5285
الاسم :- سئلت ذات مرة ما سر ذاك الاسم؟ صرخت ِملأ صمتي المكبوت في دواخل الفنون إنه اسمها حروفه تطايرت تشكلت تألقت تعلقت بشخصي الضعيف فصار اسم شخص ما ... بداخلي. - ريحة البن .
ياريتو ﻳﻘﻮﻝ بخلان ﺑﺎﻟﺮﻳﺪ أﻭ ﺧﺠﻼﻥ ﺳﺎﻱ
أﻭ ﺇﻣﻜﻦ ﻣﺘﺤﻔﻆ ﻓﻲ ﺍﻟﺮﺃﻱ
ﺑﺲ ﻓﻲ ﻋﻴﻨﻴﻮ ﺑﺎﻳﻦ ﺭﻳﺪﻭ
ﻭﺑﻜﺮﺭ ﻓﻲ ﺣﻨﻮ ﻭﻳﻌﻴﺪﻭ
ﺇﻥ ﺻﺮﺡ أﻭ ﻣﺎﺻﺮﺡ ﻟﻲّ
ﺑﻘﻮﻟﻪ ﻋﺪﻳﻴﻴﻴﻴﻞ ﺍﻧﻲ ﺑﺮﻳﺪﻭ
ﻣﺎﻋﻴﺐ أﻣﺮﻕ ﻛﻞ إﺣﺴﺎﺳﻲ
وأﻧﺎ ﺷﺎﻳﻠﻪ ﺟﻤﻴﻠﻮ ﺩﺍ ﻓﻮﻕ ﺭﺍسي
ﻳﻜﻔﻴﻨﻲ ﺍﻟﺘﻠﻤﻴﺢ ﺍﻟﻘﺎﻟﻮ
ﻭإﺳﻤﻲ ﺍﻟﻤﺘﺮﺑﻊ ﻓﻲ ﻣﻘﺎﻟﻮ
ﻭاللهفة ﺍﻟﻔﻲ ﻋﻴﻨﻴﻮ ﻟﻴّﺎ
ﻭﺍﻟﺮﻭﺡ ﺍﻟﻤﺘﻮﻫﺞ ﺿﻴّﺎ
ﻭﺍﻟﺮﻳﺪ ﺍلإﺗﻌﻤّﻖ ﺑﻴّﺎ
ﺑﺲ ﺣﻠﻮﻩ ﻭﻛﺖ ﺗﻤﺮﻕ ﻣﻨﻮ
ﺗﺪﺧﻞ ﻓﻲ ﻗﻠﺒﻲ ﺗﺰﻳﺪ ﺟﻨﻮ
ﻋﺎﺟﺒﺎﻧﻲ ﺭﺯﺍﻧﺘﻮ ﻣﻊ ﺳﻨﻮ
ﻳﺎ ﺭﺑﻲ ﻳﺮﺿّﻴﻨﻲ ﻳﻘﻮﻻ
ﺣﺄﻋﻴﺶ ﺍﻟﺪﻧﻴﺎ ﺩﻱ ﺑﻄﻮﻻ
ﺣﺄﻓﺮﺡ ﻭﺃﻏﻨﻲ ﻭأﺩﻋﻴﻠﻮ
ﻫﻢ ﺍلأﻳﺎﻡ ﻋﻨﻮ حأﺷﻴﻠﻮ
ﺣﺄﻓﺮﺷﻠﻮ ﻗﻠﻴﺒﻲ ﻋﺸﺎﻥ يرتاﺡ
حأﺯﻭﺩﻭ ﺑﺮﻳﺪﻩ ﻭأﻓﺮﺍﺡ
ﺣﺄﺧﻠﻲ ﻳﻌﻴﺶ ﺟﻮﺍﻱ ﻣﺮﺗﺎﺡ
ﺑﺲ ﻫﻮ ﻳﻘﻮﻭﻭﻭﻭﻭﻭﻻ
#اديبة_احمد
لو يموت زول كان حياتك..أو يسافر دون رجوع
لما أطفال ديمة تبكي .. لوتموت الضحكة جوع
لما تفرح فجأة جدا .. و قلبك يرقص ف الضلوع
غصب عنك لما تحصل .. تلقى في عينيك دموع
.................................
لو سعادة بتملى قلبك .. و الحزن لو يوم يغلبك
ولو يخون الغالي حبك .. أو تفارق مرة دربك
تلقى في عينيك دموع
..................................................
ولو تقاسي من المشاعر .. و توفي ليهو و تلقى ناكر
ولو تعيش العمر صابر .. أو تكون عايش مكابر
تلقى في عينيك دموع
..............................................................
لو تفكر إنو خانك .. و لما تفقد يوم أمانك
فاكرو يوم حيصون حنانك .. ما حصل في لحظة صانك
تلقى في عينيك دموع
................................................
و لما يرجع زول بريدك .. و يبقى ليك في لحظة عيدك
و يملا بي أشواقو إيدك .. و كلما تحتاج يزيدك
تلقى في عينيك دموع
......................................
