2381
{لو لا أنــــ❤️ـتَ ما خُلـِقنـا يـاحُسَــ❤️ــيّنْ}
أبوذية لحبيب الروح ابا عبد الله الحسين ع
أجـازيـك ابشــنـو يالعلي ضليت
بنعمتك صـرت الهـج دوم ضليت
يـبــو اليمـه لون مو أنتَ ضليت
وحرمت النعمة والرحمة سوية
#أم_علي_الشمري
سنه جديده في خدمة الحسين ع يارب
أتمنى روحي أطير كون المسيه
وتتعنه للمحبوب إبن الزچيه
****
روحي أشتهت ملگاه وأشتاقت العين
وگلبي يدگ يا ناس ويريد الحسين
سحرك يموسى وين ينطيني جنحين
بيهن اروح الساع للغاضريه
****
يم الحبيب اهناك تاخذني الشواگ
وحچيله حيل أشتاگ كلبي وعليه طاگ
لا تختبرني اهواي يوجعني الفراگ
ما أحتمل مولاي بعدك عليه
****
أنت التحبه الروح وأنت سكنها
ما تهوه غيرك دوم لأنك وطنها
يمك بمـان اتعيش تنسه حزنها
لو ساعة يمك خير من الله ليه
****
ما عندي جاه اوصيت صيتي خدمتك
يالعيشتني إنسان ثاني بنعمتك
لا تحرم الدلال يقصد حضرتك
اقسم عليك ابراس حامي الحمية
****
امنيتي بيتي أهناك يمك يمحبوب
مو ساكن انه ابعيد وأميال الدروب
اشما حن إلك واشتاگ اتحول أغروب
وأبچي وأهل العين كل مغربيه
****
بجاه الگضه عطشان وگليبه يمك
بجاه الكفل الظعون وتفده دمك
بالحبته الحوراء والحبته أمك
بيدي أخذ رجواي ورضه عليه
****
( ام علي الشمري )
ــــــــــــــــــــــــــــــــــــــــــــــــــــــــــــــــ
السلام عليك يا ابا عبد الله الحسين
السلام عليك يا صاحب الزمان " عج "
كتبت 31/12/2023/ ميلادي
18/ جمادى الآخرة 1445هـجري
أبوذيات الوفاة مولاتي ام البنين ع
****
أحساسي يرجع الغايب وملي
قبل ما موت يحضرني وملي
أعيوني ابشوفة الغالي وملي
الكافل وأخوته اوبدر الزچيه
****
ويـن الياخذ أخــبـاري دليلي
ولعنـد الما هــو غيـره دليلي
يخبـره افـراگـهم غير دلـيلي
حسين ويفزع بروحه عليـه
****
تعال او شوف نيرانك ويتني
بعد ما ظل صبر عندي ويتني
هلبت عــدل مــا ميت ويتنـي
أعيونك وأبتشر بيهه المسيه
****
الشهاده تمت الولدي وتم لي
حزن يعقوب بــفـادي وتملي
نهار او ليل يـنعــاهم وتـملي
دمعها أشما فرغ عيني اوجريه
****
لسان. حال مولاتي أم البنين ع
#أم_علي_الشمري
أبيات نعي لمرلاتي أم البنين
على فراش المنية العين دارت
ماحيرت اليمها ودره اشرادت
علي السجاد دمعة عينه طاحت
حس بيهه أشتريد اوصاح ويلاه
يگلها امنين اجيب حسين ودريه
لــو مـوجود بعيـونـچ تضميه
ولو موجود ميعوفچ تتانيه
يجيچ او گمر هاشم حاضر اوياه
وتّشوفــيه يـم عبـاس الحــنيــن
وي سر گلـبـچ او عيـنـچ تـسريـن
وبعد ما مش نظر للطف تديرين
أوتخّلص حسرتچ يا يمه والآه
أمنيتي احسين يحضر يم البنين
قـبل ماجفنچ او عينـچ تغمضين
وترتاحين يمه من تموتين
اوبعد ماكو بچي اوماكو حسيناه
يالبصلچ عملتي اوثبتيت أمجاد
ورخصتي الغوالي العين ابو السجاد
قاصد حضرتچ هالليله أريد أمراد
جدمي الغير دربه لا يسر ممشاه
خادم للحسين ابقى اوإلچ ممنون
يالجاهـچ عظيـم اتوسلچ بعـيون
ذاك الكفل زينب ولي قاد أضعون
عمري ابلايه حب حسين كون انساه
#أم_علي_الشمري
⛔| تم نقل البوت الى بوت جديد
📍 | اضغط هنا للدخول الى البوت الجديد
⚠️ | سارع في الاشتراك ... !
