4231
✔️ 𓆩cнαииєℓ𓆪 ♡♡:♡♡ 𓆩 كم تمنيت ان تكونِ روما 𓆪
فاركتني وكلت خلصت..
لازم ابدي بشوك ثاني،
وقررت افتح دفاتر واكتب اسماء العفتهن
هاي جارحها وعفتها،
وهاي صاحبتي الشلتها وطلعتها،
وهاي بس جانت جميله تلمستها،
وهاي مومس لو جعت ترويني واشبع..
وحرت ياهو اختار منهن
ويامن ابدي والمن ارجع..
وراحت ايام وبقى الشوك بلهاتي،
ضلت اثار الاصابع من هذيج الفاركتني..
الماي يتبده على خدي
راحت الجانت تغني وراسها يغفى على زندي
فاركتني الجنت ابديها على روحي..
وهسه روحي الموش عندي..
اني هسه تعلمت معنى اليحب تكثر جروحه..
هذا جرحي..الجنت جارحهم قبل
والينجرح ينزف ملوحه..
"ليش من حبيت صدفه تعثرت،
ليش من قررت اكون انسان صادق فاركت"..
مره صحت الليل يا ليل استريح..
هو اليحبله بشر،
تكبر عيونه من السهر..
وبحضنك يون ويصيح،
جاوباني الليل هاي جروح وادم جانت تشوفك مرايه..
وجانت تعشكك ولايه..
تطوفك بهيئة ضريح..
#سجاد_الغريب
چنت لو مريت بيه ، جدامي ترجف والچتاف
ومن كثر ماخوفتني
اتمردت .. ماگمت اخاف
#رحيم_المالكي
الطلقه وكت الحرب تكتل شخصين٫
الجندي والكاعد بـ گلب الجندي..
#محمد_قصي
وكل ضيم العلي منك،
مثل ذاك الحمار بركبة العرسان..
فشل من انشد عنك..
والله جا رهمت وياي لو گلبك مثل سنك،
والله ماكو مثلي يجاسمك ونك..
تفرح من تشوف زروف گلبي هواي..
وانه زروف التراجي تغيظني البذنك
المهم انت ولاجنك.
#سعد_شميل
بعد لتودي طيفك ليلي مابي شوگ
اجاني وباب جفني بوجهه سديته
انه من الورد ضليت اضم الشوف
لان كلش يشبهك ما اشتميته
بخيم صدري الزعل زعل هواي حروف
حجيت وماي وجهك ما ندليته
الك جنت التفت وادري انت ماموجود
اذا ببالك حرف من اسمي عديته
بعد ما التفت لو سما بضهري أطيح
حسبالك گبل لا گلبي چويته
گمت اخذ نفس وبريتي ينزل غيم
واندليت علتي وجرحي كضيته
روح الهوا بضهرك والهويته يروح
مو بس شوفي عنك سمعي غضيته
گبل ليلك وخلگي اتسابگن بالطول
العلي ماكفه هسه بروحي كفيته
انه بخد النده تلگاني طايح ماي
وصوت النفس يصهل بأذني خليته
روح اترس فراغك بالبروده البيك
انه وجه الشمس بالملگه غطيته
#علي_رشم
بعد لتودي طيفك ليلي مابي شوك..
اجاني وباب جفني بوجهه سديته،
انه من الورد ضليت اضم الشوف
لان كلش يشبهك مااشتميته..
بخيم صدري الزعل عَطش هواي حروف،
حجيت وماي وجهك مااندليته..
"الك جنت التفت وادري انت ماموجود"
اذا ببالك حرف من اسمي عديته..
بعد ماالتفت لو سما بظهري تطيح
حسبالك كبل،
لا گلبي جويته..
#علي_رشم
ليش ما كلتي من الأول،
ابتعد وأنساني..
ليش ما كلتيلي من الأول،
لاتدك بيباني..
ليش من بعد الحنين،
وقصه كتبتها السنين
جايه تكوليلي أنسى
في حياتي شخص ثاني..
ليش ما كلتيلي أبعد..
