7626
خدمة الزهراء والحسين (عليهما السلام) للعزاء قناة متميزة منوًهة بخبرة عالية تعتمد على أساس دراسي وتطبيقي من قبل خطباء متميزين وأكبر الشعراء والرواديد
نعي بحق السيدة خديجة عليها السلام عن الزهراء عليها السلام وهي تنضر الى امها وهي تحتضر كأني بها تقول
شلون بية.. شلون بية اديها امددة واشلون بية
وداع المنية.. وداع المنية.. ييمة امودعة وداع المنية
افرك بدية.. افرك بدية .. اوننلچ وسف وافرك بدية
يصعب علية.. يصعب علية.. يفگد الوالدة يصعب علية
======================
امددة هاي..امددة هاي.. يهاي ام المحنة امددة هاي
يبچي اعله مبچاي.. يبچي اعله مبچاي ابوي المصطفى يبچي اعله مبچاي
يتگابل وياي..يتگابل وياي..على امي من اون يتگابل وياي
يا يمة دنياي..يا يمة دنياي..مظلمة وموحشة يا يمة دنياي
======================
يا نعش الحنينة..يا نعش الحنينة..جفاني وشال يا نعش الحنينة
موحش علينة.. موحش علينة.. ييمة البيت ظل موحش علينة
رحتي من ادينة.. رحتي من ادينة..يشمعت بيتنة رحتي من ادينة
اشگد بچينة.. اشگد بچينة.. بوداعچ ييمة اشگد بچينة
======================
ما شافت النوم.. ما شافت النوم.. يعيني ابفرگتچ ما شافت النوم
اشتم بالهدوم.. اشتم بالهدوم.. شما گلبي يحن اشتم بالهدوم
شما لايم ايلوم...شما لايم ايلوم.. ما ابطل البچي شما لايم ايلوم
ما منچ علوم.. ما منچ علوم.. يالحدر الترب ما منچ علوم
======================
اسالكم الدعاء رائد الاسدي
لوفاة ام المؤمنين خديجة بنت خويلد زوجة النبي محمد صلى الله عليه وآله وسلم (موشح)
ياخديجه ام الوفة وياعالمه
غيابچ امأذي الرسول وفاطمه
★★★★★
ياربيع الخير يانبع الوفه.
بالحنان امليتي دار المصطفى
زهره فواحه بمحنه وعاطفه
تستحي من جودچ غيوم السمه
★★★★★
مو وكتها جفنچ.الليله غفه
عام يكسر گلب ابوالزهره لفه
باللحد يم الوفه نورچ صفه
نورچ الزاح الليالي المظلمه
★★★★★
ياهو مثلج منزله بهاذي وصل
هذا جبرائيل يم دارچ نزل
الچ يلحره سلام الله حمل
الچ من الله السلام ايقدمه
★★★★★
دوم لزمة ظهر ساعات الشدد
وي النبي بكل معضله عون وسند
مانظر مثلج ولامثلچ وجد
حگ تسيل دموعه بفراگچ دمه
★★★★★
وي طه ابروح وإحساس وفكر
وقدميتي المال ساعات العسر
شلون ماگلبه يذوب وينكسر
ساعة افراگچ عظيمه ومؤلمه
★★★★★
شلون مايبچي بدمع مثل المطر
ودم يهل من ناظره سيد البشر
يلتركتي اجمل فعل واطيب أثر
وموت لجل الدين اعظم خاتمه
★★★★★
كل كتر بالدار لأنوارچ يحن
فاطمة وجبريل والهادي يون
يوم فاضت روحچ بعام الحزن
گلوب احبابچ حزينه اميتمه
الشاعر حسن لعيبي الحريشاوي
قصيدة في شهادة الإمام أمير المؤمنين عليه السلام ، لسان حال إبنته العقيلة زينب ع ،،،،
ـــــــــــــــــــــــــــــــــــــــــــــــــــــــــــــــ
ٱوياك إخذني من تروح
گلبي ما يِحمل جروح
بويه حيدر بويه حيدر
ـــــــــــــــــــــــــــــــــــــــــــــــــــــــــــــــ
يالنّويت ٱتسافر وتِبعد عَلَيّة
لَسّا جَرحي يِدّي بفراگ الزچية
إلهَا أحِن وظَلّت ٱدموعي جِريّة
شِنهو نِيتَك گِلّي يا حامي الحَميّة
لا تِكرّر مِحنِتي
لا تِسَبّب لَوعِتي
بويه حيدر بويه حيدر
ـــــــــــــــــــــــــــــــــــــــــــــــــــــــــــــــ
آنه زينب يابو زينب يالعِفتني
لِلمآسي ولِلمُصايب سَلّمِتني
ذكرياتي بالمَواجِع حاوطتني
والدموع بلايَه رحمة هاجِمَتني
يَتّمِتني بروحِتَك
وأيّسِت مِن رَجعِتَك
بويه حيدر بويه حيدر
ـــــــــــــــــــــــــــــــــــــــــــــــــــــــــــــــ
مِن عگب عينك يَبويه ٱشتَد ظَلامي
طيوفي سودة وما شِفِت راحة بمَنامِي
لشوفتك يا بو المَحنة گليبي ظامي
وَيّه نَسمات الصبح أبعث سلامي
غَيّرَتني دِنيتي
عَذّبتني حَسرِتي
بويه حيدر بويه حيدر
ـــــــــــــــــــــــــــــــــــــــــــــــــــــــــــــــ
شعِنده ٱبن مُلجَم طُبَر رَاسَك يَوالي ؟
وِنتَه كِسرَت سَجدِتَك جِنحِ الليالي
غادَرِت بَس صورتك دوم ٱعلَبالي
بويه رَيتَك حاضِر وتِنظُر لَحالي
جَرّح ٱجفوني الدّمع
مِنحِني ٱعليك الضلِع
بويه حيدر بويه حيدر
ـــــــــــــــــــــــــــــــــــــــــــــــــــــــــــــــ
موحِشة وما تِنچهِب يا بويه دارَك
يِنعَى مِحرابَك يَحَيدر وَي فَقارَك
ما يِخِيب المِستِجير اللّي ٱستَجارَك
يا علي وبطَبرِتَك صَار ٱنتصارَك
يا هو مِثلك بالقَدُر
وهُوّه ساجد يِنطُبُر
بويه حيدر بويه حيدر
ـــــــــــــــــــــــــــــــــــــــــــــــــــــــــــــــ
الليلة هالكون ٱنفِجَع ناحَت نُجومَه
والدّمع فوگ الوَجِن مُطرَت غُيومَه
والحِزِن أعلَن على الوادم هُجومَه
لو نِزَف دَمّ الصّبُر لا لا تِلومَه
يا وَريثِ المصطفى
يا مَدينَة مَعرِفَة
بويه حيدر بويه حيدر
ـــــــــــــــــــــــــــــــــــــــــــــــــــــــــــــــ
بقلم الأستاذ / ستار عذاب الحچامي
يالخذت روحي ومشيت بويه وينك ما اجيت
تعال روحي ولهانه عليك
تعال رايده اغفى بين اديك
يا علي بويه
..............................................
يا ضحكة شفايف طيف من اتمر على الفقره
بعدني اشتاكلك والعين بويه وداعتك حمره
مر بيه ولو لحضات وشوف اشسوت الذكره
يمكن لو شفتني ايجوز ماتعرفني انه الحره
بويه مو بس راسي شيب وجهي شكله هم غريب
تعال وانه اوكفلك واجيك
تعال رايده اغفى بين اديك
ياعلي بويه
............................................................
يا كلشي بحياتي وياك كون وياك ماخذني
يا نسمة هوه امن اشتاك وين الكاك عايفني
محتاجه الحنانك حيل بويه الشوك ذابحني
كمت اتفكد الحيطان بلجن صوره تشبكني
أمن الدمع بويه عميت. أمشي محنيه بقيت
تعال وانه بعيوني اشتريك
تعال رايده اغفى بين اديك
ياعلي بويه
.......................................................
كل طفله امن ابوها تريد نضرة شوك ملهوفه
حتى من تحس بالخوف تركض تحضن اجفوفه
وينك يا علي بجفاك زينب طبت الكوفه
مجتوفه بحبل ياحيف لبن زياد مجتوفه
يالخذت كولشي بجفاك مانمت ليلي وراك
تعال زينب وتتنخى بيك
تعال رايده اغفى بين اديك
ياعلي بويه
................................................
