5285
الاسم :- سئلت ذات مرة ما سر ذاك الاسم؟ صرخت ِملأ صمتي المكبوت في دواخل الفنون إنه اسمها حروفه تطايرت تشكلت تألقت تعلقت بشخصي الضعيف فصار اسم شخص ما ... بداخلي. - ريحة البن .
يا بت بتهجِّي النوتات ،
وتتنهَّدي عادي موازير ...
يا النضْمِك حالي ، غِنيوات
وعيونِك ضاجة فوازير ...
يا رعشة وَقْعْ الآيات ،
و يا كف ترنيما مزامير ...
ما تَسْمَحِي للحوت الأزرق ،
يتحكَّم في معنى الكليشيه ،
وينصِّب روحو على المغنى ...
ما ترمي 'بحبَك' في المُطْلَق ؛
وفي خاطرِك إبَر الكروشيه !
هاك فصِّلي بستان للمَعنى ...
النجم الفي لونك رقرق ،
ومساهر علِّك ترشيه ؛
يلمع في عينك مُستثنى ...
لو نطفي إضاءات المسرح ،
ونولع انوار الجمهور ...
بلياتشو حيتعلّم يفرح ،
وحنشمِّت شماشة السور ...
نتخيّل : _آخر حي _أطرش ؛
ممسوح من رهبتو صوت الصور ...
الشاعر في قيدو بيرزح ،
وبيصقَع في جِرَرْ الصورة ...
أنا نملة بتبدولك تنزح ،
زي شايلة 'بحبِك' مجبورة ...
لكني وحاتك شان تفرح
عينيك ، أنا دافن مطمورة ...
اتخيلي أكتر زول بِطْرَب ،
هو البرقص ويبدولِك أشتر ...
وفي ناقد ترزي بيتدرّب ؛
في ايدو مقاسات الأشعَر ...
بشبهلي سدومي ف آي الرب ،
بي ضيوف الانبيا يستبشر ...
عينيك موش قلت عزيزة علي ؟!
وانا واعدِك دايما أبقى صريح ؟
لكن ما بعرف أهز الفََي ،
و لو حامل بي ألف مسيح ...
ما راجي الطبلة تترجم لي ،
أنا راضي برتبة : شاعر الرِيْح ...
الجاهل القال : ' الدفيق ني '
ما بفهم كودات السُكَّر ...
وانا بعشق طعم المعنى الحي ،
ما برجا يخمِّر شان يِسْكَر ..
ما ترضى قصيد البُدرة ي خَيْ ؛
ماف لِبَا في معجمو يتبستر ...
الرُطب المتمسِّكة بالعرجون ،
اختارت تحلا وبرضو تشيخ ...
أنا يومي بونِّس في مجنون ،
على كيفو بطرِّز في التاريخ ...
وصِّالِي ف تركتو صك معجون ؛
في قلبو مفصّل شَرع السيخ ...
يا مُلهِم _ بوصلة الزاجل ..
ومعلّم __شبكية المنشور ...
_يتغير إحداثي الحاصل ..
__وتتمايز أطياف النور ...
_الصوفي المطمورتو حواصل ..
__وقزاز بي دهشتو مَعْبُور ...
يا حوا و شاكتي ويا عشتار ؛
يا أول رعشات النوتة ...
شبّالِك بشّر دون أشتار ،
أزرع في كاسك بنوتة ...
يا أولى قبل حفظ الشطار ؛
و يا حافظة قصايدي المسكوتة ...
يا بت بتهجِّي النوتات ،
وتتنهَّدي عادي موازير ...
يا النضْمِك حالي ، غِنيوات
وعيونِك ضاجة فوازير ...
يا ومضة وَقْع الآيات ،
يا كف ترنيما مزامير ...
#محمد_الشيخ
. ما بِجْدِي لولاي العشم ،
وأنا قلبي مفطوم الفرح ...
طرِّي الأغاني اليابسة في حلقِك و أرح
مقفولة أبواب الحنين ،
لكن هدا السور اتفتح ...
حرد الكناري غنا القفص ،
لكنو يوم حلَّق صدح ...
ما كنتي بتدلِّي الدهب ،
لو ما هشابِك انجرح ...