قبل ما يجمعنه موعد
جان ساعتها أعذرج
وأكتم أشواكي وأداري
جان يمكن أنسى بيدي
أو ألغي اختياري
جان كل شي وكل شي يجرى
ع الأقل ما جنت أعاني..
أدري مجهوله رحلتي،
"مو نصيبي أعرف أنتي"
أعرف لكن هي غلطه وأحنه مسؤولين عنها
أحنه لازم بالنهايه
ثنينه ندفع ثمنها
خلي ابقى وحدي آني
يمكن أنسى اللي نساني..
#عزيز_الرسام
الظاهر انت لـهسه ماتعرف شريد
ولا مفكر تفتهمني..
#مرتضى_مطشر
كون المفارگ حبيبه يرد عليه
ونبض گلبه يسولف الصار بجفاه
وكلمن يحب من طرف ولفه يجيه
بوجهه يترس حيرته وتمطر سماه
حضنة العشاگ مابيها حرام
اليحب من محبوبته يفصل غطاه
كون المسافر نفس ميشم غريب
متاع للغربه اليحب ياخذ هواه
من تراب ولايته شيوصله خير
بروحه ينده كل صبح بالغربه تاه
ولاجفن سهران يبقى يتاني طيف
الليل مالح والجرح وجهه وكفاه
#علي_رشم
ذبلت ايامي وبعد مابيه ليل،
خلك ماكو بجفني يتلكه السهر..
مر عليّ بـمرورتك وانكتني حيل،
تطيح من راسي محطات وسفر..
حرورتك بيه ولبست الصحره ثوب،
"وماكو غيرك ينزل بروحي وفر"..
#علي_رشم
راضي بعشرتك لو تبقى بس نظرات..
احس ذني اليه وهذا يكفيني..
مبارك عـ الجرف بس كون اشوفك ماي
صخره الروج فوك ولاترويني..
بعد ماضل ذهب حتى افرك المصباح،
والمارد طردته شعنده ينطيني..
حركتي الـ بالگلب تطلع عليه بساع
شما الزم جمر مااحسه يجويني..
#سمير_صبيح
تارس الجره حصو،
وغرابكم ماشرب جا ماينه شعوزه..
غير اليصيبه سحر يبقى على عينه غشه..
كضوني افك العمل،
واترس صورج جنت ببطون الحروزه..
هني ومَهَله ونوم العوافي عليج..
العلي جفني ولااطبكه
امنيتي ادخل واجيبج بس بعد شيفيد
فلوس بغرفه محتركه..
#رضا_العبادي
مزدحمه النوارس،
شيب يدفع شيب..
كلها تريد گلبي،
وگلبي يرفضها..
#نور_اللامي
ارفض تكونيلي ذكرى..
وارفض تكونيلي شوگ
مو برخص الماي دمعي
وروحي مابايكها بوك..
ممكن اذكرلج ملامح،
بس مثل مارحتي رايح
منتلاكه هنا بعد
نتلاكه فوك..
للبُعد ماكمت اغني،
لا ولا همزين اكول
بس مُمله تصير يمكن
القصص لمن تطول..
واحنه ماجان افتركنه،
لو خلل ماكو بعشگنه
شعرج المغرور يكره
أَن يلم خصلاته طوك..
ارفض تكونيلي ذكرى،
وارفض تكونيلي شوگ..
#مرتضى_الميالي
شما اكولن أيست تفضحني عيني
مبينه تنتضرك تجيها
من اسمع بديره جديده
يكلي گلبي يجوز بيها
وامشي ادورك..
استغلني.. العشگ فرصه
وخاف يبهت بيه عيدك
خضر بروحي گبل لا اصير صبخه وبيش افيدك
أَطرد اصورك واحنه
وارجع وبالشوف ألح
"واشكي من طيفك ولكن
شكوة العاشگ صلح"..
عفيه عمري الگاضي هم
الفرگه هم… الملگه هم
الجوري يسال ياهو ساعدني أعله شتله وهذا هم
كبرت الورده الزرعناها سويه
وصارت حديثه وتريد اليوم شم
وهذا هم..