من طبع اليروح يعود مهما طوًل اغيابه
وتستبشر هله بالخير ويجبر خاطر احبابه
حاجيني ولو لحضــــات تذبح فركة اليابه
تدري البيت من تروح ماواحــد يدك بابه
اليتامه من تروح اعيونها تمطر جروح
تعال كولشي مشتاك الحجيك
تعال رايده اغفى بين اديك
يا علي بويه
..........................................................
مشتاكه وعلي مشتاكه ترجع ذيجي لمتنــــــــه
شحلاها من نجي بحضنك يوجه العافيه العدنه
محرابك يفيض الدم غسلنــــــــــــاه ابمدامعنه
يمن كون الطبر هامك طابر بويــــــه هامتنه
يالعليك اتعلميت امن البجي بويه عميت
تعال كون بيه الصار بيك
تعال رايده اغفه بين اديك
ياعلي بويه
.......................................................
خادم خدمة الحسين
الشاعر
محمد الموالي
نعي لوفاة أم المؤمنين خديجة سلام الله عليها
أتهد الحيل فرگاهم الغالين
الوكت وفراگهم بلگلب رمحين
راحة بال بعد الراحوا أمنين
على فراگ اليهدم الحيل ناوين
يلچمات النبي لاوحده وأثنين
للهادي حملها. وجابها البين
يدهر الماعرف يمتاز ويلين
اخذ من داره الاحباب الميامين
بفگد ام الزچيه النار نارين
يلگه الراحه بعد ام الوفه وين
جروح البلگلب خلت نياشين
وعاونها الدمع يجرح الخدين
يكتر العافيه وشم الرياحين
ولاعلبال عنه غفل ترحين
خلافچ ذبل عمره الجزه الخمسين
ياشمعة البيت وياضوه العين
ياثار اليطلبه الوكت يادين
شكثر مهظوم جد الحسن وحسين
الشاعر حسن لعيبي الحريشاوي
هالليله الـوحي يصيح
ركن دين الهدى يطيح
علي دمه نزف بالمسجد وسال
'''''''''''''''''''''
شد حزمه ومشه وبكلبه جاري الهم
وعلى عيونه الدمـــع حافر بئر زمزم
يحسـّــــب للفقير خـــــلافه يـتيتم
عله صـــــوت الاذان وحـــيدر اتألم
مشه وبكلبه جرحين
الفقره وام الـحسين
جرح گلبه يهدم حته الجبال
علي دمه نزف بالمسجد وسال
''''''''''''''''''''
ركن الدين طاح ابوسط محرابه
وغابت كــــــل معاني العلم بصوابه
وحًـــي الله ندب بس يهضم جوابه
علـــــي نگع تراب المسجد اخضابه
جابـــــــوله اللبن كوم
وحيدر جرحه مسموم
من السم يـروح يمين وشمال
علي دمه نزف بالمسجد وسال
''''''''''''''''''''''
من شال الوصي غاب الابو المملوح
بداره الروح طلعت وشيرجع الروح
احتارو بالحزن مايشفي ضل النوح
واليفگد ابوه يكضي العمر مجروح
ابابه الــــــوادم اتنوح
ابونه شخيره مطروح
اليتيم انكسر ضهره مثل الهلال
علـــي دمه نزف بالمسجد وسال
'''''''''''''''''''''''
هنياله اليطيح ابموضع السجده
واملاك السمه الزتاتوته حد لحده
عدل ميت الناس اتجمعت عنده
وبين ادم ونوح الجثه متوسده
مــــــــــن بيته للگبور
انترس درب النجف نور
مات وبعده جفه تخضر افضال
علي دمه نزف بالمسجد وسال
''''''''''''''''''''''
خادم القصيده
عزيز المياحي
ابوذيات لوفاة خديجة ام المؤمنين رضوان الله عليها
وي طه بدت من غار حره
خديجة المايهزها الصعب حره
احملت برد الوكت واحملت حره
سند للمصطفى اليوم المنيه
★★★★★
خديجة الجود معناها وصلها
أبد متريد بالدنيا وصلها
حسافه الموت المحتم. وصلها
كسر گلب النبي وگلب الزچيه
★★★★★
أئمر يادهر بالكيف ونها
ام الغانمه والطيب ونها
الزچيه مابطل للموت ونها
على امها اتنوح كل صبح ومسيه
الشاعر حسن لعيبي الحريشاوي
لوفاة ام المؤمنين خديجة
بنت خويلد سلام الله عليها
دمع جمرات الحزن نجريها
لسلوة الزهرة ونظر واليها
★★★★★
هاي ام القاسم بيوم الشدد
للنبي بكل معضله عون وسند
ينوح طه لشمل مايرجع بعد
عَرجَّت روح الوفه الباربها
★★★★★
چم ذنب شالت الدنيا چم ذنب
اتفرق بغفله المحب على المحب
شمعة البيت بدياجر تنحجب
ايهدم گلوب الاهل ناعيها
★★★★★
ونت المجروح تكتل من يون
من يون بحرگه علراح ويحن
يساعد الله المصطفى بعام الحزن
روحه تتحمل حزن مابيها
★★★★★
طلعت من الدنيا تنعاها السمه
الدخلت الاسلام اول مسلمه
مؤمنه ماتت خديجه وعالمه
الزمن يخشع لوسمع طاريها
★★★★★
المحبه اتفرعت وانتي الأصل
مثل امچ فاطمة قول وفعل
دموعنه لمچ چمر ضلت تهل
عندچ دموع الحزن سجليها
★★★★★
ماتت ام الخير ورباة الكرم
الدافعت عن المعارف والقيم
الحاربت گوم الضلاله والصنم
فاطمة بهلفاجعه انعزيها
الشاعر حسن لعيبي الحريشاوي
في ذكرى وفاة السيدة خديجة (ع)
على لسان ابنتها السيدة الزهراء (ع)
ظلمه بعد عينچ صفت حياتي
و الشوفتچ عطشانه يا فراتي
ابغيابچ هالعمُر
جنازه ابلا گبُر
خديجه
&&&&&
مختنگ بيه الهوه .. جرحي هسه ابلا دُوه
ليش أحچي يا ضُوه .. او ما تردِّين
جيتچ ابوجهي الدمع .. فرگتچ كسرةْ ضلع
گلبي يُمه المنفجع .. ضج بالونين
من غيبتچ .. يا أم الوفه .. دلالي انمُرد
ظلمه صفت .. كل دنيتي .. يا وجه السَّعَد
إنتي السند .. او هسه صرت .. وحدي ابلا سند
سافرتي عني يُمه و النتيجه
بنتچ يتيمه تبچي يا خديجه
صُبَح حتى الصبُر
جنازه ابلا گبُر
خديجه
&&&&&
بعد عينچ يا سمه .. ضيعه ضاعت فاطمه
الشوفتچ بيَّه ظمه .. وجهچ الماي
عني من رحتي تره .. ابهالليالي حايره
