5285
الاسم :- سئلت ذات مرة ما سر ذاك الاسم؟ صرخت ِملأ صمتي المكبوت في دواخل الفنون إنه اسمها حروفه تطايرت تشكلت تألقت تعلقت بشخصي الضعيف فصار اسم شخص ما ... بداخلي. - ريحة البن .
لم انهياراتك براك
ولم الدموع بركة
ومن أعلي قمة معركة
جواك نط في الغريق
الروح مضايقك في التراب
عارفاك تريب
الشوق محاوط بالغياب
بتلم قريب
النور عتيم
قول يا يتيم
مالنور عذاب
أديني جيب
هل من مزيد
ألمك عجيب يا منتبه
مالفكرة أكبر من حروفك يا حبيب
والفكرة عينك يوم تشوف روحك غريب
و الخوف طريق من البداية الى الخلاص
والناس تسو في اليومي ما شايفاك
ولا مريت في بال او إحتمال
مريت سريع زي الرصاص
يا منتبه ليهم
وليك
لي الله
والحب
والجمال
قول لي دماك يا دم بعد ما تغلي
ملعقة بُن و دون سكر تعال
ارجع وريدي الحار وخش جيهة القلب
وأبرد خلاص
ما تقول سلام يا ناس
قول ليهم سلام يا مسرفين في الحوجة و الإحساس
و فط الحالة وإتجاوز
وما يجرك نمط عادية أو ياهو
خش في الأنت حقو براك
و ماشرط افهموك يا حي
ولا هسع
تتوه روحك ؟
تتوه منك ؟
فما تقول لي كان تاهو
حيفهمو يوم
فما تخاف ليهم انت
إنت كفاك.
#امجد_اسماعيل
في مثل هذا الليلِ
يوماً ما
سيكفي أن أراك لكي أصالح الدنيا
سيكفي أن أضمك لي
فلا تجد المسافة بيننا معنى
و تغفو في البحار الريحْ
ليلاً ما، سأكتشف اندهاشي كله
طبعاً سأعرف أن أغنيةً ستدفعنا إلى الصمتِ الصريحِ
بلا مبالغةٍ
سأعجز أن أعبر عن " أحبُكِ ".
فاطمئني !
أنت في القلب الصحيحْ
#محمد_عبدالقادر
القصّة أنّ الحب جميل
وعيونك في الصحراء وجوفَ الليل دليل
يحكى أنّ أناسا حين رأوك بكوا
ورأاهم مذ ذاك قليل
يا أخت البدر وبنت النيل
ظمآنٌ قلبي والصّحراءُ سرابٌ في الآفاقِ يسيل
لو أنّ جمالك يسمح لي
أن أصرخَ سبحانَ الله وما شاء الله
صرخت ولكن تحت الماء الغرقى لا صوت لهم
والصمتُ أمام جمالك تبجيل
القصّة أنّ الحبّ كبير
يجعل أقوى رجل في الأرض ضعيفا
ليس مخيفا ومخيفا
والحب صباح القلب ولكن العقل ضرير
والحب صغير لا يهدأ لا يهجع
كم أسعدنا ولكم أوجع
لا نكرهه فهو الحب
والعشاق الأطفال الرضّع
ماذا رأيك في القصة
اللهفة تملك أم لصة
والحب سعادة هذا القلب أم الغصة
قل لي ما رأيك
#محمد_عبدالواحد
أفقديني وأسألي الليل
هل غشاك في غفوتك نيل
تلقي عاشق ضل نبضو
وخت احساسٍك دليل
مر غيم شفقان وراحل
طلو مغرم بالرحيل
لا لحق سالم فيافي
ولا استراح عابر سبيل
دق باب أسباب غيابِك
وشال هواكِ اثر جميل
كلما تلاقيهُ نجمة
يدندن الحزن النبيل
أفقديني إذا المسافات
عاندت وصل السنين
البعيد باسط حنينو
وكم غدر بيه الحنين
لملم أطراف شوق ممدد
واستلف موال حزين
ناح صبيب ريدو المنادي
يلا يا ليل يلا يا عين
كل ممكون دق طارو
الوله حال المساهرين
غابوا بمحض احتياجهم
وفي دفاتر اللقيا حاضرين
أفقديني أسير بيحبس
دمعة تشتاق للتقاسيم
رفة سابت ضفتينا
وشاردة بين تذكار وتهويم
وارب الضو بانعكاسو
ضلفة الشك الدميم
وانسرب في الجنة سربِك
بجناح دافي وحميم
وابتسم بي إلفة فجرك
وباغت الضنا بالنسيم
وقرر يكتب بيك لأنك
قصة الوعد القديم
#محمد_المهندس
صباح الحبيبة
التصحيك بدرري
تقول ليك بريدك
يجيك شوقا نااااعم
يخش بي وريدك
تنفض غبار الفراق الامس
تسالمك في إيدك
و بي لهفة عارمة
تقول ف إحتيال
شنو يعني يااخ
مااا راجين
( بريدك)
#عاطف_شمبات
حاسه بفراغ
المحيط البحيط القلب مالو ضاق
الحنين الجواي والوصول ليهو شاق
العيون البتدمع دوام بإشتياق
مالو قلبي بيئن ديمه يطرأ الفراق ???
