487
شاعر قصائد حسينيه منبريه .... ادعمنا فقط في الاشتراك للتواصل @Mert3338
[نزله للحسن ١٤٤٥]
عن الحسن اقلامنا اشتكتب ؟
هذا الحسن ديوان ومعزب
هذا الحسن ... هذا الحسن
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
القلم قرر يكتب وجانت اول نيه
يبدي بسم الباري من العزوبيه
امضيفه كالو فكرة باب بيه ملغيه
ايعزبك بكل ساعه هذا اخو العلويه
طالب علي الحسن من زغره
سوي الي امضيف بويه اشكبره
هذا الحسن ... هذا الحسن
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
ثاني نيه لقلمي عن شجاعة نفسه
الحسن جان العكسر لو يطبله يخلسه
الجمل تشهد رمحه وين نبّت ضرسه
اشيطلع الي حيدر بالقتال امّدرسه
مرحب لون مو بوكته حيدر
بسيف الحسن هم يشطره وينطر
هذا الحسن ... هذا الحسن
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
هسه ثالث نيه للقلم عن علمه
الحسن اية ومحد فسّراها ابفهمه
الحسن كوكب مزهر ممتلئ بالحكمه
الحسن نور لفاطم وثاني فرع العصمه
اسم الحسن لايك أعلى اوصافه
عطر الورد يعتزل لو شافه
هذا الحسن ... هذا الحسن
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
هسه رابع نيّه للقلم ناويها
عن فصاحة روحه هلروايه ارويها
سمع واحد سبّه الديره من مر بيها
كله يلي تسبني الك حاجه اقضيها ؟
هذا الحسن منين تتدخل بحره
هذا الحسن فدوه اروح لعمره
هذا الحسن ... هذا الحسن
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
بعد خامس نيّه عن ظلامة موته
وسفه ينسم جبده وينطرح تابوته
لحد هسه احجايه كالها منحوته
حسين يومك أكلف ياضامي إخوته
ابعينه الحسن نظر للطف قادم
كله استعد ليوم عمك قاسم
هذا الحسن ... هذا الحسن
# الشاعر عباس محمد الحميداوي
١٤٤٥.٢٠٢٣ صفر الخير يوم ٥
(ثكيل لشهادة الامام الحسن ... حوار بينه وبين الامام العباس عليهما السلام )
ناده الحسن ياعباس يبن امي بل يعضيدي
خافنه مايرضى حسين بكربله ايهد اوليدي
يكول الحسن كله اهناك ... ايموت لازم وياك
جسام جسام ... جسام جسام
____
ساعه وتجي المنيه ... وماضلي غير اشويه ... وتروح الانفاس
عباس لافيني الاجل ... والضعن باجر لو رحل ... وتذوبل الياس
لحسين كله وخبره ... امحالل اوموهبن تره ... بوليدي عباس
القاسم دعائه اورجواه من الله ابكل لحظه
ابكربله لو حان الموت عمه بقتاله يرضه
كله امنياته يفداك ... ايموت لازم وياك
جسام جسام ... جسام جسام
__
عباس جني أتصور ... كربله وهذا المنظر ... وشدة الفجعه
ايشوفه زغير ابعمره ... ويمنتع ابن الزهره ... خايف يرجعه
وادري شيكله اخونه ... يكله انت اسمك عونه ... ويذرف الدمعه
أتصور ابني ايهد راد وحسين رده لرمله
اوديعت اخيي وهيهات مابيه افكدك كله
وابني يكله اترجاك ... ايموت لازم وياك
جسام جسام ... جسام جسام
___
يتوسله اهواي اهواي ... ويكله اقبل مولاي ... ياشيخ الاطناب
ينزل يقبل جدمه ... ويرجع ابلهفه لأمه ... اتكصرله الثياب
يلبس ملابس عوده ... وهاي العمامه السوده ... يلبسها هل الشاب
ايشوفه طلع جن عريس ويتصوره كدامه
ينادي الحسن ماضن مات يل لابس العمامه
اتمنى يسمحله انخاك ... ايموت لازم وياك
جسام جسام ... جسام جسام
___
عباس هذا العندي ... لحسين ازغر ولدي ... واجب جهاده
امر الله واختياره ... ايموت الولد قراره ... لعمه ابسعاده
نصر الدماء الواضح ... والحق ندأء صادح ... ابصوت العباده
عباس من فدوه الولد وفدوه الضنه يروح
وسفه اخيّنا أعلى الرمح بس راس مذبوح
وزينب تنادي وتتناك ... ايموت لازم وياك
جسام جسام ... جسام جسام
__
تكتل الغربه باجر ... العاشر ايشيّب العاشر ... والعونه قله
ابكربله ماكو سهل ... ينذبح علماي الطفل ... والموته سهله
الصبر باجر يصعب ... او ميتين أهلها زينب ... وعلتها عله
ابكربله مايحصل عون ويساعد ام عون
الله يساعدها لون بل الضعن يموشون
عباس فدوه لعيناك ... ايموت لازم وياك
جسام جسام ... جسام جسام
الخادم: عباس محمد الحميداوي
صفر الخير
( نزله الى الامام الحسن عليه السلام )
كريم ابن الاطايب ... الحسن حلو المناقب
ينطي ابلا ثمن ... الحسن هذا الحسن
_____
نزل جبرائيل يسئل حين شع نوره وظهر
يامحمد منهو هذا الي انولد وجنه كمر
كاله المختار طه هذا ابن فارس مضر
وراح لكل الملائك يبشر بهذا الخبر
وربك امام منصبه ... يشع نور بكوكبه
ابن خير السنن ... الحسن هذا الحسن
__
جفه جانت اتشبع الجوعان وتفرح اليتيم
هيج جاب الحسن عمره كريم ابن الكريم
شايعه اخبار لمضيفه يكرم ويشفي السقيم
والنعم منه ارد اكولن شيخ جنات النعيم
ابو القاسم الذي ... بيه ريحة علي
بابه ماسده الزمن ... الحسن هذا الحسن
_____
محزم بخاجية ابوه وعنده عوجية بخت
واكف اباب المضيف يهلي بضيوفه الاجت
ونار كمكم ادلاله ابداً و لا لحظه طفت
الكهوه من حرورة اعزوبيته وحدها اتخدرت
معزب مثله وين ... فده القاسم للحسين
قليله الي انحجن ... الحسن هذا الحسن
_____
عن قوانين الضيافه كتب وتعّب كل قلم
اكتاب اول درس جان عن كيفية الكرم
كل حرف بيه عطر امه وريحة الزهره تشم
ونختم ذاك الكتاب ومن حبر كلبه انختم
بخط شيخ العرب ... بكتابه انكتب
بيته لضيوفه وطن ... الحسن هذا الحسن
_____
القلم حاني ركبته واكف بهيئة خجل
وعنك شيكتب حاير ياأبن خير العمل
عن سخائك عن قتالك لو عن البذل
طه جدك وأبن حيدر وامك من اشرف نسل
يحير ويبكه محتار ... يوصف جبل ايثار
جبل لاح المزن ... الحسن هذا الحسن
الخادم : عباس محمد الحميداوي
صفر الخير
(ثكيل ... حواريه بين الامام الحسن وهو على فراش الموت واخيه الحسين عليهما السلام )
بعدني يمك وظهرك صبح مايل ... وماينكسر ظهره اليمه ابو فاضل
ظهرك تعدله اريد ... تكسره من تضل وحيد
بلايه ابو فاضل ... بلايه ابو فاضل
__
يحسين اذا مات الاخو وأمتون اكو لتابوته
وينشال مابين الخلك والناعي ينعى بصوته
وعيون تبجيله تضل يمكن يخفف موته
بس تختلف عن اليموت ابلا هله ولاخوته
يخويه الغربه من ماعندك اخوان ... ولاعندك اخو يتعنه دفان
الغربه خويه اهناه تزيد ... تكسره من تضل وحيد
ابلايه ابو فاضل ... ابلايه ابو فاضل
__
ويحسين كسر البظهر صعبه لمن يتجبر
ويصعب اذ ا هذا الكسر مو مره بل يتكرر
بلباب امس ودعنه اخو وجايك اوادع اتنطر
من بعدي راح اتودع اخو زلمه شجاع معتبر
اذا ودعت ذاكه البراسه ريشات ... وتّطيح خيمته معناها اي مات
اهناك لو مات العضيد .... تكسره من تضل وحيد
ابلايه ابو فاضل ... ابلايه ابو فاضل
___
يحسين المفاركله اخو معروف من خطواته
محني ويجر جدمه ابثكل ويتكاثرن عثراته
ويصير عطر المكبره يتغازل ابدمعاته
خويه وعمري هل خلص واتكربت ساعاته
ومااريدن تهزك نسمة الريح ... حيلك طيحه من الكافل يطيح
من تشوفه ابلايه ايد ... تكسره من تضل وحيد
ابلايه ابو فاضل ... ابلايه ابو فاضل
_____
يحسين جزء من الوفاء انوافي بيه ام الوفه
هاي أم البنين الذي يعميها دمع العاطفه
يحسين تتحزم الي وبفاتحتي تبكى واكفه
المبحره ابماي الدمع ولاكتها هاي العاصفه
وفاء بروحك الها بنبض الاحساس... طش روحك حين يموت عباس
راح تبجي اي اكيد ... تكسره من تضل وحيد
ابلايه ابو فاضل ... ابلايه ابو فاضل
_____
ويحسين صفرة لوني هاي اهون تره من لونك
من ثلث تيام العطش يغير بياض اعيونك
عطشان والماي اشكثر ومحد رضى يروونك
وعاد انا احسن اندفن بس انته مايدفننوك
مصبية عاشرك ماتمر ابكل حين ... لمن تنطي الاهل للطف قرابين
ويتنصر دم الوريد ... تكسره من تضل وحيد
ابلايه ابو فاضل ... ابلايه ابو فاضل