ليش هيه المگبره .. قاسيه اوياي
كلما حرت .. كلما ضعت .. ألگاچ الوطن
هسه الألم .. أتنفسه .. او شمعاتي طُفَن
ابلايه دفو .. ابلايه حضن .. خلاني الزمن
زاد العيونچ يأغلى أم حنيني
يا آنه أجيلچ يُمه يا تجيني
الگلب نار او جمُر
جنازه ابلا گبُر
خديجه
&&&&&
كلشي من حولي غُرُب .. اعيوني بعدچ بس تصُب
اوگلبي يا بعد الگلب .. بين الگبور
اشگد يأذِّينا الهجُر .. اجهنم ايسوِّي العمُر
و آنه بعدچ أنسطُر .. او ضلعي مكسور
أرد أخبرچ .. بعدچ ترى .. بابي يندفع
و اعله الوجه .. وجه النبي .. او تاليها أنصفع
ايسبني العدو .. او متني يطگ .. او صوتي يستمع
خوفي أأذِّيچ او أزيدچ هضمه
لو گتلچ الطاغي عصرني يُمه
ابدليلي چم كسُر
جنازه ابلا گبُر
خديجه
&&&&&
من أصير آنه ابچِفَن .. اهواي يبچي بو الحسن
يُمه و ابهذا الزمن .. حيدر ايحير
ابشهر ألله ينغدُر .. على راسه ينطبُر
او يا وسف عبد الفطر .. مأتم ايصير
او هذا الحسن .. يمشي عكس .. وياه الوكت
ايجرعونه سم .. او چبدته .. يلفظها ابطشت
نعشه ابنبل .. شفته انرمى .. او يوليدي صحت
بين السم او بين الذبح بنينچ
يگضون او ألله يا عسن يعينچ
ذخُر يتبع ذخُر
جنازه ابلا گبُر
خديجه
&&&&&
و الحسين ابكربله .. ايلاگي أنواع البله
ينسحگ صدره او هله .. أسرى يَرْحون
او ينذبح ذاكه الطفل .. و الحسين اعله الرمل
و الحراير عالهزل .. سكته يبچون
ابنا الحقد .. وسفه العده .. ايحرگون الخيم
او صوت الشمر .. يعلى بعد .. شيَّال العلم
و أم الستر .. ابمجلس رجس .. توگف يا ألم
زينب مصيبتها أشد مصيبه
بعد الكفلها امسلّبه او غريبه
العقيله و اليسُر
جنازه ابلا گبُر
خديجه
&&&&&
إبراهيم الدريس
في استشهاد الإمام علي ع 👇👇
ألمن يبوية تروح الأيتام
ألمن يبوية تروح الأيتام
****
بعيني العمه ولا اشوفك اليوم
ما تكَدر من اصوابك تكَوم
راحت تجيني كل الهموم
بسما يبوية عينك تنام
***
خليني اموتن يا علي وياك
يا نفس روحي شلون انساك
خيمة تظل علينه ردناك
وبلايه ابوها الحرمة تنضام
****
للدنيا هذي كون ما جيت
عكَبك يحيدر اظلم البيت
ألمن يبوية بية وصيت
شو كَلبي خايف من الأيام
**
مو حكَه ينعه عليك جبريل
وعين العرش يا حيدر تسيل
ويلي على زينب ويلي يا ويل
يومية حيرة ولوعة وآلام
**
راحت تظل وياي الأحزان
ليل الطفوف اتخيله الآن
لا خيمة عندي ولاكو خوان
مچتوفه اروحن تالي للشام
**
يابوية باجر للطف نروح
چم غالي عندي هناك مذبوح
عليه المصايب راحت تنوح
لمن تشب علينه الخيام
**
يابوية كلي بكربله شلون
محد يظل لهاي الضعون
كل الشماته عليه يحچون
شحال اليروحن وي ظلام
***
حيدر حسين الكرعاوي
لطميه سريعه
__
اويلاه ياحيدره
الراس منهو طبره.
_
الحزن عم الديره.
مضروب راعي الغيره.
ظلت الشيعه بحيره
محزونه دنيه واخره.
جبريل ناده بسمه.
مغدور حماي الحمه.
خضبو شيبه بدمه.
شيبه بدماه معفره.
نلطم على والينه.
البشدد حامينه.
غيره فلا حبينه.
الشيعه خلفه سائره.
راع الوفه بمحرابه.
سيف المرادي صابه.
بجه هله وحبابه.
خله الدموع مناثره.
يتم اولاده وكومه.
حيدر علي مو يمه.
ريت الاله يدومه.
خيمه علينه ساتره.
محزونه دنيته صفت.
بيها الهموم تراصفت .
مغدور ياراعي البخت.
صوبه ابن الكافره.
نوكف نون ابابه.
ويه اهله واحبابه.
فايض دمه محرابه.
بجه العيون الصابره.
*ناعية الخيام*
#قصيدة مؤمن قريش
...
يبوطالب ياشمس من كل كتر
يبوطالب وحـــدك بس منتصر
يالحمية أنت الرســـــــاله بزودك
وضل يرتل بس مواقـــف جودك
...
الهـسه وگفاتك رســـــائل للدواوين
لازم الحـــــگ أيتأزر بالحچي الزين
وأنت بيرغ من ترفرف غيرتك دين
موقفك هم شافه حتى الماأله عين
أني أكتب وادري مـينصفك شعر
يبوطالب وحـــــــدك بس منتصر
يالحمية أنت الرســــــــاله بزودك
وضل يرتل بس مواقـــف جودك
...
سرفنت ردن القضيه أبهيبتك هــاي
ياضوه الماطخله حاجب يم الهواي
والعطش مر أبنبينه وگتله انه الماي
ومـــن كفلته الدين گلك أنت مولاي
والموحد ينعرف مـثل العطر
يبوطالب وحدك بس منتصر
يالحمية أنت الرســــاله بزودك
وضل يرتل بس مواقف جودك
...
وصرت مؤمنهم قريش الكل يعرفون
الهسه صوتك دين شايل صايرأمتون
ومن أجوك الباب بيتك رجعــو عيون
الخوف تارسهن وزودك رجــف الكون
وجوي سيفك شيب أفكار الكفر
يبوطالب وحــــــدك بس منتصر
يالحمية أنت الرســــاله بزودك
وضل يرتل بس مواقف جودك
...
يامـــنارة وبيهه تاج وراية أســلام
الله خصاك أبكرامه أحزامهه أحزام
علي أبنك والأمــــــام أيخلف أيمام
يمك الماحطلـه كلمه أيعيش بوهام
وأسمك آشگدبي مناير تفتخر
يبوطالب وحــدك بس منتصر
يالحمية أنت الرســــاله بزودك
وضل يرتل بس مواقف جودك
...
بس رحيلك عام خلف شايل أحزان
والألــم عاش أبنبينه أبكل الأوطان
مانساك وعشت هـيبه أبكل الأديان
وأنت رحمة الله بيك أيعيش الأذان
ياهوه الله الماعرف شنهو العذر
يبوطالب وحـــــدك بس منتصر
يالحمية أنت الرســــاله بزودك
وضل يرتل بس مواقف جودك
...
