5285
الاسم :- سئلت ذات مرة ما سر ذاك الاسم؟ صرخت ِملأ صمتي المكبوت في دواخل الفنون إنه اسمها حروفه تطايرت تشكلت تألقت تعلقت بشخصي الضعيف فصار اسم شخص ما ... بداخلي. - ريحة البن .
بترجع حليمة
ونرجع لذات الحكاوي القديمة
بنسأل ضميرنا و غيابو البجاوب
نضيع من قيمنا و بدون أي قيمة
بتبقى الهموم لينا أقرب قرايب
نعيش إنكسار الظروف الأليمة
و يوم ما نحس إنو يوم بكرة غالب
نخاف إنتصارنا و نَحِنْ للهزيمة
توحدنا دائما جموع المصائب
و تفرقنا كلمة زعل او شتيمة
ولا يوم بنحسب ونخشى العواقب
و يارب تجيب العواقب سليمة
#محمود_الجيلي
الخليل… والعازه ..وكباية شاي ..
بعد نامت كلاب الحله ..كتلن ضنيبن سكت نباحن
صجت المواجع فوقي ..مسكن كبيدتي وصاحن
كتلوك ولا جووك جوووك
يا النايم فوق قبر ابوك ..تب العيال فاتووك
وبكن.. بكني لامن ناحن
منو القال المحن بتحاحن?!
وانا جاي اعزيك فيني يا العازه
جاييك من سته صباحن
جاييك من سته صباحن
طربوشي اللحمر دم قلبي
خلي الغنوات اليرتاحن
يا عازه خليلك ما بنساك
ما شامه الغنوات الفاحن!?
الزهره الوجت في جناينك
شربت دم قلبي الصاينك
ارواحا سبقت ارواحن
يا حليلك يا عازه خليلك
جاييك من سته صباحا
حبابك يا زول اتفضل
يا سيد الغنوات الكمل
خرمان للشاهي اللحمر?
دنقرتا ولا قلتا التكتح
مرات مرات ..انا ساي بخجل !
وبي حنان بعرفو الهبهان
ختت كباية الشاهي اللحمر
وقبال ما يبرد شوقي
والنار الشبت فوقي ..
وقفت فوقي ..وسألت:
كيف حال البلد يا خلي?
يا عازه ياخ ما تخلي..!
كيف حال مزارعيها ..
رواعيها وافنديها..?!
صح هجيتو للبندر
بعد نشفت اراضيها?
نسيتو كلام جدودنا زمان
وكت "وصونا علي الوطن
علي التراب الغالي المالي تمن"
حليلو الكان "بناديها"
وبعزم كل زول يرتاح علي ضحكة عيون فيها"
عليك الوطن يا عازه
روحي الفيها كافيها
انا البلد الخلق فيها
شرب من طينا الميها
حبيت بنجوس ..
اكل فقوس ..
لعب في. كل حواريها
ضالة وشليل وين راح
ام بطاح ..الكلب النباح
دا السرقها ..قبال تشرق شمس الصباح
دا الضبحها.. وشال ضي عيونها وراح
دا السلخها.. وسو من جليدتا وشاح
دا الاكلها ..تاكل ام بوعلو يا اب مشيتن شوباح
ودا الودا الخبر لي اهلها
وكل القالو (ياخ ما صاح)
وانا سيد الرايحه بكيت بكا الامات
بي كل اللغات الحيه .. ووب واحييا ..ببكيها
مرق من كل رواديها
كما الاذان ..كما النشره
مجلجل في بواديها
احب بلدي..حلف بي تراب جدي
اختها في اباطي جمر
واضمها يومي في زندي
واقول بلدي
بلدي الخلق فيها
وحااات الله البسل الروح
تفوت روحي واموت فيها
ولا بقدر اخليها
محال يا عزه اخليها ..
