5285
الاسم :- سئلت ذات مرة ما سر ذاك الاسم؟ صرخت ِملأ صمتي المكبوت في دواخل الفنون إنه اسمها حروفه تطايرت تشكلت تألقت تعلقت بشخصي الضعيف فصار اسم شخص ما ... بداخلي. - ريحة البن .
قمرين.. في سما نساي...!
في دروب الغربه...
يوووت بتذكرك
ومن المداين الرافضه صوتي يحصلك...
انا بندهك ..
يا يمه هوووووي
صوتي انسحك
اصبح رزاز ما حصلك ؟
يا يمه هوووووي..
قلبي انفتق
خرطوم شنو البتبدلك؟
وانا بندهك ..
في لحظه ما خامرني شك
محتاج عديييل لي معجزة
شان صوتي يقدر يوصلك
ووققتا في الفسحه الامام
شارع قليبي المو تمام
ناديت علي الطير اليمام
يا ايها الطير واليمام
صفا وانتباه وكت التمام
اجمع كتايبك دون فرز
شكل مع ديش الحمام
نشن هديلك وارتكز
فتح جواي سكك الكلام
ويديك معاي عشان نلز
جنحيك معايا عشان نلز
قطر الغنيوات الوقف
ناديت عليك رد الاسف
ناديت عليك رد الاسف!
شان صوتي يقدر يوصلك
منطر اطاطي واستلف
اصوات جميع الكاينات
عبيتا ليك في فد حرف
كل الحناجر في الفلك
ندهن عليك وانا برتجف
يا يمه هووووووي
حدي اتلحق ..
قبال اجيك واوصلك
يا يمه هوي ..
بحري انحرق..
قبال يجيك وينهلك..
عطشان قليبي ومرتبك
والغربه مصت دمي جت..!
ما عندي مقدار انزفك
يا عذبه .. يا موية المطور
وين الرهيد البشبهك..؟
سائل عليك كل الزهور
يمكن تحن لي توصفك
وانا من سنين كايس عليك
واثق عبيرهن بعرفك..!
دوزن عصب كل الحواس
قاصي الدروب متكرفك
وانا قلبي قادوس الانين
يا زهرا اه لو تعرفي
ركت نسايمك في الجبين
وانا كنت غمران منكفي
نزت قصايد الشوق حنين
يا يمه وجع الروح خفي..؟
وانا بفقدك..
اصلو الشتا..
سناك سكاكين في الرئه
وساومني بي لحظة دفي
في اللحظه ديك لو تعرفي
بحتاج شموسك يبقو في!
في اللحظه ديك لو تعرفي
يمه تصبح لي شهيق..!
والحسره اقرب من رفيق
يا آه بي اتلطفي
والآهه فاير دمها
دي الآهه فاير سمها
فنوها في قلوب الخلوق
ومكتوب عليا المها
من اليتامى الفي الوجود
حالمها ..وحألمها
من الحزانى وكت تعود..
حألمها ..وحألمها
وكتين يا زهرا ينومو الناس
والروح في الغربه تكوس وناس
بمسح دموعها
واضممممممممممها
الآهه ما بتخبر بلاي
ياني الوحيييد ولضمها..!
دي الآهه ما بتعرف سواي
ياني الوحيد ود امها..!
مكتوب علينا نعيش سوا
وجعين علي جرح انكوا
مطعون صبابه ومنجرح
رادتني غنوات الفرح
وانا قلت ساكت اشمها
الآهه بقت من جرح
قاتلي رويحتك يسمها
لو تبدا مسدارين مرح
كيتن عليك
حأتمها ..وحأتمها
وضحك عليها جنس ضحك
بتغيري يا الكاجه الشرك؟
خوفتي عصفور الفرح
جوايا ما قادر يرك..!
وغنيت ..غنيت
يوم جيتك يا يمه..
"يا ام قرون الحمامه.. معاكي السلامه
زولي البريدا فات ..الدنيا ما دوامه
احي يا اب فليجه .. معاك السلامه "
وغنيت يوم جيتك يا يمه
لمحني عيونك في الضلمه
فرزني في لحظة وعرفني
وزي عاداتني ..بكننننني
قمرين في عيونك يا يمه
كايسين شقيش مدسي سماي
وسماي العجمي الما بتسمى
يوت مسجون في فضا نساي
وفضايا غناي ..لو بتلمه
انا كت لميتو وراك دوباي
و كت حلفتو علييييك الزمه
مما توصل لي عن يمه
ارجووووك قوليها وليدك جاي!
