Telegram-канал mezmuredawit - ዜማ ዘቅዱስ ያሬድ: Unsorted

ዜማ ዘቅዱስ ያሬድ

14 March 2023 05:24

በስመ አብ ወወልድ ወመንፈስ ቅዱስ አሐዱ አምላክ አሜን!

🕯 #አቡነ_ገብረ_መንፈስ_ቅዱስ

አቡነ ገብረ መንፈስ ቅዱስ አባቱ ስምዖን እናቱ አቅሌስያ ይባላሉ። በላዕላይ ግብፅ ንሂሳ በተባለች ቦታ ለ30 ዘመን ሲኖሩ ልጅ አልነበራቸውም። ከዚህ በኋላ አቅሌስያ ወደ ቤተ ክርስቲያን ሔዳ ከሥሉስ ቅዱስ ሥዕል ብትማጸን ክብሩ ከሚካኤልና ከገብርኤል፣ ከመጥምቁ ዮሐንስና ከነቢዩ ኤልያስ የሚተካከል ልጅ ተቀበይ አልዋት፤ በዚህም አናብስትን የሚገዛ በአምላኩ ኀይልም አበሳን የሚያስተሰርይ ልጅ መጋቢት 29 ቀን ተፀነሰና በታኅሣሥ 29 ቀን ተወለደ፡፡
ሲወለድም ስሙን ኒኮላዎስ አሉት፡፡ በተወለደም ጊዜ ከእናቱ ዕቅፍ ወርዶ ስብሐት ለአብ፣ ስብሐት ለወልድ፣ ስብሐት ለመንፈስ ቅዱስ እያለ ሦስት ጊዜ አመስግኗል።
ሦስት ዓመት ሲሞላው ቅዱስ ገብርኤል ከሰማይ ወርዶ ከእናቱ ዕቅፍ አንስቶ ወደ እግዚአብሔር ወሰደው፤ ከዚያም ወደ እናቴ ውሰደውና ትባርከው አለው፡፡ ከዚያም ከአዳም ጀምረው አበው ቅዱሳን ባርከውታል፤ ከተባረከ በኋላ ብዙ ባሕታውያን ወደ አሉበት ወስዶ አባ ዘመደ ብርሃን ለሚባል አበ ምኔት እንዲያስተምረው ሰጠው፡፡ እርሱም አንሥቶ አቅፎ ስሞ ወደ በዓቱ በማስገባት በፍቅርና በሥነ ሥርዓት ብሉይና ሐዲስን እያስተማረ አሳደገው፡፡ ከዚያም ዲቁናን ይሰጠው ዘንድ አብርሃም ወደ ሚባል ጳጳስ ወስዶ በማዕርገ ዲቁና ተሾመ፤ እርሱም እንደ ቀዳሜ ሰማዕት እስጢፋኖስ ጸጋና ሞገስን የተሞላ ሆነ። በኋላም ማዕርገ ቅስና ተቀብሎ በጾም፣ በጸሎት፣ በስግደትና በብዙ ትጋት እየተጋደለ ብቻውን በበረሃ መኖር ጀመረ፡፡ ‹‹ነፍስ ሆይ ዕወቂ በእግዚአብሔር ፊት ዕራቁትሽን ትቆሚ ዘንድ አለሽና ታገሺ በርቺ›› ይላት ነበር፡፡

