5285
الاسم :- سئلت ذات مرة ما سر ذاك الاسم؟ صرخت ِملأ صمتي المكبوت في دواخل الفنون إنه اسمها حروفه تطايرت تشكلت تألقت تعلقت بشخصي الضعيف فصار اسم شخص ما ... بداخلي. - ريحة البن .
و صحيت و لقيتك في عيوني
في صوت بتي الماشة الروضة
في البسمة و في النسمة الهبت
تغريني عشان آخد غمضة
و لقيتك في الشمس الشرقت
و لقيتك في الوردة الغضة
في الحافلة المن بحري العربي
في عيون قاطعات شارع العرضة
يا الراوية النيل كلما يعطش
أرويني عشان الشوق يرضى
#محمود_الجيلي
محل ما اتعكست ياكا البحل شربيكة
مخزن حكمة للشر الوقعتو وشيكة
بالك سلبة ما انصر في القواسي وشيكة
وإيدك جي بي إكس تدفع سبيكة سبيكة
#ودمسيخ
التفاصيل الصغيرة
مستكه (1)
وأنا يا خرطوم ...
قلبي ميل كآبه وانتكا
وين الصغيرونة ..؟
بتي الهبهانه المستكه ...!
وين ريحانة الجنة ..؟
بت دمي شديرة الحنه ..
مش بينا الحنان؟
واكوام لبان؟
فيونكه بمبي واستكه ..؟!
يااااااا مستكه
انا قلبي ني ...
شوقك بنيتي عصر علي
عقد حياتي وشربكا
يا مستكه
اشيل من عمري واديك
اديك البرضيك
انا هسي مشتاق لي ايديك
وايديك في طينه ملبكه
شابيتي فوق شيشك علي
خافت جلاليبي البيض
يادي المحنه المربكه ...!
طين لاقى طين
وتنطي في كتفي اليمين
وأنا والحنين
ننشقا بالريد و البكا ...!
يا مستكه ...
يا صندل الغنوات و يا ريحة البلد
أحد ... أحد
البينا ريدة إلى الأبد
ونسه وضحك .. ما بتنسحك
محفورة في الروح والكبد ...!
وقطيعة في الناس القراااااب
ال ...
قرقرااااااب
ال ....
خستكه ...!
يا مستكه ...
انا حيلي ما قدر الغياب
امتى الإياب ... و انا قلبي شاب
وأنا يومي كلما دق باب
تنحلا أعصاب ..
وتتب رويحتي مدربكه ..!
قالو الكبار ...ريدة البنيات الصغار
في الروح بتعمل دربكه ...
ياخ زحي لعباتك كتار
مزقلاهن ليل نهار
وأنا بالنهار .. بنهار
متقريف الجوطه الهظار
شكلة وغبار
اندومي شطة بهارو حار
يا دي التفاصيل الصغار ...!
وبالليل معارك مهلكه ...!
بابا الدزمه ..
يااااابت انا جزمة؟
يا كلبة يا بت الكلب
بابا الجزمه ختها لي بي هناك
انا من يوم داك
قت ليك سيورها مشررربكه
يا دي التفاصيل الصغار
وبالليل معارك مهلكه ..؟
بابا الدزمه ...
حااااضر ... نعمين يااا سكره
يا طاعمة يا بت القلب
اهو كلو تحت السيطره
رغم الشقا ، بس لينا رب
رتب حياتنا وسطرا ...!
والمسطلا؟!
والمسطره .. انا جبتها
وقلمين رصاص
برايه حمراء واستكه
يااااا مستكه
شفتي التفاصيل الصغار
بالليل معارك مهلكه ..!
يا المستكه ... يا ريحة الوطن العزيز
الفرقونا ..
اريتو كان الانجليز!
اريتو كان كفار قريش
تهمونا شفشفنا النبيذ
يا حليوة يا دمي اللذيذ
الفرقونا ..
اتنين غلاااااااد
سجم الولاد ... واخوهو عاد
ارم ذات الرماد
خلو الكنوز الفي البلاد
واتشاكلو
في دكوة وحلة عكوة
وشطة خدرا وهردبيس
مربطات في كيس
كان فيهو دقة قنقليس ..!
يا حسرة الوطن العزيز ...!
