيهن امير المرجله
هله ام عباس الگمر مية هله
……………………………………………………………
✍️ ( سيد خضر الزاملي )
/channel/tajalzahraa1
يم البنين يم البنين
****
نشوف الكمر بعيونچ
شنهي الشريعه بدونچ
ام اربعه يعرفونچ
ام البنين
لحسين عين انطيتي
وزنود هم ضحيتي
بلايه كمر رديتي
ام البنين
حگ لو بچينه ادموع من وفي
الحزن يم عباس شيكفي
لنطت ولدهه كون تجري دموم
جرحچ ابد مولاتي ما يشفي
الخادم حزين
يم البنين يم البنين
*
تسهيل امر سجليني
وي الخدم خليني
ارجوچ لتعوفيني
ام البنين
بداعت الضحه بعينه
يم الكمر شوفينه
يوم الحشر زورينه
ام البنين
سجلينه من خدامچ وكافي
من دون خدمه عمري شو طافي
يا رحمت الله وبيكم الرحمه
دوم اسمچ ليلهچ عله شفافي
كلچ حنين
يم البنين يم البنين
***
بگليبي ضلت حسره
بسمچ تضل العبره
مشكوره من الزهره
ام البنين
ما قصريتي بهايه
جبتي زلم وفايه
لحسين رفعو رايه
ام البنين
سمعأ وطاعه كالو وتامر
واحدنه لجلك بشدد حاضر
يبن الزجيه غيرك شعدنه
ما ننتضر يا سيدي لباچر
نفدي الحسين
يم البنين يم البنين
***
لتضحيه انتي العنوان
بطف فديتي الخوان
فدوه لحسين العطشان
ام البنين
ما همچ انتي العباس
بحسين صحتي يا ناس
فدوه الولد والانفاس
ام البنين
الروح ترخص يل كمر فدوه
بس يرجع حسينك يبو النخوه
كلتيله حيدر رادك لهل يوم
تروي الاطفال وللاخو تجوه
متقصرين
يم البنين يم البنين
*
مجلس نسوي بيومچ
يل طيبه انتي اعلومچ
باب الحوائج دومچ
ام البنين
كلچ محنه وطيبه
وفقينه يم الهيبه
طلعت بيومچ شيبه
ام البنين
نقسم عليچ بفاطمه الزهره
الخادم توفقينه كل عمره
ما عندي غيرچ وانتي تدرين
يم البنين نريد هل نظره
تدمع العين
يم البنين يم البنين
الخادم/ حيدر ناجي الدراجي
@HxzEU1
/channel/tajalzahraa1
نعي عن لسان ام البنين
سلام الله عليها
يلتنادوني بسم ام البنين
تذكروني بلوعتي وجمر الونين
اربع ابدور المشوا عني وصرت
بيتي خالي ومابعد عندي بنين
توذورا بسيوف مابيهن رحم
على الغبره احباب گلبي اموذرين
يوم گالوا بالعمد راس انهشم
وطاحن جفوف الگمر يسره ويمين
واشد كل هاي المصايب علگلب
سهم المثلث فطر گلب الحُسين
الشاعر حسن لعيبي الحريشاوي
/channel/tajalzahraa1
يالحـــاجتك مـــا تنكَضي
أم البنيـــــن أنخــــــاها
**
لكــــل وآحد يهــد الألــــم حيــلة
ومينــام من كثـــر القــهر ليـــلة
موكـل شخص بالنـاس تمشيــلة؟
يُفــرَح أكــو لــو دمَـعك تسيــــلة؟
كَدام كل أهل الأرض بــأم البنــين اتبــــاها
**
انخـــاها يامـن كثرت همـــومك
أحــزان كَلبــك تنتــهي بيــومــك
المــا يعتقد والجـــاهل يلومــــك؟
شمـــرهم مثلما تشمــر هدومــك؟
تتمنــه تطلب حــاجتك تتنَطَــــرك تلكَــــاها
**
صفيـــها نيتـــك وأعتقــد بيــها
كــل الحوائـــج ألـــــك تكَضيــها
شتـــريد هيـــه البـــاري ينطيها
چـــي وآفــت الزهــــرة يوافيـها
عتـــرة محمــد للحشــر نحيـــه ونموت عليها
**
لا تستحـــي وإيـــــاك تتـــــردد
لــوچنـــت بالمــــريخ أو ابـــعد
حاجـــات كَضَـــت والله ما تنـعد
للـــي يحب حســـين تنطي ازيد
هـــذي كرامات شكـثر سبحـــانهَ الله أنطـــاها
**
نصــرت حسين بأغلى ما عدها
تكَضـــي الكــلايف الله رايــــدها
لو ردت تنخـــه انخــاها وحدها
عدهـــــا مــواقف محــد يعــدها
يالأيَــست من دنيــتك اتخَيِبَــــك حاشـــــاها
**
عدهــــا الحســـين يعــادل الدنية
انطت ولِدهـــا وتستحــي شــوية
عنــد الله وأهـــل البيــت مرضـية
ما عدهــــا عطلـــة تنطــي يومية
أصعب مرض يشفه أله البالمنذبــح وآسـاها
**
هــــاي المكـــانه من الله والرفــعة
الينخـــاها لو سابع سِمــهَ اتسمعة
واليلـــطم تشـــوفه ويهـــل دمـــعة
هيهـــات خـــايب فاطمــة ترجـــعة
انطت ولِدها الأربــعة ورب العرش وآفاها
**
أم البنيـــــن تحــــب مجالسنـــــه
لكــــل المــــواكب تجــــي تتمـــنه
هـــذا العــــزاء يدَخــــلك الجــــنه
أنخــــاها بـس من كَلـــبك اتعـــنه
ما ترد وآحــد لو دَعـه أم الكَمـــــر حيـــاها
**
بيـــها أطمَـِـن يالخــابت ظنـــونك
جربهـــا وأنت تشـــوف بعيـــونك
بعض الهمــــج خلـــهم يلومــونك
إحذرهــــم وبـــــالك يغيــــــرونك
هاي العقـــول التــالفهَ المفروض نتحـاشاها؟
**
حيدر حسين الكَرعاوي
/channel/tajalzahraa1
ابوذيات
١٠٧٠- عتاب ام البنين (ع)
بعـد ماخيّط اجـروحي وشلها
عله اللي دمعة عيونـي وشلها
الگمر ماگال اجي لامي وشلها
اعذره اعله النهــر طايح رميه
✍ فراس المحمداوي
١٠٧١- وفاة السيدة ام البنين (ع)
١٣ جمادي الآخرة ٦٤ هـ
النواعــي والنوايــــح ما تملها
وبفــــرگاك الغوالي مات املها
وجوب الليله ننصب ماتم الها
وانقدم لبو فــــــــــاضل عزيه
✍ فراس المحمداوي
/channel/tajalzahraa1
#وفاة_السيدة_أم_البنين ع
#أطوار_مختلفة
# تصوير حضور الإمام الحسين ع والسيدة الزهراء عند إحتضار أم البنين ع
مَرّ طيفه على عيوني .. قبل موتي " حبيبي حسين"
وإجَت وياه "حزينه" تنوح .. تنادي يا فْقِد البنين
#منو هاي الحزينه ...؟
شِفتها وإحترت بأمري .. منهي اتكوني يالحره !!!
