5137
القصائد الرثائية للآل الأطهار ع
بكل سنه بعاشور نبچي أمن البدايه
ننجمع يحسين نرفع ليك رايه
ويى هلال امحرم انجدد حزنه
ياحسين وخدمتك للأمه جنه
وي هلال امحرم انجدد حزنه
.......
ندعي ربنه ايديم هل خدمه علينه
وعل صدر يوميه نطبعها ادينه
نواسي احنه فاطمه الزهره الحزينه
نصيح يامولاتي فدوه سجّلينه
.....
الرايه حين التنرفع نعلن مصيبه
ونذكره ام الخدر من ضلت غريبه
وزينب اتصيح الكفلني امنين اجيبه
واخ ياعبدالله شيسكّت نحيبه
......
شما وگفنه ونرفع الرايه بألمنه
حتى نعلن للمله الليله خدمنه
نشوفه وي الخدم يتخلدّ اسمنه
وعالخيم دمعاتنه اتخضب علمنه
.....
عدنه نجمه مانصدها بهل ليالي
عدنه چم خادم نگله امچانه خالي
لأن خادم للعقيله انحسبه غالي
وصيته يبقى شما يمر الدهر عالي
.......
ياحسين الموكب ابصايتك حفظه
واليخدمك ندري بيه شكبر حضه
الغايه هايه علينه انت كون ترضى
اخ يامن صدرك الحافر يرضه
ــــــــــــــــــ
الشاعر محمد حسن ضيغم
/channel/kasaedalatharDaygham
الف انعم الله اعليك يابو اليمه
يزل جدمي وانت تجيبني الهل خدمه
ــــــــــــــــــ
يل جاذبية حبك اتحير اعقول
حبك جذبني وهذا كلش معقول
هنياله يوم الصرت عندك مقبول
ترد اليحبّك ليك لو زل جدمه
ـــــــــــــــــ
شكرا الك كلش قليل احجيهه
المفروض عيني المحنتك اعميهه
يم جدمك الروح ابلاش انطيهه
اشكبره حضي وبسمك آنه اتسمّه
ــــــــــــــــــــ
يمك رسى كَليبي وفجت بشواكَك
يلّي بدليلك شلت كل عشاكَك
فراك الخلكَ سهله الذبحني افركَك
والهجر يذبح ياحسين بسهمه
ــــــــــــــــ
يطشّرني وكتي وترجع انت تلمني
ومن حزني ليك اتريد ما تحرمني
لو زرت احس الصدرك انت اتضمني
وبتربتك عطرك حسين اشتمّه
ــــــــــــــــــ
تقبلني خادم هاي والله جبيره
رغم اليخدمك ماخلص تقصيره
بدونك احس دنياي حيل ازغيره
ياربي دوم اعلينه هاي النعمه
ـــــــــــــــ
خبزة حلال الخدمه ما تتلوّث
وجيل وبعد جيل ابفخر تتوارث
عاقبتي حر ماريدهه ابن الاشعث
تفتحلي بابك ها يباب الرحمه
ــــــــــــــــ
خل صدري اخسفه ابمجسلك يامولاي
وعيب استلذ بالماي وانت بلاماي
يل نمت عاري اعله الرمل ماكو فياي
فدوه آنه اروحن ليك اسهل جلمه
ـــــــــــــــــــ
الشاعر محمد حسن ضيغم
/channel/kasaedalatharDaygham
لك البكاء ... يامهدي يامهدي
لك العزاء... يامهدي يامهدي
ـــــــــــــــــــــ
للحسين امحضّرين ادموعنه
وللطم جهّزنه كل ضلوعنه
وياك ندخل كربله مهدينه
هاي كل تخطيطنه المشروعنه
لك الولاء ... يامهدي يامهدي
لك العزاء... يامهدي يامهدي
ـــــــــــــــــــــ
ننهدم ومحرّم اليبنينه
ونرجع اكثر نخدمك تدرينه
نقابلك وتوقّع النه اوراقنه
الشيعي خادم يفتخر تعيينه
يرف اللواء ... يامهدي يامهدي
لك العزاء... يامهدي يامهدي
ـــــــــــــــــــــ
الرايه ما تنزل ابد تدريهه
نبيع كلشي سيدي ونشريهه
جبال متهزنه رياح الفتنه
الرايه عدنه ولحضه ما ننطيهه
ترف بالسماء ... يامهدي يامهدي
لك العزاء... يامهدي يامهدي
ـــــــــــــــــــــ
وقف يم جدمك جميع اعمارنه
ها يثار الله الّي تاخذ ثارنه
ندري ام الحسن من كَبر الحسين
من نجي تنادي هله بزوارنه
في كربلاء ... يامهدي يامهدي
لك العزاء... يامهدي يامهدي
ـــــــــــــــــــــ
نعيش محنة كربله وآلآمهه
وبنت الحسين انجوت اجدامهه
من مشت تركض لبوهه وشافت
بلايه راس حسين ضل جدّامهه
بفيض الدماء ... يامهدي يامهدي
لك العزاء... يامهدي يامهدي
ـــــــــــــــــــــ
الشاعر محمد حسن ضيغم
/channel/kasaedalatharDaygham
انه وام عباس والله ابدارنه
نصيح يحسين ولهب كل نارنه
( متى ترانا ونراك)
ــــــــــــــــ
ضعنك مشه ... ومشت وياه المهج يابو الوفه
ضعنك مشه ... عيونه العينك تضل متلهّفه
ميل ساعه خطوتك لمن مشيت ...بجت ام عباس وبدارك بجيت
دموعنه اتناديك ارجع ياحسين ....بيتنه انت بدونك احنه بلايه بيت
والّي ينشد بعدك احنه شلونّه
جلمه ما نحجي الّي تحجي عيونّه
( متى ترانا ونراك)
ــــــــــــــــ
نكَعد سوه ... نحجي بيك انصبّر احنه ارواحنه
نكَعد سوه ...بدون ما ندري ويطر مصباحنه
ها ترد ها مترد حيرتنه هاي ...وحده حسره اوّحده لا ماعدهه راي
اشواكَ كاتلهه العطش خافن تموت ... ياحبيب ارواحنه بس انت ماي
تصبّر اعليّه واصبر اعليهه
امل بيّه نفس ذاك البيهه
( متى ترانا ونراك)
ــــــــــــــــ
نزرع ورد ... قرّرينه برجعتك يابو علي
نزرع ورد ...نصيح يا ميّه هله بيكم هلي
انه افرش دار ابوي مقرره ...بكل مكان افتر بهاي المبخره
وادري ام عباس ياخذهه العزم ...سنين تنثر لبن امنه الطاهره
لون كَالوا ضعن ابو اليمه رجع
كَلبي كَبل الجسد بيه اشعر طلع
( متى ترانا ونراك)
ــــــــــــــــ
كلشي انتهى ... هيج صرنه انحس لان طال الوكت
كلشي انتهى ...متت يا يمّه واهي تكَلّي متت
راحوا ومحّد يجيب اخبارهم
الباب مادكَّاه جف خطارهم
بيت جان مضوّي بهله ومستجن
هسه وحشه وخالي منهم دارهم
الزاد ما يهنالنه ولا لذّه بيه
الموت لو صح لينه صدّكَ نشتريه
( متى ترانا ونراك)
ــــــــــــــــ
ريح الحزن ... جابت اخبار التسد انفاسنه
ريح الحزن ...دفعه وحده الرمش شاب وراسنه
عالحرم ويلي الخيم حركَوهه
جثث حمره اعله الترب خلّوهه
حسين فوك ارمال صحره كربله
جثّته بخيل العده يدوسوهه
الكَمر يم جرف النهرضل نايم
ماكو جف من عنده اصبح سالم