لما أم تحضن جناها ... و لما أم بتجيها آهه
و لما أم تديك رضاها .. و إنت قاعد يوم معاها
تلقى في عينيك دموع
..........................................
لما بتبوس إيد أبوك .. ولو براك و يحميك أخوك
و كنت فاكر يوم نسوك .. يشتلواالأفراح و يجوك
تلقى في عينيك دموع
.........................................................
الدموع في كل إحساس... و المهم الدمعة راحة
و الدموع بتطفي نارك ..و تسقي جواتك مساحة
و الدموع دائما تعبّر .. و تدي أفراحك صباحا
لما تفرح أو تسامح .. الدموع سر السماحة
...........................................................
لو يموت زول كان حياتك..أو يسافر دون رجوع
لما أطفال ديمة تبكي .. لوتموت الضحكة جوع
لما تفرح فجأة جدا .. و قلبك يرقص ف الضلوع
غصب عنك لما تحصل .. تلقى في عينيك دموع
مقطع خاص :
للدموع أسباب كتيرة .. و أصلو ما بتشبه خدودك
و إنتي تشبهك السعادة .. و كل يوم ناضرات ورودك
#محمود_الجيلي
عشان الفرقة والخذلان
مشيت من ضو
ربطتك في طرف ريدي
وصريت في الرويحة حنين وحبة الفة
شوق تعويذة من الخوف وضوح الشوف
وكت ما الضلمة تنبح هو
تباريح الكلام الزين فراقك شين
سمح ما تستبيح الجو
تجينا مع النسيم متدسي تنزل شو
عطور كمية تدخل في المسام والجتة
والروح تبقى زي مافيشها
تكمل ما تفضل حتة
واحساسي الرماد الكالو
حاضن جوة بيت الريدة
راجي الرمية تعمل ستة
#ماجدولين_سعد
إليك المناجاة
منك النجاة
بتوق الحياة وطوق الحياة
ولي كلما زاد بطش الطغاة
خرقت السفينة
لكنها سربت بعض عمري من الأزنِدة.....
يدلل حظي بقلبي الكآبة
طفلٌ تعثر ثم أصيب بعدوى الكتابة
يهذي إليك
إليك السؤال ومنك الإجابة
والاطلاع جحيم يطل على الأفئدة ...
و لا علم لي كيف تبدو يد البر - ماشكلها-
غير أني وثقت بها
حين ألقت لطفل ببئريَ حبلك حبل السلام
وثقت بها
منذ كنت
أنام
وكانت تمد لرأسي حقول الفضول الحرام
وتفاحها يطعم الأسئلة التي لم أذق بينها قلق من سقوط السماء عليّٓ ومن كونها في النهاية سقف بلا أعمدة...
بجاه النبيّ
وأنت تُلَقّى الكلام من الآدمي....
بحق محمد
أنت السلام وأنت المحبة
هلّا تبارك ذنب الأحبة؟!
هل يا تراك ستُلقى عليّ،
على الجيب في نذره المريمي،
لتملأ جبَّتيَ الروح منكَ وروحك فيّ؟
مشيت إليك فهرول إليَّ
وأنت القريب إليّ من الأوردة...
ذكرتك يا كاتم السر فاذكرْ
أناديك أنيَ قد مسني الضر
يا سامعي قد تعريت فاسترْ
على وسم رقي إليك وقيد الطريق أبوء بذنبي ولكنني حر
لي صوت قلبيَ فاصنع على عينك الان دربي
تعلمتُ أسماء كل الوجود
ليكفي فقط أن أفكر بالباب كي أوجده...
#وئام_كمال
#لم_تكُن_يوماً_لهُ
هي ما درت أنَّ الحبيبَ
إذا تحملَ عاشِقاً
غـفرَ التذمـُرَ والزلل
صفعَ الدموعَ بصبرهِ
ومضى بأروقةِ التناسي لا يسل
فالحبُ في عُرفِ الزمانِ مودةٌ
والهجرُ للقلبينِ صُبحٌ وارتحل
وهو الذي حسبَ
المواعيدَ ارتهاناً بالهوى
فتناوشتهُ على حريرِ الأمنياتِ
وفي هجيرِ الوجدِ خانتهُ الظُلَل
كم كانَ مخموراً بنَخبِ الحُسنِ
والأنموذج الأسمى
وتاريخ الأحبةِ من تحدى أو بذل
فسَقتهُ إيماءً عناقيدُ الترآئي
من أكفِ السامعينَ
يظُنها من تيهِِ سُكرَتِه عسل
#محمد_المهندس
كلام شبه موزون
اسفي على الناجين
من هذا الخراب
لا يعلمون بأنهم هم
من تراب والي تراب
من ينحني للريح
حين تهب اولى ان يهاب
ومن ينشد الأمجاد تخشاه
الصعاب
من يطرق الباب الذي
من خلفه وطن مصاب
من هم بالفعل الصواب
فهذه البلاد تخصنا نحن
الشباب
من يترك الساسة وفلسفة
الخطاب
من منا إن نادى المنادي
للسلام فمن أجاب...؟
#محمد_السر
كوني معي
غنّي معي
فالوقت ليس بصفِّنا
و الحب ليس كما نشاءْ
لا تتركي ليلاً يمرُّ بدون أن تجدي يدي.
