4231
✔️ 𓆩cнαииєℓ𓆪 ♡♡:♡♡ 𓆩 كم تمنيت ان تكونِ روما 𓆪
افتركنه وجرى بنهر ارواحنه الموت،
وبياض گلوبنه على الروح غيّم..
اتفقنه نموت لكن واحنه عدلين،
نضحك بس اكو بخاطرنه مأتم..
الهوى يلاكينه لكن ما مبينين،
مختنكين بس نكول نشتم..
#ايهاب_المالكي
"وكت ما ينحزر لا ينغلب يوم
يأمن الجوز بيد الما اله ضروس..
اضل ارجف اذا جابولي طرواه
رجيف السعف لمن تگبل الفوس..
عكس عقرب الساعة تدور دنياك
اسد مجروح يتوچه اعلى طاووس..
وكبر بالسيف بين وانترس شيب
وركع غصباً عليه بحضرة الموس..
وجرح بالشمس صار ونزفت النور
ونزلت ما تشوف تريد فانوس..
ورغم ظلم الوكت هم انت وياه
احس ضدي وعليه مرافگ البين,,
رغم تعبي خسرت وياك دنياي
ودون من الصفر محصولي يازين,,
مثل محصول ذاك البسط بماي
وسبيل يصيح واحد عنه شبرين,,
"حوافر خيل وكتي اليعثر يموت"
وتعال انه عثرت بأول خطوتين,,
"براءة تريد واشهدلك علّي زور
اگولن ماي دمي العلـ سچاچين،،
احسن كلي عين ووكتي منگار
بس ارمش اخوفه وينگر العين"
وعفتني انت بظرف ما انحسد بيه
احس حتى الهوى من استورحه سنون"
ماعشت الفرح و ادم نبي الله
ما عاش الطفوله وشافها شلون,,
يا حمل الاشيله وياهو اخليه
ثگل حملك يولفي وشحه المتون,,
بحيث من اصفن ابلواك ياهواي
"اسمع صوت طگ رموش العيون"
وشلومن بعد بيك شينفع اللوم
اليجذف والبلم مربوط يلام؟,,
گلبك مات كلش بين الضلوع
انعده من عظام صدرك واصبح عظام,,
"سويتك بأيدي يلـچنت لا شيء
كون لسان عدها وتحجي الايام،،
اعتبر كل حبنا طيف وهسه فزيت
اشرب كاس ماي وارجع ونام،،"
#يوسف_حسن
امس طلعت الهدايا الغافيات،
وسهرتهن وسهرت وياهن..
وهنَ اصلاً مو هدايا الذكريات..
جنت اضم اشيائك التنساهن..
#شجاع_الحليحل
تذكرتك وغمضت،
ولميت كلشي جنح واستغربت من شفت..
حضن السما الخالي..
تلاكينه وشكد ورد ضل مستحي ببالي..
فزيت وتلفتت بس اني وخيالي..
بردت الدنيا وغصن شابك غصن،
والنهر معقوله مايلتفت للعينها تلالي..
معقوله اصبعك بعد مايفكد هلالي..
هو اني صح ما متت،
بس انت كتالي..
#احمد_عاشور
لو بينك وبيني اهون شكول للناس،
شكد حاجيلهم عنك شأكلهم مل؟..
شأكلهم والـ(شلونك)بيها اغص مرات..
شأكلهم والعرف من يوجعك يندل..
سكتت بروحتك مو راضي لاوالله،
بلعت ريكي هذا الحجي المايكمل..
اخر مرحله من الوجع سكته تصير..
الحجي ميكفي مو يعني السكوت اسلم..
#علي_مقداد
ياحبيبي عيوني راحن،
تره المرسال ميتعبك رخيص..
ذبل يعقوبك يـيوسف،
فدوه وديلي قميص..
#مهدي_شاكر
الا ليت المشيب يعجل وياي،
لسولفله المصايب من جنت شاب..
لاتحسب نجوم البسما تدوخ،
تعال جروحي عدهن نفس الحساب..
اتانيك على بابك واكف سنين..
وبيها شكد بشر عبالهم باب..
تعال شكد ملامح غيّر الليل،
تعال اترف ملامح صارن تراب..
تعال الليل خَلف والصبح مات،
الف ليله بجهنم ليلة غياب..
واطش الروح غبشه تدور عليك..
طارش للحنين ويه الهوى الهاب..
خايف روحي تخلص بيش اتانيك،
ظهري وللخناجر صاير كراب..
اأوميلك بديه ومادرت بال..
من كد ماصحتلك صارن عضاب..
لهسه على الشجر ذكرتنه متروح..
تشور ما يمر عليها حطاب..
يسكن بالعكد خطواتنه البيت،
عكدنه الجان شاهد بأول اعجاب..
يسمونه قبل عكد العصافير..
تسمى خلاف عينك عكد الغراب..
نكرت وجهي حتى مراية البيت،
ترسمه بلا ملامح وجه جذاب..
تعال وكلها غربه الشجر والطير..
كلشي خلاف عينك لابس حجاب..
كلها جروحي فاتح بس جرح طوخ،
عرفته متاني جيتك خزن عتاب..
