الاسم :- سئلت ذات مرة ما سر ذاك الاسم؟ صرخت ِملأ صمتي المكبوت في دواخل الفنون إنه اسمها حروفه تطايرت تشكلت تألقت تعلقت بشخصي الضعيف فصار اسم شخص ما ... بداخلي. - ريحة البن .
أنا يا ربُّ لا أكفي
همومَ النَّاسِ والأعباءْ
يفرُّ الماءُ من كفِّي
متى أزمعتُ قبضَ الماء
أفتِّش في مدينتهم
،وما أفلحتُ، صفوَ هواء
لو انِّي عشتُ يا ربي
وقلبي صخرةٌ صمَّاء
فلم أعطِ الألى منعوا
ولا استغفرتُ للأعداء
يبيت الحُزن في عيني
ثقيلاً نازفَ الأعضاء
يقيم الليل يقعده
بما قد شاء من أشياء
أنا والشِّعرُ والذكرى
وأحبابٌ لنا قرَّاء
ركضنا فوق عشبِ هوى
وأجهشنا بحفلِ بكاء
أنا يا رب لن أكفي
وأنت إله كل عطاء
فما أوصدتَ بابك دونَ
عبدٍ ضارعٍ بدعاء
وأنت تجيبُ مضطرًّا
بجوفِ الليلة الظلماءْ.
#محمد_عبدالواحد
#ريحة_البن_2023
بمشاركة الأساتذة الأحباب عمّنا العطا على العطا و عزالدين ودالماجدي و محمد السر و محمد الشيخ و احمد الريح زحزح ، استاذ محمودالجيلي.
كل جمعة
#ريحة_البن
#ريحةالبن
#ريحة_البن_2023
#سودانية٢٤
#سودانية24
#سودانية_24
#سودانية_٢٤
.
.
في بت بتضحك
تنسى باب الفرحة فاتح
تنزغم تدخل سحابتين :
واحدة بتصب ..
واحدة ترمي على المسادير
ضلها ..
تبتق شجرتين :
واحدة بتدرس بنات الطير سواة العش ، و طِرِّيق المناقير
والغناوي
و واحدة بتمثل على الضو ..
(خلي بالك للفروع الخدرا ديييك ماش تبقى شُبَّاك
منهمك في ستارة ملزمة بالدساتير)
تبتسم
لي بت بتضحك
تندلع في النيل جزيرة
ينسى تربال مويتو ، واللبقة الكسر سِن طينا هرجي الموج
وثرثرة الدميرة
وتنفعل ريح في بصيرتو
تنطلق أووووو ترعى بي قيد المراكبية
وشِبَاك تنفَرَّ تقتنص الظهيرة
تلاقى شمسين :
واحدة بتحمِّر مسافة الشوق وتاكلا حااااارة جم
و التانية بتخدِّر حنين البت
بعد داك قد تبخِّر حزنها
وقد لأ ..
ف تضحك ..
ينمسح عرق المرق من بيتو خمسة ونص صباحاً
وجاي راجع
بالو في الجاي من مواجع
ينسبق في قلبو خوفين :
خوف على البت
- القراية ام دق
- أضان الشارع الصنَّت وابو مروة الشرد في القافلة خلا ورا الكلاب تنبح
- نضافة البيت
- وتأنيب المراية
و خوف على البلد القدر ما تمد رويسا تجي المناشير
أو يباغت حلمو طير قبل التفاسير
أو تحرِّق روح سحايبو عوارة أمشير
تنسى باب المزن فاتح
ترمي نقطة حزن في خد بت بتضحك في الأسافير
.................