صدري وسادةُ دمعِنا
حزني و حزنك أصدقاءْ
نامي لأول مرةٍ
من دون أن تتخيّلي حرباً تفرِّقُ بيننا
و لتحلمي بيديّ حولكِ
لا رصاصَ
و لا دماءْ
#محمد_عبدالقادر
ما زال هذا الموت يعزف لحنهُ
للحربِ
للأصحابِ
للغرباءِ
لا أحد يغني للحياةِ
و لا دموعٌ للفرحْ
لم نختبر وجعاً كهذا يا إلهي.
أن يصيب القلبَ إدمانُ الوداعِ
و أن يصير الموت في مرآتنا
في البابِ
في ضحكاتنا
في الجدول اليوميِّ للأحزانِ
حتى في المُحبّين اتّضحْ
.
#محمد_عبدالقادر
و الآن
ما عندي شيءٌ لأخسرَهُ
لا بيت
لا حب
لا أشواقَ
لا رغبةْ
أنا أعيش كأني آلةٌ صُنِعتْ من الجراحِ
أعيش مراحلاً صعبةْ
و أنت ما زلتِ كالخرطومِ
مُتعَبةٌ
لم تخسري بعدُ
لكن فازتِ الغُربة
#محمد_عبدالقادر
تنادي عليك سنين الذكرى
يا سيد الضمير الحي
وتسمع صوتها لما تقول
مصيرك بكرة ترجع لي
وتلقى بلادك الراجياك
ملانة أمان وبسمة وضي
تعال مشتاقة ليك الناس
ومشتاقاك بيوت الحي
#محمود_الجيلي
الليم متين يا مولاي
وأنا
بلم متين أنا يا مولاي
وهل في الشتات أنا عندي راي ؟
نحن السوراي ؟
ما نكون نحن
نحن السراي
جيناك بالحب
راريت بي الحرب
الروح يا رب الروح
الروح مرقوعه
و سيدا الخيات
بتسرب نور
بنكشف الذات
و جلدي التبروقة
فرشت النفس
الخوف سلم
اطلع درجات
الموت غادي
الطشة هبات
الرجعة علم
خبرة وقدرات
امسك حبلك
لا يجرك حدس
قول بسم الله
خُش السمؤات
بتعرف تسمو ؟
ما بعرف كيف
هو شنو الإنسان
غير غُمت السيف لحظات الدم
ساعات الحق واقف زيو
وساعات الغم يلمع رايو
يشفع للكل ساعة الرجيف
يغلب غيو و ينصر خيو
ويعامل التاني كأنو الضيف
يا ريت ولو كلنا كان ياريت
أعلنا النصر على هذى النفس
ونسينا جهالة هذا العصر
صليت ؟
العَصَر ؟
صليت ؟
ص ل ي ت
صلاني زماني التيه والغدر
و النار
و الضيق
ضيق الاحلام
و نار التانين
تيه الصلصال
و غدر الاقدار
وادركت بوعي
فكر التسليم
ما الإستسلام
و مشروع السعيّ
فصليت الناس
عمق الإحساس
ما القشريات
وريتم بيّ
لجم الوسواس
ما الفطريات
سويتني براي
ما كنت الزي
ولا كنت نبي
ويا الساكي شعر أنا ساكي شعور
يا الراجي حبر انا خالى سطور
يا الداير القرب أنا كلي نفور
إسفاف
وسفور
و خمور
و شرور
و خلاف
وغرور
و كسور في كسور
شقيت السماء عن عيسي وجيت
شقيت العماء بيك يا ابو السيد
ورسمت صلايب في الحتات
(مريم .. مريم)
جنيت يا حي
(مريم .. مريم)
قول بسم الله
سيد الخلتات
هوي يا اللخبات
(مريم .. مريم)
يا يمة الشوق للفاتوني
مشتاق بالجد ؟
لي أبعد من أبعد حد
لي يات حد
حدد تحديد ؟
مشتاق لي لحظة
نفهم لمن ننملي زُت
ونشوفنا كما نشوف التانين
و لي لحظة
ما قبل الكُن
في سرك و سر التمكين
لي كنه الجوهر ولي المضمون
و ليك يا رامي الشك في النار
وماسك طرف الخيت في الناس
يا حُر من كلمة حُر زاتا
يا حيرة كل بني محتار
يا ذاتك في معني الاشياء
يا ما قادرينك بعد الياء
يا ما موصوف يا بعد الصمت
البعد الصمت البعد الشوف
والشهقة الدهشة الممطوطة
وطعم البشرية المزبوطة
و الممكن دون الما دون
يا مسهل درب الواصلين
وموصل قول الساهلين
ومنسي الهسع ناسين
ومذكرني
يا منك مني المنَ على
بي بعض الفكرة وبعض الضي
يا حي في حي الذاكرين
شاكرين ..