انت يا اول عرف واخر غريب
يحبني بس مو مالتي
ياحبيبي…
ولايتي الما بيها مثلك عيب اگول ولايتي
الليل شنهو الليل عگبك
لون مشمور بمدينه
الليل اذا ما بي محنه شفرقه عن العميه عينه.
#احمد_عبدالرضا
يعرفون جرحي الحبوا وفاركوا،
ويدرون جفي شجم حلم بي خسر..
جمرة بخور الذكرى لمن تمر،
تورث حسرتي وبيه تمشي بحذر..
الصبخه جنت ارويها من كصتي،
وتشابه بعيني العطش والمطر..
"ذيج انتي واني بغيبتج مو صدك"
تعبتي جدمي وساعتي من السفر..
بي حيل هجرج واني وشلت خلك،
ذبلن وجهي مناطرج والسهر..
يعجبني ذوقج مثل ذوق البلم،
متعافي ياخذ راحته بـأي نهر..
نتشابه اني وياج من نفترك،
ويختلف وجهي وروحتج بالصور..
#علي_رشم
ها يـليل شحصلت من النهار..
ويانهار شحصلت من ليلك
ويا صباح الله الكشفتلنه الستار
شـشفنه بيك البارحه ونحجيلك..
ويا صباح الله شمشه بيك القطار،
وشكثر نام الكطا بشليلك
واني ذاك الماطلع من الگراب
زنجريت وحاط بدواي الطبيب..
"دورينه وردنه يوم من الاحباب،
لنه ممشى سنين عن درب الحبيب"..
#صاحب_الضويري
يجي الليل وخساره تجر خساره
وانام وبيدي مشتعله الجگاره
وكت گمت اندفع بچفوف الصغار
وانه الصخره التسد باب المغاره..
#سعد_شميل
ابو الحك ذله من يشتاك للغلطان..
ذلة خشب بين الحرك والمنشار
بس هيَ المشاعر عـ الگلوب اقدار
"ردني الشوك من حرب الكرامه رماد"
واكلك وانت ماتدري بجروحي المن صدك حبن،
حنينات من اذكرك مدري شيصبن
مثل حال الحطب لمن تلزمه النار..
وحده تواسي وحده وكلهن يكبن..
#صفاء_الصمت
فتت من باب بيتك والگلب ذاب،
ومدري شطاح مني من حنيني
رجعت لبيتنه واندكــت الـــباب
فتحت الباب واحد جــاب عيني..
#نائل_المظفر
روحي طبعها خرب
لافاد بيها البچي
ولافاد بيها الطرب
نفترگ والله وكت
مو جنه ماي وبلم
منين طب الگصب
شيريد مني الحزن
دگ الوتد بالضلع
وبروحي خيمة نصب
ولو مرني نار الفرح
بچم كاغد استقبله
وافرشله سفرة حطب
ولليل احضر دمع
يلبس اچفان التتن
لو حس مماته گرب
ووجهين عده الكرك
بين الدفن والزرع
گاضيها حسب الطلب
وشغلة حضوض الجنح
چم طير عش ما لگه
وچم طير عايش بقه
گلاده اعلى صدر الگبب
لتصير مثل النخل
بس تنشبگ تنسحگ
منك وبيك الكرب
يتواضع ويه الحصو
ويتبره من السعف
والله ابن اصول الرطب
#سيد_تراب
بسندانة المشتل جنت،
ولا هو موسم مشتره ولا كاع وسعه العد هلي
بس اليدك وازاني..
كتلك خضارك ينعشك،
لا كتلي ابو المشتل جذب رايد يقنع اليشتري
مو لله من داراني..
مو جلبت برداني
مو كتلي اخذني لـصحرتك
هم ارحم من مجاني..
جا صوفرت وتبطرت
وتكلي مايك مو عذب من جبتك لبستاني
لا يا هواي شغيرك،
من جنت اكلك راح اجي شفايتلك بـ بابك ولك يم بابي تتلكاني..
