rehtelbon | Unsorted

Telegram-канал rehtelbon - ريحة البن ☕

5285

الاسم :- سئلت ذات مرة ما سر ذاك الاسم؟ صرخت ِملأ صمتي المكبوت في دواخل الفنون إنه اسمها حروفه تطايرت تشكلت تألقت تعلقت بشخصي الضعيف فصار اسم شخص ما ... بداخلي. - ريحة البن .

Subscribe to a channel

ريحة البن ☕

الحرب عااابرة
فينا قوة ويقين
والقلوب صااابرة

بس متين الوجع
يمشي ماااخابرة
ورحمة الله العظيم
للقلوب جااابرة

#اديبة_احمد

Читать полностью…

ريحة البن ☕

شنو الفضّل محل كنا ؟!
بَزِح فارغ الرصاص بلقاك ؟!
بلقى ضِحِكْنا تحت انقاض ؟
ورود الشارع الشاهِد ؟!

منو الفضّل من الأصحاب ؟
شنو الفضّل من الأصحاب ؟
منو السالمنا بي ضحكة
وهناك مدفون بدون شاهد ؟!

بتنبت ضحكتك ياسمين ؟!
تقوم خرطوم محل أترك ؟!
محل ست شاي حمامة تَرِكْ ؟!
بقول يمكن ، بقول وارد ...

محل بتطير فراشاتك ،
هناك شايف دُخَان جاحِد ...

يسوع مصلوب سمعتو بئن ،
وجامع دَّوّوّ نزل ساجِد ...

مِنيو الحرب فيو صنفين :
تموت موت حار على الفاقدين ،
أو تفقد معالمَك فيك ؛
تموت بس موت على البارد ...

#محمد_الشيخ

Читать полностью…

ريحة البن ☕

باللهِ يا نُخَب الكُساح
وَديتي وين وَطني الخَزين
سِبتيلي هادي التااح ترااح؟
#عاطف_شمبات

Читать полностью…

ريحة البن ☕

ما ركّا عصفور في مَحَل ،
وشهق يغنيك بي سلالم لي علاك ؛
إلا وتحاحيهو النِّبَل ...
ما اتوضّا شاعر وابتهل ؛
الا وبتعْرِش في سماك دخان ودم ،
يبكي وتضيق بيه القِّبَل ...
ما انْفرَّا عمري على هواك ؛
وغزلت إسمك بالأمان ؛
والأماني الطيبة ،
والصادق سَمَل ...
ما انْفَرّا ريد الا اضْمَحل ...
ما خلّا قلبي عليك وجل ؛
ما خلا قيف ما خلا صيف
ما خلا كيف ما خلا هل ...
تتراصف أسباب القنع ،
ترشيني بي عوض الصحاب ،
وتجيبني بي باقة العسل ...
كان واضح السودان قفل
قاعدين نفلس في الطِبَل ؟!
أنا آفتي كان جينَك علي ،
والإنكسار قدر الأمل ...
انت بتراهن بالوحل ؟!
داخل رهان إسمو انتحاب ؟!
هزينا شهدك بي نشيد ،
فكيتنا لي إِبر النَحل ...
عِشِمْنا نضربَّك مِثال ،
خليت شبابنا ضَرِب مَثَل ...
ما أظنو دايرة درس عصر
حكمة " الأيام دول " ...
أنا بُقْجَة راجية مطار يَفِج ،
أنا خاطر أداك واحتمل ...

#محمد_الشيخ

Читать полностью…

ريحة البن ☕

يابا الحرب لازم تقيف
تمتم وهمهم (الله حي)
قول يا لطيف
قُت ليهُ يابا
فترنا نان
الله لي
يا رب تجيب قدرك خفيف
أخلاقنا من شِدة حياها
والله قعد تنزف نزيف

#عاطف_شمبات

Читать полностью…

ريحة البن ☕

بكره ح نفرح إنو وطنا تمام إتعافى
أنا متفائله الخير الفيو بالخير بتكافى
وبكره أراضيو ترجع سالمه
كانو الحرب الفيو ماشافه
وبكره ح نرجع نحضن أرضو
وهدمو اللابسو أنيق وقيافه
بكره ح ننسى المحنه الجاتنا
نشّرط كتب الحرب بغلافه
و أحسبو إنو الفات دي ضريبة
وحبة وجعة وقيمة مضافه 😔

