567148
ရန်ကုန်ခေတ်သစ်သတင်းဌာနသည် ၂၀၁၈ ခုနှစ်၊ ဇန်နဝါရီလ ၁ ရက်နေ့တွင် စတင်ထူထောင်ခဲ့သော သတင်းဌာနဖြစ်ပါသည်။ https://yktnews.com/
မတ္တရာမြို့နယ် မြွေပုသိမ်ရွာနှင့် မြိုင်မြို့နယ် ဝက်ပုတ်ရွာကို စစ်တပ် စစ်ကြောင်းက မီးရှို့ဖျက်ဆီးနေ
ရန်ကုန်၊ ဒီဇင်ဘာ ၂၅
မန္တလေးတိုင်း၊ မတ္တရာမြို့နယ်၊ မြွေပုသိမ်ရွာကို အကြမ်းဖက် စစ်တပ်က မီးရှို့ဖျက်ဆီးနေကြောင်း Voice Of Mandalay အဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ယနေ့ ဒီဇင်ဘာလ ၂၅ ရက်နေ့ မွန်းလွဲပိုင်းတွင် မတ္တရာမြို့နယ်အတွင်း စစ်ကြောင်းထိုးနေသည့် အကြမ်းဖက် စစ်တပ်က တိုက်ပွဲဖြစ်ပွားချင်းမရှိသေးဘဲ ပြည်သူပိုင် နေအိမ်များကို မီးရှို့ဖျက်ဆီးနေခြင်းဖြစ်ကြောင်း သိရသည်။
လက်ရှိချိန်ထိ ကျေးရွာအတွင်း ပျက်စီးမှု အခြေအနေနှင့် ပြည်သူများ ထိခိုက်မှု ရှိမရှိကို အတည်ပြုနိုင်ခြင်းမရှိသေးဘဲ အကြမ်းဖက် စစ်တပ်က ပြည်သူပိုင် နေအိမ်များကို ဆက်တိုက် မီးရှို့နေကြောင်း သိရှိရသည်။
"မြွေပုသိမ်ရွာကို တိုက်ပွဲ ဖြစ်ပွားခြင်းမရှိဘဲ စစ်ခွေးတွေ ဆက်တိုက် မီးရှို့နေတယ်။ ရွာထဲ အခြေအနေနဲ့ ပြည်သူတွေ ထိခိုက်မှု အခြေအနေကိုတော့ ဆက်လက် စုံစမ်းနေတယ်" ဟု Voice Of Mandalay အဖွဲ့မှ တာဝန်ရှိသူ တစ်ဦးက ပြောဆိုသည်။
အလားတူ မကွေးတိုင်း၊ မြိုင်မြို့နယ်၊ ဝက်ပုတ်ရွာကိုလည်း အကြမ်းဖက် စစ်တပ် မီးရှို့ဖျက်ဆီးနေကြောင်း We Love Myaing အဖွဲ့က ပြောဆိုသည်။
ယနေ့ ဒီဇင်ဘာလ ၂၅ ရက်နေ့ နံနက် ၁၀ နာရီခန့်တွင် မြိုင်မြို့နယ် တောင်ပိုင်း စက်မှု ၂ မှ ထွက်လာသော အင်အား ၈၀ ခန့်ပါ အကြမ်းဖက် စစ်တပ် စစ်ကြောင်းသည် ဝက်ပုတ်ရွာကို သေနတ်များ ပစ်ဖောက်ကာ ဝင်ရောက် စီးနင်းခဲ့ခြင်းဖြစ်ကြောင်း သိရသည်။
ထိုသို့ ဝင်ရောက် စီးနင်းပြီးနောက် အကြမ်းဖက် စစ်ကောင်စီ တပ်သားများက ပြည်သူပိုင် နေအိမ်များကို ဆက်တိုက် မီးရှို့ဖျက်ဆီးနေခြင်းဖြစ်ပြီး ကျေးရွာအတွင်း ပျက်စီးဆုံးရှုံးမှု အခြေအနေနှင့် ပြည်သူများ ထိခိုက်မှု အခြေအနေကို အတည်ပြုနိုင်ခြင်း မရှိသေးကြောင်း သိရှိရသည်။
Photo - စစ်ကိုင်းတိုင်း အတွင်းရှိ ကျေးရွာတစ်ရွာကို စစ်တပ်က မီးရှို့ဖျက်ဆီးနေစဉ် (ပုံအဟောင်းဖြစ်သည်)
စစ်ကိုင်းမြို့ဘက်မှ မုံရွာမြို့သို့ ဆင်းလာသည့် သံပြားကာ စစ်ယာဉ်တန်းကို မိုင်းဆွဲတိုက်ခိုက်မှု စစ်သားများ ထိခိုက်မှုရှိပြီး ခင်မွန်ရွာရှိ ရွှေမြရ်မိုဆေးရုံတွင် ဆေးကုသမှု ခံယူနေ
ရန်ကုန်၊ ဒီဇင်ဘာ ၂၅
စစ်ကိုင်းတိုင်း၊ စစ်ကိုင်းမြို့ဘက်မှ မုံရွာမြို့ကို ဆင်းလာသည့် သံပြားကာ အကြမ်းဖက် စစ်တပ် ယာဉ်တန်းကို မိုင်းဆွဲ တိုက်ခိုက်ရာ စစ်သားများ ထိခိုက်မှုရှိပြီး ခင်မွန်ရွာရှိ ရွှေမြရ်မိုဆေးရုံတွင် ဆေးကုသမှု ခံယူနေရကြောင်း BLDF တပ်ခွဲ အညာမိုင်းအဖွဲ့မှ တာဝန်ရှိသူတစ်ဦးက ရန်ကုန်ခေတ်သစ် သတင်းဌာနထံသို့ပြောဆိုသည်။
ဒီဇင်ဘာလ ၂၃ ရက်နေ့ မွန်းလွဲ ၂ နာရီ ၃၀ မိနစ်ခန့်တွင် စစ်ကိုင်းမြို့ ဘက်မှ မုံရွာမြို့ကို မန္တလေး-မုံရွာ လမ်းပိုင်း အတိုင်းဆင်းလာသည့်အကြမ်းဖက် စစ်တပ်၏ သံပြားကာကား ၆ စီးပါ ယာဥ်တန်းကို ချောင်းဦးမြို့နယ် ပြည်သူကာကွယ်ရေး တပ်ဖွဲ့ BLDF တပ်ခွဲ အညာမိုင်း တပ်ဖွဲ့က ခင်မွန်ကျေးရွာ ရွှေတိုးနိုင်ဆီဆိုင်တောင် ဘက်တွင် မိုင်းဆွဲ တိုက်ခိုက်ခဲ့ကြောင်း သိရသည်။
ထို တိုက်ခိုက်မှုတွင် အကြမ်းဖက် စစ်သားများ ထိခိုက်ဒဏ်ရာရရှိမှုရှိပြီး ခင်မွန်ရွာရှိ ရွှေမြရ်မိုဆေးရုံတွင် ဒဏ်ရာရ စစ်သားများ ဆေးကုသမှုခံယူနေရပြီး ဆေးကုသပြီးနောက် မုံရွာ အနောက်မြောက်တိုင်းစစ်ဌာနချုပ်သို့ ပြန်လည် ခေါ်ဆောင်သွားကြောင်းသိရသည်။
"စစ်ခွေးသေစာရင်းကတော့ မသိရသေးပါဘူး။ စစ်ခွေးတွေဘက်ကတော့ ပြန်လည်ပစ်ခတ်မှုရှိပါတယ်။ ပစ်တာကတော့တော်တော်ပစ်ပါတယ်။ ကျန်တော်တို့ ရဲဘော်တွေ အထိအခိုက်မရှိ ဆုတ်ခွာနိုင်ခဲ့တယ်" ဟု BLDF တပ်ခွဲ အညာမိုင်းအဖွဲ့ မှ တာဝန်ရှိသူတစ်ဦးကပြောဆိုသည်။
AA နှင့် KIA ၏ တိုက်ခိုက်မှုကြောင့် စစ်သင်္ဘော ၁၇ စီး ပျက်စီးသွားပြီးနောက် အကြီးဆုံးဖရီးဂိတ်စစ်ရေယာဉ်ကို ရေချလိုက်ပြီး ပြည်တွင်း၊ ပြည်ပရန်ကို နှိမ်နင်းနိုင်စေရန် သာလွန်မင်းဟု စစ်သင်္ဘောကို မင်းအောင်လှိုင်က နာမည်ပေး
ရန်ကုန် ၊ ဒီဇင်ဘာ ၂၅
ရခိုင်ပြည်နယ်၊ မြို့နယ် အတော်တော်များများ ကိုလက်လွှတ်ထားတဲ့ ရတဲ့ စစ်ကောင်စီက ရေတပ်မှာ အသုံးပြုဖို့ အကြီးဆုံးဖရီးဂိတ်စစ်ရေယာဉ်တစ်စင်း ရေချခဲ့တယ်လို့ စစ်တပ် မီဒီယာတွေက ပြောပါတယ်။
အဲ့ဒီရေယာဉ်ကို "သာလွန်မင်း"လို့ အမည်ပေးထားပြီး အလျား(၁၃၅)မီတာရှိ ကာဒီဇင်ဘာ လ ၂၄ ရက်မှာ မင်းအောင်လှိုင် ကိုယ်တိုင်ရေချအခမ်းအနား တက်ရောက်ခဲ့တယ်လို့ သိရှိရပါတယ်။
သာလွန်မင်း"လို့အမည်ပေးထား ဖရီးဂိတ်စစ်ရေယာဉ် ရေချပွဲ အခမ်းအနားကို ရန်ကုန်တိုင်း၊ သန်လျင်တပ်နယ်ရှိ ရေတပ်သင်္ဘောကျင်းဌာနချုပ်မှာ ကျင်းပခဲ့တယ်လို့ သိရှိရပါတယ်။
အဲ့ဒီစစ်ယာဉ်ကို ပြည်တွင်းရန်နှိမ်နင်းဖို့ ၊ ပြည်ပရန်ကာကွယ် ဖို့ နဲ့ သာလွန်မင်းကို ဂုဏ်ပြုတဲ့ အနေနဲ့ စစ်ကောင်စီရေတပ်က တည်ဆောက်ထားတာလို့ သတင်းထုတ်ပြန်ချက်တွေမှာဖော်ပြထားပါတယ်။
လက်ရှိမှာ ရခိုင်ကမ်းရိုးတန်းက မြို့နယ် အများအပြားကို လက်လွှတ်ထားရချိန် မှာ စစ်ကောင်စီ က ခုလိုရေတပ်စစ်ရေယာဉ် ရေချပွဲပြုလုပ်လာတာ ဖြစ်ပါတယ်။
အကြမ်းဖက်စစ်ကောင်စီတပ်ရဲ့ စစ်သင်္ဘော ၁၇ စီးထက်မနည်းကို AA နဲ့ KIA ဦးဆောင်တဲ့ တော်လှန်ရေးတပ်တွေက ဖျက်ဆီး ရှင်းလင်းထားနိုင်နေပြီဖြစ်ပါတယ်။
အကြမ်းဖက်စစ်ကောင်စီတပ်ရဲ့ စစ်သင်္ဘော ၈ စီးကို KIA က တိုက်ခိုက် ဖျက်ဆီးခဲ့ပြီး စက်တင်ဘာလ ၁၇ ရက်နေ့ နံနက်ပိုင်း ကချင်ပြည်နယ်၊ ရွှေကူမြို့မှ ဗန်းမော်ကို ဆန်တက်လာတဲ့ စစ်ကောင်စီသင်္ဘော ၇ စီးကို KIA နှင့် PDF ပူးပေါင်းတပ်တွေက တိုက်ခိုက်ခဲ့ရာ သင်္ဘော ၂ စီးမှာ နစ်မြုပ်ပြီး ၄ စီးမှာ မီးလောင်ပျက်စီးသွားခဲ့ပါတယ်။ ဒ့ါအပြင် စစ်ကိုင်းတိုင်း ထီးချိုင်မြို့နယ် မြတောင်တွင်လည်း စစ်သင်္ဘော ၂ စီးကိုလည်း ပစ်ခတ်ဖျက်ဆီးသိမ်းပိုက်ခဲ့ပါတယ်။
ဒီအပြင် ရခိုင်တပ်တော် AA ကလည်း ဒီနှစ် ဖေဖော်ဝါရီ ၇ ရက်မှ ၁၃ ရက်နေ့အထိ၊ ၆ ရက်တာ ရေကြောင်းတိုက်ပွဲတွေအတွင်း စစ်ကောင်စီရဲ့ စစ် သင်္ဘော ၃ စီး နှင့် ဇက်သင်္ဘော ၂ စီး စုစုပေါင်း ၅ စီးကို ရက္ခိုင့်တပ်တော်က တိုက်ခိုက် ချေမှုန်းနိုင်ခဲ့ကြောင်း၊ ထို့အတူ အခြားသော စစ်သင်္ဘော ၄ စီးမှာ လည်း ရေချ၍ မရနိုင်သည်အထိ ပျက်စီးသွားခဲ့တယ်လို့ AA ရဲ့ ထုတ်ပြန်ပြောဆိုချက်အရ သိရပါတယ်။
ရွှေဘိုမြို့နယ်တွင် ဆန်နှင့် စက်သုံးဆီ သယ်ယူမှုများကို စစ်တပ်က မတရားငွေကြေးကောက်ခံနေ၍ ပြည်သူများအခက်တွေ့ ၊ မြစ်ကြီးနားသို့ ဆန်နှင့်စက်သုံးဆီသယ်ယူလျှင် ဖမ်းဆီးမည်ဟု စစ်တပ်က ခြိမ်းခြောက်
ရန်ကုန်၊ ဒီဇင်ဘာ ၂၅
စစ်ကိုင်းတိုင်း ရွှေဘိုမြို့နယ်အတွင်း အကြမ်းဖက်စစ်တပ်က ဆန်စပါးနှင့်စက်သုံးဆီသယ်ယူခွင့်ကို ပိုမို တင်းကျပ်ထားပြီး ဆန်နှင့်စက်သုံးဆီ သယ်ယူလျှင် စစ်တပ် ဂိတ်တိုင်းက အနည်းဆုံး ကျပ် ၂၀၀၀၀ မှ အများဆုံး ကျပ် သိန်း ၂၀ အထိ တောင်းခံနေသဖြင့် ပြည်သူများ အခက်တွေ့နေကြောင်း ဒေသပြည်သူများက ရန်ကုန်ခေတ်သစ်သတင်းဌာနသို့ ပြောကြားသည်။
အကြမ်းဖက်စစ်တပ်၏ ဂိတ်များဖြစ်သည့် ဇီးကုန်းဂိတ်၊ ကန်တော်ဂိတ်၊ အမှတ် ၂ ကျောင်းဂိတ်၊ ကိုးပင်ဂိတ်၊ မင်းကျောင်းဂိတ်၊ မန်းလေးအဝင်ရွှေဘိုတောင်မုဒ်ဂိတ်၊ မင်းကုန်းဂိတ်နှင့် ဆိပ်ခွန်ဂိတ်တို့မှ အကြမ်းဖက်စစ်သားများသည် ကုန်စည်သယ်ယူခွင့် ပြေစာပါလျှင် ကျပ် ၂၀၀၀၀ တောင်းပြီး ပြေစာ မပါလျှင် ကျပ် ၅၀၀၀၀ တောင်းခံနေကြောင်း၊ ဆန်မှာမူ သယ်ယူခွင့် ပြေစာ မပါလျှင် လုံးဝ သယ်ခွင့် မပေးကြောင်း ဒေသပြည်သူများက ပြောကြားသည်။
“ဒီနှစ် စပါးသယ်ရတာ တော်တော်ကျပ်တယ် ။ ဘယ်က သယ်လာတာလဲ ဘယ်ပို့မှာလဲလို့ မေးတယ် ။ ငွေကတော့ ပြေစာပါပါ မပါပါ ပေးရတာပဲ။ စပါးထက် ဆန်သယ်ယူတာကို ပိုမိုတင်းကျပ်တယ်” ဟု ဒေသပြည်သူတစ်ဦးက ရန်ကုန်ခေတ်သစ်သတင်းဌာနသို့ ပြောကြားသည်။
ထို့ပြင် ရွှေဘို-မြစ်ကြီးနားလမ်း၊ ကိုးပင်ဂိတ်တွင်မူ မြစ်ကြီးနားသို့ ဆန်နှင့် စက်သုံးဆီသယ်ယူခွင့်မပေးဘဲ ဆန်နှင့် စက်သုံးဆီ ပါလာသူများကို ဖမ်းဆီးမည်ဖြစ်ကြောင်း၊ ဆန်နှင့်ဆီသယ်ယူသူများအနေဖြင့် အဖမ်းခံရမည်စိုး၍ ပစ္စည်းများ ထားခဲ့ရပြီး ဒဏ်ငွေအဖြစ် ကျပ် ၅ သိန်းမှ ၁၀ သိန်းအထိ စစ်တပ်ကို ပေးရကြောင်း ကုန်သည်များက ရန်ကုန်ခေတ်သစ်သတင်းဌာနသို့ ပြောကြားသည်။