#ابراهيم_جابر
خُش السمؤات
بتعرف تسمو ؟
ما بعرف كيف
هو شنو الإنسان
غير غُمت السيف لحظات الدم
ساعات الحق واقف زيو
وساعات الغم يلمع رايو
يشفع للكل ساعة الرجيف
يغلب غيو و ينصر خيو
ويعامل التاني كأنو الضيف
يا ريت ولو كلنا كان ياريت
أعلنا النصر على هذى النفس
ونسينا جهالة هذا العصر
صليت ؟
العَصَر ؟
صليت ؟
ص ل ي ت
صلاني زماني التيه والغدر
النار و الضيق
ضيق الاحلام
و نار التانين
تيه الصلصال
و غدر الاقدار
وادركت بوعي
فكر التسليم
ما الإستسلام
و مشروع السعيّ
فصليت الناس
عمق الإحساس
ما القشريات
وريتم بيّ
لجم الوسواس
ما الفطريات
سويتني براي
ما كنت الزي
ولا كنت نبي
ويا الساكي شعر
أنا ساكي شعور
يا الراجي حبر
أنا خالى سطور
يا الداير القرب
أنا كلي نفور
إسفاف وسفور
و خمور و شرور
و خلاف وغرور
و كسور في كسور
#امجد_اسماعيل
و كأني متستّف فراغ .. مليان و فاضي
متبعثر الأفكار .. مشوّش
مرة أبقي حرامي في التفكير
و مرات أبقى قاضي
و رغم إني عليّ دايما سادّي بابي
عامل حساب لي إني ما عامل حسابي,
متوقع أني يجيني يوم .. بي لحظة ما بتوقعا
لحظة قدر .. ماف حاجة ممكن تمنعا
ما كنت شايفا من بعيد .. و لا كنت قادر أسمعا
و كأني متستّف فراغ .. مليان و فاضي
جواي بفتّش للسلام.. لحظة سكون
في حلقي مخنوق بالكلام ..
يتشابي بينات العيون
مرات بكون
شفقان و جاري مع السنين
مرات بكون زي مابتكون
و مرات بكون زول إعتراضي
شفقان و جاري مع السنين
لا عارف إني بلاقي شي.. لا حاري قطعة
من الأراضي
غنيان ديون .. و رغم أي شي
مبسوط دوام
من الله راضي
#محمود_الجيلي
ناديتك
حبيبي براي
بلا اللهفة البتنده ليك تملأ هواي
فغنيتك
مليت احساسي لهفة وحن
غنا وشاشاي
مليتك ريد
مليتني حنين مرق دوباي
فسميتك طبيق الروح
حلاوة عيني ياكا عشاي
فسميتني الحبيبة الكل
رفيقة الناي
فما بتفرق
منو الأشتر
منو الالحانو مظبوطة
منو الفي عودو راخي وتر
منو الموزون علي النوتة
ولا بتفرق منو البيناتنا كان غناي
سماك رضاي
لقيتك فوق
مستف بالمحبة الجد
حنين مطلوق
اعاين ليك تجوط روحي
قليبي يروق
هواك هداي
براااااك كاواي
تحرش في الدروب الجاية منك لي
تسوقني عليك تجيبني خطاي
امش ينحت تيرابك
يقوم احساسي خدرة وراي
#ماجدولين_سعد
خابرك بالحيل
روحك طيبة
وقلبك بكاي
وعيونك من الله حبابا
بتشوف لاعند المبنية
وبتكشف ايديك حجابا
بس خسمتك اكان تتشابا
خايف مايقولو فقير وحلج
بشويش بشويش تطلع لا فوق
خوف واستغفار بعديهن شوق
سكرة وصحوة غيبة وحضرة
إرهاص وحجاب وتجلي وتمكين
بعديهن (ازل) لي يوم الدين
أَصبر يا الشيخ ما بجيك عوج
وأعرف قيمتك شان تندرج
واتذكر دايماً آ ولدي
ماف إستعجال ما جابا دلج
#امجد_اسماعيل
قالت : الجاي علّو لي خير ،
قلتلا : الجاي ماني واصلوا ...
الا يبقى الجاي ل طير ،
ما اتملت علقم حواصلوا ...
