لوحة شعر شعبي
في حق قائد النصر
الشهيد أبو مهدي المهندس رحمه الله
..................
يالتشبه شعر ما يوم ما مكتوب
أو خلك شاعر يدورلك قوافي
الخلك يمك وكف محتار شيكول
والشاعر صدح كافي التجافي
أبالوحات الشعر مالك وصف ليش
يا وحي النصر والنبعه صافي
صاحب صاحبك حد شهكت الروح
جنوبي أو كشختك لبس الجفافي
أبكريات الحشد تجري أنتصارات
الحشد يتنفسك ترس الفيافي
جرح كسر الخواطر يهدم الحيل
ونه أجروح الخواطر منها وافي
عوافي أنته أو نسيمك كصبة الهور
ونه أبعازة نسيمك يا عوافي
أشكثر بيك أريحيه التعشك الموت
أو لعبت أويه المنيه شوط أضافي
حروف أسمك شرف فوك المنصات
أبو مهدي المهندس أنته كافي
وجودك بالحشد أنطه الحشد صيت
الحشد مهما وفالك ما يوافي
يالمأدب الدواعش وسفه تابوت
أحتواك أو ينعه ألي موتك صحافي
اخترت درب الشهاده أو نلت التريد
بطل أنته حقيقي مو خرافي
ألك أخذ تحيه أو راسي مرفوع
وجي القبرك أزوره واني حافي
..................
خادم أهل البيت
الشاعر : أسماعيل الجوراني
الجمعه : 31/12/2021
هوسات جنوبيه
لذكرى ولادة
بطلة كربلاء ورمز الأباء
السيده زينب الحوراء عليها السلام
.................
أبميلاد العقيله زينب الكبرى
نهديها التهاني الفاطمه الزهره
أو كلمن عنده حاجه و نبشره
ها ها
أبجاه الربك سماها
زينب محبوبة طه
كل حاجه التتمناها
ها ها ( وبصاية زينب )
مكضيه وبصاية زينب
................
عقيلة آل هاشم أنعم أو أكرم
ما تنسى الحضر هاليله واليخدم
جف الجود جفها الدومه ما يحجم
ها ها
أبهاي الليله الموعوده
فزعة زينب مشهوده
جفها الما يحجم جوده
ها ها ( عيديه )
ينطي الكل حاضر عيديه
................
خادم أهل البيت
الشاعر : أسماعيل الجوراني
الجمعه : 10/12/2021
مولد
لذكرى ولادة ومديح
الأمام جعفر الصادق عليه السلام
...............
جعفر من ولد بعيونه ساطع
بحر المعرفه أو طب المواجع
حكها الجعفريه
أتهني المرجعيه
هاليله أو فرح تملي الشوارع
..................
سادس نور بنوار الأمامه
ديوان الهلا أو وجه السلامه
باجر يحضر أبيوم القيامه
باسط يمنته لهل الخدامه
أيعبرها أبيمينه
أبيسراه الحنينه
يمسح روسها أو عند الله شافع
.................
أنعم وكرم أبراعي الولاده
مولى الرافضه أو شلوة الساده
نمليها سعد دور العباده
صار المحد أيضاهي أجتهاده
أبهالذكرى العظيمه
محفلنه نقيمه
وت كبر شكر كل الجوامع
.................
واهب معرفه الكل المذاهب
تشهدله الكتب وهل المناقب
ثامن عجبه للسبع العجائب
للشيعه الفخر هاي المراتب
ببحور المعالم
سلطان المعاجم
ماخذ أمتياز أو بالصوامع
...................
مرجع للمراجع كلها جعفر
علمه أو حكمته للشيعه مصدر
الخالف طريقه والله يخسر
دنيا أو أخره أبتفكيره الأقصر
بخلاقه الحميده
باسط راحة أيده
كد ما الله بي زارع تواضع
................
يابو الكاظم أو يابن محمد
ياجد الرضا الساكن أبمشهد
سوت شيعتك للفرحه مربد
من كد ما تحبك فرحت أبكد
أمك بالولاده
الحد هاي السعاده
أو بصمت عالوفه أبعشرة أصابع
...................
خادم أهل البيت
الشاعر : أسماعيل الجوراني
السبت : 23/10/2021
مولد
لذكرى ولادة الأمام
جعفر الصادق عليه السلام
.................
أمبارك أمبارك
للي أجه أو شارك
يا جعفر الصادق
سجلنه زوارك
.................
1
في محفل الميلاد
جينه نريد أمراد
منك يبو الكاظم
الساكن أبغداد
يا سادس الأقمار
يا راعي الأستبصار
شيعة علي الكرار
عندك أجت خطار
كل تها تتبارك
من هلت أنوارك
يا جعفر الصادق
سجلنه زوارك
.................
2
كلمن حضر مسرور
هلت بشاير نور
مدرسه لهل البيت
عنده العلوم أبحور
وارث علم زاخر
لمحمد الباقر
يشهدله كل ناكر
غايب وذا حاضر
من حقها أنصارك
تتباها بخبارك
يا جعفر الصادق
سجلنه زوارك
.................
3
شيخ أو حفيد أشيوخ
ألها المعالي أتنوخ
العاملك بالضد
أصله أصل مشروخ
يا تاج فوك الراس
حكمه أو كرم وحساس
من شابهك بالناس
عمه البطل عباس
يالراهي مقدارك
والغانمه الجارك
يا جعفر الصادق
سجلنه زوارك
................
4
نتمنه تطوى الكاع
أوبرض المدينه الساع
نتواجد أحنه أوياك
و نبايعك أتباع
بيعة عهد بالروح
لو مهما بينه أيلوح
ظلم السقيفه أجروح
ما عنك أحنه أنروح
فرحتنه بصيارك
فرحة أهل دارك
يا جعفر الصادق
سجلنه زوارك
.................
5
يا شلوة أهل البيت
ب 17 هليت
وي والد الزهراء
أبهالمولد أتساميت
الأول أبو الزهره
نتبارك أبعطره
يا نسل هالشجره
يا لعمرك أبعمره
أشملنه بنظارك
شفعنه بوقارك
يا جعفر الصادق
سجلنه زوارك
.................
6
للفرحه ظل نيشان
زينه على الحيطان
ياس أو شمع وبخو
بيها الحفل يزدان
شيب أو شباب أطفال
كلها أبجهد فعال
هالخدمه راحت بال
هنياله كلمن كال
بيمينك أيسارك
تطعمها أثمارك
يا جعفر الصادق
سجلنه زوارك
...............
خادم أهل البيت
الشاعر : أسماعيل الجوراني
الثلاثاء : 19/10/2021
موشح
لذكرى أستشهاد النبي الأكرم أبا القاسم محمد عليه وعلى آل بيته أفضل الصلاة وأتم التسليم
................
اليوم أبو الزهره لفظ نفسه الأخير
أوعالجسد حيدر علي جوجه حسير
.................
عالجسد حيدر علي خير العمل
جوجه حاسر راسه ودموعه همل
والد الزهره عن الدنيا رحل
الجان توئم دنيته أبعسر أو يسير
....................
توئم الدنيا النبي السامي المقام
روحه فاضت والجسد ذاك الهشام
أمسجى والوجه أنشحب بدره التمام
أو مغرب الوحشه هدل ستره المرير
.....................
