🎭 رواياتي 📚 الوسام 2️⃣ 🎭

01 August 2024 12:29

قلت ليهو هوووي يا مصطفى ما تستهبل ! مش قلت ليهو إني حـ أبدا اشتغل ! قال لي يعني ما كان أقول ليهو ؟؟ قلت ليهو ايوه ما تقول ليهو أي حاجه و لو سألك عن أي شي عني قول ليهو ما بعرف....
في نفس اليوم دا رسلت لـ فريال و قلت ليها لو معاك رقم المدير أديني ليهو ، قالت لي ليه ؟؟ قصدي في شي حاصل معاك ؟؟ قلت ليها لا ، بس عايزا أغير ورديتي و اشتغل المساء ، قالت لي طيب ... بس سؤال و ما تعتبريهو تطفل ، راحلك ما عندو مانع تشتغلي في المطعم و كمان بليل ؟؟ قلت ليها لا ما عندو مانع ، المهم أول ما رسلت لي رقم مجتبى طوالي اتصلت عليهو و الخط كان خاشي بس ما برد ، شويه كدا فريال اتصلت علي ، لما رديت عليها قالت لي اتذكرت ، هند دي امبارح كانت بتتكلم عن الموضوع دا و قالت عايزا زول يبدلها يشتغل مساء و هي صباح ، قلت ليها طيب كلميها إنو أنا حـ أبدلها أو اديني رقمها ، قالت لي طيب برسل ليك رقمها ، قلت ليها أستاذ مجتبى ما حيكون عندو مشكله صح ؟ قالت لي لا أصلاً ما عندو شغله بالحاجات دي المهم الشغل يكون صح ، المهم رسلت لي رقم هند ، اتصلت عليها و قلت ليها أنا مها و دخلت ليها في الموضوع ، قالت لي ريحتيني شديييد والله ، خلاص نبدا من بكرا ، أنا بجي الصباح و انتِ تعالي المساء ، قلت ليها تمام و قفلنا على كدا ، فجأه تلفوني رن ، لقيتو مجتبى ، ما رديت عليهو بس لما تاني اتصلت فتحت الخط ، قال لي معاي منو ؟؟ لقيت مكالمات من الرقم دا !... قلت ليهو دي أنا ... قال لي منو ؟؟ طبعاً ما عرفت أقول ليهو شنو فـ طوالي قفلت الخط !!
في اليوم البعدو لمن عملت الشاي و جبتو و بدينا نشرب أنا و مصطفى يونس كان بعاين لينا ساااي ، بعد مسافه قال لي ممكن أعرف أنا كبايتي وين !؟
قلت ليهو في المطبخ ، قال لي أكيد الشاي ما حـ يتكب براهو و يجيني !! ممكن تبطلي البتعملي فيهو دا !؟
قلت ليهو ليه انا بعمل في شنو !؟ ما عايزا أجيب ليك شاي و بعدين اكتشف انك ما عايز أو شاربو و أكون وسخت الكبايه ساي ، قال لي يعني حأشربو في أحلامي !
هنا مصطفى قعد يضحك ، يونس قال ليهو جننتني ! ما معقوله معاها ! كل يوم ما بتعمل لي حساب لا في أكل لا في شراب و لمن أسألها تقول لي قايلاك متغدي أو فاطر أو شارب !! قلت ليهو لأنك عودتني على كدا 😊
قال لي أنا ما عندي مانع لو قلتي لي ما عايزا اتعب نفسي معاك بس ما تقولي لي أسباب مكرره و غير منطقيه ! قلت ليهو مهما حصل أنا مستحيل أكون كعبه أو بخيله للدرجه دي و ما عندي مانع اعمل ليك شاي أو أكل بس كيف حـ اعرف إذا أنت عايز ولا لا !؟
قال لي تمام من اليوم اعملي لي حساب و لو متغدي أو فاطر حـ أقول ليك ، قلت ليهو كدا أحسن ، المهم بعدها مصطفى جاهو الترحيل و مشى المدرسه ، يونس كان قاعد و ما طلع ، بقينا قاعدين الإتنين في الهول بس ماف واحد شغال بالتاني ، أنا مركزه مع تلفوني و هو مركز مع الشاشه ، فجأه كدا سمعنا صوت الجرس ، يونس مشى فتح الباب ، بعدها سمعت صوت نسوان و صوتو و هو بقول ليهم ايوه موجوده اتفضلوا ، فجأه جات إيلاف البت القالت لي نحنا جيرانكم الجداد و معاها مره كبيره عرفت انها أمها ، إستقبلتهم و ضيفتهم ، المره قالت لي نحنا سكنا في البيت الحداكم دا لينا أسبوعين ، قلت ليها ايوه لاقيت بتك جنب الباب و كلمتني ، معليش والله كان مفروض أجي عليكم ، قالت لي ماف مشكله الما جا عذرو معاهو لكن نسوان الحي كلهم جونا داخلين ، قلت ليها والله أنا ذاتي جديده هنا و ما بعرف ناس الحي ديل شديد ، قالت لي ايوااا عشان كدا ، عروس انتِ ؟ قلت ليها لي شهرين ، عاينت لـ يديني و رجليني و قالت لي ما تهملي نفسك للدرجه دي ، مالك كان ختيتي ليك حنه و رسمتي و اتجيهتي ، إيلاف قالت ليها امييي ! عاينت لي و قالت لي معليش أصلاً امي دي كدا ، قلت ليها لا لا عادي ماف مشكله ، أمها قالت لي والله ما قصدي احرجك ، كلامي دا أنا لبناتي بقولوا ، و دا لمصلحتك والله ، انتِ بت شابه و صغيره و عروس كمان اهتمي بنفسك ، قلت ليها حااااضر ، طبعاً يونس ما جا داخل تاني ، قعدوا معاي اتونسوا شويه و لمن قالوا حـ يمشوا يونس جا داخل ، مشى السوق و جاي شايل معاهو كميه من الحاجات ، قال ليهم إلا تقعدوا و تفطروا معانا ، قالوا ليهو لا لا مره تانيه نحنا أصلاً طالعين ، أصر عليهم بس قالوا إلا يمشوا عشان هناك كمان ناس بيتهم منتظرنهم للفطور ... المهم في النهايه مشوا ، قلت لـ يونس ديل جيرانا الجداد ، قال لي ايوه عارف ! قلت ليهو معناها أنا بس الما كنت عارفه ! قال لي عشان ما قاعده تطلعي ! قلت ليهو أطلع أمشي وين ! ؟ دقيقه انت ناسي لمن عرفت اني حـ اشتغل قعدت تسألني الناقصك شنو و حاولت تمنعني ! الشغل برضو طلعه !! قال لي ما ضروري عشان تطلعي تمشي تشتغلي ! ممكن تطلعي على ناس الحي ديل و تتعرفي عليهم و يجوك و تمشي ليهم ! قربتي تتمي الشهرين هنا و لسه ما عرفتي زول ! قلت ليهو أنا الساكنه معاهو في نفس البيت ما عرفتو أعرف البرا البيت !؟

🎭 رواياتي 📚 الوسام 2️⃣ 🎭

01 August 2024 12:29

من دون ما أتلفت عليهو قلت ليهو :
قلت اسهل عليك الموضوع لأنو شايفاك متردد فـ مفروض تشكرني لأني طلعت أشجع منك و حكيت نيابة عنك !
جاني قريب و لفتني عليهو و قال لي قصدك أنا جبان !؟ قلت ليهو ما متأكده !... بس تصرفاتك بتقول كدا !
قال لي كدا مرتاحه يعني !؟
قلت ليهو مرتااااحه شديد لأنو بعد دا بقى ما عندي حقيقه أدسها من الناس ، عايزني أقعد معاك كدا لمتين ؟؟ لمتين عايز تخليني وراك و تدسني من الناس !؟ لو خجلان بي فأنا ما خجلانه من نفسي لأنو ما لي أي ذنب ، بعد دا ما فارقه معاي ، العايز يتقبلني زي ما أنا أهلاً و سهلاً و الما عايزني ما بغصبو علي ، عاين لي مسافه و كان حـ يطلع من المطبخ بس وقفتو و جيت وقفت قدامو و قلت ليهو بالمناسبه ليان دي منو !؟
قال لي و انتِ بتعرفيها من وين !؟ قلت ليهو من كترة إتصالاتها ، اممم خليني أخمن دي حبيبتك صح !؟ دي الخلتك تكتشف انك غلطت غلطه كبير لمن عرستني صح !؟ دي الخلتني أكون باهته في عيونك ؟!
قال لي ما تفسري على كيفك ... قلت ليهو مشتهياك مره وحده بس تقول الحقيقه ... قال لي عايني أنا ما فاضي ليك و حاول يتهرب ، أول ما اتحرك تااااني وقفت ليهو قدامو و منعتو يطلع من المطبخ ، قلت ليهو مره وحده بس خليك راااااجل و قول الحقيقه ليان دي منو !؟
طبعاً جملة خليك راجل دي إستفزتو شديد و خلت تعابير وشو تتغير ، واصلت إستفزازي و قلت ليهو ما تخاف مني ما حـ أكتلك ، قوي قلبك و خلي الجبن ، مسكني بقوهـ من يدي و قال لي كلمة جبان دي ما بتتقال لي ، قلت ليهو طيب خليك راجل .... هنا حسيتو حـ يكسر يدي عديل ، قال لي بنبرة تهديد إياك تعيدي الجمله دي تاني فاهمه ولا لا !؟
ما رديت عليهو ، قال لي ما تفتكري انك كدا بتستفزيني عشان تسحبي مني الكلام ، أنا ماف زول بقدر يجبرني على حاجه ، قال كدا و فك يدي و طلع طوالي !
بقيت أنبذو في سري و انبذ ليان و اليوم الجمعني بيهو !
قلت في نفسي يمكن البت ما عارفه إنو متزوج !! في الحاله دي ما عليها لوم ، اللوم كلو على إسمو يونس دا !
المهم لما عرفت إنو صيانة المطعم خلصت و الموظفين رجعوا للشغل ، قلت أخيراً حـ أطلع من الأربع حيطان دي ، من الصباح جهزت نفسي و طلعت بعد ما يونس و مصطفى مشوا ، أول ما وصلت المطعم مشيت مكتب المدير ، ضربت الباب و لمن قال اتفضل ، دخلت و قلت ليهو السلام عليكم ، قال لي و عليكم السلام أهلا و سهلاً اتفضلي ، قعدت و أنا مشربكه أصابعي ، قلت ليهو عارفه نفسي في الفتره الآخيره أهملت شغلي و أخدت إجازه طويله بس والله كانت حاصله معاي ظروف ، خجلانه أقول ليك خليني اشتغل مره تانيه بس أنا بالجد عايزا اشتغل هنا ، رجع بـ كرسيهو لـ ورا و قال لي عملتك دي ماف زول عملها قبلك ! و لو في زول عملها طوالي بنفصل من الشغل ، قلت ليهو عارفه بس أنا كلمت فريال عشان تقول ليك إنو أنا حاصله معاي ظروف و حـ اضطر اغيب كم يوم زياده ، قال لي و ما كانو كم يوم ، و غير كدا انتِ ما وضحتي لي ظروفك ولا أخدتي إذن مني ، اكتفيتي بإنك تكلمي زميلتك في الشغل و خلاص !! ياخ حتى الطلاب المدارس بياخدوا إذن و لو الواحد اضطر يغيب فتره بكون مجهز أسبابو !!....نزلت راسي و قلت ليهو معاك حق ، أنا غلطانه ، أما ظرفي صدقني ما بقدر أقولو ليك ، عاين لي مسافه بعدها قال لي لو اتبادلنا الأدوار و كنتِ انتِ مكاني حـ تعملي شنو ؟؟
قلت ليهو حـ أديك فرصه بما انك قلت حاصله معاك ظروف ، حـ أديك فرصه لأنو شغل كان كويس و ما حصل جا زبون أو زميل في الشغل شكى منك ، حـ أديك فرصه لأنو كلنا بنستاهل ناخد فرصتين 😅
ابتسم و قال لي حقو أمسكك حسابات الميديا تبع المطعم عشان تروجي لينا و تقنعي الناس يجوا مطعمنا ، قلت ليهو بقدر اشتغل أكتر من شغل في وقت واحد ، قال لي والله يا مها ما عارف أقول ليك شنو !!.... قلت ليهو علييييك الله يا مجتبى... قصدي أستاذ مجتبى ، عليك الله أديني فرصه تانيه ، أخد نفس و قال لي تمام ، يلا على شغلك و تاني ماف حاجه اسمها اجازه ، فرحت و قلت ليهو شكراً شكرررراً و تاني ما عايزا إجازه خالص .... طلعت منو و مشيت المطبخ للشباب و قلت ليهم أنا جييييت ! جسار قال لي welcome to back ، فريال قالت لي مجتبى خلاك تواصلي ؟؟ قلت ليها ايوه قالت لي يا سلاااام أهلا بيك مره تانيه ، حذيفه قال لي يلااا يلااا على شغلك يا زوله ، كفايه نوم و كفايه كسل ، قلت ليهو أصلاً زهجت من النوم ....

لقيت مصطفى واقف جنب الباب ، يا حليلو شكلو واقف من قبيل في الشمس ، لمن وصلتو قال لي ياخ انتِ مشيتي وين من قبيل بضغط على الجرس ! قلت ليهو كان عندي شغل المهم إني جيت ، فتحت الباب بالمفتاح و قبل ما ندخل جاني صوت بقول : السلام عليكم !