#اديبة_احمد
نتحي الغيرة والشوق المعصلج سدو
خلو عيوني من كتر النويح انهدو
الوهطني طيفك كل ساعة أشدو
يوماً مو معاك يا فاطنة ما بنعدو
مطق قلبي قرضايتو القبيل تافيها
نارو الباقة شقيش الدموع تطفيها
كل مايمرق الليل بي الطيوف كافيها
انمد بي انبساط يا فاطنة دامك فيها
مين المتلي حاسس والخيال دانالو
شارد نومو مغدوب واليهر حنالو
مرواد الطيوف البي البعد سنالو
لملم صبري يا فاطنة وعقب فنالو
بعد الليل خلاص لملم نجومو اتدلا
شوقي الكان مغتغت من عروقي انسلا
كل ما اقول انوم اهجس شوية انغلا
يرجع طيفك آ فاطنة وعليهو اتقلا
شوفتك تفرح القلب الدموعو إتوكن
اصفاح السرور من البعاد إنحكن
جنحات الولف ساعة الغياب إنفكن
إبقن لي معاك يا فاطنة هسع ركن
زمنا عدا دون لقياك وهسع ولّا
الله يضر عقابو اللا فتر لا كلا
القمر الظهر فوق دورو باين هلا
سدر عقلي فوق فاطنة وعقب اتدلا
(كانت روحي قبلك في العذاب مكلومة
تردح بي النهار ترجي المنام مهمومة
هسع في امان بي الود بقت متمومة
ريدا شايلو ليك ما بنحسب فطومة)
نتحي الوحدة والليل اب نجوم ومطارق
اتحديت نظامن والبعاد الحارق
شوقك فاطنة اتعدا الخيال الخارق
بقيت حاسيهو من كل المسامات مارق
#الهمباتي_الاغبش
الشرف
فيما اظن
اخر مشاوير الحياء
للانحرف
الشرف
حالة شعور التخمة
والبال مستلذ
حد الترف
الشرف
بديك مسافة تستعيد
شيخوخة عز الذاكرة
من لحظة خرف
الشرف
مساحة ماليها الانين
بدل الحنين
قبل أن يرتد للشوق الطرف
الشرف
ساعة مروق الروح
من بين مخالب الصحو
دماعك زرف
الشرف
حالة إنزلاق اخلاقى
فى وكر السنين
و الليل جرف
الشرف
#عاطف_شمبات
أنا كنت أسرَجْ خيل ؛
ممتن لأنو كبا ...
يا غيبة آن الليل ،
شتت قميصا نبا ...
ما تطففيني الكيل ،
لو قالو فيك صبا ...
بحة كلام الشط ،
يا غيمة في العقبة ...
انا خاطري فيك رحط ،
يا رقصة بالرقبة ...
الهدهد الزارك ،
ما جابو عرش سبا ...
أنا يا بحر دارك ،
يا عنبة الهضبة ...
أنا في الوِّدَي جارك ،
لونك اديس ابابا ...
