5285
الاسم :- سئلت ذات مرة ما سر ذاك الاسم؟ صرخت ِملأ صمتي المكبوت في دواخل الفنون إنه اسمها حروفه تطايرت تشكلت تألقت تعلقت بشخصي الضعيف فصار اسم شخص ما ... بداخلي. - ريحة البن .
.
اسمها دنيا شان دانيات قطوفها وحافل ؟!
وللا عشان دنية بتستجيب للسافل ؟!
يمكن دنيا من دنى يدنو ذاك الجافل
غايتو هي دنيا ، والبسعاها غافل غافل
مرات تشري فيك وتبيع ، تسيك تجارة
ومرات تغمرك بالحن تقول ات جارا
قدر مافيها نتسابق وحوش نتجارى
دنيا غرورة بت كلب اصلو مابتتجارى
أكان ايامنا كانت بالمراد والمنية
كان احزاننا سيناهن بدل بكا غنية
الله تعالى ماساكت لصقلها كنية
قال الدنيا لي حكمة وهي فعلا دنيا
مهما الدنيا مدَّت لك كنوز خلَّابة
ما يغرَّنك الضرَّاع تقول حلَّابة
هسي بتسعدك ، باكر بتتقلَّابا
بخذلوك القراب اصلو القلوب قلَّابة
#عزام_عبدالعاطي
أفرش لا مبالاتك
سجاجيد عنكبوت واهي
ما تنازع دموعك يوم
خوض في الحزن متماهي
#محمد_الشيخ
طيب يا ناس أنا أستاذن..
. ما دام الدنيا بقت ناسات .
...
كفات ميزان ما بيتوازن
مادام الناس و احلاما بقت
ماشين في خطين بتوازن
مادام ساعات اليوم جاريات
خسرن جولاتن ما فازن
مادام عدّن سنواتنا كذب.
.نتجازى أنحنا و يتجازن
مادام بنعيش في زقاق لابدين.
.ميتين عايشين فيهو مجازاً
مادام بنشِّف ريق الطين.
.طيب يا ناس أنا أستاذن
مادام بنحك في ضهر الروح.
. أرواح لا دارن لا عازن
مالن واقفات في بداية الخط..
لا لحقن فاتن لا جازن
لا شبن متل النار في القش.
. لا خربشن الباب لا رازن
..مادام الحالة بقت كيف كيف..
طيب يا ناس أنا أستاذن
#محمود_الجيلي
تموت الحروف
عُقب حسرتا
اشيخ في شبابي
وحنينك فتى
افارقك ... بفارق
الظروف الخطأ
شوق شاقى صبري
كشف عِلتا
صراع جووة روحي
و تحت رحمتا
اهيم فيك حبيبي
لا قليبك رتا
لا دفيت من هواك
لا لقيت الغطا
ندهتك تعاااال
صداي الاتى
#عاطف_شمبات
و يؤلمني الآن
أني أناديك
مثل ندائي البقية
و يجرحني أن أحرك قلبي
قليلاً
إلى فكرةٍ منطقية
و يغلبني أن أضم الفراغ
و ألا يكون عناقك نيّة
و يفلتني من يديك رصاصٌ
و تبعدني عن هَناكِ شظية
و يكسرني أن وجهي و وجهكِ
لم يكسبا قُبلة في القضية
و أن المسافات من بيننا
دائماً
دائماً واقعية
.
#محمد_عبدالقادر
من بابِ خوفي من غياب الدفء في قلبي
كتبتُ
ولم أقل أني أخاف من المساء القادمِ
و كتبت عن أشياء تحدث مرةً في العمر
عن موتِ الملامح في البيوت
و موتِ عاشقةٍ تحاصرها المسافة لا الرصاصُ
و موتِ لحنٍ كان بالإمكان
أن يقضي معي ليلي
و أغنيةٍ تُخِيط هزائمي
و عن خوفي من السنوات تأكل من حنانِ مواسمي
.
.
