5285
الاسم :- سئلت ذات مرة ما سر ذاك الاسم؟ صرخت ِملأ صمتي المكبوت في دواخل الفنون إنه اسمها حروفه تطايرت تشكلت تألقت تعلقت بشخصي الضعيف فصار اسم شخص ما ... بداخلي. - ريحة البن .
كتير تتأخر الأفراح
ويأتيك الحزن بدري
تجف الدمعة في عينيك
وسيل وجعك عليك يجري
خزاين الدايمة غنيانة
وبيت الزايلة هو الفقري
نحاول نرضى بالمقسوم
نخش جوة الهموم قسري
نصحي ضميرنا من النوم
رويحة بتشكي واااا مري
تضييييق وتضيق
وتفرج حيث لا تدري
#ماجدولين_سعد
على علاتنا ؛
' رواكيب والفت غيمة '
ولا بنتلام ؛
بنرمي شوية الرقراق ...
اذا في القدرة ؛ قدرتنا :
[ _ علي حِزَم القنا الصادقات ؛ _ ،
مرات السَلَب فرَّاق ] ...
بنرضى من العنب شبَّال ،
بنرضى من المحبة بُرَاق ...
يشيل الطيف ،
يجيبك ضيف ،
ضيف ،
ونناولو يقلا البن ،
فيارب الحبش رب كن ،
ده لون حبشي ؟! ...
هيا ' خَب الغمام ' راحل ،
ده اسمو مشي ؟! ...
هيا ده السمسم الطاعم ،
ويال ال
يا اسيل ناعم ،
ده اسمو وشي ؟! ...
وشاك من تيل دهب مُترار ؟!
جلاك
حلاك
ملاك
و ملاك
ارحكي معاي نجيب مشوار ...
نشيل عبَّار ،
_ من اخر ما سلاف في شم _
نقول نورا ؟!
نسيل نُوّار ؟!
...
مناي لو ينسكب مني،
كُل القلت يوم مني !
واعود فاضييييي
براي من غير حروف عِلَه ...
زمان لو كان زرعت الفُل ،
موش كان الأمور فُلَّه ؟! ...
عيبك يوم قطعت الفل ؛
وسبتو على السبيب غافي ...
صِبْح الفُلْ ،
صباح يابس ،
صباحو أفل
_ صِبِح _
كان السبيب
مافي ...
طفولتَك ما اتفهم بوحا ،
وقلبك كان حليب صافي ...
علي اتقابلن اتنين ؛
[ قلب خواف ،
حبيب جافي ] ...
وكانت هسي ،
كانت هسسسي قاعده هناك ،
ولساهو اللحاف دافي ...
#محمد_الشيخ
يا دابا صبّت عندكم ؟؟.. و حسيتو بي جو الخريف
و شعرتو بي ريحة الدعاش و الغيمة و الجو الظريف ؟
أنا لي سنين عايش كده .. متهني بالحب الشفيف
أنا أصلي بي شوفة الحبيب .. دائما بكون في جو لطيف :)
.......
يادابا صبت و القلوب .. بتغني بي نشوه و سلام
و فرحانة بالندى و الزهور .. مبسوطة بي الغيم و الغمام
أنا غايتو ما فارق معاي .. مادام حبيبي معاي دوام
ماليني احساس بالجمال .. و مغطي دنياي بالغرام
......
أنا لي سنين في جو لطيف .. لا فيو سخانة ولا غبار
لا فيهو ليل غربة و بعاد .. لا فيهو مواجع بالنهار
يادابا صبت عندكم .. صبت بعد طول انتظار
الحمد لله البقيت .. ماف زيي في العالم كتار
.....
