5285
الاسم :- سئلت ذات مرة ما سر ذاك الاسم؟ صرخت ِملأ صمتي المكبوت في دواخل الفنون إنه اسمها حروفه تطايرت تشكلت تألقت تعلقت بشخصي الضعيف فصار اسم شخص ما ... بداخلي. - ريحة البن .
يا دابا صبّت عندكم ؟؟.. و حسيتو بي جو الخريف
و شعرتو بي ريحة الدعاش و الغيمة و الجو الظريف ؟
أنا لي سنين عايش كده .. متهني بالحب الشفيف
أنا أصلي بي شوفة الحبيب .. دائما بكون في جو لطيف :)
.......
يادابا صبت و القلوب .. بتغني بي نشوه و سلام
و فرحانة بالندى و الزهور .. مبسوطة بي الغيم و الغمام
أنا غايتو ما فارق معاي .. مادام حبيبي معاي دوام
ماليني احساس بالجمال .. و مغطي دنياي بالغرام
......
أنا لي سنين في جو لطيف .. لا فيو سخانة ولا غبار
لا فيهو ليل غربة و بعاد .. لا فيهو مواجع بالنهار
يادابا صبت عندكم .. صبت بعد طول انتظار
الحمد لله البقيت .. ماف زيي في العالم كتار
.....
بتحبو انتو مع الفصول .. خوف للشتاء و حب للخريف
تشتاقو للحب في الربيع .. و تغيبوا عز الدنيا صيف
أنا حبي أكبر من مطر .. و اكبر من الخوف و الظروف
انا حبي في كل الفصول .. و حبيبي هو الجو اللطيف
#محمود_الجيلي
غيمتين بونسو فيني بيك
التانيه قالت في خجل
انا قاعدة احب لون سمرتك
ودارت وشيها علي عجل
مسكينه دمعتا خانتا
ما عارفه انو الحب أجل
صبت مطر
طيفك علي الواطه البكر
دسالو في رحم الغياب
زي صرة حب وملانه شوق
حتان رحل
انا شفتهم بتوسوسو
لكني كت غرقان حنين
غالبني فيك من ادني حل
عاينت في طرف السما
شايفك تبللي في النجوم
عاينت في الكون
كان عموم
عاينت فيك محل محل
ما لقيت خلاف انك رؤوم
يازوله زي انك رحيق
فورا دخل
منك شعاع
كشفك علي
وكشفني فيك
يا سامقه زي عود النخل
طويله زي بال النبي
فسيحه زي صحرا وسهل
انا وانتي في الريد نختلف
فتحونا في الدم زي اهل
يا دايسه في الجرح القديم
يا دايشه درويشك بهل
#عاطف_شمبات
سلامتك و العيون تبقالك الشوف
للمدي المدسوس ملبد خوف
و متمدد على حلقك
وجع عبرات تقيف عثرات
عشان الغنوة ما تمرق
مرتبة و الفراش يرقص على نورك
كرامتك قسموها فصوص
حنينك في الضمير مرصوص كما البنيان
عليك سميت جناي مخصوص
و ناديتك تعال في البال
بفرك ريدة في السهلة
و بفرد حسي بي مهلة
بقولك خير إذا كان الحنين تالت
كدي النمرق و نتوصابو تاني اتنين
سلامي عليك يا الثابت
مزعزعة روحي بين ريدك و بين قيدك
ولا غابت ملامحك فيني ما تابت
عيوني السكرة و الفترة
الغيوم خابت مطر من ضو عشق اول
و شوف سادس
إذا صبحت حواسك في الوطن سبعة
كدي النحسب دموعك في عيون الناس
و اغنيك في الغنا الفالت
نشاذك في الوتر معزوفة لي جنات
وكوثر من يقين مختوم
حلاوتك زايدة في الوجعة
الوطن ما مات و لا عيون الحنين فاتت
تعال ابقالنا ختت خير أكان حتت
شجرة الروح أواخر خدرة جواها و بقت صفرا
تعال انفره في الندرة
محل ختيت حنينك تنقلب خدرا
اكان مطرت في صخرة بتقوم شجرة
تعال نقرا السطور الأولى في نيلك
نشيل حيلك نوزعو حيل على الجنيات
ونتملابا هذي القيفة يا جلابا
ما بتتغابي في موجة البلد عرفة