مو جنه رمشين بجفن
ما ننتظر ياهو اليجي
من نسير بنص الدرب
واحد يلاكي الثاني..
وبحضاني من كد مانمت
مااسلم اعله اهلك بعد والله خفت لا ننفضح
جي عطرك بقمصاني..
واكفلك اكثر من هلك،
مثل الجواز بعشرتك
واكفلك اني بغربتك
بس انت مو حكاني
لمن نرد من السفر
ويه التحبهم تلتهي
ويه الجنط تنساني
بس اني ماعندي كلب..
باچر تعاود عالسفر،
محد يجي وياك وترد يم جنطتك تلكاني..
شكد رادوا انطي بعشرتك
والله وصلت لـمرحله
ما سولفت مو للبشر لا حتى يم حيطاني..
والله وصلت لـمرحله..
عرفوني مو يم الخمر،
صبولي كاس وماكدر واحد يبوك لساني..
اسكت جنت مثل الطفل،
بس يم هله يطلع الحجي
ويستغرب من الوادم..
هيج احفظ اسرارك جنت
وانت اليكلك مرحبا
تكله اكعد احجيلك بعد
شتريد اسولف خادم..
شسويتلك حتى انسي
الحاجيهن ويه امي گبل
من عدهن الكطلك حجي
واكعد واحطلهن لحم
خاف الحجايه تنشز..
وتهضمني يمي شمثكلك
ويم غيري تضحك للهوى
والمشكله بكلبك يحط
وين الحجابه التنغز..
#مصطفى_جواد
المصايب من يجن كلهن فرد يوم
طبر عالعين وسيوف بخواصر
#جواد_الحمراني
الم الكم ملح خاطر يغزر عود
وانه كلي جرح چا بي ترشوني
وانه كلمة سلف وانقرت بالمكلوب
قريتوني فلس وبفلس بعتوني
#علي_نجم
ما تجين ..
ﻭﺍﻧﺘﻲ ﺗﺪﺭﻳﻦ ﺑﻌﺸﮕﻨﻪ ﻭﺣﺴﺐ ﺗﻘﻠﻴﺪ ﺍﻟﻀﻠﻮﻉ ..
ﺍﻟﺸﺒﻜﻪ ﺩﻳﻦ،
ﻭﺣﻴﻞ ﻣﺆﻣﻦ ﻛﻠﻤﻦ ﺗﻮﺿﻪ ﺑﺤﺒﻴﺒﻪ ...
ﻭﻛﺎﻓﺮ ﺍﻟﻤﺎﻋﻨﺪه أدين…
"ﻭﺍﻧﺘﻲ ﻭﻳﻦ ﻛﻞ ﺷﺒﺮ ﺑﻴﻨﺎﺗﻨﻪ ..ﻳﺪﺭﺩﻡ حنين"،
ﻭﻟﻮ ﺗﺠﻴﻦ..
ﺭﻓﻌﻲ ﺑﺮﺩﺓ ﺑﺎﻟﻲ ﻣﻦ ﺷﺒﺎﻙ ﺣﻠﻤﻲ ..
ﻭﻃﺒﻲ ﻃﻴـﻒ..
ﻃﺒﻲ ﭼﻠﻤﻪ..
ﺑﻄﺎﺭﻱ ﺷﺎﻣﺖ ﺟﺎﻧﻲ ﺿﻴـﻒ
ﻫﻮﺳﺔ ﺍﺭﻣﻮﺷﺞ ﺗﻘﺎﻃﻊ
ﻭﺍﺯﺩﺣﺎﻣﺎﺕ ﺍﻟﻤﺪﻳﻨﻪ ،
ﻭﺍني ﺍﺩﺭﻱ ﺑﻠﻮﻥ ﻋﻴﻨﺞ ﻛﻠﻪ ﺭﻳﻒ ..
ﻭﻳﺎ ﺑﻨﺎﺕ حروفج ﺍﻟﻤﺎ ﻟﺜﻜﺘﻬﻦ
اي ﺃﺫﺍﻥ ﻭﻟﻮﻥ ﺣﭽﻴﺞ ﻓﺪ ﻧﻀﻴﻒ ..