يسولفلك بواجي بوكت الغروب..
ومن يسمع ضحكتك يعتق رگاب..
تعال وخل اشبكگ مثل الوداع،
الشبگه البيها تلفت كل الاعصاب..
تره شماتبقى يوسف وابقى يعگوب..
جذب تصبح عزيز بديرة غراب..
#اسماعيل_الحسيني
نك ونكيكه مو محله،
كتله ولك كافي مذله..
ذاك وكت وانطوه و وله..
كال الا همَ وهسه الا..
فرفح وراداهم شكله؟..
يلح بالنشد كلش هالايام،
يكلي گلبهم مثلي محتام؟..
لاهو طفل وتخوفه وينام..
ومن ترجعلها فشله ينلام..
جبنه العمر الكم تواسيل،
كلش ذكركم كايم يعيل..
گلوب التودكم وشلت حيل..
جا ليش تلتمون باليل..
بالجذب كولوا وين ما وين،
ناموا،كلوا،عدلين،ميتين..
شكد جذبينه وره المجفين..
ينشدونه ونكول زينين..
من جفوفنه ماي وتبدوا،
نشدوهم علينه وتبروا..
العمله من راحوا شسووا !..
روحة جنازه ولا التفوا..
صعبه تره يمشون كلهم،
نتحسر من نشوف حِلهم..
صاح الگلب..كلناله خلهم..
هذا درب لا تعرضلهم..
"حملي الثكيل يريد عونه،
يعرفونه شبيهم نسونه..
(هي المشكله يعرفك)..
الگلب لو صبن عيونه..
الناس اليودهم يوجعونه"..
خايف اموت وما الكاهم،
طيبين عالفركه شجاهم..
لا بطل العندي ونساهم..
ولا ينكسر گلب الخذاهم..
مفكوسه عيني بقلم مقطوط،
و عالمشوا حيلي صاير خيوط..
فوكي الليالي حطن حطوط..
وشالن وين اللكط ملكوط..
( لليوم اذكره ذاك الغروب،
بوجوهنه من سدوا البوب..
جا غير كون بهاي ونتوب..
بس ثاري هي گلوب وگلوب )..
آه يا رخص ذيج الدواره،
وفرفاحته بليله ونهاره..
من كثر ما متوجره ناره..
من عنده ونورث الجكاره..
آه ياتعبنه الراح بالماي،
لا اله اليسمعه ولا اله شراي..
كمنه نسل بهداي بهداي..
كمنه نسل بهداي..
بهداي.
#ماهر_جاسم
كون الگلب ينعت و اعته،
واشلع ضلوع وياه سته..
لو ينمرد بيدي مردته..
وزتت حطب للنار ازته..
الصوج بيه استاهل انه،
لساني ماجريت اذانه..
كون الوجع اندل مكانه..
اچوي ولا حمل المهانه..
ريت الهوى مكطوع ريته،
ولا انطرد من باب بيته.
#محمد_ثامر
سالفه سواني فگدك،
منها حتى الگلبه ميت ينخدش..
#مرتضى_حرب
شكد حاولت ردت افتهم شنهو اليدور ببالك،
ماي انه طايحلك جنت بس انت مدري شمالك..
باحساس كل ناس دخلت،
بس مادخلت احساسك..
وانت ترف من كل كتر..
بس جان يابس راسك..
#حكيم_الفريجي
يا ليل مو كافي سهر،
ليا وكت ابقى انتظر..
اني ادري انت ما تجي..
بس باقي انتظرك عُمر..
مجبور الك اني احن..
اليسافر يبقى عايش وي جراحه،
ردت اشوفك حتى اكلك بالصراحه..
ترجع المن؟دنيا ماكو بس نياحه..
#عبدالخالق_المحنه
گلبي وي گلبج يدك،
شوگ وعشگ..مهما بعدنه..
والقدر حكمه انفرض..
بس النبض..حافظ وعدنه..
#احمد_الذهبي
لا تحجيلي شوگك نفسه بيه البيك،
وافهم كل شي منك حتى لو سكـته..
#جبار_رشيد
مو تعودني عليك وتمشي مني،
خلي اكلك كلشي عني..
اني طيب ماانام من اسمع حجايه تغثني..
چي وفي..محد فهمني..
#زيد_السومري
على غصن انتظارك ريح ما هبيت،
وزرعت الميل بيه وخضرت دكته..
انت العلمتني شلون افك ذرعان..
للملگه الموادع ما تعلمته..
من يكبر فراغك صدري جان يضيك،
و انه البد بعطرك ماتنفسته..
#علي_رشم
بُعدك والسهر والليل والآهات،
تولني نهش وتشوف .. ما اگلك..
#سمير_صبيح
انت خليك بمكاني،
الصار بيه يصير بيك..
بنص نهر لازم تعبره..
وتلتفت ماتلكه اديك..
اني هذا الصار بيه..
بنص نهر عافنّي اديه..
و عـ الجرف بس الشماته..
وانت كلي شلون اصيح!..
انت خليك بمكاني،
نهر وتعوفه الجروف..
