4231
✔️ 𓆩cнαииєℓ𓆪 ♡♡:♡♡ 𓆩 كم تمنيت ان تكونِ روما 𓆪
ماخذ ناكتي وعايفلك الصحراء،
وخير من الله عندي متاع اليكفي..
ومثل ما طيره تنكت روحها من الماي،
هيج انكت عشرتك نكت من جفي..
بعد لا طينتي ولاتنحط بصفي،
انه بره القصر بس قالق السلطان..
وانت ويه العبيد الواكفه تهفي..
عله صوتي عليك اعذرني مامقصود،
بس بلا صياح العتب مايشفي..
ولاتنشدني وين مسافر ومجفي،
رماد ومن اسافر مامحدد وين..
المهم بس اشرد من الموكد المطفي..
وبعد مثل الفراغ اليبقى بالميزان،
من نتلاكه جتفك مايطخ جتفي..
"على باب العلاقه وحذروني الناس،
الحجي بوجهك فرق كالولي عـ المخفي..
كلها تصيحلي اوكف،لاتفوت شلون..
درب كله كزاز وطفل متحفي..
وفتت بيها متاهه ومن كضت رديت،
الدرب ماحافظه وامشي على اثر نزفي"..
(ضرفك سهل ماينقاس وي ضرفي،
وجرحك عين الابره وجرحي عين البوّم..
مفتش ليله كله ومارضى يغفي)..
وباب العشره سديته بقلق وبخوف،
ولك جن ساد بيدي عيون متوفي..
نهر بس نشفتني وحاط الله وياك،
‘جانت تترس الحلوات من جرفي‘..
عشره وتنكطع وتشدها ماتنراد،
وبعد ماعندي واهس تعتذر واعفي..
شريط الافتتاح وحدي،كطعه وياك..
طرفك لاامسه ولا تمس طرفي..
ولاتنشدني وين مسافر ومجفي،
ابن آدم بين فتره وفتره كون يغيب..
ويفرش ناسه كلها ويكعد يصفي.
#سعد_شميل
حيره وگلبي ما ماخذ قراره،
ومااشوفنها تخلص بـ استخاره..
احس الغرفه محجر من يجي الليل،
وعليّ مكتوب ممنوع الزياره..
انه ابن آدم يوادم موش طاعون،
وتخاف الناس كلها من انتشاره..
#سعد_شميل
انه جذاب من ازعل،
واكلك روح مااريدك..
انه مرات من اشتاك،
ارسمنك واكض ايدك..
#مالك_الباوي
اني من كد ما حنين،
انطي للحايط جكاره..
ونكعد نسولف عليك..
#علي_البديري
اجلي بحديد الزمن مبرد وانه منجلي
بس جيه الموت مامنها ابد منجلي
يكولون ليل الحزن لابد وان منجلي
وتطلع علينا شمس لمن وكتها يحن
وچف الهجر حنته للحنه يرجع يحن
يفلان تدري شوكت گلبك عليه يحن
لمن على السنبلة يعطف گلب منجلي
#سمير_صبيح
بعيد وجنت اشوفك مثل العيون،
واقرب من سواد العين حسيت..
تنكل صورتك تدري العصافير،
ويصفطنك بعيني لَوّن حنيت..
طرت حدما تلاشت صورة الكاع،
وشفت وجهك سما وكباله صليت..
بس كلي شـأكطع خاطر انساك،
دشوف شجم گلب من صدري جريت..
اخلي بخاطرك من جنت احاجيك،
وانت بخاطري مايوم خليت..
كلي الخالقك جم نسخه سواك،
اشو يابيت اطبله الكاك بالبيت..
تره اني من كثر متولعت بيك،
جن وتلبست بعضاي شكيت..
جابولي اليطلع يكدر الجان،
غلط طلعني اني وانت ضليت..
#ميثم_فالح
المايندل خيالي بروحي مااخلي،
ومايرهم عليه لو نَفس جيته..
التعداني بحلم يلكاني عابر ليل،
الفجر كبل الشمس بعيوني وشلته..
المايشتاكلي ينترس حضنه فراك،
على الملگه من اسولف ماتذكرته..
بيها وداع روحي يكفي كل الناس،
وخسرها الجان ضَن الروح خاسرته..