هدى الصدفة اللقت جوة العشق صدفة
و بدت تسمع غناك من ضو
قبل ليلك يخش في الجو
نوزع لي مسامع الناس مواويلك
تفاصيلك مقسمة في
حبيبات من عرق مارق على جبهة
طفل واقف بنضف في قزاز اسود
ومادي الحوجة قدامو
وبسمة تضوي في وشين
ووش شين مادي اوهامو
تجاعيدك مقسمة حوجة في وش طفلة
شايلة لبان تبيع إحساسا في صينية
عز الحر
وخالة تجر كراعا عشان تبيع الشاي
و عم ملهوف علي بيتو
ولد مضطر
يلملم خاطرو في شنطة
و يشيلو سفر
دموعك ما بتغسل وجعة البلد
الصبح بي همو متعكر
رضاك ما طاب عشان كسر الحنين يجبر
مناك ما شاب عشان يديك ملامح لي حلم أصغر
غناك ما غاب
ولا غابت ملامح ريدك الفينا
بلد رغم الجروح في الروح
مرارتك في الحلق تنزل كما السكر
#ماجدولين_سعد
وانا طريد الموت ابحث عن ملاذ
هل يستقيم الظل لي
في اعوجاج القتل والذل والرصاص؟؟
بعض الرحيق نزفته
وجراحي لا تدري اتزرفني دموع
ام يغطيها الفراش...
بعد احتفاء الموت بي..
ظهرت جنود الخوف
تلبس حلة الزهو المقيت...
ماذا فعلتم ياكلاب الحرب
(رحم الجنجويد..).
وطني الذي مزقته...
أشلاء حب للسلام...
ونعقت مثل البوم فاليمت الحمام....
دوما عديم القيم محدود الرؤي...
اقتل بلا خجل
واشرب من دماء الطفل
والماخور في عقلي
ويكرهني الورى..
ماذا جنيت لاستحق الموت..ياهذا السواد...
الموت في وطني رخيص كالتراب..
هاذي البلاد ...
مسجونة الحزن الخراب...
حاربتهم بالضوء فشتتني البعاد....
فعبدت شيطان الاسي.
.سكنتني اغنية الحداد
ياربي من هذا النزيف الحر...
واوشحة السواد...
تتلفح الكل من ظلام السلطة( قتاله الولاد...)
من جوف هدير الاعتصام...
ظهرت ترانيم الحصاد...
ياوجعي من لوم الحروف
من شعر لا يسوي فتات اليوم
في كبد الظروف...
فاعيش..
يسكنني السكات...
#نصر_محي
كلها أيام وتعدي
أهي كلها أيام و تعدي
وحترجع من تاني البسمة
والبيت العامر بالضيفان
ونسة أحباب زي النسمة.
.....
وأطفال شايلين علبة ألوان
يرسموا في الخاطر كم رسمة
ويرفرف فوق علم السودان
ياوطني تعيش دايما أسمى
.
دي عيون ماليانة كلام وأحلام
وقلوبنا المليانة تحدي
بنعوّض أحزانا الجاتنا
والسكة الجابت حتودي
.
ونعيش بسلام من غير آلام
نتماسك يدك في يدي
ما بتكسر شوكتنا الأيام
أهي كلها أيام و تعدي
.
لو غابت صورتك من العين..
جوانا تغني مواويلك
جوانا ملامحك في الوجدان
وبتعيش جوانا تفاصيلك
.
.......
كل الالام تصبح ذكرى
ونحقق بالعمل الآمال
نمسح من كل قلوبنا الهم
والدمعة الفي خد الأطفال
.
وحنبني الاتكسّر كله
ونعلم بالحب الأجيال
الوطن العايشين في ضله
ده محال حنسيبو يضيع ده محال
.
محفورة الذكرى الفي بلادنا
جوانا بكلّ تفاصيلا
البيت والشارع و الأصحاب
والعمر الرويان بي نيلا
.
راجعين يوم باكر بالآمال
والرحلة البيناتنا طويلة
والعازة بتمسح دمعاتا
بالغنية الغناها خليلا
.
لو كل الأبواب مقفولة
جوانا أمل لي باب مفتوح
حنعيش أيام فيها بتشفى
بالكلمة الطيبة جروح الروح
.
ونقول للناس نحن رجعنا
ونبنيك يا بلدي صروح وصروح
وترجع بالفرحة عصافريك
وتغرّد تاني بلابل الدوح
......
