5285
الاسم :- سئلت ذات مرة ما سر ذاك الاسم؟ صرخت ِملأ صمتي المكبوت في دواخل الفنون إنه اسمها حروفه تطايرت تشكلت تألقت تعلقت بشخصي الضعيف فصار اسم شخص ما ... بداخلي. - ريحة البن .
نص النهار و النجمة قاعدة مبحلقة
شايفاها روحي الضاق نفس رئتيها
يوم نضم الوساويس محقا
و ضاق الوساع بعدت مسافة تلحقا
و كتمت وكت هب النسيم
بي ريحة الشحتافة جات
ويقود بولع نار غناي
روحي المعذبة حرقا
و حندك مسامات ارضي غيم
شحتف رويحة الانتظار
و الضو مكسر في الحيط رقراق حنين
و الواطة تدردق علي روحا انطوت
لفت عقاب الضل فراش
اتلولوت كل الدريبات العدال
و الواضحة صبحت في الطشاش
اتخذقت عين الكلام
عينة المطر كانت رشاش
كيفنها الزرعوها قامت حسكنيت
حصدوها خرشت الايادي الزينة
طعنت القلوب
قاعدين بنتكرف طعام الالفة
جانا ربيت ربيت
ياها الشوت جلد الاماني السمحة
بي لهبا العبيط
و اتلومت يوم كومت
حطب الكضب فوق راسا ولعت الظنون
حرقت جميع افراحا بي وجعا المميت
و اها اه داك غطاها يغربل الناعم
مقدد بالشرار النازلة ما بتبقالو خيط
و اها كيف دبارة الجوع
اكان نهش اللحم دخل العضام
نبحت كلاب الحوجة فوق زولا صبور
عرقا علي واطاتو ماسك بي يقين
مرقا علي السما ما بطق
لا فيهو شق لا فيهو سوسة ولا هو شين
و الشينة تتجمل تجيك
تدخل عليك
كيفنها التخلع براءة الشفع الجوة الخيال
الغول هي قولة اخ
توقف كل قلوب الدنيا
تنشف موية الاحساس
و لا وضو لا تيمم في اليباس
و نقيف نصلي علي جنازة الريد
اكان مات في الدواس
و الداس علي الخير
ماهو غير زولا سهيت ما وجيب
كضب عليك
القال بجيبلك من طيور الريد حليب
فأسك اكان قطع الضرر
لا شك رويحتك جاها طيب
كتاحة الليك همبريب
تدخل تداعب فيهو مرق العنقريب
تسمعلك اصوات طقطقة
تلوليك اكان النوم بجيك
وتهدهدك اصوات انينك و حرقتك
ما النوم بجيب اللوم
اخيرلك قوم
اذا قام اللهب
و الدوكة وسخت المعاريك كلها
حرقت ولا فضل بياض
ضاقت طرق نورا عراض
و العرضة في نص السكاليب
شالت الشبال من اللطمت
خدودا و شرطت جيب الحداد
قالت بتلبس لون ورود
كان دمها الفي جروحا فاض
محقون هو سمم روحا في ساعة المخاض
كل المدائن اجهضت
جنياتا يوم شارعنا حاض
و الساعة بتدق زي بتتمطق
تفتش لي طعم باكر وكت مسخ الزمن
و الواطة تتقنع من الكتاحة
خايفة من المحن
و الموجة تضرع هديك نص البحر
حلفت تموص طين المطيرة
اللي هديماتن عطن
موية عوينات الصدق
مربوبة ظن
بي شب صبرنا نكحلن
مهبوشة يا بت الغنا
موجوعة و النغمة بتئن
ما الرقصة في عز الوجع
حرفة بتغطغط في الحزن
و آآه منهن سهراجة للوردة بتجر
و القربة مقدودة بتخر
راكوبة ضيقة و ما بتشيل
كترابة الشقا و الفقر
حبوبة ونسي ليل حبيب
اتمطلق العميوق علي
سوالو كبسيبة فتن
اسمك حبيب
جمام بجيب رحراح حلو
ايديهو يوت تروينا حن
شجرة بتشيل كل الثمار
خوف ام دريقون في الخريف ما بنقدن
و آآه يا حبيب سووك محويب للمرخ
فرعك متين ما بملخ
و الدق بقوي جلد بهاك
ما بنسلخ
اسمك وطن عز الوجع
ياكا الحبيب الما بنخ
سموك وطن عز الوجع
عارفاك حبيبي الما بنخ
#ماجدولين_سعد
يا..
حزن روحنا
الجميلة
يا ..حكاياتنا
النبيلة
يا جراح ..
خيلنا الأصيله
كلُ ما نطلع مواكب
والخيول يصدح صهيلا
خيلنا
ترجع في المغارب
ويرجع السيف دون محارب
ونفقد الضو في القبيلة
ما الشعب
شعب أقوى
والردة مستحيلة
..اه
لو تعلمنا
التجارب
او نفكر..
نلقى حيلة
كان ..
لقيتي براح عيوني
للشدايد استعده
وروحي..
فيك بطيب مقيلا
سمره ..يا ..
حزني و شجوني
بيني بينك لسة ورده
كيف..؟
تحققي حلم دوني
وكم شهيداً الله اداه
روح رفاقتاً شاده حيلا
بيني.. بينك
ريد ومبدأ
ذكريات ؛ و دروب
طويلة
بيني.. بينك
خلقة الله
و ريد أ خلاء
فريق وحله
وموت مهاجر من هجيرك
بي جحيمك إ ستظله
البينا حاجات ما قليله
بس جوارحي
البفضحوني
وماني يوسف في الفضيلة
فكيف..؟
كيف تعدي الحلم دوني
وحزني بيك يا سمره
عدا
مهما فرعون استبدا
الا إنك
زي كأنك
طفلة تاهت و زي كأنو
غناي دليله
سمره..
سمرا يا وطني الموسم
في رحى الحرب و فتيله
يا حزن ريدي المقسم
بي غنا اللون والقبيلة
ربي بيك يا عشقي ارحم
وياكي
شيالة التقيله
وامي لما يطول عويله
ما بتحتاج لي وصية
والشعب أقوى فعلاً..
والردة ...
خيلنا
جاهزات و استعدن
بي جراح المغربية
لما فجرك يمه أذن
نرمي هذه البندقية
نرمي ثوب العنصرية
#محمد_السر
مطرك ..مودر للبيوت
الفي صباها مؤانثه
وحزنك ملا الحلال ..دموع
وصوتك كأنو مهامسه
بين نيل ونخله ..