بتحبو انتو مع الفصول .. خوف للشتاء و حب للخريف
تشتاقو للحب في الربيع .. و تغيبوا عز الدنيا صيف
أنا حبي أكبر من مطر .. و اكبر من الخوف و الظروف
انا حبي في كل الفصول .. و حبيبي هو الجو اللطيف
#محمود_الجيلي
الله على ساعة المطر
دايماً بتفتح لينا ساحات من محنة
تنادي في الساقو الزمن
دايماً ترشرش
فوق كتوف احلامنا ضُليلة وسكن
دايما تودع في ضلام ايامنا وتزيل السكن
وانا وانتي رافعين الكفوف
ياااااااا الله لا تخلينا لا تبلينا
لا تورينا آلام لا محن
يا الله كم نادينا في الروّح سنين
افراحنا في الروح اتمحن
يا الله كم غنينا للناس والجروف
يمكن نعود نلقى الوطن
يمكن صباح الامنيات بي حضرتك
بي فكرتك بي ضي صباكي
يحقق احلامنا البدن
#محمد_المهندس
حبل الندامة عليك ،
نبلة ونشانا عُلَيْ ...
قهبونة الخلوات ؛
عقبت نسايم الفَيْ ...
غالبني أبقى عليك ،
هان ليك تبقي علي ؟! ...
جيدك بقول لي هِيِكْ ،
طرفك بقول: قول لي ...
عود الشجن عزَّاف ؛
عودك نضير و رُوَيْ ...
صياد رفع لافتة :
حلمك علي يا ظُبَّيْ ..
انا كلي لسة هناك ،
شتل الوعود الني ...
لو سنبكك مردوم ،
بتوكا حس مرحوم ،
" خلوا الملام عَلَيْ
سيبوا الملامة علي
لوم الأحبة جراح "
ما يحلى ليك الكَي ...
#محمد_الشيخ
الحرابة ولا حلو ..
البلد دي ..ترا اغلي ماعندي
الحرابة ولا حلو ..يا الله لينا تبردي ..
"!";/:
مزارعية وقيامنا بدار
نزرعو كل ترابها خدار
نريدك يا شقيقة النيل
وريدك يا ما شال نوار
يا فرح البنيات الدقاق
يغنن للعريس السار
عدي يا عريس عدي
عدي اصلو ما تهدي
والبلد دي ..ترا اغلي ما عندي
الحرابة ولا حلو ..
يا الله لينا تبردي ..
*&*
قلنا للاحزان كفايه
كل ظالم وليو نهاية
الوليدات بكرة جايين
شدي حيلك يا القراية
جابو اقمار في عينيهم
وشالو اقلام في ايديهم
وهزت الريشه الدواية
الصغيرين البكرة جايين
السميحين الينا تايا
يا الله تامين ريد وسالمين
والبسيمة تشيل وتدي ..
والبلد دي…
ترا اغلي ما عندي
الحرابة ولا حلو ..
يا الله لينا تبردي ..