ابونّتها تِفت الروح .. وبديّها شايله الصّره
فَتْحَتها وشِفت كفين .. دِريت الطّاهره الزهره
كفوف إبني جابتها .. يغمض لي جفون العين
تصيح بصوت يم عباس .. تِعوضلي فقد الاولاد
تِجازي قطّعة إزنوده .. وما تدري بحزن الفأد
لوّن من الوِلد عشره .. ويرد سالم أبو السجاد
بس جاني الخبر مذبوح .. ع الرمضه وبلا تكفين
#واذا بأم البنين خجلت من الزهراء ع ومواساتها لها ، نظرت للحسين تسأله تستعلم الحال عن وفاء العباس ، يجاوبها الحسين :
شِفت موتي ييُمّه هناك .. من راح القمر عنّاي
صاح بصوت يهز القاع .. انا العباس انا الوفاي
لهذا اليوم رادتني .. أمي التِعبت اعلى رباي
اريد اوفي سهرها بليل .. وافديلَك كفوفي اثنين
🖊خادمة أبي الفضل
/channel/tajalzahraa1
#وفاة_أم_السيدة_أم البنين ع
#طور_وحدة_من_اليتامى
#وكأني بأم البنين ع رأت إلامام الحسين ع في الحلم
غربة هالليله يا يُمّه .. وشِفتَك بحلمي يغالي
واِسْمحتلي كُون ضُمّك .. وتِسمع الصار وجرالي
من رِحت عني وفِقَدتك .. ضاعت احلام الليالي
يا عزيز الزهره إرجع .. طوّل غيابك واتاني
هاذا يا دم اعلى يدك .. قلي لا تخفي عليّه
وريحة العباس اشمّها .. مِن لِزمت كفوف إديّه
يعني إبني وفىَ دِينه .. ولجلك اتوسد وطيه
بالله قلي . والعقيلة .. بعده كم غصة التعاني
بالحلم صارت مناحه .. ويروي الحسين الفجيعه
امن النّهر صوته إجاني .. وحرّت يا صوب الشريعه
وصلته ودموم اعلى عينه .. ومنه كفينه قطيعه
رِدت أشيله للمخيم .. قلي خليني ابمكاني
🖊خادمة أبي الفضل
/channel/tajalzahraa1
يخويه حسين خل نتعنه لمنه
صلاة الوحشه صلينه بهضمنه
آه آه........يمه ابدمعتي
**1
تعنينه بحزنه ودمعة العين
اخوي وياي يلطم آه الحسين
ادير انه الوجه وبلايه چفين
حضرنه اثنينه يا ام البنين
وگفت انه وشفت دمع اليعزون
امد ايدي وارد مصيوبه العيون
آه آه..... يمه ابدمعتي
**2
يخوي حسين انت تمشي وياي
نتوجه سويه وننعه بهداي
هناك ام البنين اتشربك الماي
تصيح اوليدي يمه يا هلا جاي
يخويه بالمدينه تحچي الدموع
يم امي ابدمعهه انداوي الظلوع
آه آه......يمه ابدمعتي
**3
اجينه وجبنه يمه دمع الايتام
مرينه ييمه بديرة الشام
لسه ارماد بيها حرك الخيام
والدمعه عله خدهه تنزل اسهام
بعدهي من الحزن ماظلت الروح
ايام السبي تحچيلج اجروح
آه آه........يمه ابدمعتي
**4
حزنهه ماخلص وتسولف اجروح
زينب والنعي والعشره والنوح
تشوف احسين آه وتشهك الروح
تقبل خنصره والحسره مذبوح
عله الرمضه ييمه اتهدم الحيل
وبحافر مهرهه اشسوت الخيل
آه آه ......يمه ابدمعتي
**5
تعنينه ... ابدمعنه يم رقيه
گعدنه هناك سوينه العزيه
ابو اليمه يسولف عن سبيه
راد يشبگهه ذكر سهم المنيه
جبنالج رقيه وتبچي العيون
اثار السبي ما خلت امتون
آه آه.......يمه ابدمعتي
***6
صعوبه اشلون يمه نلگي دفان
يجي المذبوح يمج بعده عطشان
اجيت بلا چفوفي وگلبي نيران
نهيل اتراب گبرج يم الاحزان
اهيله بلا چفوفي اشلون التراب
ماشوفن ييمه ابعيني الصواب
آه آه........يمه ابدمعتي
***
وگفنه بالعزه وجروح الاحساس
وخوي حسين واگف هم بلا راس
قرينه الفاتحه مخنوگه الانفاس
وقيم انه العزه بالجربه والطاس
حنيت الظهر يمه مثل الحسين
عليچ اسچب ييمه دمعة العين
آه آه.......يمه ابدمعتي
***
تمت بعون الله تعالى الشاعر___يوسف_الفتلاوي
/channel/tajalzahraa1
قصیدة زينب وماادراك مازينب
للشاعر الاديب السيد سعد الذبحاوي
الرادود محمد ضيغمي
ليلة ام البنين ع
.
.
.