#ابراهيم_جابر
ما عندي غير الله
يسمع أنين صمتي
ومن همّي أتحلّ
ما عندي غير الله
ما عندي غيرو يشيل
مني الألم والضيق
ويديني راحة البال
ويهديني نورو طريق
وينشلني من البي
أنا لسه فيني غريق
ويرجع بلدنا أمان
واللمة في الحلة
ما عندي غير الله
مين ضامن الأيام
ومين عارف البكرة
واليوم ألم ساعات
والثانية زي جمرة
البال دوام مشغول
فكرة بتشيل فكرة
ونار الصبر بتقيد
وفي نارا أتقلى
ما عندي غير الله
كل اللكانوا معاك
يوم ما وقعت مشوا
وحتى الوعود ذاتا
طلعت كلام و حشو
خلو التراب يابس
والنيل بزيد عطشو
يا قلبي ما ليك غير
بالذكرى تتسلى
وما عندي غير الله
#محمود_الجيلي
دائما بحسك كتير فيك بفكر
عيونك تدلع حواسي وتشكر
بريدك بجدي
وفات ذاتو حدي
جفاك هو البخوف
وما أظن بعدي
تعال شوفو ردي
دفاك انت بردي
هواك مالي يدي
وأطمن عيونك حلول ريدنا عندي
#أديبه_احمد
صافحتُ من ظلموا، عفوا مددتُ يدي
خرجتُ منتصرا من حسرتي لغدي
صفحًا عن النفس لا رِفقًا بظالمها
ستشهقُ الرُّوحُ في بحرٍ من الزّبَدِ
لما طلبتَ طريقًا لا تضلُّ بها
ظللتَ تطلبها عمرا ولم تجدِ
(أحرقتُ خارطةَ الآلامِ مبتردا
من يومها وأنا أرتاحُ في جسدي)
كانت تعاتبه واللومُ ديدنها
شمطاء هاربة من غيهب الأبدِ
وكان يصحبها كالخضرِ مبتسمًا
لا تسأليه فما في الأمر من رَشَدِ
(أنا ابن آدم قد قدّت سفينتهُ
والماء يصعد من ساقي إلى كبدي)
قالت: تموتُ سدى. قال: الوداع إذن
قالت: سواك قضى نحبا ولم يعدِ
قال: الطريقُ طويلٌ والهلاك به
قالت: نجوتَ إذا أقسمتَ بالبلدِ
يا عقدةَ الذَّنبِ يخفيها وتفضحه
في الدّمعِ والخوفِ والتفكيرِ والسُّهدِ
قال: اتركي أملاً للطفل يمضغه؟
قالت: وما حاجةُ المقبورِ بالولدِ!
قال: السّلامُ على نفسٍ تعذّبني
قالت: عليكَ السّلام الآنَ للأبدِ.
#KeepEyesOnSudan
#حفظ_الله_السودان
#ceasefireInGazaNOW
#محمد_عبدالواحد
لو كنت صريح ؛
كانت شالت ،
في الايد الحنة الغنيتا ...
لو كنت بِريِت
من طبع الريح ،
كانت قالت
كنت لقيتا ...
وانت المتيبس بالأحزان
كنت قريتا ،
ولقيت عنوانك بالأحضان
كان ياريتك
كان يا ريتا ...
انت المتعلق بالألحان
والكِبْريتة ...
وانت المتلبس بالألوان
انت النايح
والتربيتة ...
انت البتفلي سبايب الليل ،
من لغو النجمة السهرانة ...
وانت البتلكِّز خصر الخيل ،
وتموت في اللفة الولهانة ...
وشهيقِك/نبضِك جزو من كل ،
في نوتة عمري وألحانا ...
البت الحلمها طوق ال فُل ،
ما بتفهم ليك الريحانة ...