الليله ليلة وحشه متخومه أبخبر
28 من أخر صفر
طول أبو أبراهيم بالكاع أندثر
وآل عبد المطلب خسرت جثير
.....................
آل عبد المطلب شيب أو شباب
لو تهيل أسنين عالراس التراب
ما تجي الحزن الزجيه أبهل المصاب
لو صفه عدها الحزن عام النفير
......................
لو صفه عدها الحزن ليل أو نهار
ما تجي الحزن أم حسن ذرة غبار
أبحين أبوها شافته أبحال أحتضار
شوغه بعد الشوغه واتبها المصير
.....................
شوغه بعد الشوغه كم طالب طمع
ينسى أصول الدين و يغره الجشع
أبموت أبوها المصطفى أبحين السمع
أغراب شوم الدين ينعق بالهجير
....................
أغراب شوم الدين أبو الراي البدد
أبنص سقيفة ساعده لمن كعد
ويه كم هافي بخت شئومه عكد
لعنة الله أعليه معدوم الظمير
....................
لعنة الله أعله النكر حق البتول
والمشى مشيه أو ظلم آل الرسول
مدري لله الناصبي شنهي اليكول
من يصير أحسابه عند الله عسير
....................
خادم أهل البيت
الشاعر : أسماعيل الجوراني
الأربعاء : 14/10/2020
قصيده كعديه ( 3 ) نص
تأبين لرحيل المرجع الديني
سيد محمد سعيد الحكيم قدس الله سره
......................
حكنا اليوم أنهل المدمع
فاكد مذهب حيدر مرجع
تشهدله أبطون الأعلام
خرج آيات الأسلام
فاكد مذهب حيدر مرجع
................
أنثلم دين الله ثلمه من نعى الناعي الفقيد
اليوم نيبتنه جبيره أبسيد محمد سعيد
ناصر الحق الألاهي الراضي بالعيش الزهيد
مدرسة علم النبوه صاحب الراي السديد
الظل مجانه اليوم خالي
أبحسرة الفاكدله غالي
أنشيعه أبدمعه تلالي .. أو للحزن نقره نشيد
أبن الزهره الليله الزهره تحضرله أبقبره
يمه محمد أمك يمك وتريح صدره
نعشه أعله أمتون الخدام
مشيول أبهيبه أو أكرام
فاكد مذهب حيدر مرجع
..................
اليوم كل حوزه شريفه أمصابها أبفكدك عظيم
أتأبن أو هاجسها يهتف يا حكيم آل الحكيم
كوم طلابك تراها حالها أصبح سقيم
حاطه أبابك رحلها تنتظر درسك تقيم
والله فاجعها أرتحالك .. ماتت اللهفه أبوصالك
فدوه منيها أبخيالك .. الكل سؤال أنطيها جيم
طلاب الحوزه العلميه أو كل صاحب غيره
تنتظرك ويه المشايه من ديره الديره
تتعنه حسين الضرغام
ياسيد حافي الأجدام
فاكد مذهب حيدر مرجع
..................
عاودت ذكرى مصائب كربله أبكل الشعائر
لربعين حسين مقتل أقره من فوك المنابر
والله عطشانه المسامع والله متلهفه المشاعر
الصوتك الكله محنه الدفنته أبطون المكابر
لا تظل هالسنه غايب .. أمتانيه أهل المواكب
جيتك يا خوش صاحب .. الشوفته أتكحل النواظر
أبأخر جمعه أبشهر أحزان حسين أتجافينه
ونته أمعودنه أعله المنبر تقره أتبجينه
ياهو اليقرى هذا العام
مقتل ويبجي العوام
فاكد مذهب حيدر مرجع
...................
خادم أهل البيت
الشاعر : أسماعيل الجوراني
الأثنين : 6/9/2021
نوحيه : أساسيه
لذكرى أستشهاد الأمام عبد الله الرضيع عليه السلام
وعن لسان حال أمه الرباب عليها السلام
....................
خل أبوسه أبمنحره البوسه الأخيره
حرمله أمجند سهم ميت ظميره
ويه نحر الغالي
أوداع أخير أبالي
حرمله أمجند سهم ميت ظميره
---------------
يا سهم من تِنحَره أوتذبح وريده
أشلون شوف أتفرفر أعله أحسين أيده
أحساسه دافي أوليدي وحساسك حديده
الله يلعن حرمله الهاي المكيده
راح أجي أمنالتالي
أوداع أخير أبالي
أبني عبدالله ألي أهل أوعشيره
--------------
يا سهم يلـما عرف كلبك خطايه
من شحب وجهه أوصفه أبالون العبايه
راجعت دورك كلت صعبه النهايه
لو عشكت الدور ياسهم الرزايه
سال دمه أكبالي
أوداع أخير أبالي
نكبتي أبعبد الله ياعالم جبيره
-------------
يا سهم يالحتمت وجهت مصيره
كلي من يمته العطش تهمه خطيره
أمغمس أبسم حرمله الماعنده غيره
جيت متحامي أعالنحره أبهالظهيره
الحسره منك فالي
أوداع أخير أبالي
لاخر أنفاسي الحزن باقي شعيره
--------------
يا عرف حلل فعل هاي الرزيه
أبسابق أصرار أو ترصد غير أميه
راح أحكمك ياسهم هاي المسيه
أبمحكمة عدل الولايه الحيدريه
أول أبلا تالي
أوداع أخير أبالي
المثلي مفجوعه أبولد حيرتها حيره
--------------
يا ألم شاخص يظل حد القيامه
الليل حلفه أبخته لو جلجل أنامه
يا سهم عبد الله ياأكبر ظلامه
سولت ألساني أبمعاناة اليتامه
الليل يدري أبحالي
أوداع أخير أبالي
ذكره حلوه أتهيج أئالامي المثيره
--------------
يا حزن روحي الصفه أبعالم خياله
أيزف ونين أم الولد حالتها حاله
ضيعت درب الرجه أو خيط الدلاله
بين موقف محنته أو هالت جماله
أوبين مهده الخالي
أوداع أخير أبالي
كبل ماحكم السهم ينفذ مصيره
----------------
خادم أهل البيت
الشاعر : أسماعيل الجوراني
الأحد : 2/10/2016
نزله : محرم 1442
لذكرى أستشهاد
الأمام عبد الله الرضيع عليه السلام
....................
هلهلي الحلو الشمايل هلهلي
كومي يا زينب يبت حيدر علي
..................
مثل أخوته أبكربله كبش الفده
بالسهم مذبوح من نحره غده
والله عبد الله شهم هوه البده
أو كال نبلة حرمله ودوها ألي
..................
يوم شاف حسين محد ناصره
كطع أكماطه كرامه الخاطره
شرع أجفوفه أو دمع عينه جره
غيرة الساده البيه أتخيلي
...................
ضد أميه الماجنه بيرق نصر
عالي صار أبكربله لله الشكر
صار صيته أبصيت ربات الخدر
أنعم أو أكرم مكارم تنتلي
...................
عمره 6 أشهر ولكن غيرته
ما رضت لحسين تخمد ثورته
مو ذبح نحره أبسهم بس سيرته
سيرته أكبر بعد مما يلي
....................
كثر الله خير عملة كربله
كشفت الحقد الحقيقي أبمقتله
ماي من يسكونه سهله المسأله
ليش نحره أبحر سهمهم ينصلي
....................
