39
دنيا بلايه حب حسين وأحشه وكلشي ماتسوه
بحق باب الحوائج //ع//
جيت ادك بـــابـــك يموسى الكاظم
لا تـــردنـــي وآنـــه إلـــكــم خـــادم
وسّمــت صـــدري واديــــه
والـلـطـم عــنــوان الــيــــه
*---------------*----------------*
تارك بصدري اثــر خمست اصابــع
خــادم وتشهد الي كلهه الجوامــع
بمجلسك هاي امنياتي وبيهه قانع
كون اموتن باللطم وبلا تـــراجـــع
هـــاي مـــن الله اريـــدن انــي
كون اموت وذكرك اعله لساني
امنيتي تحضرني المنيه
*---------------*----------------*
سيدي بجدم الاماني جيتك امشــي
حاجتي تسوه حياتي وتسوه كلشي
بمأتمك رايــد اطبكه ويغفه رمشــي
وتحمل اللطامه كلهـه اطراف نعشي
حـــاشــه والله تبخل بهالحاجه
طلب عندي وهالطلب محتاجه
خادمك رايد هديه
*---------------*----------------*
الثوب الاسود كشختي وعطرِ المجالس
واللطــــم جمّـــل اديـــــه بـلا محــابس
يا حــلاة الخدمــه بيـــه الكل يتنــافس
اتمنـى املك بالخدامه اجنـــون عــابس
بيهه باجر ادري اكحل عيوني
اني خادم بـــس ملك سموني
خدمتك صارت هويه
*---------------*----------------*
امـك الزهره الزجيه بيهه تحـضــر
امنيتي يالكاظم اموتن جوه منبـر
حته يرحمني بسؤالـه هناكه منكر
يمسح دموعي الجرتلك يبن جعفر
لو سألني الدمعه تنطي اجوابي
ابقى خــادم وآنــه جـوه اترابي
تشهد الدمعه الجريه
*---------------*----------------*
كلبي ضامي والمجالس بير زمــزم
واسمك الساني يحبه وبــــي متيم
حزنك بروحي يتجدد ربـــــي يعلم
بـنـاره يـشـبـه نــار زينب والـمخيم
هذا نوحي وهذا دمعي النازف
يبقى دايــم يبن جعفر حـالــف
خالده بكلبي الرزيه
*---------------*----------------*
واكف الليلـة بــعــزائـك عندي مطلب
حاجتي يمك عفته ودمعــــي منصب
وانـت كاضي الحاجه بابك والمجـرب
واليقصدك يعني قـاصد رحمــة الـرب
رحمة الله بهالمجالس هـــايه
عمري يخلص ريت كله قرايه
بيهه تشفعلي الزجيه
*---------------*----------------*
✍ بقلم خادم الحسين ع
الشاعر رعد الجريخي
أبو فاضل أبو فاضل
**********************
ما تدري بسبينه خوية شصار بينه
ظلت بس عبينه عباس انولينـــه
**********************
الويــاكم أميرة مسبية واسيرة
حيره الشام حيره يا بدر العشيرة
**********************
مچتوفات ادية آيالغاضريــة
كل الهم عليه وين أختك سبية
**********************
والله ما نسيتك لو بيدي اجيتك
خوية شكَد نخيتك ما تقبل حميتك
**********************
ما چان على بالي اتسلب يغالي
ويلي من الليالي حال الضيم حالي
**********************
لا هل لا كَرابه يا ليلي ومصابه
كل يوم بخرابه من عكَب المهابه
**********************
زينب محد ألها من ماتو أهلها
هاي الهم كتلها چا وين الكفلها
**********************
بچه النوكَ حَني عاش وياي وني
مَل الليل مني وينك خوية عني
**********************
تدري شكَد اعاني چم سوط الولاني
كون الموت اجاني شو كَلبك نساني
**********************
حيدر حسين الكرعاوي
هايعباس. هايعباس. هايعباس
زينب انه بلاخدر
وين ياستر العقيله.... النـــــــاس تتباوع الي
خويه ضل دمعي يلالي... گوم رجعني الهلي
منين ماديرن يخويه... اسياط تاخذني اوعلي
گمت ساعة اشگف بديه ..اوساعه اطيحن ونحني
بين الخيول بين الخيول. بين الخيول
زينب انه بلاخدر
خويه بس دخان يمي..اوضاك عن روحي الهوه
والدمع غرگ اعيوني.... اوضاع عباس الضوه
وين چنه اوين صرنه اوبعد مانرجع سوه
اوياحسافه عيوني شافت.. دمـــك مفيض الوه
هاينوماس. هاينوماس. هاينوماس
زينب انه بلاخدر
منين ماديرن عيوني. نارهم تسعر شفت
واعله اطفالي اوبناتي هوايه من عدهم خفت
يابو فاضل رد علييه صدگ عايفني اورحت
وانت تدري اعداك مره اوجوهم بالشر اجت
اشكي حالي. اشكي حالي. اشكي حالي
. زينب انه بلاخدر
فدوه ياراعي الحميه. لا تفــــــــكر بالهجر
تدري يجبرني زماني. أوكف اكبال الشمر
والله لو بس اصبع ايدك. . لــــويرد منك عَشر
ينهزم كل جيش آميه. اوصيتك يزيح الخطر
رد عليّه. رد عليّه رد عليّه
. زينب انه بلاخدر
ادري ماتقبل يخويه. بلايه محمل ناگتي
اوتگلب الدنيه عليهم لو أشوفك دمعتي
خويه بين اهل الشماته. . اشلون حالي بغربتي
بلايه حماي اوكفيل. والله حيره حيرتي
ياكفيلي ياكفيلي ياكفيلي
. زينب انه بلاخدر
مودع الله يابو فاضل. رايحه الدرب الأسر
اوبس جسد ماشيه عنك روحي يمك يالكمر
يبو عطر الما أمله. انطيني من روحك عطر
حتى بي كلبي ألزمه. لايذوب اوينفطر
ياضوه العين. ياضوه العين ياضوه العين
زينب انه بلاخدر
خادم الزهراء ع ابو احمد الطائي
مايدري بينه حامي الضعينه
رحنه بسبي. وي اجنبي. مايدري بينه
واگع العباس شفته اعله النهر
والعلم مطروح والسيف انكسر
يعني أيسن لاخلاص اولا مفر
يابناتي اتجرعن هـذا الأمر
صابوله عينه اوگطعو يمينه
اوبين الزلم. راعي العلم. مايدري بينه
مالگيت أجفوف عنده اولا نظر
اوألف طعنه بطعنه شايلها الكمر
گتله خويه اعليك بالخوه انتظر
اومن تروح ايروح مايبقى الخدر
راح من دينه عمچ اسكينه
او راعي الخدر. ضل عالنهر مايدري بينه
ناس اجتچن عالدمه عطشانه
ولـــنزامط بي موش اويانه
سكته أمشن لـــــــــو شمر لاگانه
ولا تردن عـــــــــالبذيه السانه
يسمع حجينه. الطاغي ويجينه
او راعي الشيم. من ننهظم. مايدري بينه
أجرعن جور الزمن والـنايبات
وشـداً احزام المحن يمدللات
الممات أهون ولا ذلت الحياة
والله متكفل سترچن يابنات
صعبه علينه. امجتفينه
وسفه الكمر. صرنه ابخطر. مايدري بينه
باجر انشوف المصايب ولعذاب
اويمه صبرن لوكعدتن عالتراب
غاب ابوچن والدلال اوياه غاب
واليضل اوحيد يتحمل مصاب
راعي السكينه أمگطعينه
وعالمشرعه. من انودعه مايدري بينه
خادم الزهراء ع ابو احمد الطائي
بعازة اخو والناس مو ناسي
وين انطي وجهي وراح عباسي
محني وتميل عمامتي براسي
وينك
...