#محمد_الشيخ
الظروف الجات بتمشي
وكل جروحنا الفينا بتزول
العشم في الناس مذلة
والله ما يحوجنا لي زول
الله ما يحوجنا ليهو
الفي العذاب ما بحس بيكا
ويفهمك من قبل ما تقول
وتشرح الحال العليكا
السند في الدنيا دائما
تبقى ليهو ويبقى ليكا
الله ما يحوجنا لي زول
يكسر الروح ويشتكيكا
الكلام القالوا لينا
والوعود البخلفوها
والمحبة الصادقة ظاهرة
ولسه هم ما بعرفوها
وقبل ما أحلامنا تبدأ
بالقساوة بينسفوها
والدموع القالوا بتسيل
هسه بالهم نشفوها
الله ما يحوجنا لي زول
بالعشم يكوينا جمرو
كان بيزيد آلامنا ويمشي
وعمرو ما فرحنا عمرو
الله عالم وحاسي بينا
ويسرو مربوط جوه عسرو
نحن رافعين الأيادي
وديمة بنسلم لأمرو
#محمود_الجيلي
حلتنا كان جنبها كم فسحة، بالتحديد ورانا كان في فسحة معقولة كدة فيها تلاتة رواكيب، واحدة حقت حوة ( اصغر وأقدم واحدة) و تاني منى و دايما بتجي واحدة تلاتة تحاول تنافسهم ما بتواصل كتير،،
قهوة حوة جميلة جدا، بس قهوة منى هي الأجمل علي الإطلاق، أنا زبون حوة باعتبار القدم.
رغم انهم المفروض متنافسات بس كانوا متصاحبات بحيث بشيلو من بعض النواقص، و لمن واحدة تفضي بتجي عند التانية تتونس، و كمان كانو بيفطرو مع بعض يوميا في الغالب، و كم مرة فطرت معاهم
الزباين عندهم كتيرين و مجتمعين مختلفين تماما، كل مجتمع عندو ولاء لي زولتو رغم أنهن ما عندهن ايي مانع لو مشيت او لقتك بتشرب عند التانية، فبتجي بتتونس معاك و معاها
منى كانت بتطلع معانا المواكب لمن جات الثورة
حوة ديك رسمية أصلا بتفتح الصبح و العصر بتقفل و ما زولة ايي شي غير شغلتها دي
علاقتي معاهم بقت صداقة وثيقة مع الزمن، لمن ارجع من الشغل لو لجيت بدري بنزل اشرب جبنة حتي اخش البيت
السبت بصحى من الصباح بمش عليهن،،
القصة دي تفاصيل عادية شديد و غير استثنائية عن علاقات إنسانية بسيطة شديد حاصلة في اماكن كتيرةفي السودان، عشناها كل يوم علي مدى سنين
هسي فارقة معاي جدا
و حاسي بالوحشة بدونها، و نفسي اعرف و اتطمن انو منى و حوة بخير لأنو انقطعت منهم طولت
كلما أكون طالع يقولو لي سلم على الحاجة، و كنت بسلم عليها و اكلمها
بلدي كان ساجن طموحنا
إلا في القيد كم فرحنا
كم شربنا الجبنة بكري
و تاني تنينا و ضحكنا
بلدي كان الكون مصغر
بعدو وينما رحنا (رحنا)
فيهو تشبهك التفاصيل
جوة قلبك ألف سحنة
كنا متعايشين و راضين
كل تكاتف بلغي محنة
بلدي يا أحلى المواويل
بلدي يا شوقنا و جرحنا
بلدي ترحاب نكرم الضيف
هسي بس معليش نزحنا
اه من الوجع الصحي بعيش
آه من الموت المسحنا
بلدي يا الليلك موطل
أصلو ما شاقك صبحنا؟
#مجاهد_كاروري
لنا حُزنان .
حزن دائمٌ و إرادي
و هناك حزنٌ لا يهمُّ ... و عادي
حزنٌ سيمسحُهُ البكاء و ينتهي
و هناك ما ندعوهُ نحن :
" بلادي "
#محمد_عبدالقادر
19 ديسمبر
شفت صورتك قلبي دقه
انتي ريدتك مستحقه
والله شوقك يا الحنينة
جوووه في اعماقي بقه
💔💔💚💔💔
الملامح ياها ذاااااتها
نفس شاماتا التلاته
بحري والخرطوم بشوفن
جوز عيونك يا حلاتها
ذبتي في ام در ياخي كلللك
و سحتي في انبل صفاتها
غير اريدك شن اسوي
وانتي ريدتك مستحقة
شفت صورتك ..