#اديبة_احمد
#مستبشرة_خير

Читать полностью…

ريحة البن ☕

يا بلدنا الطعمو حِلو
لعبو بيك الأرزقية
كنت سيفك ما بتسلو
إلا في الحارة و قوية
اسي في اولادك مِحِلو
والجفير عند (أجنبية)
و بكرة خايف يقولو خلو
جتة راقد سمسمية

#امجد_اسماعيل

Читать полностью…

ريحة البن ☕

الدانة بدل الدُم
بدل العمار الدم
صبراً صبرنا عشم
أها تاني نصبر كم

قلنا الحضارة نعم
زرعت مليشيا لغم
وجنرال مطيتو وهم
لا وطني لا بيفهم

مين البدا البارود
ومنو اللي وين موجود
ما طمنت مولود
نحن الحصدنا ندم

أطماع جثث و صراع
اوجاع تزف أوجاع
بين النزف والجاع
أصبح حلِِم نِتْلم

مرقنا قلنا بلد
إغتال حلمنا سلاح
ولسه بنقولا بلد
تمشي الطريق الصاح
نحبها و تنعم

واهم البظن الخوف
بكره بيحجّمنا
قايل حرايق الجوف
ليهو بتلجِّمنا
نموت وما نحلم

يا هيبة الأذان
يا بهجة الألوان
يا سيدي السودان
ياربي لي تسلم

#محمد_الشيخ

Читать полностью…

ريحة البن ☕

ارحمونا ...