#عزام_عبدالعاطي
داير شقاي ينده علي ؟؟
دايرني كيف أمرق براي
والحِلّه بتشيل الخبر
ويقولوا حايمه تراها ساي
والناس توزع في الكلام
حت في البخصك ليها رأي
#اديبة_احمد
أحبك قربة مقدودة
أحبك مدة محدودة
أحبك خزفية
أحبك صيفية
أحبك طل
أحبك أجل
أحبك شرنقة
أحبك يرقة
أحبك فراشة
أحبك مياسم
أحبك مواسم
أحبك قزاز
أحبك رزاز
أحبك بوري سيرة
أحبك أبنصات جاز
'أحبك حقيقة
وأحبك مجاز'
أحبك حجاز
أحبك بندقية
بحبك سمسمية
أحبك بلاط
أحبك فسطاط
أحبك بالمتر
أحبك بالشعر
أحبك على وجل
أحبك على عجل
أحبك أجل
غمزتي أثر فراش
ضحكتي ؛ ضحك دعاش
أحبك في ال blues
أحبك ocean cruise
أحبك بالموجود
أحبك فارسة
أحبك فرسة
أيوا فرسة عود
أحبك ضفاير
أحبك مساير
أحبك بلا وعود
أحبك مزازيك
بحبك وأزازيك
أحبك بين السطور
أحبك بين الشعور
أكون في المطر ضيفك
أكون بلل صيفك
أحبك على كيفي
أحبك على كيفك
أحبك هنا
أحبك هناك
بحبك
هاك
#محمد_الشيخ
وأنا آسفة داهمني النعاس
وكتين طريتني وجاني رد
وأنا راضيه بحكمك علي
حبل الصراحة بِدورلّو شد
#اديبة_احمد
رضياااانه يملاني الوجع خليها تلتهب الجروح
كان سكتك شوك من أنين الفرحة خليها التروح
لملم سكات الوجعة قبال الضجيج يبقالي روح
مكتووولة ذاته الريده إن قالت تلد نارك قروح
ريحة (بخور )الفرقة مامحتاجة جمرة عشان تفوح
#اديبة_احمد
لحن الغريبة يستفزُّك للغناءِ.
و أنت مزدحمُ المزاجِ ، مُشوّهُ الإيقاعِ
تمنحك الغريبةُ فرصةً لترى ملامحها
و لكن - يا لحسرتها - تراك، و لا تراها
في فرصةٍ أخرى،
ستكتشف الغريبة جرحكَ القاسي.
تطبطِبُ خوف قلبكَ بالعناقِ
فربما
تنمو ملامحُها بصدركَ
مثلما تنمو الحديقة من ثَراها.
ربما.
#محمد_عبدالقادر
ابقي طيبة
ربي يحفظ لي عيونك
و خلي بالك يالحِبييبة
عارفة ما بقدر بدونك
أول امبارح فقدتك
جيت و مالقيت معاي
فاكرة يوم داك يوم وعدتك؟
جيت وجابني الشوق براي
اختلف ميعاد هوانا
كنت اسرع في المشي
كنت بنده بالجوانا
وانتي سامعالك وشي
كنتي اولى تكلميني
انه مفروض نفترق
قبل كنتي تعلميني
قلبي بالشوق يتحرق
غايتو بس ودعتك الله
امشي يتعدلن خطاك
لا في يوم تغشاك عِلة
لا يغيب نور من بهاك
ف ابقي طييبة
#عاطف_شمبات
إن كنت صاح هاماك أكيد
ماكنت غادرت البلد
قول ليّا ذنب الريدة إيه
تنجب من الأوجاع ولد
ما أظنو زمن الريد يفيد
لو شوقنا للأوجاع قلد
وأنا بيك حسيت بالأمان
وقليبي منك إتولد
أنا حاسة بلهفة غناك
وإحساسي بيك توبو إتفرد
أسقيني من فرحك عشق
شان ريدتي ليك ماليها حد
كيفن ح تدخل دنيتي
وإت ريدك إستوطن بجد
وأنا عارفة قلبك في العشق
مابخلف الشوق لو وعد
خسران وحات الساب هواك
والبهمل إحساسك فقد
ياغالي جيت لروحي كيف
شردت من بالي الزهج
وهج الجمال أنا شفتو فيك
وأنيني من الفرحة هج
ما إنت حركت الجواي
سعن الحروف خاجاني خج
خليتني أتمايل حنين
جنّبت أشواقي الحرج
كيفن عيون الأمنيات
رغم الخواطر إشتكت
وأنا من فراقي الشفتو فيك
صوت حزني لانام لا سكت
وأنا غير معاك مالي زاد
بحر الصبر جواي جمد
خلينا من وجع الفراق
باكر نقول صفحة إنطوت
دنا هسه رويانات فرح
وأشعاري بالتحنان روت
دنا هسه رويانة فرح
إيد المواجع إتلوت
يكفيني من الكون هواك
وحروق جراحي البيك شفت
وأنا آسفة داهمني النعاس
وكتين طريتني وجاني رد
وأنا راضية بحكمك علي
حبل الصراحة بدورلو شد
أهو باكر إبتدأ بغناك
وياصباحي الفلو ورد
وأنا كيف صباحي يكون بلاك
يازول دخلني ومامرق
وأنا زوله أدمنتك عديل
لمن عيون الريد صفت
شتت ريدك في الحروف
وأفكاري بيك إتجمعت
والغربة زادت فيني خوف
وعيوني بالشوق دمعت
#اديبة_احمد
عرقك يا ابوي نُقّاطُو في البلد الغريب
والدرب البسوق للغربة ما ظنيت يجيب
أبكي عليّكا مابين حالي وعيون الحبيب
ألف وطن ممدد يابا بين قسمة ونصيب
#ايمان_متوكل
مصيريةًُ أنتِ
كالموت وهو يشد العَميق إلى الأعمقُ
وشفافةًُ أنتِ
كالفرق بينَ المضئ من النار والمُحْرِقِ
#محمد_عبد_الباري
أنا يا خيال اللون ،
في خاطرك اليرقة ...