#محمد_عبدالقادر
لسه عينيك سهر؟
لسه عيني دموع
لسه بينك سفر
لسه بيني الرجوع
يا عروس البحر
جدبي كل الفروع
صبي وابقي المطر
ابقي ليكي الزروع
هسه ديل كم شهر
عايني ديل كم سبوع
والرجا المنتظر
غزا كوع فوقو كوع
النشوق والدمر
والخطأوي التزوع
من حجر لي حجر
من نجوع لي نجوع
قلت ليك القمر
مالو مابي الطلوع
والضلام انتشر
عم كل الربوع
قلتي لي الجسر
في الولاد ما خنوع
حتى لو انكسر
حا يضوي الشموع
قلت ليك الزهر
والقهر والخضوع
وانتي كلك نظر
وقاعده بين الضلوع
قلتي لي ماف مفر
ومافي غيرن شروع
( والبباري البقر
حا يلاقي الضروع )
ما بنجي الحزر
القدر من وقوع
ومافي بعد العكر
الا صافي ونقوع
بنكتب في الاثر
معدنك ياتو نوع
والبيرجي البشر
يرجى جية يسوع
#يس_النضيف
الناس الزادو ( الطيب) بله
وين يا الله؟
في البيت، في الشارع، في
الحله
وين يا الله؟
مالن ما اتراعو
( واتراعو)
واتشتتو في ياتو محله ؟
فتشت
عليهم ما لقيتم
فتشت
علي من قبالم
الفرقه
السكنت في بيتم
والوحده
السكنت في بالم
اتقطع
خيتم
وراس خيتم
ممدود للوحشه وإدلا
ناديت
بالكلمه المسموعه
والدار الصماء أبت تسمع
يا سامعه
ولكن مفزوعه
او حسها ما قادر يطلع
الوهن
الفيها
على جوعه
وخلاها
خليلا
وما اتخلي
باريت
في المويه اتر نادي
لايادي بتعرف تتوضي
وفي الحر البلهب
بي غادي
وفي
النار السعرت والرمضا
خطواتاََ
هايمه
على
وادي
وضارباها المسكنه والزله
#يس_النضيف
جاوب بلا
هل دا السهر حق العلا؟
ولا الفتر
ووجع الضهر
ولا الشعور( البل) خطر
في المدبره وفي المقبله
جاوب بلا
هل دا امتحان بالابتلي؟
ولا البشر
وشوك العشر
وخمسة عشر
راجل
وصندق في خلا
جاوب بلا
الجاتنا قادرين نحملا؟
ولا الانا
وفي ظننا
ما مننا
للغاشي ماشي نحملا
جاوب بلا
هل باقي حاجه نحلله؟
ولا انبشق
وزاد الفشق
برك الجمل بالراحله
جاوب بلا
هل باقي ريما في الفلا؟
ولا اتنفر
قام في سفر
قبل السفر
وعينيه ماها مكحله
جاوب بلا
اها بعدو فضل من حلا؟
جاوب غلط
او بي لقط
قول انفرط
عقد البجيب الاسئله
جاوب بلا
البكره عندو محاوله
ولا اتمحن
من المحن
ايامو في ساعة زمن
فرق (الطواغيت) كملا
جاوب على؟
الرؤيه
كيف بتاولا؟
الخمره
كأس؟
والطيره
راس؟
وهل دا الأساس
لي اي فرعون في ملا؟
#يس_النضيف
يا ابوي:-
جانا عيد من دون وعودك
وامنياتك وطلتك
منظرك والهيبة حالك
نور مُحيَّاك قدلتك
ونحن نتشابي وننطط
لي قروش عيدية منك
قُبلة نتسابق عليها
وكل أمان الدنيا حضنك
تعدل العمة وتباشر
كل زول بي بسمتك
وديمة ديوانك معبى
ومابتفتر همتك
#ريم_الرفاعي
ياسلاااااام على عيد بلادي
الجلاليب الكتيرة
صوت منادي :
عيد مبارك ...
والسلام الفي الأيادي
يا تبارك ...