#ابراهيم_جابر
جادت الأحلام وجابت
طيف حبيبي في شكل غيمة
نقطت في قلبي قامت
وردة واااحدة
فتحت جواي تميمة
حصنت روحي ابتسامتك
نبتت أرضى العقيمة
فجابت أحلى سلاسة في الريد
سمحة دغرية وسليمة
#ماجدولين_سعد
ديسمبر كانت
في الأول سداً
ضدً كانت
ضد الشيطان
ردماً للكارثة
الأكبر حداً
كانت ورِداً
ذكراً
شكراً
قمة حب بني الإنسان
ديسمبر أحلام الناس
أشواك
أزهار
إرهاص
أبكار وهبو للحق
اقدار
كتبًُ
و مناص
ديسمبر نحن و لا تنسى
إذ نهتف يسبقنا كشة
إذ يرجف في خوف بشة
إذ يكذب علماء السلطان
إذ نصدق وعد الميدان
يدفعنا صوت اللاقبلية
وسلام يمكث داخلنا
وعدالة رب الحرية
وجمال ينتظر خلاص
بالحرب قتلتم أمتنا
أمتكم
أو يحدوني الشك
لكنا نحن وما زلنا
نعشقنا حين يعود لنا
ديسيمر إي ديسمبرنا
إن ظنو أنا قد هُنّا
وبنار حروبهم لِنّا
يا صوتاً يخرج ممنا
واللًه و تا اللًه لإنا
لن ينسينا الحق رصاص.
...........
#امجد_اسماعيل
#حرية_سلام_وعدالة
#ديسمبريون
#مافي_مليشيا_بتحكم_دولة
بي أبسط حاجة بنفرح .. بي كلمة و شوفة صاحب
و بي أبسط هم نتجرّح .. بي الغم و ضمير الغائب
عايشين و أرواحنا رهيفة .. و نطير لو جونا حبايب
بنحب في ناس جافونا ... لو جونا نكون إرتحنا
الناس الزينا نحن من محنة تقع في محنة
الشقا في عيونا يتاوق و الهم في الدم و السحنة
#محمود_الجيلي
الدنيا دبنقة وعايزة جَلَد ...
والدارة عنج ،
الدارة عجاجاً شقا ولد ...
و الركْزة مزااااج
والخالق لمن قالو كونوا ؛
في البرمجة خطا علينا كبد ...
الصبر حبالو لجام أخلاق
الصبر مسد ،
الصبر مسد ...
لو رفضت كل خطوط العرض
تبقالنا العرض
اتوكا عصاتك وابقى بلد ...
#محمد_الشيخ
يا البلد البريدا شديد
وريدي ليك كتامي
دسيتو في دم الوريد
ما بحتا بيهو غرامي
يا الكل ما اسافر بعيد
بلقاكي واقفة امامي
كيفن نسيتي الريد؟
الريد والحديس السامي؟!
#ابراهيم_جابر
ما محتاج أقول ليك قول
وأوريك يا القريب مالي
وما معقول نكون أصحاب
واحتاج أشرح أحوالي
#محمود_الجيلي
حتي النور دا حت
واتبتق ضلام
قام في كل حته
قام والله قام
قام في احلي نكته
وفي طرف السلام
عشا ن كدا ما ضحكت
وعز الابتسام
ما عارف هجعت؟
عام او بعض عام؟
وعمرك ما اضجعت
لا زارك منام
ايا قمري اتطلعت
في كف الغمام
اسبوعين طلعت
وما تم التمام
ناديت لو سمعت
وكررت الكلام
ما تقول انتصرت
وكلك انهزام
#يس_النضيف
الكتابة اتبكمت...!!
صوت الحروف مات واندفن
والقافية ذاتا اتغربت
بقت القصيدة شبح مخيف
تقراها...
تصبح لا احد.....
#نصر_محي
اهو دا الصباح إتنسل
من باقي ليل امبارح
ياريتو كان إتمهل
وبقي ف عيونك سارح
كان هسة ساكن فيك
وبانيلي بيت ومطارح
اشرب مزاجات كيفك
بدل الحنين الجارح
انا بالي في (شمبات)
انا عندي فيها مسارح
#اولادـالحلة 💔
#عاطف_شمبات
جانا رِهاب
من الأصحاب
شك ومظنة
في كل اللي كانوا قُراب
صحيح تحت السواهِي
دواهي
وما كل العُزاز أحباب
غايتو رِضينا يا (ابوحميد)
ومن رِجا ربه ماظن خاب
#عاطف_شمبات
# في اليوم العالمي للحبيبة❤️
الي سناء محمد عيسى 😍
وفي اللحظة ديك ضحكتها ...
وفي مركب فاضي في القيف
غشيتها ريد ركبتها
بت اللذين أحبهم
اقنعتها ..!
انو عينيها الدقاق ديل البحر
وأنا ما بعوم انا جاي انتحر
وفي القيف هنآك وقفتها
واقنعتها..
انو العمر ..من غيرها كر 😭
وانو الحلو انا ضايقو مر😥
لو ما هي جات في وقتها
ومن وقتها ..