---------
الخادم : عباس محمد الحميداوي
صفر الخير
[رقيه والحسين ١٤٤٥]
نايمه اعيوني واتانيك ابحلم
فجئ عطر لجيتك يابويه اشم
والله تعبني الهجر ... صارلي اشكد انتظر
عطر جيتك ... عطر جيتك
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
جايني ياهلا بجيتك ارد اكلك بالجرن
وراح اكعّدلك خواتي جيتنه وهن مادرن
انه ابجي ابحين اسمع فاتحه لروحك قرن
اتراب متروسه لحيتك اشفاك ليش اتعورن
الراس عن الجسد مفصول اشعجب؟
جبهتك بيها الحجر بويه اشكتب
اشكتب يانور البصر ... صارلي اشكد انتظر
عطر جيتك ... عطر جيتك
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
البارحه فاركت وجهك عفتك ابجرحك ترف
هاي اول مره اتيهك حسين جنك مو عرف
هسه لو ماذابحينك جا متت من النزف
اشمالهم طشرو جسمك اجروحك اتعدن الف
هسه ميت اشمالها؟ الخيل واتغير
احسين اول؟ تالي؟ تنلم بالحصير
طبره هاي اعالنحر ... صارلي اشكد انتظر
عطر جيتك ... عطر جيتك
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
هسه يله اعرفت ليش امعصّبه اعيوني امس
خايفه عمتي من اشوفك ينكطع مني النفس
ثاري راسك العلى رمحه ايلاكي ابحر الشمس
ارد ابوسك بويه لاجن خاف الجمك بالمس
امن نحرك اقبّلك؟ من العيون
اشربك ماي اريدن كلي اشلون؟
خاف مايرضه الشمر ... صارلي اشكد انتظر
عطر جيتك ... عطر جيتك
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
هذا انته حسين بويه جاي خطار ابعجل
ماكو تابوت أعلى كدي بيك اشم عطر الاجل
حسين عمتي من اموتن تشبّع اكبالك خجل
انت كتلها ابركبتج بنتي واعليج انتجل
امخليني امانه بذمة ام عون
ماموتن ابغسلي اهلي يحيرون
امتوني ليهسه حمر ... صارلي اشكد انتظر
عطر جيتك ... عطر جيتك
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
هاي حفره ابوسط نحرك امجان هذا للرمح
ذني جم طبره أعلى نحرك ضالات من الذبح
اشماله سيف اعداك بويه والجرح فوك الجرح
وبويه خلينه انتشابك ياابو كلب السمح
منك اعتذر جرحيت الا حساس
نسيتك جايني يحسين بس راس
بويه ماريده العمر ... صارلي اشكد انتظر
عطر جيتك ... عطر جيتك
# الشاعر: عباس محمد الحميداوي
١٤٤٥.٢٠٢٣ صفر الخير ليلة واحد
(قصيده ثكيل ...عن لسان رقيه تخاطب ابيها الحسين قائلاً ... )
من كلولي طبينه الشام ... تذكرت بيه دهري شضام
ابالي اجت صورة طشت غطاه منديل
يسيل منه الدم وانه دمعتي اتسيل
تذكرت بيه دهري شضام
_____
دارت الدنيه بضعنه ... موته بلحر عفنه اهلنه
وانبسينه والشمل طش
عشنه نتصابح ابشتايم ... وسوطهم أذى الحرايم
برمل خدري ماي وانرش
هذيج الفوك ناكه هزله اختك
والتحاجيك هاي ارقيه بنتك
ضيعت العرف بابا أعلى بختك
عرفتك تجي يابابا عرفتك
مغيرتنه تعرف جم آه ... ومو عمر عكبك عشناه
بليل ندواي المتن ويبدي دمعنه وي اليل
يسيل منه الدم وانه دمعتي اتسيل
تذكرت بيه دهري شضام
_____
اول خطوات النه بيها ... الشام يذبح كل حجيها
وبيها كثرانه البواجي
والمهم موعد لقانه ... وبل الخرابه حسين انه
ومسلّبه مني التراجي
ماابجي لسلب ترجيتي من اذني
انه ارقيه وحكك لو تناشدني
البجاني ونّكع مني كل ردني
اكبال الراس يتعمد شمر سبني
يجرني وعليه شكد صاح ...كتله اشويه ارد ارتاح
جن ماسمعني ورد عليه بسوطه شوفّني الويل
يسيل منه الدم وانه دمعتي اتسيل
اتذكرت بيه دهري شضام
__
وهلا بخطاري الوفد ... الشكر لله والحمد
اخذني يخطار وياك
يحسين يايابه وكون ... تسولفلك عمتي ام عون
التعبها غربه وفركاك
هلا بكل نسمه مقسوم الها بنفاسك
صحره ارياجك وانهار بحساسك
جاساني الهضم يامن عطش جاسك
الحمد لله ونزل من الرمح راسك
متغير الشكل او لون ... مفطر الشفه ابلا اسنون
ابثغرك يزيد بخيزرانه نكث ويرد ايعيل
يسيل منه الدم وانه دمعتي اتسيل
تذكرت بيه دهري شضام
__
ياهو الذي مّدمي النحر ... وياهو اثنعش طبره طبر
والشيبه خضبه من الدم
اليتمني ابعمر الورد ... وانفاسي رايح تنخمد
أعلى الراس ويروح الهم
حلاها الموته لو ويه التحبه تصير
وانه المتمنيه غير الصار والتدبير
ردت ميته أعلى صدرك والخيول اتغير
حتى اشويه صدرك يخف عليه تكسير
ماصارت وصار الياس ... موتتي تحلى أعلى الراس
ردت ابعباتي غطه جسمك كبل لاتسحكه الخيل
يسيل منه الدم وانه دمعتي اتسيل
تذكرت بيه دهري شضام
__
وعمتي تتكفل بعد ... بتغسيل وتكفين الجسد
وماكدرت تغسلك غاد
لاماي اولا ماي الورد ... لاكبر محفور ولحد
والكاع مو ترب ارماد
وكالتك يخويه حسين راح اطلع
شمر كايد ضعنه ومرنه عل المصرع
افرض كلها ادفني والوكت يسرع
شتلم من وصالك وانت الموزع
يحسين زينب لو صار ... وجه الصبح حك تحتار
مابيها ينظرهه اجنبي وينسب حمّاي ادخيل
يسيل منه الدم وانه دمعتي اتسيل
تذكرت بيه دهري شضام
الخادم :عباس محمد الحميداوي
صفر الخير
(القصيده مهديه الى سيدي ومولاي ابا الفضل العباس عليه السلام )
( ثكيل ...لشهادة السيد رقيه حواريه بين رقيه وابيها )
ادري ماتجي بس فارشه مصلايتك
ادري اعلى الرمح ولافرض الفايتك
ولون تدري بتاليتي ... بويه سلبوها ترجيتي
___
لازمه بثلث اشياء بويه انه بدرب السبايه
لازمه شيلة راسي ولازمه اوياها العبايه
ولازمه يحسين بويه ايدي بهل المصلايه
ذني مجلبه اني بيهن بس عندي احجايه
اخبرك اعلى التراجي أتسلبن مني
تره الماطلعت من ذني شرم اذني
ولاتكلي المن حجيتي ... بويه سلبوها ترجيتي
__
من علينه الخيمه شبت ونارها لسعتنه
بينه حارت عمتي زينب شلون لو جمعتنه
بويه وحجايات خصمك اهواي أي أذتنه
لمن هجمو اعلينه واحد يكول اي فرصتنه
فرصه ينادي رجس من الارجاس
ويكلهم سلبو كلشي مات عباس
واحترك فوكاي بيتي ... بويه سلبوها ترجيتي
__
امذعره منهوبه مسلوبة خدر جيتك تره
امجرحه مشتومه مضروبه ويايه جره
كل هذني وجيتك انه والدرب مااخطره
واسمعت شامت يكلي ابوج كطعو خنصره
همزين مو منحر كلت بس صبعه
ويمسح على راسي باأصابع تسعه
حسين لاتكلي شلكيتي ... بويه سلبوها ترجتي
_
اشلكيت اشناظرت وشنهو الذي باك الصبر
جسم اموزع اعلى الكاع وكل وذره ابكتر
والمحت عيني رمح شايل جمالك والنحر
لملمت روحي وركضت لعمتي ابذاكه العصر
ودعتك بعد والخيل اجت محتامه
اواحدهم يصيح احسين طحنو اعظامه
والدمع اصبح سجيتي ... بويه سلبوها ترجيتي
___
بأي صوره اتجيني بيها اموذر امجرح تهون
المهم تاخذني بويه طولي ماكلته العيون
عيني مسطوره ياغالي وأزركت هاي المتون
يله بويه بنتظارك تجي وتطفي الشجون
يابويه العجل العجل كون بجيتك
انه مشتاكه يل المشتاك لبنيتك
وياك تحلالي منيتي ... بويه سلبوها ترجيتي
°°°°°•••••°°°°°•••••°°°°°•••••°°°°°•••••°°°°•••••°°°°°
الخادم : عباس محمد الحميداوي
صفر الخير
(ثكيل ... القصيده على لحن قصيده محمد الجنامي ياهلا يلهلا بجيتك ياهلا )
ناحله ناحله ... من السبي ناحله
بلحلم شفته ياعمه ... ومشه بضعن القافله
____
صدقت الرؤياء ياعمه وهذا راسه بطشت
عمه عذريني ارد اودعه وحكي لو فوكه متت
بويه صار ايام ادورك ليش من الجيه اكطعت
اتاخرت وعمتي سبوها حين من مهرك طحت
بل سبي بل سبي ... كل هظمنه بل سبي
ويه ارجاس الخليقه ... مشت ذيج العايله
____
كبل لحضات اني اسولف لعمتي عن جيتك
وهلا براسك يبو الاكبر وهلا بريحة كعدتك
عمت عيني ياهو هذا الخضب الدم بشبيتك
بويه ياهو الماسكاك الماي وفّطر شفتك
هل رمح هل رمح ... مغيرك هل رمح
ليش مخضب بدمك ... وليش شفتك ذابله
_____
عسن منديل الي غطه الراس لاشلته بدي
وردت منك تجي كامل ليش بس راسك يجي
بكلبي مضمومه سوالف احجي لو عوف الحجي
