487
شاعر قصائد حسينيه منبريه .... ادعمنا فقط في الاشتراك للتواصل @Mert3338
ليلة الامام مسلم ابن عقيل ...
تجليبه كربلائيه ..
ابن عمنه يزينب سابح من الدم
يعظم الله اجرج انجتل مسلم
_____
اجيتج حافي خويه وذاب العمامه
خويه اول ابن عم خلصن ايامه
على الراح من ادينه ادك علهامه
اليه اخو جان وموش ابن العم
____
ولله الامر ابكل حال والتسليم
ويبت حيدر عزه لمسلم خل نقيم
ونادي محمد وبنيته وابراهيم
بيهم ريحته المعطوره خل نشتم
____
جرح مسلم ملح بجروحنه ينذر
وعلى كلبي ودليلي محنته تكبر
يموت وجسمه بنص سوكهم ينجر
بغدر كل الجره ولاهاشم التعلم
_____
جان آخر سلام وعينه اضن تدمع
جنه كالي يغدورنكم ارجع
وكلوله العده المثلك فلا يخضع
كلهم موش من الموت انه مهتم
_____
جان أخر كلامه من تسيل العين
رد يحسين ناده اهواي رد يحسين
لاجن وسف غمض عينه جف البين
وبمنزلة الشهاده بشرف اتوسم
_____
يزينب دمعتي خلي تلط بل خد
فراغ امجان مسلم ابد ماينسد
ابن العم اخو لا مايعوضه احد
وطبع الحيل مثل السيف يتثلم
____
انثلم حيلي لمن ناضرت لبنيته
تدري مات ابوها بس امتانيته
لو ادري بمصيره احذاي خليته
ماادري الجيوش اعليه من تلتم
•••••••☆
الخادم : عباس محمد الحميداوي
محرم الحرام
نعي لشهادة مسلم ابن عقيل عليه السلام عن لسان الامام الحسين عليه السلام...
يبن العم الك عازه فلا تنسد
ومجانك يبو محمد مايسده احد
كل ساعه وتجيني ابنيتك وتنشد
خبر عن والدي ياعمي شو مارد
لو تدري بحميده الضاله ابحسره
عن كل البنات انظرها متكتره
تكلي الكلب من الفركه طك صبره
انجانه الابو ميت ودني لكبره
لو تسمع نواعي ام عون من جانه
خبر موتك مسلم حيل اذانه
أولادك اتكول الابو عافانه
بعد مانلتم ولاتلمنه احضانه
ابشك اثيابنه وامهدلين اعليك
ولون ادري تموت اهناك ماوديك
عمت عيني ابحبل جروك من رجيلك
متشمتين وسط السوك ذوله بيك
لون ادري بمصابك هيج جايد
وحيلي ابفركتك خليته بايد
يااول واحد بطفنه يجاهد
اشحلاتك لون يمي وهسه كاعد
اجانه الخبر واللطمه على الهام
وكعدنه انه وابو فاضل على الهم
خطار انت هل الرايح عليهم
على عمك علي وي الزجيه
أبفركاك العقل مشدهه وهايم
وماضل شي ونلحكم هيه ايام
مصابك جم كتر بروح هايم
وجم ضلع انلوى من اللطم اليه
الشاعر عباس محمد الحميداوي ١٤٤٥.٢٠٢٣
تم بحمد الله نشر قصائد الليله الرابعه ☝️
Читать полностью…
[قصيده للسيده ام البنين والسيده وزينب عندما
رجعت من السبي فخاطبت ام البنين قائله ١٤٤٥]
تعبنه اجدامج يايمه من الوكفه
والتنتظرينه ذبحوه من المكفه
راسه من شالوه برماح ... والحادي صار الذباح
والتنتظرينه ذبحوه من المكفه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
واكفه أعلى الباب يمه من ركبت ابهودجي
وجانت احسابتي اجيب اخواني وياي واجي
امذبحين وبعد جيه منهم ولانرتجي
وكشفي متني يمه يله أعلى الآثار اتفرجي
من راحو مني اسياط اتولوني
ماعندي اليحمي ووحيده شافوني
بيرغ عباسج من طاح ... والحادي صار الذباح
والتنتظرينه ذبحوه من المكفه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
عود ماشفتي الجرالي وهيج يمه ذابله
هاي بس من وكفه يم الباب هيج امعلعله
جا اشصار ابحالج انتي لو حضرتي بكربله
يمكن تموتين من حسين صاباه حرمله
ابنص كلبه مسدد سهمه المشّعب
انصاب وطاح ابنج وصاح يازينب
ماخلوه اشوي يرتاح ... والحادي صار الذباح
والتنتظرينه ذبحوه من المكفه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
انتي اشمدريج ميّت وثوب اسود لابسه ؟
على صدرج حيل لطمج بلمصاب امهيّسه
مو اهناه ضليتي جنج ويانه جنج جالسه
جنج تشوفينه اخيي انكلب وشمر اليرفسه
ويايه أعلى التل وتسمعين اهاته
يمكن شفتهن بالدم غركن شيباته
بلحومه دم ابنج ساح ... والحادي صار الذباح
والتنتظرينه ذبحوه من المكفه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
يمه جم سيف اليطعنه وجم رمح بيه انغرز
على رجليه راد يوكف ماكدر يمه وعجز
من طلع هيبة محمد بيه اخيي من برز
طشروه جن خيط سبحه انكطع وانطش الخرز
انلم بيش اوصاله يايمه ابحصيره
ومسبيه اخذوني امصيبنته الجبيره
خدري بجم عين انلاح ... والحادي صار الذباح
والتنتظرينه ذبحوه من المكفه
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
اخر حجايه الحجاها وياي زينب عاودي
للخيم يختي يكلي وانه ابحيره لوحدي
من طلعت انه ارد اجيبه هو هذا مقصدي
رجعي يكلي وروحي تكلي يمه اتمددي
بلجن جم حافر سحكتهن بضلوعي
ردت اجمع دمعي ويشرب من دموعي
عطشان وجدي من صاح ... والحادي صار الذباح
والتنتظرينه ذبحوه من المكفه
# الشاعر عباس محمد الحميداوي
١٤٤٥.٢٠٢٣ محرم الحرام
٠
ليلة أم البنين
(نزله )
هاك اخذ روحي بيدك واسألها ... من تصعب حاجتي منهو يحلها
كلي ثقه وكلي يقين ... تكضيها ألي أم البنين
__
اذنوبي لمن تكثر ودعوتي ماترفع
وين اديرن وجهي لباب من ؟ تتوقع
ادك باب ام ابو فاضل وخايب ماارجع
واحس صوت بنص ضميري انقضت اي اسمع
كون روحي تنعصر من أحزانها ... ابلا اراده امشي ادك بيبانها
افعالها تبقه ألي دين ... تكظيها ألي أم البنين
__
ثقتي من بعد ربي الايدي ماردتها
دخليها وشديت حملي كله بشيلتها
كبل مااحّلف الوفيه الكاها مخلصتها
تحلها المرضات ابنها حسين كل غايتها
المن أصل بدوي تعود انسابها ... مايوم ردتني بزعل من بابها
الماخلت اكليبي حزين ... تكضيها ألي أم البنين
___
احوال عافيتي لمن تتفاقم وتتدهور
وعلتي يزداد ألمها والمرض يتطور
بحين كلبي من المصايب والحزن يتجمر
ادك باب أم البنين وادري ماتتعذر
واعرفها بلهم روحي ماتخليها ... والتصعب اعلى الطب اهي اداويها
وترجعلي عافيت السنين ... تكظيها ألي أم البنين
___
الهم لمن يعلى اعلى صدري والحمل يتمايل
ادك باب الله العظيمه واذكر الها ابو فاضل
