الاسم :- سئلت ذات مرة ما سر ذاك الاسم؟ صرخت ِملأ صمتي المكبوت في دواخل الفنون إنه اسمها حروفه تطايرت تشكلت تألقت تعلقت بشخصي الضعيف فصار اسم شخص ما ... بداخلي. - ريحة البن .
لمه فرحه بين اخواني
عندي العيد بكون عيدين
ابارك للبعيد والداني
حنينه هي دعوة الوالدين
حس اطفال فرح في الحي
صباح العيد تزيل البي
تهانيك من اهل واصحاب
اماني توصلك للباب
كل سنه و انتو طيبين
عموم ناسي البعاد وقراب
و عقبال من العايدين
☕ #عاطف_شمبات 🎉
يا ابوي:-
جانا عيد من دون وعودك
وامنياتك وطلتك
منظرك والهيبة حالك
نور مُحيَّاك قدلتك
ونحن نتشابي وننطط
لي قروش عيدية منك
قُبلة نتسابق عليها
وكل أمان الدنيا حضنك
تعدل العمة وتباشر
كل زول بي بسمتك
وديمة ديوانك معبى
ومابتفتر همتك
☕ #ريم_الرفاعي 🍃
وانا كل ما اقول الجية متين ؟
بتقول لي بجيك في العيد
وبلم في صرة توب الريدة عقاب صبري
وبقول ليك
خيييييييير
...للحول ما بعيد
ونصهنج من الشوق ونصن
وتمر ايام وشهور واعوام ...والنار بتزيد
والهم بيزيد
وظروف ما بتدي حريف ....
ودموع تتجارى وﻻ بتقيف
....وما بجيب الفرحة عناد ام ايد
اها كل عام يا غالي وات الخير
كل عام وعيونك لسة بخير
كل عام وظروفنا اخير...يا الغالي وانت
#نهي_الكباشي
أنا بيني بين الجنجاجيش
دم أبريا ،
وسلاحي في الحرب الكلام ...
وأنا بيني ما بين المآذن الخاوية
من الدين ،
واللحى المخضوبة بالدم ،
والدعاوي الجوفا للحرب ،
الشعارات التُرَق فيها الدماء ،
التسن فوق المصاحف بالرماح ،
الينادوا : 'غزير الدمع في المحراب' لكن:
'فاليجف القطرُ' لو الناهلين ما نحن !
انا بيني ما بين أي كوز الإعتصام ...
انا بيني بين هيروشيما ،
سبعتاللآف درجة من الحميم !
وأطفال تذوب يا مارشيملو الأمريكان !
ويا ندائهم للسلام !!!
أنا لائك التعنيك يا خرطوم
لا الحروب والتفرقة
لا للبينفخوا كير قبايل
لا للبيزرعوا إنقسام ...
وانا عمري كلو مع النظام ،
لو النظام قادر يأصل للنظام ،
والدولة دولاب للعمل
وبيوتنا مشرعة بالأمل
والقوت بوفر للطوارق
والبيارق زاهية عزة
وريدنا تحكيه المسام ...
يا بلد
لي عليك ضحك الصحاب
و دم الذين تيمموك
وليك علي الإلتزام ...