وطو صوت الدانه حبة

ماكفاية وطنا راح

كل زول لي جيشو عبة

وكل عيد مليان نواح

ارحمونا

وختو ياريت السلاح

وابقو عايشين بالمحبة

وابقو فكرو مرة صاح

مين بيكسب في الحرابة

ودم اخوك هو المستباح

مين وارضك شبه غابة

وليلا دايماً دون صباح

ارحمونا من المطامع

وموت ولادنا عشان

تريشو

ماكفاية بقيتو فوقنا

وكل واحد ضرا عيشو

البموت من ديل وديلك

هم ولادنا قبل تجونا

مين بربي جناو يعيشو

فأرحمونا

انتو ساكين الكراسي

والبلد فاقده المعونه

زي تقول ناقصين مأسي

افقدو المالية كملت

نحن شعبها ما بنخونا

امشوا انتو وارحمونا

#محمد_السر

Читать полностью…

ريحة البن ☕

الفيكي

مكفيني

في الزمن الغادر

قادر

جواكي يوفيني

بي جناحك بعرف

اسافر

يوم انتي ترفيني

ياالنور الشالع لامع

وزماني مطفيني

ياالصبر الواسع

شاسع

وانا ضايق بالفيني

يا الباب الدايما

فاتح

والسيدو مصافيني

والقلب البعرف

يسامح

طولي معافيني

مسار الصبر

الاغبش

يا حبلو اللافيني

شن معنى التوب

يتزركش

لو ما حا يدفيني؟

#يس_النضيف

Читать полностью…

ريحة البن ☕

حيَّ على العمل
برحيبِ الأمل
تسبقُنا النوايا
فالصفُ اكتمل

الخطواتُ تسعى
من صحنٍ لمسعى
بهدوءٍ وهِمة
والأفياءُ وُسعا

فيضُ اللهِ زمزم
تروينا ونعلم
كم في البُعدِ دمعٌ
بالتطوافٍ همهم

نخدمُ بالمحبة
كحمامٍ أحبه
نغرسُ ما علِمنا
تنبتُ فينا حبة

نبدو مثل سِربٍ
نغسلُ كل دربٍ
ونعودُ اشتياقاًً
حيَّ بكل حبٍ

يا منانُ أقبل
هذا الضيفُ أقبل
في الحجرِ استجارَ
مدَّ يديهِ .. قبَّل

#محمد_المهندس
#حيَّ_على_العمل

Читать полностью…

ريحة البن ☕

‏و اقسم لها
‏قلباً خفيفاً يا إلهَ الحزنِ
‏قلباً لا يعذبُها اذا عادتْ جراحاتي

‏و املأ يديها بالحنان لكي تسامحني
‏اذا اغضبتُها بالصمت رغم حنانِ كلماتي

‏و اكتب لنا صبر المحبة كلهُ يا ربِّ
‏لا دمعٌ
‏و لا شوقٌ يموتُ من المسافاتِ

#محمد_عبدالقادر

Читать полностью…

ريحة البن ☕

على الرحبِ والسعة
بحـبيبي ومـن مـعه

طرِبَ الوعدُ وانتشى
رقصَ القلبُ في دعة

#محمد_المهندس

Читать полностью…

ريحة البن ☕

كفةُ العمرِ .. تميلُ
فوق ميزانٍ عليلٍ
هذا تلويحٌ الليالي
ذاكَ إذنٌ بالرحيلِ
قد مضى منكَ اشتهاءٌ
ذابَ في قِدرٍ ضئيلِ
كم تجاعيدُ بنهركَ
جففٍَت نيلاً بنيلِ
كم طيورٌ فارقتكً
على بُكاءاتِ الهديلِ

كيف وارتعشت خطوطٌ
في سنا حرفٍ نحيلِ
هل بصمتَ على التمني
أم ركنتَ إلى المقيلِ
هل تناديكَ القوافلُ
أم سمعتَ بلا دليلِ
لعبةُ الأيامُ .. سهمٌ
ضنٍَ بالقوسِ البديلِ
وانتهى في طرفِ مدٌ
آبَ من جزر طويلٍ

خيلُكَ المفتونُ أشقى
وانزوى بعد الصهيلِ
ضاع في الرحلِ صواعٌ
غاب بالحملِ الثقيلِ
تلك مما كنتَ تخشى
أن تسيرَ بلا خليلِ
خذ عصاكَ بلا هواكَ
وامشي بالقلبِ الكليلِ
عِش كما شئتَ فأنت
سوف تمضي بالقليلِ

#محمد_المهندس
#عِش_كما_شئتَ

Читать полностью…

ريحة البن ☕

بال الشفع ممكن ينسى
الطابور الجوطه الكبسه
الغنوات الماتن هسى
الطعمية ام طعما طاعم
جوه حلوقن صارت غصة
الدافوري الكان بيريدهم
لامي غبارو لبعد الحصه
إلا الشفع ...
ما أظن تشفع ..
للغشاهن بالجركانه
وكان ماليها حلاوة وسمسم
وجوه السمسم دس الدانه ..

#ابراهيم_جابر

Читать полностью…

ريحة البن ☕

من يحقرونكَ
كُلُّهم
للريحِ
للتبريحِ
للقبر المريحِ

ولأنت يا وطن المشارق والجروف السمرِ
والنيل القديمِ
حبيبنا
بادي الكرامة
والضريحِ

من أمعنوا في الغمز والضحك الجريحِ
عرفتهم؟

ثكلى الضمائر
آكلوا الأكباد
صلّابُ المسيحِ

من يحقرونك قد رأوك على ثيابك لوثة العالين والقبب الصغارِ

ولأنت يا وطن المشارق جيبنا المثقوب والمملوء من ماء الفخارِ

رفقا بنيلكَ
لا تزد لغة الكنى والإستعارِ

سيفيض
في العام الجديد
تهبُّ أجنحة الدمارِ

من يحملونك للضياع تحبُّهم؟
فينانُ قلبك لاصفرارِ

نضجت على فمك الثمارُ
وفي يمينك
ذي اليسارِ

يا مرفل البردين في الدهر المعارِ

هب أنَّ شمسك لم تلح
ماذا تريد من النهارِ

من يحقرونكَ
كُلُّهم
للريحِ
للتبريحِ
للقبر المريحِ
وللبوارِ.

#محمد_عبدالواحد

Читать полностью…

ريحة البن ☕

وفهمت حديسك تب ام در
الدر في ام در!
والسافر منك وما منطر
خسران خسران ..
أن جاب الدر ..
والقاعد فيكي برغم الحر
الموت ،البوت ،السقط، القر
كسبان كسبان ..
كسبان ام در .. !
وفهمت حديسك تب ام در ..!
الدر .. في ام در !