🎭 رواياتي 📚 الوسام 2️⃣ 🎭

01 August 2024 12:29

قالت لي يا بت كلهم بكونوا ملاك في البدايات بس لـ قدام بوروك الوش التاني ! قلت ليها بستفيدوا شنو طيب لمن يلعبوا بمشاعر البنات !
قالت لي هم شغلتهم شنو في الحياة دي غير يلعبوا بمشاعر البنات ! ياخ ديل عواليق ساي بلا يخمهم !... قلت ليها لا بس هو ما كدا !
قالت لي شفتي دا واحد من الأسباب البخليهم يتعولقوا فيكم ، الواحده تقعد تبكي و تشكي و لمن يقولو ليها الزول دا ما نافع تقعد تدافع عنو و تقول هو ما كدا !! يا بت أنسيهو و أرمي طوبتو ، دي شغله فارغه ساي ! تاني بس الواحده تقعد و تنتظر البجيها بالباب لأنو معظم الرجال العواليق ديل عايزين يلعبوا و يتسلوا بمشاعر البنات!
قلت ليها نمارق .... أنا بتكلم عن راجلي !
قالت تعاااالي الواتس سرعه .... طلعت من الفيس و دخلت الواتس لقيتها بتسجل لي في ريكورد ، قالت لي فيهو :
شنووو شنووو ! شنووووو!! يعني انتِ معرسه !! قلت ليها ايوه لي زي شهرين كدا ! قالت لي وااااي يا حليلك ! عمل شنو السجمان العواليق الإسمو راجلك دا !!
قلت ليها ما عارفه ألوم نفسي ولا ألومو ولا ألوم البت الدخلت حياتو ! قالت لي لوميهم الإتنين و انتِ تبري من اللوم و العتاب ، قلت ليها شكلهم بحبو بعض و أنا قاعده ليهم في النص ! قالت لي يقعدوا في جهنم الحمره ان شاء الله ، ضحكت و قلت ليها شكلك ممغوصه و زعلانه أكتر مني ! قالت لي بالجد حاجه بتزعل ! راجلك دا لو كان وقع في يدي كان أكلتو من دون ملح ، و البت التافهه الحيوانه الما بتتسمى ديك كنت نتفت ليها شعرها و شوهت ليها وشها ، هي أحسن منك في شنو عشان يخليك و يمشي ليها !؟
ضحكت و قلت ليها انتِ شفتيها وين لمن بكل ثقه تقولي لي هي أحسن منك في شنو ! 😂
قالت لي متأكدة انك أسمح منها و أحسن منها ، أصلاً الرجال بعد الزواج ما عارفه البحصل ليهم شنو بعاينوا للبنات القرف ! الواحد يكون معرس وحده نجفه و زي القمر و بخونها مع واحده ما بتساوي ضفرها ! وسسسخ !!
قلت ليها واااي يا نمارق شكلك زعلانه شديد ! مالك جربتي الخيانه قبل كدا ولا شنو !؟ قالت لي كتييير بس هسي دا ما موضوعنا ، اها حـ تعملي ليهم شنو !؟
قلت ليها يعني مفروض أعمل ليهم شي !؟
قالت لي يا بت ما تخليني أطلع ليك بشاشة التلفون دا ! يعني عايزا تخليهم يحبوا بعض زي ما عايزين و انتِ تموتي من المغصه !
قلت ليها يعني أعمل ليهم شنو ! قالت لي مااااف وحده قلبها واجعها بسبب خيانة راجلها ليها بتسأل سؤالك دا ! اعملي أي شي ، أخربي ليهم حياتهم ، نكدي ليهو عيشتو ، أجري ورا البت دي و أعرفيها منو و أفضحيها عشان تاني ما تخت عينها على راجل معرس ! حاربي و ما تسكتي عن حقك !
قلت ليها يا نمارق عادة الواحد بحارب عشان حاجه بتخصو ، بس هو ما لي و عمرو ما حيكون لي ، فما من حقي أحاول أخرب البينهم و أغصبو علي ،قالت لي طلقك !؟ قلت ليها لا ، قالت لي طيب لمح ليك إنو حـ يطلقك !؟ قلت ليها لا !
قالت لي إذاً انتِ أحق بيهو منها ، ما تبقي مسكينه و عويره و تخليهو ليها ! قلت ليها بس هو ما شافع يا نمارق عشان أقعد أطير منو البنات زي الذباب ! هو زول واعي و عارف نفسو عايز شنو و بحب منو !
قالت لي أفهمي إنو الرجال كلهم كدا ، يعني حتى لو اتطلقتي من دا و عرستي غيرو برضو حتلقي نفس الحكايه فـ بس الواحده تكون قاااهره و ناااهره و قاااادره تمسك راجلها و بيتها و كل ما يتلفت عشان يشوف غيرها تلوي ليهو رقبتو ، قلت ليها ما حاسه إنو لازم أعمل كدا ، قالت لي النصيحه البنات كلهم بقوا سمحات و وقفوا قلوب الرجال ، بقوا ما عارفين يعرسوا منو و يخلوا منو ، الواحد يمسك وحده و يفكها لمن يلقى الأحلى منها و برضو يفكها لمن يلقى غيرها أحلى منها و هكذا 🤣🤣🤣
ضحكت و قلت ليها بالجد انتِ مجنونه ، قالت لي دا حالهم بالجد ! عشان كدا ما تتمسكني ليهم ، قلت ليها على فكره أنا ما مسكينه 🌚
قالت لي طييييب إتصرفي و وريني شطارتك و أثبتي لي إنك ما مسكينه !
المهم قعدت اتونس معاها بالساعات ، بعدها طلعت من دردشتها و دخلت دردشة حلا ، لما لقيت رسائل منها ليها أيام ، كانت بتسأل فيها عن حالي و مرسله لي صور ليها هي و لدن و كاتبه لي أنا و لدن بنصبح عليك ، رديت على رسايلها و سألتها عن حالها ، طبعاً ما كنت عارفه إذا أخو يونس كلمهم إنو يونس عرس ولا لا ، من اليوم داك ما جا تاني و شنطتو قاعده في البيت !
قعدت و بقيت أفكر في كلام نمارق ! نفضت الأفكار من راسي و قلت إذا هو حابي البت دي و فضلها علي فـ خلاص ربنا يهنيهم ، رغم إني ممغوصه و قلبي واجعني بس ما بقدر أغصبو علي !! ...
رجعت الفيس و أول بوست لاقاني كان لـ يونس منزل صورتو مع واحده من لوحاتو و كاتب : شكراً للقهوه البتخلي الواحد يطلع الإبداع الجواهو 🖤

🎭 رواياتي 📚 الوسام 2️⃣ 🎭

01 August 2024 12:29

اتذكرتها طوالي ، لما جيتهم عشان أوصل ليهم الأكل الرسلو ليهم جسار هي الفتحت لي ، طبعاً هم بعرفو مجتبى و فريال بس أنا لا ، جسار دا لقينا يدو معظمها شبه محروقه ، كانوا معاهم ضيوف ، بعد حمدلنا ليهو السلامه و ضيفونا أنا طوالي عاينت للساعه في تلفوني ، قلت مصطفى لو رجع من المدرسه حـ يضطر يقعد في الشارع و ينتظرني ، همست لـ فريال و قلت ليها خلينا نمشي ، قالت لي يا بت قولي بسم الله متين جينا ، قلت ليها أنا اتأخرت و حـ أمشي ، قلت كدا و وقفت على حيلي ، جسار قال لي وين وين يا العروس الما عزمتنا عرسها !! قلت ليهو اتأخرت والله يا جسار ، طلعت من البيت من قبيييل طبعاً مشينا لحذيفه و جيناك ، قال لي لكن متين جيتو ! أمو و أخواتو قالوا لي عليك الله اقعدي شويه و اشربوا معانا الجبنه ، قلت ليهم مره تانيه ، لازم أمشي بعد دا ، مجتبى وقف و قال لي أنا كمان طالع ، جسار قال لينا يا جماااعه !!
قلت ليهو مره تانيه ، ودعتهم و طلعت طوالي و مجتبى و ذاتو كان معاي و فريال جات لاحقانا ، جسار و واحده من أخواتو قدمونا لحد الباب ، مجتبى قال لينا أركبوا عشان أوصلكم ، قلت ليهو طيب أنا وصلني محطة المواصلات ، ركبنا و اتحركنا ، فريال راكبه معاهو قدام و أنا ورا ، لما جينا مارين بمحطة المواصلات قلت ليهو نزلني هنا ، قال لي حظك حلو ، أنا كمان ماشي أمدرمان ، فريال قالت ليهو ماشي ناس خالتك ولا شنو ؟؟ قال ليها ايوه ، المهم أول شي وصلنا فريال ، بعدها بقينا أنا و هو فقط ، و كان في صمت حاصل ، كسرو و قال لي ها كيف لقيتي الحياة الزوجيه ؟؟! قلت ليهو كويسه ، قال لي واضح ، لدرجة انك ماخده إجازه قريب شهرين!! قلت ليهو بالمناسبه كفاره ليك ، سمعت إنو المطعم اتحرق! قال لي ايي والله و الخساره كانت كبيره بس كلو بتعوض بإذن الله ، قلت ليهو الصيانه حـ تخلص متين ؟؟ قال لي بالكتير تلات أسابيع ، قلت ليهو كتييره ياخ ! ضحك و قال لي زهجتي من قعدة البيت ولا شنو ، قلت ليهو فعلاً زهجت شديد !!....المهم وصفت ليهو البيت و هو طوالي نزلني جنب الباب ، نزلت و من باب الذوق قلت ليهو اتفضل ، قال لي مستعجل والله ، قلت ليهو طيب شكرا ليك ، فجأه الباب اتفتح و يونس جا داخل ، الوقت داك مجتبى دور عربيتو و اتحرك ، لما جيت أدخل يونس قال لي كنتِ وين ؟؟
ما رديت عليهو ، زحيتو من قدامي و دخلت جوه لقيت مصطفى قاعد ، قال لي مشيتي وين جيت من المدرسه و ماف زول فتح لي ، لو ما عمو يونس جا كنت حأقعد في الشارع ، قلت ليهو مشيت قريب و جيت ، دخلت غرفتنا البننوم فيها أنا و مصطفى فـ يونس طوالي جا لاحقني ، قال لي كنتِ وين يا أستاذه ؟!
قلت ليهو ما مهم تعرف ، زي ما أنا ما قاعده اسألك كنت وين و مع منو و ليه بتتأخر انت كمان ما تسألني ، قال لي ماف زول منعك من انك تسأليني! قلت ليهو على أساس انك كنت حـ تجاوب يعني لو سألتك ؟؟
قال لي لما جيت مصطفى كان واقف برا جنب الباب ، تحت الشمس الحاره ديل ! اتخيلي لو ما كان جيت بدري ، قلت ليهو مصطفى ما غبي ، كان حـ يشوف أقرب شجره يقعد تحتها لحد ما يجي زول و يفتح ليهو !! قال لي كل احتياجاتكم أنا جايبها ليكم ، فلو في شي ناقص مفروض تكلميني ، قلت ليهو أنا ما مشيت السوق ، ما مشيت أشتري حاجه ! قال لي مشيتي الميتم ؟؟
قلت ليهو لا ، قال لي تمام وين كنتِ ؟؟
زهجت و قلت ليهو يااااخ عندي اتنين زملاء في الشغل عيانين مشيت ليهم !! قال لي مرضوا الإتنين في نفس الوقت !!؟ أخدت نفس عميق و قلت ليهو حصل حريق في المطعم و هم اتصابوا !! قال لي تمام ليه ما كلمتيني ؟؟ لما عاينت ليهو جوه عيونو قال لي طيب الوصلك هسي دا منو ؟؟!
قلت ليهو ما ضروري تعرف ، جدعت الشنطه و طلعت خليت ليهو الغرفه ....

أتعرفون ماهو الغريب في مشاعرنا..
إننا ..نبتعد
و نحن في أمس الحاجة للقرب.
إننا.. نتماسك
ونحن في أمس الحاجة للانهيار.
اننا .. نصمت
ونحن في أمس الحاجه للعتاب.
إننا...نبتسم
ونحن في أمس الحاجة للبكاء .
نعم ،قد نبدو بخير ولكن لن يبوح أحدنا بما يؤلمه ف بعض الكذب كرامة ياسادة 🖤🦋
لكاتبه

يتبع......

🎭 رواياتي 📚 الوسام 2️⃣ 🎭

01 August 2024 12:29

= دقيقه دقيقه يا يونس !! كيف ظبطت معاهو ؟؟ من وين لـ وين سعيد جمعك بالبت دي !!

_ أول مره لاقيت البت دي كان في شارع النيل ، لحد اللحظه ديك هي كانت برا مخططهم ، في اليوم داك كان معاي سعيد لما شفت البت دي في شارع النيل ، كانت متشاكله مع واحد و أنا اتدخلت بيناتهم و سعيد من لحظتها خطرت في بالو الفكره دي ، لأني طلبت مساعدتو بخصوص الموضوع دا ، ما بقدر أجزم ليك بس متأكد إنو سعيد كان عارف إنو البت دي بت ميتم ، عارفاها من دار إيمان ، و عارفني بحاول افك الغموض البدور حولين الدار دا ، شاور جماعتو و رسل لي صور البت دي و قال لي حسب العرفتو دي الجاسوسه المرسلنها ليك و أداني بياناتها !

=ما بصدق ! معقوله !! ياخ سعيد دا صاحبنا و حبيبنا ! كيف يعمل كدا !!

_عشان يشغلني بيها و يلف لي راسي و فعلاً هو نجح في الحاجه دي

= معناها في الوقت الشغلوك فيهو بالبت دي على أساس انها جاسوسه ، البت أو الجاسوسه الحقيقه دخلت حياتك و يمكن قريبه منك ! ... راجع نفسك و شوف من الدخل حياتك في الشهور الآخيره و ما ضروري تكون جاسوسه ، يمكن جاسوس !... ايوه يمكن جاسوس ! بعد ما انت اكتشفت اللعبه دي و اتوقعت انهم حيكونوا رسلوا أو حـ يرسلوا جاسوسه هم حيكونوا مخططين يرسلوا جاسوس ! راجل ما بت !

_.... بالجد الموضوع طلع معقد شديد ، يعني هسي حأكون مجبور اتصرف بحذر مع كل الناس الحوليني!

= لو المخابرات عرفوا انك اتدخلت في القصه دي و اتصرفت من عندك و قبضت أخطر عناصر و احتفظت بيهم حـ تدخل معاهم في حته ضيقه شديد و يمكن تفقد شغلك و تتوجه ليك كميه من الإتهامات !

_ المخابرات و المباحث ليهم أكتر من سنه ماسكين الموضوع دا و للآن ما عملوا شي لا مسكوا المسؤولين عن الميتم لا جابوا أدله ضدهم ! و دا ما لأنهم ما قدروا يصلوا لرأس الخيط لأنو وسطهم في خونه و مندسين من القاده الكبار معرقلين شغلهم ! كل ما يتمسك زول بطلع بكفاله أو بكون مجرد أداة قام بهمه معينه و انتهى دورو و ما بقدر يفيد بشي أو يوصلهم لـ قادتهم و رؤساءهم أو بكون فدائي!

_ حتى ولو دي مهمتهم ، يسكوا الموضوع دا لمن يمسكوا راس الهوس ! و بعدين إذا جهاز الأمن و المخابرات فيهو خونه و مندسين دا معناه إنو هيئة مكافحة الإرهاب ما فيها خونه و مندسين ؟ ! و ما تنسى إنو المخابرات هي الماسكه زمام الأمور و كل الأوامر بتصدر منها سواء لـ المباحث أو قوات العمل الخاص أو هيئة مكافحة المخدرات أو هيئة مكافحة الإرهاب و غيرهم !

= شوف مرات الواحد بضطر إنو يشتغل براهو ، لأنو بكون شايف حقيقه غيرو ما شايفها أو شايفين بس عاملين فيها عميانين ، هيئة مكافحة الإرهاب هيئة كفاءتها عاليه ، ضباطها من الدرجه الأولى و عندنا قدرات و إمكانيات في القص و المداهمه و إنجاز المهمات الصعبه ....

______

بليل زي الساعه 8 كدا ، مصطفى نايم و أنا بعد ما شفت كراساتو و اتأكدت إنو بصحح أول بأول ، شلت ألواني و ورقي و مشيت قعدت في الهول و قبل ما أبدا ارسم دخلت الواتس فـ لقيت فريال مرسله لي ، أصلا أنا شبه متواصله معاها ، قالت لي ما وريتك طبعاً حصل حريق كبير في المطعم و حالياً بصينو فيهو و كلنا ماخدين إجازه ، يعني نومي نومك و استمتعي بأسابيع زياده بزواجك ، رديت ليها : لا ياخ متين الكلام دا و ان شاء الله كلكم كويسين ، كانت داخله الواتس فـ ردت علي طوالي الكلام دا حصل أول أمس ، الغاز اتسرب و اتسبب في الحريق ، في ناس اتصابت و أسعفوهم للمستشفى ، جسار و حذيفه من الناس الإتصابوا بحريق لكن اصابه طفيفه ، قلت ليها لا ياخ هسي هم كيف ، في المستشفى ولا في بيوتهم ؟؟ قالت لي في بيوتهم ، قلت ليها مشيتي شفتيهم ؟؟ قالت لي لسه والله ، كان عندنا مناسبه في البيت بس حـ أمشي ليهم بكرا ان شاء الله ، قلت ليها حـ أمشي معاك ، قالت لي تمام بكرا بتصل عليك ، بعد اتكلمنا شويه و خلصت دردشتنا ، ختيت التلفون و بديت أرسم فساتين بأشكال و ألوان مختلفه ، كنت مندمجه مع الرسم لدرجة اني ما حسيت بـ يونس لمن جا داخل ، ما إنتبهت ليهو إلا لمن قال لي ما شاء الله والله! تنفعي تكوني مصصمة أزياء ، رفعت راسي و قلت ليهو بإستغراب دخلت كيف !! قال لي أكيد بالباب معاي مفتاح! قعد و قال لي واصلي !
قلت ليهو أكيد حـ أواصل قايلني حـ أشيل حاجاتي و أدخل جوه عشان انت جيت ! قال لي لا ، واصلت رسم و اتناسيت إنو موجود بتفرج علي ، بعدها بمسافه طلع الحوش برا ، أظنو مشى الحمام ، المهم أثناء ما أنا برسم تلفونو رن ! برضو كانت ليان ! ما عارفه البت دي بتتصل عليهو 24 ساعه ولا بس لمن التلفون يكون جنبي ! رن كدا لمن فصل براهو ، بعدها سمعت صوت رسائل نزلت بس ما قدرت أشوفها و الشمار كان حارقني ، بعدها بمسافه يونس جا داخل فرش المصلايه و قعد يصلي ، بعد خلص قال لي اتغديتو بـ شنو !؟ ما رديت عليهو ، طوالي مشى دخل المطبخ و عمل لنفسو أكل لأني ما فضلت ليهو ولا شي من الطبختو ، بعد أكل عمل لنفسو شاي و كب لي معاهو ! جابهم كبايتين و قال لي اتفضلي !

