آی طبیب دردیم آغیردی سنده درمان گورمیشم
هرکسین اولماز نسیبی سنده وجدان گورمیشم
روحیمه آزار ائده للر نا نجیبلر قصدینن
سن حیبیب بی بدلسن سنده رحمان گورمیشم
ایچمیسن باده عزیزیم دوست الیندن مستی سن
سنده حکمتلر عجایب سرره پنهان گورمیشم
گل یورولمازی اونودما می ایچن ساعاتیده
قارتالیم قلبونده چونکه نور ایمان گورمیشم
🍂🍁@paeizanam🍂🍁
دوزو دوز گؤره نى،اَيرينى اَيرى
باسيرلار گؤزلرى كور اولور له له
نامرد قاباغيندا كيم بويون اَيَر؟
ظاليمى ديكلدن زور اولور له له
يامانليق دونيانين دَييشير رنگين
حاقّى دانيشانين ازيرلر اَنگين
مئشه لر سولطانى،شيرين،پلنگين
يئرى تؤلكو قوران تور اولور له له
باغبان ناشى اولسا،باغ الدن گئدير
چوبانسيز-چولوقسوز داغ الدن گئدير
بوستانلار پوزولوب تاق الدن گئدير
يئميشلر،قارپيزلار اور اولور له له
"موغان اوغلو"منه دوست اولوب قنيم
اؤزگه دَييرمان دا دارتيلير دَنيم
باخ گؤر بو دردلردى سينه مده منيم
كؤزه ريب،قيزاريب قور اولور له له
#بختيارعلی_مرادى
🍂🍁@paeizanam🍂🍁
سیراما
گول الینده توتوب گوللو گولونو
گول گوللونو آچیب،گوللو گولو آچیب
ائله یاراشیر کی گوللر گوللویه
من هله دئدیم بس گوللو گول آچیب
گول دوداغین آچیب گوللو گولنده
گول ده والِه اولور گوللو گولنده
بیر آز دا گولوشون گوللو گولنده
گول گوله سؤیکه نیب،گوللو گول آچیب
"انتصار"گول ویرماز گولوم گول گوله
گولومسر دوداقلار گوله گول گوله
گوللونو چکمیشلر گوللر گول گوله
گوللرین شوقوندان گوللو گول آچیب
#داودانتصار
🍂🍁@paeizanam🍂🍁
بیر قاتیل دن داها جانی اینسانلار گؤردوم. اومیدیمیزی اؤلدورنلری گؤردوم.
🍂🍁@paeizanam🍂🍁
سئودیم اونو، آخیردا منی آتدی، نئیلیسن؟!
بوش سؤزلر ایله کؤنلومو آلداتدی، نئیلیسن؟!
یازدیم: «بو سئوگی کاش اوزانا ساچلارین کیمی!»
چوخ بیلمیش ایدی، اونلاری قیسسالتدی نئیلیسن؟!
تئز-تئز دئییردی ها: «گئدیرم، گؤرسهنر یئریم»
گئتدی، آخیر دئدیکلرینه چاتدی، نئیلیسن؟!
بیر گول کیمی گؤروندو گؤزه، ایستهدیم دَرَم-
بیردن تیکان کیمی الیمه باتدی، نئیلیسن؟!
زنگ ائیلهدی دونن گئجه، بیر سؤز دئدی منه،
لاپ سئوگیمین بالین زهره قاتدی نئیلیسن؟!
آخشام گئدیب منی سوروشوبدور محلّهدن
نَم کیم دئییبدی: «بوشلاگیلان، لاتدی، نئیلیسن...؟!»
#مهران_عباسیان
🍂🍁@paeizanam🍂🍁
- آداملار عوض اوْلوب، زمانه عوض اوْلوب
بیلیرسن، بو گۆنلر بیرییله ال وئردیکدن
سونرا، هر بئشینی گئری آلدیغیندان امین
اوْلماق اوچون بارماقلارینی سایمالیسان...
🍂🍁 @paeizanam 🍁🍂
paeizanam
ائله، «هله» دئییب هله دؤزوروک،
هله کی، هلهنین هلهسییم من.
نه، سرحد تانیماز عاشیق کرمم،
نه ده خان اوغلونون للـهسییم من.
ناحاقلار اؤنونده نئچون کیریدیم؟
قال بو خجالتده، آغزی کیلیدیم!
گویا بو دونیادا نئیلهیه بیلدیم؟ -
دئییم کی تزهدن گلهسییم من.
