5285
الاسم :- سئلت ذات مرة ما سر ذاك الاسم؟ صرخت ِملأ صمتي المكبوت في دواخل الفنون إنه اسمها حروفه تطايرت تشكلت تألقت تعلقت بشخصي الضعيف فصار اسم شخص ما ... بداخلي. - ريحة البن .
ياهالة أكِتْبي
اكِتْبي ياهاله
أنا متمصرِن
وانا متجلدِن
وانا متنفسن
من دي الحاله
من آثار الحكم البائد
ومن ها الجِتة ومن صلصالا
الحيكومة الفاتت قالوا
أنا طبَّالة!!!!!!!
أكِتْبي ياهالة
وري العارف والماعارف
سنة ألفين
لامن كنت شيوعي الفكرة واهتف اهتف
ضد العسكر
ضد الكوزنة والعَمَّاله
وانتي تزغردي
مرات ترجفي
ود أمي الحاشاك اللوم
نعم إنو كلامك ذوق ورسالة
بس ديل كَتَّالة
وانتَ بعوضة
حُمار في نظرهُم
باقي وسخ برموك في زباله
بِطَلِّعوا عينك
بحرقوا دينك
بنسفو ذكرك
بمحقو فكرك
(بقطعو ضِكرك)
مالك ومالم ياخَي هاله؟
أكتب عن ياسمين البت خديها عيونا ولونا جمالا
وهالة بتدرُس لغة عربية
أوعة تباشر لما تنبز
رمِّز رمِّز
واوعة تكاشر
اوعة تقول العسكر بسكر
مالك ومالم ديل عتالة
وانت ذباب طَنَّان في نظرهُم
باقي وسخ برموك في زبالة
وانا من ألفين
الفين وتلاتة أغني سلام حرية عدالة
ولما حصل ماقالت هاله
ومرة بعد ماأنفض المنبر
وانا بكتب كُولِن
وكنت بكولِن
كُولِن حار
من زول قهران
ضايقابو الحالة
حالة الشعب الماسك خشمو وغالبو يقول في الحاصل لالا
قلت اقول انا بدل الشعْب..
مالي ومال ناس قيس ناس كعْب..
والبنوت انا مالي ومالا
كُولِن قول حرية ومُوت..
خت الكورة وماتخاف شوت..
قول للظالم ارحل فوت..
وقمت أكولن
قمت أقول والصفقة معاي
..
..
عاملين عُبَّاد صوفية
لابسنها جلابيه
والدقن القايمه طريه
ماتخافوا المولى شويه
لابخلوا ولابتخلوا
عن تلك الإجراميه
ياعزة هواك إتسرَّب
وثراك الغالي إتخرَّب
ذكراك صبحت منسيه
والعسكر فاتح جيبو
شان يسكر فاتح جيبو
لملم حتى الماهيه
قالولنا الدولة فقيره
والدولة غنيه غنيه
والكاتل منهم يمرح
يدفع من قُتل الديه
وكمان إتجرؤا برضك
سموها الجمهورية
جابولم واحد غنَّىٰ
من قولم شَرَّح وسَنَّ
ودوهم بطن الغابه
سوهوا الموت باالجنة
والودوا هناك ماجنَّ
الجنة ثمارا شهيه
حتعرسوا بت حوريه
غشوهم وقالوا حديثم
صادق مليون في الميه
طردوهم من إحساسم
وودوهم للوحشيه
وتموت الإنسانيه
أطفال المدرسه لسع
ماعرفوا الإجراميه
الوطن الداير يعرس
بالخدمة الإلزاميه
الوطن الداير يدنس
بالخدمة الإلزاميه
والكشة الإجراميه
الولد الساقوا رَجاله
ودوهوا محل عمليه
فايتلو عروض وبنيه
حتكون إيه العمليه
وادنك وين ياأحمد
ماش اكتل بت مارِيّٕا
تبقالك إيه يااحمد
مااختك سودانيه
افريقي وافريقيه
ولو عربي تكون عربيه
احسنلك ترجع ارجع
ودوك لي شغلة دنيه
لو داير تسرق ارضك
او داير تفرض فرضك
او داير تهتك عرضك
اعرف طولك من عرضك
شان تعرف ماها قضيه
..
..
..
كنتَ بكُولِنق
كنت بقول والصفقة معايْ
ولمن كتمتْ
صِرت براي!!!!!!!
والصفاقة تراهم فحَّطوا وانا بي جاي!!!!
في وسْطِ وحوش
وصغور عَتََالة
ورحت أتذكر في قول هاله.....
غايتو مشيت ساقوني وفتَّ
وانا من ديكا ولسع لسع مامتاكد حي ام متَّ!!
وجيت ماجيت أنا مامتأكد
وكانوا تلاتة الواحد فيهم يعادل سته!!
وغصبا عن الأسد البزأر بالحرية
ماتستقربوا يصبح بطه!!
وحاجة أكانت فيني كبيرة وصبحت حته!!!!!
