5285
الاسم :- سئلت ذات مرة ما سر ذاك الاسم؟ صرخت ِملأ صمتي المكبوت في دواخل الفنون إنه اسمها حروفه تطايرت تشكلت تألقت تعلقت بشخصي الضعيف فصار اسم شخص ما ... بداخلي. - ريحة البن .
كُتْ نايم في أوحش صحرا ،
كان رملة دقاقة ومقهورة ...
أها فجأة غمامتين اتلاقن ؛
شبالن أنجب عصفورة ...
والروح عد تشهق من همسك ،
يا وحيك يا أول سورة ...
لكن الحدس الفي الميزان ،
بكتب أبياتك مكسورة ...
وانا بفهم تمتمة الألوان ،
أنا أزهد من أشرح صورة ...
أنا شايف صدقك في الضحكات ،
وانا لامح خوفك معبورة ...
في كل خلية بفور تنور ،
ما تسطحي نار في تنورة ...
لو داخلة مزاد بي أيامك ،
أنا كاتب ر و ح في فاتورة ...
وانا رافع رفقاً وكلي جروح ،
موش كُنْتَ توصي القارورة ؟!
بتغيري في عرف الكمون ،
العين الباصرة ومبصورة ...
وانا عندك خاطر لو بيمون ،
انا روح في توبك مصرورة ...
#محمد_الشيخ
كل عام وخطوات الفرح للروح تسوق
والدنيا بجاه الملوك تحلا وتروق
ويسوقنا طوفان الحنين يرفعنا فووق
نسكر مع الروح والحروف لمن نفوق 💚💚
#اديبة_احمد
#كل_عام_والسمح_يبرانا 💚
اليوم جئنا نستعيرُ القول حين القول جاء
رفقاً بِهِنَّ فإنهن شقائقٌ تهبُ الصفاء
اليوم نُفردُ كلَ أجنحة الصباحاتِ البهيةِ والمساء
لنُذيع بين الناسِ جهراً أننا نزهو بهِنَّ
بِفضلِهنَّ بِكُلِ مايحملنَّ من فيض النقاء
ونَخُطُ حرفاً صادقاً (بالحُبِ نحترمُ النساء).
#محمد_المهندس
ساعة الواجبة ما سرحن مع واتسابن
وبخت الصابحن في يومو وإتمسابن
ما تركن قديمن ولا قديمن سابن
وما بتشلعن وسط البعرفو حسابن
#ودمسيخ
سيداتي آنساتي مُلهماتي
ساقياتِ الوجدِ في شعري
إذا تاهَ السقاةُ بقافلاتي
راسماتِ الحسنِ في كأسِ
التدلُلِ والتمنُعِ ساحراتي
كلَ غارسةٍ بقلبي
نبتَ عشقٍ للسماحةٍ والأناقةِ
كلَ من نسجت لروحي
بيتَ شعرٍ من صفاتي
الحبيبةُ لو تثنَّت راوغتني
والقريبةُ لو تأنت روعَّتني
جئتُ أستهدي بنبضي واشتياقي
ضلَّ عن دربي هُداتي
سيداتي آنساتي أمهاتي
بلسمُ الحزنِ المسافرِ
ظلُ هجري لو تمادى إنفلاتي
قُبلةُ عندَ الجبينِ
ومسحةُ التعبِ الغريبِ
ودعوةٌ تهبُ النجاةَ لرفرفاتي
حينما نثرَت أماناً
في كفوفِ الصدقِ
أروت همهماتي
حينما همست لِفجري
غرَّدت أطيافُ رزقي
في وشاحٍ رافلاتِ
حُضنُها حِصني وأمني
كلما ضاقت دروبي طمأنتني
هدأتني هدهدتني
رغمَ عمري .. عندها
أنسابُ جزءً من نواةٍ
سيداتي آنساتي نورَ ذاتي
كلَ شكري وامتناني للتصبرِ
واحتمالِ الصمتِ لو بخِلت لُغاتي
أو تمردتِ المشاعرُ
واستدارَ الليلُ في طيشٍ
ولم يدرك هباتي
للتي أرقت ورقَّت
ثم نوَّنتِ الأماني
حينما ضنَّ النُحاةُ بموسِراتِ
فاستندتُ بصبرِ أمي
صدقَ أختي قلب بنتي
رائداتُ الحبِ فينا
عاملاتٍ عالماتٍ طيباتٍ صابراتِ
كلَ من أضفينَ حباً في حياتي
هنَّ في الدنيا حياتي
سيداتي آنساتي
#محمد_المهندس
#سيداتي_آنساتي
ماذا يخيفكَ؟
- أن أرى قلبي يخافْ
أن أعود إليك في روحي اختلافْ
أن أضمّكِ بالمسافة و الحَوَافْ
أن أصيبكِ بالتعوّد و الجفافْ
أن تخافي أن تناديني، أخافْ
.
#محمد_عبدالقادر
أديني نُص بالِك ،
او رُبعِك الخالي ...
وأنا غيمة ببقالِك ،
أو تِلتِك ال حالي ...
و أنا ما بقول مالِك ،
و ردك يكون مالي؟!
أنا في المدين مالِك ،
أو غارك أوحالي ...
وانا ما رجيت فالِك ،
يا بالك الغالي ...
في التوهة عقبالِك ،
في الروقة عُقبالي ...