_يا مهجتي ونوري_
فراش في نوارك :
ميسم وجد سببا ...
_يا طائر الدوري_
العيش في منقارك ؛
والصدقة قالو ربا ...
_إمالة الدوري_
ما مِلت من نيرك ،
إن لم أمِلْ طربا ...
#محمد_الشيخ
دايرة اقولك يا حبيبي
انو دنياي دون عيونك
ما بتعرف غير نحيبي
#اسلام_النحاس
غريبة جدا في الحنين
انا كلما اقسي بتلين
#عاطف_شمبات
لو كنت تُحاسَبُ
في الشعرِ
لحُمِلتَ على الأعناقِ تجاهَ القصرِ أو القبرِ
وأقمتَ بقومِك مُرتحلا
لو كنت تُحاسَبُ في
الشعرِ
لوُلِدتَ وشِختَ
هُديتَ ضَلَلتَ
رَقَصتَ على إيقاعِ الدهرِ
وللذت بقافيةٍ جَبلا
يَلبِسُكَ التاجُ
فترفعه
بجبين الحكمة والتِّبرِ
تفتنك الحسناء السمراء
من العينين
إلى الشفتين
إلى
يأتى الحسّادُ
بقول الزور
سياطًا تنشب في الظهرِ
ألما أجلا
أرضاك الله غفورُ الشعرِ وقلتَ قلا
لو كنت تُحاسَبُ في
الإحساس
أحببتَ
وأبغضكَ الناس
وذهبتَ لربِّكَ في الغارِ
لو كنت تحاسب في الإحساس
لقَرَعتَ الأجراسَ
من الاشعارِ
وأقمت الجمعة والقُدَّاسَ
حفِظتَ الحُرمةَ للجارِ
ولذُقت البردَ
من النارِ
لكنك تُنكرُ ما قد قُلتَ
تتوبُ عن الشِّعرِ الحُرِّ
وترى السجَّان
فترهبه
والشعرُ حقيقٌ بالذعرِ
يا شاعر أستار الكعبة
يا جلجامشَ
يا شاعر ملحمة الأولمب
نشيد الثورة والنصر
ماذا تخشى
يا نورَ الحقِّ
من الإيمانِ
أم الكفرِ
ها أنت تحاسَبُ في الشعرِ
بوقوفك كالشحّاذ على الأبوابِ
تبيع الدُرَّ المكنونَ ببخسٍ
ودراهمَ من كيس البخلاء
لتخرُجَ من ضيق البئرِ
وطوافِك في شهر الحج على الخصرِ
وحنينِ الأم لغائبها
وبُكاءِ الأختِ على الصخرِ
ورثائك أحياءَ الذكرى
وهجائك أمواتَ الذِّكرِ
في شعر الثورة والأوطان
وموت شهيدٍ في الساحات
بسيف شجاعته
ها أنت تُحاسَب في الشعرِ
#محمد_عبدالواحد
حافظين السر
ساوين بالدس
مكنات الأرض
وأسياد النفس
الوحييّن
الامآرين
النظارين
والحفارين
أصحاب الغرس
لا تباعين
لا بضاعين
لا بلعنو خوف
لا بطعنو همس
بيهم ليهم
وليهم بيهم
همهم الذات
وذاتهم فيهم
قول لليهم
والبين إيديهم
سو صبر أيوب
إستحمل و بس
#امجد_اسماعيل
اللخدر اب رميش ريدو نار عويش
الليله سلم لي ايديا قامن ريش
خلوني النموت انا خساره تاني أعيش
**
من الدغيش قميت روحي مابيا البيت
الصندل الدقو شميتو ما شميت
جديا رقيبتو قزاز اريتو بالسوميت
في قلبي ولع جاز خسارة تاني أعيش
**
الزيو ما لاقيت بي قلبي ليهو مشيت
يا الله سلم لي ولا البراي رديت
الكحيل فطره جنيت وكت حبيت
خليت غناي ذكري خسارة تاني اعيش
**
قوقا البلوم حنيت اشتقت ليك بكيت
لاقيت قميرتن لي شفتها ولاليت
الريدة كن عترة وقعت ما سميت
من وين اجيب قدره خسارة تاني اعيش
#ابراهيم_جابر
.