وهدهدايه
وصندله..
واجساد تكر في روحا
مامستحمله
انفاسا طالعه من الضلوع
ماشفتي لعب
الكمبله
السنبله..
والغنيه ماسكتت
علي الرحاله ..من
دون الجموع
وجمالا ماها جمالا
في ها المرحله
نفس الفراشات القبيل
اتلحت عسل الفروع
وقفت تسامر
الحنضله
سرب الجراد ..وقتو اليجوع
بخبر يقص اثر..الدرت
دون بوصله
السنبله..السنبله
النفس الملازم ..الناله
والأباله
بالريق اتملا
والنيل الصبيه
المابيه تدي العاشقين
شبالا
عمرآ هملا
صقار طوحت في
الداره
صعدت منبرا
وزرزورآ بجيب
اخبارآ
ما انقطع النصيب
بالعش جملا
ما خلت بلاد
وأماره..
في صيفآ عصيب
كانت اولا
رحلت طيور الحله
كايسه الهمبريب
كاست تستر احوالا
رجعت بالنحيب
عقبان بالفروخ
راس مالا
حضنآ كملا
وصغارا سالتا
ذي غريب
ضمآ بلا نفسآ يطيب
فرحآ بلا بيت
مقبره
الدنيا..بين انك
تشيل ..
وانك تجيب..
ياضو ..عصافير
الخلا
قدرك علي..الكون
الرحيب
تفرد جناحيك للبلا
وتفضل..كما
النورس حبيب
وتعاف من الفرص
اسهلا
القافله..كلابا..التخيب
مين العليكم
خولا
شان تدفق اللبن
الحليب
وفي رقابكم إتسن
معولا
#محمد_السر
قدرك يسوقك حب بلادك
للقدر
قدرك محل ماتقول تشوف
فجر الصباحات إنتشر
وترسم ديار للرجعة من
رهق السفر
تملاك بلادك بالرهق
وتملاها بالغني والوتر
لاتلين عليك الدنيا لاو جعك يلين
وات الملامس وجعتا
وانت البراك مليان حنين
غرقان مستف ريدتا
متلك شبة للصالحين
لا لنتا لا القلم اتكسر
واهي دي البلاد يوما التريد
اولادا..ذي عاد تكرهم
واهو دا انطباع لي محبتا
متلك متل يوسف زمان
ذنبك غناك ومحبتك
ذنبك وجعتا بي وجعتا
اهي دي البلاد ومحبتا
يوما التحبك تقتلك
شن ضرا حراس العقيدة
بلا القصيدة التنشدا
شن ضرا احلام الغلابة
بلاالاماني المجهدة
وغنوات كتييير ضاعت سدي
اهو دي البلاد ومحبتا
يااااااااااتحبها
ياتحردا
قدرك تشيل حمل الكتار
وانت العليك كتر الحمل
قدرك تكون المبتدا
لاخنت لاصبرك كمل
قدرك يحاكمو محبتك
لي بلاد بتعشق تربتا
وتجيها في عز غربتك
تتسامي من محنت غناك لي محنتا
وتثور عليها وتنفعل
وات مفتكر ..قد ولي زمن الغتغتة
تسرج حروفك وترتجل
بالثورة روحك ملهبا
تكرب ضراعك وتشتغل
ما الصورة واضحة كما يجب
كان يعني لازم تكتبا
كان يعني لازم تنشغل بالملعبة
وإنو الكراسي مرتببه
وعقولنا يوت هي مغييبة
اهو دي البلاد ومحبتا
يوما التريدك تسجنك
تدخل كما يوسف ظلم
بس ما(حنك)
تمرق شديد من شدتا
رؤياك وتفسير الحلم
فض إعتصام..والي
متي
لجنه..
ونزول وقريب غطا
بي كل مخدر تحقنك
ومجاوطه ومحاوطه
وإت مفتكر قد ولي زمن الغتغته
#محمد_السر
يا سمرا يا بُنه
أصبحتي كيفك كيف ..
ياناديه يا جنه
ونسني منك طيف ..
غِشت البنان حنه
بخة حليبك كيف ؟! ..
أنا وانتِ يامُنيه ،
رغم الظروف حنكون ..
وغباشة الدنيا ،
ننقش عليها اللون ..
ونطرز الغنيه ،
ويبقى الحمام مأذون ..
أنا وإنتِ ضد الزيف ،
ضد البخون أرضو ..
ضد البجيبلو نزيف ،
نافله وترك فرضو ..
برفع غنايا وأقيف ،
كان يابو كان يرضو ..
ضد إنكسار ولدك ،
ضد القلوب واجفه ..
ضد القَهر جَلدك ،
ضد حالتك الواقفه ..
ضد البقول انا ضد
ويستثمر السالفه ..
باكر يعود والنيل ،
فرشة مراكبيه ..
حق السواقي تشيل ،
تدي المزارعيه ،
وقطن طويل التيل ،
غزلو الصنايعيه ..
باكر يجي وألقاك ،
في ساحه شعبيه ..
مردوم أغني معاك ،
نوباوي شايقيه ..
ومنوت يغني غناك ،
رقصات بجاويه ..
باكر يجي ونضحك ،
زي ما عرفنا الخوف ..
وجع السنين ينفك ،
وعَمَار يبرد جوف ..
إنتِ العليك الرك ،
شايف إنتصارك شوف ..
أنا وانتِ يا سندي ،
يا واحه ورديه ..
أنا وإنت في بلدي ،
وأحوالنا مرضيه ..
جرتقنا بالبلدي ،
و الفال بياض نيه ..
يا سمرا يا بُنه
أصبحتي كيفك كيف ..
ياناديه يا جنه
ونسني منك طيف ..
غِشت البنان حنه
بخة حليبك كيف ؟! ..
#محمد_الشيخ
يصدقُ حبّك
حين يلوحُ لكَ المحبوبُ من الأرجاءْ!
فتراه وغيرك ليس يراهُ
يغرقُ قلبُكَ
يملٱ صدرَكَ
نور بهاء
يا تفّاحَ الشّوقِ الأول
يغرقُ قلبي
يملأ صدري
بحرُ دماء
كيف سنبلغُ
عمرَ الجنّة
والأهواءُ
هي الأهواء؟
الحبّ
الجبّ
الثقب
الماءُ
الماء
الوجد
البرد
الفقد
الرّعد
الأنواء
مصر
البئر
الغدر
الصّبر
ونورُ دلاء
الشّبق
الشفق
الغرق
الميناء
الطّمع
الهلع
الدّاءُ
الداء
أدركني
واتركني أغرقُ
في الحبّ
فنحن
إليه
ظماء.
