5137
القصائد الرثائية للآل الأطهار ع
(( 59 ))
بمناسبة السيدة رقيه عليها السلام
من وزن الموشح ( المربع)
ـــــــــــــــــــــــ
ابجي سكته ويجري دمع عيوني
لون حسّوا بالبجي يضربوني
ـــــــــــــ
صغيره ودموعي تهل وبلا سبب
وعتبي للعباس بدموعي انكتب
مثل نار الخيمه بجروحي اللهب
وذبلت بكد الدموع جفوني
ــــــــــــــــ
انه بنت حسين وصغيره عمر
بعمري ماشفت الجره ولسع الجمر
ليش يا هلناس خدي ينسطر
بسطرة ابن الخايبه اذّوني
رغم كل ماصار وأتجرّع ألم
انسلب قرطي وأذني ضلّت تجري دم
فكري مشدوه بكثر حركَ الخيم
تعذّبن حيل وتغيّر لوني
ـــــــــــــــــ
ويّ روحي شكَد حجيت بمحنتي
يارقيه النار تجوي ابمهجتي
شكَد لذت من السياط بعمّتي
بالضرب غايتهم ايروعوني
ــــــــــــــ
شكَد ركضت امن النهر وبجفّي ماي
وردت اروّي الصاح مرمرني ضماي
شفته مذبوح وصرت فاكَده الراي
يل ذبحتوه وينكم ذبحوني
ـــــــــــــــــ
الشاعر محمد حسن ضيغم
/channel/kasaedalatharDaygham
المجلس (( 57 ))
بمناسبة الشام
من وزن الموشح ( المربع)
ـــــــــــــــــــــــ
الشام طبّيناهه حامي ضعونه
بالدفوف وبالفرح لاكَونه
ـــــــــــــــــ
الشام فرحانه ودمعنه احنه يصب
اهل بيت الرحمه والوادم غرب
شلون بيهم هل وكت ما ينكَلب
ال بيت النبي ويسبّونه
ـــــــــــــــــــــــــــ
الشام آيالشام جرح مو سهل
جرح كلش بالكَلب ما ينحمل
شفت يمهم ضيم ماشفته قبل
عمدا انواع الظلم راوونه
عيلة الهادي ويرامونه بحجر
واحنه عيلة حيدر وسيد البشر
بهل مصيه احتار ويّانه الدهر
حالنه محّد يوصفه شلونه
ــــــــــــــــــــــــــ
السوكَ طبيناه والوادم تشوف
نبجي والوادم تدكَ بهل دفوف
بلاهوادج والحبل شد الجفوف
شويه بس نرتاح ماخلّونه
ــــــــــــــــــ
اطفال تبجي والحبل اذّه الادين
ونبجي حسره من نصد راس الحسين
اه من هلناس كلهم شامتين
وجه هل اطفال اصفر لونه
ـــــــــــــــــــــــ
الشاعر محمد حسن ضيغم
/channel/kasaedalatharDaygham
احجز نسختك من مكتب الحاج حازم
ذي قار . سوق الشيوخ
+9647802794455
وتوجد خدمة توصيل لكافة المحافظات
علما ان الديوان بسعر مدعوم
...
واويلا ..واويلا
...
ماتنوصف جروحه
البيده يدفن روحه
يبچّي السماء بنوحه
الله يعين السجاد
.....
ومصيبته شديده
اليدفن الغالي بيده
وعينه تصد وريده
وعليه نوحه يزداد
......
بالطف يصد ضحايا
اخذتهم المنايا
كل ساعه يندب هايه
جثه تمرد الفّاد
.....
من شاف ابو بلاراس
جمراته تجوي الاحساس
وناده يعم يعباس
وسفه ضعنّه ينگاد
.......
ميريد هذا عمره
صد للذبيح ونحره
ومطحون ويلي صدره
وبكربله حيله باد
.....