#ابراهيم_جابر

Читать полностью…

ريحة البن ☕

ايدين

بتتلف

بالحريق

تلحس قعر قحف الجحيم

بالعطشه

و(القاني الملح)

في

المقتبل

ينسال

ولا حال ليهو حول

ينشال على كفنو البتول

ينزال

ولا امراً جلل

ايدين

بتتلف

بالحريق

تكتل صدر

وتفط صدر

تتمد للعون

منجنيق

تسندنا

للسهر العميق

تنجدنا

لكن للقبر

والموت ولا فض المحل

ايدين

بتتلف

بالحريق

تعرف

تريق

عينيها

متضحة

الطريق

مشت خطاها على الوحل

ايدين

بتتلف

بالحريق

تلحس

قعر

قحف الجحيم

بالعطشه

و(القاني الملح)

في المقتبل

اهي ذاتا جسدت الرجيم

(جنحين)( غرابا) (عك) تطوف

رفت حتوف

تنعق نعيق

اعلوو ( هو) بل ...

#يس_النضيف

Читать полностью…

ريحة البن ☕

أنظر لخارطةِ الدماءِ ترقَّعت
هتفَ المُوالي واستدارَ ضئيلا
الأرضُ ألقَت للسُيوفِ رِقابَها
والبحـرُ ينفُثُ كفـتيهِ رحيلا

وخطىَ بعيدٍ في المَهاجرِ سافرت
هل ظل في حُلمِ المُهاجرِ عيلا
أظلمتَ مشكاةً بناصيةِ الرؤى
فصرختَ من صرحِ الهوى تضليلا

وغـرستَ للأقدامِ رُمـحَ زُجـاجةٍ
مِصباحُ نورِكَ في الرواقِ عليلا
وغدَوتَ تُشعِلُ للإيابِ مواقداً
ماعادَ في ظلِ الرواحِ مَقيلا

فجرت كفوفُ التِيهِ تكتبُ مَدَّها
لكن دمـعَ الحـبرِ صـبَّ عليلا
يرتدَّ طـرفُكَ بالمـساءِ مُهـمهِماً
ومع النهارِ تناحـراً وصليلا

ماذا كسبتَ من احتضانِ تميمةٍ
بصَمَت بكـلِ عـنادِهـا تنكيلا
يكفيكَ كتفٌ مالَ من طولِ النوى
فغـداً ستُسألُكَ الكتوف طويلا

#ولو_بعد_حين
#محمد_المهندس

Читать полностью…

ريحة البن ☕

كفاية رحيح
ترِح لمتين وحقك في الوطن ترتاح
ترح لمتين وحقك راح
مسرف في البلود الهايمة بالأجناس
مكدسة بي حساب جايط
وما عرفنا الغلط والصاح
ترح لمتين ..

#محمد_المهندس

Читать полностью…

ريحة البن ☕

الحرب إبتلاء
والوجع ذاتو داء
الفقد مر عديل
كيف تحس بالرضا
البلاد دون أمان
الهبوب بمرضه
والبجوع في الوجع
عيشتو مابقرّضه
وكيف بنية الوطن
للغريب تعرضه 🤷

#اديبة_احمد

Читать полностью…

ريحة البن ☕

ذكريات كتلت طموحنا
أعلنت للروح نزوحنا
زادت الالآم جروحنا
ولسه نبكي 😭😭
ساجده في مصلايتي بشكي
وأبكي بكل قوة وأحكي
عن وجعنا 😭
عن حلم شفعنا بسودان يلمنا كان رجعنا
مش بواقي حروب وألغام ..
مش بواقي جروح وألآم ..
مش بواقي غزاة وإجرام ..
جد بهمني نلقى إسلام
نلقى جوانا السلام
ذكريات ؟؟
مافي ذكرى صداها أوجاع تندمل باللين تروح 💔
أي زول كان جوه بلدو وبره بلدو تراهو مجروح
نحنا صايمين بالوجع والحرقة من عدم الوضوح🤦‍♂️
مااافي زول يمرق يقول العيد سلام هل من يبوح ؟؟

#اديبة_احمد
#زعلانه_عليك_ياوطني

Читать полностью…

ريحة البن ☕

ماف أي كيمان في الحرب
ماف اي كوم غير الأسف
ماف أي حادب أو وطن
شايف غرابين في جِيَف