#علي_رشم
-بجفه خلي شجخني سهم نوبات
-بگفاي وطب عليّ بخبال نوه يبات
شفت الموت بعيوني
اصيحن مايسمعوني
مشوا مطروح خلوني
عليك اثغب مثل طفله
دمعي تكول جن دهله
شيسكته الينفكد خله
اشتهيتك روحي ماتنسى
شهوة وحده تتنسى
عدها لسان بس خرسه
بس وياي اضن خابت
حتى العسرت جابت
توم واخ ماصاحت
شصيحن ماتسمعه الصوت
جفن ولمته كبل الموت
جنازه وعوزي بس تابوت
-وعلي باليوم اموتن ثلث نوبات
عدل واني هلي يدفنون بيه.
شكثر خط على روحي دارميات
الكبر بجفاك صدري دارميات
تعال وشوف گلبي دار ميت
العجايز شادات وزار بيه.
#عباس_الدلفي
كلتله تان بس عافاني ما تان
ومشى والعافيه ويه الحيل ماتن..
واضل حاير،
ردت بس افهم شصاير
شجاك وعني متخلي
وتكل للناس خيولي
ولك جا حاسبك خلي
واكول يحبني ميملني
وطلعت بدوني متهني
سهله وتبتعد عني
يمك اهلك وناسك
ولاشايب شعر راسك
شجره جروحي من فاسك
المهم ثق بعد مااريدك
گلبي حجاره ميفيدك
يمن جريته جف ايدك
ولغيابك ولا اهتم
ولاتهمل عيوني الدم
وبعد ميفيد لاتندم
روحي بغيبتك لا بعد..ما تنـلجم
لأني تعودت عـ الصار بيه.
جنت احبك وانت ماعندك علم..
وللعلم ماجنت اعرفك للعلم،
شنهي يعني..
يعني انت شكد مهم..
#جبار_رشيد
اقوى من الخمر تأثيرك اعله الروح
انعد عـ السكارى وماضكت قطره
انه وي شوفتك داس اعله جفني الليل
مو بجدامه داس بحافر المهره
يالتنعس قبل مايطلع الخفاش
انه بلياك كاسر خاطر الگمره
بس بالحلوه اشوفك بالفهاوه تروح
وانه مرافكك عـ المره والمره
انه من ابجي انشف هدومي موالخدود
انكع حالي حال الطالع بمطره
الطبر بيدي واكولن خاف عش فوكاك
لو عاشك اتعنى وبيك خط ذكرى
عـ كد عقلك انطيتك من ردتها حساب
بجف طفله حسبت ايامك المره
وكلت عد السنه واوفيلك وعديت
وخنتني انت قبل لااوصل العشره
منا وانتهت مدري انتهت مناك
من صديت شوگي بعينك الحمره..
#رائد_ابو_فتيان
هــا دهر كفيت لو بعــــدك وراي
يـادهر هيهات تسمع بي تبت ..
الحزن صب ونته صارت وي صـــــباي
مــا أظن عالضحكه نوبه أتحسرت ..
خله مطرك ضيمك أيدگ بـگــــفاي
ذاك مشيي ولا مشيــت وحنبت ..
زيده بردك وأعصف اچللي بشـــــــــــتاي
ادفه برواگ العشگ لـو عسمت ..
يَتم أريوگي وإخذ خبزة غـــــداي
من متاع الصبر أكل لــو جعت ..
اني مفلس من دسومت مشتــــهاي
وبجليل أسهم الماعنده گمت ..
أنــه أخدر ظيم ماخدر الچـــــــــــــــاي
ولو فرغ ساعات قوريي دخت ..
صحره وأرمال وهوى وجــــلد ذراي
وبكتر بيت الشماته مــا لذت ..
أني معفي بعسري وأشنشطه عفـاي
چــلمة أدخيل بحيــاتي ماگلت ..
سره لزمت ناس عالذله وسراي
أول الناس بسره النخوه صرت ..
لاتزعلني صعب كلـــش رضــــــــاي
أعناد معبار الوذل لــــو عاندت ..
عندي گواك الله وخبز وبشطي مـــاي
بدوي وبزاد الخرج لــــو عزبت ..
أني ثوب العسر ملبوس وغـــــــطاي ..
ومتر خام من اليسر ما حصلت ..
يــادهر تركض عليه أنه شــوراي
لــو ثخين الفي علي ما سومرت ..
أني بس ثوب الشرف چد وعــصاي ..
ظامها لمشي الكبر لــو عجزت ..