الشاعر محمد حسن ضيغم
/channel/kasaedalatharDaygham
المجلس (( 55 ))
بمناسبة الكوفه
من وزن الموشح ( المربع)
ـــــــــــــــــــــــ
الكوفه بيتي شلون اطب للكوفه
بلا ولي ومتعذّبه ومجتوفه
ـــــــــــــــ
دار اهلي هنا وبي ريحة علي
هنا عشت وهنا كّضت عشرة هلي
شلون اطب ودمعتي بعيني اتهلي
وانه بنت المرتضى معروفه
ــــــــــــــ
الكوفه بيهه شكّد عشت ياهل خلكَ
وبيهه كَلبي بحب علي كل نبضه دكَ
تالي بحبال العده جفّي انشبكَ
المثلي وسفه الحبل شد جفوفه
شلونا طب للكوفه وانه اميسّره
وانه بنت القلع بيده خيبره
والله فشله اعليهم ايجتفوا مره
عكَب ذاك الصولته معروفه
ــــــــــــــــــ
الكوفه بيهه ما شخص شاهدلي ضل
وهيبتي وكل قدري مايشيله عقل
شلون للكوفه اطب اعله الهزل
شلون طول الناس هسّه اتشوفه
ــــــــــــــــــ
مجتّفه ومتعذبه ومتمرمره
وراح وكت البي جنت متخدّره
انه شفت الّي جره والماجره
السبيي انظر هلخلكَ ملهوفه
ـــــــــــ
الشاعر محمد حسن ضيغم
/channel/kasaedalatharDaygham
المجلس (( 53 ))
بمناسبة السيدة الزهراء ع وحظورها الى كربلاء
من وزن الموشح ( المربع)
ـــــــــــــــــــــــ
من المدينه الكربله بالحسره
تعنّت حسين العزيز الزهره
ـــــــــــــ
تعنّت حسين وتهل مدمع دمه
تدري جسمه حسين عالغبره ارتمه
شافت ضلوع العزيز امهشّمه
ضلوعه بالحافر غدت متكسره
ـــــــــــــــ
تصيح يبني امن اعتنت طف كربله
ليش جسمك يبني محّد غسّله
خلافك ابهل بر تنوح العايله
اطفال تصرخ والدي ومتطشره
يبني صاحت خنصرك وين انرمه
وليش ثوبك منصبغ يبني ابدمه
حسين يبني انه امك فاطمه
شوف جرح عليك يبني شكبره
ـــــــــــــــ
تصيح كَلبي والله هل مشتاكلك
كَوم حاجيني تراني جيت الك
بضلع دامي تدري حتما اوصلك
الوجنه لسّه يبني ضلّت حمره
ـــــــــــــــــــــ
مثل ضلعي ضلعك اتهشّم وسف
ومثل دم صدري دماك انظر نزف
ومثل حيدر ابنك بحبل انجتف
وجرح بينه اعله المشت متيسره
ـــــــــــــــ
الشاعر محمد حسن ضيغم
/channel/kasaedalatharDaygham
المجلس (( 51 ))
بمناسبة السيدة زينب عليها السلام
من وزن الموشح ( المربع)
ـــــــــــــــــــــــ
زينب شما مر حزن ذكروني
آنه بالطف راح شوف عيوني
ـــــــــــــــــــ
زينب آنه وشفت اعظم فاجعه
روس متطشره وجثث متكَطّعه
حرت ياهو المنهم امشي المصرعه
حايره بذاك العصر خلوني
ـــــــــــــــــــــــــــ
عفيه كَلبي شكَد صبور الهل امر
اركض وما ادري اسحكَ عالجمر
حسين ظهره اعله الكفلني منكسر
وأعرفت راحت تتيه اضعوني
زينب آنه وحالتي ما تنوصف
جوف ادينه من الرعب ضل ترتجف
حين طاع اعله النهر ذاك الكلف
بخيل وبنار العده كَصدوني
ـــــــــــــــــــ
منهو مثلي شاف اهله مكَطعه
منهو مثلي حسين ضيّع مصرعه
منهو مثلي بالمصيبه مكَبّعه
بالمصايب هل خلكَ سمّوني
ــــــــــــــــــــــ
شاب راسي والرمش ابيض صبح
بكبر كاع الطف جرح كَلبي انفتح
حسين جدّامي شفن نحره انذبح
وصحت ها كَبل السبط ذبحوني
ــــــــــــــــ
الشاعر محمد حسن ضيغم
/channel/kasaedalatharDaygham
ليلة ٤ محرم ١٤٤٦هـ
الرادود/ صادق البصري
الشاعر / محمد حسن ضيغم
حسينية المصطفى (ص) بالدالوة
ابوذيه لليلة. الوحشه
كلمن لاحته النيران فرّيت
صحت وعله الگلب لچمات فرّيت
كوه امن الخيم يحسين فريت
ورماد الخيمه مقنع صار اليه
… ..