هذا القولُ قصير القامةْ
أكلحُ وجهٍ
أجعدُ شعرٍ
نزر وسامةْ
دونَ هجاء
ذاكَ الصّمتُ
عظيمُ الهمّة
عدلُ القسمةِ بحرُ الحكمة
فيضُ عطاء
هذا الشوقُ
بلا قدمينِ
فكيف سيبلغُ أرضَ لقاء؟
#الشوق_الشوق
#محمد_عبدالواحد
.. ابقى واصل
العيون ال في انتظارك
شوقة ذي مطر الفواصل
نسأل الريح عن طريقك
كان تحكي البيك حاصل
وبرضو ما هماك شوقنا
ولا بتفكر يوم تراسل
ابقى واصل ...............
الديار خربانة بعدك
وانهدم عش التمني
والطيور خاتيات فريقنا
ومابية تسجع او تغني
راضية بي هجرك وضنك
وراضية بي فرقاك مني
بس دحين رسل خبارك
شان تطمن بيهو ظني
ونبدا نتراسل عتابنا
مرة منك ومرة مني
#اسلام_النحاس
الحساد عوارض إعطشو الخزان
والاخوان بشاشة تودر اﻻحزان
رفاقة المصلحه ونقل الكلام جرذان
والنايبات تراهن للرجال ميزان
الشافكم غلاد في الفارغه مترابطين
يقول كان قمتو هسي تحررو فلسطين
بيناتكم بتعلو وعندي منحطين
وجوهكم سمحه لكن الضماير طين
افواهكم بتبسم والقلوب في نفاقه
نقبل تبقو اعدانا.. ونعود صفاقه
الخلا اخير عليكم والظلم والفاقه
قالو الرفقه توب عز يا اذلّ رفاقه
الواضح مشكر والخبيث مذموم
ورب القدره بفرج كربة المهموم
الببهتنا حرم والخيابه عموم
البلقانا فيهن ..رهبه نوم مابنوم
تعال تلقاني سندك كان بقيت مغرود
مواقفك عندي كلها والحساب مجرود
تمد طرف إيدك ان درتك سلام بي برود
تقوم يااا الله لي غرضي التقول ميرود
في نوع من الرفاقه مع الزمن بتلوّن
ونوع ببقالك العز ...للصعاب تتهوّن
في نوع بمواقفو في صفحات حياتي مدوّن
بﻻقيك بي لسان ساكت وايادي بسوّن
الزول كان عدم من البجي يواسيهو
الناس جت بتنسي وربو مو ناسيهو
(الخزﻻن)واحساس اﻻسي الحاسيهو
بكسر شوكتو بإذن الله واحل قاسيهو
اخوك بالصح بسندك قبل تستدعاهو
بقيفلك واصلو مابقول الظروف مانعاهو
البسعاك عشان مصلحتو ماتسعاهو
والبرجاك تقولو الفاني برضو معاهو
قدر ما الدنيا تغدر بي وتنوي صدامي
بطراك فزعه ياسيف الرجاله الدامي
محل ماكبلت قاسيات ظروفي اقدامي
بلقاك حر تقع فوق ام لهيب قدامي
بيني وبينو عشره طووويله مابتتخلي
اخوي الماتبع ...درب الفواحش وضله
وكت تحتاجلو تلقاهو السند بعد الله
ما النوع البقوليك .....(اصبر وبتنحله)
الحُر ايدو بتسو...... مو حجا بحجيك
مابﻻقيك يضاحكك وبي قفاك يهجيك
وكت تحتاجلو.. تلقي محل تدور راجيك
ما النوع البقوليك (ﻻمن افضي بجيك)
من ماقمته في فارغه وعوج يعميك
ومهيوب خلقه ما النوع الشنب تاميك
كلاب الدنيا تنبح وانت ما هاميك
سوّ الدايرو خلي الراجل .اليحميك
الدنيا بتدور كل زول بياخد جوله
وانت تراك بالعز والمكارم اولي
قدر ماتضيرك اﻻيام رحيم المولي
وين مايقنب القيصر بقوم راس دوله
الما أنه ....من والد رحل ما أنه
والما حنه.... شوقآ للبلد ما حنه
الما جنه... بي ريد الحبيب ماجنه
والما غنا .في اﻻخوان يمين ماغنا
عندي اخواني خلقة ربنا مباشرين
يلاقوك بالطواقي محدرات قاشرين
رفاقه رفاقه دون مايكونو منتشرين
تشوفن كل واحد في الدواس عشرين
المابقيمو الناس بي جنس والوان
ساعة الحاره ببقولك سند واعوان
بلا يشاوروك بسوقو ضيوفك الديوان
امانه عليكم اخوان وﻻ مون اخوان؟؟
#مصعب_ابنعوف
قومي ثوري ..
في القصايد الهسه محتاجاك ضروري ..
شدي عصبك في إمتداد الدم
إذا صابك حضوري ..
وأشلعيني قدر أحسك فيني
وأدي الدنيا نوري ..
شتتيني مع الرياح الدافية لفي معاي ودوري ..
في الصحاب البلتقو النيل في الجناين بالخصوبه
في الدروب الخطوهن ميسور ولو مليان صعوبه
ختي في كل نية بيضا في قلب زول يازولة طوبه
وأحجزيهم .. وأحجزهم يا الله من بلدي وحروبه
الصحاب .. الخطوة .. والنفس الصباحي
الصحاب .. النشوة . ترنيمة جراحي
الصحاب .. الكسوة .. من جلد الأضاحي
الصحاب .. الغفوة .. ساعة القلب صاحي
الصحاب .. القهوة .. والكيف والمزاج
وإحتجاج
على اي قول جاييك غلط
الصحاب
الألف خط
فاصل مداري
بين تقيف او تمشي جاري
في الطريق المادي ليك إيدو بمحنه
الصحاب مابخلو ليك جواك انة
الصحاب العود
ومعزوفة الوعود
ليي حبِ غنه
الصحاب ..
بيهم بيبقى وطنا جنه
الصحاب
وينهم
صحابي
من زمن
مادقو
بابي
#ايمان_متوكل
فلنتاين.. بخيت وسعيد
(ان الذين يحتفلون بالحب مره في كل عام.. انما يحتفلون بتقصيرهم اليومي في الحب..!)
وقالت لي:
فلنتاين..
بخيت وسعيد..!
انشا الله
يوت فرحان
تبوس الريد
خديد بي خديد..