الليله بالطـيف / شفت سيف / يحــز ابمنـحر
وصوت مبحوح / يـمـــذبــوح / ضَعنه اتطشر
حلمي من يگدر يفسره
سايمه اعليــكم الزهره
انه ام البنين
***
وي ماغمـضت عيـــني شفـت صحراء مـــزدحمه
وعلى مـــد البصر عسكر بـــس عــسكر بلا رحمه
قــسم للذبـح متحزمـــه وقســم للـسلب متحزمه
واكو حرمه اصعدت للتل مدري شحچت وي زلمه
الزلمه عالثره امــدد .. وحيله من سمعها اشتد
گــام وطاح والذباح .. سهمــه بمـنــحره سـدد
عــن ليــرتاح / شخص صاح / احـرگو اخيامه
وخلو هالخيل / تجــي حيل / تدوس اعظامه
هالحلم فسرولي امره
سايمه اعليكم الزهره
انه ام البنين
***
بعدني بالحــلم واسـمع واحـد صــاح نــسبيها
حرمــه ومالهـا كافــل الكفـــلها اظــن نــاسيها
صاح الثاني خـل نحــرگ بس لحـــد يطــفيها
ومن تركض بنص الجيش نحــرگ گلب واليها
تشب بذيالها النيران .. تطفي فلان شب فلان
كلــها تصــيح ياعـمه .. عمانه اللهب والدخان
اتلم بالاكبار / بالــزغــار / بقت محتاره
وين متـروح / بالجروح / تجيها الغاره
امر هالحرمه شيدبره
سايمه عليكـم الزهره
انه ام البنين
***
تكـــملت الحــلم چــانت توجــع كـــلـش وصــعبه
الزلمه الطاح بالميدان اجــه واحـــد حجـــر گلــبه
علـى صدره گعــد شفته لزم شيبـــه وبـده ايعذبه
ضرب منحـره وانه احسب بالسيف اثنعش ضربه
الدنيا احــمرت وعجت ..السماء اضطربت وضجت
انذبح شيخ الزلم صاحو .. ونسائه بالفـــله هـــجت
وصار الــزماط / بالســياط / مـنو ايعـذبهن
وجيــش الانذال / بالاحبال / بده ايگيدهن
والي هالبيت اشيصبره
ســايمه علـيـكم الزهره
انا ام البنين
***
نهر بالحــلم شاهــدته وخيــر مــن الله جــروانه
عجيبه اهل الخيم چا ليش كلها تصيح عطشانه
بنـــات زغـــار وحدتـهن مــن التـــعب كـــبـــرانه
يسألن وين راعي الجود عمنه شـــعجـب ماجانه
صاحت وحده وانه اسمع .. عمنه يمكن مگطع
بخيـــمة عَمتي يگــولون .. الكافل بعد مايرجع
ماكو كفـال / للعـيال / يصيـح العسكر
وللسبي كون / ينادون / الحرم تتحضر
بلله ها يشلون سفره
سايمه عليكم الزهره
انا ام البنين
***
بـس لاضــعن أبو الســـجاد هــذا البالحــلم شفته
وبس لا هالمره التــركض زينب بـــت علــي اخته
فـــال الله ولا فــالــي حـــلـــمي مـــره ســــالفته
حسين ان شاء الله يرجع الجــيته اتـاني طايفته
ولكن گــلبي مـــامرتـاح .. واحـس منه انشلع سباح
من يوم الشفت بالطيف .. جسم فوگه اعتله الذباح
عن الحسين / ضوه العين / سؤالي الدايم
ابچي ودعيت / تمـــنـــيت / يردلــي سالم
منو من عدكم يخبره
سايمه عليكم الزهره
انه ام البنين
***
حيدر تركي الكربلائي
/channel/tajalzahraa1
گعده لــ ام البنين
(لــن تَــنالوا البِــرَ حــتى تُنــفِقـوا ممــا تُحِـــبون)
وانه اعز ماعندي ولدي وفدوه الك يانور العيون
اويه اللبن من رضعتهم
عالتـــفـــاني علــمـــتهم
(لن تَنالو البِرَ حتى تُنفِقوا مما تُحِبون)
--------------------
بسم دمع اعـيوني ابدي واحچي عمَا صار بيه
الكــبرتهـم بــالمــتاعـــب والمــصاعب والاذيه
محــلل ومُــهوب بيهــم كون بس ترضى عليه
اي وحق جفني ومدمـعه .. اعرف قليل الاربعه
يـــرادلــــك للمـــشرعـــه .. اخـوه للــعباس ميه
عَشره من يرحون منهم هم يضل وياك تسعين
حتـى ماينكـسر ظهرك عالشـريعه يـمه يحسين
لون عندي جندتهم
وعالـتفاني علـمتهم
(لن تَنالو البِرَ حتى تُنفِقوا مما تُحِبون)
------------
(اتقــوا الـــنارَ بــشقِ )تمــره وانــه هـــواي عندي
ولــذلك مــو بتــمــره جــاي اتــصــدق ابـــولــدي
انچان تحسبهم شويه ويـاهم انه احسبني جندي
ابعامود اهد وموعجب .. بالمعركه مثل ام وهب
لاموعجب بس العجب .. شحچـي للزهره بلحدي
من تگلي وين اديچ وايدي كلشي ماكو بيهه
شراح اگلها يبو اليـمه وزينـب مچوايه اديهه
إي وحق الي خذتهم
عالتــفاني علمــــتهم
(لن تَنالو البِرَ حتى تُنفِقوا مما تُحِبون)
--------------
امن ازرعت بذره محبتك خضر العباس ياسك
وگتله انفاسك حسين تمـوت انته ابلا انفاسك
تاج راسك ابو اليمــه وغــيره ماكو تاج راسك
ربيته هـيچ امن الزغر .. وشــربته خــدر ام الخــدر
بشيلتهه گمطته شكثر .. حتى يعرف شنو حساسك
علي چان ايصيح بسمه الكربلائي الكربلائي
وانه ماگــله ابو فاضل چــنت اگله يالفدائي
بهالــطريقه هيئتهم
عالتــفاني علمــتهم
(لن تَنالو البِرَ حتى تُنفِقوا مما تُحِبون)
-------
وداعتــك يا ابو اليمه باچر امــن ايصير عاشر
ومايضل عندك صـديج ومايضل عندك مناصر
اربعتــهم تحت امــرك ولدي ســـويهـم گـناطر
بــس المهــم تــرجع الي .. يابو عــلي يابــو عـــلي
من تبطي تدريني ابتلي .. وابقـه مكسورة الخاطر
الدنيه ريح وريح صرصر وانتَ تـدري چني ريشه
العيشه عــگبك مستــحيله وراح ماسمــيها عيشه
واسأل اولادي اربــعتهم
عــالتــــفــاني علمـــتهم
(لن تَنالو البِرَ حتى تُنفِقوا مما تُحِبون)
----------
مــن احــط بكفه ولــدي سيدي وحــبك بـكفه
حـبي يرجع عـلى اولادي مــن كـثر مابيه لهفه
اليوم حالي حال واحد عنده ميت وعنده زفه
كودن نطيت اربع ولد .. وچـي رايح انتهَ وماترد
دلالـي احــسه منمــرد .. ويبــني من هــسه توفه
ان شاء الله ترجعلي انتَ والولد لامومهمين
ولوتــرد سالم ييــمه بعــد شــتريد ام البنين
فدوه الك من قدمتهم
عالــــتفــاني علمتـــهم
لن تَنالو البِرَ حتى تُنفِقوا مما تُحِبون
--------------
حيدر تركي الكربلائي
/channel/tajalzahraa1
من كربله جاي ... زاير الج زاير الج
الماشارب الماي ... زاير الج زاير الج
الجبتي العمر تجريله الدموع
هاليوم اجاج ابكلب مفجوع
......