خادم أهل البيت،،ع،،
أبوحسين السرگودي...🕊️🕊️🕊️
يا علي
نعي مفجع
چـنـه نـتـاني ونحسب احساب
عـيـد الـيـجـيـنـه أيلم الاحباب
ثــاري الــدهـــر دولابــه دولاب
جــار واخــذ دّحــاي الابــواب
*------------------------*--------------------*
ألـمــن بــعــد نـتـنـاك يـا عـيـد
ونـدري عـلـينـه اهمونه اتـزيـد
راح الـيـلـمـنـه وروحتّـه ابعيـد
وصـار الـدمـع لـلـعـيـن تعـويـد
*------------------------*---------------------*
كـلــشـي يــروح الابـو لـو راح
والـمـات ابـوه اشـلـون يـرتـاح
يـگـضـي العـمـر دمعات ونياح
يـلـزم صفحته ويـصفـگ الراح
*--------------------------*------------------*
✍خادم أمير المؤمنين ع
الشاعر رعد الجريخي
خل نصلي اليله وحشه..عالحمَل جبريل نعشه
نــبـچــــــي ونصلــي ركعــتـين…. يزينـب
البيت وحشه ابدون ابو حسين… يزينب
★★★★★★★★★
اهنا يزينــــب گابلينــــي ابـــدمــع العيون
انـــه اخوچ الحسن يمچ يختي يَم عـــون
ليش الي انحــبـــهـــم يــزيــنـب مايظلون
والله صعبه باالمگـــابــــر مــــن ينامــون
راح ابـونـا وفـارگانـه …. العيد جاي اويتمانــه
ابــلا أبـــو بيـمَـــن تعَــيــديــن…يزينب
البيت وحشه ابدون ابو حسين… يزينب
★★★★★★★★★
اتوضي بدموعچ يخيتي العَلگمي ابعيد
أوحَضري اهدومچ السود الجيـت العيد
انـــه ادري اجــــــروح گلبچ بعد مَتهيد
ازغيرة أنتي وبينَت بيچ التجـــــاعيد
بالمگابر غفوا ناسچ … وبين الشيب اعله راسچ
واللــــه حــگـــــچ من تشَيبين…يزينب
البيت وحشه ابدون ابو حسين…يزينب
★★★★★★★★★
اسم الله خويه حسين گلي اشينفع ابچاك
گـــــوم خويــــه وخل يجي العباس وياك
خل لبونــــــــا انصلي وحشه وزينب اهناك
واللــــه من تسمع بچيها اتگطع اچــــلاك
ليش شهر الله ابصيامه…خله اهل زينـب يتامه
فطــــر گلــبـچ مــن تفطريــــن.. يزينــب
البيت وحشه ابدون ابو حسين…يزينب
★★★★★★★★★
يابـــو فاضل من نصلـــي ونوگف اصفوف
ومـــن تگبر تـهـــد حيلي هـــــاي الچفوف
أذكـــر اوصــيَــت أبــونـا الــيـــوم الطفوف
بــاچـــر انتــه اتصير خويه حصت السيوف
تشوف زينب عاالشريعه…ذَنـي اچفوفك گطيعه
عالنهر لـــو شفــتـــــي چــفــين….. يزينب
البيت وحشه ابدون ابو حسين… يزينب
★★★★★★★★★
شمعه شمعه خل نصير ونضوي مُحراب
ونلطم احـــنه وتقره مُلايــــه ام الحجاب
اهنا يزينب نصي صوتچ أُمــــنه باالباب
لا تسمعچ نــــام ابونــا جـــــــوه التراب
أمي شو عافت گبرها …. وأجت مَحنيه ابكسرها
خـــــاف سمعت من تـــونـــــين….. يزينب
البيت وحشه ابدون ابو حسين… يزينب
★★★★★★★★★
خيمه ابـــــونـــــا وراح مـنه وبالگـــبر نـــام
يعنــي بــاچـــــر ماتـنـفعـــچ كــــل الاخيام
صــرنا مــن هســه يـــتامـــه والفَرح صَــــام
وبــاچــــر الوادم تـگــلـــــچ أُم الايـــــــتام
الراح ابوامايلگه راحه... وعيشي زينب بالمناحه
عالهـــزل مَچتوفـــه تمشــــين….. يزينب
البيت وحشه ابدون ابو حسين… يزينب
★★★★★★★★★
أنــة اخوچ الحسن هسه وچبدي مَمرود
كربــله ابعيني صورها انعـرظـــت اردود
چفچ ابحبل الشمـــــر من شفته مگيود
صفگت ايدي وصحت عنچ وين الحيود
من سمَع جبريل صوتچ…صاح زينب وين اخوتچ
امتربـــــه وعَــلـتَــل تصعديـــن…. . زينب
البيت وحشه ابدون ابو حسين… يزينب
★★★★★★★★★
ـــــــــــــــــــــــــــــــــــــــــــــــ
ماجد حبيب الخيگاني
ونسألكم الدعاء
كأني بمولاتي زينب ع تخاطب أمير المؤمنين علي ع ليلة شهادته و تقول
ودّعتك الله و بعــــد چـم عام
موعدنه من ندخل على الشام
عالنـــاگة. انتظرك. و احبالي اباديه
تحضرني لو نادو. زينب يا سبيه
يا غربتي يا غربتي
ــــــــــــــــــــــــــــــــــــــــــــــــ ــــــــ
شفت الطف و اخوتي امذبحة اگبالي
من شفتك خضــــيب و دامي يالوالي
لحيته احسين حمـــــــرة شـو تراوالي
چا شيصير باچـــــر بابنــــــــك الغالي
دمك يابــــــويه الي نزف
لو هــذا دم احسين
و عباسي ليش ابلاية چف
ظلت تشوفه العين
يالجرحك. يـــراوينــي. جروح اهــواية للعاشر
و اكبرها . ضوه الزهره. تطيح اضلوعه بالحافر
من الظهر حتى ما يجي الليل
فوگاه تظـــــــل تِدَّابچ الخيل
يا ريتـــك تفزعــــله من يوگع رميه
تحضرني لو نــــادو. زينب يا سبيه
يا غربتي. يا غربتي
ــــــــــــــــــــــــــــــــــــــــــــــــ
مالي وياك ظلت الا چـــــــم ساعة
و يظل گلبي عليك ايچَّوي بأضلاعه
أودعك بين اخـــــوتي و ناري لذّاعة
و آ يحسين باچــــــــر يذبح اوداعه
باچر اودعــــه بيا وضع.
محبوبك العطشان
يا ويلي و الگاه عالترب
متمـــــدد و عريان
امن التـــــلة. اعايــــنله. ذبيح و ما عليه هِدمه
و عله اطفال و نساوينه. حرگـوا گلبه و خيَّمه
خنصر يمينه بالرمـــــل ضاع
و صيوان أخيته تفرهد ابساع
اندهـــله. يالضامي. گوم الحگ رقية
تحضرني لو نادوا. زينب يــا سبية
يا غربتي يا غربتي
ــــــــــــــــــــــــــــــــــــــــــــــــ
كل باچر نظــــرته ابجرحـــك الينزِف
و من هسه احسّه گلبي ظـــل يرجِف
بيَّه شلون لو ليــل اهـــدعش يكشِف
و عليَّ أشَّر شمرهم و الحــچي يكلِف
يَمّك و احس چني اركبت
مچتوفة فـــــوگ النوگ
و طارف عباتي محــــترگ
و چف ايدي هم محروگ
. لأطفالي أشد جرحي و احـــاول استرد حيلي
و كل حرمة. لون يوگع. طفلها اتصيـح الحگيلي
بيــن اليتامة و النســــــاوين
اگعد و اداوي راس الاحسين
ابچـــيله. و انظرله . تدمــع عينه اليه
تحضرني. لو نادو. زينب يـــــاسبية
يا غربتي. يا غربتي
ــــــــــــــــــــــــــــــــــــــــــــــــ
چنت بيدك تطَّفي ادموعي من تلهب
عليَّ تكلــــــــف فرگتك يا صبـر زينب
ابنيتــك بويه عگبـــــك راح تتســـلب
و عله الهزلة تريدك يَمّها مــــن تركَب
كونك تعوف ارض النجف
و تحضر الي بالحال
حارس اريـــــدك بالضعن
توگف على الاطفال
ما عــــــدنه. يظل والي . ذبح يگضون اهالينه
و شصير انه. لون يهجم. مُعسكر كامل اعلينه
من السياط احميلي الازغار
و خليني اشاگف انه الاحجار
لايتامي ما توصل. كون الهم أذية
تحضرني. لو نادوا. زينب يالسبية
يا غربتي. يا غربتي
ــــــــــــــــــــــــــــــــــــــــــــــــ
بسوگ الشام آ الشام مـــــــن ندخـل
شيجي ابالك علينه اهناك راح ايحـل
حِزَم بوية العصي فوگانه مـــــن تنزل
و نظرات الشمــاتة يا علي تكــــــــتل
تبَّت يـــــــدا أبي لهب
و تبَّت اديـــن الشام
باچر يجمعون الحطب
عالنســـوة و الايتام
يضربونه. و يشتمونه. سباية و حالة حالتنه
و الاكلَف. قصر ندخل و تطول اهناكه وگفتنه
من ندخل الها ينعلن عيد
و اعلينه كلها ترفع الايد
يهضمني يالوالي ديوان ال أميه