🎭 رواياتي 📚 الوسام 2️⃣ 🎭

01 August 2024 12:29

فعلاً جزو كبير من البنات رسلوا لي في الواتس ، قبلتهم كلهم و عملت قروب سميتو صحبات ، قلت ليهم هنا حـ نتونس و نشكي لبعض و ننصح بعض ، بس أول شي خلونا نتعرف على بعض ، فعلاً بدينا تعارف ، لحد الساعه 10 م و نحنا بنتونس مع بعض ، يعني أخيراً حسيت انو في ناس في حياتي ، المهم بعدها لمن حسيت بالجوع قفلت الشبكه و طلعت من الفيس ، مشيت المطبخ قعدت آكل هناك و لمن جيت طالعه إنتبهت إنو صوت الشاشه عالي ، قلت هسي لو كان أنا العليت الصوت يونس كان اتزهج فيني بس لـ نفسو عادي !!... أول ما وصلت الريموت و شلتو تلفون يونس رن ! طبعاً تلفونو كان جنب الريموت ، نفس البت الإتصلت قبل كدا ! ليان !! دي منو نفسي أعرف ! إتلفت يمين شمال ما شفت يونس ، شلت التلفون بتردد و قلت بس عايزا أعرف دي منو !!
أول ما فتحت الخط جاني صوت بت بتبكي و هي بتقول يونس انت فهمتني غـ..... قبل ما تتم كلامها يونس جا و خطف مني التلفون !... كنت مخلوعه و أنا بعاين ليهو ، قال لي منو السمح ليك تشيلي تلفوني و تردي على المكالمات كمان !! ... طبعاً أنا كنت متفاجأه و عقلي عمل Error عديل لمن سمعت صوت البت ! صوتها أبداً ما غريب علي !!
يونس قال لي تاني ما تردي على مكالماتي ... قال كدا و طلع مع تلفونو و خلاني في سؤال : دي هي ولا لا !؟!
قلت لا لا استحاله تكون هي لأنو البت دي إسمها ليان ، عادي الأصوات بتتشابه ، بس للدرجه دي !؟
بس دي منو و علاقتها شنو بـ يونس !... بعد مسافه لمن جا راجع قلت ليهو دي منو !؟ قال لي زميله ، قلت ليهو بالمناسبه انت شغال شنو !؟
قال لي عندي مركز تجاري ... ضحكت ضحكه باهته و قلت ليهو ما حاسي انها حاجه غريبه ! يعني متزوجين لينا أكتر من شهر و ياداب عرفتك بتشتغل شنو !! قال لي ما حصل سألتيني! قلت ليهو انت فاضي لي عشان اسألك !؟
ما عايزا افتح ليك باب الشكيه و اللوم ، بس أنا بالجد مستغربه و مصدومه فيك ! تعاملك معاي قبل الزواج مختلف تماماً عن تعاملك معاي بعد الزواج ! حاسه كأنو يونس الكان قبل الزواج دا واحد تاني ما انت ! مستحيل انسان يتغير فجأه كدا و بالطريقه المخيفه دي !.... قال لي أنا ... قاطعتو و قلت ليهو لا لا ما تبرر و تعيد لي نفس السيناريو ، صدقني أنا قنعانه منك ما زعلانه ، و خت في بالك إنو في فرق بين الحاجتين ديل ، الزعلان ممكن يتراضى و مع الأيام زعلو بروح بس القنعان عمرو ما حـ يتراضى ولا الأيام حـ تخليهو يحس بشعور تاني عكس إحساس إنو قنعان !
قال لي ما تعقدي الأمور ! ضحكت و قلت ليهو صدقني كدا ياداااب الأمور بدت توضح ، و يمكن الإسمها ليان دي هي السبب الرئيسي الخلاك تتغير ، و دا إن دل على شي فهو انك ما كنت جادي معاي ، كل الحصل كان إنبهار البدايات و سرعان ما زال الإنبهار دا ! شكراً ليك لأنك أثبت لي إنو كلامي صح و إنو البمشي ورا قلبو بندم ، بالجد شكراً ليك لأنك أثبت لي إنو بت النسب و الأصول ما بتتساوى مع بت ما عندها نسب 😊
بعد قلت كلامي دا ما أديتو فرصه يتكلم طوالي دخلت جوه و قفلت الباب و أنا حاسه بوخزات في قلبي ، يعني أنا مستغربه كيف انسان يحب انسان و يصرح ليهو بالحاجه دي و يجري وراهو و يعمل كل البقدر عليهو و ما بقدر عليهو عشان يكون معاهو و فجأه كدا كل مشاعرو تتغير و يحب شخص تاني !!؟ إذاً دا أصلاً ما كان حب !💔

__

_يوووونس أنا والله ما كنت قاصده اعمل العملتو ، في لحظة ضعف مني قربت منك و عملت الما كان لازم اعملو 😭 عارفاك هسي حتكون فهمتني غلط و كرهتني شديد بس انا والله ما كدا
= حصل خير و اتمنى إنو حاجه زي دي ما تحصل تاني

_والله من دون قصد مني ، ما حـ تتكرر تاني يا يونس بس انت ما تزعل مني

_قلت ليك ما زعلان و خلاص أقفلي الموضوع دا !

على كدا خلصت المكالمه بين يونس و ليان ، من ناحيتها أول ما نزلت التلفون اتذكرت لما يونس طلع منهم و مشت تقدمو للباب و أثناء ما هو بتكلم معاها و هي بتعاين ليهو فجأه قربت منو و باستو على خدو و هو طوالي طلع و مشى !... اتذكرت اللحظه دي و إبتسمت بحب ، و قالت لي نفسها : عارفه إنو تصرف زي دا ما برضيك يا يونس ، أنا ما قدرت أمسك نفسي بس الحصل دا انا ما ندمانه عليهو ، متأكده انك حاسي بنفس الإحساس الأنا حاساهو تجاهك ، متأكده حـ يجي يوم و تعترف لي بمشاعرك ، عارفاك بتجينا هنا عشاني ، بتتحجج بأمي بس انت جاي عشان تشوفني ♡

_____

و أنا قاعده أدردش في الواتس مع البنات الإتعرفت عليهم ، سمعت صوت الجرس ، قلت معقوله يكون دا يونس !!.... لمن مشيت و فتحت الباب ، شفت شاب كدا واقف قدامي كان لابس كاب و شايل شنطة ضهر و ماسك شنطة سفر ! بقى يعاين لي بإستغراب و أنا استغربت من نظراتو ! قلت ليهو ايوه ! قال لي يونس قاعد !؟

🎭 رواياتي 📚 الوسام 2️⃣ 🎭

01 August 2024 12:29

و لو كلهم ما عاجبنك أمشي و أقعد بعيد عن الشاشه ، قال لي دا بيتي ، أقعد وين ما عايز ، خطف مني الريموت و قال لي أوريك بحضر شنو ، جاب القنوات الرياضيه و قال لي عندك ديل مثلاً و ناشونال جيوغرافيك ، و القنوات الوثائقيه ، قال لي في قنوات كتيره و برامج مفيده ، زي برنامج سين مثلاً !.... قلت ليهو خلااااص فهمت أديني الريموت !!
فجأه كدا تلفونو رن ، شالو و طلع بيهو و أنا شلت الريموت و جبت القناه العايزاها ، ساهرت كدا لحد الساعه 12 يونس كان نايم صحى و قال لي ياخي وطي الصوت ! لا بتنومي لا بتخلي الواحد ينوم !!
قلت ليهو في زول قال ليك نوم في الهول !؟ مالك عميان من الغُرف دي !؟ قال لي عايز أنوم هنا عندك إعتراض !؟
قلت ليهو انت المعترض ما أنا ! قال لي وطي الصوت عشان ما أقوم اقفل الشاشه ، قلت ليهو حـ تقفلها بكلمة سر يعني !😒
طوالي قام و جا علي ، قايلني حـ أخاف و أوطي الصوت بس ما اشتغلت بيهو ، قفل الشاشه و فصل الوصله و قال لي أمشي نومي ، خليتو يرجع سريرو و قمت شغلتها تاااااني و عليت الصوت أكتر ، قال لي بزهح ياخ أصلو ما معقوله معاك ! مصدع أنا ، عايزا تصلي لـ شنو انتِ يا بت الناس !؟؟
طبعاً ما إتلفت عليهو ، جا مندفع زي الطلقه و تااااني فصل الشاشه و رفع أصبعو جربي بس توصليها تاني عشان أوريك الحيحصل شنو...
أول ما هو وصل السرير و رقد كدا طواااالي جريت شغلت الشاشه تاااااني ، لمن إتلفت عليهو لقيت عيونو ديل زي الشرار ، وقف على حيلو و جا علي زي التور الهايج ، صراحة كان غضبان شديد لدرجة اني حسيت إنو أول ما يصلني حـ يشيلني و يضرب بي الشاشه .... ولا كذبت ختيت الريموت و قمت جاريه على أقرب غرفه و هو وراي ، ياخ قرب يمسكني لو ما استعجلت و دخلت و قفلت الباب بسرعه ، قلبي كان شغال دق دق ، قال لي الليله إلا ما تطلعي من هنا ، قلت ليهو ما طالعه ، أساساً عايزا أنوم ، طبعاً قفل الباب من برا بحيث إني ما أطلع تاني ، قلت ليهو بصوت عالي أصلاً قنعت و كنت حـ أنوم فـما تفتكر انك منعتني أحضر أو قدرت علي ....
تاني يوم لمن صحيت عملت الشاي و كبيت كبايتين فقططط ، شلتهم و جيت بيهم الهول ، لقيت يونس كمان قاعد ، مديت لـ مصطفى كبايتو و قلت ليهو خلص بسرعه عشان الترحيل حـ يجي بعد شويه ، قعدت و شلت كبايتي ، مصطفى قال لـ يونس انت يا عمو ما بتشرب الشاي ! يونس قال ليهو أظن الدكتاتوريه دي قايلاني شربتو و أنا نايم ! قلت ليهو في باقي لو عايز أمشي كبو و أشربو ، ما رد علي ، شويه كدا سمعنا صوت بوري الترحيل ، مصطفى لبس شنطتو سرعه سرعه و مشى ، شلت الكبابي مشيت غسلتهم و جيت راجعه لقيت يونس لسه قاعد ، ولا عبرتو ، فتحت الشاشه و قعدت أحضر ، كان شغال بتلفونو مسافه ، بعدها ختاهو على جنب و قال لي يعني أنا اليوم ماف لي شاي صح !؟ قلت ليهو شكلك ما عايز و إلا كان دخلت المطبخ ، قال لي ايوااا يعني كدا !؟
قلت ليهو كدا شنو !؟ انت واضح انك ما بتحب زول يتدخل فيك أو يعمل شي عشانك ، للسبب دا الأفضل تعمل البريحك وقت ما عايز ، قال لي تمام و طوالي قام و مشى المطبخ ، تلفونو كان جنبي ، فجأه كدا جاهو اتصال ، لمن عاينت في الشاشه لقيت الإسم ليان ، طواالي اتذكرت مره في المطعم هي اتصلت عليهو! قلت طلع ما هين و حلا تشكر فيهو سااااي ، ليان دي منو كمان ما حصل سمعت الإسم دا عند حلا ، المكالمه فصلت و لمن يونس جا طالع من المطبخ تلفونو تاني رن ، شالو و دخل اقرب غرفـه ، قلت شكلو كلامهم خااااص عشان كدا دخل جوه ، المهم بعدها بساعه طلع طوالي ، طبعاً لا سألتو ماشي وين لا قلت ليهو حـ ترجع متين ....
بعد الضهر كدا لمن مصطفى جا راجع من المدرسه قلت ليهو اليوم حـ نمشي الميتم ، قال لي يا سلااااام ، جهزنا نفسنا و طلعنا طوالي ، كنت متحمسه و مشتاقه لكل ركن في الميتم ، عايزا متين أصل و أشوفهم كلهم ، رغم كل شي بس لسه مشتاقه لـ لمة البنات و لقصصنا و حكاوينا و مصايبنا ....
لمن وصلنا الميتم و وقفنا قصاد الباب بقيت أعاين فيهو بلهفه ما عاديه ، شهر و زياده ما شفت فيهم الميتم ، جيت في يوم الثلاثاء دا مخصوص عشان بابا حازم حـ يجي و هسي يمكن يكون جا ، ضربت الباب شديد عشان مرات كتيره بكري بكون قاعد في الضل بعيد شويه عن الباب ، بعد لحظات الباب إنفتح و طلع بكري في وشي ، قال لي اووو الفتاة الخارقه الجابك راجعه شنو !؟ قلت ليهو سواد عيونك ، قال لي كنت حاسي انك حـ تجي يوم راجعه عشاني ، قلت ليهو عليك الله استغفر و زح من وشي ، قعد يضحك و قال لي و في النهايه إحساسي طلع في مكانو ، قلت ليهو انت غير ليلى ماف زول شغال بيك ، قال لي اخخخ خنجر في نص قلبي ، قلت ليهو خليك من دا بابا حازم لسه ما جا صح !؟

🎭 رواياتي 📚 الوسام 2️⃣ 🎭

01 August 2024 12:29

حسيت أعصابي تلفت !! فُرت و إتدفقت ، قلت لـ يونس اكيد انت القلت ليهو الكلام دا و مليت ليهو راسو ، قال لي هو مالو ما عندو خشم ولا ما عندو مخ !؟ هسي لو سألك قال ليك ماشين وين حـ تقولي ليهو وين ؟؟ عايزا ترجعي بيهو الميتم ولا عايزا تلفي بيهو في الشوارع !؟ الولد مرتاح و ما ناقصو شي و مدرستو عاجباهو فـ ليه عايزا تقلبي ليهو حياتو !؟
قلت ليهو ما يخصك ، قال لي بخصني ، ما أذكرك إنو لي حق عليهو و هو الآن بإعتبارو ولدي 😊
قلت ليهو مصطفى ما عايزا أصرف معاك عربي كتير ولا اقول ليك دقيقه ، دخلت الغرفه شلت الشنطه و جيت طالعه بيها ، جريت مصطفى من يدو و قلت ليهو سرعه اتحرك قدامي ، قال لي بزهج قلت ليك ما ماشي ياخ أمشي براك !!
طبعاً بقيت أعاين ليهو و أنا مصدومه !! ما قادره أصف كمية الخذلان الحسيت بيها !! يونس قال لي سمعتي صح !؟ قال ليك ما عايز يمشي من هنا !!
بقيت ساكته و ما عارفه اعمل شنو أو أقول شنو ! كيف يعني مصطفى يقول لي كدا !! عمل ليهو شنو يونس أو قال ليهو شنو خلاهو يتكلم معاي بالطريقه دي !!
يونس قال ليهو أدخل جوه بدل ملابسك عشان تفطر ، قال ليهو حاضر و طوالي مشى !!
بعد مشى يونس قال لي عارفه إنو لو سقتي الولد و مشيتي بيهو من هنا حـ يتشال منك و يرجع الميتم بما اننا كافلنوا سوا ؟!
ليه عايزا تخربي ليهو حياتو بسبب سوء تفاهم ؟؟
قلت ليهو سوء تفاهم ؟؟! بالجد كلامك بقهر و بيوجع القلب !! ما معقوله كيف بتتعامل مع مشاعر الناس و احاسيسهم بكل البرود دا ! .... أنا ما غبيه بس انت الكنت شاطر في التمثيل ، شاطر لدرجة انك خليتني أصدقك و أحلم أحلام ورديه !
قال لي بالجد ما عارف أقول ليك شنو ، متأكد أي شي حـ اقولو ليك ما حـ تصدقيهو عشان كدا الأفضل أسكت ، جا شال مني الشنطه و قال لي روقي شويه و فكري في مصلحة مصطفى لو بالجد بتهمك !
شال الشنطه و مشى خلاني واقفه في مكاني و حاسه الدنيا لافه بي !
اليوم الأول قضيتو زعل و من غرفتي ما طلعت ، بس بعدين لمن ضربت حساباتي لقيت إنو حالياً ما معاي شي ! و الرجوع للميتم ما حل ، بما إني طلعت منو فـ دي فرصتي عشان أكون نفسي و مصطفى حياتو ماشه تمام و يونس بما إنو موقع على أوراق الكفاله فـ طبيعي يصرف عليهو و دا واااجبو و أنا ما حـ اعترض و احسس نفسي إنو متفضل علينا ، بكرا حـ أرجع لشغلي ، أصلاً اجازتي خلصت من بدري بس ما قدرت أمشي بسبب نفسياتي الكانت داقه الأرض ، أنا خلاص رميت طوبة يونس و المره دي جد جد حـ أكون ليهو مزهريه بكامل رضااااي و ما حـ اتعب نفسي معاهو ، ما حـ اطبخ ليهو ولا حـ اغسل ليهو أو أكوي ليهو و بالغلط ما حـ اتصل عليهو ، إذا قايلني حـ أقضي عمري كلو عشمانه فيهو و باكيه عليهو يكون غشى روحو ، يونس ما بعرفني و ما بعرف إني اتجاوزت حاجات كتييييره غيرو و وقفت و واصلت طريقي زي الما حصلت حاجه ، من اليوم حـ يشوف تعامل تاني و شخصيه جديدهـ .....