فتحيهه عينج يم الابنين
عباس اجاج وجايب حسين
رغم الجروح النازفه البي
ماعافج الوحدج تموتين
من كربله اتعناج هاي المسية
يحضر دفنتج راد يوم المنية
ما هم بالالام ... يمج اجه يمج اجه
وبصدره الاسهام ... يمج اجه يمج اجه
شابع بواجي وحيل موجوع
.......
اتعنالج ابدمعات العيون
حاضر حسين اوية اليشيعون
بس عنده غصه بصدره يا حيف
شيل الجنازة رايد امتون
وبحسينج اتعرفين مثلو تمثيل
ضلوعه اصبحت ميدان لِحوافر الخيل
كاصد للمصاب .. من كربله من كربله
مسلوب الثياب ... من كربله من كربله
ماعافج المتكسَّر اضلوع
........
يالعمرج اكضيتيه معانات
عل مات من كثر الجراحات
وانذرتي لجله ادموع العيون
وبحركَه تحجيهه بعطش مات
انذرتي ابثوابه الماي لاخر حياتج
واليوم اجه ايجازيج عن تضحياتج
جايبلج اوياه .... دمعه اليصب دمعه اليصب
والأكثر اذَّاه ... دمعه اليصب دمعه اليصب
طفه ابرحيلج كل الشموع
........
قصة حسين وذبحه الاذاج
عاشت لحد الموت وياج
ليل ونهار امكابله النوح
مهدوده حيل الوكت خلاج
من بعد ابو الاحرار بيتج هجرتي
سويتي بيت احزان واشكد كبرتي
عمرج خلص نوح .... يم الكمر يم الكمر
عالراح مذبوح .... يم الكمر يم الكمر
حزنج واونج صار موضوع
.......
ولدج رخصتي لغله معشوك
تضحيتج بعين العرش فوك
ابماي الذهب مخطوطه عالوح
لحسين غيرج ام فلا اتلوك
حنيتج اعله حسين جن ام أبيهه
وبالمحشر الزهراء اتشكرج عليهه
يا ام الابنين ... شكرا الج شكرا الج
وافيتي لحسين ... شكرا الج شكرا الج
بيج الوفه ظل راسه مرفوع
......
كلمات : موسى الخادم
/channel/tajalzahraa1
(( #مدرسة_الوفاء ))
……………………………………………………………
خل ندخل ابمدرسة ابو فاضل
المنها تخرج للـخدر كافل
ام البنين .. ام البنين
……………………………………………………………
هالدعوه من رب النِعم
الكل واحد ابـ آل الخدم . وايسجل اسمه
في مدرسة عز وفخر
اسم المديره ام الگمر . و هي المعلمه
لازم تجيب اربع صور . في مجلس ابن الزهره
وحده ابلطم وحده ابدمع . واثنين ونه وحسره
وتأييد تسكن بالعزا . امن المنبر انت اتحضره
والگلب جنسيتك يهل خادم
ينبض يريدونه ابعشگ فاطم
نبضه الگمر .. نبضه الحُسين
ام البنين .. ام البنين
……………………………………………………………
وضعت شروط المدرسه
المابيه ابد مندرّسه . اخلاص وعقيده
واللي تكبر عالخدم
يعتبر هاجم عالخيم . حارگها بيده
عالباب ام المدرسه . كتبت عباره اچبيره
ما يدخل الـ بالشهره هَم . وبس بالرياء تفكيره
نستقبل اليشتم وفه . وبي عالشعائر غيره
نحنُ نرحب بالكثر نوحه
السحگ الحوافر تنزف جروحه
مثل البچت .. طول السنين
ام البنين .. ام البنين
……………………………………………………………
والمنهج وما بيه حذف
امن الالف للياء ينعرف . عنوانه الحسين
ظلمه الجهل نور العلم
واستاذتك تحمل اسم . الحره ام لبـ نين
لو شرحت الطف تنگلب . ارض وسمه احسينيه
واتعيشك ابنص الخيم . وتسمع بواجي ارقيه
من كثر ما تفهم تظل . كل درس تاخذ ميه
والمجتهد تكريم إله اتقدمه
اتعلگ وسام ابموضع اللطمه
امن ام الوفه .. و گلب الحنين
ام البنين … ام البنين
……………………………………………………………
ما بيها عطله و معلنه
لا نص سنه واخر سنه . دوم الخدامه
بالجمعه هم واجب حضر
تندب المهدي المنتظر . نور الامامه
تبتدي ابعاشور النحر . و الخدمه لو مشايه
وامحرم الباب وضلع . اثلثتشر كلها اقرايه
وبرجب لم عون الذكر . و الموسى نرفع رايه
ولكل امام المجلس انعيده
ذكر الحسين ايدوم تجديده
منها الوفاء .. امعلمين
ام البنين .. ام البنين
……………………………………………………………
تتخرج امن ام الگمر
ابرتبة امير اعل البشر . اتعيشك ابجنه
ابموكبها وتسجلك عضو
ام وحضنها اقدس دفو . ام المحنه
لا مو خرافه ولا حجي . و لا شعر صار ابالي
اقرب مثل اضرب الك . تشييع سيد الفالي
ابقم والنجف و بكربله . تابوته يفتر عالي
والقبله سيد جاسم و صيته
وي الحسين اندفن تاليته
عدها ادرسوا .. همه الثنين
ام البنين ... ام البنين
……………………………………………………………
يا اخت فاطم والوعد
نمشي اعل دربج للابد . مانترك حسين
تسعر تظل نار الذبح
وصورة شمس فوگ الرمح . مرسومه بالعين
انظل ننذبح لمن نصد . كاروك لو ترچيه
باذانه جمرة صده . من جلمة المسبيه
ماننسه سوط المنطبع . في متن چم علويه
والماي يجرح لمن انشوفه
بي صورة الگطعوهن أچفوفه
وبخيمته .. متجمعين
ام البنين ... ام البنين
……………………………………………………………
✍️ ( سيد خضر الزاملي )
/channel/tajalzahraa1
يا ام الحسن | الملا حسين الخاقاني
https://youtube.com/watch?v=KHEw997uHoQ&si=kUEhL6n27eIRsTVf