أنا متا قبالِك ،
هاك عيشي قُبالي ...
في ضِحكك أطفالِك ،
في حزني أطفالي ...
في ليلِك الحالِك ،
ونسة مُشاط حالي ...
أها انتي كيف حالِك؟!
#محمد_الشيخ
تعرف يا الحبيب شكلك ما غريب
تشبه لي واحد من الروح قريب
بين اخدر واسمر جوهر قلبو مظهر
بالتحنان معطر عَرقو وعِرقو طيب
خاتي ملامحو غيمة للشقا والعزيمة
بالحس الموالف للنبرة الحميمة
والضحكة البتمسح آثار الهزيمة
عاكس نور صباحو في شفق المغيب
راقي حنين مهذب بالأشواق معذب
رويان بالتسامح ونهر أيامو وأعذب
أصدق لو تصدَق ما خاصم وكذب
ومهما تعاندو فجة رضيان بالنصيب
حاجبو جناج مهابة للصَبا والصلابة
اخر مرة شفتو وطلتو في شبابا
اطلق دقنو سابا كان سكسوكة دابا
بي شيبة البخاتة شاب يا بختو بالشيب
كان بيحب حبيبتو بي هرمون مغاير
مرة ضجيجو غافر ومرة سكونو غاير
سهمو الردّ صيدو راح جواهو غاير
يا تلك المشاعر .. اكسيتوسين عجيب
في مشوارو عافر كم باب واشتغل
وكل حلِم يميّل يسندو بالامل
ولما طموحو عتر شاف فيزة عمل
مرجيحة سنينو بتودي وتجيب
شنطة سفرو تحلف لوحة مستفة
تاجوج والمحلق وشرايط مصطفى
تفسير الجلالين وسبحة مولفة
شال أبيض مطرز وخرزة مغلفة
دلاية هشاب وجزلان بني في الجيب
وادعنا وسلامو سارقاو غصة تشرق
ضمة ولمة لما عبرة امو تخنق
بي دعوة ابوهو راجي صباحو يشرق
بكرة تجينا طيب والايام تطيب
اصحابو المعاهو لي آخر الحدود
الصحفي المثابر لقى في القيد قيود
الدكتور وصابر منتظر الوعود
العامل وعامل راجي الخير يعود
وكل واحد بناتل في الزمن العصيب
كان في الشدة بيهم في الحارة ونفيرا
لما تصب ونغرق في اللمات وخيرا
لمن كتفة تتهد بيرفع كتفة غيرا
ولمن جارتو تمرق بيغض طرفو غيرة
وتحييهو روحا بي احساس رحيب
كان شاعر بغيرو يكتب في القضية
ويدندن حنينو للهوى والهوية
سلمية بتسالم احلامو الفتية
احساس من سماحتو فاتح للشهية
وكل اشارة تهتف يبتسم اللبيب
مرة سمعت انو فاز بحثو بجدارة
سوداني ومميز بي اعظم حضارة
اخرو بس دقايق تجديد السفارة
ونال الجايزة غيرو في اخر اشارة
خطوات في حياتو تتلافى وتصيب
نبض النيل هدوءو هادر ومستكين
فارد روحو ضفة يمكن تستبين
سميع لما يطرب بالشوق والحنين
وكابلي ينادي ليه يا قمر دورين
تخضر المسافة ويبتسم الحبيب
باكر يدق قلوبنا ونفتح بي محنة
نلقاه فينا اشرق ويلقى براحنا جنة
تعود لي امو روحا وتخت في ايدو حنة
يقالد ريحة ابوهو والوطن الأحنَ
وانت بكل ملامحك شكلك ما غريب
#محمد_المهندس
#شكلك_ما_غريب
كل شهيد حيات حروفو ..
وكل شهيد باسم وشي...
مالو كل كاكي بنشوفو!؟
خلفو صياد بنتشي
عبي في الرصاصة صوتو
قرب الموت يختشي
موت بعزِّل بالوسامة ،
مالو أي شهيد وسيم !
مالو بشبه لي حمامة ،
شايلة في الكمامة نيم ...
موش ده كان رمز السلامة ؟!
مالو هسي الموت لئيم ...
نحن ياما صبرنا ياما ،
ربي لطفك يا رحيم ...
#محمد_الشيخ
اه يا بلد
أحد .. أحد
اقسمنا بي هذى البلد
نرويها بالريد الحلال
نصحي لو نام السقد
ماشين علي سكة بلال
صابرين علي ديش الضلال
والفازو في غزوة أحد
،،
الفي عروقنا .. سبب مروقنا
ما خفنا من زول .. وشو شبرين
نضاف و سمحين .. الله فوقنا
عباسيه .. اااااا وين .. نحن صامدين للأبد
..
الزغاريد التسوقنا .. تصحي شوقنا
في تمام الساعه واحدة ..لي متاريسنا ودروقنا
وقلنا لليل .. يلا يا ليل
مانا خايفين .. أرفع البوت من شروقنا
الله فوقنا ..
قلنا للموت .. يلا يا موت
سوا قادرين ..
نرجع الصوت لي حلوقنا
ونغني ليك اه يااااااابلد
#ابراهيم_جابر
قالت بيكتلك الأجل ؛
قت ليها _وانتي الصادقة_
بيقتلك الأمل ...
الدرب النهايتو بدايتو ؛
و الشوك والوحل ...