💚💚💚
#ابراهيم_جابر
الطوفان وصل
والنار مشت للغابة
و المحبوبة
يا داب سرّحتْ
يا دابا
الحال في الفريق
حال السواد و التابا
من باب الضمان
الناس تدس أحبابا
#محمد_عبدالقادر
#ليت_قلبي_مُحرِمٌ
لبيك ربي ليت قلبي مُحرِمٌ
أشتاقُ مكةَ والحجيجُ قد احتمى
ياربُ أفرحني بما أكرمتهم
واجعل فؤادي في ظلالِكَ مفعما
فـبِنيةِ الإحرامِ سارَ حنينُهم
وتوشـحَ الإيمانَ نوراً مُسلِما
من موكبِ الميقاتِ فاحَ عبيرُهم
عطرا تناثرَ في الفيافي ملهما
وقفوا علي عرفاتِ فيضَ تهافتٍ
بعد القدومِ على الديار تنسّْما
قامت قلوبُ الساجدينَ لربِّهم
وبأصدقِ الدعواتِ مَدَّت سُلَّما
زادوا بتشريفِ الإفاضةِ حبَهُم
جمعٌ وتقديمٌ وقلبٌ قد هما
فصفيةٌ طافت به فلتنفروا
وقفَ الحبيبُ مُحدثاً ومُسلِّما
أقدامُهم عطشى لإقدامِ الصفا
سُقيا لهم من كلِ فجٍ زمزما
سعياً كهَاجرَ والسرابُ يُعيدُها
حقاً لها في الحج أن تتكرما
ورموا مع الجمراتِ كل ذنوبهِم
رجعوا كما وُلِدو جَنيناً قد نما
وإلى الزوالِ على الثلاثِ جِمارهم
قبل المبيتِ تراهُ كلٌ قد رمى
فتقبلَ اللهُ الحجيجَ ومن مضى
جاؤو رضاً بين الوجوهِ مُوسَّما
وتباركت أعمالَهم بشرى لهم
صعَدت أهازيجُ التسامحِ للسما
برٌ وغفـرانٌ وعَـودٌ أحمدٌ
نورُ القلوبِ على الجبينِ تكَلما
لبيكَ ربي ليت قلبي مُحرِمٌ
أشتاقُ مكةً والحجيجُ قد احتمى
#محمد_المهندس
🕌🕋
ﻭﺁ ﺑﻐﺮﻱ ﺍﻟﺤﺠﻴﺞ ﺍﻟﻠﻴﻠﻪ ﺳﺎﻳﺮ
ﻋﻠﻲ اﻟﻔﻲ ﺑﻘﺎﻋﻪ ﻳﻜﺮﻡ ﻛﻞ ﺯﺍﻳﺮ
ﻣﺎﻧﻌﺎﻧﻲ ﺍﻟﻈﺮﻭﻑ ﻭﺗﺮﺍﻧﻲ ﺣﺎﻳﺮ
ﻋﺰﺍﻱ ﺍﻟﺸﻮﻕ ﻭﺍﺣﻴﺎﺀ ﺍﻟﺸﻌﺎﺋﺮ
....................................
ﻣﺘﻴﻦ ﻳﺎﺟﺪة ﺍﺣﺮﻡ ﻭﻓﻴﻚ ﺍﺩﻭﺑﻲ
ﻭﺍﻗﻮﻡ ﻟﻲ مكة ﻭﺇﺭﺟﻊ ﻟﻴﺎ ﺻﻮﺑﻲ
ﺍﻃﻮﻑ الكعبة ﺗﻤﻼ ﺩﻣﻮﻋﻲ ﺗﻮﺑﻲ
ﻭﻣﻨﺎﻱ ﻳﺎ ﺍﻟﻠﻪ ﺗﻐﻔﺮ ﻟﻲ ﺯﻧﻮﺑﻲ
...................................
ﻣﺪﻳﻨﺔ ﺍﻟﺨﻴﺮ ﻣﺤﻞ ﺳﻌﺪﻱ ﻭﺷﻔﺎﻳﺎ
ﺻﻼﺗﻲ ﻋﻠﻴﻬﻮ ﻳﻨﺒﻮﻉ ﺍﻟﻈﻤﺎﻳﺎ
ﺍﺯﻭﺭﻭ ﻧﺒﻴﻨﺎ ﻣﺼﺒﺎﺡ ﺍﻟﻌﻤﺎﻳﺎ
ﻭﺑﻤﻮﺕ ﺑﺎﻟﺤﺴﺮﻩ ﻛﺎﻥ ﻣﺎﻧﺘﻢ ﻣﻨﺎﻳﺎ
..................................
ﺗﺮﺍﻧﻲ ﻣﻌﻨﻲ ﻳﺎ اﻟﺤﺠﺎﺝ ﺳﻬﻴﺪ
ﺑﺮﺍﻧﻲ ﺍﻟﺸﻮﻕ ﻭﻛﻞ ﺻﺒﺎﺡ ﺑﺰﻳﺪ
ﻫﺬﺍ ﺍﻟﻌﺎﻡ ﻋﻠﻲ ﻋﺎﻡ ﻣﻮ ﺳﻌﻴﺪ
ﻻ ﺣﺠﻴﺖ ﻭﻻﻥ ﻓﻲ ﺍﻟﺤﺞ ﺷﻬﻴﺪ
..