#محمد_الشيخ
أنتَ سعيدا
أفضلُ منكَ وأنتَ وحيدا
تصمتُ تُطرقُ
تقطعُ بِيدا
ثُمّ تعودُ
بصِفر يديكَ
وثَمّ تعود
بذكرى الراحلِ بين يديكَ
فتبكي تبكي
حتّى صِرتَ نشيدا
أو موّالا
أو تغريدا
أنتَ سلاما
أجملُ منكَ وأنتَ حُطاما
يا وطنَ الأشواقِ تألّمَ قلبي
شوقًا وهياما
ما عادَ يُصدّقُ أحلاما
أضحى الفجرُ الصادقُ في عينيه ظَلاما
قلبي
قتلوهُ ثم بَكوهُ
قبري الساهر قلبي
هل ذاق مناما
ألمسُ في نيليك الريّ سرابا
أصحو كي ألبِسَ أوهاما
يا وطني يا عذبُ عذابُكَ كانَ غراما
أنتَ مُليما
أرحمُ منك وأنتَ مُلاما
أنتَ عشيقا
أصدقُ منكَ وأنتَ صديقا
تعشقها
لكن تخشاها
تهواها زفرًا وشهيقا
حينَ تراها ،قلبك، يخفقُ تصفيقا
حين تغيبُ تذوقُ الضّيقا
قُل أهواكِ تجيبُ الجوقةُ والموسيقى
قُل أهواكِ ودعهمْ يدعونكَ زِنديقا
إنّ ذهابَ الوقت الأفضل مثلُ البرقِ سيسبقُ صوتَ الرّعدِ بريقا
أنتَ شُجاعا
أكرمُ منك وأنتَ تلوّحُ للأحبابِ
وداعا
أو ترسلُ في الأشعارِ بريدا
أنتَ وحيدا
#حفظ_الله_السودان
#انقذوا_الجزيرة
#ceasefireInGazaNOW
#محمد_عبدالواحد
المسافات مابتقصر توب حواس العاشقين
العيون البشتهيها، والبسيمات المشاغبين
الغنيوات الحلاتن
وصوتك الكاتلني حين
الكلام المابنقولوا لحظة يغلبنا الحنين
كيف حبيبي؟ وكيفو يومك
علهن عينيك طيبين
مابنخاف، ماالجاي اجمل
والخطاوي معاك سمحين
كل يوم بيناتنا اسمح من بدايات المحبين
مابنخاف البينا بيه بتستقيم كل الموازين
المحبة المابتخلي الدنيا تغلب ريدنا بالشين
لو تطول السكة تقصر،حد حدود الريدة واصلين
بالكتير انا ياخ بحبك وفيني منك ناس كتيرين
قلبي اضيق من يشيل ريدك ده داير ليه قلبين
البعاد: لحظة اغمض وتبقى في عيني بين بين
بين حلم شابيت وصلتو وبين حقيقة الريدة يازين
ولو كتاب احلامنا قصة نحن ياداب في العناوين
كيف حبيبي…وكيفو يومك؟؟
علهن عينيك طيبين
#ريم_الرفاعي
كبرت لأعرف
أن السكوت عبادة من يطلب المعجزة...
وأن السكوت سيفتح جيبا لكي ينفخ الحق من قوله أوجزه...
فقدست في الرمز ما رمّزهٔ...
ووشّعت كل الذي لايقال لإصحاح بيتي الذي مجّزه
وصليت صمتا جميلا
صلاة على كل ما كان من قلبنا والسلام...
لأعرف أن اعتزاليٓ طفل اللسان سيكشف زاوية في المكان القصي
لألبس زرقة عين اليمام....
وأحجز تذكرة للمجاز
لأن الرسالة لا أن نراها
ولكنها أن نجيد قراءتها
ثم ننجو بها
حينها لن نرى شجرا سائرا للأمام...
لأعرف ألا حصان
سيقفز من ساعة الرمل وسط الزحام ...
يلوّح في الجانب الآخر العدميُّ لكل الصهيل بذات اللجام..
ويخرس كل اللهاة فما عن فمِ...
ويصطاد لغو اللغات جميعا
فأقسمت ألا يطال فمي...
وأودعت حظي من الكائن اللغوي القصيدة كي ينتمي...
لذا ليس لي غير شعري داخل هذا النظام...
كبرت
وفي داخلي. شاخ صوت الرضيع
تحيك له الأم إكليل ورد البغام...
تعلمه أن يرص الحروف
بعقد البديع...
ليزهر من أصغريه الربيع...
وتكفي الطفولة كي يستطيع...
ولكنه الآن صفر البراعة بعد الفطام....
إذا هام بالوردة الآدمي
كبرت لاستشعر العاطفة...
-يمد لها كفه باشتهاء
وتهديه قبلتها النازفة-..
و يرهقني في انحناء المحب لها
أنها كانت الواقفة...
وقد سيل الحب قلب الرحيق
على شفة العاشق الروميوي الذي يقرأ الإنتظار بركعته الخامسة ...
ليفتح بالتوق للقبلة النافذة..
ويورق لون على اللوحة اليابسة..
فيوقظها أو يجف تماما كما جف غصن لزيتونة في شفاه الحمام..
وأعرف أن ظلال النصوص التي ثارت الأمس كي تتعدى حدود مصادرها لاتزال توابع أجسامها المعتمة.
ولم تدعُ ضوءا إلى مضجع الظل كي يرفض المارد القمقمة..