في الدنيا اتفطمنا سعادة ؛
نرضع في الوجل ...
لو فرح إتضح غازلنا ؛
نضحك بي خجل ...
كتلتنا الأماني العذبة ؛
والسير في المحل ...
#محمد_الشيخ
اب قنفة البفج سهل الوِدّي بي ضراعو
راكزة كراعو في الختة وعديلة طباعو
علي الما قالو فرّش توب غرامنا وباعو
عازمين قجـة السفر المـنافي أوضاعو
#الهمباتي_الاغبش
نناجي أشواقنا طول الليل..
عساها تزورنا فجرية..
مع الخيط البضوّي الكون..
تغرّد فيهو قُمرية..
تزيد البهجة جوّانا..
مع النسمة الصباحية..
نشّر آمالنا فوق الخيط..
عساها تضوّي حريّة..
نغنّي الريدة للسودان..
تبشّر فينا جودية..
و يزهر فينا قول الخير..
نحلّق فوق مسيّرية..
و نغشى أهلنا كردافة..
نفج الدارة صقرية..
و نقارةً تشق الليل..
بي دلوكة جعلية..
نردّد في غُناك حُمّيد..
معاها الصفقة دُغريّة..
يلم سودانا تُقّابة..
و ذكر الله.. و حي الله..
في حلقاتنا عصرية..
نلف العِمة فوق الشال..
و نلبس أيّ طاقيّة..
دام منسوجة بالإلفة
و دام الريدة صوفيّة
#نهزم_الإحباط
#المشروع_الثقافي_السوداني
#العنصرية
#كلناواحد
#مهند_حيدر
ام خشيمن حليب... ابقى ليكي عونكليب
يا الوارده الحفير... ببقى ليكي الدريب
بريدك حار انا والله شقيش فريقكي اتدلا
شق الحفيره القامت.. مناك قويز الرمله
قوليا يا بتضمي... اتي الخدار والالمي
عطشان قليبي ودمي.. من ريدكي ما بتخلا
يا رملة القيزان... في زول طبيقا حصان
شق الدروب روح... شوفنا كن زعلان
خبارو ما قبل... البيهو بتسبل
بي ناري بتبلبل... كن شفت جاي بي هان
هوي يا الضعينه السايره... ما شفتو زولتي النايره
هاكو اقرو اسيمها... فوق جروحي الغايره
الصيده قلبي بريدتا... شالت قليبي في ايدتا
خلوها ليا وحيدتا... تسوي فوقي الدايره
قبيل وردتا الدونكي... قبلت بوشي ابنبكي
الشوقا قطع قلبي... وفراقا زي السونكي
هرد كبيدتي كتلني... يا تومي هووي افزعني
من الدموع اقرعني... وانا بحكي ليك وبنشكي
#ابراهيم_جابر
عندك أختك؟ ياخي بختك
ختة . . في روحا بتختك
فلة في بستان زمانا
بتكرم الندى خانة خانة
وحسها المازج حنانا
احلى من سكر كنانة
بر أمان لو ضاق براحك
تشفي بالإيمان جراحك
وكلما يغيب انشراحك
باليقين تطلق سراحك
في . . الملمات المهمة
بترشدك بي رأي وهمة
وتزهو بيك خُلال وعِمة
وتاني بختك بيها عمة
حرة منقوش توب نباتا
بيكتب التاريخ صفاتا
تبقى ترهاقا لحياتا
وتبقى ليك شاخيتي ذاتا
حافظة سرك بير غريقة
وداعمة جيشك بالحقيقة
وظابطة بُنك في دقيقة
وفوق دا كلو معاك صديقة
عندك أختك؟ أحمد الله
الهلال . . بي نورا هلّ
وبخر الأحلام وصلى
وجر سبحتو هلا هلا
صوتها تُم تُم زاد محنة
وقالدك خُلخال وحنة
تمشي بيك نيلين وجنة
وترسمك تنوين وغنة
نخلة في جبل احتمالك
ترمي خيرا يزيد منالك
تدي يمناك يسمو حالك
وتروي نبضك في شمالك
فيها إشراقة وصباح خير
ترمي قمح أفراحا للطير
صورة تعكس روحا للغير
تحكي .. رفقاً بالقوارير
بسمة قبل النسمة سيرة
تشدو في قصة ومسيرة
من ثبات مندي ومهيرة
لي شموخ علم السِريرة
يا كريم . . خليها فوقنا
فكرة . . بتآلِف فروقنا
وطلة بتناغم شروقنا
الحبيبة بتروي شوقنا
عندك اختك؟ ياخي بختك
ختة . . في روحا بتختك
#محمد_المهندس
#عندك_أختك
سيداتي آنساتي مُلهماتي
ساقياتِ الوجدِ في شعري
إذا تاهَ السقاةُ بقافلاتي
راسماتِ الحسنِ في كأسِ
التدلُلِ والتمنُعِ ساحراتي
كلَ غارسةٍ بقلبي
نبتَ عشقٍ للسماحةٍ والأناقةِ
كلَ من نسجت لروحي
بيتَ شعرٍ من صفاتي
الحبيبةُ لو تثنَّت راوغتني
والقريبةُ لو تأنت روعَّتني
جئتُ أستهدي بنبضي واشتياقي
ضلَّ عن دربي هُداتي
سيداتي آنساتي أمهاتي
بلسمُ الحزنِ المسافرِ
ظلُ هجري لو تمادى إنفلاتي
قُبلةُ عندَ الجبينِ
ومسحةُ التعبِ الغريبِ
ودعوةٌ تهبُ النجاةَ لرفرفاتي
حينما نثرَت أماناً
في كفوفِ الصدقِ
أروت همهماتي
حينما همست لِفجري
غرَّدت أطيافُ رزقي
في وشاحٍ رافلاتِ
حُضنُها حِصني وأمني
كلما ضاقت دروبي طمأنتني
هدأتني هدهدتني
رغمَ عمري .. عندها
أنسابُ جزءً من نواةٍ
سيداتي آنساتي نورَ ذاتي
كلَ شكري وامتناني للتصبرِ
واحتمالِ الصمتِ لو بخِلت لُغاتي
أو تمردتِ المشاعرُ
واستدارَ الليلُ في طيشٍ
ولم يدرك هباتي
للتي أرقت ورقَّت
ثم نوَّنتِ الأماني
حينما ضنَّ النُحاةُ بموسِراتِ
فاستندتُ بصبرِ أمي
صدقَ أختي قلب بنتي
رائداتُ الحبِ فينا
عاملاتٍ عالماتٍ طيباتٍ صابراتِ
كلَ من أضفينَ حباً في حياتي
هنَّ في الدنيا حياتي
سيداتي آنساتي
#محمد_المهندس
#سيداتي_آنساتيإليكن وأنتن كاملات
حب و لين ...