الشاعر محمد حسن ضيغم
يبن الحسن جسام
كلمات الشاعر
محمد حسن ضيغم
الرادود السيد علي الحسيني
يبن الحسن جسام
كلمات الشاعر
محمد حسن ضيغم
الرادود السيد علي الحسيني
فزاعيه للمصرع
صباح العاشر
وتقرأ بعد المقتل
زينب تصيح بكربله
وين امي عن اوليدهه
.....
ابنچ وگع من مهرته
وبالحجر صابوا جبهته
والسهم مارد چبدته
عالراس تلطم بيدهه
زينب تصيح بكربله
وين امي عن اوليدهه
.....
رد مهره خالي الخيمته
يصهل وتهمل دمعته
وسكينه اشوف تلگّته
والحسره حيل اتزيدهه
زينب تصيح بكربله
وين امي عن اوليدهه
.....
من طاح مرمي اعله الترب
عل وجه شفته منگلب
يتألّم ودمه يصب
لوريده تفدي اوريدهه
زينب تصيح بكربله
وين امي عن اوليدهه
.....
وين امي تحضر محنته
وتشوف هاي الأذّته
مگطوع خنصر يمنته
كل العلاوي اتريدهه
زينب تصيح بكربله
وين امي عن اوليدهه
.....
عشرة خيول اتعنّته
سحگت ضلوعه وطحنته
يتگلب وما رحمته
مصيبتهه ابنهه يعيدهه
زينب تصيح بكربله
وين امي عن اوليدهه
.....
ياويلي من بعد الذبح
مرفوع راسه اعله الرمح
والجسد دامي ومنطرح
وأخته اعله ضيمه شبيدهه
زينب تصيح بكربله
وين امي عن اوليدهه
.....
الشاعر محمد حسن ضيغم
/channel/kasaedalatharDaygham
نعي
أنه الگلبي لعد الضيم عاشر
ووصل گلبي سهم والسهم عاشر
شبگه بزينب بعد يايوم عاشر
خذت كل اخوتي من بين اديه
...
الشاعر محمد حسن ضيغم
/channel/alnaay2022
يا ليل الوداع
ــــــــــــــــــــ
يحسين اودعك لو اودع حامي الضعون
وآنه ادري لو رحتوا بعد ما ضن ترجعون
ـــــــــــــــــــــ
يبن امي كلي شلون اودعك يالشفيه
وتدري آنه اشوفك مو جنت صبح ومسيه
باجر يخويه شلون اشوفك عالوطيه
مذبوح اشوفك والعده بصدرك يسحكون
ــــــــــــــــــــ
يبن امي انزل خويه فدوه وعوف مهرك
عندي طلب هالساعه اشمن خويه نحرك
وخليني اقبل يا عزيز الروح صدرك
صدرك يرضوه العده ونحرك يكطعون
ـــــــــــــــــــــــ
وشلون اودعك وانت كل نبضه بدليلي
رايدني كل اسنيني ما اكطع عويلي
واشلون اودع مهجتي وروحي وجفيلي
لتضن تضل لختك بعد من تبجي العيون
ـــــــــــــــــــــ
وشلونا ودعك والكمر راعي الشهامه
وطول العمر هذا الجفت يترك منامه
باجر تصير اطفالي يبن امي يتامه
وياهو العليهم يمسح بساعة ينوحون
ـــــــــــــــــــــــــ
وشلونا ودعك والجمر بضلوعي لهاب
ورحمه علروحه الي ندب يافكد الاحباب
كبلك يريت اتوسد باحضان الاتراب
يبن امي فركاكم علي لتضن تره يهون
ـــــــــــــــــــــــــ
ميته عساني ولا اودعك هالمسيه
وياريته جدمي ماسحك كاع الوطيه
ظلمه بلياكم تصير الغاضريه
تتبع اثركم روحي لو للحومه تمشون
ــــــــــــــــــــــــــ
الشاعر محمد حسن ضيغم
وداع وداع ... بين العقيله والكمر
وداع وداع .. تبجي وتأشر عل نهر
خنكتهه عبرتهه بلهيب اونينها
حضنت اخوهه وتجري دمعة عينها
ــــــــــــ
ملامح وجه ابو الغيره صور تحجي