شاكرين اللجلجة والظلمات
وضميرنا الحي
سامعين سامعين
عارفين الكان
في الزمن الفات
و الزمن الجاي
زمن الحوبات
وفوارس ماف ..
يا حليل (بودا)
ياااااااااا غوتاما خليتنا يتاما
ما ضقنا وراك طعم الاشفاق
طعني الشوق يا الدربك شوك
مد لي اخوك من صبرك
مد
كترو الفراقات
و غالبني اسد
واقف في اخر الصف
وبعد
تسعة وتسعين
تسعة وتسعين ورايح لسة ؟
حاسيني براي طيش الحصة
فاهم القصة
لكن بالجد
ما حاسيها
ومصاب بي عطب إدمان الكشف
مشرور زي ضل فوق الافكار
مكار
ومروح طرف الخيت مني
قاصد
متأسد وماسك في طيف
كم و عشرين صيف
و خريف وشتا
و ما ضقته ربيع
ممكن هسع اشفع للكل
و مالاقي شفيع
متواضع ليك
فسموني وضيع
سبحانك قمت ضحكت على
من فرط البي
من شوف ماسك بالجمر اليد
من ان اترك واعيش بسلام
ومن الاحلام
من بعض غناي
ومن كلي إذا ما حلك حل
و من كلمة هل
من دم و اهل
و من كيف نتسلسل
واهل الصل صل
من العارفين
والروحم نيم
ضل التايهين
والطبو علل
(واحدين جبال و احدين تلوب
واحدين جالسين فوق اللالوب
الليم متين يا مولاي)
صوتك يا (محمد)
يا غناي ختاني شروك
هي يا (شبكة) الشربكة مافي الروح
في خاطر الشاف في سواه
الزول المضبوح
و الراحة العند القال حاضر
و كدا تحصل معجزة براحة
و لا معجزة زاتو
عاجزين نحن
او قول كنا
و قول ما زلنا
وزلينا
يا (الفاضلابي)
شيخي الكافر
يلحقني غناك
ياسيد اللون
كافر بي شنو ؟
متغطيبك
الكون جواك اوسع منك
لكن قدرك
و قدرك لابد يصيبك
إيقاعك أظبط من التون
لخبات إنت
واسع ادرك ما قد ادرك
وقيد التتليت
عقلك باطن و ظاهر سواق
روحك اسي من امبارح وبعدين
-ودي نفسها ذات روح المشتاق-
ونفسك يا طايف الافلاك
اه يا عكليت
السقفك وشالك عالي علاك
و لحقك الحِن
يا (طه) الجن
مو طه اللحقنو الامات
جواك مليون (بهنس) ما مات
وجواك يا العارف
جواك براك
ناولني غناك
و هاك مني شيل من منك
(الذكرى اللئيمة تصيبني بي نشابة
سمح الذكريات العرفة في تتغابى)
قبلك وحدك يابا
سمح الذكريات في الروح محطات ياما
اقدما كنت شجرة
وكان فروعي سهامة
صابتني الزوابع والمطور
والطامة
مركب نوح جذوعي
وفيني بعض كلاما
لغة الطير
وعصر الخير
وقعدات الدلاي لاما
يابا الروح تروح من طين
تخش لي طين
حد توصل منتهاها سلامة
...
وهل من عودة تاني سلامة للعاصمة ؟
هنا أمدرمان ؟
لا حولاااااااااا
دي بورتسودان
يا خرطوم حليلك فيني مات حيلك
ميتين نحن من شوقنا القدر نيلك
عكرني البحر
مالح وليلو مازي ليلك
و احمر من دماي مافي
ومافيش اليخفف ويلك
مابين الحلو والشين
والدنيا البي وشين
الإيد في الإيد بي إلفة
واجهنا الكون وشين
أدينا وعود للضفة
والجبل العارف الوقفة
للوادي العارف الرجفة
والشارع العارف الوصفة
للنهر العبى وجف
الظمأ الراجي الرشفة
كان حلمو الكاس والغرفة
والسر الساكن الغرفة
والواحد أس اتنين
كلمنا الطين ما ينشف
ما يفارق درب اللين...
وحنسنا الروح لو طفف
كيل لقيا تسد البين....
كلمنا السما تتنطف
والوطا تهدينا جنين...
والجين بين الجين يتولف
يهدينا سمارضِي هجين....
غطانا جناح لو رفرف
يا سما أرضينا حنين
أهدينا منام يتكهف
زيد فوق أعدادنا اتنين
يا سما أرضينا اتلطف
الورق الليهو سنين
وشوش للريح تتصرف
ماتنشف فينا الطين...