#فاضل_غضبان
بعدك ماادورك حلم لو ردت انام..
لا ولا اريدك تمر بأحلامي،
وهذا دمعي السآل ماسايل غرام،
شال جفني وطلعك من عيني..
لابيك حظ وتجي ولابيه حظ وانسى،
البارحه تذكرت كل لحظه بيها سوه..
وكبران چني سنه من البارحه لـهسه..
معقوله عشرة عمر ماخذها للونسه..
وللعشره مالك خلك،
بوجهي بمذله جنت مرسالك تشمره..
جن زاد بالمعركه يشمرونه للاسرى..
#سعد_شميل
براي لألله من الخذلني،
واله بعد هيهات ارد..
هو منجل واني ورده،
شلون ترهم منجل يعاشر ورد..
#مرتضى_حرب
الفرجه الماتكضها جفوف رسام،
تسوي ابشع مناظر باحلى الالوان..
#سعد_شميل
جفيتك وادري تاخذني وره جفاك
حسرتي و لوعتك والهم وره جفاك
بخيالي جروحك مبينه وره جفاك
وخناجر كمت احس النفس بيه.
#علي_رشم
اكابل عينك الحلوه واغني،
وكل اليوجعنك يوجعني..
اذا تنجرح اني انجرح وياك..
مثل مااني منك انت مني..
5/5
#مقتدى_الحديدي
والله ولا جان على بالي،
مديتلك جفي وسؤالي
اني انسى كلشي وگلبي خالي
حسبالي حالك مثل حالي
جكليت طشيت الهلا عليك
واستغربتلك مو بحالي
تاليتي ابد مو خوش تالي
خله اليطك صوره لخيالي
ثكلان وجهه وصار غالي
ضميت بالكوه انفعالي
واني الموزع دمعي عـ الناس
وبعيون ناسي دموع مالي
عفتك نصيص هسه عالي
يالهدمت من گلبي چالي
امس اني جذبت الحجالي
خاين وكلتلهم حلالي...
#عقيل_العرد
عرفتك ماتقدس كل مشاعر دوم،
من شفتك تسوك اعله الغنم بالنـاي..🪈
#حسن_الخيكاني
تاجر مو شرط عندك ذهب وقصور،
موقف ويه ربعك تنحسب تاجر..
تلهث ايامي وعمر تركض وراك..
والدقايق غربه واللحظه قطار،
دير وجهك مايهم بجروحي خير
"واضحه حجاياتي وحروفي نهار"..
(وياي طبعك يشبه اوضاع العراق
خير للغربه وعلى اهله يصير نار)..
رَكضت شهكاتي ودموعي وراك،
شلون ركضت عوزنه بوكت الحصار..
فحطت خلكي وبعد زعلك طويل،
ودرب الملاكه عليه شبعده صار..
"روحي مابيها عشگ خَلص عليك"
وبسما جروحي حنينك كله طار..
فرفحت روحي ونكتت جفوفي حيل،
من سمعت بواهسك يم غيري صار..
#علي_رشم
أمسَت جُروحي مِعطَفاً واحتَل لوني نَزفَها ..
والحُزنُ في قيثارتي يُبكي جَماداً عزفَها ..
صارَحتُكُم بمشاعري وازداد فيكُم صَدَّها ..
لو كان فيها كذبةً ما كانَ مِنكُم ردّها ..
مو صوچكُم طبع البشر يرتاح للي يغدره ..
لو غاب يومين الرمح يشتاگ ويفك صدره ..
(وچيف انه احبكم من صدگ ..
وبروحي شايلكم عشگ ۔۔
مل غيري من عيونكم وانه بحسرة النظره) ..
وشگد اجو رادوني احب علمت گلبي وماعرف ..
"يعني اني احبكم من طرف واحد وصنت العشره" ..
وشگد فضول اتحملت .. ووجوه مابيها طعم ..
واني بكثر ماغيمت يرعبني لون الگمره ..
#مهند_العزاوي
جفاني نظر عيني عليك ونتاه
عايفني بگلب ماعاف ونتاه
لا تايه واكول للناس وين تاه
انه التايه وكل الصوج بيه.
#حسين_الفريجي
تدرون ضيمي منين بادي،
من البصره لأطراف الرمادي
هذا الحجي بيا ديره سادي
زعلان اكله يكلي عادي
دورت عنه شكثر من راح
دوارت حكومه عن السلاح
ياهو اليكضني يكلي مرتاح
واني على گلبي تنام الرماح..