وزينب كَابلت راعي الوفه وتبجي
تكلّه اخلاف عينك المن آنه اشجي
يخويه اكَليبي كَوه بضلعه متوجّي
تروح تروح ... للشاطي وبجفك علم
تروح تروح .. ويوكع عمد من الخيم
خويه المصايب ويني آنه او وينها
حضنت اخوهه وتجري دمعة عينها
ــــــــــــ
زينب لازمه الرايه وتشم بيها
تكَلول شلون اشوفن دامي راعيها
الخيم من تشتعل جا ياهو يطفيها
يخويه وزينبك حرمه انت تدريها
خيام خيام ... يحركوها وانت اعله النهر
خيام خيام .. وحسين مكسور الضهر
لا انته يمها ولا يجيها احسينها
حضنت اخوهه وتجري دمعة عينها
ــــــــــــ
صعب حيل الوداع ابين كَلب ودم
يخويه وكَلبي خايف يلفي المحتّم
عسن لاجاني يومك عاشر امحرّم
اخوتي امذبّحه ومحروكَ المخيّم
كفيل كفيل .. .. . ما يبقه عندي بكربله
كفيل كفيل .........من يهوه يشمت حرمله
وسكينه بعدك ياوفي امأذينها
حضنت اخوهه وتجري دمعة عينهه
ــــــــــــ
وكف يمها اخوها وصدّت العينه
بجت عرفت سهمها ايزيّد اونينه
لحضه وعينها ضل تربي جفّينه
هوت عالكَاع زينب آ يالحنينه
عجيب عجيب ... شلون انظر بعينك سهم
عجيب عجيب ...ومكطوع جفك يجري دم
تمنّت اخيتك ينكَطع جفينها
حضنت اخوهه وتجري دمعة عينها
ــــــــــــ
كّوه تكول خويه وأشّرت كَوّه
على الشاطي وتون ياراعي المروّه
يخويه العلكمي بزينبكم اشسوّه
كلما انظرك تهوه الكَلب يهوه
ذبيح ذبيح ... والراس مصيوب بعمد
ذبيح ذبيح .... بلا روح ابقى بس جسد
بليّاك دنيه ما اريد اسنينها
حضنت اخوهه وتجري دمعة عينهه
ــــــــــــ
الشاعر محمد حسن ضيغم
المجلس (( 58 ))
بمناسبة الشام
من وزن التجليبه( المربع)
ـــــــــــــــــــــــ
وصلنه الشام وانت عله الرمح راسك
ومن شفت الشماته اختنكَت انفاسك
ـــــــــــــــــ
وصلنه الشام واحنه بضيمنه وننحب
وكَبالك يخويه بسوكَهم ننسب
والله بهل وضع ياخويه نتعذّب
نعرف بالمدامع نجرح احساسك
ـــــــــــــــــ
وصلنه والشماته ايدكَ طبلهم حيل
واحنه من المصايب راح منّه الحيل
من الشام يبن الزهره شفنه الويل
ساسي انهدم وانت انهدم كل ساسك
ياسهم الشماته بالكَلب يوجع
وجلمات السبايه صعب من نسمع
واحنه اعله الهزل يحسين نتلوّع
ريت اتشوف دمعة حزن كل ناسك
ـــــــــــــــ
محد يرحم بهل عيله من الشام
فوكَ آلآمنه ضكَنه يخويه آلآم
من انوح طول الدرب ما ننلام
راسك عالرمح وي راس عباسك
ــــــــــــــــــــــ
يشتمونه وضحك كَدام نسمعهم
واطفالي شتم منترس مسمعهم
ماواحد يجي وعن سبنه يمنعهم
يامن ماوصل واح المقياسك
ـــــــــــــــــــ
الشاعر محمد حسن ضيغم
/channel/kasaedalatharDaygham
مولاي حسين ||الملاحسين الخاقاني ||عزاء هيئة الحسن المجتبى عليه السلام _ا...
https://youtube.com/watch?v=g2srzfRYCKE&si=53E6Rv_MlOOxmgh7
نعي
لون بيدي اقدّم راسي لحسين
وعمري أبّحر حزنه راسي لحسين
الحوافر حين سحگت راس الحسين
مثل شيب البراسه طلع بيّه
...