قلبي دقه 💚💔💚
#ابراهيم_جابر
أصابني خَدَرُ الحواس
لأنني فكرتُ في معنى عناقكِ
في مسار الخصلة التمتدُّ بين يدي و وجهك
في شتاءٍ لا يزورك دفا في صدري
و في برد الشفاه
أصابني خدرٌ الكلام
لأنني حاولت أن أصف ارتماءك في اندفاع مشاعري
حاولت أن أدعوك باسمك دون أن يحتاج قلبي نبضةً أخرى
بدون مسافةٍ تحتاج تذكرةً
و إذناً للحياة
#محمد_عبدالقادر
زولة عينيها ابتسامة
و طولها مد النيل عذوبة
ضل وطن للشمسو نازحة
و صوت سلام عز الحروبة
زولة بيت بابو المحنة
و مبني بالحب طوبة طوبة
كلما تطرى الأماكن
تبقي ليك حلة و دروبة
و تبقي ليك اصحاب و رفقة
من جفا الغربة و شحوبة
زي دعاء من عبد خاشع
لي الكريم ناوليو توبة
#مجاهد_كاروري
أنا رهن حبيس قيد أوهامي
أتابع شهوتاي و أبغض التبع
فجنبني ملازمتي ظلامي
ونفسي إذ تغالبني وتبتدع
تؤرقني ذنوبي جل أيامي
ويوجعني ضلالي أيما وجع
اغثني يا إلهي من هيامي
ففيَّ المضغة السوداء تتسع
#امجد_اسماعيل
من بين أحضان الأغاني
في هوى أمدرمان
من بين الحكايات التي تُنسى من التلفاز
و التاريخ أحياناً
وجدتكِ صدفةً
و نسيت أن أختار وجهك وجهةً للبيتِ
إيقاعاً لأغنية ستبقى للأبد
و نسيت أن أعطيك تذكاراً
يعوضك الحديث إلى سواي
نسيتُ أن دروبنا تقسو
وأن الحرب لن تبقى إلى يوم الأحد
#محمد_عبدالقادر
أفكاركَ الحمقاءُ تعبثُ بالنُّهى
فتقلّبُ الآراء، كيفَ وأيّها
تثبُ الظنون على بنانك إنّما
أحرق رسائلكَ التي أعددتها
يا أيُّها المقتولُ حبًّا لا تعش
إن كان قلبك بالحبيب مولّها
هذا لنفسي أم ترى لحبيبتي
هذا لها، هذا لها، هذا لها!
هذا لنيلك للجروف وللقرى
لعذوق نخلٍ لا تفارق أصلها
من عاش عاش على ثراك وإنّما
من مات عنك ،إلى سواك، توجّها
ما زال يلكمُ عاجزا أفكاره
متشخّبا ملء الموادج أبلها
لا شيء بين يديك حتى ترتمي
لا شيء في الأفق الحلوك لتعمها
لا شيء من ريش النعام ولا الأرا
ئك كي تنام على الدثور وتفكها
لا ماء في النيلين إلا دمعنا
إذ مقرن النيلين سدرة منتهى.
#حفظ_الله_السودان
#ceasefireInGazaNOW
#الهلالية
#محمد_عبدالواحد
على الدربِ سجادةٌ من حرير
على قدمي شوكة من قلق
ستُعرض عن ناظرينا الغيوم
إذا ما اشترطنا عليها الودق
تصعّر صحراءنا للغريبِ
وتمنح أسرارها مَن صدق
فكيف أقمتِ صلاة فراق
حين قرأت عليك الفلق
سألقي بصنارتي للنجوم
ففي الليل متسع من أرق
لضبة حِكمَته في الملام
فسيف الملامة فينا سبق
فإن عاد صندلها للرئاتِ
فمن أين للمقلتين الشبقِ
سأركض في الخوف حتى يخافِ
لأن القصيدة بنت العرقِ
على قدمي شوكة من مجازٍ
على الدرب سجادة من ورقِ
#محمد_الشيخ
ثم تخرجُ منهزماً . . .