( متى ترانا ونراك)
ــــــــــــــــ
الشاعر محمد حسن ضيغم
/channel/kasaedalatharDaygham
الباني خيمه بيده
يجي هسّه اريده
ردته يلفي اليه ... يرد كَوم اميّه
ـــــــــــــــ
بس شفت كَوم اعتنت صوب الضعينه
اجه ابالي كافلي الروحه حنينه
صوت اسمع من العيله الحزينه
وين ابو فاضل تمنّيناه يجينه
شلون منظر موسهل ..ماينحمل .. راح الشمل .. عكَب الكفلنه
شلون منظر ياعلي ... وبلا ولي ... دمعي يهلي ...جا منهو النه
النار بينه شبّت
جيوش لينه كَربت
ردته يلفي اليه ... يرد كَوم اميّه
ـــــــــــــــ
صرت ماشوف الدرب حتى اعتنيله
البينه صارت ياخلك لا مو قليله
هذا حال الضعن من يبعد كفيله
ابين وادم غرب متضل عندي حيله
شكَد جبيره امصيبتي ...وكل محنتي ..بلا رايتي ...ابقى وحيده
شكَد جبيره الفاجعه .. متلوعه ... ومكَطعه ..جفين ايده
الغاره يمي صارت
واله عيني دارت
ردته يلفي اليه ... يرد كَوم اميّه
ـــــــــــــــ
لاتحركَون العمد بي ريحه منّه
هوّه بجفوفه الحنينه كفل ضعنه
شرد اكَل لسكينه لو ناشدت عنّه
خل اضم دمعاتي وشيخفي الونّه
ريت للطف ماجيت .. ولا بجيت .. ولا لكَيت الصار يمي
ريت للطف كل ذكر .. ما ينذكر ... طول العمر .. حزني ابدمّي
بكربله المصيبه
اصبحت غريبه
ردته يلفي اليه ... يرد كَوم اميّه
ـــــــــــــــ
اه واويلي الخيم شبّت علينه
نطفّي بيهه والجمر يلسع بدينه
ابد لا ماحسّبت يعله بجينه
وكافلي مكَطوعه يسراه ويمينه
نايم بصف النهر ...كَلبي اكسر.. جفه انبتر.. مفضوخ راسه
نايم بصف الجرف ... ماينعرف ... لاينوصف ...شنهي احساسه
سهم طافي عينه
وينسمع ونينه
ردته يلفي اليه ... يرد كَوم اميّه
ـــــــــــــــ
شلون اخبره بالخيم خلصت فرد نوب
من البواجي يالولي ماضلّت كَلوب
بين هذا وذاك ضاعت كل الدروب
شمعه جن كل وحده منّه وامست تذوب
شتّموني ياكَمر ...تارك اثر ... كلش كثر ... ضرب الاعادي
شتموني وبعلي ... صرت انولي ... وجمري يغلي ... بداخل فؤادي
متوني زركَه صارت
آل اميّه جارت
ردته يلفي اليه ... يرد كَوم اميّه
ـــــــــــــــ
الشاعر محمد حسن ضيغم
/channel/kasaedalatharDaygham
اذا همَك كبر بس صفّي النيّه
ودكَ باب الحنينه الحاجه مكَضيه
ـــــــــــــــــــــــ
بس صفّي النيّه وأهمل الدمعه
واقره الفاتحه الهه وأشعل الشمعه
معروفه اليمد جف خالي مترجعه
هي ام الوفه واهل الكرم هيه
ــــــــــــــــ
ام الاربعه الماهمهه من راحوا
ولا همه ضحايه اعله الارض طاحوا
عطر بالغاضريه اعله الخلكَ فاحوا
وضلهم خسر كلمن مااحتمه ابفيّه
ـــــــــــــــــــ
اذا مهموم حيل وحاجتك كلفه
وبيك جروح كل ضنّك فلا تشفه
بس اقسم عليهه بالرخص جفّه
صفحات الهموم اتصير مطويّه
ـــــــــــــــــــ
باب الحاجه ام عباس ندريهه
وعنوان الكرم بالسمه اموصفيهه
الطلبه بسرعه للينخاهه تنطيهه
وهذا الامر واضح ميه بالميه
ــــــــــــــــــــــ
ام عباس أي والنعم من عدهه
طينه طيبه ومن طيب والدهه
ايد التنمد الله والله متردهه
واقسم بالمشت عالنوكَ مسبيه
ـــــــــــــــــ
شكَد ناحت او ونّت لجل ذبح حسين
وعجبه شلون ضلّت ماعمت هالعين
جروح هواي مو بس جرح لا جرحين
وجهه الطف اضن غيّر معانيّه
ـــــــــــــــــــــ
الشاعر محمد حسن ضيغم
/channel/kasaedalatharDaygham
الضعن طب الكربله وحس بالمصاب
الشافه ما يدري حقيقه او سراب
ــــــــــ
من المدينه الضعن من طب كربله
ونزلت اعله ارض كل العايله
ليش وحّدهه المدامع هامله
وليش وحده الكَلب جن بحسره ذاب
ـــــــــــــــــ
بالطفوف النوكَ لمّن نوّخن
بيده ابو فاضل بنه اخيام الضعن
ويمّه كَعدت حايره اخت الحسن
تريد تعتب بس صعب تدري العتاب
ــــــــــــــــــــ
تكَول زينب كَلبي يلجمني احس
وعيني رفّت يابوفاضل من امس
جنّه ضعني ابدونك انت ينحرس
وانت تبقى بلاجفوف اعله التراب
ــــــــــــــ
دنّك العباس ويكَلهه نعم
منيدي باجر يوكَع اتشوفي العلم
شلون اكَوم وتحتركَ كل الخيم
وآنه من دمي صبح ليّه الخضاب
ـــــــــــــــــــ
ابو اليمه نايم ابحر الشموس
والخيول بلا رحم صدره تدوس
عالرماح انرفعت اتشوفي الرؤوس
بدر عزكم تنظريله شلون غاب
ــــــــــــــ
الشاعر محمد حسن ضيغم
كوني يانار ... كوني يانار
برداً على ذاك المخيّم
ـــــــــــــــــــــ
الخيمه خيمه زينب وبيهه الحرم
وسهم يرموهه وفلا يخطي السهم
شافت ام الخدر ويلي اشجم ألم
بالمصايب امر واقع وانحسم
عظم المصاب ... عظم المصاب
بذاك الجره بس الله يعلم
ــــــــــــــــــــــــــ
هجمت الكَوم ومهر يسبكَ مهر
هذا شايل سيف ذاك ايوج جمر
هذا كلّه بأمر من ذاك الشمر
كَال خلّي النار بيهم تستعر
بهجمة الخيل ... بهجمت الخيل
جم حيل من زينب تهدّم
ــــــــــــــــــــ
حاله صعبه ايشوفهه حسين ويصد
كلت كَلبه الحسره ينظر من بُعد
الجيش عل خيمه اجه مراكض يهد
وللسلب واحد اصبح مستعد
يكّوم ويطيح .... يكوم ويطيح
والنحر حسره يقذف الدم
ــــــــــــــــــــ
يامن الجن وانس بيك اكتفت
بسمك ابراهيم نيرانه طفت
اطفي نار اخيامي يارب البخت
وكون امرك هذا زينب آمنت
رب الاكوان .... رب الاكوان
من النار اريد العيله تستلم
ــــــــــــــــــــــ
لهب خيمتنه وصل حد السمه
وفيّت اعلينه الزجيه فاطمه
الدنيه والهذا السبب مطرت دمه
شلون تبجي اطفالنه ومتألّمه
من الانذال .... من الانذال
بالسوط جم متن التورّم
ـــــــــــــــــــــــــــ