#محمد_الشيخ

Читать полностью…

ريحة البن ☕

لما قواك تخونك
وتتكالب سجونك
تضحك سن نديدك
لي آخر شجونك
وحلمك يتشرق
بتحس بالفرق

تتباعد أيادي
كانت في التبادي
موجة حنينة حالمة
بين سميع ورادي
بالأحلام بينادي
صوتو بيتسرق

وقت الناس تطمن
روح بالضيم تحنن
أعياها اشتباها
بين ترهيب وآمن
رغم سكوتو بيئن
بيتقسم العِرق

ويشاور مغني
في لحظة تمني
لي كورال مرتب
موصوم بالتجني
في مقطع تأني
دو ري مي ورِق

بتشوف كم مسافر
لملم حيلو غافر
للحجَرو انتماءو
في شنطة ودفاتر
وشعار حسو فاتر
مكتوب ذكرى تحرق

تتشلهت دروبك
وما تعرف غروبك
هل حلل صيامو
أم قاصد كروبك
تشعل نار حروبك
في أقصى الشرق

تبني تلال بعيدة
للضفة السعيدة
تبسم لها شيمة
بي أنياب عنيدة
وتجدد وعيدا
يتواني المرِق

ساعة غيمة تضرِب
بال مشتاق مهضرب
رفة عينو لاحت
بين قضبان ومضرب
في جو منطرب
ويساومو البرق

ولسة هناك مشاهد
لي مولود وشاهد
ولحظات أقسى وانسى
ما محتاجة شاهد
كم في اليم غرق
بتحس بالفرق

#محمد_المهندس
#بتحس_بالفرق

Читать полностью…

ريحة البن ☕

- فعايل صِبية في مجنون -
يناوشني الفراغ ؛
أحتج ..
أهش إبر الفراغ محزون
يناوشو الصِبية:(يامجنون)
أسب هذا الزمان الفج ..
ذاك العاري في جواي ،
نزّه الله من الوين ،
وأحرم في الشوارع حج ..
أدي قفاك أي طشاش ،
يجيك متهادي قد أبلج ..
حيل الكلمة حين كلَّ
خيل الفكرة قد أسرج ..
بلغ مجمع
وفار تنور
كان محتاج أوان لقيا ،
صبح لي كل أمان أحوج ..
نفخ زمني البلاك الصُور ..
بح َّالصور
مسك وازا
نفخ
-من فوهة الوازا-
طلع عصفور ..
تمخض عن ضلام ناضج ،
وانجب نور ..
تداعت كل رمزية ،
حمامة تكتل القمري ،
ويحلِّق سور ..
نزهد في الكلام الهش ،
نبدا نقزقز المحظور
وأفليك من كلام الغير ..
هل هدهد غياب حين غاب ،
كان كلم قبايل الطير ؟! ..
تفْرقي إنتي في الإيقاع
ألوم النوتة في التأخير ..
أحصّن فيك من القاع
ومن أيقونة التأطير ..
بعطش واحرس النقاع
عشان أفهم سياسة الزير ..
منو الغيري انكسر في خيرو
لما قدرتو قال لي خير ..
أنا الصادني الزمن بالتيه
بقول يا ريتني أبقى أخير ..
مُنية سمكة في سِنارة ،
ترجع شان توصي الصِير ..

#محمد_الشيخ

Читать полностью…

ريحة البن ☕

... أرح نتلاقى أمبارح ...

قبل أفقد معاك روحي ،
قبل يتقال كلام جارح ..

أرح نتلاقى أمبارح ...

أرح نتلاقى أمبارح ...
ونضحك زي زمان تاني ،
ويحسدنا الزمن فينا ..
وكت ينزل جليد الهم ،
كلامنا الكان بدفينا ..
حلفنا الدنيا مهما تجور ،
رصيد البينّا بِكفينا ..
لِبسنا كعوب عوالي فرح ،
وجا الزمن البحفِّينا ..
ويصير تمن الولف فادح ..

أرح نتلاقى أمبارح ...