خلني اغسل دمه الشيبه بويه من دمع البجي
بل الدمع بل الدمع ... نحجي خل بل الدمع
انته ابجي وانه ابجي ... والحجي عن كربله
__
عمري ثلث اسنين بويه وابد مو مالت يتم
ضعنه من بعدك يبويه وحين حركوها الخيم
عمتي تركض على النار بينه محتاره وتلم
لابكه حامي ايحمينه وبكت اطفال وحرم
تحيرت تحيرت ... زينب اتحيرت
شلون مسيبه خذوها ... وجانت مدلله
__
النار حركت من عباتي اتخيل ارماد وجمر
هيمه مشتعله بخمينه ومن الخيم كمنه نفر
اجه سلاب اعتناني وغده بترجيتي يجر
اشرد من السلاب عودن يطلع بوجهي الشمر
شكد خفت شكد خفت ... تدري بويه شكد خفت
منين مااركض يجيني ... الشمر لو حرمله
____
خلي اغفه فوك راسك جنهن انفاسي كظن
وفدوه الك متني وايديه وفدوه الك جرح الاذن
سولفتلك اشويه بويه من الذي اعلينه جرن
اهواي بكلبي سوالف يجرحنك لو انحجن
الموت اجه الموت اجه ... جنه بويه الموت اجه
جيتني ورايح اجيلك ... وبجيتك بويه هله
الخادم : عباس محمد الحميداوي
# ٢٥ محرم* شهادة الامام زين العابدين
(اخر ماتتمناه روح الامام السجاد عليه السلام١٤٤٦)
تمنيت مدفون وبلا راس
بس ردت اعيشن هذا الاحساس
وحار الرمل جواي ... وعطشان كون هواي
تمنيت ... تمنيت
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
علي السجاد اني وباخر انفاسي
امنيتي ردت هم ينكطع راسي
مثل حسين كون الي يريد يموت
بس وياي دهري شكد صبح قاسي
وحتى أمنياتي دهري حارمني
وهاضني الطف لسه هاضمني
شد الدهر وياي ... وعطشان كون هواي
تمنيت ... تمنيت
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
احساس الذبح لو بالحلم ردته
وحتى بالحلم احساسه ماشفته
ردت الخيل احلم بيها تسحكني
حتى اعرف شلون الخيل ساحكته
حسين عّذب حالي يحسين
اتمنينه كلنه مثله ميتين
ومطشره كون اعضاي ... وعطشان كون هواي
تمنيت ... تمنيت
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
جنت اتمنى سهم ابكلبي مايطلع
ومثل ميزاب دمي جن نبع ينبع
ابجبيني كون ضربه للحجر تنزف
ومن مهري ردت للكاع هم اوكع
وبخاصرتي واحد يدفع برمحه
ويصيحون يمي راسك نذبجه
وتترس الكاع ادماي ... وعطشان كون هواي
تمنيت ... تمنيت
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
ماتنشال كون اجنازتي من الكاع
وكلساع انسلب ياريتني كلساع
خنصر كون بيدي مايضل ياريت
انه المن ابوي اولا شبعت اوداع
انه العليل وزين العباد
تمنيت كبري ابكربله غاد
والموت جان ادواي ... وعطشان كون هواي
تمنيت ... تمنيت
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
مو بالسم تمنيت العمر مختوم
بس شاء الله ارحل والجبد مسموم
كون اسمع نداء بكل عزاء يصيح
هليوم ونعزي فاطمه هليوم
عينّوها فاطم ام الاحزان
ولهفان كلب الزهره لهفان
أم المصايب هاي ... وعطشان كون هواي
تمنيت ... تمنيت
الشاعر الحسيني: عباس محمد الحميداوي
١٤٤٦.٢٠٢٤ محرم الحرام شهادة الامام السجاد(ع)
(نزله لشهادة الامام زين العابدين )
عمره بس دمع وآنين ... هذا زين العابدين
عمره كله بقه ينادي ... ياحسين ياحسين
_
نايبة كربله اباله مالها لحظة ذهاب
تختنك ريته ويذكر حسين يشهك بلتراب
يخلط الزاد ابدمتعه ايهيّج الماي المصاب
صبت اعليه الرزايا علي السجاد انصباب
هم عليل ومنسبي ... فاكد احفاد النبي
ماغفت من عنده عين ... ياحسين ياحسين
____
اباله تفتر صور ركضه لعمته صوب النهر
اتصيح وينك يبو الشيمه بيك ملزوم الخدر
ياكمر هاشم اتفّزع وشايله انواع القهر
اتكله حركو كل خيمنه اهناه ياعباس الكمر
اعليه موقفها يعود ... وقمه زينب بلصمود
عاش بس جداً حزين ... ياحسين ياحسين
_
مرن عام وثاني وعقدين صار اعلى الحدث
يوم رد المهر يصهل وشمر فرحان وشبث
يوم ضلت على الغبره اموذره ذيج الجثث
يوم ابن هند ابعصاته ابشفاف ابو اليمه عبث
اتلاثين عام ابنحناء ... كلفه عملة كربلاء
ماخذه اليوث العرين ... ياحسين ياحسين
__
غسله الباقر وشاهد بعض أصحابه اشحصل
الباقر دمعه ايتهادر وعن الناس اعتزل
جاوب الناس بجوابه أوضّح لكلمن سئل
كلهم الجامعه لهسه اثر الها بجسمه ضل
ابركبته باقي الأثر ... رغم جم عام الي مر
وصعبه ماضنها تلين ... ياحسين ياحسين
_
انشال نعشه والفواطم ندبن الحسره عليه
أهون من امصاب ابيّه الخيل تعبر وترد ليه
حسين سلبوه وتبّضع وانكطع خنصر من اديه
علي السجاد ابمماته ماكو شمر اليجر بيه
جبده بلسم انجسم ... ومات بفراش الألم
ابحجر مامدمي الجبين ... ياحسين ياحسين
الخادم: عباس محمد الحميداوي
محرم الحرام
القصيده مهديه الى السيده شريفه بنت الامام الحسن عليهما السلام )
(قصيده ثكيل ... لسهادة الامام السجاد عليه السلام )
علي السجاد بأانفاسه الاخيره ...بقى الطف شاغل احواله و ضميره
ختم عمره بدمع عين ... هديه لنحر الحسين
_____
على بساط المنايه ... تحت اعظم رعايه ... رعاية الله وجروحه ودمعته
ايتلوه شكد تلوه ... وحيد ابلايه اخوه ... وعلى وجهه بدت تظهر حسرته
عتب عنده وهضيمه ... ورسالة حب أليمه ... يريد اهله يحضرون بدفنته
ابراك اعيونه راسم لوحه فنيه
تشع الوانها ابدمعات مجويه
موضوع الرسم اعتاب للميتين
يدفنونه وينصبون اله التعزيه
علي السجاد ابجرحه وعتابه ... آه يحسين ناده ويامصابه
والعمر لو ردله مرتين ... هديه لنحر الحسين
__
أبن اطهر سلاسه ... الجميل ابكل خصاله ... كسير من الجروح الباقيه تنزف
الحزن ماتحده مده ... نفس دمعه اعلى خده ... بقه رغم السنين المرن اعلى الطف
رغم قربه ويه ربه ... لجن صعبه اعلى كلبه ... مصيبه وشعظمها وماتجي اكلف
جان ابكل صلاه وبكل عباده
يصبر روحه بأن القتل عاده
لجن يرجع يكول اليهضم الماي
علينه انمنع واحنه كلنه ساده
نسل هاشم ابكلهن يجدمونه ...ليش الماي علساده يمنعونه
عطاشى اهله ميتين ... هديه لنحر الحسين
__
تصوغ الدمعه شهكه ... دوه اوجاعه ملكه ... يجمعه وي ابوه الذابله شفته
العجيبه جفنه ينشف ... يدور اباله موقف ... من هاي المواقف الكلبه شالعته
لمن شام الغدر طر ... يبين ثوبه احمر ... بس ثوبه انصبغ من دم ركبته
اليموت من البجي يناس ميبالغ
اذا صبحه اعلى ليله بعبرته يناشغ
بيته من الاكل يمكن فرغ مرات
بس مامره من ذكر البجي فارغ
جر ونات اكثر من الانفاس ... حزنه اثكيل صعبه لمن انقاس
يون ابطول السنين ... هديه لنحر الحسين
__
الهوه يشح برئاته ... لون ناظر خواته ... عليهن كسرة الفركه يبين من اثرها
نهر عينه اتفجر ... لون ترجيه ينظر ... يتذكر حرمله يسّلب رقيه ورد سطرها
مساحة حزنه ديره ... على حسين ونصيره ... وعلى كل الهواشم والفواطم وي كمرها
على روحه الموت اهوايه متأخر
وسبب موته السم وبلحزن متأثر
واذا ردنه سبب أخر لموته نكول
مات ابحين طاغي اعلى النسه اتأمر
ويمكن هم سبب هذا لوفاته ... لمن يزيد نكث الراس بعصاته
وروحه بأعلى علين ... هديه لنحر الحسين
___
كوكب حزنه شاسع ... بقه بموته ينازع ... ينازع فكرة الميت وتسحكه الاعوجيه
ومتى صارت مثلها ... مره يجتلون اهلها ... خيمها ايحركوها وأهي تمشي سبيه
للذالك حزنه سرمد ... ابديه دمعة الخد ... صاحب فاتحه ضلت يشيعه دائميه
خطوه خطوه يتكرب الموت احذاه
بعد ماكال من الشام آه آه
أخر جلمه كال وغمض العين
حسيناً واحسينا ً واحسيناه
مات من الشماته وعمره اتبده .. مات من آل اميه منمرد جبده
تمنه وي القرابين ... هديه لنحر لحسين
•••••••
الخادم : عباس محمد الحميداوي
محرم الحرام يوم 20
(ثكيل الى الامام السجاد وكأن الحسين جاء لدفن ولده )
من الطف متعني وجاي ... عباس يدفنك وياي