လက်ရှိတွင် မြစ်ကြီးနားမြို့တွင် ဓာတ်ဆီ ၁ လီတာ ကျပ် တစ်သောင်းခွဲအထိ မှောင်ခိုဈေးကွက်တွင် ပေါက်နေကြောင်း၊ထို့ပြင် စစ်ကိုင်းနှာပေါက် အကြမ်းစစ်တပ်ဂိတ်နှင့် ရွှေဘိုမြို့နယ် အကြမ်းဖက်စစ်တပ်ဂိတ်များက စက်သုံးဆီသယ်သည့် ဆီဘောက်ဆာကားနှင့် တွဲကားများကို ကားတစ်စီးလျှင် ကျပ် ၁၅ သိန်းမှ သိန်း ၂၀ ထိတောင်းယူနေပြီး ကားအသေးနှင့် ကုန်ကားများ၊ ထော်လာဂျီများပေါ်တွင် တင်လာသည့် စက်သုံးဆီပေပါတစ်လုံးလျှင် ကျပ် ၅သောင်း တောင်းခံနေကြောင်း ကုန်သည်များက ပြောဆိုကြသည်။
ဓာတ်ပုံ - ရွှေဘိုတွင် အကြမ်းဖက် စစ်ကောင်စီလက်အောက်ခံ ရဲများက စစ်ဆေးမှုများ လုပ်ဆောင်နေစဉ်။ (ပုံအဟောင်းဖြစ်ပါသည်။)
အနောက်ပိုင်းတိုင်းစစ်ဌာနချုပ်ကို သိမ်းပိုက်နိုင်မှုနှင့် AA၏ နိုင်ငံရေးအမြင်ကို ပအိုဝ်းနှင့် မွန်တိုင်းရင်းသားအဖွဲ့ ၄ ခုက ဂုဏ်ယူဟု ထုတ်ပြန်
ရန်ကုန်| ဒီဇင်ဘာ ၂၅
ဗမာအပါအဝင် ဘဝတူ အဖိနှိပ်ခံ တိုင်းရင်းသားလူမျိုးများအားလုံးကို လွတ်မြောက်ရေး အတွက် တိုက်ပွဲဝင်နေသော အာရက္ခတပ်တော် AA ၏ နိုင်ငံရေးအမြင်ကို ပအိုဝ်းနှင့် မွန်အဖွဲ့အစည်း ၄ ခုက ချီးမွမ်းဂုဏ်ပြုကြောင်း ပြောဆိုကြသည်။
ပအိုဝ်းနှင့် မွန်လူမျိုးတို့၏ လက်နက်ကိုင်အဖွဲ့များဖြစ်သော ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLO)၊ ပအိုဝ်းအမျိုးသားဖက်ရယ်ကောင်စီ (PNFC) ၊ မွန်ပြည်သစ်ပါတီ-စစ်အာအာရှင်ဆန့်ကျင်ရေး (NMSP-AD)နှင့် မွန်ပြည်ဖက်ဒရယ်ကောင်စီ (MSFC) တို့က ယနေ့ ဒီဇင်ဘာလ ၂၅ ရက်နေ့ သဝဏ်လွှာပေးပို့ ဂုဏ်ပြုခဲ့ခြင်းဖြစ်သည်။
အနောက်ပိုင်းတိုင်းစစ်ဌာနချုပ် (နပခ) အား သိမ်းပိုက်နိုင်ခြင်းနှင့်အတူ မကြာမီကာလတွင် ရက္ခိုင်တစ်ပြည်လုံးရှိ စစ်ကောင်စီတပ်များ ကင်းစင်ပပျောက်သွားအောင် အာရက္ခတပ်တော် (AA) ၏ ဆက်လက်တိုက်ပွဲဝင်မှုနှင့် ရဲစွမ်းသတ္တိကို ဂုဏ်ပြုပါကြောင်း သဝဏ်လွှာတွင် ပြောဆိုထားသည်။
စစ်အာဏာရှင်စနစ်အောက်မှ ပထမဦးဆုံးလွတ်မြောက်မည့် ရက္ခိုင်ပြည်၏ အလားအလာကောင်း များနှင့်အတူ ရက္ခိုင်ပြည်လွတ်မြောက်ရေးတွင် သာရပ်တန့်မနေဘဲ တစ်နိုင်ငံလုံးရှိ ဗမာအပါအဝင် ဘဝတူ အဖိနှိပ်ခံ တိုင်ရင်းသားလူမျိုး အသီးသီး၏လွတ်မြောက်ရေးတိုက်ပွဲများနှင့် အပြန်အလှန်ဆက်စပ်၍ ပြည်သူ လူထုတစ်ရပ်လုံး အဖိနှိပ်ခံဘဝမှ လွတ်မြောက်ရေးအတွက် ULA/AA က နိုင်ငံရေးအမြင်ကျယ်စွာဖြင့် ပူးပေါင်းဆောင်ရွက်နေသည်ကိုလည်း အထူးပင်ဂုဏ်ယူရကြောင်း အဆိုပါ အဖွဲ့များက ဆိုသည်။
မွန်ပြည်ဖက်ဒရယ်ကောင်စီ (MSFC) မှ ပြောခွင့်ရ နိုင်မွန်ဆိုင်းက "AA ရဲ့ ခေါင်းဆောင်တွေက သူတို့ရခိုင် ဒေသတစ်ခုတည်းနဲ့ လွတ်မြောက်ရုံနဲ့ မလုံလောက်ဘူးပေါ့နော်။ မလုံလောက်ဘူး။ ကျနော်တို့ တစ်နိုင်ငံလုံး စစ်အာဏာရှင်စနစ်အောက်ကနေ လွတ်မြောက်မှသာလျှင် လွတ်မြောက်မှု အစစ်အမှန်ကို ရမယ်ပေါ့နော်။ ဒါကို သူတို့ပြောထားတယ်။ ဒါ့ကြောင့် AA ရဲ့ လက်ရှိ အောင်ပွဲပေါ့နော် ဒီအောင်ပွဲက သူတို့ရဲ့ အောင်ပွဲဖြစ်သလို တိုင်းရင်းသားပြည်သူလူထုရဲ့ အောင်ပွဲလည်း ဖြစ်တယ်ဆိုတဲ့အကြောင်း ပြောထားတာ ကျနော်တို့ တွေ့ရပါတယ်။ AA ရဲ့ ခေါင်းဆောင်တွေရဲ့ မိန်းခွန်းမှာလည်း ထည့်ပြောထားတာတွေရှိတယ်။ ဒါက အထူးချီးမွမ်းဖို့ ကောင်းတာပေါ့နော်။ အထူးချီးကျူးဖို့ ကောင်းတယ်" ဟု ပြောသည်။
ဆက်လက်၍ "ဘာလို့ဆိုတော့ ကျနော်တို့ တိုင်းရင်းသားလူမျိုးပေါင်းစုံ တိုက်ပွဲဝင်နေတဲ့အချိန်မှာ ကိုယ်ရဲ့ဒေသ ကိုယ့်ရဲ့တိုက်ပွဲနဲ့ကိုယ်က ကိုယ့်ရဲ့ လှုပ်ရှားမှုတွေ၊ ကိုယ့်ရဲ့တော်လှန်ရေး လုပ်နေကြတယ်ဆိုသော်ငြားလည်း တစ်ဖက်နဲ့တစ်ဖက် ဒီ ဘာလဲ ဒီစိတ်ဓာတ်ရေးရာအရ ပြောဆိုမှုတွေ၊ ကူညီမှုတွေတွေ့ရတယ်။ နောက် သိတဲ့အတိုင်းပဲပေါ့နော် ဒီ ညီနောင်မဟာမိတ် သုံးဖွဲ့ဟာလည်း တခြားသော တော်လှန်ရေးအင်အားစုတွေ အထူးသဖြင့် နွေဦးတော်လှန်ရေး အင်အားစုတွေကို အာဏာသိမ်းပြီးကတည်းက ကူညီထောက်ပံ့တာ အပြည့်အဝ လုပ်ဆောင်ပေးခဲ့တယ်။ ဒါတွေကို ကြည့်ခြင်းအားဖြင့် သူတို့ အခုလက်ရှိတိုက်နေတာက သူတို့ဒေသတစ်ခုတည်းအတွက် လွတ်မြောက်ရေး မဟုတ်ဘဲနဲ့ တစ်နိုင်ငံလုံး တစ်ပြည်လုံး တစ်တိုင်းပြည်လုံး လွတ်မြောက်ရေးအတွက် ကြိုးပမ်းနေတယ်ဆိုတာ ကျနော် ဒီ ၃ နှစ်တာကာလ တော်လှန်ရေးအတွင်းမှာတော့ ကျနော်တို့ ထင်ထင်ရှားရှား တွေ့ရတယ်။ ဒါကြောင့် သူတို့ရဲ့ လုပ်ဆောင်ချက်တွေကို ချီးမွမ်းခြင်းဖြစ်ပါတယ်” ဟု ပြောသည်။
MNTJP/MNDAA, PSLF/TNLA နှင့် ULA/AA ညီနောင်မဟာမိတ် ၃ ဖွဲ့၏ ၂၀၂၃ ခုနှစ် ဇန်နဝါရီလ ၁ ရက်နေ့ နှစ်သစ်ကူးကြေညာချက်တွင် “မိမိတို့အားလုံးနှင့် မြန်မာပြည်သူတစ်ရပ်လုံး မျှော်မှန်းထားသော ဘုံရည်မှန်းချက်များ ပြည့်ဝစေရန်၊ လက်ရှိအခြေအနေကို အကောင်းဆုံး ကျော်လွှားနိုင်ရန်နှင့် စစ်အာဏာရှင် စနစ်ကို တိုက်ထုတ်နိုင်ရန်အတွက် လုပ်သင့်လုပ်ထိုက်သည်များကို ဆက်လက်လုပ်ဆောင်သွားမည် ဖြစ်ကြောင်း" ဖော်ပြခဲ့ပါသည်။
ထိုဖော်ပြချက်နှင့်အညီ ပြည်ထောင်စုတဝန်းလုံးတွင် ၁၀၂၇ စစ်ဆင်ရေး ပထမလှိုင်း၊ ဒုတိယလှိုင်းလုံးများနှင့်အတူ လူထုတော်လှန်ရေး၏ အောင်ပွဲအဆင့်ဆင့်ကို ရရှိခဲ့ပြီး စစ်အုပ်စု၏ ရှုံးနှိမ့်မှုများကိုလည်း ပီပီပြင်ပြင် တွေ့မြင်နေရပြီးဖြစ်ကြောင်း သဝဏ်လွှာတွင် ဖော်ပြထားသည်။
မွန်နှင့် ပအိုဝ်းတို့အနေဖြင့်လည်း “တစိတ်တပိုင်း လွတ်မြောက်ရုံဖြင့် အားလုံးမလွတ်မြောက်နိုင်၊ အားလုံး လွတ်မြောက်မှသာ လွတ်မြောက်မှုအစစ်အမှန်ကို အပြည့်အဝ ရရှိမည်၊ ယခုအောင်ပွဲသည် ရက္ခိုင်ပြည်သူတို့၏ အောင်ပွဲဖြစ်သကဲ့သို့ တိုင်းရင်းသားလူမျိုးပေါင်းစုံ ပြည်သူလူထု တစ်ရပ်လုံး၏ အောင်ပွဲလည်းဖြစ်သည်"ဟု ခံယူထားသည်နှင့်အညီ သူ့အရေး ကိုယ့်အရေး၊ အားလုံးလွတ်မြောက်ရေးအတွက် စုပေါင်း တိုက်ပွဲဝင်ကြလျက် ရှိကြောင်း ပြောသည်။
ချောင်းဦးမြို့နှင့် မုံရွာ -မန္တလေးလမ်းမကြီးပေါ်တွင် စစ်တပ်ကို မိုင်းဆွဲတိုက်ခိုက်မှု စစ်သား ၁ ဦး သေဆုံးပြီး ၈ ဦး ဒဏ်ရာရ
ရန်ကုန်၊ ဒီဇင်ဘာ ၂၅
စစ်ကိုင်းတိုင်း၊ ချောင်းဦးမြို့နယ်၊ ချောင်းဦးမြို့ပေါ်တွင် ကင်းပတ် ထွက်လာသော အကြမ်းဖက်စစ် ကောင်စီတပ်ကို မိုင်းဆွဲတိုက်ခိုက်ခဲ့ရာ စစ်သား ၈ ဦးအပြင်းအထန်ဒဏ်ရာရရှိခဲ့ပြီး သေဆုံးမှုများ ရှိနိုင်ကြောင်း ချောင်းဦးမြို့နယ် ပကဖ တိုက်ခိုက်ရေးတပ် - CHU PDF တပ်ဖွဲ့မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောကြားသည်။
ယမန်နေ့ ဒီဇင်ဘာလ ၂၄ ရက် ညနေ ၆ နာရီ ၄၈ မိနစ်အချိန် ချောင်းဦးမြို့မ ရဲစခန်းအတွင်းမှ ချောင်း ဦး မြို့တွင်းသို့ ကင်းပတ်ထွက်လာသော အကြမ်းဖက်စစ်သား ၁၀ ဦးကို ချောင်းဦးမြို့နယ် ပ.က.ဖ တိုက်ခိုက်ရေးတပ် CHU PDF တပ်ဖွဲ့မှ မြို့တွင်းတနေရာ၌ ည ၈ နာရီ မိနစ် ၅၀ အချိန်တွင် မိုင်းဆွဲ တိုက်ခိုက်ခဲ့ရာ စစ်သား ၈ ဦးအပြင်းအထန်ဒဏ်ရာရရှိပြီး လဲကျနေရာမှာ အော်ဟစ် ညည်းညူနေခဲ့ ကြောင်း သိရသည်။
“ပုံမှန်ကင်းပတ်နေကြ စခတွေကို ချောင်းဦးတွင်းတနေရာမှာ မိုင်းဆွဲတယ်၊ မိုင်းဆွဲတော့ ၁၀ ယောက် ထဲ ၈ ယောက်ထိတာ၊ အများစုကသေနိုင်တယ်၊ စခန်းထဲကနေ ထွက်လာပြီး လာသယ်သွားတယ်။ သေဆုံးတဲ့သတင်း တိတိပြောမရဘူး။ မှတ်တမ်း Video လည်းရထားတယ်။ မိုင်းဆွဲခဲ့တဲ့ရဲဘော် ပြော ပြတာကတော့ ၁၀ ယောက်ထဲက ၂ ယောက်ပဲ ပြန်ထနိုင်တယ်။ ၈ ယောက်ကလုံးလုံးမထနိုင်ဘူး။ အော်ဟစ်နေကြတာ။ အသေးစိတ်နောက်ဆက်တွဲသတင်းတော့ ပြန်ထုတ်ပြန်ပေးပါ့မယ်။” ချောင်းဦး မြို့နယ် ပကဖ တိုက်ခိုက်ရေးတပ် - CHU PDF တပ်ဖွဲ့မှ တာဝန်ရှိသူတစ်ဦးက ရန်ကုန်ခေတ်သစ် သတင်းဌာနထံသို့ ပြောကြားသည်။
အလားတူ ယနေ့ဒီဇင်ဘာလ ၂၅ ရက်နေ့ နံနက် ၉ နာရီ ၅၈ မိနစ်အချိန်က မုံရွာမြို့နယ်၊ မုံရွာ-မန္တလေး လမ်းမပေါ် မုံရွေးတိုးဂိတ်အနီးတွင် ကင်းပုန်းဝပ်နေသော အကြမ်းဖက်စစ်သား ၂ ဦးကို မိုင်းဆွဲတိုက် ခိုက်ခဲ့ရာ ၁ ဦးသေဆုံးခဲ့ကြောင်း သိရသည်။
ချောင်းဦးမြို့နယ် ပ.က.ဖ တိုက်ခိုက်ရေးတပ် CHU PDF အနေဖြင့် ပြည်သူများနှင့် တပ်ဖွဲ့ဝင် ရဲဘော် များ ထိခိုက်မှု နည်းသည့် နည်းလမ်းကို အတတ်နိုင်ဆုံး ချိန်ဆ၍ စစ်ရေးဖော်ဆောင်လေ့ရှိပြီး ယခု စစ်ရေး ဖော်ဆောင်မှု ၂ ခုလုံး မှတ် တမ်း ဗွီဒီယိုရရှိထားရာ မှတ်တမ်းနှင့် နောက်ဆက်တွဲ သတင်းကို ဆက်လက်ထုတ်ပြန်ပေးသွားမည်ဖြစ်ကြောင်းအသိပေးထားသည်။
ဓာတ်ပုံ - မိုင်းဆွဲခံထားရသော စစ်ကောင်စီ၏ စစ်ကားတစ်စီး။ (ပုံအဟောင်းဖြစ်ပါသည်။)
တီးတိန်မြို့နယ်၊ စီယင်းဒေသတွင် ဘိန်းစိုက်ခင်း ၃ ဧကခန့်ကို CDF CDM SIYIN တပ်ဖွဲ့က ဖျက်ဆီး
ရန်ကုန်၊ ဒီဇင်ဘာ ၂၅
ချင်းပြည်နယ်၊ တီးတိန်မြို့နယ်၊ စီယင်းဒေသရှိ ဘိန်းစိုက်ခင်း ၃ ဧကခန့်ကို ဖျက်ဆီးခဲ့ကြောင်း CDF CDM SIYIN စစ်ဦးစီးချုပ် ထောင်းပူက ရန်ကုန်ခေတ်သစ်သတင်းဌာနထံသို့ ပြောကြားသည်။