صبحت مافي
وانا من الفين وتلاتة بقيت مابعرف أهتف..
ولسع شلوفتي القاعدالكم شاهد تنتح وترجف..
ولسع مصراني الماعصبي وعصبي بينزف وينزف
وانا متمصرن وانا متجلدن وانا متنفسن من دي الحالة
مره مع عبدالله محمد توم
ومرة مع معتصم الزين
ومرة مع دكتور احمد على صاحبي المربوع الزين
والصفاقة الخلو المنبر وفحطو خلوني اكورك وين؟
ماشين وين؟!!!!
وبعد سنتين
وماعارفين
ولسه بقولوا
الحيكومة الفاتت احمد احمد زحزحة صار طَبَّالة
وزحزحة ذاتا دي جات من وين..؟
ماعنوان لقصيدة كتبتها سنة الفين
الفين واتنين..
تشرح حال الشعب الساكت وانا جواها بكورك واهتف حسك للشارع يصل لمتين..؟
ويادي الحالة
ولو بتفحطوا وتخلونا
تخلوا منو؟
أنحنا خلاص الفينا وكملت
ياشعراء الحرية الان
الصَفَّاقة
لو بيفحطوا ويخلوكم
أحسن تسمعوا كلمة هالة
وتكتبوا عن ياسمين البت خديها عيونا ولونا جمالا
..
#زحزحة
زيك بروح
بي باقي روح
وردك
ولا بعرف يفوح
حدك
ولا بعمل جروح
خدك
سليل الصفعه
والدمع
اللحوح
زيك بروح
بي
باقي
بوح
صوتك
قدر صوتك ينوح
موتك
علي الواقف يلوح
فوتك
على المجهول
وخطواتك نزوح
زيك بروح
لامن يروح
حاربك
على وينك تدوح
قاربك
محن في الفيهو نوح
طوفان من الدم السفوح
جبلك واباك
وجبلك وراس جبلك سفوح
اللهم لطفك باهلنا في النيل الأبيض
#يس_النضيف
هذا القولُ قصير القامةْ
أكلحُ وجهٍ
أجعدُ شعرٍ
نزر وسامةْ
دونَ هجاء
ذاكَ الصّمتُ
عظيمُ الهمّة
عدلُ القسمةِ بحرُ الحكمة
فيضُ عطاء
هذا الشوقُ
بلا قدمينِ
فكيف سيبلغُ أرضَ لقاء؟
يا تفّاحَ الشّوقِ الأول
يغرقُ قلبي
يملأ صدري
بحرُ دماء
كيف سنبلغُ
عمرَ الجنّة
والأهواءُ
هي الأهواء؟
يصدقُ حبّك
حين يلوحُ لكَ المحبوبُ من الأرجاء
فتراه وغيرك ليس يراهُ
يغرقُ قلبُكَ
يملٱ صدرَكَ
نور بهاء
الحبّ
الجبّ
الثقب
الماءُ
الماء
الوجد
البرد
الفقد
الرّعد
الأنواء
مصر
البئر
الغدر
الصّبر
ونورُ دلاء
الشّبق
الشفق
الغرق
الميناء
الطّمع
الهلع
الدّاءُ
الداء
أدركني
واتركني أغرقُ
في الحبّ
فنحن
إليه
ظماء.
#الشوق_الشوق
#محمد_عبدالواحد
بعد الحرب دي تقيف اكيد
انا غايتو ح اقول ليك كلام
ح اعيد واكرر من جديد
ومن هسة نبداو (بالسلام)
سلام عليك وطني الوحيد
سلام شديد سرب الحمام
مش ممكن ابقى ليك غمام؟
لو تبقى لي واسع مديد
انا عندي قُدرة اكون تمام
لو تبقى مطرة من الصعيد
وتخضر أشواقي الرُكام
ح ازرعك جووووة الوريد
ح افتحك مصنع حديد
دورني مكنات للحام
اديني ثقتك من جديد
بديك فِكر يا داااب وخام
انا وانت إيد في إيد وإيد
يلاك نقول قولة (سلام)
#عاطف_شمبات
ﺍﻟﺰﺍﻳﻠﺔ ﻣﺎ ﺑﺘﺪﻱ ﺍلأﻣﺎﻥ
ﺑﺲ ﻗﺎﺩﺭﺓ ﺗﻨﻬﺰ ﻓﻲ ﺍﻟﻘَﻔﺎ
ﻭ ﺍﻟﻤﺎﻳﻠﺔ ﻣﺎﻟﺖ ﻣﻦ ﺯﻣﺎن
ﺑﺲ ﻛُﻨَّﺎ ﺭﺍﻗﺪينﻻ ﻗَﻔَﺎ
الجات من السما للأرِض
ما كان بإيدنا نوقّفا
و القسمة راضنَّا اكيد
الروح بتمرُق...