خِلة المفگود اخيه اتبيّن اعليه من بعيد
تطلع الكلمه ويّه روحه آخ يفراگ العضيد
ايد تمسح دمع عينه وتلزم لخاصرته ايد
طحت يابيرغ عشيره وعايف حسينك وحيد
الوادم تهابك لو اخو عندك
وشامت سمعته يگلي شو وحدك
بس الهوه يتچيلي من بعدك
وينك
...
يا بو فاضل من اجيتك جدمي بچفوفك عثر
وانحنيت اعليهن ابچي غيمه ودموعي مطر
انطيني ايدك ما گلتها خاف اجرحك يالگمر
گوم يالماعندي غيرك طولك احله من النهر
غيم السمه يالمحد يلوحك
وين الله تطلع روحي وي روحك
ظلت تصيح جروحي و جروحك
وينك
..
چانت الدنيه بوجودك تسوه لو طالت عمر
عندي جنه الگبر بعدك هاي اذا صحلي گبر
عمري بالخمسين عام وتوني حسيت بكبر
الراح من ايده اخيه يفتهم معنه الكسر
بعدك هواي اشتمه بالگوّه
ولو شفت اخوك تگول مو هوّه
ماكو احلى منها عشرة الخوه
وينك
...
كلشي يسألني اعله جيتك حته خطوات الدرب
اشلون راح احچي لخواتك والله ماعندي گلب
هواي صعبه گبال زينب دمعة عيوني تصب
خاف تبچي بصوت عالي وصوتها تسمعه الغرب
من تدري زينب طاحت الرايه
خايف تموت بهاي الحچايه
يا كلمه اگلك والحچي هوايه
وينك
...
طحت يا خيمة بناتي يالچنت الهن ضوه
وهسه احس بسكينه صاحت صوط بمتوني التوه
بطيحتك يعني رقيه چفها بالنار انچوه
وخوله فوگ الهزل تنخه وين شيّال اللوه
وحته رضيعي ما يخلونه
بيدي يبو فاضل يذبحونه
شما شفته اقره كلمه بعيونه
وينك
...
فرگتك چنها المنيه وخلت بجرحي ملح
وكربله قانون بيها الماله اخو يشوف ينذبح
احسبلي يابالفضل ساعه وراسي تلگا عالرمح
اجروحي الف وتسعميه وجرح ما يشبه جرح
ساعه شمرهم يگطع بنحري
وساعه الحوافر ترفس بصدري
وزينب تصيح الحگ على خدري
وينك
...
خادم الحسين ( عليه السلام)
كرار حسين الكربلائي
( ابو كُميل)
أبا الفضل العباس عليه السلام
وكأني بحال أم المصائب زينب عليها السلام
.................
زينب أتنادي أبو فاضل
وبو فاضل عالنهر
لافظ أنفاسه الأخيره
أو ظهر الحسين أنكسر
وا ويلا يعباس
وا وايلا يعباس
..................
1
طول الغيبه كفيلي
أتنادي والمدمع جره
والله ناغزني دليلي
جان سبع الكنطره
من أناديله يجيلي
هسه عني أشئخره
ساعه ويوافيني ليلي
الخيمه مثل المكبره
ليلي لو جلجل سواده
خوفي عباس الكمر
لافظ أنفاسه الأخيره
أو ظهر الحسين أنكسر
وا ويلا يعباس
وا ويلا يعباس
....................
2
عالنهر شو ماكو رايه
ترعب أكلوب الملا
ساكنه أحتوف المنايه
خيل ماكو مجفله
لا ضجيج أو لا عيايه
تنذر أبفد معضله
أبشهر عاشور الرزايه
أشبيه عملت كربله
يعني معقوله كفيلي
وذرو جسمه وذر
لافظ أنفاسه الأخيره
أو ظهر الحسين أنكسر
وا ويلا يعباس
وا ويلا يعباس
...................
3
يا هو ياخذني المجانه
أهناك صوب المشرعه
حتى أذكرنه أبحنانه
وهمس أبنص مسمعه
جيت أذكرك بالأمانه
البيها ذاتي أمشبعه
أنه هوه أو هوه أنه
أرد أعيشن مصرعه
أوياي أكبعنه أبعباتي
وغسل أبدمعي النحر
لافظ أنفاسه الأخيره
أو ظهر الحسين أنكسر
وا ويلا يعباس
وا ويلا يعباس
...................
4
أبخيمة العباس لنه
أتربع حسين أو كعد
هل دمعته أو جرله ونه
بيده جر منها العمد
جنه راد أيكول جنه
عفته عالشاطي جسد
من أبو فاضل الظنه
كطعي يا زينب بعد
خل يجن سكنه أو رقيه
أو يدرن أبهذا الخبر
لافظ أنفاسه الأخيره
أو ظهر الحسين أنكسر
وا ويلا يعباس
وا ويلا يعباس
....................
5
لا يمينه أو لا يساره
أشلون عالغبره هوه
تندب أصوات الحياره
والكلب منها أنجوه
والله للشيعه خساره
أيموت شيال اللوه
أستشهد أبكامل وقاره
الزوده تشهد نينوه
عالكتايب غار غاره
الجيش نصين أنشطر
لافظ أنفاسه الأخيره
أو ظهر الحسين أنكسر
وا ويلا يعباس
وا ويلا يعباس
....................
6
صاحب الذات الحنينه
كافل الحره الأشم
الجابها من المدينه
الكربله أبغيره أوحشم
جف يساره أو جف يمينه
أنكطعن أو طاح العلم
أو بالسهم مطفيه عينه
أو نام بالجربه سهم
ما بقى ماي أبجربته
أو بالعمد راسه أنطبر
لافظ أنفاسه الأخيره
أو ظهر الحسين أنكسر
وا ويلا يعباس
وا ويلا يعباس
...................
7
الشام متروسه شماته
السوك مليانه غرب
وينه جا كافل خواته
العند الملاكه صعب
عالرمح راسه أشحلاته
بالسبي صاحب درب
ميت أو حتى أبمماته
تارس العسكر رعب
راح أجاوب للسئلني
أبداعي مدعاة الفخر
لافظ أنفاسه الأخيره
أو ظهر الحسين أنكسر
وا ويلا يعباس
وا ويلا يعباس
...................