ونتسالم انا واياك
ايد بي ايد
ونتبادل كووس الريد
وريد لي وريد.. !
وانشا الله..
ما اعدم مرورك
في مسارب الدم
براك توم الهوي
الوحّيد..
وقتليها :
وانا الولدوني عاشق وبس..
عشان اكبر و اغنيها
وانا الـ..
بالريده بتنفس
شهيق.. وزفير
اعيش بيها
بحبك..
يا حبيبتي برااااي
وريدتك لي بضاريها
من لفحي السموم
والناس..
ومن وسواس زمن
خناس
وادسها..
مره في الكراس
غناوي جمالها
في الايناس
وفي رقة قوافيها
قوافيها الوكت تظهر
حروف من نور..
تنط السور ..
بخاف لو جسمها البلور
فضح
صورتي المدسدسه في خوافيها..
ريدتك لي بضاريها
وادسها
مني جوووه الراس ..
صداع محموم
بيحمي النوم
كلام منظوم
وما مفهوم
اناملو تدغدغ الاحساس..
وترقص لي فرح مافيش
دلاليك
خجت غناويها
ريدتك لي بضار يها
واخت طاقيه فوق راسي ..
اقول يمكن حتخفيها
واضاريها..
بي جاي
وبي جاي
حليلو القال بضاريها..
عايني الريده
شوفيها
بتمرق
زي شعر ابيض
بتضحك فيني تاريها
حلاتا
سنينتا البيضا
تعضيني
اموت بيها
حليلا الريده تاريها
مويه مسافره
من قامت
بتهرب من عواليها
بتتسرب
علي الواطي
عشان يعلا البلاقيها
حليلي الريده تاريها
بتمرق من اضاني ندا
تجيك من غير تناديها
تنوم في حضنك الدافي
تخت تحتك اياديها
واناديها
تعالي عليّ
واناديها..
بوسي عينياّ
ضويها..
عشان تعرف عينيا منام
واتعلمت فيني الكلام
وانا الربيتا..
بي همس النسايم للنسايم والغمام
وانا اللجيتا..
بي اجمل غنيوات الهديل
قبال ينقدني الحمام
وما استغربت ..
اول كلمه
نبتت في خشيمه كانت
يا سلااااااااااااااام ...!
ولا استغربت لامن اول مره قلتا ابوسا
صرت
وقالت ليا:
مام..
ودست في ايديها وجيها
غنت لي غنيوه لطيفه اسمها مام
تكاويني
واجوط فيها
حليلي الما بقدر ساي اكاويها
وتنوم جنبك..
تجاه قلبك
اعاين في الضلام مغيوظ
اكوس
لي قمره في وجيها
وغريبه ..
كل نصايص الليل
افر قلبي المولع نار
افرو بشيش واغطيها
بريدا وكت تروووووح
في النوم
اساسق ليها في الاحلام
اقول امكن الاقيها ..!
اشرك ليها
بي نكته..
عشان تضحك
عشان تنفك
حزاين كنكشت فيها
حبيبتي البتضحك
لي طرايفي البايخه
شان ريدي المبكيها
بحبها...
شان بتغفر لي
ذنوب قبال اسويها
بحبها. .
يومي من قمتا
معاي كبرت حكاويها
ولابعرف. .
احبها مره في كل عام
انا اليوماتي حابيها
كانها...
رزقي يوم بي يوم
بتب من نومي جاييها
وسيم الطله .. بي ريدا
ولد في روحو فاكيها
مصدق نفسو انو برا
يساوي الدنيا بالفيها
مدام انتي الـ( حبيبتي براي)
عيونك لي قمر دورين
مكحله بي غناي ليها
بمد ايديا للقمره
خلاص للقمره نطفيها..!
#ابراهيم_جابر
ي عم فالنتاين ...تعال
ده منو اللي قال الحب
شعارت وانفعالات
واحتفال في يوم محدد
الحب تفاصيل اسمي واكبر
من هدايا ومن قلب احمر مورد
الحب شعور واحساس جميل
مشرور ممدد
في بيوتنا وفي سلامنا
البلتق النضم المقدد
والحب وقت تقعد تطايب
في المجهجه والمشرد
الحب وكت تلقا البخاصمك
والبسالمك بي سماح قولك بيشهد
الحب حبيب وحبيبه
كاتبين في سناريو حياتنا
احلي حوار ومشهد
هل بتقدر بابتسامه
تزيل حزن زولا عزيز
بي الشوفه فرهد
هل بتقدر ترسم الفرح الملون
في شوارع ضلمت احساسا سود
هل بتعرف كيف تقالد القمره
في الليل الطويل والهم موسد
ي عم فالنتاين تعال
خش نعلمك المحبه
في مدرسه استاذ محمد
#محمد_المهندس
وأناكنت ديمه بعلما
إنوالحزن زاد الفرح
والفرحه نفسها مؤلمه
والعافيه أسمح منها
حتي لوكانت بلسما
والشمس في توب من حلال
والقمره أكبر مجرمه!