وين؟
متين؟
ما بنعرفا …
#نهي_الكباشي
لكَ في عميقِ القلبِ
كرسيٌ ومسبحةٌ وضوء
لكَ يا حبيبي دعوتينِ مع الضحى
فاغزل صباحكَ بالثنايا والوضوء
فلقد رأيتُكَ في خيوطِ الفجرِ نوراً
فوق طرْفِ الحبِ يبدأ بالنشوء
ولقد نفضتُ غبارَ أيامي
وأوثقتُ الرِحالَ مُيمِماً حُلمي حِيالكَ
أرتجي حق اللجوء.
#محمد_المهندس
ياااااروح
المشاوير
لسه...!!؟؟
يا مباريه الاتر
اعفيني . .
ماقااادر علي
الاشواق....
وهسسسه
اذا
بهمك
لملميني
كفاي . . .
وذا بعنيك
لمي خطاي
يااااا
الحلم
المكامنو غراق
ويا المالك
معانده
كفاي . . .
هدني
الشوارع
الفيني
والحظ
الحصانو
معاق
رماني
علي الرهان
وراني
وانتي
تعايني
لي خسراني
بي الرقراق
يااا
البهواك
وسويتلك
غناي
لامتين . . . ؟؟
غناوي
لذاذ
وتهويمه
وحروف
واوراق . . .
فترت
تصدقي
الحلم
انسرق. . .
اشوقي
العمر
السنينو
رقاق
غلبني
الملمك
ماعرفت . . .
في السفر
الدروب
ساساق
زمان قادر
اقلو صبايا
كان ماهلني
هسه
الفيني
شايفو علي رجاك
ما حاق . . .
بتعرفي .
نفسي
في شنو
انا
؟؟؟
اخش
علي
قبلتك
وحداني. .
نمرق
زي اجن
اتنين
وتلحقنا المظنه
من اقرب الناس
قدر ما شافونا
بنسوي في الحنان
في زقاق . . .
امس
علي فكره
جبت قميص
سمح لي بتنا
الح نجيبا
يا الله
حلاته
بلا وجيه
الوره
يشبه
ملمحه
الاشراق
تشبه
روحنه
معموله
بسماحه
كدا
تعالي
عشان
نحاوله
ياخ
انتي
مصره
نقضي
عمرنا كلو
فراق . . .!!؟؟
مشتاق
كلما
تقاصد
خطاك
الفرقه
ابقه
هواك
قريب
مني
رفيقة
الروح
وراك
بترروح
لاحقه
شنو
الفراق
ملحوق
وحاتك
عندي
تستني
بحاول
ما يضيق
بي صبري
واحتملك
ولكن
لو غلبني
بنادي
ليك
حني
لانو
الانتي
ما عارفاو
ولازم
تعرفيو
عني
بريدك . .
لما كنت معاك
خليتك
مرقت
قصادك
الروح
بيك متكه
صبيطه
طاعمه
بحبك
اي ياخ
مجدعه
فوق
شوارع دمي
حلات
من اماني
بسيطه
الله . .
دي
ياها
زاااته
ملامحك
الختاك
هسه
منو
الصبقني
عليك
غيران
من خدود
الحيطه
شافك
ولا كيف ؟
لاحولا
ياخ
الفيني
ما تكتلني
غيره
عبيطه
ياخ
انا ليك
وبس
سامعني
ياخ
انعل
ابو
التوريطه
#احمد_البلال
لما عاودنا الشجن
كم حبيب كسر الخواطر
وضييع الاحلام سدآ
كان سحاب بالريده ماطر
وكان علي الروح مؤتمن
تاري كان سواح وعابر
تاري لاعب بالمشاعر ..
وكان هواهو شكوك وظن
ولما عاودنا الشجن
ما افتكرنا دموعنا لسه
وانو نتناسي وبننسي
والقلوب الراحله ديما
تلقي في جراحاتنا مرسي
ويبقي لينا الشوق وطن
#محمد_السر
على صهوة الحب
أسرى بي الشوق شعراً ،،،
أناجيك ،،،
قلبي يرتل في مقلتيك الصبابة ،،
آياً من الأمنيات العذاب ..
تجلت لروحي لما رأيتك
بيض الأماني :: و عذب اللحون ::
جميل الأغاني ::
فغنيت .. غنييت ::
واهتز أحمرك المستهام ،،
تساقط عطرك وردا نديا ..
وثنيت لما تثنى ..
فأسكرني الحب ،،
أثملني الشوق ،،
أرشف شهدا جنيا ..
حنانيك ..
يا من أخذت فؤادي ..
ردي الفؤاد إليا ..
وذكرني كل ما فيك من ألق وجمال ،،
لذيذ تباريح أيامي الماضية ..
وأنى يكون شفائي ،، ويرحل دائي ،،
إذا كنت من ارتجيه طبيبا ،،
تزيد بحبيه أمراضيا ..
وأعجب من روحي اللاتفيق من الحب ،،
عن فعل قاتلها راضية ،،
تهاوت علي فواتك طرفك ::
يا ليتها كانت القاضية ..