خادم أهل البيت
الشاعر : أسماعيل الجوراني
العقیله تخاطب اخاها الحسین علیهما السلام
—----
خوی یحسین/دفک عین/ عدل لو لامتت
التجی وین/ من البین / یخویه اتحیرت
ادموع عینی هامله
حیرتنی ابعایله
خویه یحسین 2
—------
یلعفتنی / حزینه / ودموعی ساجمه
بین اعادی / لعینه / وعساکر هاجمه
خویه دارت / علینه / جیوش الغاشمه
صرنه نشگف / بدینه / سیاط الظالمه
اطفال هامت بالفله
حیرتنی ابعایله
خویه یحسین2
—------
بین الارجاس / غریبه / ولاراحم الی
الطم الراس / کئیبه / عفتنی یالولی
کافلی امنین /اجیبه / التوزّم محملی
والنسه اتلوع / نحیبه / ومدامعهه اتهلی
من مصایب کربله
حیرتنی ابعایله
خویه یحسین2
—---—
حامه لظعون / ابوالزود / اخوخیته الگمر
نرتجی ایعود / لنا اردود / لچن مامن خبر
یروی لطفال / خذه الجود / یوسفه وماسدر
انصاب بالعین / والزنود / گطیعه اعلی النهر
والاعضاء امفصله
حیرتنی ابعایله
خویه یحسین2
—---—
یالجبتنه / من اهلنه / بسلامه من الوطن
ماهی ولمه / اترکتنه / یخویه بهالمحن
عالیتامه / خیمنه / ابلهیب اتوجرن
اتسلّبینه / انشتمنه / وجفا ویانه الزمن
احوالنه متبهذله
حیرتنی ابعایله
خویه یحسین 2
—---—
زینب آنه / العقیله / ولاشفت الغرب
بعدک ابگیت / ذلیله / ودمع عینی یصب
من الاحزان / نحیله / وضهد حیلی الضرب
ناگة السیر / هزیله / وصعب خویه الدرب
یحدی بینه حرمله
حیرتنی ابعایله
خویه یحسین2
—---------—
خادم اهل البیت سیدناصر الموسوی
الـــوداع ياعلــي ياعلـــي
1
هـاي آخـر ليلـة من عمرك يحيدر
ينطبر راسك وشيبك يصبح أحمر
كلشـي بـفراكــك نعــم راح أيتغير
ينخسـف وجـه السمــه بهــاي المسيــة
الــــوداع ياعلــي ياعلـــي
2
ياعلـي بمحرابــك وساعــة صـلاتك
مــن طحــت مافكــرت أنــت بحياتك
فكــــرت بحسيـــن وبـزينــب غلاتك
وأنـــت يـــــوم أبينـــــك وبيـــن المنيـــة
الــــوداع ياعلــي ياعلـــي
3
شنهو وضعك وأنت باللحضة الأخيرة
ناظـــرك المـــن بعــد حيــدر تديره
شلون زينب راح تصبر والله حيره
مــن تشــوف أجنازتـــك عالغبـــرة هيــه
الـــوداع ياعلــي ياعلـــي
4
ياعلــي أنـــت حلــم كــــل اليتامــة
كلهـا تدعي تقوم يمتـــه بالسلامــة
من غبت غابت ويــــاك الابتسامــة
وغيبتـــك يا اباالحســــن مابيهـــا جيـــــه
الــــوداع ياعلــي ياعلـــي
5
حقها هاي الناس من أتصيح وينـك
جنت خيمـة وتعطف عليها بحنينـك
هالمسيــة ياعلــي غمضــت عينـك
محـــد يعـــــــوض مكانـــــك بالبــريـــة
الــــوداع ياعلــي ياعلـــي
6
الــوداع الليلـة صحنـه بكـل حزنه
رحت من عدنه وبعد ماترجع ألنه
مصيبتك مثل الجرح كسرت قلبنه
لاجــل عينــك نحمــل همـــوم وأذيــــة
الــــوداع ياعلــي ياعلـــي
بغداد
امجــــد صاحــــب الشطـــــري
قصيدة لمصاب سيدي ومولاي علي ابن ابي طالب عليه السلام
اي والله هي هاي… ليلة الوعد
عن طه هالخبــــر .. وبأمر احد
اشدد حيازيم الصبر .. يا علي يالمنطبر
-------------------
انا الما خايف امن المـــوت . انا ملاگيه الف مره
و صفه امن يشوفني بدربه .اهو الموت ايحفــر گبره
لاچن فرگة الخلان .. وهاي اللمه والعشره
اشد من سيف ابن ملجم .. وحگه لصاحب القدره
اطبرني خل افـــوز … للقاء احـــــن
بس ما اريد اشوف .. زينب التون
لا ما تهون ام الخدر .. ياعلي يالمنطبر
----------------------
انا الضارب رؤوس الگوم… لحد ما شهدو الله حي
انه الجامع الضديـــن .. اصيرن ليل اصيرن ضي
شنو طبره وانا الطبار ... انا الصرت لمحمد خي
لاچن لو دنه المسكين… اصير بشفته گطرة مي
ما راكع لسيوف… ما خايف اجل
متصدق برگوع .. و اشعر بخجل
سيفك علامه للنصر .. ياعلي يالمنطبر
--------------------
سيف الله انه والاسلام ... وچنت اتنطر الموعد
لذلك مو عجيبه السيف… اعله هامه السيف من يسجد
و مو خوف اختلف لوني ... خشوع لربي چنت اقصد
انا الچتالي نايم چان … وانه الگتله گوم اگعد
مو وگتك و تنــــام… نفذ فعلتـــــــك
شمتاني هسه گوم ... اضرب ضربتك
حانت منيتك و انتضر… ياعلي يالمنطبر
-------------------------
و ضربني الظالم الحاقد… وبسيفه انطبر راســي
ورغم الضربــه و الالام… لأيتامي مشه احساسي
و انه مصاحب الفقـره… شگلهم لو ذبل ياســــي
اذا مو بيدي اوكلهــــم… منو الهم والزمن قاسي
لهذا الجرح نسيت ... وبالفقره همت
تسأل ابونه ويــــن… لو انه متــــــت
خجلان بس لله العذر… ياعلي يالمنطبر
-------------------------
وصيتي عني احفضوهه ... وعن فكره الامر نابع
كلمن رايد الجنــــــــــــــه… يصفي النية ويتابـــع
الجنه مو شرط مــــــأوى… للگام وبنه جامــــــع
ضمان الجنه ياشيعــه ... تحط خبزه ابطن جايع
اليقتدي يفـــوز … وتفرح جنتــه
لو سائل اعتناه… ويگسم خبزته
غاية وصيتك للحشر… ياعلي يالمنطبر
---------------------------------
وسام الغراوی
( ايتام تصيح )
ايــتـام تـصـيح ... عـلـي
معقوله اتـطيح ... عـلـي
يم بابك الفقـره بهظم مـجـتـمـعـه
منتظره من بـيتك يـحـيدر فـزعـه
يدعون يـارب شـافي النـه الـغالـي
الرد الـشمس ياربنـا كـون ترجـعـه
ايــتـام تـصـيح ... عـلـي
معقوله اتـطيح ... عـلـي
__1__________________
حيدر يدير عيـونه صـوب الفـقـره
والـفـقـره كـل عـيـونهـم عـالـطـبره
شافو نزيـف الـراس يمـشي بهيـده
وصاحـو دخيل الله ودخيل الزهره
ايــتـام تـصـيح ... عـلـي
معقوله اتـطيح ... عـلـي
__2__________________
الـحـاضـر قبـل كـل آدم وكـل حـوّه
مـتـغــيـر هــوايـه عـلـي ومـو هـوّه
الچان شحـلاته احـله مـن الـنـسـمه
مـعــقـولـه يـتـنــفـس هـوه بالـگـوّه
ايــتـام تـصـيح ... عـلـي
معقوله اتـطيح ... عـلـي
__3__________________
اليفـگد عـزيـزه يـا هـو الـيـتـچـيلـه
لـيـل ودمـع نـاتــج الـفـاگــد حـيـلـه
اليفگـد عـلي كـل مـغـربـيه تشـوفـه
مكسـور خاطـر "يـاعـلـي" بترتـيـلـه
ايــتـام تـصـيح ... عـلـي
معقوله اتـطيح ... عـلـي
__4__________________
هـسـّا ذبـل عـود الـيـتـامـه بـفـگـده
يـبقـى اليـتيم ابـلا عـلي وشـعـنـده
نــار الـدمـع يـتـحـول بـنـص عـيـنه
حرگ الخـيم دمـعاتـه تـحرگ خـده
ايــتـام تـصـيح ... عـلـي
معقوله اتـطيح ... عـلـي
__5__________________
معقوله طـاح الـطـاح بـاب بـچـفـه
وحيله أيتهاوه بريح مثل الـسعـفه