وكضابه مابتحلب لبن
ومليانه زيف ومهضلما
وممسوخه مهما إتبرجت
ماذي مصابيح السما
والسمحه مي سمحة وشي والشينه جنها تمتمه
والقمحه من طينه وعرق شن أحلي منها وأطعما
والناس سواسيا كالمشط
والحره دينا ملجما
والقدره مابتنفات شبر
والستره ميها الكمكمه
وكتيرعلي السم ناس تعيش وكتير تخنقك سمسمه
مالحلوه ماحلوة طعم والمره ربنا قاسما
والقسمه مابالإيد كمان الإيد هي ذاتا مقسمه
أصبع صغير وأصبع كبير وأصبع وسط واصبع نضم وأصبع بدخل خاتما
وتفرق بداية الشوق كتير وكتين تصل للخاتمه
ماالريده بتشوف بي تحت! والحب موشح بالعمي
ومابفهم النورإلا زول عاش في دياجرمظلمه
النجمه مابتعني الوضوح والعتمه ميها الهضلمه
والوشمه مانزف الجروح والبسمه عز البفهما
والنسمه في الصيف لوتفوح تحرق حشا البتنسما
والوجعه بارده علي الببوح وتسل رويحة البكتما
والروح بتمرق مابتموت والجته بتقيم مأتما
ونحنا إنعكاسات للنجوم
والواطه ضل راميا السما
#احمد_الريح_زحزحة
نسمتين في ضل غمامة
ارتحالن هيج الكون
بسمتين ومع السلامة
وزعن في الواطة كم لون
طين بداعب في خضارو
دس خطوك جوة في التون
المحاذير الشديدة
شتتن في رأسي كمون
المسارات البعيدة
كل صعاب الدنيا بتهون
كيف مزاجاتي الفريدة
ظاهرة في ضحكة عيون
التفاصيل الحميدة
شايلة ظن احساسها ماعون
زي مشاعر فرحة جاطت
رأس حبيب في غربة ممكون
المسافة البينا كم ميل
ماها تقييم للمسافات
المحبة البينا كم ليل
ما بتفرق في الحسابات
باقي لي في شوقي كم حيل
كم مشاعر وانفاعلات
افترضت محبتك سيل
شال تعب كل المحطات
خش بين اوجاعي فتح
بين جرح والتاني وردات
#ماجدولين_سعد
متشابهانِ
لا في اللونِ لا في الشكلِ
لكن في الحنينِ الآسرِ
من أولِ اللقيا تعالت زفزةُ
حتى هوت
قبلَ العِناقِ العاشرِ
مدَ اتساعِ الحُلمِ قُربَهما
بِساطاً يستوى
عند الفؤادِ الشاغرِ
سَعةٌ توزعُ دُخرَها
رَوحٌ ورَيحانٌ
على سربِ الرحيقِ العابرِ
يرتاحَ في دفئيهِما سفرُ الحبارى
يزدهى وجهُ البسيطةِ
باختلاجٍ ناضرِ
خَطاهما كتبَا بصدقِ سجيةٍ
"متشابهانِ"
فلاقتِ ألابياتُ لحناً في مقامٍ نادرِ
كفَّاهُما قَسمٌ ينُصُ على الوفاءِ
اذا اختلى نبضُ رقيقٌ
باشتياقٍ غامرِ
إقرارُ محتاجٍ لمجتاحٍ
تَسربلَ بالهدؤِ
وخافقيهِ على هديرٍ ظاهرِ
كلُ الشروطُ مجازةٌ
إلا غيابَ الروحِ
في قلبٍ تهيأ بالرفاءِ العامرِ
ما ضَنت الرؤيا ببُعدِ الضَفتينِ
ولكنْ الأنسامُ فازت
في مناخٍ خاسرِ
من بينِ آلافِ الوجوةِ
تآلفا في لوحةٍ
حازت على قصبِ السباقِ الظافرِ
كل الحواس تطابقت
أبعادُها في هدأةٍ
حدسٌ يسابقُ ضحكتينِ بخاطرِ
لا لم تكن صُدفاً تحثُ الغيمَ نَزاً
بل شعوراً
يستفيضُ مع إناءٍ شاكرِ
في ليلةِ الرؤية تَماهَا
هالة وهلالِها
فجرٌ يؤذنُ بانعتاقٍ من فنارٍ حاسرِ
لهُما وما للناسِ شبَ الوعدُ
منذُ البدءِ في كنفٍ وفيٍ
والنهايةُ بابتداءٍ وافرِ
#محمد_المهندس
#متشابهان
إنت خليل / فرح ،
وإنت حبيب و وردي ،،
في الزمن الجرح ،
وإنت الماندولين ..
لا ماها (خليل فرح)!
ولا في بالي (وردي)!
يا الود الأمين ..
ماااا (ود الامين) ،
مالك ياخ كده ؟!؟!
اجي اكتب جنابك
يجوني المطربين ؟!
إنت لحن شردته ،
من نقريش كروسه ،،
شالا (خدر بشير) ..
(لا الحاحاي بيمنع ،
اصلي لمن ادور اجيك ،،
حين بدع خدير ) ..
(بادي) الاستهامبك ،
اعترا حالو احوال ،،
شالك بحا حسوا ،
في النفس الاخير ..
يا مِحن (النَعام) ،
النطَّق سِلك ،
عينيك يا أعزا ،
اتسمت طنابير ..
يا أسمر بريدك ،
اذان الاذاعة ،،
وخوجَلة المسادير ..
حنان نيلك مَعَزه ،
شذى زهرك ألذه ،،
يا لحن المصير ..
#محمد_الشيخ
من ذا الذي غشانا
سرق الحلم صحانا
صبحنا بالجبخانة
مسانا بالجبخانة
فطرنا بالبازوكة
زي التقول مفروكة
بالراجمات غدانا
من ذا الذي غشانا
اقنعنا إنه الدانة اقصر طريق للمركز
يلقى المهمش خانه !!
دارفور قضية حب
و الحب عطية الرب
ارفع إيديك ولضم
الدم بحن للدم
ارفع إيديك للشم
و معايا قول يا رب..
#ابراهيم_جابر
ﻳﺎﺭﺍﻛﺒﺔ ﺧَﺴَّﻤﺘﻚ
ﻋﺸﺎﻥ ﺧﺎﻃﺮ ﺍﻟﻐﻼﺑﺔ ﺍﺗﺮﺟَّﻠﻲ..
..
ﺍﻟﻨَﺺ/
ﺍﻟﻨﻴﻞ ﻛَﺴَﺮ
ﻭﺍﻟﺴﻴﻞ ﻋَﺼَﺮ
ﻭﺍﻟﺤﺎﻟﺔ ﺻﺒﺤﺖ ﻓﻲ ﺧﻄﺮ
ﻭﺍﻟﺮﺣﻤﺔ ﻓﺎﺿﺖ ﻣﻦ ﺳﻤﺎﻙ
ﺇﻻ ﺍﻟﺒﻴﻮﺕ
ﺷﺎﻻ ﺍﻟﻤﻄﺮ
ﻣﺎﻳﻮ
ﺍﻟﻜﻼﻛﻼﺕ
ﺍﻟﺠﺰﻳﺮﺓ
ﺍﻟﺠﻴﻠﻲ
ﻣﺪﻧﻲ ﺍﻷﺯﻫﺮﻱ
ﻭﻋﻴﻴﻴﻴﻚ
ﻳﺎﺃَﺑﻮﻣﺮﻭﺓ ﺍﻟﺤﻘﻮﻧﺎ ﺍﻟﺤﻴﻞ ﻓَﺘَﺮ
..
ﻫَﻲ ﻳﺎﺣﻜﻮﻣﺔ ﺇﺳﺘﻌﺠﻠﻲ
ﺷﺎﻥ ﺍﻟﻈﺮﻭﻑ ﺍﻟﻘﺎﺳﻴﺔ
ﻭﺍﻟﻔﻴﻀﺎﻥ ﺩﻩ ﻳﺎﺥ
ﻛﺎﻥ ﺇﻧﺠﻠِﻲ
ﻳﺎﺭﺍﻛﺒﺔ ﺧﺴﻤﺘﻚ
ﻋﺸﺎﻥ ﺧﺎﻃﺮ ﺍﻟﻐﻼﺑﺔ ﺇﺗﺮﺟﻠﻲ
...