#نزار_سراج 🕋🕌
اللهم تقبل من حجاج بيتك لهذا العام وردهم سالمين غانمين واكتب لنا حجة في القادم..
ونسألكم يا حجاج بيت الله من صالح الدعاء
يا ابوي:-
جانا عيد من دون وعودك
وامنياتك وطلتك
منظرك والهيبة حالك
نور مُحيَّاك قدلتك
ونحن نتشابي وننطط
لي قروش عيدية منك
قُبلة نتسابق عليها
وكل أمان الدنيا حضنك
تعدل العمة وتباشر
كل زول بي بسمتك
وديمة ديوانك معبى
ومابتفتر همتك
#ريم_الرفاعي
لمه فرحه بين اخواني
عندي العيد بكون عيدين
ابارك للبعيد والداني
حنينه هي دعوة الوالدين
حس اطفال فرح في الحي
صباح العيد تزيل البي
تهانيك من اهل واصحاب
اماني توصلك للباب
كل سنه و انتو طيبين
عموم ناسي البعاد وقراب
و عقبال من العايدين
#عاطف_شمبات
أهو ده العيد هسه علي الابواب .. و انا بيني و بينك الف حجاب
أنا بيني و بينك سكة شوق .. و منافي محنة و هم و غياب
أهو ده العيد هسه على الأبواب
و الناس فرحانة و بتغني ..
علشان العيد لمة أحباب
بتخيل جيتك في كل عيد
أعياد بتمر و انا مستني
و أتخيل صورتك جمب الباب
رسل لي مرة و طمني
رسل مع فجر العيد جواب
أهو ده العيد هسه علي الابواب .. و انا بيني و بينك الف حجاب
أنا بيني و بينك سكة شوق .. و منافي محنة و هم و غياب
العيد متردد يا غالي .. خايف من يجي و يلقاك مافيش
خايف ما يلاقي فرح أطفال
لا يلاقي عيون بتغني جمال
ما يلاقي عروس تديو شبال
بيسألني عليك العيد و بقول
وين البي شوفتو الفرحة تعيش؟
أهو ده العيد هسه علي الابواب .. و انا بيني و بينك الف حجاب
أنا بيني و بينك سكة شوق .. و منافي محنة و هم و غياب
#محمود_الجيلي
ياسلاااااام على عيد بلادي
الجلاليب الكتيرة
صوت منادي :
عيد مبارك ...
والسلام الفي الأيادي
يا تبارك ...
وصوت طلق شفع تصنن
وحالتي يامريود تحنن
كل لحظة أشب وأتاوق
شوووووق يجنن
والوطن حبه ويروق
طول ما ليل الهم بهضلم
يعني بكرة شروق شروق
نحنا شاربين الحناضل
صفو دم كل الغلابه
والفضل يا يبقى سافر
أو يسافر
ومافضل في الصحبة فاضل
وما إنكسرنا