الشاعر محمد حسن ضيغم
/channel/kasaedalatharDaygham
اركض اجيت وجايبه الماي
كَبل الذبح ردت الحكَ بهاي
بس لكَيتك منّحر
بويه منك اعتذر ... بويه يحسين
ــــــــــــــــ
ادري بجفوفي زغار المهم كلت اوصل اله
ولأن تعبانه يبويه جبيره صارت كربله
رحت للشاطي وبجيت
الجود عمّي اتذكّريت
بهل هظيمه وهل فجيعه
صحت ياربي شجنيت
يمي النهر ودموعي تنسال
والحكَ كَلت من كَبل الحبال
خاف اروحن باليسر
بويه منك اعتذر ... بويه يحسين
ــــــــــــــــ
صغيره بس كَلت احمل الهم بيّه ادري شماجره
خل اروّي حسين ضامي كَبل كَطعت منحره
ادري جويه بأيدي هاي
وأدري عدواني وراي
حتى لو تلجمني ايدي
المهم اوصل ليه ابماي
بالخيمه وبنص كَلبي نيران
صعبه يموت حسين عطشان
عليه كَلبي منكسر
بويه منك اعتذر ... بويه يحسين
ــــــــــــــــ
بويه يم النهر آنه واحس كل حيلي انهدم
ساعه اصدّن ليك بويه وساعه اصدّن للخيم
خيم تتلاهب صفت
وعيني بالسطره انعمت
وعمّتي ماادري بيهه
الياكتر زينب مشت
يامن بروحي وعمري اشريك
كل همي اوصل ليك واسكَيك
سهله انطيك العمر
بويه منك اعتذر ... بويه يحسين
ــــــــــــــــ
رغم ما عطشانه بويه ماضكَت كَطره ابد
جبت ماي بأيدي واركض ومدري الك ممشه اشبعد
اركض وكَلبي انمرد
ومدري الك بويه شبعد
خوفي يتبدّه امنديه
جم امل بيّه انولد
يتبدّه والجمره ابوريدي
مرتين وارجع اترس ايدي
شكَد صعب هذا الامر
بويه منك اعتذر ... بويه يحسين
ــــــــــــــــ
من بعيد وشفت راسك عالرمح ضل منرفع
واختلط ماي الّي جبته بويه والله ويالدمع
شفت ضلعك منهشم
وانكشف ذاك الحلم
نزلت ايدي اتبدّه مايي
وحرت بيك شلون الم
يمك كَعدت ويجري دمعي
يابعد ضلعك هذا ضلعي
ريت حز راسي الشمر
بويه منك اعتذر ... بويه يحسين
ــــــــــــــــ
الشااعر محمد حسن ضيغم
/channel/kasaedalatharDaygham
حسين من يگرب أهلال محرمه
خلي عينك شابحه الصوب السمه
راح تنظر ثوب مصبوغ بدمه ... احسيناه
.ـــــــــــــــــــــــ
ليله اولى .... ينّشر بيهه السواد
ليله اولى ... والوحي يعلن حداد
فاطمه تحضّر دمعها
تلطم ينزف ضلعها
الدنيه ذيج الّي جبيره
اتضيكَ متصير شوسعها
الليله سهم جبير صوّب فاطمه
راح تنظر ثوب مصبوغ بدمه ... احسيناه
.ـــــــــــــــــــــــ
هل محرّم ...والملائك بي تضج
هل محرم ... لجل ابو اليمه تعج
والقميص اتنشره بالهم
وهي بين الحسره والغم
ياقميص حسين ويلي
بالسماء املطّخ ابدم
تنادي ويلي اعليه وعياله بضمه
راح تنظر ثوب مصبوغ بدمه ... احسيناه
.ـــــــــــــــــــــــ
هلال حزنه ....يحجي محنة كربله
هلال حزنه ...وكل مصاب العايله
انفاسنه اتضل ياحسين
اجروحنه اتضل ياحسين
السهر يحله وما نعوفه
لان نشتم ياحسين
ارواحنه من الازل بيه امتيّمه
راح تنظر ثوب مصبوغ بدمه ... احسيناه
.ـــــــــــــــــــــــ
والمواكب .... احزام شدّت للألم
والمواكب ... تعيش جمرات الخيم
ملتقى الجف والصدور
وتشعل اشموع وبخور
لولا خوف امن الله والله
جان كَطعوهه النحور
سنين عاشت عالسبي متألّمه
راح تنظر ثوب مصبوغ بدمه ... احسيناه
.ـــــــــــــــــــــــ
الغاضريه .... جمره تسعر للحشر
الغاضريه ... علّي سحكَوله الصدر
يصد خيماته تشب
وهو دامي اعله الترب
وعيلته يصد ليهه راحت
بالسبي الدار الغرب
والسباهم من عسن عينه بعمه
راح تنظر ثوب مصبوغ بدمه ... احسيناه
.ـــــــــــــــــــــــ
الشاعر محمد حسن ضيغم
/channel/kasaedalatharDaygham
بالمصطفى والمرتضى وفاطم
ياربي عجّل بظهور القائم
ــــــــــــــ
متى ينادي الثأرَ للحسينِ
وبالضياءِ يملي كلَ عينِ
كنّا وما زلنا على يقينِ
بسيفهِ نحو الطفوفِ قادم
ــــــــــــــــــ
متى ترانا ونراكَ دوماً
قلنا وليسَ الامرَ صارَ حُلماً
انَا على الموعدِ يأتي يوماً
لِيشفي جُرحاً كان في الفَواطم
ـــــــــــــــــ
اين الزكيُ وارثُ الزكيّه
منتظرونَ الطلعَةَ البهية
عروقهُ تنبضُ هاشمية
فَيَسحقُ بالحقِ كلَ ظالم
ـــــــــــــــــ
مازالَ يبكي لأنينِ زينب
وَقَلبُها المُلَوعُ المُعَذّب
دماً دموعُ المهدي تبقى تُسكب
من ضَن ناس الطفَ فهو واهم
ـــــــــــــــــــــــــ
كيف له ينسى جراحَ الطفِ
ورايةً وقربةً وكفِّ
جسمُ الحسينِ الالف فوقَ الالفِ
جراحهُ وليسَ عضوٌ سالم
ــــــــــــــــ
يبكي دما في الصبحِ والعشيّه
انينهُ ما زالَ يا رقيّه
مكتوفةٌ مشتومةٌ مسبيه
الله فيما جرى فيكِ عالم
ــــــــــــــــــــ
الشاعر محمد حسن ضيغم
/channel/kasaedalatharDaygham
كيفَ لي اُقنُعُ نفسي عنّي راضٍ ياحسين
وأنا المُذنبُ حقاً بشهودِ المَلَكين
ــــــــــــــــــــــ
انّني لم استحيكَ في الخلاء
لم اُبالي مايحلُّ من بلاء
انّي ماعدتُ جليس العلماء
وغُررتُ بطريقِ الاشقياء
خجلاً جأتُ اليكَ خذني مكتوفَ اليدين
وأنا المُذنبُ حقاً بشهودِ المَلَكين
ــــــــــــــــــــــ
للدواهي العضمى انّي صاحبٌ
ولفعلِ الذنبي انّي راغبٌ
قد اتيتُ اليومَ حرٌ تائبٌ
واميرٌ صرتَ حقاً وأبو
كنتُ شيءً يا امامي حسرة اصبحتُ اين
وأنا المُذنبُ حقاً بشهودِ المَلَكين
ــــــــــــــــــــــ
انا من قرّ بكلِ ما جرى
وعلى سيّدهِ اليوم اجترى
ليتني صرتُ رمادً في الثرى
افعلُ الذنبَ وأدراك ترى
فاليكَ العمرُ يُفدى وفداكَ كلُ عين
وأنا المُذنبُ حقاً بشهودِ المَلَكين
ــــــــــــــــــــــ
فأنا المُعطى على الذنبِ الرَشا
وغشى بتيهةٍ ما قد غشى