#محمد_الشيخ
نحن انتظرنا يا إلهي
في القلوب مساحة أخرى
تركناها لوعدٍ منك
أن الأرض سوف تعود ضاحكة
و أن الليل يخلو من دموع الخائفين
تركنا فرصةً أخرى لأيامٍ بلا حزنٍ
لبيتٍ لا تدمره الحروب
ولا سنين الاغتراب
ولا فواتير السياسة
لا معاناة السنين
نحن انتظرنا
قلبنا راضٍ
و لكنّا تعبنا
يا إله المتعبين
#محمد_عبدالقادر
لوازم مرحلة وإفلاس
فلاسفة غرب حارة الروح
شريعة عباية الانجاس
جييف لا تقوي غير ما تفوح
عااااااااااالم مسرح الرصاص
و إدمان جمعي حالة النوح
إذن لابد من حصاص
إذا ما الرملة نازفة جروح
ودا الما منو أي مناص
طُلق يا حمام
بغم يا بوح
عَدَم يا إمام
تعال يا نوح
#امجد_اسماعيل
و أنا كان غبيتك يا دروب الريد بطش
و أنا كان ضهبت من العوينات و الرمش
أنا وين أمش؟؟
يا السمحة واضحة زي الشمش
صوتك كمنجات الحنين
صوتك هوى
صوتك دوا
صوتك محطات الأنين
صوتك روى
و لي صوتك إنتي النيل عطش
و الما سمع نمك مع الطير في الصباح
و الما سمع منك حلاوة الضحكة و الحكي و المزاح
في الناس طرش
ياطاعمة في عينيكِ قهوة و جنزبيل
يا ناعمة في خديكِ أزهار الخميل
يا شامخة في الطول و القوام
يا عالية زي شجر النخيل
فرشولك الدرب البسوقك بالقلوب
و كل الجمال عرشوهو من فوقك عرش
و الما بشوفك في بشارة الفال و في الشبال و في الدلوكة و السيف و البرش
في الريد مريض.. ما عندو إحساس بي قرش
و أنا يا أم وضيب
آمنت بالقسمة و نصيب
قاعد بصبّر في القلب بالريد
و واقف مندهش
#محمود_الجيلي
لو جواك ماكان في قضيه
او جواك كانت في قضية
فعذرا ليكم جد ياساده
اطلعوا بره
هنا ده حنفضل نحنا المافي
اولاد قرية في اقصي اقاصي
لا ناس مدرسة لا تعليم
لا في طفولة ولا في حنين
داروين مين؟
علمانية وحكم الدين!!
داك انشقا
وصوتنا انشق المدفع وبلعوا
ونصنا وقعوا في بحر الدم
مافارزين هل نحنا اخوانهم
ام اعداء شان اولاد عم
كل النعرفوا طعم الموت
جرح الفرقة
وحِس الغم
وانا والهم اصحاب من بدري
كنا بنعشق نفس الحته
وذات البيت
الشعِر النَم
وكيف محبوبه بحجم الدنيا
بتصبح يوم مافيها نغم..
#نصر_محي_الدين
معقولة
معقولة
قبل ما تو يجمع
نغرق من ضو في لو
معقولة ؟!
مشغولة
"بحبك"
بعناية
_كروشيه _
مشغوله
" بَحِبِكْ "
بعناية
عانيك المعنى
ارح نتمرجح سوا
والجو ال جو
أها
مشغولة؟
مجهولة
مجهولة
عواقب الخوا والنوا
فتشتك فيك وفتشنا
اتفشيتي ؟! مشيتي؟!
انتشينا ؟!
اتفشى خبر فرقتنا هناك
مركبنا هداك
و النو ال نو
ساقتنا مراكب
مجهولة
ممهولة
ممهولة السِكَّين بِسَكِينَةْ
لا سُكْنَى بدت
لا سَكنت نون من نحن
فرحنا قبل ما الهوا
لو الفو تلين
لو نوى
والدنيا تلمنا
ممهولة
مهولة
مهولة الفكرة بتاعة ماف
مأهولة دواخلي بسرب سوا
الدنيا تجرَّح ما تجرَّح
بلقاك دوا
ده فتيلو المغروز في قلبي
هل مات النوى ؟
والهوه البيناتنا مهولة
عجولا
الإنسان لي رزقو
أصلو الإنسان
خلق عجولا
مسؤول عن فرقتنا أنا
وأنا عارفك شاطرة ومسؤوله
ف ودعتك ليك للعارفا براك
الريح ؟! الجاي؟! الماف ؟! التو ؟!