#مالك_الباوي
من رحت طاح الگلب..
صحيته كوه وكعد،
وبأول حجايه انحجت عنك سأل وينك..
شديت عين الجرح ..
جبته واجيت اعتذر يم باب سجينك،
وطميت مجره الدمع ..
ولونت وجه الحزن..
ورسمت سلة ورد..
ومااريد منك فقط،
"بس مدلي جفينك"..
#جبار_رشيد
ﺍﺭﺟﻮﻙ ﺗﻠﻐﻲ ﺍﻟﺤﻠﻢ ﻭﺗﺄﺟﻞ ﺍﻟﻔﻜﺮﻩ
ﺍﻟﻤﺎﻱ ﻃﺎﺡ ﺑﺮﻣﻞ ﻭﺍﻧﻜﺴﺮﺕ ﺍﻟﺠﺮﻩ
ﺍﺣﺴﻦ ﺍﻟﻴﻪ ﻭﺍﻟﻚ ﻧﺒﻘﻰ ﻋﻠﻰ ﺍﻟﺬﻛﺮﻩ
ﻃﻮﻝ ﻏﻴﺎﺑﻚ ﺳﻨﻪ ﻭﺑﻼ ﻋﺬﺭ ﻭﺍﺭﺟﻊ
ﻭﺷﻠﻮﻥ ﺍﻗﻨﻊ ﺍﻟﻜﻠﺐ ﻭﺍﺩﺭﻳﻪ ﻣﺎ ﻳﻘﻨﻊ
ﺍﺑﺪﻳﺖ احس ﻣﻮ ﺍﻟﻲ ﺣﺴﻴﺘﻚ ﻣﻮﺯﻉ
ﻭﻓﻜﺮﺓ ثنين بـگلب ﻣﺮﻓﻮﺿﻪ ﻫﺎﻟﻔﻜﺮﻩ
ﺍﺣﺴﻦ ﺍﻟﻴﻪ ﻭﺍﻟﻚ ﻣﺎ ﺗﺮﺟﻊ ﺍﻟﻌﺸﺮﻩ..
ﻣﺎ ﻧﻠﻜﻪ ﻧﻔﺲ ﺍﻟﺨﺠﻞ ﻭﺍﻟﺨﻮﻑ ﻭ ﺍﻟﺮﻋﺸﻪ
ﻭﻻ ﻳﻮﻡ ﻓﻮﻙ ﺍﻟﻮﺭﺩ ﻳﺮﺟﻊ ﻧﺪﻩ ﺍﻟﻐﺒﺸه
ﺳﻜﺘﻪ ﻭﻧﻀﻴﻊ ﻭﻛﺖ ﻟﻮ ﺭﺩﻧﻪ ﻧﺘﻤﺸى
ﻭﻛﻠﻤﻦ بحبه التها ﻭﺑﻴﻬا نشغل ﻓﻜﺮﻩ
ﺍﺣﺴﻦ ﺍﻟﻴﻪ ﻭﺍﻟﻚ ﻣﺎ ﺗﺮﺟﻊ ﺍﻟﻌﺸﺮه
ﺻﻔﺤﺔ ﺑﻌﻤﺮﻧﻪ ﺍﻧﺘﻬﺖ ﻭﺍﺣﻨﻪ ﻃﻮﻳﻨﺎﻫا
ﻭﻓﻮﻙ ﺍﻟﺮﻓﻮﻑ ﺍﻧﺴﺖ ﻭﺗﺮﺍﺏ ﻏﻄﺎﻫا
ﻭﺗﺮﻳﺪ ﺑﻌﺪ ﺍﻟﺴﻨﻪ ﻧﺮﺟﻊ ﻭ ﻧﻘﺮﺍﻫا
ﻣﺎﻛﻮ ﺟﺪﻳﺪ ﻭﺣﻠﻮ ﺑﻜﺘﺎﺑﻨه شنقره
ﺍﺣﺴﻦ ﺍﻟﻴﻪ ﻭﺍﻟﻚ ﻣﺎ ﺗﺮﺟﻊ ﺍﻟﻌﺸﺮﻩ
ﺻﺪﻛﻨﻲ ﻣﻦ ﻧﻠﺘﻘﻲ ﻛﻞ ﻣﺎ ﺑﻘﻰ ﻧﺨﺴﺮﻩ.
#الكاطع