#السودان
#أيام_وتعدي
#محمود_الجيلي
شلت هموم الدنيا وقمت
و فوق الرشرش شريت حزنك
ليك كمين اسبوع ما نمت
شارد من البيك و ظنك
و من اعياد العالم صمت
قايل روحك انت براكا
اي حزن في الكون يبراكا
قايل روحك تبكي و تشكي
و مافي التجري دموعو معاكا
ياخي استغفر
انت الفيهو ده نعمة كبيرة
في ناس في الدنيا حياتا متاعب
لاقت و شاقت شافت ياما
لاقت و شاقت في اياما
مآسي كتيرة
ياخ استغفر
انت الفيهو ده نعمة كبيرة
مثلا يعني
في واحد حلمو يلم اولادو
في اوضتين و برندة و متبخ
خمسة سنين بين مونة و طلبة
و من الشغل يديو تتملخ
و سقفو حصيره و عينو بصيرة و يدو قصيرة
و في لحظات تتهدم امالو و يلقي البيت و الريد و عيالو
يبقي الحلم السيل الشالو
ياخي استغفر
انت الفيهو ده نعمة كبيرة
في ناس في الدنيا حياتا متاعب
لاقت و شاقت شافت ياما
لاقت و شاقت في اياما
مآسي كتيرة
ياخ استغفر
انت الفيهو ده نعمة كبيرة
مثلا يعني
كم من زول في الشارع راقد
و نام متوسد في الليل يدو
و مرت فيهو ليالي البرد الحر المطرة.. ليالي الحزن الما بتعدو
مافيش لقمة بتسند حيلو
و ما معروف الجوع وين حدو
يقوم من نومو و يلف في الشارع
بين داك عندو و داك ما عندو
ياخي استغفر
انت الفيهو ده نعمة كبيرة
في ناس في الدنيا حياتا متاعب
لاقت و شاقت شافت ياما
لاقت و شاقت في اياما
مآسي كتيرة
ياخ استغفر
انت الفيهو ده نعمة كبيرة
مثلا يعني......
...............................................
حالات كثيرة لا يمكن حصرها في قصيدة.. لذلك نحمد الله كثيرا و ربنا يقدرنا نساعد
#محمود_الجيلي
2014
أنت متعبةٌ
و بالتالي أنا
لا شيء يبدو منطقياً هذه الأيام
لكن في النهايةِ
كلنا يختار إيماناً يخفف وحشة الأقدارِ
يجعل قلبنا أسفنجةً لمخاوف الدنيا
و أحزان البيوت
أنت متعبةٌ
لذلك تركضين إليّ
بالتالي أنا أيضاً.
وأحمل ما تبقى من أمان القلب
حتى آخر الخطوات
في سكك التردد
والخيانة
والسكوت
.
#محمد_عبدالقادر
من أي ناحيةٍ تموتُ
من البلادِ
من الحقيقةِ
من دروبٍ لم يسر فيها سواكَ
و من دموعٍ علّقت فيك الرجا
من ساسةٍ يتناوبون على الخيانةِ
من مخالفة الأوامرْ
من أي ناحيةٍ تعودُ
من الأغاني
من دماء الجنجويد بشارع المصفاةِ
أو من أبرد الأجزاء في قلبي
من الخرطوم
أو شندي
و من كل المحاورْ
(.رحم الله الشهيد ملازم اول محمد صديق)
#محمد_عبدالقادر
من ياتو ناحية بتسألو
وانتو التعرفو بتجهلو
من ناحية البلد اليتيم
هل في حسابكم تكفلو
من ناحية اللاء والنعم
ومحايدين بتململو
كل الشتلتو خراب خراب
باكر خسارة بتنشلو
كف اللئيم ما هز روح
#من_ياتو_ناحية بتسألو
#محمد_المهندس
بعد الحرب دامت للسنة و إتعدت
خسران الوطن فينا المواجع مدت
خبر الشوم وصل بعدو الجبال انهدت
آ الدخري الأصم قالو الرهيفة اتقدت
ألا رحم الله فقيد الشعب
#مجاهد_كاروري
إيقاع
الروح
الاشرق
بيك
ياغالية
اذا بعنيك
ضلم
هو متين
يااااشافع الريد دقيت
الباب ومشيت
قبل اطايبك
ياداب احساسي
عليك سلم
ياخ ما بدري . . .
