Telegram-канал konyqodwaa - 💕 كـونـي قـدوة 💕: Unsorted

💕 كـونـي قـدوة 💕

03 January 2021 05:22

تصحيح عقدي خطير:👇👇👇
الجملة دي اتقالت في مسلسل #الاختيار :
"أعظم حاجة ربنا خلقها هي القرءان"
"وهي جملة لا تجوز مطلقا.

عشان الناس تفهم وتعرف إيه هي #عقيدة_أهل_السُنة_والجماعة -اللي هما احنا المسلمين يعني- ((القرءان كلام الله غير مخلوق)).

هو يعنى إيه #مخلوق؟!
مخلوق بكل بساطة يعني زيه زي أي مخلوق، به من العيوب والنقص..
يعني يجوز عليه ما يجوز على كل مخلوق من القِدم والحداثة والتطوير والاكتساب والموت والحياة والمناسبة الفكرية لزمان على غير زمان، والهدم للتصور الفكري بظهور فكر جديد على كل العصور،

وبرضه ما ينفعش تستعيذ بالقرءان لو هو مخلوق لأنه لا يجوز الاستعانة ولا الاستعاذة بالمخلوق ..
وأيضا إثبات أن القراءن مخلوق فيه تعطيل لصفة الكلام لرب العالمين ،،
إيه ده هو ربنا بيتكلم؟
نعم وهيكلمنا يوم القيامة، والقرءان من كلامه، وقال تعالى:"وكلم الله موسى تكليما".
..
طيب أنا مش فاهم الدليل فين؟
هقولهولك وباختصار
بدون الخوض في التفاصيل لأنها كتيرة وانا عايز ابسطلك المعلومة واختصرهالك لأن فيها كلااااام كتيييير.

ربنا فرّق بين الخلق والأمر
قال تعالى:"ألا له الخلق والأمر". سورة الأعراف.

إذن الخلق شيء، والأمر اللي هو #القرءان الذي هو من كلامه جل جلاله شيء آخر.

عشان كدة ربنا قال لسيدنا النبي ﷺ
"وكذلك أوحينا إليك روحا من أمرنا" سورة الشورى... اللي هو القرءان.
..
كمان ربنا قال: "الرحمن، علم القرءان، خلق الإنسان"
فتعليم القرءان شيء والخلق شيء.
..
ومن السُنة سيدنا النبي ﷺ قال :
«فَضْل كلام الله على سائر الكلام كفضل الله على سائر خلقه».
فلو كان كلام الله مخلوقاً لم يكن فضل ما بينه وبين سائر الكلام كفضل الله على خلقه.
..
الخلاصة ..
دي الفتنة اللي ثبت فيها الإمام #أحمد_بن_حنبل -رحمه الله- إمام أهل السنة والجماعة، وجُلد فيها وضُرب وسُجن، ووقع فيها كثير من الناس ولم يصبر على الاذى فيها كثير من أهل العلم.

شوف أهل العلم بيقولوا ايه في المسألة الخطيرة دي:👇👇😯

ذكر الإمام اللالكائي المتوفى 418هـ
(وهو إمام من أئمة أهل السنة )

ذكر مقالة السلف الصالح: أن القرآن كلام الله غير مخلوق، وأن من قال بخلقه فهو كافر، وأسندها إلى خمس مائة وخمسين إماماً، سوى الصحابة الأخيار - رضي الله عنهم - ثم قال:
(ولو اشتغلتُ بنقل قول المحدِّثين لبلغتْ أسماؤهم ألوفاً كثيرة)!!

متخيل ٥٥٠ من أئمة أهل السنة،، ويطلع لك واحد زي إسلام بحيري اللي بالمناسبة فرحان جدا باللي حصل في المسلسل الحلقة السابقة تحديدا عشان الكلام ده وعشان إقحام إمام أهل السنة وشيخها شيخ الإسلام #ابن_تيمية رحمه الله في موضوع التكفير والقتل والحرق! وشيخ الإسلام منه براء وليس ذنبه أن يفهم الناس فتاواه خطأ!
..
-حد هيقولي وإيه الفايدة من كل الكلام ده؟!

1-الفايدة ترسيخ مبدأ "إن القرءان كلام الله غير مخلوق".
وان دي عقيدة -لابد وواجب وحتما- على كل مسلم أن يعرفها ويعتنقها ويُعلمها إخوانه وأهله.
2-احترام كلام أهل العلم والعلماء.
3-تعليم ذلك لأبنائنا وأولادنا ونشره في جميع وسائل التواصل.
4-التحذير والانتباه من السموم التي ينشرها العلمانيون.

أخيرًا
أرجو منكم مشاركة المعنى عشان الناس تفهم ..

"القرآن كلام الله غير مخلوق منه بدأ وإليه يعود أنزله الله تعالى على نبينا محمد بواسطة أمين الوحي جبريل عليه السلام "
علموا الكلام ده لأوالدكم وانشروه
مش هيحصل حاجة لو نشرت البوست..