تعالي بدون تجاعيدك ،
ملامح الوجعه خليها ..
تعالي بدون جروح نيه ،
ولُقيا تكب ملح فيها ..
جيبي معاك نحن زمان ،
وأغاني الطير يغنيها ..
جيبي معاك ليا قلب ،
بدون وجعات نقشتيها ..
إذا بنتلاقى أمبارح ؛
ما بتحتاجي تعتذري
فبالتالي انا مسامح ...

أرح نتلاقى أمبارح ،
دي بوصلة فاقده أي جهات ..
( أرح نتلاقى أمبارح ) ،
دي (ياريت) ردها ال( هيهات) ..
انا بقيت لما ساي أضحك ،
بتطلع في الضحك آهات ..

أرح نتلاقى امبارح ،
لو عندك جبيرة روح ..
جا الطوفان ملان خذلان ،
وما عندك سفينة نوح ..
كان القلب ليك جنة ،
وكان كل الثمر مسموح ..
بعد رجَّحتا بيك الكون ،
مشيتي قعدتي في المرجوح ..

أرح نتلاقى امبارح :
إذا بترجعي الشوكة
بدون مجروح / بدون جارح
وإذا بنتلاقى أمبارح
أنا مسامح

#محمد_الشيخ

Читать полностью…

ريحة البن ☕

بي أشواقي حس..بي نظراتو سلم..و بي بسماتو مس..يوم المغربية
حديثو حنين و همسة.. موسيقى إذا تكلم.. هواو لي قلبي مس..و شوقو كتير علي
ولو لاقيتو هسه..زي البان مقسم..بكون مشتاقلو لسه..و كلامي الفيو شوية
ولو القلب دس..غراماً لي ألّم..خفاهو علي تقسّى..وظاهر في عيني
........................................................................................
اللادن جسيمو .. الراقي المهندم..يرد الروح نسيمو.. خمائل موسمية
متين يا ربي ليمو..و من عزالي أسلم..و أعيش ديمة ف نعيمو..العيشة الهنية
ربي علي يديمو..يصد مرات و يرحم..أخير لي من جحيمو..لو ضاع من إيديّ
جديد ريدي و قديمو..غير عينيو تحرّم..عقد الدر بسيمو.. و القامة العليه
.................................................................................................
الوجنات وحاتن..مرة إذا تبسّم..في خديو حلاتن ..وفي ورودو الندية
فتاك جيدو فاتن..مرضي و ليّ بلسم..و عينيو من صفاتن..بتزيد الأسية
و مافيش حسن فاتن..قتلن قلبي بالهم..و بي سلاح المفاتن..و من غير أي دية
و عايشات هن حياتن..و كم عاشق بيحلم..جفا العينين ثباتن..و ساهر بي الأزية

#محمود_الجيلي

Читать полностью…

ريحة البن ☕

خلينا نحن القلت جاي ؛
وخاطرنا بي عشموا انكسر ...
عطشانه كباية العصير ؛
خاطر الملايات ما انجبر ...

#محمد_الشيخ

Читать полностью…

ريحة البن ☕

الحبيبة
المالو لو
جات
كان رجيتها
ولون احساسي
المزامير
الحبيبة
الفيني
منها ليها
حاجات
( يا رفيق )
ماااا تقولها
الشوق
والغياب
كيفنو
لي خير؟؟
مااااعرف
احساسها
اشتاق . .؟؟
ما بقت من
غيبتي بتغير ؟؟
ما غريبة
توالفا الروح
السميحة
الوالفا الطير
قبل كم يوم
مش لقيتا
اكتست ايامي
لون غير
والزمن
اهداني
افراح
وركو في
حجري
العصافير
اختشيت
ظااااااهر
عليا . . ؟؟
ولا ما
ظاااهر
في تغير . . ؟؟

#احمد_اابلال

Читать полностью…

ريحة البن ☕

مع ذكريات رمضان
غندنا زميل كان منتظر كرتونة حلو مر ورقاق تجيهو من الخرطوم ولكن اتفقدت وماوصلت والمرابيع تصور الحصل ............