سأكتب لأنني أحبكن ..
إلى عيد اللحظات ..
المنبع
والمصب ..
الحلم
والطريق
والرفقة ...
الزاد والأغنيات ..
- لستُن نصف الحياة
أنتن الحياة ذاتها - ...
إلى جدتي ...
وهي هناك تقص الأحاجي على الصغار الذين ذهبوا الى ال هناك بلا أحاجي اسمع قهقهاتهم وهي تلاعبهم (ضباح ضباح كسره بي ملاح ) وتنفرج الأسارير تأهباً لينفجر الضحك عند ( بيت العروس) ...
الى أمي..
وهي لا تزال تستيقظ ليلاً لتعيد وضع الغطاء علي .. هي توقن انني لم أكبر بعد ، كل ما يمكنك إقناعها به انني صرت أطول .. لا فرق عندها بين قميص رياض الأطفال الأخضر وهي تربت عليه مساء استعداداً لصباح الغد ، وبين قميص زينته النجوم والنياشين والأجنحة ..
إلى أمهاتي ..
مريم .. فوزية .. شامة ال هناك .. بثينة 💜 .. و ... وأنا امارس العقوق في كل لحظه لا أقول لكن فيها أحبكن ..
إلى سارة في الصورة أدناه عروساً ...
أختي وبنت قلبي ...
إلى الصديقات الواحات الخضراء اليانعة والمرافي الرؤوم أنتن لحن الجمال وظلال من رهق الحياة ..
إلى ابنتي المستقبلية .. أحبك وأحب أمك يا (بنت اللذين) ..
إلى نساء الارض كلهن ..
النصف عاريات في أدغال أفريقيا وهن يربطن صغارهن على ظهورهن ويحتطبن ..
إلى الأرتريات اللواتي يزحفن الآن في معسكرات التدريب وهن يحملن السلاح ..
إلى طفلة في قرية ما من قرى السودان وهي تضحك الآن ملؤها البراءة لفرط الدلال واحتفاء النسوة بها والخضاب على يديها و(الدايه) وضعت أدوات الجريمة في قدر للتعقيم ..
إلى طفلة يمنية في التاسعة تزف عروساً مساء اليوم ..
إلى فلبينية في بقعة من بقاع العالم تخنق نهدها بحمالة صدر ضيقة ليبدو أكبر عبر فتحة القميص تساوم الآن على سعر الساعة وهاتفها يضج برسائل التوسل من الديار لتبعث بالمزيد من المال ..
إلى الحبيبات وهن يمسحن الرهق عن جبين الرجال ويرسمن الابتسامة ويتحملن الحماقات ودموع الفراق واللقاء وسوء الفهم والشوق والغيرة ..
إلى المحجبات والمنقبات عن حب ..
إلى ذوات ذيل الحصان والضفيرة والضفيرتين والمساير والمشاط والمتموجات ..
إلى الشقراوات والسمر البدينات والنحيفات القصيرات والسامقات ..
إلى المتزوجات وهن يتحملن الأطفال الكبار (أزواجهن) والأطفال الصغار ..
إلى اللواتي بقين ك النخل شامخات وحدهن ..
إلى اللواتي أنجبن فروعاً واللواتي بقين أصولاً حقيقةً بالاحتفاء ..
إلى اللواتي فقدن أرحامهن ليهبن للحياة حياة .. واللواتي فقدن اثدائهن بسرطان الثدي ..
إليكن جميعاً ..
قبلة على جبين ..
#محمد_الشيخ
٨مارس يوم المرأة العالمي
الجميلة الفيني طيبا و محتواها
الله قادر خت فوقا
القوة و اللين الوجاهة
الله عالم بي لماها
وكت تشوفا الغيمة تفتح ليها فاها
تشيلو خيرا توزعو
و الشمس تلزم ضراها
الجميلة المن صفاها صفت نفوسنا
الحنينة الرايقة جدا
الأمان فينا احتواها
و احتوت كل المشاعر جات معاها
الله قادر جابنا من حتة نقاها
❤❤❤❤❤
لجميع نساء الأرض الشاخصات في ضوء أمي لكن كل حبي وودي كل عام و كل النساء بالف خير و رحمة من الله تغشى المتوفيات منهن🤲🤲
#ماجدولين_سعد
اليها وحدها...