الشاعر محمد حسن ضيغم
/channel/alnaay2022
المجلس (( 56 ))
بمناسبة الكوفه
من وزن التجليبه ( المربع)
ـــــــــــــــــــــــ
الكوفه شلون طبّيناهه يبن امي
عسنّه ما مشه بهذا الدرب جدمي
ـــــــــــــــــ
دخلنه الكوفه واحنه اعله الهزل حسره
وياجرح الكَلب من اوصفه شكبره
دار اهلي عيوني لمّن اتنظره
وحكَ المرتضى حكَ يحتركَ دمي
ـــــــــــــــــــ
عسن ما شفنه كوفتنه واهليهه
شماته كل اهلهه بينه ندريهه
الوضع لم الخدر اصبح يبجّيهه
اخت عباس صار ام الحزن اسمي
شلون انسه الليالي البيهه مرّينه
اوّل ما وصلنه الكوفه ونّينه
ذكرنه هنا جانت دور اهالينه
ويا نار الهظيمه اشتعلت بجسمي
ــــــــــــــــــ
الكوفه من دخلنه الجرح ينزف كَام
ذكرت ايامي ذيج الما مثلهه ايام
من الكوفه تالي نروح لرض الشام
وبعدهه ابعيني حركَة جمرة خيمّي
ــــــــــــــــــ
اصيحن آه من ضيمي واصيحن آه
من الكوفه هاي وتستحق ويلاه
يادرب السبي والضيم ما انساه
يضل لاخر حياتي بهل كَلب همّي
ـــــــــــــــــــــــــ
الشاعر محمد حسن ضيغم
/channel/kasaedalatharDaygham
المجلس (( 54 ))
بمناسبة السيدة الزهراء ع وحظورها الى كربلاء
من وزن التجليبه ( المربع)
يزينب وين اخوتج يمّه دليني
حسين بياكتر مطروح حاجيني
ــــــــــــــــ
وصلت كربله فاطمه وتجري العين
تصيح بصوت يازينب اخيّج وين
وين الكمر وين اخوانه وي حسين
مو دمعي اليهل جرّح جفن عيني
ــــــــــــــــ
دلّيني عليهم وين مصرعهم
ذوله اولادي يمّه وانه هاي امهم
اريد ابجي وانوحن هل وكت يمهم
ويم كل واحد ابجي ويكثر اونيني
ــــــــــــــــــ
الكمَر وينه واخوته بياكتر طاحوا
شكثر بسم الحسين بكربله صاحوا
حرّاس الخيمكم ادري من راحوا
يرف رمشي عليهم انتي تدريني
ــــــــــــــــ
يمه اعله النهر عباس ضل دامي
اخوي البيده والله شيّد اخيامي
واخوته اتذبّحوا يالزهره جدّامي
واحدهم اجه يمّه يحاميني
ـــــــــــــــــــ
وذاك حسين يمّه وجسمّه الموذّر
وصدره بالحوافر فاطمه اتكسّر
بلا راس وبقه فوك الترب منحر
شففته وأصفكّت يسراي بيميني
ــــــــــــــ
الشاعر محمد حسن ضيغم
/channel/kasaedalatharDaygham
المجلس (( 52 ))
بمناسبة السيدة زينب عليها السلام
من وزن التجليبه ( المربع)
ـــــــــــــــــــــــ
منين ابدي المصايب ارد اعددهه
اسولف وي جروحي وأبقه اناشدهه
ـــــــــــــــــــ
جروحي ابكَلبي ماتبره ولا هي اتطيب
وعن عيني مصارع اهلي لا ما متغيب
الطفل من الذي شفته اعرفه ايشيب
الشاهد ماتت الطفله اعله والدهه
ـــــــــــــــــــــــ
هاي هموم ما مرّت عله أي انسان
وعلى وجهي الحزن والالم كلش بان
احيرن بالنسه لو حير بالرضعان