ဒီဇင်ဘာလ ၁၉ ရက်နေ့က ချင်းပြည် (Chinland) Siyin ဒေသအတွင်း CDF CDM SIYIN ၏ ၂၀၂၄ ခုနှစ် ပုံမှန်အစည်းအဝေးဆုံးဖျက်ချက်အရ ဒေသအတွင်းရှိ ဘိန်းခင်း ၃ ဧကခန့် ကို CDF CDM SIYIN ရဲဘော်များက ဖျက်ဆီးခဲ့ခြင်းဖြစ်ပြီး ကျန်ရှိနေသော ဘိန်းခင်းများကိုလည်း ဆက်လက်ဖျက်ဆီးသွား မည်ဖြစ်ကြောင်း သိရသည်။
“ချင်းပြည်နယ်မှာ ဘိန်းခင်းတွေကများတယ်၊ အခုဖျက်ခဲ့တာက ကလေးမြို့နယ်နဲ့နီးတဲ့ စီယင်းဒေသ မှာရှိတာကို ဖျက်ဆီးခဲ့တာ။ အခုက ကျနော်တို့ရဲဘော်တွေက တွေ့လို့ ဖျက်တာ၊ အချို့နေရာတွေ မှာရှိသေးတယ်လို့ သိရတယ်၊ သွားကြည့်ပြီး ဖျက်ဆီးအုံးမှာပါ။ ပြည်သူတွေကပဲ စားဝတ်နေရေး အခက်အခဲရှိတာနဲ့ စိုက်ထားတာ၊ လွယ်လွယ်ရတော့ အဲဒါပဲ လုပ်စားချင်နေကြတဲ့သဘော။ စကစနဲ့ ပေါင်းတာတော့မဟုတ်ဘူး။ စားဖို့ခက်ခဲလာလို့ လုပ်ကြတာ။ ဘိန်းခင်းတွေနဲ့ ပတ်သက်ရင်တော့ ဆက်လက်ဖျက်ဆီးသွားမှာပါ” ဟု CDF CDM SIYIN စစ်ဦးစီးချုပ် ထောင်းပူက ရန်ကုန်ခေတ်သစ် သတင်းဌာနထံသို့ ပြောကြားသည်။
အဆိုပါဘိန်းခင်းပိုင်ရှင်များသည် ပြည်သူများဖြစ်ကြပြီး နိုင်ငံရေးအခြေအနေအရ စားဝတ်နေရေး ခက်ခဲလွန်းသောကြောင့် စိုက်ပျိုးရခြင်းဖြစ်သည်ဟု ပြောသော်လည်း နိုင်ငံရေးမတည်မငြိမ်မှုကို အခွင့်ကောင်းယူခြင်း စားဝတ်နေရေးအတွက် မဟုတ်ပဲ ကိုယ့်ကောင်းကျိုး ကြည့် စီးပွါးရေး သမား အချို့၏ သွေးထိုးအားပေးမှုကြောင့်သာဖြစ်သည်ကို တွေ့ရှိကြောင်း ၎င်းက ဆက်လက်ပြောကြား သည်။
တိုင်းပြည်နှင့်လူမျိုးရပ်ရွာ အနာဂတ်လှပဖွင့်ဖြိုးသာယာအေးချမ်းစေရေးအတွက် CDF CDM SIYIN အနေဖြင့် လက်မခံနိုင်ပဲ ဘိန်းခင်းများ တိုးချဲ့စိုက်ပျိုးခြင်းကို လုံးဝတားမြစ်ကြောင်း၊ ဘိန်း အခွန်ကိုလည်းကောက်ခံမည်မဟုတ်ကြောင်း၊ CDF CDM Siyin ထိန်းချုပ်နယ်မြေဒေသတစ်ခုလုံး ဘိန်းစိုက်ပျိုးခြင်း ကင်းစင်ရေးစီမံကိန်း ချထားသည့်အတိုင်း ဆက်လက်ဆောင်ရွက်သွားမည် ဖြစ် ကြောင်းအသိပေးထားသည်။
နွားထိုးကြီးမြို့နယ်၊ မြိုင်သာရွာနှင့် ဒေါင့်ဘိုးရွာကို စစ်တပ်က လေကြောင်းဖြင့် ၂ ရက်ဆက် ဗုံးကျဲ တိုက်ခိုက်မှု ပြည်သူ ၁ ဦးသေဆုံး
ရန်ကုန်၊ ဒီဇင်ဘာလ ၂၅
မန္တလေးတိုင်း၊ နွားထိုးကြီးမြို့နယ်၊ မြိုင်သာရွာနှင့် ဒေါင့်ဘိုးရွာကို အကြမ်းဖက် စစ်တပ်က လေကြောင်းဖြင့် ၂ ရက်ဆက် ဗုံးကျဲ တိုက်ခိုက်ခြင်းကြောင့် ပြည်သူ ၁ ဦးသေဆုံးခဲ့ကြောင်း မြင်းခြံခရိုင် ပကဖ မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ယမန်နေ့ ဒီဇင်ဘာလ ၂၄ ရက်နှင့် ဒီဇင်ဘာ ၂၃ ရက်နေ့တွင် နွားထိုးကြီးမြို့နယ် မြိုင်သာရွာနှင့် ဒေါင့်ဘိုးရွာကို အကြမ်းဖက် စစ်တပ်က လေကြောင်းဖြင့် ၂ ရက်ဆက် ဗုံးကျဲ တိုက်ခိုက်ခဲ့ခြင်းကြောင်း သိရသည်။
ယင်းတိုက်ခိုက်မှု အတွင်း ဒေါင့်ဘိုးရွာမှ ပြည်သူ တစ်ဦး သေဆုံးခဲ့ပြီး ဒေါင့်ဘိုးရွာကို စစ်တပ်က ၂ ရက်ဆက် လေကြောင်းဖြင့် ဗုံးကျဲ တိုက်ခိုက်ခဲ့ခြင်းဖြစ်ကြောင်း၊ ထို့ပြင် မြိုင်သာကျေးရွာကိုလည်း အကြမ်းစစ်တပ်က ဒီဇင်ဘာလ ၂၄ ရက်နေ့ ညနေပိုင်းတွင် လေကြောင်းဖြင့် ထပ်မံ ဗုံးကျဲ တိုက်ခိုက်ခဲ့ပြီး ပြည်သူများ ထိခိုက်မှု အခြေအနေကို အတည်ပြုနိုင်ခြင်းမရှိသေးကြောင်း သိရှိရသည်။
"ဒေါင့်ဘိုးရွာကို မနေ့ကလည်း ဗုံးကျဲပါတယ်။ ပြည်သူ တစ်ဦးသေဆုံးပါတယ်။ ဒီနေ့လည်း စောစောကပဲ ဒေါင့်ဘိုးကို ထပ်ကျဲသွားပါတယ်။ ဒီနေ့ ကျဲတာတော့ အထိအခိုက်တော့ မသိရသေးပါဘူး" ဟု မြင်းခြံခရိုင် ပကဖ မှ တာဝန်ရှိသူက ပြောဆိုသည်။
ဒီဇင်ဘာလ ၂၃ ရက်နေ့တွင် ရန်ကုန်-မန္တလေး အမြန်လမ်းပိုင်း၌ Natogyi People Defense Force မြင်းခြံခရိုင် အမှတ် (၄-၁၀) တပ်ရင်း က ရန်ကုန်-မန္တလေး အမြန်လမ်းမကြီး မိုင်တိုင် အမှတ် ၃၁၈ တွင် ပြည်သူများကို တိုက်ပွဲများ ဖြစ်ပေါ်လာနိုင်၍ ရန်ကုန် -မန္တလေး အမြန်လမ်းမကြီးပေါ်တွင် မလိုအပ်ဘဲ ခရီး မသွားကြရန်၊ ည အချိန်မတော် မထွက်ကြရန်၊ တိုက်ပွဲ ဖြစ်ပွားနေချိန်အတွင်း ရှေ့ဆက်တိုး၍ ကား မမောင်းဘဲ နီးစပ်ရာ လုံခြုံသော နေရာများတွင် နေထိုင်ကြရန် အသိပေးမှုများ လုပ်ဆောင်မှုများ ပြုလုပ်ခဲ့ကြောင်း သိရသည်။
Khit Thit သတင်းဌာန၏ ဒီဇင်ဘာ ၂၅ ရက် မနက်ပိုင်း ရုပ်သံသတင်းအစီအစဉ်
By ရန်ကုန်ခေတ်သစ်
ဒီကနေ့ ဒီဇင်ဘာ ၂၅ ရက် မနက်ပိုင်း တင်ဆက်ပေးမယ့် သတင်းတွေကတော့
- အကြမ်းဖက်စစ်ကောင်စီအနေနဲ့ အရှေ့မြောက်တိုင်းစစ်ဌာနချုပ်နဲ့ အနောက်ပိုင်းတိုင်းစစ်ဌာနချုပ်ကို ဆုံးရှုံးပြီးတဲ့နောက်မှာ နောက်ထပ် တိုင်းစစ်ဌာနချုပ်တွေ ကျဆုံးတော့မယ့် အခြေအနေ ရောက်ရှိနေပြီလို့ အမျိုးသားညီညွတ်ရေးအစိုးရ-NUG ယာယီသမ္မတက ပြောဆိုလိုက်ပါတယ်။
- ဧရာဝတီတိုင်း ရေကြည်မြို့နယ်မှာ ရခိုင်စစ်ဘေးရှောင် ၁၀ ဦးထက်မနည်းကို အာဏာသိမ်း စစ်ကောင်စီ တပ်ဖွဲ့ဝင်တွေနဲ့ အုပ်ချုပ်ရေးအဖွဲ့ဝင်တွေက ဖမ်းဆီးထားတယ်လို့ နီးစပ်သူတွေဆီက သိရပါတယ်။
- ပဲခူးတိုင်း၊ သာယာဝတီခရိုင်ရှိ မြို့နယ် ၈ ခုမှာ နယ်မြေစိုးမိုးမှု ပြန်လည်ရရှိရေးအတွက် အကြမ်းဖက် စစ်ကောင်စီက စစ်ကြောင်းထိုး၊ လုံခြုံရေး တင်းကျပ်ဖို့ စီစဉ်နေတဲ့ သတင်းအပါအဝင် နောက်ဆုံးရသတင်းတွေကို တင်ဆက်ပေးပါမယ်။
https://www.youtube.com/watch?v=wJN6Ofts1iU
ရေစကြိုတွင် စစ်တပ် ရိက္ခာပို့ စစ်ကြောင်းနှင့် ဆားတောင်ရှိ စစ်တပ် အထိုင်စခန်းကို တိုက်ခိုက်မှု စစ်ကောင်စီ တပ်သား ၅ ဦးသေဆုံး
ရန်ကုန်၊ ဒီဇင်ဘာ ၂၃
မကွေးတိုင်း၊ ရေစကြိုမြို့နယ်တွင် အကြမ်းဖက် စစ်တပ် ရိက္ခာပို့ စစ်ကြောင်းကို တိုက်ခိုက်ခဲ့ရာ စစ်သား ၅ ဦးသေဆုံးခဲ့ကြောင်း YOUNG WOLF LOCAL PDF အဖွဲ့မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာထံသို့ပြောဆိုသည်။
ဒီဇင်ဘာလ ၂၃ ရက်နေ့တွင် ရေစကြိုမြို့နယ်ရှိ အကြမ်းဖက် စစ်တပ် အထိုင်စခန်းကို လက်နက်အင်အားနှင့် စားနပ်ရိက္ခာ လာပို့သည့် အကြမ်းဖက် စစ်တပ် စစ်ကြောင်းကို တော်လှန်ရေး တပ်ဖွဲ့များက ကြားဖြတ် တိုက်ခိုက်ခဲ့ကြောင်းသိရသည်။
ယင်း တိုက်ခိုက်မှု အတွင်း အကြမ်းဖက် စစ်ကောင်စီ တပ်သား ၅ ဦးသေဆုံးကာ ထိခိုက်ဒဏ်ရာရရှိသူများလည်းရှိပြီး စစ်သား အလောင်းများနှင့် ဒဏ်ရာရရှိသူများကို စစ်ကောင်စီ တပ်သားများက ပြန်လည် သယ်ဆောင်သွားကြောင်း၊ တော်လှန်ရေး ရဲဘော်များဘက်မှာလည်း အထိခိုက်မရှိ ပြန်လည် ဆုတ်ခွာနိုင်ကြောင်း သိရသည်။
အဆိုပါ တိုက်ခိုက်မှုကို YOUNG WOLF P.D.Fအဖွဲ့၊ မန္တလေးခရိုင် တပ်ရင်း ၆ ၊ ဆားတောင်မိုးကြိုး၊ ဆားတောင်မြို့ပြပြောက်ကျား SD အဖွဲ့များနှင့် နယ်မြေ ပူးပေါင်း မဟာမိတ်များက လုပ်ဆောင်ခဲ့ကြောင်း သိရသည်။
အလားတူ ဒီဇင်ဘာလ ၁၄ရက်နေ့တွင် စစ်ကိုင်းတိုင်း၊ ဆားတောင်မြို့နယ်ရှိ အကြမ်းဖက် စစ်တပ် အထိုင်ချစခန်းများကို တော်လှန်ရေး တပ်ဖွဲ့များက ဒရုန်းဖြင့် ဗုံးသီး ၁၂ လုံး ကျဲချ တိုက်ခဲ့ကြောင်းသိရသည်။
ထိုတိုက်ခိုက်မှု အတွင်း အကြမ်းဖက် စစ်ကောင်စီ တပ်သားများ ထိခိုက်သေဆုံးမှု အခြေအနေကို အတည်ပြုနိုင်ခြင်းမရှိသေးဘဲ တော်လှန်ရေး ရဲဘော်များ အထိအခိုက်မရှိ ဆုတ်ခွာနိုင်ခဲ့ကြောင်း သိရှိရသည်။
အဆိုပါ တိုက်ခိုက်မှုကို YUONG WOLF P.D.F အဖွဲ့နှင့် ဆားတောင်မြို့ပြပြောက်ကျား SD အဖွဲ့တို့က ပူးပေါင်း လုပ်ဆောင်ခဲ့ကြောင်း သိရသည်။
မြ၀တီမြို့နယ်၊ ရွှေက္ကိုလ် လောင်းကစားမြို့တော်တွင် လူသေဆုံးသည်အထိ ဖြစ်ပွားနေသော ပြင်းထန် ကာလ ဝမ်းရောဂါကြောင့် ထိုင်း-မြန်မာ နယ်စပ် ၁ လကြာ ပိတ်ထားရန် ထိုင်းကာကွယ်ရေးဝန်ကြီး အမိန့်ထုတ်
ရန်ကုန်၊ ဒီဇင်ဘာ ၂၃
ကရင်ပြည်နယ်၊ မြ၀တီမြို့နယ်၊ ရွှေက္ကိုလ် လောင်းကစားမြို့တော်တွင် လူသေဆုံးသည်အထိ ဖြစ်ပွားနေသော ပြင်းထန် ကာလ ဝမ်းရောဂါကြောင့် ထိုင်း-မြန်မာ နယ်စပ် ၁ လကြာ ပိတ်ထားရန် ထိုင်းကာကွယ်ရေးဝန်ကြီး Phumtham Wechayachai က အမိန့်ထုတ်လိုက်ကြောင်း ထိုင်းသတင်းဌာနများက သတင်းဖော်ပြသည်။
ထိုင်း-မြန်မာနယ်စပ် တာ့ခ်ခရိုင်အတွင်း ကာလဝမ်းရောဂါ မပြန့်ပွားအောင် ကာကွယ်ရန် ကာကွယ်ရေးဝန်ကြီး Phumtham Wechayachai က ထိုင်း-မြန်မာနယ်စပ်ကို ၁ လကြာ ပိတ်ထားရန် အမိန့်ထုတ်လိုက်ကြောင်း၊ ယနေ့ ဒီဇင်ဘာ ၂၃ ရက်နေ့မှစတင်၍ ယင်းသို့ အမိန့်ထုတ်ပြန်လိုက်ခြင်းဖြစ်ကြောင်း၊ ထိုင်း-မြန်မာနယ်စပ် မဲဆောက်ခရိုင် တာဝန်ရှိသူများ၊ မဲဆောက် ရဲတပ်ဖွဲ့နှင့် မဲဆောက်ဆေးရုံမှ ဝန်ထမ်းများက တာ့ခရိုင် နယ်စပ်ကျေးရွာများတွင် ကာလဝမ်းရောဂါ ကာကွယ်ရေး အသိပညာပေးမှုများကို လုပ်ဆောင်လျက်ရှိကြောင်း သိရှိရသည်။
လတ်တလော ကရင်ပြည်နယ်၊ မြ၀တီမြို့နယ်၊ ရွှေက္ကိုလ်မြို့သစ်တွင် ကာလဝမ်းရောဂါ ကူးစက်ပြန့်ပွားလျက်ရှိပြီး အနည်းဆုံး လူ ၂ ဦးသေဆုံးကာ ရာပေါင်းများစွာ ကူးစက်ခံနေရကြောင်း သိရှိရသည်။