ما إنكسرنا
ولسه متماسكين نناضل
كل عام والجميع بالخير
والقابله في براحات وطن زي مانحب ح يكون
خالي من الحروب
#ايمان_متوكل
ﺍﺳﻌﺎﺭ ﺍﻟﻀﺤﻴﺔ ﺟﺰﻡ ﻣﻮﻟﻌﻪ ﻧﺎﺭ
ﻭﺍﻟﻜﺒﺶ ﺍﻟﻤﻬﻠﻬﻞ ﺯﺍﺩﻭ ﺳﻌﺮﻭ ﻭﻃﺎﺭ
ﻣﺎﺳﺘﻐﺮﺑﺘﻮ ﻳﻨﺰﻝ ﻓﻲ ﺟﺮﻳﺪﺓ ﺍﻟﺪﺍﺭ
ﻭﺑﺎﻟﺨﻂ ﺍﻟﻌﺮﻳﺾ ﺇﺗﺸﺮرﻛﻮ ﻛﻢ ﺟﺎﺭ
ﻛﻨﺎ ﺑﻨﻀﺒﺢ ﺍﻟﻌﺎﻟﻲ ﺍﺏ ﺳﻨﺎﻡ آﻟﻨﺎﺥ
ﻭﻛﻨﺎ ﺑﻨﺴﻨﺪ ﺍﻟﺰﻭﻝ ﺍﻟﻮﻗﻊ ﻭﺍﻟﺸﺎﺥ
ﻣﻦ ﺳﻌﺮ ﺍﻟﺨﺮﻭﻑ ﺇﺷﻜﻲ ﺍﻟﻤﻮﺍﻃﻦ ﺩﺍﺥ
ﻭﻛﺎﻳﺲ ﻓﺘﻮﻱ ﻳﻤﻜﻦ ﺇﺣﻠﻠﻮﻟﻮ ﻓﺮﺍﺥ
ﻛﻨﺎ ﻧﺼﺪﺭ ﺍﻟﻤﺎﺷﻴﻪ ﻭﻛﺒﺸﻨﺎ ﺭخيص
ﻭﻛﻨﺎ ﺑﻨﻜﺮﻡ البغشى ﻭﺃﺻﻠﻨﺎ ﻧﻔﻴﺲ
ﺇﻧﻄﻤﺴﺖ ﻗﻴﻤﻨﺎ ﻭﺇﺑﺘﻼﻧﺎ ﺍﺑﻠﻴﺲ
ﻭﺧﺎﻳﻒ ﺑﻜﺮﻩ ﻧﺼﺒﺢ ﻟﻠﻤﺠﺎﻋﻪ ﺍﻟﻤﻴﺲ
ﻣﻌﺮﻭﺽ ﻓﻲ ﺍﻟﺠﺰﺍﺭﻩ ﻭﻏﺎﻟﻲ ﻓﻲ ﺍﻟﻄﺎﻋﻮﻫﻮ
ﻓﻲ ﺍﻟﻤﻦ ﺿﻮﻗﻮ ﻗﻨﻌﻮ ﻭﺑﺎﻟﻌﺪﻡ ﺩﺍﻋﻮﻫﻮ
ﺍﻟﺨﺒﺮ ﺍﻟﻤﺆﻛﺪ ﻭﺷﻔﺘﻮ ﻣﺎﺯﺍﻋﻮﻫﻮ
ﺍﻧﺎ ﺑﻌﻴﻨﻲ ﺷﻒ ﺭﺑﻊ ﺍﻟﺮﺑﻊ ﺑﺎﻋﻮﻫﻮ
ﻳﺎﺣﻠﻴﻞ ﺍﻟﻀﺤﻴﺔ ﻭﻣﺬﺓ ﺍﻟﻜﺒﺸﻴﻦ
ﻭﻗﺒﻠﻲ ﺳﻨﻴﻦ ﺃﺃﻛﺪ ﺍﺑﻬﻈﻦ ﻣﺘﻴﻦ
ﺍﻟﺤﻴﺮﻧﻲ ﻓﻮﻗﻪ ﻏﻼﺗﻪ ﻳﺎﻟﻄﻴﺒﻴﻦ
ﻭﻻﺭﺍﺗﺒﻚ ﺑﺠﻴﺒﻪ ﻭﻻ ﺍﻟﻘﻠﻊ ﻻ ﺍلدين
#نزار_سراج
جات سيرة العيد
والناس بتهني وبتبارك
وانا بتتبارك بي الطافوا هناك
الشافو الكعبة وزاروها
الريد والشوق ساكن في القلب
لي زيارة مكة وسجدة قرب
الروح تشحتف وتعطش تب
ترويها صلاتنا علي الغالي
السيرتو تخلي القول حالي
صلواتنا عليك يا سيد الناس
وسلامنا عليك في كل ثانية
يوصلك ويغمرنا الاحساس
يملانا الحب
#ماجدولين_سعد 🕋🕌
(كل عام وانتم بخير وحجا مبرورا لكل حجاج بيت الله ولكل من حج بقلبه)
الوجعه من افراطا
بالروح تنتشي
والدمعه فيها محاطه
بي سري البشي
شايفه المطر نقاطه
لسه ترشرشي
طينك دا ببقى شباطا؟
ولا تنقرشي
ضلك عليهو وهاطه
رقرق
شمشي
لو بقدر ابقى بساطة
للكون فرشي
كان النفس مطاطا
دا السماء اهبشي
وسقفك عليك اتواطا
احسن تعرشي
بطلت من اتناطا
يا موية الوشي
زدت البساطه بساطه
لامن تختشي
انا في انتظار الواطه
تنبت اي شيء
او اقلو ما تتواطي
تحرمني المشي
#يس_النضيف
انا بس طريتك جا المطر
سيرتك فتيل ريحة انكسر
رش الوجود مطرة وملامح غيمة
تشبه فرحتي و هبشة وتر
سالت غناوي و انفعال ساعة حنين
انا في امان ما دام غرامك هو الخطر
#ماجدولين_سعد