سيدي صار على العينِ غشى
غيرُكَ لو كانَ للسرِ فشى
يارؤوفٌ ياعطوفٌ يارحيمٌ ياحَنين
وأنا المُذنبُ حقاً بشهودِ المَلَكين
ــــــــــــــــــــــ
كيف لي انسى خضيباً بالدماء
وبهِ جالت خيولُ الادعياء
وخيامٌ اُحرِقت فوقَ النساء
سوف ابقى نادبا ياكربلاء
سأضلُ الدهرَ ابكي بدموعٍ وانين
وأنا المُذنبُ حقاً بشهودِ المَلَكين
ــــــــــــــــــــــ
الشاعر محمد حسن ضيغم
/channel/kasaedalatharDaygham
مسّني الضر واعرفك ماتردني من اجيت
والله اموت شما عفتني ولو ندبت اسمك حييت
اذنب وأرجع اتوبن لون حر جان استحيت
يلّي ما باجي اعله غيرك بس الك نحت وبجيت
كيل وأملي عيوني دمعه
شمايروح الفكر رجعه
خلني مدمن عالمصيبه
وصوت ناعيّك اسمعه
ــــــــــــــــــــ
آنه محّد مثلي ضيّع فرصته واصبح سراب
وآنه مثل الراد يقره وشكَكَ اوراق الكتاب
جيت الك والغايه انت وياك مادوّر ثواب
أجهنّم اهون عندي وأسهل حيل من نار العتاب
استحي من الزهره باجر
بمجلسك ماجنت حاضر
غلطه هاي وانت تدري
ويلي من غلطة الشاطر
ـــــــــــــــــ
فدوه جتّفني ابمحبتك وخل اضل مسجون بيك
آنه هارب منك انت ولاجئ بكل شوكَي ليك
حتى لو تطردني ابقه ازحف ازحوف واجيك
وين ماتخاذني ارضى تره مخلّيهه عليك
فوّضت امري الجفوفك
وعهدي لمّك مااعوفك
انت سر من الحقيقه
موبشر يحسين اشوفك
ــــــــــــــــــــــ
الكَلب مخلوق المحبتك شلون يدخل بيه ثاني
كون انساك انه لحضه بموتت الذل من عساني
كاتب ابدمعي اعله جفني شلون انسه المانساني
حسين عن درب المتاهه حبك الدربك خذاني
أي وحكَ كَطعة وريدك
وذر اتكَطّع واريدك
خاف تنظر غيرك انت
عيوني فدوه امسحهه بيدك
ـــــــــــــــــــــــــــ
انت يا قربان زينب تشهد اعليك الطفوف
قدّمت كلشي امنجلنه النحر شاهد والسوف
طفل والخدر سبايه وكَمر مكَطوع الجفوف
واثر لسياط ال اميه جروح صارن بالجتوف
بت علي تصبح سبيه
وتنسلب بنتك رقيه
وصوت كل الحرم صاحن
منين اجتنه الغاضريه
ـــــــــــــــــــــ
الشاعر محمد حسن ضيغم
/channel/kasaedalatharDaygham
يا ابو الينطي الولد بجفوفه
مستحيل ابنه بحسرته يعوفه
ـــــــــــــــــــــ
الابو ميفرّق ابد بين الولد
اعزاز عنده اولاده مابيهم عبد
ما يميّز فرد عن واقع فرد
كل ولد مثل العيون يشوفه
ـــــــــــــــــ
حسين ابونه واحنه اولاده الخدم
وبيتنه البي عشنه ندريبه الخيم
الضيّف ابنحر ابنه بالطف السهم
افعال فضله اعله الخدم معروفه
ـــــــــــــــــــ
ياابو اليقبل اوليده ابزلته
يمسح براسه ويلزمه ابيمنته
يحجي ويّاه ويردّه العيلته
حسين ميحسس اوليده بخوفه
ــــــــــــــــــ
نقصّر اوياه ونرد نفعل ذنب
وعالحسين الذنب نعرف ينحسب
ياملك ذنب ابني لا ماينكتب
يصيح وحسين النجاه بحروفه
ــــــــــــــــــــ
ابو وربّانه علحبّه من الزغر
بالتعازي نعيش نكبر ينتظر
حروفه نكتبهه بلطمنه اعله الصدر
ارواحنه هم لو نموت اتطوفه
ـــــــــــــــــــــ
احنه ابونه الخيل داست جثته
فاض دمه وسال خضّب شيبته
لان بيهه اعياله حركَوا خيمته
مجتّفين انسبوا لرض الكوفه
ـــــــــــــــــ
الشاعر محمد حسن ضيغم
/channel/kasaedalatharDaygham
وداع وداع ... بين العقيله والكمر
وداع وداع .. تبجي وتأشر عل نهر
خنكتهه عبرتهه بلهيب اونينها
حضنت اخوهه وتجري دمعة عينها
ــــــــــــ
ملامح وجه ابو الغيره صور تحجي
وزينب كَابلت راعي الوفه وتبجي
تكلّه اخلاف عينك المن آنه اشجي
يخويه اكَليبي كَوه بضلعه متوجّي
تروح تروح ... للشاطي وبجفك علم
تروح تروح .. ويوكع عمد من الخيم
خويه المصايب ويني آنه او وينها
حضنت اخوهه وتجري دمعة عينها
ــــــــــــ
زينب لازمه الرايه وتشم بيها
تكَلول شلون اشوفن دامي راعيها
الخيم من تشتعل جا ياهو يطفيها
يخويه وزينبك حرمه انت تدريها
خيام خيام ... يحركوها وانت اعله النهر
خيام خيام .. وحسين مكسور الضهر
لا انته يمها ولا يجيها احسينها
حضنت اخوهه وتجري دمعة عينها
ــــــــــــ
صعب حيل الوداع ابين كَلب ودم
يخويه وكَلبي خايف يلفي المحتّم
عسن لاجاني يومك عاشر امحرّم
اخوتي امذبّحه ومحروكَ المخيّم
كفيل كفيل .. .. . ما يبقه عندي بكربله
كفيل كفيل .........من يهوه يشمت حرمله
وسكينه بعدك ياوفي امأذينها
حضنت اخوهه وتجري دمعة عينهه
ــــــــــــ
وكف يمها اخوها وصدّت العينه
بجت عرفت سهمها ايزيّد اونينه
لحضه وعينها ضل تربي جفّينه
هوت عالكَاع زينب آ يالحنينه
عجيب عجيب ... شلون انظر بعينك سهم
عجيب عجيب ...ومكطوع جفك يجري دم
تمنّت اخيتك ينكَطع جفينها
حضنت اخوهه وتجري دمعة عينها
ــــــــــــ
كّوه تكول خويه وأشّرت كَوّه
على الشاطي وتون ياراعي المروّه
يخويه العلكمي بزينبكم اشسوّه
كلما انظرك تهوه الكَلب يهوه
ذبيح ذبيح ... والراس مصيوب بعمد
ذبيح ذبيح .... بلا روح ابقى بس جسد
بليّاك دنيه ما اريد اسنينها
حضنت اخوهه وتجري دمعة عينهه
ــــــــــــ
الشاعر محمد حسن ضيغم
الليله اصدّن للسمه .. بأحزاني
ارد اواسي فاطمه ..بأحزاني
......
لاتهل .. كلك حزن .. لمن تهل .. يهلالي
اذكره .. شلون انفجع .. وبكربله .. دلالي
بكربله .. من فارگت .. اشچم محب .. اوغالي
ملوعه.. ومعذبه .. وبلا علم ... لا والي
الليل بي .. املاك السمه .. تنشر قميص.. ابدمه
هل قميص .. المنعرف ... كل الوجود .. يألمه
والمىئك لاطمه .. بأحزاني
ارد اواسي فاطمه ..پأحزاني
.......