التركض حايره محّد يساعدهه
عندي هموم ما مرّت على أي واحد
وعلى كل كلمه منّي الدمع ضل شاهد
حيلي من المصايب ياخلكَ راكَد
فكَد حسين زينب والله ركَّدهه
ــــــــــــ
شفت ضيم ومصاب ايهد جبل حتما
وعيوني اضن من الدمع يعمن
اشكي همومي عكَب حسيني جا المن
روحي تصير نار وبيش ابرّدهه
ــــــــــــــــــ
لهسّه اكَبالي من ضربوهه بنت حسين
لهسه اتصيح اسمعهه طفت هل عين
اريد اكَصد لبوي اتكَلّي دربه منين
طفله وصعبه اخلّيهه لوحّدهه
ـــــــــــــــ
الشاعر محمد حسن ضيغم
/channel/kasaedalatharDaygham
ذبحوا حسين العده من البارحه
يا رباب وما نصبنه الفاتحه
احنه وي كل النسه
خل نسوّي مجلسه
ومن نخلص خلّي نقره الفاتحه
ـــــــــــــــــــــــ
يا رباب شلون انسه وآنه شفت الي جره
بعيني شفت الشمر ويلي بسيف يكَطع منحره
وشفت ثاني اتعنه اخيي وكَام يكَطع خنصره
وبحوافر خيل اميه ضلوع صدره مكسّره
شفت دم من النحر يتجاره
وجف يمنته لزم جف ايساره
وضع لا ماينسه
خل نسوّي مجلسه
ومن نخلص خلّي نقره الفاتحه
ـــــــــــــــــــــــ
ليله مرّت وآنه اخيي نايم بحضن الترب
آنه اتمنّه اعتنيله وامسح الدم اليصب
زلم وخيول بطريقه شلون اطرّنه الدرب
وهم ارد بعيوني اشوفه آنه عندي اشجم كَلب
شلون اوصل والزلم بدروبه
شلون وآنه الي جنت مهيوبه
شلون ايدي اتلامسه
خل نسوّي مجلسه
ومن نخلص خلّي نقره الفاتحه
ـــــــــــــــــــــــ
عاده عن الناس ادري من يموت الهم ولي
تلطم الناس اعله اخدهه والمدامع تنهلي
بعد ما يندفن تنصب فاتحه بجمره اتغلي
بس خويه حسين ويلي وينهه الزهره وعلي
بلايه جادر لا هله التبجيله
وماكو توزيع بثوابه الليله
ثوب اسود نلبسه
خل نسوّي مجلسه
ومن نخلص خلّي نقره الفاتحه
ـــــــــــــــــــــــ
يا رباب وياي كَومي انّادي كل هاي الحرم
نسوّي مجلس عل حسين ونبجي بس ادموع دم
من عبينه انسوي جادر لان ما ظلت خيم
فاتحه نقرره بثوابه وتنهدي الراعي العلم
والثواب امي تجي بصينيته
والله ادري تحظر بتعزيته
بكل صباح وكل مسه
خل نسوّي مجلسه
ومن نخلص خلّي نقره الفاتحه
ـــــــــــــــــــــــ
هاي اول ليله مرت وحشه وبدلالي آه
ليله وحشه يا رباب وخل نصلّيله الصلاه
آنه اكطّع هذا كَلبي كون بس لحظه نساه
و يا ذبيح المثل اخيي لسه مخضوب بدماه
ما شفت ميَت فلا يدفنونه
وعل تراب وماجوا ايشيعونه
خصمه بيه شكد قسه
خل نسوّي مجلسه
ومن نخلص خلّي نقره الفاتحه
ـــــــــــــــــــــــ
الشاعر محمد حسن ضيغم
/channel/kasaedalatharDaygham
نعي
حگ ضعني يفر بالخوف ويهاي
بچيت وطفت بالطف هاي وي هاي
برماد الخيم تالي انصبغ ويهاي
بركضتي اعثر بخوتي شلون بيه
.