أنا يا يقينا خديج ،
لو كان نكر ورقة ...
أنا ما بلوم الساكس ،
لو غنَّا في الفَرَقَة ...
أو لو فلوت عطشان ،
قام لحَّن الورقة ...
#محمد_الشيخ
عايز اقول ليك
كلمة سِر
كل ما جابوها سيرتك
حتى في نص الكلام
روحي من الشوق تفِر
حاول اطويني في قليبك
لو ترد بس بالسلام
ومرة فُِر
يالشغلت حنيني بالصٍح
ما بخاف انا من ملام
ريدي كل ما يوم بصِر
اصلي ما داسيهو ريدك
فيني لي حد التمام
اقل نظرة هواي يقِر
ابعد اقسي وزيد شقاي
قلبي بعدك اصلو صام
وخلي حاسدنا ال يقِر
زيدني هجران واوعا ترتي
وتفتكر البينا عام
شدة الشوق ال تحِر
#عاطف_شمبات
ينثر البن حبّاته شعراً، وتفوح رائحته حُباً ، للسودان 💙 ، في حلقة جديدة
ببهاء أستاذنا محمود الجيلي
وفيض الأساتذة الجميلين جداً إبراهيم جابر إبراهيم و محمد الشيخ و أحمد الريح زحزحة و محمد السر و ماجدولين سعد جادين
#ريحة_البن_2023
#سودانية٢٤
البنات ديل هن حنيني
وراحتي لمن حالي يغلب
ديمة طمانات انيني
البنات ديل
قلبي بالجد
واحدة فيهن قلبي كلو
وواحدة قاعدة تكون وتيني
البنات ديل قاعد اريدن
عندي حزمة حِن
مخزن في وريدن
بستلف القوة منو
كل ما ضاقن سنيني
#عاطف_شمبات
اظنك غافلة من شوفي
وعاملة من الطناش حُجة
انا البكتب حروف اسمك
وشوقك فيني بتهجي
ضارب فى النسيج الحي
وفارض فى الحواس ضجة
هو بالتييلة النفس شلتو
وكت صوتك ملأ الفجة
وحتحت مني باقي الحيل
شعرت الدنيا تترجي
بقيت يوماتي عِز الليل
اسامرو وبيهو اتحجي
فيا ست الغناء الجواي
اطوفك كل عام حجة
وما بين مروتك وصفاي
احس الدنيا تتفجّٕ
وتمرقي من وسط زمزم
شرابك سلسبيل ونجاة
#عاطف_شمبات
أظنك يا جميل شكيت
وبدلت المحنة جفا
تعال راجع كفانا عتاب
كفاية نعيشها خوف وخفا
وهي الدنيا شِن فيها
غير ما نعيش حنين وصفا
قلبي الكان دوام زعلان
مسامحك وذاتو هسة عفي
تعال راجع نمش احباب
ما قدر المشيتو حفا
احساس انت جنبي اكيد
اكيد عارف بعيشو دفا
وياهو القالوهو في الريدة
عطا واخلاص وحِن ووفاء
نور عينيَ كنت دوام
من بعدك حنيني طفا
#عاطف_شمبات
قعدتنا تاريخية
انت البراك انت
كُلك معاي انا
بيناتنا شوق واشواق
اعمارا فايتة سنة
قعدتنا ما ساهلة
اللحظة ما قادرة
الواطة عودا تنى
الكون وقف بينا
اليوم دا بالتحديد
في حق رفاقو جنى
ناديتني:
ناخُد صورة؟؟؟
..