وبين رمشة عين واخرى الكه همي زائل
بت حزام الي طلبها تكله اخذ يلسائل
يامحلى اسمها ياخلك وحروفها ... توزع فرح لكل الطلبها جفوفها
زوجة أمير المؤمنين ... تكظيها ألي أم البنين
___
نالت هاي الكرامه وعظم هاي المرتبه
لمن انطت كل ولدها للحسين وموكبه
وبعد لو عدها ضعف هل الضنه هم توهبه
والتضحيه جانت تكلهم وي اخوكم واجبه
فلذالك مطمئن من انخاها ... واكتفي بلفاتحه الها اقراها
ومن اقسم اعليها بحسين ... تكظيها ألي أم البنين
•••••••
الخادم : عباس محمد الحميداوي
محرم الحرام
ثكيل .. عن أم البنين سلام الله عليها)
بوجه التاريخ موقف يتخلد .. ضحيتي اولاد ماضن يتجدد
أربعه اولادج سوه ... ماتو بطف نينوى
_____
ومن دخلتي لدار حيدر وشفتي ايتامه
كلتي الهم مو ضره اني خدامه
وحتى ماتنعاد بهذا البيت الاامه
وحتى ينسون طاري الباب وايامه
كلتي سموني بعد أم البنين .. حتى مايلنجم كلبك ياحسين
وجنتي لريه هوه ... وماتو بطف نينوه
_____
من الزغر يدرس الكافل بمدرستج طلع
وطلع اول بل وفاء لمن جفينه كطع
وناده حسين دخليج شكثر عباسج سبع
ويبقى اسمج مده هاي الدنيا يلمع لمع
وناعية الطف انتي يهنيالج .. وعلي يدري بوفائج وهل اجالج
يدري بهل المحتوه ... ماتو بطف نينوه
___
هل الوفاء البيج لازم يصير مقياس
وانزرع هذا وفائج ابكلب عباس
والنعم منج اصيله ورفعه للراس
وين تلكه من وفائج هاي الناس
طاهره ورضّعتي اولادج وفاء .. وكبريتهم لجل طف كربلاء
واحد ابجفه اللوه ... ماتو بطف نينوه
_____
القلم بكل سطر يعثر ويبقى حاير
شيكتب عنج وعن صدرج الطاهر
لبن صدرج اتبين ابيوم عاشر
بحين ضل احسين من دون ناصر
فزعت الخوه بكلوب الاولاد .. وكالو عد عينك يبو السجاد
اكبالك نضحي سوه ... وماتو بطف نينوه
_____
حيرة القلم جنها حيرة الخدر
لمن حركو خيمهن وركضن بهل البر
حيرة زينب لمن خايفه وتفتر
تنادي يحسين ياعباس يل الاكبر
هيج هذا القلم بوصفج بحيره .. وكل وفائج يضل صعب تفسيره
لجرح ابو اليمه دوه .. وماتو بطف نينوه
الخادم : عباس محمد الحميداوي
قصائد أم البنين عليها السلام
(ميمر .. بين ام البنين والعباس قبل الخروج من المدينه)
امك تريد اتوصيك عباس جم اوصيه
_________
تكله اعلى اخيك بالك تعز روحك
عباس خلي السهم كبله يلوحك
وياه لاتتساوه حت بجروحك
ياكمر شع وسط الكون وعم علكره الارضيه
___________
بالك واشد بالك لون ماتفديه
الينطي اصبع اجفوفك اريدن تنطيه
المثلك بعد ماحاجه مره نوصيه
خنصر اذا انطه احسين كله انه انطي ايديه
__________
صب دم اكليبك ياخو زينب بجفه
ولو مشى خل ممشاك يبني خلفه
ربيتك وادريك راعي الكلفه
حجياتي اريدن عباس بذنك تضل ترجيه
__________
من الماي لاتشرب واهو يتلضه
وفرض الوفه اديه وبدم اتوضه
عباس اذا ترجع الي ماارضه
لو ترجع وياك حسين لو مااريد الجيه
__________
لو غرفه من الماي بيدك تغرف
من احرورتك خلي الشريعه تنشف
ذب للنهر جفك لون كلبك رف
تشرب لذيذ من الماي وعطشانه جم علويه
__________
تشرب واخيك نار تشب بكلبه
وحاول شما تحاول توصل الجربه
عبد الله اخذه وبيدك انت شربه
خلي يرتوي من ضماه وشرب بديك ارقيه
___________
لكل الوفه اسمك اريدن مقياس
وبوجه تاريخ الدهر تضل نبراس
زينب اريد تكول وفه العباس
ماريد منك تقصير حت لو يكون اشويه
•••••••
الخادم عباس محمد الحميداوي
محرم الحرام
(ام البنين تخاطب الحسين بعد رجوع الضعن الى المدينه)
المستهل ....
من فدوه الك يرحون الاولاد ... ومو نفس ضعنك للوطن راد
الطف متكلي شنوموضوعه.. رد وعلي السجاد تجري دموعه
للوطن راد ... للوطن راد
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
لمن طلعتو ايحف كمر يضوي بركب القافله
ولمن رجعتو ولا ولي الضعن بس ابنك أله
بلذي يخشاه الكلب وتخشاه عيني الهامله
من كربله كلبي انلجم وهل صوبتني كربله
من رحتو واني بلكلب نار ... وحسيت اكو بهل الدرب اخطار
درب الخداهم هذا درب اللوعه ..رد وعلي السجاد تجري دموعه
للوطن راد ... للوطن راد
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
من عادة اشيوخ الضعن بصدر الضعن موجوده
هيبته مو حادي الضعن الهيبه من احيوده
وماشوف ريشات الكمر ولااكو اعمايم سوده
وبس العليل الرد الي ونحلان من اكيوده
ناشدته اشيوخ الضعن وين ... بحسين راح ورد بلا حسين
رد وكلوب الحرم موجوعه .. رد وعلي السجاد تجري دموعه
للوطن راد ... للوطن راد
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
الجاي من طف الحزن شايل لنا اوجاع
وريحة فكد وكسرة ظهر وريحة اوادع
ذيج السفينه الابحرت ردت بلا اشراع
رد الضعن شابع ركض والدمعه اله متاع
ابكل عبايه جمرة اخيام ... والضعن فاكد كومة ازلام
وطافيه يايمه ليش شموعه .. رد وعلي السجاد تجري دموعه
للوطن راد ... للوطن راد
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
رشيت دمعي للضعن لمن سره عن عيني
وغركت الشيله من البجي فركاكم امبجيني
سار الضعن وسار البجي بين العليله وبيني
ياريت رحت ويه الضعن ولاللبجي مخليني
حاني الظهر افراكم حيل ... الجيه شمس وفراكم ليل
ومن الضعن الونه شو مسموعه ..رد وعلي السجاد تجري دموعه
للوطن راد ... للوطن راد
#الشاعر: عباس محمد الحميداوي
محرم الحرام
(تجليبه الى سيدتي أم البنين عليها السلام)
يقين اصعب علل انتي التشافيها
باب الله انتي والحاجات تكظيها
____
اذا من المرض متعوب ندري الحل
ندك بابج وكل الصعبه تتسهل
يبرى الاعمى والاخرس والي انشل
ماتصعب وحق عباس ندريها
__
شما احسب فزعتج الي يتيه العد
ولااذكر بيوم بوجهي بابج انسد
انه ادري بجفوفج ما ترد احد
الايد التنمد ابابج تترسيها
____
حاشا اليدك بابج يرد يتندم
كريمه احنه نعرفج والخلك تعلم
اشلون ترد ادين اليبجي واليلطم
حاجه وطالبج وادري تخلصيها
___
اريدن من حضرتج هاي البشاره
وادري انتي الذي تسويلي جاره