انا كت بقوم من جنبها
شان تاني اقعد جنبها
أقعد يمين .. اقعد شمال
اقعد شمين .. نص قلبها ❤️
من ديك وعييييك ضحككككتها
بت اللذين احبهم..!
في مركب فااااضي في القيف
غشيتها ريد ركبتها ....
ماسورة كان البت ياخ
دقستا غايتو ركبتها ..!
ماسورة بتنقط فرح💧
فوق القليب الانجرح
انا قلت اح ..
وجغمتها..!😂
رصيت جرادل الريده صف
صف بعدو صف… من بعدو صف
قلت ليها بشويشك عليا ونقطي
طق .. طررق ..وشربتها!
يا زمزم العشاق انا يم عطيش
انا ود قبايل الموية من كانت مشيش
وانا كنت درويش ..داسي المحيطات جوه طار ... وبسال حمامة الغار
حم يا حمامه الموية شقيش؟
وانا كست ليك في الصحرا
شربني البنيات العويش…
كم واحدة بيك شبهتها؟!
وقصيت حشاشة الاغنيات
من قلبي دا ولبستها…
هي القصة كانت عاملة كيف؟
الدنيا حر وسموم وصيف
وانا شفتها ..
بت زي غمامه.. وماااا غمامه
بت زي حمامة ..وماااا حمامه
بت من ضلع اعوج..
سبحان الله..!
انا الاعوج ..و عرفت بيها الاستقامة!
بت زي قشيشاية الخريف
خدرا خدرة مفرهدة
ونجااااضة
نار الله الموقدة
الياما حرقت افئدة
وانا المسيكين شواني ضراما
بت اقول ليكم شنو؟
زي البانه يعني قواما؟
وهي البانه بتقيف قداما؟!
الله قادر .. بت قيامة ...!
ومخير الله…
لو شفتوها في لحظة قياما !
بتقعد الكون جت تحت
المجرات النجيمات جت تحت
الجناين والكماين والمداين
والبعاين وما بعاين ..جت تحت
انا قلت ليكم بت قيامة
لكن
صراحة تحت تحت
انا قلبي كان بااااارك أمامه
وديع وداعة تقول حمامه
دا كان بكوووووورك ..يا حليلو
هل سمعتو؟
طالبين سلاااااااامه ..
ماتبقي ظلامة ..يا خية دي الدنيا
معدودة ايامه ..
طالبين سلامة؟!
حييييي انا ...هسي كايس للسلامه؟!
ما قلتا مافيش ريدة تاني
ما كنت بتغني الملامة
وهسي راقد لي دقييييييق
ومادي نبضك لي السلامه؟
حييييي انا ...!
الشراره الفي البسيمه
حاجة اوسم من وسيمة
ومافي اوسم منها
الا…
ابشر ودي القسيمة
بت رهيفة تقول نسييمه
بت تشهيك تبقي نيمه
وانا يا خلايق روح يتيمة ..
والحنان الفي عيونا
جنة بتلم اليتامى ..
بت قيامة…
وفوقي شبت نار غراما
واشتهيت يا قلبي تحرق
مش كدا؟ قاليا آي
قلبي يا حطب القيامة ..!
لكن كمان
البت قيامة..!
#ابراهيم_جابر
ليه يا حبيبة الروح دايما علي تقسي
تكويني بالحرمان وللذكريات تنسي
يا الشلتي نوم العين بي شوقي تتمسي
انا في انتظار عطفك صعبت علي نفسي
انا في انتظار عينيك لو حتى كان في الطيف
انا نفسي يوم ألقاك قول لي ألقاك كيف
يا فرحتي وسلواي يا نسمة عز الصيف
أنا يا حبيبة الروح غرقان وبرة القيف
الفرقة يا غالية بالذكرى حرّاقة
والدمعة طول الليل بي شوقا دفّاقة
لمتين شروق شمسك انا راجي اشراقا
تمسح ضلام نفسي الليكي مشتاقة
#محمود_الجيلي
ما لم تقله زرقاء اليمامة ...