طيب تمام ناخُد
لكن أقول معليش
لي اللحظة في الاول
للكون وللتاريخ
لمن تجي الصورة
ماف كون
وماف تاريخ
مهما في استثنائي
أو وضع ما بتكرر
الصورة حالا طواري
بنسى المكان واللحظة
نسيان عشانا مبرر
عاينت للكاميرا
وفي بالي كان وشي
مُحتاجة لي بُدرة
والطرحة ما زابطة
ممممم
يا زولة ما قصة
عاديتي هي القُدرة
عاينت للكاميرا
متأكدة الكاميرا
عاينت بي قوة
رسلت في الصورة
احساس حضور طاغي
انا حية بي جوة
عاينت للكاميرا
ونسيت منو الجمبي
انا كُلي للصورة
ما كان بعاين ليك
ما كان بفكر فيك
ما كان في بالي اللحظة
لا كنت حاسة بغيري
انا كلي للصورة
انا
كلي
للصورة
كيف تطلع الصورة
ومافيها مني انا
غير ما يخصك انت
؟؟؟!!!
اشواقنا
تاريخنا
إلفتنا
كيميتنا
ونطلع بنتشابه
خدرتنا تتطاقش
وشوشنا تتلامع
وعيونا مبحوحة
ما قلت لي انو
صورتنا مفضوحة
#غدير_شيخنا
يا الحالي نضمك طوف
في كل اوصالي
زيد في وصالك لي
او جافي تحلا لي
#ماجدولين_سعد
سُكْنى الطيور الريح ،
مافيش فرع وطنا ...
تعرف فصيح الحزن ،
مره السلام رطنا ...
_إسفنجة الأوجاع_
نقّط سراب عطنا ...
لو مافي بال للنص ،
او ما في بال مغنا ...
في القصة مافيش طير ،
القصة طيرة انا ...
#محمد_الشيخ
كل واحد عندو قسمة وفي العيون مكتوب نصيبو
والقلوب بين ريد و دمعة ومافي زول بيختار حبيبو
#محمود_الجيلي
يا للمصيبة !
أستطيعُ كتابةَ الأحزانِ
أصنعُ من دموعي دهشةً
و من الهزائم نسخةً مني
و من خوفي ملاذاتٍ كئيبةْ
في الجانبِ المملوءِ من قلبي
أنا خالٍ من التعبير .
وجهكِ يهزم الكلماتِ
عيناكِ انتصارٌ للحياةِ.
فكيف
أكتبُ
" يا حبيبةْ "
#محمد_عبدالقادر
دقت بابنا بشويش؛
قاصده ف شكل معليش..
نضم الجاهله نُقاع؛
خطاها تكنو هبيش ..
الطاووس تمَّحن؛
توبا المحن الريش..
مشيها مشي الحمامه؛
نققدي قلبي مو عيش..
و أحب
( توارنا )
كان جابك علينا صباح ..
أريد
توب
الصلاه اللابساهو
والخجل البزيدا سماح ..
اصابعك
بكملن
بالخجله
يا الحاجه الوحيده الصاح ..
عليك
مولاك
تقعدي
تفطري
يبقى البينا ريد وملاح ..
ماشاء العمر بهواك
ماشاء الدرب بمشيك ..
ماطال الغياب برجاك،
بي طول الصبر برشيك ..
سميتك (سلام) هنداك،
اذاً واجب علي أفشيك ..
انا الشايف برق حنداك،
اذاً وعد الطراوه وشيك ..
#محمد_الشيخ
انخيني ..
قبل البتبته
انخي ..
اللي
مافي
الفيني
وين كان حتتا ..
سخيني ..
انتف
ريشي
كان تقل الجناح ..
ما اضمو بي علاتو
اعنيبو الوطه ..
بخيني ..
مش
أمكن افيق؟
وانسلا
صحوي من الغتا ..
تمرق
( كراعي) من الحريق ..
وصبيه
ترجع
تبتا ..
تقدل
علي الأرض السلام
وتنزل
عليها مسرتا ..
تغزل
خدود الابتسام
بي
خيت
خدود متكفته ..
انخيني ..