وصوت طلق شفع تصنن
وحالتي يامريود تحنن
كل لحظة أشب وأتاوق
شوووووق يجنن
والوطن حبه ويروق
طول ما ليل الهم بهضلم
يعني بكرة شروق شروق
نحنا شاربين الحناضل
صفو دم كل الغلابه
والفضل يا يبقى سافر
أو يسافر
ومافضل في الصحبة فاضل
وما إنكسرنا
ما إنكسرنا
ولسه متماسكين نناضل
كل عام والجميع بالخير
والقابله في براحات وطن زي مانحب ح يكون
خالي من الحروب
#ايمان_متوكل
جات تهنيني و تشارك
شايلة طيب بعض الازاهر
وكل أسلحة المعارك
مدت إيد مليانة ريدة
وفتحت كل المدارك
انتي ياخ عيدي البعيشو
ياتو يوم العيد ببارك؟
#ودمسيخ
العيد بدون شوفتك
عيد غايتو عادي شديد
مافيهو غير الشوق
واللهفة والتنهيد
عيد شايفة في الشفع
في ضحكة من امي
شايلنو في الشالات
في طيبة الخالات
شايفاهو في الحالات
تصميم في بروفايلات
لكن بدون عينيك
مافيهو اي جديد
بس برضو يا احباب
عيدكم بخيت وسعيد
كل سنة وانتو طيبين
☕ #ماجدولين_سعد 🎉
لكن..
يُقاطِعُني المُؤذِّن أنَّ فجرَ العيدِ جاء
عفواً .. فما زال الكثيرُ مدى انتظاري.. كي.. أجيءَ .. كما أشاءْ
كعكٌ وحلوى ثمّ أعواد البخور
أمّي ودعواتٌ لتمنحَني السُّرور
وشيٌ وعطرٌ ثم جيرانٌ أزور
قف!
كلَّ عامٍ سيّدي.. وأنا وأنت كما نُريد
عيدٌ سعيدٌ سيِّدي.. عيدٌ سعيد
عمرٌ مديدٌ سيّدي..
والعيدُ هذا العامَ حتماً .. لونُ طلّتِهِ جديد
#غدير_شيخنا
جيت ماري ب حبيبتي..
_قبل نعرف بعض_
كانت يانعه جدا"
مبتسمه ازدهت ♡ ..
حسيت وجعه جايه ..
فطيتا ف سلامي
وقصتنا انتهت :-) ♥
#محمد_الشيخ
رحم الله _ محمد فيصل الجزار واسكنه فسيح جناته مع النبيين والصديقين والشهداء والصالحين وحسن أولئك رفيقا.
Читать полностью…
بين انتماي لي فكرة شاعرة ،
وبين مشاعرك والدَفو ..
أنا كنت أعجَز من مُجرد فِكرة شاغرة ،
"أظل أريدك ؛
والعفو..!"
كان في عيونك طفلة شاطرة ،
وكنت بيتين من كتاب أثري اختفوا...
أنا صاح بجاهِد كنت في يَم صُدفة عاثرة ،
وانتي بتعلّمي فيني فلسفة الطفو...
أنا ما اكتمل في ليل على البال
_ وردة عابرة _ ؛
الا ونهارات الحقايق يقطفوا...
" من كُتر
ما انتَشيت
حَــنــيــن ؛
ألـقَـانـي
كُــل مــا
أمِد بَنـان
يتحَسسوك
بيّرجِفوا..! "
أنا قلبي مُركب _اتشَّرق بي موجة _،
وانت البَراك كَفيّك
رَغم الرِقة قادرين يغرفوا
وأظل
أنا
الناي
الوحيد
الراجي
نوتة
تألِّفوا ...
#محمد_الشيخ
الحزن كائن مهذب
عمرو ما غش الأماني
صادقة كلمات نزفو حية
و ده البخلدو في الأغاني
#محمد_الشيخ
طلاق الرتينه بت عوج الدرب
…
الرضيه ختم البسطه
ومحمدين الاسطه
وتحت تحت
حليمه شربكتا
ديل جابو الخبر
الرتينه طلقوها
الرتينه طلقوها
طلقوها حته حته
وانطلق الخبر
طلقة بخور الشته
شالنو الانوف الحايمه
راكبات حمارة ابليس
مافطن اي محطه
سطر سطر ونقطه نقطه
حتي العوين في السوق
شوف عيني وقفن فوق
ماجابو سيرة الخته
سيرة الطلاق الاولي
والتانيه سيرة الربطه
والرجال في ضاله
دخلو في كم حاله
ضربو خمسه في سته
تلاتين.. خمسه وتلاتين
اربعين وزياده
اها ديل الرواعيه والوراده
كضاب البقول ما راده
سكنت روحو قبل الجته
هي الرتينه مطيرة الصباح
يا اخوانا رتينة نصاح
شوفتا بتعالج السكته
الرتينه بت ابوها
قصيبة السكر النقوها
طلقوها ..