ياحزن .. هد الكَلب .. خل الجرح .. ما يشفه
والهظم ..كلش صعب ... يصعب لون .. اتوصفه
محرّم البي .. محنتي ... ومتني احسّ .. بنزفه
وعالنهر .. راعي العلم ... عل علكَمي .. ضل جفّه
شيحمله .. هذا الجرح ... ملني الصبر .. من صبري
بالجمر .. شفت احترك ... شفته انسلب .. كل خدري
ضعني شب امخيّمه .. بأحزاني
ارد اواسي فاطمه ..پأحزاني
ــــــــــــــــ
تبتدي ... قصتي ابدمع ...ماتنمحي .. من بالي
وبالسهر ... ليلي ايخلص ... دموعي بدماهن .. هالي
فاركَت .. ياحسرتي .. ويالوعتي ... جم غالي
ورافكَت ... طول الدرب ... جتّالك ... وجتّالي
بالكَلب .. لجمت جرح .. آيالجرح ... يلجمني
انبني ... وطف الحزن ... من اذكره ... يهدمني
بالبجي متلازمه .. بأحزاني
ارد اواسي فاطمه ..پأحزاني
ــــــــــــــــ
ياهي اشد ... لو فكّرت .. يامحنه .. او يامحنه
ويابجي .. اكثر صبح ...ياحسرتي .. ويا ونّه
والالم ... ما ينوصف ..لو ناشدوني ... عنّه
شفت اشد ... من الظلم ... والموتي صرت ... اتمنّه
زينب و.. اجرع غصص .. من كربله ... خلوني
الماحصل .. والّي حصل ... بعد الكَمر ... راووني
كافلي بحين ارتمه .. بأحزاني
ارد اواسي فاطمه ..پأحزاني
ـــــــــــــــــــ
عالنهر .. شفت الكَمر ... متكَطعات ... جفوفه
عيني ريت ... هيج الوفي .. بهذا الوضع ... متشوفه
والحسين .. اعله الترب ... ضلوعه صفت مخسوفه
وانسبي .. من كربله ... فوكَ الهزل ... للكوفه
ومن بعد ... كوفه ظلم ... سوكَ وشتم ... سمعوني
الشام اطب ... وبلا اهل ... وي الضعن ... خلوني
بلا ولي وبلا حمه .. بأحزاني
ارد اواسي فاطمه ..پأحزاني
ـــــــــــــــــــــ
الشاعر محمد حسن ضيغم
/channel/kasaedalatharDaygham
الدار وحشه اخلاف ابونه شلون اطبنلج يدار
نار اليفاركَ عزيزه نار ما تشبهه نار
من بعد اهل الحنان ... مارحم بيّه الزمان
-----
فاركت اعزاز كَلبي واهلي راحو من ادي
وداري ظلمه اخلاف ابونه وبعد ماصح ليهه ضي
عكَب في الغالي والله مايصح للعيله في
راحوا وخلّوني ابجي وجارت الدنيه علي
صغيره وعيوني احسهه ذبلت بكثر الدموع
ليلي ونهاري الفكَدهم الطم آنه اعه الضلوع
شكَد اصد الهل مكان ... مارحم بيّه الزمان
-----
ياعليله المثلي ضلّت حايره اخلاف الاهل
راحوا اهلي وبضعنهم يرد ماعندي امل
من مشوا لسّه اكَولن عفيه كَلبي شكَد حمل
شكد صحت يهلي تعالوا بكَد دمع عيني الهمل
لسه اتصوّر اهلنه ساروا بهذا الدرب
والله هل موقف احسّه اعليّه ياعالم صعب
عل عليله التعب بان ... مارحم بيّه الزمان
.......
ودعتهم والمدامع ترسم بخدي المصاب
وكَلبي كَبل الساني يندب لاتطولون الغياب
من لهيب الهجر يهلي كَلبي احسّن بيه ذاب
يمته جفها يدكَ كَلبك فدوه جاوبني يباب
عيوني تنظر كل مسيه للدرب بلكن تجون
ها يمن فركتكم امست معظله ولا ماتهون
جنّه موتي الليله حان ... مارحم بيّه الزمان
.......
كافي يهلي مو دمعتي اتحوّلت جمره وتصب
وسهم فركَاكم احسّن بالكَلب اصبح يطب
انه مو بالدار احسّن جنّي ابديرة غرب
الكون بعد الغالي واهلي اتغيّر وجن منكَلب
مغبره الدنيه اصدهه مدري شني الّي جره
لا خبر منهم اجاني والله صرت محيّره
كلُ من عليها فان ... مارحم بيّه الزمان
......
خايفه وكل خوفي يجره ورمشي رف بمحنتي
جنها فوك النوك تمشي بلايه رايه عمتي
والخيم حركَوهه واسمع عمي حركَوا خيمتي
والكَمر يم الشريعه يكَول طاحت رايتي
حسين ابوي اعله الوطيه والحوافر سحكته
اخ يابويه اصيح بحين شفت اعمامته
مفطّر انظرله اللسان ... مارحم بيّه الزمان
........
الشاعر محمد حسن ضيغم
/channel/kasaedalatharDaygham
سلام عليكم خدام سيد الشهداء
ارجو الاشتراك بالقناة ليصلك رزق الله علينا بنعمة الخدمه
جديد 2025
/channel/kasaedalatharDaygham
بالحلم شفت احتركَ صيواني
شموع ذابت عالتراب اخواني
ــــــــــــــــــ
قبل لا نوصل اراضي كربله
كَمت اصد لعيون ابن عقد الوله
اعلينه ليش ادموع عينه هامله
حايره بهذا الوضع خلاني
ــــــــــــــ
يروح ويرد احس رايد يحجلي الي
يسكت أمن يكَلّي ها يابت علي
يروح عني ودمعه اشوفه ينهلي
حال ابو اليمه صدكَ بجّاني
ـــــــــــــــــ
نمت ساعه وشفت منظر مو سهل
بكربله مدري شسبب مال الحمل
ليش انظر بيدي اثر شد للحبل
من كَعدت اتبدّلت الواني
ـــــــــــــــــ
واذكرت شفت الحرم تبجي وتون
وجسد فوكَ الغبره لا ما مندفن
تنتظرني فاجعه بالطف اضن
دموعي فوكَ الخد صفت نيشاني
ــــــــــــــــــ
رحت سولفت الحلم يم الاخو
وكتله تفسير الحلم خويه شنو
باجر اخيامج تشب بيد العدو
وتترس الحومه اصد رضعاني
ــــــــــــــــــ
الخيل باجر تسحكَ ابنص جثتي
والدمه الينزف يخضّب شيبتي
عالهزل مسبيه ترحل عيلتي
وتنسبون ابأيد كل عدواني
ـــــــــــــــــ
الشاعر محمد حسن ضيغم
/channel/kasaedalatharDaygham
اصلي الوحشه كَعده وتهمل العين
هد حيلي ومردني فكَد الحسين
ياهي المثلي اخوهه اتنظره عالكَاع
وما تكَدر تودعه آخر اوداع
ــــــــــــــــ
هاي اول ليله عنّي ... حسين راح ومايرد
عل ارض مطروح اشوفه ... هيج اصدله من بعد
آنه ماشفت بحياتي ...ينزف ادموم الورد
ومن اصلي ايبيد حيلي ...من اقره آيات الحمد
اصلّي ونحره اشوفه اكَبالي ينزف
رغم كَعده صلاتي انحيله وأرجف
جروحي بكَد جروحه صارن وساع
وما تكَدر تودعه آخر اوداع
ــــــــــــــــ
تيممت ونويت اصلّي ... الوحشه للضل عالترب
ومن اريد اهديه صلاتي ...اسمه يمرد بالكَلب
صعبه اخت تنظر اخوهه ... مكَطّع امسى شكَد صعب
مرمي يمّي ومو بعيد ... وحاسه بديره غرب
تعبت من التعب مابيّه اون حيل
وعهد ماراح انامن ساعه بالليل
الكَيته من الزغر في هل وكت ضاع
وما تكَدر تودعه آخر اوداع
ــــــــــــــــ
ليش كلما ردت انوي ...وكبّرت يجري الدمع
ظهر عاشر يرد حزنه ...ويطفى جدّامي الشمع
هنانه جف مابيه رايه ... هنانه خنصر منكَطع
هنانه حافر صرت اشوفه... حيل يكسر بالضلع
ردت تخلص صلاتي بلكي ارتاح