.
الوطن آي بعاني
والعنت يوماتي زايد
لكن الخير جايي تاني
وفي مصايب قوم فوايد
أي سو _ للوزن _ داني
قلبو ما واقف محايد
من ضميرو الأبيضاني
شن بضيرو ونورو قايد
عينو في الحق أسمراني
دينو نفسو ، وقلبو قايد
حكمتين ، للكون معاني
كلمتين ، وبدون زوايد
:
(الامل) كتف الأماني
(والعمل) حتف المكايد
قالا مصطفى في الأغاني
ضمن ما اصطفى من قصايد
(ياصباحات المواني) ..
و(ياااا وطن عند الشدايد) ..
#عزام
الشِعر الجادلنو ضفاير ،
والشِعر البطلع منكوش ...
ده البيت الباننو عماير ،
والبيت الفيه النيم والحوش ...
يا عارفة أظن روحي قماير ،
بترسلي voice note مرشوش ...
ال tone البتخش وتضاير ،
و الونسة هوامش مفروش ...
كيف أشرح انو الصوت ناير ؟!
والدهب الفي جيدك مغشوش ؟!
سطرتا قصايد الشوق بِردي
يا ملمح أثينا و قامة كوش ...
أنا وانتي الوُد يا صوت وردي ؛
يوم صادف إحساس الدوش ...
#محمد_الشيخ
أنا تقريبا شخصٌ جيّدْ
لستُ بعبدٍ
لست بسيِّدْ
مذ أتعبني فهمُ حياتي وأنا للأوهامِ أؤيِّد
سوف أقلِّلُ من أخطائي
من أعبائي
ماذا قد أفسدتُ عسى
مالَ أبي
سُمعةَ شخصٍ يهزأ بي
وقلوبَ نسا
أو صرحًا غيري عاش يُشيّد
أنا تقريبا شخص
آخر
لستُ أبي لست صديقي
حُبَّ غنى
كُرهَ عنا
عِشقَ بريقِ
بي قلق الشاعر
فلماذا قلبي النافر نافر؟
وتزلُّ عن الخطوات طريقي؟
ألهو والأصحاب مساءا
أشعل برد الليل غناءا
أنفخ في الأوزون هواءا
صدت بطرف العين ظباءا
حين أسدِّد
أنا تقريبا شخصٌ جيد
في الإجرام وفي الأوهام وفي الأجرامِ
قالوا بحت بكفري
إذ واجهت الكون بفكري
حين سألت سؤالا لم يعجبهم
حين لبست ثيابا لا تشبههم
جلدوا ظهري
بالإسلامِ
بحتُ بكفري
بالتقليد وبالتجديد
قد هرطقت و قد جدّفت و قد سفسطت بشعري
أرسلتُ بريدي
حين عشقت بلادا لم تعشقني
منعت حسن هواها عني
كرهت فني
آوت غيري في مخدعها
وتأوّه في أوتار غريبٍ لحني
صرت وأنا ابن بلادي
لا أعرفني
قد أوقفني صفًّا أفحصُ أوراقي
قد أسرقني
لكني لا يمكن أن أنصفني
فأنا عبدٌ
وأنا سيِّدْ
وأنا لست الشخصَ الجيد
قل لفتاتك شعرا أفضل من هذا
كن حلاجا
أو مهراجا
واكسر بالقدمين زجاجا
لا تزعم أنك لست قبيحا
أو أن جدودك ما هُزِموا أو ظلموا أو ظلموا
كن بالحق شحيحا
أرسل مالكَ ريحا
كي تصلح ما كان صحيحا
وتقيّد
#محمد_عبدالواحد
بجيك وإنت عارف الدروب مابتجيبك
بجيك شان أجيبك
خطاوي المحنه
غناويي ومداين
بجيك شان أعاين
عيونك دي ماله
ملاحم ملاحم
بجيك شان أزاحم
خطاوي بتسيبني وتسيبك
عناوين عريضة
بجيك شان أجفف
دموع مابسيلن
بجيك شان أخفف
حمول لسه فيني
وخايفاك تجيني
خايفة الظروف التبدل عيوني بعيونك
تشوف كلي دم دم
نزيف مابقيف
وحس ريد مكمكم
#هضربة
أنا مابراي
مات حسي ولا فتر غناي
#ايمان_متوكل
على مهلك
أرح نقرف غناي من ضو
وصحي الريد إذا طول ..