أهوازيه(#وراء_كل_رجل_عظيم_أمراه )
……………………………………………………………
كل زلمه العظيم و شوف . وراه أمرأه امسويته
و اخذ المثل من عباس . و أمه استاذ تربيته
……………………………………………………………
منهج تربية عباس . ابكل مدرسه ايدرسونه
بسم ام البنين اكتاب . بلون اخضر يطبعونه
درس التربيه ايسموه . بكل جدول يخلونه
اسم ام الگمر مخطوط . اباب الصف يعلگونه
حتى الجيل يتعلم
معنى التربيه و يفهم
يدرك راح كل تلميذ . امّه التبني شخصيته
……………………………………………………………
عد ام الگمر مشروع . و اتخطط الـ أنجاحه
إبنها أتريده بالاخلاص . الاول كون بالساحه
المنجل عالزرع لو صار . عيد بعين فلاحه
وهي اتربي بالعباس . و تنطر يوم ذبّاحه
المنطق حارت افكاره
الينعه اوليدها ابشاره
تكول ابدال محسن صار . ولم الحسن وديته
……………………………………………………………
من اترضعه تحجي وياه . اشرب يبني و حاذر
بالك يمه گبل حسين . تتهنه ابعذب باجر
ابنها اتكعده نص الليل . اتعوده ايفتّح الناظر
حتى تريده ينسه النوم .الخدر ال النبي ايساهر
ابهوسة بدو اتلوليله
حي بالكافل العيله
اتغطيه ابعباة ام عون . تتنفس خدر ريته
……………………………………………………………
اتصور تعتبر عدها . إساءه وچلمه مو حلوه
منعاً باتاً لحسين . تنطق چلمة الخوه
الا بحاله وحده هناك . من ظهر المهر تهوه
اتگله اعليه خويه حسين . لحّك يابو المروّه
اخوك ولچن ايمامك
بيه انقبل اسلامك
احنه و البشر خطار . و الكون اعتبر بيته
……………………………………………………………
اتگله ولو گعدت احذاه . راسك يوصل اركبّك
مو بعيونك اتصد ليه . شوف حسينك ابگلبك
اشما صغّرت نفسك ليه . ايكبرك كالشمس ربك
خادم يعني انت ابخيت . هاگد ربك ايحبك
جبريل الوحي العالِم
لحسينك صبح خادم
الكعبه والقدس معشار . ما وصلن القدسيته
……………………………………………………………
لو ملك النبي اسليمان . عرش بلقيس الك زينه
وي حسين ما يسواش . هدب الي ابرمش عينه
لو كل العراق يصير . ملكك ويه نهرينه
ولله ولا يعادل خيط . من اعباية اسكينه
لو صار الجبل فضه
بحر امن الذهب عرضه
لتقارنهن ابجسام . ولا بذيال چفيته
……………………………………………………………
زاد اعله امه ابوفاضل . طين و زوّداه بِله
اجروحه احسبهن اخفيفات.اجفوف وفوگهن خله
عمود الراس سهم العين . هذا الامر ما همّله
شوفة ولد لمّه اتموت .جوده اعل الارض صدله
بعيونه الظهر ظلمه
بدمعه ويعتذر لمّه
لا وصليت عبدالله . ولا بالعذب روّيته
……………………………………………………………
✍️ ( سيد خضر الزاملي )
/channel/tajalzahraa1
وين ابن حذلم بِشِر هالليله وين
ايروح للعبــــاس ينعه ام البنين
ـــــــــــــــــــــــــــــــــــــــــــــــــ
بشر وينه يگصد ارض الغاضريه
يخبر العباس عن هـــــاي الرزيه
ايگله امك رادتك وكــــت المنيه
غدت تنشد بلچي للــعباس جيه
بالنوايح والمدامـــــــــع والانين
ايروح للعبــــاس ينعه ام البنين
ـــــــــــــــــــــــــــــــــــــــــــــــــ
رادت الاولاد تمشــــــي بالجنازه
والولِد وكت الدفــن عازتها عازه
هـــــاي أم الكافل وبيش اتّجازه
هـاي بيهه الكلب يندب لو توازه
عالولـد حگ الربه وتعب السنين
ايروح للعبــــاس ينعه ام البنين
ـــــــــــــــــــــــــــــــــــــــــــــــــ
وين ناعي حسين بطراف المدينه
خل يصــل للمشرعه بجمرة ونينه
يخبر العباس راحــــــت هالحنينه
خل يجيها بس يشيل اسهام عينه
الچان امس ینعه یساره واليمين
ايروح للعبـــــاس ينعه ام البنين
ـــــــــــــــــــــــــــــــــــــــــــــــــ
ماتت ودمعــــــاتها ترست جِفنها
الاربعه اتمنت يحضـرون ابدفنها
هذا اليسد عينها ويشــــد چفنها
وذاك الايــون المصيبتها وحزنها
وين ناعي الحزن يلطم عالجبين
ايروح للعبـــــاس ينعه ام البنين
ـــــــــــــــــــــــــــــــــــــــــــــــــ
ايروح لحسين ويخبره عالمصيبه
ايگله ام الاربعه مـــــــاتت غريبه
الهــــا حگ اعليك تدريها النجيبه
من غبت دلاَّلهه مـــــــاكف نحيبه
من يروح ايخبر حسين الحنين
ايروح للعبــــاس ينعه ام البنين
ـــــــــــــــــــــــــــــــــــــــــــــــــ
التنعه لجل مصيبتك لاخر عمرها
كونك اتهيل التراب اعـــله گبرها
الفاتحه تقـــراهه واتنوح ابكترها
فــاجده وماأنصف اوياهه دهرها
خلي ياخذ موكب ویمشي حزين
ايروح للعبــــاس ينعـه ام البنين
ـــــــــــــــــــــــــــــــــــــــــــــــــ
حيدر بشار الدراجي
/channel/tajalzahraa1
نزلة لمولاتي ام الاقمار ام البنين "ع"
دخيلج يالخدمتي بغيره واحساس