إذآٓ -لم تفكر بدعوة ضوء إلى مضجع الظل
لكنها فكرت أن ثمة حرية في الظلام !!!!...
كبرت
ولا أشتري الحلم من متجر الالهة...
وأعرف
أن الفتاة التي أقرضت جارها عملة الحظ
قد أسقطت موقف الباص من دربها
ثم سارت إلى بيتها
واكتظاظ السرير بها وحدها
بعض موتٍ
وكان العشاء المعد ببيته ذاك المساء معدا لها ...
كي تفيق على أنها لبثت في الفراش المليء بخذلانها ألف عام ....
ومن ألف عام كبرت
أراود في الماء مني الحقيقة عن نفسها تستبد لأصرخ بالشك هل من مزيد..
ولما عرفت ولم ألمح الحلم في شاطىء الوعد والأغنيات وضخ الدماء وبيت السماء وفي الطفل من جين خل الطريق وسبر العقيق ومعنى الجديد
نسيت لماذا وأين انتُهكت
ولم يدخل ال(كيف) فيما نسيت...
أريد الحقيقة بالرغم من أنها في الحقيقة لاشيء
لاشيء مما أريد...
ولكنها شهوتي
( في الحقيقة )لي شهوة في الوصول لخدر النهاية للقفز من غيمة لا تردد إلا حديث الحياة ولكنها لاتدوم لتحي العظام...
(مضى النصفُ)
آخر ما قاله الوقت عن نفسهِ..
وآخر مايكسر الآنُ نصفا بهِ..
واخرنا قبل أن ننتهي..
وآخر قصتنا
بعد أن ملّها شهريارُ
وليست كما نشتهي....
واخر كل الكلام.....
كبرت
ولن أقتني وتدا خان عهد الخيام
كبرت
على الوجع المريمي
كبرت
على أن أهز إلي
كبرت
على قهر هذا الصيام...
كبرت
على حمل هذا الغلام...
كبرت. على أن أرد على (كيف أنت)
بأنيٓ لست على مايرام...
ولاصوت من تحت هذا الركام...
ولا شيخ من تحت هذي القباب ...
سوى ما تبقى من الحرف
مني
بثغر السهام...
ومن نزف هذا الضريح
ومن صمت هذا المقام... فصليت صمتا جميلا
صلاة على كل ما كان من قلبنا والسلام...
#وئام_كمال
يا حسن
يا حسن
يا عل تجيبا لي
يا حسن
يا حسن
الجاهل نادو لي
الصبية ام حجول
الشويدني النِقَيْ
خسموها الرسول
قولو ليها الشِّقَيْ
قال ينادو البتول
ام جبينا وِضَي
ام وضيبا يطول
زمومها الرسول
يا حسن
يا حسن
ياحسن تنادوا لي
قولو ليها انسهد
بي فراقو اتفصد
لحدولو اللحد
يا الفراقكم مسد
حني ليني وكفا
وثريهُ الدفا
جانا ناح قد بكا :
"
ليلو فاح ليلكا
اللوين
الهوين
ام عويدا لدن
اللوينو
شهد عينو
مُزِّجت بِه لَبَن
يا ودود
يا ودود
ام خديدا ورود
ام خديدا ورود
ام قواماً رِوا
الودود الودود
ام رميشا قِوا
ام طبيعا يسير
ام فؤدا طوى
قد سرت ببابلٍ
وقد مشت به طوى
"
قولو ناح
قولو فاح
قلنا فالق النوى
قمنا جبنا الحكيم
وصفوكي الدوا
يا علي
يا علي
يا سليل الحسن
يا علي
يا علي
نارها جنة عدن
يا علي
يا علي
الشويدن الرطن
يا علي
يا علي
ريحا جاولي ووطن
يا علي
يا علي
قولو ناح اتوتن
يا حسن
يا حسن
يا عل تجيبا لي
يا حسن يا حسن
الجاهل نادوا لي
#محمد_الشيخ
سأقول الشعر اليوم لكي أتسلى
لن أفعل شيئا لكني
سأحرر شعرا محتلا
وأدور على كعب المعنى لن أسقط إن وزني اختلا