#عمار_البطحاني
من يوم ما طليت ناديتك
ما جيتك دون بابك دغري
ما أتشابي هواي أنا بالشباك
شان حنك يخشاني ويجري
دقيت احلامك بالتحنان
شان تعرفي جواي تنستري
وتالاي خطاويك تتهادي
وتتمردغي جوف اشواقي حنين
تتجولي في ذاتي وفكري
وتلقيني وقت ما تحبي أمل
وافراح بتكوسك من بدري
تلقيني الضحكه الطارده الخوف
الشوف وقتين ليلك يسري
ما تهابي عوارض الدنيا كفاك
وانا من جواك ما اظني امش
شان بعدك ضاق بالضيق صدري
ويوماتي بتسقي هواجسي فراق
والفارق ما بيني وبينك
انك بتحاولي تطردي هواي
وانا طارد كل الدنيا عداك
في أي محطة شوق بلقاك
والناس شايفنك في شعري
#عمار_الزين
يا حليل سمحة البسمة التضوي بروقه
الشم في خدوده ومن ثناها شِروقه
الشاويني شوقه ونغجلتني حِروقه
طلعته يوسفية ويعرُبيه عِروقه
***
اطلال المحبه آلى لِقانا تنادي
مفتقداكي يانغم الكنار الشادي
اشواقى آلبناتلن في القليب الصادي
حنلك حنين آهلي الغبش للرادي
***
كل ماقيف عليهن بالدموع إتبله
واسرح وحيلي يخدر والفكر يتشله
يالصاين غرامك وعنو مابتخله
مان قايل بفارقك والزمن بتغله
***
ياروحي البتلدغ في الفؤاد افعاكي
مره حياتي دونك وربي لي يرعاكي
ماتنسيني يالمالكه الحواس اوعاكي
وارجوك خلي بالك من فؤادي معاكي
***
يازهري البريدك ومن عطورك فُلي
مشتاقلك تعودي وفي سمايا تطُلي
من لوعة فراقك وآ عزابي وزُلي
بقْلد طيفك ابكي وبيك اونس ضُلي
***
بشكيلك ممحن ياغرامي واسي
من هماً يودر كاد إشيّب راسي
إتنين إبتلني وجرّعني مأسي
حسادي العوازل والزمان القاسي
***
بلاك العيشه مره ويام موايق زِله
مترطش موهدب لا اهل لاخِله
من مافتي يالسمحه وهجرتي الحِله
روحي علي حزنت وإحتوتني العِله
***
شوقاً لي عيونا وطلته ومحياها
والبسمه البتنزر بالمطر من فاها
اربعه ياخلايق بشكي من مُر داها
بعدها والمغايس والحزن والاها
***
يال تريانه عفه وإحترام ورزانا
بعدك نار وقاسي وبي لهيبو ازانا
انا والنجمه والقمر البلالي حزانا
في البكاء والقصايد والتمني عزانا
***
طريت ايامي جمبك والليالي الغُره
يابت العواهل والإصول الحُره
شوقك وإبتعادك جرعني المُره
والعجب العوازل والحظوظ الطُره
***
اجمل اغاني في نمي القلم خطْاها
فوقك يالجمالك بالدرر غطْاها
وحات العلا قامتك وحاشا ما وطْاها
بي ريدك متيّم ولاحق امات طه
***
يال لي جرحي بي طيبة لهيجك حايكه
فيكي براءة الطفله وتقاكي ملايكه
مادام القمر طلعو الخواجه ولايكه
مابلحق جمالك يالدروبك شايكه
***
الحياء والتعفف والتواضع زانه
والوسمي البيهطل في الربيع امزانه
قبلان ابقى سلة مهملات احزانه
ترمي شقاها فوقي وادمنن اوزانا
***
البي ريده والصد الكتر عاقتنا
لي درب المواجع والسهر ساقتنا
يال في دروب غرامك كل محن لاقتنا
رفقن بينا إتحملنا فوق طاقتنا
#نزار_سراج
الليل بساط ممدود
يرقصن فيو بنات افكاري قبل انوم
والقمرة علامة بتوريهن يرقصن كيف
والغيمة دلوكة السواد
مشدودة بي ضو النجوم
والسما من حرير
توب بي شهاب مقدود
....................................
الليل انين كل الملايكة المتعبين
الليل سواد ود عينا
منبع كل حنين
زي خصلة من خصلاتا
وكتين ما تبين
متمرده ومفروده
راقدة علي الجبين
الليل كمين
الليل عيون بتشوف
في كل غمضة عين
الليل طيوف بتطوف
مالاقية مرسي امين
يبقي الصباح هوالخوف
الدنيا ما بين بين
.......................................
الليل وقت ما يجن
بجن
مجنون وزي ماتقول بحن
وحواسي تتقلب تأن
ساعات تان
والليل يصن
واصن واقول
دا الليل اظن
او ما اظن
...................................