بـفـراشـه نـايـم والنـزيـف بـطـولـه
ومـايـقـبـل يـبـطـل ثــوانـي نـزفـه
ايــتـام تـصـيح ... عـلـي
معقوله اتـطيح ... عـلـي
__6__________________
#رزقهم_سلام_الله_عليهم
#احمد_رزاق_الاعرجي
عظم الله اجورنا وأجوركم
بأسشهاد سيدنا ومولانا أمير المؤمنين علي عليه السلام
كل مغرب احن واشتاك الك وتنطر اخبارك
لمن سافرت يا سلوتي موحش صبح دارك
انه ام البنين رايح عني وين
***********
كل يوم اكعد اعله الباب وتنطر خبر منك
تعبني السهر يحسين يمته اترد وشوفنك
تعال خل نتباصر يبني ونكعد سوه
تعال محتاجتلك تدري بكد الهوه
تعال طفيت ايامي وصرت بلا ضوه
جريت النفس كوه واجت ويه النفس روحي
ما استاهل اتعذب وضل بهمي وجروحي
موتني الحنين رايح عني وين
****************
اكتبلك رسايل شوك والدمعات تقراها
روحي العودتها اعليك يم الخيمه تلكاها
وراك سبحت عمري انكطعت وطشرت
وراك تعبت عيني ومن افراكك عمت
وراك امك كبرت واهواي اتغيرت
غايب واشعر امجانك يباوعلي ويحاجيني
انته بعيني وصورك ابد ما فاركت عيني
اصرخ يا حسين رايح عني وين
******************
فزيت بتوالي الليل وصدري خنكته العبره
فاركتك يروح الروح وبعد ما ترجع العشره
حرام ينهد حيلي ويلجم جرحي البرد
حرام يبس غصني ويذبل ذاك الورد
حرام انته اتروح ومني اتروح الولد
وينك يالرحت والشوفتك عايفني عطشانه
البيت الينهجر ما ينسكن وتمله حيطانه
يا تعب السنين رايح عني وين
***************
طول الليل اون اعليك يالتستاهل الونه
اشلون اتروح وانه وياك روحين بجسد جنه
اصيح وينك والحيطان اتردلي الصده
اصيح ودمعة عيني طاحت مثل النده
اصيح توه حسين اكبالي وهسه اشبده
غالي وينعصر كلبي صحت لو سافر الغالي
تكتل فركتك يالصورتك ما فاركت بالي
عذبني الونين رايح عني وين
*******************
لا تمشي وتفاركني تعال افراك ما بيه
يبو الحنيه من اتروح اظل ابلايه حنيه
انوح وخضر جرحك من دمعاتي التصب
انوح وبالباب اكعد وعيوني اعله الدرب
انوح شيردهم يا روحي اعزاز الكلب
ليش السافرو ما عودو ودياري عافوها
وحدي والكبر هدني وحرام المثلي ينسوها
الغالي ابجيله عين رايح عني وين
*******************
يالمتعني درب الموت كل ولدي الك فدوه
عكبك يا حلم دنياي هاي الدنيه ما تسوه
شريد غيرك ياالمنطيتك يمه اربعه
شريد غير ارباي اويمك ما ضيعه
شريد والعباس اجفوفه اعله المشرعه
نورس دنيتي وكل اخوته ايضحون الك لازم
يحسين الولد فدوه صحت كونك ترد سالم
يالتطلبني دين رايح عني وين
**************
تمت
تحسين الخفاجي
كلبي المجروح يايمه
الفركاك اينوح يايمه
بيه اشسوه فركاك وديت اربعه وياك
***************
ودعتك ونار الحزن تجويني
ومن فركتك ما كمت اشوف بعيني
ينطيك كلبك تمشي وتخليني
يحسين لجلك كبريت ابنيني
وادري ايوفون يايمه
وراح ايضحون يايمه
كل الولد تفداك وديت اربعه وياك
****************
يحسين اسمك يسري ويه الانفاس
جنت امن اشوفك انسه وجه العباس
عطر الحبايب احله من عطر الياس
تدري بغيابك يبني شيبت الراس
يمته الغياب يايمه
ايدكون الباب يايمه
ضل ابالي ذكراك وديت اربعه وياك
********************
ارجع ييمه وشوف عكبك حالي
لمن عفتني ضل مكانك خالي
ام البنين وحسرتي بدلالي
اشلون اصبر وعن عيني راح الغالي
بهجرك يحسين يايمه
بجيت العين يايمه
ضلت روحي ترجاك وديت اربعه وياك
**************
يا دنيتي وروحي وحياتي وعمري
وانته الهوه يحسين عندي اليسري
حدب ييمه امن المصايب ضهري
كل يوم اذكرك والمدامع تجري
بصدري الالام يايمه
وظلمه الايام يايمه
لا تنسه وانساك وديت اربعه وياك
********************
عفتوني وحدي وبيه تغلي النيران
والبيت بيكم كل وكت يزهر جان
كمت انتظر طارش يدك البيبان
ما ينحمل ياروحي فكد الوليان
كل لحضه اشتاك يايمه
ما بيه افراك يايمه
تدري بكلبي يهواك وديت اربعه وياك
*****************
يحسين عكبك كلي شيخلصه الليل
وانه ادري باجر صدرك اترضه الخيل
طيحت اخوك بكربله اتهد الحيل
ودم نحرك اشكد عالترب راح ايسيل
ايدوسون اعليك يايمه
وتنهض ما بيك يايمه
وتطحن جسمك اعداك وديت اربعه وياك
*****************
تمت
تحسين الخفاجي
عظم الله اجورنا وأجوركم
بوفاة سيدتنا ومولاتنا
أم البنين ع
حركَو يا عباس خيامي
************************
يالشايل بيدك رايتنه
خافن ما تسمع صرختنه
ليل الطف يبچي لونتنه
والأكثر خوية يألمنه
************************
دكَيته لصدرك چم مرة
تالها تظل على الغبرة
ما تدري بزينب متحيرة
ليل وخوف ومحد يمنه
************************
اتستر بيمن من اطلع
خلافك عباس امشي واوكَع
باچر لمك بيمن أرجع
يم دارك يوم النتعنه
************************
خيل ونار وخوف وغربة
تنسب زينب كلش صعبة
غيبتكم دلالي تشيبة
نسولف المن باچر همنه
************************
فرت من الخوف العيلة
شيخلص عباس الليلة
ياهو اليسمعنه ونشكيلة
شكَد مصايبكم تهظمنه
************************
وين امشي برضعان وخّدر
شحچيلك يا عباس اكثر
زينب توكَف يّم العسكر
ياخذ عمري الموت اتمنه
************************
أركض والنسوان كَبالي
ورضعانك تتباچه لحالي
مو حكَه يشيب دلالـي
واحد كل ساعه يشتمنه
************************
حيدر حسين الكرعاوي
نزلة لرجوع السيده زينب عليها السلام
خويه عباس. جيتك باحزاني
................
يالكفلت ظعوني... عاين الحال
جيتك بآلامي... دمعي همّال
ارد اخبرك بالسبي وآلامه
شيّبت ياخويه من ايامه
وين گبرك خل اشم ترابه
هواي تدري لشوفتك محتامه
تبقه كفّال ماكو غيرك ثاني
خويه عباس. جيتك باحزاني
.................
يالچنت تحميني... مدلله هواي
من طحت چتفوني... للسبي اعداي
ترضه ياعباس اختك آني
فرجه اصير بمجلس السفياني
بيّة يتشمّت يراعي الغيره
ومن سأل عني شكثر اذاني
يسأل يريد يجرح بوجداني
خويه عباس. جيتك باحزاني
................
لكربله ردّينه... بعد لغياب
يابوفاضل خويه... دمعتي عتاب
وين گبرك ياگمر دليني
خوية من تحت الترب حاچيني
نايم بگبرك ينور عيوني
بيد دهري الغادر امخليني
جرحك هواي ياگمر بچّاني
خويه عباس. جيتك باحزاني
................
آنه زينب خويه... ريتك تشوف
جيتك بياحاله... لوني مخطوف
من سبي الشام وقهر دنيايه
جيتك وجبت الحرم ويّايه
هنانه خويه گطّعوها چفوفك
طاحن وطاحت يخويه الرايه
خويه والماي. يجري ماروّاني
خويه عباس. جيتك باحزاني
................
