449
شاعر في خدمة اهل البيت عليهم السلام @HussamAl_essawei
ع النوك و حجيت وياك اعتذر من فوك ودعتك
ردت يا خويه اطيح اعليك عليلك كتله تعبتك
انته اول هلي يحسين جادر ما نصبت اعليك
صبرك خويه بس جم يوم بخرابه انصبها فاتحتك
خويه حسين خويه حسين
*****
لا ترفعلي ايدك نام الوداع يصير مو كامل
وداع اربع اصابع موت خويه ارجوك لتحاول
راح امشي و ال الله وياج لا تحجيها يبن امي
راسك باقي يمشي وياي كلبي بهايه هم قابل
خويه حسين خويه حسين
*****
الهضمني بهالوداع حسين ما لحكت اشبكنك
امنجيتك انه ذاك الليل خفت يا روحي اعورنك
مو مالت شبك جسمك مالت بس جمع و ادوار
تكول اخ اعله كيف وياي كلما ردت الزمنك
خويه حسين خويه حسين
*****
اعذرني بكلامي وياك لو تعبتك شويه
ردت اخر امر يحسين بيدي اسكيك الاميه
بس كدامي بدو بيه ما لحكت اجمعنه
و شكد حاولت وياك ما وصلتلك ارقيه
خويه حسين خويه حسين
*****
اجم شامت يتالي الشيب يم اذني اسمعت صوته
يضحك جيف اودع بيك يكول اتودع بموته
و جم حجايه من فركاك زادت خاطري المكسور
ساكت ما يرد اعليج شنهي الفادج اسكوته
خويه حسين خويه حسين
*****
ما يدرون انه وياك شكد انسولف بسكته
بس الشاهد الله حسين انه الميته مو انته
تكسر خاطري الجلمات هسه حسين شابع موت
لسبيج يله امشي ام عون من هذا الحجي ميته
خويه حسين خويه حسين
*****
حسام العيساوي
يا ليل تهضمني كلش هدوتك
و الحيل يتلاشه كله بضلمتك
كلما اشوفن جاي
واحد يلم ثيابه
تستوطن الكئابه
بكلبي و يحل عذابه
الحسره بدليلي تصير
كون انه هم مثلهم
اتحظر بسفرهم
و ما اكعد بدربهم
شنو يصير لو امشي بضعنهم
و لا ادير عيني شما اصدهم
و اگاود رقيه بمشيها
و لا اكون مكسوره و غريبه
و بالعيون تنشاف المصيبه
و تحل المواجع عليه
*****
بهداي يا ليلي وياك اختنك
بلا ماي بدموعي اطفه امن احترك
طفله و دليلي يفور
ليش انه من عداهن
بس التفت وراهن
الوالد شفت خذاهن
بس انه اصب دموع
و الحسره بيه تاكل
ما اركب المحامل
و ابقه بأمل رسايل
بأمل راح يخلص كل زماني
ع الصفاح ايدي و ابقه اتاني
و اكولن عسه ايرد ضعنهم
تمنيت لو علتي شفيه
و تعنيت لرض الغاضريه
و لا ضل رفيجة حزنهم
*****
ينشاف بعيوني والله كل وجع
انعاف كلبي فلا مره أقتنَع
ما حسبت يا ليل
انه الاضل اتاني
و افكد كهف اماني
و ابقه احسب الثواني
و ادري الرحل ميعود
بس ابقه بنتضاره
و اتكلب اعله ناره
و دمعي الحزن تجاره
بالامال ليليه اغفه و اصحه
اعله هالحال اذبل صفحه صفحه
و اجذب دليلي و ضنونه
المشه يعود لازم من سفرته
و بالوعود اني انطر رجعته
يجي و املي عيني بعيونه
*****
ما نام يا ليلي شلي براحتك
احلام تراودني كلها بجيتك
ماريد انام و بيك
احلم ابويه ضامي
و اتكتلو عمامي
شهالذه من منامي
احلم رقيه تطيح
و الطف سلب حلمها
و جاوي الجمر جدمها
و الرقه هو اسمها
بحبل ليش شدوهن اديها
و شفت جيش ما حنو عليها
و يضربون اذا خف مشيها
فلا اريد احلم عمتي زينب
حبل بيد و اعله الناگه تنحب
و ع الرماح تشاهد وليها
*****
حسام العيساوي
علي بهذا الجفه
على الدنيه العفه
*****
كبريتك شيبه شيبه
و اشبر بطولك و اناطر
و من كلت جلمه يبويه
كلبي من الفرحه طاير
و كبرت وياك امنياتي
يلي بين عيوني صاير
تعلمت كدامي تمشي
و اني من العثره احاذر
الكلب بيك اكتفه
على الدنيه العفه
*****
من اشبكك جرحي يشفه
و من اشوفك عمري يصغر
يا اعز من ضي عيوني
و اغله من شرياني الابهر
لو خدش بيك انه افرفح
يبني جا غير انته الاكبر
خل اربحك انته بويه
و تالي شخسر خلي اخسر
يدين العاطفه
على الدنيه العفه
*****
ما ردت بالدنيه كلشي
يلي بيك كليبي كاشخ
انته يا ملح المحاجي
يل بدونك كلشي ماصخ
دامك انته كبال عيني
وحك عينك بويه ماطخ
و لو شفت جرحك حبيبي
والله مثل الثكله اصارخ
لجروحي انته الشفه
على الدنيه العفه
*****
من اجه الطف و مصابه
و سير الموت اعله ولدي
كتلي خل اتقدم انه
و خلي حزنك بيه يبدي
و من نزلت كبالي اشوفك
مدري ابني مدري جدي
تحارب و ترجعلي ضامي
و انه بس دموعي عندي
و جروحك نازفه
على الدنيه العفه
*****
هايه اخر روحه يبني
و يا جرح منك اشده
بيدي اقدمك لليذبحك
والله هاي وليدي شده
و انه اشوفنك تحارب
و العطش جبدك يمرده
انوليت و ماكو واحد
ظهرك الخالي يسنده
جرح ما وصفه
على الدنيه العفه
*****
و من طحت بويه اسرعتلك
و من ظهر مهري طحتلك
و من شفت دمك يحيلي
تدري يبني ما عرفتك
و كمت انازع فوك منك
ماني كادر حته احملك
و كمت افزع بالهواشم
بالحصيره تلمه جسمك
عمر مابيه وفه
على الدنيه العفه
******
حسام العيساوي
غضبُ الله على الاعداءِ حلْ
انهُ العباسُ للحربِ نزلْ
شاهراً سيفين ام تلك يداه
أعليَين رؤا ماذا حصلْ
طبها و الجيش اعله كبره خايف ملاگاته
و الشمر اولها شارد من لمح ريشاته
ما يعارك زلمه زلمه جنه يحصد من يفوت
و ابو الاكبر من فرحته هوس بشيباته
يابو الفضل يا سيدي
*****
عندما غارَ و في الاوساطِ كرْ
لم يجد فيهِم رجالاً بل ذكرْ
و سؤالاً واحداً يعلو صداه
إنهُ العباسُ من اينَ المفرْ
حين بالميدان غاص و شردت الخياله
اتلاحك حسين اعله اخيه من نظر للحاله
صاح يحزامي و عضيدي الجيش خلص يبن ابوي
خلي لخوانك نصيب الجيش ضل وشاله
يابو الفضل يا سيدي
*****
ملكُ الموتِ و في كبد السماءْ
أجهنم قال أم ذي كربلاءْ
لستُ ادري أدنى يومُ الوعيدْ
أم على جيشِ العدا حلَ الفناء
هذا عباس الدخلها لو علي بفقاره
تعباني هواي يذبح غاره تتبع غاره
انه ما شايفلي زلمه جنه زيبگ من يصول
منين ما دورله يطلع ماله حل و جاره
يابو الفضل يا سيدي
*****
بطلٌ في كفهِ تلقى الممات
صاغراً قد جاءهُ نهرُ الفرات
جعلَ القادةَ من هولِ المصاب
من يمينِ الساقي قد فروا حفاة
الزلمه ما يلحك يسل السيف من گرابه
و كلها تركض ركضه وحده الجيش سوه ترابه