دخيلج يم بخت يارافعه الراس
على النيات الله ينطي عبده
على حب زينب الله انطاج عباس
-
يمالج كُفؤٌ يصير إلّا حيدر
غيرج يا مره لعباس تكدر
ام الوفاء .. ام البنين
ام الوفاء .. ام البنين
___
يقاموس الوفاء بحب الحسين
يالمخلفه زلم بالحومه رزنين
اذا غاروا سويه يعله الصياح
يجيش اقروا الحمد ع الروح مرتين
-
يالمخلفه زلم تاريخ الرجال
فرّو كربله فرة المحچال
ام الوفاء .. ام البنين
ام الوفاء .. ام البنين
___
خِدَمتي بنيه صدقت فوك الهواي
وحبيتي الحسين بگلب وبراي
اذا يعطش تجينه وماي ع الراس
لذلك ربنه خلاج ام ابو الماي
-
كلشي يم خدمتج صفر معدود
ام الجود انتي وام ابو الجود
ام الوفاء .. ام البنين
ام الوفاء .. ام البنين
___
خدمتج باقيه والاثر موجود
ومن احجي لكلامي كون اكو شهود
نروح لكربله نشوف المشاهد
كل واحد بصفحه انشوف الزنود
-
بنتك ياحُزام مخلفه الحزام
لظهر حسين لو دارت الايام
ام الوفاء .. ام البنين
ام الوفاء .. ام البنين
___
كلمات
الخادم حسن الكريماوي ✍🏻
/channel/tajalzahraa1
اويلاه يم الگمر اويلاه يم الگمر
***
ايام عمرݘ خلصت اويلاه يم الگمر
وروحݘ الباريها ارجعت اويلاه يم الگمر
والخلگ محزونه بقت اويلاه يم الگمر
بثوب السواد اتوشحت اويلاه يم الگمر
وشيعتج ياحره بݘت اويلاه يم الگمر
ودموعها عالخد جرت اويلاه يم الگمر
والدمع مثل الدم حمر اويلاه يم الگمر اويلاه يم الگمر
***
حصلتي احسن منزله اويلاه يم الگمر
بخدمتݘ لسياد المله اويلاه يم الگمر
صيتݘ يبدويه عله اويلاه يم الگمر
بحبݘ لبن عقد الوله اويلاه يم الگمر
حسين الذبيح بكربله اويلاه يم الگمر
الضحيتي كل ولدݘ اله اويلاه يم الگمر
الوگعوا على شاطي النهر اويلاه يم الگمر اويلاه يم الگمر
***
مرضعݘ طيب مرضعه اويلاه يم الگمر
يم البنين الاربعه اويلاه يم الگمر
انوارݘ علينه ساطعه اويلاه يم الگمر
شانݘ الخالق رافعه اويلاه يم الگمر
عالوفه دوم مربعه اويلاه يم الگمر
والوفه انتي منبعه اويلاه يم الگمر
معروفه عد كل البشر اويلاه يم الگمر اويلاه يم الگمر
***
بنفسݘ يمولاتي امل اويلاه يم الگمر
تمنيتي ولدݘ بالاجل اويلاه يم الگمر
يحضرون يمج بالعجل اويلاه يم الگمر
وعينݘ تدور الهم تظل اويلاه يم الگمر
يلفولݘ اولاد الفحل اويلاه يم الگمر
وكت المنيه اوي الاهل اويلاه يم الگمر
لكن ولا واحد حضر اويلاه يم الگمر اويلاه يم الگمر
***
انتي مره ونعم المره اويلاه يم الگمر
اختارج الباري الحيدره اويلاه يم الگمر
تبقين تاج ومفخره اويلاه يم الگمر
والدة سبع الگنطره اويلاه يم الگمر
وهالاسم هذا شمكبره اويلاه يم الگمر
للفاهم احݘي ياورى اويلاه يم الگمر
اصحاب البصيره والبصر اويلاه يم الگمر
***
ياحرم حماي الحمه اويلاه يم الگمر
لحسين صرتي خادمه اويلاه يم الگمر
للوفه صوره راسمه اويلاه يم الگمر
واسيتي امه فاطمه اويلاه يم الگمر
الوالاݘ نال الغانمه اويلاه يم الگمر
يشفعله رب المرحمه اويلاه يم الگمر
ونشوفه بالجنه ظفر اويلاه يم الگمر اويلاه يم الگمر
***
خادم اهل البيت / ابومحمد العاشور (07810010732)
/channel/tajalzahraa1
نخوة توسل بالسيدة أم البنين طلب شفاء مريض
يام البنين جينا عنّايه
نقسم عليچ ابصاحب الرايه
نقسم عليچ جاه ابو فاضل
ساقي العطاشه الوافي الكافل
منچ نريد هالطلب عاجل
طقينا بابچ وانتي عطايه
يام الكفيل جينا وانريدچ
تعطينا حاجه اوحرمة اوليدچ
عدنا عليل والدوا بيدچ
يارحمة الله اوعندچ الغايه
جينا نصيح والقلب ذايب
يا قبلة الله اورحمة الواهب
هذا العليل مايرد خايب
من كرم چفچ وانتي وفايه
طقينا بابچ وانتي معروفه
المشلول يجي لچ ينهض انشوفه
ابجاه الكفيل القطعوا اچفوفه
جيناچ يام القمر شكّايا
ندخل عليچ ابقطعة ازنوده
والرايه يام الأربعه اوجوده
حني على اللي چبده ممروده
ويصيح منچ أطلب ادوايه
ابجاه ابو فاضل وابسهم عينه
جينا نطلبچ لا تخيبينا
هذا العليل ابعجل داوينه
يام البنين انصيح نَخَّايَه
رَبِّ اشْرَحْ لِي صَدْرِي وَيَسِّرْ لِي أَمْرِي وَاحْلُلْ عُقْدَةً مِّن لِّسَانِي يَفْقَهُوا قَوْلِي
السيد موسى الأحسائي
اللهم بحق أم الكرم والجود أم البنين صلوات ربي وسلامه عليها من على أبي السيد محمد ولد السيد ناصر بالشفاء العاجل وألبسه ثوب الصحة والعافية
/channel/tajalzahraa1
#إلى_روح_السعيد_الشهيد_علي_صبّاح
#اطوار_مختلفة
#يوم_الحادي_عشر
راح امشي بلا حيلي ولا قوه ولا الخوه
تضل طايح يبو الأكبر الشمر ما تدري شالسوى !!