تحضرني. لو نـــــادوا. زينب يا سبية
يا غربتي. يا غربتي
ــــــــــــــــــــــــــــــــــــــــــــــــ
الحمدلله
#علي_حسين_الكناني
لطمية في ليلة جرح الإمام علي عليه السلام
آيبويه يا مصابك يا علي
يا ولي الله يا نعم الولي
آه ويلي شلون ظالم يعتنيك
حين با المحرب ابن ملجم يجيك
هشمه راسك أو يتجاسر عليك
اعليك همي بوية ابد ما ينجلي
✍🏻خادمة اهل البيت عليهم السلام العلويه ام سيد مهدي الموسوي
/////////////////
شلون اكدر انسى طبرت هامتك
روحي شاغت من شفتها اعمامتك
بالدماء املطخه يا جبهتك
وصرخت ايتامك ابحضنك تعتلي
✍🏻زينب الواسطي
/////////////////
صرخت ايتامك تنادي حيدره
انهدم ركن الدين وانا مــكدره
الدنيا مرجونه عليك ومــغبره
هيبتي وروحي يبويه وكل هلي
أم صــ✍️ــــادق المنصوري
/////////////////
انت كل عمري وحياتي ودنيتي
مارضيت بيوم تهمل دمعتي
شلون عايفني يبويه بحيرتي
منهو غيرك اليگلي ادللي
*✍🏻أم عبــــــد اللــــــــــه العابـــــــــــدي*
/////////////////
ايروح ياحيف الدلال ابغيبتك
اشلون اصبر يالحنين الفرگتك
صعبه يابويه عليه روحتك
عيني تفرح بيك من تجبل الي
✍️أم أحمد الساعدي
/////////////////
عيني تفرح من تصد الصورتك
هسه تدمع من تناضر طبرتك
صدگ ناوي اتفارگ انت ابنيتك
وگلبي بعدك بالمصايب يبتلي
خادمة آل البيت ع
ــــــــــــــــــــــــــــــــ
ـ((( رابط راثيات العتره )))
تـــمـ بعون الله تعالى ـــت
باقـــ✍ـــلام خادمات اهل البيت ع
(((رأّبِطّةّ رثّأّء أّلَعٌتّرهِ)))
بتاریخ / 4/ رمضان / 1445هـ🌙
لانجيز حذف الاسماء
🙏🏻🙏🏻نسالكم الدعاء🙏🏻🙏🏻
ياعيد ماريــــدك تجي بفراك ابونه
ياعيد گبلك والدي غُمضت اعيونه
حيدر ضمه التراب وجرح الفركه ماطاب
ــــــــــــــــــــــــــــــــــــــــــــــــــ
عمت عيني الاعز من روحي ضمه اتراب الكبور
مشه عني وبقيت انه يتيمه وكلبي مكسور
ودمع فكده مثل المطر فوك اخدودي منثور
صعبه ينحط بالكبر
العندي اغله من العمر
حسره تخنك بالصدر اه
منه حارمني الدهر
بعيني مرسومه الصور
وعودي بالفركه انكسر اه
ياعيد مافك حزني بيك ولا اعايد
ياعيد بيك اشيفرح الفاكدله والد
يبقه ابسود الثياب وجرح الفركه ماطاب
ــــــــــــــــــــــــــــــــــــــــــــــــــــــــــــ
مشه الغالي وبقت بس صورته فوك الحياطين
يكون ابجي عله فراكه لحـــــد ماتنعمي العين
يهـــل وادم تره يتــــعب غياب الكلبه احنين
غالي عن عيني مشه
وداره ضلت موحشه
الجيته رمشي فارشه اه
حيدر نايم ابلحد
ماظن لداره يرد
وانه كلبي منمرد اه
ياعيد تره التفكد ابوها اتموت سكته
ياعيد اريدن حيدر وما اريدك انته
ذابح روحي الغياب وجرح الفركه ماطاب
ــــــــــــــــــــــــــــــــــــــــــــــــــــــــــــ
كضت روحي بعد عيون حيدر شلي بالروح
بحر دمعي يغركها السفن وشراعها النوح
ولا ريده الكلب لو ساعه بعده ايبطل النوح
حزني لعيوني وطن
والله غدار الزمن
يتم حسين وحسن اه
وليرحل عنها ابو
تبقه بالدنيا شكو
تفكد أحضان الدفو اه
ياعيد تمنيت اويـبوي الموت والله
ياعيد شني ضلتي وبوي اللحد ضماه
جبدي من الهضم ذاب وجرح الفركه ماطاب
ــــــــــــــــــــــــــــــــــــــــــــــــــــــــــــ
صدك وسفه تشم بنته النسيم وما يشمه
لون بيدي اعوف البيت وسكن كبر يمه
علي ليله مشه وصار العمر بغيابه ضلمه
جنه نتفطر سوه
يحبني ويشمني هوه
يترك جرحي بلا دوه اه
صارت شفافي خشب
هدم اركاني التعب
مغطه بتراب الذهب اه
ياعيد من حيدر ابوي انه انحرم ليش
ياعيد شفت جرحه عميج وموش بريش
ودمعتي مغركه الحجاب وجرح الفركه ماطاب
ــــــــــــــــــــــــــــــــــــــــــــــــــــــــــــ
عله متوني تضل ريحت جفوفه شما لزمني
اشم بيها ششم من راح من عدها حرمني
اخذ كلشي واحس بالعمر بعده مايهمني
ماكو منك ياعلي
بيتي من دونك خلي
راحت بويه ادللي اه
ذني ايام الدمع
حسره وتجوي بضلع
ونتي صارت تنسمع اه
ياعيد راح الليله حيدر مني ياعيد
ياعيد لون فص عيني اذبه افكده ميفيد
دمعي ابفكده سجاب وجرح الفركه ماطاب
ــــــــــــــــــــــــــــــــــــــــــــــــــــــــــــ
حسين عبد الزهرة الدراجي
لوفاة ام المؤمنين خديجة
بنت خويلد سلام الله عليها
دمع جمرات الحزن نجريها
لسلوة الزهرة ونظر واليها
★★★★★
هاي ام القاسم بيوم الشدد
للنبي بكل معضله عون وسند
ينوح طه لشمل مايرجع بعد
عَرجَّت روح الوفه الباربها
★★★★★
چم ذنب شالت الدنيا چم ذنب
اتفرق بغفله المحب على المحب
شمعة البيت بدياجر تنحجب
ايهدم گلوب الاهل ناعيها
★★★★★
ونت المجروح تكتل من يون
من يون بحرگه علراح ويحن
يساعد الله المصطفى بعام الحزن
روحه تتحمل حزن مابيها
★★★★★
طلعت من الدنيا تنعاها السمه
الدخلت الاسلام اول مسلمه
مؤمنه ماتت خديجه وعالمه
الزمن يخشع لوسمع طاريها
★★★★★
المحبه اتفرعت وانتي الأصل
مثل امچ فاطمة قول وفعل
دموعنه لمچ چمر ضلت تهل
عندچ دموع الحزن سجليها
★★★★★
ماتت ام الخير ورباة الكرم
الدافعت عن المعارف والقيم
الحاربت گوم الضلاله والصنم
فاطمة بهلفاجعه انعزيها
الشاعر حسن لعيبي الحريشاوي
نعي لوفاة أم المؤمنين خديجة سلام الله عليها
أتهد الحيل فرگاهم الغالين
الوكت وفراگهم بلگلب رمحين
راحة بال بعد الراحوا أمنين
على فراگ اليهدم الحيل ناوين
يلچمات النبي لاوحده وأثنين
للهادي حملها. وجابها البين
يدهر الماعرف يمتاز ويلين
اخذ من داره الاحباب الميامين
بفگد ام الزچيه النار نارين
يلگه الراحه بعد ام الوفه وين
جروح البلگلب خلت نياشين
وعاونها الدمع يجرح الخدين
يكتر العافيه وشم الرياحين
ولاعلبال عنه غفل ترحين
خلافچ ذبل عمره الجزه الخمسين
ياشمعة البيت وياضوه العين
ياثار اليطلبه الوكت يادين
شكثر مهظوم جد الحسن وحسين
الشاعر حسن لعيبي الحريشاوي
مجلس الأمير ع ١٤٤٥
💧💧💧💧💧💧💧
شيعةَ الكرارِ قوموا للعزاءِ
طاحَ في المحرابِ"سرُّ الأنبياءِ"
وانزِفوا الدمعاتِ في العينِ دماءً
لإمامٍ خضّبوهُ بالدماءِ
شَقّ َ رأسَ المرتضى يا لهفَ نفسي
في الصلاةِ سيفُ أشقى الأشقياءِ
وإلى بارئِها تعرُجُ روحٌ
حبُّها معراجُ روحِ الأولياءِ
عند بابِ الدارِ أيتامُ عليٍّ
حالُهم ما بين خوفٍ ورجاءِ
أنت يا ربَّ الورى الشافي المُعافي
يرفعونَ للسما كفَّ الدعاءِ
ومع الآهاتِ ناداهُ فقيرٌ
أين تمضي يا حبيبَ الفقراءِ
ليس للجرحِ دواءٌ أو طبيبٌ
جهّزوا النعشَ استعدوا للبلاءِ
حسنٌ ينعاهُ للناسِ حزيناً
وحسينٌ في أنينٍ وبكاءِ
غسَّلوهُ كفّنوهُ شيَّعوهُ
دفنوا في القبرِ معشوقَ السماءِ
يا لحزني يومَ عاشورا حسينٌ
دون دفنٍ تركوهُ في العراءِ
بدموعٍ شيّعتهُ زينبٌ
داميَ الجسمِ ومسلوبَ الرداءِ
فانصبوا المأتمَ أحبابَ عليٍّ
وانقلوا الحزنَ لأرضِ كربلاءِ !!!
