Telegram-канал mikreabew - ምክር ፣ ተግሣፅ ወትምህርተ አበው ✞: Unsorted

ምክር ፣ ተግሣፅ ወትምህርተ አበው ✞

12 March 2024 11:11

       †              †             †
▬▬▬▬▬ ▬▬▬ ▬▬▬▬▬

[   ኦርቶዶክሳዊ የመዳን ትምህርት   ]

[ በዚህ መርሐ-ግብር ኦርቶዶክሳዊ የመዳን ትምህርት ከቅዱሳት መጻሕፍት ፤ ከቅዱሳን አባቶቻችን ሊቃውንተ ቤተክርስቲያን አስተምህሮ እንዲሁም ከመምህራን ትምህርቶች ላይ በየጥቂቱ ይቀርባል። እንዲሁም የተሐድሶ መናፍቃን የኑፋቄ ትምህርቶችና ምላሾቻቸው የሚቀርብ ይሆናል። ]

†                  †                     †

[   ኦርቶዶክሳዊ የመዳን ትምህርት   ]

[       ክፍል ሃያ ሦስት     ]

[ መዳን ማለት ምን ማለት ነው ? ]

†                  †                     †

1) ኃጢአት ካመጣው ፍዳ ሁሉ መዳን

               [ -   ፪ -    ]

ጌታችን እኛ ከሞትና ከርግመት እንድን ዘንድ ራሱን የተወደደ መሥዋዕት አድርጎ አቀረበ ፤ ክርስቶስም ደግሞ እንደ ወደዳችሁ ለእግዚአብሔርም የመዓዛ ሽታ የሚሆንን መባንና መሥዋዕትን አድርጎ ስለ እናንተ ራሱን አሳልፎ ሰጠ” እንዲል። [ ኤፌ.5፡2 ] ክርስቶስ የመጣው ከኃጢአት ብቻ ሳይሆን ከሞትም ሊያድነን ነው:: በሞት የደረሰብንን የነፍስና የሥጋ መለያየት ያድን ዘንድ ሥጋችንንና ነፍሳችንን ተዋሐደ። ለዚህም መድኃኒታችን ነፍሱና ሥጋው በሞት ጊዜ እንዲለያዩ ፈቀደ፡፡ ሆኖም መለኰት ከሁለቱም ጋር - ከሥጋውና ከነፍሱ ጋር - የተዋሐደ ስለሆነና ስለማይለይ ሞት ሥጋውንም ሆነ ነፍሱን ይይዛቸው ዘንድ አልቻለም ፣ ምክንያቱም መለኰት ከሁለቱም ጋር ተዋሕዷልና።

ከሦስት ቀን በኋላም ቅድስት ነፍሱንና ክቡር ሥጋውን በትንሣኤ እንደገና አዋሓዳቸው:: ስለዚህም ሞትን አጠፋው:: በጌታችን ሞት ሞት ድል ሆነ ፣ ሲኦል ተመዘበረ መቃብር ተከፈተ፡፡ ለዚህም ምስክሮችና በኩራት ይሆኑ ዘንድ በኢየሩሳሌም ሞተው ተቀብረው ከነበሩት ቀደምት ወገኖች መካከል የተወሰኑት ከመቃብር በመነሣት ለሰዎች እንዲታዩ አደረጋቸው:: በቅዱስ ወንጌል “ከትንሣኤውም በኋላ ከመቃብሮች ወጥተው ወደ ቅድስት ከተማ ገቡና ለብዙዎች ታዩ” እንደ ተባለ። [ማቴ. 27:53]

በሞቱ ሞትን ሻረው ፤ “የኋለኛው ጠላት የሚሻረው ሞት ነው” የተባለው ለዚህ ነው:: [1ቆሮ. 15፥26] ስለዚህም “አሁን ነፍሴ ታውካለች ምንስ እላለሁ? አባት ሆይ ፥ ከዚህ ሰዓት አድነኝ" ነገር ግን ስለዚህ ወደዚህ ሰዓት መጣሁ” አለ። ይህም ማለት ጌታችን ሰው የሆነውና ወደ ሕማማቱ የገባው ስለ እኛ እስከ ሞትና መቃብር ድረስ የደረሰ መከራን በፈቃዱ ለመቀበል መሆኑን ነው:: [ ዮሐ.12፡27 ፣ ቆላ.1፡20 ፤ የሐዋ.20፡28 ፤ ሮሜ.5:9 ፤ ኤፌ.17 ቆላ.1:14 ፤ ዕብ. 9:22 ፤ ራእ.1:5-6 ፣ ራእ. 5:9 ]