#وئام_كمال
في موضة سفر البلدان
ودعتا على الساحل صاحب
كان ساكن في لبو السودان
ملاينبو وبيحاجج صاخب
كان حافظ في مخو المولد
كان قاعد في جيبو الراتب
ظنيت الساقوا دعا والدين
تترقى وتتعلى مراتب
سودانك حتحت من خاطرو
فكرة أحلامك في الغالب
اتعلم تحسب عادي هناك
ما تعد أيامك بالسالب
واتأكد دام انك طيب
ظنيتنا طيابا وبنطايب
ما نحن بعد قعر البلدان
صلصالنا القام كسر القالب
ما تقضي سنينك ساي مطلوب
تستاهل يوم تبقا الطالب
ما تدخل يدك في عمرك
من كهفك ورقك ما بحاسب
واتلطف وانت مع الأشجار
الفاس في جزعها بيشاغب
وحياتك وحياة البينا
الأوليا و النجم الثاقب
الكون مترصد لي بيتنا
مترصد ممغوس وبراقب
يلاك نعيش الجاي سوا
الشوق الما بيَحَمَل غِب
مهرودة الروح من فرط النوح
في حضنك شفت براءة الطب
لو كان بشفعلي معاك الحب
انا دغري بحبك ما واجب
وانا يوسف في حضن الجب
كان شايف في سجنو مكاسب
يا بلدي العلمتك تكتب
هل وسَّم جيناتك راسب
نستورد راي من خواجة
يا النخبة البتصدر ناخب
لو جيت قررتا تحاسبني
هاك فك أيامنا و ح تحاسب
والباقي _وَدَعْتَك_ شلتو معاي
مصروف لي بيت يبدو مناسب
انا صاح ودَّعتك شادي الحيل
والخيل الصدَّ معاي ناحب
وانا بس قدمتك للغربة
وطاريك يا صاحب لو ساحب
نتقاود باقي العمر سوا
وقفانا سعير ما فيو غالب
#محمد_الشيخ
يا الوشك شبيهي
عاين في وجيهي
مش نفس الوسامة؟
اخدر وما ضلمه
اخدر شكل يمه
وخاطف ابتسامه ..!
.
.
ولضمي البريدو
ما بقطع وريدو
يا الله السلامه ..!
شيشك بالرويحه
غناااية وسميييحه
حترشك طعامه ..!
كاتلني وما كتلتك
دمي الفي رقبتك
لي يوم القيامه ..!
#ابراهيم_جابر
لو صحيح بالجد بدينا
ح نبقى للفاتونا مرتع
نسدد الدين العلينا
وبالعزيمة اكيد ح نصنع
العمار الفي إيدينا
المكن في كل مصنع
الدورب تنده علينا
والبيوت مشتاقة نرجع
البيوت مشتاقة نرجع
ويقلد الشجر الميادين
والحنين للحلة واقف
راجي مننا مدة اصبع
ويستلم باقي العرابين
الجوامع عاد تكبر
والكنائس
جينا راجعين
نمشي للمحتاج ونفزع
التكورك مانا دايرين
شوفو ناس اخر المربع
من عُقب تالانا صادين
واي مسمع فينا يسمع
همسة أسياد الدكاكين
الببايع ماب يمنع
الجرورة وفكة الدين
نحن زي ما أمرنا في الدين
باقي ليك يا حجة باقي
هاتبو حاجة من الكراتين
مدت ايدا علي الرفوف
الصغار جاهليين بُطينين
شالت الب يستر الجوف
طالما ما الله موجود
البشر ما منو خوف
ترانا قاعدين
البيوت في الحلة تنده
تبكي من شوقا العراميص
الشبابيك التتاوق
للضيوف المروا فوقنا
تعزم الجايين فطورنا
دمعة (سايلة) علي القراريص
العيال في همة لموا
كُتب المدارس والكراريس
البيوت مشتاقة نرجع
والدورب تنده علينا
المكن في كل مصنع
والعمار الفي إيدينا
بالعزيمة اكيد ح نصنع
نسدد الدين العلينا
نبقى للفاتونا مرتع
لو صحيح بالجد بدينا
#محمد_الشيخ
قل للذي فقد الأمان ومالَهُ
ودهى الزمانُ جداره فأمالَهُ
الله أرحمُ بالفتى من أُمّهِ
إن أوكلَ الداعي له آمالَهُ
#حفظ_الله_السودان
#محمد_عبدالواحد
بتعرف تستفز نبضي
تحت من روحي كم لهفة
وتشتت في فضاي ألوان وكم إلفة
#ماجدولين_سعد
ويكأني ضاعَ مني ضوءُ ظنَّي في الفناء
فاستدلَ بهمسِ أمسي واستوى قُربَ المساء
أوردَ الأشواقَ راقَ سبَّحت كفُ الرجاء
بانتشائي لاشتهائي ذابَ شوقي كيف شاء
يا سروري حين سوري مَدَّ محراباً أفاء
ظللَ الشوقَ الموارى في مكاتيبِ الوفاء
كلُ حرفٍ فيهِ طرفٌ كُحلهُ دَعةُ الرفاء
صبَّ صبراً في صبيبِ الليلِ موفورَ الثناء
صادقاً ما دام قامَ ساجداً يهَبُ الدعاء
لِلمُقِلِ الجهدُ يُهدي كأسُهُ سقفُ الإناء
عَودُنا بالوعدِ يعدو في شآبيبِ العطاء
فاليقينُ مقامُ قلبٍ مقبلاً بالنورِ جاء
التحياتُ السقاةُ رُواةُ روحي بالخفاء
طالَ ليلُ العاشقينَ طالما طابَ النداء
جادَ جبراً يا حنايا ها قتامٌ الثلثِ ضاء
لاحَ بين البينِ نجمٌ ويكأني في السماء
#محمد_المهندس
تظنُّ بأنها شبحٌ
و لكني أراها الآن تنبُتُ في حقول القلبِ
ترقص في مخيّلتي
أرى بالقرب من يدها وداعاً لا يليقُ بها
و حزناً بِـٰسم أيامي
و أحضاناً لأسئلتي
تحاولُ أن تغيبَ.