متعنيك ... ايواريك .. ويوافيك
عمك عباس ... عمك عباس
____
وياي اجه يوفي الدين .. بس مستحي ابلايه ايدين
حاير بنعشك منهو يشيله
عباس صح عنده اجتوف ... بس عمك ابلايه اجفوف
بس هو نفسه بعده بحيله
بنص الدرب ويايه حجه ... بس ماكدر يحجي وبجه
الترب راد اوياي ايهليه
ماي الدمع حين النزل ... تذكر الماي ومني خجل
تذكر الجربه وكربله والعيله
من النهر جاب ادموع ... وعيونه يشعلها اشموع
يصليلك ... يحجيلك ... يبجيلك
عمك عباس ... عمك عباس
___
حين النظر تابوت الخشب ... تذكر الخيمه من تشب
ونحب وطفى جمر روحه
تذكر ركض طفله ونار ... تذكر سبي وبجي ازغار
واباله طفنه انرسم لوحه
صوت النخوه بذنه اذان ... وزينب عنده جن قرأن
بذاكرته نخوه ابد ماممسوحه
عمك كلبه زار الشام ... مثلك راح ويه الايتام
قصة السبي زادت نوحه
مجروحه ايامه وساعاته ... وياك ينوح لخياته
ينعاهن ... يبراهن ... وياهن
عمك عباس ... عمك عباس
___
جايب كل حنيته وياه ... كوم اكعد يله اتلكاه
وانظر كل دمعه الهماله
كبل شويه يبجي حيل ... يكول انته داسنك خيل
وليش ماجت لي خياله
عمك غيره وكل احساس ... وين الكه مثل العباس
ياهو اليوفي من امثاله
جاي وياي يدفنك عود ... بس اتعذر ماكو ازنود
كوم انهض عاين حاله
طايح وطايح عباسك ... افتح عينك ارفع راسك
والكسره ... ابظهره ... وبعبره
عمك عباس ... عمك عباس
_____
يابويه مو عم هذا ابو ... هنيالي عندي هيج اخو
وفاي لحد اخر لحظه
جينه وجبنه الدرب ابنوح ... وسفه السجاد ايروح
خذ يارب حتى ترضه
يبني فدوه افتح عينك ... يم راسك هذا احسينك
اعيونك جا ليش امغمضه
مثل الاكبر وي جسّام ... تغمض بس موقصد اتنام
كل يوم بدمعك تتوضه
ينعاك المحراب اليوم ... وعمك يبجي اعليك دموم
دمعاته ... واهاته ... وحسراته
عمك عباس ... عمك عباس
__
اتمدد وياك طول بطول ... من حزن لاخر منقول
وحزنك يستاهل هل الونه
سولفلي لو بس جلمه ... اطشر حيلي وشيلمه
وكبر ابني اشلون احفرنه
الحزن البيه هد حيلي ... يله انته الي اتجيلي
بس مره طولك اشوفنه
محتاج لكل وكفه تعين ... يبني الوالد انه احسين
هم صوتك بعد اسمعنه
يقره يمك ياسين ... ورش كبرك بدموع العين
يقرالك ... وينعالك ... متمالك
عمك عباس ... عمك عباس
الخادم : عباس محمد الحميداوي
محرم الحرام
(قصيده الى سيدتي ومولاتي ام البنين )
هاي انه ذيج الصابره ... ... لو جنت بل الطف حاضره
وي ولدي افزع ناصره
يحسين يمه ... ... يحسين يمه
____
حرام الي يتصدق على أهل البيت
وصدقتي اربع نشامه واعرف شربيت
يجوني مايجوني حسين ماهميت
همي جان ترجع يبني انه تمنيت
اربعه ذوله وياوسف ... يحسين ماربيت الف
وابرباهم ابكى امساهره
وي ولدي افزع ناصره
يحسين يمه ... ... يحسين يمه
_____
ماينعز ضنه لعينك وتعب ارباي
يروح الزهره ياحيلي ونظر عيناي
جنت مناطره بس جلمه منك هاي
تمنيتك لطفك كتلي امشي وياي
جا شفت من يمي العجب ... ... هديت جا وي ام وهب
الفاديك جنته مناطره
وي ولدي افزع ناصره
يحسين يمه ... ... يحسين يمه
__
بعدني ام حيل خاوي يبني وامهدم
وكل ليله الضعن بل الباب اتحلم
ضحيت وعلى باقي النسه اتشيم
تاجرت بولد مو مال لا بل دم
يحسين خسران البخل ... ... وروحه لروحك مابذل
وماضن تجاره خاسره
وي ولدي افزع ناصره
يحسين يمه ... ... يحسين يمه
__
جن الموت خذه أرواحكم اتسفط
بادي من حبيب لحد المكمط
الموت أعلى الركب مثل القلادة انخط
والما مات بل الطف من ايده يتربط
المامات يتأسر نعم ... ... لو تحترك فوكه الخيم
بل الطف منايه ماطره
وي ولدي افزع ناصره
يحسين يمه ... ... يحسين يمه
__
العذر لأمك ياغالي حايره ابعذري
قليله بس ضناي افديكم ابعمري
ولون ادري السبي مكتوب لو ادري
جا وي زينب اركض حافيه ابخدري
خلي عليه يصيحون ... ...كلشي ولاخدر ام عون
هل الخدر ربك ساتره
وي ولدي افزع ناصره
يحسين يمه ... ... يحسين يمه
_____
كلشي يكول ضعنك مختلف من رد
وعلى جم غالي ضعنك لابس الاسود
يمه تكلي زينب حرت وين اشرد
يمه تكلي زينب الحادي بينه ابعد
زينب مهضومه احس ... ... وحمره العبايه من الشمس
الصاير بهلها ماجره
وي ولدي افزع ناصره
يحسين يمه ... ... يحسين يمه
الخادم : عباس محمد الحميداوي
محرم الحرام
(ثكيل للسبي )
حسين مايدري ابخواته ... سبي راحن للشماته
من الظلم ... ... ... محد سلم
__
ياناس هذا الجره ... الذبّاح حاس ابمفخره
الخيل داست منحره ... وضلوعه هم انداسن
جم مره صاحت زينبه ... يحسين خدر الله انسبه
كل العيال امدولبه ... أهل العفاف انشافن
محاوطهن الظالم بجيشه ... الموت أهون ولا العيشه
وضرب وشتم ... محد سلم
___
تتطوه وحدتهن طوي ... وماطايبه اجورح الجوي
دك الطبل يدوي دوي ... أبأسماع كل علويه
المذبوح ماجنه حسين ... جن خارجي عن الدين
جلمة الحك راحت وين ... جم فلس بيه مخفيه
المال أعمى كل بصيره ... بيهم وضاعت شكو غيره
ابنار الألم ... ... .... محد سلم
___
زينب ابمثابة ام كبل ... ويكلولها ابكل الحصل
هسه الوكت صعدها تل ... وين الجانت اميره
ابجم مصيبه محمله ... شيّبت زينب كربله
شافت صبر مااطوله ... وتاليها للشامت اسيره
مامتعوده زينب علمذله ... ولاماشيه والناكه هزله
والكل علم ... ... ... محد سلم
___
مكتوبه الاام تضوك ... وماوكفت رجل النوك
الا لمن طبت سوك ... وشافوها خدر امكبع
اهنا لسان الحق نطق ... خطتبها مو جلمه بورق
ومن القصر هل المنطلق ... وبدت والكل بده يسمع
ذلت يزيد وابن ازياد ... وذلهم بعدها السجاد
لبيع الذمم ... ... ... محد سلم
___
مرات تنقام الحرب ... بس مو بلسيوف وضرب
الخطبه هاي اكبر رعب ... هزت عروش وذلت
وبلتالي ينطاع القدر ... شاء الله نفديه النحر
وشاء الله يسبون الخدر ... وارسالة الحق وصلت
مشروع الحسين الفاز ... أحدث بل الإسلام انجاز
ثورة قيم ... ... ... محد سلم
الخادم: عباس محمد الحميداوي
محرم الحرام
[قصيده للسبي ١٤٤٥]
أصبح سبيه بليله ويوم ... مو حكها عيني تهجر النوم
من بعد ذاك الدلال ... ايدي مجتوفه بحبال
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
تالي عمري وبعد كل ذاك الدلال العشته
انسبي وشامت يصيّح الكمر مبسيه اخته
الموت انَه بذيج المواقف والله آنه الردته
بيوم واحد خمسة اخوه وعون هم قدمته
اعلى ارماح شالت روسهم كوم ... مو حكها عيني تهجر النوم
من بعد ذاك الدلال ... ايدي مجتوفه ابحبال
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
كلهن يونن خواتي وهايه كل العايله
الما مجويه برجلها امسّلبه من حرمله
المو عليله ويانه اجتي هسه اي متعلعله
واشخلت ابيتي المنيه وكربله ياكربله
وذيج الرماح تحاجي الغيوم ... مو حكها عيني تهجر النوم
من بعد ذاك الدلال ... ايدي مجتوفه بحبال
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
عايفته مو في الجسد بلشمس من عفناهم
وماجيت حتى بالدفن السجاد اجه ودفناهم
بكومة عمايم ضعني اجه وراح ارجع ابلياهم
ماتو عطاشى كل هلي ومحد اميّه انطاهم
شربو هلي من فيض الدموم ... مو حكها عيني تهجر النوم
من بعد ذاك الدلال ... ايدي مجتوفه بحبال
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
عدمن ابثّن شكوتي وياهو اليرد اجوابي
خليتهم فوك الترب بصبح اهدعش احبابي
بخواني ابولدي ابهلي الله يعّظم امصابي
لحي هلي ياهو الينطلق ويأخذ وياه اكتابي
يكلهم يهلها انسبت جلثوم ... مو حكها عيني تهجر النوم
من بعد ذاك الدلال ... ايدي مجتوفه بحبال
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