ﺍﻟﻨﺎﺱ ﺑﺘﻐﺮﻕ
ﻭﺍﻧﺘﻮ ﻭﻳﻦ؟
ﺍﻟﻔﺎﺷﺮ
ﺍﻟﻔﺎﻭ
ﺍﻟﻀﻌﻴـﻦ
ﺑﺎﻟﺬﺍﺕ ﺟﻨﻮﺑﻚ ﻳﺎﺣﺰﺍﻡ
ﻗﻮﻡ ﻳﺎﻟﺤﺴﻦ
ﻗﻮﻡ ﻳﺎﻟﺤﺴﻴﻦ
ﻭﺍﺟﺐ ﺍﻟﻮﻃﻦ
ﻻﻣﻦ ﺗﻘﻮﻡ ﺍﻟﺴﺎﻋﺔ ﺩﻳﻦ
..
ﺧﻠﻮﺍ ﺍﻟﻐَﺮَﻕ
ﻭﺍﻟﻘﺼﺔ ﻣﺎﺗﺼﺒﺢ ﻛﺘﺎﺑﺔ
ﻭﺍﺗﻔﺎﻗﺎﺕ ﻓﻲ ﻭﺭﻕ
ﺷﻮﻓﻮﺍ ﺍﻟﺸﺮﻭﻕ
ﺍﻟﻤﻨﻮ ﺿﻮ ﻫٰﺬﻱ ﺍﻟﺒﻼﺩ
ﺑَﻖُّ ﻭﺷَﺮَﻕ
ﻳﺎﺑﻮﺭﺳﻮﺩﺍﻥ
ﻳﺎﺩﻗﻨﺔ
ﻳﺎﻋﺜﻤﺎﻥ
ﻭﻳﺎﺗﺎﺟﻮﺝ
ﻭﻳﺎﺗﺎﺭﻳﺦ
ﻭﻳﺎﺩَﻡ ﻳﺎﻋَﺮَﻕ
..
ﺣَﺮَّ ﺍﻟﺠﻮَﻯٰ!
ﻭﺑﻴﻨﺎ ﺍﻟﻬﻮَﻯ!
ﻟﻴﺶ ﺍﻟﺨﻼﻑ
ﻟﻴﺶ ﺍﻟﻨﻮَﻯٰ
ﻟﻴﺶ ﺍﻟﺤﺮﻭﺏ
ﻭﻗﻠﺒﻨﺎ ﺑﺎﺍﻟﺒﻴﻦ ﺇﻧﻜﻮَﻯٰ
..
ﻳﺎﻣﺴﺘﻄﻴﻊ
ﺟﺒﺮ ﺍﻟﺨﻮﺍﻃﺮ ﻣﺎﺑِﻀﻴﻊ
ﻟﻮ ﺇﻓﺘﺮﺿﻨﺎ
ﺑﺈﻧﻮ ﺟﺎﺭﻙ ﻛﺎﻥ ﻣﺮﻳﺾ
ﺗﻘﻌﺪ ﺗﻌﺎﻳﻦ
ﻭﻻَّ ﺑﺘﺸﻮﻑ ﺍﻟﺪﻭﺍ؟
...
ﻧﺤﻨﺎ ﺑﻴﻠﻤﻨﺎ ﻓﺪ ﻭﻃﻦ
ﻓﺪ ﻣﺤﺘﻮَﻯٰ
ﺷﺎﺭﻋﻨﺎ ﻭﺍﺣﺪ ﻭﻣﻌﺘﺪﻝ
ﻳﺎﺥ ﻟﻴﺶ ﻟﺰﻭﻡ ﺍﻹﻟﺘﻮﺍ؟!
ﻧﺮﻗﺺ ﻧﻐﻨﻲ ﻣﻊ ﺑﻌﺾ
ﻧﻮﺑﺔ ﻭﺑﻨﻲ ﻋﺎﻣﺮ ﺳﻮﺍ
..
ﻳُﻤﺔ ﺍﻟﻮﻃﻦ
ﻳﺎﻫﻮ ﺍﻟﻮﻃﻦ
ﻭﻭَﺷﻴﻨﺎ ﺑِﻲ ﻃﻴﻨﻮ ﺇﻧﻌﻄﻦ
ﺣﻖ ﻛﻠﻨﺎ
ﺣﻖ ﺍﻟﻔﺼﻴﺢ
ﺣﻖ ﺍﻟﺮَﻃَﻦ
..
ﺣﻖ ﻛﻠﻨﺎ
ﻭﻟﻮ ﻛﻠﻨﺎ ﺻﺤﻴﻨﺎ
ﻭﺿﻤﻴﺮﻧﺎ ﺗﻤﺎﻡ ﻓَﻄَﻦ
ﻣﺎﺑﻨﻨﻬﺰﻡ
ﻣﺎﺑﻨﺨﺘﺼﻢ
ﻣﺎﺑﻨﻨﻘﺴﻢ
ﻭﺗﺒﻘﻰ ﺍﻟﺨﺮﻳﻄﺔ ﺇﻳﺎﻫﺎ ﺫﺍﺗﺎ
ﻭﺍﻹﺳﻢ ﻳﺎﻫﻮ ﺍﻹﺳﻢ
..
ﺳِﻴﻦ
ﺳﻮﺡ
ﻭﺳﻮﺭ
ﺳﺎﺣﺔ ﺳﻼﻡ
ﻭﺍﻭ
ﻭُﺩ
ﻭﻭَﺭﺩ
ﻭﻭﻓﺎ
ﻭﻭﺋﺎﻡ
ﺩﺍﻝ
ﺩُﻑ ﻳﺪﻕ
ﻳﺮﻗﺺ ﻋﻠﻴﻮ ﻛﻞ ﺍﻟﺤﻤﺎﻡ
ﻣَﺪ
ﻣَﺪ ﻣﺴﺎﺣﺘﻚ ﻳﺎﻭﻃﻦ
ﻻﻧﻌﻴﺶ ﺟﻔﺎ
ﻭﻻﻧﻌﻴﺶ ﺧﺼﺎﻡ
ﻧﻮﻥ
ﻧﻮﺭ
ﻧﻀﺎﻝ
ﻧﻘﻄﺔ ﻧﻈﺎﻡ
..