وإذا فتر الصباح جواك
تعال وريني مين سبقك
وقام حرس الشمس أول ..
وأنا الساهرت بيك الليل
وحنست العشق جواك
وقت ليك أوعه تتحول ..
وأرح نحرس عيون الشوق
أرح نشحد بشارة خير
أرح نمرق على الأحلام
أرح قدام
أرح نزرع ونحصد ريد
بدل مانجوع ونتسول ..
#أرح
#ايمان_متوكل
كتمرٍ تدلى
وصار خفيفاً
حفياً تحلى
بِريقِ الأحبة
خفياً تعلى
بصدقِ المحبة
نقياً تقيا
شقياً مجلى
كحبٍ تغلى
فزادَ عنادي
وشوقٌ أطل
فطال ابتعادي
بصدقٍ احل
اقتيادَ عنادي
فلا ثم كلا
يصيرُ اقتيادي
كحرفٍ أخل
بمياثقِ ضادِ
وشعر تسلى
بعشقِ بلادي
ووقت أقل
بقرب حبيبِ
كسيفٍ اذل
ملوك الصليب
هلالٌ أهل
فزاد لهيبي
بصبرٍ تقلى
وصار رمادا
وعشق أظل
وصب تمادى
وورد محلى
بثوبٍ تهادى
حبيب تحلى
بعشق تمادى
وقلب اغل
هوى فاستعاد
حنينٌ تولى
دهور وعاد
بقلب تخلى
على غير عادة
وعنق معلا
يضم القلادة
كحب تدلى
فصب السعادة
كحبِ المصلى
الذي صار عادة
لشيخٍ أجل
يطيلُ العبادة
بغيم اظل
سرى في زيادة
كطفلٍ أطل
بيوم الولادة
كتمرٍ تدلى
فصار خفيفا
حفياً تحلى
بريقِ الأحبة
خفيا تعلى
بصدقِ المحبة
#ماجدولين_سعد
و أنا أفكّر في المسافة بيننا
أحسست بالآتي :
الشوارع لا تزال كما اكتشفناها معاً
اللافتاتُ تضم تعليقاً طريفاً قُلْتِهِ عنها
و قاموس الكلام لديّ -حتى الآن-
معتادٌ لجعلكِ تضحكينْ
حاولتُ أن أجد المسافة بيننا
و فشلتُ.
أعلمُ أنني -للمرة الأولى- أريدُ مسافةً
ليست بمقياس الحنينْ
#محمد_عبدالقادر
القمره الفوق اتدلت
قعدت في جنبي قريب
الروح اليابسه انبلت
من ضيها خفت اغيب
وصتني القمره وقالت
لاقي المحبوب يا حبيب
واتأسف حد ما تقدر
عن زمنا ساقك وغيب
عينيك من عينو الطيبه
ما الطيب بهوي الطيب
لو فلت ايدو البضه
الحزن الركبك و بيض
كان شعرك لسع ابيض
كان قلبك صبي ما شيب ..!