محمد طالب العاملي
((للسيده خديجه))
يالتسأل المن هالعــزاء
لم فاطمه فخر النساء
مولاتي خديجه.. مولاتي خديجه
~
اليله،، هالخــدم مـــجــتمعه
تبچي،، وتسچب الها الدمعه
ابلوعه.. هالتـنـــــــوح وتنعه
انقدم اليه التعازي لبو الزهره المصطفه
والموالي بهل رزيه جفنه مانــام وغــفه
ويانه حزنانه الـــسماء
لم فاطمه فخر النساء
مولاتي خديجه.. مولاتي خديجه
~
الهادي.. اليله منهد حـيله
الحزنه.. كل سمه تبچيله
وعينه.. ماغـفت كـل ليله
ماتـــــهون العِشره عـنـده خـلص ايامه يحن
وسمه عام المشت عنه المصطفى عام الحزن
وعـيونه ذبـلهه البــكاء
لم فاطمه فخر النساء
مولاتي خديجه.. مولاتي خديجه
~
الزهره.. اليله الله ايعينها
فاطم.. مايبطل اونــينـها
راحت.. امها من ايـدينها
ايعظم الله يالــــزچيه اجرچ بهذا المصاب
الوالده خيمه اعله بتها وتنهدم من الغياب
وخلافها اتعيش ابعناء
لم فاطمه فخر الـنساء
مولاتي خديجه.. مولاتي خديجه
~~
چانت.. بالشرف معروفه
طيبه.. وبالكرم موصوفه
تترس.. للفقير اچـــفوفه
بالنسب مولاتي اهلها چانوا اشراف العرب
الباري بشرها ابهديه الها بيت امن القصب
تستاهل ابحق الجزاء
لم فاطمه فخر النساء
مولاتي خديجه.. مولاتي خديجه
~
ظلمه.. الدنيا لمصيبتها
غابت.. راحت الجـنتها
ويلي.. شالو اجـنازتـها
كل سنه انقيم المجالس عهد منا الفاطـــمه
امصيبة ام الزهره بچّت حتى املاك السمه
للموت منعوف الرثـاء
لم فاطمه فخر النساء
مولاتي خديجه.. مولاتي خديجه
~
حيدر بشار الدراجي
لوفاة ام المؤمنين خديجة
رضوان الله عليها(وزن عگيلي)
الله يساعد گلب الزهره
لمصاب أمها اتعيش ابحسره
★★★★★
أمها العاشت نار الغربه
ماعافت طه ولادربه
بالسهله وَيَّاه وبالصعبه
وبالحلوه وَيَّاه وبالمره
★★★★★
للهادي شگد ضحت أمها
ماغير الاسلام ايهمها
وسفه اتراب الگاع يضمها
عگب اللمَّه وذيچ العشره
★★★★★
هيه ابوكت المحنه الناصر
عون وملگه وجبرة خاطر
لاچن طبع الدنيا الغادر
من احمد سلَّبَتْ هاي لدَّرَه
★★★★★
هيه الناصر وكت المِحَنَه
وياما دفعت كل هم عنه
سبقت طه الدار الجنه
ياكسر الفاگد شيجبره
★★★★★
ايعين الله الزهره ابفرگتها
والهادي الفارگ شوفتها
والدار الفگدت شمعتها
مثل الليل الغايب بدره
الشاعر حسن لعيبي الحريشاوي
|ياسين جواد العبد الرضا:
١٥ شعبان ١٤٤١هـ تختلف
نظمت في ١٤٤١/٨/١٦هـ
لنا ليلةَ النِّصْفِ شعَّ وبانْ
ضياءُ الهمامِ إمامُ الزمانْ
وبالأُنسِ والحُزنِ ممتزجانْ
دموعٌ، ونحن علانا الهوانْ
أمَا آنَ لابنِ الهُداةِ الأوان؟
إلهي بطاووسِ أهلِ الجنانْ
نريدُ الأمانَ الأمانَ الأمانْ
___
بوذية في حق الإمام المهدي عجّل الله فرجه الشريف
نظمت في ٩شعبان ١٤٤٤هـ
مُحِبَّك غير جيتك مَنتظرها
وفنت أيّام عمره مِنتظرها
اودعاءه ابعجل يرجع مُنتظرها
اويفرّح كل قلوب الجعفريّه
ـــــــــــ
بوذية في حق الإمام المهدي عليه السلام
نظمت في الجمعة ١٤٤١/٨/١٦هـ
بغيابك ترى الأيام مُره
وماشفنه الهنا مولاي مَره
ولو بس عالمحب بالطّيف مُره
او أمّن قلبه بالطلعه البهيّه
____
بوذية (في ميلاد الإمام المهدي عليه السلام)
نظمت في 13/8/1439هـ
حُـــب الآل مــنـجـاتــي ومهدي
وحليب أمّي إلي شاهد ومهدي
بــعِــدِل لـكـتـاب ميلاده ومهدي
ولائه للمحب صاير هويّه
* * *
هوسة (في ميلاد الإمام المهدي عليه السلام)
نظمت في 13/8/1439هـ
بنصف شعبان كلها الأنبيا بتهجت
وعلى الموعود جات اتسلّم وصلّت
والشيعه بفرحها اليوم إجت هنّت
للزهره او أمّه بميلاده
والكون اترنّم باعياده
* * *
تمت بحمد الله ومنّه
نظم خادم السيدة الزهراء عليها السلام
ياسين العبد الرضا
على باب السيدة خديجة((عليها السلام))
نظمت في 9/9/1439هـ
يامّ الزهره يامولاتي
يامّ الزهره يامولاتي
* * *
ياللّي ربّ الكون اختارچ
خالد ذكرچ عالي شانچ
وابداً مايخيب الدق بابچ
وانخابچ جيت ابنخواتي
* * *
فايز كلمن ليچ ايوالي
باول ذخره إنتي وتالي
وبيچ الشيعي راسه عالي
وبسمچ بالمحشر منجاتي
* * *
أنجى حتماً يا باب الله
وأعظم برهان اليوصلّه
ميرد إلاّ مراده يحصله
وليچ اليوم أرفع طلباتي
* * *
وعندي أشرف وأكبر مطلب
خادم إلكم للموت أُحسب
ولمصايبكم دمعي ينصب
وانحب واجذبها الحسراتي
* * *
بردي افّادي وطفّي ناره
يامّ البضعه وحق لزياره
القبرچ روحي وي زوّاره
بلهفه تعنّت وبآهاتي
* * *
تنعى الفقدچ يامّ الزهره
تواسي الهادي تعظّم أجره
وبعدچ منهو اليجبر كسره
ولسلام أصبح في عزياتي
* * *
صوّب طه دهره الظالم
ويتّم فقدچ بنتچ فاطم
وصدري بحسره اعليكم لاطم
وَيْ لاملاك أرفع صرخاتي
* * *
وامسى الناعي امصابچ ينعه
نفجعت هالشيعه بهالفجعه
ولچ مايكفي نجري الدمعه
ولا زفراتي ولا ونّاتي
* * *
يابوصالح طوّل ثارك
يمتى تشعشع إلنه انوارك
عجّل عجّل إحنا انصارك
وابداً ما تخمد جمراتي
* * *
تمت بحمد الله ومنّه
الجمعه9/9/1439هـ
خادم السيدة الزهراء عليها السلام
ياسين جواد العبد الرضا
نعي/ للسيدة خديجة عليها السلام لسان حال مولاتي فاطمة الزهراء عليها السلام
بعدني زغيره محتاجه لحنانج
ييمه ولا تحرميني امانج
مكانج لا يضل خالي مكانج
دعوفي الموت مو وكته اوانج
ييمه وفاطمه آنه بضمانج
خديجه و ألله خصج بالكرامه
عليج ويالوحي انزل سلامه
ابوي الهادي يرتاح بمقامه
يمج لو كعد ينسه الملامه
حالي بغيبتج حال اليتامه
كسرتي گلوبنه بهاي المصيبه
بنتج فاطمه آنه الحبيبه
بقيت بلايه ام مثل الغريبه
خديجه الغالية الحره النجيبه
جرحج ما طفه يسعر لهيبه
سيد زيد الفحام
السلام عليكِ يا أم المؤمنين …
" كُتبت للحث و عدم التقصير في زيارة السيدة خديجة عليها السلام "
يالقاصد الـ مكة ابگلب ملهـوف
أمشي عد خديجة نادي و أطوف
سلام الله على أم الزچيه
سلام الله على أم الزچيه
————— (١) —————