الحوك بيهم و اليواجه من يشوف الخزره ذيج
بلا شعور يكوم يرجف جنه يوم احسابه
يابو الفضل يا سيدي
*****
حسام العيساوي
جاي للكوفه الصبط خطارها
لجن ما قبلو يطب اديارها
*****
الكالو اقبل بالكتب رسلوله
انقلبو بثوب الحرب راحوله
بايع ايزيد و ترد كلوله
لو حرب و انته اعرف بأخبارها
*****
كالهم هاي الكتب شوفوها
اشهور و ايام انتم ترسلوها
ليش هسه كمتم تنكروها
مو حجيكم هذا يا اشرارها
*****
كلها سكتت و الخجل بعيونها
السالفه يعروفها و يحرفونها
وادم انترست حرام ابطونها
جلمة الحگ بسهوله انكارها
*****
اتجمعو كلهم على حرب الحنين
بكل صلافه نكرته الما عدها دين
منعو الماي و عطش جبد الحسين
و صارو لهاي الحرب تجارها
*****
تحاوطو كلهم عليه اهل الرجس
بدرهم و دنيار باعو حجي امس
كالو نخلي الحسين بهالشمس
و اله شكله يختلف من نارها
*****
وادم تهد ع المره ما بيها حر
و تضرب الاطفال ترجيه تجر
تحرك خيام و تجي تصلي العصر
و ع الرماح تخلي روس اخيارها
*****
حسام العيساوي
ماكو مثلي شافه شلعان الكلب
ماكو مثلي بداره بس عاش بغرب
و الدمع صار سوله العين
*****
أنه حيد الزلم و اليوم اجيت احجي هضم كلبي
الجنت من امشي طولي شراع هسه محدب بدربي
انه ابو الحيل المصفن الحومه
هسه اتوجه من انوي ع الكومه
حيلي ماكو من اهد لف الجفن
حيلي ماكو ادفنته ويه ام الحسن
الموت اخذ مو واحد اثنين
و الدمع صار سولة العين
*****
انه العايش غريب بدار بيها اهلها اليحبونه
بس الفاكد الزهراء بيش يقنع عيونه
انه المتعبه فاكد اُنس روحه
التعرف جروحه لو ما حجه جروحه
لنكساري هذا ما يرهم جبر
لنكساري وياها انامن بالكبر
بشتياقي لأم الحسين
الدمع صار سولة العين
*****
انطفت شمعة حياتي و صوت بين ضلوعي يتردد
بعد ماكو التحبها الروح و كلشي ابيض صبح اسود
اللون الابيض صفه بس شعر راسي
و لو تموت البشر كلها متواسي
ميته زهره ماكو من عدها بعد
ميته زهره الي مثلها منوجد
منجل الها صاير البين
و الدمع صار سولة العين
*****
الهضيمه و كسرة الخاطر زيارتها بضلام الليل
و بس زينب تضل بالدار انومها بوشال الحيل
للكبر اوصل و ام حسن ردت
حيدر الحك تره زينبك كعدت
و ارجعلها الكه تشتم بالهدم
و ارجعلها تكلي شفت امي بحلم
موقف ايهد مني حيلين
و الدمع صار سولة العين
*****
شنو ايسكن دمع زينب طفله الحسره تخنكها
اكلها امج تره بسفره لكن ما تصدكها
امج بسفره راحت اكللها
احجي و الدمعه من عيني اوشلها
تبجي زينب هذا منظر مو سهل
تبجي زينب شنهو الي يقنع الطفل
شرد اكلها راحت لوين
و الدمع صار سولة العين
*****
حسام العيساوي
حار بحار يزت للنار
السيف بجفه و لا يحتار
حيد زماط ولا ينحاط
طكته ولا يلحكها خياط
يجهب الروس الثجيله
و من علي الكرار حيله
عيونه ماشفو مثلهن
والله حك نصرخ دخيله
ابو فاضل دخيله عيونه ارماح
لهايه بمكابل اصلا ما ينلاح
كلها كدامه ترفع طارف عين
لان لو شاله راسه يحسب راح
ابو فاضل يا عباس
*****
زلمه و حيد جفوفه تصيد
الطير الطاير من بعيد
ما ينشاف يطب خطّاف
ومامش راس يضل بجتاف
اسمه خلاس الفوارس
الشافه ريجه يبلعه يابس
ما وراها طكته گومه
حگه منه اليبقه خانس
عله صوته الجيوش تخضر خوف
الشرده منه تصير بمد الشوف
منو مثله بضربته ايخسف الكاع
ركب القاده حنه و بيها يدوف
ابو فاضل يا عباس
*****
يطب و يدوس الطك مدروس
كباله اركاب و مامش روس
كباله الخيل تدور حيل
و من عباس تصيح الويل
صوته ما يتلاكه صوته
مثلو كدامه موته
حته بلكت ما يجيهم
ما درو يرهب سكوته
رجفته تفضحه كلمن يدنه اعليه
يحاول ايهدي رجله تفضحه ايديه
يقرر اخرها يشرد بس يا حيف
ع الركض ما تسعفه تضل رجليه
ابو فاضل يا عباس
*****
يكر و يغير الطف زغير
مغزل بيده يضل يدير
عيونه سيوف البيها يشوف
من النظره يذبحه الخوف
جفوفه مختزله القيامه
فعله اكثر من كلامه
يم عدوه تشوفه ضيغم
و يم اخيته جن حمامه
الحلو طكاته وحده و ماكو ثنين
تره من حكه يكشخ بيه حسين
يعني شيريد اذا عباس حزام
الخطر الي يريد ايجيله منين
ابو فاضل يا عباس
*****
حسام العيساوي
يمه زينب كعدي يمي
و خل اسولفلج مصايب
و من اسولف لا تعِدي
يتعب اليحسب نوايب
بأول مصاب من بعدي
بحيدر ابوج راح ابدي
بوكت الصلاة و صايم
دمه يرد متبدي
ايرد و الطبره براس الولي
و الدم صبغ شيب الورد
اول مره ايردلج علي
موش اعله طوله و يستند
عمامة راسه بدم تمتلي
هالمنظر كليبج يهد
يمه يمه زينب
*****
الاخو احزام لخواته
و بيه تشد كلمن ظهرها
و تستضل بفيه تبقه
بشوفته تكحل نظرها
بس الحسن يايمه
باجر طشت بيه دمه
و رغم الالم من جبده
يمج يضل كل همه
يلزم ايدج و ايصب دمع
و الحيره كلها لكربله
بصوته الكوه يضل ينسمع
يحجي اعله ضيم العايله
يسحن كلبه ضيم الضلع
و تهظمه نبلة حرمله
يمه يمه زينب
*****
و الاشد بهالمصايب
كربله و اليجري بيها
جثة حسينج ييمه
كلها تدافع عليها
امن ايضل وحيد و ضامي
بكلبه يكول اخيامي
شحال البنات و زينب
من تستمع لعضامي
زينب يمه شدي العزم
لمن تشوفين النزف
لمي اطفالج مامش زلم
بس العليل و منجتف
اعرف صعبه و ما تنفهم
حرمه بوجه سبعين الف
يمه يمه زينب
*****
كلشي بالطف يحني ظهرج
امصيبه محد يفتهمها
شهني حرمه و هم جبيره
بساعه تتذبح زلمها
لا يبقه اخو لا خيمه
بس الزغار و هيمه
و الطف جبير و منج
كلسا تضيع ايتيمه
كلشي البلطف معناه جرح
معناه ركض معناه بجي
بيه كل لوعه بطول الرمح
و بيه ينحجي الما ينحجي
و كلما يلفي بنوره الصبح
اعليج الفواطم تنتجي
يمه يمه زينب
*****
يمه زينب حضري روحج
للسبي و ذيج الهزايل
دنيه من باجر تعذبج
و كلشي بيها وياج مايل
بدرب السبي و عثراته
حسينج حمر شيباته
فوك الرمح و يعاين
و تصب جمر دمعاته
درب الهيمه كلش صعب
ما ينمشي بهاي الهزل
باجر ياخذ هذا الدرب
جم طفله يمه و جم طفل
و انتي ابولية وادم غرب
ضرب المره عدهم سهل
