5285
الاسم :- سئلت ذات مرة ما سر ذاك الاسم؟ صرخت ِملأ صمتي المكبوت في دواخل الفنون إنه اسمها حروفه تطايرت تشكلت تألقت تعلقت بشخصي الضعيف فصار اسم شخص ما ... بداخلي. - ريحة البن .
_ سيدي في القصور ما الذي أرَّقك ؟!
-- إنت طالع تثور عاد شنو المرَّقك ؟!
_ هل هتافنا الهناك في حشاك حرّّقك ؟؟
--انت صوتك سنين الغُبن طرَّقك ؟!
_سيدي البحر موج الغرور غرَّقك ؟!
--هاك -تاح تاح تراح- السلاح فرَّقك ؟!
_ ( الشوارع تمور تغلي تهتف تفور )
-- ياخي خلوا الامور يا الهناك كن صبور
_ ( الشوارع تمور تغلي تهتف تثور )
-- إنتو يا البي هناك حبه علوا الأجور
_ ( الشوارع تمور تغلي تهتف تثور )
-- عمرولهم سلاح والضرب في الصدور
_ ( _الشوارع تثور إتنفخ فيها صور_
نحن نفتح طريق إنت أفتح قبور
جيب كتايب ظلام نحن نغتالا نور
إنت جنبك قلم؟ الصباح ده يوم كم ؟
خُت شخيت يا مَقيت
سمّي يوم العبور ..
#محمد_الشيخ
في مثل هذا الليل
أشعر بالهناء
و ينتمي قلبي لعينيك انتماءً هادئاً.
عيناك تكتشفان بُعداً رائعاً للشوق
تشتعل الأغاني كلها بالدفء
بالرقص المثير
أنا أحبكِ
أنتمي ليديك أكثر
لن تشرح الكلمات ما أعني
أنا أحتاج وحياً يا إله الحب
ألهمني.
أنا في حالة الحب التي من بعدها
لا حب يا مولاي أكبرْ
#محمد_عبدالقادر
السمار النار
السرق قلبي
شفتو بالصدقة
عقلي جن وطار
ده منو يا ربي
الضحك رنات
تظهر النونات
تتنعش روحي
السنون لمبات
في الضلام جاهرات
يا عيون بوحي
الخطاو رايقات
شال حنيني وفات
اهدي يا روحي
العيون داسات
شوق سنيني الفات
بالحنين توحي
القلوب هايمات
الخدود نايرات
تشبه القمرة
الحروف حايرات
في اللهيجو فرات
نضمو زي خمرة
العيون لامعات
نورة الراحات
غارقة في سمرة
ساحر النظرات
أحيا قلبي المات
ريدو زي جمرة
السمار النار
السرق قلبي
شفتو بالصدفة
عقلي جن وطار
ده منو يا ربي
#ماجدولين_سعد
غابت عمدا عن يومي شَمِس
لا طل صباح ولا خلتني لأفراحي أمِس
لا طير سبح لا قمري هَمَس...
يابرزخ كل رمادي الكون
انسجن اللون
وانخنق الضي مالاقي نفَس ...
ولو رجعت خطوات الساعات
لي اليوم الفات
لو جمدت اللحظة النظرات
لو غشّ مكان أقدارنا زمان
أو سالت في الذاكرة منامات
لَيْ بس.. لو بس!!!
سردية (لو) منهكة جداً
وخطورة (بس)بتشيل من ذاكرة الأحلام وأماني قُدام لقطات عمداً
وتدسها جوة الواقع دس....
والطيف مخلوق من بين وهمي
بيتسمى على الأرض مسافة
وغياب في منطقو مارسمي
وحضور غيْبي بنأوِّلو مَس..
بحساب النيل
مقرن اتنين واحد فردي
وبحساب الحب
تيدي آفرو اذا غنى لوردي
وبي حساب البي
اللمسة السكنت في يدي
جواها عوالم شارع وبيت
ومكاتب ونادي وزار ومزار
كاهن وأسرار مركب بردي
وسلاسل وقيد طلقة وجندي
صلوات مابين أذّان وجرس..
