Telegram-канал karawawshamyany - 📖❤کـــەڕاواو شامیانــی❤📖: Unsorted

📖❤کـــەڕاواو شامیانــی❤📖

13 April 2025 14:48

#شۆنەماو_ڕاسی

هەردوی کوڕەکەش جە هەندەران ژیوێنێ. حەر زوو وەلای چەمەڕاو هەواڵێوەشانە ، تا زانۆ چکۆنێ و چێش کەرا، کە چێش، ئا وێرەگا ڕاویارێوە رۆزنامێوەش پەنە بێ کە عەکسوو دوە کوڕەکەیش چاپ کریا بێ
دماو نماو مەغریبی لوا یانە هامسا و دماو ئەحواڵ پەرسی رۆزنامەکەش دا دەسوو کوڕوو یانەگاکەیوە تاوەنۆشۆ پەیش بزانۆ چێروو عەکسەکانە چێش نویسیان، کە چێش کوڕەکەی وات : ئی ڕۆزنامە هینەو وەڵاتوو وێما نیا منیچ مەزانوو وەنووشۆ . کابرا هەناسێوە کاڵش هۆرکێشت ، تاتەو کوڕەکەی واتش : سۆفی گیان ناڕەحەت مەبە خۆ هێشتای مەزانمێ چێش نویسیان رۆزنامەکەنە..
مامۆ سۆفی وات: بەڵێ من نەخوێنەوارنا وەلێ ئی قژامە ئاساونە چەرمە نەکەردێنێ، چن ڕایێ تەر پێسە روەش دێنە ، وەختێ عەکسوو کوڕە هەژارێوە رۆزنامەنە دریا چاپ نەشمە و نشوومەش خاس نیا ، دیارا چێوێ تاڵ ڕوەش دێنە.
منی هەژار ئەگەر تەماموو دارایەکەیم بەسوو کۆڵێ هەورێشەیرە تانجیە مەگێرۆش، کوڕێ من وەروو نەداری و تەنگ و چەڵەمەو ژیوای و بە ئاواتەو ژیوای خاستەری چەنی چن نەفەرێ تەری جوانێ هاوماڵێ وێما ئاوارێ هەندەرانی بیێنێ، وەلێ دیارا جلێ بەوبەختی وکرۆڵی ئێمە بە لەتەرێ مەینەتی رێسیێنە
ساعبێ زوون،هێشتای ئاویە سەروو گوڵ و گیواویوە مەنەن،جریوەو سەیرەو مریچڵەی دلێ داروودرەختەکەینە و بوەو پوینەی تێکەڵوو بوەو وارانی بیێنە، باڕەو وەرەگەلێ، دلێ دەگایش پەڕکەردێنە،پیایێ قۆڵێشا هۆرماڵێنێ و لوێنێ هیتەو و جۆماڵ
ژەنی و کناچێ ئینێنێ ڕاو هانەیوە
ئانا مامۆ سۆفی یانەنە زیارە، هیزی شەوێ تا ساعبێ ئەجیێ مەکیشا کەردێنێ چەمێش تەماشایێوە ئاسمانیش کەرد ، پێسە واچی بارێوە قورس ئینا سەروو شانەیشۆ
ژنەوتەبێش پیایێوە عەکاس چەنی ژەنەکێش یەرێ چوار ڕوێن ئینێ دلێ دەگانە یانەشا گێرتەن،واتشا ژەنەو کابرای شارەزاو زوانی ئینگلیسینە، لوا وەروو بەرەیشا و تەقەش دا و تکا و لاڵەش کەرد بەشکەم ئا ژەنێ بێ و هەواڵوو دلێ رۆزنامەکەیش پەی وەنۆوە.
دماو مەودایێوە فرەی چەمەڕایی، خانمە تەشریفش ئارد، چا فیز و دەمار بەرزا بێ کە کلکوو هەری بە دەسماڵ گێرا،دەموو وێژەن ژاوایوە واتش: ئینە نویسیان ئی دوە نەفەرە سەربە بزووتنەوێوەنێ کە لاینگری کەرۆ جە مان گێرتەی کرێکارا،ئی کارو ئێڎیشا بە کردەوێوە دژە سیایەت قەڵەم دریان و ئیسە زیندانیێ سیاسینێ
مامۆ سۆفی وات: چە کردەوێوە؟! خوایا حەر باسووئاوڕویما نەبۆ،حەر حەیاما نەشۆ،ئیتر بەتوون ، چێش کەروو،دەسەڵاتم نیا