"ဝမ်းရောဂါဖြစ်တာက လူပါသေတယ်။ ၂ ဦးသေသွားပြီ။ အခုတော့ စျေးဆိုင်တွေနဲ့ လမ်းဘေးစားသောက်ဆိုင်တွေ အကုန်လုံး ပိတ်ခိုင်းထားတယ်။ ရွှေက္ကိုလ်ထဲကို အဝင်အထွက်တွေ ကန့်သတ်ထားတယ်။ ဝမ်းရောဂါဖြစ်တာတော့ ၄၀၀ လောက် ဖြစ်တယ်လို့ပြောတယ်" ဟု မြ၀တီမြို့ခံတစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။
ကရင်ပြည်နယ်၊ မြ၀တီမြို့နယ်တွင် ကာလဝမ်းရောဂါဖြစ်ပွားမှုနှင့်တပ်သက်၍ မြ၀တီမြို့နယ်ကို ထိန်းချုပ်ထားသော စစ်ကောင်စီနှင့် နယ်ခြားစောင့်တပ်များက တစ်စုံတစ်ရာ သတင်းထုတ်ပြန်ခြင်းမရှိသေးပေ။
ဓာတ်ပုံ- ထိုင်း-မြန်မာနယ်စပ် တာ့ခရိုင်တွင် ကာလဝမ်းရောဂါ အသိပညာပေး စာစောင်များကို ထိုင်းစစ်တပ်က ဝေငှနေစဉ်။
Photo- Khaosod English ။
ချင်းပြည်တောင်ပိုင်းတစ်ခုလုံးတွင် စစ်ကောင်စီတပ်များ ကင်းစင်သွားပြီး ချင်းပြည်နယ်တစ်ခုလုံး၏ ၈၅ ရာခိုင်နှုန်း လွတ်မြောက်၊ မင်းတပ် ခလရ ၂၇၄ မှ ဗိုလ်မှူးကြီးကို ချင်းညီနောင်တပ်က အရှင်လက်ရ ဖမ်းဆီးထား
ရန်ကုန်၊ ဒီဇင်ဘာ ၂၃
အကြမ်းဖက်စစ်ကောင်စီတပ်များ အခြေစိုက်ထားသော မင်းတပ်မြို့နယ်နှင့် ကန်ပက်လက်မြို့ကို ချင်းညီနောင်တပ်ဖွဲ့များက သိမ်းပိုက်ရရှိပြီးနောက် ချင်းပြည်နယ်တောင်ပိုင်းတစ်ခုလုံးတွင် စစ်ကောင်စီတပ်များ ကင်းစင်သွားပြီဖြစ်ကြောင်း ချင်းညီနောင်အဖွဲ့မှ တာဝန်ရှိသူများက ယနေ့ သတင်းစာရှင်းလင်းပွဲတွင် ထုတ်ဖော်ပြောဆိုလိုက်ကြသည်။
နိုဝင်ဘာလ ၉ ရက်နေ့မှစ၍ မင်းတပ်မြို့နှင့် ဖလမ်းမြို့တို့ကို ချင်းညီနောင်စစ်ဆင်ရေး (Operation CB) အဖြစ် မြို့သိမ်းတိုက်ပွဲဖော်ဆောင်ခဲ့ရာ မင်းတပ်မြို့အခြေစိုက် ခလရ ၂၇၄ တပ်ရင်းကို ဒီဇင်ဘာလ ၂၁ ရက်နေ့တွင် အပြီးတိုင် ချေမှုန်းနိုင်ခဲ့ပြီး မင်းတပ်မြို့ကို အလုံးစုံထိန်းချုပ်နိုင်လိုက်ခြင်းဖြစ် ကြောင်း ၊ ဒီဇင်ဘာလ ၂၂ ရက်နေ့တွင်လည်း စစ်ကောင်စီတပ်များ ဆုတ်ခွာသွားဖြင့် ချင်းညီနောင်တပ်များက ကန်ပက်လက်မြို့ကိုလည်း သိမ်းပိုက်လိုက်ကြောင်း သိရှိရသည်။
"ချင်းပြည်တောင်ပိုင်းကတော့ စစ်ကောင်စီကင်းစင်သွားပါပြီ။ ချင်းတစ်ပြည်လုံးအနေနဲ့တော့ ၈၅ ရာခိုင်နှုန်းနီးပါး လွတ်မြောက်နေပြီလို့ပြောလို့ရမယ်။ တီးတိန်၊ ထန်တလန်၊ ဟားခါးကတော့ ကျန်နေသေးတယ်" ဟု ချင်းညီနောင်တပ်ဖွဲ့မှ တာဝန်ရှိသူတစ်ဦးက ပြောဆိုသည်။
ချင်းညီနောင်တပ်ဖွဲ့အနေဖြင့် ကျင်းဒွေး၊ မတူပီ၊ မင်းတပ်၊ ကန်ပက်လက် အပါအဝင် ချင်းပြည်တောင်ပိုင်းရှိ မြို့များအားလုံးကို တိုက်ခိုက်သိမ်းပိုက်ပြီးဖြစ်ကြောင်း၊ မဟာမိတ်တပ်များအနေဖြင့် သိမ်းပိုက်ရာတွင် AA ထံမှ အကူအညီများစွာရရှိထားကြောင်း တာဝန်ရှိသူများက ဆိုသည်။
လက်ရှိတွင် ချင်းပြည်နယ်မြောက်ပိုင်းရှိ ဖလမ်းမြို့ကို တိုက်ခိုက်သိမ်းပိုက်ရန် ထိုးစစ်ဆင်နေဆဲဖြစ်ကြောင်း၊ ဖလမ်းမြို့တွင် စစ်ကောင်စီ၏ ခလရ ၂၆၈ တပ်ကုန်းတစ်ခုသာ ကျန်တော့ကြောင်း၊ ချင်းပြည်တစ်ခုလုံး လွတ်မြောက်ရေးသာမက မြန်မာနိုင်ငံတစ်ဝန်းလုံး စစ်အာဏာရှင် လက်အောက်မှ လွတ်မြောက်ရေး ကြိုးစားသွားမည်ဖြစ်ကြောင်း ချင်းညီနောင် အဖွဲ့ဝင် CDF မင်းတပ် စစ်ဦးစီးချုပ် ဆလိုင်းထန်းချန်းဖေက ဆိုသည်။
စစ်သုံ့ပန်းများ ဖမ်းဆီးရရှိရာတွင် အဆင့်မြင့်ဆုံးအနေဖြင့် ခလရ ၂၇၄ မှ ဗိုလ်မှူးကြီး ၁ ဦးကိုလည်း ဖမ်းဆီးရရှိထားပြီး ၎င်းတို့ ကျူးလွန်သော စစ်ရာဇဝတ်မှုများကို စစ်ဆေးမည်ဖြစ်ကြောင်း၊ လက်နက်ချသူများလည်းရှိရာ မင်းတပ်မြို့ နှင့်ဖလမ်းမြို့မှ စစ်သုံ့ပန်းများကို နိုင်ငံတကာဥပဒေနှင့်အညီ ထိန်းသိမ်းထားကြောင်း သိရှိရသည်။
ဓာတ်ပုံ- ချင်းပြည်နယ်၊ မင်းတပ်မြို့နယ်ရှိ ခလရ ၂၇၄ အပါအဝင် စစ်ကောင်စီတပ်စခန်းများကို တိုက်ခိုက်သိမ်းပိုက်ထားစဉ်။
Photo- Yaw Mang။
မြင်းမူနှင့် ဝမ်းတွင်းတို့တွင် စစ်တပ်ကို ပစ်ခတ်တိုက်ခိုက်မှု စစ်ကောင်စီဘက်မှ ၆ ဦးသေဆုံး
ရန်ကုန်၊ ဒီဇင်ဘာ ၂၃
စစ်ကိုင်းတိုင်း၊ မြင်းမူမြို့နယ်တွင် မိုင်းရှင်းနေသည့် အကြမ်းဖက် စစ်ကောင်စီ တပ်သားများကို မိုင်းဆွဲ ပစ်ခတ် တိုက်ခိုက်ရာ စစ်တပ်ဘက်မှ ၄ ဦးသေဆုံးခဲ့ကြောင်း People's knight Defense Force Myinmu (PKDF-MMU) အဖွဲ့ တာဝန်ရှိသူ ရဲဘော်အေးချမ်းက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဒီဇင်ဘာလ ၁၈ ရက်နေ့ နံနက် ၁၁ နာရီ ၁၅ မိနစ်ခန့်တွင် မြင်းမူမြို့နယ်၊ ဝမ်းပြည့်ကျေးရွာ အနောက်ဘက်ရှိ ရေဦးဆီဆိုင်တွင် တပ်ဆွဲထားသော အကြမ်းဖက် စစ်ကောင်စီ တပ်သား ၁၅ ဦးသည် မြင်းမူမြိုနှင့် ဝမ်းပြည့်ကျေးရွာ အကြားတွင် မိုင်းရှင်းရန် လာရောက်စဉ် တော်လှန်ရေး တပ်ဖွဲ့များက မိုင်းဆွဲကာ လက်နက်ငယ်များဖြင့် ဝင်ရောက် ပစ်ခတ် တိုက်ခိုက်ခဲ့ကြောင်း သိရသည်။
ယင်းထိတွေ့ တိုက်ပွဲသည် မိနစ် ၃၀ ကျော်ကြာဖြစ်ပွားခဲ့ပြီး အကြမ်းဖက် စစ်ကောင်စီ တပ်သား ၄ ဦး သေဆုံးကာ ၂ ဦး အပြင်းအထန် ဒဏ်ရာရရှိခဲ့ကြောင်း၊ တိုက်ပွဲဖြစ်ပွားရာ နေရာကို မြင်းမူမြို့ပေါ်မှ အကြမ်းဖက် စစ်ကောင်စီ တပ်သားများ ရောက်ရှိလာ၍ တော်လှန်ရေး တပ်ဖွဲ့ဝင်များ အထိအခိုက်မရှိ ပြန်လည် ဆုတ်ခွာနိုင်ခဲ့ကြောင်း သိရှိရသည်။
တိုက်ပွဲ ဖြစ်ပွားပြီးနောက် အကြမ်းဖက် စစ်ကောင်စီ တပ်သားများက လက်နက်ကြီးများဖြင့် အနီးအနားရှိ ကျေးရွာများကို ရမ်းသမ်းပစ်ခတ်ခဲ့သော်လည်း ပြည်သူများ ထိခိုက်မှု မရှိကြောင်း သိရသည်။
အဆိုပါ တိုက်ခိုက်မှုကို စစ်ကိုင်းခရိုင် အမှတ် ၇ တပ်ရင်း တပ်ရေး ဗိုလ်ကြီး ကွပ်ကဲ၍ People's knight Defense Force Myinmu (PKDF-MMU) နှင့်အတူ စစ်ကိုင်းခရိုင် အမှတ် (၇) တပ်ရင်း တပ်ခွဲ ၂ ၊ စစ်ကိုင်းခရိုင် အမှတ် (၇)တပ်ရင်း တပ်ခွဲ ၃ တို့က ပူးပေါင်း လုပ်ဆောင်ခဲ့ကြောင်း သိရှိရသည်။
အလားတူ မန္တလေးတိုင်း၊ မိတ္ထီလာခရိုင်၊ ဝမ်းတွင်းမြို့နယ်၊ ဒိုင်းကောင်းကုန်းကျေးရွာ စာသင်ကျောင်းအတွင်း၌ တပ်စွဲထားသော အကြမ်းဖက်စစ်ကောင်စီတပ်သားများကို ၄၀ မမဖြင့် ပစ်ခတ်တိုက်ခိုက်ခဲ့ရာ စစ် သား ၂ ဦးထက်မနည်းသေဆုံးခဲ့ကြောင်း Wundwin Township Revolution Force – WTRF အဖွဲ့မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောကြားသည်။
ယနေ့ ဒီဇင်ဘာလ ၂၃ ရက် နံနက် ၅ နာရီခန့်က အင်အား ၃၀ ခန့်ဖြင့် တပ်စွဲထားသော ဝမ်းတွင်းမြို့ နယ်၊ ဒိုင်းကောင်းကုန်းကျေးရွာ စာသင်ကျောင်းကို တော်လှန်ရေးတပ်ဖွဲ့ဝင်များက ၄၀ မမ လက် နက်ကြီး ၂ လုံးအသုံးပြုပြီး အနီးကပ်သွားရောက်ပစ်ခတ်တိုက်ခိုက်ခဲ့ရာ စစ်သား ၂ ဦးထက်မနည်း သေဆုံးခဲ့ကြောင်း သိရသည်။
“သင်္ချိုင်းကုန်းကို စစ်သားအပြည့်ပိတ်ဆို့ပြီး သင်္ဂြိုလ်နေတာ၊ ဘယ်သူမှအဝင်မခံဘူး။ အဝေးကနေ ကြည့်ရတာမို့ ၂ ဦးထက်တော့ ပိုနိုင်တယ်။ မနေ့ညက တမာကန်မှာဖြစ်တဲ့ကိစ္စနဲ့အခုအပစ်ခတ်ခံရတဲ့ ကိစ္စတွေကြောင့် စခတွေ ခြေရှုတ်နေတယ်၊ မိဘပြည်သူတွေအနေနဲ့ စခတွေ သတင်းကို ပေးပို့ကြဖို့ မေတ္တာရပ်ခံပါတယ်” ဟု Wundwin Township Revolution Force – WTRF အဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ်သတင်းဌာနထံသို့ ပြောကြားသည်။
ထို့သို့ ပစ်ခတ်တိုက်ခိုက်ခံရပြီး သေဆုံးသွားသော အကြမ်းဖက်စစ်သားများကို ဒိုင်းကောင်းရွာသင်္ချိုင်း ကုန်းကို စစ်သားအပြည့်ဖြင့် ပိတ်ဆို့ကာ သင်္ဂြိုလ်ခဲ့ကြောင်း သိရသည်။
ထို့ပြင် ခရီးသွားပြည်သူများကို စစ်ဆေးရှာဖွေမှုများ ပြုလုပ်လျက်ရှိပြီး ပြည်သူများ အနေဖြင့် စစ်သား၊ ရဲ ဆိုင်ကယ်၊ ကားတန်းများ တွေ့ရှိပါက တော်လှန်ရေးတပ်ဖွဲ့များထံ သတင်းပေးပို့ခြင်းဖြင့် ကူညီပေးကြပါရန် မေတ္တာရပ်ခံထားသည်။
ဓာတ်ပုံ- အညာဒေသတွင် တိုက်ပွဲဝင်နေကြသည့် တော်လှန်ရေးရဲဘော်များ။ (ပုံအဟောင်းဖြစ်ပါသည်။)
ဝမ်းတွင်းတွင် တပ်သားသစ်စုဆောင်းပြီးစစ်မှုထမ်းကြေး အတင်းအဓမ္မ ကောက်ခံနေသည့် ရဲဗလ တံဆိပ်ရ ပျူစောထီး ခေါင်းဆောင် မောင်လွင်နှင့်မိသားစု ပစ်ခတ်ခံရပြီး သေဆုံး
ရန်ကုန်၊ ဒီဇင်ဘာ ၂၃
မန္တလေးတိုင်း၊ ဝမ်းတွင်းမြို့နယ်တွင် စစ်မှုထမ်းကြေး အတင်းအဓမ္မ လိုက်လံကောက်ခံနေသည့် အကြမ်းဖက် စစ်တပ်က ပေးအပ်ထားသော ရဲဗလ တံဆိပ်ရရှိသူ ပျူစောထီး ခေါင်းဆောင် မောင်လွင်နှင့် မိသားစုဝင် ၂ ဦး ကို ပစ်ခတ်တိုက်ခိုက်ရာ ၃ ဦးလုံး သေဆုံးခဲ့ကြောင်း Wundwin Township Revolution Force (WTRF) အဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဒီဇင်ဘာလ ၂၂ ရက်နေ့ ည ၉ နာရီခန့်တွင် ဝမ်းတွင်းမြို့နယ်၊ တမာကန်ကျေးရွာအုပ်စု အုပ်ချုပ်ရေးမှူး၊ ပျူစောထီး ခေါင်းဆောင်၊ ရဲဗလ တံဆိပ်ရရှိထားသူ မောင်လွင်နှင့် မိသားစုဝင် ၂ ဦးကို WTRF အဖွဲ့မှ တော်လှန်ရေး ရဲဘော်များက ပစ်ခတ် တိုက်ခိုက်ရာ ပွဲချင်းပြီး သေဆုံးခဲ့ကြောင်း သိရသည်။