.......
اعتزلتك..
..غَصَب عني
لما كل احلامي طاشت
وخاب معاي في ظني ظني
افتكرتا..احلامنا تكفي
ونحيا ذي كل الحكايا
في سعادة وبس نغني
كنتا واهم ياحبيبه
لم قت فارقتا همي
قلتا فزتا في حرب مُره
وقت ربطتا إسمك مع أسمي
في رباط زاهي ومقدس
صرتا زوجك وانتي حرمي
والا ما اقدر اطوفك
عايشه جاريه معاي في دمي
افتقدتك...
لما ضليت في حشايا
افترشتك...
وكنتي برضك لي غطايا
اغترفتك...
الف مره وكل مره ذي البدايه
وكل يوم اقداري تقسي
وانتي صبرك دون نهايه
فكيف اقول انا فيك اغاني
حد حدودك لا نهايه
وما أظن حرفين بكفوك
مابتكفيك الا آية
وانتي آية في حد زاتها
الا بس حافظك برايا
ماكُفر
او اي معصيه
الا غالباني الروايه
كل حروفي مهضلمات
آفه سكنت في الخلايا
هم كبيييير اسمو الوطن
هم بيكبر دون رعايه
ومابرايا
كل شباب الجيل معايا
حتي اطفالنا وشيوخنا
بناتنا حرومنا في حدايا
وماعذر يبعدني منك
وماسبب
شان انتي غاية
داير اسوقك للنجوم
مانتي ياهو سبب هنايا
الا طاحناني الهموم
حتي روحي انا ما معايا
فعايز اقولك اعذريني
وعارف إنك ديمه واعيه
مهما تقسي علي ظروفي
في عينيكِ يعيش منايا
فاعفي لي لو ماهديتك
كل حروفي من البدايه
ماحصل يوم كنتي دمعه
كنتي دايما فيني شمعه
ضحكه بتنور طريقي
بسمه بمسك بيها نجمه
حَلما في عز الحقيقة
مُهرة حرة..وماطليقه
عايشا في داخل حدودا
مافي زول يقدر يعيبا
ياحبيبه
ارح نغني
كييه في ظروفنا العصيبه
بكره بنلاقيو فرحنا
وتضحك الدنيا الكئيبة
تضرب اجراس المدارس
والجروح كافه بنطيبا
ديمة تلقيني في حداكي
ونحيا في مساحات رحيبه
وابقي واثقه انا مهما ابعد
انتي دايما لي قريبه
فيا حبيبه
ارح نغني
كيييه في ظروفنا العجيبه..
.....
#نصر_محي
وانا امي حالي كلاما
دمعتا فوق العين
للواقعه هي اللزامه
للعمياء شوف العين
للباكيه هي البسامه
سايمه الفرح بالدين
ساعة الدواس حزامه
ماها المرا البين بين
كل العوين هي عوين؟
يااااااامي زيكي يييين؟
#ابراهيم_جابر
راهنت على الناس البسطاء!
أهل (الحوبة) واليومية،
أهل الواجب
من يهوون القول الواااضح
لا همس الريح بأذن الماء
ولا زقزقة المعنى فوق غصون الأشجار السمراء.
أو حزن الضحكات على باب اللهفة في عام الهرطقة الخامس،
بعد جلوس الملك العادل على عرش الحسناء
راهنت وألقيت عصاي لتلقف سحر الكفار الشعراء
وهزئت ب (توكسيدو) الألفاظ وربطة عنق المصطلحات
قحا أشعث أغبر جئت ب (جلابية) جدي، في فمي (المركوب)، على كتفي (عكازي) وتراثي، نركض في الفلوات
وربحت بذلك ذاكرتي!
راهنت على لغتي
وخيالي
لم أقصد باريز وروما
ووقفت على أطلالي
ودعوت المارة في الذكرى
لحبيبٍ في الربع الخالي
وعقرت (بيانو) من خرجوا
كي يرمح فيها
موالي
وبلغت بذلك آمالي
#محمد_عبدالواحد
تمشين كالموج المؤدبِ
تُرْعِشين بخطوتين توازنَ العصَبِ المعطَّلِ.
يصبحُ الفستان نحتاً مدهشاً
بين البساطة و الجنونْ
تمشين كالوقت المطمئِنِ .
خطوةٌ أخرى إليَّ تصيبني بتوتر الكلماتِ
لا تتوقّفي
هيا تعالي
حرّري هذا السكونْ
#محمد_عبدالقادر
بِتعلّي صوت اللون
درجاتو فيك بتشيل
شُوف عيني كورك تون
من حدة الإزميل
هبشت سفر تكوين
إيديك مصانع كون
في أول الإنجيل
في البدء كلمة وبوح
نفخت قبايل الروح
في رسمة الكرتون
ثارت على التشكيل ...
هي كمالو مع نقصك
وأسماؤو في التبجيل
الداخلة في نفسك
مع كلو آه يا ليل
والطالعة من نصك
بي مخرج التأويل
تيرابا في قصّك
والفايحة من قصّك
نوارا حتَّ حِليل...