ماعندنا ونسة
وعمر جميل
من حقنا
ساي كدا بس
نحلم . . .
اتزكري
إحتجتك
تروي
القلب
الماشايف
غيررك
ارويني
العطش
اليد في ( اليم )
فاض بي
تتخيلي
مااا انضم . . .؟؟
ح اموت
ح تسمعي . . ؟؟؟
اتكلم . . . ؟؟
اتأخر . . . ؟؟
ارجاك . . . ؟؟؟
تفتكري . . . ؟؟؟
لو جيت
من غيرك
ح اسلم . . . ؟؟؟
ياورطة
بحبك
عافيت ليك
انا واحد
بغلط
وبتعلم . . .
#احمد_البلال
في طريقٍ لا يؤدي
في مكانٍ ليس عندي
هل ستختارين قلبي؟
رغم أحزاني و بُعدي
في زحامٍ من ضحايا
في اضطرابات النوايا
هل ستختارين وجهي؟
قبل أن تُشفى خُطايا
في اللقاء المستحيلِ
دون أغنيتي و نيلي
هل ستختارين دربي؟
ها أنا " قلبي دليلي"
#محمد_عبدالقادر
نقطّنا بي سكاتك..!
يا صاحبي يا طيب
علي قدر نياتك
بتلومني في ريدا
زيي كل عاداتك
ياخ نحن متفقين….
نقطناّ بي سكاتك…!
🙃😉
من حقو يجرحني
يا ما جرحتو كتير
دا غيابو بضبحني
ضبح الحنين للطير
يا رب يسامحني
ما عندي غيرو سمير
يا الجايي تنصحني..
سلّفني اناتك..
يا خ نحن متفقين
نقطنا بي سكاتك…!
✋️💔✋️
مرات نملّ الريد
حركات حبايب ساااي
وحبيبي يمشي بعيد
واشتاقلو من جواي
يكسر عيوني الشوق
طفل الهوي البكااااي
مفطوم من التحنان ..
ما بسكتو اللولاي…
#ابراهيم_جابر
بالقرب منكِ
الوقت يفقد فارق التوقيت
ليس يهم أين نكون
ما دامت يداك معي
أنا من قبل أن ألقاك
شخص غاضبٌ جداً
أنام بحضن أحزاني
و أصحو أرتدي وجعي
أخاف من الوداع؟
نعم .
و أخشى لو أسير إليك
في حزن الخطى تقعي
و لكن
فجأة !
ألقاكِ
أضحكُ مرةً أخرى .
يغني القلب
فاستمعي
.
#محمد_عبدالقادر
أيا رب الخيار الصعب
كيف أضم من أحببتُ
لو فقدت يداي الدفءَ ؟
كيف أحرر الطرقات من ذكرى الأغاني
و المشاوير الوحيدة من صدى صوت الصحابْ
كيف أقولُ " يا محبوبتي ابتسمي "
اذا فقدتْ يديها في رماد الحرب
أعلم أنها تعبتْ
و أعلم أنني نصفٌ يعاني من خسارةِ قُبلةٍ أخرى
و أدمنتُ الغياب ؟
#محمد_عبدالقادر
بكر بالبنيه.... والله حظو سعيد
في زول بيسقو الريده... من وريد لي وريد
الجنيات جناين ... والبنات نوار
وكن بقن رتاين... يضو ليك الدار
اللطاف ولداين... وفي التقيله حجار
ياخي بختنا بيهن.. وبالقمير الزار
الله فوق سونن والبريق الشال
ياما في عيونن... نلقى راحة البال
يا الله كيف بدونن.. يبقى كيف الحال
ديل تيراب أماتنا... يا ما جابو رجال
شوف كليمة يابا... مارقه زي سلسال
تروى فينا سرابه... وزي مطر هطال
كان ندور او نابا... لو طالت الاجال
هن البفلن شيبنا... وهن البقولو تعال
#ابراهيم_جابر
ندقدق في الحنين اجراس
اذا جرس المحنة رطن
رطن صوت الولف دوباي
اذا جوة الحنايا سكن
سكن جوانا حس الخوف
شلع جوة العيون وبكن
بكن من حرقة التاريخ
وكت قسم ترابو شكن
شكن للبارئ سوء الحال
وكت لون الحنين دكن
دكن دك قسمنا النيل
اريت نونات عيونو رون
رون كمين صبر للجاي
اذا ريح الجنوب هبن
هبن يا صحاري الشوق
قالدن للسما وكبن
كبن فينا مطر الفال
اذا نبت الفرح شبن
شبن في موايق الروح
ومن تعقيدو اتفكن
وغنن للولف دوباي
يرقص فينا حس الفن
ندقدق في الحنين اجراس
اذا جرس المحنة رطن ....