طرِّي الأغاني اليابسة في حلقِك و أرح
الدنيا 'هسي' ،
' قِبيل ' دي ماف ،
والبُكرة ما بعنيك كتير...
الاتولَد ناسي الجناح ،
موش حقوا يوم يِعرِف ؛
يطير ؟!
وانا لو بوصيك بالجمال،
ما بيعني ما بعرف أغير ...
لكن عشان لوم النحل،
نحمي البتلات العبير ؟!
عينيك طلسم ما اتشرح...
طرِّي الأغاني اليابسة في حلقِك و أرح
أنا هسي زول حافظ الضياع،
ده حرمني من متعة أروح ...
تلقيني في بحر المتون،
زاهد جُزُر كل الشروح...
يلاك نسريل ما اتضح،
وارح نشرِّح في الوضوح ...
المعنى مرات بيتلمس ،
وكتير بنحرقوا شان يفوح ...
ندينا مننا هسي بس ،
وماف زول يلوم نورس نزح ...
طرِّي الأغاني اليابسة في حلقِك و أرح
#محمد_الشيخ
(يادروب)
يادروب لي وين تودي
خطوة الزول المسالم
قصة الوجعة البتكبر
ما بايدو والله عالم
والظروف مافيها تالت
اما مظلوم وللا ظالم؟
****
ياهو حالك ..ياحقيقة
الشمس من عينو شالت
باكر احلامو وبريقا
والورود الكان بتضحك
للفراش ..نزفت رحيقا
وساقية الهم الملازمو
مابتهدى ولا دقيقة
ولسه ساير
في متاهات المصاير
يمسح القسا بالقساوة
ويطفى حرقتو بالحريقة
*
بكره يرجع
ايوه لازم بكره يرجع
بكره يصدح بالامانى
والقلوب الصما تسمع
صوت مواوليو وحكايتو
من بدايتو ولنهايتو
وتبقى ساحة خيرو مرتع
للوليدات البغنو
والبنيات البهنو
تانى يرجع حسن ظنو
والطيور في غصنو تسجع
(شقوري)
أنا كنت أسرَجْ خيل ؛
ممتن لأنو كبا ...
يا غيبة آن الليل ،
شتت قميصا نبا ...
ما تطففيني الكيل ،
لو قالو فيك صبا ...
بحة كلام الشط ،
يا غيمة في العقبة ...
انا خاطري فيك رحط ،
يا رقصة بالرقبة ...
الهدهد الزارك ،
ما جابو عرش سبا ...
أنا يا بحر دارك ،
يا عنبة الهضبة ...
أنا في الوِّدَي جارك ،
لونك اديس ابابا ...
_يا مهجتي ونوري_
فراش في نوارك :
ميسم وجد سببا ...
_يا طائر الدوري_
العيش في منقارك ؛
والصدقة قالو ربا ...
_إمالة الدوري_
ما مِلت من نيرك ،
إن لم أمِلْ طربا ...
#محمد_الشيخ
يافاتح الأرواح ،
الضلفه في الضلفه ..
توب الحبيبه شَفون ،
توب القلب خَفه ..
هل قُبْله ذات جبين ،
بترجح الكفه ؟!
...
يا واهب العصفور ،
اوركسترا الألحان ..
يا مُلهم الطمبور ،
مكامن التِحنان ..
انا قلبي أحرم ريد ،
بس راجي (حان الآن) ..
...
رب الجمال والبوح ،
البسمه والنونات ..
الكون كتاب مفتوح ،
وعيوني في الصفحات ..
غمضتا هاك الروح ،
طوِّفبِي في عرفات ..
...
يا الله هاج الموج ،
عبدك أسير لُجه ..
بين الحضيض والأوج ،
بس قلبي أُتْرُجَه ..
هاك الحواس فد فوج ،
كون حَجي والحُجه ..
...
لو الجسد نمرود ،
انا قلبي جاكا مسيح ..
هذا الحشا المهرود ،
استهلكوا التجريح ..
توب الحيا المقدود ،
يا ربي ردوا نصيح ..
...
ياباري يا عارف ،
هاذي الضلوع ناقصات..
هذا الوجيب كاشف ،
هاذي العيون راقصات ..
دام القلب راشف ،
هل الفرح بنصات ؟!
...
يا خالق الطائوس ،
الريشه والتلوين ..