يانيل خالد دخل المحبوب
تيارو شمال شلالو جنوب
متشعب وكل آثارو ندوب
بتذكِّر بي أصل حضارة
وإنسان أول
مفتاح وهرم
وبترمي ظلالا علي حسرة حاضر منكوب
ورسايل نوب فيضان وترس...
يومياتي بتنتحر الأسوار
بيموت على حدك ألف خلاف
وبغني عشان حبك شعبي
بنشد أعصابنا على الطمبور
يتسرب مننا راب غربي
بتترامى علي أطرافنا جيوش
كم إسكندر وقائد حربي
ولو وشى هدهد ....بنسلم طوعا ملك ونبي
تتدفق نقارة قلبي
يتمايل جن ويغني حرس...
لا شمسي تغيب
لاحضورك تاني نأولو مس...
#وئام_كمال
#الحروب_لا_تقام_على_اجساد_النساء
على قدر الحيرة الفيها .. بين صدك و حبك وقفة
رضيان بي حكمك و جورك .. لو مرة تميل الكفة
تهديني النار بي إيدك .. يا النارك أبرد و أدفى
و تعكر فيني الدنيا .. بي ضي عينيك بتصفى
عينيك سهام مسمومة .. و حيات رمشك لو رفّ
سرحان بين صدك و قربك .. ما بين النيل و الضفة
و جواي القلب يتلفت .. زي الأطرش في الزفة
#محمود_الجيلي
أنا سطحيٌّ لا أتعمّقْ
كاهلُ قلبي
تَعِبٌ
مُرهَقْ
عقلي
يغلي
قلبي
تعبي
بصري
في لاشيءٍ
حدّقْ
مُذ مأمونُ لسرّيَ
أفشى
وأنا أخشى
مذ مسعود دموعي
أجرى
وأنا أدعو قلبي صخرا
مذ غفران أبت أن تنسى
ذنبي
وأنا أقسى
أزهاري لا يعرفها الرونَق
هو سطحيٌّ
لا يتحرّى
لغةَ الضمّةِ نصبا جرّا
حين تعلّق حين تمزّق
أقسم ألا يبرح حُرّا
أنت لخوف الماضي
في مقبل أيّامك تحيا
تظمأ تظمأ
خشية أن تقتلك السقيا
تترك بيتك
كي تقضي الليلة
في الخندق؟
أنا سطحيٌّ لا أتعمّقْ
#محمد_عبدالواحد
هذا العام
جئتُ أهدهدُ الذكرى
فجاءَ الشوقُ غافلني وقام
وضياءُ آمالي ينادي
ياحبيبتي
يا اناشيدَ المحبةِ والسلام
فتمردت خفقاتُ قلبي عن سكونٍ
كنتُ أحسبهُ هدوءاً في المقام
لكنهُ قلبٌ تحداني
وحرضُ عادياتِ الوجدِ
عصياناً على صبري
فزوّدَها بألويةِ الغرام
وهفا شمالاً باتجاهِ خواطري
ناجى الحروفَ وصمتها
ومضى يميناً
نحو دوح الشِعرِ غازلهُ
فغارَ الشعرُ من شِعري وهام
هذا العام
لن يبقى زِمامي في يديكَ
تقودُني يا قلبُ
حيثُ البالُ يلهو
في مساءاتِ التلاقي والهيام
ولن امضي بدون ضيائها
فالعينُ قد شَحُبَت
وليلُ الصبرِ أرهقهُ الفِطام
و لن آتي مطاراتِ التمني
باحتمالِ تغَيُّرِ الاحوالِ
أو ترهيبُ حُلمٍ ما غفا للانهزام
يا ليتني ألقى
علاءَ الدينِ والمصباح
كي نعلو بساطَ الحُسنِ
نفترشُ الوئام
هذا العام
رغم تسابقِ الخطواتِ
في دربِ التمني