~~~~~~~~~~~~~~~~~~~
أبوذيات لمولاتي فاطمة "ع"
**
چنـت بـوجـودها أمضوي وهلن
اعيوني أبچن دمع من دم وهلّن
على المـا منهـا بعد أسمع وأهلاُ
ببو الحسنين مـن حلگ الــزچيه
**
أنــا الكل منكر أتصـدّه ونهــواي
يگلبي اعليـهـا لتبطـل ونهــواي
النــاس ابليل تتسامــر ونهـواي
دفنتـه ابيــدي ودمـوعي سويه
**
#ام_علي_الشمري
ابيات نعي لمولاتي فاطمة الزهراء "ع "
*
عليمن يعتـب الليله أبـو حسـين
محمد مـوش يمَّه وگلبـه نصين
منو يصـبـر دليله ابعمّلـت البيـن
هدم ركن الوصي وبيته وحياته
*
بعده الفـگد طه الجرح ما طاب
اوچمّلته الزچـيه ابلحگ الحباب
خذت ويّاها روحه الدار التراب
الچان ايشيّب اويـاهـا أمنـيـاته
*
سبـگتــه المـنيّـه والأجــل حـال
گطـع وصل المودّه وخيّب آمال
مـرد دلال حيدر والــدمـع سـال
خسف بدره وشعب ولده وبناته
*
چـفّـنـها اودفـنــها ابليل يـا ليل
نزل حتى الظلام يصبره عالويل
مثل فاطم دفنـّها ايفگد الحـيـل
يســل الوجــه ويغــيّر سِـمــاته
*
عليـمن تچّوتــه المكسـور گلبـه
شَبَه الغروب تالي يصيـر دربـه
حزين ابلا ضوه و قنـديل حـُبّه
وحيد ابعالم آهــه او ذكـريـاته
*
#ام_علي_الشمري
https://vm.tiktok.com/ZM6J26dN7/
Читать полностью…
أبوذيات
بمناسبة ميلاد الطاهر بنت الأطهار زينب ع
ـــــــــــــــــــــــــــــــــــــــــــــ
قصيدة عشگ اكتبها وردها
عله أسماع التحب زينب وردها
بجاه الليله والساعة أوردها
الحضن ام الحسن تشفع إليه
ـــــــــــــــــــــــــــــــــــــــــــ
وليدة هـالمسـه نـورت سمـاها
خبر واصلنه نسمع عن سماها
يطه سمي ( زينب) من سماها
گمر وأخدودها انجوم الثريه
ــــــــــــــــــــــــــــــــــــــــــ
عليها العلم مثل المطر حيّ دار
وإذا تسأل عليها منين حي دار
جـدها المصطفى والأبـو حيّـدر
ومهـا الطاهره الـزهره الزچيه
ــــــــــــــــــــــــــــــــــــــــ
وردها - أرددها
وردها - أريدها بمنزلتها
وردها - قدومها
#ام_علي_الشمري
لسان حالي
يگلبي اشيوجعك مني ولم بيك
مــاهــو مـاي تـتـبده ولـم بـيـك
دسـولف لا تضم گلي ولـم بـيك
بـعد لـو نيّـتــك نسكـت سويـه
#ام_علي_الشمري
هاي عمامته والراس
فوگ الرمح متعلي
رحمي حالتچ عمه
كافي تصيحي وتسألي
ما يرجع بعد الحسين
خاف من البچي تسلي
لا يوم كيومك يا ابا عبد الله
#ام_علي_الشمري
الدمع عن الشماته أخفي وداري
الي مـو بس ولـد راحـو وداري
بــعد الـمـن أنــه أتـعنــه وداري
وانا اعزازي قــضوا بالغاضـريه
#ام_علي_الشمري
أبوذية عن لسان مولاتنا أم البنين ع
أريــدك بالـكـرم تشمخ وجودك
وللعطشان يوم الطـف وجودك
موش ازنود يبني أذب وجودك
أگبال حسين وتـرضي الزچــيه
الاولى -العطاء
الثانيه -أفعاله
الثالثه- أبا الفضل
#ام_علي_الشمري
أبوذيات ... زينب ع تقول
أبــو فاضل ربـات أخـته ولحسين
قـبـل مــا گـله عطـشانـه ولحسين
طاح اگبالي اهو وجوده ولحسين