من أيامٍ كانت تصافحُك بيدٍ وتنحرُ أحلامك بأخرى.
من وجوهٍ ظلت تقابلُكَ ضاحكة وتفارقُكَ بشرر كالقصر.
من نفسٍ مازالت تصارعُ ثلاثتها، مطمئنة ولوامة وأمارة.
من مقبلِ الأحزانِ التي تسكبُ قلقاً وتمزجُ أرقاً ببنهما خوفٌ من ضبابِ العمر، إن كان في العمرِ بقية.
ثم . . . تخرجُ . . . منهزماً
#محمد_المهندس
زمان كان لما تشتاق ليّ .. مافي سبب بكون حاجب
هسه بقى السلام بحساب .. زي البتأدي في واجب
الريد يا الحبيب إحساس .. و ما مجبور عليهو أكيد
و أوعى تجامل الحباك .. تمثّل في الكلام الريد
ظاهر في النفس و الروح .. ظاهر في المحنة شديد
و لو حاولت تبقى قريب .. بدون إحساس حتبقى بعيد
كلام الريد بقول روحو .. و ما محتاج كلام يتقال
زمان كان لما تشتاق لي .. بشوف في عينك ألف سؤال
بشوف اللهفة في عينيك .. و أناديك يا حبيبي تعال
هسه بقيت أشوف عينيك .. بدون أشواق بدون آمال
بتسأل عني زي مجبور .. عشان ترفع عليك اللوم
تسلّم و الكلام بحساب .. و ما كان ليهو أي لزوم
حبيبي الدنيا ما بتحتاج .. عشان ما تزيد همومي هموم
ولو في لحظة هنت عليك .. ما تكذّب علي في يوم
زمان كان لما تشتاق ليّ .. مافي سبب بكون حاجب
هسه بقى السلام بحساب .. زي البتأدي في واجب
#محمود_الجيلي
بلدك يا الاصم خليها ديمة الاولى
من بحر الثبات عبو الفرح مدوله
أرضك يا الحبيب يوم شمرت لي فحوله
قادت ها الرسن عزة وشموخ وبطوله
فيك يا بلدي قوة وعزه ما بتنكال
وفيك ابان عروض دايما" بسترو الحال
وفيك بنات رهاف عل الحمل شيال
ريدك يا غلاي جوة الوريد هطال
#اسلام_النحاس
عامٌ يمر
ونحن أبعد ما نكون عن السكون
عن السكينة والرضا
متفرقون وبعضنا غرباءُ في الأيام والطرقات
عامٌ آخر سيمر فينا شاحباً و مجرّحا
ونظل نحن معلّقون بلحظة بالبيت
أسرى نكتةٍ ظلّت تضحّكنا
ومشوارٍ يقصّر بينا الأحزان
ما زلنا نغني حين نعشق
ثم نفقد مسرحا
عامٌ يمرُّ
ولا نمرّ
ولا يعوّض ما محا
#محمد_عبدالقادر
حرّكت ذاكرتي إليك
إلى شمال القلب تقريباً
و حولّت السنين إلى معانٍ ليس بالأرقام نحسبها
ولا بالشيب أو عمر التجاعيدِ
حرّكت ذاكرتي لإنقذها
من التحديق في الباب المؤدي للوداع
و من شبابيكي التي انتظرت رجوعك
من أسفِ المواعيدِ
حركتها نحوي
بعيداً عن مدى الخرطوم
عن عمري و عمرك
والتقاليدِ
#محمد_عبدالقادر
قمرين.. في سما نساي...!
في دروب الغربه...