انتحب يم گبرك... تسمع الصوت
ريته ياخذ روحي... مايجي الموت
خويه ريت الموت ياخذ روحي
ولااظل عباس بين جروحي
شگد بچيت وماهدت آلامي
لا دموعي التنفع ولا نوحي
دمعي سچاب ماكو من يرعاني
خويه عباس. جيتك باحزاني
سيد زيد الفحام
2020
________________________________________
لاتمشي عباس. ياخويه تاني
تتركني اشلون والهم خذاني
تقبل يبو الغيره انهضم وامشي سبيه
اوينشد حبل من رگبتي. الرگبة الرقيه
ـــــــــــــــــــــــــــــــ
انسبي بلياك. . انهضم بجفاك. .انتهي ويخلص دلالي واشبع اهموم
من تفاركني. حزني يذبحني اوهيبتي وخدري يضيع اوكلبي مالوم
منين اجتني كريله اوصار الحزن يبرالي
اوعباس اموت اولا آصد. والگه مكانك خالي
اتفـــارگ اوياك. موش بحسابي
اولو ودعتني ينزل عذابي
الموت خويه اهون الي من سياط اميه
وينشد حبل من رگبتي. الرگبة الرقيه
ــــــــــــــــــــــــــــــــــــــ
اسودت أيامي اوضاعت احلامي. اوگرب اعليه الاسر وفراگ أخيي
زينبك أني . ابين عدواني. اوعگبك اركض عالجمر بخيامي اطفي
لاتمشي ابعيد الدرب اومحد يباري الاختك
ودخيله من رفگت شمر عباس خويه امروتك
عكبك يعباس. ياهو اليردني
او لوفاركتني يذبحني وني
جم چلمه أدگ بالعظم تنگــال الـيه
اوينشد حبل من رگبتي. الرگبة الرقيه
ــــــــــــــــــــــــــــــــــــــ
ينكسرظهري وينسى گدري. اوخويه يالعباس كلها اطول اديها
تهمل اعيوني . من ييسئلوني وينه حامي ضعونجن شو ما يجيها
يسألني ياخويه الشمر عن حالتي بجفاكم
اويتبسم اويشبع ضحك .لوكمت خويه انعاكم
اوياهو الأحـاجيه. يتعاند اوياي
اويم راس الحسين أيبدي الماي
أيگلي ممنوع الحجي سكتي سبيه
اوينشد حبل من رگبتي. الرگبة الرقيه
ــــــــــــــــــــــــــــــــــ
ضاعت امالي. خويه وطفالي . أنذبح لو شوفها اتنام بخرايب
يمي أتعاني. اوتدوي نيراني. اوشيب يطلع بجفن
من المصايب
يوميه خويه من الفجر. بالنوح آصبح احسيني
وتعاينه فوگ الرمح عميه عليكم عيني
ايگابلني الحسين. ممروده عينه
اوجرح الحجر صار طبعه بجبينه
اوهل مشهد ايضل مستمر للمغربيه
اوينشد حبل من رگبتي. الرگبة الرقيه
ــــــــــــــــــــــــــــــــــ
ابشاربك انه. روحي خلصانه. خويه شبعانه قهر عينك عليّــــه
ليش نتباعد. احنه مو واحد اوعمري ماريده اذا رحت من ديه
مو أحنه چنه من الزغر. واحد يباري الواحد
ورده وغصن مانفترگ. ونموت بس نتباعد
يالرايد اتروح. لاتحني ظهري
وبجفاك عباس. مايسوه عمري
اشلون وانه اخت الكمر. يجتفون اديه
اوينشد حبل من رگبتي. الرگبة الرقيه
خادم الزهراء ع ابو احمد الطائي
عايفني مكسورة گلب
وينك ييمه
بعيوني ما شوف الدرب وينك ييمه
وينك ييمه .. وينك ييمه
...
يالولد يا شوف عيني ضيعت كلشي بغيابك
اوداعتك كل مغربيه شابحه عيوني اعله بابك
بعد توه الناس يبني اشافت امك من شبابك
يا جمال الله ونبيه اعليك ما لايگ خضابك
امحلفتك بهز المهد ارجع يغالي
ما يرحم افراگ الولد ارجع يغالي
دنياي ظلمه .. وينك ييمه
...
اتخوصرت گدام جسمك ومالت الخيمه لنحيبي
مشطت بچفوفي شعرك وبدماك اصبغت شيبي
انه امك ليش ساكت احچي كلمه يا حبيبي
رزق ما مقسوم اليه وليدي چنك مو نصيبي
ها يبعد عمري وهلي رحت منديه
گطعّت گلبي يا علي رحت منديه
حاچيني كلمه .. وينك ييمه
...
الوالده التفگد ولدها گلي شتسوي بعمرها
تدري يا ضي عين امك فرگتك كسرت ظهرها
بهامتك طبره اشكبرها انشلت ايده الي طبرها
السيف فرهد تعب شيبي وعايف جروح شكثرها
محنيه من كثر الحزن والله يروحي
ما ينحمل فگد الابن والله يروحي
دمك ألمه .. وينك ييمه
...
ليش يا سباح گلبي تعوفني بغربه وحيده
عمر ما بي علي الاكبر هذا عمري ما اريده
شوف ابوك يلوج بعدك حاط فوگ الظهر ايده
تدري بالوالد ييمه ايموت لو فارگ اوليده
گدام عدوانه بچه من بعدك حسين
بعامود خيمتنه انتچه من بعدك حسين
ونحرك يشمه .. وينك ييمه
...
ما بعد بس وحده حسين يفگد هله وناسه
السيف يتدنه مكان الـ بي رسول الله باسه
الشمر من يگطع وريده عالرمح يرتفع راسه
من يريت تشوف صدره وحافر الخياله داسه
وامك يركبوها الهزل وامشي سبيه
چفي يشدونه بحبل وامشي سبيه
جرحك الچمه .. وينك ييمه
...
خادم الحسين ( عليه السلام)
كرار حسين الكربلائي
( ابو كميل)
راحو ولدي يا هل ناس لاكن ما يهموني
همي بالعزيز حسين هوه الساكن عيوني
***********
راحو ولدي واعله الباب ضلت دمعتي اتلالي
عافوني واشوف البيت ضل امن الزلم خالي
جنت اولادي اكبرهم ووصيهم عله الغالي
ضلت عالغريب حسين تسعر نار دلالي
ما حسبالي هيج بساع ولياني يودعوني
همي بالعزيز حسين هوه الساكن عيوني
************
انه ام البنين وكام دمعي ايفزع الوادم
براحه اتنام كل الناس وانه جفني ما نايم
عندي انه اربعه وتدرون بحسين الكلب هايم
فدوه الولد صحت بصوت بس كونه يرد سالم
اشم ريحة الغالين يم العتبه ودوني
همي بالغريب حسين هوه الساكن عيوني
***********
من راحو احباب الروح راحت روحي وياهم
كمت اكتب عله الحيطان ذكره ودمعي ينعاهم
تكتل فركة الغياب وانه ابجي اعله فركاهم
ما ينسون اريد حسين ويضحون بدماهم
ربيت وسهرت الليل ودري ما يخيبوني
همي بالعزيز حسين هوه الساكن عيوني
************
انه ام الكمر والناس كلها سولفت بيه
بدويه واضل للموت انه اتباها بدويه
يحسين واشوف اهواي جلمت خادمه اعليه
صحت بصوت يا عباس عينك عله العلويه
يوليدي اربعتكم كون بالعاشر تفرحوني
همي بالغريب حسين هوه الساكن عيوني
****************
للطف ودعيت اقمار واحدهم بالف واحد
كلتلهم يماي العين ضحو وراسكم بارد
كلبي الما تلمه جروح غير حسين ما رايد
والفاركله خوش احباب يبقه بالدرب كاعد
انه ام البنين وشاب راسي وخابت ضنوني
همي بالغريب حسين هوه الساكن عيوني
************
اوكف يابشر ناديت ما انشد صحت عن عون
جعفر وابني عبد الله للغالي فده يرحون
تكتل فركة العباس لاجن للغريب تهون
لحسين انذرت ولدي وردت بكربله ايضحون
اشعندك من خبر كلي يالنعيك خطف لوني
همي بالغريب حسين هوه الساكن عيوني
**************
تمت
تحسين الخفاجي
مقدمه للعباس عليه السلام 2021
ما شوف راية ولا كفيلي بعيني
عباس طاح بيا كتر دلّيني
يحسين لتظل ساكت وحاچيني. ياخويه
............