طلقوها.. حته حته..
مخير الله..
الدنيا دبنقا
بشيش بشيش يا وليد
دردقكا
والدرب البدس الشوكه
هو ذاتا الدرب البجي وبمرقكا
الرتينه عاقر
ما بتلد
يا وليدي بس طلقكا
شديرة الهموم انساها
سيبو دريبا قوم فارقكا
الصبر يا يمه
الصبر يا وليدي كتل الورل
في جحرو مات اندكا
الصبر يايمه الصبر
في ام كم حتصبر يعني
ماك ايوب
ولا هي الوحيده الفوقكا
الشم شقيش تمرق
تمرق في العوين
كفاك يا جناي لمتين
لمتين في الحناضل المره
تكرج تقصع الجره
كمكين مره انت تلوكا
مادام قسمتك في العوين العاقر
سردب وابقي راجل
والرتينه بت عوج الدرب طلقكا
اها يا يمه
هدت في عضاي
في روحي جوه دماي
في الاهه التجيني براها
في النفس وكت يتخمه
اه يا يمه
خليني كان انجمه
دا الهول البروب الالمي
سيرتا التجيب الحمه
الرتينه بت عوج الدرب
الصندل القام في القلب
ود الخلاها في كل غناي تنشمه
الصغيرونه جوغانة الدرت
البرتكانه الخدرت
النيتا فوقكا غير
الله يسمه.
#ابراهيم_جابر
حاسيني بتسابق عليك
انا والمشاعر وروحي ذاتها
الجِتة بِتنِز شوقها ليك
نحنا ف رهان
مين فينا بوصل اولك
ومين فينا اولاك بي حياتها
ما فينا من يتسولك
زايدين حنان
اول البارح طريتك
وياها أفكاري وسِواتها
ماشة في البال ساي بِريتك
ضاجة ريحتك بُرتكان
حيلي كان تعبان ملعثم
انت نيل دُنيا وفراتها
جاني صوتك كان مدّسم
ألحان وحان
داير اقول ليك ياخ بريدك
وقاعد احبك بالتلاتة
هاتي إيدك
هاك امان
#عاطف_شمبات
يا بلادي حلاتك ..
نحن العشقنا غلاتك..
الريدة ليكي وحيدك
والمجد للساتك..!
اهو نحن ديل "ساناتك"
الواقفين عليكي قنا ..
وفي قلوبنا كنداكاتك
الريدة ليكي وحيدك
والمجد للساتك ..!
لستك ومو للكتمة
لستك ينور عتمة
نورا يسوق خطواتك
للشارع الغناكي
غناكي رغم سكاتك
حجاكي بي الجاييكي
قال ليك حديس الفاتك
الريدة ليكي وحيدك
والمجد للساتك ...!
الالمي مو البرجوب
غناك زمان محجوب ..