သေဆုံးသွားသော မောင်လွင်ကို ၂၀၂၁ ခုနှစ်က တော်လှန်ရေး ရဲဘော်များ ပထမ တစ်ကြိမ် ပစ်ခတ် တိုက်ခိုက်ခဲ့ရာ အသက်မသေဘဲ လမ်းမလျောက်နိုင်သည့် ဒုက္ခိတ ဖြစ်နေခဲ့သော်လည်း ၎င်း၏ သားဖြစ်သူနှင့် မိန်းမဖြစ်သူက ၎င်းအရှိန်ဖြင့် တမာကန်ရွာ ၊ကျောက်အိုးရွာ၊ မင်းကုန်ရွာနှင့် တောင်ဆည်ရွာမှ တစ်အိမ်လျှင် စစ်မှုထမ်းကြေး ငွေကျပ် ၁၀၀၀၀ ကောက်ခံခြင်း၊ လူငယ်များရှိသည့် နေအိမ်များကို တစ်အိမ်လျှင် ငွေကျပ် ၃ သိန်းမှ ၁၀ သိန်းထိ ကောက်ခံခြင်း၊ ပြည်သူများကိုလည်း ခြိမ်းခြောက် အကျပ်ကိုင်ခြင်းများ လုပ်ဆောင်နေသူဖြစ်ကြောင်း သိရှိရသည်။
ထိုသို့ ပျူစောထီး မောင်လွင်၏ လမ်းစဉ် အတိုင်း ၎င်း၏ သားဖြစ်သူနှင့် မိန်းမဖြစ်သူက လိုက်ပါလုပ်ဆောင်နေခြင်းကြောင့် တော်လှန်ရေး တပ်ဖွဲ့များက ၎င်းတို့ ၂ ဦးပါ ပစ်ခတ် တိုက်ခိုက်ခဲ့ခြင်းဖြစ်ကြောင်း သိရသည်။
"ပျူစောထီး ခေါင်းဆောင် မောင်လွင်နဲ့ သူ့မိသားစုက ကျေးရွာတွေအပေါ် အလွန်အကျူး ဖိနှိပ် အနိုင်ကျင့် နေလို့ တော်လှန်ရေးတပ်ဖွဲ့က ပထမ တစ်ကြိမ် ပစ်ခတ်ခဲ့သည့်တိုင် ပြုပြင် ပြောင်းလဲခြင်းမရှိဘဲ လက်အောက်ခံ ပျူစောထီးတွေကို ကိုယ်ရံတော် အစောင့် အဖြစ်မွေးပြီး တမာကန်အုပ်စုအတွင်းမှာရှိတဲ့ ရွာတွေ အားလုံး အပေါ် ဆက်၍ ပိုတိုးပြီး အနိုင်ကျင့်ဖိနှိပ်နေလို့ မောင်လွင်နဲ့ သူ့မိသားစုဝင်တွေကို ပစ်ခတ် တိုက်ခိုက်ခဲ့တာ" ဟု Wundwin Township Revolution Force (WTRF) အဖွဲ့မှ တာဝန်ရှိသူ တစ်ဦးက ပြောဆိုသည်။
စစ်ကိုင်းမြို့ပေါ် လက်ဖက်ရည်ဆိုင်အတွင်းသို့ စစ်တပ်က ဝင်ရောက် ပေါ်တာဆွဲ ဖမ်းဆီးစဉ် ထွက်ပြေးသည့် လူငယ်များကို စစ်တပ်က ပစ်ခတ်မှု အသက် ၃၂ နှစ်အရွယ် ကိုမျိုးမင်းသူ ပွဲချင်းပြီး သေဆုံး
ရန်ကုန်၊ ဒီဇင်ဘာ ၂၃
စစ်ကိုင်းတိုင်း၊ စစ်ကိုင်းမြို့ ၊ ဇေယျာကွက်သစ်ရပ်ကွက်ရှိ လက်ဖက်ရည်ဆိုင်တစ်ဆိုင်တွင် အကြမ်းဖက် စစ်တပ်က ပေါ်တာဆွဲ ဖမ်းဆီးစဉ် ထွက်ပြေးသည့် လူငယ်များကို လိုက်လံ ပစ်ခတ်ရာ အသက် ၃၂ နှစ်အရွယ် ကိုမျိုးမင်းသူ ပွဲချင်းပြီး သေဆုံးခဲ့ကြောင်း ဒေသပြည်သူများက ရန်ကုန်ခေတ်သစ် မီဒီယာသို့ ပြောဆိုသည်။
ဒီဇင်ဘာလ ၂၀ ရက်နေ့ ညနေ ၄ နာရီခန့်တွင် စစ်ကိုင်းမြို့ပေါ်ရှိ လက်ဖက်ရည်ဆိုင် တစ်ဆိုင်ကို အကြမ်းဖက် စစ်တပ်က ပေါ်တာဆွဲ ဖမ်းဆီးစဉ် ထွက် ပြေးသည့် လူငယ်များကို လိုက်လံ ပစ်ခတ်ခဲ့ကြောင်း သိရသည်။
အကြမ်းဖက် စစ်ကောင်စီ တပ်သားများ ပစ်ခတ်သော သေနတ်ကျည် ၂ ချက် ထိမှန်ပြီး စစ်ကိုင်းမြို့ ဇေယျာကွက်သစ် ရပ်ကွက်တွင် နေထိုင်သော အသက် ၃၂ နှစ်အရွယ် ကိုမျိုးမင်းသူ ပွဲချင်းပြီးသေဆုံးခဲ့ကြောင်း သိရသည်။
"စစ်ကိုင်းမြို့ လက်ဖက်ရည်ဆိုင်မှာ စစ်ခွေးတွေ လူငယ်တွေကို ၂၀ ရက်နေ့က ပေါ်တာ ဝင်ဆွဲတာ ပြေးလို့ဆိုပြီး ပစ်သတ်လိုက်တာ အသက် ၃၂ နှစ်အရွယ် ကိုမျိုးမင်းသူ သေနတ်ကျည် ၂ ချက်ထိပြီး ပွဲချင်းပြီးသေဆုံးသွားတယ်" ဟု ဒေသပြည်သူ တစ်ဦးက ပြောဆိုသည်။
သေဆုံးသွားသော ကိုမျိုးမင်းသူ၏ ရုပ်အလောင်းကို ဒီဇင်ဘာလ ၂၁ ရက်နေ့တွင် ရွှေသမားသုန်သာန်တွင် မီးသဂြိုလ်ခဲ့ကြောင်း သိရှိရသည်။
အုတ်ဖိုရှိ ဈေးဆိုင်များကို PDF တပ်ဖွဲ့က ရှောင်တခင် ဝင်ရောက် စစ်ဆေးပြီး စစ်တပ် ထုတ်ကုန် အရက်နှင့် ဘီယာများကို သိမ်းဆည်း ဖျက်ဆီး
ရန်ကုန်၊ ဒီဇင်ဘာ ၂၅
ပဲခူးတိုင်း၊ အုတ်ဖိုမြို့နယ်ရှိ ဈေးဆိုင်များကို ရှောင်တခင် ဝင်ရောက် စစ်ဆေးပြီး စစ်တပ် ထုတ်ကုန် အရက်နှင့် ဘီယာများကို သိမ်းဆည်း ဖျက်ဆီးခဲ့ကြောင်း သာယာဝတီခရိုင် တပ်ရင်း ၃၈၀၂ သတင်းနှင့်ပြန်ကြားရေးတာဝန်ခံ ရဲဘော်ဒူးယားက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဒီဇင်ဘာလ ၂၀ ရက်နေ့တွင် အုတ်ဖိုမြို့နယ်အတွင်းရှိ စျေးဆိုင်များ၌ အကြမ်းဖက် စစ်တပ်ထုတ်ကုန် အရက်နှင့် ဘီယာများ ရောင်းချနေမှုကို သာယာဝတီခရိုင် တပ်ရင်း ၃၈၀၂၊ တပ်ခွဲ ၄ မြေအောက်ပြောက်ကျားတပ်ဖွဲ့-အုတ်ဖို ၏ ရဲဘော်များမှ ရှောင်တခင် ဝင်ရောက် စစ်ဆေးရှာဖွေခဲ့ကြောင်း သိရသည်။
ထိုသို့ ဝင်ရောက် စစ်ဆေးစဉ် အကြမ်းဖက် စစ်တပ်ထုတ် အရက်နှင့် ဘီယာများ တွေ့ရှိရ၍ အရေးယူ ဖျက်ဆီးကာ စစ်တပ်ထုတ်ကုန်များ အသုံးမပြုရေးအတွက် သတိပေးခြင်းများ လုပ်ဆောင်ခဲ့ကြောင်း သိရှိရသည်။
"စစ်တပ် ထုတ်ကုန်တွေ မရောင်းချဖို့ အကြမ်းဖက် သတိပေးထားပေမယ့် ဆက်လက် ရောင်းချနေတဲ့ အတွက် အရက်နဲ့ ဘီယာတွေကို သိမ်းဆည်းပြီး ဖျက်ဆီးလိုက်ပါ။ ရောင်းချနေတဲ့ သူတွေကိုလည်း ဆက်လက် မရောင်းချဖို့ အတွက် သတိပေးမှုတွေ လုပ်ဆောင်ခဲ့ပါတယ်" ဟု သာယာဝတီခရိုင် တပ်ရင်း ၃၈၀၂ သတင်းနှင့်ပြန်ကြားရေးတာဝန်ခံ ရဲဘော်ဒူးယားက ပြောဆိုသည်။
သာယာဝတီခရိုင် တပ်ရင်း ၃၈၀၂၊ တပ်ခွဲ ၄ မြေအောက်ပြောက်ကျားတပ်ဖွဲ့အနေဖြင့် ဆက်လက်၍လည်း ပြည်သူများကို ဖမ်းဆီးသတ်ဖြတ်ကာ အမျိုးမျိုး ဒုက္ခပေးနေသည့် အကြမ်းဖက်စစ်တပ်ကို ဝင်ငွေရစေသော စစ်တပ်ထုတ် အရက် ဘီယာ ရောင်းချသည့် ဆိုင်များအား ဝင်ရောက် ဖမ်းဆီး ဖျက်ဆီးမှုများကို ထိထိရောက်ရောက် လုပ်ဆောင်သွားမည်ဖြစ်၍ ပြည်သူများအနေဖြင့် စစ်တပ်ထုတ်ကုန် အသုံးမပြုကြရန် အသိပေးလိုကြောင်း ရဲဘော်ဒူးယားက ဆက်လက်ပြောဆိုသည်။
နောက်ပြန်မလှည့်ကြေး ဒီတော်လှန်ရေး လူထုသပိတ် စစ်ကြောင်းက စစ်အာဏာရှင် ချေမှုန်းရေး ချီတက် ဆန္ဒပြ
ရန်ကုန်၊ ဒီဇင်ဘာ ၂၅
ယင်းမာပင်မြို့နယ်တွင် နောက်ပြန်မလှည့်ကြေး ဒီတော်လှန်ရေး လူထုသပိတ် စစ်ကြောင်း ဦးဆောင်ကာ ဒီဇင်ဘာလ ၂၅ ရက်နေ့တွင် စစ်အာဏာရှင် ချေမှုန်းရေး ချီတက် ဆန္ဒပြခဲ့ကြောင်း သိရသည်။
ဂွမြို့နှင့်ထိစပ်နေသော ဧရာ၀တီတိုင်း၊ မြို့နယ်တချို့တွင် ပျူစောထီး၊ ပြည်သူ့ စစ်နှင့်ပြည်သူ့လုံခြုံရေးအဖွဲ့များကို စစ်တပ်က လက်နက်တပ်ဆင်ရန် ဖုတ်ပူ မီးတိုက် စီစဉ်နေ
ရန်ကုန်၊ ဒီဇင်ဘာ ၂၅
အကြမ်းဖက်စစ်ကောင်စီက ရခိုင်ပြည်၊ ဂွမြို့နှင့်ထိစပ်နေသော ဧရာ၀တီတိုင်းအတွင်းရှိ မြို့နယ်တချို့ရှိ ပျူစောထီးများ၊ ပြည်သူ့စစ်နှင့်ပြည်သူ့လုံခြုံရေးအဖွဲ့များကို လက်နက်များ တပ်ဆင်ရန် ဖုတ်ပူမီးတိုက် အလောသုံးဆယ် စီစဉ်နေကြောင်း တပ်သတင်းရင်းမြစ်နှင့် ထွေ/အုပ် သတင်းရင်းမြစ်က ရန်ကုန်ခေတ်သစ်သတင်းဌာနထံသို့ ပြောဆိုသည်။
ရခိုင်ပြည်၊ ဂွမြို့နယ်နှင့် ဆက်စပ်လျက်ရှိသော ဧရာ၀တီတိုင်း ငသိုင်းချောင်း၊ ကျုံပျော်မြို့နယ်များနှင့်သာမက ရွှေသောင်ယံ၊ ငွေဆောင်၊ ချောင်းသာနှင့် ပင်လယ်ကမ်းခြေ နယ်စပ်ချင်း ဆက်စပ်နေရာများအားလုံးရှိ ကျေးရွာများမှ ပြည်သူ့စစ်များ၊ ပျူစောထီးများနှင့် ပြည်သူ့လုံခြုံရေးအဖွဲ့များကို လက်နက်များ တပ်ဆင်ရန် စစ်ကောင်စီက စီစဉ်နေခြင်းဖြစ်ကြောင်း သိရှိရသည်။
"တပ်ဘက်ကနေ ပြည်သူ့စစ်တွေကို လက်နက်တွေ ထုတ်ပေးဖို့ စာရင်းတောင်းတယ်။ ရွာအခြေပြု ပြည်သူ့စစ်တွေကို လက်နက် အတိုအရှည်နဲ့ ကျည်တွေ ထုတ်ပေးမယ်ပြောတယ်။ စာရင်းကောက်သွားတယ်။ ဒီလကုန်တာနဲ့ ချပေးမယ်ပြောတယ်" ဟု ငသိုင်းချောင်းမြို့နယ်မှ ထွေ/အုပ် သတင်းရင်းမြစ်တစ်ခုက ရန်ကုန်ခေတ်သစ်သို့ အတည်ပြုပြောဆိုသည်။
တပ်သတင်းရင်းမြစ်ကလည်း ပြည်သူ့စစ်၊ ပြည်သူ့လုံခြုံရေးအဖွဲ့များကို MA စီးရီး သေနတ်များ တပ်ဆင်ရန်ရှိနေပြီး ယင်းလက်နက်များမှာ တိုက်ပွဲဝင်ရန်အဓိက ဖြစ်ကြောင်း ပြောဆိုသည်။
ဂွမြို့မှတစ်ဆင့် AA နှင့် PDF များ ဧရာ၀တီတိုင်းအတွင်းသို့ ဝင်ရောက်လာမည်စိုးရိမ်၍ ခုခံ တိုက်ခိုက်ရန် ကျေးရွာအခြေပြု လုံခြုံရေးစနစ်ထူထောင်ခြင်းဖြစ်ပြီး လက်နက်များ တပ်ဆင်ခြင်းဖြစ်ကြောင်း သိရှိရသည်။
ဓာတ်ပုံ - စစ်တပ်က စစ်သင်တန်းပေးနေသော စစ်မှုထမ်း တပ်သားသစ်များ။
တိုင်းရင်းသားလူမျိုးပေါင်းစုံ ပြည်သူလူထုအားလုံး လိုလားသော စစ်အာဏာရှင်စနစ်အပြီးတိုင် ချုပ်ငြိမ်းရေးနှင့် ဖက်ဒရယ်ဒီမိုကရေစီ ပြည်ထောင်စုတည်ဆောက်ရေး ဘုံလုပ်ငန်းစဉ်တွင် ညီနောင် မဟာမိတ်သုံးဖွဲ့ အပါအဝင် ဘဝတူညီနောင်တော်လှန်ရေးအင်အားစုများနှင့်အတူ ခိုင်ခိုင်မာမာ လက်တွဲ တိုက်ပွဲဝင်သွားမည် ဖြစ်ပါကြောင်း အဆိုပါ ၄ ဖွဲ့က ထုတ်ပြန်ပြောဆိုထားသည်။
Читать полностью…
Khit Thit သတင်းဌာန၏ ဒီဇင်ဘာ ၂၅ ရက် နေ့လယ်ပိုင်း ရုပ်သံသတင်းအစီအစဉ်
By ရန်ကုန်ခေတ်သစ်
ဒီကနေ့ ဒီဇင်ဘာ ၂၅ ရက် နေ့လယ်ပိုင်း တင်ဆက်ပေးမယ့် သတင်းတွေကတော့
- လူထုခေါင်းဆောင် ဒေါ်အောင်ဆန်းစုကြည်လို ဝတ်စားဆင်ယင်ပြီး ဆေးလိမ်ကုသည့် "ခြံစည်းရိုးကြီး မယ်တော် ဟောင်စုဘ၀" အွန်လိုင်း ဇတ်လမ်းကို သရုပ်ဆောင် ရိုက်ကူးသူ ဖြူဖြူထွေး အပြင်းအထန် ဝေဖန်ခံနေရပြီး ၊ ဒေါ်အောင်ဆန်းစုကြည်ကို ရည်ရွယ်ချက်ရှိရှိ နိုင်ငံရေး သိက္ခာချတိုက်ခိုက်မှု အဖြစ် ပြည်သူတွေက ရှုမြင်နေကြပါတယ်။