يمه يمه زينب
*****
حسام العيساوي
جيتك كوه اعثر و الطف ليل
و احجي بكلبي زينب شدي الحيل
وي كل خطوه تبيد اجدامي
اتهدم حيل اختك يالضامي
*****
بعد التعب بعد الركض بعد السحك و انته اعرف
الطف سكن صوته و كلت خل امشي للباكه الطف
ابهيده اطلعت اسحب جدم و الحيره ما تتوصف
كلت امشي الك يابو العشك كلبي اعله شوفك رفرف
أمنهد اصعدت ع التل و انه
و لا شفتك و طولي انحنه
بموتك كبرت شجم سنه
و كوه اوكف
جيت بتعبي و الطف بس دخان
هوه اليعشك يتعنه شما كان
ميته و امشي يابو احلامي
اتهدم حيل اختك يالضامي
*****
معروفه الام اعله الضنه يفرفح كلبها بلهفه
لو شافته صابه الخطر تتمنه ميته ابصفه
و انه اول ام ميتلها ابن و تعوفه من اتكشفه
اتكله اعتدز يمه لجن خالك اعز اتعرفه
عفت ابني لجلك و اكبلت
بس مالت الله اتمرمرت
وينك يبعد اختك كلت
والله كلفه
ماهمني ابني منه اغله انته هواي
يمته اليعطش يستغني اعله الماي
ماي انته و جيتك يحزامي
اتهدم حيل اختك يالضامي
******
الريجه يابس لو مشه شتضن تعينه جدامه
و فوك العطش ضلمه و جثث ما يعرف شكدامه
و انه التعب بيه مشه مشيت افطور الجامه
بنكلة جدم يوكع عمر بس كلبي شد حزامه
كلت اوصلك رغم الدرب
ع الزلمه لو ينطر صعب
لجن بعد حن الكلب
راد امامه
مثل السعفه لو مر بيها الريح
اختك زينب وي كل خطوه اتطيح
جيتك يا عامود اخيامي
اتهدم حيل اختك يالضامي
*****
اتلفت و جني طفل ايدور عله امه و ضايع
اتلمس بمماشي انه ايعثرني كلمن واكع
اتقربتلك و اوصلت بالشفته محد سامع
الزمت ايدك و احسب كمت لمن وصلت التاسع
اصبع نقص خويه طلع
ياهوه من جفك كطع
معقوله بالمحبس طُمع
حته كاطع
حيلي اتناثر من جستك بهداي
صدرك ماكو شيصبرني لهاي
معقوله حسيني الكدامي
اتهدم حيل اختك يالضامي
*****
كمت اجمع بجسمك و اون يل صدرك شكد دافي
بحضنك رقيه التغفه جا ليش الكه حافر غافي
اكعدلي يا بعد العمن من البواجي و كافي
طر الفجر هسه الشمر لينه بهزايل لافي
اكعدلي يبن امي الهزل
من تمشي تكزل مو عدل
هذا تعب فوك الحمل
صار اضافي
مودع بالله راح ارجع و الشام
ليه متاني و مدري لجيتي شضام
بيه تتفرهد كل ايامي
اتهدم حيل اختك يالضامي
*****
حسام العيساوي
اسولفلك سوالف تهدم الحيل
تعبت امن الركض يبن امي و الخيل
لا تعرف جبيره و عمري خمسين
خذتني امطارد لحدما جزه الليل
و النار بذيالي اطفيها و تشب
*
اشدن حيلي كوه و اسند الروح
و ارد اعثر و اشوف كبالي مطروح
ولد من ولدي لجن احجي وياه
اعز منك ييمه عندي مذبوح
و ايدي اعله خاصرتي اكلب بالجثث
*
اعله كيف امشي و اخافن مشيي مسموع
و نكعت انه اعله طولي بكثر الدموع
و يبعد اختك تره الخوفه الاشد هاي
خاف انكل جدم و اسحكلك ضلوع
ترس الطف صبح جسمك يالمسلب
*
امشي و جني امشي بهالدرب عام
يمته اوصلك و ترتاح الاجدام
و تاليها وصلتك ناذره اشباگ
بس وكفتلي عارض هاي الاسهام
و خاف اشلع سهم و ايلجمك ازياده
*
شفتك يابس و هذا الرمل جان
حار و انته نايم خويه عريان
و من نحرك سمعتك تهمس بصوت
تقربت و سمعت اتكلي عطشان
بجلمتك هايه الف موته متت
*
اتكطع كلبي خويه بجلمتك هاي
ما يلكه اليشربه الماله سگاي
مثلك ريجي يابس لسه يحسين
جابوه و جفيته كارهه الماي
و ما ابلل لساني يبو السان الخشب
*
حسام العيساوي
بزياره الناحيه انعاك
و دم ابجي اعله بلواك
من كل جانب اعداك
حاطوك و وحيد النوبه عطشان
فرقه بسهم الاكدار
و فرقه تكاطف حجار
و ثالث فرقه تندار
فوكك بالسيوف التلمع الوان
و انته لوحدك يل مالك امعين
حيره ترد منو و ربعك مطاعين
كثروك بجراح بأيد و بعين
و فوكاهه المثلث صوبك ااااخ
بنص كلبك يالحسين
من مهرك تتهاوه هضيمه
و تتعالى اصوات الجريمه
الكل تضحك تتشمت يجدي
و مخضبين الشيبه الكريمه
السلام عليك جد يا حسين
*****
طحت برض حوافر
و تعلوك البواتر
و انته بنصها حاير
جبينك قد رشح يا جدي للموت
تقبض تبسط بأيد
بطرفك تنضر تريد
لخيامك يل الوحيد
انشغلت بنفسك و ما عاد الك صوت
و اسرع مهرك الشارد للخيام
محمحم باكياً و بجسمه الاسهام
شافنه النسه مخزي و بله ايمام
سرجك فوكه ملوي احاا يمضلوم
و دمك تارس الهام
ياجدي شيحمل هالمصيبه
و عيالك بالهيمه و غريبه
شافنه و ما حملن مصابك
و كل كلب توجرلك لهيبه
السلام عليك جد يا حسين
*****
من رد مهرك يلوع
يبجي لكسر الضلوع
ضجت اهلك دموع
و الحال اعله فكدك شيبت روس
برزن من الخدور
نشرن ليك الشعور
يلطمن فوك الصدور
و انته اعله الترب يل شابع بدوس
فوكاهه الشمر متربع يريد
يكطع راسك محزم يل العميد
لازم شيبتك يا جدي بالايد
و بسيفه يحز براسك النوووب
بطبرك اكثر يزيد
اخرها من سكنت حواسك
و اعله القنا رفعوها راسك
و ضل دمك من شيبك يكطّر
و الهيمه باكت احله ناسك
السلام عليك جد ياحسين
*****
تالي اهلك سبي تروح
منظر ياخذ الروح
ضعنو كلهم جروح
جن مثل العبيد انكادو اغراب
ياكل بيهم الحَر
تعبو من مشي البر
و كلسا طفله تعثر
ساگوهم جتف ايد اويه الارگاب
طروهم صحاري و الرمل حار
و بكل سوگ طافو خدر الاخيار
و اطراف العبي محتركه بالنار
و التهضم يجدي اطفالك تشوف
منظر رمي الحجار
جتفوهن و التشكف بديها
و الوادم تتفرج عليها
خدر الله بنص سوگ الاجانب
و يا حيرة عماتي و بجيها
السلام عليك جد يا حسين
*****
ياجد عمتي بالسوگ
الها الوكفه متلوگ
كلما تعثر النوك
توكع ماكو اي اسم الله يم عون
يضحك سنها شمات
ينادوهن سبيات
عماتي اعله هزلات
كل وحده وجهه اندار الف لون
تالي للقصر ينكادن و هاي
جلمه هوايه تذبح والله بهداي
ينظرهن يزيد و يضحك هواي
و بعصاته يضرب شفتك حيل
اليبست ما روت ماي
و ام عون تباوعله يگلبه
خاب شباقي تكله و تضربه
صارن خشبه شفافه و لهاته
ما شافت ماي و هايه صعبه
السلام عليك جد يا حسين
*****
حسام العيساوي
كالولي طاح و جيتك اركاض
بس تيهت دربي بركضتي