مطرة صبي ساااااي
دام نشف هواي
ما فرق معاي
بعدك الشتا
مطرة بعدي ايه
جاية تاني ليه
بعدما الهجير
فيني شاب عتى
اتأخرتي ياخ
غيرنا المناخ
كل قطرة فيك
ترجع غيمتا
كم فرحت بيك
في السخانة ديك
الخريف يجيك
تنتظر متى
كت بضحك كتير
زي طفل صغير
يحضن الغيوم
و المطر غطا
مطرة؟ مطرة مين
عدت السنين
باقي ذكرى طين
ساكن الوطا
#مجاهد_كاروري
هسة جات المطرة قالت
خاتة جوة الطين جنين
شافها شافع الحلة مالت
داسة فى الغيم كم حنين
الرعود صالت و جالت
البرق كان عندو حين
التراب واطاتو شالت
و الشجر نديان و لِين
السماء إبتسمت و طالت
نادى فى الكون مييين؟
امين
مطرة زى لعب الحواري
(و رجعت الموج فى العصاري)
مطرة زي دافوري فى الحي
و الببسي بررررة
تقسيمة جنب نادي البراري
مطرة واحدة
قادرة جدا تظبط الجو
رغم عن حالة الطوارئ
نحن ناس كاتلانا طيبة
ما مهم بوليس سواري
مطرة زي ما تكون مواعد ضو
ضو بيشلع فى ضلمة
و (زي اعز اتنين حبايب)
و شاي مقنن
جايبة يمة
مطرة زى عرق المزمل
لم تمرق منو حمي
#عاطف_شمبات
باب بيتنا القديم ..
"حضرنا ولم نجد احدا"
يااااااااا بيتنا بيتنا الماااااا ابيتنا
الا القدر باااان وانكتب
اهو فرقت بينا الظروف
وخطواتي راح ليها الدرب
ياخ كركرب الباب القديم
برااااااحة ..
كركبو .. كر كرب
حاجيكا من آخر الدرب
رغم المسافات الطوااال
ما البينا زي وصلة درب ..!!
والذكريات دم الصحاب..
تمشي وتلف ..تكتل ملف
بتااان تصب جوووة القلب ❤️
يااااااابابنا بينا الذكريات
الألفة والريد والتعب ..!
#ابراهيم_جابر
فات العيد وجيناك يا المترع زيتك
وفيك الجبنة تتراقش بعد لخبيتك
يا الجنك شمار بي خاطري ما خليتك
ومو كسير تلج أقسم يمين ما نسيتك
#ودمسيخ
ايدو في العيد
وايدو في الما
عندو فيو ايد
ايد بتتمدا ابتسامة
ودمعه
في نفس المواعيد
ايد تقيد شمعة وسامه
رغم أنها لسه في القيد
ايد تشاور بالسلامه
للمسافر من بعيد
وايد سعيده تقول كلامه
يوم تطبطب ايد سعيد
ايد سعيد
#يس_النضيف
العيد .. الخير .. الفرحة .. النور ..