- ရန်ကုန်မြို့ စမ်းချောင်းမြို့နယ်မှာ စစ်မှုထမ်းဖို့ လူငယ်တွေကို ဖမ်းဆီး ငွေညှစ်ခြိမ်းခြောက်နေတဲ့ ဟုမ်းလမ်းဘူတာရပ်ကွက် အုပ်ချုပ်ရေးမှုး ရဲပြုတ် စန်းငွေဆိုသူ ပစ်ခတ်ခံရပြီး ဆေးရုံမှာ အသက်လု နေရတုန်းပဲလို့ FLA တပ်ဖွဲ့က သတင်းထုတ်ပြန်ထားပါတယ်။
- ဧရာဝတီတိုင်း၊ ဓနုဖြူမြို့ကနေ ရန်ကုန်ကို သွားတဲ့အချိန် ပျောက်ဆုံးသွားတဲ့ လူငယ် အောင်မျိုးမြင့် ဆိုသူဟာ အကြမ်းဖက် စစ်ကေင်စီတပ်ရဲ့ ဒညင်းကုန်းတပ်ထဲမှာ ပေါ်တာဆွဲခံထားရပြီး ၊ အုတ်ဖိုမြို့နယ်မှာလည်း ၉ တန်ကျောင်းသား မောင်ရိုးမြတ် ဆိုသူကို စစ်တပ်က ပေါ်တာဆွဲ ဖမ်းဆီးသွားတဲ့ သတင်းတွေကို တင်ဆက်ပေးပါမယ်။
https://www.youtube.com/watch?v=b2VB6xLokd0
ပေါက်ခေါင်းတွင် တပ်သားသစ်များရရှိရေး စစ်တပ်နှင့်အတူ ပေါ်တာဆွဲ ဖမ်းဆီးနေသူ နတ္တလင်းကျေးရွာမှ ခင်စိုး ပစ်ခတ်ခံရပြီး သေဆုံး
ရန်ကုန်၊ ဒီဇင်ဘာ ၂၅
ပဲခူးတိုင်း၊ ပေါက်ခေါင်းမြို့နယ်တွင် စစ်မှုထမ်း တပ်သားသစ်များရရှိရေး စစ်တပ်နှင့်အတူ လူငယ်များကို ပေါ်တာဆွဲဖမ်းဆီးနေသူ နတ္တလင်းကျေးရွာမှ ခင်စိုး ပစ်ခတ်ခံရပြီး သေဆုံးသွားကြောင်း ပြည်ခရိုင် ပြည်သူ့ကာကွယ်ရေးတပ်မတော်၊ ၃၆၀၁ PPDF တပ်ရင်း ၏ စစ်ထောက်လှမ်းရေးနှင့်သတင်းပြန်ကြားတာဝန်ခံ က ရန်ကုန်ခေတ်သစ်သတင်းဌာနထံသို့ ပြောဆိုသည်။
ယမန်နေ့ ဒီဇင်ဘာလ ၂၄ ရက်နေ့ ညနေ ၄ နာရီ ၃၀ မိနစ်အချိန် ပဲခူးတိုင်း ပေါက်ခေါင်းမြို့နယ် ကင်မွန်းခြုံအုပ်စု နတ္တလင်းကျေး ရွာနေ ခင်စိုးကို ပြည်ခရိုင်ပြည်သူ့ကာကွယ်ရေးတပ်မတော် ၃၆၀၁ PPDFတပ်ရင်း တပ်ခွဲ ၃ က ၎င်း၏ နေအိမ်သို့သွားရောက်၍ ပစ်ခတ်ရာ နေရာတွင်ပင် ပွဲချင်းပြီး သေဆုံးသွားကြောင်း သိရှိရသည်။
သေဆုံးသူ ခင်စိုးသည် အကြမ်းဖက်စစ်ကောင်စီတပ်ဖွဲ့ဝင်များနှင့်ပူးပေါင်းပြီး စစ်သားသစ် စုဆောင်းခြင်း၊ လူငယ်များကို ကိုအတင်းအဓ္မပေါ်တာဆွဲရာတွင် အားတက်သရောလိုက်ပါဆောင်ရွက်ခြင်း၊ ပေါ်တာဆွဲပြီး အသက်မပြည့်သူများကို ငွေကြေးဖြင့် ရွေးခိုင်းပြီး စစ်ကောင်စီကို အားပေးထောက်ခံခြင်း ၊ တော်လှန်ရေးထောက်ပို့ရဲဘော်များ၏သတင်းအချက်လက်များကိုလိုက်လံစုံစမ်းခြင်းတို့ကိုပြုလုပ်နေသေူဖြစ်ကြောင်း သိရှိရသည်။
ပြည်သူ့ကာကွယ်ရေးတပ်ဖွဲဝင်များအနေဖြင့် အကြမ်းဖက်စစ်ကောင်စီတပ်ဖွဲ့ဝင်များ၊ ထွေ/အုပ်စာရေးများ၊ ရပ်/ကျေးအုပ်ချုပ်ရေးမှူးများ၊ သတင်းပေးလမ်းပြများကို ပြတ်ပြတ်သားသားအရေးယူဆောင်ရွက်နေပြီ ဖြစ်သောကြောင့် ပြည်သူများအနေဖြင့် ၎င်းတို့ရှိသောနေရာများသို့ သွားလာနေထိုင်ခြင်း၊အားပေးကူညီခြင်းနှင့်ပူးပေါင်းဆောင်ရွက်ခြင်းများမပြုလုပ်ကြပါရန် ပြည်ခရိုင် ပြည်သူ့ကာကွယ်ရေးတပ်မတော်၊ ၃၆၀၁ PPDFတပ်ရင်းက သတိပေးထားသည်။
နေပြည်တော်၊ ဒက္ခိဏသီရိမြို့နယ်တွင် လူငယ် ၇ ဦးကို ပေါ်တာဆွဲ ဖမ်းဆီးခံရပြီး ငွေညှစ်ခံနေရ ၊ မုံရွာတွင် လူငယ် ၁ ဦး ၁ လ ခွဲနီးပါး ပျောက် ဆုံးနေပြီး ယခုအချိန်အထိ ပြန်မတွေ့သေး
ရန်ကုန်၊ ဒီဇင်ဘာ ၂၅
နေပြည်တော်၊ ဒက္ခိဏသီရိမြို့နယ်၊ ကူဆည်စုကျေးရွာ အုပ်ချုပ်ရေးမှူး အောင်ကိုလတ်က နေအိမ်တိုင်းမှ စစ်မှုထမ်းကြေး လစဉ် ငွေကျပ် ၂၅၀၀၀ ကောက်ခံနေပြီး ငွေပေးဆောင်ထားသော နေအိမ်မှ လူငယ် ၇ ဦးကို ပေါ်တာဆွဲ ဖမ်းဆီးကာ ထပ်မံငွေညှစ်နေကြောင်း ဖမ်းဆီးခံရသော လူငယ်များ၏ ဆွေမျိုးမိတ်ဆွေများက ရန်ကုန်ခေတ်သစ် သတင်းဌာနထံသို့ ပြောဆိုသည်။
ကူဆည်စုကျေးရွာ အုပ်စု ရပ်ကျေးအုပ်ချုပ်ရေးမှူး အောင်ကိုလတ် ဦးဆောင်မှုဖြင့် ဆည်စုကျေးရွာ ရာအိမ်မှူး ဝင်းတင်၊ ဂွေးတောက်ရိုး ကျေးရွာ ရာအိမ်မှူး နိုင်ဝင်းနှင့် မကျီးကုန်းကျေးရွာ ရာအိမ်မှူး မင်းအောင်တို့ ပူးပေါင်းကာ ကျေးရွာအုပ်စုအတွင်းရှိ ကျေးရွာများမှ နေအိမ်တိုင်းကို စစ်မှုထမ်းကြေး အပတ်စဉ်တိုင်း အတွက် လစဉ် ငွေကျပ် ၂၅၀၀၀ တောင်းခံခဲ့ကြောင်း၊ ယင်းနောက် လစဉ် ကောက်ခံနေသော စစ်မှုထမ်းကြေး ပေးဆောင်နေသော နေအိမ်များမှ လူငယ် ၇ ဦးကို ထပ်မံ ဖမ်းဆီးခဲ့ပြီး ငွေထပ်မံ ညှစ်နေကြောင်း သိရသည်။
ပေါ်တာဆွဲ ဖမ်းဆီးခံရသူများသည် မန်ကျည်းကုန်းရွာ ဦးသဒ္ဓမ္မ မဟာစန္ဒာရုံကျောင်းတိုက်အတွင်းမှ ပန်းရံ အလုပ်သမား ၃ ဦး၊ ဂွေးတောက်ကုန်းကျေးရွာမှာ ၁ ဦး၊ ပိတောက်ကုန်းကျေးရွာမှ ရွှေကြာပင်ရပ်ကွက်ရှိ ကားဝပ်ရှော့များတွင် အလုပ်ဆင်းနေသည့် မောင်ဆန်းအောင်၊ မောင်အောင်နိုင်ဝင်းနှင့် ဝင်းစိုက်ပျိုးရေး နဂါးမောက်ခြံတွင် အလုပ်လုပ်နေရင်း ပေါ်တာဆွဲခံရသည့် မောင်ဖိုးပြည့်တို့ ဖြစ်ကြောင်း သိရသည်။
ယင်း လူငယ် ၇ ဦး ပေါ်တာဆွဲ ဖမ်းဆီးခံရပြီးနောက် ကူဆည်စုကျေးရွာ အုပ်စု ရပ်ကျေးအုပ်ချုပ်ရေးမှူး အောင်ကိုလတ်က လူငယ်များကို ငွေကျပ် သိန်း ၁၀၀ ကျော် ဖြင့် ပြန်လာရွေးရန် မိသားစုဝင်ထံမှ ငွေညှစ်နေခြင်းဖြစ်ကြောင်း သိရှိရသည်။
“ လစဉ် စစ်မှုထမ်းကြေး ငွေ ၂၅၀၀၀ ပေးထားပါလျက်နဲ့ မောင်အောင်နိုင်ဝင်း ၊ မောင်ဆန်းအောင်တို့ ချောဆွဲခံရတယ်။ မောင်ဆန်းအောင် ချောဆွဲမခံရခင် ၁၅ ရက် အလိုမှာ အုပ်ချုပ်ရေးမှူး အောင်ကိုလတ်က စစ်မှုထမ်းမပါအောင် လုပ်ပေးမယ် ၁၂ သိန်း ပေးလို့ တောင်းတယ်။ မောင်ဆန်းအောင်က မပေးလို့ ချောဆွဲခံရတယ်။ သိန်း ၁၀၀ ပေးရင် ပြန်ထုတ်ပေးမယ် ပြောတယ်။ နောက် မောင်အောင်နိုင်ဝင်း မိဘတွေကိုတော့ သိန်း ၅၀ ပေးရန် ပြန်ထုတ်ပေးမယ် ပြောလို့ မောင်အောင်နိုင်ဝင်း အဖေ ဦးဖိုးသာအောင်က လယ်မြေပေါင် ငွေတိုးယူပြီး ဒီဇင်ဘာ ၁၄ ရက်နေ့က အောင်ကိုလတ်ကို သိန်း ၅၀ ပေးလိုက်ရတယ်” ဟု ဒေသပြည်သူတစ်ဦးက ရန်ကုန်ခေတ်သစ်သတင်းဌာနသို့ ပြောဆိုသည်။
ထို့ပြင် စစ်ကိုင်းတိုင်း မုံရွာမြို့တွင် အသက် ၂၉ နှစ်အရွယ် မောင်ပြည့်စုံအောင်သည် နိုဝင်ဘာလ ၁၅ ရက်နေ့ မွန်းလွဲ ၂ နာရီကတည်းက အပြင်သွားစဉ် ပျောက်ဆုံးသွားခဲ့ပြီး ၁ လခွဲနီးပါး ကြာမြင့်လာသည်အထိ အဆက်အသွယ်မရဘဲ ပျောက်ဆုံးနေကြောင်း သိရှိရသည်။
မုံရွာမြို့တွင် စစ်ကောင်စီက လူငယ်များကို မကြာခဏဆိုသလို ပေါ်တာဆွဲ ဖမ်းဆီးပြီး စစ်ထဲထည့်သွင်းနေကာ သက်ဆိုင်ရာ မိဘဆွေမျိုးများကိုလည်း အကြောင်းကြားမှုမရှိကြောင်း ဒေသပြည်သူများက ပြောဆိုကြသည်။
ဓာတ်ပုံ - မုံရွာတွင် ပျောက်ဆုံးနေသော မောင်ပြည့်စုံအောင်။
စစ်အုပ်စုက အာဏာ ဆက်လက်ရယူရန် ဟန်ပြ အတုအယောင်ရွေးကောက်ပွဲ ပြုလုပ်မည့်အပေါ် တရားမဝင်အာဏာရယူထားခြင်းဖြစ်၍ ရွေးကောက်ပွဲ ဦးစီးကျင်းပပိုင်ခွင့်မရှိဟု NUG နှင့် NUCC က ပူးတွဲ ထုတ်ပြန်
ရန်ကုန်၊ ဒီဇင်ဘာ ၂၅
အကြမ်းဖက်စစ်အုပ်စုက နိုင်ငံတော် အာဏာ ဆက်လက်ရယူနိုင်ရေးအတွက် ဟန်ပြ အတုအယောင်ရွေးကောက်ပွဲ ပြုလုပ်မည့်အပေါ် တရားမဝင်အာဏာရယူထားသော အဖွဲ့၍ ရွေးကောက်ပွဲကို ဦးစီးကျင်းပပိုင်ခွင့်မရှိကြောင်း အမျိုးသားညီညွတ်ရေးအစိုးရ- NUG နှင့် အမျိုးသားညီညွတ်ရေးအတိုင်ပင်ခံကောင်စီ-NUCC တို့ က ယမန်နေ့ ပူးတွဲ ထုတ်ပြန်သည်။
မြန်မာနိုင်ငံတွင် ပြည်သူလူထုအသိအမှတ်ပြု ရွေးကောက်တင်မြှောက်ခဲ့သည့် ၂၀၂၀ ခုနှစ်၊ ရွေး ကောက်ပွဲရလဒ်သည် ယနေ့ကာလအထိ တရားဝင် ဖြစ်ကြောင်း၊ အကြမ်းဖက်စစ်အုပ်စုက ၂၀၂၀ အထွေထွေ ရွေးကောက်ပွဲရလဒ်ကို ဥပဒေမဲ့ အဓမ္မဖျက်သိမ်းပြီး နိုင်ငံတော်အာဏာကို တရားမဝင်ရယူရန် ကြိုးစားနေ သော အဖွဲ့အစည်းသာဖြစ်သဖြင့် ရွေးကောက်ပွဲတစ်ရပ်ကို ဦးစီးကျင်းပပိုင်ခွင့် မရှိကြောင်း၊ ပြုလုပ်ခဲ့ပါကလည်း ယင်းရွေးကောက်ပွဲသည် မြန်မာစစ်တပ် အာဏာဆက်လက် ရယူနိုင်ရေး အတွက် ဟန်ပြ ပြုလုပ်မည့် တရားဝင်မှုမရှိသည့် အတုအယောင် ရွေးကောက်ပွဲသာ ဖြစ်မည်ဖြစ်ကြောင်း NUG နှင့် NUCC က ကြေညာသည်။
အကြမ်းဖက်စစ်အုပ်စုက ၂၀၂၁ ခုနှစ်၊ ဖေဖော်ဝါရီလ ၁ ရက်နေ့တွင် ဖွဲ့စည်းပုံ အခြေခံဥပဒေ ၂၀၀၈ ပါ ပြဌာန်းချက်များကို ချိုးဖောက်ခဲ့သောကြောင့် အဆိုပါ အခြေခံဥပဒေသည် ပျက်ပြယ်ခဲ့ပြီးဖြစ်ကြောင်း၊ ၂၀၂၁ ခုနှစ်၊ မတ်လ ၃၁ ရက်နေ့တွင် ၂၀၂၀ ရွေးကောက်ပွဲရလဒ်အရ ပေါ်ပေါက်လာသည့် ပြည်ထောင်စု လွှတ်တော်ကိုယ်စားပြု ကော်မတီ ကလည်း ပြည်သူလူထုလက်မခံသော ၂၀၀၈ ဖွဲ့စည်းပုံ အခြေခံဥပဒေကို အပြီးသတ်ဖျက်သိမ်းခဲ့ပြီးဖြစ်ကြောင်း ယခုအချိန်သည် ပြည်သူလူထု ထောက်ခံသော နိုင်ငံရေးပါတီများသည် နည်းလမ်းပေါင်းစုံဖြင့် မတရားဖိနှိပ်ခံနေရခြင်းများ ကြုံတွေ့နေရ ကြောင်း ထောက်ပြထားသည်။