ايّست من جيت الكمر لا مايجيني الكافل
ومجبوره راح اركب هّزل ويسبني كلسا عايل
ياهو البعد يلفي ابنشد خافن المحمل مايل
ابلا محمل الهزله تره وشبيه دهري اشعامل
اعلى الضعن كل السوك ملموم ... مو حكها عيني تهجر النوم
من بعد ذاك الدلال ... ايدي مجتوفه بحبال
# الشاعر عباس محمد الحميداوي
١٤٤٥.٢٠٢٣ محرم الحرام
(نزله للحسن )
بكربله لو جان الحسن ... جا كلب مقياس الزمن
دخيل اخو العباس والعلويه
لو حاضر بكربله بس شويه
جا كلب مقياس الزمن ... جا كلب مقياس الزمن
_
لو تعاد الدنيه مره والحسن ايضل سالم
جا ترخص من مضيفه ولبّه نخوة هاشم
وبلطريج ايكول لبنه اوليدي اسمع قاسم
كبل لايبرز الاكبر الحسن كال نهاجم
والقاسم اجوابه يسر ... كله نكص راس الشمر
وناخذ لعبد الله جود اميّه
لو حاضر بكربله بس اشويه
جا كلب مقياس الزمن ... جا كلب مقياس الزمن
__
جف المعزب كريمه تنطي وطك لو تهد
والحسن واضح سخائه المحب يدري واليضد
لون حاضر يوم طفها جا مشاردها يسد
والحسن هم مثل إخوته سيفه مانام بغمد
لو حاضر يصيح بقين ... اننا أصحاب اليمين
أصحاب يمنه ابد ماملويه
لو حاضر بكربله بس شويه
جا كلب مقياس الزمن ... جا كلب مقياس الزمن
___
جا اتوسط بلهواشم وقسّم أصناف العده
اليمنه يم حسين ضلت ابو زلم امّجنده
المشرعه لعباس كلها اعليها كافي لوحده
وهو اخذ مركز العكسر ناوي اعليه يفنده
والأنصار دور انطاهم ... بكتر السبط خلاهم
والحسن هيبه من أوله لتاليه
لو حاضر بكربله بس شويه
جا كلب مقياس الزمن ... جا كلب مقياس الزمن
___
وين اكو مهره التشيله الحسن تجوي احرورته
وترهب ابديوان اخيه الحسن جانت صورته
المره مو كهوته بلطف الضربه هيه امرورته
لون بلطف وسيفه سير أعلى الركب تسيورته
امهندم وشيخ أعلى العرب ... ويتونس بكص الركب
هذا الحسن شيخ الكره الارضيه
لو حاضر بكربله بس شويه
جا كلب مقياس الزمن ... جا كلب مقياس الزمن
___
جيب اليخلص ركبهم لون حاضرها الكلف
جا العكسر الف حسبه تجيبه وترجعه الف
جفه سطّار للعدوه وعل اليتامه شكد ترف
الكريم الي بعطائه شكد جميل ومختلف
من الزاد ينطي اكثر ذهب ... امعزب الريح الي تهب
كرم شجاعه ومفخره ماضيه
لو حاضر بكربله بس شويه
جا كلب مقياس الزمن ... جا كلب مقياس الزمن
الخادم: عباس محمد الحميداوي
صفر الخير
(نزله في حق الحسن عليه السلام )
موكب ابنص روحه الحلوه ... وصار كلبه الدله والدم كهوه
ابهلا والمرحبه خدر جايه ... وكهوته وزعها علمشايه
الحسن ... الحسن
___
الحسن فتحله موكب بوكت أول زاير
بيوم اجه لحسين ذاكه الاعمى جابر
قبل الف وكسر عام الحسن ناصب جادر
كهوته جانت تفور وجان جايه خادر
من تعنه جابر لمحبوبه ... خيمة امضيف الحسن منصوبه
حيهم ينادي يهل الوفايه ... وكهوته وزعها علمشايه
الحسن ... الحسن
__
موكب ابن الزهره ضل بأاوسع نطاق
تعب مابيه وابد مابيه كل مشاق
الحسن يمكن موكبه صار العراق
ومنها والوادم خذت امضيفه انطلاق
انطلاق الخدمه بزوده اتولام ... أول أبو موكب وأول خادم
هلا بيهم جانت أول احجايه ... وكهوته وزعها علمشايه
الحسن ... الحسن
___
الحسن حاشا مره بات جايع جاره
واخذ من هذا الكريم حكمته وايثاره
يعتبر خطار اخيه احسين هم خطاره
فلذالك كمكم ادلاله بقه تشب ناره
الحسن كل الكرم مديون اله ... الحسن معزب اوليده لكربله
الكرم غالي وجان اهو شرايه ... وكهوته وزعها علمشايه
الحسن ... الحسن
___
ايده عصاة موسى من الخدم تلقف تعب
الحسن ماعونه بيه الزاد اقل من الذهب
الحسن ماعبر زاير لمن موكبه انصب
النوى يكمل طريقه لعطر دلته ينجذب
وين اكو زاير تعده امضيفه ... وهو ممشى الزائرين ابكيفه
الحسن مبعوث الخدامه هايه ... وكهوته وزعها علمشايه
الحسن ... الحسن
____
الحسن روحه يقيناً ابكلشي متصدره
وحاشا كالو شاعر يوصف الكريم بشعره
الحسن مشعل هدايه مثل باقي العتره
الحسن شي جداً جبير شما ردنه نصوره
وجهه شمعه الشمس تخجل منها... اكنوز علمه يحرم ندفنها
روحه لروح الحسين امرايه ... وكهوته وزعها علمشايه
الحسن ... الحسن
_
الخادم : عباس محمد الحميداوي
صفر الخير يوم 6
شهادة الامام الحسن
(ثكيل الى الامام الحسن )
رحلة موت راح وياي تبدي ... عن لاتجي زينب شيل جبدي
نحي الطشت عني ... الفواطم لايجني ... وأون لايسمعني
شلون يحسين ... شلون يحسين
_____
والله خايف كلب زينب لو نظر ذاكه الجبد
وحك عينك هم جبدها مثل جبدي ينمرد
والله دمعتها عزيزه وسفه لو تبجي اصد
خويه خاف عيون زينب تنعمي من البعد
امس ودعت امها وي ابوها ... وهل المره اضن تودع اخوها
كبل لاتجي ليه ... وتنظر الجبد هيه ... يلجمها خطيه
شلون يحسين ... شلون يحسين
_____
بعده موقف جتل محسن جن يدور ابالها
البين ماخله الها واحد شأخذ وشخلالها
لو تعاين جبدي خويه وشيصير ابحالها
خويه لايلجم كلبها الدم ويخيب امالها
هذا كسر الضلع عامي اعيونها... وبعينكم كال الوصي تخلونها
العزيزه هاي زينب .. ماردناها تنحب .. وجمرها انوب ينشب
شلون يحسين ... شلون يحسين
__
تهدمت والله اركان الهدى وجرح الصبح
ذني عاشن ويه اختنه من فعل ذاك الجرح
خويه خايف لاتجيني تشوفني هم منطرح
تره موقف جرح حيدر ابالها ولامن مسح
خاف تشوفني وتهل دمع عين .. شيل الطشت ابساع يحسين
انه خايف عليها ... ومن اسمع بجيها ... ماكدر و اجيها
شلون يحسين ... شلون يحسين
__
هيه مثل امنه العزيزه تبجي وتون بشجن
وسفه هيج يصير بيها هواي تعبها الزمن
امس مرنها المصايب بحزن عاشت ولحزن
امس امنه وي ابونا وهسه لمصاب الحسن
خطيه بت علي لاتنفجع كوم.. تنظرني طريح وجبدي مسموم
الدهر كشرها الانياب .. وبيه خاف تنصاب ..وتفكد بعد احباب
شلون يحسين ... شلون يحسين
_____
خويه هذا مصابي هين لجن لايوم اليمر
مثل يومك يبو اليمه البيه كلبها يستعر
بيه طشت تنظر اختنا مو جبد تنظر نحر
ربي ايعّظم اجرها وينطي لزينب صبر
الخيم تحترك هم الكلب محروك ..ومن بلد لبلد يمروها بسوك
اختنا تنسبي ..... وتحترك العبي ..... وينصاب النبي
شلون يحسين ... شلون يحسين
الخادم : عباس محمد الحميداوي
صفر الخير
( قصيدة لشهادة السيده رقيه عليها السلام ١٤٤٦)
بويه .. احسب لموعدنا احساب
بويه .. صعبه عزيزك لو غاب
بويه بويه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
اليفارك كون من اليفكده شابع
وفرق بين اليشوف الفركه والسامع
وانه مضيعتلي ابو منه صبع ضايع
وعلينه الموت بويه امحزم وفازع
بويه .. منك شنهو الانساه
بويه .. احاه اصيحن احاه
بويه بويه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
يبويه اعليك متعوده اشكثر تدري
عفتني اميتمه وبس دمعتي تجري
اريد الموت حتى تزورني بكبري
رقيه انه العزيزه المنذبح عمري
بويه .. تالي ابخرايب وشام
بويه .. من الوجع مابينه انام
بويه بويه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
يبويه امدللت ضعنك جنت انه
وتنشدني جنت ها بويه تعبانه ؟
ومهتم بيه حيل وانه قلقانه
تعال حسين دمعي افرشه اهنانه
بويه .. لجيتك اتاني متانات
بويه .. بحساسي اكلهم مامات
بويه بويه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
اوصلناها الخرابه ماتجي ليه ؟
وكبل جيتك اسولفلك انه شويه
اعرفك راح تدري شبيه مابيه
من اتشوف بذني ماكو ترجيه
بويه .. حتى الحجي يتعبني
بويه .. يالراسك امعذبني
بويه بويه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
اويلي جايني راسك ابدم ثغرك
تعذرنه يبويه اتراب ضل حدرك
ابوسنك اريدن من أصل نحرك