لامن تحجينا
وغناك يشجينا
يا مراكبي عدينا
هي الهادّة من جِينا
في الكلمة جيل ورا جيل
ده منو الكتب فينا
وما جرَّ حرفو سليل؟...
السِتة في وصفك
كان قلنا ستّة قليل
هي المارقة من كفّك
دون جرح أو تعديل
أفكارا من لفّك
لمحت علي كتفك
فرّة جناح والوين ما بيقبل التكبيل
كل ما سكنت البيت الباب عليك بيسيل ....
الدّارا في عرفك
منو واليهو رحيل
وامتارو ما بكفو الروحو عقدة وميل
سربك سرابو طويل
قفص الدهب برضيك
وفضايا هل بيشيل؟؟؟
عبقر _إذا طرفك
يرتدْ قبُل صرفك
بأتيك بلا تعليل_....
أنا فيك حواس فنان
من رقتو ورِقو
شاف في الصفير الريح
أشّر تَجلّى سبيل...
وأنتَ اشتباه صياد في الفيل وضل الفيل..
شاعر ومن حقو
على هيأتو وصورتو
ينطق بلا جبريل...
قال الحمامة هديل
هل كل لا مثلو في الرتبة بيترقو؟؟؟
مِن عَلّم الأسماء
سمّى الكلام تنزيل
في الخَمرة سمى نخيل
في السكرة قال قُنديل....
عضم الرطوبة عليل
في الحفرة سمى هبيل ...
والرغبة تفاحة غاصاهو في حلقو
سمى النمش نجمات
شيب البخاتة سبيب سبق الزمن سنوات وزمانو ما لحقو
سمى الوجن قبلات طبعوها أولاد ايل
سمى الوحم ونسات أرشيف بيحكي الفات كيف عاش وكيفن مات
واختار طعان الخيل ...
سمى النفس شقُّو
وهذا القميص أحضان فترت من التأجيل...
درويش بناجي جليل
لو فكرتو و خلقو
وما أوحى للخالق
منو فينا بيتاوق؟
الخاطر الما بين
كيف يبقى متطابق؟،
وتكون حبيبة عديل
لي سيدا بتعانق؟،
ياباري فيك معشوق وجميل بحبو جميل ...
ياباري فيك عاشق ؟
كل الأفق خانق
أبدع خيالي جزاي
وأنا في الخيال عالق
وجزاي أحب الويل
يا الله حب صادق...
#وئام_كمال
من يوم القيامة
قامت جاتو طيرة
من الجنة طايرة
كانت لابسة احمر
ولون جنحينا اخضر
وريشتين من حمامة
رسمت جنبو دايرة
قات ليو في إضانو
نركب فوق غمامة
ولا المطرة شايلة
اتونس معاها
وكان شمس الله قايلة
وشو دا كان منور
ومليان ابتسامة
الا رويحتو فايرة
شكلها ماشة زايلة
جتتو خانتو
ما قدرت تشيلو
رغما طول وقامة
خشت طلقة عبرت
خلت حالتو مايلة
راقد في إستقامة
رافع راسو يضحك
قال الدنيا زايلة
#عاطف_شمبات
وغريبه ..
كل نصايص الليل
افر قلبي المولع نار
افرو بشيش واغطيها
بريدا وكت تروووووح
في النوم
اساسق ليها في الاحلام
اقول امكن الاقيها ..!
اشرك ليها
بي نكته..
عشان تضحك
عشان تنفك
حزاين كنكشت فيها
حبيبتي البتضحك
لي طرايفي البايخه
شان ريدي المبكيها
بحبها...
شان بتغفر لي
ذنوب قبال اسويها
بحبها. .
يومي من قمتا
معاي كبرت حكاويها
ولابعرف. .
احبها مره في كل عام
انا اليوماتي حابيها
كانها...
رزقي يوم بي يوم
بتب من نومي جاييها
وسيم الطله .. بي ريدا
ولد في روحو فاكيها
مصدق نفسو انو برا
يساوي الدنيا بالفيها
مدام انتي الـ( حبيبتي براي)
عيونك لي قمر دورين
مكحله بي غناي ليها
بمد ايديا للقمره
خلاص للقمره نطفيها..!
#ابراهيم_جابر
أنا تقريبا شخصٌ جيّدْ
لستُ بعبدٍ
لست بسيِّدْ
مذ أتعبني فهمُ حياتي وأنا للأوهامِ أؤيِّد
سوف أقلِّلُ من أخطائي
ماذا قد أفسدتُ عسى؟
مالَ أبي
سُمعةَ شخصٍ يهزأ بي
وقلوبَ نسا
أو صرحًا غيري عاش يُشيّد
أنا تقريبا شخص
آخر
لستُ أبي لست صديقي
حُبَّ غنى
كُرهَ عنا
عِشقَ بريقِ
بي قلق الشاعر
فلماذا
قلبي النافر نافر؟
وتزلُّ عن الخطوات طريقي؟
ألهو والأصحاب مساءا
أشعل برد الليل غناءا
أنفخ في الأوزون هواءا
صدت بطرف العين ظباءا
حين أسدِّد
أنا تقريبا شخصٌ جيد
في الإجرام وفي الأوهام وفي الأجرامِ
قالوا بحت بكفري
إذ واجهت الكون بفكري
حين سألت سؤالا لم يعجبهم
حين لبست ثيابا لا تشبههم
جلدوا ظهري
بالإسلامِ!