محلفج ببنج ويمناه ويساره
تمت حاجتك رايد تكوليها
___
كرم الله الكريم وهل الكرامه انطاج
وباب لكل مصيبه ربج اختاراج
يزعل ابو فاضل ويرضى لرضواج
والله لهل القداسه كال اعليها
___
لحبيب الله انطيتي اربعة شبان
ومن اجل العقيله مقدمه قربان
الج كلمن يدير الوجه مو خسران
كريمه والصعاب انتي التحليها
___
ها يم الكمر جفي الج ممدود
بت اجواد انتي ومنبع لهل جود
يم باب الكرم لامايضل معكود
جواز الفرحه بجفوفج توقعها
الخادم : عباس محمد الحميداوي
تم بحمد الله نشر قصائد الليله الثالثه 👆
Читать полностью…
[الليله الثالثه ... قصيده تشرح حال العليله قبل طلوع فجر رحيل الحسين عنها ١٤٤٥]
رفعت ايدي ونزل دمعي ... وادعي مدري ماادعي
اريدن ادعي يتأجل سفرهم
وحدي ابعلتي صعبه انتظرهم
وادعي مدري ماادعي
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
اهلي ناوين أعلى سفره جنها مابيها رجوع
يمكن ابكل دار يمكن أشعل ابابه الشموع
يضل مكان حسين خالي وينرش بهاي الدموع
خايفه من وداع باجر وروحي اذا ضلت تلوع
اضن كل خطوه تقهرني ... الضعن يمكنه يعبرني
ومن عمري يارب كون لعمرهم
وحدي ابعلتي صعبه انتظرهم
وادعي مدري ماادعي ... وادعي مدري ماادعي
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
شكثر لميت بغراضي انوب اطشرهن اردود
وقررت لو مشو باجر هدومي كلها البسها سود
كعدتي وي كل خواتي جنها مارايح تعود
الله يرزقهم سلامه والي صبراً وصمود
وضعي يختلف وضعي ... عليله ولو مشو انعي
انعى لفركت اهلي الضايع خبرهم
وحدي ابعلتي صعبه انتظرهم
وادعي مدري ماادعي ... وادعي مدري ماادعي
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
أجلت دعوت لساني وكلت اكسر خاطره
كلت معقوله وحيده يرضه اضل مناطره
ولون مايخذني ويه الموت روحي مسافره
يدري هذا السفر مخطر وعلى الموت اشجابره
يدري ابويه بكلشي ... وجاليش مايرضه امشي
تبكى أعلى بالي بس تمر صورهم
وحدي ابعلتي صعبه انتظرهم
وادعي مدري ماادعي ... وادعي مدري ماادعي
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
وشلن دمعات عيني اشلون باجر لو مشه
مدري تطلع روحي باجر مدري اضلن عايشه
منين مااطبلها باجر دار ابويه موحشه
امغبشه روحي أعلى الموادع والمدامع غابشه
ماارش ماي ابطلعته ... راح ارش دمعي لرجعته
وابكربله اشضام لهلي قدرهم ؟
وحدي ابعلتي صعبه انتظرهم
وادعي مدري ماادعي ... وادعي مدري ماادعي
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
هذا امر الله رحيل حسين عن هاي الديار
واعتقادي امر الله ابنيته تبكى ابنتظار
ابجاه جدي علي أتوجه لله لو هلفجر صار
بلجن يفّرح دليلي اولدي ايغّير القرار
ويكلي يله محملج نصبته ... هذا الأمر يابأري طلبته
ويسهل الله كون أمري وامرهم
وحدي ابعلتي صعبه انتظرهم
وادعي مدري ماادعي ... وادعي مدري ماادعي
# الشاعر عباس محمد الحميداوي
١٤٤٥.٢٠٢٣ محرم الحرام
(القصيده على لحن نار بدليلي تسعر )
ارد اعتب وسمعوني .... شنهو السبب عفتوني
ونتي تراها اثجيله .... بنيتك انه العليله
شنهو السبب عفتوني
_____
كل الخلك تنشدني .... ليش انه زايد وني .... وشنهو العذر حاجيني
اتسله بدموع العين .... واتنطرك بويه احسين .... فركاكم امبجيني
بويه المرض سلاني .... ومنتظره كل اخواني .... جايمته تفرح عيني
كتاب بدمعتي خطيت .... ومرسول الكم وديت
من العتب عذروني .... شنهو السبب عفتوني
_____
وازاني حزني وكتبيت .... وشعجب ليه ماجيت .... بعدك لبست احزاني
يحلى العتب وياكم .... وليمته اضل ارجاكم .... يل بدلت الواني
من العله ماونينه .... ردنه الضعن يلفينه ..... ولجلك اعيوني اتاني
يل شلت بضعون اهلي .... يابويه هم ترجعلي
اترجاك لاتنسوني ....شنهو السبب عفتوني
___
الفركه الي مقسومه .... والاحزان الي مضمومه ...من الزغر واحسب ليها
لو تجي تشوف المنظر .... حالي غصن متكسر ... وروحي المرض باليها
ماينجبر كسري اشلون .... لمن عليه تردون ... ويطيب جرح البيها
يهزني الهوه لو مرني ..... وفركاكم معذبني
من الفركه عميه عيوني ..... وشنهو السبب عفتوني
____
الصبر ماعاناني ..... وكل الفرح عافاني .... من حملت الضعينه
ديره ومنها الشايل ..... انته وعمي الكافل .... جامنهو مخلينه
انجان عله بيه ...... زادن وصارن ميه ...... يبرن لون تلفينه
حال الرمل لو ذروه .... هذا اليفارك ابوه
بهل الحال لاتخلوني .... شنهو السبب عفتوني
__
مافاركيت المدمع ..... لحد ما تجيني وترجع .... ياكلبي وسباحه
يايوم نكعد وياك .... ولاتضن بويه بفركاك .... بنيتك غدت مرتاحه
سهم الهجر عاميني .... يابويه ياضي عيني .... وشوف الكلب وصياحه
عني اسمع يكولها .... هاي الاهل عافوها
بهذا الحجي يجرحوني .... وشنهو السبب عفتوني
____
ريحة يتم تكرب ليش .... يلشوفتك بيها نعيش .... ياريت تدري بحالي
ريحة فكد وأم ثكله .... بيها الذبح بل نبله .... بيها المهد ضل خالي
عريس جن مطبر ..... وجن راح اخوي الاكبر .... هذا اليدور ابالي
وريحة عبي ووجت نار .... وخد نايم برمل الحار
ماتصيب ريت اضنوني ..... شنهو السبب عفتوني
الخادم : عباس محمد الحميداوي
(حوار بين الحسين وفاطمة العليله قبل خروج الضعن )
مابيج طاقه أعلى السفر ... وأصبح قراري
خايف عليج من الخطر ... ضلي بداري
يبنيتي رايح تضل دعواتي ترعاج
هل المره انه الي اكولن الله وياج
*_*_*_*_*
درب النوينه نكطعه خطواته خطره بخطره
الينظر لحالج يتضح ماالج طاقه وقدره
كثيري وداعج من هلج يمكنها اخر نظره
وطاسه دمع خلف الضعن جفج خل يطشره
يبنيتي لو قرص الشمس ... لاح بغيابه
عن بعد وكليبي يحس ... صحتي يابابه
كفي عن كلبي العتب يابويه ارجاج
هل المره انه الي اكولن الله وياج
*_*_*_*_*
انظر اعيونج علضعن حين التناظر تهمل
ولسان نظراتج حجه جاليش مالي محمل