يوووت بتذكرك
ومن المداين الرافضه صوتي يحصلك...
انا بندهك ..
يا يمه هوووووي
صوتي انسحك
اصبح رزاز ما حصلك ؟
يا يمه هوووووي..
قلبي انفتق
خرطوم شنو البتبدلك؟
وانا بندهك ..
في لحظه ما خامرني شك
محتاج عديييل لي معجزة
شان صوتي يقدر يوصلك
ووققتا في الفسحه الامام
شارع قليبي المو تمام
ناديت علي الطير اليمام
يا ايها الطير واليمام
صفا وانتباه وكت التمام
اجمع كتايبك دون فرز
شكل مع ديش الحمام
نشن هديلك وارتكز
فتح جواي سكك الكلام
ويديك معاي عشان نلز
جنحيك معايا عشان نلز
قطر الغنيوات الوقف
ناديت عليك رد الاسف
ناديت عليك رد الاسف!
شان صوتي يقدر يوصلك
منطر اطاطي واستلف
اصوات جميع الكاينات
عبيتا ليك في فد حرف
كل الحناجر في الفلك
ندهن عليك وانا برتجف
يا يمه هووووووي
حدي اتلحق ..
قبال اجيك واوصلك
يا يمه هوي ..
بحري انحرق..
قبال يجيك وينهلك..
عطشان قليبي ومرتبك
والغربه مصت دمي جت..!
ما عندي مقدار انزفك
يا عذبه .. يا موية المطور
وين الرهيد البشبهك..؟
سائل عليك كل الزهور
يمكن تحن لي توصفك
وانا من سنين كايس عليك
واثق عبيرهن بعرفك..!
دوزن عصب كل الحواس
قاصي الدروب متكرفك
وانا قلبي قادوس الانين
يا زهرا اه لو تعرفي
ركت نسايمك في الجبين
وانا كنت غمران منكفي
نزت قصايد الشوق حنين
يا يمه وجع الروح خفي..؟
وانا بفقدك..
اصلو الشتا..
سناك سكاكين في الرئه
وساومني بي لحظة دفي
في اللحظه ديك لو تعرفي
بحتاج شموسك يبقو في!
في اللحظه ديك لو تعرفي
يمه تصبح لي شهيق..!
والحسره اقرب من رفيق
يا آه بي اتلطفي
والآهه فاير دمها
دي الآهه فاير سمها
فنوها في قلوب الخلوق
ومكتوب عليا المها
من اليتامى الفي الوجود
حالمها ..وحألمها
من الحزانى وكت تعود..
حألمها ..وحألمها
وكتين يا زهرا ينومو الناس
والروح في الغربه تكوس وناس
بمسح دموعها
واضممممممممممها
الآهه ما بتخبر بلاي
ياني الوحيييد ولضمها..!
دي الآهه ما بتعرف سواي
ياني الوحيد ود امها..!
مكتوب علينا نعيش سوا
وجعين علي جرح انكوا
مطعون صبابه ومنجرح
رادتني غنوات الفرح
وانا قلت ساكت اشمها
الآهه بقت من جرح
قاتلي رويحتك يسمها
لو تبدا مسدارين مرح
كيتن عليك
حأتمها ..وحأتمها
وضحك عليها جنس ضحك
بتغيري يا الكاجه الشرك؟
خوفتي عصفور الفرح
جوايا ما قادر يرك..!
وغنيت ..غنيت
يوم جيتك يا يمه..
"يا ام قرون الحمامه.. معاكي السلامه
زولي البريدا فات ..الدنيا ما دوامه
احي يا اب فليجه .. معاك السلامه "
وغنيت يوم جيتك يا يمه
لمحني عيونك في الضلمه
فرزني في لحظة وعرفني
وزي عاداتني ..بكننننني
قمرين في عيونك يا يمه
كايسين شقيش مدسي سماي
وسماي العجمي الما بتسمى
يوت مسجون في فضا نساي
وفضايا غناي ..لو بتلمه
انا كت لميتو وراك دوباي
و كت حلفتو علييييك الزمه
مما توصل لي عن يمه
ارجووووك قوليها وليدك جاي!