قبل البتبته ..
دا البيكي
صفح
النيمه
للضل
والحطب ..
ودا البيا
شرح
الغيمه
غير بي مويتا ..
#يس_النضيف
لو شاعر السماحة
لي روحو انتبه
نرسيس في المراية
كان شاف الشبه ...
ليه؟ من دون إجابة
لو قِسمة المجاز
ياني إذا الأغاني
مسجونة نشاز
أيوبي الوتيرة
والزار اهتزاز
الطار مع جنابو
هل ختم الجواز؟
لو ربط الصبابة
بي كلمة عُزاز
كان ميّز ضبابا
من خلف القزاز
اللاحق سرابا
ما بارى الرزاز
يا نار الحرابة
والمابيننا جاز
تترنح سحابة يتساقط وَلَه...
أسئلة المشارِب
عن بلل التُرب
تسبيح البِراقب
ويقول (هذا رب)
في جوطة العواصف
وفي زحمة مَهَب
أفكار القوارب
والشك في الخشب
المال للأجانب
ما أغنى وكسب!
غير أرض الحبايب
ما تحت القُبب؟
النيل لو بعاتب
مازار المصب
الوجع المصاحب
(ما عزّ الطلب)
مابين باش وكاتب
داخل من أحَب
حركت المعارف
مكنيكا عصب
محفوظ المصاحف
مكتوب الأدب
غار ورسول وصاحب
ماعيب الهرب
في كل المذاهب
إدمانك وجب
ياغوث في المراتب
أدمنت التعب
الطين للقوالب
والروح للشَّرَه....
في هذا المقطَّر
كم صانع تجلى
كم درويش نده؟؟
الآخر مراية
ماجات من عَتَه..
لو شاعر السماحة
لي روحو انتبه
نرسيس في مرايتو
كان شاف الشبه..
#وئام_كمال
صورة بي تلفون هواوي
فيها حن وصدق ولهفة
وريده نور احساسا ضاوي
وصورة بي ايفون حداشر
في مكان فاخر وقاشر
الا احساس ناسا فاتر
#محمد_عبدالواحد
شاف بي عينو
ما شاف الحقيقة
بارى الموية
واتناسى الحريقة
خنق الوردة مامدت رحيقا
فتش غيرا ؟؟
مليانة الحديقة ...
غنّت جنّة
ود الجنة لامن غنى كان في بالو آه ياليل ..
هي عدمانة الليالي الحية شان نورا بتعاير الويل ؟!!!
طينو الحنّ أسرج خيل
هبط إحساسو فوق تعب القوايل ليل
ما بتتنى؟
الراس هاش وفوق الوحي شايل شيل
أنَّت أنَّ ...غنت جنّ
وابتدت المواويل
موت أحمر وأبدي قليل ونيران إلا برضو صديقة...
فتش في كنوزا بريقا
نقنق عاج
ما فاهم الفرق بين البِدُق الواطة والبختار حروبو
طريقة..
ضج و وهاج
صياد صدفة..... قلبي السلّم
خايف فرقتا ونشّابا
كل ماغرفة تقفل بابا دقَّ وسلم
يابا !!يقول ليه: ضيقة الدنيا.. ما تزيد لينا ضيقا ...
آدم وحوا جدلية الخليقة تفاحة ومنافي أنيقة..
عايز أبَدي
آه وين....دنيا
عطشان أدّي
ما باللقيا
مديت يدي
غمتت غنية
قبلي وبعدي
وين السقيا
حُماك
بردي
منك رُقية
وحدك وحدي
غيمة و ريقا....
حِني و أرضي
ردت بي رضاها الأرضي
عاشقك برضي
قبلة وفيها لبيك فرضي
كلك
بعضي
دمي ونبضي
مجروح إلا ما من رفضي
من حدة عقيقا...
كرهان الصباح
ماقال صباح الخير
عسكر كلمة ماتديم قفاك..وتتهم المصير
شاعر وروحو منطق طير
يا طوق الحمامة وظاهري التفسير
(يا إله فني )
شنو الأخون من المادية في التعبير
شان روحك تريقا...
راهب دينو قسوة لينو
شاف بي عينو
ما شاف الحقيقة
بارى الموية واتناسى الحريقة
خنق الوردة مامدت رحيقا
فتش غيرا؟! مليانة الحديقة....
#وئام_كمال