لن أذكر حبا عذبني وتمكن مني وأذلا
أتسلى
ماذا خلفي
فأنا تعب من حمل الهم على كتفي
والعالم مكتظ جدا بالحزن لديه ما يكفي
لن أذكر حكم الموسيقى
أو كنه عبادة شعب الفينيق الفينيقا
وعدوا قد كان صديقا
وأحاول أن أنسى
من أزهق طغيانا نفسا
ويتيما جوعانا أمسى
وسأنسى
أني ضيعت القدسا
أتسلى
ألهو رفقة حرفي
أغرسه كي يثمر من بعد القطف
وأشكله صلصال كلام يفضحه الطبع بما يخفي
وألونه باللون الشفاف ليبصره أهل الكشف
حرفي
لن يسأله أحد أين وكيف وفيم يكون
وسيعرفه الناس ويعرفهم إذ ليس له وجه وعيون
لن يكفيهم منه قليل لكن كثيرا لن يكفي
سأقول قصيدا دون مرام
دون مديح دون رثاء دون هجاء دون غرام
لأنظف خاطر أشعاري
فالشعر سيصحو حين أنام
وأنام وأوغل في الأحلام
أفعل في ساعة نوم ما لم أفعله في أعوام
سأعيد سلاما دارفورا أو أنهي نكبة أهل الشام
وأزوج كل حبيبين وأترك في القدس القسام
وأعود لمكة يوم الفتح لأشهد تحطيم الأصنام
وسأصحو حين تجيؤ الشمس لتسلخ من جسدي ظلا
فأنا قد قلت الشعر اليوم لكي أتسلى
لم أفعل شيئا لكني
حررت الشعر المحتلا
#محمد_عبدالواحد
أهو ده العيد هسه علي الابواب ..
وأنا بيني و بينك ألف حجاب
أنا بيني و بينك سكة شوق ..
ومنافي مَحنّة و هم وغياب
أهو ده العيد هسه على الأبواب
و الناس فرحانة و بتغني ..
علشان العيد لمّة أحباب
بتخيل جيتك في كل عيد
أعياد بتمر وأنا مستني
وأتخيل صورتك جمب الباب
رسل لي مرة وطمني
رسل مع فجر العيد جوّاب
أهو ده العيد هسه علي الأبواب ..
و أنا بيني و بينك ألف حجاب
أنا بيني و بينك سكة شوق ..
ومنافي محنة و هم وغياب
العيد متردد يا غالي ..
خايف من يجي و يلقاك مافيش
خايف ما يلاقي فرح أطفال
لا يلاقي عيون بتغني جمال
ما يلاقي عروس تديو شبال
بيسألني عليك العيد و بقول
وين البي شوفتو الفرحة تعيش؟
أهو ده العيد هسه علي الابواب ..
و انا بيني و بينك ألف حجاب
أنا بيني و بينك سكة شوق ..
و منافي محنة و هم وغياب
#محمود_الجيلي
ما عندي غير الله
يسمع أنين صمتي
ومن همّي أتحلّ
ما عندي غير الله
………………..
ما عندي غيرو يشيل
مني الألم والضيق
ويديني راحة البال
ويهديني نورو طريق
وينشلني من البي
أنا لسه فيني غريق
ويرجع بلدنا أمان
واللمة في الحلة
………………..
ما عندي غير الله
……………….
مين ضامن الأيام
ومين عارف البكرة
واليوم ألم ساعات
والثانية زي جمرة
البال دوام مشغول
فكرة بتشيل فكرة
ونار الصبر بتقيد
وفي نارا أتقلى
…………..
ما عندي غير الله
…………………
كل اللكانوا معاك
يوم ما وقعت مشوا
وحتى الوعود ذاتا
طلعت كلام و حشو
خلو التراب يابس
والنيل بزيد عطشو
يا قلبي ما ليك غير
بالذكرى تتسلى
……………..:
وما عندي غير الله
#محمود_الجيلي
في الحالتينِ أحب وجهك
أنت صالحة تماماً للوعود المستحيلة هذه الأيام.