دفعني بالرمح وانا .. عمري تجاوز الخمسين
من صغري وهمومي اهواي .. ودمعتي حفرت الخدين
ما خلوني يمّ جسمك .. ضربوني على المتنين
لون بيدي أفيلك .. وظلّل جِثتك يا حسين
شلون أروي بعد مقّدر .. ما ظل بالعمر سلوه
إسمع شامت يقلي .. أخُوتك وين يبت زهره
واحد منقطع راسه .. وريح الهاب دخل نحره
وكافل عالنهر طايح .. قطعنا ايمينه واليسرى
وعريس الطف خضابه الدم .. ولاكبر انذبح عمره
شلون اروي بعد مقدر .. عدونا بحالنه اشسوّه
جابوا النوق نادوني .. ودليلي فتّته المنظر
ودلالي الكان تِمنيته .. يرد بيّه لزمن حِيدر
أميرة وما لَمْحْ واحد .. طولي .شلون ما أقدر
أطلع عالهزل يا حسين .. وحبل برقبتي أثر
شلون أروي بعد مقدر .. يجرني الشّامت ابقوّه
🖊خادمة أبي الفضل
/channel/tajalzahraa1
#وفاة_السيدة_أم_البنين ع
#طور_مستهل_ساعة_اوداع الزكية
# أمنية أم البنين ع عند ال إحتضار
حلم عندي ومُنِيتي .. يجي المذبوح
حانت اللّيلة مَنِيتي .. ابونّه وي نوح
طوله والمنحر اشوف
وانظر لضرب السّيوف
١_عمري قَضيته بمناحه ... وانظر ايعود .. وانظر ايعود
بفرقِته ما عندي راحه ... ودربي مسدود .. ودربي مسدود
دمعي من عيني ذَروف
وانظر لضرب السّيوف
٢_خِلصت ايامي برزيّه ... ذبحوا حسين .. ذبحوا حسين
واعلى صدره الأعوجيّه ... اشعملِة البين .. اشعملِة البين
صاير بصدره خسوف
وانظر لضرب السيوف
٣_موتي من يوم الإجاني ... النّاعي ينعى .. النّاعي ينعى
بصِيحته اِتهدم كياني ... ولادي صرعي .. ولادي صرعى
بعيني شِفته هالطفوف
وانظر لضرب السيوف
٤_والدة آنه ابوفاتي ... رِدِت إبني .. رِدِت إبني
يمسح بكفّه عَبرتي ... آيحزني .. آيحزني
أدري معذور الظّروف
وانظر لضرب السّيوف
٥_طَيرة مذبوحه بفقِدهم .. راحو اعزاز .. راحو اعزار
جعفر وعون وقمرهم .. يجوني جنّاز .. يجوني جنّاز
اوياهم حسيني العطوف
وانظر لضرب السيوف
🖊خادمة أبي الفضل
/channel/tajalzahraa1
أبيات نعي للسيده ام البنين ع
____
چني وسط المگبره والدنيا غيمه
آه يحسين ومصابه اشگد هضيمه
حسره بعيوني الليالي كلها هيمه
هاي زينب حايره محترگه خيمه
خاف هاشم باليسر ناسينهه
●●●●●●●●●●●●●●●●●●●●●●
ظلمه صارت يمه بعيوني الليالي
ماريد البيت عگب حسين خالي
گاعده ومساهره ابدمعي الجرالي
حتى لو بالطيف بس يلفيني غالي
اجروح صارت دمعتي بتوطينهه
●●●●●●●●●●●●●●●●●●●●●●
يعينهه الله الوالده الفگدت شباب
حيره ابدموع الهجر دلالي ذاب
وانه اناطر طارش الجايب جواب
وانه خوفي حسين نايم عالتراب
وين هاشم ما لفلتك وينهه
***
گلبي ينطر الكافل...........بناياي
بنيت من الهجر حزني......بناياي
راحو اربعه بالطف..........بناياي
لبو سجاد هاي اجمل هديه
●●●●●●●●●●●●●●●●●●●●●●
يوسف الفتلاوي
/channel/tajalzahraa1
عباس وينه اوين الحسين
ماشـــيعو نعش ام البنين
وين اليحضرون الشدد دوم
وين الذكرهم يجلي الهموم
ام البنين اتحشــــــــم اليوم
رادتهم يغمضــــــولها العين
ـ-------ـ
باخــــر نفس وتريد العـــــزاز
اليــوم النعشها اتريد جــــناز
دوم المحب لحبــــــابه يحتاز
صعبه اذا عنه بعيـــــــــــدين
ـ---------ـ
جمر الغياب اهـــــواي حراگ
خلص عمـــرها افراگ بفراگ
كل لحظه للعبــــــاس تشتاگ
وبحســين شيب راسها البين
ـ--------ـ
خلصت كل اسنــــــينها ابنوح
مــن الطفوف امترسه اجروح
جم غالي عدها المات مذبوح
يالوعة امصـــــاب الميـــــامين
ـ--------ـ
اتمنــــــت ولدها لعنها غيـاب
بيـــــــــــديهم ايهيلون التراب
كلهم سـوه اينصبولها امصاب
يونون يم الحد صــــــــــــوبين
ـ--------ـ
✍الخادم
كامل السعيدي
/channel/tajalzahraa1
فزاعيه لأم البنين عليها السلام
👇👇👇المستهل
اجيت اباب بيتج يم الأولاد
كالولي طبيبه اوعندج امراد
💎💎💎💎💎💎💎💎
وانتي لليجي تنطين بيده
والياخذ دوه منج يفيده
شفاعه من هلج هليوم اريده
بس يطلب تطينه امراده
💎💎💎💎💎💎💎💎
آ يم النطايه اوايدج التكرم
يم عباس لبنج انه اريد الطم
وتحزم وريد انصبله الماتم
لمصابه انون نقره اقرايه
💎💎💎💎💎💎💎💎
يستاهل انوح اعليه ودك صدري
واكعد بالعزه ويصب عليه دمعي
وريد ابطلبتي تشفيلي كل وجعي
من كرمج هذا اتسوينه
💎💎💎💎💎💎💎💎
مانطلب بعد من غيرج انكلج
وحنه اروح كنه فدوه لوليدج
كرامه امن الكريم انطاج لحبابج
وليطلب انتي اتكرمينه
💎💎💎💎💎💎💎💎
نتمنه نطب للطم يم عباس
وصيرا خادمه ولطم انا ويالناس
للخله الضحايه بخيلهم تنداس
وتحزم ولطم للهيبه
💎💎💎💎💎💎💎💎
بالله ياطبيبه نظري الحالي
اجيتج معتني ونفطر دلالي
اريدلي كرامه اوربج العالي
اتكرميني وجرج يم الله
💎💎💎💎💎💎💎💎
تمت بعون الله تعالى
بقلم الشاعره أم تحسين البصره
غير مبري الذمه اليحذف اسم الشاعره وينسب الكلام له
اهدي ثواب القصيده الى روح الشاعره ام تحسين
/channel/tajalzahraa1
مقدمة ليلة ام البنين ع
.
.
.