اليشوفك فشله لو بجروحه يخبرك
بويه .. وياك امشي وياك
بويه .. مااحتمل بويه اجفاك
بويه بويه
الشاعر الحسيني: عباس محمد الحميداوي
١٤٤٦.٢٠٢٤ ليلة واحد صفر
(القصيده مهديه الى روح المرحومه جدتي ام سعد )
(نزله لشهادة رقيه ... الامام السجاد يخاطب عمتة زينب بشأن اخته رقيه )
ياعمه يازينب ... صاح بكلب ينحب
ماتت أعلى الراس أخيتي
ماتت أعلى الراس أخيتي
__
أنفاسها مشتاكه جانت تشم عطر الشيبه
واجه الراس وهيه صاحت طوّلت بالغيبه
عمه رادت جسم ابونه يم نحره تجيبه
تريده كامل مو منحر يجي حسين الهيبه
وجمر الحزن يلهب ... صاح بكلب ينحب
ماتت أعلى الراس أخيتي
ماتت أعلى الراس أخيتي
_____
عمه عن منحر ابوها الطفله بس نحيّها
عمه مانامت رقيه الموت عارج بيها
عمه والاصعب عليج ابساعة اتغسليها
التغسل تخاف منها لا مرض يعديها
ومنها فلا تكرب ... صاح بكلب ينحب
ماتت أعلى الراس أخيتي
ماتت أعلى الراس أخيتي
___
ماسمعتيها تناشد راس والدها ابحنان
تكله ياهو كطع نحرك وعيشاني ابلا امان
ياهو بويه يتماني عمر لو شمر وسنان
عمه خل ترتاح ماتت خل تغادر هل الزمان
واعليها السبي يصعب ... صاح بكلب ينحب
ماتت أعلى الراس أخيتي
ماتت أعلى الراس أخيتي
__
عمه مافارك جفنها الدمع والبال انترس
بليتميه بس يتيم تكول ياناس اليحس
لحد هسه ابالها شمر وعلى صدره جلس
عذبه بثنعش ضربه انوب اتولاه رفس
من شافته اتعذب ... صاح بكلب ينحب
ماتت أعلى الراس أخيتي
ماتت أعلى الراس أخيتي
__
عمه يازينب ترافة اختي تجتاز الكطن
على الهون وياها عمه ابحين ساعات الدفن
هواي رشي ماي عمه العطش ماريده يحن
اتمنت اتذكر أعلى ابوها اسود يصير الجفن
وبلغرب صح تتعب ... صاح بكلب ينحب
ماتت أعلى الراس أخيتي
ماتت أعلى الراس أخيتي
الخادم: عباس محمد الحميداوي
صفر الخير
( نزله في حق السيده رقيه )
كلبج من الشام ذايب ... ميته وسفه ابهل الخرايب
يارقيه ... يارقيه
____
على راس حسين حانت ساعتج
وخضاب شيبه أنغسل من دمعتج
رحتي وارتاحيتي لاجن عمتج
احتارت اشلون ابغرب لو دفنتج
وحسين مايرضى لبناته ... تموت يم كاع الشماته
يارقيه ... يارقيه
___
غيّمن اعيون زينب ودمعتها تهلها
وليش تبجي الجواب اهنا يل تسئلها
البمغيسل تكول هل الطفله منغسلها
هاي البينه مريضه نخاف مانوصلها
ليش ازرك ضل متنها ... انخاف اي والله منها
يارقيه ... يارقيه
____
كربله والسبي ودمعج ومع قلة الحيله
ورمح شايل راس ابوج وينسمع ترتيله
والخرايب البيهن انتي بايته جم ليله
وشوكج لختج فاطم وحلمج وتأويله
والفراك المرافك حياتج ... ذني اسباب لوفاتج
يارقيه ... يارقيه
___
كلوب التذكر مصيبتها بلهموم امتلت
وتنطي قصتها شبه بأيه قد أنزلت
وأذا آل أميه ياناس باجر سئلت
فبأي ذنب بنت الحسين رقيه قتلت
بأي ذنت بسيطاهم تتلوه ... وليش رجليها بجمر تتجوه
يارقيه ... يارقيه
___
بل الخرابه ولعمته كال العليل
جفن ودع جفن وقد حان الرحيل
رحلت من الدنيه الى رب جليل
عمه ماتت اعلنحر ابدمع اليسيل
ماتت وماتت ابجلمه بابا ... وفاتحتها اهنا بهاي الخرابه
يارقيه ... يارقيه
°•••••°
الخادم : عباس محمد الحميداوي
صفر الخير
(القصيده مهديه الى سيدي ومولاي الحسين وابنته رقيه عليهما السلام)
( نزله لخدمة السيده رقيه )
هنيالي اذا ترضين اخدمج ... ممنونج واروحن فدوه لسمج
هنيالي ... هنيالي
_____
هل المقام اجبير كلش خادم اصبح لحضرتج
والله يرادلها حظ وبخت هايه خدمتج
اني يامولاتي عبدج تحت امرج وطاعتج
اطلب انه رضى الباري ورضى ابوج وجدتج
هنيالي خادم اني لرقيه ... هنيالي اقره اعليج لطميه
هنيالي ... هنيالي
____
بلقب خادم اسمي صار وخايف ايحسدوني
وخادم بت ابو اليمه هيج انه ايسموني
والله شكرا والف شكرا لهل الدرب جبتوني
خادم الكم واقره والطم ومنبر تصعدوني
هنيالي وهاي من اعظم نعم ... هنيالي اتسجلت من الخدم
هنيالي ... هنيالي
___
والله مبخوت اليخدمج وباله مرتاح وسعيد
هل خدامه من جنهم باجر تنجيه اكيد
وبليله الوحشه تجونه الخادم مايضل وحيد
الف حمداً على حسين والف لعنه اعلى يزيد
هنيالي وصرت ابفرقه الناجيه ... هنيالي العن يزيد الطاغيه
هنيالي ... هنيالي
__
حاجه عندي يبت فاطم وانتي لصعبات حل
كون روحي من المجالس ابد متكف وتمل
وكون ايدي من الخدامه ومن اللطم ماتبطل
وكون دمعاتي جريه وعيني بس الكم تهل
هنيالي انحسب باجي بصدك ... هنيالي اجزع اعليكم وادك
هنيالي ... هنيالي
___
هم مراحل هل الخدامه وبايه بايه تنصعد
كون كلبك صافي كلش يعني ماتحمل حقد
كون اخلاصك ميه وحيل جاد ومجتهد
اهنانه حكك من تخاف علخدامه تنحسد
هنيالي وانرزق منج نيتي ... هنيالي خادم يكتبون بجنسيتي
هنيالي ... هنيالي
____
بجاه فاطمة العليله اعليج وفقيني اجي
زاير اتعنه لضريحج اهناك اريد اشبع بجي
ارد اسكي ازهار عمرج ومن دموعي تنسجي
ارتاح يم كبروكم انه وياكم يحلى الحجي
هنيالي زاير وهم انحب ... هنيالي ازور عمتج زينب
هنيالي ... هنيالي
الخادم : عباس محمد الحميداوي
(ثكيل ... محاوره بين الحسين ورقيه عن صاحب الزمان )
كاعده مره بحضن بدر الحنان ... وسولف هواي عن مهدي الزمان
كتله بويه وضح اكثر ... كال ياخذ ثار منحر
وكالي يجيب التراجي من آل اميه
__
على الفطره اهنا نشدته وكف لحظه من الزمن
كتله ترجيات ياهي يجيبهن ابن الحسن
سكت وحط ايده بجهته عيونه جنهن غوركن
وجانت النظرات اليه وعيونه الي هنه الحجن
فسرت من دمع عينه بت دلال ... تنسلب وينشد عضدها بل حبال
كتله سولف بعد ماصبر ... كال ياخذ ثار منحر
وكالي يجيب التراجي من آل اميه
__
بطرف من ذيج العبايه الخيطتها فاطمه اختي
مسحت دمعاته واكولن لعيونه اترجاج اسكتي
كمت الوم بروحي انه شبيج يروحي وسئلتي
سكتن اعوينات ابويه وماكدرت احبس دمعتي
ضل الاسم مبهم وتبينه الايام ... ياهي الذي بخرابه باجر اتنام
كتله يمتى المهدي يحضر ... كال ياخذ ثار منحر
وكالي يجيب التراجي من آل اميه
__
نشغتي بهل الساعه فجئى لدرانا فكري خذت
وتذكرت نوح ام البنين والعليله من بجت
كتله بويه بداعة امك جثة منهو اتسلبت
منهو تبرز من خدرها وياهو منهن الي انسبت
هاي الاحداث الخذتها من الحجي ... جان كل كلمه مديونه للبجي
كتله مو كلبي تفطر ... كال ياخذ ثار منحر
وكالي يجيب التراجي من آل اميه
____
سولف واني استمعله وجانت الجلمه دوه
وجل علينه الليل فجئه وشيبته انترست ضوه
جان يوكف عن كلامه بس لمن يشتم هوه
احداث بطف شكد طويله نشوفها يمكن سوه
يمكن نسافر سفر كلش طويل ... يمكن السجاد بيه يصبح عليل
كتله كلبي يحس بلشر ... كال ياخذ ثار منحر
وكالي يجيب التراجي من آل اميه
_____
لمن حان الليل سولف بجرح رمله وليلى
وجرح كافل مارد النه وزينب التدعليه
وجرح مذبوح بنبال الجنتي اتلوليله
كال يم ابو صالح يله ندعي بلفرج وتعجيله
هو باجر ياخذ بثار الرباب ...وياخذ بثار الخد النام بتراب
كتله علذل تره ماكدر ... كال ياخذ ثار منحر
وكالي يجيب التارجي من آل اميه
__
انوب سولف عن الوحشه التجي بذاك المكان
بيها زينب ولاولد ضلو ولابكه عدها امان
بيها مخنوكه العقيله من فعل ذاكه الدخان
ليل لابيه ريحه مني ولامن عباس الحنان
كلفت المهدي اهناكه يحامي ... وكتله بعيونك تبات ايتامي
كتله كون وياك يظهر ... كال ياخذ ثار منحر
وكالي يجيب التراجي من آل اميه
___
ختم سالوفة الكعده وكام بس كوه وكف
قصه اختنك منهايطيح شيخ اعظم سلف
قصة بيها الماي قائد ويعتنيله الما رجف
اربعة ألاف فارس ترمي جربه وتكص جف
قصة العباس بيها كسرة خاطر ... طيحته اعلى النهر تكسر باجر