أمن الوريد أو للوريد أبيا ذنب
دمه بيد حسين ظل يشخب شخب
أبكثر ما نحره ترف غيره خصب
أبجيشهم يا كربلاء أتزلزلي
...................
مات عبدالله أوبعد ما منه حس
والجسد ذبلان من حر الشمس
هذا يا زينب ترى أبذاته درس
آل هاشم مشعل الكل مبتلي
...................
كومي يخت يحسين زيدي النايبه
للرباب أدموع عالخد ساجبه
يمه عبد الله تون وتعاتبه
أمك أبهالساعه موقفها جلي
.....................
يا بعد أمك ألك فدوه رحت
أبجي ليل أنهار بفراكك صرت
من صبر زينب صبر بعدك ردت
كون كبلك يالولد حل مقتلي
....................
صورة الطف خالده اليوم الجمع
أهلال عاشور أشيهل نوره يشع
للشمع مقيات مقيات الدمع
أبحضرة الكاروك جي منه خلي
.....................
خادم أهل البيت
الشاعر : أسماعيل الجوراني
الجمعه : 28/8/2020
أبيات أبو ذيه
لشجاعة الأمام
علي الأكبر عليه السلام
...............
تقدم للحرايب شاب من شاب
أوعلى شاكل ابوه الولد من شاب
سرج ظهر المهر عالمهر من شاب
للأكبر هلهلهت كل هاشميه
..............
الأكبر ذخر للطف جاب الحسين
ترس غيرة هواشم جاب الحسين
لون مو مهره شت به جاب الحسين
يكولون أعله وجه الكاع أميه
................
خادم أهل البيت
الشاعر : أسماعيل الجوراني
الأحد :14/4/2019
..................
1- من شاب : جميل جدآ
2- من شاب :عندما بلغ سن الشباب
3- من شاب : ركب على المهر
...................
1- جاب الحسين : أنجب ولد
2- جاب الحسين : الجيب
3- جابالحسين :وحق الحسين
هوسات
لشجاعة الأمام
علي الأكبر عليه السلام
....................
من برز للحومه الأكبر مثل سبع الكنطره
دايره بالسيف خطله أو صار وسط الدايره
أوكام يا فارس يجيله راسه غاد أيكتره
ها ها ( من عمه )
أتعلم شمراته من عمه
....................
كثر الشوغات بيهم للحرب لما أنبره
بين خاتله أبحفيره أوبين جثه أعله الثره
بالشجاعه(علي )جده (علي ) أويندب حيدره
ها ها ( ياهو اليكدر )
يلوي أذراعه ياهو اليكدر
...................
بكر بن غانم تورط ورطه من واجه علي
جابه يمنه أوجابه يسره والمراجل تنتلي
أو طكه طكه حيدريه أوغبره كامت تنجلي
ها ها ( يتباها أبزوده )
والأكبر يتباها أبزوده
......................
خادم أهل البيت
الشاعر : أسماعيل الجوراني
الأحد : 14/4/2019
موشح : 1442
لشجاعة الأمام
علي الأكبر عليه السلام
....................
اليوم نجل حسين شلوة حيدره
أيطالب أبثارات سبع الكنطره
....................
أيطالب أبثارات عمه العالنهر
أمكطع الجفين والهام أنطبر
علي الأكبر كربله نادت حضر
الجيش ناده أدخيله ليث القسوره
....................
الجيش ناده الجيش هالنشمي النزل
بالحرب مغوار جن جده الفحل
بيها شردت بيها كاتلها الوجل
بيها دفنت روسها أبنص الثره
..................
بيها مدري أشبيها من كد الرعب
صعد للزرودم من عدها الكلب
حكها لنها أتشوف كامت تنشطب
أكبالها الروس أو جثثها أموذره
...................
الروس فوك الروس تله أبكربله
صارت أو جم فارس أبعاها أبتله
والله نشمي أو حيد أبن عقد الوله
راجله أو فرسان خله أمجزره
...................
راجله أو فرسان صيت ألهم أمس
جثه طاحو عالأرض ما بيها حس
الثار عمه الحيد خالسهم خلس
بالخيم هلهلت جم أمخدره
.................
بالخيم صوت الهلاهل لن دوه
عمته فدوه الثار شيال اللوا
خل يتك بنفاسهم عذب الهوا
الشور شورك ونته بيهم قرره
..................
الشور شورك قرره أبهمه أو حزم
المو زلم خليها لنها مو زلم
أو داعتج يا عمتي أثلمهم ثلم
من زمان اليوم هذا أتخطره
....................
من زمان أو سيفي يسئلني أشوكت
تلفي عملة كربله أو صبرآ كلت
بالغمد يا صاحبي من كد ما نمت
جاوب أستحيف لأن حيلي أنهره
....................
جاوب أستحيف مثل هذا العدد
اليوم ما خليه بالحومه قدد
من سمعني صحت يا حيدر مدد
كيف أو يا كيف كيفه أتصوره
..................
خادم أهل البيت
الشاعر : أسماعيل الجوراني
الجمعه : 28/8/2020
نزله
في حق شجاعة وشهامة
الأمام علي الأكبر عليه السلام
................
هذا ميدان الحرب
الكدها بيكم خاليطب
سيفي بيدي .. الحومه عيدي
ماكو للشارد درب
..............
سيطره الأكبر نصبله .. أشلون شيال اللوا
كامت أنفاس العساكر .. كوه تتنفس هوا
أوغبرت سوح الحريبه .. ونحجب بيها الضوا
أو من ثغابير التراب .. أنزاح عسكرهم خوا
كام يحصبهم حصب
روسهم يكطع غصب
يا يزيدي .. الحومه عيدي
ماكو للشارد درب
................
أشبه الناس أبمحمد .. وبعلي عقد الوله
أبكربله ثبت وجوده .. حكها تفخر كربله
مشكل الجيش أبيمينه .. وبيساره مشكله
أمنين ما ملتي غرفتي .. هاي مكيوله أله
بالشجاعه أشكد صلب
موقف العسكر صعب
الحز وريدي .. الحومه عيدي
ماكو للشارد درب
..................
موهبة فن الشجاعه .. كلها بيه أمسطره
سالفه أتجر السوالف .. جنه سبع الكنطره
لا وحق جده الصميده .. جنه جده حيدره
خله كراته اليكرها .. صوره جدآ نادره
تشهد أبطون الكتب
زارع الحومه رعب
كل صعيدي .. الحومه عيدي
ماكو للشارد درب
....................
ضهضب الشاب الحسيني .. ياعلي حيدر مدد
مايثني الضربه بيهم .. هالشبل من هالأسد
راجله أوفرسان صارت .. كلها بالحومه قدد
هلهلت ليلى لبنها .. نامي ياليلى رغد
ناده والمدمع يصب
أغلب أو ما أنغلب
ذولي صيدي .. الحومه عيدي
ماكو للشارد درب
....................
عفيه نوماس الهواشم .. بيه ينشد الظهر
واجه الوحده العساكر .. هوه واحد ونتصر
بالوجه محد كدرله .. بالغدر أصبح وذر
شنهو كلنه أبحق الأكبر.. ما يجي نكطه أأبحر
بالخلق طبعه خصب
طيب أحنين عذب
من وعيدي .. الحومه عيدي
ماكو للشارد درب
...................