#ابراهيم_جابر
أنتَ سعيدا
أفضلُ منكَ وأنتَ وحيدا
تصمتُ تُطرقُ
تقطعُ بِيدا
ثُمّ تعودُ
بصِفر يديكَ
وثَمّ تعود
بذكرى الراحلِ بين يديكَ
فتبكي تبكي
حتّى صِرتَ نشيدا
أو موّالا
أو تغريدا
أنتَ سلاما
أجملُ منكَ وأنتَ حُطاما
يا وطنَ الأشواقِ تألّمَ قلبي
شوقًا وهياما
ما عادَ يُصدّقُ أحلاما
أضحى الفجرُ الصادقُ في عينيه ظَلاما
قلبي
قتلوهُ ثم بَكوهُ
قبري الساهر قلبي
هل ذاق مناما
ألمسُ في نيليك الريّ سرابا
أصحو كي ألبِسَ أوهاما
يا وطني يا عذبُ عذابُكَ كانَ غراما
أنتَ مُليما
أرحمُ منك وأنتَ مُلاما
أنتَ عشيقا
أصدقُ منكَ وأنتَ صديقا
تعشقها
لكن تخشاها
تهواها زفرًا وشهيقا
حينَ تراها ،قلبك، يخفقُ تصفيقا
حين تغيبُ تذوقُ الضّيقا
قُل أهواكِ تجيبُ الجوقةُ والموسيقى
قُل أهواكِ ودعهمْ يدعونكَ زِنديقا
إنّ ذهابَ الوقت الأفضل مثلُ البرقِ سيسبقُ صوتَ الرّعدِ بريقا
أنتَ شُجاعا
أكرمُ منك وأنتَ تلوّحُ للأحبابِ
وداعا
أو ترسلُ في الأشعارِ بريدا
أنتَ وحيدا
#محمد_عبدالواحد
حوَّاية
ألمي الميَع بعيد
شيلي ليه وقاية
و انُشْقي لي صعيد
....
غُناكِ في الخلا قوقاية
أقدلي يا ام حجيل
نجيمة في السما ضوّاية
و برّاق مربط عجيل
....
هميمة للغرود قضّاية
وفوق درب الوَرود مضّاية
الدنيا لو صحيح رضايّة
تكوني يوت معاي و حضايا
....
عجاج درب المسير و سفَّاية
ومعاي جفاك كتير ما كفايا... ؟
ضعينتك ام نفير بي قفايا
تابعها كم غفير ف الحراية
كم سيف برة الجفير كم راية
برجاها ف الحفير أكان جاية
....
#نهي_الكباشي
المحبين ما لواييق ،
أسأل الشوق في الكواليس ...
تلقى فاهم الخلخلة ؛
حننت قلب الترابيس ...
#محمد_الشيخ
منذ اختياركَ للغريبةِ
صرتَ مشغولاً طوال اليومِ
أكثرَ رغبةً في الصمتِ
وجهكَ كالرصيفِ
يداكَ غربالٌ
رضاك مجامَلةْ
على وشك التخلّي عن معاركك النبيلةِ
صار عادياً شعوركَ بالغيابِ
أصابك الزمنُ العصيب بلعنةِ الشَيبِ المبكّرِ
و اكتفيت بمقعدٍ خالٍ على مقهى الحنين
و طاولةْ
#محمد_عبدالقادر
السنين بالناس بتجري
و العمر ما فيهو رجعة
و البنات كبرن حلاتن
سرعة سرعة
يضحكن في وش أبوهن
بالعيون الفيها لمعة
البنات يا حظي بيهن
عمري كلو هدية ليهن
و كل عام جواي يولّع
نور وجودن شمعة شمعة
#محمود_الجيلي
يبدو بأنكِ حينما اخترتِ الغريبَ
اخترتِ أن تتنازلي عن فكرة الحب المشوِّق
والجنون العاطفي
اخترت روتيناً أقلّ إثارةً
و اخترتِ حباً منطقياً
لا اندفاعَ
ولا خسائرْ
أكملتِ عاماً كاملاً بالفعلِ
من دون اعترافٍ للغريبِ بأنه
” لا يعرف اللون المفضَّل
في الفساتين القصيرة
في الأظافر
و الضفائر "
#محمد_عبدالقادر
كم باهتٌ هذا المساءُ
بلا انتظارٍ
أو عناقٍ
أو شجارٍ
أو دموعْ
خالٍ كقلبي.
لونُهُ لونُ احتمالٍ لا يذكّرني عيونَ حبيبةٍ رحلتْ.
يذكّرني
بما أخشاهُ من نَدمِ احتمالاتِ الرجوعْ
.
#محمد_عبدالقادر
إنقلاب
حاجة بالجد جد غريبة
لما انسي ملامحي عندك
وروحي ما اقدر اجيبا
#عاطف_شمبات