يالقاصـد الكعـبه و كــلك اذنــوب
لعـند "كعبة محمد" اسـلك دروب
كل خــطوة الخديجة تنجلي اكروب
هاذي الي بگـبرها تقــوى الگلــوب
حلفــها بإبنــها البــگى مســــلوب
و الله ابجـــاها لك يقــــبل التــوب
و يقــبل عمـــرتك رب البريه
ســـلام الله على أم الزچــــيه
————— (٢) —————
بعد فرض المناسك أقصــد الها
وصـل الله و محمد من وصــلها
و قطع غصن الرساله من جهلها
كعــــبة للكـــرم ربنــا جعــلها
و منهو ابهالفضــل يدني فضلها
نبي الله ابجـــلاله اتفـــييء ظلها
و چانت تنصره صبح و مسيه
ســـلام الله على أم الزچــــيه
————— (٣) —————
يا شيعـي المنــــاسك من هديها
و لا تكمــل العمــره إلا تجيــــها
إذا الهــادي محمــــد لاذ بيـــها
معـــناته الكــــرم منــها إليـــها
و لــو أم الحســـن نادت عليــها
لا لا مــا انسطـر خد أم أبيــــــها
و لا محسن وگــع فوگ الوطيه
ســـلام الله عــلى أم الزچـــٍيه
————— (٤) —————
خديجة خصها الله ابهالكرامة
نزل جبريل يوصّــلها ســـلامه
مقامه الطاهــره عالي مـقامه
واليگصــدها حصل كل مرامه
كعبــه للعطـــايا ام الإمــامه
و ملاذاً للمظــلل بالغمـــامه
و مــلاذ و قبلة الكــل البريــه
ســـلام الله على أم الزچــــيه
————— (٥) —————
مثـــل ما سلم البــاري عليــــها
لا تبخل يا مؤمـــن تمشــي ليها
ترى الجــنة ابخديجة وي بنيــها
و على الشيعة فرض تومي بديها
بعد فرض الصلاه ترفــع حچيها
ســلام الله عليـــچ يا أم أم أبيــــها
و سلام الله على العتره سويه
ســـلام الله على أم الزچــــيه
مفضل_حبيب_السهو
القطيف - سيهات ٨-٩-١٤٤٤
يُهدى ثواب هذا العمل إلى روح المرحوم الحاج حبيب علي السهو*
#قصيده ليلة 19رمضان
طاح أبو حسين يزينب طاح أبو حسين
الهامــه نصيـن يزينب الهامــه نصيـن
كومي شوفي بالعجل
كبل لايحين الأجل
طاح أبو حسين يزينب طاح أبو حسين..
➖➖➖➖➖➖➖➖
صاح جبريل و هتف صارت عزيه
لحكو هالساعه لعد حامي الحميه
أنصاب بالمحراب أظن يا هاشميه
خلي تفزعله الأهل..
كبل لايحين الاجل..
تدمع العين يزينب تدمع العين
طاح ابوحسين يزينب طاح ابوحسين.
✍#علويه ام فاضل
➖➖➖➖➖➖➖➖
صوت جبريل آعتلى والشيعه ناحت
كلها صوبه أتوجهت للوالي راحت
كل علايــم فكدته بالكــون لاحت
السيف للهامه وصل .
كبل لحين الاجل.
تدمع العين يزينب تدمع العين..
طاح أبو حسين يزينب طاح أبو حسين..
✍ #ام فاطمة الزهراء
➖➖➖➖➖➖➖➖
حزنت اليوم سمانه ومطرت أدموم
خلاف عينك يالولي عاشرنه الهموم
عكبك الدنيه حزينه وما صفت يوم
بطيحتك راح الأمل ..
كبل لايحين الأجل..
تدمع العين يازينب تدمع العين..
طاح أبو حسين يزينب طاح أبو حسين..
✍#آلّشآعرهً آلــــّعــلّويِـــه آلّمٌوسويِــــۿ
➖➖➖➖➖➖➖➖
صوت وحي الله اعتلى ولكل تألم
صوبو حامي الحمه ولكل تيتم
وركن هذا الدين بمصابه تهدم
علي بمحرابه انكتل
گبل لايحين الاجل
تدمع العين يزينب تدمع العين
طاح ابو حسين يزينب طاح ابو حسين
✍ #ام زهراء الزيداويه البصراويه
➖➖➖➖➖➖➖➖
الـــف ياحيــــــف ولينــه الـــف ياحيف
جرح راســــه مالـــه طيبه وماالـه كيف
صعـب نســـمع هل خبر یارته لو طيف
لجله ظلينـــه ابوجل
گبــل ليحـــين الاجل
تدمع العین یزینب تدمع العین
طاح ابو حسین یزین طاح ابو حسین
✍ #الشاعره ام عباس الحسيني
➖➖➖➖➖➖➖➖
صعب نسمع طيحتك يابويه ياحيد.
تروح ماترجع بعد ولمكبره بعيد
شلون بويه لورحت ويمرنه العيد
صوبو خير العمل
كبل لايحين الاجل
تدمع العين يزينب تدمع العين
طاح ابو حسين يزينب طاح ابو حسين
✍ #خادمه آل القائم(عج)فاطمه اللامي
➖➖➖➖➖➖➖➖
((يخيمه وطولك افياي))
حـنـان أم وأبـو بـيـك يـحـيـدر
دعـيـت الله اليخليك يـحـيـدر
يـخـيـمـه وطـولـك أفـيـاي
ألـلـيـلـه ابـطـبـرتــك جـاي
*-----------------------*-------------------------*
الـمـرادي بـطـبـرتـك حـقـق مـراده
ابـلـيلـه اليـفـتـَرض بـيهـه السعاده
فـجـعـنـي والـحـزن خـيّـم سـواده
ابـمـصـابـك يا امـيـن الـلـه العباده
أگبالي وينزف الراس هظيمه
گـوه إجّــر الانـفــاس هظيمه
چـنـت يالغـالـي رجواي
*--------------------------*-------------------*
يـحـيـدر جـاوب بـكـلـمــه عـلـيّـه
يلـمـعـوّظ حـنـان أمــي الـزچـيــه
ابـطـبـرتـك والـدمـه جـابـوك ألـيّـه
يـلـيـث الـمـوزمـه وحامي الحميه
أحَچـي وسالت العين يبويه
اشـوف الهامـه نصين يبويه
هـاجـس حـزنـي وياي
*------------------------*---------------------*
راسـك لـيش مـلـفـوف ابـعِـصـابـه
نـظـرتـك واذكـرت فـعـل الصحابه
يبـويه الشيب مصبوغ ابـخـضابـه
واجـاني الماچـنت احسب حسابـه
احسـك بـاچـر اتروح يغالي
وابـقـه ابيـن الجروح يغالي
وحـدي وتـجـري عيناي
*-------------------------*--------------------*
أصــد الهامـك ودَمّــه وطـبـرتـه
اكـابـر والـجـفـن تـنـزل دمـعـتـه
كلبي وخاطري بجيتك كـسـرتـه
يتچيلك حـسـن جـابـاك شـفـتـه
عـلـيّـه اضلـم الكون اشوفه
دمـك ينزف اشلون اشوفه
تـصـعـب حـآلـتّـك هاي
*-------------------------*---------------------*
لـيـلـي اشـلـون يا حــيــدر انـامـه
واشـوفـن حـالتك يـابـو اليـتـامـه
دعـيـت الله اليگـومـك بالسـلامـه
زمـاني والـيـتـم تـوجـع سـهـامـه
چنت ما حآسبّه احساب طبرتك
عـادت حــرگـت الـبـاب طبرتك
دارت چــنــهــه دنـيـاي
*-----------------------*-------------------*
جـاوب زيـنـب الـعـنـدك حـبـيـبـه
سكوتـك يـحـرك الروح ابـلـهـيـبـه
ابـتـدت ويـاي نـيران الـمـصـيـبـه
يـگـولـون الـجـرح عـاجـز طبيبـه
ابدونك لحظـه ماريـد حياتي
اضـل ابنوحي شتفيد حياتي
امـوتـن افـضـل اهـواي
*------------------------*------------------*
✍خادم أمير المؤمنين ع
الشاعر رعد الچريخي
.