وانتظارِ الفجرِ
يخرُجُ من سرابيلِ الغمام
ورغم ما شابَ الهُدوءَ
من احتداماتٍ
وشرخٍ وانقسام
ولأن رَحمَ الأرضِ
يُنبِتُ كل امشاجٍ تُكونُ صِدقَنا
سيظلُ رمزُ الخيرِ بين الناسِ
غصنُ محبةٍ يحدو بهِ
صَوبَ التسامي والعُلا
سربُ الحمام
هذا العامُ يا قيثارتي
لن نستريحُ على
محطاتِ القطارِ بحِملِنا
نستقبلُ الآتي نودعُ ما مضى
بالوردِ والقلبِ المضرّجِ بالسِهام
فالعمرُ ياعمري حَرِيٌ
أن نخططُهُ بعقلٍ وانتظام
ونجيئ نكتبُ والجميعُ شهودنا
الحبُ عنوانٌ
نعلقهُ علي بابِ الزمانِ بصفحِنا
والبيتُ نسكُنهُ ونسكُننا
تآلفَ وانسجام
وأقِرُّ أنَ رفيقتي
أيقونتي قارورتي رفقاً بها
وأُحيطُها فخراً وعزاً واحترام
وأكونُ في انفاسِها
حباً تُسافرُ عندهُ
ونقولُ للعشاقِ دوماً اننا
سنُعيدُ تغييرَ النظام
#هذا_العام
#محمد_المهندس
اللجنةُ الغرّاءُ أصحابُ المعالي
هذا خضوعي وامتثالي
أن قد قرأت كتابكم
ذاك المعنون فيه ب (الأدب المثالي)
وشهدتُ كل صغيرةٍ وكبيرةٍ من هزركم
وعلمت أنكم تحبون ابن هانئ
والفرزدقَ
في فواحشِ شعرهِ
وجميعَ ما كتبَ المبرّدُ ثمّ أبو عليّ القالي
وكتبتُ خير قصيدةٍ
الآن قد أحكمتها
من خاطري وخيالي
ثمِّ انتحالي
وبرعتُ في مدحي كتابكمُ و قدحي من أراكم تبغضون من الرجالِ
أما النساء المرهفات العامرات الفاترات الفاتنات فلست أذكر عندكم
إلا الكبيرة في الجمالِ
فلي المنابر والجوائز كلها والطائرات إلى الأعالي
اللجنة الغراء أصحاب السيادة
يا من قرأتم في الطفولة
شعر ابن أوسٍ أو عبادة
وكتاب عمرٍو والخصائصَ باركوا قلمي مداده
حتى نعيد زمان قومٍ أرمسوا
فلعل في عودٍ إفادة
الشاعرُ الحذق المؤدّب والهمامُ
أيقظتَ نوّم روحنا
وهمُ على الأشجانِ ناموا
يا من حفظتَ وصاتنا
والحافظون قلائلٌ
والناسُ هاموا
بركاتنا ورضاؤنا
لا يبرحانِ ولا تضامُ
تترى الجوائز أقبلت
والطائرات لها قعودٌ أو قيامُ
وبمثل شعرك كم يباهى عنتر
يهجو الحطيئة
ثم ينشدنا جريرُ (سقيتِ الغيث أيتها الخيامُ)
#محمد_عبدالواحد
#لا_للعنصرية
#كلنا_واحد
#لا_للمخدرات
يا يمه هووووي حدي اتلحق
قبال روحيتي تحصلك ..
يا يمه هووووي بحري انحرق
قبال يجيكي وينهلك ..!
عطشان قليبي ومرتبك
والغربة مصت دمي جت
ما عندي مقدار انزفك
يااااااا عذبة يا موية المطور
وين الرهيد البشبهك؟
.
.
.
اه من وجعتك يا ولضم ..فيصل خليفة
ألم لا يوصف ..الله يوسدها الباردة ويلهمك الصبر الجميل.