وجهك - حين تبتسمين - يملأ ثغرةً في القلب
يطفيء حزن أيامي
و يفتح شارعاً بيني و بينك
لا تمر به الحروب
وجهك،
كم يعوّضني المسافةَ
و الزمان المرّ
يجعلني أقلَّ تعرضاً للخوف
يصنع ذكرياتٍ لا تموتُ
يُخِيط أشلاء القلوب
#محمد_عبدالقادر
مليان و فاضي
مليان و فاضي
و كأني متستّف فراغ .. مليان و فاضي
متبعثر الأفكار .. مشوّش
مرة أبقي حرامي في التفكير
و مرات أبقى قاضي
و رغم إني عليّ دايما سادّي بابي
عامل حساب لي إني ما عامل حسابي,
متوقع أني يجيني يوم .. بي لحظة ما بتوقعا
لحظة قدر .. ماف حاجة ممكن تمنعا
ما كنت شايفا من بعيد .. و لا كنت قادر أسمعا
و كأني متستّف فراغ .. مليان و فاضي
جواي بفتّش للسلام.. لحظة سكون
في حلقي مخنوق بالكلام ..
يتشابي بينات العيون
مرات بكون
شفقان و جاري مع السنين
مرات بكون زي مابتكون
و مرات بكون زول إعتراضي
شفقان و جاري مع السنين
لا عارف إني بلاقي شي.. لا حاري قطعة
من الأراضي
غنيان ديون .. و رغم أي شي
مبسوط دوام
من الله راضي
#محمود_الجيلي
اللهُ أكرمُ .. هل ترى
أهلاً به "رمضان كريم"
شهرٌ أرقُ من الصَبا
رَوحٌ ورَيحانٌ مقيم
الخيرُ خيلٌ سابقٌ
والجودُ خيالٌ هميم
أبشر به من مَقدمٍ
لقياهُ في الدنيا نعيم
كُتِبَ الصيامُ لأجلِنا
واللهُ ألطفُ بالعباد
الصبرُ في إبحَارِنا
أجرٌ اذا نفدَ المِداد
نحنوُ لهُ . . بحُنُوِه
مرحى به فالوعدُ عاد
وتسابقت ارواحنا
سرجٌ على ظهرِ الجياد
عند الموائدِ دعوةٌ
صعدت بإلحاحِ الرجاء
أقمِ الصلاةَ ولُذ بهِ
شهرٌ من الرحمنِ جاء
يا باغيَ الخيراتِ أقبل
بابُهُ .. نحوَ السماء
اقرأ ورتل .. وارتقِ
رمضانُ للساعي وعاء
#محمد_المهندس
#رمضان_كريم
تصوموا وتفطروا طيبين والبلد ترجع أجمل وأفضل عاجلاً غير آجلٍ باذن الله.
ريحة الحلو مر
دقت بيبان الروح حامت
وانشرت في كل مكان
واتبسم خاطر شوقنا الليك
بيتشابي وراجيك زمان
مرحب طليت مرحب يالجيت
اهلا بهلالك يارمضان
فرشات ممدوده علي الشارع
والجوطة القبال الاذان
وامونة تمد لي سلمي قدح
تقلية عصيدتا بوخا يلف
الزاد بالزاد والبسمة ولف
ورجال شايلين الزاد للغير
عطاية ايديهم للعدمان
فك ريقك هاك بلحة وموية
علي قدر قساوة الدنيا حنان
اهلا رمضان
ياهو ده السودان
بي بيوتو وناسو بينتظروك
اولاد الكورة الفي الميدان
صاموك وصلوك وقاموك
وبعد ماتمو طقوس الروح
اتوهطو واتسامرو شله
اذان الفجرية بحومو
ويسحرو كل ناس الحلة
والناس تتخيل من ريدهم عيلة واخوان
كيف مترابطة قلوب الجيران
رمضان دايما ليو طعمو الخاص
رمضان اجمل لو في السودان
#ريم_الرفاعي
#رمضان_كريم
العيد بدون شوفتك
عيد غايتو عادي شديد
مافيهو غير الشوق
واللهفة والتنهيد
عيد شايفة في الشفع
في ضحكة من امي
شايلنو في الشالات
في طيبة الخالات
شايفاهو في الحالات
تصميم في بروفايلات
لكن بدون عينيك
مافيهو اي جديد
بس برضو يا احباب
عيدكم بخيت وسعيد
كل سنة وانتو طيبين
☕ #ماجدولين_سعد 🎉
العيد .. الخير .. الفرحة .. النور ..
الناس .. الضاحكة.. تغني .. سرور ..
بسمة .. و دعوات .. آمال .. و زهور ..
و أطفال .. أطفال
صلوات .. طاهرات .. و زيارة .. جار
و ذبيح .. شربوت .. الصاج ..في النار
عيدية .. سلام .. جلسات .. و حوار
و أطفال .. أطفال
حبان .. اصحاب .. أهل أو .. أغراب ..