كتله ظهرك بيه يكسر ... كال ياخذ ثار منحر
وكالي يجيب التراجي من آل اميه
الخادم : عباس محمد الحميداوي
[لسان حال الامام زين العابدين عليه السلام على فراش الموت ١٤٤٥]
وياكون هسه ابهذا وكتي
يم راسي تنعى ام عون عمتي
نواعي تخص الحسين ... واموت وهامل العين
انه السجاد ... انه السجاد
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
للقبله متكبل انه جم شهكه واغمض عيني
وبالي فلا يم الاجل كل بالي يم حسيني
ماناسي من الطف جرح وجاشنهو الينسيني
بلحظات الموادع ردت عمتي الذي تبجيني
الزاد اخلطه بدمعي ابكل مره
والموت صار اسنين انه منتظره
اخلص عمري بونيّن ... واموت وهامل العين
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
هاي انفاسي الاخيره اذبلت وشبيه اشضل
راح أموت وبيه حسره الحسره يامن تسئل
ردت زينب مو عدليه تقره يمي المقتل
وريت حتى تراب كبري كون من ذاك التل
موتي بجفه وعمتي عندي بجفه
مسبيه صاحو الها هاي الكلفه
تطب السوك مرتين ... واموت وهامل العين
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
الشام بايك من حياتي اسنين ماعدهن عمر
ادري بس ايام بيها عشنه وي ذاكه الصبر
امتوني وامتون العلاوي من السياط شكد حمر
الشام آه يشام آه يشام وطبات القصر
ملتمه اعلينه الناس الي امعيّده
فرحانه الوادم اكبالي متعمده
ثار لبدر واحنين ... واموت وهامل العين
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
حتلو لو عطشان اموتن حتلو ابكى طريح
حتى لو انداس هسه مو مثل عودي الذبيح
الموت سهله لجن صعبه علتل عمتي تصيح
انهض الحك ياذخرنه مو وكتها تستريح
وابذاكرتي الكوفه ابذاكرتي الشام
أخذن من عمري ايام ايام
الموت الي هو المعين ... واموت وهامل العين
# الشاعر عباس محمد الحميداوي
١٤٤٥.٢٠٢٣ محرم الحرام
(ثكيل : الامام السجاد يخاطب ابو حمزه الثمالي عندما قال له ان القتل لكم عاده وكرامتكم من الله الشهاده )
يابو حمزه الثمالي ... لا يدهشك حالي
هم كبل سامع مثل هاي القضيه
من بنات الزهره ماخذوه سبيه
لايدهشك حالي ... لايدهشك حالي
____
والله يابو حمزه هضمتنه جبيره
عمتي تتجف ومن ديره لديره
ابلا هودج ابناكه هزله وهم اسيره
ابسوك نوكف وينظر الماعنده غيره
اتخيل انت ابالك ... احسبها جن بعيالك
هاي يابو حمزه صعبه ومو شويه
من بنات الزهره مأخوذه سبيه
لايدهشك حالي ... لايدهشك حالي
_____
ابحجر نتصابح لو شتم الوصي ليش
لو ابسوط أعلى الحرم يتوعد الجيش
ينسبي المامات وي حسين ويعيش
تدري لاكونه يابو حمزه الخصم بيش
لاكونه بطبول ادك ... ياريت ميت والحك
ميت يابو حمزه اويه ابوي ماصح بديه
من بنات الزهره مأخوذه سبيه
لايدهشك حالي ... لايدهشك حالي
____
شفنه جم شامت بطبتنه القصر ذاك
بين متشفي ابجتلنه اوبين ضحّاك
لجن خطبت عمتي زينب سوت ارباك
وخطبتي زادت ويريتك حاضر اهناك
انتصر دمنه أعلى السيف ... ذلتهم اخذ الحيف
رغما عليهم كلمة الحق أعلى هيه
من بنات الزهره مأخوذهى سبيه
لايدهشك حالي ... لايدهشك حالي
_____
يابو حمزه وجرح ثاني يهز مصابه
كعدونه اعلى التراب ابنص خرابه
احتمنله ولن كلبنه ايشب عذابه
كعدت ارقيه وتنادي احسين يابه
زادت الحيره اكثر ... وموتها حال المنحر
علراس نامت ولنها ميته اعليه رقيه
من بنات الزهره مأخوذه سبيه
لايدهشك حالي ... لايدهشك حالي
__
يابو حمزه ذني كلهن جزء معدود
الخيل فوك حسين سحكت وردت اردود
يابو حمزه وعمنه على المشرعه ممدود
وحين اجانه الجيش ماضل عدنه هادود
فرت الحرم بلهيمه ... وشبت ابنار الخيمه
كلهن من طاري السبي أهون عليه
من بنات الزهره مأخوذه سبيه
لايدهشك حالي ... لايدهشك حالي
الخادم: عباس محمد الحميداوي
محرم الحرام
(القصيده مهديه الى السيده شريفه بنت الامام الحسن عليهما السلام)
قصيده ثكيل ... لسان الامام السجاد عندما نزل ملك الموت عليه )
اتلاثين عام اعلى الطف وماناسي شي اتذكر
وحتى من اجه ملك الموت كام المشاهد تكثر
روحي بقت بحزانها ... والموت دك بيبانها
علي السجاد انه ... علي السجاد انه
__
المده ماتنقاس على الفارك احبابه وخلته
يحتمل مايصب الدمع بس كلبه يبجي بسكته
اليفكد شخص واحد فقط تنظر كض خاصرته
وزلمه بظهر زلمه افكدت ومذبوح ابويه شفته
اسبعطش شيخ اثوبلهم دمع هايه وهايه
ابلا روس اذكر ودعتهم وهمه اعلى المسنايه
اجسام انه دفانها ... والموت دك بيبانها
علي السجاد انه ... علي السجاد انه
____
ملك المنايا نزل يم راسي وبده يشوف وياي
وصاح ولطم راسه لمن شاهد نسه تهج حفاي
وزاد الجزع لمن سمع عطشان اريد من الماي
اتوقفنه وازداد البجي وكفتنه حيل اشواي
شفنه الذبح وشفنه السحك شفناهن شوف العين
بس الهضيمه من انعرض مشهد مسلوب احسين
والطف صعد تربانها ... والموت دك بيبانها
علي السجاد انه ... علي السجاد انه
_____
من عزرئيل اسمع حجي وبدمعه جفنه غركان
كلي يبن سيد العرب المثلك ميت من ازمان
كتله اوكف وانظر بعد مشهد يهيج الاحزان
ذاكه اني مجتوف وهذيجه عمتي بنص ديوان
ياعلي السجاد اسمعه يكلي اريدك ترتاح
يمنه الحسين بجنته مايمه سيف ولاارماح
روحك دخليه العانها ... والموت دك بيبانها
علي السجاد انه ...علي السجاد انه
___
من شافني الباقر علم عمري بعد جاه حده
نزلن ادموعه وذكرني ابموقف بيه شده
من رجع خالي مهر ابوي يصهل وجاي ابوحده
يصهل الظليمه من امةً ذبحته وهو محمد جده
ومن موقف الميمون رحنه لموقف بيه حسره
من جابو احبال السبي والخيم بيها موجره
اهلي شب صيوانها ... والموت دك بيبانها
علي السجاد انه ... علي السجاد انه
_____
وخطه الموت اعلى ابن ادم لوالدي هذا النص
وهايه الحياة شما بقت لازم بيوم وتخلص
واليوم خطاري الموت ابدون مايتربص
جاني بعد مادهر حزن كلبي منه اتفصص
وهم بشهر المحرم صار موتي وضلت عليه الونه
وجنت ابحياتي محنه اودع واستقبل محنه
روحي الدمع عنوانها ... والموت دك بيبانها
علي السجاد انه ... علي السجاد انه
••••••
الخادم : عباس محمد الحميداوي
محرم الحرام اليوم 16
(القصيده مهديه الى الامام زين العابدين عليه السلام)
(القصيده عباره عن شكر من فاطمه الزهراء إلى جميع الخدام١٤٤٦)
هالرساله موجهه لكل خادم
شكراً تكلكم جميعاً فاطم
اكتأب شكر ابيدها ... ... للخدم لوليدها
شكرا تكلكم جميعاً فاطم
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
اول شكر من فاطمه لخدامها تكول
للجان باله بالمجالس كله مشغول
وللطم صدره على الساحكته الخيول
الزهره يمه تكله لطمك لبني مقبول
فاطمه ماتنسه واحد ماتشكره
واحد واحد تعرفه وتدري بامره
وهذا من تسديدها ... للخدم لوليدها
شكرا تكلكم جميعاً فاطم
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
كلشي يم الزهره محسوب بحسابه
الحضر لحسين وحزن اكليبه جابه
والشال ماي اوزع الماي بثوابه
عن محمد وعلي تشكره نيابه
واعزاز عد الزهره كل خدامه
الشيخ والرادود واللطامه
وفرد راي تريدها ... للخدم لوليدها
شكرا تكلكم جميعاً فاطم
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
وفاطمه ماتنسه تشكر شاعر حسين
تكله يمه البيت عيده وعيّد الونين
بعد فاطم مانست خدام اكو اثنين
الطبخ زاد والي يذرف دمعة العين
الكانس الموكب وخادر جايه
والكال حيهم وهلا بالمشايه
الف مره تعيدها ... للخدم لوليدها
شكرا تكلكم جميعاً فاطم
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
العلى حب حسين لو صارف فلس
الحاط رأيه والي اسود هم لبس
والمابجه البس دنك شويونه بس
الكلش شويه بمصاب حسين حس