ሥጋው ከአጥንቱ እስከሚጣበቅ ድረስ ያለ መብልና መጠጥ በገድል ተጠምዶ ኖረ፤ ከእንጨት ሥርና ፍሬ ቅጠል ምንም ምን አልተመገበም ለሥጋውም የሚጠቅም ምክንያት አላደረገም፡፡ ‹‹ሰው በእግዚአብሔር ቃል ሁሉ እንጂ በእንጀራ ብቻ አይኖርም›› ሉቃ. 4፥4 እንዲል።
ከብዙ ዘመን በኋላ ጌታችን ተገልጦ ወዳጄ ሆይ ከዛሬ ጀምሮ ሰው እንዲያውቅህ አደረግሁ፤ መላእክት ይጎበኙሃል፤ ወደ ምትፈልገው እንድትበር የብርሃን ሠረገላ ይሁንልህ በፈለግህ ጊዜ በሦስትነቴ ታየኛለህ አለው፡፡ ቀጥሎም ‹‹ወይእዜኒ ሑር ምድረ ኢትዮጵያ በህየኒ ሀለውከ ነፍሳት›› ትርጓሜውም ‹‹አሁንም ወደ ኢትዮጵያ ሒድ በዚያ ከመከራ የምታወጣቸው ነፍሳት አሉህ›› አለው፡፡ ገብረ መንፈስ ቅዱስ በገዳመ ንሂሳ መንኩሶ በግብፅ 300 ዓመት ከኖረ በኋላ በ11ኛው መቶ ክፍለ ዘመን ወደ ኢትዮጵያ በታላቁ ጻድቅ በንጉሥ ላሊበላ ዘመን መጣ፡፡ ጌታችን ገብረ መንፈስ ቅዱስን የሚያገለግሉ ስልሳ አናብስትንና ስልሳ አናምርትን በድምሩ በ120 ቤተሠብ ልክ 120 አድርጎ እንዲከተሉት ሰጠው፤ በዚህም ጊዜ እነዚህን ምን ላብላቸው ብሎ ፈጣሪውን ጠየቀ፤ አንተ የረገጥከውን አቧራ ይልሳሉ ብሎ ጌታ ነገረው፡፡ ወደ ኢትዮጵያ መጥቶ በላሊበላ ቤተ መንግሥት ሮሃ ገባ፤ ላሊበላም የገብረ መንፈስ ቅዱስን መልክ፣ ፀጉርና የአንበሶቹን ጽዳት ቅልጥፍና አይቶ አደነቀ፡፡ አብረው በቤተ መንግሥት ትንሽ ቀን ከቆዩ በኋላ ቅዱስ ገብርኤል በብርሃን ሠረገላ እየመራ አምጥቶ ምድረ ከብድ አደረሳቸው፡፡ ቅዱስ ላሊበላም አብሮ እስከ ምድረ ከብድ ሸኝቶ ተሰናብቶ ሲመለስ አዳዲ ማርያምን አንጾ እንደተመለሰ ተጽፎ ይገኛል፤(ገድለ ቅዱስ ላሊበላ)።
አባታችን ገብረ መንፈስ ቅዱስም አሻግሮ ሲመለከት ምዕራፈ ቅዱሳን በኩረ ገዳማት ዝቋላ ታየው፤ ይህች ቦታ ለእኔ ማረፊያዬ ናት ብሎ ተነስቶ ሔደ፤ ከተራራው ስር ሲደርስ የሀገሩን ሰዎች አገኛቸው፤ እነሱም የአንበሶቹን ሥልጣን እና የገላውን ማማር ሲያዩ እርስ በእርሳቸው ምንድን ነው ይህ ሰው ወይስ መልአክ ነው እያሉ ኦቦ አሉት፤ ጻድቁም ቋንቋቸው ተገልጾለት ለምን ኦቦ (አንተ) ትለኛለህ ሲሉ ታዲያ ማን ልበልህ ሲል ጠየቃቸው ስሜ ኒቆላዎስ ነው አሏቸው፡፡ በዚያ የሰዎችን ኀጢአት ተመልክቶ ወደ ባሕር ገባ፤ ይህን ሕዝብ ካልማርክ ከዚህ ባሕር አልወጣም እያለ 40 ቀንና 40 ሌሊት እንዲህ ሆኖ ኖረ፤ በዚህም ጌታችን መጥቶ ተነስ ውጣ ከባሕሩ አለው፤ ጻድቁም መላውን የኢትዮጵያ ሰዎች ካልማርክልኝ አልወጣም ብሎ በባሕሩ ውስጥ 100 ዓመት ኖረ፡፡ ደሙ ፈስሶ አጥንቱ እንደ በረዶ ነጭ ሆነ፤ አእላፍ አጋንንትም በየቀኑ ከአራቱም ማዕዘን እየመጡ በቀስት ይነድፉታል፣ በሻፎ (ሱፋጭ) ድንጋይም ይፍቁታል፤ እንዲህ እየሆነ ታግሦ ኖረ።