#ابراهيم_جابر
جادت الأحلام وجابت
طيف حبيبي في شكل غيمة
نقطت في قلبي قامت
وردة واااحدة
فتحت جواي تميمة
حصنت روحي ابتسامتك
نبتت أرضى العقيمة
فجابت أحلى سلاسة في الريد
سمحة دغرية وسليمة
#ماجدولين_سعد
ديسمبر كانت
في الأول سداً
ضدً كانت
ضد الشيطان
ردماً للكارثة
الأكبر حداً
كانت ورِداً
ذكراً
شكراً
قمة حب بني الإنسان
ديسمبر أحلام الناس
أشواك
أزهار
إرهاص
أبكار وهبو للحق
اقدار
كتبًُ
و مناص
ديسمبر نحن و لا تنسى
إذ نهتف يسبقنا كشة
إذ يرجف في خوف بشة
إذ يكذب علماء السلطان
إذ نصدق وعد الميدان
يدفعنا صوت اللاقبلية
وسلام يمكث داخلنا
وعدالة رب الحرية
وجمال ينتظر خلاص
بالحرب قتلتم أمتنا
أمتكم
أو يحدوني الشك
لكنا نحن وما زلنا
نعشقنا حين يعود لنا
ديسيمر إي ديسمبرنا
إن ظنو أنا قد هُنّا
وبنار حروبهم لِنّا
يا صوتاً يخرج ممنا
واللًه و تا اللًه لإنا
لن ينسينا الحق رصاص.
...........
#امجد_اسماعيل
#حرية_سلام_وعدالة
#ديسمبريون
#مافي_مليشيا_بتحكم_دولة
بي أبسط حاجة بنفرح .. بي كلمة و شوفة صاحب
و بي أبسط هم نتجرّح .. بي الغم و ضمير الغائب
عايشين و أرواحنا رهيفة .. و نطير لو جونا حبايب
بنحب في ناس جافونا ... لو جونا نكون إرتحنا
الناس الزينا نحن من محنة تقع في محنة
الشقا في عيونا يتاوق و الهم في الدم و السحنة
#محمود_الجيلي
الدنيا دبنقة وعايزة جَلَد ...
والدارة عنج ،
الدارة عجاجاً شقا ولد ...
و الركْزة مزااااج
والخالق لمن قالو كونوا ؛
في البرمجة خطا علينا كبد ...
الصبر حبالو لجام أخلاق
الصبر مسد ،
الصبر مسد ...
لو رفضت كل خطوط العرض
تبقالنا العرض
اتوكا عصاتك وابقى بلد ...
#محمد_الشيخ
يا البلد البريدا شديد
وريدي ليك كتامي
دسيتو في دم الوريد
ما بحتا بيهو غرامي
يا الكل ما اسافر بعيد
بلقاكي واقفة امامي
كيفن نسيتي الريد؟
الريد والحديس السامي؟!
#ابراهيم_جابر
ما محتاج أقول ليك قول
وأوريك يا القريب مالي
وما معقول نكون أصحاب
واحتاج أشرح أحوالي
#محمود_الجيلي
حتي النور دا حت
واتبتق ضلام
قام في كل حته
قام والله قام
قام في احلي نكته
وفي طرف السلام
عشا ن كدا ما ضحكت
وعز الابتسام
ما عارف هجعت؟
عام او بعض عام؟
وعمرك ما اضجعت
لا زارك منام
ايا قمري اتطلعت
في كف الغمام
اسبوعين طلعت
وما تم التمام
ناديت لو سمعت
وكررت الكلام
ما تقول انتصرت
وكلك انهزام
#يس_النضيف
الكتابة اتبكمت...!!
صوت الحروف مات واندفن
والقافية ذاتا اتغربت
بقت القصيدة شبح مخيف
تقراها...
تصبح لا احد.....
#نصر_محي