خادم أهل البيت
الشاعر : أسماعيل الجوراني
الأحد : 8/9/2019
نزله محرم 1443ه
لذكرى شهادة الشباب الحسيني
الأمام علي الأكبر عليه السلام
..................
يوم الأكبر ضهضهب أبميدانها
ختلت أركاب الزلم ببدانها
................
1
يوم كابلهم أبن شيخ العرب
زمهرير الموت يلهب بالركب
خنست أصوات العدا بعد الصخب
والطويله ألسان كص ألسانها
.................
2
دب دبيب الخوف بكلوب الزلم
داخو أو ظلو جسم يردم جسم
جنه عمه الحيد شاخص مبتسم
واثق الخطوه أبعظيمة شانها
..................
3
هاشمي أو مغوار بالهجمه نجر
يعرف أرض المعركه شبر أبشبر
وين ما حط الجدم يهزر هزر
بالعساجر راجله أو فرسانها
................
4
شاب عشريني العمر وسمه علي
أبجيش أبن سفيان خالي مختلي
أبخزرته أو بالسيف يصليهم صلي
حكها هاشم تفخر أبفتيانها
................
5
نشمي أبن نشمي أوغضنفر بالحرب
أبعمر الأكبر ما حصل واحد صعب
لا فتى من لا فتى أبيوم الظرب
حملته حملة علي نيشانها
...................
6
يشبه الهادي النبي أبسيره أو شكل
يعني بالمعنى الأدق كول أو فعل
نسخه من طاها النبي طبق الأصل
ونته من هاي أفتهم عنوانها
...................
7
أبيوم ثامن من فجيعة كربله
شب على ظهر المهر وتخيله
يمنه جاب الجيش يسره أو بهذله
العدله تنكال أبالسن عدوانها
..................
8
زمجر أو ضهضب غضب لمن برز
أنه شبل حسين بالحومه أرتجز
أبصدر أبن غانم علي سيفه غرز
أو جثته الشطرين كص جثمانها
...................
9
غدرته أسيوف الغدر من الظهر
جسمه عالتربان خلته وذر
يمه أبوه حسين بمصابه حضر
راح يا زينب نده سكانها
...................
10
ليلى أمه أبحال ما يحسد أبد
طبت الخيمتها مو طبت رغد
طبت أو تندب علي يمه الولد
أمك أتريدك ترد لحضانها
..................
خادم أهل البيت
الشاعر : أسماعيل الجوراني
الأحد : 27/6/2021
نسألكم الدعاء
وقراءة سورة الفاتحه
لروح والدي وروح والدتي
نزله 1443ه
لمديح وشجاعة
الأمام القاسم أبن الحسن عريس الطفوف
..................
من تراوه للحرب جمع الحسن
جمع أبن سفيان شل حيله الوهن
.................
1
يا أسير الكربه أرخصلي أطب
أجيوش أميه اليوم أترسها رعب
بالوصيه النصرتك كلبي خصب
أبلامتي أو بالسيف أتحدى المحن
................
2
أوادع أخير أويه أمه بطناب الخيم
أتشمه ويشمها الأشم وبن الأشم
أو جلبن بذياله نسوان الحرم
هودج الزفه خواتك بخرن
................
3
طك عرج كصته أو بده بالميمنه
سيفه بيده أو الله بيهم مكنه
حرمله خاتل شرد شمر الخنه
أمخدرات حسين بيه أتباهلن
....................
4
صاح بيهم صيحه جسام الفطن
اليوم أراويكم شنو أتجيب البطن
كشه أنتو أبريح ما ألكم وزن
ويلكم من عزمي يا أهل الفتن
.................
5
ألتقى الجمعان والموقف خطر
أو غربت شمس العلا أبوكت الظهر
أو صافرات أنذار دكت للحضر
جيش بالميدان كامل ممتحن
..................
6
هاشمي أو صنديد بالحومه كلف
صرصر أو يحصد عمرهم للحتف
عالشجاعه البيه محد يختلف
الغيره والأخلاق بجبينه أنقرن
..................
7
ضعضع الجيش أبثبات أهل العزم
عالزلم لو غار تلكاها الزلم
بين شارد بين خاتله أبجسم
ما هنه جفنه أبمالذات الوسن
....................
8
أبكربله أم البله لمن برز
جيش أميه يوكف أكباله عجز
أبحين تربات الحسن صوته أرتجز
العلاوي الصوته كلهن هلهلن
....................
9
بالغدر كدروه مو صدر أبصدر
شسع نعله الي أنكطع ساعة صفر
طاح مصيوب أو عله الغبره يخر
دمه والدلال من عنده سكن
....................
10
أعلام حربي الجاسم أظل نينوى
هيجي شاب أو عنده هالكد مستوى
أبزود عباس الشهم راعي اللوى
أتشبه أو زود الحسين المرتهن
...................
خادم أهل البيت
الشاعر : أسماعيل الجوراني
الأثنين : 12/7/2021
نسألكم الدعاء
وقراءة سورة الفاتحه
لروح والدي وروح والدتي
فزاعيه : محرم 1443ه
لذكرى شهادة قمر العشيره
أبا الفضل العباس عليه السلام
وكأني بحال أم المصائب زينب عليها السلام
.................
زينب أتنادي أبو فاضل
وبو فاضل عالنهر
لافظ أنفاسه الأخيره
أو ظهر الحسين أنكسر
وا ويلا يعباس
وا وايلا يعباس
..................
1
طول الغيبه كفيلي
أتنادي والمدمع جره
والله ناغزني دليلي
جان سبع الكنطره
من أناديله يجيلي
هسه عني أشئخره
ساعه ويوافيني ليلي
الخيمه مثل المكبره
ليلي لو جلجل سواده
خوفي عباس الكمر
لافظ أنفاسه الأخيره
أو ظهر الحسين أنكسر
وا ويلا يعباس
وا ويلا يعباس
....................
2
عالنهر شو ماكو رايه
ترعب أكلوب الملا
ساكنه أحتوف المنايه
خيل ماكو مجفله
لا ضجيج أو لا عيايه
تنذر أبفد معضله
أبشهر عاشور الرزايه
أشبيه عملت كربله
يعني معقوله كفيلي
وذرو جسمه وذر
لافظ أنفاسه الأخيره
أو ظهر الحسين أنكسر
وا ويلا يعباس
وا ويلا يعباس
...................
3
يا هو ياخذني المجانه
أهناك صوب المشرعه
حتى أذكرنه أبحنانه
وهمس أبنص مسمعه
جيت أذكرك بالأمانه
البيها ذاتي أمشبعه
أنه هوه أو هوه أنه
أرد أعيشن مصرعه
أوياي أكبعنه أبعباتي
وغسل أبدمعي النحر
لافظ أنفاسه الأخيره
أو ظهر الحسين أنكسر
وا ويلا يعباس
وا ويلا يعباس
...................
4
أبخيمة العباس لنه
أتربع حسين أو كعد
هل دمعته أو جرله ونه
بيده جر منها العمد
جنه راد أيكول جنه
عفته عالشاطي جسد
من أبو فاضل الظنه
كطعي يا زينب بعد
خل يجن سكنه أو رقيه
أو يدرن أبهذا الخبر
لافظ أنفاسه الأخيره
أو ظهر الحسين أنكسر
وا ويلا يعباس
وا ويلا يعباس
....................