#ابراهيم_جابر
الماءُ ماءُ ورد
والكأسُ والشفاهُ نارُ رَعشةٍ وبرد
أذوبُ لو تَؤوبُ
تستطيبُ راحتيَّ عند قُبلةٍ
تُعِيدني بِجَهد
اراكَ ما ابتعدتَ
قُربَ مَسمعي تُغازلُ الحنينَ
بالعناقِ دون وعد
اما دريتَ كم رأيتُ
حين طوَّقت يدايَّ شاطئيكَ
ام تمهَّلت توابعُ احتراقِنا بِعَهد
لترتوي نواجذي
لآخرِ الضِفافِ في خواطري بِفرد
فالماءَ .. الماءُ ماءُ ورد
والشوقُ يا مُتيمٌ
يحُثُني فانثني للَهفةٍ
رهينُها يَعُدُ رقم حظِهِ بنرد
افوزُ بابتسامةٍ تُحِيلُ وجنتيكَ
قُبلتينِ تَسكبانِ بحرَ شهد
بِوافرِ الشَهيقِ استفيقُ في حرارةٍ
بِدفئها اتوهُ عند زفرةٍ ووجد
فحُضنُكَ استتابتي ومأمني
يضمُنا تمازجُ انصهارنا بِعمد
إليكَ ما إليَّ رَشفَتينِ بين بينِ
فاستدرتُ قد وَرَدتُ
ما ارتوى تَوارُدي بِعَود
فالماء .. الماءُ ماءُ ورد
والعطرُ وَصلُ بُعدِنا بِوَعدِنا
يُعيدُنا لأولِ اللقاءِ
دَقتينِ في رَحابةِ
ونظرة تُراقبُ ابتسامةً وسرد
خواطرٌ تسابقت فعانقت سُكوتَنا
تُحبني؟
احبُ ماتحبُ حينَ صدفةٍ وقصد
قرأتكَ الذي قرأتني
هدايةً لِعاشقٍ
رأكَ في العيونِ ضوءَ سعد
فكُن لآخرِ اتِقادِنا
لنُشعلَ اشتياقَنا تسابقاً ومجد
احبكَ الذي قَتَلتني
اذا اناملي بِكأسِكَ اختلت
تَثورُ ام تُثيرُ
ما ترى .. وبَعد
فالماء .. الماءُ ماءُ ورد.
#محمد_المهندس
صباح الحبيبة
للحبيب المودر ورِد
صباح منخلع
من كتوف الصبر
صباح البرِد
صباح الحنين القِنع
من سواتنا
وسافر حِرِد
صباح شتوي حارق
يزيد التهاب الشعور
المِرِض
#عاطف_شمبات
البت الرسمت وردة بتاعت فل
هي نفس البت الرمت القنبلة
فوق الضل
بشهادة الكل
فما بين فُلك و ضُلك
إحتدمت فوضي
احساس بيقول
من زمن الروضة
انا كنت بريدا
و بنفس الجودة
سافرت معاها اماني
بلا ازمان
ومن غير عودة
الروح بتشوف
انو اتلاقو دى حاجة اكيدة
وانو علاقة الروح بالروح
دى فكرة طريدة
ورب القدرة الخلق
الضل والفل
قادر يحمع بين روحين
من غير يتلاقو
وقادر يقلب قاف (القنبلة) سين
سنبلتي الانيقة :
(قد حدثني عنك خاطري
فوجدتك تفوقين ذلك).
واهو إتقابلنا في رحم الغيب
نطفة شوق
اتخصب ريدك
وانا باسطلك قلبي بريدك
افتحي إيدك
واحبسي نفسك
اسجني نفسك جوة وريدك
احسبي عمرك
و مني بزيدك..
يا مفتوحة كتاب في ضلفة
من شباك احلام متكية
و انا بي لهفة
اقرا واعيدك
نفسي اكون الوان يوم عيدك
الوان زاهية
تلون جيدك
#عاطف_شمبات
حاسه بفراغ
المحيط البحيط القلب مالو ضاق
الحنين الجواي والوصول ليهو شاق
العيون البتدمع دوام بإشتياق
مالو قلبي بيئن ديمه يطرأ الفراق
#اديبة_احمد
من شدة اني براي براي ،
رافض صداي ما يرد لي ...