خانمە رۆزنامەکەش داوە دەسشۆ و گێڵاوە.
سۆفی کە پەی یانەی ئێۆە چەمش کەوت یانەو میرزا، زانێ حەر زووەلاین نەوەشا، واتش بلوو سەرێش دەو،هەواڵێش پەرسوو. دماوو ماوێوە چەمێ هیوا و هۆمێدیش بریێ میزای و واتش : ماچا کورەکام تووشوو زیندانی سیاسی بیێنێ،تاوی ماناو چن کەلیمام بە وێمانە پەی واچی؟
ئەرێ میزا سیاسەت چێشا؟
میزای وات: تەماشاو کاروو شوانا کەرە،شوانە ئەگەر وێش سالم بۆ ، گەلە و مێگەلەش بێوەین و شوانەی نا پاکیچ جە وەرگی خرابتەرا
سیاسەت لاو ئینسانی پاک و عالیوە یانێ وەرپەرس حەنناو کۆمەڵگاینە و پەی ئینسانی ناعیسانیچ یانێ سووئیستیفادە جە ئانە کەلیمێ قیمەتیێ و بیرو باوەری پیرۆزینێ، پەی ئانەی دەسەڵات گێرۆ دەس.
سۆفیچ وات: ناعیسانەکا چەنی کەڵک جە باوەڕە پیرۆزەکا گێرا؟
میرزای وات : ماچا حەق ئانەن کە هەژارەکا فرەتەر کار کەرا تا سەرمایەدارەکا وەشتەر ویاراش، تا وێشا بەردەوامێ با.
مامۆ سۆفی پەرساش دەی خاسا ئەی پەیوەننی زیندانی و سیاسەتی چەنینا؟
میرزای وات: ئانیشایچ دوێ دەسێنێ، دەسەو ئەوەڵی ئا سیاستوانانێ کە ئاستوو گەنەڵی و فەسادیشا یاوان رادێوە تازە تارەتشا نمێ و ئەگەروو ئانەیچ هەن دەورووبەریەکایچشا نما بەرا،هەرچن ئا جۆرە کەسا پێسەنێ سۆنەی وبە حیچ ئاوێ تەڕێ مەبا وجەکۆڵوو کۆمەڵگایچ مەباوە.وەلێ رەنگا بۆنەو زیندانیوە بەینێوە جە سیاسەتی دوورێ گناوە.
وەلێ دەسەی دوۆم ئا ئینسانە با شەرەفانێ کە گەرەکشانە نان و دۆ هەژارا گنۆ یۆرە و چێر چەپۆکێ نەبا. چەنی زاڵمی ملا یۆرە ، پاسە تووشوو زیندانی با و حەر هەوڵوو سیاسەتیشانە. پاسە دیار کورەکاو تۆ چی دەسەو دوۆمینێ.
وەختێ مامۆ سۆفی گێڵاوە پەی یانەی ،چەمی بێ هێزش بڕیەبێ ئاسۆی و وەروو وێشرە پاسە لێیەک دێوە کە ئا گردە ئاخا کە ساڵهان هەناوو مننە پەنگشا واردە بێوە،کوڕەکاو من غەریبینە یاوێنێشنە
دەروونوو من گۆڕسانێوە بێ چا قسە نەکریایا و ئیسە ئایشا درکنێنێشا
حەتتا قەبرەیچنە حەر، چەمەڕاو ئازایەتی و غیرەتیتانا
ماکسیم گورکی/افسرصدارت

وانەری وەشەویس

چی چیرۆکنە ئینسانێوە هەژار و ئاورای دوورە شار و نەخوێنەوار وەلێ فرە ئەسڵ و نەسەب دار ، فرە خاس جە قووڵتەرین ماناکاو کۆمەڵگای حاڵی بیەن و ڕاو وێچش دیاریش کەردێنە ، چوونکەی بەدڵ ئینا شۆنەو پاکیوە ، چێوی بە قیمەت لاشۆ ئاوڕوون ، نەک کیسە پەڕ کەردەی، گەرەکشا حاڵیش بۆ و حەر حاڵیچش بۆ.
کاروو میرزاکایچ شیکاری بابەتەکان پەی خەڵکی بە کورت و موختەسەر

عیسائەحمەدی/ساحێب حەبیبی

@karawawshamyany