الشاعر محمد حسن ضيغم
/channel/alnaay2022
ابوذيه تقرأ في ليله الوحشه
نظرات العدو نيشنن ورمن
عليّه وحرت وين اتجه ورمن
يعمه چفوفي من السوط ورمن
أمن انام. شلون احط راسي اعله اديه
…… .
الشاعر محمد حسن ضيغم
قصیدة: #زیارة_عاشوراء
الرادود: #ملا_رسول_السعیداوي
الشاعر: #محمد_حسن_ضیغم
تصویر و الإنتاج: #استودیو فوکوس
کادر التصویر:
محمد شوندي
علیرضا فریساد
محمد حسن جلالي
علی سعیداوي
•لیالي محرم الحرام 1446 هـ ق
هیئة رایة العباس (علیه السلام) الأهواز _ الخفاجیة
حسینیة الأمام موسی الکاظم (المرحوم حاج افراري)
اَللّهُمَّ عَجِّل لِوَلیِّکَ الفَرَج
شلون ليله اتمر عليهه
زينب الفكدت وليهه
بس حرم يمهه ويتامه فكدت اصحاب الشهامه
*********
زينب ودمعتهه تجري تصيح بويه بحالي تدري
كبال عيني انسلب خدري بعد اخوتي شلي بعمري
امس جانو يمي اخوتي
ريته صار الليله موتي
الليل من جلجل ضلامه فكدت اصحاب الشهامه
*********
الليله وحشه اعله العقيله حايره المدمع تسليه
تصيح ابوهه وتشتكيله الليله ماعندي وسيله
بس حرم واطفال عندي
ابجي وادموعي علخدي
مارحم دهري بسهامه فكدت اصحاب الشهامه
*********
اطفال يمي اتريد ابوهه خويه بالسوط اضربوهه
زينب اتعاتب اخوهه تكلّه عيلتكم سبوهه
من الضمه الاطفال تبجي
وين اروح والمن اشجي
شلون هذا الليل انامه فكدت اصحاب الشهامه
*********
مصابي مايحصل مصابه كعّدونه اعله الترابه
خيام ماضلّت ييابه بيهه اضم سكنه وربابه
سلّبوا كلشي من ادينه
بس عبي الضلت علينه
الضعن من حركوا خيامه فكدت اصحاب الشهامه
*********
آه ياهاي المسيه شفت بيهه شجم رزيه
اطفال متعلكه بأديه ولاذت بسدّي رقيه
تكلّي عمه راح ابونه
وعكب عينه روّعونه
الشامت يصيح بكلامه فكدت اصحاب الشهامه
*********
الشاعر /// محمد حسن ضيغم
نعي
الغيور الشافته عيوني تحز بيه
ويگلبي النوح لجروحي تحز بيه
مات حسين مو كافي تحز بيه
شمر مو وذر صار ابن الزچيه
.
الشلعر محمد حسن ضيغم
/channel/alnaay2022
لليلة الوداع على لحن يخيمات
ـــــــــــــــــــــــــ
بالاوداع ... زينب كَعدت ابحسره
بالاوداع ... وحضنت مهجة الزهره
بالاوداع ... وحسين اشعظم صبره ... بالاوداع
ـــــــــــــــــــ
ليل الحزن ما ينوصف بين الاخت واخوهه
تتذكّر ايام المضت من فاركَت ابوهه
باجر تشب خيمة علي واخوتهه ما لفوهه
كلهم ضحايه اعله الترب لا والله ما نسوهه
تون حيل ...يم حسين مهظومه
تون حيل ... المدمع تنزف ادمومه
تون حيل ....زينب تشتعل جمره ... بالاوداع
ــــــــــــــــــــ
من سولفت هل الدمع منهه وبقت حزينه
لا لا تروح وانه اضل رد بينه للمدينه
فراكَك صعب يبن النبي كَلبي استمع ونينه
معقوله ترضى انحب دهر وآنه اختك الحنينه
عسى الليل ... طال وفجره لا ماطر
عسى الليل ... واخلص هوياك بمساهر
عسى الليل ... ابدا ما يطر فجره ... بالاوداع
ــــــــــــــــ
عاشر محرّم بي جرح ما يشفى للقيامه
باجر ولا منكم اخو يرجعلي بالسلامه