بحتُ بكفري
بالتقليد وبالتجديد
قد هرطقت و قد جدّفت و قد سفسطت بشعري
أرسلتُ بريدي
حين عشقت بلادا لم تعشقني
منعت حسن هواها عني
كرهت فني
آوت غيري في مخدعها
وتأوّه في أوتار غريبٍ لحني
وأنا ابن بلادي
لا أعرفني
قد أوقفني صفًّا أفحصُ أوراقي
فأنا عبدٌ
وأنا سيِّدْ
وأنا لست الشخصَ الجيد
قل لفتاتك شعرا أفضل من هذا
كن حلاجا
أو مهراجا
واكسر بالقدمين زجاجا
لا تزعم أنك لست قبيحا
أو أن جدودك ما هُزِموا أو ظلموا أو ظلموا
كن بالحق شحيحا
أرسل مالكَ ريحا
كي تصلح ما كان صحيحا
وتقيّد
#محمد_عبدالواحد
المطر كائن جنوبي
والتراب من شمسو نوبي
غربل العرق البهجّن في جيوب الطين ذنوبي
أغفر النور في مسامي
رحلة الشتا في المشارق والنشوق الفي غروبي
وعادي قول للموية توبي
#وئام_كمال
يا ضل مفروش
جوات الحوش
مقشوش ونضيف
من قول الزيف
مرشوش بى مويه ريد وحنان
والبن في النار
وتهب ريحتك
وانا راسي يدوش
متقريف ليك
والمطره بدت في ذاك الحوش
المامعروش
#ريحة_البن٢٠٢٣
نقاط الزير
ولحاف مهرود
ماتامي سرير
... والحوش وسخان
بلاعة البيت
جركانة الزيت
كسار الطوب
فردة مركوب
شجرة لالوب
شافع سرحان
مليان بالجير
ويقود النار
باقة الكركار
دخان الصاج
صوت الحجاج
باب النفاج
أولاد عمك
راقدين بي جاي
مهدودين حيل
شايلين الليل
احلام عشمان
ريحة البلدات
ضرعات جنيات
ميراث ابوات
وعصاية زان
صوت الأذان
موية الابريق
شوف لينا طريق
ختينا الني
ختينا الضيق
ادينا وساع
وكلاب الحي
ماكنات ومناع
مانعات الضي
والحال بطال
ادينا ريال
راجيانا عيال
وحبال في حبال
ماليها حدود
وطريق مسدود
والجيب مقدود
والود ميرو
حق الدكتور
والصف والدور
وابوهو معاش
ماف حاجه بلاش
سيد الدكان
ممنوع الدين
جاز البابور
سلك اللماع
طعميه فطور
ورسوم وهموم
وغبار وسموم
ام الأولاد
ماضاقت النوم
ولاحتي رقاد
تعبانه خلاص
ملت البرميل
ونهاره غسيل
حفظت البت
سورة الإخلاص
بي وجع الراس
رقدت بالتوب
ماقالت الروب
كوراك الديك
مستوره هديك
جهزت الشاي
ربك هاديك
مابفكك ساي
لابد إديك
من بعد الضيق
وانا كنت غريق
مالاقي القش
ولا حتي شهيق
ياالوشو قمر
مابدسو الغيم
وانا حبي قديم
وتتاوق البت
تملاني كلام
وعيونا عيون
ماليات الكون
بي اجمل لون
مرشوح جواي
ياهمس الريد
ياسر مغناي
بقراك في النم
سامعك شاشاي
عطرك ينشم
بحرك وداي
الناس بالناس
والكل للفوق
بعدوني بعيد
من المعشوق
غرباوي بقيت
رسموها شروق
وانا بين إتنين
بالظن مخنوق
بين إنك لي
ام إنك فوق
عسمني الريد
ياست الزوق
ياضل مفروش
جوات الحوش
مقشوش ونضيف
من قول الزيف
مرشوش بي موية ريد وحنان
والبن في النار
وتهب ريحتك
وانا راسي يدوش
متقريف ليك
والمطره بدت
في داك الحوش
المامعروش
سافر ياناس
انا القاو كيف
رسلت كتير
أشواق وسلام
وحروفي تطير
مرسالي حمام
وأقول لابد
يبعت لابد
لكنو هناك
لا بصد لا برد
شلهتني معاو
لي آخر حد
حدادي هواك
مدادي المد
ياخ مشتاق ليك
طمني علي
لو كت ماجاي
رسل عينيك
فجأة النباه
وانا ليلي طويل
متعشي جراح
لملمت اساي
جابلدت الآه
شهدت نجوم
وحدت الله
وأخيرآ عاد
كان شايلو بعاد
وأخيرآ عاد
وانا عاد ياناس
افراحي كحل
والريد مرواد
وجريت القاو
سابقني هواو
ولسوء الحظ
لاحظت اللون
ما لون العين
وإحساس ممحوق
مافيهو حنين
زي المسحور
او طاقشاو عين
والدنيا تدور
وقلب مكسور
ومراية الظن
ما بتعكس نور
#محمود_الجيلي
حجيتكو ما بجيتكو
ابا الكبير حجانا
عيال بنات لمانا
عيالي هوي يا عيالي
زمن المرافعين جانا
عدو البقيرات توا
شقيش اخبرو بكانا
عدو الحميلات توا
اقيش اخبرو بكانا
ابا ادم نطا
حمر عليهو قال
اليكم الاخبار
جابا هارونا ..كالالمي في الخربال
حمور ولد زووق ..توري اب قرونا فوق
اب غرتا عاجبانا
كذلك الكرتا
الكرتا بقرة عيسي
حلابا الا تعيسا
والخدرا عجلة موسي
النافره زي جاموسه
اللبارح انفقدن
ما عرفنا وين رقدن
فزعنا في القيزان
هناااااك بكان مرقن
تحت الشدر رقدن
ديل ريحتن مافي
وما اظن شردن
يشردن كيفن
وهن اتولدن ..في القوز وفي القردود
بقراتنا اتولدن
في الوادي في الدكنوج ..اتوالدنا حلبن
ابا هوووووووي ابا
بقراتنا انفقدن
المرفعين نقدن ..!