وضلي واقف عندو راي ،
و أنا وانت والأيام علي ...
#محمد_الشيخ
الباب في طرحوا وقح جدا ،
وانا عالق في معنى الشباك ...
والعرفك ؛ ما عرفك ؛ ظلمك ،
العرفك هو الحجَّم معناك ...
انا زاهد في اللون الواضح ،
وفي فوضى لذيذة من الارباك...
الصُحبة البتقول ليك يلا ،
وتغتالك صحبة بايعناك ...
بوصلتك لي بكرة نجومك ،
مع انها تاريخ الأفلاك ...
جبادتك للثمرة استعجال ،
انتظر الشجرة تقول ليك هاك ...
#محمد_الشيخ
بين مصطفى و محمود
سر الوتر و العود
صوت الحنان لو غاب
صوت الحنين موجود
ذكراك ما ذكراك
في كل يوم بتعود
بين مصطفى و محمود
سر البخور و العود
كلما إحترق بيفوح
لو راحوا من العين
فوقنا بتحلق روح
صوت دندنات و وطن
لسه الجرح مفتوح
و لسه القلوب تسمع
تغريد بلابل الدوح
و صوت الكمنجة أنين
و لسه الوتر مجروح
#محمود_الجيلي
عشرون حزنًا أربعون سعادة
ورضاكَ بالمقسومِ خير عبادة
ما كفَّ ربُّك عن يديك مغانما
إلا وحسنى عنده وزيادة
الناس أعداءٌ لما لا يعلمون
يدين أكثرهم بدين العادة
اغفر لنفسك أن شوقك جامحٌ
في البيد أعيا من يزمّ قياده
القلب يعلم ما أودُّ وأشتهي
ما لي بذلك عَزمةٌ وإرادة
ودّعت أحبابي وعدت مباغضي
وهدمتُ سورا كنت من قد شاده
وتقول نفسي: قد هلكنا. قلت: لا،
الله ربي لا يَضِيعُ عباده
وتقول نفسي يوم عالجها الهوى
وهكا لها من أينعيه وساده
أقصر كفيت اللوم قلت كفيته
قالت مراح القلب ليس فساده
ورمت ثياب الصبر وهي قليلةٌ
ضربا بساقٍ في الحشا وخّادة
شططا تحاول بيد أني صنتها
ستساء فعلك ما هواك أجاده
وطلبت مجدا كلَّ خطوك دونه
وسواك أحصى غانما أمجاده
ما كفَّ ربُّك عن يديك مغانما
إلا وحسنى عنده وزيادة
#محمد_عبدالواحد
نبر الحماسة دلوكة ليها ضل
........
معروفين تلوب دايما علينا علينا الرك
مافينا الجبان وكت الحديث ينلك
في يوم المحاص ساعة الغبار ينفك
ابشري يا ام سماح لينا النصر لا شك
يوم دقا النحاس واتعالت النيران
والخيل جات صفوف متوجها الميدان
يوم داك يومنا عاد يوم ابرز الفرسان
بنخلي الصقور فوق الجتت كيمان
اصبحنا الصباح فوق النصر عارضين
من بعد الغويش ليهن عموم قارضين
الرخم الغلاد ليهم دوام طاردين
بي فوقن غصب راينا الصريح فارضين
العز والفخار فوق الجبين مكتوب
واقفين كالجبال فينا الصبر مكروب
اللاقانا باتع في الدفاس مضروب
بلقي غضبنا نازل فوقو نار مكبوب
فوق درب الجدود الفي الكماج بارزين
ماشين فوق بطر ليها السيوف غارزين
في العركة ام غبار يوم يكترو الفازين
بي عزة وثبات ليها البلد عازين
#الهمباتي_الاغبش
أخيراً !