بئکار ال نئچون ده سؤزومه باخسین؟
الیمین اوزو یوخ اوزومه باخسین.
او هانسی اومیددیر بیزی چاغیرسین؟
دوروب آرخاسینجا تلهسییم من.
دایان، دوروم گئدیم بازاریمگیله،
دونیا بوللوغونا ارکیم بیر گیله.
قالمیشام اؤزومه لاپ گوله-گوله،
ائله گوله-گوله اؤلهسییم من.
کیملره بورجوم وار، دولوب سیاهی،
وورا بیلمهدیگیم هدف گوناهی-
کسیب بارماغیمی، وئریب سیلاحی.
بیر نامرد حاکیمین کؤلهسییم من...
#موسی_یعقوب
🍂🍁 @paeizanam 🍁🍂
paeizanam
دؤنهیدیم بیر سئوینج یاشینا کاش کی،
گؤزوندن سوزولوب اؤلهیدیم سنین!
یولوندا بیر قورو آغاج اولایدیم،
بیر کوچه اوزونو گؤرهیدیم سنی!
چئوریلیب کولهیه، یئله، یاغیشا،
آیاغین آلتیندا بیر اوووج داشا،
لاپ ائله دؤنهیدیم بیر قارانقوشا،
اوچوب پنجرهنه گلهیدیم سنین!
کاش کی، باجانیزین یئلی اولایدیم،
اوجاغی، آلووو، کولو اولایدیم!
کاش سنین آنانین الی اولایدیم،
ساچینی داراییب هؤرهیدیم سنین!
Ülvi Səmazən
🍂🍁 @paeizanam 🍁🍂
منی، آلنیما یازمادیغین بیر شئیی آختاراراق، یورما، تانریم!
#مفاتیحالجنان
🍂🍁 @paeizanam 🍁🍂
paeizanam
روباعی
مئی شؤوقو اولوبدور منه عادت، ای شیخ!
گلدیکجه بو شؤوق اولور زیادت، ای شیخ!
خوشدور منه مئی، سنه عبادت، ای شیخ!
رأی ایله دئییل عشق و ارادت، ای شیخ!
حکیم ملامحمد فضولی
🍂🍁 @paeizanam 🍁🍂
ایستیرسن آغا اول ایستیرسن پاشا
اونوتما کی
سنده بیر گون گیرجکسن مزارا..
👍👍👍
🍂🍁@paeizanam🍁🍂
سن اوره ييم مئشه سينده
دؤرد فصيل ده
گؤم-گؤي قالان
بوي بوخونلو
بير آغاجسان.
من بيليرم
سؤز دوشنده
كؤنول آدلي بير ملك دن
مني يادا سالاجاقسان.
دردين
كؤرپه اوره ييمده
قالانديقجا
قالاجاقسان.
اؤز الينله
ياراتديغين
آتشينه ياناجاقسان
يانا-يانا
آناجاقسان!
#بهروز صديقی
🍂🍁@paeizanam🍂🍁
داریخما، دوزلمهیهجک!
نه گلن کیمی گلیرم،
نه گئدیرم گئدن کیمی.
بیر یئکهپر اؤلوم گزیر،
یانیمدا جانگودن کیمی.
دئیهسن دلی اولورام،
قیلان یوخ علاج باشیما.
گؤودهسیندن دیرماشیرام،
ییخیلمیش آغاج باشینا.
یا سؤک، یا تیک، نه فرقی وار؟!
بو داخما دوزلمهیهجک.
گل سنه تسلّی وئریم:
داریخما، دوزلمهیهجک...!
#سالام_ساروان
🍂🍁@paeizanam🍂🍁
اوزونده بیر تبسّوم
اوزونده بیر تبسّوم
سن دؤنوب باخمادین می؟!
بیر باخیشلا کؤنلومو
یاندیریب یاخمادین می؟!
یاشادین اومودوم دا
کول آختاردین اولدوم دا
قارالمیش بولودوم دا
شیمشک تک چاخمادین می؟!
آتیب اوزدن تئلینی
بال ائیله دین دیلینی
منیم تک بیر دلینی
یولوندان ساخلادین می؟!
کولک کیمی اسنسن
شیطان می،یا نه سنسن؟
پامبیقلا باش کسنسن
آللاهدان قورخمادین می؟!