ابعطرك ياعلي… .ريحت كل هلي
اشتمك واحس….. تارس منزلي
المغرب ياعلي ابثوب أمي اشــمك
ميت عَــــدل هــم تلگانـي يمــك
يحيدر
★★★★★★★★★
حُبك ياعلي اشكبرة…. عاش ابگلبي عالفطرة
تارس ريتي وعطرة…. اشحلاته
أنـــه اتنفَس انفاسك… وهنياله الگبل باسك
السيف ايتمم ابراسك…. صلاته
مثلك ياهو حَـــس بيه…. ويعطف عَلَــــي يوميه
ولجلي اعــياله مسبيه…. وبناته
تنــزف ياعلي جروحك…وانـه الگاعـد ابــروحك
مو ياهو اليجي ايلوحك…. ابذاته
مجنونك أَنــــــــه…من أول سـَــنــــه
ولجلك ياعـلــــي…ربيت الظـــــنـه
اخلط مو دمع دَمِ او يدمك…
مَيت عَدل هَم تِلگاني يــمك
يحيدر
★★★★★★★★★
چانت أمي تحچيلي…. وقصة عشگ ترويلي
واسهَر وي نجم ليلي... ولا انام
اتگلي حب علي واجب.... هذا ابن أبي طالب
مثل العين والحاجب… والاسلام
بالـــك يبـــنــي لتعوفه … چَــلب حـيل بچفوفه
الكعبه كل مسه اطوفه… والايتام
خلي اصورة بعيونك… حته لو يذبحـــونك
هَــم يمــه يـدفــنونك…. والامام
يقـــبل خدمتَك… .ويشعل شمعتك
لو صار الحشر …. تضوي ابحفرتَك
هاي اوصيت أُمي وداعت أمَك
مَيت عَـــــدل هَـــــم تِلگاني يمك
يحيدر
★★★★★★★★★
صحت وصافيه النيه…. كاتب ألـــك لطميه
وتـــارس كل حُسينيه…. ابنحيبي
صايم ياعلي وفاطر…. بروحي گاعد العاشر
ابچي والطم الخاطر…. سَليبي
ثوبـــي مــــا أبدلـــنه… أسود يعشَگ الونـــه
ُحُبَـــك تدري سودنـه…. حبيبي
أنـــي ياعلي اعْـراقي… ابشعرك تارس اوراقي
وباقي ابخدمتك باقي… . المشيبي
ها ياباالحسَن… . لو لَفني الجِفَـن
غربــه المگبرة … وبس أنته الوطن
امنَ أبـرَد ياعلـي ايدفيني هِدمَك
مَيت عَـــــــــــدل هَم تِلگاني يمك
يحيدر
★★★★★★★★★
كل يوم احسب احسابك… المغرب اگعد ابابك
واشتم ياعلي اترابك… بالانفاس
الوادم صاحت اگبالي… ليش ابحب علي اتغالي
گتلهم علي الوالي… على الناس
حيل اتفاجأو مني…. شافوني ابزغر سني
وروحي بسمك اتغني…. والاحساس
گتلــهـــــــــم احبـــنه… غالي ومااعوفنه
بس يم حيدر الجنه …. والعباس
راســي معتلي…. رغم العاذلي
لو صار الفَـزَع…. ما غيرك ألي
تطفه الحاطمه من اذكر أسمك
ميت عدل هم تلگانــي يمـــك
يحيدر
★★★★★★★★★
من أمي العشگ راضع… وبذني ايكَّبَر الجامع
أول علـــــــي مو رابع…. تَخَلَد
وَظح نَبي الأُمــــــيه…. وناده باالغديــــريـــــــه
حيدر وسطَت الريــه… توَسَد
سَمَعْ صيحته العالم… ورَف بيرغ بني هاشم
أول علـــي والقـــائم… مُحمد
گال المهدي من عدنا… ويخسر كلمن ايضدنا
النام امأمن ابسدنا… مُسَدَد
اتظل للمنتظر… رايه اعله النهر
وجفه وجربته….من عمه الگمر
وگل للمنتظر لاتنسه عَمَك
ميت عدل هم تلگاني يمك
يحيدر
★★★★★★★★★
هاي اوصيتي لولادي... ابنعشي لو مشه الحادي
اخذوني يم علي غادي…. دَفنتي
وصيحوا ياعلي اجالــك…هـذا الچــان يقرالــك
ادري تنشــــف ابجالـــك…. دَمعتي
ادخيلك ياعلي ادخيلك..خَلص عمري أبچيلك
زينــب هـــــيه تحچيلك… جَمرتي
اعليك انـه اقسم ابفاطم…سجل اسمي لك خادم
تشفـــــع باالحـــشر لازم…. خدمتي
معقوده السمه… ابسبحت فاطمه
ابدمعات الخَدَم …. تطفه الحاطمه
من عيون البشر چا وين اضمك
ميت عــــــدل هم تلگاني يمك
يحيدر
★★★★★★★★★
ــــــــــــــــــــــــــــــــــــــــــــ
ماجد حبيب الخيكاني
ونسألكم الدعاء
#جديد_وحصري
قصيدة ثگيله للامام علي "ع"
باقلام خادمات اهل البيت ع ✍🏻✍🏻✍🏻 #الشاعرة_رسل_الابراهيمي #الشاعرة_نورس_الحلفي #الشاعرة_رضاب_الاسدي
{{علي ومن ايدي}}
علي ومن ايدي الزمن وسفه خذاه
يتيمه خلاني واهل دمعي بجفاه
لسه ابوي بعازته
شلون احمل فرگته
شخص ابوي اخلافه ماتسوه الحياه
علي ومن ايدي الزمن وسفه خذاه@@@@@
ــــــــــــــــــــــــــــــــــــــــــــــــــــــــــــ
عليه متعوده واريده يضل ضخر
بدون ابوي الغالي مايسوه العمر
شلون اهيد منين اجيبلي صبر
مانفع صبري علي
كون ينسام اشتري
هذا ابوي المايصح والي بغلاه
علي ومن ايدي الزمن وسفه خذاه@@@@@
ــــــــــــــــــــــــــــــــــــــــــــــــــــــــــــ
شلون اهيد وراح ابوي الكله طيب
فارگاني وغاب ويطول المغيب
يا جرح راسه ولا صحله طبيب
شال حماي الحمه
وراسه يتنازف دمه
سيف ابن ملجم حسافه ما خطاه
علي ومن ايدي الزمن وسفه خذاه@@@@@
ـــــــــــــــــــــــــــــــــــــــــــــــــ
ينزف وما طاب جرح الهامه
شال ابوي وما مكمل اصيامه
عالوصي الليله تنوح ايتامه
صاحت ام گلب الحزين
بعد شيعوده الحنين
عافني ولوعات راح اشبع وراه
علي ومن ايدي الزمن وسفه خذاه@@@@@
ــــــــــــــــــــــــــــــــــــــــــــــــــــــــــــ
سوالف الفگدت ابوها تظل تون
شبعي يبنيته عله افراگه حزن
بجرح رأسه راح ابيج يندفن
راح ابوج الكله طيب
صيحي مثله منين اجيب
گلبي أحسنه بدمع عينه بجاه
علي ومن ايدي الزمن وسفه خذاه@@@@@
ــــــــــــــــــــــــــــــــــــــــــــــــــــــــــــ
لا تخليني بفركتك مالي حيل
ياصبح عمري بغيابك عمري ليل
الشال ابوها كون وي موته تشيل
يالعفتني ابچي عليك
شلون علمني اجيك
كون بي باب الگبر واكعد وياه
علي ومن ايدي الزمن وسفه خذاه ... تمت بعون الله وفضله🙏🏻 غير مبري الذمه من يحذف أسماء الشاعرات أو يتلاعب بالكلام وينسب الرثاء لشخص اخر. ونسألكم الدعاء