5
لا يمينه أو لا يساره
أشلون عالغبره هوه
تندب أصوات الحياره
والكلب منها أنجوه
والله للشيعه خساره
أيموت شيال اللوه
أستشهد أبكامل وقاره
الزوده تشهد نينوه
عالكتايب غار غاره
الجيش نصين أنشطر
لافظ أنفاسه الأخيره
أو ظهر الحسين أنكسر
وا ويلا يعباس
وا ويلا يعباس
....................
6
صاحب الذات الحنينه
كافل الحره الأشم
الجابها من المدينه
الكربله أبغيره أوحشم
جف يساره أو جف يمينه
أنكطعن أو طاح العلم
أو بالسهم مطفيه عينه
أو نام بالجربه سهم
ما بقى ماي أبجربته
أو بالعمد راسه أنطبر
لافظ أنفاسه الأخيره
أو ظهر الحسين أنكسر
وا ويلا يعباس
وا ويلا يعباس
...................
7
الشام متروسه شماته
السوك مليانه غرب
وينه جا كافل خواته
العند الملاكه صعب
عالرمح راسه أشحلاته
بالسبي صاحب درب
ميت أو حتى أبمماته
تارس العسكر رعب
راح أجاوب للسئلني
أبداعي مدعاة الفخر
لافظ أنفاسه الأخيره
أو ظهر الحسين أنكسر
وا ويلا يعباس
وا ويلا يعباس
...................
خادم أهل البيت
الشاعر : أسماعيل الجوراني
الخميس : 15/7/2021
نوحيه
لذكرى أستشهاد سيدة نساء العالمين
الصديقه فاطمة الزهراء عليها السلام
---------
أهل الرجس هاليوم كسرو عليه الباب
أو بسمار يا والدي من عنده ضلعي أنعاب
جَيت أشتكيلك جَيت
دَشو علي للبيت
أبجَف أدفعوني أبجَف خِدي أنسطر ياياب
-----------
نِزلَتْ مَصايبْ عَلي لو نازِلَه أعله الجَبل
أويَه الكاع جا ساوِته يا والدي بـالعَجل
يا والدي المصطفى أتمَنه كَمت الأجل
كَبلك عَسن مَيته أولابيه هالشي حِصل
ريتَك شِفت ياريَت
بيناتهم ظَليت
يَالِمني كَسر الضِلع وبَكَلبي مِيت أصواب
------------
كَشرو ناب الحِقد ضدي أوهدَوني الجِفه
ومَجنيه أصبح عَلي مو صِدفه عن مَعرفه
بابي اللي من الخَشب بسمار مِنهَ لفه
وتَربع أبصفحتي وَصبحلي كُنيه أوصفه
أبدَم صَفحتي أتحنيت
وَنت قَهر وَنيت
يَا بت رَسول أونبي مَر بيهه هَيج أمصاب
------------
يَم بيتي جَابو حَطب أو شعلو مَشاعل نار
منها أنشمَر عَالسكف منههَ الوكَع بالدار
مَابيهْ أعله المَشي أمنصَوابي حِيلي أنهار
كَمت أزَحف أعَله الجَمر والجَمر خَله آثار
مِن الألَم نَادِيت
يَا وَالدي أتَجويت
شمسويه عدهم ذنب وختنك بالعطاب
-------------
كَسِر الضِلعْ والعَصر والدَفعه والسَطره
هَانن لَونْ حَي بِقه المِحسن يَبو الزَهَره
يَومْ أعلَه يَوم اليِمر جِنت أنه أنتَظره
سَويتْ مَهدهَ أبئدَي بـالخَيط وِالأبره
أنتَظره يِملِي البِيتْ
أبحسِه أو لَجَنْ مَدرِيتْ
أبطَرفَة رِمش مِني أيروح أوَيه ريِح الهابْ
-------------
جَازو أحسَانك غَدر بالسَان نَابي أوفِعل
أومنهم مَصَايب شِفتْ مَا تِنعِقل بـالعَقل
بَمتِوني خَلو أثَر يَاكِل أبَروُحي أكِل
أوكَلها أبكِتَر وِبكِتَر لَمَن سَطَرني النَذل
أبَهالَحظهَ إنه أتمَنيِت
كُونكْ عَدل مُو مَيتْ
يَاعِزوتي أبَدنيَاي أنتَه أوعَلي بو تراب
------------
خادم أهل البيت
الشاعر أسماعيل الجوراني
أبيات نعي فصيح
لمظلومية سيدة نساء العالمين
السيدة فاطمة الزهراء عليها السلام
................
هجمو على دار الزكيه الطاهره
في ظاهره ليس كمثلها ظاهره
قد أضرمو نارآ وبات ضريمها
يلهب أرياش الطيور الطائره
وستوقدو مشعل يحرق دارها
والنار أضحت حولها متناثره
أقدامها تكوى وتكوى كفوفها
وعباءة الزهراء نارآ ناخره
وتهافتو جمعآ على بابآ حجب
أم الحسين والنوايا غادره
وكأنهم عدة وحوش بغابتآ
قد هاجمت في رغبتآ متواتره
فريسة أستجدت العطف وما
عند الوحوش عطفآ شاعره
نشبو المخالب والنياب كشرت
وقوى الفريسة غائره
ما ذنبها الزهراء يكسر ضلعها
ما ذنبها تجهض جنينآ قاهره
ما ذنبها تطفى لها عين بكت
فقد النبي لقيام يوم الأخره
................
خادم أهل البيت
الشاعر : أسماعيل الجوراني
السبت : 13/11/2021
هوسات جنوبيه
لذكرى ولادة النبي الأكرم
أبا الزهراء محمد عليه وعلى آل بيته أفضل الصلاة وأتم التسليم
...................
أبو الزهره الزجيه فخر عزتنه
هاليله أنولد وحنه أعله فطرتنه
آيات السعاده أبشوك لمتنه
ها ها
أنهلهل ونعلي الصفكه
بالحضن الجانه أنشبكه
أو يارب باركله أبرزكه
أو يارب باركله أبرزكه
ها ها ( و بذريته )
يارب باركله أبذريته
...............
أعله حب طه النبي وبذكرى ميلاده
أجينه اليوم نحيي العاده كالعاده
بينه الأجه الحاله الجايب أولاده
ها ها
بالما زل مره ألسانه
أو منزل وحي أبقرئانه
أكبار أزغار الفرحانه
أكبار أزغار الفرحانه
ها ها ( أبغاليها )
وتهني الزهره أبغاليها
.....................
خادم أهل البيت
الشاعر : أسماعيل الجوراني
الجمعه : 22/10/2021
هوسات جنوبيه
لفرحت الزهراء ومديح الصحابي الجليل
أبو لؤلؤه رضوان الله عليه
................
(أن يكن ) تاكل أبكلبي أي وحق ركن الحطيم
هاك مني الضربه هايه النابعه من الصميم
حتى أرسلك يابو حفصه الجهنم مستقيم
ها ها
يالحق الزهره أتغصبه
من جف الخايف ربه
تستاهل هاي الضربه
تستاهل هاي الضربه
ها ها ( أو تاريخه )
يا عار الدين أو تاريخه
..................