والليه خطاك ماشة
عجوله
معقولة
قبل ما تو يجمع
نغرق من ضو في لو
معقولة ؟!
#محمد_الشيخ
في سماك أرضيني
الجنة وحورا
ملكك يا نورا
وفي عزف أناملك
مع أول ري مي
ترقص نافورة
يا سيد العزة
ويا معنى جلالا
ما تفلت يدي
في كل جلالة
يا ناري وبردي
انا فيك يا بلدي
مكتوب ورسالة
من اخر جندي
في ورقة بردي
جوة القارورة
كان لقت الشالا
كان رمز الطابع
بلقيس وقصورا
أنباء مستورة
في البعد السابع
الغاب في طيورا
كان عارف الشارع
والقرية وسورا
قال ليك في طورا
نيلين ومنابع
كان أمر الشارع
وحدتنا ضرورة
البيت الجامع
أضرحتو بزورا
والبيت لو جامع
يا آلو بدورا
جيت كلي مضاجع
سوط شوقي الطامع
متمرد وطايع
جيت كلي كرابل
باكيات عاشورا
كم روح بتكابر
ارضينا غرورا
حرمنا مراضع
على نافخ صورا
بين ساكس وأصابع
كان لحن شعورا
كم لوح في شاعر
كاتبنا مشاعر
في كف الطالع
في غنوة شافع
لو زار الروضة
مع أصحابو
ساعة للعبو
ساعة كتابو
بيعرف يلون
عدّل صورة
شجرة مروة
وساقية ومروى
وغُنا عصفورة
#وئام_كمال
قاعدة علي لحم إحساسي
ما ناغمت قلب عطُوف
ولا استدعيت خيالك ناسي
وإنت معبِّي روحي طيُوف
خاتاك للعشم سُقياو
ولي طول المسافة ظروف
#نهي_الكباشي
الأعلى من صدى الموعظة...
الكلمة مفتاح الجبروت..
لا قمة أعلى هذا الجبل لتصعدها
لا أسفل غير رؤوس حراب تبتسم و تهتف للصاعد بالعلياء..
وسقوطك موت يا هذا وبقاؤك دون صعود موت...
فاكتب كي تورق من موتك حيوات لا تعرف تابوت...
عَلِم الحانوتي بأنك عتقت الفكرة بالأوراق و أنك من بعد رحيلك ستُرنح رواد الحانوت...
و اكتب
(كي تعرفك البيداء..
كي تنظرك العين العمياء..)
و اكتب
لتكفرك الغوغاء..
و تراك النخبة في الشهداء..
ولتطعنك ظلال الطاغوت...
اكتب لتعيش ولا تنسى إذ تكتب أن تكتب لتموت...
أشياءك جرم أسقطها (بالفوق) ستتسع الوحدة و ستصغر أحجام الأشياء ...
لا خطر عليك سوى ألف تتبعها نُون قبل التاء..
القمة تحتك لا أعلى والقلق بقاء..
فاستخلف نفسك في القرّاء..
المعنى ألسنة جفت
ومجازك ماء ماء ماء..
و اصطد موعظة تتعثر بصداها صخرة كل سماء..
مسكوب صوتك بالآذان و ينسخ أصوات القدماء ...
أذن وحدك فالكون سكوت
كرسي الملك من الأسماء..
الكلمة مفتاح الجبروت...
بروا الكتاب لتفتح أبواب الملكوت ...
#وئام_كمال
يا حمامَ الحرم
ذُبتَ في العشقِ كم
سحُ بروحِ الرضا
وازدهي بالكرم
واهدِنا في صَبا
هدأًةً من نغم
#محمد_المهندس
بين مُفتَرقَـينِ سِرنا
مـالها الدنيا ومـالي
اوردتني ما روتني
مالَ كوبي لانعزالي
يستعيدُكُ من سلافٍ
لانَ من فِرطِ الجمالِ
في عِناقِ الشهدِ وحدي
ارتجِــيكَ ولا تُبالـي
لو نأى قـلبٌ .. سيَفـنَى
قِس على ذاكَ احتمالي
#شغف
#محمد_المهندس
كنت محسوب زول خرافي
و أسي من ضمن الخلود.