قــسم بسـمه عطـش ما يظـل بيه
ــــــــــــــــــــــــــــــــــــــــــــــــــــــــــــــــــــــــــــــــــــــــ
راح الچــان بحســاسه يـره الماي
گصد والغيره سابـگته يــره الماي
راد ابـچـــفــه يـتروه يـــره الماي
أخـــوه حسين وسكينــه اورقـيه
ــــــــــــــــــــــــــــــــــــــــــــــــــــــــــــــــــــــــــــــــــــــــ
مو بيـدي لــون عفــتك ولحسين
يبو فاضـل عزيز اختك ولحسين
دشوف شلون من بعدك ولحسين
سبــانــي فگــدك او واضـح عليه
ــــــــــــــــــــــــــــــــــــــــــــــــــــــــــــــــــــــــــــــــــــــــ
بــعــد الــمــن أرد لــهـلي وداري
أنــا او يحسيـن متفـارگ وداري
روحـي ابـروحـه متعلـگه وداري
اعوفه شلون دامي اعله الوطيه
ــــــــــــــــــــــــــــــــــــــــــــــــــــــــــــــــــــــــــــــــــــــــ
جــف بئر الدمــع عـندي ولماي
اشـربــه للـصــدع گلـبي ولماي
صحت ياحــيدر اوجدي ولماي
أجتِ اوشافت اهـمـــوم العليه
#ام_علي_الشمري
اجمل قصائد لاستشهاد فاطمة الزهراء ع تجدونها هنا
/channel/ininafwf
صنمٌ في عينكَ وفي عينِ ملاك
لا تــرى الاصنــامُ مـا نحن نـراه
( لمن يقول عن جابر صنم )
#أم_علي_الشمري
ما عدنا راس الأي سنه
بس رووس عدنه اعله الرمح
وبتدت من راس احسين
ـــــــــــــــــــــــــــــــــــــــــ
السلام عليك يا أبا عبد الله
ـــــــــــــــــــــــــــــــــــــــــ
#أم_علي_الشمري
مساجلة لمولاتي ام البنين ع
تعال او شوف نيرانك ويتني
بعد ما ظل صبر عندي ويتني
هلبت عدل مــا ميت ويتني
أعيونك وأبتشر بيهه المسية
ــــــــــــــــــــــــــــــــــــــــــــــــــــــ
يتغير الحال نظره من الكفل يتغير الحال
وصلوله مرسال أمك تحتضر وصلوله مرسال
يحضرها بالحال لتموت ابعجل يحضرها بالحال
توجع الدلال الجنازه ابلا ولد توجع الدلال
****
مايرد عباس لا تنتظري أبد ما يرد عباس
ويلي اعله الحساس گلب امه يون ويلي اعله الحساس
موتتها يا ناس من أفراگ الولد موتتها يا ناس
لا چف ولا راس ابيش ايشيعچ لا چف ولا راس
****
خابت الأمال گطعتها المسه او خابت الأمال
ما ظلها رجال مو بس الكفل ما ظلها رجال
أمگطعه اوصال اولادچ يالحنينه أمگطعه أوصال
دمهم تره سال برض الطف جره دمهم تره سال
****
شيلو الجنازة و امشو للحد شيلو الجنازه
الرادته عازه ميت يا علي الرادته عازه
اليوم المجازه حضرت فاطمه اليوم المجازه
طه واعزازه نصبوا فاتحه طه واعزازه
****
#أم_علي_الشمري
أبيات نعي لمولاتي أم البنين ع
***
لنوح اعليكم او ما بطل النوح
اولذكر الفاگده والعدها مذبوح
لون انعد اصيرن سادس النوح
يالرحتو وتركتو بگلبي جمره
****
طفيتوا ضحكتي وشمعة ربه أمكم
وبقت صوره اعله بالي طف ذبحكم
شلون انسه ييمه او رحتوا كلكم
ما ظل واحد الكسري يجبره
****
وحگ الرافع السبعه ابلا اعماد