ضعنك يبو اليمه تشب نار العده بخيامه
واحمل ضرب واحمل شتم وانه اجمع اليتامه
تشب نار ...الخيمه ومن يفّيهه
تشب نار .... محّد يلحكَ اعليهه
تشب نار ...وتبقى اعيالي متطشره .. بالاوداع
ــــــــــــــــ
صعبه امنوادع مهجتي وباجر تضل رميه
تهوه اعله وجهك والمهر خالي يرد اليه
وصدرك يصدر المصطفى تدوسه خيول اميه
وماتكَدر اتحضنك بعد وتبوّسك رقيه
علرمال ... جسمك يالاخو دامي
علرمال ... وجبدك منذبح ضامي
علرمال ... اخيي منكَع نحره ... بالاوداع
ــــــــــــــــــــــ
خلّيني يمّك يالاخو ويّاك اريده موتي
باجر من الهم والقهر يخفت يخويه صوتي
جدامي للناكَه بزجر خصمك يكَلي فوتي
بت حيدر وكلّي شرف راح امشي ابسكوتي
يضربون .... بيّه وتنولي اطفالي
يضربون ...حال الضيم ضل حالي
يضربون .... امشي ابضيمي متيسره .. بالاوداع
ــــــــــــــــــ
الشاعر محمد حسن ضيغم
/channel/kasaedalatharDaygham
الى الوداع سيدي
ــــــــــــــــ
زينب تصيح بلوعه
جفني تسيل ادموعه
خويه اضل مفجوعه
يا هو الينشف دمعتي
ـــــــــــــــــ
هالليله يمي وحايره
وباجر تصير اعله الثره
واني اروح ميسره
واتكفل اني عيلتي
ـــــــــــــــــــــ
يحسين يانور النظر
دلالي يبن امي انفطر
جرحي عليك شكد كبر
ياهو اليطفي جمرتي
ــــــــــــــــــــــــ
يمك اودعك وانتحب
ونيران دلالي تشب
دلالي بالهم ملتهب
خويه شكبرهه حسرتي
ـــــــــــــــــــــ
مااحمل افراكك ابد
يا روح روحي والجسد
دلالي ياخويه انمرد
والالم لوّع جبتدي
ـــــــــــــــ
ناديت الك خويه بحزن
ودلال اختك ضل يون
الليل باجر من يجن
تكبر يخويه مصيبتي
ــــــــــــــــــــ
يل ساكن بهذا الكلب
يانور بي ضوّه الدرب
امسح دمع عيني اليصب
يا خويه وارحم غربتي
ــــــــــــــــــــ
الشاعر محمد حسن ضيغم
شلون اودعج خويه زينب وانه ماعندي جفوف
شلون اشوفن نور وجهج بعيني نبله شلون اشوف
ــــــــــــــــــــــ
حيرتي حيره جبيره خوفي ضعنج بي يمر
انتي والعيله تجيني ولابسه ثياب الصبر
ويحدي ضعنج يالوفيه خلاف ابو فاضل شمر
لاتكولي السوط خويه بالضرب ادمه الجتوف
ــــــــــــــــــــ
شلونك وادعج واني ادري يصعب اعليه الوداع
انتي عل هزل يزينب وانه تحضن جسمي كاع
لاتسمعيني حسرتج لاتكولي الخدر ضاع
انه موبيدي يزينب وذرت جسمي السيوف
ــــــــــــــــ
لاتديري الوجه ليه لوسرت نوك الهزل
ادري افراكج يخيتي عل كمر ما ينحمل
بلايه جفيني يخيتي هذا اخيج منجتل
وهامي مفضوخ ابعمدهم اه من يوم الطفوف
ــــــــــــــــ
مودعه بألله يزينب هذا صوتي البي عذر
خويه راسي وياج يمشي بحسرته ايباري الخدر
راح عيني اتباري ضعنج واحمل هموم اليسر
راح اغمّض عيني لمّا الشامت ايدك الدفوف
ــــــــــــــــــ
انه كافل خدرج ادري عليه اتصعب محنتج
مكدر انظر هذا وضعج وادري احن الشوفتج
فدوه اعذريني يزينب يل عقيله امروّتج
والعذر خطيته خويه بالدمه بهاي الجروف
ــــــــــــــــــ
الشاعر محمد حسن ضيغم