الناس .. الضاحكة.. تغني .. سرور ..
بسمة .. و دعوات .. آمال .. و زهور ..
و أطفال .. أطفال
صلوات .. طاهرات .. و زيارة .. جار
و ذبيح .. شربوت .. الصاج ..في النار
عيدية .. سلام .. جلسات .. و حوار
و أطفال .. أطفال
حبان .. اصحاب .. أهل أو .. أغراب ..
و بعاد ..لكن .. في القلب .. قراب ..
شباك .. الروح.. فاتح.. ترحاب
و الشوق .. بيخلي .. الباب.. في.. الباب
الفرحة ..تلم ..شايبين .. و شباب
و أطفال .. أطفال
#مجاهد_الكاروري
لكن..
يُقاطِعُني المُؤذِّن أنَّ فجرَ العيدِ جاء
عفواً .. فما زال الكثيرُ مدى انتظاري.. كي.. أجيءَ .. كما أشاءْ
كعكٌ وحلوى ثمّ أعواد البخور
أمّي ودعواتٌ لتمنحَني السُّرور
وشيٌ وعطرٌ ثم جيرانٌ أزور
قف!
كلَّ عامٍ سيّدي.. وأنا وأنت كما نُريد
عيدٌ سعيدٌ سيِّدي.. عيدٌ سعيد
عمرٌ مديدٌ سيّدي..
والعيدُ هذا العامَ حتماً .. لونُ طلّتِهِ جديد
#غدير_شيخنا
وانا كل ما اقول الجية متين ؟
بتقول لي بجيك في العيد
وبلم في صرة توب الريدة عقاب صبري
وبقول ليك
خيييييييير
...للحول ما بعيد
ونصهنج من الشوق ونصن
وتمر ايام وشهور واعوام ...والنار بتزيد
والهم بيزيد
وظروف ما بتدي حريف ....
ودموع تتجارى وﻻ بتقيف
....وما بجيب الفرحة عناد ام ايد
اها كل عام يا غالي وات الخير
كل عام وعيونك لسة بخير
كل عام وظروفنا اخير...يا الغالي وانت
#نهي_الكباشي
جات تهنيني و تشارك
شايلة طيب بعض الازاهر
وكل أسلحة المعارك
مدت إيد مليانة ريدة
وفتحت كل المدارك
انتي ياخ عيدي البعيشو
ياتو يوم العيد ببارك؟
#ودمسيخ
مع إنو الدنيا قبايل عيد
التخا شرا
والنيل بخر
والشمس إنقلبت لي برا
وبكينا قصيد
والناس مشغولة بخرفانه
والبلد التنضم خرفانه
انا دايره شهيد
انا دايره شهيد
انا دايره شهيد
واضان الخوف عملت طرشه
ومع إنو الدنيا قبايل عيد
انا لابسه حداد
على دم اخوانا الراح ساهي
والتار البيش
ح نعيش
ميتين
والدين
في رقاب الحكام شين
والشين
لمتين
خايفين
ساكتين
نحنا الكفار الخرابين
وهم اهل الدين
المعصومين
وحق البنزين
حق الغلبان
حق الورنيش
حق كيس العيش
حق الشحاد
حق عمو حسين سيد الكارو
حق السافر وقطع اخبارو
حق المويه
حق وفويه
...
حق وفويه !!!