بعد أن مرّت على قلبي العيون المستحيلةُ
و الصراع الهش بين الحب و الأحزانِ
و الندم المؤجلُ
و الحنين المغلقُ الأبوابِ
والأمل المخيفْ
ضحكت عيونك لي
و قادتني إلى أقصى حدود الحبِّ
إني أستطيع الآن أن أجد العلاقة بين
قلبي والحياة
و أن أحبك أنتِ
بالقلب اللطيف
#محمد_عبدالقادر
تاواقة انتي شديد خلاص
شاباية لي غُرف الحنين
طوالي روحك في مناي
متحشرة..
متوهطة البال ليك سنين
نقناقة زى شكشاكة
في سقفٍ هزيل
بالاني فخار عجنتك
دايراني زير..
نقاط عشق لي حضرتك
وانا قبلتك .. وين نبلتك ؟
فنيني سجيل بسمتك
او نسمتك..
ساعة الاصيل..
ويا سلااام
سمحين خلاص انا والخليل
لامن نغني لعزتك
عند الاصيل
موال جميل
عازة ف هواك وفي جتتك
داخلاني نيل
إتشابي .. ياخ إتحشري
إتاوقيني هواك نبيل
إمكن اكون نفاج
نصيبك وقسمتك
#عاطف_شمبات
احبك فقط
دعك من سفاسف الامور
ومما سهوا سقط
ومن ذا الذي قال
هامش الكلام
وبعض اللقط
احبك فقط
#عاطف_شمبات
سرجك ختو فوق ضهر السخي المشبوب
ارح قوماك لي سيد الحشا المكروب
اكان مي القسمة سايقة والقدر مكتوب
ما كان قلبي اصبح في البعاد مسلوب
♡
درفون البداوة المن صغير محبوب
فارع قامة لادن ومن وسط مطبوب
تاورني الغرام الما بدورلو سبوب
بقيت اتقلا فوق نار البعاد مصلوب
♡
وين تمر العجاوي المال سبيطو اتكفا
وين المنو لون دهب البراتي اتخفي
معزول ناقع العسل الاصيل ومصفي
صبح قلبي من صدو ونوفورو انتفا
♡
اتوطا الفيافي وفيها ضارع حيلو
حاكا سراعة السهم المرق من تيلو
عارف مرضي من دون اتنخج واشكيلو
انو زوالو في الشوفة البتشفي غليلو
♡
اب قنفة البفج سهل الودي بي ضراعو
راكزة كراعو في الختة وعديلة طباعو
علي الما قالو فرش توب غرامنا وباعو
عازمين قجة السفر المنافي اوضاعو
♡
الشمش انتكت والدنيا حمرن كونا
من بعد السلم السكة تب مضمونا
المنقة البتجهر في الغصون بي لونا
ما ظنيت حياتنا تصير فرح من دونا
♡
كورك جضا يا اللغبش قشاطو يلاوي
نعمن الرسن هو والسلك متساوي
بي ها الحالة جيت فوق الرمال متخاوي
عاني الفرقو جهمورة ؤ وصالو بداوي
♡
ترا الدرب انترم والجو معاك اتصافا
قل فردة كراعك في الدحيح وإتوافا
علي الما قالو صعلوق في الشوارع شافا
بدري الليلة بنجيها ونضوق اكيافا
♡
تراك يا الاغبش اتنعفش ودومك كبا
يا دابك سخيت حاس بي العلي انصبا
علي فرخ القطا البشويش مشيهو اتدبا
ارح نلفاها قبال الدروب تنطبا
♡
يا فارط التيوس اللي البعيد بتداني
دوماتك غلاد من النظر ساداني
علي وحشية الصي البقت واداني
باكر فوقا أكان إبقي العمر مداني
♡
السهل انشحط والجو غبارو اتعالا
علا اخفافك الارض بي انشطاط لابعالا
النظراتا في الجوف والعصب طابعالا
ليها الخطوة يا اللغبش معاك راجعالا
♡
قطاع ساحة الفنقة المتاقي هجيرا
قودي الليلة لي سيد السماح واميرا
معسول السبيط الما اتنقد لي طيرة
يبرد حلينا اكان بي صدفة جات السيرة
♡
قطاع ساحة الفنقة المتاقي هجيرا
قودني الليلة لي سيد السماح واميرا
معسول السبيط الما اتنقد لي طيرة
يبرد حلينا اكان بي صدفة جات السيرة
#الهمباتي_الاغبش
وبينى وبينك الضحكه..