#اسلام_النحاس
انا بس طريتك جا المطر
سيرتك فتيل ريحة انكسر
رش الوجود مطرة وملامح غيمة
تشبه فرحتي و هبشة وتر
سالت غناوي و انفعال ساعة حنين
انا في امان ما دام غرامك هو الخطر
#ماجدولين_سعد
"كل يوم مفجوعة بلد في صبَيّ
ي الله الحي
هسع كم بيت أصبح بي حي
و كم صيوان في الحي قايمات ؟
كم ضرا إتشال من وش الحرَّ
كم مرة صبحت في سواداً صَرّ
كم حيل مضطر
لي شيل اكتر
كم وجعة سِخَت بي قلوب أُمات"💔
"لُطفك بالجزيرة يا الله 🤲🏼"
#نهي_الكباشي
توقّعنا مصيراً آخراً يا ربِّ
-نعلمُ أنت جبّار القلوب-
أصابنا ما لا نطيقُ
ولا نعدّ له من الإيمان صبراً
لا نرى معنى
و لكنّا نقول
"الحمدللهِ"
الحنين أصابنا يا ربّ
أتعبنا
و ما أقسى الحنينْ
هنا في هذه اللحظات
في قلب الجزيرةِ
تفقد الطرقات أبسط ما يكون من الحياةِ
يقبّل الموتُ الجبينْ
#محمد_عبدالقادر
وانا هسي كيف..
انسان ..
مغسل بالدموع كاين لطيف
عايف غنا الفرح الرتيب
وانا لي قليب..
غشيتو بيك
شان مايقيف...!
#ابراهيم_جابر
الطلقةُ العمياءُ في صدرِ الضحيةْ
قلبٌ
جفاه الحبُّ
يمسكُ بندقيةْ
والرأي والرأي النقيضُ ولا قضيةْ
الصرخةُ الخرساءُ من صدر القتيلِ
عينانِ جاحظتانِ ظلّ القاتلين عليهما
والضحكةُ البلهاءُ في أنيابهم
كالنار في جسد الخليلِ
نظراتُ وجهك في الغيابِ
أوليتَ ظهرك للأحبّة
وانصرفت بلا إيابِ
ورحلتَ في عمر الشبابِ
الموتُ يضحك والخراب يقيم عرسا للصغارِ
الخوفُ يرقص حول أغنية الدمارِ
والنار تركض إثر نارِ
العيدُ يأتي لا حبور لدى اللقاءِ
وجه الفقيد مع الشهيد (يتاوقان) من السماءِ
وتلوحُ من صمت المجالس في ثيابٍ من ضياءِ
قد عدت أقبل فيك يا عمري عزائي
#حفظ_الله_السودان
#انقذوا_الجزيرة
#أنقذوا_الجزيرة
#ceasefireInGazaNOW
رحم الله الشهيد ملازم أول محمد صديق
#محمد_عبدالواحد
يزح .. التاكا .. وانت .. تراكا
واقف .. فى .. حماها .. براكا
ما شافوك قالوا : هداكا
يوم حرّت .. مسكت .. ضراكا
....
رايهم .. سُبَّة .. وانت سديد
تب فى النخبة .. وانت وحيد
ولدة .. وحبة .. جيدن .. جيد
جنة .. وصحبة .. فوق يا شهيد
....
ليلها .. ان جنّ .. انت جناها
يوم ايامها .. ما ياها
كنت أمانها .. فى الجاياها
قلت : بلادى بيت الجاها
...
فى الفراديس يا ثائر
وهيب
''مخالف سعادتك''
مهذب كعادتك
بي دم المهابة
بتكتب سعادتك
ملازم مكانك
عيونك قيادتك
وتفضل مفضل
لأنك سعادتك.
#محمد_المهندس
#الجاي_خير 💚
لا بد بكرة نفرح ،، تملأ البهجة روحنا ..
و نعانق الشوارع عايدين من نزوحنا ..
عامرين بالمحبة ،، تعمر بينا سوحنا ..
وحاتك نحنا قادرين نتسامى في جروحنا ..