إن أهمَ ما يكونُ في شريكِ عمرك لا أن يُحبَك أو يُغدق عليك بكلماتِ الحُب التي لا تنتهي ، بل الأهمُ أن تأمنهُ ساعاتِ الخصام

الناسُ يتشابهون في الحُب و يتوافقونَ في الجميل ، لكن معادِنَ الناسِ تظهرُ في الحُزنِ و الخِصام
كيفَ يتجاوزُ الناسُ أحزانَهم و كيف يمرونَ بما يُكدرُ صَفوهم و يعكسونَهُ على ذويهم
و كيف يستقبلهُ الآخرون..

لذلك مَن تهون بهِ الأيام ، و من تشعرُ معهُ في خِضمِ الألمِ بالأمان ، و تحس إلى جوارهِ بمعنى الإطمئنان حتى في أشدِ ساعاتِ اختلافكم وأكثرِ أوقاتِ انفعالِكم ، هذا هو الأهم! 🌷🖤
لكاتبه

يتبع......

🎭 رواياتي 📚 الوسام 2️⃣ 🎭

01 August 2024 12:29

قعدت أبكي كدا لمن صدعت و أنا العمري ما بكيت على حاجه مرتين ، بس يونس عذبني معاهو و تعب نفسيتي بالجد ، ياريتني ما مشيت في الطريق دا ، ياريتني ما لاقيت يونس من الأساس ... طول عمري كنت شايفه انو زواج بنات الميتم جحيم مؤجل ، عاجلاً أم آجلاً إلا ما يجي يوم و تتعاب فيهو البت مجهولة الأبوين ، كنت عارفه إنو ماف واحد حـ يعيش فتره طويله مع بت عرسها من ميتم ما عندها نسب ! عارفه كل الحاجات دي و متأكده انها حـ تحصل و مع ذلك وافقت على يونس في النهايه و كنت فرحانه بيهو !! ختيت عقلي على جنب و جريت ورا قلبي ! ياريتني سمعت كلام عقلي ، ياريتني ما باريت الفارغه دي ، ياريتني ما رسمت أحلام ورديه ، كنت مبسوطه بشغلي و ماف شي شاغل بالي غير كيف احسن من نفسي و أجمع قروش و أعمل كل النفسي فيهو ، جا يونس و جوط لي حياتي كلها و أخدتني لـ منحنى تاني ، ياريتني ما أديتو اي فرصه ، ياريتني ما فتحت الباب القفلتو من زمااان ياريت و ياريت 💔
دخلت جوه و وقفت قصاد المرآيه .... دي ما أنا الواقفه قدامي دي !!.. عاينت لـ شعري المنكوش و للسواد التحت عيوني ، يونس قدر خلال شهر و زياده يبدل حالي ، حولني لـ زهره ذابله ، حولني لـ زومبي ، من يوم عرستو و أنا ببكي ، من يوم دخلت البيت دا و أنا قلبي كل يوم بنزف دم ، أنا السبب ، أنا السبب في دا كلو لأني عليت سقف طموحي و إتمنيت حاجه مستحيله ، لو بس اكتفيت بشغلي و بفكرة إني لازم اجتهد فيهو كان أفضل ، ياريتني لو حسمت نفسي من أول مره دقه فيها قلبي لـ يونس ، صبرت عليهو و ختيت ليهو بدل العذر ألف و كلو لأني ما حبيت استعجل ، ما حبيت أنكد عليهو و أكون شكايه و نقناقه بالذات لأنو كان بقول لي أنا مصدع أو أنا جاي تعبان ، أو أنا مضغوط شديد مع الشغل ، كنت بقول معليش أصبري عليهو يمكن غير شغلو عندو أسبابو ، بس خلاص فاض بي و أساساً كل شي بقى ظاهر و واضح إنو ندمان أشد الندم ....
أنا عمري ما ضعفت ، عمري ما جريت ورا زول ، طول عمري كنت سانده نفسي ، ما بنتظر حاجه من زول ، بقع و بقوم براي ، طيب هسي الإتغير شنو ؟؟ راجل يخليك تبكي البكى دا كلو يا مها ؟؟
راجل يوصلك للحاله دي ؟! وين نفسك ؟؟ وين شخصيتك القديمه !؟ معقوله راجل يخليك تبهت للدرجه دي و يمحي ملامح شخصيتك و يطفيك !؟
نفضت غبار الحزن ، حاولت أرمم نفسي أو على الأقل اتظاهر بالقوه و التماسك ، اليوم حـ أحسم الحاصل دا كلو ، ما أنا البتهان إهانه زي دي يا يونس ....
شلت تلفوني و إتصلت عليهو ، ما رد علي ، تاااني اتصلت و بعد قريب التلات مكالمات رد علي و قال لي التلفون كان بعيد ، قلت ليهو ما مهم ، تعال البيت ضروري ، قال لي في شنو !؟ قلت ليهو حـ تجي ولا لا ؟؟
قال لي أنا مشغول ، قولي لي في شنو عشان إذا الموضوع مُستاهل أجي !!... قفلت الخط في وشو ، و نزلت شنطه و لميت فيها ملابسنا أنا و مصطفى و ختيتها على جنب ، مصطفى كان في المدرسه ، يونس ما كان مقصر من ناحية مصطفى ، سجلو في مدرسه و كان بشتري ليهو كل إحتياجاتو و ما منقص منو شي بس مشكلتو كلها كانت معاي أنا ، نافر مني بطريقه تحير الواحد و أنا ما قادره أعرف السبب شنو ، مرات بقول يمكن متضايق بسبب وجود مصطفى و ما عايزو بيناتنا بس تعاملو معاهو بقول عكس كدا تماماً ! ، بحسو بحب مصطفى شديد و بفضلو علي ....
لميت الملابس و ختيت الشنطه على جنب و طلعت برا منتظره مصطفى يجي من المدرسه ، بديت أفكر كدا لحد ما فجأه يونس جا داخل !! طبعاً نهاي ما إتوقعتو يجي ، قال لي في شنو ؟؟
قلت ليهو ولا شي ، قال لي كيف يعني ولا شي ، متصله علي اكتر من مره عشان تقولي لي تعال راجع البيت عشان ولا شي !؟
كنت عايزا اقول ليك حاجه و غيرت رأيي ، غمض عيونو و أخد نفس عميق ، حسيتو زي الكان عايز يتعصب بس مسك نفسو ! جا قعد جنبي و مسك يديني و قال لي أحكي لي في شنو مضايقك !؟
سحبت يديني منو و قلت ليهو بس عايزاك تقول لي الحقيقه و تريحني ، قال لي حقيقة شنو ؟؟
قلت ليهو حقيقة انك كنت شايفني تحدي و بس ، و إلحاحك على الزواج مني كان بدافع الإعجاب ما بدافع الحب ، حقيقة انك ندمت على الزواج دا ، بدليل انك ما ناوي تكلم بيهو زول ، حقيقة إني ولا شي بالنسبه ليك عشان كدا بتتعامل معاي كأني خدامه هنا في البيت دا أو أختك ! سكوتي و صبري عليك ما كان ضعف مني ، كل الحكايه إني ما بستعجل ، ما بنهي العلاقه إلا لمن رصيد الشخص دا يخلص ، لمن هو براهو يوسخ صورتو و يبهتها قدامي ، لمن اتأكد إني قمت بواجبي على أكمل وجه و عملت العلي ، قال لي مهااا بتقولي في شنو انتِ !؟ صدقيني أنا ما..... قاطعتو و قلت ليهو إذا عندك ردود على أسئلتي دي قولها ماف داعي للدراما !!

🎭 رواياتي 📚 الوسام 2️⃣ 🎭

01 August 2024 12:24

= يونس قوم و أمشي أفضل و آسفه مره تانيه عشان خليتك تجي على الفاضي ☺️
_شوفي دا ما قصدي ، أنا دائماً في حالة انشغال ، لما اتصلتي علي كتير قلقت و افتكرت إنو حاصل عليكم شي ، لما قلتي لي تعالي في المكان الفلاني خليت شغلي و جيت لأني حسيت إنو الموضوع كبير و في شي حاصل و في الآخر طلع دا كلو زهج منك !!
=......
_ هسي الببكي شنو ؟؟...ليان !...بتكلم معاك أنا ، أرفعي راسك و ردي علي في شنو مالك ؟؟
= قلت ليك زهجانه
_ يعني هسي البكى دا كلو عشان بس زهجانه !! تمااام سبب زهجك دا شنو ؟؟
=....
_لو ما قلتي لي حـ أعرف كيف
= أنا ما بس زهجانه ، أنا متضايقه من كل شي حوليني
_ اهدي و روقي شويه ... براحه براحه أحكي لي الحاصل معاك شنو ؟
= ....يونس أمي بقت الزمن كلو توصي فيني ، شايله هم زواجي و هم أخواني من بعدها ، أنا بالجد بتضايق في كل مره هي بتجيب فيها سيرة الموت ، بحس روحي بتطلع ، أنا ما بقدر استحمل فكرة إني أعيش في حياة أمي ما موجوده فيها ، أمي هي نفسي الطالع و النازل يا يونس
_امك بس من خوفها عليك بتقول ليك كدا ، كل الأمهات بقولوا كدا لأولادهم
=قبل يومين أمي تعبت شديد و حسيت اني حـ أفقدها و هي ذاتا حست بالشي دا عشان كدا بقت توصي فيني
_نعم ؟؟ و ليه ما كلمتوني ؟؟!!
=ما حبينا نتعبك معانا ، يعني ما معقول أي مشكله تحصل معانا ندخلك فيها ، انت ماف شي جابرك علينا و نحنا ما من حقنا نرمي مسؤوليتنا عليك ، السويتو لينا ما شويه يا يونس
_ حـ اعتبر نفسي ما سمعت الكلام دا ، أمك كيف هسي ؟؟
=كويسه ، احسن من أول أمس
_حـ أمشي معاك البيت عشان أشوفها
= طيب خلينا نمشي
_دقيقه خلينا نطلب شي
=معليش ما ضيفتك ، أول ما جيت وقعت فيك شكيه
_امسحي دموعك و خلي الحساسيه الزايده دي ، المهم تاكلي شنو ؟؟
=على فكره أنا العازماك
_ لا أنا العازمك
=ما تحرجني يا يونس ! أنا العازماك يعني أنا العازماك و انتهينا
_تمااام تمام بس عايزين شي خفيف عشان نلحق الغدا الجد جد في بيتكم
=أمي أكيد حـ تكون عامله ملاح خدره ، كل ما تعملها بتقول لي يونس بحبها شديد
_ خالتو انتصار ربنا يديها الصحه و العافيه

_________

رغم تعبي و الإرهاق الحاسه بيهو دخلت المطبخ و حاولت اطبخ كم طبخه كدا مع إني ما بعرف ، دخلت النت و بقيت أشوف في وصفات و بحاول أعملها بسرعه قبل ما يونس يجي ، حبيت اكسر الحاجز الغريب البيناتنا بحاجه مختلفه ، زي إني أطبخ ليهو مثلاً ، طبعاً افتكرت الموضوع ساهل بس للأسف كل طبخه اعملها يا حرقت يا ملحها طلع كتير ! زهجت و قلت يونس حـ يجي بعد دا و أنا ما عملت شي ، خايفه في الآخر اضطر اعمل ليهو سلطه خضراء بس! مرت الساعه و أنا في المطبخ و دخلت الساعه التانيه ، خلطت عصير برتقال و دخلتو التلاجه و بعد تعب عملت كفته و سلطة أسود و شيبس بطاطس ، شويه كدا سمعت صوت الجرس ، من المطبخ قلت لـ مصطفى أمشي أفتح الباب دا يونس ، قال لي أصلاً ماشي أفتحو و فعلاً مشى فتحو ، بعدها بشويه يونس جاني داخل في المطبخ و هو شايل معاهو أكل جاهز ، بعد سلم علي عاين للطبخ العاملاهو و قال لي ما كان تتعبي نفسك!
قلت ليهو لا عادي ماف تعب ، أصلاً كنت زهجانه فـ حبيت أشغل نفسي و اتعلم كم طبخه كدا ، قال لي تمام ، رتب الحاجات و مشى خلاني ضايعه و ما فاهمه الحاصل ! خلصت الفي يدي و لمن اتأكدت إنو يونس طلع من الحمام و حالياً قاعد في الهول مع مصطفى طوالي ختيت الغدا و شلتو مشيت بيهو الهول ، يونس قال لي أنا متغدي والله أكلو انتوا !!
ما قلت ليهو حاجه بس حسيت بغصه في حلقي ، أنا تعبانه و مع ذلك وقفت في المطبخ ساعتين أو أكتر عشان أجهز ليهو الغدا و أكسر الحاجز الإتبنى بيناتنا فجأه كدا ، و عشان أحس إني فعلاً زوجتو و ست بيتو ! بس ما كلف نفسو يدخل يدو في صحن ولا برر لي تأخرو ! و البزعل أكتر إنو بتصرف عادي كأنو ماف شي ! مديني إحساس إنو كل شي تمام و إنو علاقتنا ماشه تمام !
بعد خلصنا غدا أنا و مصطفى ، عملت كبايتين شاي و جبت من عصير البرتقال لـ مصطفى ، قلت لـ يونس كبيت ليك شاي ، و كان مفروض اسألك قبل ما أكبو ليك ... يمكن شاربو و ما عايزو 😊
قال لي والله شارب بس ما بضر لو شربت تاني ، شال الشاي و بدا يشربو و هو مره يعاين في الشاشه ، و مره يهظر مع مصطفى الشايل تلفونو و بلعب بيهو جنبو ، بعد مسافه مصطفى قال لـ يونس ماشي أقعد برا و ألعب بتلفونك ، قال ليهو تمام أمشي بيهو ، قلت ليهو ماشي برا الشارع يا مصطفى ؟؟ قال لي لا هنا في الحوش ، بعد طلع شلت الكبابي وديتهم المطبخ غسلتهم و رجعتهم مكانهم ، بعدها رجعت قعدت مع يونس في الهول ، كان في صمت حاصل ، هو مركز مع الشاشه و أنا مركزه معاهو و بحاول أفهم كيف ممكن الإنسان يتغير بين ليله و ضحاها !!