بچت حتى الصحاري اعلي يلولاد
صرت مثل المضيع رايح اوراد
أجول ابهالبراري او أجري عبره
****
#أم_علي_الشمري
ليالي الـقدر تنعى اعليك وتـنوح
واعمال الخميس وليلة الجمعه
واصحاب الكساء الليله مشغولين
ينتظرون ناعي ولجله مجتمعه
يـا سـيـّد الـفــالي روح مـرتــاح
هنيئـاً خلصت عالـزهـره تنـعــى
اهناك ام الحسن منتـظره بآهات
يناعيهه التجيـهه او تـهـل دمـعـه
اهناك حسين يمك وأهله الأطهار
وكلمـن رايــد أحسـاسك يسمعـه
مجالـس تنّصبلك ويــن مـتـريــد
تعيد الجمره عالـمرضوض ضلعه
شفيعك حـيــدر الــكــرار مــولاي
اومحمد وآله والطاهره البضـعـه
#ام_علي_الشمري
جديده لمولاتي فاطمة الزهراء ع
**
يا كاتـب الاشعار هـاك انقل الـصوره
مظلـومه أم حسين وإيـديـه مأسوره
واعرض ظلامتها واكشف حقيقتها
مظلومه أم حسين وإيـديـه مأسوره
ـــــــــــــــــــــــــــــــــــــــــــــــــــ
أكتب يشاعر ما جره الفاطمتي
منهـو التجرأ واقتحـم مملكتـي
أخذ الحقيقه مـن جمر سالفتي
خليني أسولف وبري لله ذمتي
لتنقـص ولتزيـد كل الحچي اتحفظه
عن الظلمها شلون أرضـالـه وتـرضى
جمرتهـا ما تطفى بالگلب مسجوره
يا كاتب الاشعار هاك انقل الصوره
ـــــــــــــــــــــــــــــــــــــــــــــــــــ
الباب ما اهتم لون كاسرها
والدار اهون ينكشف ساترها
لاچن الزهره ارويحتي الساطرها
ما ارضى فاطم ينكسر خاطرها
عذبني هذا الصار لـونـك ولا تـدري
لو ما وصيه اهنا چا كسرت صبري
ما ظل علي محـتار ونفاسه مقهوره
يا كاتب الأشعار هاك انقل الصوره
ـــــــــــــــــــــــــــــــــــــــــــــــــــ
ركز شگول او دون مصيبتها
من يا ضرب ام الحسن موتتها
البسمار والحايط أخذ ضحكتها
والعصره خلف الباب ما رحمتها
والموته بَثّرِ السوط من گد مضارُبها
أخفت جرح وآلام يدريها بس ربها
موجعه راحت حيل أشگد حملت أمروره
ياكاتب الاشعار هاك انقل الصوره
ـــــــــــــــــــــــــــــــــــــــــــــــــــ
راحت الربـهـا الراضيه المرضـيه
اوتركتنـي عايش بالدمع يوميه
چانت الحيل اوراح حـيل البــيه
الـدنيــا بعد ام الحسن مـو ليه
عني إرحلت لله وانه ابجسد باقي
اوياها خذتها الروح وانفاسي واعماقي
الملكت الدلال تركتني معذوره
يا كاتب الاشعار هاك انقل الصوره
ــــــــــــــــــــــــــــــــــــــــــــــــــــ
البيت بعد الزهره مابي أي نور
عنها كلامي اشما گلت يبقه اسطور
مو قطره هي اوجيه من ابحور
أنسيه والباري خلقها من الحور
بنت النبي المختار ماكو شبه بيها
تختلف عـن الناس خـلاهـا باريها
مو آيه عالآيات لا بل هي السوره
يا كاتب الأشعار هاك انقل الصوره
ــــــــــــــــــــــــــــــــــــــــــــــــــــ
#ام_علي_الشمري
لمولاتي فاطمة الزهراء ع
من يامرض ماتت فاطمه الزهره
تـدرون بخــبرها لـو انضـم سره
**
سألوا فضه عـن الـمرض والعله
چانت عايشه ويـاها العـمر كـله
تجاوبكم على اللي صار والقبله