أمش راضي يا كبير و ما قصرت عملت العليك وزيادة منو كمان
في وداعة الله .
#امجد_اسماعيل
حُلمٌ يضجُّ بخاطري
فتكادُ تُبصِرُهُ العيون
أنَّ الهمومَ تبدَّدَت
وارتاحَ مِنها المُتعَبون
غَدَتِ الحياةُ جميلةً
لا ظُلمَ فيها أو مُجُون
طُرِحَ الفِراقُ على الثَّرى
واقتصَّ منهُ العاشِقون
أدري الظروفُ عصيبةٌ
والحزنُ أكبرُ ما يكون
لكن برغم ظُرُوفِنا
لا بُدَّ مِمَّن يحلمون!
#حفظ_الله_السودان
#BlueForSudan
#FreeGaza
#محمد_عبدالواحد
بالدراجِ والفصحى
يا أهلاً يا مرحى
مشتاقُكَ قد اضحى
بالوجدِ مٌلاما
بحضورِكَ أشرقنا
ولحاظاً أطبقنا
للدهشةِ أطرقنا
بالصمتِ كلاما
دقاتُكَ تسعدُنا
بحنينٍ توعِدُنا
ما برحت تُقعدُنا
بالقربِ قياما
حيًٍاكَ حنانيكَ
وبياكَ فكن أيكَ
إلى الواهبِ لبيكَ
إلى الحبِ سلاما
#محمد_المهندس
وَردُ القلبِ تحجَّى
غابَ ترجَّى .. طابَ تهجَّى
الأُترُجّة .. الأُترُجَّة
طعمُ الشهدِ وسَندُ الحُجّة
حُلمٌ فاقَ حدودَ الصَرحِ
فأذهلَ طرفَ العرشِ بذاتِ اللُجّة
ليلٌ أسدلَ خِدرَ الشوقِ
وأعتقَ عند الهَدأةِ دُجّة
وِترٌ قامَ على نهرينِ
من الإلحاحِ وأدفأ فُجّة
سِحرُ النبرةِ ردَّ أمانَ شرودٍ
قبلَ الهجعةِ لبَّى
أصغى ثاويٍ للأوهامِ مَلياً
ثم تعالى خلفَ جناحَ العَطفِ وهبَّ
قال: تعالَ . . .
فَوحُ شَذاها جادَ وأيقظَ
جِفنَ الحُسنِ
فغارَ غمامُ الأمس وصبّ
قطفُ الجنةِ سالَ تقطرَ
بين كؤوسِ الحُبِ تخبّى
يا تواقُ كذاكَ النجمُ الساري
في الآفاقِ ترآءت دُرّة
خُذ بيمينِكَ بَضّ رُؤاها
واطبع في منتصفِ الوردةِ غُرّة
تؤتي أُكُلَ الحينِ بكلِ حنينٍ
عينُ الآسرِ تحفظُ قُرّة
سكَنَت فيكِ بلطفٍ
غارت زارت طارت . . . صارت
في بستانِكَ حرّة
#الأُترُجَّة 💚
#محمد_المهندس
بتمسح دمعة من عينيك.. بس كيفن بتمسح خوف
بتتصبر على الحاضر.. وليك يوم بكرة ما معروف
بتمشي علي طريق مجهول.. وكيف نص الضلام بتشوف
دي أسئلة في القلب بتعيش.. وتبقى الدنيا هم وظروف
#محمود_الجيلي
يا سيد الصباح
أصلح حال بلدنا
ادينا السماح
عّدِل ميل ولدنا
و الحكم الصلاح
الهم الوعدنا
كل ما جاء الصباح
والغم البعدنا
من سعي الفلاح
ياا نجمات سعدنا
في الليل اللي لاح
#عاطف_شمبات
الله فينا
قادر يمسح خوف وجعنا
والحكايات الحزينة
الله لي بلدي الرزينة
والله لينا
نحن همنا كان صغير
كنا كايسين المحبة
التسامح والسكينة
كنا دايرين نبقي واحد
ننبذ الفرقة اللعينة
كان هدفنا عمار بلدنا
نطرد الغل والدغينة
فجأة خشت يد غريبة
قامت الحرب اللعينة
أعذرينا
نحن يا خرطوم بقينا
