Telegram-канал rwayatsudan - رِوايات سُودانية🪐🤎!)": Unsorted

رِوايات سُودانية🪐🤎!)"

25 February 2024 18:51

، ممكن تشوفي شهادتك بـ وين وتكوسي درب شغلك الخليتيهوا عشاني وعشان بناتي زي ما قلتي ، حصلت صنة كده عجيبة من بعد كلمة طالق دي وملاذ ومنى كانوا بيصرخوا وببكوا والبيت ده كلو دخل في حالة رعب كده ما يعلم بيها إلا رب العالمين!! انا انزويت براي وبقيت استغفر وحاولت أكون أوعى وحدة فيهم وأمنع دموعي من انها تنزل بس خذلتني ونزلت للأسف !!! ، شوية كده وامي طلعت غرفتها على طول ولحقوها منى وملاذ شوية كده وجوا وكلهم كل وحدة فيهم شايلة شنطتها ، بابا وقف ملاذ ومنى قال ليهم وانتو التانيين ماشين وين كمان!؟ ، ردت ليهو منى قالت ليهو زي ما شايف يا بابا ما حنخلي ماما براها في حالة زي دي ، ماما ردت ليهو وقالت ليهو وانا اصلاً ما ح أخلي ليك بناتي ، لأنهم بناتي أنا وبعرف أربيهم براي كيف ، بابا قال ليها ما قبل شوية كانوا بناتي هسي بقيتيهم بناتك؟؟ ، ماما ما ردت ليهو اتلفتت علي وقالت لي انتي التانية كمان خلصينا ويلا امشي جيبي حاجاتك سريع ، انا الوقت داك كان عمري 15 سنة بس كنت واعية شديد ، ختيت في راسي اني لمن امشي مع امي تاني ح أعيش معاها طيب وبابا؟؟ ، رديت ليها بسرعة ومن دون تركيز مني وقلت ليها انا ح أقعد مع بابا ، الحيقعد معاهوا منو؟ ، ماما حمرت لي وطلعت وطلع وراهم ماجد عشان يوصلهم ، اتلفتت على بابا لقيتوا بيعاين لي وعيونوا زي المدمعة كده في اللحظة دي أنا حسيت نفسي كِبرت شديد في نظر بابا شديد♡ ، مرت الأيام والسنين وبابا رجع شغلوا وأنا استقريت مع حبوبة الـ مـا قصرت معاي خالص واحتوتني ورحبت بي شديد الله يخليها ، وكنت بمشي لـ ماما كتير في بيت حبوبة "ام ماما الله يرحمها متوفية هي وجدو" لحدي ما ماما سامحتني لأنها كانت زعلانة من حتة اني اختار بابا وأفضلوا عليها ، بس انا ما اخترتوا عليها في الحقيقة انا حسيت في اللحظة ديك انو منكسر شديد وماف زول معاهوا!! اخواتي الاتنين طلعوا خلوهوا وماجد برضوا اها كمان انا ازيدها زيادة يعني ولا شنو؟!! ، بعدها بكم سنة راجل عمتي اتوفى وجات هي وبتها سكنوا معانا وملوا لينا البيت و ونسونا يحليلهم ده غير عمو عادل المعانا برضو ، و أهو الحياة مستمرة..
____عودة للحاضر____
ودعنا ناس امي ورجعنا البيت طوالي أنا ونسرين وكان الزمن داك المغرب قرب يأذن ، وصلنا ودخلنا لقينا حبوبة وعمتو قاعدين برا في الحوش ، اول ما جينا داخلين وسلمنا عليهم عمتو قامت مشت المطبخ تجهز الغداء وانا ونسرين كل وحدة مشت على غرفتها ، دخلت غرفتي اول شي أخدت دُش ، الجو بارد بس كان في كتمة شديدة الوقت داك ، اتدوشت واتوضيت صليت المغرب قمت لملمت حاجاتي ورتبت الغرفة وشلت تلفوني وطلعت برا ، لقيت عمتو جهزت الغداء خلصت منو ناديت نسرين وقعدنا أكلنا وكُنا بنتونس عن مواضيع مختلفة وناس حبوبة وعمتو سألوني عن اخواتي وكده قلت ليهم كويسين ما عليهم عوجة ، خلصنا اكل شلت الصينية وديتها المطبخ وختيت الشاي في السخان وقلت مسافة يتسخن اشوف التلفون الحاصل فيهو شنو ما فتحتوا من ما كنت في الجامعة ، اول ما فتحتوا ما جاتني اي اشعارات من أي ابلكيشن ده شنو ده !! ، اتذكرت الفاتورة ، طلعت برا ناديت على نسرين كانت قاعدة مع حبوبة وعمتو في الحوش قلت ليها منشطة؟ ، قالت لي بري والله مقحطة ومن الصباح بحنس في امي وحبوبة ابو لي عدييل كده ، حبوبة قالت ليها يا بت انتي امبارح ما جيتي شلتي مني قروش لي رصيد وفوق ده كلو جيتي شلتي من تلفوني تاني ١٠٠ جنيه قلتي الرصيد وصلك من الدكان ناقص مية جنيه عايزاني تاني اديك بري والله ما اديك ، عمتو قالت ليها فترت انا والله قروشي كلها مكملاها لي انتي ، نسرين قالت لي شفتي هديل ما قصروا فتّوني ليك يلا ، قلت ليها يعني بتعترفي اني كنت نافعاك؟ ، نسرين قالت لي آي والله ياخي انتي بي نتك داك انا كنت متابعة لي مسلسل في تطبيق اسمو HiTV كمان اها رايك شنو؟ ، قلت ليها كويس كشفتي لي نفسك براااك تاني القي ليك نت مني يا كلبببة ، طلعت فوق لبست لي عباية ولفيت طرحتي كويس وجيت طالعة بـ شبشبي بتاع البيت زاتو ، طلعت الدكان الجمبنا لقيتوا مقفل أصلاً هو ليهو كم يوم كده مقفل ، ضربت راسي وقلت اخخخ ده شنو يااخي القفيل ده وانا واقفة في نص الشارع وخاتة يدي على راسي سمعت صورت بوري عربية ، والضو عمى لي عيوني ختيت يديني في وشي ووقفت في حتتي ما حاولت أتحرك اصلاً!..
*•••••••••••••••••••••••••••••••••••••••••••••••••••••••••••*
*★★يتبــــــــــــــــــــــــــــــــــــــــــــع★★*
*♡بــــــــــــــيــــــــــــــــــــجــــــــــــــة♡*