🎭 رواياتي 📚 الوسام 2️⃣ 🎭

01 August 2024 12:24

قفلت الشاشه و باب الهول و طفيت الإضاءه و دخلت الغرفه النايم فيها مصطفى ، رقدت جنبو و حاولت أنوم بس النوم جافاني ! دي أول مره في حياتي أحس نفسي مهمومه للدرجه دي ، كأنو صخره كبيره إنشالت و إتختت على صدري ، حاسه بغرابه شديده و حاسه اني وحيده ! زي الزول القاعد براهو في صحراء لا شايف زول لا زول شايفو !
دا يونس العايزاهو و دا الإتمنيتو ، بيت دافي قاعدين تحت سقفو أنا و الزول الحبيتو ، الزول الكنت شايفاهو كتير علي ، الزول الكنت شايفاهو صعب المنال ، اتحقق النفسي فيهو بس ليه ما قادره أحس بطعم السعاده دي !!؟ ليه حاسه يونس بعيد رغم إنو قريب !
بقيت ما عارفه هل بالجد في شي غريب حاصل ولا أنا بس متنشنه و متضايقه عشان فارقت الميتم و بابا حازم و ناس الميتم ، عشان امبارح كنت في مكان و اليوم في مكان تاني ؟!!
بقيت أفكر كدا لحد ما غشاني النوم و نمت ...
تاني يوم صحيت بمغص شديد ، قلت تنشنة و غرابة أمبارح دا سببها ، طبعاً ما لقيت مصطفى جنبي ، لمن طلعت برا لقيتو هو و يونس بشربو في الشاي ، قلت ليهم صباح الخير ، يونس قال لي صباح النور ، قلت لـ مصطفى غريبه صاحي بدري ! قال لي عمو ذاتو صحى بدري ، قلت ليهو نهااااي ما قاعد تصحى بدري ، بعرفك أنا ! قال لي لا لا والله كنت بصحى بدري عشان مس نادين ما بتخلينا ننوم لحدي ما الشمس تطلع ، يونس قال ليهو أخد راحتك و هسي لو نعسان بعد ما تشرب الشاي أرجع نوم .... مشيت اتسوكت و جيتهم راجعه ، مصطفى قال لي ما عايزا شاي ؟؟ قلت ليهو لا ما عايزا ، مشيت دخلت الغرفه و رقدت ، قلت يمكن يونس يجي لاحقني عشان يشوفني مالي بس ما جا ، و أصلاً أنا ما جيت داخله هنا عشان أخليهو يجي وراي ، جيت داخله لأني بالجد تعبانه و عشان أمبارح عقلي كان شغال زي الطاحونه و نمت بعد تعب و هسي مصدعه ! بعد حكايه ربع ساعه كدا طلعت لقيت مصطفى قاعد براهو ، قلت ليهو يونس وين ؟؟
قال لي طلع و قال ليك لو إحتجتي حاجه إتصلي عليهو ، غمضت عيوني و أخدت نفس عميق و رجعت دخلت جوه و رقدت ، قريب للساعه عشره ناديت مصطفى و قلت ليهو لو جعان أدخل المطبخ أكل ، أنا مصدعه ، مشى المطبخ و جا راجع و هو شايل صينيه ، قال لي جبت ليك الفطور ، قلت ليهو أنا ما عايزا ، أكل انت ، قال لي لو ما أكلتي الصداع ما حـ يخليك ، قلت ليهو طيب تعال ، أكلت معاهو شويه بس و لمن خلص رفعت الصينيه ، قلت ليهو أنا عايزا أنوم ، فتحت ليك الشاشه أقعد أحضر و ما تطلع تمشي أي مكان ، قال لي طيب ، فعلاً هو طلع و أنا رقدت و اتغطيت .....

"أخبروا الراحلين أن الفاجعة لا زالت بداخلنا أكبر
كذب من قال أن المصائب تولد عظيمة و تصغر حتى تتلاشى..أخبروهم أن الفراق مرّ و أن الوَحشة فيهم ليست هينة، و أن الأيام لم تضمد لنا جرحاً ولا الزمن كفكف لنا دمعاً..
كاذبون أنتم ، من أخبرتمونا أننا سنتجاوز و نتخطى كما تخطى غيرنا فواجع الفقد و الرحيل..."

يتبع.....

🎭 رواياتي 📚 الوسام 2️⃣ 🎭

01 August 2024 12:24

طلعت و هم ذاااتهم جوا طالعين معاي عشان بس يشوفوا يونس ، ودعت بابا حازم و قلت ليهو بكرا بعد بكرا حـ تلقاني في وشك ، قال لي المكان دا بيتك الأول و أبوابو مفتوحه ليك في أي زمان و مكان ، بعدها بابا حازم رجع مكتبو و يونس شال الشنط و طلع قدامي ، رماح جات و قالت لي قولي ليهو عايزين نسلم عليك ، طلعت و هم طلعوا معاي ، لقيت يونس و مصطفى ركبوا ، لما وصلتهم جيت لـ يونس بالشباك و قلت ليهو البنات عايزين يسلموا عليك ، طبعاً مصطفى كان بهبش في العربيه ساااي و هو فرحان ، قال لي تمام أركبي ، مشيت بالباب التاني و ركبت ، قايلاهو حـ ينزل يمشي ليهم أو يسوق العربيه يمشي بيها لـ قدام شويه و يقيف قصادهم بس ما عمل كدا !! دور العربيه و لمن جا ماري بجنبهم طلع ليهم يدو بالشباك و ما وقف خالص !!
طبعاً استغربت !! قلت ليهو هم بس كانوا عايزين يسلموا و يباركوا ليك ! ليه عملت كدا ! ؟
قال لي ما عندي زمن و أنا أساساً متأخر ! قلت ليهو دقيقه ما كانت حـ تفرق ، لأنو الحركه والله ما ظريفه ، قال لي المره الجايه و سكت على كدا ، مصطفى قال لي عربيتو سمحه و بااااارده ، يونس قال ليهو عجبتك ؟؟ قال ليهو آي قال ليهو خلاص لمن تكبر بشتري ليك وحده زيها ، مصطفى قال ليهو قول والله ، يونس قال ليهو ما طالباني حليفه لكن والله 😂
بعدها بدوا يتكلموا الإتنين و أنا ساكته ، ما اتخيلت إنو يجي يوم و أمشي من الميتم العشت فيهو كل مراحل حياتي بالطريقه دي ، بقيت اتذكر في سنواتي القضيتها هناك ، ضحكي و زعلي و خططي و مغامراتي و مشاكلي مع مس نادين و نقاشاتي مع ليلى ، الحفلات و السهرات الكنا بنعملها في كل مره يتم فيها إختيار وحده من البنات عشان تعرس و تمشي من الميتم ، ما عارفه إذا المره دي حـ يساهروا و يعملوا حفلة توديع لـ فدوى و نور ولا لا خاصة إنو أنا الكنت بعمل ليهم الحفلات دي و بجهز كل شي ، رغم الحصل بيناتنا بس ما إتمنيت أمشي بالطريقه دي و وداعنا يكون باهت بالشكل دا ، ما حـ أقول إني ما زعلانه من العملوهو ، لا زعـلانه و شديد كمان لأنو نفوسهم اتغيرت ، كلامهم ما جديد علي بس الجديد انهم اتفقوا مع ليلى و ختوا لي مُخدر !
زمان كانت الوحده فيهم لما تزعل بسببي أو تحس إنو بابا حازم بفضلني عليهم بتقول الكلام في وشي ، ما حصل اتفقوا علي ، ما حصل فكروا يعملوا لي شي ، ايوه كنا بنتناقش و بنتجادل كتيييير و بنرمي اللوم على بعض بس لحدي نهاية اليوم بنكون اتصافينا و رجعنا نتكلم عادي و النفوس طيبه ، بس بما انهم كتموا جواهم و اتفقوا و خططوا من وراي معناها نفوسهم اتغيرت و بقى في حقد و كراهيه خاصة إنهم ختوا يدينهم على يد ليلى الدائماً عامله ليهم فتن و مشاكل ، ليلى الما عندها حاجه لزول ، ليلى الأنانيه و المصلحجيه ، كان ممكن أغير تعاملي معاهم و أقطع علاقتي بيهم على الآخر بسبب تصرفهم دا بس في حاجه مريحه شديد أنا بلجأ ليها لمن اتخذل في زول و هي إني أنزل رتبتهم أو مقاماتهم في حياتي ، أنا ما بخاصم أنا بنزل الرتب ، يعني من رتبة ناس قراب و مفضلين لـ رتبة ناس عاديين شديد ، ماف داعي أزعّل نفسي و اقول ليه عملوا لي كدا و و و.... و أتعب قلبي ساي ، انا انسانه على قدر ما أقدر بتجاوز ، و بحاول أنهي زعلي من أي موقف في ساعتو أو يومو ، بحاول قدر الإمكان ما أوتر حياتي بسبب أشخاص أو مواقف ، أنا راضيه عن نفسي و عارفه نيتي كويس و عارفه اني ما قصرت مع البنات و عارفه إني ما كنت حامله ليهم إلا الود و الإحترام و بالجد مصلحتهم كانت بتهمني ، يشهد الله إني ما حصل غرت من وحده ،و ما حصل إتمنيت الشر أو زوال نعمه من وحده فيهم أو من غيرهم ، البسعدهم بسعدني أكتر و كذلك البزعلهم بس إذا هم شايفيني عكس كدا و مفسرين تصرفاتي على كيفهم و مصدقين تفسيراتهم دي فأنا ما بقدر أعمل ليهم شي و مواقفي معاهم ما محتاجه إثبات ولا محتاجه أذكرهم بيها .....
و أنا سرحانه و بعاين بشباك العربيه يونس خت يدو على يدي ، لمن إنتبهت قال لي بتفكري في شنو !!؟ قلت ليهو ولا شي ... ماشين وين نحنا و أهلك عارفين ولا لا ؟!
قال لي خلينا نصل اول بعدين نتفاهم ، عاينت ورا لقيت مصطفى نايم ، قلت دا متين نايم ، قال لي من قبيل و عشان كنتِ سرحانه ما إنتبهتي ، قلت ليهو كنت بفكر في بابا حازم و الميتم و البنات ، يعني خايفه من الجاي و.... قال لي فاهمك أنا ، بس كل شي حيكون تمام إتطمني....
حـسيت إنو كـدا خلاص إنـتهت فترتي فـي المـيتم و حـ انتقل لـ مرحـله جديده و عـالم تاني مختلف مع أشـخاص مـختلفين ، حتى لو حـ أزور الميتم من فتره للتانيه بس إحساس إني خلاص ما بقيت وحده من ناسو ولا بنتمي ليهو ما حـ يفارقني، و كونو الواحد يزور مكانو الإتربى فيهو من فتره للتانيه ما زي لمن يكون متواجد فيهو على طول ، صح مـا عارفه المـنتظرني شنو لـ قـدام بس فكرة إنو يونس معاي براها مطمنه .....

🎭 رواياتي 📚 الوسام 2️⃣ 🎭

01 August 2024 12:24

انفعلت و قالت لي انتِ حيوانه ولا شنو و كانت حـ تضربني بس مسكت يدها و قلت ليها ما جبت الكلام دا من عندي ، شفتكم أكتر من مررره في المخزن بتقلوا أدبكم ، قايلاني عشان ساااكته معناها غبيه و ما عارفه حاجه ؟؟ قبل ما تتكلمي عن الناس أمشي شوفي نفسك يا وسخه يا عفنه ... و انتوا ! صحي الكلب بريد خانقو ، ليلى دي شنو الما عملتو فيكم و في النهاااايه جيتوا وقفتوا معاها و مطلعني حاااسده و حاقده عشان بس هي قالت عني كدا !! لو البت دي مهدداكم أو ماسكه عليكم ذله قولوا لي عشان أعذركم يا الما عندكم خوه ، أنا ياتو يوم حسدت وحده فيكم ، ياتو يوم ما اتمنيت الخير لوحده فيكم ! ياااخ الكنت بعملوا أنا عشانكم انتوا ربعو ما عملتوهو لي ، لكن ياااا خساااره ما تستاهلوا والله ... و بعدين انتوا الحارقكم شنو أنا عايزا أفهم ؟ كنت شايله فكرة الزواج من بالي و بعدها غيرت رأيي و ختيتها في بالي المشكله وين ؟؟! المره الفاتت لما العريس داك أشر علي قومتوا الدنيا و ما قعدتوها و قلتو أنا عايزا اظلمكم و اشيل حقكم و اليوم لما جبت عريس من برا برضو مقومين الدنيا و من قبيل شغالين قطيعه فيني ! عليكم الله هسي منو فينا هو الحاااقد الحاسد ! ... نضفوا دواخلكم عشان تعرفوا تعيشوا مرتاحين ... قلت ليهم كدا و طلعت خليتهم و ديك كانت تاني مره أبكي فيها بشده و أحس إنو قلبي انقسم نصين ، أول مره لما حسام مشى خلاني و دي تاني مره ، حسيت قلبي دا انفطر من شدة الوجع ، بكيت كدا لمن صدعت بس بعدها مسحت دموعي و قلت ديل ما يستاهلوا أبكي عشانهم ....
طبعاً بعد ما يونس مشى بابا حازم ناداني في مكتبو ، اتوقعتو يشاكلني و يقول دا منو و بتعرفيهو من و و و لأنو نهاي ما بحب فكرة إنو بت أو ولد من ناس الميتم يتعاملو كتير مع ناس خارج الميتم ، بقول لينا كلهم استغلاليين و ما كويسين ، من زمان بقول لينا الحياة خارج الدار صعبه شديد ... المهم لما مشيت ليهو قال لي أنا موافق عليهو ، و الغريبه إنو ما سألني عن أي شي ، قلت ليهو يعني انت ما زعلان مني ؟؟ قال لي لا ، لو وحده غيرك كنت حـ اشاكلها و أرفض الزول الجابتو بس عشان أنا عندي ثقه في اختياراتك و عشان حسيت إنو ولد الناس دا ما فيهو كلام وافقت طوالي .... طبعاً كلامو طمني و جواي كان في كميه من السعاده و في نفس الوقت كميه كبيره شديد من الخوف و القلق ! يعني ما قادره أصدق إنو الموضوع دا اتسهل بالطريقه دي و إنو أنا و يونس حـ نكون لبعض و يجمعنا سقف واحد ، حاسه نفسي بحلم ! و خايفه من ردة فعل أهلو و خايفه من المشاكل الحـ تواجهنا لقدام !!
طبعاً تاني يوم كان آخر يوم لـ منار في الميتم ، البنات عملوا ليها حفله و قعدوا يغنوا و يرقصوا و الأكيد إني ما شاركت معاهم ، بس قبل ما منار تمشي مع العريس مشيت ليها و قلت ليها : ما اتخيلت نودع بعض بالطريقه دي بس دا الإخترتيهو انتِ ، عشان صُحبتنا ، عشان العشره ، عشان نحنا كبرنا سوا جايه أقول ليك مع السلامه و ربنا يهنيك و يسعدك ، كتبت ليك رقمي و ختيتو ليك في جيب شنطتك لو حبيتي يوم من الأيام أو سنه من السنوات اني تتصلي بي أو ترسلي ، قلت ليها كدا و مشيت خليتها ، طبعاً اليوم داك ما مشيت المطعم ، دخلت الفيس و رسلت لـ يونس و بقيت منتظره رد منو بس ما رد ، اتذكرت إني ما مصادقاهو و بالتالي رسائلي حـ تنزل في طلبات المراسله و بما إنو هو عندو متابعين كتااار ما ظنيتو يشوف رسائلي دي ...
رسلت لـ حلا على الماسنجر لأنو شفتها نشطه ، قالت لي مهاااوي كيفك أنا كويسه الحمدلله ، انتِ كيفك ؟؟ قلت ليها كووويسه ، قالت لي تعالي الواتس أحسن من هنا ، أصلاً أنا مرسله ليك هناك ... قلت معناها يونس كلمهم و هي عايزا تتكلم معاي في الموضوع ... شكلهم ما عندهم مانع و لو في زول عندو مانع ما حيكون حلا ، متأكدة انها حـ تقيف مع يونس ، المهم لما دخلت الواتس لقيتها مرسله لي برقم جديد ، رسلت لي ريكورد و قالت لي فيهو : اكيييد حتكوني شفتي الرقم الجديد دا و عرفتي إني برا السودان ، طبعاً أنا ذاااتي متفاجأه ، لحد الدقائق الآخيره ما كنت عارفه إنو حـ نسافر مع ياسر ، ياسر و يونس من بدررري ظبطوا الموضوع دا و اتفقوا إنو ما يكلموني نظاام مفاجأه و كدا و فعلاً كانت أحلى و أجمل مفاجأه ... قلت ليها حلووو والله سافرتوا وين و متين ، قالت لي سافرنا قبل 3أيام و قعدت تحكي لي و هي مبسوطه و أنا كل بالي في يونس إذا ناوي يكلمهم ولا ينسحب !... بس معقوله ينسحب !؟ لا لا مستحيل ، يونس البعرفو دا زول واثق من نفسو و عند كلامو و أصلاً لو كان عندو نيه ينسحب ما كان اتكلم مع بابا حازم في الموضوع !
المهم لما دخلت الفيس انتبهت إنو في رسائل على الماسنجر ، لما دخلت لقيتها من يونس ! يعني شايف رسائلي ، كاتب لي مهاوي كيفك أنا كويس الحمدلله ، أديني رقمك ، عايزا اتناقش معاك في الموضوع ، المكالمه أفضل من الماسنجر ، قلت ليهو طيب و رسلت ليهو رقمي و هو طوالي اتصل ، طبعاً لما فتحت الخط و سمعت صوتو يدي رجفت و قلبي عمل شححح كأنو دي أول مره