ورحيق الشاى
وطعم الخبز والسُتْره..
ومساء النور وعمق الإلفه..
بين النهر والنخله
وغنا الطمبور
وصدق العُشْره
بين الأرضِ..والإنسان
وبيني وبينك الفكره..
وجمال الذكرى
والنسيان وحسن الظن
ومشوار الحيا اليوماتى
ما بين الجبل والسهل..
ما بين الصعب والسهل
عزّ الليل..وفى سكّه مطر بكّاى
فلا هماً تشيلو براك
ْولا جرحاً أعانى براى
ولانا على بعض نمتن*
وتزعل يوم..
وازعل وننفعل مرات
تقبّل منّى..
واتوسّد ضُراعى سكات
وفينا حنينه تتشابك موده..
تشابك الغابات
ونحن اذا اختلفنا سوا..
بنطيع الصاح
ولو بتنا القوا بنرتاح
اذا تمن الملح والعيش..
رُضا الشمّات*
وتتكى سنبلايه على ضراعى..
واميل كأنى غنا الطفوله العذب
ْكأن الدنيا طى القلبِّ والمنديل
كأنّ الدنيا طىِّ القلب والمنديل ...
#ايمان_متوكل
أمسيتُ وحدي رغم كل رفاقي
والنيلُ فاض علي من أحداقي
وحزمتُ قلبي وامتطيتُ كرامتي
فنزلتُ في وُدِّي وفي أشواقي
فعلمتُ أن لا وصلَ دامَ لصاحبٍ
وعلمتُ أنّ الدهر دهرُ فِراقِ
#محمد_عبدالواحد
دا صباحك لي ؟؟؟؟؟
بتصابحي القلب الرادك جدا كدا ؟؟
بي احساس ني ؟؟
وانا ليلي احاحي الطير منك ياشتلة ريد تديني الصي ؟
دا صباحك لي ؟!
وينن عصفورتين شوقك هسه ؟؟
الكانن فوق الخاطر لما يركن ساي
البال برتاح
الوجد يغني
الدنيا صباح
وينن عصفورتين شوقك ؟؟
كدا ؟؟
تديني الغربة وسفر الروح ؟؟
وانا روحي اتمكن منها شوق الخيط الابيض من عينيك
تديني شعاع من نور مكسور ؟؟
وانا داسي في شوقي (صباح النور) ؟؟
دا صباحك لي ؟؟
انا قلت في سر الليل اهواك ..
و ارجاك ..
والقاك بصيص من حب أو ساكت جذوة
اتفاجأ بيك مافيشة كدا ؟!
كيف هان الريد جواك ؟؟
سواك ..
مهجورة جفونك من حنيتك
مالو حنينك ماوززاك ؟؟
ماقالك وين القالد طيفك وضاحك جوة عيون الظرف الطاري ؟؟
الحاري سماحة تبتق وسط الشين الغز عصاة السفر البيننا ؟؟
الدفق موية عينو وراك ؟؟
ورراكي حنينك ؟؟
ماورراك ..
دا حنينك لي ؟
دا الشوق الكان بترقرق في عينيك قصاد عيني ؟؟
دا صباحك لي ؟؟
ماجال في خاطر نسمة تداعب خصلك بي تنهيدة من الاتنين المرقن قوة
لا الغيمة الحاضرة ونسة الناس بالحال البي مارشت بلت قلبك جوة ؟؟
تديني صباح لا حيل لا مروة ؟؟
صباح ماجاب من ريحتك حتة
صباح ماجاب لي سيرتك
لا غناك
دا صباح ممكون ..
بتثائب .. لسه ملامح النوم مامرقت من أطراف الشفق البشبه فيك خديك حقاتو
صباح نعسان ..