ماشوف رايه عله النهر لاحامي خدري الغالي
خيل وزلم عالمشرعه خاف ورجف دلّالي
عباس ماشوفه بعد بس التراب اگبالي
طمّني يحسين شحصل عن كافلي اليبرالي
ليش انت لازم ظهرك وتتحسّر
شصاير على العباس يابوالأكبر
بجروح گلبي وهمّي لتخلّيني. ياخويه
..............
يحسين حاچيني شسبب وجهك تغيّر لونه
بس لا چفوفه اتگطّعن بس لا سهم بعيونه
عباس اخويه الهاشمي قوة علي بمتونه
ما يوگع وما ينثني إلا اذه يغدرونه
معقوله يرمينه الشمر بسهامه
وعباس عايش مايكسر عظامه
ياخوفي طاح وطيحته تأذّيني. ياخويه
.................
ما جاوب اخته امن الألم گلبه احترگ بالهيمه
لخيمة ابوالغيره دخل طيّح عمود الخيمه
معناها يازينب وگع عباس راعي الشيمه
يعني استعدّي للسبي ودرب المآسي وضيمه
لطمت وجهها زينب المفجوعه
راواها دم من يمنته المگطوعه
گاللهه يختي عله الصبر عينيني ياخويه
..................
شحچيلچ وخاف الحچي ما ظنّچ اتحملينه
ما واجهوه غدروه غدر ياريتچ تشوفينه
ظل حاير بظهر الفرس من گطّعوا چفينه
عباس طاح عله النهر صابه العمد بجبينه
عالمشرعه لمن وگع ناداني
حسّيت طايح منّي نصفي الثاني
ما شرب ماي وغايته يواسيني. ياخويه
....................
متزاحم بصدره النبل ضيّع علينه الملگه
همّيت اشبگه وفكّرت تلچم جروحه الشبگه
ودّعته يختي بدمعتي وصّاني گبل الفرگه
من زينب اطلبلي العذر صاح وحچاها بحرگه
باجر اذا راحت سبي للكوفه
لا تنظر لجسم الگمر وچفوفه
منچ سماحه رايد موصيني ياخويه
...............
ما قصّرت يابالفضل ياخويه ومسامحتك
وفّيت ياحامي الظعن مشكور يابعد اختك
شماصار بية بالسبي لا تهتم وعاذرتك
تبقه الكفيل شماجره ارحل وعود ابختك
لكن ابواليمه انفجع بغيابك
ظهره انكسر يابالفضل بمصابك
حالك وحاله ابكربله امبچّيني
#سيد_زيد_الفحام
________________________________________
وين الاحباب. . يدنيه. وين الاحباب
كلبي مصيوب اوعليهم جرحي ماطاب
عيني مانامت ولاطبكت وراهم
اوشال من عدهه الضوه ابشيلت ضواهم
اصياح اصيحن من ألم كلبي الهواهم
اودمعتي مافارگت خدي بجفاهم
شلو احوالي او سبوني ابطول الغياب
وين الاحباب. يدنيه وين الاحباب
أحبابي يادنيه وعلي چنهم نسوني
ومـــاوصل منهم خبر لا راسلوني
حيرة الاعمى ابدرب غربه اتركوني
اوغرگوني ابشوگهم من فاركوني
خضرن دمعاتي واعيوني على الباب
وين الاحباب. يدنيه وين الاحباب
فاركوني اومانست عيني صورهم
اوجنت أتمنه الهوه ياخذني يمهم
صحت وينك يانسيم الي تمرهم
أخـــذ مني أعتابي اورجع عذرهم
أعتابي أخذه اوياك وصله لأهلي الاطياب
وين الاحباب . يدنيه. وين الاحباب
ليش ماردو عليَّ أهلي النشامه
وانه أعرف مايتركون اليتامه
خاف ابوي احسين حرگوهن خيامه
اوخايفه بطف كربله اتموت السلامه
دنيتي نشدي احبابج والهوه الهاب
وين الاحباب . يدنيه. وين الاحباب
يم خدر زينب يدنيه ركزي العيون
اوشوفي العباس بعده ايحامي الضعون
عمي سالم لو وگع من كثر الطعون
اوسالمه من العطش لو ونت ام عون
احسين بعده بظهر مهره لو على تراب
وين الاحباب . يدنيه. وين الاحباب
دنيتي بس هالخبر منچ كفايه
أخياتي ابخير لو راحن سبايه
فدوه گولي بخير ماعدهم ضحايه
اولاتگليلي ابهلج صارو دمايه
روحي راحت من عذابي وأنطر اجواب
وين الاحباب . يدنيه. وين الاحباب
خادم الزهراء ع ابو احمد الطائي
لحن قصيدة (يايمه شلون)
يابويه شلون يابويه شلون
نفترگ ياعلي يابويه شلون
لا مو بالهون لا مو بالهون
فرگتك يالأبو لا مو بالهون
_______________________
يا حيدر علي بان اليتم بول مسيه
فقره اخلافك الظلو يبو الفقره خطيه
ريت بموتتك يفني العمر يابو الحميه
نذكر من تجي نزرع حلم نگعد سويه
عالخاطر مجت تمشي بعجل وي المنيه
عيون الحبتك من الدمع عميانه هيه
خانت دنياك خانت دنياك
ماوفت للأسف خانت دنياك
ياريت اوياك ياريت اوياك
ننجرح ننطبر ياريت اوياك
_____________________
المثلك روحته صعبه ترى وكلش هضيمه
وبيبان الفقر ظلت عگب چفك يتيمه
تطرقها چنت بيدك علي وهايه عظيمه
تدعي الوادم الشخصك تريد الله يديمه
ما حسبو لبن ملجم يسويها الجريمه
اليله بغيبتك نمسي ترى بليله اليمه
والكل مفجوع والكل مفجوع
من سمع بالخبر والكل مفجوع
فزعو بدموع فزعو بدموع
والگلب محترگ فزعو بدموع
___________________
وجهك ماردت واحد يشوفه وهايه حكمه
والما يعرفك بس يسمعك تبنيله حلمه
مثلك ما حصل لا ما يجي بهالدنيه زلمه
متواضع لحد ما مرتفع عد الله علمه
الجوعان اليجي يمك علي التشبعه چلمه
الماله احد صرت عونه وسند تچايه يمه
يابو المعتاز يابو المعتاز
چامنو يكررك يابو المعتاز
سويت انجاز سويت انجاز
ماگلت هذا الي سويت انجاز
______________________
محرابك مسه موحش بقه ما بيه اذانك
وما بين اليحبونك صفه خالي مكانك
يا حيدر يتامه اليله البحاجت امانك
شو شبعو بچي أليليه شابعهم حنانك
حنيه ودفو ينگط سوالف من لسانك
احرار الحبتك عاشت صدك فترة زمانك
اليله اينامون اليله اينامون
عالوجه يالولي اليله اينامون
لا ميتانون لا ميتانون
ماتجي وإسو لا ميتانون
______________________
التفگدهم چنت ليليه چا ياهو اليمرهم
مارادو العمر نذرو عگب عينك عمرهم
سطره بلارحم هذا الوكت وسفه سطرهم
الظالم من اجه گبلك ترى ايتامك طبرهم