🎭 رواياتي 📚 الوسام 2️⃣ 🎭

01 August 2024 12:24

قال لي معايير الجمال بتختلف ، بس مهما تعددت و اتنوعت بالنسبه لي ماف أجمل من إحساس الراحه و القبول البتحسو تجاه شخص معين ، يعني الواحد ممكن ما يكون الأجمل لكن عندو كاريزما و حضور مميز مليان طمأنينه و راحه و طاقه حلوهـ و روح نقيه ، بالنسبه لي ما مهم إنو اختياري يلمع في عيون الناس الأهم عندي إنو يكون لامع في عيوني ...
قلت ليهو دا اعتراف مباشر إنو البت أجمل مني 🌚
ضحك و قال لي انتِ القلتي الكلام دا ما أنا ، من قبيل توصفي فيها و مُنبهره فيها ! قلت ليهو عشان قلبي كان حااااسي انك كمان منبهر فيها !
قال لي يعني هسي ما طلعتي بشي من كلامي دا كلو غير إنو البت أجمل منك !!؟
قلت ليهو كماااان بتقولها لي في وشي !! لا لا كان تخليني بعد أمشي من هنا ، أو تقول كدا بينك و بين نفسك !
ضحك و قال شكلي وقعت في الفخ ، من البدايه كان مفروض أفهم الهدف من سؤالك ... بس كويس دي معلومه مفيده ، من هنا عرفت إنو البت لمن تشكر ليك بت تااانيه و تقول ليك إنو البت جميله و تقعد تمدح فيها ، معناها عايزاك تنفي ليها كلامها و من البدايه تقول ليها انتِ اجمل منها !!
ضحكت و قلت ليهو لا لا والله دا ما كان القصد !! سؤالي بالجد كان جاااادي ... فجأه تلفونو رن ، قال لي هسي برجع ، مشى و جا قال لي بعد دا لازم أمشي ، قلت ليهو طيب أمشي ! قال لي حـ أوصلك ، قلت ليهو لا ماف داعي بـ..... قاطعني و قال لي بمشي براي " حفظت الجمله دي ! قلت ليهو أصلاً الميتم قريب من هنا ، قال لي حـ أوصلك و انتهينا بس خلصي عصيرك و السندوتش دا ، قلت ليهو لا ما عايزا ، قال لي قبيل نفسك كانت قافله بسبب الموضوع داك و بما إنو خلاص حكيتي لي و انتهينا مفروض نفسك تكون فاتحه لأي شي ! قلت ليهو طيب حـ اشرب العصير بس ، قال لي خجلانه مني ولا شنو !؟
قلت ليهو أخجل منك لشنو يعني !
قال لي الواحد أصلو ما يمزح معاك ! المهم خلصينا .....
بعد ما خلصت طلعنا و مشينا ، كنت مبسوطه و عايزا أطير من الفرح ، لما وصلنا قلت ليهو يونس بالجد ما عارفه أقول ليك شنو ، ما اتخيلت إنو ممكن يجي يوم زي دا ، قال لي لو من البدايه واجهتيني و حكيتي لي كان حلينا الموضوع دا من زماااان و عرسنا ، طبعاً لما قال لي كدااا قلبي عمل شححح ، قلت ليهو مع السلامه و طوالي نزلت ، جا نازل و لي دقيقه دقيقه ، إتلفت عليهو و قلت ليهو ايوه ، قال لي بما اننا حلينا الموضوع و شلنا الحاجز الكان بيناتنا ، للمره التانيه : بتقبلي انك تكوني شريكة حياتي و ست بيتي ؟؟
طبعاً حسيت نفسي بحلم ، و قلبي كان شغال زي الدلوكه ، قبل ما أقول ليهو حاجه فجأه سمعنا صوت عربيه ، لما إتلفتنا شفت بابا حازم نازل من عربيتو !!
عاين لينا بإستغراب ، جا علينا و لمن وصلنا قال لـ يونس انت منو ؟؟
يونس عاين لي بنظرات معناها دا منو ؟؟
قلت ليهو دا بابا حازم المسؤول عن الدار ، يونس قال لي ايوااا و مد يدو سلم عليهو و قال ليهو خلينا نقعد مع بعض عشان أقول ليك أنا منو و بعمل شنو هنا ... طبعاً أنا هنااا طوالي عاينت ليهو ! ما قايلاهو حـ يفكر يفتح الموضوع مع بابا حازم طوالي كدااا !!
يعني فجأه كدا حسيت الزمن جاري بسرعه و الأحداث متسارعه و يونس ما مديني فرصه استوعب بيها ، يعني قبل ما استوعب إنو هو اتقبلني و رغم إني بت مجهولة الأبوين طلب مني الزواج ... تااااني في نفس اليوم و في نفس الساعه عايز يفتح الموضوع مع بابا حازم!
المهم دخلنا جوه و يونس مشى مع بابا حازم لـ مكتبو و أنا دخلت جوه للبنات بس ما حكيت ليهم شي ، كنت متوتره و مقلقه و شايله هم ردة فعل بابا حازم....

"إذا أردت أن تُشعِر أحدهم بالأمان ، احتوي قلبه
‏فاحتواء القلب هو أول درجات الأمان .." 🥀🦋

يتبع....

🎭 رواياتي 📚 الوسام 2️⃣ 🎭

01 August 2024 12:24

أول ما سمعت صوت الباب طوااالي قامت جاريه عشان تفتحو ، إحساسها كان بقول ليها إنو دا هو و فعلاً أول ما فتحت الباب لقتو في وشها ، ما قدرت تخفي إبتسامتها ، ما قدرت تدس الفرحه الكانت في عيونها ، قالت ليهو بفرحه : يوونس ! أهلاً وسهلاً كيفك... اتفضل
دخل و قال ليها أنا كويسه الحمدلله ، انتوا كيف ، خالتي في البيت صح ؟؟
قلت ليهو ايوه موجوده اتفضل اتفضل ، قبل ما يدخل معاها جوه قال ليها ليان أنا قبل كدا قلت ليك شنو ؟؟ ما تجي طالعه قدامي بلبسك دا ، على الأقل ألبسي ليك طرحه ....قلت ليهو من استعجالي نسيت ألبس طرحه !... المهم اول ما دخل العريشه جاهو صوت أم ليان و هي بترحب بيهو و بتقول ليهو اتفضل اتفضل يا ولدي ، دخل سلم عليها و قعد في السرير المقاصدها و بقى يسألها عن حالها ، قالت ليهو والله نحنا كويسين الحمدلله ، مالك إنقطعت مننا الفتره دي ! قال ليها مشغول بس والله ، قالت ليهو لا كان كدي خلاص والله خفنا يكون حاصله عليك حاجه ، قلت لـ بتي ليان دي تتصل عليك و تشوفك قالت لي خليهو يا أمي بنكون زهجناهو و كرهناهو حياتو ، قال ليها لا لا والله ماااف أي كلام زي دا ، الغلط غلط كان مفروض اتصل و اطمنكم ... فجأه جات ليان و هي لابسه توب و شايله ليهو مويه ، قالت ليهو اختفيت كدا عرست ولا شنو ، قال ليها لسه بدري على الكلام دا ، أم ليان قالت ليهو لسه ما لقيت البت المناسبه ولا شنو ؟؟
قال ليها والله أنا أصلاً ما فكرت في الموضوع ، حاسي نفسي ما مستقر حالياً و الزواج دا ما حاجه ساهله ، قالت ليهو والله ماف أسهل من العرس و هسي كان سألتك انت الناقصك شنو عشان تقول ما جاهز ! والله ما شاء الله زول تماام و مكمل و الكمال لله ، خلقه و أخلاق و ما اظن وضع المادي يمنعك من الزواج ، انت لو أشرت ساي تلقى مليون بت واقفين ليك صف ، ضحك و قال ليها والله ما بالسهوله دي ، الإختيار صعب ، قالت ليهو انت مواصفات البت العايزها شنو ؟
قال ليها حـ اخت مواصفات لما أبدا أفكر بجديه في الزواج ، قالت ليهو ان شاء الله ربنا يرزقك بت الحلال الهديه الرضيه..

_______

•"عمو عريييس علا "
كلهم ضحكوا على الجمله القالتها لدن بت حلا ، أبوها ياسر قال ليهم : بت حسمت ليكم الموضوع ، عمها يعرس خالتها و السلام
كان في حلا و يونس و راجلها ياسر و بتها لدن

_ طبعاً يا ياسر دا ما كلام لدن ، دا كلام أمها ، حلا بتكون حفظتها الجمله دي تحفيظ

=والله العظيم يا يونس أنا ما قلت ليها كلام زي دا ، أنا عارفاك عايز البت ديك فـ شنو البخليني أقول كدا لـ لدن 😂

**يعني حتكون جابت الكلام دا من وين يا حلا

=غيتو أنا ما قلت ليها كدا يا ياسر .... تعالي هنا يا لدن و قولي لي جبتي الكلام دا من وين ؟؟

**أمك القالت ليك كدا مش ؟؟

•"لاااالااا"

_اها القال ليك كدا منو

•"دي علا القالت كدا "

_______

يوم بعد خلصت دوامي و وصلت أمدرمان و بعد ما وقفت جنب باب الميتم و كنت حـ اضربو حسيت بعربيه جات وقفت وراي ، لما إتلفت إتخلعت بالجد و ختيت يدي على قلبي ، نزل من العربيه و هو لابس نظارتو ، رفع راسو عاين فوق لـ اللافته المكتوب عليها :"دار إيمان لرعاية و كفالة الأطفال " و قال لي : بتعملي شنو هنا ؟؟
طبعاً من الخلعه ما قدرت أقول ليهو شي ! ضحك و قال لي مالك مخلوعه كدا ؟! يمكن جايه تشوفي الأطفال الهنا ، يمكن جايه تتبرعي ليهم ، يمكن و يمكن و يمكن فـ ليه اتوترتي كدا زي الحرامي لما يتمسك ؟!
بما إنو أنا رفضتو و فضلت احتفظ بأسبابي كان ممكن أكذب عليهو و اقول ليهو ايوه جايه أشوف الأطفال الهنا بما إنو الدار جنب منطقه سكنيه ، كان ممكن اقول ليهو أي كذبه و أمشيهو لأنو حقيقتي حاجه بتخصني أنا بس ما بعرف ليه ما قدرت أكذب ، ليه ما قدرت أخفي حقيقتي الأصلاً هي حاجه بتخصني أنا شخصياً و ما ليها علاقه بأي زول !... يمكن عشان صدري ضاق بسبب إنو هو و حلا لسه عشمانين فيني و هو لسه جاري وراي و كل مره بجي المطعم عشان يشوفني ، حبيت أقول ليهو حقيقتي عشان يعرف و يفهم إنو نحنا ما بنناسب بعض ، عشان يمشي و يشوف حياتو مع غيري ،
بلعت ريقي و قلت ليهو أصلاً أنا ساكنه هنا .... قلع نظارتو و قال لي كيف يعني ؟؟
ما رديت عليهو و كنت حـ أدخل بس وقفني و قال لي ما تديني إجابه مبتوره ، قلت ليهو إجابتي كامله ، أنا ساكنه هنا ، الما واضح شنو ؟؟
سكت مسافه و صدمتو فيني كانت ظاهره في وشو ، قال لي خلينا نشوف مكان هادي كدا نقعد فيهو و نتفاهم على رواق ، قلت ليهو في شنو تاني ينقال ! أنا قلت ليك حقيقتي عشان أريحك مني ! عشان ما تتعب و تعشم نفسك فيني !!
قال لي اسمعي ، خلينا نشوف لينا مكان رايق كدا ، ما قدرت أقول ليهو شي ، كان في شوية دموع على عيوني ، يمكن هو الإنسان الوحيد الما اتمنيتو يعرفني على حقيقتي ، اتمنيت إنو هو يبعد بس من دون ما يعرف أنا شنو و عايشه وين ، بس ما قدرت أكذب أكتر و أوهمو إني بت ناس و عندي أهل و بيت !...المهم ركبت معاهو و أنا ساكته و هو ذاتو كان ساكت و ملامح

🎭 رواياتي 📚 الوسام 2️⃣ 🎭

01 August 2024 12:29

لمن إتلفت لقيتها بت يمكن في عمرها قدري أو أكبر مني بشويه ، قلت ليها و عليكم السلام ، جات سلمت علي و قالت لي نحنا جيرانكم الجداد ، سكنا في البيت الجنبكم دا قبل أسبوعين ، قلت ليها بالجد !! نورتو والله ! قالت لي تسلمي و شكلك ما بتطلعي على الناس عشان كدا ما شفناك ، المهم انا إيلاف ، قلت ليها و أنا مها ، قالت لي اتشرفنا ، يلا بما انك عرفتي بيتنا و بقينا جيران تعالي مارقه علينا ، قلت ليها حاضر ان شاء الله ، بعدها مشت و دخلت بيتهم ، قلت ديل متين رحلوا هنا ! مصطفى قال لي أنا شفتهم لمن كانوا بنزلوا عفشهم قلت ليهو غريبه نهاي ما شفتهم و ما حسيت بحركتهم ، المهم بعدها دخلنا البيت ، جهزت الفطور و قلت لـ مصطفى يلا أبدا مراجعة دروسك طوالي ، و من بكرا أنا حـ انزل شغل و دوامي يبدأ من الساعه 8 و بخلص 3م ، قال لي يعني حـ أقعد براي في البيت !؟ قلت ليهو ما عارفه والله! حـ ألقى حل ! المهم في نفس اليوم دا لقيت نمارق مرسله لي ، رديت عليها و هي كانت داخله فـ بقينا ندردش مع بعض ، قالت لي عملتي شنو بخصوص راجلك الخاين و البت التافهه المعاهو ؟؟
قلت ليها لسه ما عملت شي ، قالت لي بتبالغي والله ! جايبه البرود دا من وين انتِ ممكن أعرف ! ؟
قلت ليها نمارق يمكن البت ما عارفه إنو متزوج ، ما عايزا أظلمها ساي و أقعد أنبذها أو احاول أعمل ليها شي ! قالت لي استحاله تكون ما عارفه !... طوالي اتذكرت الرسايل الرسلتهم ليان لـ يونس ! حسب كلامها هي زعلت من يونس لمن قال لأمها العروس جاهزه و في آخر رساله قالت ليهو عرفت انك قاصدني !!.... يعني هي بالجد ما عارفه إنو متزوج !!
قلت ليها لا لا يا نمارق أنا متأكدة انها ما عارفه ! قالت لي بنات الزمن دا حتى لو معرس و بـ أولادو ما بخلنوا في حالو ! قلت ليها صدقيني البت ما عارفه ! قالت لي معناها راجلك لاعب على حبلين ! لازم تصلي للبت دي و تخليها تعرف إنو هو راجلك ، لو انسحبت و خلتو في حالو خير أما لو لسه واصلت معاهو بعد ما عرفت إنو متزوج يبقى هنا لااازم تقيفي وقفه جد و تأدبيها ! قلت ليها ما أظن تستمر معاهو بعد ما تعرف إنو متزوج ! قالت لي اتمنى ذلك !.... المهم اتكلمنا شويه و بعدها طلعت من الواتس و قفلت الشبكه ، شلت ألواني و قعدت أرسم ، و أنا مندمجه مع الرسم يونس جاني داخل ، قلت ليهو اتعلم تضرب الباب قبل ما تدخل يا ود الخطاب !
قال لي دا شغل شنو البديتي فيهو دا !؟؟
قلت ليهو بحثت في النت لحد ما لقيت بيت دعاره فـ قلت بما اني قاعده ساي أحسن أمشي اشتغل و أملى فراغي !... جاني مندفع و قال لي جاوبي زي الناس ! قلت ليهو هسي جاوبت زي الحيوانات يعني !؟
أخد نفس و قال لي سؤالي واضح ، مفروض ردك يكون واضح ! قلت ليهو دا الجواب الأنسب لـ الطريقه السألتني بيها ! قال لي براك فهمتي غلط .... انتِ لقيتي شغل و اليوم مشيتي !؟
من دون ما أعاين ليهو قلت ليهو رجعت لشغلي في المطعم ، قال لي تمام ليه ما كلمتيني ؟؟
قلت ليهو أكلمك ليه !؟ ما شايفه سبب مقنع أو دافع قوي يخليني أكلمك ! قال لي زواجنا ما سبب كافي عشان يخليك تكلميني ؟ ما شايفه إنو من حقي أعرف ؟
قلت ليهو لا ما شايفه كدا !... قال لي انتِ محتاجه شنو !؟ لو قروش أنا مخلي ليك قروش هنا في البيت شيليها و إشتري العايزاهو ، قلت ليهو لا شكراً ، قروشك دي أصرفها على نفسك و مصطفى أنا خليني خارج حياتك و حساباتك و بعدين مستحيل أقعد عمري كلو أشحدك أو أطلب منك كل شي ! الأفضل إنو كل واحد يكون في حالو !... قال لي طيب و مصطفى لمن يرجع من المدرسه يقعد في الشارع ولا براهو في البيت !؟ و أنا معظم اليوم برا البيت !
قلت ليهو حـ أشوف حل للموضوع دا ، حـ اغير دوامي و أبدا اشتغل المساء ، قال لي نعم !؟
المساء حتكوني برا البيت!؟ قلت ليهو ايوه وين المشكله ! لحد العصر أو المغرب كدا انت حتكون جيت البيت و كدا مصطفى ما حيكون قعد براهو ! انا لحد 8_9 كدا حأكون في البيت!
عاين لي مسااافه بعدها جا قعد جنبي في السرير و قال لي بهدوء : حاولي تفهميني ! انتِ ما ناقصك شي عشان تمشي تشتغلي و لحد ساعه متأخره من الليل تكوني برا البيت ! قلت ليهو الساعه 9 بدري و ما زمن متأخر ! غير كدا أنا عايزا اشتغل عشان أملى فراغي و أنا أصلاً ما متعوده أقعد القعده دي لا شغله لا عمله ! أنا ما بعتمد إلا على نفسي !
قال لي انتِ بس قولي لي محتاجه شنو !؟ قلت ليهو محتاجه حريه ! محتاجه أطلع من هنا و أشغل نفسي و أنسى كل شي !
قال لي طيب تعالي اشتغلي عندي في المحل التجاري ، قلت ليهو لا شكراً ، أنا مرتااااحه في شغلي دا ، قال لي آخر كلام عندك !؟
قلت ليهو ايوه 😊
بعدها وقف على حيلو و طلع ، لمن مصطفى جا داخل قلت ليهو انت ما أي حاجه لازم تمشي و تقولها لـ يونس! قال لي قلت ليهو شنو !؟