ﻭﺍﻟﺤَﻞ ﺃﻣﻞ
ﻗﻤﺮﺓ ﺑﺘﺰﻳﻞ
ﻛﻞ ﺍﻟﻈﻼﻡ
ﺍﻟﺤﻞ ﺟُﻤَﻞ
ﻛﻠﻤﺎﺕ ﺳﻤﺎﺡ
ﻣﻦ ﻛﻞ ﺯﻭﻝ
ﻟﻲ ﻛﻞ ﺯﻭﻝ
ﺗﻨﻬﻲ ﺍﻟﻤﻼﻡ
ﻭﺍﻟﺤﻞ ﻋَﻤَﻞ ﻗﺒﻞ ﺍﻟﻜﻼﻡ
..
ﻗﻴﻮﻡ ﻭﺣَﻲْ
ﻳﺎﺃﻟﻠﻪ ﻟﻲ ﻫﺬﺍ ﺍﻟﻮﻃﻦ
ﺃﻫﺪﻳﻬﻮ ﻣﻦ ﺟﻮﺭ ﺍﻟﻈﻼﻡ
ﺷﻤﺴﺎً ﺗﺸﻊ
ﺗﺒﻘﺎﻟﻮ ﺿَﻲ
ﺃﺭﻭﻳﻬﻮ ﺭﻱ
ﻭﻳﺎﺍﻧﺖَ
ﻳﺎﺩﺍﻙْ
ﻳﺎﺃﻧﺎ
ﻭﻳﺎﻛﻠﻨﺎ
ﻋﻠﻰ ﺍﻟﻠﻪ ﺣﻴﺎ ﻋﻠﻰ ﺍﻟﻜﻔﺎﺡ
ﻭﻳﺒﻘﻰ ﺍﻟﺸﻬﻴﺪ ﻣﺎﻣﺎﺕ
ﻭﺣﻲ ﻓﻲ ﺍﻟﻔﻜﺮﺓ ﺣﻲ
ﺣﻲ ﻳﺎﻭﻃﻦ
ﺣﻲ ﻣﻦ ﺟﺮﺍﺣﻚ
ﺃﻭﻭﻭﻭﻭﺏ ﻭﺣﻲ
ﺇﻳﺪﻙ ﻋﻠﻰ ﺇﻳﺪِﻱ ﺍﻟﺨﻼﺹ
ﺇﻳﺪﻙ ﻋﻠﻰ ﺍﻳﺪﻱ ﻭﺧﻼﺹ
ﺷﺎﻥ ﺍﻟﻮﻃﻦ
#احمد_الريح_زحزحة
علي وعدك
بقينا نقوم
يحوم جوانا حس اللوم
ونقعد نبقى في بكرة
البقالنا سموم
نعاين في ملامحنا
الملانة هموم
ونستني ابتسامتنا
البقت بتجينا بالصدفة
تغيب ايام تطلنا لحظة في فد يوم
هديلك سنتين مراقات
يسون قج
علي هم العزيز الكان ركيزة
وبين ندايدو وهج
هديلك قرقرابن فوق
يرجن رج
ولا شايفات ولاد الشارع
الرايحين بنيات الوجع لافات
يسون خج
دميعات الرجال نزلت
تنقط في التراب تنفج
مبوبرة وجعتك ساكت
سكاتك في الحقيقة خمج
ونضمك ما بجيبلك شئ
اذا كان المعاك اصنج
هو شن فايدة ونستك بي
وخوفك مالي اوصالك
وماليني العليك حرج
اظنك ما بقيت مني
بقى الوعد القبيل اعرج
فهل لسة المراح راجيك
وهل ضل الحبيب قاعد
اظن ضلو العليهو عرج
طلع منو
معلق في سما الاحزان
بلد ما فيهو غير اخرج
يطردك في نصايص الليل
تلملم باقي دمعاتك
عشان في غربتك تحرج
هداك النيل يعاين سااااي
ومويتو الجارية تتموج
تشيل في وجوهنا جواها
تسوقنا صور
علينا الدنيا تتفرج
دحين ما باقي لينا كتير
بقينا صغااااار ولا بنرجي الهبوب تكتر
مع النسمات بنتدحرج
ده حدو متين
متين الضيقة دي بتفرج
متين ترجع سمح تاني
نغني عليك سوداني
المحكر جوة وجداني
المسكر بي حلواتنا
العزيز الكان ركيزة
وبين ندايدو وهج
#ماجدولين_سعد
الجالوص
بونس حيطة الجيران
ف ضُل مطرة
قالت لمبة في ناصية عمود للضو
اريتني اكان بقيت فانوس
احوم بالنور مكان العتمة
بدل مسجون مكان واحد
وافلي من المروق السوس
هو ذاتو الواطة غمرانة
ليها سنين
موية تفتش اليابسة
والنيل مارقة منو عروس
تكوس لي زفة الدنيا
والحب في حداها يكوس
يدفق لينو حِنيية
لابس الخضرة نضارة
نضارة بهجة صُبحية
قاعد يدي فيها دروس
عن الثالوث
وعن باخوس
وعن كيف اتهلك نمرود
بي ناموسة من ناموس
رخت الغيمة اضنين السمع
للكون
عشان تعرف شنو الحاصل
وتفرز منطق المطرة
من المحسوس
#عاطف_شمبات
خلي الجرح يبرى
حتان تطبق الحي
من نار هواك ابرأ
ساكن جديد في الحي
فوق الحلق عبرة
ولعت جمري الحي
يا صاحب الجبرة
بيك القدير الحي
كل ما اقول مشتاق
بتزيد بعادك كي
حني العليك ما راق
ليه تاني خالف الكي
زي لمعة البراق
قلبي السحاب الني
صابر هناي ما حاق
يا داااب حنينك ني
امهلني لامن افيق
واهملني زي كل شي
امسي وابيت في ضيق
اهرد حشاي بالشي
قلبي الهواك رقيق
محتاج سقاية وري
مالك رضايا رقيق
مالك جرمت علي
#عاطف_شمبات
أبراك في كل الأراضي
شِبر .. شِبر
أبراك زي درويش
ودِر
في حضرة النوبة
الذِكر
وامرق عليك من زحمة
الدنيا الفراغ
زي التقول دافرني
نبي الله الخِضر
#عاطف_شمبات
حاجة في النص
بين مهمة وما ضروري
زي مسافة تنفخ النار
من نفس قلب السجارة
او تجابد ليكّ قشة
تقسم الجد بالهظار
اوعك تموت
وانت في بال المقاومة إنتحار
حاجة نص نص
زي كأنك كنت قاصد
تكتب النَص
كدا ب إختصار
#عاطف_شمبات
اقول ليك سر؟
إذا فريت طرف حنك علي قلبي
بفر بالفرحة جنحاتو
بحلق في سماك ريدة
أمان ودفا
بزيد الفة
حنين دفاق
سلام ووفا
بلاك بتعدل الكفة
وسيم ووقور
شبيه الحور
اذا طليت
بجيك يا غالي بي لهفة
بقول ليك دون خجل
مشتاقة تبسم لي
بتضحك بلطافة علي
اظنك ما عرفت البي
مشاعري معاكَ مختلفة
تصدق إني بي عينيك بتدفا؟
ببالغ صح؟
بقيت مجنونة معترفة
وبتحداك دي ما صدفة
#ماجدولين_سعد
للحب عيد"
عند اكتمال_ بدور_ الغرام
و للحزن عيد"
فصل' الدموع_ أفول' الوئام
و للموت_ عيد" و للعيد_ عيد"
و كل' المواسم_ في الكون_ عيد"
و لكنني لست' اعرف' عيدا" سوى مقلتيك
أيا من أهاجر' مني اليك
أيا من تطلين خلف شرودي
و بين ردودي
فما أن أضج' ارتواءا" من الوصل_ حينا"
أضج" اشتياقا" لأن أرتويك
#هتان
الزلزال ضرب وقعو الخلوق في الجُب ..