جـزى الله ام البــنين .. خير جزاء المحسنين
***
مراءه صح بس فاقت احدود النساء
مراءه لكــن صــفنـــت اهــل العـطاء
قــدمت كـــل ماتـمـــلكــه الكـــربلاء
شخصية قديره ام بــدر العشيره
هيبتنه وقـدوتنه وخيمــتنه الجبيره
علمتنه عالحنين
جـــزى الله ام البـنين .. خير جزاء المحسنين
***
علي مــن كلــف يــدورله عقــيل
مراءه بس رايــدها ما الـها مثيل
الهدف حتى تخلف الزينب كفيل
عــباس البـساله قـران الكــفــاله
معرفته وسالفته خدر اخته وجلاله
الخدر گالت يبني دين
جـزى الله ام البنــين .. خير جزاء المحسنين
***
شكــراً الأم البنـــيـن بأخــتصار
علمتــنه اليـحـترگ بـالانتـــظار
لايمل لوطفت ناره وخفت صار
لتـهزه العـواصف ولتغيره المواقف
من يگعد كون ايصــد ويـرد المخالف
جيل صنعت متقين
جزى الله ام البـــنين .. خير جزاء المحسنين
***
علمتنه اليمشي صح يبقه صحيح
اليخدم حـسين وعــله لا مايطيح
ما يطــيح الصــار خــادم للـذبـيح
الذاب بحب امامه يكــبر احــترامه
مايــزغر بــل يكــبر بالمــحشر مـقامه
وبـنهــجها سائــرين
جــى الله ام البــنيــن .. خير جزاء المحسنين
***
اليخدم ورايد يدور عالجـزاء
خلي يــتذكر ام اربــع شهداء
للحسين انطتهم وكالت فداء
الينطي بلايه مــنه ترضه الزهره عنه
مــشروعه ودموعه وموضــوعه تتــبنه
نندعي في كل حين
جــزى الله ام البنيــن .. خير جزاء المحسنين
***
حيدر تركي الكربلائي
/channel/tajalzahraa1
اتمنيتي كبرج يم الابنين
ينبني وتزورة الملايين
بس الله جازاج اكثر اهواي
عوضج مو حضره حضرتين
حضرةالكافل حضرة حسين
..........؛؛
مابينه واحد يدخل ايزور ..لحسين والعباس اخيه
بعده اعله باب الحضره ويصيح ... الف السلام اعله الوفيه
وابلا شعور ولا وعي نرفع ادينه
انسلم عليج الحضرتج نحسب اجينه
مو بالمدينه مرقدج مو بالمدينه
بكلب اليحب حسين واعليه تبجي عينه
يالجنتي لجل حسين تبجين
عطشان راح اوليدي تحجين
جم غصه شلتي بشربت الماي
لحسين عشتي ومتي لحسين
......
اكتاب الزيارة ما يفارك ... صحن الحسين وابو فاضل
تتلاكفه اجفوف اليزورون ... ابلايه استراحه ابلا فاصل
ليل ونهار احبابج اتأدي الزياره
يم الحسين اسمج ربح واعظم تجاره
باجر ضريحج ينبي وتعله المناره
ومن كربله تطلع مشي ليج الغياره
باجر الج مو كبه كبتين
تنبني وتزورج ملايين
وأربع مناير تبهر الجاي
كلهن ذهب بسم الميامين
.........
للناس باب الحاجه انتي .... خصصج ربنه ابهل كرامه
كلمن يندبج عنده حاجه ... تنقضي حاجاته ابسلامه
جم واحد ابواحد اخذ حاجاته منج
سر الاجابه الحمد تقره انيابه عنج
اخت ام الحسين وحسن والله جنج
طيبتج طيبت فاطمه اونتهه ونج
كلش عظيمه يم الابنين
مو نعمه وحده انتي نعمتين
ما يبقى يمج تايه الراي
باب الحوائج للمحبين
.....
يل جنديتي الخدمة حسين ... اربع بنينج وانتي خامس
مايوم قصرتي بخدمته ... جبتيهه واهس على واهس
خَّدامه كلتيهه ابفرح لبن الزجية
وعلمتي عباسج على اطباع الوفية
وما رجف جفنج على اولادج يل أبية
لحسين جانت دمعتج صبح ومسيه
خلصت حياتج دمعة بالعين
ما فرحه شفتي بعد الحسين
رد ساعه كحًّل بيهه عيناي
عاشت اوياج الاخر الاسنين
.......
مثلج مره يا أم الاطهار ... ابهذا الزمن هيهات نلكَه
بالمرتبه بعد ام الحسين ... حكه اليفاخر بيج حكَه
يا كبره حضج الله خصج بالكرامه
زوجه العلي خلاج وام لأعظم يتامه
اسمج يجي بعد ام حسن يوم القيامه
اربع نساء العالم وانتي الختامه
هنيالج وصارالج اسمين
ام ابو فاضل وام الحسين
يامره مثلج حصلَّت هاي
هاي الكرامه للمضحين
.......
كلمات
موسى الخادم
/channel/tajalzahraa1
ننخاج ... ننخاج ... يم البنين الطاهره
بحماج ... بحماج ... بحماج دنيه واخره
.....
اليوم اجينه المجلسج يم الوفه
نطلب الحاجات منج والشفه
لاتردينه عليج المنذبح
النحره حزوه ال اميه من كفه
نلكاج ... نلكاج ... كل شده يمنه حاضره
......
سفرتج سفرت شفاء الكل علل
بيهه جم واحد مشه بعد الشلل
ما يهمنه اليشكل اعلينه وحجه
بيج ثابت معتقدنه شما حصل
نهواج ... نهواج .... شاهدنه سبع الكنطره
.....
انتي باب الله الوسيعه الماترد
الحاجه يمج تنقضي بسورة حمد
جفوف كل سائل توزنيهه بذهب
للكرم انت الأصل يم الولد
شفناج .... شفناج ... اصل الكرم والمفخره
........
للكرم عنوان انتي مسجله
والشهود اهواي تحجي بكربله
عزبيتي اولادج الخامس اخو
وكلتي فدوه اولادي لحسين وهله
معناج ... معناج ... رب الجلاله ايفسره
......
ما يخيب الصار الج خادم صدك
وكلبه دوم اعله الشعائر محترك
ربح دنيه واخره اوياج الخدم
وخسر ذاك العن طريقج مفترك
وياج ... وياج ... كل الخدم مستبشرة
......
الج مرفوعه الايادي فاطمه
ابجاهج انحصلهه حُسن الخاتمه
الله ميردلج دعاء ابكل وكت
دعوتج توصل مباشر للسمه
علَّاج ... علَّاج ... علَّاج ربنه بمحضره
......
كلمات
موسى الخادم
/channel/tajalzahraa1