🎭 رواياتي 📚 الوسام 2️⃣ 🎭

01 August 2024 12:29

طبعاً البوست حقو كان حلة فشاااار بس ، معظم التعليقات كانت تبع بنات ، واحده كاتبه ليهو :"والله العظيم أول أمس جيت بازار المواهب مخصوص عشان أقابلك و اتصور معاك بس للأسف انت ما جيت 😭💔"
و وحده تانيه كاتبه :"غيتو جنس حلااااوه و أنا هنا ما قصدي اللوحه "
طبعاً التعليقات كلها كانت إنبراشات و هو برد على ناس معينين ، طبعاً هو بقى صديقي في الفيس ، شويه كدا جاني إشعار رسايل في الواتس ، كانت من حلا ، قالت لي أخيراً ظهرتي ، قلت ليها حلوووش أخبارك و صحتك ، قالت لي تمام ، زهجت من جملة ليه ما بترسلي و تسألي عني ! قلت ليها معليش معليش حقك علي ، رسلت لي ريكورد و قالت لي في شي مضايقني شديد ، قلت ليها خير في شنو !؟ طبعاً ختيت في بالي انها متشاكله مع راجلها مع إنو ما ظاهر انهم من الأزواج البتشاكلو ! قالت لي ثواني و طوالي اتصلت علي في الواتس ، قلت ليها قلقتيني في شنو يا حلا !؟ قالت لي حـ تنصدمي زيي ! أنا لحد الآن زعلانه و الموضوع جد مضايقني شديد ، قلت ليها قولي ياخ ! قالت لي يونس عرس من دون ما يكلم زول !!!
طبعاً حسيت لساني إتربط ! قالت لي صدمه صح ! ؟ يونس دا لحد آخر لحظه كان عايزك انتِ متين لحق يشيلك من بالو و يعرس وحده تانيه !! أنا لحد الآن ما قادره أصدق إنو عمل كدا من دون ما يرجع لينا ! ايوه دي حياتو بس نحنا أهلو و مفروض يكلمنا عشان نعمل الواجب و نفرح بيهو ! لو ما أخوهو يامن رجع من السفر و مشى ليهو في البيت و لقى مرتو الجديده الله أعلم كنا حنعرف متين إنو عرس ! ما قادره أفهم شنو الجابرو على عرس زي دا ! والله ياسر دا لمن عرف من يامن قرب يطق من الزعل ، اتصل و شاكل يونس قدرتو و هسي حالف إنو ما يتكلم معاهو تاني !! ياخ دا شنو عرس الرخصه دا ! مستغربه أهل العروس ديل ما سألوهو و قالوا ليهو أهلك وين ! شكلها البت و أهلها طمعانين فيهو عشان كدا أدوهو طوااالي و ما همهم وجود أهلو أو عدمهم ، معناها عرس ليهو وحده طماعه و رخيصه ساي و..... قاطعتها و قلت ليها الرخيصه دي أنا !! أنا العرسها يونس يا حلا ...
طبعاً حصلت لحظااات صمت ! بعدها حلا قالت لي كيف يعني عرسك !! انتِ مستوعبه الكلام القلتيهو دا يا مها !! قلت ليها ايوه و دي الحقيقه يا حلا ! إنفعلت و قالت لي كيف بس و ليه ما كلمتيني ! ليييه بس تعرسوا بالدس ! كيف يعني قبلتي تتزوجيهو من دون علم أهلو ! ايوه عارفاهو ما شافع و راجل بقدر يعرس براهو بس ليه ما تكلمونا !! في شنو يعني منعكم تكلموا الناس !! ما قادره أستوعب انا !!
قلت ليها حلا الموضوع طويل و يونس ما قادر يقول ليكم الحقيقه ، قالت لي حقيقة شنو ، بتلعبوا انتوا ولا شنو ! طبعاً كانت منفعله و زعلانه شديد ...أخدت نفس و قرار ، لازم يعرفوا بعد دا عشان يتحدد مسار العلاقه دي ، غمضت عيوني و لمن فتحتهم قلت ليها حلا ما تقاطعيني ، رجاءً خليني أكمل كلامي للآخر ، قالت لي بقلق في شنو !!
قلت ليها لما يونس اتقدم لي و رفضتو قلت ليك و ليهو عندي أسبابي ، السبب الرئيسي الخلاني أرفضو و العائق الأكبر هو اني بت مجهولة الأبوين ، أنا اتربيت في الميتم يا حلا ، يونس ما كان عارف ، يوم شافني جنب الميتم و قررت أقول ليهو حقيقتي و هو كان عند كلمتو و وعدو و قال إنو دا كلو ما بهمو ، جهز كل شي و ساقني معاهو المحكمه و إتزوجنا هناك ، ما كنت راضيه إنو يعرس بدون رضى أهلو بس هو كمان قال لي خلي أهلي علي ، و إتوقعت إنو حـ يكلمكم طوالي بس ما حصل ، كم مره كنت بحاول أحكي ليك يا حلا و أوريك بحكاية العرس دي بس بتراجع و بقول إنو الأفضل يكلمكم يونس بنفسو....
سكتت ساي ما قالت حاجه و بعدها طوالي الخط فصل !
رجعت اتصلت بس ما بترد و هي فاتحه الشبكه ، كتبت ليها : أفهميني يا حلا ، والله قايلاهو حـ يكلمكم .... قرت رسالتي بس ما ردت عليها ، بديت اسجل ليها في ريكورد بس حظرتني !!
أبداً ما إتوقعت منها تصرف زي دا ، ايوه عارفاها حاجه بتزعل بس هي كان تسمعني للآخر ! لمن قررت أحكي لـ حلا حكيت ليها و أنا متيقنه انها في الآخر حـ تفهمني بس حصل العكس ! أبداً ما كنت متوقعه تصرف زي دا من حلا ، حلا أكتر وحده اتمنت إنو أنا و يونس نكون مع بعض ، كانت بتحنسني تحانيس عشان أقبل بـ يونس و لمن حصل العايزاهو زعلت و حظرتني لأني بت ميتم !! هي ما عندها مشكله معاي بس مشكلتها إني مجهولة أبوين !! طيب انا ذنبي شنو !!
باقي الساعات عديتها زهج و نفسنه حتى لما جا مصطفى من المدرسه على غير عادتي ما سألتو يومو كان كيف ، جهزت ليهو الأكل بس و خليتو ، المهم المساء لمن يونس جا أنا كنت في المطبخ ، المره دي قررت أفرغ غضبي و زعلي من خلال الطبخ الما بعرف ليهو ، سامعه يونس سأل مصطفى عني فـ قال ليهو مها في المطبخ ، فجأه جاني داخل زهجان و قال لي منو القال ليك تحكي لـ حلا ؟؟

🎭 رواياتي 📚 الوسام 2️⃣ 🎭

01 August 2024 12:29

#بطل_الحكايه14
مها حولي الزاكي

تاني يوم بليل يونس من جا و صلى العشاء طوااالي رقد و نام ، تلفونو كان جنبو ، سحبت التلفون براحه و مسكت أصبع يونس بحذر شديد و فتحت بيهو التلفون و طوالي دخلت الواتس و أول اسم شفتو ليان !! كانت مرسله ليهو أكتر من رساله ، طبعاً الرسائل البيناتهم كتيره ، قريتها بسرعه لحد آخر رسائل كاتبه فيهم :
" ما كنت عايزا اظهر ليك زعلي ، أنا غصب عني زعلت لمن انت و أمي جبتو سيرة العرس و انت قلت ليها عروسك جاهزه"

"لمن سألتني ليه بقيت اتعامل معاك كدا ما قدرت أقول ليك الفي قلبي ، افتكرت إني فضحت نفسي و مشاعري بقت واضحه بالنسبه ليك خاصة بعد الموقف داك ! بس انت ما شغلت مخك أو يمكن فاهم بس عامل رايح و دا الزعلني زياده !"

" مع إنك قلت لي حصل خير و انك ما زعلان بس انا حاساك لسه زعلان و ماخد موقف ، للمره التانيه عايزا اقول ليك إني ما كنت قاصده أعمل العملتو ، مشاعري هي الكانت متحكمه فيني ، هي الخلتني أقرب منك بالطريقه ديك !يونس انت ما عارف أنا بقيت مهووسه بيك لأي درجه "

" و المشكله إني حاسه اني بهمك و انك بتجي البيت عشاني عارفه كويس يا يونس إنو عندي مكانه جوه قلبك ، أنا لو ما كنت واثقه من الحاجه دي ما كان سمحت لنفسي اعترف ليك "

"عارفه إنو المزعلك مني التصرف البدر مني لمن جيت البيت و كمان عرفت انك لمن قلت لأمي عروسك جاهزه كنت قاصدني أو كنت عايز تغيظني و تختبر حبي ليك ، من دون إختبار ريدتي ليك ظاهره يا يونس ما محتاجه تختبرني فيها "

و أنا بقرا في الرسائل كنت بحس بضيق أكتر بعد كل رساله ، بقرا و بعاين لـ يونس ! خلصت و رجعت التلفون مكانو و أنا عيوني مليانه دموع بس ما خليتهم يطلعوا خارج جدران عيوني ! بقيت أعاين لـ يونس و هو نايم و أنا بقول في سري يعني دي البت اللفت راسك يا يونس ! دي البت الما خلتني أتهنى بيك ، الما خلتني أعرف يعني شنو زواج و يعني شنو تعيشي مع شخص بحبك تحت سقف واحد ! دي البت الشالت قلبك يا يونس و خلتك تندم على اليوم العرفتني فيهو ! دي البت الخلتك تكتشف إنو أكبر غلطه عملتها في حياتك هي يوم عرستني و دخلتني بيتك ! دي البت الجهجهت عقلك و قلبك يا يونس و خلتك تبعد عني ، بس ليه ألومها هي ؟ ليه ما ألومك انت الطلع قلبك خفيف ؟! ليه ما ألومك انت الطلعت كذاب و ما قدر كلمتك ؟! ليه ما ألومك انت الطلعت كيس نايلون شايلو الهوا !؟ ليه ما ألومك انت الما عارف نفسك عايز شنو !!
من اليوم دا و أنا خلاص بطني طمت منو و قنعت من فكرة إنو ممكن يجي يوم و أنا و يونس نفهم بعض و نعيش زي أي زوجين ، بقيت ما بتكلم معاهو خالص و اتجاهلت وجودو أكتر من الأول ، بقى حتى لو سألني قدام مصطفى ما برد عليهو و سفهتي ليهو بقت وااااضحه لدرجة إنو مصطفى سألني ليه ما برد على يونس لمن يتكلم معاي ! طبعاً يونس فهم إني ما عايزا معاهو أي كلام عشان كدا بعد أسبوع من سفهي ليهو بقى ما بسألني عن شي و السلام عليكم ما بقولها لي ، في الأسبوع دا ممكن أقول إني دخلت في حاله أقرب للإكتئاب ، يعني عشمي راح و الأمل إتلاشى ، ما بكذب إنو كان جواي شمعة أمل و حتة عشم مصبرني و مخلني أفكر إنو يونس مخليني هنا و ما عايز يطلقني لأنو لسه باقي علي ! بس كلو طلع وهم ، يونس شفقان علي ما أكتر ، يونس قلبو محجوز و تاني ما حـ يشوف أو يحب وحده غير البت الإسمها ليان دي !
طبعاً ما عارفه ردة فعلو كانت شنو لما لقى رسائل الإسمها ليان مقروءه في الواتس ، ما حـ يخطر على بالو إنو أنا الفتحت تلفونو و قريت رسائل الإسمها ليان....
المهم أسبوع ما دخلت الميديا ، معظم وقتي قدام الشاشه بس ما مركزه مع شي !
يوم شلت تلفوني و دخلت الفيس لقيت رساله في الماسنجر ، كانت من نمارق حسين و دي وحده من البنات الإتعرفت عليهم في الفيس و ضفتها في الواتس ، بت ظريفه و وناسه ، لقيتها بتسأل عني و كاتبه لي يا بت مختفيه وين و ان شاء الله تكوني كويسه ، رسلت ليك في الواتس بس ماف رد ، قلقتيني عليك ، رديت على رسايلها و قلت ليها أنا كويسه يا نمارق انتِ كيفك ، بس حبيت أبعد شويه عن الميديا ، بعد دقائق كدا هي دخلت و قرت رسايلي و قالت لي الحمدلله انك كويسه والله خفت يكون حاصل عليك شي لمن لقيت غيابك طال ، حتى البنات في القروب سألو عنك ، قلت ليها لا لا كويسه أنا ، قالت لي خير مالك غايبه أسبوع ؟!
قلت ليها ساي بس حبيت أبعد عن الميديا زي ما قلت ليك ، قالت لي عادة البنات بعملوا الحركه دي لمن يكونو مجروحات ! لمن يطلعوا من علاقة حب فاشله !
قلت ليها لا لا ما كدا ، قالت لي بيني و بينك دي مش الحقيقه ! و ما تحاولي تكذبي لأني خبره في المواضيع دي 🌚
بعد مسافه قلت ليها يعني نص نص ، قالت لي أصلهم الرجال ديل كلهم عواليق ما تشتغلي بيهم ، قلت ليها بس هو في البدايه ما كان كدا !!