شكدج ﺷﺮﻳﻒ!!!!
ﻫﺬﺍ ﻓﺎﺕ شجم ﻟﻘﺎﺀ
( ﻭﺛﻮﺑﺞ ﺍﻟﻤﺎﺫﺏ ﺭﺑﻴﻌﻪ .. ﻭﻣﺎﻟﺒﺲ ﻃﺎﺭﻱ ﺍﻟﺨﺮﻳﻒ )
ﻭﻳﺎ ﺩﻓﻮ ﺍﺣﻀﺎﻧﺞ ﻏﺮﻳﺐ ....
ﺷﺘﻮﻱ ﻭﻣﻜﺎﺳﺮﻟﻪ .. ﺻﻴﻒ
ﻭﺍﻧﺘﻲ ﻋﻮﺩ ﺷﻜﺪ ﺛﻜﻴﻠﻪ ..
والشامه ﺍﻟـ ﺑﻌﻈﻤﺞ ﺗﺒﻴﻦ !!
(ﺟﻠﺪﺝ ﻭﺩﻣﺞ ﺧﻔﻴﻒ)
ﻭﺧﻤﺮ ﻭﺟﻬﺞ ..
ﺳﻜﺮ عيوني ﻉ ﮔﻴﻒ..
ﻫﺎﺍ ﺗﺠﻴـﻦ،
بيه ﻭﺍﻫﺲ ﺳﻨﺪﺑﺎﺩ ... ﻭﺫﺍﻙ ﭼـﺘﻔﻪ ﺍﻟﻤﺎﺗﻌﺐ ﻣﻦ ﻳﺎﺳﻤﻴﻦ.
#ابراهيم_الرائدي
الى حبيبتي التي جعلتني حبيباً للجميع..
رسايل منك لحد هسه اداريهن
مثل نومة طفل باليل اهز بيهن
واكلبهن واشوف ايامك الحلوات
مو حلوات بس مجبور اسميهن..
شايف من يطيح المطر فوك الماي
مابيها فخر من تسحك عليهن..
واجيت لـبيتكم كلت البريد الصوج
بعتبتكم وذر شفتك مسويهن..
من تكتب قصايد حابها الجمهور
"والمقصود مايسمع نعاويهن"..
هنا تعرف احساسك طير بس مسجون
مفاتيحه بجهنم وين الاكيهن..
#علي_طالب
بيني وبين نفسي شكد افكر بيك
واكول شمعنى انت الشاغل ضنوني
مو اول عشگ خاطر تشل الحال
ومو اول جمال تشوفك عيوني
شجاها الروح يمك ذبت الاسرار
وليش ارجف عليك وينخطف لوني
وحتى الناس كامت تعرف بهالحال
ومااعرف شكلهم من يسألوني
يطبون بصفنتي وعنك يدورون
ويلكوني افكر بيك يلكوني..
#جبار_رشيد
بعتلك عُمر طيب ومستحه واخلاق..
على بيعت ضميري لا توازيني
سكت سيفك وخل نحجي اني وياك
لتضل ساكت وسيفك يحاجيني..
كلي بطيب خاطر موت،
اشبع موت..
تكلي اسكت بغيض،
لسان تلكيني..
بالطيبه تمشيني اعله حد السيف
بالسيف اعله طيبه ماتمشيني..
#عامر_العيثاوي
راضي بعيشتي ومرتاح وبخير..
المهم عندي گلب يتحمل احزان
انه معاند زماني عناد صبير
يموت وينتهي وميكول عطشان..
لتفكر تعال بغير تفكير..
لان باجر تجيني تكلي غلطان
وأأكدلك تجي لتكول ميصير
ولتكلي اطير وعندي جنحان..
يحط اعلى الشجر من يفحط الطير
مو شجره السما ومابيها اغصان
سبب هجرك ادوره وماكو تفسير
تريد انه اعتذرلك وانت غلطان.
#سمير_صبيح