أبفرحت الزهره فرحنه والفرح بينه كبر
بيد أبو لؤلؤه النشمي هلك الطاغي عمر
أو هسه مدري أشلون حاله وبسقر المستقر
ها ها
كاسر ضلعين الزهره
محروك أبقبره أو حشره
واجبنه الباري أنشكره
ها ها ( أنهنيها )
أو واجبنه الزهره أنهنيها
...............
خادم أهل البيت
الشاعر : أسماعيل الجوراني
الجمعه : 15/10/2021
أعكيلي
لذكرى أستشهاد
النبي الأكرم أبا القاسم محمد
عليه وعلى آل بيته أفضل الصلاة والسلام
...............
دارك بعدك ما حشموها
................
يا بو القاسم عايش ريتك
وتشوف أشصار أتمنيتك
أشلون النار أتشب أبيتك
وبنيتك عالخد سطروها
.................
يوم البي غمضت أعيونك
ولسانك عضته أسنونك
ألتمو مو حتى أيشيعونك
لمتهم بالضد كصدوها
.................
لمت شر صارت لمتهم
وطماع الدنيا أستهوتهم
باعو دين الله الدنيتهم
وحقاد العدهم علنوها
.................
كلمن أنه أيكول أو أنه
نفس الرغبات الشيطانه
متره الواحد طول ألسانه
وحدود الباري أتعدوها
.................
كل واحد بين مكنونه
طمعان أبكرسي أيخلونه
ناره أبأيده الشر بعيونه
والنار أبدارك شبوها
.................
حيدر بيك أيغسل وحده
يا نفسه أوعافيته أوسنده
بيك أيجفن دمعه أبخده
أوهاي الحيدر ماعدوها
.................
الله أيصبر حيدر بعدك
دفانك والجهز لحدك
شابك نعشك خده أبخدك
أوفرصتهم هاي أغتنموها
..................
عكدو نيه أشرار النيه
أقطاب الدوله الأمويه
دين الله أيحرفونه أشويه
وحكوك الزهره أيغصبوها
..................
ألحك يابو الزهره الزهره
بالدار الوحدها أوعشره
هجمو ضدها أبدفعه أو سطره
عشرتهم لا ما أستخطوها
..................
أبكسر الباب أضلوع الكوثر
كامت تتفتفت تتكسر
بسمار أنصابت والدم خر
أوصابو محسنها الصابوها
...................
خادم أهل البيت
الشاعر : أسماعيل الجوراني
الاثنين : 4/10/2021
أبيات أبو ذيه
ليلة ويوم عاشر عاشوراء
عن لسان حال
الأمام الحسين سيد الشهداء
عليه السلام
.................
مره سكنه
يصد مره الرقيه مره سكنه
أو ندب ياربي كلبي مره سكنه
أبعصر عاشر محرم مره سكنه
أو لكه أحيود النبي جتلى رميه
.................
تميت
يعاشر من شهر عاشور تميت
وحيد أو ناصري أعله الكاع تميت
جانت ناكصه أو هالساع تميت
أنذبح وم الخدر تمشي سبيه
...............
خادم أهل البيت
الشاعر : أسماعيل الجوراني
الخميس : 19/8/2021
1. مره سكنه : أبنته السيده سكينه
2. مره سكنه : ألهم قلبي الصبر والسلوان
3. مره سكنه : مرت قافله
..............
1. تميت : بقيت وحيدآ
2. تميت : تم ميت
3. تميت : تمت : أكتملت
نزله : أعكيلي
لذكرى أستشهاد الأمام عبد الله الرضيع عليه السلام
................
بكماطه أوليدي أمجفنينه
................
يابس كلبه أوذبلت شفته
جابه حسين الخاطر حته
يسكونه أو تتعدل صحته
مايدري أبسهمه أمحضرينه
................
مذبوح أوليدي أمن المنحر
شفته أبعيني أوجنت أتصور
باجر يزحف يمشي أو يكبر
وتربع بالخير أسنينه
................
بيد حسين أوذبحو نحره
هومش بيده أوصد أبنظره
جنه أبهاي اللحظه الزهره
شايف ويهومش بيدينه
.................
حنيه أبعبد الله أشكدهه
ضحكت حلكه أشكد وحدهه
سكنه أيناغي أيشمهه أبخدهه
مشتاكه اللشماته أسكينه
................
كلما أشوفن مهده الخالي
صورة وجهه أتصير أكبالي
يابعد أمك يبني الغالي
حنينه الصوتك حنينه
.................
دورة محبس نحره أوخده
جان أمفتح مثل الورده
من جده المختار أوجده
حيدر أيمان أمرضعينه
...............
جبته أبحضني أوبينه أوبيني
حاجيته أو ظنتي أيحاجيني
عبد الله أفراكك سابيني
وعداي الشر أمبيتينه
...............
باب الحاجه أبيوم المحشر
عبد الله أوشدتكم يحضر
هلو الدمعه أكبال المنبر
مأجور الدمعاته أبعينه
...................
خادم أهل البيت
الشاعر : أسماعيل الجوراني
الثلاثاء : 18/9/2018
نزله
عن لسان حال السيده رقيه عليها السلام
مخاطبه عمها قمر العشيره أبا الفضل العباس عليه السلام
بعد أستشهاد أخيها الرضيع
.......................
عمي ياعباس أبن عقد الوله
صوبت عبد الله نبلة حرمله
......................
عمي ياعباس عبد الله الشهيد
أنذبح من الوريد أوللوريد
ياوصف يرهم علا زمرة يزيد
الذبحت أشبول الهواشم والوليد
أوضوكت دلالي حنظل كربله
صوبت عبد الله نبلة حرمله
....................
عمي ياعباس عبد الله الطفل
يا ذنب سواه خاطر ينكتل
والله محتاره أو أون يابو الفضل
وحلم أبيا يوم يلتم الشمل
حافيه أو أركض صرت بين المله
صوبت عبد الله نبلة حرمله
......................
ذابح أرياكه العطش رايدله ماي
ونكتل مذبوح والغصه أبالهاي
مات محروم النفس نسمة هواي
ونتهى هاليوم بالدنيه رجاي
حسره بكليبي أوعله الحسره بله
صوبت عبد الله نبلة حرمله
......................
بعده أخوي أزغير ما كمل سنه
ما أرتاح أبعمره لاشاف الهنه
أيعينه الله الينذبح بيده الظنه
والدي ياعمي علمني أشجنه
أعزاز كلبه أعله الرمال أمجتله
صوبت عبد الله نبلة حرمله
.......................
الماي ماريده بعد منك تعال
يا كمر هاشم يصكار الرجال
مات أخوي الما شبع من الدلال
أبيا زلال اليهنه بعده أبيا زلال
حنظل الماي أبالهاتي أشما حله
صوبت عبد الله نبلة حرمله
......................
بس جسد ياعمي يم المشرعه
أجفوف أديني يا رقيه أمكطعه
أصواب عبد الله أخوج أومصرعه
طف جديد أومحد المتوقعه
منزلة عبد الله أشرف منزله
صوبت عبد الله نبلة حرمله
....................
عمي ياليث الحرب سبع الطفوف
يا سيوف اللكطعت منك جفوف
ما أصدك حته لو بعيوني أشوف
يمنتك ويسارك أبصف الجروف
ونتظر منك بعد جلمة هله
صوبت عبد الله نبلة حرمله
.......................