والله حتى هذا تشكر حضرته
والبذل دينار ابعشره ردته
وفاطمه ابتعويدها ... للخدم لوليدها
شكرا تكلكم جميعاً فاطم
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
والشال صينية ثواب حسين بيده
والطبر راسه لأجل كطعت وريده
اليمشي ويردد ابوحده بأي قصيده
تحضره باجر بالكبر عدنه عقيده
وبليلة الوحشه الزجيه تزورهم
كل خدمها تندل اهيه اكبورهم
تدعي ربها يزيدها ... للخدم لوليدها
شكرا تكلكم جميعاً فاطم
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
وبكل طريقة خدمه بل وبكل شعيره
سجل فاطمه مانسه اجبيره وزغيره
وتقسم بذاكه الي لمّوه ابحصيره
دين خدمتكم وحق بدر العشيره
بالقيامه اتوفي كل اديونكم
تقر يوم الحشر هاي اعيونكم
والذنوب اتبيدها ... للخدم لوليدها
شكرا تكلكم جميعاً فاطم
الشاعر الحسيني: عباس محمد الحميداوي
١٤٤٦.٢٠٢٤ محرم الحرام يوم السابع عشر
(نزله ... على لحن قصيده الملا باسم الكربلائي ..على محمد واويلاه )
ضعن الاميره انسبه وانحاف ... ومن بلد لاخر وسفه تنطاف
واويلي ... واويلي ... واويلي ... واويلي
_____
الماألها أثر بخد الارض ضل
تصعد الهزله وتصعد التل
وأعلام النصر بيها تمثل
حاشا اعلى اخت الكمر تنذل
سطانه فوك النوك تنشاف ... ومن بلد لاخر وسفه تنطاف
واويلي ... واويلي ... واويلي ... واويلي
____
التاريخ وكل اقلامه يكتب
تبقى عظيمه الحره زينب
لكل النسه عفتها مضرب
راحت تذل العدو بموكب
موكب يتامى وحرم واشراف ... ومن بلد لاخر وسفه تنطاف
واويلي ... واويلي ... واويلي ... واويلي
__
تستضعف الحرمه ابلا ازلام
صح هاي لاجن زينب أعلام
بوجه الطواغي حجت بلشام
لايرمي حصوه البيته من جام
ييزيد كالت احنه مانخاف ... ومن بلد لاخر وسفه تنطاف
واويلي ... واويلي ... واويلي ... واويلي
__
من يصدح الحق كلها تنصت
وكل أذن رغما ً لصوته ينعت
زينب اسيره وحاشا تسكت
صح هيه منها الجبد منفت
وبيها جرح شكد صعب ينراف ... ومن بلد لاخر وسفه تنطاف
واويلي ... واويلي ... واويلي ... واويلي
_____
عدها عتب اعلى البيه غيره
وحسرة كلب بيها جبيره
لذيج الخرايب كل عشيره
اخذت المن عدهم اسيره
يكولون صعبه ابين الاعراف ... ومن بلد لاخر وسفه تنطاف
واويلي ... واويلي ... واويلي ... واويلي
___
لهاي الهضيمه الكلب ينطر
والعين غميه ودمع تمطر
تنسب وتنطك وغفله تنجر
وتركض وابين اعداها تعثر
هاي المصيبه ابكل الاوصاف ... ومن بلد لاخر وسفه تنطاف
واويلي ... واويلي ... واويلي ... واويلي
__
من تهمل العين اعلى المصاب
جيه بت علي ماشتها الاجناب
ولا فّرعت ولاطاح النكاب
والكال فرعت هذا جذاب
شلون العزيزه الطر الاسلاف .. ومن بلد لاخر وسفه تنطاف
واويلي ... واويلي ... واويلي ... واويلي
___
مثل الجبل هل الزود شامخ
احجايتها ملح الحجي الماصخ
ضلت ومنها الراس ماطخ
لاجن بقت غمية ون اتزخ
الطف بكلبها اجروح هل عاف... ومن بلد لاخر وسفه تنطاف
واويلي ... واويلي ... واويلي ... واويلي
_____
خط قلم من الحزن حبره
دمع العقيله البيه حسره
ويلي اعلى المكطوع نحره
واخته انسبت وانشاف خدره
ابحبل اليسر مشدوده الاجتاف ...ومن بلد لاخر وسفه تنطاف
واويلي ... واويلي ... واويلي ... واويلي
_____
شالت شرف عجّب المخلوك
تبقى اميره ابهزل النوك
الكلفه عليها طبت السوك
بت ناس ماتسكت اعلحكوك
بيها الارض من الخوف تلتفاف... ومن بلد لاخر وسفه تنطاف
واويلي ... واويلي ... واويلي ... واويلي
-----------
الخادم لخدمة زينب واهل البيت : عباس محمد الحميداوي
محرم الحرام يوم 12
[قصيدة ليلة الدفنه ١٤٤٥]
مدفون مامدفون محد كلي
لروحك صلاة الوحشه ردت اصلّي
يحسين يحسين ... يحسين يحسين
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
ميت اخوي وليل اجه ... ولازم اصلّي الوحشه
محد كلي مندفن ... انشال لو ضل نعشه
وتعبانه اصلّي بكعدتي ... باجر سبي من غبشه
من الصار ويانه صفت ... روحي بحزن وبدهشه
راحت اخوتي ابكربله فمن لي؟
لروحك صلاة الوحشه ردت اصلّي
يحسين يحسين ... يحسين يحسين
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
اشويه عن التل عفت ... جسمك اشوي من يمه
وبونينك اسمعتك كلت ... اشجم آه جم يايمه
ابنص النهار وتهيت ... شلون اجي بنص ظلمه
صوت الليالي ينسمع ... وانوب صوت الحرمه
ماترضى صوت لمشيتي يطلعلي
لروحك صلاة الوحشه ردت اصلّي
يحسين يحسين ... يحسين يحسين
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
من حطني دهري أعلى الهزل ... من ودعت خواني
ماشفت كل خير وفرح ... ولامن فرح شافاني
اشلونك ابحر هل الشمس ... محد اخبار انطاني
دفنوك خلوك ابترب ؟ ... داساك ؟ حافر ثاني
المثلك اويه اجناب العقيله يخلي ؟
لروحك صلاة الوحشه ردت اصلي
يحسين يحسين ... يحسين يحسين
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
يحسين اذا كتلو رجل ... وانوخذ من حكه اشكد
زلمه اوي ازلمه المعركه ... موش أعلى نسوان تهد
مارجع خالي الي ركض ... سلبّنه جر سوطه اورد
ماخله متن من الحرم ... ماطكه فد حاقد فد
مو زين عندي امتون التضلي
لروحك صلاة الوحشه ردت اصلي
يحسين يحسين ... يحسين يحسين
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
يحسين تاليته الوكت ... من هونته أعلى الباري
لاادري بيك ابيا كتر ... اولا انته تدري اخباري
زينب المايعرف كبل ... اسمي يبن أم جاري
يكلولي بحسينج نمر ... بعباس يله اختاري
وحيرانه جا غير انتم اهلي
لروحك صلاة الوحشه ردت اصلي
يحسين يحسين ... يحسين يحسين
# الشاعر عباس محمد الحميداوي
١٤٤٥.٢٠٢٣ محرم الحرام
(نزله للسبي)
ياابا الفضل روحي الك مشتاگه
ياابا الفضل رايحه اعلى الناكه
للسبي مجتفيني .... كوم يله احميني
ياابا الفضل ... ياابا الفضل
_________
كوم ياراعي الشهامه كوم فك ايديني
شلون ترضى يابو فاضل الشمر يسبيني
بين عدوانك يخويه عجب وتخليني
حشميتك يابو الغيره وشكد نخيت احسيني
ياابا الفضل المحب زاد افراكه
ياابا الفضل رايحه اعلى الناكه
للسبي مجتفيني .... كوم يله احميني
ياابا الفضل ... ياابا الفضل
_________
يله شد حيلك يخويه كبل لايحدي الشمر
كوم خلي الماي خويه كوم وعوف النهر
كبل ماحد شاف طولي ولالخيالي نظر
هسه ترضى يابو فاضل العدو اعليه جسر
ياابا الفضل بعد هم نتلاكه
ياابا الفضل رايحه اعلى الناكه
للسبي مجتفيني .... كوم يله احميني
ياابا الفضل ... ياابا الفضل
________
كوم يشيخ العشيره وشيخ كل العايله
امس جيت من المدينه بجالك انه مدلله
هسه حيرانه اخيتك وهم وحيده بكربله
من طحت صوت للعدوك بساع يخويه عله
ياابا الفضل الضعن شمر الساكه
ياابا الفضل رايحه اعلى الناكه
للسبي مجتفيني ... كوم يله احميني
ياابا الفضل .... ياابا الفضل
_______
امتوني من كثر السياط اشطوب بين بيهن
وكل خواتك ذني مثلي السوط امأذيهن
مو جنت كفال الضعينه والشمر هل حاديهن
للديوان الزلم عباس الحادي اليوم سابيهن
ياابا الفضل كلبي زاد اشواكه
ياابا الفضل رايحه اعلى الناكه
للسبي مجتفيني ... كوم يله احميني
ياابا الفضل ... ياابا الفضل
________
زينب الربتك خويه صارت بوليت عدو
مالها حامي ايحميها ولابكه عدها اخو
خدر اختك يابو فاضل الزلم شو فرهدو
والعليل بظهر ناكه شكثر خويه عذبو
ياابا الفضل نار كلبي حراكه
ياباالفضل رايحه اعلى الناكه
للسبي مجتفيني ... كوم يله احميني
يااباالفضل ... ياابا الفضل
الخادم : عباس محمد الحميداوي
محرم الحرام
العمل هذا مهدا الى صاحب العصر والزمان عجل الله فرجه الشريف