يافاتح القاموس ،
ومحرِّش التدوين ..
يامرسل الناموس ،
ألهِم فؤادي الدين ..
...
مِن اتولَد واتحَمْ ،
إصفّرَّت الصَفَقه ..
لو الزمن تَم تَم ،
وانجمعت الوَرَقه ..
تِم الذي ما تَم ،
عاملني بالشَفَقَه ..
...
رمضان كريم يعود خيرات
#محمد_الشيخ
اصلو رمضان شهر عافية
عافية بتعالج النفوس
فيه راحة بال و تقوي
خاصة في كل الطقوس
لمة الناس في الضرا
تطرح الوجه العبوس
جيتنا شايل جك عصيرك
قبلو شايل حب كبير
العصيدة مع ملاحها
و الوقار الفي الضمير
اصلو رمضان كلو رحمة
شهر فيه الخير كتير
التلاوة في نص نهارو
و القيام في الليل سعادة
التراحم و التألف
دينا قال هم العبادة
ربي ثبتو في قلوبنا
ديمة عندنا تبقي عادة
#عاطف_شمبات
كُتِبَ الصيامُ لأجلِنا
واللهُ ألطفُ بالعباد
الصبرُ في إبحَارِنا
أجرٌ اذا نفدَ المِداد
نحنوُ لهُ . . بحُنُوِه
مرحى به فالوعدُ عاد
وتسابقت ارواحنا
سرجٌ على ظهرِ الجياد
عند الموائدِ دعوةٌ
صعدت بإلحاحِ الرجاء
أقمِ الصلاةَ ولُذ بهِ
شهرٌ من الرحمنِ جاء
يا باغيَ الخيراتِ أقبل
بابُهُ .. نحوَ السماء
اقرأ ورتل .. وارتقِ
رمضانُ للساعي وعاء
#محمد_المهندس
هووووووي
ارحكن ...
الشمس دارت وشيها
إتحسبنن من التشِنِّف والنجيهة
و امرقن للناس قدحكن
الليلة كان يوم حااااااار علينا
الله يقسم لينا أجرو
و لطفو بالمرحوم بندعي
و ها الهجيرة إن شاءاللَّه يبرد فيها قبرو
البتاكلن .....
والبتدعن.....
والبتحكن
إن شاءاللَّه نتلم في فرحكن ...
اصلها بتدي وبتاخد
و القدر ما منو مهرب
يوم بتصبح عامرة عمرة
ويوم بتخرب
الجعان ادنو ياكل
والعِطش ادنو يشرب
صدقة لي روح الغوالي الفاتو وفراقم جرحكن ...
ارحكن.....
#الرحاميد_او_الرحمتات
رمضان كريم عليكم و ربنا يتقبل الصيام و القيام 💜
#نهي_الكباشي
يا يمه هووووووي
رمضان كريم
…
اشتقت لي ناسك
احساسهم احساسك
بتخاطفو الضيفان
اهلا تعال بي جاي
حرم تعال بي جاي
ما بسددو البيبان
في عيون يتيم بكااااااااي
واهه ا يمه
من شوقك الشواي
بركه النسيتيها
نار منقدك جواي
بتذكرك يمه ..
يلاك نشربو شاي
شايا مدنكل حااااار
زي التقول مو شاي…
☕ #ابراهيم_جابر
ريحة البن ☕:
شهر الرحمة جانا
حباب رمضان حبابو
كتر ربي خيرو
سعيد آل الله جابو
لمتنا الحنينة
بى اكلو و شرابو
العيلة و اهلنا
الحاضرين و اللى غابوا
مرة فطورنا برة
فاتحين حوشنا بابو
و مرات بالمحبة
اخوى عازم صحابو
سودان الكرم
الجود قاعد يهابو
#عاطف_شمبات
🌛
نسوان فريقنا مع العواسة و طرقة الآبري.. و كم جردل رقاق.. و الشفع يسرقو من كراتينن.. و يجروا على الزقاق.. رمضان كريم يا يمة هوي رمضان كريم يا نعمتي.. رمضان كريم ليكم و لي كل الرفاق.
#ريحة_البن
#رمضان٢٠٢٣
وهي الامومه دي
حاجه هينه ??!!