ياهو الترك بضلوع الطهر جمره
تــدرون بخبــرها لو انضم سره
**
گولو امنين أجتها العله من ياويل
ظلت ما تعـرف انهـارها من الليل
من شدّت وجعـها مـا تسنّد الحيل
لعوتها ابصدرها اعظــامها مكسره
تـدرون بخــبرها لـو انضـم سره
**
من ياسوط من ياضربه يابسمار
من ياعصره من ياباب من يا نار
كلهن نزلن اعليها اوغدت تحتار
ياجرح التضمه اواضحه السطره
تـدرون بخــبرها لـو انضـم سره
**
ليــل الله اليـمـر اعليها متنـامه
مايغمض جفنهـا او ترقد الهامه
الجرحه ازغير ما يتـحمل آلامه
شلون ام الحسن حملتهن الفتره
تـدرون بخــبرها لـو انضـم سره
**
بنت المصطفى ووديعة المختـار
يا حسرتي اعليها من لفت لشرار
من كاس القـهر شربوها هالكـفار
خلـوهـا النفس تتنـفسـه بحسره
تـدرون بخــبرها لـو انضـم سره
**
#ام_علي_الشمري
أبوذية بمناسبة ولادة الحورية زينب ع
انـا بت هلّأتـه او ياسين والعم
أنا الجدها النبي المختار والعم
حمـزه او والــدي حيدر
أسمي اعله النسه يفـتر
زينـب والفـخر يـفـخـر
للـعـفـه صـرت مـصـدر
شبـيـهـة فـاطـمـة أُمـي
المشه كل خيرها بدمي
المنهه أستورثـت علمي
العظيمه الخلدت أسمي
ميلادي فـرح لحبابي والـعم
جميع الناس فرحانه المسيه
#ام_علي_الشمري
أنــا التــوه بــديــت اضحـك
بعـد مـا جـفــن اعيــوني
ويوم الجيت أعيش احساس
معنـى الضحكه حسدوني
الحمد لله 😊🫶
#ام_علي_الشمري
قال الإمام علي(ع)
العقول أئمة الأفكار و الأفكار أئمة القلوب و القلوب أئمة الحواس و الحواس أئمة الأعضاء.
المصدر : بحار الأنوار
لسان حال اليتيم
عــاده بـالسلف عـدنـه ورا مـاي
اليسافر هـله يــذبـولـه ورا ماي
الـدهــر بسهامـه عذبني وره ماي
بعد مــا غـابت او بـعـدت عليه
الاولى - الماء
الثانية - رمى بمعنى القاء او قذفة
الثالثة - الأُم
#ام_علي_الشمري
ريـتك يوم عاشر ظـهـر ماطر
بعاشور ودليل حسـين ماطـر
يغيم الله لــون راويــه ماطر
إبن جوشن خيامه وگوم أميه
اللهم كما رويت الارض عذب مائك
لا تحرمنا حب الحسين ع يا الله
( يا أبا عبد الله )
1-ماطر -نزول المطر وهو الفعل
2-ماطر- تصدع 💔
3ماطر- مشه -
#ام_علي_الشمري
أبوذية عن لسان حالي أتمنى في يوم من الأيام آخذ علي وروح وأقره هذي الأبوذية بعد الشفاء التام العلي أبني في حضرت أبا الفضل ع
ــــــــــــــــــــــــــــــــــــــــــــــــــــــــــــــــــــــــــــــــــــــــ
قسم بأسمك يبو فاضل ولحسين
قـبل الجبته الك يشكي ولحسين
تشافه وعـله مـا ظلــت ولحسين
بخــوك أنــذاب وجنــونه الـهويه
الاولى -قسم
الثانيه-الإمام الحسين ع
الثالثه - للأحسن -
#ام_علي_الشمري
⛔| تم نقل البوت الى بوت جديد
📍 | اضغط هنا للدخول الى البوت الجديد
⚠️ | سارع في الاشتراك ... !
~~~~~~~~~~~~~~~~~~~
⛔| تم نقل البوت الى بوت جديد
📍 | اضغط هنا للدخول الى البوت الجديد
⚠️ | سارع في الاشتراك ... !
~~~~~~~~~~~~~~~~~~~