أنا أحاول أن اقول لها:
" تعالي
و املأي رئتي "
.
#محمد_عبدالقادر
و ركضتُ نحو الباب
ملهوفاً !
مواعيدُ انتظاركِ أتعبتْ قلبي.
كاني منذ أن بدأ الزمان كتابةَ الأشواق
قد بدأ انتظاري
ركضتُ نحو الباب لم أفتحْ
وجدتُ جدار أحزاني نما
و تحوّل الباب الوحيد لصخرةٍ
من صُنع خوفي و اختياري
من يومها، للآن
أحضنُ صخرتي
و أنام في كَتف الجدارِِ
.
#محمد_عبدالقادر
أسفي لكل القارئين:
ها عدت للبيت الكبير وها لقيت الأصدقاء.
ونسيت أصوات الرصاص
وكل ألوان الدماء.
ونسيت خطوات النزوح،
نقاط تفتيش العذاب،
ونظرة القلب الأخيرة ،نحو بيتك، ثم تمضي للعراء.
قد كان كابوسا صحوت غسلت وجهك بالتعاويذ الأثيرة والدعاء.
بيض العمائم في اللقاء تعانقت!
قد عاد بيتك للضيوف صباح يوم الجمعة الغراء يجمعنا الطعام.
قد عاد مشيك للطريق
وعدت أنت
وعاد صوتك للكلام.
قد عاد للطفل التعثر
عاد لليل النيام.
ورجوت وقت غيابنا ألا يطول؟
ورأيت أهلك بعد دهرٍ واقفين على الطلول
هل غاب بيتك عن خيالك لحظةً
خبر النوافذ، صحن جارتنا الشهي، شواء كبش العيد، (من بالباب يطرق)، هل لدى الجيران نورٌ، هل تعود الكهرباء؟
قد غبت حتى شاخت الطرقات وانحنت الظلال
قد غبت حتى أقفر الميدان لا المريخ أمرخ ،غبت، لا اكتمل الهلال
لا في ربيع المصطفى قرعوا الطبول
ها عدن للقرع الطبول وها لقيت الأصدقاء
افرح! لقد عدنا!
لقد طبنا وقد طلع الصباح
ما بال وجهك كالحا
أثر الجراح على يديك ولا جراح
اضحك وقم نمضي إلى الترهات واللهو المباح
سنعود نتلو سورة الفتح المبين نصيح حي على النجاح
أتعيش آثار الهلاك إذا نجونا
كل من ماتوا على أكتافنا تمشي النعوش بيوتنا
الذكرى
القبور
هل قد نجونا أم نجا الموتى وبرزخنا النشور
ونسيت شكل الحزن أم كنه السرور
الحرب نافذة الجحيم
الحرب تذكرة الذهاب
الحرب نائحة الجيوب
الحرب أخت الحرب بنت الحرب والدة المبير
في الحرب تغتصب النساء
في الحرب لا يأتي الصباح ولا يعيش الأبرياء
في الحرب أطفال الشتات سيسألون متى نعود، ولن يعود الميتون إلى الحياة
ستظل روحك في البعيد، ترى الوجوه على الغمام وحين تشربك المياه
ستعود لكن لن تعود.
لا أنت أنت ولا البلاد هي البلاد.
#محمد_عبدالواحد
... خطيت القصيد في بردي ...