ذاك المعسكر صاحت ام عون
جا حكي مو طايح كشختي
جيتك اركض و انه زلمه الشيب تارس راسي كله
و اسمع امن بعيد صاحو حسين يركض والله فشله
من وصلتك يا دلالي
بس اسم منك بقالي
ردت اكوم و باد حيلي
كمت احس مدري شجرالي
اوليدي راح اوليدي راح
*****
شلعان كلب احسينك تصير
هاي الجنت ما حاسبلها
غير الزلم من تكبر تريد
بزرتها تتكفل حملها
اسنين اكبّر و اني اكول الراحه باجر من نصيبي
عندي زلمه احزام ظهري وسفه منك صار شيبي
هذا ابوك و ضيم كلبه
اعليك تيه حته دربه
يشوف بزره كبال عينه
امفرهدينه ازلام غربه
اوليدي راح اوليدي راح
*****
شريان كلبي اتكطع اعليك
من كتلي بويه اميه رايد
خليتك اترد يابس الريج
و الجيش كله اكبال واحد
بيك وصلت بويه حته فرسك ايتيه طريجه
شنهو اتخيل بعدها كبالي اشاهدها النتيجه
اخضابي خله ايصير دمك
من بعدها عود ألمك
و هسه كلها هناك تنطر
و اشيصبر هسه امك
اوليدي راح اوليدي راح
*****
شافوني من ابعيد وياك
متمدد و طولك شبكته
كمت اهمس ابأذنك و احاجيك
احسينك بعد ماتت ضحكته
شنهو رايك بويه هسه نموت سكته و كلشي يخلص
تدري بعدك كل دقيقه حيل ابوك و عمره و ينقص
بعد ساعه كلشي هندس
بصدر ابوك الخيل ترفس
و من بعدها الشمر هذا
فوك صدري بسيف يجلس
اوليدي راح اوليدي راح
*****
ماريد منك كلشي بس كوم
خليها تشبع شوف عيني
انه الجنت بيك افرح هواي
من انته متبسم تجيني
هاي اول مره اندهك و انته ساكت ما تجاوب
عمري كله وياك احسّن شاب لكن هسه شايب
كوم و اتسند عليه
كوملي بداعت رقيه
حيلي خلّص فوك جسمك
كلشي احسّن مات بيه
اوليدي راح اوليدي راح
******
حسام العيساوي
يل ماشي مو مال فراگ
شيسوي كلبي امن اشتاگ
بالصفنه جم دوب انباگ
يا ساجن البال
*****
يمخلبص الهدوه بليل
و موشل الضل بالحيل
جم ذكره بالبال تعيل
و اتسبّل دموع
اطشر و ألتم و بيك
و اتلفت و ما لاكيك
حيل الجم من طاريك
و اتراجف ضلوع
شريان الابهر و النيط
كل ساعه الك روحي تشيط
كلبي انفتگ بس يا خيط
يرهمله مگطوع
گوه النفس ينشهگ من اذكر عيونك
لحظتها احس اختنگ يل غالي من دونك
و ابقه استلذ بنوحي
و بهيده تطلع روحي
هوه انته اغله جروحي
يل ظهري الك مال
*****
يل بسمك دموعي تعيش
يل الغالي اشريك ابيش
انهد حيلي من كثر الليش
و بجلمة الوين
طعم الفكد ما ينضاك
كلساعه الك انه اشتاك
بخلافك انفاسي فراك
يل باكك البين
جودرت نص روحي الاه
كبال اسمك اصرخ ويلاه
شمحله التحبه و تلكاه
كدامك العين
وين التفت صورتك تفزز شكو بروحي
و انشغ وجع و الهظم شيسوي بجروحي
و ابقه اصفج الراح براح
و جف يركض يكض لصفاح
يمته اليفارك يرتاح
و الفركه جتال
*****
مركدهه روحي بأهات
نص كلبي شيب نص مات
ذاك الوكت عده و فات
هسه انته بتراب
كل ثوب الك اشتم بيه
و بدمعة العين اسكيه
لو ما نكع ما اخليه
وي باقي الثياب
هسه الكلب بيش يهيد
و حته الدمع بيش يفيد
لو ماكو الك دكت ايد
اسمعها عالباب
انته الهوه و الضوه و الضحكه و الكشخه
هسه اصبحت جن ارض من الهجر صبخه
كون الوكت هم يندار
و كبالي اشوفك بالدار
مو كافي هلكد احتار
و انته ادره بالحال
*****
يسوالف الحب و الشوگ
يل ضحكتك ليه تلوگ
بعدك عشت بس مخنوك
و متيهه ممشاي
محودب عليك و محتام
وي كل نفس رجف عضام
يل كلبك انطاك تنام
و اني اذبل بهاي
رد حيلي الك حيل اعتاز
و انكط وجع حد الجاز
وي كل اسم مثلك فاز
و اشبحله عيناي
انشف صبر و ارتجف و ابقه احجي وي حالي
بسك بعد يا كلب ما يرجع الغالي
شجره اني و فراكك فاس
يكَطّعني كدام الناس
يل ما جنت ترضه انجاس
هسه الدمع سال
*****
وين التقي وياك بيوم
و احجيلك اعله المضموم
يمفرهد بعيني النوم
رد ارد احاجيك
هادل الجفن و ذبلان
شلك عرف بالتربان
امنيتي يجمعنه امجان
و بضيمي اراويك
كل خطوه يغزيني الشيب
و ادري الحزن مابيه عيب
ما عندي شك و لا ريب
ما يوم الاكيك
كلشي انتهى و ايست بانت تجاعيدي
جيل اكبرت و اليصد يخطي بمواليدي
موش انه ذاك البيه حيل
الما جنت اكولن يا ويل
هسه انهطر وكت الليل
بيه الوكت عال
*****
حسام العيساوي
صال غار حان بجفوفه القدر
موت صار بيد الساقي الكمر
طاب حيد كال اله اجفي النهر
كافل العلويه الما يهتز ابد
الغيره تطفح منه لو صاحت مدد
شبل ليث الغاب اليتسمه علي
المن يطب للحومه ميهمه اي عدد
كافل زينب ما يتلاكه السيف يهوس ياقمر
الجيش بكبره و من كد خوفه ايصيح ادخيلك يا قمر
قمر قمر يعباس
*****
وين جان صاح كل جيش الشمر
كون ضال بيش جا هسه نفر
دام سال سيف كل راس بكتر
الما يطخ الهامه الما يدناه خصم
طكته مو بالريش و توصل للعظم
سيفه بيده ملقن راهم ع الحرب
الشمر عن عينه ضل راسه يضم
الكاع تنومس عنه تكول دخيل ذراعك ياقمر
بس انته الحك و تستاهل زلمه نكلك يا قمر
قمر قمر يعباس
*****
زود بيه يفوت تحنيله الرگب
منين ما طب تشتم الغضب
جان لو صاح ما ينرد طلب
جفه يهوه الصعبه و ميحب السهل
ما يطك الشارد لا يولي اليذل
رابي بيد الجان اليعفي شما وله
و لو يكر ع الحومه يغزلها غزل
و هذا الكافل رابي اعله ايده الحومه تندبه بيا قمر
سباع الدنيه اتقبل جفه تكله مروتك يا قمر
قمر قمر يعباس
*****
شال جود راح ناوي اعله السگه
الجيش راد حيل خاطر يلحكه
غاص بيه و داس كل واحد لگه
اليمنه فوك اليسره يكلبها الكمر
الله بيه يتباهه لو طب ع النهر
كاشخ بريشاته و شايل جربته
الاربعة آلاف و لا الهم اثر
السيف امثلم حكي انطيته و تگوه ايصيح يا قمر
محد مثلك بيه اتباهه و يطلع صوتي يا قمر
قمر قمر يعباس
*****
حسام العيساوي
يا بعد اخيتك عوزك فياي
و محد مبلل شفتك ماي
من الظهر حد طارف الليل
الدوس ماخذ منك هواي
لكيتك وحدك بس جثتك اخلاف
كلها اعله الظهر نومتها صارت
بس انته الوحيد التختلف ليش
نومك ع الوجه و الدنيه دارت
اشلون اكلبك صابتني حيره
جسمك اموزع تارسله ديره
ساعدني خويه و خليني اشيلك