انت الحنيّن قسيت..
شلون ترحمني الظروف..
صرت اعده من العده..
وطلعت وعودك ندى..
وجمره ضليت بغيابك وارضى لو ترجعلي ريح.
#سمير_صبيح
وكلتله اشواگ بيه تريدك ومليت،
امنعها ردت ماقبلت امنعها..
وبعد ماصار بيني وبينك الميصير..
وعرفت شكد ولع روحي المولعها..
منك للاسف من بعد هذا الصار..
سمعت كلمات مامتوقع اسمعها..
اني المالي داعي شلون صارت هاي،
احجيها على روحك شوف تقنعها..
#جبار_رشيد
"فوگ ما تتصور جروحي غميجه
انه اول گلب يابس موش ريجه..
مو مخيم گلبي بس عندي حريجه..."
موخوش من بعيد العتاب..
واترجى بلكت يندگ الباب..
جان شحلاته وينطب البيت..
لاچن عگبهم صاير تراب..
#علي_الموسوي
عفت جرحك جاهل بروحي ومشيت،
بيش اقنعه..بيا عذر وشكد يلح..
حتى جيران الجرح صاحوا عليه..
عمي خل نرتاح جاهلكم وكح..
جروح عدنه تريد ترتاح وتنام،
الله ما وصاكم بسابع جرح..
#علي_خلف
صلف من خيروك ودنگت محتار
لو مختار غيري ولا گلت شختار...
أبليتني بالعشقِ ثم تركتني،
وأذقتني حلو الهوى فقتلتني..
ووهبتني قلبًا يفيضُ تعطّفًا،
بضعاً من الأيام ثم قهرتَني..
تقسو عليّ ولستُ أعلمُ غلطتي،
أوا غلطتي أنّي بِذُلّي أنحني؟..
أنّي رميت القلب صباً مذعناً،
بل خاضعاً يرجو الرضى لا ينثَني..
وحفرتُ في الأحشاء حرفك غائراً،
وجعلت حرفك في الصبابة موطني..
قتلتني أتلفت عمراً؛إن بقي،
وبمَهَمَّة النسيان ثم قبرتني..
انه وگلبي النحبك طولت عنه،
يـمنّه شغيراك وصرت مو منّه..
بشر لكن غيابك مال ناس هواي..
شما تبعد رسومك موتي يتدنه..
مو مالت زعل بس انت ردت تروح..
موچد غير ناس وعندك الضنّه..
تره مبين الرايد حجه حتى يروح..
يزعل من سوالف مايزعلنه..
جان القاسمه الله اتقاسمه انه وياك،
ماندري بوكتنه شجان ضاملنه..
طحت وانه بوكتها تمددتلك كاع..
وشلتك من جحيم النار للجنه..
عفتني وصدكت طبع ابن آدم صار..
عينه على الجفوف المايكومنه..
وكت خله الذهب ينسد مكانه بخيط،
وعيون النودهم ماتصدلنه..
"عطشانك حجي شتنفع اخبارك زين"،
اريد اكعد وياك شلون ماجنه..
واكلك ماكو راحه الثكيلات ثكال..
واضحك والمكابر دافن الونّه..
كرضه من الوكت ضحكت المامرتاح..
شگشر طبع الايام المايضحكنه..
ركد تابوت حزني وما لكاله متون..
منك..وانعم الله الصور شالنه..
#علي_نافع
خذت نضره ولهسه عيوني متوضيات،
اذا صلت لغيرك كل فرض يذبل..
السهر مو زين بس عيوني تشرب ليل،
تندل كل سهر بس طيفه ما تندل..
المسافه البيني والبينك سبع لجمات،
واجيتك والشماته عيونهم تسأل..
ما يستاهلك كالوا..كلت مشتاگ..
اليحب يضحي لتكلي اليحب ينذل ..
#علي_المحمداوي
اشتمك هوى و من غيره اختنك،
شما ريح الوكت صافي..
يا اجمل اسم بالحب لا تظن..
غير اسمك على شفافي..
كافي من العشگ كالولي كبرت،
منك ما كلت كافي..
لأجلك سافرت لو نار الدرب..
و الله امشي الدرب حافي..
اليعرفني يعرف اقصد يا اسم،
من هذا الحجي الكلته..
"نون"اول حرف "واو"ويا بعد..
"راء"حروفه خاتمته..
يا ناس العشگ مو حصراً الي،
هوايه المثلي عاشگته..
قبلي الشافته مثلي تولعت..
مو بس اني من شفته..
#ناظم_الحاشي
على كلشي اتخيلك يمي وارسماك
يباعدني ببعد نجمه وره سماك
يبعد اسمي كتبت اسمي وره اسمك
القصد تجوه وردت تنتجي عليه
#اياد_عبدالله
مثل الماضي صرت وياي،
اتمنىٰ شما اكبر..
#رائد_ابو_فتيان
جان وجهك،
اول ولايات عمري واخر دروب الضياع..
جانت عيونك سما لجنحان حلمي..
تيهتني ومن هذاك اليوم ادور..
ما لكيت لحلمي كاع..
#غانم_الفياض