မြန်မာနိုင်ငံအနှံ့ဖြစ်ပွားနေသော ခုခံတွန်းလှန်စစ်၊ ထိုးစစ်များကြောင့် စစ်ဘေးရှောင် ဦးရေ တိုးပွားလျက်ရှိသလို အခြားမြို့ရွာအသီးသီးတွင်လည်း အသက် ၁၈ မှ ၃၅ အတွင်းရှိ လူငယ်အများစုမှာ အကြမ်းဖက်စစ်တပ်၏ အဓမ္မ စစ်သား စုဆောင်းရေးအစီအမံ နှင့် မတရားဖမ်းဆီး စစ်မှုထမ်းခိုင်းမှုများကြောင့် အရပ်ရပ်သို့ ထွက်ပြေးတိမ်းရှောင် နေရခြင်း၊ တော်လှန်ရေးအင်အားစုများက မြို့နယ်ပေါင်း ၉၀ မြို့နယ်ကို သိမ်းပိုက်ထားပြီး ဧရိယာအားဖြင့်လည်း တစ်နိုင်ငံလုံး၏ ၅၀ ရာခိုင်နှုန်းကျော်အား စိုးမိုးထိန်းချုပ်ထားကြောင်း၊ ၂၀၂၄ ခုနှစ်၊ အောက်တိုဘာလအတွင်း အကြမ်းဖက် စစ်အုပ်စု က ပြုလုပ်ခဲ့သော ဟန်ပြသန်းခေါင်စာရင်း ကောက်ယူမှုတွင် မြို့နယ် ၈၀ ခန့်ကိုသာ ဆောင်ရွက်နိုင်ခဲ့ပြီး တနိုင်ငံလုံး၏ လူဦးရေးစာရင်းကို ကောက်ခံနိုင်ခြင်းမရှိခြင်းစသည် တို့သည် ထည့်သွင်းစဉ်းစားရမည့် မြေပြင် အခြေအနေမှန် များဖြစ်ကြောင်း ကြေညာချက်တွင် ဖော်ပြထားသည်။
ထိုအခြေအနေတွင် ပြည်သူလူထုကို လက်နက်ဖြင့် ခြိမ်းခြောက်၍ အဓမ္မ မဲထည့်ခိုင်းမည့်၊ မသမာသော နည်းလမ်းပေါင်းစုံဖြင့် မဲစာရင်းနှင့် မဲရလဒ်များ လိမ်လည်လုပ်ဆောင်နိုင်မည့် အခြေအနေ၊ ဂုဏ်သိက္ခာရှိသော လွတ်လပ်သည့် နိုင်ငံတကာနှင့် ပြည်တွင်း ရွေးကောက်ပွဲ စောင့်ကြည့်ရေးလုပ်ငန်းစဉ်များ မဆောင်ရွက်နိုင်သော အခြေအနေတို့တွင် အဓမ္မ လုပ်ကြံကျင်းပမည့် ဟန်ပြရွေးကောက်ပွဲသာ ဖြစ်လာမည် ဖြစ်ကြောင်း ၊ မြန်မာနွေဦးတော်လှန်ရေးသည် အကြမ်းဖက်စစ်အုပ်စု ထိန်းချုပ်ထားသည့် အဖွဲ့အစည်းတစ်ခုခုက အတုအယောင်ရွေးကောက်ပွဲတစ်ခုကို ကျင်းပပြုလုပ်လိုက်ရုံဖြင့် ရပ်တန့်သွားမည်မဟုတ်သကဲ့သို့ ထိုနည်း လမ်းသည် မြန်မာ့ပြဿနာ၏ ထွက်ပေါက်လည်း မဟုတ်ကြောင်း၊ စစ်တပ်က နိုင်ငံရေးတွင် ဆက်လက်ပါဝင်နေသမျှ ပြည်သူလူထုလိုလားသည့် ဖက်ဒရယ်ဒီမိုကရေစီပြည်ထောင်စုပန်းတိုင်နှင့် အလှမ်းဝေးနေဦးမည် ဖြစ်ပြီး ပြည်သူ့တော်လှန်ရေးသည်လည်း အရှိန်အဟုန်ဖြင့် ဆက်လက် တည်ရှိနေမည်ဖြစ်ကြောင်း အတိအလင်း ကြေညာသည်။
အကြမ်းဖက်စစ်အုပ်စုအပါအဝင် ပြင်ပအင်အားစုတစ်ခုခုက မြန်မာ့ကံကြမ္မာကို ဝင်ရောက် ချယ် လှယ်ခြင်း၊ အဆုံးအဖြတ်ပေးခြင်းကို လက်ခံမည်မဟုတ်သကဲ့သို့ မြန်မာနိုင်ငံ၏ ခေတ်ပြောင်း စနစ်ပြောင်း တော်လှန်ရေးကို မြန်မာပြည်သူလူထု လိုလားလက်ခံသည့်ပုံစံဖြင့်သာ မြန်မာများကိုယ်တိုင် ကမကထပြု ဆောင်ရွက်သွားရမည်ဖြစ်ကြောင်း၊ တော်လှန်ရေးက ပြဌာန်းထားသော ဖက်ဒရယ်ဒီမိုကရေစီ ပဋိညာဥ်နှင့်အညီ ဖက်ဒရယ်ဒီမိုကရေစီပြည်ထောင်စု တည်ဆောက်နိုင်ရေးအတွက် စစ်အာဏာရှင်စနစ် အပါအဝင် အာဏာရှင် စနစ်ဟူသမျှ ချုပ်ငြိမ်းပြီး ရေရှည်တည်တံ့သော ငြိမ်းချမ်းမှု ဖေါ်ဆောင်နိုင်ရေးအတွက် မြန်မာပြည်သူ လူထုကိုယ်တိုင် ရွေးချယ်သည့်နည်းလမ်းများဖြင့် အောင်မြင်သည်အထိ ဆက်လက် အကောင်အထည်ဖော် ဆောင်ရွက်သွားမည်ဖြစ်ကြောင်း အမျိုးသားညီညွတ်ရေး အတိုင်ပင်ခံကောင်စီ နှင့် အမျိုးသားညီညွတ်ရေးအစိုးရက ဖွဲ့စည်းထားသော တရား မဝင် အတုအယောင် ရွေးကောက်ပွဲ ဆန့်ကျင်ရေး ပူးပေါင်း လုပ်ငန်း ကော်မတီက ကြေညာထားသည်။
အုတ်တွင်းတွင် စစ်တပ် တပ်စွဲထားသော မြို့မရဲစခန်း၊ ထွေ/အုပ်ရုံးနှင့် ကန်ကလေးရွာ တို့ကို ဒရုန်းဖြင့် ဗုံးကျဲ တိုက်ခိုက်မှု စစ်သား ၂ ဦး သေဆုံး
ရန်ကုန်၊ ဒီဇင်ဘာ ၂၃
ပဲခူးတိုင်း၊ အုတ်တွင်းမြို့နယ်တွင် အကြမ်းဖက် စစ်တပ် တပ်စွဲထားသော မြို့မရဲစခန်း၊ ထွေ/အုပ်ရုံးနှင့် ကန်ကလေးရွာ တို့ကို ဒရုန်းဖြင့် ဗုံးကျဲ တိုက်ခိုက်ရာ စစ်သား ၂ ဦး သေဆုံးခဲ့ကြောင်း တောင်ပိုင်းစစ်ဒေသ အမှတ် ၂ စစ် ဒေသခွဲက ပြောဆိုသည်။
ဒီဇင်ဘာလ ၂၂ ရက်နေ့ နံနက် ၁၁ နာရီ ၂၄ မိနစ်ခန့်တွင် အုတ်တွင်းမြို့နယ်၊ ကန်ကလေးကျေးရွာအနီး၌ အခြေချ တပ်စွဲထားသည့် အကြမ်းဖက် စစ်ကောင်စီ တပ်သားများကို တော်လှန်ရေး ပူးပေါင်းတပ်ဖွဲ့များက ဒရုန်းဖြင့် ဗုံးကျဲ တိုက်ခိုက်ခဲ့ရာ စစ်သား ၂ ဦးသေဆုံးပြီး ၅ ဦးအပြင်းအထန် ဒဏ်ရာရရှိခဲ့ကြောင်း သိရသည်။
အဆိုပါ တိုက်ခိုက်မှုကို တောင်ပိုင်းစစ်ဒေသ၊ အမှတ် ၂ စစ်ဒေသခွဲ၊ PDF အမှတ် ၃၅၀၂ တပ်ရင်း - Delta one Drone Force ၊ စစ်တောင်းစစ်ကြောင်းနှင့် အုတ်တွင်း (ပကဖ) ဒရုန်းတပ်ဖွဲ့တို့က ပူးပေါင်း တိုက်ခိုက်ခဲ့ခြင်း ဖြစ်ကြောင်း သိရှိရသည်။
အလားတူ ဒီဇင်ဘာလ ၆ ရက်နေ့ကလည်း အုတ်တွင်းမြို့မရဲစခန်း နှင့် ထွေ/အုပ်ရုံးတို့၌ တပ်စွဲထားသော အကြမ်းဖက် စစ်ကောင်စီတပ်ဖွဲ့များကို အမှတ် ၃၅၀၂ တပ်ရင်း - Delta one Drone Force နှင့် အုတ်တွင်း (ပကဖ) ဒရုန်းတပ်ဖွဲ့တို့က ဒရုန်းဖြင့် ဗုံးကျဲ တိုက်ခိုက်ခဲ့ကြောင်း သိရသည်။
ယင်း တိုက်ခိုက်မှု အတွင်း အကြမ်းဖက် စစ်ကောင်စီ တပ်သား တချို့ ထိခိုက် သေဆုံးမှုရှိသော်လည်း အရေအတွက်ကို အတည်ပြုနိုင်ခြင်းမရှိသေးကြောင်း၊ တော်လှန်ရေး တပ်ဖွဲ့ဝင်များ အထိအခိုက်မရှိ ဆုတ်ခွာနိုင်ခဲ့ကြောင်း သိရှိရသည်။
မတ္တရာတွင် စစ်တပ် ပစ်ခတ်သော လက်နက်ကြီးထိမှန်ပြီး ပြည်သူ ၁ ဦး သေဆုံး၊ ဆိပ်ဖြူတွင် ဆိုင်ကယ် စီးလာသည့် လူငယ်များကို စစ်တပ်ကပစ်ခတ်မှု လူငယ် ၁ ဦး ကျည်ထိမှန် ဒဏ်ရာရ
ရန်ကုန်၊ ဒီဇင်ဘာ ၂၃
မန္တလေးတိုင်း၊ မတ္တရာမြို့နယ်၊ အောင်ကန်သာရွာကို အကြမ်းဖက် စစ်တပ်က လက်နက်ကြီးဖြင့် ပစ်ခတ်ခြင်းကြောင့် ပြည်သူ ၁ ဦး သေဆုံးခဲ့ကြောင်း Voice Of Mandalay မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဒီဇင်ဘာလ ၂၂ ရက်နေ့ နံနက် ၁၁ နာရီခန့်တွင် မတ္တရာမြို့ ဘောလုံကွင်းရှိ အကြမ်းဖက် စစ်ကောင်စီ တပ်သားများက တိုက်ပွဲဖြစ်ပွားခြင်းမရှိဘဲ အောင်ကန်သာရွာကို လက်နက်ကြီးဖြင့် ပစ်ခတ် တိုက်ခိုက်ခဲ့ခြင်းဖြစ်ကြောင်း သိရသည်။
အကြမ်းဖက် စစ်တပ် ပစ်ခတ်သော လက်နက်ကြီးထိမှန်ပြီး ပြည်သူ ၁ ဦး သေဆုံးကာ ၃ ဦး ထိခိုက် ဒဏ်ရာ ရရှိခဲ့ကြောင်း သိရှိရသည်။
"စစ်ခွေးတွေက တိုက်ပွဲဖြစ်ပွားခြင်းမရှိဘဲနဲ့ လက်နက်ကြီးနဲ့ ပစ်ခတ်ခဲ့တာပါ။ သေဆုံးသူ အမည်ကိုတော့ မသိရသေးဘူး" ဟု Voice Of Mandalay မှ တာဝန်ရှိသူ က ပြောဆိုသည်။
အလားတူ မကွေးတိုင်း၊ ဆိပ်ဖြူမြို့နယ်တွင်လည်း ဆိုင်ကယ် စီးလာသည့် လူငယ်များကို အကြမ်းဖက် စစ်တပ်က လိုက်လံပစ်ခတ်ရာ ၁ ဦး ကျည်ထိမှန်ဒဏ်ရာရရှိခဲ့ကြောင်း Young Revolution Front အဖွဲ့မှ တာဝန်ရှိသူ တစ်ဦးက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဒီဇင်ဘာလ ၂၀ ရက်နေ့တွင် ဆိပ်ဖြူမြို့နယ်၊ ကပစ ၂၂ အနောက်ဘက်ဂိတ်စောင့် အကြမ်းဖက် စစ်သားများက ဆိုင်ကယ်စီးလာသည့် လူငယ်များကို လိုက်လံပစ်ခတ်ရာ လူငယ်ကျည် ၁ ထိမှန်ပြီး ပြင်းထန်ဒဏ်ရာရရှိခဲ့ကြောင်း သိရသည်။
"ဆိုင်ကယ်နဲ့လမ်းမှားပြီး မောင်းနှင်လာတဲ့ ဆိုင်ကယ် ၂ စီးကိုလည်း ကပစ ၂၂ အနောက်ဘက် ဂိတ်စောင့် စစ်ခွေးတွေက ရမ်းသမ်း ပစ်ခတ်လိုက်လို့ ဆိုင်ကယ်မောင်းနှင်လာတဲ့ လူငယ် ၁ ဦး ဗိုက်ပျော့နေရာကို ကျည်ထိမှန်ပြီး ၆ ချက် ချုပ်ထားရတယ်" ဟု Young Revolution Front အဖွဲ့မှ တာဝန်ရှိသူ က ပြောဆိုသည်။
ရန်ကုန်နှင့် ဧရာဝတီမှ ဆယ်ကျော်သက်အရွယ် လူငယ်များ ပျောက်ဆုံးမှု အလွန်များပြားလာ၊ ပဲခူးတွင် လူငယ် ၁ ဦးကို စစ်တပ်က စစ်မှုထမ်းရမည်ဟုဆိုကာ နေအိမ်ပေါ်တက်၍ ပေါ်တာဆွဲ ဖမ်းဆီး
ရန်ကုန်၊ ဒီဇင်ဘာ ၂၃
ရန်ကုန်တိုင်းနှင့် ဧရာဝတီတိုင်းတွင် အသက် ၁၄ နှစ်အရွယ် ကလေးငယ်များ ပျောက်ဆုံးမှု ပိုများလာကြောင်း မိသားစုဝင်တချို့နှင့် ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။
ရန်ကုန်တို်း၊ မြောက်ဒဂုံမြို့နယ်၊ မဟာမြိုင်အိမ်ယာတွင် နေထိုင်သော အသက် ၁၄ နှစ်အရွယ် မောင်ဘုန်းမြတ်သူရ (ခ) သားငယ်သည် ဒီဇင်ဘာလ ၂၂ ရက်နေ့ မွန်းလွဲ ၃ နာရီခန့်တွင် ဘောလုံးကန်မည်ဟုဆိုကာ နေအိမ်မှ ထွက်သွားစဉ် ဘောလုံးကွင်းနှင့် နေအိမ်ကို ရောက်ရှိလာခြင်းမရှိဘဲ လမ်းတွင် ပျောက်ဆုံးသွားခြင်းဖြစ်ကြောင်း သိရသည်။
ထိုသို့ ပျောက်ဆုံးသွားပြီးနောက် မိသားစုဝင်များက သူငယ်ချင်းနေအိမ်များနှင့် မောင်ဘုန်းမြတ်သူရ သွားတတ်လာတတ်သော နေရာများကို လိုက်လံရှာဖွေသော်လည်း တွေ့ရှိခြင်းမရှိကြောင်း သိရှိရသည်။
အလားတူ ဒီဇင်ဘာလ ၁၉ ရက်နေ့ကလည်း ရန်ကုန်တိုင်း၊ လှိုင်သာယာမြို့နယ်၊ အမှတ် ၅ ရပ်ကွက် ဒဂုံရွှေမျှားလမ်းတွင် နေထိုင်သော အသက် ၁၄ နှစ်အရွယ် လူငယ် ၁ ဦးသည် ဖခင်ဖြစ်သူ ဆူလိုက်၍ နေအိမ်မှ ထွက်သွားရာ ၃ ရက်ကြာသည်အထိ ပြန်လာခြင်းမရှိဘဲ ပျောက်ဆုံးနေကြောင်း၊ ၎င်းသွားလာတတ်သော နေရာများကို လိုက်လံ ရှာဖွေသော်လည်း တွေ့ရှိခြင်းမရှိသေးကြောင်း သိရသည်။
"လှိုင်သာယာ အမှတ် ၅ ရပ်ကွက် ဒဂုံရွှေမျှားလမ်းမှာ နေထိုင်တဲ့ အသက် ၁၄ နှစ်အရွယ် လူငယ် တစ်ဦး ပျောက်ဆုံးနေလို့ပါ။ သူရဲ့ အဖေ အမည်က ထွန်းထွန်းဝင်းပါ။ သူ့အဖေ ဆူလိုက်လို့ အိမ်ကနေ ထွက်သွားတာ ပြန်မလာတာ ဒီနေ့နဲ့ ဆို ၃ရက်ရှိနေပါပြီ" ဟု မိသားစုဝင်တစ်ဦးက ပြောဆိုသည်။
ထို့အတူ ဒီဇင်ဘာလ ၂၁ ရက်နေ့ မွန်းလွဲပိုင်း Delivery ပို့သည့် လူငယ် ၁ ဦးမှာလည်း အိမ်ပြန်ရောက်ခြင်းမရှိဘဲ ပျောက်ဆုံးသွားသဖြင့် မိသားစုက စိတ်ပူနေကြောင်း၊ အလားတူ ဒီဇင်ဘာလ ၁၈ ရက်နေ့ ရန်ကုန်မြို့တွင် မောင်စိုးသူကျော် (ခ)ကိုမောင်ချေ သည် အိမ်ပြန်လည်ရောက်ရှိခြင်းမရှိဘဲ ပျောက်ဆုံးနေကြောင်း လူမှုကွန်ရက်မှတစ်ဆင့် ထုတ်ပြန်ထားသည်။