حكو لي انو الليل سماح
لون خدودو الاندياح
مرات سكون مرات براح
لكن اظن دا زمان وراح
لو صاح سكاتك منو صاح
الليل بصيبك بالجراح
سفاح ولا بهمو النواح
الليل خبر موت الصباح
#امجد_اسماعيل
النوادعك
وانتي فيني
بلا غلا الروح العزيزه
يالغيابك عارفه بسرق
صفوة ايامي اللذيذه
ما اشتكيت ليك
بكره بسلم
ما الحزن حاله
وغريزه
وكوني اهواك بي قساوتك
صدقيني دي زاته ميزه
****
ياشقاوة الريد وكت ما تجيك بتجيك
وانت ما سويتلها زنوب
مالي كان انا بالغباين
دمعه بتجف
ودمعه يادوب
كان بي ايدي كان عفيتك
قلبي هو الماداير اتوب
انتي هسع هان عليك كيف
الحنين علي امرو مقلوب .
#احمد_البلال
رجال الفزعة طبقوا الكي
فوارساً ما بسووا الني
الجزيرة مرقت ضي
نسور في الجو صقور جديان
سيوفاً في المحاصة سنان
ببيعوا الدم فدا الأوطان
صغيرهم تلقى في الميدان
الجزيرة مرقت ضي
رجالاً ما بسووا الشين
كراماً في السمح سمحين
فوارساً في الدواس ثابتين
بجيبوا الرايحة حمرة عين
رجالاً ما بتتفشخر
سماحة وطلتهم بتسر
للصاحب عطور ياسمين
وللبغلط شرا القنقر
الجزيرة مرقت ضي
#ماجدولين_سعد
سألت عليك
لا خليت رمُل
في القيف
لا خليت صَدَف
في القاع
بَحَتّ القَمَره
بي ايدَّيا
ما خليت حُجار
وشُعاع.
وَصَفْتَ صِباكِ
"للتلفاز"
رسمت هواكِ
"للمذياع"
جَدَعني الشوق
لحضْن الريح
ولفّيت
أسأل الاصقاع.
..........
فَتَرتَ
وما فتر حلمي
ما صدَّق
حضورِك ضاع.
..........
سألت عليكِ
لا خليت
صدُر مغبون
لا خليت
خيوط في لون
لا خليت
وهَج في عيون
لا خليت
نَجِم مسكون.
.........
سألت عليكِ
لا خليت
حُضُنْ مهجور
لا خليت
غُبار عتمور
لا خليت
فرح محْزُون
لا خليت
غضب مجنون.
..........
سألت عليكِ
لا خليت
بحر وشراع.
لا خليت
صَدَف في القاع.
جدعني الموج
لُحضْن الريح
ولفّيت
أسال الاصقاع
فَتَرتَ
وما فَتَر حلمي
وما صدَّق
حضورك ضاع.
.......
ويدفر فيني
ليل في ليل
ويشِق
بي وهجو
مليون ميل.
يقول لي قدمي
شِدِّي الحيل.
أخير نحلم
بدل ما نموت
أخير نسأل
بدل يصبح
فَتَرْنا سكوّت.
..........
سألت عليكِ
لا خليت
صدُر مغبون.
لا خليت
وهَج في عيون.
لا خليت
هُتاف مسجون.
لا خليت
غضب مجنون.
يا معطونه
في روحي
تكوني أكون
يا معطونه
في روحنا
تكوني نكون
هاشم صديق
تكوني نكون
#غدير_شيخنا
تستغرب حياتك؟
كيفك؟
وانت مت
وكيفن طوق نجاتك
طفح
وما ظهرت
تخاف
من اي حاجه
فخاخ
في كل حته
وحتى الروح
علاجه
يكون ما فيها
جته
تفتش فيك
ملاكك
تلقاك ماك انت
وتجيك ايدين
هلاكك
أصابعا سته سته
#يس_النضيف
وطنى ال بالصح
#العطا_علي_العطا ٠٠ البركل
يا الله عليك
وطني ال البصح
كم انت جميل
كم انت سمح
الفوقك وفيك
ينشاف شوف عين
في ناس اوشيك
دون أي شرح
وفي ناس محجوب
واحمد وفتح
وفي ادم وايوب
كيف متريح
وكل العايشين
في قطاطي القش
وبيوت الطين
الخبر الزين الشي المفرح
متفائلين خير
باكر شمسك تشرق وتصبح
ويوم بكره يكون احسن واخير
وتتعافي تطيب من اي جرح
وهنا في السودان
كل زول مرتاح كيف متريح
الناس عايشين في أمن وامان
لازول لاجي لا زول نازح
وخاتين البال
لي صبح وشيك
فيهو الامال
تنشاف صح صح
كل الصحراء
القايمه عشر وشوك وسرح
تصبح خضراء
عيش ريف وذره وودعكر وقمح
وننادي عليك
وطني ال بالصح
لبيك لبيك يا اعتي صرح
كم انت جميل وكم انت سمح
كان الغرض المشاركة في التسجيل والإعداد لحلقات ريحة البن لموسم رمضان 2025، و ما تم تسجيله لم تكن قصائد!