طحت طيحة الماي حسين من طاح
سفينه شلونا بقه وراح الشراع
وما تكَدر تودعه آخر اوداع
ــــــــــــــــ
الشاعر محمد حسن ضيغم
/channel/kasaedalatharDaygham
احس دمعي يهل .. سنه مناطر يهل .. شهر المحرّم
أنوح الكربله ... اشد احزام اله ... شهر المحرّم
للغريبه ... والمصيبه .. عهد مني يضل
للسبيه ... الوفيه ... عهد مني يضل
ــــــــــــــــــــــــ
كل حياتي ... وامنياتي ...من يهل شهر الحزن .. تبقه تون ... روحي
ياحبيبي ... ياطبيبي ...حسين غيرك ما الي .. ضل يعتلي ... نوحي
من الصغر سيدي ناذر اسنيني
بس الك لطمتي وكل دمع عيني
والله ما تنّسي مصيبة احزانك
بكل جرح كاتب احضرني يحسيني
أنه المنذور الك ... يغالي والهلك ... هل عمر فدوه
بدونك موبشر .. اصير بهل دهر ... هل عمر فدوه
للغريبه ... والمصيبه .. عهد مني يضل
للسبيه ... الوفيه ... عهد مني يضل
ــــــــــــــــــــــــ
دنية الهم ... ودمعتي ابدم ... تعلّمتها من النبي ..وأعله السبي ... بجّه
بمولد حسين ... هل دمعتين ...بدمعته باس النحر ..وحيل انكسر .. بجه
ينتحب عالسبط بالولاده اصبح
والعجب الياسبب مابقى يفرح
يعرفه بكربله ينذبح ضامي
والصدر بالسحك ويلي يتجرّح
يبوسه ابركَبته ... ويشمه ابيمنته ... وينظر الخنصر
وينادي بحسرته ...حسين بدمعته ... وينظر الخنصر
للغريبه ... والمصيبه .. عهد مني يضل
للسبيه ... الوفيه ... عهد مني يضل
ــــــــــــــــــــــــ
للسمه انظر ... شلون اصبر ...هلال حزنك لو لفه ... تضل نازفه .. الدموع
جنهه زينب ....بجمره تلهب ... تصيح خويه رد الي .. تضل تنهلي ... الدموع
مكَبعه بالحزن تذكر اطفوفه
بلا فكر وتنمرد لمّن تشوفه
كربله والمصاب ذاك يتجدد
عالنهر الكمر طاحن جفوفه
يرد بيهه العمر ... الخيمهه التستعر ... وطرّت البيده
وحرمها بلا ولي .... تنادي ياهلي ... وطرّت البيده
للغريبه ... والمصيبه .. عهد مني يضل
للسبيه ... الوفيه ... عهد مني يضل
ــــــــــــــــــــــــ
سنه مناطر ... بكَلب شاجر ... محرّم بحزنه يجي .. وليه ارتجي .. يلفه
حتى اواسي ... بالمئاسي ...فاطمه ام الحسن ..بضيمي الزمن .. يلفه
المجلسه من اجي استمع رادوده
هدومي اله بكل عزه بالحزن سوده
باللطم والدمع ينكتب اسمي
فاطمه بالعزا ادري موجوده
بعبايه امترّبه ... الزجيه امعصّبه ... تنادي يوليدي
ضلعهه يصب دمه ... حزينه مألّمه ... تنادي يوليدي
للغريبه ... والمصيبه .. عهد مني يضل
للسبيه ... الوفيه ... عهد مني يضل
ــــــــــــــــــــــــ
آ يويلي ... انهدم حيلي ...عالمصيبه الّي جرت ... من وجرت ... ناري
انكَطع نحره ... انسحكَ صدره ...نار الخيام اسعرت ... هي اسست .. ناري
شيبته بالدمه صفت متخضبه
والرجس بالحقد يرفس بكَلبه
من العطش ضل يون حسين ياوسفه
بلا رحم يمّه اجوا ومحّد يشربّه
وعلى الناكَه مشت ... اخيته اتجتّفت ... الكَوم سلبوهه
بلا جود وعلم .... كبر عدهه الالم .... الكَوم يسبوهه
للغريبه ... والمصيبه .. عهد مني يضل
للسبيه ... الوفيه ... عهد مني يضل
ــــــــــــــــــــــــ
الشاعر محمد حسن ضيغم
/channel/kasaedalatharDaygham
وداعاً ياحسين
ــــــــــــــــــــــــــ
من وره الباب بدمعتي ... احجي وي ادموع عينك
بويه راح ابقه وحيده ...وكل كلامي اليبقه وينك
حيّرتني .... تمشي خطوه أووجهك البنتك تديره
حيّرتني ...صغير عمري وعندك ابنيتك جبيره
حيّرتني ...نار صارت بيّه ما احسبهه حيره
وداعاً ياحسين
ــــــــــــــــــــــــــ
بكَلبي اخر جلمه منك .... بويه شمس الملكَه غابت
واعرفت معناهه هسه ...وروحي كَبل الشيب شابت
ودّعتني ....وحيل ماعندك اشوفك ها يغالي
ودّعتني .... بلاكَمر هيج انه وسنيني ليالي
ودّعتني ....كَبال عيني اندفن بالهجره دلالي
وداعاً ياحسين
ــــــــــــــــــــــــــ
آخذ من ادموعي بيدي ...واكتب اعله الباب قصتي
طفله عافوهه اهلهه ... علّه زادوا فوكَ علتي
عذّبوني ...اليجبر الخاطر كسر كَلبي عجيبه
عذّبوني ... ابيتي ياعالم واحس آنه غريبه
عذّبوني ... ليل وانهار انحب ابدمعه سجيبه
وداعاً ياحسين
ــــــــــــــــــــــــــ
دعوتين ادعي بحسرتي ....وبلكي وحده تصير منهن
دعوه يرجع ضعن ابونه .... والدموع بدربه اطشهن
ثاني دعوه .... مو حلم واصحه وافز من هذا نومي
ثاني دعوه .... اسمع يصيحولي يالله ويانه كَومي
ثاني دعوه .... اركض بكل لهفتي واجمع هدومي
وداعاً ياحسين
ــــــــــــــــــــــــــ
خوفي يتحقق حجيهم ... وكربله تصبح مصيبه
والدي وعمّي اسمعتهم ... سولفوا قصه عجيبه
الغاضريه .... عالحرم باجريشب حتى المخيّم
الغاضريه .... بس جثث تبقى الاهل مخضوبه بالدم
الغاضريه ... وصدر ابوي بخيل عدواني تهشّم
ــــــــــــــــــــــ
الشاعر محمد حسن ضيغم
/channel/kasaedalatharDaygham
كل دمعه مكتوبه
كل صرخه محسوبه
في عزاء الحسين .... في عزاء الحسين
ـــــــــــــــ
يامن تعيش بحزن ذاك المصاب
الفرص كَالوا من تمر مر السحاب
اغتنمها ولا تدوّر أي ثواب
بلا تعازي بالك يمر الشباب
كلشي عدم باجر
بس كَلبك الشاجر
في عزاء الحسين .... في عزاء الحسين
ـــــــــــــــ
الله خالق مَلَكين اعله متون
كلشي يصدر منك انت يسجّلون
افتخر لو حسبوا ادموع العيون
بالحشر كل سيئه بسجلك تهون
ذنوبك المتجمعه
تمحيهن الدمعه
في عزاء الحسين .... في عزاء الحسين
ـــــــــــــــ
من هذا الفخر اكثر بعد شتريد
والزهره تصد صدرك تلطمه بأيد
اعمال الخير تتضاعف وحيل اتزيد
فرض خلّي المجالس مو امر تعويد
شما تحضر قرايه
شانك علا هوايه
في عزاء الحسين .... في عزاء الحسين
ـــــــــــــــ
وسّم صدرك اعله حسين وابجيله
ومن ينعى الخطيب ابدمعك انعيله
حسين ابكربله ماحصل تغسيله
ولجل اخيامه دمعك عل وجن سيله
صدرك من تلطمه
اثر عشكَك ترسمه
في عزاء الحسين .... في عزاء الحسين
ـــــــــــــــ
الشاف الخيمه شبّت والجمر بيهه
وعيله مطشّره محد يحاميهه
ثل مرات كَام وما صل ليهه