የሰው ልጅ “በበላህ ቀን ሞትን ትሞታለህ” ተብሎ አስቀድሞ ተነግሮት የነበረው የሞት ማስጠንቀቂያ በገቢር ተፈጽሞበት በሰውነቱ ላይ ሞት ነግሦበት የሞት ተገዢ ሆኖ ነበር። [ዘፍ.2:17 ] በሕይወተ ሥጋ እያለም ኑሮው በጽላሎተ ሞት [በሞት ጥላ ሥር] ውስጥ የወደቀና በሞት ስጋትና ፍርሃት የታጠረ ሲሞትም ነፍሱ በጻዕር ተለይታ ሥጋው ወደ መቃብር ነፍሱ ወደ ሲዖል በመውረድ በጭንቅና በመከራ ይኖር ነበር:: ጌታችንና መድኃኒታችን ኢየሱስ ክርስቶስ ሞት የሚስማማውን የእኛን ሥጋ በመዋሓድ ሞታችንን ሞቶ በሞቱ ሞትን አጠፋልን ፣ የእርሱን ሕይወት ለእኛ ሰጠን ፣ ሞትን በትንሣኤ ለወጠልን የመቃብርን ይዞ የማስቀረትና ሰውነታችንን የማፍረስና የመለወጥ ኃይል ድል በማድረግ በመቃብር ተይዞ ፈርሶ በስብሶ መቅረትን አጠፋልን።

በብሉይ ኪዳን የነበሩ ወገኖቻችን የሚኖሩት በሞት ፍርሃት ውስጥ ነበር፡: ሲሞቱም በጻዕርና በመከራ ነበር:: ነቢዩ ዳዊት ይህን በዚያን ዘመን የነበረውን ፍርሃተ ሞት ሲገልጽ እንዲህ ይላል ፦
" ወደንገጸኒ ልብየ በላዕሌየ ወመጽአኒ ድንጋፄ ሞት ፍርሃት ወረዓድ አኃዘኒ ወደፈነኒ ጽልመት ወእቤ መኑ ይሁበኒ ክንፈ ከመ ርግብ እስርር ወአእርፍ - ልቤ በላዬ ተናወጠብኝ ፣ የሞት ድንጋጤም ወደቀብኝ ፣ ፍርሃትና እንቅጥቅጥ መጡብኝ ፣ ጨለማም ሽፈነኝ ፣ በርሬ ዐርፍ ዘንድ እንደ ርግብ ክንፍን ማን በሰጠኝ?" [መዝ. 54:4-7]

ልበ አምላክ የተባለ ዳዊት በመዝሙሩ እንዲህ አድርጎ የገለጸው በዘመነ ኦሪት ሰው ሁሉ በሞት ፍርሃትና ጭንቀት ውስጥ የነበረ መሆኑን ነው፡፡ ይህን የሰውን ልጅ ሲያስፈራና ሲያስደነግጥ የኖረውን ሞት ከሥሩ ነቅሎ ያጠፋልንና ያስወግድልን ዘንድ ክብር ምስጋና ለዘለዓለሙ ለእርሱ ይሁንና ጌታችንና መድኃኒታችን ኢየሱስ ክርስቶስ ሰው ሆነልን ሐዋርያው “ እርሱ ደግሞ በሞት ላይ ሥልጣን ያለውን በሞት እንዲሽር ፣ ይኸውም ዲያብሎስ ነው ፣ በሕይወታቸውም ሁሉ ስለ ሞት ፍርሃት በባርነት ይታሰሩ የነበሩትን ሁሉ ነፃ እንዲያወጣ በሥጋና በደም እንዲሁ ተካፈለ” እንዳለ። [ ዕብ.2:14-15 ]

ስለሆነም ክርስቶስ በሞቱ ድል ካደረገው ወዲህ ሞት ኃይሉን ያጣ ደካማ የቀድሞ አስፈሪነቱ ቀርቶ በክርስቲያኖች ዘንድ መሳለቂያና ወደማያልፈው ዓለም መሄጃ መንገድ ሆኗል፡፡ ቅዱስ አትናቴዎስ ሐዋርያዊ እንደ ገለጸው በዘመነ ክርስትና ሞት ጥፍሩ እንደ ወለቀ ፣ ጥርሱ እንደ ረገፈና ኃይሉ እንደ ደከመ ፣ ከዚህም የተነሣ የሕፃናት መጫወቻ እንደ ሆነ አንበሳ ፤ እንዲሁም መርዙ እንደ ወጣና ምንም ጉዳት ማድረስ እንደማይችል እባብ ሆኗል፡፡

[ በማክሰኞ መርሐ-ግብር ፦ ]

1 ] ኃጢአት ካመጣው ፍዳ ሁሉ መዳን [ ፫ ]

         †              †             †
▬▬▬▬▬ ▬▬▬ ▬▬▬▬▬