ويظل بالگلب لا مايفض تدري قهرهم
بذكرك يالابو اليل اليمر يخلص سهرهم
ما يرتاحون ما يرتاحون
من رحت للأبد ما يرتاحون
لا ما ينسون لا ما ينسون
وگفتك لاتظن لا ما ينسون
_______________________
خادم امير المؤمنين
الشاعر /حميد عبدالحسن السعيدي
لطموا اعلى الخد يا لطّامه
حيدر طبروه اعلى الهامه
*
يلطم جبريل ابجنحانه
عرش الله اتهدم اركانه
بيت الله اصبح دم حيطانه
وجه الله صابوه عدوانه
ما تمّم يا ويلي اصيامه
حيدر طبروه اعلى الهامه
*
اتيتّم هالليله المنبر
حين الطبروا هامة حيدر
والكعبه اتون بسمه و تجهر
و حسين من الهم يتعثّر
تتصارخ هالليله ايتامه
حيدر طبروه اعلى الهامه
*
زینب مدهوشه من الطبره
تتناشق یابویه ابعبره
تنعي و تندب امهه الزهره
لن تعرف حيدرهه اتحضره
مفجوعه و تنحب لآلامه
حيدر طبروه اعلى الهامه
*
دم اصبح حيدر محرابه
زينب شدّتله العصّابه
و اتضمّدهه اجروح اصوابه
مخنوگه و تنحب لمصابه
کل ساع اتقبّل بجدامه
حيدر طبروه اعلى الهامه
*
زينب يا زينب يا زينب
ام لخوتهه و ام للمذهب
من يوم الصارت تتعذّب
الجدهه ، الامهه ، الحيدر تنحب
اتشم و اتقبّل لعمامه
حيدر طبروه اعلى الهامه
*
خادم خدمة الحسين عليه السلام
ناصرآلبوعبید
تچوله الحسن وحسين حماي الحمه الليله
طاح الكون والدم ماخـــــذ اصوابه
عرش الله انفجع ويواسي محـرابه
لون الشيب گالـــــب احمر اخضابه
من الطبره حيدر راح كـــــــل حيله
تچوله الحسن وحسين حماي الحمه الليله
ياليل المصيبه الـــــــــدوهن ايتامه
طبرو چـــــــم فقير ابطبرت الهامه
من بيت الرساله طــــاحت اعمامه
ومال الچان مايعرف شنــي الميله
تچوله الحسن وحسين حماي الحمه الليله
جابو حيدر بيا حــــــــــاله ومصوب
تعثر بالعـــــــــــــــــبايه اتلگته زينب
ينزف مـــن جبينه وشدته ابمعصب
واتگله اعله هــــــونك يامن اتشيله
تچوله الحسن وحسين حماي الحمه الليله
گضينه الليل ندعـي سالم اتكومه
ياربي اليتامه امچلــــــبه بهدومه
ماضم الطبيب وگال حــــل يومه
سبلهه الچفــــــوف وقلت الحيله
تچوله الحسن وحسين حماي الحمه الليله
يم راسه الزلـــــــــم لماها ويگلهه
گلهم هــاي اختكم شيلو محملهه
كض ايد ابو فاضل گـــال تكفلهه
گله ابعيني زينب هــــيه والعيله
تچوله الحسن وحسين حماي الحمه الليله
وين الچان محــــــــد يلوي ذرعانه
متبدي اعله طوله وروحه خلصانه
دفان الزلم وايــــــــــــــــريد دفانه
واحتار الحسن مـــــن راد تغسيله
تچوله الحسن وحسين حماي الحمه الليله
خادم مولاه
شاكر الصيمري
الوداع الوداع ياعلي ياعلي
*
ودعتك الله ياعلي هذا اخر اوداع
معقوله هليله السمه ندفنهه باالگاع
شفت اليشيعونك مشو ياحيدر بساع
مثل السفينه انه صرت مكسورة اشراع
الوداع الوداع ياعلي ياعلي
*
يوميه غالي اتودعه عيني من الاحباب
ويوميه گلبي يندفن ويضمه التراب
الله ياهذا المسه وياعظم المصاب
لمن اشوفن والدي وذاك العطر غاب
الوداع الوداع ياعلي ياعلي
*
اول مسيه ياعلي ماهو انته باالدار
ها الفارشه مصلايتك وانحب يكرار
تسبيحي صارت دمعتي ياحامي الجار
اصوابك يظل ياباالحسن طول الوكت حار
الوداع الوداع ياعلي ياعلي
*
البيت اذا راح الابو يتنفس اهات
وعيوني اذا ماشافته تگضيها دمعات
هليله يابويه صدگ حدر الثرى اتبات!!
هاي المسيه الجيتك خيعون الاموات
الوداع الوداع ياعلي ياعلي
*
ساعة وداعك عاالگلب بيه زيد الهم
وشكثر حزني الفرگتك بس الله يعلم
عاشور ياحيدر علي من هسه خيم
واليوم صارت دنيتي عاشر محرم
الوادع الوداع ياعلي ياعلي
*
#سعد العبودي
ام البنين عليها السلام
حدّبت بمصابكم شيّبت بغيابكم
يا بنيني. يا بنيني
................
يالمشيتو وباقي بعيوني اثركم
ماكو رجعه گلبي ايّس من سفركم
رحتو عني وظلّت ابّالي صوركم
راسي شيّب من رجع ليّة خبركم
دم بچيت ابّابكم شيّبت بغيابكم
يا بنيني. يا بنيني
................
الوالده حگها عله ابنها تبچي وتنوح
يكتل فراگ البنين ويجرح الروح
شلون لو عالغبره سمعت عنه مذبوح
تبچي دم بمصيبته وتتنفّس جروح
سلني عطر ثيابكم. شيّبت بغيابكم
يا بنيني. يا بنيني
................
يا بنيني الاربعه الكم سلامي
عفيه ماقصّرتو وي تاجي وامامي
ارفعتو راسي فدوه نفّذتو كلامي
عليكم ابچي واكثر عله الطاح ضامي
اسوّه بيه صوابكم. شيّبت بغيابكم
يا بنيني. يا بنيني
................
من مصاب حسين يبقه مصابكم دون
صح جرحكم يچوي گلبي لكن يهون
حسين اعظم منكم ومن عندي تدرون
مصابه هد حيلي وفجعني وغيّر اللون
صاب گلبي الصابكم شيّبت بغيابكم
يا بنيني. يا بنيني
................
بمكم المفجوعه ماظل قوه لا حيل
اكثر عله حسين حگهه دمعتي تسيل
منهو منكم يابنيني داسته الخيل
وذر من جمسه الحوافر گامت تشيل
گاعده بعتابكم شيّبت بغيابكم
يا بنيني. يا بنيني
................
ثنعش طبره ابنحر ابوالسجاد طبروه
ويلي ريحانة مُحَمَّد ضامي ذبحوه
بالخيول الاعوجيّه شلون داسوه
برمح عالي گبال زينب راسه شالوه
تيتّمت احبابكم شيّبت بغيابكم
يا بنيني. يا بنيني
................
آنه امكم فاطمه المجروح گلبي
عگب ابواليمه اموت دعيت ربي
چني اسمع صوت يم عباس طلبي
صحت ريت حسين هذا اليوم قُربي
عارفه باسبابكم شيّبت بغيابكم
يا بنيني. يا بنيني
................