تدعين اسمعج فاطمه بلكي السفر يتأجل
ومتأمله ينكسر خاطرهم وحسينج يقبل
مكتوبه ضلتج وحدج ... بدار الهواشم
وادعيله يرجع والدج ... يبنيتي سالم
واتسلي بدموع الحزن طروانه لو جاج
هل المره انه الي اكولن الله وياج
*_*_*_*_*
بطف كربله شاء القدر يصبح ابوج احرامه
لتكولي عافوني هلي وحسين شد احزامه
وخلاني بدياره ومشه وضليت اله محتامه
وادري الليل الي يمر عيونج تضل متنامه
شاء القدر علتج بكت ... ويبكى ونينج
وزهرة عمرج انسكت ... بدموع عينج
يافاطمه وحك فاطمه ماراح انساج
هل المره انه الي اكولن الله وياج
*_*_*_*_*
اسمعتج كلتي لعتمج عندي امنيه وصليها
لحسين الماخذ كل هله وابنيته مخليها
ردتي عبد الله يضل لو اختج تسليها
عبد الله منتظره السهم واختج سبي متانيها
نحره يتلاكه وي النبل ... الناشفه ارياكه
وارقيه لجفوف الحبل ... وعثرة الناكه
تشوفين ماريد القهر يل ضايع ادواج
هل المره انه الي اكولن الله وياج
*_*_*_*_*
ماعفتج أبين الغرب وعندج حنينه اتباري
ام البنين ابهل الكتر الضونتها هم بكتاري
ومن عفتج وضعني سدر اوضليتي ابداري
عن غايه هاي حتى اليجي تعزبينهم خطاري
كتبيلي عن حالج لون ... طالت سفرتي
واجب اعوفج بالوطن ... وامضي برحلتي
تهمل اعيوني لون اهملت عيناج
هل المره اني الي اكولن الله وياج
خادم عليلة الحسين : عباس محمد الحميداوي
محرم الحرام
(قصيده تجليبه للعليله عليها السلام )
كبل لاتروح اقره الفاتحه واضعن
اموتن لو عفتني وخل اموت احسن
___
كلت هودج اليه انصب كل ضني
وكلت ويه الضعن ملزوم ياخذني
مثل طحن الرحى فركاك يطحني
ولو تتركني علتي تزيد ويه الون
__
يروح الضعن والتبكالي الذكره
اخذني وياك بداعت امك الزهره
من اروحن علتي ياولدي تبره
وبمشيتي وياك حالي اهواي تتحسن
_____
هم يحمل دليلك تترك ابنيه
وتاخذ كل اهلها وتبقى بس هيه
صد وشوف حالي ونشغت البيه
بجلن حالي يكسر خاطرك بلجن
___
لجمني الكلب من كمتو تودعوني
وجذبت الكلب وضليت بضنوني
كلت هيهات وحدي مايخلوني
وامشي وياهم انه وحدي ماضلن
_____
تخلوني وحيده وشنهو الاسباب
اذا اني عليله الجسم مني طاب
عكبك راح اناطر جيتك عالباب
وانظر للدرب كل يوم واتمعن
_____
سفركم بيه خطر كلبي اليحاجيني
وبعد هم يحصل ملاكه وتلاكيني
يابويه شكال كلبك من تخليني
اضل اتناك لو اكطع اخبار الظن
___
اذا شديت عزمك من المدينه اتشيل
اخذني اخدم ضعنكم لو اروي الخيل
يابويه شحال وحدي لو يجل اليل
وهيهات العيون بفركتك يغفن
#الشاعر : عباس محمد الحميداوي
محرم الحرام
ابيات من النعي والابوذيات لسان حال العليله تخاطب ابيها بعد السفر )
بمكتوبي كونك تقره عتبي
من الفركه تدري ذاب كلبي
رحتو ووجد كوه بدربي
وعليه طال السفر وانطر تردون
اسلي الروح وكولن جاين اهلي
وخواني وخواتي هم يردلي
بنات الديره تدري شنهو كاللي
ليش حسين عافج دون الضعون
واسمع بنت جاري تكول لبوها
جا ليش العليله اهنانه عافوها
تعالو ياهلي لبتكم ولحكوها
تراهي من البجي ماضلت اعيون
من زغري اتعرف ماتت يبويه امي
وضليت بحسرتي ودمعتي وهمي
جنت ناسيه يتمي من جنت يمي
وهسه شلون حالي مدري شلون
الوعد وين الوعد لو حالك اتغير
توديلي ابو فاضل لو علي الاكبر
مو تدرون على فركاكم ماكدر
تعالو يلي مابيه تكطعون
_____
جفوفي من مشيتو شكثر لاحن
وعسنه يوم فركاكم لاحان
كلبي شلون اصبرنه لو حن
لكعدتنه لمن نكعد سويه
تذكر من كلت ضلي وانتن
اركبن كلبي ون تدريه ونتان
انه وام البنين انموت لو نتان
رجعتكم تصح لو هاي هيه
شبطل ونتي دمعي نحابي
والضعن والدي لرض الطف نحا بيه
حرت نوحي على اخواني انح اباي
المشه وخلاني بديار الخليه
بكل مصباح بدمعي العين ماجن
وعليه ليل بدون انياح ماجن
مشن وياك الفرح والنوم وماجن
يردن الي من ترجع اليه
عن طور النواعي يختلف لحني
ومن اسهام فكدك شكد لاحني
ظهر كل ناكه لو جيتو لحنيه
واطش ادموعي الكم واهليه
الخادم : عباس محمد الحميداوي
محرم الحرام
(ميمر.. لسان حال حميده بنت مسلم عليهما السلام )
اول يتم .... بيه انرسم .... وأول جرح وأول ألم ...
هسه الابو صار حسين ... بس خاف هم يتركني
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
من جابني احسين وكعدت بحضنه
حس كلبي شي مخطر وصل والدنه
من مسح راسي ابو ماضل عدنه
سوالف فكد ..... وطاري النشد ... اعليك اسئل ياضمد
... بس لاجرح صاب احشاك ..... وبلماي مامتهني
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
يصبح صباحي وادعي ترجع لينه
جنت بحنانك والعطف غاطينه
واعمارنه ضلمه انته التضوينه
راح النظر ... عظمي انخر ... كل يوم احس بيك بخطر
... من القصر من شمروك ... وكلبي بده يوجعني
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
نبوع الحنان تفيض من كل كترك
ماصدكت ميت وبقيت انتظرك
وسفه على الكوفه ترد وتغدرك
طبرو امس ... اعظم شمس ... والغدر ضل عدهم يرس
...حيدر امير وطبروا ..... والغدر بيهم معني
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
يكلولي عنك جفك امبجيهم
يكولون جن حيدر وطب اعليهم
من كل طريق ابسيفك املاكيهم
ابفعل الغدر .... حفرو حفر ... محد اكبالك يستقر
...القاده شردت والجيش ... وابفعالك مشيمني
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
القصر سموه قصر جيه صعدو بيك
فوكه وسلامك وصل ويشهد باريك
واحسين كام يريد ايرد اعليك
رد وبجه .... بس ماحجه ... راح وعلى اخيه انتجه
...لاحيل ضل عند احسين .... وماراد اضن يفجعني
انته الامير شلون ويخونونك
من اعلى القصر للكاع ويذبونك
من بعد جتلك بلحبل يجرونك
بيكم يجر ...حبل الغدر .. وهاني كضى وياك العمر ...
...وضليت انوح وانخاك ....و بلفركه لا تعذبني
عباس محمد الحميداوي
محرم الحرام
(نعي ليله مسلم ابن عقيل سلام الله عليه)
مسلم يخاطب الامام الحسين وهو على القصر .....