الغُنا في فلسكاب
أنا صاحب المزاج النَّرْدِي
فيك القلب كبكاب
هاك فيني الدوانكي فأردي
هاك الدمع أنخاب
بحبك في الحزن يا وِرْدي
عارف الحزن جياب
بحبك بالبلوزة الوردي
وبحبك بدون أسباب
عندي الحب تناسب طردي
فيني الحزن لبلاب
أنا صولو الكمان الفردي
الجيتار مع الأصحاب
هاك (باص)(عمري)هاك انفردي
(محمود) ذات شجن منساب
هاك(راجياني) بي صوت(وردي)
هاك صوت (رَبْشة) مُرتاب
#محمد_الشيخ
بسلاحي
حزت شهاداتي وكفاحي
وكتبت رسالة تخريجي
بدمي
وغصبت بنات الناس لتأكل من تفاحي
بسلاحي
وبلاغة قصفي
أكتب قانوني
بحروف العطفِ
وأسمي نفسي أستاذا
بالرتبة في أعلى الكتفِ
تدعو لي أمّي
كي تبكي أم سواي
فهي الحرب
يموت الناس ليحيا الناس
بريء بحري
وعصاي
#محمد_عبدالواحد
فقد لحن الفرح معناو
بعد توب الحلم كش
هداك سابل وراهو عناو
وفي كل الدروب طش
ندهنا كتير ورجعناو
سرب باب الحزن خش
زمان وافراحو ودعناو
بتاوق للشروق بش
ودندن ريد وماسمعناو
أتاريو للصبر هش
ضليلو السابو ضيعناو
وجمر الفرقة زاد تش
وقفنا على الوطن بعناو
ونادانا الوهم غش
وبرينا اللاهي طاوعناو
بعد مطر الحنين رش
وهو البيزازي بي مغناو
فضل في العتمة يتمشى
يساسق والليالي معاو
وفي أحلامو يتفشى
#محمد_المهندس
يا الشر في النفوس الوسختها طباعة
خليتي السماحة و فيك تمام الساعة
خميتي النقيصة عملتي ليك شماعة
صريتيها بقجة قباحة يا طماعة
طراك موتك النوم برضو ليو ما طريتي
ذكرك المرض ضعفك رجعتي قويتي
كبرك الزمن وكبرتي لما بقيتي
مغرورة وخدعتي اللابسة جتة وجيتي
وين الليلة ماشة و وين بوديك سييك
وين القوة يا الجاهلة وخيالك ضيق
وينو غرورك آ النجضني نيك
عترتي الليلة يا الدربك عِوَييق
#امجد_اسماعيل
_ لمن اسميكْ فردة _
انا عشمي فيك جناح
يسمَح يرفقنِي
في دربِك الرواح
انا صاح غلطتا كتير
لكني شفتك صاح
في الريد يناصحني
الريد عشيم يا صاح
وانا كيف ادس ريدي
عِرق البريد فضاح
' اوف شولدرِ كْ ' ايقاظ
نِدا محيك الوضاح
يا عينك البيضا
ويا رمشك السفاح
الوردة في خدك
يا واين التفاح
املي الجراب بالوُد
بملا المسافة سماح
#محمد_الشيخ
للموتِ لحنٌ كارثيٌّ في مخيّلتي
له لغةٌ بلا معنى
و أحضانٌ تصيبك بالفراغْ
للشعرِ موتٌ كارثيٌّ
عِشتُ أعرفهُ
ثقوبٌ بين ذاكرتي
و أحزانٌ تُحَسُّ ولا تُصاغْ
للحبِّ حزنٌ مسرحيٌّ
قاتلٌ أيضاً
حنينٌ مستحيلُ القُربِ
شوقٌ يستبيحُ و يُستساغْ
.
#محمد_عبدالقادر
لو لا إنو عنك
كان جبت سيرة الواقع المضني
ونبزنا الحكومة سوا
وكان شويمنا عزة
و وترنا الخليل
لكن إنتِ أغلي وأعز
من انتعل سيرتك
واسير بيها
على الزي ديل
فخليك منهم أسي
وفيك خليني فيك اطيل
يا ارهف بتلة واندى
من سلة ورد شفقان
ويا النحل الغيابك عمداً
شفق وردنا النعسان
طابخ ليك رحيق ومودة
كامن بالحنان.
صننن صنت
.
.
وطننن طنت
.
.
نقناقة المحنة الفيك
توهت المظنة الفيني
واشتبكت رؤاي
شفتها طايفة فوق ضلماتي
طارت مني افكاري الفراشات
الوآن في الخيال طفرات
فارتبكت مشاعري الحية
خشيت في ضفوري
مرقت قاع الغار
وفاجأني الملاك بالحب
وروحي الفي غايهب كانت
ابعد روح رسول في الجب
نورتا الفيافي الغادي
و مديت ليك سنين
بي كلتا اليدين القلب
واتوحدت فيك اسهبت
عقدت العلايق بوب
وقلت آمين
لفحت توبا قامت كب
بسم الله
لفحت كُلي ملكتو تب
قول يا لاهي
مختصر الكلام
تلخيص السلام
في ذات
تختصر الخليقة جهالة
توصل لحظة الإتمام
ومن هنا لي قيام الساعة
ثم الآت
مختصر اللغات
و الدين
أنا وصلصالي والروح
ومجموع الحواس
والنفس
مشتااااااااااااااااقين.