#نصرت_کسمنلی
🍂🍁@paeizanam🍂🍁
گوزلرینین قاراسیندان
گوزلریمه قادان دوشوب
خاطیره لر سیراسیندان
یادیما بیر اَدان دوشوب
بیزه ساری یول ایینده
دوداق بوزوب،دیل ایینده
شیرین-شیرین یار دئینده
قلبیمه خوش صَدان دوشوب
حسرتینده سیر اَلی وار
اولوم،ایتیم عملی وار
کمندینده بیر دلی وار
"صیاد"کیمی نادان دوشوب
صیاد زیادپور
🍂🍁@paeizanam🍂🍁
سوسدور اوره گیمی آی ناشی جراح!
آماندیر سازیمین تئلينه دَيمه
هر كؤك اوسته بير ديلقميم ياتيبدير
زيلينه توخونما بَمينه دَيمه
دؤندرمه باغريمين قانا يوردومون
بؤيوك اومودو وار اونا يوردومون
قفسده چیرپینان آنا یوردومون
زنگین اوباسینا ائلينه دَيمه
وورغونا بير نامه يازارام اينان
واقيف قارا باغدان سؤيله ير اوتان
"آلقاييد"!اؤلمه ييب علی عسگر بابان
بیر قلم گؤتورن الينه دَيمه
#آلقاييدخليل اوف
🍂🍁@paeizanam🍂🍁
گون آیدین دوسلار❤️
ایشلرینیز یولوندا🌺
ساغلیغینیز یئرینده💗
گونوز بول و برکتلی🌹
عؤمرونوز اوزون و سعادتلی🌸
هر شئی کؤنلونوزجه اولسون💖
☀️گون آیدین گوزل آذربایجان☀️😍
🍂🍁@paeizanam🍁🍂
.
💫بو گئجه یاتارکن
غملری اونودون
کدرلری بئینینیزدن سیلین
گؤزل دوشونون
راحات یاتین
بیر معصوم اوشاق کیمی، فیکیرسیز
گئجز اولدوز کیمین پارلاق عزیز دوستلار💫
🍂🍁@paeizanam🍁🍂
تانرینین گؤزوندن آخدیق آستاجا
سوزولوب یول اوسته سئویشهر اولدوق
بیلمهدیک هارادیر یولوموز بیزیم
بیز آنجاق یول اوسته گؤروشهر اولدوق!
اونوتدوق قدهرین آجی یوکونو،
پای اولدوق روزگارین اسن تئلینه
بیر اوووج قاریکن سپیلدیک یئره،
بیلمهدیک آتیلدیق کیمین ائلینه
گونشی گؤرونجه آلداندیق اونا
سانمادیق گونوموز سانیلیر بیزیم
ارییب یوخ اولدوق سادهجه بئله،
آدیمیز سو کیمی آنیلیر بیزیم
#رحمتلیک_قاسیم_جبرئیلزاده
🍂🍁 @paeizanam 🍁🍂
paeizanam
نه یامان گلدی،
اوشاقلیق گونلریمین زاوالی!
بیلمیرم،
هانکی یاراماز الدن قوپان،
قیزیل گوللـهیه گلدی،
اوشاقلیغیم.
اوندا،
ایندیکی کیمی «باریشماز» دئییلدیم؛
بو یاندان کوسوب
اویاندان باریشاردیم.
دار کوچهمیز،
دار باشیما،
دونیا کیمی دار دئییلدی.
اوندا،
حیات قوخوسو قوپاردی،
سو چیلنمیش تورپاقدان.
اوندا،
اورهییم آسیلی ایدی،
بوداقلارین دؤشونو اَمَن یارپاقلاردان.
حیات اوزولمهمیشدی،
سامانلی دووارلاردان.
ایندی آما،
صداقتدن پایسیز دانیشیقلار کیمیدیر حیات،
اونودولموش معبد قوخوسو وئریر بوزلانمیش باخیشلار.
بیرجه یول آچا بیلهیدیم،
آنامین مئشین جیلیدلی یاغلی قورآنینی!
کاش اوشاقلیق گؤزو ایله،
بیر ده باخا بیلهیدیم،
بوز کؤپکلر اوستونو بزهین،
ساری دویمهلی گئییملره.
ایندی باریش سؤزونو،
سؤزلوکلردن سیلنلردندیر «باریشماز»لیغیم.
ساری دونون آلتیندا،
اؤزگه قانی ایله کؤروکلهنن،
اورکلردیر تیترهدن کورهییمی.
اوشاقلیقدا چاپان یوخ ایدی،
یاردیما اوزانان بیلهییمی.