وجيت شايفاك مباري الفارغة ( عيد الحب ) ..
الحب هسع اهلك أولى بيو يااااا الحب ..
الحب تبني بلدك تمسك ايدها وهوووب ..
وسمح الببني في بلدو لترابو يقش ..
سمح الزرعو نامي ودمو حامي يرش ..
سمح البكرمك في الباب ويقولك خش ..
أسمر ايدو دشنه وكان حلف مابغش ..
غناهو يدمع .. وصوتو يسمع .. ونمو يُشق ..
خت سكينتو في ضراعو وصعوط في الحُق ..
جلابيتو مكوية وبياضها يبق ..
ودخل الدارة يركز وينجلد ويدق ..
#ايمان_متوكل
حبيبه صاح ..!
يا قلبي داير اسألك
لكني خايف اجرحك ..
عشتا الليالي الشينه كيف ..؟
من غير حبيبه تسمحك..!
♡♡
حقك
تلاقي حبيبه صاح
تديك احساس في الصباح
انو الشمس
مبسوطه بيك
زادت عشان جيتك سماح..
وانو البواح ..
كان ما عينيك
والله بس
كان حقو راح..
حبيبه صاح..
لكن بتسرق
وبي صراح
من قلبك المحزون
جراح..
تنشل اناملها ..
دمعتين ...
فصدن خديدك بالنواح...
حبيبه صاح...
تتهجى عينيك الفصاح..
تقراكا صاح
انك..
حبيبها البشبها
في الطلعه
والروح ..
والبها..
في الدمعه
في الضحك
المزاح...
حبيبه صاح..
بتعلمك ..
انو المباح ..
ارواحنا تتقسم الجراح ..
الشهقه..
والنفس الأخير..
شاهي المغيرب
و الصباح ..
حبيبه..
صاح...!
#ابراهيم_جابر
يا بيتنا إنت فقدتني؟
ولا بتجامل فوقي ساي
اها يا البريدك ردتني؟
ولا بتحن شان شايف اساي
ضايرني جنبك خُتني
اقدر اطمن شوق عساي
كان ادهى انك عِدتني
و بورحت فيك صبحي و مساي
لو كُنت إنت ال فُتني
ما كُنت حسيت بي قساي
انا راضية انو تِفِتني
بس شوفة بتبرِّد حشاي
يا شوقي عاد ما كتلتني
لي لمة تفرِد إنتشاي
لي خترة تابى تفُطني
فاجاها قهوة و كيفي شاي
انا قلبي فيك يا موطني
و قلبك ولا عارف الجواي
العبني حِجلة و نُطني
طنشني و إن خارت قواي
و إن كنت حِيلك بِتني
قول يا حليلك من سواي
شجرة هواجسك حِتني
و اديني لُقيا حسب هواي
ضل المطر...
#نهي_الكباشي
بتحاشى المباشر
والبوح اِتمَكَن...
اِنفلتت ضفيرة واِيديك مَشَّطن ...
فرقان السبايب لي كفّك قَرن ...
واِتشابت سبيبة للجاي من نصيبا
سابقَت الزمن ...
من هول المصيبة رجعت لينا شيبة
مليانة شجن....
هاك فَلّي الضهاري تلقاها المدن..
يا رحلة سفاري
في بال الكناري
شاف في الجنة ناري
وفي نارك عدن..
أنا تلميح براري
جراري وبجاري
شبال نصف عاري
بيراود الكِرن..
أو رَيِّف مدينة
الجبنة ورتينة
واللمة الحنينة
ربشة يغني لينا
والشاي باللبن...
قلبي عقاب كمينة
قلبك طوب حراري
والساكن حرن...
بين بايع وشاري
إيديك الأمينة
وأنا بت الخزينة
وسليلة خِزَن...
أََرِّخ للوقايع
في النقش الجداري
الوشم البضاري
قشعرة البدن..
الله براك قاري، أي خلية شارع
غنِّي وإنت طالع
(أمشي وأجيهو راجع )
المين و السكن، في جواي بِمانع
قانون الطواري
ومشروعو الحضاري
كان قفلو الكباري
بَتطرَّف يساري
لاءاتو التلاتة إن رفضت حِواري
بتوقِّع إطاري
ويوتوبيا الحَواري
يا بُري البراري
بتعلِّي التروس
وتِمتحن المَكَن ....
أدِّي اللحظة دِينا
اِنتَ مسيح سكينة
مصلوب في النفق..
رضَّا قلوب حزينة
وأنا آخر حواري
بيعاني المحن، وسلوك انتحاري
بَدَّل طَمْأنينة
بي فوبيا الأرق..
يا نيل جاري فينا
ماجدوى السفينة
للحاري الغرق ، واللابسو الكفن...
دَيِّن لحظة بِيْنا
حدَّثت الخلايا
وايِّ مسام رطن...
ياصِحّة بخاري
قبلانة الحسن ...
حنست الغفاري
ببقالك وطن...
قال ما باختياري
فيك كل الفتن...
نظرة بتطفي ناري
يا السمحة أم عجن( لو كان قليل تبري الشجن
أعرف صفا الأيام وافيق
وانظر جمال تلك الوجن)..
#وئام_كمال