انا امي بتشوف
هي قاطعاني
من اكتر حته فيها لينه
و من شدة ما حنييينه
لو مرة حسيت بالالم
بتجيها كل اعراض عياي
ودي واحدة من كم المشاعر
او قول دي عينه
☕ #عاطف_شمبات 🍃
يامرحبا
واجمل نبأ
سنه حلوة ياست الكرام
من شبه في حضنه وربا
قال : ( الف وميم )
ست الحريم
من ثم ينطق ( الف وبا )
يا امي ست نمي بتضيق
كلمات غنيا البكتبا
ياخ اعفي ليا واعفي ليك
علي كل ثانيه بنتعبه
انا وانتي في احضان بعض
بسمه وموده وتبتبه
كان الله خلاني وحيت
وعمال كل البعجبه
كان الله برضي علي وافوز
بي جنه ماف من يحجبه
يا امي يا اقرب طرق
للجنه الا من ابا
يامرحبا
واجمل نبأ
سنه حلوة ياست الكرام
من شبه في حضنه وربا
قال :( الف وميم )
ست الحريم
من ثم ينطق الف وبا
☕ #احمد_البلال 🍃
يا يمه هووووووي
حدي اتلحلق ..
قبال رويحتي تحصلك!
يا يمه هوووووي بحري انحرق
قبال يجيك وينهلك ..!
عطشان قليبي ومرتبك
والغربة مصت دمي جت
ما عندي مقدار انزفك
يا عذبة يااااموية المطور
وين الرهيد البشبهك!؟
#ابراهيم_جابر
حظك كدا..!
حزنك
ولا بشيلو الفضا
جرحك
زمان فات المدى
يا قلبي
في الريد ضيعوك
معليش خلاص..
حظك كدا.. !
حظك تريد..
ما تلقى ريد
قدرك تفرهد
تبقي عيد
وتجي المآتم مادا إيد
تجرح غناك الابتدا
حظك كدا..!
حظك تكون
قطر الندى..
لي زهره حلوه مفرهده
تسقيها كاسات الحنين
يا ريت حنينك يسعده
حظك كدا..!
حظك تكون زي الربيع
تدي الورود
احساس بديع..
عمرك سنينو محدده..
حظك كدا..!
ما تجيبا لي
سيرة الهوى
جرحوك
وما لقيت الدوا
انا وانت
مهزومين سوا
وافراحنا ديك..
راحت سدى..
حظك كدا..!
#ابراهيم_جابر
ربِّت على كَتِفٍ
ينوحُ خَصاصةً
بين المدامعِ بالسمَاحةِ يُؤثرُكْ
واهمِس بِحُبِكَ
فالحياةُ قصيرةٌ
ريحُ العزيزِ من البعيدِ ستُبصِرُكْ
كم غائباً تشتاقُ
بعضَ حضورَهُ
والشوقُ للارواحِ دمعاً يُمطِرُكْ
كانوا بقُربِكَ
حاضرينَ تسامرو
واليومَ ساروا لا قريباً يحضُرُكْ
#كذلك_الخروج
#محمد_المهندس
#تذكار_ومكان
الموج الطال ماشيبك وين
مركب ايامك صبرو ضنين
شايلاكا غباشة تعافر ساي
قالولنا زمان جبد لا تلين
شان باكر مد للقيفي شراع
يلقوكا بطان الفال تامين
والايد الواحدي تصفق كيف
ايديك بي حلمك متماسكين
الرايدك صح ما بيمشي يفوت
يبنيلك بيت من ريد وحنين
والجايات اكتر خلي الفات
السابك خير والجاي خيرين
كان فيها رجاك ما كان الطير
خلاها وفات والعين في العين
الليل مشوارو معانا طويل
والهم الفيك هدانا وزاد بالحيل
عكازنا على الايام صابرين
يا درب الهم كم صبر جميل
ما الدنيا اساسا محطة وزاد
بين كفة وكفة حضور ورحيل
بنعاند الفينا نوادع الفات
ونقالد الجاي نفردلو ضليل
والخطوة تشيلنا على الحبان
ويبتق فال نمشيبو دليل
تنجم كيفن والواطة سراب
تمر الافراح حردان الشيل
بتكاوي هواك بي حس مخنوق
طمبارك صفق ونادى النيل
مي ياكا زمان القلت غناك
الدوكي صباح والكاويق ليل
غنوكا كتير والبال محنان
محموم ريدك ساهي وسهران
اليوم ان فات حنلحقو كيف
والعمر ايام انكتبو زمان
اسمع وان كان القول بكاك
لي الليلي هداك حملك غرقان
اتنفض قوم ماتربي محن
باكر بتلولي شقا واحزان
تاوقلك ريد اتشمر و تِب
عندك في الروح تذكار ومكان.