ارجع للمدينه الكوم غدروني
ويم ابن الدعي كلهم خانوني
يابعد الروح ارجع ياضو عيوني
عينك اعلى ايتامي ياعجيد الكوم
تره صارو يتامه بصبح هذا اليوم
باريهم بعينك احسين يامضلوم
تره ذوله امس الكاتبوك اقدم
نفسهم سلموني اجتاف يالمجدم
غدت الكوفه واهلها اعليك تتحزم
واخر جلمه عندي وياك السلام اعليك
وتمنيت شكثر تطلع روحي بين ايديك
وأمانه ايتامي عندك خلهم بعينيك
__
وكأن الحسين يخاطبه لعد مقتله .....
وسف اعليك الزمن ياحيد ينجار
يمن كلمن ايتنخه بيك ينجار
صدك جسمك بنص السوك ينجر
وتضل بسوكهم جثتك رميه
على ايتامك تأمني وانه لها
روحي الحزن بفراكك انه الها
تعال اسمع بجي بنتيك ون الها
والها ادموع ماتنشف جريه
الخادم : عباس محمد الحميداوي
محرم الحرام
هذه الابيات مهدات الى روح المرحومه كاظميه بجاي السكيني
(نزله ...ليلة ام البنين ... ام البنين تخاطب العباس قبل خروج الضعن )
عباس ها يبني وياك الي حجايه
معصبي هاك اخذه وشده على الرايه
__
ماحاجه بعد ارجع ووصيتي اكررها
زينب بنص عينك ياوليدي تحفرها
ينكسر كل خاطر من كسر خاطرها
التامر تضل هيه ومحد اليامرها
عباس ها يبني زينب تره الايه
معصبي هاك أخذه وشده على الرايه
__
امها نسب عالي ونور اعتلى ضيه
امك بت شيوخ بس امها علويه
اعلوم التشيل الراس تفّرح البدويه
وكل عطوه وي خصمك يلشهم منفيه
عباس ها يبني الشمر لاتسمع اشوايه
معصبي هاك اخذه وشده على الرايه
__
من تاخذ المعصب وتشده بالواكم
يبقى كلب زينب مستر بطرواكم
والله تره يدري لحيدر من انطاكم
يدري الخدر باجر يتماشى وياكم
عباس ها يبني هايه تره الغايه
معصبي هاك اخذه وشده على الرايه
__
معصبي من يلوح ويناظره اخيك
يطمئن زينب بعدها ابفيهه اوفيك
عباس زينب ورد ينسكي من ميك
ونوماسها ابزودك بل المعركه اوعيّك
عباس ها يبني رضاهم صير شرايه
معصبي هاك اخذه وشده على الرايه
_____
عباس تفدي حسين من الكاروك ناذرتك
وتصير ظل عن الشمس لو مشت اختك
مناطره اتوافي ارباي وزينب مناطرتك
الضعن من شال وطلع كله على بختك
عباس ها يبني اعرفك للوفه ثايه
معصبي هاك اخذه وشده على الرايه
___
اتلث نجوم اخوتك وانت بدر كامل
ومابيك شي مايل بس سيفك تره المايل
عباس اريد اصياح خصمك ليثرب واصل
ماريد زعلانه ترد زينب يبو فاضل
عباس هايبني النهر جيبه ابكل مايه
معصبي هاك اخذه وشده على الرايه
الخادم: عباس محمد الحميداوي
محرم الحرام
( نزله الى أم البنين )
في كل عام معكم خلوني مولاتي
في كل عام تنزل خلوها دمعاتي
ابجاهج يم البنين ... خلينه بدرب الحسين
خلينه بدرب الحسين
_____
عن درب احسين رجلي لاتخليها تزل
وكلبي بهاي المجالس دوم اريدن متصل
ادخليج يم البنين من البجي مااريد امل
غيمه خلي اعيوني الكم وبكل لحظه تهل
في كل عام معكم خلوني اخدمكم
في كل عام ابقى احب الذي يحبكم
وبحبكم نضل فائزين ... خلينه بدرب الحسين
خلينه بدرب الحسين
____
بكل سنه وفقيني احضر عزاء محبوبي
وادري بل مجلس وحقج تمسحوها اذنوبي
ادروب الدنيا جثيره وانتو احلا دروبي
شنهو دمعة عيني الكم شنهو شكت ثوبي
في كل عام رايد اعيوني تدمع
في كل عام رايد بمجلسكم اجزع
امنيتي اعميلي عين ... خلينه بدرب الحسين
خلينه بدرب الحسين
__
بكل سنه رايد الزنجيل يجرح ظهري
وبكل السنه ايديه خليها تدك بصدري
مولاتي بدرب ابو اليمه خليني دائم اسري
واذا راحت خدمتي معناها رايح عمري
في كل عام معكم ماحول عن عهدي
في كل عام اخدم وي سيدي المهدي
وثابت بكل السنين ... خلينه بدرب الحسين
خلينه بدرب الحسين
__
بكل سنه يتوجه النه حجي ونضل نقاوم
وبكل سنه منا لاخر يوم اضلن خادم
اليحجي ماضاك طعم النعمه وابد مافاهم
معنى الخدمه جبير وصعب توصفه الوادم
في كل عام معكم من زغري طالبها
في كل عام هايم بهل الخدمه واحبها
ولشخصج مدينه ادين ... خلينه بدرب الحسين
خلينه بدرب الحسين
___
بكل سنه ماريد انسه لوعت اطفال وخدر
بكل سنه خليني مثل حسين راسي ينطبر
بكل سنه شوغة رقيه ابالي خليها تمر
اني مسكين بحياتي وذني يغنن بل كبر
في كل عام ليتني كنت معكم
في كل عام يحترك كلبي لخيمكم
مجنون واهوى المغرمين ... خلينه بدرب الحسين
خلينه بدرب الحسين
الخادم : عباس محمد الحميداوي
ليلة أم البنين عليها السلام
(ثكيل .. حواريه بين أم البنين تخاطب ابنها العباس عليهما السلام )
على رغم المسافه البينها وبينه .. حست من ابنها انكطع جفينه
صاحت ورفعت الراس ... رضيت اعليك عباس
يبني ... يبني
___
١-
فز كلب هاي الوالده وحست بهذاك الموقف
من يثرب وجنها درت عباس واكع بطف
ضمت اديها بردن ومثلّت ماتملك جف
وحيته جنها اتناظره وبلكوه كامت توكف
تكله يهرش كلبي ولب لحشاي .. يسوه الف موقف شمرت الماي
وعهد ولاخر انفاس ... رضيت اعليك عباس
يبني ... يبني
_____
٢-
بين اليحبون اتعرف الدرب مايحسبوله
ومعقوله شفتك من طحت رغم البعد معقوله
عباس والموقف صعب لحد هسه انه مذهوله
ومنهم قضى والينتظر مصداق انه لقوله
وانه الضليت ماغمضت جفنين .. وتمنيت اشكثر امشي وي الحسين
ولون انموت لاباس ... رضيت اعليك عباس
يبني ... يبني
_____
٣-
تمنيت يمك حاضره واسمع شنو تحجيلي
وتكلي من تعزم على المشرعه يمه ادعيلي
ولو قدر الله لطيحتك ويبيد يمك حيلي
واتعنه الك روح وكلب وحسين اليتجيلي
ولون تعرف يغالي كلبي شكال .. ردتك ماردت دنيه ولامال
خمد صوتك والانفاس ... رضيت اعليك عباس
يبني ... يبني
_____
٤-
جلمه الخويه للاخو كالو تشد من عزمه
ومو اخو وديتك تره وديتك انه تخدمه
بيضت وجهي ياشهم هنيالي بهل الزلمه
بموقفك بانيلك جبل من الوفه وانته القمه
لاجن من كلتله خويه مره ... منها وايده صارت فوك ظهره
وفه بهل الجمله واحساس ... رضيت اعليك عباس
يبني ... يبني
_____
٥-
تنحسد اعلى الجابته يمه المثلك عدها
وطمني اعلى حسين وجمرة كلب بردها
وعن زينب الجفك مشه منا واهو مكاودها
عباس ردها وموت لاتخلي الهضيمه تردها
اريدن من اناشدها واكلها ... ولدي بكربله شنهو فعلها
لون راضيه النبراس ... رضيت عليك عباس
يبني ... يبني
•••••••
الخادم : عباس محمد الحميداوي
محرم الحرام
(أم البنين تخاطب الحسين قبل مسير الضعن من المدينه )
المستهل ...