هوي يا أب سديري وتوب
نهواك يا المحبوب
نهواك لي ذاتك
#ابراهيم_جابر
الحب نشوق الآله
ولع بخور الاشتها
واضرع لدى رب الجمال
ربي اليك المنتهى
رب المعارج والسهى
ربي المؤانس للنهى
يارب هل ضن الوصال
يا حزن عينك يا مها
#محمد_الشيخ
كل ما كان بيننا في البلاد الوحيدة
لم يمكن ممكناً أن يكون قصيدة
لم يكن نابضاً كي يكون غناءً
ولا واعداً كي يسمى بقاءً
و لا فرصةً في الخيال بعيدة
لم يكن مدهشاً كي نَحِنِّ
ولا فوق طاقتنا كي نجنَّ
و لا ضاع من بالنا لنعيده
#محمد_عبدالقادر
في أعظم الأعياد
كل عام و انتو بخير
ينعاد على السودان
بالراحة و التغيير
و الثورة ثورة شعب
و السلطة سلطة شعب
و يعم بلدنا الخير
تتقالد الأفراح
نلفاها بالبشِّير
زغرودة كم شبال
من أم جناها صغير
من شبَّ و السودان
في قلبو حبو كبير
لا ساوم الأحزاب
لا العسكر الكضاب
لا خاف ولا يوم هاب
حرية التعبير
في حلمو وطنو عظيم
يستاهل التعمير
نلحق ركاب بلدان
عدونا فاتو كتير
و نعرّف التاريخ
مين نحن في الميزان
توبنا و جلاليبنا
و هوية السودان
و حضارة رامية بعيد
في مغبر الأزمان
تاريخ نضال ناصع
و قضية عادلة كمان
قدر القضية نضال
و اصلو البثور ما خان
كل عام و انتو بخير
و الجاي وطن عمران
و القابلة متحدين
مرصوص هنا البنيان
كل عام و انتو بخير
#مجاهد_كاروري
تراهو العيد بيشبه نفسي عيدي الفات
طعم باهت
ولون مسخوت 💔
ووجعه بتقنت الاهات
وفرحة علي حواف الموت 💔
ومليانه النفس بالخوف
وعميان السحاب مابشوف 😔
والأرض الجفافه بإن
سقيته حناني بالمعروف 😔
دحين يا أبويا بشتاق ليك كل مايوم💔💔
وبعدك ضقنا كم إحساس وحسيت بعذاب الكون
والناس البيمشو معايا ليهم في الكذب كم لون 😔
وياأبوي الأرض ضاقت وكتّلت السماح بالهم
وياأبوي الشمس سكرت وريحة انفاسه مابتتلم
ويا أبوي البحر مجروح بغسل جرحو نفس الدم
دحين عيد الوجع ماعيد 😭😭
مدام حلم الأماني بعيد
والوجعة البضوق إحساسه دائما وجعي فيها بزيد 😭😭
وياأبوي في أمان الله أشوفك يوم لقاهو سعيد 🤲
#اديبة_احمد
لمه فرحه بين اخواني
عندي العيد بكون عيدين
ابارك للبعيد والداني
حنينه هي دعوة الوالدين
حس اطفال فرح في الحي
صباح العيد تزيل البي
تهانيك من اهل واصحاب
اماني توصلك للباب
كل سنه و انتو طيبين
عموم ناسي البعاد وقراب
و عقبال من العايدين
☕ #عاطف_شمبات 🎉
العيد .. الخير .. الفرحة .. النور ..
الناس .. الضاحكة.. تغني .. سرور ..
بسمة .. و دعوات .. آمال .. و زهور ..
و أطفال .. أطفال
صلوات .. طاهرات .. و زيارة .. جار
و ذبيح .. شربوت .. الصاج ..في النار
عيدية .. سلام .. جلسات .. و حوار
و أطفال .. أطفال
حبان .. اصحاب .. أهل أو .. أغراب ..
و بعاد ..لكن .. في القلب .. قراب ..
شباك .. الروح.. فاتح.. ترحاب
و الشوق .. بيخلي .. الباب.. في.. الباب
الفرحة ..تلم ..شايبين .. و شباب
و أطفال .. أطفال
☕ #مجاهد_الكاروري 🎉
وانا كل ما اقول الجية متين ؟
بتقول لي بجيك في العيد
وبلم في صرة توب الريدة عقاب صبري
وبقول ليك
خيييييييير
...للحول ما بعيد
ونصهنج من الشوق ونصن
وتمر ايام وشهور واعوام ...والنار بتزيد
والهم بيزيد
وظروف ما بتدي حريف ....
ودموع تتجارى وﻻ بتقيف
....وما بجيب الفرحة عناد ام ايد
اها كل عام يا غالي وات الخير
كل عام وعيونك لسة بخير
كل عام وظروفنا اخير...يا الغالي وانت
#نهي_الكباشي