#محمد_المهندس
.
الليل جنَّ والليل ذو مزايا عديدة
فيهو الطيف بزور ، والروح تلاقي نديدا
الحالة العلي خليها ماها جديدة
أها اتسحرتي برقاق أم شربتي مديدة ؟!
#عزام_عبدالعاطي
ادعوا لي معاكم
بالهدى والصلاح
حق العُشرة بينا
والمِلح المُلاح
دسوني في دعاكم
بالحب المُباح
بي جاه الحبيب
كل ما فجر لاح
في جوف الضلام
ومسك سُكونو فاح
ادعوا لي معاكم
بالستر العفاف
دعوات من قلوبكم
لي يوم الوقاف
يوم الناس عرايا
والكل في إصطفاف
راجين الحساب
والكل ريقو جاف
من مثقال ذرة
نبقي من الخُفاف
#عاطف_شمبات
ريحة الحلو مر
دقت بيبان الروح حامت
وانشرت في كل مكان
واتبسم خاطر شوقنا الليك
بيتشابي وراجيك زمان
مرحب طليت مرحب يالجيت
اهلا بهلالك يارمضان
فرشات ممدوده علي الشارع
والجوطة القبال الاذان
وامونة تمد لي سلمي قدح
تقلية عصيدتا بوخا يلف
الزاد بالزاد والبسمة ولف
ورجال شايلين الزاد للغير
عطاية ايديهم للعدمان
فك ريقك هاك بلحة وموية
علي قدر قساوة الدنيا حنان
اهلا رمضان
ياهو ده السودان
بي بيوتو وناسو بينتظروك
اولاد الكورة الفي الميدان
صاموك وصلوك وقاموك
وبعد ماتمو طقوس الروح
اتوهطو واتسامرو شله
اذان الفجرية بحومو
ويسحرو كل ناس الحلة
والناس تتخيل من ريدهم عيلة واخوان
كيف مترابطة قلوب الجيران
رمضان دايما ليو طعمو الخاص
رمضان اجمل لو في السودان
#ريم_الرفاعي
#رمضان_كريم
الله أكرم .. هل ترى
أهلاً به "رمضان كريم"
شهرٌ أرقَ من الصَبا
رَوحٌ ورَيحانٌ مقيم
الخيرُ خيلٌ سابقٌ
والجودُ خيالٌ هميم
أبشر به من مَقدمٍ
لقياهُ في الدنيا نعيم
كُتِبَ الصيامُ لأجلِنا
واللهُ ألطفُ بالعباد
الصبرُ في إبحَارِنا
أجرٌ اذا نفدَ المِداد
نحنوُ لهُ . . بحُنُوِه
مرحى به فالوعدُ عاد
وتسابقت ارواحنا
سرجٌ على ظهرِ الجياد
عند الموائدِ دعوةٌ
صعدت بإلحاحِ الرجاء
أقمِ الصلاةَ ولُذ بهِ
شهرٌ من الرحمنِ جاء
يا باغيَ الخيراتِ أقبل
بابُهُ .. نحوَ السماء
اقرأ ورتل .. وارتقِ
رمضانُ للساعي وعاء
كل عام وأنتم طيبين وتصومو وتفطرو على خير
#محمد_المهندس
رمضان كريم على كل زول
واللمة في برش الفطور
وصدى التراويح في العقول
والناس بتتباشر فرح
لمو المواعين والطبول
والسهرة لي وش الصباح
مختومة بي قومو السحور ❤️
#اسلام_النحاس
هلا هلالو بشري ونور الاكوان
واهلا بي قدومك يا شهر رمضان
فيك الجنة تفتح و تغلق النيران
ومرحبتين حبابك جيت بلاكيزان
#نزار_سراج
رمضان كريم
وتصمو وتفطرو علي خير
لفة الطرقة
بي تحِل عندي مليون
الف فرقة
لمّ خوتنا الحميمة
للظروف تبقالنا درقة
ايدي في ايدك نصوم
شهر رمضان فيو محبة
قادرة تمسح سيل هموم
من جبين ضنك الحياة
تبرد الحر والسموم
جانا رمضان شاري خيرو
في تفاصيلنا الرحيمة
هاكِ آبري معاو رُقاق
عادة عندنا جد قديمة
ناولو بُن قول ليهو ساي
مرة جيب جك العصير
و ناولو سيرمس فيهو شاي
بُكرة ح يجيب ليك فطير
لمة الناس في الشوارع
للسابلة مقطوع الطريق
اللي فكر فيها بارع
حظو من فكالو ريق
جوة سودانا النريدو
قيمة عالية من المحنة
يلا نرسل في بريدو
نحن دار نبنيك جنة
#عاطف_شمبات
#
اثنان ...