انه وصيتهم كبلك يموتون .. وكتلهم بدونه لاترجعون
فشله شلون لو رديتو عدلين .. هذا حسين موتو كبل الحسين
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
قبل لايسير الضعن ... وقبل لاتعوف الوطن ..وصيت ولدي
سمعاً وطاعه حجو ... وايدي باسوها وبجو ... وعيني تبدي
اختك ادعي مأمنه ... اربعه واحسبني انه ... يحسين جندي
خلهم يموتون وترد سالم انته
واليكصر وحك زينب اشكلت ذمته
ذوله تعبي والتعب لجلك بذلته
وابني العباس وصيته اعلى اخته
كتله بشاربك ياحامي الخيام .. وكال ادللي بنص عيني اتنام
وكلي صار يمه لاتوصيين ... هذا حسين موتو كبل الحسين
_____
مااحشمهم عليك ... خدم همه بين اديك ... رهن الاشاره
اولادي مألهم عذر ... لو ردو والنحر ... صاير مناره
راسك براس القنات .. ويكلولي حسين مات .. ودمه يتجاره
منهم اتبره وكل ضنواي ارفضه
وبعد ماارضه اعليهم ولا لحظه
اكلبوهم تنبض وكلبك وكف نبضه
وحافر بصدرك يرض شلون رضه
لايجون انجان مابيهم جرح ... عباس ماريده واخيه المنذبح
وكالولي يايمه لاتخافين ... هذا حسين موتو كبل الحسين
____
صدري در الهم وفاء .. وكبرتهم لكربلاء ... لظهرك تجيه
كتلهم هل الحجي .. والبجي يحاجي البجي .. بهاي القضيه
راسي لاينزل كلت ... والغيره بكصصهم حجت .. ولد الوفيه
مااريدن راسي يم الطاهره نازل
اريد اتلكاها ودمع العين هامل
اريد منها تكلي الناذرته واصل
وهيه تحجيلي عن ابو فاضل
يم امك فشله اتفشل اهناك .. اذا عباس مو بجفوفه وافاك
وصيته الك يكطع الجفين ... هذا حسين موتو كبل الحسين
__
كتله الشمر مو خالك ... بالك يالولد بالك .. لاتسمع امره
التريدنه يصير ... اخوي ماخليه يحير ... وينكسر ظهره
وكتله الخبر لو جاني ... واحد طاح علثاني ... وفده عمره
اهناك وراسي ارفعه بفزعت الغيره
الما خلو اخوهم اتهاجمه الحيره
اذا عباس مارد يحسين للديره
معناها انذبحت وحيرتي اجبيره
معناها زحف جيش العده احذاك .. تصيح ولا احد يفزع وياك
وتطيح ونار تلهم بصوايين .. هذا حسين موتو كبل الحسين
___
روح والله وياكم ... وبروحي راح اتناكم ... يبن الاكارم
بيه تشب نار الشمع .. وياريت ثاني ننجمع ... بآل هاشم
روح يابني ياشهم ... المهم انته المهم ... ترجعلي سالم
المهم ترجع وزينب بخدرها مكبعه
المهم انته يغالي مو مهم الاربعه
خبر رد احسين اريدن اسمعه
الاحنّي ظهور نوك جابتك من مدمعه
من مدمع جفني احنّيها النوك .. الجابت زينب وماطابه لسوك
وانادي ياهلا بكل المجلبين ... هذا حسين متو كبل الحسين
الخادم : عباس محمد الحميداوي
( نزله )
بقت روحي بحنين .... انه أم البنين
كتبت بدمعتي .... سلاماً ياحسين
__
يحف بيك الكمر ... واولادي ذخر .... الك كلهم نذر .... وقليل الاربعه
لو عندي بعد .... عشرة من الولد .... الك كلهم سند .... بحين الفاجعه
وعد بدويه ...... الولد لو ميه ..... الك مفديه .... وماني مانعه
قليل وياك افدي .... فده روحي ويه ولدي
سلوتي وياشمعتي .... سلاماً ياحسين
____
اقره البسلمه .... وتوكل للكربله .... وامان العايله .... بوجود احيودها
الشر والفادحه .... وشرور النايحه .... اقره الفاتحه .... والي مكصودها
امك بلشدد ...... ماردت احد ..... اقراها وعد .... تشرد جنودها
بس الفاتحه اقراها .... والي يايمه منواها
محنتك من محنتي .... سلاماً ياحسين
__
على كلبك سلام ... ياشيخ الخيام ... وياعطر الهيام ... بظعن الشايل
الضعن والهيبه ... يشيخ النيبه .... بحلاة الشيبه .... بوجهك نازل
ضياء الرحمه .... وجمال النعمه .... بروحك نسمه .... تعدل المايل
طالع للجل دينك ..... وماخذ كل بنينك
تضحي يامهجتي ..... سلاماً ياحسين
___
الغيبه لاتطول .. ياسبط الرسول .. اعوذ من الخيول .. تدوس ابصدرك
الغروب لحيلي ..... يهده ويلي .... ونهاري وليلي .... اضل انتظرك
دعائي ونوحي .... الك ياروحي ... اضعونك توحي ... خطر لعمرك
الحزن جنه الي حن .... اعيونك ليش يبجن
لاتزيد كربتي ..... سلاماً ياحسين
__
يقرأن الفجر .... ويسباح العمر .... للرجعتك انتظر ... واعد ايامها
شمسنه الضاويه .... اعد بثانيه .... واضل متانيه .... تتطيح اصنامها
يزيد اكبر صنم .... بجهادك ينثلم .... اذالال الظلم ... بسيف اسلامها
وانته اسلام دنيناي ..... صافي جنك الماي
لاتشعل جمرتي .... سلاماً ياحسين
الخادم : عباس محمد الحميداوي
محرم الحرام
ليلة أم البنين عليها السلام
(ثكيل )
باب للحاجات الله انطاها ..... وخادمه لحسين هم سواها
منزلت مريم واشد .... والله رزاقها بعد
خادمه لحسين هم سواها
____
هام توأ قد ورد هذا الخبر
اليخدم المضلوم يربح ماخسر
نظره تنظرله العزيزه أم الكمر
وتشفي علته تزيل همه شما كبر
ربك الخالق نعم علاها ..... وخادمه لحسين هم سواها
نريد من عدها المدد .... والله رازقها بعد
وخادمه لحسين هم سواها
_____
هيه المضحيه الوفيه يجمال القابها
انطت الحره ولدها لزينب ولحجابها
ودعتهم لجن هيه لازمت ابابها
انتظرت يعود الحسين وتفرح ابحبابها
تشكر الله شكثر جيه خلاها .... وخادمة لحسين هم سواها
تضحي باأربع ولد .... والله رازقها بعد
وخادمه لحسين هم سواها
___
مثل كل الخدم متحزمه بصبر
وناذره للحسين كل هذا العمر
تفرح بجيت محرم من يمر
تريد تبجي تريد تلطم علصدر
مثل كل الخدم هم تتباها .... وخادمه لحسين هم سواها
تطلب تضل للئبد ..... والله رازقها بعد
وخادمه لحسين هم سواها
__
دموع الفراك المغيره كل معالمها
وحسره الشوفه لبنها هواي تالمها
راحو وشالو ضعنهم ولااحد يمها
ضلت لحيطان دار تسولف بهمها
تشكر الله علبجي خصاها .... وخادمه لحسين هم سواها
تنوح للحسين الضمد .... والله رازقها بعد
وخادمه لحسين هم سواها
___
نعمة الخدمه مناها ترضي العتره
ورضى احسين اهمهن مغزى الفكره
يعني اذا راضي عليها راضيه الزهره
تدعي تشملها الزجيه وياهم بنظره
رضى الزهره هاي تتمناها .... وخاده لحسين هم سواها
كل محرم تستعد ..... والله رازقها بعد
وخادمه لحسين هم سواها
____
جلبن بيها المصايب من بشر ينعاهم
وجان كل ضنها يعود الضعن وتتلكاهم
رد ضعن بيه الثكالى حسين مو وياهم
وضلت اتنوح الغيارى ومااضن تنساهم
زينب التنعى وهيه وياها .... وخادمه لحسين هم سواها
تنوحهم انطت وعد .... والله رازقها بعد
وخادمه لحسين هم سواها
الخادم : عباس محمد الحميداوي
محرم الحرام
(نعي ليلة السيد باب الحوائج أم البنين الطاهره سلام الله عليها )
لسان حال أم البنين عندما سمعت بقتل ولدها الحسين ...