#احمد_البلال
غنت رغم خيبة
(يا السكر حبيبة)
شن كشح العليبة
وخلا الدار غريبة
شرّد صوت بنية
بتضفر سبيبة
وتملا الزمزمية
شان يدفع ضريبة
للخان في العلن....
سألت طيف حبيبا
لو نصبر شوية
في هذي النصيبة
الفرحة العصية
هل نقدر نصيبا
ونكون من نصيبا
ويكون ده التمن؟؟؟
غنى عشان يجيبا
(يا ضابط السجن)...
كم خرطوم سبِيّة
محبوبة أسير
في هذا الوطن؟؟
وكم خرطوم صبِيّة
محبوبة أمير
لو عاد الزمن.....
#لازم_تقيف
#وئام_كمال
شلخوني من بتضمي
بتضمي شدرة همي
يا روحي كيف تنجمي
ما دام بنية خالي
خالي الرويحتو في امي
كتلوها دنيا مغارب
طفو الشموس في نمي 😪
#ابراهيم_جابر
لا حمى لا أرو
لا شغلاًَ كجّرو
(يمة هوي ساب البلد دي)
أطبا كان قرو
كان قلبي جبّرو
(يمة هوي ساب البلد دي)
قليبي بتعرفه
المطرة في الصفا
(يمة هوي ساب البلد دي)
من غدرك انكفى
خصمتو وما عفى
(يمة هوي ساب البلد دي)
قوالة العزول
الوشم المابزول
(يمة هوي ساب البلد دي)
كان بينضم المكتول
كان بحكي ليك وأقول
(يمة هوي ساب البلد دي)
البين الانكتب
والمبني الانخرب
(يمة هوي ساب البلد دي)
كان بفتحو العلب
في الصافية لي طلب
دريدم الكعكول
الفي الخشم مبلول
(يمة هوي ساب البلد دي)
ككيف تفوت يازول
واللعي مامعقول
لا تمرنا المعسول
لا الفي القزاز مقفول
(يمة هوي ساب البلد دي)
بسكر بلا كحول
من طرفك المكحول
طيفك غشاني زار
كان يخلس النهار
(يمة هوي ساب البلد دي)
حساب ومو كوار
نص يوم عليا حار
(يمة هوي ساب البلد دي)
طويلة غلبني اكتبا كلها
#لازم_تقيف
#لا_للحرب
#وئام_كمال
#أُقِرُ_بأنني_مُعجب
أشُدُ شجونَ اوتاري
واعزفُ عن صدى دَني
لأعزفُ لحنَ تذكاري
مقامٌ للصبا تغفو
عليهِ بناتُ أفكاري
تقاسيمٌ على عودٍ
تُعيدكٌ قبل إبصاري
أراكَ تميلُ عن لهَفي
واستجديكَ يا ناري
بجَفنيًَ اتخذتُ رؤاكَ
قافيةً لأشعاري
وسرتُ مع طلاوتِكَ
ترافقُني . . ولا ساري
عرجتُ إلى سما حُلمي
فأهداني بمقداري
وعلًّمَ نبضيَّ الحاني
سكونَ العشقِ في الغارِ
صببتُ هواكَ في كنفي
صبيب المسكِ في الغارٍ
وأشعلتُ القنا وحدي
فمن يا حربُ انصاري
أتُوقدُ شمعة تهمي؟
على ضوءِ الهوى داري
وكن داراً لأمنيتي
اتدري؟ أنني داري
اليكَ مشيتُ يا قدري
وأنتَ جميلُ أقداري
حملتُ هوايَ معتذراً
أتقبلني بأعذاري؟
فزًمِّل بالهوى قلبي
وكن مَدداً لأذكاري
أُقٍرُ بأنني مُعجب
وأبصمُ قبل إقراري
#محمد_المهندس
كيف تمرُّ الظهيرة
في قريةٍ في ضواحي الجزيرة ؟؟
و كيف تُعِدّ الجميلات شاياً
اذا ما اشتهينَ عن الحب سيرة
و كيف يُعرْنَ انتباهاً لخوفٍ
و كيف يُسرّحنَ خوفَ الضفيرة
و هل يا ترى يصبح الليل حضناً
يضمُّ تفاصيل شوقٍ صغيرة
و كيف يغنّون
كيف يصيغون إحساسهم
بالحروف القصيرة
كيف؟
#محمد_عبدالقادر