اعشق فيهما حب التفاني
والتصبرَ في المحن
اثنان ...
يحتملان نزواتي وعثراتي
اذا تاهت خطاي عن الطريق
تخبطتَ خوفا وظن
اثنان ...
اذ ما جئت اشطار انتظاراً
واشتياقاتي تئن
كانا دثاري من أعاصير الأسي
من كل ماشاب الهدوء
من امتحانات الزمن
اثنان ...
في عيني وفي قلبي هويً
اثنانِ
بين جوانحي
مادامت الروح ارتهاناً في البدن
اثنان ...
.
.
.
امي . . . والوطن
☕ #محمد_المهندس 🍃
قمرين في عيونك يا يمه
كايسين شقيش مدسي سماي
وسماي العجمي الما بتسمي
يوت مسجون في فضا نساي
وفضايا غناي لو بتلمه
انا كت لميتو وراك دوباي
وكت حلفتو عليك الذمه
مما توصل لي عند يمه
ارجوك قوليها وليدك جاي
☕ #ابراهيم_جابر 🍃
انا ماشة واتقل من امي
الناهزة دموعنا وباريانا
انا ماشة وقابضة فإيدي الشوق
والغنا محموم من يوم جانا
تاوقت على الشارع بالليل
لو فضل للاحلام خانة
ولقيت الليل مليان بكيات
والواطة بغيبتك مليانة ...
حزنت قدر مافيني حكي
ورجعت بطنطن وزعلانة
يا ساتر من وجعا باكر
حيكون واقعنا واحلامنا
☕ #غدير_شيخنا 🍃
لكي تتخيّـلي حربي .
ضعي كفّيكِ في قلبي
اخيراً، أستطيع أن أضع بين يديكم ديواني الشعري الأول - إذا انتبهتْ عيونكِ لي -
و أحب أن يلامس قلوبكم قبل أياديكم
و أن تنتبهوا للحب و الحياة.
يوم الجمعة ١٧ مارس ، ٦:٣٠ مساء
في مكتبة نيرفانا
أنا بانتظاركم .
مؤسسة نيرفانا الثقافية
مشتاقة للحلة ولأمي وأخويا
ولريحة أبوي وقت أندهلو يابا
ولمن روحوا فاتت من الوجعة مُتنا
خلا وراهو طيبة في أمي وتيابه
سلّحنا بالقوة وأدانا المروءة
ودرّبنا من جوه كيف نفدي الغلابة
ورانا الخلاوي بالقرأن تداوي
من فجع المصائب والمر والخرابة
زاد لينا إيمانا وريحنا في بالنا
وغَذّانا بديّنا وبحب الصحابة
ورانا دوا روحنا يوم توجع جروحنا
كيفن نفدي روحنا بالصلاة والرقابة
نتلاقى في جَنّة يا أبوي صبري جَنَّ
الروح فاقده روحك وموجوعة بغيابة
والغربة في جروحنا بتإن جوووه روحنا
تشتاق للبموتوا وللعايشين كئَآبة
ولحِس المباني ولصوتنا الجواني
الدائما بعاني في الدنيا وصعابة
والغربة بتحسك وتتحكم في حسك
زي جان خوف يمسّك وتحس بغرابة
#اديبة_احمد