شيخ العشيره انسلبت عشيره
خويه حسين خويه حسين
*****
اكبالك كعدت و حايره شلون
بالنعمه ليش الكل يطشرون
ترضاها هاي احجيها و تنام
بلا عون ضلت اختك ام عون
وصلتك و الخريف اعله الورد غار
و الحضن الاحبه شو امفرهد
انته اول بشر جي غالي يحسين
ما خلو بجسمك للسلب حد
شو سلبوهن حته المحابس
و خيل التسحكك صارلها واهس
جي صدرك اترف من عنده ماكو
ياهيه اسرع صارت تنافس
خويه حسين خويه حسين
*****
مشتاگه جيتك تدري بالشوگ
بس ليك بعد العافيه ايلوگ
ساعات بس فاركتك الگيت
مبيوگ كلك خويه مبيوگ
من صدرك يخويه الكاع تنشاف
من الدوس منخل صار جسمك
هسه شلون بله الحگ الخيل
حته امن الحوافر خويه المك
اخ اليدفنك راح اشتلجمه
انهار كامل جسمك يلمه
بكل خطوه منك يلگه بقايه
خويه الحوافر ماعدها رحمه
خويه حسين خويه حسين
*****
فوك الرمال التجوي عريان
و اتلث ليالي خويه عطشان
ردت انه اجيب بجفي الك ماي
كلبك ابخه شلون ما جان
اعذرني العصر خلصته يحسين
اردن شارد و ينداس شارد
و هاي الهيمه خلصت خويه بركاض
من اهل الرحم ما شفنه واحد
خجلانه منك جي عطلوني
كلما اجيلك خويه امنعوني
و هسه انه جيتك تعبانه روحي
و كل خوفي من عدوانك يجوني
خويه حسين خويه حسين
*****
راح انه اعوفك خويه ترتاح
و انه ارد لكض الصفاح
خليني اردن لا يفزون
خاف الكه طفله لو طفل راح
لا تكعد رقيه تريدك تصيح
و محد غيري يكدر يشرحلها
كلمن يشرحلها تفضحه الدموع
حته اني ابجي بس ما ابينلها
من تبجي والله اتبجّي الكواسر
و لو تدري شنهو برجليها صاير
محروكه من جمرات المخيم
لرجليها محد يكدر يناضر
خويه حسين خويه حسين
*****
حسام العيساوي
اعله نار انه انتظر و جف الصبر
سالبني لذة نومي
بقرار من الابو ضاع الدفو
و ضل للمدامع يومي
النهار مابيه ضوه كلشي انطوه
بيه كمت اشوف نجومي
بخدودي ما جف الدمع
و يم كل اثر روح انشلع
و كل لحظه من تمر عَلي
من كلبي احس بَت ينكطع
عله فراك الابو مكدر لجف حنيته اشتاگ
وي كل طيف اشوفنه شويه شويه انباگ
اتحمل سبي و غربه و لا اعيش ويه الفراگ
حبيبي وا حسيناه
*****
وداع يكسر كلب و هذا الدرب
ياخذ بياض عيوني
ضياع ويه الحزن كلما اون
و اتذكر العافوني
صراع ويه الامل و ادري الاهل
بلا رجعه من تركوني
بس اصبر بجلمة عسه
يرجعلي ابن خير النسه
مو كال اوديلج علي
معقوله اليحبني نسه
ما معقوله و استبعد ينسه بنيته الحنين
مو عاداته يتركني عرضه ليمته و الوين
طفله و اقصى احلامي اغفه بحضن الحسين
حبيبي وا حسيناه
*****
سراب هذا الحجي و بس البجي
صار الحقيقه كبالي
عتاب بس بعشك بيه اختنك
و بدمعي أشرب اخيالي
كتاب ابعث اله لحد كربله
و بلكت يصل مرسالي
بس خايفه و كلبي جمر
يوصل اله بذاك الظهر
لمن يودع العايله
و لموته يصعد ع المهر
راح اكتبله مو كتلي صبري اعليه ايام
اوديلج علي الاكبر لو كفال الخيام
بس لا يقره مرسالي و عمي شابع سهام
حبيبي وا حسيناه
*****
اشتياق ما ينوصف بجم حرف
اكتبهن بدمعاتي
الفراق رايد حضن و غمضة جفن
يم والدي و عماتي
و عناق ويه الكمر و هاي الصور
هيه التزيد آهاتي
اتخيل و مامش نفع
لوَناتي محد يستمع
و بخدودي من عكب الابو
ينهش بقه جف الدمع
كلساع اني اتخيل خيل و ركضة ام عون
و خيمه النار اجت ليها و اطفال اليركضون
و من دخان المخيم عميه هواي العيون
حبيبي وا حسيناه
******
حسام العيساوي
دخيل الله طبها كافل زينب
****
حل وكت الغضب و كل لون انگلب
طب حيد الزلم يحصد بالرگب
ما بيهم زلم ما بيهم شهم
بسيفه ابن الفحل طشرها و يلم
وياهم يتلاگه و من وين المفر
ميضل راسه الگابل جفين الگمر
الزلم كلها شارده و تتقرب
دخيل الله طبها كافل زينب
*****
بركان و دخل بعيونه الزعل
حالف كربله يمحيها الفحل
فدوه لريشته كشخه بوكفته
و من يم الخيم زينب حيته
طب ليهم و عيونه تتجادح غضب
هو النار و صارو بجفوفه الحطب
دخيل اسمه يتَّعب و ما يتعب
دخيل الله طبها كافل زينب
*****
لاح بصارمه صارت ملحمه
شل حيل العدو فرّح فاطمه
عباس الكلف حيله بحيل الف
مسيطر بالحرب و الرايه ترف
يا هنياله الشارد من جف الرعب
من خزرات عيونه يجفل كل گلب
شبل حيدر جفه نار و تلهب
دخيل الله طبها كافل زينب
*****
خيال و كفو مثله وين اكو
گبال امذهبه ما يثبت عدو
يطب مثل الهوه و ايرف باللوه
الجيش اكبر مرض و بس سيفه الدوه
شما كثرو گدامه و زادو بالعدد
هو اكثر يترهه و يتسيد بعد
ثگل سيفه هوايه صار مجرب
دخيل الله طبها كافل زينب
*****
طب جنه الضحه و يطحن چـ الرحه
الما واضح گبل سيفه يوضحه
داخل عاصفه ياهو يوصفه
لو گالو منو عباس و كفه
شاهين و ع الصيده اعليهم من يحط
يتخير قادتهم يلگطهم لگط
اذا يدخل ألحذر يتوجب
دخيل الله طبها كافل زينب
*****
سيفه و لا شبع اگباله الكل ركع
الگالو هذا اسد طگ ضرسه انسمع
فذ ما ينگحم ع الطگ منفطم
مو بالريش ابد طگته بالعظم
أليشرد من سيفه محقق معجزه
و الما رايد روحه يدنه يبارزه
الشرد منه هذا حقق مكسب
دخيل الله طبها كافل زينب
******
حسام العيساوي
الفرگه يا بويه تره شربت ملامح شكلي
أملني حته لو جذب يبنيتي راجع گلي
احجيها كلمه و خالف
وهّس دليلي الخايف
يبنيتي راجع گلي
*****
مرت ليالي اعله السفر بس انتظارك باقي
و تدري بخريف مناطرك يحصد بده بأوراقي
تدريني طفله و گلبي خواف
و المثلي صعبه لوحده ينعاف
كل ليله اگولن باجر تعود
و امن الاگولن تعبت شفاف
اغفه و يفززني حلم مرعوبه انشف دموعي
بيه انته واگف ما ترد بس ليش اكض ضلوعي
تفسيره شنهو الواگف
وهّس دليلي الخايف
يبنيتي راجع گلي
*****
مرات اجي اعله ام الگمر بس اهضم بمگعادي
اسألها ليش تأخرت و تگلي كلش عادي
تلاطفني و تحاجيني بهداي
و تگلي باجر والدج جاي
اني ادري هاي الكلمه تصبير
و مجبوره اصدگ ماكو اي راي
من يجبل الليل ابدي احس يجري الحزن بعروگي
و انزف صور لا مو دمه يا بويه من گد شوگي