بل كانت شجون السودان والسودانيين و عواطف محبيه و حنينهم للبلد، لم يكن خلف الكواليس اجهزة الصوت و الاضاءة و توجيهات المخرج فقط، بل كانت الدموع حاضرة و الآماني و الدعوات.
احتشد يوم الأمس بسيل من المشاعر الصادقة ، لتأتيكم حلقات استثنائية تماماً لريحة البن في هذه الأعوام الاستثنائية أيضاًّ لنا كسودانيين في السودان الجريح، والذي ما زال ينزف دماء ابناءه.
شكراً Mahmoud Algaily ، بحجم محبتك للبلد والإبداع و المبدعين، شكراً لحسن الإستقبال والضيافة من كل الفريق العامل بلا استثناء و شكراً للضيوف الأعزاء أستاذنا محي الدين الفاتح و أبوبكرالجنيديونس المغربي و إبراهيم جابر إبراهيم و ابتهال تريتر و Amal Albanna و الجميل المرهف سفيان جنو و حبيبنا Anas Jalal Aldin و كل من لم أذكره هنا، سعيد جداً جداً بكم و بلقائكم.
و شكر أخير للحبيب السودان الذي منحنا كل هذا الجمال 💙
محبتي و تقديري 💙
#ريحة_البن
#ريحةالبن2025
في بالي بيوت الحِلة بيت بيت
و في روحي روابط الإلفة خيت خيت
قلبي عليكَ انا الفارقت و إتأذيت
و وجعك وجعي انا البي غربتي إتجازيت
ابكيك في البهِم للقوت و هو بصلة و زيت
ولا الكان اخير ليه الموت
يا سهم الوجع م تجلي
يا الفي حشا اهلي اتغزيت
انا العدمانة قُدرة اوصل إحساسي
انا ان بكيت شِن بستر قفاي مع ناس ولا ناسي
انا اتهزيت
و في اقرب قريب فارقني ما اتقالدت و اتعزيت
انا الفي بالي بيوت الحلة بيت بيت
و انا في روحي روابط الإلفة خيت خيت
خليتن وراي و بي ندمي إتعبيت
انا في مكان ما شبهي إتختيت
كنت هناك غُصن اخضر هِنا إتحتيت 💔
#نهي_الكباشي
نقاط الزير
ولحاف مهرود
ماتامي سرير
... والحوش وسخان
بلاعة البيت
جركانة الزيت
كسار الطوب
فردة مركوب
شجرة لالوب
شافع سرحان
مليان بالجير
ويقود النار
باقة الكركار
دخان الصاج
صوت الحجاج
باب النفاج
أولاد عمك
راقدين بي جاي
مهدودين حيل
شايلين الليل
احلام عشمان
ريحة البلدات
ضرعات جنيات
ميراث ابوات
وعصاية زان
صوت الأذان
موية الابريق
شوف لينا طريق
ختينا الني
ختينا الضيق
ادينا وساع
وكلاب الحي
ماكنات ومناع
مانعات الضي
والحال بطال
ادينا ريال
راجيانا عيال
وحبال في حبال
ماليها حدود
وطريق مسدود
والجيب مقدود
والود ميرو
حق الدكتور
والصف والدور
وابوهو معاش
ماف حاجه بلاش
سيد الدكان
ممنوع الدين
جاز البابور
سلك اللماع
طعميه فطور
ورسوم وهموم
وغبار وسموم
ام الأولاد
ماضاقت النوم
ولاحتي رقاد
تعبانه خلاص
ملت البرميل
ونهاره غسيل
حفظت البت
سورة الإخلاص
بي وجع الراس
رقدت بالتوب
ماقالت الروب
كوراك الديك
مستوره هديك
جهزت الشاي
ربك هاديك
مابفكك ساي
لابد إديك
من بعد الضيق
وانا كنت غريق
مالاقي القش
ولا حتي شهيق
ياالوشو قمر
مابدسو الغيم
وانا حبي قديم
وتتاوق البت
تملاني كلام
وعيونا عيون
ماليات الكون
بي اجمل لون
مرشوح جواي
ياهمس الريد
ياسر مغناي
بقراك في النم
سامعك شاشاي
عطرك ينشم
بحرك وداي
الناس بالناس
والكل للفوق
بعدوني بعيد
من المعشوق
غرباوي بقيت
رسموها شروق
وانا بين إتنين
بالظن مخنوق
بين إنك لي
ام إنك فوق
عسمني الريد
ياست الزوق
ياضل مفروش
جوات الحوش
مقشوش ونضيف
من قول الزيف
مرشوش بي موية ريد وحنان
والبن في النار
وتهب ريحتك
وانا راسي يدوش
متقريف ليك
والمطره بدت
في داك الحوش
المامعروش
سافر ياناس
انا القاو كيف