کاش آنامین ماهانا قوتوسو کیمی،
آغزیمین دادی قویلانان گون،
من ده قویلانایدیم،
اوشاقلیغیم قویلانان،
دار کوچهمیزده.
او گونلرده قویلانمامیشدی،
شرف،
غیرت،
ناموس،
عار، کوچهمیزده...
حیدر عباسی باریشماز
🍂🍁 @paeizanam 🍁🍂
paeizanam
سنی سئون وارسا...
سن یئری، سن گؤیو قلبینله دینله!
سنی سئوَن وارسا، دونیا سنیندیر.
سئون یوخسا، باریش اؤز طالعینله!
آغریلی، آجیلی رؤیا سنیندیر.
اونوتما، سئوگیدن قاچا بیلمزسن!
سنی سئون وارسا، حیات سنیندیر.
سئون یوخسا، قوشتک اوچا بیلمزسن،
او سینمیش، یارالی قاناد سنیندیر.
چؤکسه ده یولونا قاپقارا بولود،
سنی سئون وارسا، جاهان سنیندیر.
سنی سئون یوخسا، دنیزه اۆز توت!
اوردا جوشوب-داشان توفان سنیندیر.
اگر سئون وارسا، سئو اورهیینله،
یازدیغین هر دردلی میصراع سنیندیر.
سئون یوخسا، باریش اؤز طالعینله!
مجنون تک آتشلی صحرا سنیندیر.
نبی خزری
🍂🍁 @paeizanam 🍁🍂
▫️ان چتین ایش، دویغولارین سنی بوغدوغو حالدا، منطیقلی داورانماقدیر.
📚 داستایئوسکی
🍂🍁 @paeizanam 🍁🍂
اریتدی بو عؤمرو بئله
سئودانین اوزاق یوللاری
گلسنه عشقین آدینا
حک ائدک، یازاق یوللاری
بو درد منده یووا قوروب
کؤنلومه ائله اوتوروب
قلمی درده باتیریب
شعیرله جیزاق یوللاری
وار یولونو، یوخ یولونو
سن بیلیرسن ساغ- سولونو
حیاتیمدان سال یولونو
سن- اونون- اوزاق یوللاری
منه دَیَن اوندان دَیدی
قار ایسلاتدی، توفان دؤیدو
یوخودا یول یاخشی شئیدی
«یوللار»ا یوزاق، یوللاری
هر بیر نِدا سسدن گئدیر،
نه گئدیرسه قَصْتدن گئدیر
اورهییمین اوستدن گئدیر
بو باکی- قازاق یوللاری!
#علمالدین_نجات
🍂🍁@paeizanam🍂🍁
یاساق سئوگی
سئوگی عهدیمیزین اعتیباری دی
بخته ور او کسدی سئودی یاریدی
هامینین بیر ایسم پنهان واریدی
بو یاساق سئوگی دن کیمسه یان دئییل
ان گودک،ان اوزون ناغیل سئوگی دی
دوشونجه سئوگی دی،عاغیل سئوگی دی یاساق اولورسادا ماغیل سئوگی دی
بو کی نیفرت دئییل،بو کی قان دئییل
بو سئوگی منیمچون اونودولمازدی
تانری سیناق اوچون آلنیما یازدی
سئوینجی دایازدی،غمی دایازدی
کیمی کی بو سئوگییه پریشان دئییل
منیم عومور پاییم دوندو نیسگیله
ایللردیر آغلیرام من گوله-گوله
ایلک سئوگیم کوکسومده کوزه ریر هله
آغزیم هر یئتَنه سولانان دئییل
#نرگس_صادقوند
🍂🍁@paeizanam🍂🍁
آی شیشر-شیشر
سیر وار اوره ییمده ساخلامیشام من
نامرده دانیشسام آی شیشر-شیشر
یامان ائله بونووره دن یاماندیر
بیر گونده اوز وئرسم آی شیشر-شیشر
ائللر کوچوب حسرت قالیب قارا داغ
دومان،چیسگین بورونوبدور قارا داغ
چکیلیبدیر سینه م اوسته قارا داغ
اوره ییم درد چکیب آی شیشر-شیشر
"موغان اوغلو"چارخ دولانیر ترسینه
بو دونیانین دوزو نه دیر ترسی نه؟
قیسمت اولار ترس ده دونر ترسینه
یانار گون جمالی آی شیشر-شیشر
#بختیارعلی_مرادی-موغان اوغلو
🍂🍁@paeizanam🍂🍁