ﺷَﻲﺀٌ ﻳُﻄﻞُّ ﺍﻵﻥَ ﻣِﻦْ ﻫﺬﻱ ﺍﻟﺬُّﺭﻯ
ﺃَﺣﺘﺎﺝُ ﺩَﻣﻊَ ﺍﻷﻧﺒِﻴﺎﺀِ ﻟِﻜَﻲْ ﺃَﺭَﻯ
ﺍﻟﻨﺺُّ ﻟﻠﻌﺮَّﺍﻑِ ﻭﺍﻟﺘّﺄﻭﻳﻞُ ﻟِﻲْ
ﻳَﺘَﺸَﺎﻛَﺴَﺎﻥِ ﻫُﻨَﺎﻙَ ﻗَﺎﻝَ ، ﻭﻓَﺴّﺮَﺍ
ﻣَﺎ ﻗُﻠْﺖُ ﻟﻠﻨﺠﻢِ ﺍﻟﻤُﻌﻠّﻖِ ﺩُﻟّﻨِﻲْ
ﻣَﺎ ﻧﻤﺖُ ﻛﻲ ﺃﺻﻄﺎﺩَ ﺭُﺅﻳﺎ ﻓﻲ ﺍﻟﻜَﺮَﻯ
ﺷَﺠَﺮٌ ﻣﻦ ﺍﻟﺤﺪﺱِ ﺍﻟﻘَﺪِﻳْﻢِ ﻫَﺰَﺯﺗُﻪُ
ﺣَﺘّﻰ ﻗَﺒﻀﺖُ ﺍﻟﻤَﺎﺀَ ﺣﻴﻦَ ﺗﺒﺨّﺮَﺍ
ﻻ ﺳِﺮّ .. ﻓﺎﻧُﻮﺱُ ﺍﻟﻨُﺒﻮﺓ ﻗﺎﻝَ ﻟِﻲْ
ﻣﺎﺫﺍ ﺳﻴﺠﺮﻱ ﺣﻴﻦَ ﻃﺎﻟﻊَ ﻣَﺎ ﺟَﺮَﻯ
ﻓِﻲْ ﺍﻟﻤﻮﺳﻢِ ﺍﻵﺗﻲ ﺳﻴﺄﻛُﻞُ ﺁﺩﻡٌ
ﺗﻔﺎﺣَﺘَﻴْﻦِ ﻭَﺫﻧﺒﻪُ ﻟﻦ ﻳُﻐْﻔَﺮَﺍ
ﺍﻷﺭْﺽُ ﺳَﻮﻑَ ﺗﺸﻴﺦُ ﻗﺒﻞ ﺃﻭﺍﻧِﻬَﺎ
ﺍﻟﻤﻮﺕُ ﺳﻮﻑَ ﻳﻜﻮﻥُ ﻓﻴﻨﺎ ﺃﻧﻬُﺮَﺍ
ﻭَﺳَﻴﻌﺒُﺮُ ﺍﻟﻄﻮﻓﺎﻥُ ﻣِﻦ ﺃﻭﻃﺎﻧِﻨَﺎ
ﻣَﻦْ ﻳُﻘﻨﻊ ﺍﻟﻄُّﻮﻓﺎﻥ ﺃﻻ ﻳَﻌْﺒُﺮَﺍ
ﺳﺘﻘﻮﻝُ ﺃﻟْﺴِﻨﺔُ ﺍﻟﺬّﺑَﺎﺏِ ﻗَﺼﻴْﺪَﺓً
ﻭﺳﻴﺮﺗﻘﻲ ﺫﺋﺐُ ﺍﻟﺠﺒﺎﻝِ ﺍﻟﻤِﻨْﺒَﺮَﺍ
ﻓَﻮﺿﻰ ﻭﺗﻨﺒﺊ ﻛﻞ ﻣﻦ ﻣﺮّﺕ ﺑﻬﻢ
ﺳﻴﻌﻮﺩ ﺳﻴﻒُ ﺍﻟﻘﺮﻣﻄﻲّ ﻟﻴﺜﺄﺭﺍ
ﻭﺳﻴﺴﻘﻂ ﺍﻟﻤﻌﻨﻰ ﻋﻠﻰ ﺃﻧﻘﺎﺿِﻨَﺎ
ﺣَﺘّﻰ ﺍﻷﻣﺎﻡُ ﺳﻴﺴﺘَﺪِﻳْﺮُ ﺇِﻟَﻰ ﺍﻟﻮَﺭَﺍ
ﻓﻲ ﺍﻟﻤﻮﺳﻢ ﺍﻵﺗﻲ ﺳﺘﺸﺘﺒﻚُ ﺍﻟﺮﺅﻯ
ﺳﺘﺰﻳﺪُ ﺃﺷﺠﺎﺭُ ﺍﻟﻀّﺒﺎﺏِ ﺗَﺠَﺬُﺭَﺍ
ﻭَﺳَﻴُﻨﻜﺮُ ﺍﻷﻋﻤَﻰ ﻋَﺼَﺎﻩُ ﻭﻳَﺮﺗَﺪِﻱْ
ﻧﻈّﺎﺭﺗﻴﻦِ ﻣﻦ ﺍﻟﺴّﺮَﺍﺏِ ﻟِﻴﺒﺼِﺮَﺍ
ﺳﻴﺮَﻯ ﺍﻟﻘَﺒِﻴْﻠَﺔَ ﻭﻫﻲ ﺗَﺼﻠُﺐُ ﻋﺒْﺪَﻫﺎ
ﻓﺎﻷﺯْﺩُ ﻻ ﺯﺍﻟﺖ ﺗﺨﺎﻑُ ﺍﻟﺸّﻨﻔﺮَﺍ
ﺳﻴﺮﻯ ﺍﻟﻤُﺆﺫّﻥَ ﻭﺍﻹﻣﺎﻡ ﻛِﻼﻫُﻤﺎ
ﺳﻴﻘﻮﻝُ ﺇﻧّﺎ ﻻﺣِﻘَﺎﻥِ ﺑﻘﻴﺼﺮﺍ
ﻓﻲ ﺍﻟﻤﻮﺳﻢِ ﺍﻵﺗِﻲْ ﻣﺰﺍﺩٌ ﻣُﻌﻠﻦٌ
ﺣﺘّﻰ ﺩَﻡُ ﺍﻟﻤﻮﺗﻰ ﻳُﺒﺎﻉُ ﻭﻳُﺸﺘَﺮَﻯ
ﻧﺎﺩﻳﺖُ ﻳَﺎ ﻳَﻌْﻘُﻮﺏ ﺗِﻠﻚَ ﻧُﺒُﻮﺀَﺗِﻲْ
ﺍﻟﻐﻴﻤﺔُ ﺍﻟﺤُﺒْﻠَﻰ ﻫُﻨَﺎ ﻟﻦ ﺗُﻤْﻄِﺮَﺍ
ﻗَﺎﻝَ ﺍﺗّﺨِﺬْ ﻫَﺬَﺍ ﺍﻟﻈﻼﻡ ﺧَﺮِﻳْﻄَﺔً
ﻋﻨﺪَ ﺍﻟﺼّﺒﺎﺡِ ﺳﻴﺤﻤﺪ ﺍﻟﻘَﻮﻡ ﺍﻟﺴُّﺮَﻯ
ﻻ ﺗَﺒﺘَﺌِﺲ ﻓﺎﻟﺒﺌﺮُ ﻳﻮﻡٌ ﻭﺍﺣِﺪٌ
ﻭﻏﺪﺍً ﺗُﺄﻣّﺮﻙَ ﺍﻟﺮﻳﺎﺡُ ﻋﻠﻰ ﺍﻟﻘُﺮَﻯ
ﺇﺧﻠﻊْ ﺳَﻮﺍﺩَﻙَ .. ﻓﻲ ﺍﻟﻤﺪﻳﻨﺔ ﻧﺴﻮﺓٌ
ﻗَﻄّﻌﻦَ ﺃﻳﺪﻳﻬﻦّ ﻋﻨﻚَ ﺗَﺼَﺒُّﺮَﺍ
ﻗُﻢْ .. ﺻَﻞّ ﻧَﺎﻓﻠﺔ ﺍﻟﻮﺻﻮﻝِ ﺗﺤﻴّﺔً
ﻟﻠﺨﺎﺭﺟﻴﻦَ ﺍﻵﻥ ﻣِﻦْ ﺻَﻤﺖِ ﺍﻟﺜّﺮَﻯ