ထို့ပြင် ဧရာဝတီတိုင်း၊ မြောင်းမြမြို့နယ်၊ ပြင်ရွာ အထက ကျောင်းတွင် ၁၀ တန်းတက်နေသည့် လတ်ပွတ်ကုလား ကျေးရွာတွင် နေထိုင်သော အသက် ၁၅ နှစ်အရွယ် မောင်ထွဋ်ရန်လင်းသည် ဈေးဝယ်သွားစဉ် ပျောက်ဆုံးသွားခြင်းဖြစ်ကြောင်း သိရသည်။
ဒီဇင်ဘာလ ၁၆ ရက်နေ့ နံနက် ၈ နာရီခန့်တွင် မောင်ထွဋ်ရန်လင်း သည် မြောင်းမြမြို့ကို ဆိုင်ကယ်ဖြင့် ဈေးဝယ်သွားစဉ် ပျောက်ဆုံးသွားခြင်းဖြစ်ပြီး ယနေ့ချိန်ထိ ပြန်လည်ရှာတွေ့ခြင်းမရှိသေးကြောင်း သိရှိရသည်။
အလားတူ ပဲခူးတိုင်း၊ မိုးညိုမြို့၊ ဇောတိက ရပ်ကွက်တွင်နေထိုင်သော အသက် ၃၀ နှစ်အရွယ် အမျိုးသား ၁ ဦးသည် ၂၀၂၂ ခုနှစ်တွင် ဖမ်းဆီးခံရပြီး ခံဝန်ဖြင့်နေထိုင်နေစဉ် ယခုနှစ် ဒီဇင်ဘာလ ၁၇ ရက်နေ့၌ အကြမ်းဖက် စစ်ကောင်စီ တပ်သားများက စစ်မှုထမ်းရန် လူလိုသည်ဟုဆိုကာ နေအိမ်တွင် လာရောက်ဖမ်းဆီးသွားကြောင်း ဒေသပြည်သူများက ရန်ကုန်ခေတ်သစ် သတင်းဌာနထံသို့ ပြောဆိုသည်။
"မိုးညိုမြို့၊ ဇောတိက ရပ်ကွက်မှာနေတဲ့ အသက် ၃၀ အရွယ် အမျိုးသား ၁ ဦးကို စစ်ခွေးတွေက ၁၇ ရက်နေ့ ညမှာ နေအိမ်မှာပဲ လာရောက် ဖမ်းဆီးသွားတယ်။ သူက ၂၀၂၂ ခုနှစ်က တစ်ခါ ဖမ်းဆီခံရဖူးတယ်။ စစ်ကြောရေးကနေ ပြန်လည်လွတ်မြောက် လာတာ ခံဝန်နဲ့ နေထိုင်နေရသူပေါ့။ အခု နောက်တစ်ကြိမ်း ဖမ်းဆီခံရတော့ စစ်မှုထမ်းထဲ လူလိုလို့ ပို့ဖို့ အတွက်လို့ သိရတယ်" ဟု ဒေသပြည်သူ တစ်ဦးက ပြောဆိုသည်။
အကြမ်းဖက်စစ်ကောင်စီတပ်က လစဉ် စစ်မှုထမ်းရန် တပ်သားသစ်အရေအတွက် ပြည့်မီခြင်းမရှိသဖြင့် မြန်မာနိုင်ငံတစ်ဝန်းလုံးတွင် ပေါ်တာဆွဲ ဖမ်းဆီးမှုများကို အကြီးအကျယ် လုပ်ဆောင်နေကြောင်း သိရှိရသည်။
Khit Thit သတင်းဌာန၏ ဒီဇင်ဘာ ၂၃ ရက် နေ့လယ်ပိုင်း ရုပ်သံသတင်းအစီအစဉ်
By ရန်ကုန်ခေတ်သစ်
ဒီကနေ့ ဒီဇင်ဘာ ၂၃ ရက် နေ့လယ်ပိုင်းတင်ဆက်ပေးမယ့် သတင်းတွေကတော့
-အာရက္ခတပ်တော် AA က ဖမ်းဆီးရရှိထားထဲ့ အကြမ်းဖက် စစ်ကောင်စီတပ်က စစ်သုံ့ပန်း ဗိုလ်မှူးချုပ် ၃ ဦးကို ပြည်သူအပေါ် ကျူးလွန်ထားတဲ့ စစ်ရာဇဝတ်မှုတွေအလိုက် အပြစ်ပေးအရေးယူမှာ ဖြစ်တယ်လို့ AA ပြောခွင့်ရပုဂ္ဂိုလ် ဦးခိုင်သုခက ရန်ကုန်ခေတ်သစ်ကို ပြောပါတယ်။
-မကွေးတိုင်း ငဖဲမြို့နယ်မှာ အမ်းမြို့နယ်ကို သွားလို့မရအောင် ပိတ်ဆို့ထားတဲ့ တော်လှန်ရေပူးပေါင်း တပ်တွေက စစ်ကောင်စီတပ်ရဲ့ စစ်ကူစစ်ကြောင်းတွေကို ကြားဖြတ်တိုက်ခိုက်ခြေမှုန်းမှုအတွင်း စစ်ကောင်စီတပ်သား ၁၄ ဦးကတော့ အသီးသီး သေကုန်ကြပြီလို့ အရှိုချင်းကာကွယ်ရေးတပ် (ACDF) ရဲ့ တာဝန်ခံ ဆလိုင်းခနီ-လေဗွေက ရန်ကုန်ခေတ်သစ်ကို ပြောပါတယ်။
-ချင်းပြည်နယ် မင်းတပ်မြို့ကို ချင်းညီနောင် တော်လှန်ရေးပူးပေါင်းတပ်တွေက သိမ်းပိုက်ပြီးတဲ့နောက် အကြမ်းဖက် စစ်ကောင်စီရဲ့ ခလရ ၂၇၄ ဗဟိုကင်းမှာ ချိတ်ဆွဲထားတဲ့ အကြမ်းဖက် မင်းအောင်လှိုင်ရဲ့ ဓာတ်ပုံကို ဖြုတ်ချပြီး ခြေနဲ့ နင်းချေ လိုက်တဲ့ သတင်းအပါအဝင် နောက်ဆုံးရသတင်းတွေကို တင်ဆက်ပေးပါမယ်။
https://youtu.be/HWgJBbzE4sA?si=loS1otuUz8otbzr1
ထိုင်းနိုင်ငံ ချွန်ပူလီ အထပ်သားစက်ရုံတွင် အလုပ်ပိတ်ရက်ရရှိရေး ၊ အချိန်ပိုကြေး ရရှိရေးနှင့် အလုပ်လုပ်ခွင့် သက်တမ်းတိုးကုန်ကျစရိတ် လူတစ်ဦးလျှင် ထိုင်းဘတ် ၁၄၄၀၀ ကျော် တောင်းခံမှု လျှော့ချရေး မြန်မာအလုပ်သမား ၆၀၀ ကျော် ဆန္ဒပြ
ရန်ကုန်၊ ဒီဇင်ဘာ ၂၃
ထိုင်းနိုင်ငံ ချွန်ပူလီမြို့ရှိ HOEN FONG HOME LIVING TECHNOLOGY ကုမ္ပဏီ၏ အထပ်သားစက်ရုံ တွင် အလုပ်လုပ်ကိုင်နေသည့် မြန်မာအလုပ်သမားများမှာ တရားဝင်အလုပ်ပိတ်ရက်များ ပိတ်ပေးရေး၊ အလုပ်ပိတ်ရက်များတွင် အလုပ်ဆင်းရသည့်အတွက် အချိန်ပိုကြေးမပေးမှု၊ အလုပ်လုပ်ခွ့် သက်တမ်းတိုးရာတွင် လူတစ်ဦးလျှင် ထိုင်းဘတ် ၁၄၄၀၀ အထိ ကောက်ခံနေမှုကို လျှော့ချပေးရေး စုပေါင်း၍ ဆန္ဒပြနေကြကြောင်း သိရှိရသည်။
ယနေ့ ဒီဇင်ဘာလ ၂၃ ရက်နေ့တွင် မြန်မာအလုပ်သမား ၆၀၀ ကျော် စုပေါင်း၍ ဆန္ဒပြနေကြခြင်းဖြစ်ကာ အလုပ်ပိတ်ရက်များ မပိတ်ပေးခြင်း၊ နားရက်များ မပေးခြင်း၊ စာရွက်စာတမ်းကြေးများ မတရားကောက်ခံခြင်းများ အပါအဝင် အတင်းအကျပ်အလုပ်ခိုင်းစေနေခြင်းရပ်တန့်ရန် တောင်းဆိုးနေကြခြင်းဖြစ်ကြောင်း သိရှိရသည်။
“ပီပိုင် အလုပ်ပိတ်ရက်ကို ပိတ်မပေးလို့ပါ။ ပြီးတော့ အလုပ်သမားတွေအတွက် နားရက်တွေရော မပေးလို့။ စာရွက်စာတမ်းဖိုးတွေလည်း မတရားကောက်နေလို့ လူတစ်ဦးကို ထိုင်းဘတ် ၁၄၄၀၀ ကောက်တာ။ ကျွန်တော်တို့မှာ သူဌေးလည်းရှိတယ်။ ပကန်စံခွန်လည်း ရှိတယ်။ အဲဒါကို ၁၀၀၀၀ တောင်းတယ်။ သူများ စက်ရုံတွေမှာ ၆၅၀၀ တည်းပါ။ MOU နဲ့ လာတဲ့ သူတွေဆိုလည်း မြန်မာပြည်က တစ်မျိုး ထိုင်းကိုရောက်လာတော့ တစ်မျိုး ခိုင်းတာ” ဟု ဆန္ဒပြအလုပ်သမားတစ်ဦးက ပြောကြားသည်။
လက်ရှိတွင် ကုမ္ပဏီတာဝန်ရှိသူများနှင့် ညှိနှိုင်းနေဆဲဖြစ်ကြောင်း အဆိုပါ စက်ရုံသည် အထပ်သား စက်ရုံဖြစ်ပြီး အလုပ်သမားများကို အလုပ်ခိုင်းရာတွင်လည်း ပိုက်ဆံကို နေ့စားသဘောသာ ပေး၍ အလုပ်ခိုင်းရာတွင်မူ ပုတ်ပြတ်သဘောမျိုး ခိုင်းစေကြောင်း ဆန္ဒပြအလုပ်သမားများ ထံမှ သိရှိရသည်။
ပီပိုင်အလုပ်ပိတ်ရက်ဆိုသည်မှာ ထိုင်းနိုင်ငံ အစိုးရက တရားဝင်ပိတ်ပေးသည့် ရက်များကို ဆိုလိုခြင်းဖြစ်ပြီး အဆိုပါ အလုပ်ပိတ်ရက်များတွင် အလုပ်သမားများကို အလုပ်မပိတ်ပေးဘဲ အတင်းကြိမ်းမောင်းကာ အလုပ်ဆင်းခိုင်းခြင်းဖြစ်ကြောင်း၊ ဖက်လုံးပိတ်ရက်ဆိုသည်မှာ အလုပ်သမားများ တစ်နှစ်ရရှိရမည့် နားရက်များကို ဆိုလိုခြင်းဖြစ်ပြီး ဖက်လုံးနားကြေးအတွက်လည်း ပိုက်ဆံထပ်ဆောင်းပေးခြင်းမရှိဘဲ အလုပ်ခိုင်းစေကာ အလုပ်သမားဥပဒေများကို ချိုးဖောက်နေခြင်းဖြစ်ကြောင်း ဆန္ဒပြအလုပ်သမားများက ပြောဆိုသည်။
မရမ်းကုန်းမြို့နယ်၊ APOLLO ဟိုတယ်တွင် မင်္ဂလာပွဲ လာတက်သည့် စစ်ဖက်ရေးရာ လုံခြုံရေးအဖွဲ့မှ ဗိုလ်မှူး ဇေယျာမင်းကို ပစ်ခတ်မှု ဒဏ်ရာရရှိ
ရန်ကုန်၊ ဒီဇင်ဘာ ၂၃
ရန်ကုန်တိုင်း၊ မရမ်းကုန်းမြို့နယ်၊ APOLLO ဟိုတယ်တွင် မင်္ဂလာပွဲ လာတက်သည့် စစ်ဖက်ရေးရာ လုံခြုံရေးအဖွဲ့မှ ဗိုလ်မှူး ဇေယျာမင်းကို ပစ်ခတ်ခဲ့ကြောင်း Yangon Phoenix မှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။
ဒီဇင်ဘာလ ၂၂ ရက်နေ့ မွန်းလွဲ ၂ နာရီဝန်းကျင်အချိန် မရမ်းကုန်းမြို့နယ် ၂ ရပ်ကွက်၊ အထက်ဗဟိုလမ်းရှိ APOLLO ဟိုတယ်တွင် ညီမဖြစ်သူ၏ မင်္ဂလာ ဆောင်သို့ လာရောက်သည့် ဗိုလ်မှူးဇေယျာမင်း ကို အပြန်လမ်းတွင် သေနတ်ဖြင့် ပစ်ခတ်ခဲ့ကြောင်း၊ ဗိုလ်မှူးဇေယျာမင်းမှာ ဒဏ်ရာရရှိပြီး စိုးရိမ်စရာမရှိကြောင်း သိရှိရသည်။
"သူတို့က ကားနဲ့မောင်းပြေးတယ်။ ကားနဲ့ထွက်လာတာကို လိုက်ပစ်တာပါ။ လောလောဆယ်အထိကတော့ဒဏ်ရာရရှိတယ်လို့ပဲ သိရပါတယ်" ဟု တော်လှန်ရေး သတင်းရင်းမြစ်က ဆိုသည်။
ပစ်ခတ်ခံရသော ဗိုလ်မှူးဇေယျာမင်းသည် ပြင်ဦးလွင်ရှိ တပ်မတော်စက်မှုလက်မှုသင်တန်းကျောင်း တွင်တာဝန်ထမ်းဆောင်နေရာမှ ညီမဖြစ်သူ၏ မင်္ဂလာဆောင်သို့ လာရောက်ခြင်းဖြစ်ကြောင်း သိရှိရသည်။
ဓာတ်ပုံ- ယမန်နေ့ ပစ်ခတ်ခံရပြီး ဒဏ်ရာရရှိသွားသော ဗိုလ်မှူးဇေယျာမင်း။
Khit Thit သတင်းဌာန၏ ဒီဇင်ဘာ ၂၃ ရက် မနက်ပိုင်း ရုပ်သံသတင်းအစီအစဉ်
By ရန်ကုန်ခေတ်သစ်
ဒီကနေ့ ဒီဇင်ဘာ ၂၃ ရက် မနက်ပိုင်း တင်ဆက်ပေးမယ့် သတင်းတွေကတော့
-ကန်ပက်လက်မှာ တပ်စွဲထားတဲ့ စစ်သားနဲ့ရဲတွေအားလုံး မြို့ကနေ စွန့်ခွာသွားတာကြောင့် ကန်ပက်လက်မြို့ကို ပြည်သူတွေနဲ့ တော်လှန်ရေးတပ်တွေက သိမ်းပိုက်ထိန်းချုပ်လိုက်ပြီလို့ CDF ကန်ပက်လက်သတင်းရင်းမြစ်က ပြောပါတယ်။
အကြမ်းဖက်စစ်ကောင်စီတပ်ရဲ့ အနောက်ပိုင်းတိုင်းစစ်ဌာနချုပ်ကို AA က အပြီးသတ်သိမ်းပိုက်နိုင်မှုအပေါ် အမျိုးသားညီညွတ်ရေးအစိုးရ-NUG ယာယီသမ္မတဒူဝါလရှီးလက ဂုဏ်ယူဝမ်းမြောက်ပြီး စစ်အာဏာရှင်ရဲ့ အဆုံးသတ်နေဝင်ချိန် ရောက်ရှိတော့မှာကို ပြသနေကာ စစ်အုပ်စုအဆုံးသတ်ပြုတ်ကျရေး အတူတကွ လက်တွဲတိုက်ပွဲဝင်သွားမယ်လို့ AA ဆီကို သဝဏ်လွှာပေးပို့ သန္နိဋ္ဌာန်ပြုလိုက်ပါတယ်။
ပဲခူးတိုင်း၊ တောင်ငူမြို့အခြေစိုက် အကြမ်းဖက်စစ်တပ်ရဲ့ တောင်ပိုင်းတိုင်းစစ်ဌာနချုပ်-တပခ ကို ၁၀၇ မမ ရှော့တိုက်ဒုံး ၇ လုံးနဲ့ ပစ်ခတ်တိုက်ခိုက်ခဲ့ရာ အရာရှိ ၄ ဦးအပါအဝင် တပ်သား ၁၂ ဦးသေဆုံးပြီး စစ်ဦးစီးဌာန စစ်ဆင်ရေးရုံးခန်း၊ စခန်းရုံး၊ အရာရှိလိုင်းခန်းနဲ့ ကား ၃ စီး မီးလောင်ပျက်စီးခဲ့တဲ့ သတင်းအပါအဝင် နောက်ဆုံးရသတင်းတွေကို တင်ဆက်ပေးပါမယ်။
https://youtu.be/UmtzordD5Xs?si=ABFYNkGHV21vHi6K