لانا فارزين الصباحات
لا النهارات والسمايم
لا الشمس بتطل علينا
لا الغمائم
والمطر عشق الحرازات
شفتي وجعتنا الدفينة
اشتهينا زحام شوراعك
دقة أجراس الكنائس
والمآذن في جوامعك
اشتهينا حلاوة النيل
قنقليز بالشطة طاعم
دقة الدوم والتفاصيل
نحن راجعين المغيرب
نسمع الحزن النبيل
اشتهينا الحوت يغني ما بلومكم
كيف الومكم ياخي شوف ديل
نحن مشتاقين نشوفكم
لوم شنو اليقدر علينا
جيبي طيفك طمنينا
كيف شوارع جبرة بالله
شارع الستين وناصر
بحري كيفها وكبري شمبات
بلغي امدرمان سلامنا
باقي فاقدانا الحنينة
والحقينا
نحن يا خرطوم ودرنا
أبقى عافية ورجعينا
#ماجدولين_سعد
يا عم يا عم
الجوز بي كم ؟
الموية في قلب الموت بي كم ؟؟
و المرقة في نص النار فوق كم ؟
يا عم يا عم
هو قفاك اعوج
داير تنجم
من شارع دم
تتكل ضهرك فوق حيطة هم
و هو ضهر مكسور
و قلب محسور
احلام فد يوم ما نطت سور
ما قلت بغم
تعزف بي عصاك في الكارو نغم
و الشارع دُت ما ناقص صوت
ساكت للدوشكا و شرك الموت
مغايس قاعدة ولا بتفوت
حيلك يا عم
حلمنا معاك ما داير ينتم
شِن دايرة اقول
و بلادي تروح في حجوة غول
وبلاوي ولا سووها مغول
حيلك يا عم
جيب المعقول
دا الشارع الما بتعرفو زمان
ما الكان مقفول
دا الشارع الفاتح في الرصاص
تمرق من قُدرة طيران
وتخش في غدرة قناص
حيلك يا عم
دا شارع اصلاً ما برحم
وانت المقصود
هُم لموا القش
ما ختيت عود
ذنبك علي الله مرقت تحوم
بالخير بتجود
بتكوس في نص النار الواقدة دي رزق اليوم ؟
بتلم كيفن الما بتلم ؟
و انت الشقيان راجلاً محبوب
راجع تعبان
راقد منهوب
نفضوهو البيت
ما خلو الطوب
يا الشُفت الموت
و رجعت البيت ريحتك بارود
انت المقصود
حيلك يا عم 💔
#نهي_الكباشي
الكتراااااااابة 😍
مدت إِيدا وشالت نقطة💧
ضِحكت بسَطت كل ترابة
ودخَّلت النسمات في ورطة
😘
يا البتشحتفي روح الوالدة
كيفن حسي عرفتي المطرة ؟؟
وكيف رجعتي الذكرى الخالدة 😍
وكيف شكلتي سماح ف الخرطة؟؟
حلوة حلاة زي جية ؛سلمى ؛😉🙈
و زي نظراتك بعد الغلطة
و ريحتك فيها عراقة وإلفة
حليلو ابوك الما لاقيها😜
في اي مكان 🙊
قبل يجيها
سَتِفي ليهو أمان في شنطة ❤
#نهي_الكباشي
ما قد كتبت لنا
سيصيبنا يا ربْ
نزلت بنا البلوى
ضاق الفضاء الرحب
فافرغ لنا صبرا
واربط على ذا القلب
واكتب لها فرجا
من حيث لا نحسب
#حفظ_الله_السودان
#محمد_عبدالواحد
إتا لُو شلوم .. لُو ماشلومخ
لُو بوكوغ طوف .. لُو عوغُف طوف
سلح لي ..
أبدون لخيم اِش لِيڤيناه سْلاهْ لخيم
ام يرتسي هشيم اورشليم لانو.
#محمد_المهندس
#تضامنا_مع_فلسطين 🇵🇸