و بعاد ..لكن .. في القلب .. قراب ..
شباك .. الروح.. فاتح.. ترحاب
و الشوق .. بيخلي .. الباب.. في.. الباب
الفرحة ..تلم ..شايبين .. و شباب
و أطفال .. أطفال
☕ #مجاهد_الكاروري 🎉
جات سيرة العيد
والناس بتهني وبتبارك
وانا بتتبارك بي الطافوا هناك
الشافو الكعبة وزاروها
الريد والشوق ساكن في القلب
لي زيارة مكة وسجدة قرب
الروح تشحتف وتعطش تب
ترويها صلاتنا علي الغالي
السيرتو تخلي القول حالي
صلواتنا عليك يا سيد الناس
وسلامنا عليك في كل ثانية
يوصلك ويغمرنا الاحساس
يملانا الحب
#ماجدولين_سعد
أنا عمري كد و جسور
من قبل وحتي الان
في روحي بعض النور
في قلبي كم بركان
والعقل بذرة و بور
افكاري هي بستان
لو أظلم المنظور
في نفسي تنجستان
عرف الزمن مشرور
على مرتع الخزلان
قال المسافة شبور
بين بينا بين وبيان
و يااااااااااا الله زيدني جذور
على نقصة الصحبان
#امجد_اسماعيل
كان عندي أمنياتٌ
ورؤى تحملني نحو بلادي
كان حلمي ..أن أعود
مشوهاً .. دنفاً
فتغسلني مياه النيل
يحملني النخيل على الجريدْ
و أعود "لأمدرمان"
- يقتلني هواها -
كلٌ شبرٍ من أزقتها يثير طفولتي
فأعود ألهو في دروب السوقِ
أو " زنك الخضار"
يسوقني عبق البخور لمتجر العطار
#منتصر_الفكي
#الجاي_خير 💚
لا بد بكرة نفرح ،، تملأ البهجة روحنا ..
و نعانق الشوارع عايدين من نزوحنا ..
عامرين بالمحبة ،، تعمر بينا سوحنا ..
وحاتك نحنا قادرين نتسامى في جروحنا ..
#احمد_البلال
منذ اكتشاف الكلمة الأولى
أحاول أن أقول:
أنا مصابٌ بالجفاف
برغبةٍ في القرب من بيت الحبيبةِ
بالسكوت اللامبرّر
بالغيابِ
و باعتذاراتٍ تأخّر وقتُها
لا حرف يعني ما أحس به تماماً
فافهمي صمتي إذا أحببتِ.
يكفيني وجودك في الأغاني بين أصوات الرصاص
و في طريقٍ لا يُعيد إلى المدينة صوتُها
.
#محمد_عبدالقادر
في جنح الضلمة..
الظلاّمة..
لا زحت صورتك
لا محتك
لا باتت بيناتا
ملامة ..
ختتا قداما
وصابحتك..
طوالي هي
في مارقة
تكوسك..
مع انها يوم
ما روحتك..
في اللحظة الفارقة
في كابوسك..
قبالك
قامت ليك
صحتك ..
في سرك و في عز
سكوتك..
قالت بالريدة
وفاتحتك..
في نية سفرك
وفي فوتك..
ما مرقت منك
وبارحتك ..
علي قدر غناك
ما غنيتا ..
وهي الغنية الواحدة
الفرحتك ..
عطشت زهورة
وخليتا ..
مع انها
كم
كم
فوحتك..
من شدة غلطك
اعتادت ..
لكنها يوم
ما جرحتك ..
وفي المغفرة
شدة
ما اتمادت ..
جاتك في بالك
وسامحتك ..
جاتك في بالك
سامحتك..