داويلي گلبي النازف
وهّس دليلي الخايف
يبنيتي راجع گلي
*****
يا بويه مشتاگه و علي عبدالله شنو اخباره
بشكله شنو هسه اختلف الما عفته من اصياره
الجنت اشبر آنه بطوله كل يوم
هم گصرت اعليه هسه الهدوم
مشتاگه والله الزمهن ايديه
لحد ما اضحكه منه ماگوم
اتمنه وياكم أنه خاطر ألف گماطه
و لا هايه ضلتي لوحدي گلبي گطعتو نياطه
و دمعي الابد ما ناشف
وهّس دليلي الخايف
يبنيتي راجع گلي
*****
بفكاري يتراود حلم يمك لوَن موجوده
مصلايتك گبل الصلاه تلگاها الك ممدوده
شمحلاها لو تندهلي كلساع
و تلگاني يمك واصله بساع
و لو ردت تگعد يم الخيام
گدامك اركض افرش الگاع
لهاي التفاصيل و علي مشتاگه آنه هوايه
يم حجرتك وكت الصلاه اركض ع المصلايه
و اتخيلك ميخالف
وهّس دليلي الخايف
يبنيتي راجع گلي
*****
أبالي سؤال اتذكرت القاسم شضل لعرسه
أتمنه يم رمله اجي لمن ثيابه تلبسه
و آنه و رقيه انحضر ايام
ليلة فرح ما بينه الينام
و يم سكنه اعدل ثوب الافراح
و تزفها بيدك من الخيام
و عمي الگمر ويه علي مبارز فرح سووله
و جون و حبيب و عوسجه يم خيمته يهوسوله
يا بويه گلي اشايف
وهّس دليلي الخايف
يبنيتي راجع گلي
******
حسام العيساوي
يا مولاي خدمتك نوماسي
بس اسمك هوه رافع راسي
يبو الاكبر يبو الاكبر
*****
يا عشك يسري بعروگي
بخير اذا دام انته فوگي
بس الك خليته شوگي
يا عشك من الزغر
وين احصل مثلك انه
يا بشر هاكد حنانه
كلبي بس وياك امانه
و مستعز بيك شكثر
انته بس انته الهويته
و لايگ مفصل لكيته
حبك بروحي شريته
و دافع سنين العمر
مثلك وين الكه رافع صيتي
و بس وياك تكتمل شخصيتي
يبو الاكبر يبو الاكبر
*****
خادم و ليك انتمائي
و استعز بس بعزائي
بس يضل يمك رجائي
نظره من عينك الي
طلكت كلشي و اجيتك
و اوفى من اهلي لكيتك
والله محظوظ و هويتك
يا بعد ناسي و هلي
عمري بس وياك اريده
و هايه امنيتي الوحيده
اندفن ويه القصيده
التبجي الك يابو علي
يل حبك يسري وي شرياني
و لا غيرك يستحق وجداني
يبو الاكبر يبو الاكبر
*****
ضلمه هاي الدنيه ضلمه
و الضوه الي بيها خدمه
ما يعرف لساني كلمه
بس احبنك حسين
اني البكلبي لكيتك
و بعقل واعي هويتك
جندي خليني لقضيتك
جندي و سلاحي الونين
من نعومة ضفري عاشگ
خيرك مخليني غارگ
اعليه فضلك دومه سابگ
يا عشك كل السنين
ما جافي و ابقه طوع ايمينك
و ابقه اطمح كون اسد من دينك
يبو الاكبر يبو الاكبر
*****
انه انساك استحاله
كلبي بس انته الحلاله
ما احط واحد بداله
اسمك بنص الكلب
غيرك شمنطيني هوه
ليك اروحن اني فدوه
انته يل صايرلي تجوه
ونستي ابين الغرب
علمتني الحب هويه
و ما اساوم ع القضيه
اي وحك ضلع الزجيه
ادخل بحبك حرب
وين الكه من حنان عيونك
و ادعي الله ما اخيب ضنونك
يبو الاكبر يبو الاكبر
*****
قدمت كلشي اعلمودي
بدمك اتعمق وجودي
و انه اقدملك عهودي
ما اعوفنك وعد
ابقه خادم و ابقه انعه
و تبقه تجري عيوني دمعه
اي وحك السوه سبعه
و الرفعها بلا عمد
شما عمر عندي ابقه امشي
و لو يشيب حته رمشي
ليك اريدن انطي كلشي
و ما اوفيلك ابد
شرد انطي و انته منطي خيامك
و الاجلي سلبوها ايتامك
يبو الاكبر يبو الاكبر
*****
حسام العيساوي
يا غارس الحب بدليلي الآثم
يمبجي عيني لغربة بنياتك
خليني ويه جروحك اصدق نيتي
و لا اصيرن امن الكثرو طعناتك
ماريد اصير امن اليجرحك
بعيونه يبجي و كلبه يضحك
يل عايش انه بجال رمحك
خليني احبك
انه العشت كل عمري ضايع
و لماني جرحك و المواجع
ماريد اضل كلساعه واكع
و اجفي وي دربك
يل ساتر اعليه اشكثر ما ينعبر
فضلك ولا يتناسه ابد
اسكيني مولاي بدمع ما ينكطع
و ابجي اعله كاروك الولد
مولاي مولاي يا ابا عبدالله
*****
اشكد لبست و افرح بهندامي
كاشخ اكول و لا حسبت احسابي
بس ادركت من تالي و اشكر لطفك
ثوبي الاطينه هوه احله اثيابي
من كلبي رايد كون احبك
ماريد اصير امن اليتعبك
شعر و مشاعر كون اكتبك
و اخلصها نيتي
ابعدني عن كلشي تبغضه
و بس رمحك بعيني اعرضه
عمري المضه خليني اعوضه
و اخدم قضيتي
يا رحمة الله الواسعه لتضيعه
عبدك سلك كل الطرق
و اليمشي وي غيرك هلك رايد الك
موضع قدم اثبت صدق
مولاي مولاي يا ابا عبد الله
*****
متمسك بحبل الخيام و رايد
مافلها ايدي و ابقه ويه ضعونك
يكلولي شمحصل شنو غاياتك
ما عندي غايه الغايه بس عيونك
ما اريد اخلصها بسوالف
و يبين الحب بالمواقف
بكلب اليحبك انته عارف
انطيه نقاوه
خليني بس بذكرك ابجي
و بس الخدامه بيها احجي
و ما دور اني لغيرك اشجي
هاي القساوه
لغيرك اذا يشجي الكلب معناها حب
غيرك دخل يا للاسف
ع الحلوه و المره ردت ما التفت
بس ليك اضل بهالكنف
مولاي مولاي يا ابا عبد الله
*****
يا سيد اليقبله خادم مثلي
زلاته كثر و يعتذر و يعاود
لو غيرك اخدم من كبل طاردني
ما الكه مثلك انته بس هالواحد
رغم شكثر وياك اقصر
كل مره اجيك و ليه تعذر
غير استحي و ما اعود اكرر
كل اليجرحك
غير اليحب للحبه طايع
جا يمته اطيعك و ابقه تابع
ما حاجه اجرحك انته شابع
و كبالي رمحك
حبك اذا طاعه افتقر ضاع الاثر
المعنى افقد احساس الجرح
لابد عله الحب يتصل ويه الفعل
حته الاثر ما ينمسح
مولاي مولاي يا ابا عبد الله
******
حسام العيساوي
گوم ع الجنه اشعلت نيرانها
و الجمع بيده الحطب شيطانها
*****
عله الجنه النار هدت ناقمه
و الثلثميه اجت متحزمه
ويه شيطان الانس ضد فاطمه
و هالحرب بيها انكشف عنوانها
*****
جان عنوان الحرب لا للنبي
و بعد ما يحكمنه واحد طالبي
و بيها اول خطوه عدّو للسبي
و منها هالنار انعرف نيشانها
*****
جان هذا البيت هو المفترق
دين او لا دين منه المنطلق
و بالازاله امن الاصل حكم انطلق
و للديانه خلخلو اركانها
*****
ناس تعرف بالحجي و اتبدله
ويه هذا البيت عدهم مشكله
جفة الميزان جانت مايله
للرساله و احركو ميزانها
*****
حرب بين اللاء جانت و النعم