عينج أبعين الله وبثوب الصبر
أتوشحي هاليوم يا بعد العمر
هاي نعمه أو واجب النعمه الشكر
بالخرابه ينتظر طولج كبر
فوك راس أحسين أبوج أمجبله
صوبت عبد الله نبلة حرمله
.....................
راح أظل أحسب وعاود من جديد
أوعالهزل مسبيه بجفوفي الحديد
أكطع أدروب السبي الخربة يزيد
أوبالطشت أتنطره راس الشهيد
حته أحضنه أو روحي تصعد للعله
صوبت عبد الله نبلة حرمله
.................
خادم أهل البيت
الشاعر : أسماعيل الجوراني
الخميس : 17/8/2017
أبيات نعي
عن لسان حال
ليلى أم الأمام علي الأكبر عليه السلام
.........................
بسيوف العدا الليله توذر
يا شبان جسم أوليدي الأكبر
أنصبو للبجي والنوح منبر
أبمجالسكم ترى الزهراء تحضر
.................
أريد أعله الولد رادود ينعه
أو طفل بيده بخور أوطفل شمعه
ترى أوليدي علي مكسور ضلعه
وانه أبخيمتي من ون أسمعه
.....................
شبيه المصطفى حلو المعاني
عليه اليوم حاربني زماني
قتيل أرداه وانه ورداني
بحور النايبه أبهاي الثواني
........................
خادم أهل البيت
الشاعر : أسماعيل الجوراني
السبت : 7/9/2019
أبيات نعي
..........
عن لسان حال أم المصائب زينب تخاطب الامامين علي الأكبر والقاسم العريس
..................
أون نوبه أعله جاسم نوبه الأكبر
شباب أوطولهم بالدم تعفر
عله التربان ويلي أشبول حيدر
شفتهم والدليل أحتار ونطر
أوعليه أبكربله حل يوم الأكشر
صحت وعداي تتباجه عليه
...............
عمتكم سبيه المعشر الشام
يالكبر أنده أو أنده يجسام
وشبج من حزن عشره عله الهام
دليلي الشوفة الشبان محتام
وين الله أوتعاود ذيج الأيام
وشوفن طولكم مجبل عليه
...............
علي الأكبر أوجاسم ياضوه العين
يا شبل الحسن يا شبل الحسين
أحير أمنين أبدي أوأنتهي الوين
شباب أوما وصلتو العمر عشرين
أوعله الغبره أشوفنكم مطاعين
عمت عيني عليكم يالتجيه
................
خادم أهل البيت
الشاعر : أسماعيل الجوراني
الثلاثاء : 22/8/2017
أعكيلي : محرم 1442
في مديح ورثاء الشباب الحسيني
الأمام علي الأكبر عليه السلام
.................
يا الأكبر غير أعله العسكر
.................
يا عطشان أو يلهب جبدك
غير أبغيرة حيدر جدك
يخسى الجيش أيصير أبكدك
ونته البالنوماس أمعتبر
................
ذلهم خلهم واحد واحد
زاد السيفك جندي أوقائد
بين الميت بين الشارد
بين اليلعن حظه الأغبر
...............
خلي الجيش أبكل تعداده
لو ذكرو كدامه الساده
يذكر من ضيع مشراده
يوم الباشط بيدك عتور
...............
ضد أيزيد أو ضد أعوانه
أو ضد أهل الذات الخوانه
حيفك خله أيبرهن شانه
هاليوم أنه الموت الأحمر
................
صيتك محد واصل صيته
الطاها الهادي أبعترة بيته
أشبه خلق الله أبشخصيته
نور الهادي أبوجهك أزهر
................
أفزع لحسين أو ضحيله
أو سر قلب الزهره أبهاليله
باب الجنه أمشرع حيله
لجلك ياالأكبر ومبخر
...............
أمك تدعي أو تجري الدمعه
أبجاه الدين أونهجه أو شرعه
يارب سالم ردلي أبسرعه
أبني أبجاه الزهره الكوثر
...............
من عالي السبعه العلويه
صوت أيأذن بحسينيه
ناعي أو رادود أو لطميه
مجلس وجدادك بي تحضر
...............
شاب أو توها أسنينك خضره
أو واجب دين الهادي أتنصره
جاسم كبلك ضحى أبعمره
شاهدت أبعينك هالمنظر
...............
صاحب نخوه أو صاحب غيره
طيب ذات أو طيب سيره
بيك النيبه اليوم أجبيره
وحسين الفكدك يتحسر
................
كرت جدك حيدر كرها
أو هالثوره أبدمك أنصرها
أمك عاد الله أيصبرها
لو جسمك بالحومه أتوذر
.................
شد الهمه أو غير أبهمه
محد ينسالك هالخدمه
جف أيلزمه أوشفه أتشمه
شباكك واليفياف أخضر
.................
خادم أهل البيت
الشاعر : أسماعيل الجوراني
الجمعه : 28/8/2020
نزله : فزاعيه
في حق شجاعة الأمام علي الأكبر عليه السلام
.......................
اليوم أبن شيخ الهواشم .. ماثنه أحجاياته
كال راس أبراس أطكهم .. داخو أبطكاته
علي الأكبر بادهم
ضيعو مشرادهم
النشمي من حملاته .. داخو أبطكاته
...................
علي الأكبرمن لفاهم شعتراهم من وجل
عاودت صفين كالو عاودت حرب الجمل
يعني بلحومه تراوه علي أبو الحمله الفحل
نازل أو فقاره بيده جابته الغيره أبعجل
والنعم منك علي
ذكرتهم بلولي
اليامه من صولاته .. داخو أبطكاته
................
مالت الكاع أعله يمنه يسره مالت بيهم
رد عدلهه النوب خسفت من حدر رجليهم
كلهه خليهم أليه أبسيفي أله أفنيهم
الكاع أله جرت أذنهه أبسيفه ظل يبليهم
الكاع من أفعاله
أتشرفت بنعاله
أبخطوه من خطواته .. داخو أبطكاته
.....................
جيش أميه اليوم كله أبعلي الأكبر منصدم
شاب خضره أسنين عمره رازم الحومه رزم
وين ما وجه وجهته يكطع أبروس الزلم
وبن غانم من برزله مابقه الصيته حجم
علي الأكبر جندله
سجلتهه كربله
أبن غانم فاته .. داخو أبطكاته
....................
عفيه من خيمتهه صاحت ألتفت لن عمته
زينب الحره تراقب وين ما شن حملته
أتبسم أو كللهه أبشري سيفه رف أبيمنته
أنه أبن شيخ الهواشم روحي فدوه الثورته
أبشري زينب عمتي
ماأثني جلمتي
الغيره ترست ذاته .. داخو أبطكاته
................
وجب السيف أعله روحه شربه أمن أدماهم
أشما عطش سيفه يوجبه ذلهم أوخزاهم
رادو المشراد فرصه أو فرصه ما أنطاهم
هدنه رادو بس مجرد تنخلي قتلاهم
ساعه كال أنطيكم
أبغيرتي أفنيكم
من صده جلماته .. داخو أبطكاته
..................