وبي بركة دعانا ودعوة الحجاج ,,
للميت شهادة
وللمعتقل إفراج ,,
للظالم إبادة
الطاغية الحجاج ,,
وحقوق الوطن تمرق لغاية الضفه ,,,
أولاد الرجال إيدم توازي الكفه ,,,
والخيل الأصيل بظهر ويبان في اللفه ,,,
وانا افرح واشوف للعيد طعم يا داب ,,
والتخا ينبهل فوق للرسين كبآب ,,
والشمس التبق ضي الغنا الرباب ,,
ويادابك أهني العيد على الأصحاب ,,
#ايمان_متوكل
المهابةُ .. فالمهابة
نفرةٌ روتِ الصبابة
وقفةٌ في يومِ وعد
كيف واللقيا مُطابه
المناسكُ دربُ ناسكَ
والحجيجُ أتوا جنابه
دعوةٌ ترجو قبولاً
كلُ كفٍ دقَ بابه
فرحةُ الراجينَ نادت
يا تباشيرَ الإجابة
آبَ قلبٌ ذابَ صدقاً
تائبُ أهدى مآبه
كَبري يا ارضُ نوراً
وافردي ظلَ السحابة
واشهدي "إني مُباهٍ"
أزهرت جمعَ الرحابة
عاد بعد العيدِ غضٌ
ردد الكونُ ..حبابه
#يوم_عرفة
#محمد_المهندس
كل عام وأنتم بخير
تهفو المشاعر للمشاعر
أبدا
وما للشوق آخر
قلبي
إذا الحجّاجُ ساروا
همّ من صدري يسافر
تهفو لزمزم والصفا
تسمو بروحي
طائفا
لبّيك ربّي
ذي ذنوبي
أنت أكرم من عفا
تهفو أكفي للسما
أدعو بمكةَ محرما
ويغصّ صوتي
بالدموع
إذا الفؤاد تكلّما
تهفو المشاعر للمشاعر
أبدا
وما للشوق آخر
قلبي
إذا الحجّاجُ ساروا
همّ من صدري يسافر
يا ربّ بلّغنا المنى
اقبل
بجودك توبنا
ها قد أتينا ع رفات
لقد أفضنا من منى
جئنا نلبّي محرمين
زمرا
نسبّح طائفين
لبّيك وحدك ربنا
ها قد أتينا طائعين.
تهفو المشاعر للمشاعر
أبدا
وما للشوق آخر
قلبي
إذا الحجّاجُ ساروا
همّ من صدري يسافر
#محمد_عبدالواحد
9 سنوات!!!
ريحة البن
تجربة لا بدّ منها
من أول اتصال من ضل المطر و حتى آخر اجتماع فعلي للمجموعة قبل الحرب.
ما بين توتر البدايات، و إضاءة الكاميرا
و ما بين الأمنيات و التوقعات لبداية قد تكون هي المنشودة.
لم و لن أكون أفضل من انضم لهذه المجموعة، لكنها كانت طريقاً واضحاً لوضع بصمةٍ ما، حتى يصل من هو أكثر أحقية بمكاني.
حاولت بما أملك من كلمات و أفكار أن أجد مكاناً في لإشعال نبضةٍ ما في قلب إنسان يريد أن يقول أحبك أو تعبت أو أخاف.
أن أسمع صوتي و هو يقول ذلك بلا حدود.
هناك، حيث يصبح الشعر مسؤولية، و الشاعر صاحب رسالة.
و حيث يصبح لازماً أن ترى صداك و تسمع تأثير الكلمات.
هناك حيث يصبح جلوسك في ذاك الكرسي ميعاداً لدهشة جديدة، منك و إليك.
أن ترخي حصون بَهاك لتصبح مرآةً لقصيدةٍ ما بصوت إبراهيم جابر إبراهيم، أو نبضاً لأخرى من قلب أمجد اسماعيل
و غيرهما الكثير.
هناك حيث يتلاشى المسرح و الكاميرات، و يتحول كل شيء إلى مسرحك الخاص، تريد أن تبكي، تصرخ، و تطلق انفعالك كاملاً.
هناك حيث تمتلك المعنى.
ما زلت أقل من أصل
و أبعد من صناعة تأثيرٍ ما و لكنني حاولت، نجحت أم فشلت هذا حديث للتأريخ.
#محمد_عبدالقادر موسى
٣ يونيو ٢٠٢٥