تمشي ميسّره بت علي يدريهه
من سلّبوا اثيابه
حيل ابجي المصابه
في عزاء الحسين .... في عزاء الحسين
ـــــــــــــــ
الشاعر محمد حسن ضيغم
/channel/kasaedalatharDaygham
سيدي حروف الهجاء
اختصرها بكربلاء
من الالف للياء بس حسره وانين
تبتدي وتنتهي بأسمك ياحسين
ــــــــــــــــــ
الالف اسمك لو احبك .. وهاي معناة العشكَ
الباء بيدك انه موقن ...كَلبي من يبقى يدكَ
التاء تاجر من يحبك ... العاف دربك يحتركَ
الثاء ثوره انصرت دينك ... واقعا نهجك صدكَ
الجيم جوهر للاله
حسين بس ربنه اشتراه
الحاء حزن الهادي لمصابه حزين
تبتدي وتنتهي بأسمك ياحسين
ــــــــــــــــــ
الخاء خلّي جروحي بيّه .... ومااريدن تشوفي يوم
الدال دليني امنتيهن ....عاشكَك خليني دوم
الذال ذيج المحنه تبقى ... تزرع بكَلبي هموم
الراء ربّيني اعله دربك ...اعليّه ماريدك تلوم
الزاي زبدة هل وجود
السين سرّك للخلود
حسين قبله وقبله بس للعاشقين
تبتدي وتنتهي بأسمك ياحسين
ــــــــــــــــــ
الشين شوكه بعين كلمن ...مابجه اعله الطف ابد
الصاد صعبه الينسه فضلك .... حبنه انت امن المهد
الضاد ضجّت ناس لجلك ...من صرت بالطف جسد
الطاء طبعك ماتردنه ... الشاهد الحر والعهد
الظاد ظاهرة الحنان
العين عنوان الامان
يارؤوف وياعطوف وياحنين
تبتدي وتنتهي بأسمك ياحسين
ــــــــــــــــــ
الغين غيرك مانريده ....يل عشت بينه دمه
الفاء فارغ خلّي كَلبي ... وبس اترسه ابفاطمه
القاف قابل ان اموتن ...وانشمر من السمه
الكاف كافي تبقى روحي .... دهر الكم خادمه
اللام لائك معجزه
الميم مصدر للعزه
خلني لجدامك يبو اليمه رهين
تبتدي وتنتهي بأسمك ياحسين
ــــــــــــــــــ
النون ناراخيامك امست .... تلهب بروحي جمر
الهاء هدّوا عالمخيم .... وشتتوا كل الخدر
الواو وحدك باقي بالطف ....بظهر محني ومنكسر
الياء ياريت آنه حاظر ... كَبل نحرك منّحر
وداست اعليّه الخيول
مااهم لمّن تجول
فدوه الك يبن امير المؤمنين
تبتدي وتنتهي بأسمك ياحسين
ــــــــــــــــــ
الشاعر محمد حسن ضيغم
/channel/kasaedalatharDaygham
حسين شهرك كَربت ايامه
شدّت احزام العزه خدّامه
ـــــــــــــــــــــ
كَربت ايامك وهل الدمع
وللطم حضَرنه يحسين الضلع
كل محرم رايه عدنه تنرفع
الموكب بأسمك ترف اعلامه
ــــــــــــــــــ
كَرّبت ايامك وبان الحداد
الكون كلّه اتوشّح بثوب السواد
هالمجالس النه صارت خير زاد
رزق هاي النعمه للطامه
ـــــــــــــــــــــ
كَربت والحزن جمره وماطفت
وعين سهرانه بعزائك ماغفت
ايام حزنك والله جنّه اتوصّفت
فاز بيهه الطبر لجلك هامه
ــــــــــــــــــــــــــ
ناطرينه من سنه الداير سنه
بكثر المناطر ظهر عدنه انحنه
شهرك بحزنه علينه شما دنه
كل كَلب يتزايد بآلامه
ـــــــــــــــــــــ
كَربت ايامك وذاك المصاب
جسد يتكَلب ذبيح اعله التراب
من دمه المنحر صبح ليك الخضاب
ضعنك اكَبالك سليبه اخيامه
ــــــــــــــــــ
تشوف ضعنك لا ولي ولا رايه بيه
الجيش من ابعيد شفت اتعنّه ليه
الضعن من فر بالفله عينك عليه
اتطشَرت بالبر جميع ايتامه
ــــــــــــــــــ
الشاعرر محمد حسن ضيغم
/channel/kasaedalatharDaygham
وَجَعلنا ... من الحسينَ كلِ شيءً حيا
ــــــــــــــــ
بعالم العرفان شفنه ...حسين نور من القداسه
الدين لو ما حسين والله ....منهدم كلّه امنساسه
الله خالق كلشي لجله ...بيده كوّن هاي ناسه
تميل ويعدّلهه بيده ... والسمه رافعها راسه
وَرَضينا ...به ولن نرضى جميعا شيئا
وَجَعلنا ... من الحسينَ كلِ شيءً حيا
ــــــــــــــــ
بعالم الذر من سمعنه .... حسين منهو يحبّه صحنه
احنه والعجبه بكَلبنه ... وحده ضل ينزف جرحنه
بليل چنّه وبس تبسّم ... طلعت الشمس بصبحنه
اصل طينتنه محبته .....وفرع من حسين احنه
وَعَرِفنا ....لولاهُ كُنا بشرا منسيّا
وَجَعلنا ... من الحسينَ كلِ شيءً حيا
ــــــــــــــــ
الماي منّه انخلق كلشي .... وهوّه اصل الماي سرّه
عدم لولا حسين چنّه ...لجن صرنه بطوع امره
هو فوكَ وفوكَ كلّش ... والبقيّه كلهه حدره
ا ل أمّه فاطمة الزجيّه ... بياشعر نكَدر نصوره
آيقنَا ... في الحشَرِ يبقى حُبَهُ مرجّيا
وَجَعلنا ... من الحسينَ كلِ شيءً حيا
ــــــــــــــــ
چلمه من زمان عدنه ....ومعنى حيل اچبير الهه
والله لولا حسين كَالوا .... راحت الدنيه بهلهه
النكرت اسرار الحقيقه .... رابيه بديرة جهلهه
حسين كشي وكلشي هوّه ... الواصف بهاي اختزلهه
آمنّا .... في العرشِ كان اسمهُ مرويّا
وَجَعلنا ... من الحسينَ كلِ شيءً حيا
ــــــــــــــــ
بسوكَ والشاري اللآهك ... باع كلشي واشترانه
راسه فوكَ الرمح يقره ... عالرمح حيّر زمانه
صدره فوكَه اخيول اميّه ...وهوّه بالاعلى مكانه
رخّص اعياله ورضيعه ...وكَال ربي مقصّر آنه
ووجدنا ... القلبُ في نارِ الجفى مكويّا
وَجَعلنا ... من الحسينَ كلِ شيءً حيا
ــــــــــــــــ
الشاعر محمد حسن ضيغم
/channel/kasaedalatharDaygham
ايام الله ايامك
احباب الله خدامك
ـــــــــــــــــ
عدنه ويالزجيه موعد بهايه
كل يوم بمحرم لازم اقرايه
بثوب الاسود احنه نفخر هوايه
ينبض كل كَلب لو رفّت الرايه
فدوه احنه انروح لجدامك
احباب الله خدامك
ـــــــــــــــــ
عشّاك وعقيده امن الازل عدنه
نروح ابعيد بس المجلس يردنه
ويّ اهلال حزنك احنه موعدنه
نرد جمره الزمن كل ما يبرّدنه
بينه النيران لخيامك
احباب الله خدامك
ـــــــــــــــــ
شهر الله كَالوا عن شهر رمضان
بي تحله التلاوه وينبني الايمان
وبمحرم ذبيح اعله الثره القران
زاد بفضله واصبح ثار للرحمن
زاد اعله الكون اسلامك
احباب الله خدامك
ـــــــــــــــــــــ
الخادم عنده غايه وهايه بالفطره
بس ترضى عليه مولاتنه الزهره
الخادم ينعرف من لطمته بصدره
ولو ما اثم لجلك جا كَطع نحره
طبرتهه اتهون ليتامك
احباب الله خدامك
ــــــــــ
باجر بالخدم فاطمه تتباهه
وتترس كوثر الله ابدمع عيناهه
ملعون الذي اعله حسين بجاهه