ماشمسك غطي غيابك نورا
مضلم زاتو
ولسه مغمد وداسي في نص الغربة عيونك مني
بتعرفي كم من شوق مستني ؟؟
لييييل بي حالو
وتجي تستكتري (كيف اصبحت) علي ؟؟
دا ..
........ صباحك ..
....................... لي ؟؟
#عزام_عبدالعاطي
يااااا سبحان اللَّه
الشوق خلّاك تتقلى
شقيان و منامك قلَّ
و جالت في خاطرك حِلة
اديتا قفاك من بدري
و بوشك هوّدت بعيييييد
كضاب كان قُلت بتنسى
و تعيش من دونا سعيد
بتنسى قُعاد الرملة؟
و كانون عوعاية الديك
صنقر في نص راكوبة
و اداك ونسة "بت عيد"
السربة تلايت الليل
راجع ميتان الحيل
نادوك اصحابك ديل
لي الحفلة الطاقعة صعيد
بتنسى هدوم العيد؟
اليوم البتشوف زولتك
و بدون مواعيد...
مااااا بتنسى رجِعتك في القايلة
خُرجك مليان بي خير زرعك
و نامت في كتفك كِلّيقة
البسمة الفي فاطرك خايلة
صنقرت ادوك كباية الشاي
نهموك يا الحُر خالك راجيك
من صِبحت ترمي السِرّيقة
تتذكر اول يوم
جربت تشنِّق طاقية
؟
عشان بت خالتك غنَّت
"اللابس الجلابية و مشنق الطاقية انا منو ووب عليَّ"
وبعدين صادفتا و قالت ليك
عندك لكن الشنّيقة 👌
خشت في قلبك توووش نسمة
و خلاص من تِلك العِلّيقة
اخدت ود عمّها مجبورة
و اخدت بي سببك طليقة
...
اها قُمت براك
رفقّت خُطاك
نفضت إيديك
من اي قرابة تختك في حِتة خوّان
و مرقت و لا قاصد عنوان
لو انت نسيت مع انو مُحال
كيف تنسى عتبة الديوان؟
#نهي_الكباشي
كضب عليك
القال يجيبلك من طيور الريد حليب
فأسك أكان قطع الضرر
لا شك رويحتك جاها طيب
كتاحة الليك همبريب
#ماجدولين_سعد
جات بسيطة
بس ملامحك جابا شارعي
شفت عينيك في الخريطة
دولة إحساس
عالم أصغر من مدينة
شايلة في ريدتي الوهيطة
جات بسيطة
#ماجدولين_سعد
الرصيف
لما يبقى اللطيف
بالضُعاف
ويبقى حضن الوطن هو المكان المخيف :...
شوف بكون
لي مهابة الوطن قد بكت كم عيون؟؟!!
او ســـــقط ..كم نصـــيف؟!! )) ...
#ابومنة
ماتضحكي ,,
وسيبي الفضول ,,
جنك ترتبي في الفصول ,,
الدنيا صيف ,,
ماتضحكي ,,
خليو برااهو يجي خريف ,,
شفقانة كييف ,,
من ضحكتك نور الشمس قال يالطيف ,,
بكت الغيوم ,,
صحت النجوم ,,
ودا كلو كوم ,,
والضحكة ديكي براها كوم ,,
الضحكة ديك ,,
تتزكري ؟
لمن ضحكتي ,, الوردة قامت في الصحن ,,
والله محن ,,
وقام الصحن وقع انكسر ,,
وولا انفجر ,,
وانا جيت المو لقيتو قام تحتك شجر ,,
وللا العصير !!!!!
الكل ما يقرب عليك بزيد كتير ,,
لمن ملا الطربيزة واتدفق عدييييل ,,
في شكل سيل ,,
والناس جرت عملت ترس ,,
ولي هسة خاتين فيو حرس ,,
وجات الازاعات ,, والفضائيات ,, وغايتو جنس جرس ,,
كان يوم من ايام الوطن ,,
ناس سمو يوم سيل العصير ,,
ناس النفير ,,
ناس قالو عيد كسر الصحن ,,
وانا عارفو يوم عيد ضحكتك ,,
ومااااتحكي
#عزام