رسلت كتير
أشواق وسلام
وحروفي تطير
مرسالي حمام
وأقول لابد
يبعت لابد
لكنو هناك
لا بصد لا برد
شلهتني معاو
لي آخر حد
حدادي هواك
مدادي المد
ياخ مشتاق ليك
طمني علي
لو كت ماجاي
رسل عينيك
فجأة النباه
وانا ليلي طويل
متعشي جراح
لملمت اساي
جابلدت الآه
شهدت نجوم
وحدت الله
وأخيرآ عاد
كان شايلو بعاد
وأخيرآ عاد
وانا عاد ياناس
افراحي كحل
والريد مرواد
وجريت القاو
سابقني هواو
ولسوء الحظ
لاحظت اللون
ما لون العين
وإحساس ممحوق
مافيهو حنين
زي المسحور
او طاقشاو عين
والدنيا تدور
وقلب مكسور
ومراية الظن
ما بتعكس نور
#محمود_الجيلي
شن بيني وبين ،،
الحب والشوق والصد والبين
انا بس قول لي لاقيتك وين
يا زول مفرود جواي فرحه
وزغروده معطن توبا الفال
موال موال
بتوصف حبك لما يقيد
وانا كت برجاك في وش العيد
ضحك الأطفال
بتحوم فيهم
ترسم في روحنا اياديهم
في كل معزوفه وكل شبال
في ضل البال لمن يقيل
ويتضايق من عرقو ويسرح
في عز الحر باقيلو مجال
،، شن بيني وبين
اماد بتجبدك وتنفيني وتديني الضيم
وانا بيني وبينك يا تربال اكتر من غيم
ضهر الأعصاب مهدود بالشوق
ما ببقى تبشرو بالعسيم
انا يوم حسيتك وما لقيتك
لسنات الضي بقن ضليم
،،،وانا ايه راميني عليك غنوات ومكون فيني الريد دفه
غير اسمع همسك وما القاك غير طعنة دهشه وسط لهفه
القاك في كل الناس غايب وملامحك فيهم زي زفه
وارجاك في نص الحس الراح
مستني سمومك
تبقى حنين
واتلافى الناي الأنا وصاح
بى ضيق النفس الكاتمو سنين
،،
شن بيني وبين
الحب والشوق والصد والبين
أنا بس قول بي باقيتك وين
لاقيتك وين
...
#هتان_حمدالنيل
في أي فصل من فصول الحب ننسى من نحب
في أي خد فجر الشوق من الدمعات نهرا خالدا
في أي صدر صار للنهر مصب
من علم المحبوب كيف يعذب المشتاق سوط الهجر كيف تهز كف الشوق مكشوف العصب
من ظن أني رغم أني هائم في العشق أنسى قسوة المعشوق أو أصغي لقلب.....
دع عنك زهوك إن لي في الجوف قلب ثائر النيلين أسمر
ضفتي خصب ثراها إن زرعت الحب فيها سوف يثمر
يابس عجف زماني غير أني مثلما الأحلام أخضر
دقة التاريخ صدقي في زمان ساده الإفك وبالإفك تدثر
دثروني سوف أقرأ ماتيسر
من جميل الشعر أقرأ
باسم نيرودا وعنتر
من حكاوى العشق أقرأ
باسم أنطونيو وروميو
من عظيم المجد أقرأ
باسم آلارا و قيصر
باسم من حلت بنا أطلالهم شرقا وغرب
أتلو لأذكرهم هنا فغدا سيأتي ثائر مثلي ليذكر من أنا
ما بال عقلي قد غوى
في أي فصل من فصول الحب ننسى من نحب
في أي خد فجر الشوق من الدمعات نهرا خالدا
في أي صدر صار للنهر مصب_
لست الملام على الهوى مع ذاك مني الاعتذار
لم تستطع صبرا معي و الصبر يكويني بنار
وأنا المعنى جرمي التوق ومن ظلي أغار
أرق منامي أرهق الليل انتظاري والنهار
شيء من استعباد من نهوى يسمى الانتظار
قل لي بحق الحب أي عقيدة تعطيك حق تملكي قلبا ولب...
_فكر مليا
من أنا
ما بال عقلي قد غوى
في أي فصل من فصول الحب ننسى من نحب
في أي خد فجر الشوق من الدمعات نهرا خالدا
في أي صدر صار للنهر مصب-
دعني لسهدي و احتياجي ألعق الماضي مرارات وهم
و أسرب الآهات مني ذكريات عبر حرفي والقلم
إذ كلما أفنيت نفسي للهوى أسمو و يسمو بي عذابي والسقم
أسمى مقامات الهوى ليس العذاب و إنما استحلاؤه رغم الألم
دعني ونشوى الحزن نشرب من دنان الالتياع نمجد الذكرى بنخب...