و بين ذاك الفاس ردت و الصنم
ما يضل دين النذل قاسم قسم
و منها هالامه ابتدت احزانها
*****
هوه هذا الباب اصل كل الحزن
السطره باجر سوط ترجع ع المتن
و الشمر نفسه تره جلمة و إن
و الباب يوصل للخيم دخانها
*****
حسام العيساوي
درب لا بيه رحم لا بيه حنيه
درب هضمه و علي تمشيه العلويه
النياگ الهزله حنت و العدو و لاحن
يضحك من يشوف دموع مسبيه
الشافو دمعها يكوم يوليها السوط
*****
اطفال و حرم بحبال مجتوفه
و النوك الخذتهم نوك مكشوفه
و جم طفله التعب هدها و خذاها الموت
و اخ امن اليشوفن طبت الكوفه
و قصر الاماره راح يخذ جم روح
*****
يمشن بالدروب الموش مسحوكه
حفاي و عدوهن يسرع بنوكه
عطشانات يمشن و الحداهن كام
كبال عيونهم و يبلل عروكه
و يرشه مايه كبال كلمن عطشان
*****
بصحره اوادي يمشن حته فوك جبال
لذلك لسه الهن تلكه ميته اطفال
تعبت زينب بكد ما تزت اعزاز
و السجاد متنه انهدل كدما شال
كل خطوه زينب كاعده و تدفن مِيِت
*****
ياخذهن دربهن يدرن الهن ضام
اخ و اخ تهظم طروتك يا شام
ايدخلن سوك ما بيه لا حيه و لادين
يضحك من يشاهد عثرة الايتام
يمطر عليهن شامهم بس حجار
*****
المحد شاف ضلهن تالي نص ديوان
و فشله ابين وادم توكف النسوان
هذا اليضحك و ذاك اليعلي الصوت
و يزيد كبالهن بالراس يضرب جان
الحك يحيدر كوم و اجفيه الكون
*****
حسام العيساوي
يا نهر مايه يصعب منه اشرب و ارتوي
يا نهر اجفي مايه بجفي هايه ينجوي
اذا بعيوني اخزره
اعله كبر الكاع اطشره
*****
صح كلبي امن الحر يتلضه بس و ريجي اليابس
لا ماي اليصعب لو رايد و شنهو يمنعه الحارس
انه الجفي يرهب و لا صح نضيره
اذ الشط اريده بجربتي اديره
انه الي بركبتي سقاية عشيره
بقبضتي الشط اعصره والله ابخره للسمه
بقبضتي احلف الشط بجودي ينحط و الضمه
اسوي اجروفه حمره
اعله كبر الكاع اطشره
*****
آنه المحد بيه مفكر ايحط راسه براسي
و يا شط هذا العود اباله بمايه ايضيك انفاسي
اشفگر حظه والله لمن شحه مايه
انمنع و بقراره فلا جاسه رايه
صبح هوه ضامي اليضنه ضمايه
ما دره انه اكدر بجفي ينجر للخيم
ما دره اعليه لو شح مايه يصبح بس وهم
اذله و ما اقدره
اعله كبر الكاع اطشره
*****
آنه المن اصباي امعَلم ما دنكلي لواحد
بس لله و ساداتي و امي يا شط اركع رايد
اشيضن بله هوه اهاب الحراسه
انه بجدمي كادر ادوس اعله راسه
و علي كبره هذا ابدل مقاسه
ينحني كبالي والله بكيفي افصله العلكمي
ينحني يبوسه جفي حته يعفي الهاشمي
و لحد اخيامي اجره
اعله كبر الكاع اطشره
*****
ما جايبته امه الي امفكر عن جفي ايعز روحه
وداعت عصابة راس اختي اترس مايه ملوحه
اليعز روحه عني بغروري اذله
اخليه ايتوسل اعله ريجي اقبله
و لا منه اشرب اربيله عله
ما اطخ منه اشرب والله لوصب من عسل
ما اطخ و اروي جبدي و انه عندي هالزعل
حلم اشربله كطره
اعله كبر الكاع اطشره
*****
موش انه اليعصي اعله جفوفي ماي و ما اكدرله
و الله اكدر اشلع جرفينه و خل واحد يندله
وعلي الدنيه كلها انشفها بيدي
اذا مني يطلب اخوي و عضيدي
انه الاسمي ساقي السقايه بوريدي
بكربله رايي املي و ماكو مثلي بالغضب
بكربله راح اخلي الدم يصلي اعله الركب
و اذا هالماي اسطره
اعله كبر الكاع اطشره
******
حسام العيساوي
شو غافي بعد عيوني عيونك
كوم اكعد شنهي العيشه بدونك
ليش الماي هيج ميبسها شفاك
فدوه انهض يل متغير لونك
يابو المحنه دردلي جواب
من فدوه لسمك يعشك الرباب
ليش التجافي يرب الحنان
بس انده اسمي و احسبه ثواب
يابو عبدالله يمالك شوكي
يالجنت خيمه و فيايك فوكي
شبيهه هاي الناس حرمتني ضواك
و فرهدت كلشي حلو بمعشوكي
يا عشك الرباب يا عشك الرباب
******
مشتاكه و المشتاك شحاله
وناتك زادت جرحي جماله
كلي اي شي يا سلطاني المذبوح
شو صاير معبر للخياله
صدرك سنابك تحضنه حرام
الجان بحنانه رضيعي ينام
للحب يريدك الهي تصير
موش لسحكهم يملح الكلام
الله يرضاهه يدوسك حافر
و انته البكلبي مجانك صاير
انه لو وياك لو ماريد اعيش
حته لو مذبوح بس لتسافر
يا عشك الرباب يا عشك الرباب
******
يا روحي يل مخلوط بدمي
شتنفس لوما اشوفك يمي
ماريده الماي الماضكته وياك
غير انته خيمة ستري و حلمي
كلشي تعوفه يصيبه ضياع
و لكلشي حبك اشوفه متاع
خنكه و اشوفن كلشي سراب
للملكه انته فلا للوادع
كوم دكات الكلب مبحوحه
عاشكه اني و بالعشك مذبوحه
من طحت يالزين يا روح الرباب
هزني دهرني هزة المرجوحه
يا عشك الرباب يا عشك الرباب
******
و تاليها جنك ما تسمعني
ليهسه صوتك يصدح بذني
معقوله اني التعشك طرواي
من انده نايم متجاوبني
السالب كياني وسافه سليب
و صرنه غريبه تحاجي غريب
عشرتنه خلصت اميري حسين
و هسه الحبيبه هجرهه حبيب
راح اضل بعدك يكلبي و ضيمه
ما يغطيني سكف اي خيمه
ابقه بالغربه لان انته غريب
و راح ارافكها يروحي الهيمه
يا عشك الرباب يا عشك الرباب
******
كل ذاتي مفني حسين بذاتك
و جروحي تبرد بحجاياتك
يا حيره محرومه تضل الروح
و دم نحرك شو خضب شيباتك
هيج النهايه ختمها ونين
خلصت عشرتي يحلم السنين
راحت ضحكتي بقتلي دموع
شله بحياته اليتركه حسين
راح اضل بدمعتي الهماله
و التعوفه انته شنو اليبقاله
من ادك صدري يفز بكلبي صوت
و اصرخ الله يلعن الخياله
يا عشك الرباب يا عشك الرباب
******
حسام العيساوي
قيامة الموت
عليهم يفوت
يشرّد الخيل
اذا دوه بصوت
اشعضم اسمه اشثكل ايده علي الاكبر
يجي روجه عله صيده علي الاكبر
النجه منه لگه عيده علي الاكبر
منو كده الوغى عنده
ونسه حلوه و بيها طالع عله جده
اذا زمجر منو يكدر
ايميزه حيدر هذا طب لو علي الاكبر
علي الاكبر علي الاكبر
*****
يخوّف الخوف
يشك الصفوف
اليخزره لونه
تشوفه مخطوف
ضوه فازع عله ضلمه علي الاكبر
منو جده منو عمه علي الاكبر
تره يكفي علي اسمه علي الاكبر
رجف الجيش حِلَم ايعيش