اولادي اربعه وبس بيك انه هميت
وصلاه تحميك يمه شكد اني صليت
هذا البيت عكبك هم نسميه بيت
عزيز الضنه تدري ومو سهل وبلهين
لجن افديك ولدي حتى لو سبعين
ماصدك دليلي من كال مات حسين
وصيت ابنيني اهواي انه وصيت
وترجع كلت يمه تموت ماضنيت
رد ضعن السبايه وانته مارديت
وفه ابني الكافل لو عذب الاامك
بعدك مات ابني لو طاح كدامك
ويليل الهجر عكبه بعد ما نامك
كلب والده وتنشد عن ضناها
واضنوني بعباس عسن ماخيباها
زينب الي كفلها عسن ماضيعاها
___
وكائنها تخاطب ابي الفضل العباس ...
شحالك على زينب حين سبوها
وشنهو حالتك حين الخذوها
عجيب شلون ترضى ايجتفوها
الاخت تنظر لخيها وتنشد اهواي
وعطشانه الحبيبه هم جبت ماي
تروت من عطشها يانظر عيناي
يكولون ابنج ظل اعل المسنايه
ولاجفين عنده وطاحت الرايه
وجعفر وعون وعبدالله ضحايه
ماقصرتو ندري هواي يااولادي
ربيتي الزهره تكول واتنادي
ونعم منكم تكول يالبت افادي
___
لسان حال أم البنين عندما رأت زينب ....
الكفلها شارب ابني اشلون طرت
ميدان وعليها المحن اطرت
المصايب لكلب زينب طرت
وحيرها ا مصاب الغاضريه
تخلل بيت دمعي واليه رجن
وسحكن صدري مثله واليه رجن
غده الينظر ضعنكم واليراجن
يكول الضعن رد بلا رقيه
اعيوني ادموم صبن لاتجفن
الكافل سهم بعينه ولاجفين
لاغسلو جسم ابني ولاتجفن
وضل احسين عاري اعله الوطيه
المصايب خلها توكف حد ليها
وعجب اختك غريبه ولاحد الها
تدري بل سباها وحادي ليها
الشمر ماخذها لديوان اميه
•••••
الخادم : عباس محمد الحميداوي
محرم الحرام
(هذا الابيات كتبت بنيه قضاء الحوائج)
[نزله ١٤٤٥ ..ليلة الثالثه ليلة السيده فاطمه العليله]
بس لا نسيتوها ... ابنيه الي عفتوها
ودت رساله الكم ... اشكتبت اقروها
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
كتبت عتب الكم هاي العليله
العّذب كلب بتكم السفره الطويله
يخف الألم جانت من تشتكيله
اتموت ابصمت كامت ليله أعلى ليله
الحك ياولدها ... جنها كرب حدها
واطريحة افراش ... من راح ابوها
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
ياحادي كالتله هاك اخذ الكتاب
للي جفو عني اهلي وي الاحباب
كلهم بكت بتكم ذابحها الغياب
ماكعدت ابمنزل كعدت على الباب
متغيره الأوصاف ... بيها الحزن طاف
وضلت عليلتكم ... تأمل تجوها
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
ولو وصّلت لكومي هاي المراسيل
مشروحه احوالي وكل التفاصيل
مثل السعف حالي بكل عاصفه تميل
حتى المرض ماخف زاد الألم حيل
رك شوف العيون ... جا يمتى يلفون
الديره ويبشرني ... اهلج لفوها
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
الراح ابضعن زينب عباسي حداي
اتمنى ابو فاضل جايبهم اوجاي
شدت فرد شده ويايه دنياي
راحو هلي عني ومحد بكى وياي
ولامنهم اخبار ... بس موحشه الدار
وانه الوحيده انه ... ابوحشه اتركوها
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
ماعافو لكلبي كل ذكرى للشوك
وعبد الله كاروكه شالوه عالنوك
عافيتي تتعوض بس كلبي مبيوك
اشتم مجان اهلي لو كلبي مخنوك
شيحلها كلولي ... لااهلي ردولي
لاروحي الماتت ... ولامن خذوها
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
ام الكمر يمي ومنها الكلب واج
ومنكم نظر عيني بس شوفه محتاج
ابمحجر عيون امك تتلاطم امواج
ومن سجن المتانه هم نطلع افراج
سجن الحياه تصبح ... لو عيني ماتلمح
منكم ولو نظره ... لعيون الجفوها
#الشاعر عباس محمد الحميداوي
١٤٤٥.٢٠٢٣ محرم الحرام
(نزله .. لسان حال الحادي ورسالة العليله مع ابيها الحسين ١٤٤٤)
تناشد عفتها الراح والجاي
والكم رساله جبت وياي
شدهتني بحالتها ... ... وانطتني ارسالتها
***
انه اجد بلسير وامشي ولنها ناخت ناكتي
ولنها من دارك عليله انشدت نية سفرتي
كلت ارض الكوفه رايد هاي هيه نيتي
كالت احمل هلرساله وشرط توصل عيلتي
ياحادي كالت ابدمعة العين
ممكن توصل كتابي لحسين
مشتاكه لخوتها ... ... وانطتني ارسالتها
**
جاوبت ذيج العليله بسمعاً وطاعه ولزام
يوصل اكتابج أعلى راسي يابت سيد الانام
حملتني عتب الكم وشكثر ودتلك سلام
تكول من يوم المشيتو عيوني ماتغفه وتنام
ومتعوده وجهك تشوفه
وتنحني لعمها تحب جفوفه
لو تدري بغربتها ... ... وانطتني ارسالتها
**
جنت اناظر لمن راحت ورجعت بمكتوبها
وحك عودك ليه رجعت الدمعه غركت ثوبها
تكوم واطيح وتنادي حسين عز منسوبها
صوبها حمّلتو منه والدمعه هسه ابصوبها
تدريها مشتاكه ونحيله
ويحالها حال العليله
تتعثر ابخطوتها ... ... وانطتني ارسالتها
**
وبقت بعدي على بابك وحالها جدا غريب
جسم ناحل وجه ذابل لجن بس انت الطبيب
بنتك ويه الموت الها موعد جدا قريب
عدله مدري هسه ماتت العليله من النحيب
تعتب اسمعها أعلى عباس
وتكول كربن اخر انفاس
منتظره موتتها ... ... وانطتني ارسالتها
**
ضلت اتاني العليله يرجع اجوابك سريع
تريد تعرف حال أهلها وتنشدك عن الجميع
اشتاكت تلاعب رقيه وتناغي عبدالله الرضيع
تكول اذا غاب الابو الفرحه من عيني تضيع
تكعد على ذيج الترابه
وتنادي أه يحسين يابه
لحكوها يافرحتها ... ... وانطتني ارسالتها