تهذي و أهذي
من أنا
ما بال عقلي قد غوى
في أي فصل من فصول الحب ننسى من نحب
في أي خد(غير خدي) فجر الشوق من الدمعات نهرا خالدا
في أي صدر (غير صدري ) صار للنهر مصب
من علم المحبوب كيف يعذب المشتاق سوط العشق كيف تهز كف الشوق مكشوف العصب
من ظن أني رغم أني هائم في العشق أنسى قسوة المعشوق أو أصغي لقلب......
#وئام_كمال
مسؤلين من الخير المنام كيفنو
باقي اجفاني فاقداهو ومطوله منو
زولي القلبي مشتاق لي لطافتو وحنو
فوق عمر الزهور زايد شوية اظنو
أنا يا دفتر الأشواق ديونى الولت
ليكا عفيتة هن انحلت أو ما انحلت
بعدما العبرة من عقبة حلوقنا اتدلت
دمعنا الفات مع دمع السعادة اتخلت
بقينا مكتفين غزل الحسان سبناهو
الا الشفتو في لفة كنانة براهو
اللابس ملابس الطب وزايدة بهاهو
انا جنيتبو الله إصبرن مرضاهو
#ودمسيخ
ناديت ولا راجعني رد
فاقد صداك انا يا حروف
كملت سكك كل الظنون
حتى القلم غالبو الوقوف
كترت طوابير الفهم
ماضعت في نص الصفوف
لكني بس خالي الوفاض
تاعبني ابهام الوصوف
وانا هسه واقف دون رفيق
عفوا وفيرا يا ظروف
انا ما فترت من المشي
لا هد حيل احساسي خوف
انا بس بفتش ليا ضو
شان العيون تقدر تشوف
#مهند_الشيخ
ﻓُﺮﺍﺳﺎ ﺑﻌﺰﻭﻫﺎ ﺍﻡ
ﻗﺮﻳﻨﺎً ﻧﺎﺩﻱ
ﻫِﻴﻠُﻦ ﻳﻠﻔﻮ ﻟﻠﻀﺎﻕ
ﻭِﻳﺮﺩﻋﻮﺍ ﺍﻟﻤﺘﻤﺎﺩﻱ
ﺭﺑﺎﻋﺘﺂً ﻟﻴﺎ ﺷُﻒ ﻓﻴﻬُﻦ
ﻧﻔﺎﻳﻞ ﺍﺟﺪﺍﺩﻱ
ﺳﺎﺩﺓ ﻗﻮﻡ ﻣﻜﺎﻥ ﻣﺎ ﺣﻠﻮ
ﺣﻀﺮ ﺅ ﺑﻮﺍﺩﻱ
©©©©
ﻣﻮﻥ ﺻُﺤﺒﺔ ﻣﺼﺎﻟﺢ
ﻗﺮﻗﺮﺍﺏ ﺅ ﻗﻬﺎﻭﻱ
ﻛﻢ ﺷﺎﻗﻴﻦ ﻣﻌﺎﻱ ﻭﻋﺮﺓ
ﻛﻤﺎﺝ ﺅ ﺑﻼﻭﻱ
ﻧﻔﻮﺳﻬﻦ ﺻﺎﺍﻓﻴﺔ،ﻗﻮﻟُﻦ
ﻟﻠﻔﻀﺎﻳﻞ ﺣﺎﻭﻱ
ﻳﺠﻴﺮﻙ ﺍﻟﻠّﻪ ﺇﻥ ﻗﺼﺪﻭﻙ
ﺳﻼﺣﻬُﻦ ﻋﺎﻭﻱ
#الهمباتي_الاغبش
صباح سوق خدارنا..
و صباح ناس.. و لمة
صباح الخدار..
و البيبيع التسالي
صباح الجزارة..
و كم صنف لحمة
و نص كيلو ضان..
و عجالي غالي
و جرجير بيرقص..
علي كل نسمة
صباح خدرة ناعمة..
و طماطم تلالي
صباح زول بيغشك..
بدون أي رحمة
صباح يفتح الله..
و مالك و مالي
صباح البنية..
البتاخد ببسمة
صباح البقولو ...
علي جاي تعالي
#محمود_الجيلي
ماف حيلة غير أضحك
وأفرش سنين العمر
في الفاضي واتمشا
و افضل أغض الطرف
شان أقدر اتغشا
الله ابتلاك ب الشوف
واداك روح هشة
#محمد_الشيخ
بين مصطفى و محمود
سر الوتر و العود
صوت الحنان لو غاب
صوت الحنين موجود
ذكراك ما ذكراك
في كل يوم بتعود
بين مصطفى و محمود
سر البخور و العود
كلما إحترق بيفوح
لو راحوا من العين
فوقنا بتحلق روح
صوت دندنات و وطن
لسه الجرح مفتوح
و لسه القلوب تسمع
تغريد بلابل الدوح
و صوت الكمنجة أنين
و لسه الوتر مجروح
#محمود_الجيلي