#يس_النضيف
ثقة الصخرة في النحات
ورغبتا في أزاميلو
كلام بتشتتو النوتات
ونغرق في تآويلو
يقول الذكر للذاكرين
إذا مال الهوى ميلو
جناين في جنان باسقات
وآدم خاطرو في ثمرك
بريدك لو هلال باسم
وأذوب لو يكتمل قمرك
يقول الذكر للذاكرين
إذا لم تكتمل أدرك
بريدك زي سلاف وناس
و ريدك عم وتبارك
بريدك زي دعا الأمات
تلقى دعاك وتتبارك
يقول الذكر للذاكرين
إذا لم تدرك اتدارك
بريدك والخلايا تفور
وبريدك مبتسم آمن
بريدك والقلق سوسة
وبريدك ساهي متطامن
يقول الذكر للذاكرين
إذا لم تكتشف آمن
بحبك وانت ميالة
بحبك وانت تتحدي
بحبك بالذي دايرا
وبحبك بالذي عندي
يقول الذكر للذاكرين
إذا رمت الغرام أدي
#محمد_الشيخ
ولا يعرف القلب درباً جديداً
ولا شارعاً لا يمرّ ببيتِكْ
ولا يعلم العمر معنى انتظاري
وقربي
وبُعدي
وشوقي لصوتِك
ولا أعرف الآن كم جئت قُرب السياج الجنوبيِّ
أبحث عن ما تبقّى
ولا يعرف الغرباء الذين يمرُّون في مقلتيكِ
بأني فقدتكِ حقّا
وأني أريد الزمان القديم الذي بيننا
أن يعود فأبقى
#محمد_عبدالقادر
لو ما حاريك
ما بناغمِك دُت
ما بجيب طاريك
لو ما قاريك
بي جفاك الشين دا
يجي يباريك ؟
لو ما شاريك …
ما بتبع نضمِك بالروراي
و يجي يجاريك
مسكينة راي
اميش ما تروحي وراك القول
بتفوتي الزول الما زي زول
و تسردبي ساي …
بُوشك للحول…
#نهي_الكباشي
شن فايدة تقيف ترجاني ...
اقوم اتنفض اخد خبة ،
ووقت العترة تتناساني ؟!!!! ...
ح أجافي البيوت السايلة ،
واتخذ الشعر عنواني ...
وارجاك في المحل المافي ،
لو نيتك غمام تلقاني ...
أقعد في الدواويين زحمة ،
خليه التكل وحداني ...
وانتظر الموايد آمن ،
وانا عيسى ابتهلت أواني ...
والخوف في دواخلي خبي ...
من شدة كروب الوحدة ،
ما استبعدت أبقى نبي ...
وصدقات الوقت ما منة ،
والبشحد محبة غبي ...
والعايز ترفقو شيبة ،
أركز في نوايبو صبي ...
ان غلبك تعوم في شيمة ؛
خلي الهرجي ارخي اعضاك ...
مرات السكون ليو قيمة ؛
لو فعل الصواب جافاك ...
ومرات الله بيديك نعمة ،
ولما تقِط هو برضو اداك ...
( بتموت الهوام في الشدة ،
والبذرة البترجا نواك ) ...
وافطن للغيوم الماره ،
ان برقت حداك ...
الغيم البرق ناحيتك ،
بيصب للوراك ...
اتعلم تفج جمامك ،
واتونس براك ...
أغرس وجعتك في نقعة ،
واقعد في ضراك ...
الله معاك وفيك ان شفت ،
وان ما شفت الله معاك ...
#محمد_الشيخ
فنجان قهوة لي عادات تعدل الكيف
في رمضان يسدوا رجالنا درب الضيف
في الشارع فطورهم كان خريف كان صيف
والبيلقوه حالفين ليه رجالة يقيف
السودانيون في كل مدن المنافي لم يتخلوا عن العادات السمحة وإفطارات الشارع لإكرام الضيوف وعابري السبيل والمساكين
ربنا يكتر اجر الامهات والنساء الواقفات يومهم كله يجهزوا صينية الفطور ويحثوا أبنائهم على مرافقة أبائهم للشارع
وربنا يخلف على من انفق
رمضان مبارك وربنا يرد السودان لأهله امنا مطمئناً .
#ريم_الرفاعي
#رمضان_مبارك
اصلو رمضان شهر عافية
عافية بتعالج النفوس
فيه راحة بال و تقوي
خاصة في كل الطقوس
لمة الناس في الضرا
تطرح الوجه العبوس
جيتنا شايل جك عصيرك
قبلو شايل حب كبير
العصيدة مع ملاحها
و الوقار الفي الضمير
اصلو رمضان كلو رحمة
شهر فيه الخير كتير
التلاوة في نص نهارو
و القيام في الليل سعادة
التراحم و التألف
دينا قال هم العبادة
ربي ثبتو في قلوبنا
ديمة عندنا تبقي عادة
#عاطف_شمبات