طكته تجزي العظم اصلا ماكو بالريش
ابن حيود هجم بزود
ماكو مثله و منو مثله علي صايود
علي الاكبر علي الاكبر
*****
اليكابله يحير
و يتاني شيصير
يتمنه جنحان
لو عنده و يطير
يبقه يابس جي امامه علي الاكبر
الله يستر شد لثامه علي الاكبر
منه كلمن بيه علامه علي الاكبر
الزلم اتطيح رعب اتصيح
ما نشوفه بكل مكان و يشبه الريح
سيفه زلزال ايطر الجبال
يعكد لسان اليجهبه ايشله بالحال
علي الاكبر علي الاكبر
*****
حصاد الارواح
جفوفه مرواح
يطشهن الروس
صعوبه ينلاح
غضب ايطب جثث ايطش علي الاكبر
سيفه منجل ركب ايحش علي الاكبر
اللمح ايده غده يرعش علي الاكبر
علي يرعد علي يحصد
علي جفه الارض اتهز علي يمرد
غضب ايهب جمر ايشب
ابكلب الي لمح ايده علي يرعب
علي الاكبر علي الاكبر
*****
فريد الاوصاف
شمرته سيّاف
بضربته يا روس
تضل عله اجتاف
خطف ايطب عله غفله علي الاكبر
عله سيفه الضوه صله علي الاكبر
شنو اصله و شنو فصله علي الاكبر
علي غربيل زلم ايشيل
كلها توكع منه ماكو واحد اثكيل
علي حيّاه كفو يمناه
منو يحمل علي طكته تشل اعداه
علي الاكبر علي الاكبر
*****
حسام العيساوي
نزل حيد الزلم مغضب شرار تطاير عيونه
علي الاكبر دخيل الله ركد حيل اليلاكونه
نشمي و من ظهر نشمي علي حيدر يسمونه
طلع و شمحله طوله و كشخته و حيله
وكف بالحومه جنه المرتضى ادخيله
خزرهم و الرعب صوفر وجوه الكوم
دعو كون اعله خير تعدي هالليله
طفح غيضه و لكد مهره
شحلات عمامته الخضره
رجف كلشي اعله ذيج الكاع
جفاهه اليمنه ع اليسره
علي علي علي الاكبر علي
******
دخل للمعركه و حيله فلا بين عطش جبده
يكص بيها الركب و يطش يفنه اليوصل لحده
يقابل كل جيوش الكون اذا ينزل علي لوحده
منو اليتجره منهم يوكف اعداله
ابن شيخ العرب و الحومه تفصاله
جماله جن محمد يرهب اللاكاه
الشرد من سيفه هذا والله هنياله
دخيل جفوفه و زماطه
لعبته سيوف بكماطه
طشّر كل جنود البيه
جيش بكربله الحاطه
علي علي علي الاكبر علي
******
خَطف بيهم يمر كلساع محد يلحك يشوفه
رگبهم من كثر ما كص اضنها وصلت الكوفه
يرد للخيمه يتلكاه ابوه يقبل جفوفه
اليصد بعينه يوكع سيفه من ايده
اليكابل جفه ورطه و محد يفيده
غضب نازل عليهم ولد المفرعات
اليحطله جناح همه بالسمه يصيده
اليطير بصارمه يجيسه
التعب ماكو بقواميسه
سليل الما فحط جدمه
بعد بيمن اذا اقيسه
علي علي علي الاكبر علي
******
علي الما توكف كباله ازلام و تكرب لصوبه
اليلاكيه يشرد بحاله ينزع بالحرب ثوبه
و يكله مروتك ارحمني بس هالمره و التوبه
اليكرب صوبه لازم ينخطف لونه
ابو الطك الثجيل الترهب عيونه
اليكابل جفه تسمع من بعيد تكوم
خطيه امن الرجيف تطكطك سنونه
تكهرب خزرته و طكته
و يضل يمتمت بشفته
اليجهبه يبريد جدامه
و تضل بالكوه شايلته
علي علي علي الاكبر علي
******
علي المتعلم اعله الطك ما جل و تعب جفه
ابن سبع الزلم لو طب تصيب الكابله رجفه
شجاع و لو برز ضيغم عنده للحرب لهفه
يجوجي اعله الركب ما يلحك الشارد
يعدهم بالمعاره كل الف واحد
اليروح شمال من شماله هم يلفيه
اليروح ايمين كعده هم اله كاعد
يطك و توجع ذراعه
اله بكلهم ربع ساعه
الشرد و الما شرد لاحه
الصليل تحبه اسماعه
علي علي علي الاكبر علي
******
حسام العيساوي
عيّت الحومه و دبجها بساگه
كفها و وياهم تلاگه ملاگه
*****
كفها و النشّاد تيه بالنِشد
و الكباله تراجف و مامش برد
منجل ايده و همه سنبل و ايحصد
و النظر عينه ايبلع برياگه
*****
هزبر و جدامه ما تثبت جدِم
و السباع تهابه و تلاگيه هدم
الشط نشف مايه و صفه بس الرسم
من كثر ما جدمه غاص براگه
*****
اليجهب ذراعه ايتخردل و ايعثَر
و يصفه بس خياله لو خزره انخزر
الجيش كله يصيح من اين المفر
عله جف عباس مامش طاگه
*****
جالطريده كباله و جفوفه التصيد
صيف جانت لجن السمعوه رعيد
عله حمل السيف ما ضن تگوه ايد
رجفه صارت بيهم بمشراگه
*****
كام بيهم جنه بالماي و يفوي
و صار كل الجيش جالنار و يلوي
و من بعيد حسين صيّح يبن ابوي
حيهم و بن سعد حنضل ضاگه
*****
شمّر بذرعانه و النسمه تشح
و اليفر جدامه هذا اكبر ربح
ابن زلم حيود بالطك ما يلح
هيه ضربه و ما تصح لَحّاگه
*****
حسام العيساوي
مثل الهوه طب و دوه غيضه
رايه اتضح طك و طفح غيضه
طب مدرع السكاي
حالف يذل الماي
غيضه غيضه
*****
كاللهم هواي إنتظَر سيفي و يداعي بحگه
مثل الهوه من كل كتر طب و حميته تسبگه
نار بحطب يابس دخل ياهو اليجهبه ايحرگه
حجيي الصلح حجيي النصح من هسه راح ايطرگه
سيل و هجم هد و ردم زوده
زلمه و كلف بيه ينحلف زوده
من عنده تسمع هاي
حالف يذل الماي
غيضه غيضه
*****
كسر بجمع محد كدر وي جفه ابد يتلاه
مثل الضوه بهندس دخل ع الشرده صار اجداوه
جيش الشمر حالف عليه ويه الارض يتساوه
زلمة حرب لمن يطب ياخذ عليهم خاوه
براگ النهر داس و عبر مايه
بيهم عبس روس انترس مايه
وي سيفه مالك راي
حالف يذل الماي
غيضه غيضه
*****
من الخيم زينب تصد و اتنادي يا خَيّ تگوه
راوي الزلم شنهو الزلم معناها لمن تسوه
جفك سقر ما ينجهب كلمن تدنه اتجوه
بيدك شكو جيوش و زلم لمن تطب تطوه
شايل زعل خير العمل سيفه
زينب تصد يمرد مرد سيفه
ما كابلاه رماي
حالف يذل الماي
غيضه غيضه
*****
عرج الغضب بيه من برز طك و شرار عيونه
الزلمه و كبل لا يوصله ميت تره ايحسبونه
اتطش الركب من دايره لمن يدير امتونه
اليوصل لعد سيفه تضل تسمع صريج اسنونه
ايسلطن لمن سيفه يرن بيهم
سيفه يحش روس و يطش بيهم
ابطف كربله الرواي
حالف يذل الماي
غيضه غيضه
*****
شمحلاته لمن بالحرب يلبسها لامة حربه
و الفارس الشافه جمد بمجانه اصبح خشبه
الحومه بيده من يطب يكلبها طره و كتبه
بس هوه فارس بالحرب و يسوي كلشي ايعجبه
يفرض فرض طول بعرض رايه
بكيفه اشيحب بيه ينكتب رايه
هوه الدوه و الداي
حالف يذل الماي
غيضه غيضه
*****
حسام العيساوي