ﻭﺍﻛْﺸِﻒ ﻟِﺄﺧﻮﺗِﻚَ ﺍﻟﻄﺮﻳﻖَ ﻟِﻴَﺪﺧُﻠُﻮﺍ
ﻣِﻦْ ﺃﻟﻒِ ﺑﺎﺏٍ ﺇِﻥْ ﺃَﺭﺍﺩُﻭﺍ ﺧَﻴْﺒَﺮَﺍ
ﺳﺘَﺠﻲﺀُ ﺳَﺒﻊٌ ﻣُﺮّﺓٌ .. ﻓﻟﺘَﺨﺰِﻧُﻮﺍ
ﻣﻦ ﺣﻜﻤﺔِ ﺍﻟﻮﺟﻊِ ﺍﻟﻤُﺼَﺎﺑِﺮ ﺳُﻜّﺮَﺍ
ﺳﺒﻊٌ ﻋِﺠﺎﻑٌ .. ﻓﺎﺿﺒِﻄُﻮﺍ ﺃﻧﻔَﺎﺳَﻜُﻢ
ﻣِﻦْ ﺑﻌﺪِﻫَﺎ ﺍﻟﺘّﺎﺭﻳﺦُ ﻳﺮﺟِﻊُ ﺃَﺧْﻀَﺮَﺍ
ﻫِﻲَ ﺗﻠﻚَ ﻗﺎﻓﻠﺔُ ﺍﻟﺒﺸﻴﺮِ ﺗَﻠُﻮﺡُ ﻟِﻲْ
ﻣُﺪُّﻭﺍ ﺧﻴﺎﻡَ ﺍﻟﻘﻠﺐِ ، ﻭﺍﺷﺘَﻌِﻠُﻮﺍ ﻗِﺮَﻯ
ﺃﺷﺘﻢُّ ﺭﺍﺋِﺤَﺔَ ﺍﻟﻘَﻤِﻴﺺِ .. ﻭﻃﺎﻟﻤَﺎ
ﻫﻄَﻞَ ﺍﻟﻘَﻤﻴﺺُ ﻋﻠﻰ ﺍﻟﻌُﻴُﻮﻥ ﻭﺑَﺸّﺮَﺍ
#محمد_عبدالباري
لو بقيت في الدنيا واحد
ما بفكر فيك تاني
ولو قليبي حنينو زايد
بكسرو وبقتل حناني
ولو عيوني بقت تكوسك
ولي طيوف شوفتك تجابد
ببقي عميانة وبكابس لي دروب
المرقة منك يا أناني
اصلي ما زعلانة انك ماك قاعد
او غرامك احتواني
لا لا ما ندمانة انو فراقنا عاند
حطم الريد في ثواني
هل تصدق ما فقدتك لا طريتك
لا بقيت أسأل واعاود
هل حصل قلبك طراني
ما بريدك لا بعيدك
لا بحير روحي بي صمتك واعاني
ياخي امشي وما تعاند
ابقي مارق من كياني
وما تحاسبني وتجيب احساسي شاهد
اصلي ما بفقد اماني
ولو علي كوس ليك حبيبة
ومني ليك كل التهاني
#ماجدولين_سعد
حلتنا كان جنبها كم فسحة، بالتحديد ورانا كان في فسحة معقولة كدة فيها تلاتة رواكيب، واحدة حقت حوة ( اصغر وأقدم واحدة) و تاني منى و دايما بتجي واحدة تلاتة تحاول تنافسهم ما بتواصل كتير،،
قهوة حوة جميلة جدا، بس قهوة منى هي الأجمل علي الإطلاق، أنا زبون حوة باعتبار القدم.
رغم انهم المفروض متنافسات بس كانوا متصاحبات بحيث بشيلو من بعض النواقص، و لمن واحدة تفضي بتجي عند التانية تتونس، و كمان كانو بيفطرو مع بعض يوميا في الغالب، و كم مرة فطرت معاهم
الزباين عندهم كتيرين و مجتمعين مختلفين تماما، كل مجتمع عندو ولاء لي زولتو رغم أنهن ما عندهن ايي مانع لو مشيت او لقتك بتشرب عند التانية، فبتجي بتتونس معاك و معاها