گبل لا تغمض عيوني لنّه يمي
حسين ابوالسجاد شفته وزال همي
گتله ياموت اخذ روحي صار حلمي
روح ابوالسجاد هاي تصيح بسمي
اندفن بترابكم شيّبت بغيابكم
يا بنيني. يا بنيني
#سيد_زيد_الفحام
_____________________________________
ودعوني الاحبهم ودعوني
عذبوني بهجرهم عذبوني
شو خذو كلبي ومشو ليش هيج اتأخرو
****************
اكعد وبالباب اون راح اموت امن الحزن غير كون انسه يكلبي خاطر ارتاح
ظلمه صارت دنيتي امن اجيبن راحتي فاركوني والدمع مثل المطر طاح
تعب عيوني السهر ليش فركنه الدهر اعليه احس فجر الحزن من سافرو لاح
امن الحبايب ايست وللعذاب اتحزمت هسه ياروحي اعرفت ما يرجع الراح
فاركوني الاودهم فاركوني
ما يجوني اعرفتهم ما يجوني
خاف يا كلبي نسو ليش هيج اتأخرو
******************
خلصت عمري بجي بعد شيفيد الحجي والجفوني ليش بجروحي يعيلون
اهواي يا روحي اتعبت امن المصايب شيبت راحو وضلت صورهم بين العيون
عندي ما ضل كل امل فاركت كل الاهل اتردلي عافيتي بنيني لو يرجعون
تربي عيني اعله الدرب والهجر كلش صعب ابد ما جان اعله بالي عني يمشون
حيروني الحبايب حيروني
اتعذروني يكلبي اتعذروني
كلمه وحده ما حجو ليش هيج اتأخرو
********************
انه ربيت الولد وللطفوف احسب وعد انه ادري الاربعه يوفوني بالدين
بولدي ما مهتمه ابد وكلبي عنهم ما نشد انه شاغل بالي ضل اوليدي الحسين
هوه روحي وسلوتي وهوه مالك دنيتي وهوه اعز امن النفس محبوبي والعين
ضلت دموعي تهل بعد شيلم الشمل اجفوفي تعبت من كثر دك الحياطين
شيبوني بجفاهم شيبوني
شو نسوني اظنهم شو نسوني
للمنيه اتحزمو ليش هيج اتأخرو
******************
كمت اشم كوه الهوه كلبي جم مره انجوه صحت بسك يازمن حن اعله حالي
شكتب الهم حايره والرسايل تنقره الغالي حته لو مشه ايضل دومه غالي
يمته نتلاكه بعد خاف ملكاكم برد الفركه طالت وانه بس احسب ليالي
حسين بوداعه متت والمجانه باوعت اتخيليت ايكلي يايمه تعالي
عاكَبوني بمشيهم عاكَبوني
وتعبوني بهجرهم تعبوني
وبعذابي ما درو ليش هيج اتأخرو
******************
بزينب اوصيكم صحت وما تخيبوني اعرفت هاي كلش غاليه وغالي خدرها
كوم يا راعي العلم واحلف بذيج الخيم ما تفارك زينب وتكسر ضهرها
ثني رجلك يالولي وخلها تصعد بت علي كَود ناكة زينب وامسح اثرها
تدري بيها امدلله يا جفيل العايله صير شمعة ليلها وعزها وذخرها
طمنوني اعله زينب طمنوني
وفرحوني بختكم فرحوني
الكربله ولدي اعتنو ليش هيج اتأخرو
***************
عرضت اكبالي الصور وخطفت اشباح القدر كلها باجر تسبح بدم المنيه
تنذبح راح الولد وليه ابن حذلم يرد ايكلي ويلادج كضو بالغاضريه
ايطيح من جتفي الفضل وتبكه دمعاتي تهل اشلون بيها ام البنين بهل الرزيه
بولدي لتسولف صحت تدري بيه اتكطعت يا بشر سولفلي عن ابن الزجيه
صوبوني بمصابه صوبوني
لوعوني بغيابه لوعوني
وصله من جبدي اشلعو ليش هيج اتأخرو
****************
تمت
تحسين الخفاجي
بعيد الدرب دمعي يصب ضل عالفاركوني
وكت العصر ادعي اشكثر وين الله ويجوني
وياك اربعتهم للطف ودعتهم
****************
نزلة الدمعه وطفت الشمعه وين الاكيهم كمت اتانيهم بعتبة الباب
سافرو ولدي وصبحت وحدي ولجمت اجروحي ضلت بروحي عكب الاحباب
امس عيني ترف وستعوذيت الله
ومن هذا السفر كلش خفت والله
خلو يمي بس اكماط عبد الله
ولا اندل دربهم خاطر اوصله
احبابي امن امس حته الشمس وياهم خذوها
كلبي انكسر ومن القهر روحي عذبوها
البل غيره ارضعتهم للطف ودعتهم
**************
حسين محبوبي وشمعة دروبي ومن يفاركني دموعي تحركني اشلون اعوفه
يسري ويدمي ونسه كل همي من يحاجيني وينضر بعيني وانه اشوفه
انه ادري النشامه الكربله ماشين
صح اعزاز بس موش بمعزت حسين
اشما كلها دمعتي كافي لا تبجين
تعرض صوره العطشان وسط العين
كمت وطحت واشكد خفت من هاي العلايم
فدوه الولد خل لا ترد بس كون ابني سالم
بسمك شجعتهم وللطف ودعتهم
**********************
راح ابو الغيره وحيرتي حيره هذا ابو الرايه اعهوده وفايه اشكد احبه
راح للخوه راعي المروه ايكطع اجفوفه ويكتب احروفه من اندبه
دللول الولد ما لولي مثل الناس
دللول العلم لوليت للعباس
راسي اشلون ادنكه وابني شال الراس
راسه ينكطع والخيمه ما تنجاس
لمن دنه ويمي اعتنه كتله بذمتك الماي
وبكربله للعايله يبني اتحول افياي
خطوات اتبعتهم وللطف ودعتهم
***************
ادري يوفوني وما يخيبوني حته نسمتهم بلهفه شمتهم الاربع اقمار
بزينب اوصيهم ودوم احاجيهم بزود احرسوها ولا تخلوها اهناكه تحتار
زينب يابو فاضل كود ناكتها
وماريد العقيله اطيح دمعتها
اريدك دوم يبني اكبال خيمتها
عزيزه اختك تره وماكو بمعزتها
والربتك والشالتك عندك يبني امانه
شيل العلم واحمي الخيم وانته بضهرك انه
اخوانك جمعتهم وللطف ودعتهم
**************
ناري بيه اتشب من يجي المغرب مكدر انساهم طال فركاهم سافرو وين
ضاع كل تعبي وجا وكف كلبي راحت العشره وبقت بس ذكره امن البعيدين
انه ام البنين وجرحي ماذيني
راحت روحي مني بروحت ابنيني
وره حسين الحنين اشكد بجت عيني
جان حسين روحي وشمعة اسنيني
راح الضوه ومات الهوه بريتي من جفاني
احلامي انتهت عيني بجت لمن فاركاني
ابنيني الضيعتهم للطف ودعتهم
****************
تمت
تحسين الخفاجي
حاجيتج ومالج صوت عكبج تمنيت الموت
يمه زهراء
===========================
شعجب يايمه اصرخ ما تسمعيني
هذا انه العزيز احسين حاجيني
معقولة البُعد خلاج تنسيني
و تباعد موتتج مابينج وبيني
ناديتج بدمع العين ردي علي انه احسين
==========================
ملفوفه بچفن جدامي يا لزهره
تحضنيني بحنانج روحي منتظره
بلكت ينفتح هذا الجفن مرة
ومن خدي يمينج تمسح العبره
فلي الجفن لولحضات من خدي مسحي الدمعات
===========================
كبرج لو يحفره حيدر ابدمعه
اكله بويه كبر الطاهره وسعه
اريد اعله الوديعه اكعد وانعه
والمفارك يحب النايحه طبعه
ابكبر امي يامحله النوح كلبي وكلبها مجروح
==============================
من كلتي كرب موتي وبده هجرج
صحت يمه من عمري على عمرج
سمعت صوتج تلوجين بألم كسرج
حنه ضهري الصواب ولاحنه ضهرج
ريت الالم بيه جان ولا جفنج يظل سهران
=============================
شعجب ما ينكسر كلبج على حالي
و لا همج ونيني و دمعي الهالي
تره افراكج ابد ما مر على بالي
وعكب ذاك الحنان النوح جتالي
من زغري وفراكج نار بغيرج تره وحشه الدار
=============================
دمع زينب كسر كلبي وشعل همي
تناشد خويه هم ترجع بعد امي
شافت من ضلوعج بس ضلع مدمي
ويوم الطف بلا راس وتون يمي
راسي برمح كله دموم كل صدري بالطف مهشوم
===============================
خادم أهل البيت (عليهم السلام)
حسن بشير السوداني