وتبجي وتنتحب كل ليله خلالهه
مشدوهة بال جدّامك
احباب الله خدامك
ـــــــــــــــــــــ
الشاعر محمد حسن ضيغم
/channel/kasaedalatharDaygham
قصيدة بين ام البنين والامام الحسين عليه السلام
عذّبني يبني النِشد ... ترجعلي لو ما ترد
لوسالم اترد الي ... ازرع طريقك ورد
ــــــــــــــــ
يل عايش ابريّتي ...وأصورّك بعيني
سلواي جنت اعرفك ... تالي تبجّيني
اتطوّل ابسفرتك ... يوليدي حاجيني
نبضي واذا تبتعد ...ميته امسى تدريني
ابقى الرجعتك اعد... ترجعلي لو ما ترد
لوسالم اترد الي ... ازرع طريقك ورد
ــــــــــــــــ
آنه امك وخادمه ... اتشرّف بهايه
مو بس وسيله صرت ... ياغاية الغايه
لو اعرف بياكتر ... اتعنّه مشّايه
وبّيتك آنه انذرت ...لمّن تجي اقرايه
تدريني بيك انسعد ... ترجعلي لو ما ترد
لوسالم اترد الي ... ازرع طريقك ورد
ــــــــــــــــ
فوكَ التراب ارسمت .... صفحه الك واحبابك
وشمعه ارسم وتنطفي ... كل يوم لغيابك
درب الخذاك انتظر ... ليّه استمع جابك
اتمنه اموتن ولا ... يخبروني بمصابك
يبني الكَلب ينمرد... ترجعلي لو ما ترد
لوسالم اترد الي ... ازرع طريقك ورد
ــــــــــــــــ
كلشي انسه من دنيتي ...وما انسه شي منك
ومعاهده امك أنه ... ما ابتعد عنك
صبح ومسه وي النبض .... يحسيني احسّنّك
كل مغرب ولن صحت .... ترجعلي اريدنك
شمعه اطفى من تبتعد ... ترجعلي لو ما ترد
لوسالم اترد الي ... ازرع طريقك ورد
ــــــــــــــــ
بالطيف شفت الجره .... يوليدي بالعاشر
متخوصر وانظرك ..... لا اخو ولا ناصر
ومن تحترك خيمتك .... حيل اصبحت حاير
توكَع صريع وشفت ... ايدوسك الحافر
السيف بركَبتك يحد ... ترجعلي لو ما ترد
لوسالم اترد الي ... ازرع طريقك ورد
ــــــــــــــــ
الشاعر محمد حسن ضيغم
/channel/kasaedalatharDaygham
الرايد يشوف المهدي ودمعه اعله الخدود
حتما يشوفه ابمجلس ابن الزهره موجود
يلكَاه ...كَلبه اصبح مخيم
عيناه ... مودمعه التصب دم
ــــــــــــــــــــــ
اربعين اتصلّي كَالوا اربعاء حتما تشوف
وجه مولانه الامام المهدي وبعشكَه تطوف
المسجد السهله تروح
تصلي وبكَلبك جروح
الشوكَه وتنادي يمهدي
بسجدتك تبجي وتنوح
هالروايه ... مااجذّبهه ابد
هالروابه ... الهه يالسامع سند
ترجاه ...دلالك تالّم
عيناه ... مودمعه التصب دم
ــــــــــــــــــــــ
الغايه تسوه اتروح انت مكتسي بتوب الصبر
وتتنتظر لحضة لقائة ياعظم هذا الامر
مايهمك حر برد
الشوفته شكَد مستعد
ولون بالمسحد ليكَيته
تَكله الك خذني عبد
هاك عيني .... وبيدك اترسهه دمع
هاك عيني ... تخلص بشكل الشمع
ويلاه ...بحالك الله يعلم
عيناه ... مودمعه التصب دم
ــــــــــــــــــــــ
واختصر هاي القضيه واختصر كل الزمن
كون عندك شوكَ فعلا تلتقي ببن الحسن
عيش محنة كربله
وبمدامع هامله
بمجلس الضامي تشوفه
وفاطمه تستقبله
من تشوفه ....حاله ميسر النظر
من تشوفه ...صيح آيالمنتظر
ويّاه ...عطر الزهره تشتم
عيناه ... مودمعه التصب دم
ــــــــــــــــــــــ
الروايات الاكيده وبسندهه ثابته
هواي ناس الخذت بيهه وابو صالح شافته
يلطم ابنص الخدم
لابس اسود عالخيم
عينه مطفيّه بدمعهه
تكَول مصيوبه بسهم
شعره ابيض ...ورمشه ابيض عالسبي
شعره ابيض ... شلون زينب تنسبي
احّاه ... جفنه ابدمعه ورّم
عيناه ... مودمعه التصب دم
ــــــــــــــــــــــ
العايش الطف ابدليله وبس محرّم عيشته
شلون ميشوف البقيه ويحضى والله بنظرته
السمع جدّه منّحر
وخيل تسحكَ عالصدر
وعمته بنص ا لاميه
تمشي بدروب اليسر
بكل عزيه ...حاضر المهدي تصد
بكل عزيه ...يشهكَ بضيمه ويرد
بلواه ...محّد بيهه يفهم
عيناه ... مودمعه تصب دم
ــــــــــــــــــــــ
الشاعر محمد حسن ضيغم
/channel/kasaedalatharDaygham
خويه زينب لازم اصفاحي بديه
هيچي حاله الينذبح گدامه اخيه
ريته ماشفته وگع يم النهر
صحت رحت امنيدي يحزام الظهر
ها يزينب ها يزينب
ــــــــــــــ
ارجع للخيمه يزينب دمعي يجري
ودمعتي تكتب رحت يحزام ضهري
ريت بعدك ياكمر لا طال عمري
انت اخوي وانت عزمي وانت ذخري
ياعضيدي امنين اجيب اعضيد اليّه
استوحدتني الكَوم كَوم الحكَ عليه
غربه كلهه وانه ضلّيت بخطر
صحت رحت امنيدي يحزام الظهر
ها يزينب ها يزينب
ــــــــــــــ
ايد تصفكَ ايد اجيتج للمخيم
بحالتي يم الخدر بس الله يعلم
عالشريعه عفته اخيي امغسّل ابدم
وراسه بالعامود يا زينب تهشّم
الرايه يمه وجوده مرمي اعله الترب
وعينه تنظر للنهر ميه يصب
والله يا زينب احس كَلبي انفطر
صحت رحت امنيدي يحزام الظهر
ها يزينب ها يزينب
ــــــــــــــ
الجدم يعثر من رجعت امن الشريعه
بصوت اصيحن راح كفّال الوديعه
اه شفت اعله الثره جفوفه كَطيعه
عليه ضاكَت والله دنيانه الوسيعه
العمر ما يحله عكَب بدر الهواشم
وباجر بلياه يسبون الفواطم
بحيره ضليت وصفن يمّي الدهر
صحت رحت امنيدي يحزام الظهر
ها يزينب ها يزينب
ــــــــــــــ
لاتلوم الراح اخوه ايشيب كَلبه
لاتلوم ابهل وضع لو تاه دربه
احضنته وابجي اعليه والمدمع اصبّه
فاركَاني الفركَته اعله الروح صعبه
نار المفارك تشب ابروحي جمره
شنطي للي انطاني هذا اليوم عمره
تفاركَينه وبعد مايلمنه القدر
صحت رحت امنيدي يحزام الظهر
ها يزينب ها يزينب
ــــــــــــــ
خويه زينب والّي كلّش الّماني
بجلمه الج يابت علينه أمّناني
كَلّي سلمني اعله خيتي او ودّعاني
وخلّي تعذرني وبعد لا لاتتاني
بسته بزنوده وحضنّي ابلا جفوف
وشمني شمّت موت جاي صعبه يشوف
السهم يا زينب اخذ منه النظر
صحت رحت امنيدي يحزام الظهر
ها يزينب ها يزينب
ــــــــــــــ
الصبر راح الصبر مدري منين اجيبه
انهار حيلي وكَلبي من فاركَ حبيبه
خويه باجر راح تتسمّي الغريبه
من مصيبه ا تروحي ياخويه المصيبه
تنسبين اعله الهزل وي الضعينه
والعليل ابحبل حيف امجتّفينه
شهر تمشين وتردّين ابشهر
صحت رحت امنيدي يحزام الظهر
ها يزينب ها يزينب
ــــــــــــــ
الشاعر محمد حسن ضيغم