الخادم: عباس محمد الحميداوي
١٤٤٤.٢٠٢٢ محرم الحرام
(نزله في حق العليله عليها السلام)
التنشد اعلى اخباركم من دارها ... محد نشد منكم شنهو اخبارها
___
ياآل هاشم يله لحكو اعليها
علويه الكم شوفو شمبجيها
التصعب عليها نكل رجليها
افراكم يهل الشيم حانيها
الدمعه صارت يل الاهل خطارها .. محد نشد منكم شنهو اخبارها
____
بعتبت البيبان صار مجانها
ناطره جيت الابو وخوانها
اكتاب كتبت مضمنته احزانها
وردات الياخذه لعد وليانها
مشبوحه صوب الباب كل انضارها .. محد نشد منكم شنهو اخبارها
___
ذبلانه ومتغيره كل احوالها
وتترجى اليحمل اله مرسالها
يردون اهلها بس هايه ابالها
وباجر عكب باجر هاي امالها
تنعى وتبجي ليلها اعلى انهارها .. محد نشد منكم شنهو اخبارها
____
هاي الهوه من يختنك يشتمها
ضلت وحيده عايشه وي همها
الجلمة يابويه صايره تلجمها
لا علي الاكبر جايها ولاعمها
الحزن حايطها ابجميع اكتارها .. محد نشد منكم شنهو اخبارها
_____
نوبة بواجي كل وكت ترتابها
ومن الدمع تنكع جان ثيابها
ونذرت لون ردو تحني بابها
تتمنه هم تجتمع وي احبابها
مشتاكه بت فاطمه وبت كرارها .. محد نشد منكم شنهو اخبارها
•••••••••
الخادم : عباس محمد الحميداوي
محرم الحرام
(مقدمة عزاء ليلة العليله عليها السلام )
وين اهلي المن ناوين ... يمكنها سفره اطويله
__
شفت الخوات يلمن بكلشي الهن
وعداهن حسين وانه مو منهن
كلهن وانه ماعدني من الكلهن
واخذاهن ودلاهن ابمحملهن
ماشفته عاينلي وكال ... هذا الج يعليله
___
جانت نظرتي تكسر الخاطر حيل
وكتله علي السجاد شو هم اعليل
خذني يغالي شلون لو جاني الليل
ماتنسه وطاريك ابدمعي ايعيل
بلجن اطيبن يحسين ... أجلها بلكي الشيله
__
لو وحدك شايل كلت هينه اتهون
اتسله بعيون اخوتي وعمتي ام عون
نيتكم او لا ذكرى اليه تخلون
يمكن اموتن يهلي لمن تمشون
المن لو زاد الضيم ... ابكلبي اروح اشكيله
___
ابمحمل رقيه اكعد ازغيره اختي
وتبره ابشوفتكم ياغالي علتي
حاجيت روحي اشكد هم احملتي
مفاركه عافيتي وفاركت عايلتي
وابضعنك اشما تحدون ... ابجفي اضل اوميله
____
ياطيف يشبع عيني من ذكراكم
راح اجمع اتراب العليه ممشاكم
ماعودتني ابساع انه انساكم
اخدم ضعنكم كلت اجي وياكم
اخذوني اروي الناكات ... وافرش لكم كل ليله
خادم عليلة الحسين: عباس محمد الحميداوي
محرم الحرام
( نعي ليلة العليله سلام الله عليها)
بجن حتى الواح الباب لبجاي
وحياطين الدار ينوحن وياي
كمت انشد انه الراح والجاي
مشدوهه وانشد ابكل الضعون
واكول اليوم لو باجر يردون
عليك الكلب شاجر وعميه العيون
لارايه لاحت للضعن لاهودج البين الي
وانه اصبر بروحي وارجوج اكلها اتحملي
كل يوم ادعي لجيتك ترجع ويردولي هلي
__
ما حسبينه ... تطول الفركه تدري ماحسبينه
ماخف ونينه .... كلبي من رحت ماخف ونينه
هم ترد لينه .... نتوادع بعد لو هم ترد لينه
غفله من ادينه ... شال الضعن غفله من ادينه
____
(نعي كرناوي)
منو يجيب البشاره راجع النه
ونتلاكه بعد ويلتم شملنه
يايوم ويرد ضعنك با اهلنه
ويجف مجرى الدمع ويكف مسيله
الدمع على الخد يجر حسر اعلى حسره
بويه وبلجن بل الدمع تنطفي الجمره
صار ايام ضعنك بلباب انه انطره
وماتدري عفت بدارك عليله
___
تانيت اشكثر على الباب ومامش من خبر منكم
بويه...جايمته نعوف النوح وتحضوني واحضننكم
بويه يابويه ... شنهو الصار وعن الدار عطلكم
بويه....غايب عني صار ايام ويمته تعود لمتكم
__
كل حيطان دهري ماتجني
ومو عدله يابويه ميته جني
كلبي يكول جنك ماتجيني
وتضل ادياركم ضلمه عليه
بيت احزان بنتك مابنيته
الحزن والدمع بيّن ماني بنته
يخليني وحيده ماني بنته
واخذ وياه سكنه وهم رقيه
يغمض اعيوني اسمك وينبها
ونار الفركه بيه واني بيها
كل الناس تنشد وين ابوها
صدك خلاها بدياره الخليه
الخادم .. عباس محمد الحميداوي
محرم الحرام
[نعي لسان حال فاطمه العليله ١٤٤٥]
ولاهو يوم وكول اتاني
ولاضالي واحد واعاني
خذه كلبي ابوي الودعاني
وانه مدري شضملي زماني
كلبي بمشيتك صدعيته
ومنهو المشه وخله ابنيته
لاطر عليه الفجر ريته
ماينجهب ضل وحشه بيته
ابوي الكطع وصله وياي واجفه
وشيلته من الدار كلفه
حنين حسين يهناس اعرفه
وخالي مجان الابو وسفه
ملت عتبت الباب ... من ونتي ملت عتبت الباب
منهم خبر جاب ... محد لفه ومنهم خبر جاب
احسب اله احساب ... من يوم المشو احسب احساب
دولاب دولاب ... لعب بيه الزمن يحسين دولاب
مو عادة اهلي اطوال غيبه
وهسه المشالي منين اجيه
خلاله معلوله وغريبه
ابوجه الصبح انعى المصيبه
بنات السلف يحسين ذني
اتعبن كلبي اوتعبني
يمكن عمد من ينشدني
جاوين ابوج ويالمني
وكول بسفر مايبعد غيابه
وتلكاه واكله احوه يبابا
كلبي بسهم فركه اشصابه
ولاعتب لامرسال جابه
وين السفر جان لهل الضعون
وليش من دوني اهلي يمشون
أعلى الدرب ضلت تربي العيون
يردون مدري مايردون
ابوذيه في وصف حال العليله ....
اتاني جيتك بويه لميته
وتراب السحكته اجدامك لميته
لاني العدله بجفاكم ولاميته
اموتن ساعه وترد روحي اليه
#الشاعر عباس محمد الحميداوي
١٤٤٥.٢٠٢٣ محرم الحرام