كربله تشهدله تبقه أبدمه خلد كربله
أمنين يطلبهه الشجاعه والوصي عقد الوله
جده وبطون المعارك خلدت ذكره أله
علي الأكبر علي جده ف يساوي حاصله
نفس غيرة حيدره
بلمعارك قسوره
من ترف راياته .. داخو أبطكاته
...................
خادم أهل البيت
الشاعر : أسماعيل الجوراني
الثلاثاء : 18/9/2018
نزله محرم 1443ه
لذكرى شهادة الأمام
القاسم أبن الحسن عريس الطفوف
عليه السلام
...................
جاسم العريس لمن جالها
ما ثبت راجلها لا خيالها
..................
1
من دخل جسام لرض المعركه
راجله أو فرسان عجزت تدركه
ركها ركة موت صيت الركركه*1
الشام خلاها تخط بذيالها
...................
2
من صليل السيف بالحومه دوه
الشمس والماكو خلاها سوه
ليلت وكت الضحى أو راح الضوه
كربله أتكول الزلم بفعالها
...................
3
أبشدة المطراد أبن سبط النبي
ناده بالعدوان أنه الطالبي
أو درة أمي الطاهره أو داعت أبي
راح أراويكم عجيب أهوالها
..................
4
جيوش أبن سفيان بسمرها العجب
أو جاسم أبيناتها مثل الشهب
عالنخب لو غار عالغبره النخب *2
جثه عالجثه تشوف أبطالها
.................
5
شاش شوف الجيش جاسم شوشه *3
بينهم والقاده صارت دردشه
هذا يا هو حسين ألنه الطرشه
أجيوشنه أنريد أنعرف جتالها
..................
6
يا هو يسئل كام جاوب سائله
مكبره للموتى صارت كربله
عاد للدنيا علي عقد الوله
آل هاشم عيدت بهلالها
...................
7
كام يطوي أعمارهم طوي الحصر
لله بالميدان خر سجدة شكر
من صبر زينب أريدنك صبر
تنطي أمي المسعده أو تبرالها
...................
8
القائمه أتطول أو عريضه القائمه
جاسم العريس راعي الغانمه
أبيومه أخذ ثارات عصرة فاطمه
أو ثار محسنها الكبت دلالها
..................
9
أيودي وبن أيودي أهديب الحسن
النصرة حسين الغريب المرتهن
ما كشخ كشخة عرس كشخه أبجفن
والشهاده أبكل تفاخر نالها
...................
10
الشباب اليوم حكه أعله الشباب
الجاسم العريس خالنحيي المصاب
نلطم أعله أصدورنه أنهيل التراب
انعزي الزهره أبئاليم أعيالها
...................
خادم أهل البيت
الشاعر : أسماعيل الجوراني
الخميس : 1/7/2021
1. ركها ركت موت : حصرها في موقع ضيق
2. النخب : قادة الكتائب
3. شاش شوف الجيش : أنعدمت لديه الرؤيا
نسألكم الدعاء
وقراءة سورة الفاتحه
لروح والدي وروح والدتي
نزله محرم 1442
ليلة أستشهاد الأمام القاسم العريس عليه السلام
....................
يمه يا جسام دش ميدانها
والطويله ألسان كص ألسانها
..................
يبني يا صنديد يا ليث الحرب
خلها تتبريد زلمها أمنالرعب
بيهم أضرب حيل حد ما تنضرب
أو جثتك يكطر دمه جثمانها
....................
أبحومة الميدان أريدك قسورة
كرتك كرات جدك حيدره
كوه تاخذ روسهم كص بالسره
أو كربله أتغص بالجثث تربانها
.....................
نشمي يا مغوار يا شبل الحسن
أنصر حسين الغريب المرتهن
وكشف الكربات عن وجه الضعن
كربله أتريدك تخلد شانها
.....................
أبلامتك والسيف وعمامة نبي
أبغيرة الحيد الهمام الطالبي
فوت ليهم فوت وسبيهم سبي
خلي هاشم تفخر أبشبانها
....................
يا أهديب العين يا لب الكلب
بالوفه لحسين أريدنك خصب
أبني ودريبك نجر يوم الحرب
غيرتك غيرة علي عنوانها
....................
سرعف أعليهم سراعيف الغضب
ولجهنم كام يرسلهم حطب
ما يثني الضربه جم فارس شطب
أسمه والعسكر نعت فرسانها
...................
هاشمي الأنفاس عاشوري الهوه
أبفضائل فاطمه الزهره أرتوه
جندي عند حسين بالخدمه أنطوه
نعمه هاي أو تستحق شكرانها
....................
عيت أو صحت عياية كربله
راجله أو فرسان كلها أمجتله
أو صوت رمله أيصيح يا جاسم هله
بيك يتباها عميد أعيانها
....................
واجب أبهاليله جاسم ينخدم
عمره ما ناهز تكاليف الحلم
لا ضعف لا خاف لا رجع جدم
كربله يشهد أله وجدانها
....................
خادم أهل البيت
الشاعر : أسماعيل الجوراني
السبت : 11/7/2020
فزاعيه : رباط هوسات محرم 1442ه
عن لسان حال فخر المخدرات زينب عليها السلام
مخاطبه أخيها قمر العشيره عليه السلام
...................
يخويه للحرم ما ظلت أخيام
والنوك الهزل عرجات الأجدام
جابوها أو غصب نركبها للشام
يردونه أو بنات الزهره تنضام
أخيرك يا بو فاضل بين الأثنين
تكعد لو ألم أعليك الأيتام
و كلهم عالشريعه
و كلهم عالشريعه
و كلهم عالشريعه ( النومه عاجبته )
..................
شلك كلي يخويه أبنومتك هاي
يا هو أبشامهم جا يحمي مكفاي
ترضاها الشمر بالناكه حداي
وصيرن سالفه للرايح أو جاي
عالتل صاعده أو عالشاطي العيون
أشدلك رايتك ما ريدن الماي
أذا سالم تردلي
أذا سالم تردلي
أذا سالم تردلي ( الماي ما ريده )
...................
يالمشيم ينشمي الترفع الراس
عسى ما تزعل أمنختك يعباس
الهضم جاس أبدليلي أو بالعظم جاس
هاي أخت الكفلها أحجاية الناس
أسمعنك عتب ما كايله ألسان
أو يظل أعتابي حار الكطع الأنفاس
يجفالي الفرض
يجفالي الفرض
يجفالي الفرض ( من كعده صليته )
..................
يخويه أبخيلهم هدو عالحسين
أو كطعو خنصر أيده بالسجاجين
بقيت أمحيره وصفج باليدين
صحت عباس وينك ما كلت وين
لا أكدر أرد لا أمشي جدام
حرت ما بينه ما بين النساوين
وصدره أبأذني أسمع
وصدره أبأذني أسمع
وصدره أبأذني أسمع (طكة أعظامه )
...................
عضيدك يابو فاضل عالتريبه
غريب أو موتته بالطف غريبه
أنشعب قلبه أبسهم شيبه خضيبه
جسد عاري صفه أهدومه سليبه
لا حايوز عنه أيرد أذه الجيش
أو كتيبه أتحشم أعليه الكتيبه
عليه أتحشمو
عليه أتحشمو
عليه أتحشمو (بسيوف يولونه )
....................
خادم أهل البيت
الشاعر : أسماعيل الجوراني
الجمعه : 6/8/2021