منى كانت بتطلع معانا المواكب لمن جات الثورة
حوة ديك رسمية أصلا بتفتح الصبح و العصر بتقفل و ما زولة ايي شي غير شغلتها دي
علاقتي معاهم بقت صداقة وثيقة مع الزمن، لمن ارجع من الشغل لو لجيت بدري بنزل اشرب جبنة حتي اخش البيت
السبت بصحى من الصباح بمش عليهن،،
القصة دي تفاصيل عادية شديد و غير استثنائية عن علاقات إنسانية بسيطة شديد حاصلة في اماكن كتيرةفي السودان، عشناها كل يوم علي مدى سنين
هسي فارقة معاي جدا
و حاسي بالوحشة بدونها، و نفسي اعرف و اتطمن انو منى و حوة بخير لأنو انقطعت منهم طولت
كلما أكون طالع يقولو لي سلم على الحاجة، و كنت بسلم عليها و اكلمها
بلدي كان ساجن طموحنا
إلا في القيد كم فرحنا
كم شربنا الجبنة بكري
و تاني تنينا و ضحكنا
بلدي كان الكون مصغر
بعدو وينما رحنا (رحنا)
فيهو تشبهك التفاصيل
جوة قلبك ألف سحنة
كنا متعايشين و راضين
كل تكاتف بلغي محنة
بلدي يا أحلى المواويل
بلدي يا شوقنا و جرحنا
بلدي ترحاب نكرم الضيف
هسي بس معليش نزحنا
اه من الوجع الصحي بعيش
آه من الموت المسحنا
بلدي يا الليلك موطل
أصلو ما شاقك صبحنا؟
#مجاهد_كاروري
لنا حُزنان .
حزن دائمٌ و إرادي
و هناك حزنٌ لا يهمُّ ... و عادي
حزنٌ سيمسحُهُ البكاء و ينتهي
و هناك ما ندعوهُ نحن :
" بلادي "
#محمد_عبدالقادر
19 ديسمبر
شفت صورتك قلبي دقه
انتي ريدتك مستحقه
والله شوقك يا الحنينة
جوووه في اعماقي بقه
💔💔💚💔💔
الملامح ياها ذاااااتها
نفس شاماتا التلاته
بحري والخرطوم بشوفن
جوز عيونك يا حلاتها
ذبتي في ام در ياخي كلللك
و سحتي في انبل صفاتها
غير اريدك شن اسوي
وانتي ريدتك مستحقة
شفت صورتك ..