ከዚህ በኋላ ጌታ መጥቶ ሁሉን እምርልሃለሁ ተነስ ብሎ ዳሰሰውና ጤነኛ አደረገው፤ በዚህም ጊዜ ጻድቁ ከተዘቀዘቀበት ባሕር በጥር 5 ቀን ወጥቶአል። ከዚህም በኋላ በተሰጣቸው ሀብተ መብረቅ ከሰይጣን ጋር ሲዋጉ ኑረዋል፡፡ ቦታው ከዋዕዩና ከቆላማነቱ የተነሳ ዝ-ቆላ ‹‹ይህ ቆላማ ቦታ›› በሚል ዝቆላ እየተባለ 260 ዓመት ሙሉ ሲጠራ ከቆየ በኋላ በአሁን ጊዜ ዝቋላ በሚለው ፀንቷል፡፡ ከዚያም ወደ ምድረ ከብድ ተላከ፡፡ በዚያም እንደ ተተከለ ዐምድ ሆኖ ዓይኖቹን ሳይከድን ወደ ሰማይ እየተመለከተ ሰባት ዓመት ሲጸልይ ሰይጣን በቁራ ተመስሎ መጣ፤ ዐይኖቹም ወደ ሰማይ ተንጋጠው አገኘ፤ በራሱም ላይ ተቀምጦ ሁለት ዓይኑን አንቁሮ አሳወረው፡፡ በዚህ ጊዜ ሚካኤልና ገብርኤል መጥተው በፊቱ እፍ ብለው ዓይኑን አበሩለትና ጠላቶችህን እንድትበቀል ኀይል ተሰጥቶሃልና ወደ ዝቋላ ሒድ አሉት፡፡ ከዚያ ወደ ዝቋላ ሲሔድ በመንገድ ሦስት አረጋውያንን አይቶ ልደበቃቸው ብሎ በልቡ ሲያስብ በጀርባህ እያዘልህ አንድ አንድ ምዕራፍ ሸኘን እያሉ ጠሩት። ከዚያም አንዱን አዝሎ አንድ ምዕራፍ አደረሰው፤ ከዚያም ሁለቱን እንዲሁ አደረገ። በዚያ ጊዜ በአንድነትና በሦስትነት እንደ አብርሃም ሥላሴ ተገልጠውለት ፊታቸው እንደ መብረቅ ተንቦገቦገ፤ ጻድቁም በምስጢር ጎርፍ ተዋጠና ደነገጠ፡፡ ከዚያም በባሕር ሳለ ያሰቃዩት አጋንንት ወደ አሉበት በመብረቅ እየበረረ ሔደ፤ ቅዱሳን መላእክትም አጋንንቱን መተሯቸውና አመድ ሆነው ተበተኑ።
አባ ሳሙኤል ዘዋልድባ፣ አባ አንበስ ዘአዘሎ እና አባ ብንያም ዘምድረ ግብፅ የተባሉት ቅዱሳን ተነስተው በአንበሳ ተጭነው ከገብረ መንፈስ ቅዱስ ዘንድ ዝቋላ ሔዱ፤ እንደደረሱም የገብረ መንፈስ ቅዱስ አናብስት የሦስቱንም ቅዱሳን አናብስት ዋጡአቸው፡፡ በዚህ አዝነው ሳሉ ገብረ መንፈስ ቅዱስ በሚያስፈራ ግርማው ከበዓቱ ወጣ፤ በዚህ ጊዜ ቅዱሳኑ የሆነውን ነገሩት፤ እጁን ሲፀፋ ስልሳውም አናብስት መጡ፤ በሉ ትፉ ለምን የሰውን አናብስት በላችሁ አሏቸው። አናብስቱም አናብስቱን ተፉአቸው፤ ይህ የሆነው በጥቅምት 5 ቀን ነው፡፡ ገብረ መንፈስ ቅዱስ ለ62 ዓመት ተዘዋውሮ ሰብኳል፤ ጌታችንም ወዳጄ ገብረ አብ፣ ገብረ ወልድ፣ ገብረ መንፈስ ቅዱስ ፍቁርዬ ይለዋል።
በዚያችም ጎዳና አንድ ንጉሥ አየውና አንተ ጠጉር ለባሽ ምንድን ነህ? አለው፤ እርሱም የክርስቶስ ባሪያ ነኝ አለው፤ ንጉሡም አይሁድ በሰቀሉት ታምናለህ? አለው፤ አምንበታለሁ ስለ እኔ ብቻ የተሰቀለ አይምሰልህ ለአንተና ከአንተ ጋራ ላሉት ሁሉ ነው፤ እመንበት አለው፡፡ በዚህ ጊዜ ንጉሡ ተቆጥቶ እሳት አንድደው ጻድቁን እንዲጨምሩት አዘዘ፡፡ ጻድቁም እያዩት በፈቃዱ ከእሳቱ ውስጥ ገባ፤ አሳቱም ውሃ ሆነ፡፡ ሰራዊቱም ተደንቀው እኩሌቶቹ አመኑ፤ ንጉሡ ግን ተቆጥቶ ያመኑትን በሰይፍ አሰይፏቸው በሰማዕትነት ሞቱ፡፡ ከዚያም ሰይፉን መዞ ሊመታው ተወርውሮ ሲሔድ መብረቅና ነጎድጓድ መጥቶ እስከ ሠራዊቱ አጠፋው፡፡ ጻድቁም የሞቱትን ሰዎች ነፍሳቸውን መላእክተ ጽልመት