وابا لسسسسسسه بحجي…
حجيتكو ما بجيتكو
الله الكبير سوانا ..زينة السمر سمانا
دس النجوم جوانا ..من المي سافي سقانا
من الرهود اروانا ..فر الغيوم غطانا
من ذا الذي غشانا ..سرق الحلم صحانا
صبحنا بالجبخانه ..مسانا بالجبخانه
فطرنا بالبازوكة .. زي التقول مفروكه
بالراجمات غدانا
من ذا الذي غشانا
اقنعنا انو الدانه ..اقصر طريق للمركز
يلقي المهمش خانا..?!
من ذا الذي غشانا ..
"شيلو السونكي .. قدو الدونكي "
وشلنا السونكي ..وتيفك توووف
قدينا الدونكي ..!
المي السراب اروانا..?
" فيبو"..
كضب
والله العطش كتلانا
من ذا الذي غشانا
" شيلو الهاون ..هدو تعاون"
وشلنا الهاون
هدينا تعاون
مدرستين ،وكنتينين،وكم شفخانه.. ذنب المدرسه هل خلانا?!
دا البارانا مكانا مكانا
الطبشير اب قلبا ابيض
كيف حيسامحك يا الجبخانه
في ذراتو حروف مسجونه
باكر تكتب ضد سجانه:
"بال الشفع ممكن ينسي
الطابور الجوطه الكبسه
الغنوات الماتن هسه
الطعميه ام طعما طاااعم
جوه حلوقن صارت غصه
الدافوري الكان بيريدم
لامي غبارو لي بعد الحصه
الا الشفع..
مااظن تشفع
للغشاهن بالجركانه
وكان ماليها حلاوه وسمسم
وجوه السمسم دس الدانه"
هووووي ..هوووي
ولضلمي ..هووي
شلخوني من بتضمي
بتضمي شدرة همي
جاجوني في بت عمي
يا روحي كيف تنجمي
مادام بنية خالي
خالي الرويحتو في امي
كتلوها دنيا مغارب
طفو الشموس في نمي
كتلو الغناوي الطااااعمه
قبال يضوقن فمي ..
فتنوني في ول عمي
ول عمي سيح دمي
فتنوني في ولضمي
ولضمي فااات خلاني
وانا دمي اصبح المي
شقيش اقبل تاني
وانا دمي اصبح المي
سيت لك كلاشنكوف
الخوف بيلدا الخوف
نشن علي واضرب
في ايدي في رجلي
واوعاك من الجوف
الجوف زريبة القلب
وانا قلبي ساعي الحب
حبيت وليد عمي
اعلن عليا الحرب
حبيت وليد امي
رماني جووووه الجب
وانا يا وليد امي
خايف عليك ملهوف
تكتل وليد امك
يوم القيامه تقوم
والناس يقيفو صفوف
انت البراك مهموم
انت البراك مكسوف
بيناالصراط ممدود
ممدود كحد السيف
بيناتنا لبن امي
ودمي الصبح المي
سيت لك كلاشنخوف
اكتلني هسع دي
وانا لسه في وعدي
ما امد ليك يدي
يدي البتزرع دي
يدي البتفزع دي
يدي البتحلب دي
يدي البتكتب دي
مين البضاري عليك
في الدنيا غير يدي
ان العمر لحظات
ساااعات وبتعدي
لكني مهما يكون
صادق ولا حاخون
انا زول قدر وعدي
وانا زول شبه بلدي
لبسني افرنجي
عكازي في زندي
لبسني افرنجي
طاقيتي حمره هدي
انا زول شبه بلدي
انا زول قدر وعدي
يااارب اه يااارب
سلم وليد عمي
يااارب اها يارب
سلم وليد امي
يااارب اه يااارب
انا هسسسه بي دمي
بكتب غناوي الحب
بي اخر انفاسي ، يا اهلي يا ناسي
دارفور قضية حب ..!
كان زرقه كان حمور
كان عرب كان فور
زغاوه سابع دور
دارفور قضية حب..!
كان صنو كان هاجو
كان برقو كان داجو
دارفورقضية حب..!
ععجميها رطانيها
عربيها او زنجيها
هم البخبرو شكيها
الفيها والما فيها
ودارفور قضية حب..!
والحب عطية الرب
ارفع ايديك ولضم
الدم بحن للدم
ارفع ايديك للشم
ومعايا قول:
ياااااارب…!
#ابراهيم_جابر