قلبي دقه 💚💔💚
#ابراهيم_جابر
أصابني خَدَرُ الحواس
لأنني فكرتُ في معنى عناقكِ
في مسار الخصلة التمتدُّ بين يدي و وجهك
في شتاءٍ لا يزورك دفا في صدري
و في برد الشفاه
أصابني خدرٌ الكلام
لأنني حاولت أن أصف ارتماءك في اندفاع مشاعري
حاولت أن أدعوك باسمك دون أن يحتاج قلبي نبضةً أخرى
بدون مسافةٍ تحتاج تذكرةً
و إذناً للحياة
#محمد_عبدالقادر
زولة عينيها ابتسامة
و طولها مد النيل عذوبة
ضل وطن للشمسو نازحة
و صوت سلام عز الحروبة
زولة بيت بابو المحنة
و مبني بالحب طوبة طوبة
كلما تطرى الأماكن
تبقي ليك حلة و دروبة
و تبقي ليك اصحاب و رفقة
من جفا الغربة و شحوبة
زي دعاء من عبد خاشع
لي الكريم ناوليو توبة
#مجاهد_كاروري
أنا رهن حبيس قيد أوهامي
أتابع شهوتاي و أبغض التبع
فجنبني ملازمتي ظلامي
ونفسي إذ تغالبني وتبتدع
تؤرقني ذنوبي جل أيامي
ويوجعني ضلالي أيما وجع
اغثني يا إلهي من هيامي
ففيَّ المضغة السوداء تتسع
#امجد_اسماعيل
من بين أحضان الأغاني
في هوى أمدرمان
من بين الحكايات التي تُنسى من التلفاز
و التاريخ أحياناً
وجدتكِ صدفةً
و نسيت أن أختار وجهك وجهةً للبيتِ
إيقاعاً لأغنية ستبقى للأبد
و نسيت أن أعطيك تذكاراً
يعوضك الحديث إلى سواي
نسيتُ أن دروبنا تقسو
وأن الحرب لن تبقى إلى يوم الأحد
#محمد_عبدالقادر
أفكاركَ الحمقاءُ تعبثُ بالنُّهى
فتقلّبُ الآراء، كيفَ وأيّها
تثبُ الظنون على بنانك إنّما
أحرق رسائلكَ التي أعددتها
يا أيُّها المقتولُ حبًّا لا تعش
إن كان قلبك بالحبيب مولّها
هذا لنفسي أم ترى لحبيبتي
هذا لها، هذا لها، هذا لها!
هذا لنيلك للجروف وللقرى
لعذوق نخلٍ لا تفارق أصلها
من عاش عاش على ثراك وإنّما
من مات عنك ،إلى سواك، توجّها
ما زال يلكمُ عاجزا أفكاره
متشخّبا ملء الموادج أبلها
لا شيء بين يديك حتى ترتمي
لا شيء في الأفق الحلوك لتعمها
لا شيء من ريش النعام ولا الأرا
ئك كي تنام على الدثور وتفكها
لا ماء في النيلين إلا دمعنا
إذ مقرن النيلين سدرة منتهى.
#حفظ_الله_السودان
#ceasefireInGazaNOW
#الهلالية
#محمد_عبدالواحد
قُبلةٌ على جدار البيت قبل وداعه
تعني:
إلى أجلٍ بعيدٍ لا يُسمّى
دائماً تعني
" من الصعبِ الرجوع
و ربّما أنسى"
فقبّلني لكي يبقى حنانك دافئاً في أي باب
تعني
"أنا اخترت الرحيل"
و دائماً تعني
"البقاء خسارةٌ"
بالطبعِ لن تحميه من ألمِ الرصاصِ
و أنت لن تحميك ألم الغياب
#محمد_عبدالقادر
ايام تقااااااااال
الآم جبااااااال
اللوم اللوم
اللوم تعال
سكت الجهال
سكت الحروف
قبل ما تقال
لو بقت تشوف
المسال حلال
سكت البطون
يا حجر بلال
سكت المنون
والمرض عضال
يا رحاها وين
ماشي بالثفال
طعنه باليمين
طعنه بالشمال
#يس_النضيف
بقينا رُهااااااف
بقينا بلا سبب نبكى
بقينا بلا سبب بنخاف
#عاطف_شمبات
في مشهدٍ متكاملٍ جلستْ
و بدأتْ في الغناءِ
و حرّكت يدها على الإيقاع
و ابتسمتْ
بكل حنانها
مسكتْ بخصلتها
و مالت للوراء كأنها وجدت سَكينتَها بصدر حبيبها
و للحظةٍ سكنَتْ
بلهفةِ طفلةٍ
فتحتْ كتاباً لا يضم سوى الدموع
بكل سطرٍ تجرح الكلمات رقتها
و تؤلمها معاناةُ الحروفِ
و دقةُ التعبير عن أحزانها.
وصلتْ إلى نَص الفراق
و لم تكن وصلتْ
بكل حنانها
مالتْ إلى الصفحات
رغماً عن شظايا الحزن في جسد القصائدِ
عانقَتْها .