#امجد_اسماعيل
جيت مصدع وراسي جايط
وكم قضية / قصص / نزوح
لمسة منها بس / كفاية
بردت في الروح جروح
#امي_مرسال_الله_لي
#عاطف_شمبات
(غُناي والسمره)
قُت ليها الدٌروب مشروره
شرَّه تشفِّق العَنَّافي
فرزعة الأباكْ
قالتلي الصبي البِنخَبْرو
قلبو جُراب عَرَدْ ما بكَبْسِن
إنتَ رِبيْت براكَ مِنَفْسِن
وكَوَاس للفَكاكْ
مِد حيلك قدُر حد شْوفَك
ولاوِمني ان عصاكْ
بس قَلبك كبير من قمتا
تَنسى الفي الصباح ناجِعلو
تتارر قَفاكْ
زَغاريد المغاربْ الجِبْتا
اريت اْن ما هَريتِن فْوقك
اتَ الراضي تَقْلد شْوقَك
وتدُج بى حَفاك
اكان شَبّلتَ فوق الرِيْحْْ
اخير لي من حَوَاك
قُت ليْها الوهَاضِب بَلوَه
طَشْيت بى سَبَبهِن مِنك
رَّجيت في البَكارِي التَلوه
زُوزيت من نَوَاك
وما قِصة كُبُر في قلبي لا جالب لِماك
ما حيلا فَضَل ينمطَّا
والخيل ماها خيل هَبَّاره
والبال عارفْا ، صيد سِناره في ايدين عَفَاك
اها ، ادينا ان لِقيتي دَبَاره
مدة هاك وهاك ..
قالت لي كفاك تِتبَّكى
زي حالة العَوين تِتشَكى
طَلاب الغزال بِلفَاهو
والمال ما بقع (بِتَّكّى)
نَاولتك قَبُل من شوفي
عينيك شُفتا بيهن مَكه
العَزْ هِن مِجَرِّب صُوفا
واجب بالشِّدر تِتحكّا
ما لْيك عندي قولة عاذره ..
مربوط ! بى هواي تِتفكَّا واِن ظَرّْفك رَفَاكْ
قُتْ ليها العَوازل بينّا
رَّكُّو السِمبِر الاِتمسى
راس شْوتالُن السَنوهو
شاطِر وفي الضحك إندَسَّ
عكَّارين صَفَاك
وعارفاني الوِطِيت الجَمره حيه
ورِدتو بيك تِشتْيشا طايبتا الرِّضاك
وعارفاني البَحَيِّن عِرْقِي
شان يْسخَى ويقَطِّر دَمّي
كان تسلم دماك ..
وعارفاني الرِّضيت صاج ريده
والقَلاي هواك
فما بْصحْ ليك تَدسِّي القَمره
والليل بير و شْوْك يا السَمْره
وقْيْعَان الهِجُوس في الدَمْره تِتَّسَّب جَفاك
وكِت صَبَنَت رِياح السَافِل
وصَالَت في خَلانا فَواصِل
وصَعَّدت الهَبوبْ
الهبوبْ لِقَتلِك فيني فَحَمَة طَفْيه صَاحْيَه
و ورتَبَتنِي حَريق
انا الوادَعْتَا عَرَبِك رَاحله
القاك ناسيه فْوقِّي فَريق
ولا انكَتَفتْ خُيُول آمالي لامَن غِبتي
لا اتنازَلتَا عنِّك زِيْق
خَفيف الظِل على هَامِش رِموشِك حُمْتَا
زَيّي وزي هِلال فَجريه جرَّا العَتمَه من اِيدا ومَلاها شْروق
قالت رُوق
دَوَابِي الحَسْره ما تجِم في لَهاتا الرِيق
اكان وسْمك على أيامي ما اْنزَحَّا
بْتَشوفنِي بَريْق
واكَان كُل الدُرُوب مَسَحوْها
رَبَك قادر يبني طَريق
عارْفاك في عيوني غَتسْتَا
واسمك من عِرِفتو (غَريق) ،
قوُم واقِف وشيِل شْيلَك
ونقِّي طيوفي من ليلك
شَوِّن مُر لِسانك كْوم
وشَبِّعو والمآسي حِروق
ضِرُوع الَواطَه هِن صَبَنت
سِحابَك طيُّو مَي وبْرُوق
سمِح حيْلك وكِت تِتحدَّى
صارِي مجبِّراهو ْمروق
وقُت يا طيبه
ابِشرِي ، الدُنيا لا خاضَت وراكي مَخاضْ
ولا جرَّت بَلاك واسوُق
ودونِك عِندي هادي الدُنيا
كُلها سُوْق
سَلام يا نَاسجه من ضَهَب الغِياب تْوبِك
قدُر سَاج في حَشَاي الشُوق
سلامات والسَلَب في السَاق
وفي البَال الحنين مطلُوق
سلامات والسَلَب في الساقْ ..
#هتان_حمدالنيل
الشاب الصغير عمرا ده الذي يمشي بينكم ف الأسواق ويأكل الطعام عديل كده ده الذي وهبني الله نعم من سعة كنوز صحبتو ١٥ سنة ما قبل الشعر ذاتو قد يزعجوا بوستي ده ويتصل و ما ح ارد لكن بنقدمك في اي حتة ونستشهد ليك بيك رغم غناك عن تبليغنا