يا التلب البجيب للحلة جملة المونة
نندهلك تعال في نكبة الصابونة
طنشتا وعميت وماك المقصر دونا
تاريك يا الاصم بتزازي لي كرتونة

قالو توصي زول زول لابد يجيك مخطوطة
قبال ما يفوت رمضان تكون مزبوطة
اللابري السمح مرصوص وفوقو الفوطة
اكياس الرقاق بي الجمبة ليك مربوطة

تسلم يا الاصم ست العيال مشكورة
عارفاك يا التلب موية السحور بتدورا
عاستا بي وداد ضاقت سموم وحرورا
عبتا بي مزاج ما خلت المدخورة

بعد ما اتحرك المرسال طلقتا خيالك
حضرتا السكاكر واللبن في بالك
تشيل الباقي منو يكون رفيق ترحالك
الحلو مر يفك عطش الحرور الجالك

ونستا المعاك كيف الرقاق وفوايدو
كيفن عطنو في اللبن القبيلك رايدو
وصيتن يكون سكر خيف ما يزايدو
من بدري السحور صحنو المكرب خايدو

قت لي صاحبك الليلة الدكاترة نكيدن
نعطن جردلين فوق تلاتة نزيدن
مغرزة بالرقاق في الونسة نطلق قيدن
الخبر الاكيد في دوكة ضامنين عيدن

ماركوني الحبيب حضر شعورو اتمنا
يحلم بي الرقاق الفي السحور بتنا
بنا احلامو يرتع في ضفاف الجنة
لا ضاق العصير لا بالسحور اتهنا

قال لي صاحبو نغنج بالوضع وندسو
نرتع فيهو زين اصحابنا ديك ما يحسو
ان يوم جونا مارين او علينا اتمسو
نبقي نضوقن كورية واحدة يجسو

التلفون ضرب قال استلمنا الليكا
خلاك بالفرح تعرض تهز بي ايديكا
ان كان بالمراد تطوي المسافات ديكا
تستلم المكرتن والسعادة تجيكا

كل ما ساعة تضرب وين وصلتو آ ناس
متعرفت تقول متلاهمك اب كباس
متين يوصل يجيك الفي الحرور اتعاس
مطبق بي عناية تقول ورق كراس

بعد وصل القضارف القعاد ما اتحالا
كان ليك المراد يتسرعو الرحالا
عينيك يا رفيق النشوة ديك فاضحالا
مشتهيا الرقاق زاد العطش اوحالا

قلتا الخطة باء ترجا في التفتيش
ان سألوك تقول كايس فرن لي عيش
الكرتونة عاد تستاهل البخشيش
بالحلو مر معبية والرقاق لا الطيش

هجرك صاحبك القال الصبر ممدود
اقبض فيهو واقعد والزمن محدود
بتجيك هسي داخلة والحبل معقود
والمخزن قريب بالطبلة باب مسدود

جات التاتشر البتفرزو بس بي صوتو
صاحبك قام مصنقر وتحتو ضاير بوتو
الامداد وصل يا ناس دحين ما تفوتو
يا ريت الشهر يادوبو ختو ثبوتو

وصلو وسلمو وكل البقج دلوها
فتسو جاي وجاي التندا ما خلوها
وين كرتونتو ديك البي السمح عبوها
حد ما كاسو زين في الحتة ما لاقوها

الله يكضب الشينة ان بقت ما جات
راجين فوق جمر من السبوع الفات
ان صح صح حقيقة والركب قامحات
الجيش تب بدرو والمقصر مات

اوعة تكون قبيل من الصباح بتدردر
تطلع في المعاك لي القوز وتبدا تسدر
عشيت الخلوق اللي السحور بتبدر
الجرح انفتق عاد تاني كيف بتخدر

يعوضك الله يا ماركوني ما رضيت ليكا
ساقوك بي الخلا خلوك تغسل ايديكا
وعدك با المطبق والرقاق يديكا
لي روحو الخزين ضاق المغايس ديكا

حردان ليهو يومين صاحبي كاره روحو
لا بحمل كلام لا زول يحوم في سوحو
بقي ينضم براهو وزاد اساهو ونوحو
كل ما يشوف طرد في الحتة يطرا جروحو

الارصاد قبيل في النشرة جاب اخبارا
قال شافوها طايرة مع السحاب بي غبارا
لمان جات قريب بي دقة عرفو قرارا
انها في الطريق لي دوكة تابعة مسارا

#الهمباتي_الاغبش

Читать полностью…
Subscribe to a channel