حاولتْ حقاً مواساة المسافة بين محبوين
لم يجدا طريقاً آمناً
و عيونُها انتبهتْ
#محمد_عبدالقادر
أسفي لكل القارئين:
ها عدت للبيت الكبير وها لقيت الأصدقاء.
ونسيت أصوات الرصاص
وكل ألوان الدماء.
ونسيت خطوات النزوح،
نقاط تفتيش العذاب،
ونظرة القلب الأخيرة ،نحو بيتك، ثم تمضي للعراء.
قد كان كابوسا صحوت غسلت وجهك بالتعاويذ الأثيرة والدعاء.
بيض العمائم في اللقاء تعانقت!
قد عاد بيتك للضيوف صباح يوم الجمعة الغراء يجمعنا الطعام.
قد عاد مشيك للطريق
وعدت أنت
وعاد صوتك للكلام.
قد عاد للطفل التعثر
عاد لليل النيام.
ورجوت وقت غيابنا ألا يطول؟
ورأيت أهلك بعد دهرٍ واقفين على الطلول
هل غاب بيتك عن خيالك لحظةً
خبر النوافذ، صحن جارتنا الشهي، شواء كبش العيد، (من بالباب يطرق)، هل لدى الجيران نورٌ، هل تعود الكهرباء؟
قد غبت حتى شاخت الطرقات وانحنت الظلال
قد غبت حتى أقفر الميدان لا المريخ أمرخ ،غبت، لا اكتمل الهلال
لا في ربيع المصطفى قرعوا الطبول
ها عدن للقرع الطبول وها لقيت الأصدقاء
افرح! لقد عدنا!
لقد طبنا وقد طلع الصباح
ما بال وجهك كالحا
أثر الجراح على يديك ولا جراح
اضحك وقم نمضي إلى الترهات واللهو المباح
سنعود نتلو سورة الفتح المبين نصيح حي على النجاح
أتعيش آثار الهلاك إذا نجونا
كل من ماتوا على أكتافنا تمشي النعوش بيوتنا
الذكرى
القبور
هل قد نجونا أم نجا الموتى وبرزخنا النشور
ونسيت شكل الحزن أم كنه السرور
الحرب نافذة الجحيم
الحرب تذكرة الذهاب
الحرب نائحة الجيوب
الحرب أخت الحرب بنت الحرب والدة المبير
في الحرب تغتصب النساء
في الحرب لا يأتي الصباح ولا يعيش الأبرياء
في الحرب أطفال الشتات سيسألون متى نعود، ولن يعود الميتون إلى الحياة
ستظل روحك في البعيد، ترى الوجوه على الغمام وحين تشربك المياه
ستعود لكن لن تعود.
لا أنت أنت ولا البلاد هي البلاد.
#محمد_عبدالواحد
نقوده التي عرق جبينه
جبينه الذي لا يحب العرق
نقوده التي مصاريف يومه
يومه الذي ليته لا ينصرف
نقوده التي متطلبات وطنه
وطنه الذي لا يملك جغرافيا
نقوده التي في جيبه
جيبه الذي يشمئز من المال
نقوده التي تحملها يده
يده التي تعرف كيف تصبح كونا
نقوده التي لا تشغل باله
باله الذي يشغلني أنا
نقوده التي لا تحتسب
فارهة جدا على مشاويري
دسمة جدا على جوعي
فاتنة جدا على مظهري
كثيرة جدا على التصدق
عزيزة جدا على الإرجاع
باهظة جدا على الخزانة وعلى قلبي
ليست للاستخدام
وليست للحفظ
تناسب فقط
أن لا أعرف ما أفعله بها
#غدير_شيخنا
فخُذ بنصيحتي واسمع لقولي
ودَعْ حُبَّ النوافرِ يا أُخيْ..
ووجّه قلبك المملوء بِشرًا
تِجاه النورِ وضاءِ المُحَيْ..
تِجاه المصطفى من كان هدْيًا
ومن طُوِيَت لهُ البيداءَ طَي..
ومن لولاهُ ما كانت صلاةٌ
ولا تُلِيَت تراتيلٌ بِ حيْ..
فإن ساقتكَ أقدارُ الإله
لروضتهِ،، فحيي عني حي..
ففي يوم الحساب يكون حسبي
إذا ظَهرَ المشيبُ على الصُّبَي..
وخبِّرهُ بأني في حِماهُ
من الأهوالِ إن غُمّتْ عَلَيْ..
بِعَدِّ الماءِ والأحجارِ جمعًا
بِعَدّ الرملِ في بيداءَ صَيْ..
صلاةُ اللهِ والتسليمِ دومًا
تسيرُ إلى الضريحِ مع الشُّذَي..
وما محمودُ أنشدَ في مكانٍ،،
أطلّ من المشارقِ وجهُ مي..
إلى من قال أني عبدُ ربي
وبشرٌ مِثلُكُم يُوْحَى إلي..
#محمود_الجيلي