🎭 رواياتي 📚 الوسام 2️⃣ 🎭

01 August 2024 12:29

عاينت ليهو بملل و واصلت رسمي ، ختاهم على الطربيزه و قعد و شال الريموت ! طبعاً كنت مستغربه فيهو ! اليوم على غير العاده مبتسم و الظاهر إنو مروق على الآخر ! قلت يكون بسبب الإسمها ليان دي !! طبعاً كنت عايزا اسألو من أخوهو و أقول ليهو مشى وين بس إتراجعت ، بعد خلصت رسم بديت أجمع في أدواتي ، يونس قال لي ممكن أشوف الرسمتيهو ؟! قلت ليهو لا و لو اليوم عندك حمى أو مصدع أبلع ليك بندول لأنو لطافتك الفجأه دي ما عاجباني و موتراني !
وقف على حيلو و قال لي كيف يعني موتراك و هسي أنا مالي ؟! قلت ليهو أكيد ما جاي تتظارف معاي ساي ! نفس حركاتك الهسي دي عملتها لي في بداية معرفتي بيك و هدفك كان ترد إعتبراك لمن رفضتك ! اها هسي هدفك شنو ! أكيد ما عملت كبايتين شاي ساي كدا !... قال لي حأكون عايزا اعمل شنو مثلاً ! لو اتعاملت معاك ببرود مشكله و لو بالعكس مشكله تانيه ! قولي لي بس عايزاني أتعامل معاك كيف ؟؟!!
قلت ليهو عايزاك تتعامل معاي من دون نفاق ! عايزاك تقول لي الحقيقه و ما تخليني معلقه كدا و ما عارفه أنا موقعي شنو من الإعراب ! موجوده هنا بصفتي شنو ! عايزاك تواجهني بالحقيقه حتى لو كانت مُره لأنو ماف أمرر من إنو الواحد يعيش في علاقه باهته و ما مفهومه مع إنسان ما مقيمو !
سكت ما قال لي حاجه !
ختيت الورقه و الأقلام الكنت شايلاهم و قربت منو و قلت ليهو يونس عليك الله قولي لي انت عايز مني شنو ، ريح قلبي و قول لي عرستني ليه ، ما تخليني كدا زي الأطرش في الزفه ، أنا من البدايه رفضت العلاقه دي عشان متأكده ماف إنسان طبيعي بخلي كل البنات الحوليهو و يمشي يعرس من ميتم و عن طريق المحكمه كمان ! بس ما أنكر إنو تصرفاتك و كلامك المعسول خلوني أتراجع و اصدق انك بالجد قبلان بي بكل عيوبي و ما عندك إعتراض ! بس حالياً الفكره دي بدت تتلاشى و أنا كل يوم بدرك حقيقة انو نحنا ما لينا مستقبل مع بعض و انك بديت تفهم و تعرف عواقب انك تعرس وحده مجهولة الأبوين ! وحده انت لحد الآن أخوانك ما قادر تظهرها ليهم ! و المحيرني زياده و الما قادره أفهمو انك ليه لحد الآن مخليني في حياتك ! قصدي في بيتك ! يعني شفقان علينا أنا و مصطفى ولا خايف تطلع واحد ما عندو كلمه قدامي و تسقط من نظري !! اتطمن انت أصلاً سقطت من نظري من أول أيام لي في البيت دا ، و صدقني أنا من ما عرفت الحياة دي ماسكه نفسي و ممشيه أموري براي ، ماف زول وقف معاي و عمري ما انتظرت حاجه من زول ، براي بقدر على نفسي ، و إذا برضو شايل هم بسبب مصطفى و حاسس إنو مسؤوليه إنفرضت عليك فأنا بعفيك من الحاجه دي برضو !
اتخيلو واقفه قريب الربع ساعه بصرف في العربي و هو ما كلف نفسو يرد على كلامي دا بإنو ينفيهو أو يثبتو ! في كل مـرهـ سكاتو بوجع قلبي ! نفسي بس يتكلم و يوريني انا شنو بالنسبه ليهو ! نفسي يفتح خشمو و ينهي الصراع الجواي دا ! نفسي يتكلم و يبرد قلبي ، سكاتو قاتل ! قاتل حرفياً 💔
لمن ما لقيت منو رد ، جمعت الحاجات و دخلت جوهـ و قفلت الباب و أنا حاسه قلبي إتنفخ من شدة الزعل ، و حاسه بغصه في حلقي ، طلعت صليت العشاء و جيت رقدت جنب مصطفى بس النوم جافاني ! قلبي دا من شدة زعلي من يونس حسيتو وارم عديل أو عليهو جروح !
ما جاني نوم فـ بقيت اتقلب كدا لحد نص الليل ، لمن زهجت و قنعت من عدم النوم ، فتحت الباب و طلعت من الغرفه ، لمحت يونس نايم على الكنبه و الشاشه شغاله ، شكلو كان بحضر و نام من دون ما يحس ، مشيت وقفت جنبو و عاينت ليهو مسافه و قلت في نفسي منو البصدق إنو واحد زيو كذاب و منافق ! هو نايم مرتاح ولا على بالو و أنا بحنس في النوم تحانيس !
خليتو و مشيت دخلت جوه و حاولت أنوم ، تاني يوم بعد ما هو طلع و مصطفى مشى المدرسه ، فريال اتصلت علي و قالت لي نتلاقى في () عشان نمشي سوا ، قلت ليها تمام ، جهزت نفسي و طوالي طلعت و إتلاقينا و مشينا أول شي لـ حذيفه ، فتح لينا الباب أبوهو ، طلع بعرف فريال عشان كدا سلم عليها سلام معرفه ، فضلنا جوه و أم حذيفه و أختو ضيفونا ، بعدها حذيفه جانا داخل سلم علينا ببشاشه و قال لـ فريال الليله الزوله دي لميتي فيها وين ! قالت ليهو ما قدرت أصل ليها إلا بواسطه 😂😂
حذيفه قال لي هااا كيف العرس معاك ، طبعاً زعلانين عشان ما عزمتينا !! قلت ليهو والله كل حاجه حصلت بسرعه ! فريال قالت لي كل البنات بقولوا كدا ! معقوله العرس حصل بسرعة انك ما تقدري تمسك التلفون دقيقتين عشان تتصلي و تعزمينا !! طبعاً سكت سااااي ، حذيفه قال ليهو ما حنك يا زوله ، والله ما زعلانين ، المهم قعدنا معاهم زي ساعه كدا بعدها استأذنا عشان نمشي ، حذيفه قال لي إلا نقعد بس قلنا ليهو ماشين لـ جسار ، المهم ودعناهم و طلعنا مشينا الرياض ، أول ما وصلنا بيت ناس جسار جات عربيه و وقفت ورانا ، لما إتلفتنا و شفنا الزول النازل منها لقيناهو مجتبى مدير المطعم !! فريال قالت لي مجتبى ذاااتو جا !! جا سلم علينا و بارك لي الزواج بس كان رسمي شديد معاي ، المهم دقينا الباب و فتحت لينا أخت جسار ،

🎭 رواياتي 📚 الوسام 2️⃣ 🎭

01 August 2024 12:29

قلت ليهو لا ، قال لي انتِ منو ما عرفتك !؟
قلت ليهو أنا... أنا مرتو ، طبعاً حسيتو زي الزول الإنضرب كف على وشو !
قال لي بإستنكار مرتووو !!؟؟؟ كيف يعني مرتو ؟؟
ردة فعلو أدتني إحساس انو صحبو أو قريبو ، قلت ليهو انت منو !؟
قال لي أنا أخوهو !
قلت ليهو بس بس هو أخوهو ياسر ! قال لي ايوه و أنا كمان أخوهو ☺️
طبعاً ما عرفت أعمل شنو لحظتها ! اتذكرت إنو فعلاً قبل كدا حلا قالت لي يونس عندو أخوان اتنين ، هو ذاتو قال عندو أخوان بس أنا ما بعرف غير ياسر!!

بعد لحظات زحيت ليهو من جنب الباب و قلت ليهو اتفضل ، جرا شنطتو و دخل جوه و هو متفاجئ !! لمن جبت ليهو مويه قال لي بنبرة زعل انتوا متين عرستو و ليه انا ما عندي علم !؟
صراحة ما عرفت أقول ليهو شنو .... طلع تلفونو و قال لي هسي حـ اتصل على يونس عشان أفهم دي شنو الفوضى الحاصله دي !
اتصل عليهو و أول ما فتح الخط قال ليهو عاين أنا في بيتك ، تعالني هسسسي و طوالي قفل الخط في وشو ، أنا طوالي دخلت جوه و قلت خلي يونس يجي و يتصرف مع أخوهو و يشرح ليهو بطريقتو.....

بعد حكاية نص ساعه كدا يونس جا و أنا نهاي ما طلعت من الغرفه ، بقيت سامعه صوت نقاشو مع أخوهو ، قال ليهو كل شي حصل بسرعه ، أخوهو قال ليهو بسرعة انك ما تقدر تتصل علي أو ترسل لي ان شاء الله رساله واحده! المشكله إنو كلكم ما جبتوا لي سيرة الموضوع دا ، لا انت لا ياسر لا غيركم ! ايوه انا عارف إني ما بهمكم و ما شغالين بي بس معقوله لدرجة انكم تنسوا تكلموني !
يونس قال ليهو ما تشخصن الموضوع يا يامن ! كلهم ما عارفين ، حتى ياسر ما عارف !
طبعاً أخوهو أخد ليهو صنّه كدا بعدها هاج و قال ليهو كيف يعني تعرس بالدس من دون ما تكلم زول ! أصنام نحنا ولا ما مالين عينك ولا شايف إنو ما ضروري تكلمنا و و ....الخ جاط شديد و يونس كان بحاول يبرر ليهو بس نهاي ما قال ليهو الحقيقه ! موقفو كان ضعيف قدام أخوهو لأنو ما قال الحقيقه فـ بالنسبه لأخوهو مبررات يونس كلها كانت واااهيه ساي و ما فيها منطق !
طبعاً حتى بعد ما راقوا و أصواتهم إتلاشت ما قدرت أطلع من الغرفه ، بعد مسافه كدا يونس جاني داخل ، قال لي يعني حـ تحبسي نفسك هنا لـ متين !؟
قلت ليهو دا أخوك فأكيد انت الحـ تقيف قصادو و تشرح ليهو ما أنا ، قال لي عموماً تقدري تطلعي بعد دا لأنو ما موجود ، ربعت يديني و قلت ليهو لو كنت عـارفه انك حـ تسكت و ما حـ تقول ليهو الحقيقه صدقني كنت حأقول ليهو قبل ما انت تجي ، كل مرهـ بتثبت لي قدر شنو انت ندمان على الزواج دا ! انت لمن بتخجل بسببي و ما قادر تواجه بي الناس ليه عرستني ؟؟ ليه كنت جاري وراي و حتى لمن عرفت حقيقتي قلتي لي ما عندي مانع و أهلي خليهم علي !!
طيب تمام أنا اتفهمت نقطة انك غلطت و هسي عرفت غلطك بس كيف انت تعترف بالحاجه دي ! كلنا بنغلط و كلنا من بعيد بننبهر بحاجات كتيره و بنعجب بيها و أول ما نتحصل عليها بتبقى لينا عااااديه و ممله لأنو الإنبهار و الإعجاب بزولوا بسرعه !
أنا ما بقدر أعيش مع إنسان كل كلامو و تصرفاتو بتوحي لي إني أكبر غلطه في حياتو ! كلمتك قبل كدا إنو لسه ما فات الآوان ، هسي بتقدر ترجع كل شي زي ما كان و ترجع زي ما كنت ، للآن بتقدر تعفي نفسك من الإلتزام دا ! انت ماف شي جابرك فـ مستغربه ليه مربع يدينك و قاعد تتفرج و انت ما عاجبك الوضع !
أخد نفس عميق و طلع طوالي !
أنا رغـم إني قلت حـ اتجاوزو و أريح نفسي و ما أشغل نفسي بيهو بس بحصل العكس و في كـل مرهـ بلقاني بسأل نفسي ليه يونس بعمل كدا ! ليه هو لا قادر يثبت لي إنو عايزني و ما ندمان لا قادر ينفي إحساسي بإنو ما راغب فيني و إنو أنا حالياً أكبر مشكله و غلط في حياتو !... عموماً بكرا حـ انزل شغلي ، حـ أواصل البديتو و أشيل يونس من بالي

______

_ انت عارفني ما بثق في زول غيرك يا صديق و عشان انت صحبي أنا حكيت ليك بالفي بالي

= معقوله يا خطاب !! لا لا كيف يعني سعيد يملكك معلومات غلط ! حـ يستفيد شنو يعني !

_ عايز يلف راسي زي ما عملوا الجماعه !

= لا لا ياخ لأنو سعيد ما مجبور يملكك أي معلومه صغيره أو كبيره ، دا شغلو و تفاصيل المهمه دي ماسكنها هم و بتخصهم هم كـ جهاز أمن و مخابرات ، سعيد عادي ممكن يعتذر منك و يقول ليك ما بقدر أديك أي معلومه

_ و دا أكبر دليل على إنو كذاب و كان قاصد يضللني و إلا من البدايه كان ممكن يعتذر و يقول لي ما بقدر أديك أي معلومه زي ما قلت يا صديق ، لكن بما إنو فتح خشمو و ملكني بيانات كلها غلط معناها قااااصد و هو تبع الجماعه ديل !

= والله ما قادر أستوعب يا يونس ! كيف يعني سعيد تبع الجماعه ديل ! لو زول غيرو معليش ، لكن دا سعيد زولنا و مننا و فينا !!

_ أصلاً الغدر و الخيانه بجوك من القريب قبل البعيد ، دي كلها خُطه مدروسه و سعيد من البدايه فاهم الرصه و الحكايه و عارف إنو البت دي بريئه بس الجماعه ورطوها و جابوها كـ طعم أو شرك لي و هي ما عارفه !

🎭 رواياتي 📚 الوسام 2️⃣ 🎭

01 August 2024 12:29

قال لي اليوم ما حـ يجي ، قلت ليهو لا ياخ! جايه مخصوص عشان أشوفو ! قال لي تاني إلا الثلاثاء الجايه !.... مصطفى قال لي أنا ماشي لـ ناس هيثم و طوالي دخل و قام جاري ، أما أنا في مشيت للمبنى حقنا ، ماشه و بتلفت في الميتم و حاسه بيهو متغير ، ولا يمكن عشان أكتر من شهر ما شفتو ! حسيت حتى الشجر بقى باهت و في صنه غريبه حاصله !!... وصلت المبنى و اتوقعت إنو أول ما أدخل حـ ألقى البنات قاعدين في الصاله بتونسوا أو بسرحوا لبعض أو بحضرو المهم كلهم ملمومين ! بس اتفاجأت لمن دخلت و ما لقيت زول غير البنات الصغار ! أعمار الطاشرات !! كانوا فاتحين التلفزيون و بحضرو و هم ساكتين ! دخلت و سلمت عليهم و أنا مستغربه !! قلت ليهم وين الباقين !! فجأه جاني صوت مس نادين و هي بتقول لي الجابك شنو تاني!! لما إتلفت عليها شفت نظرات استغراب و استنكار !! قلت ليها كان مفروض أجي من بدري ، هنا عشت و كبرت ، و دا بيتي الأول ، طبعاً لسه كانت بتعاين لي بنظرات إستغراب و في خلعه على ملامح وشها! قلت ليها المهم البنات وين !؟ قالت لي كلهم عرسوا إلا ليلى و سماح !! قلت ليها معقوله !! يعني خلاص مشوا من هنا !! قالت لي أيوه ، قلت ليها طيب سماح و ليلى وين ؟!
قالت لي ما عارفه ياخ شوفيهم في غرفة النوم ، إتحركت من جنبها و مشيت غرفة النوم ، الغرفه الدافيه الجمعتنا لـ سنوات ، دخلت و لمحت سماح راقده و متلفته على الحيطه ، شكلها نايمه و طبعاً الغرفه كانت خلااااء ، بقيت أعاين فيها و استرجع ذكرياتي ، داك سريري و داك سرير منار و البعدو سرير رماح و باقي البنات ! هنا ياما اتشاكلنا و ياما اتناقشنا ، داهمتني الذكريات و حاوطتني من كل إتجاه ، بقيت كل ما أتلفت بشوف وحده من البنات ، كل ما أمشي لقدام بتذكر موقف حصل هنا ، و هسي للأسف كلهم مشوا من هنا ، كلنا اتشتتنا و إتفرقنا في الدنيا الواسعه دي ، ما معروف إذا حـ نتلاقى ولا لا ، ما معروف هل تاني حـ نشوف بعض في حياة دي حتى لو صدفه ولا لا ، بس وين ما كانوا أنا بتمنى إنو ربنا يسعدهم و يوفقهم ....
و أنا بسترجع في ذكرياتي فجأه سماح صحت و إتلفتت علي ، لمن شافتني اتفاجأت ! بسرعه نزلت من السرير و جات علي مندفعه و هي بتقول لي مهااااوي جيتي ، جات ضمتني عليها شديد و هي بتمسح في دموعها ، قالت لي يا حليلك والله فقدناك و هسي أنا فاقداكم كلكم والله ... قلت ليها و انا كمان ، والله اشتقت ليكم و لأيامي هنا ، قالت لي تعالي ، قعدنا مع بعض في السرير و قالت لي أخبارك شنو ، قلت ليها كويسه الحمدلله ، من فتره مفكره أجي و أشوفكم و اليوم جيت و اكتشفت إنو كل البنات مشوا 💔
قالت لي مشوا و خلوا الميتم مسيخ و باهت ، بقينا في انا و ليلى بس و بكرا وحده فينا حـ تمشي و بعدها التانيه ، رجعت ضميتها و قلت ليها يا حليلكم والله ، ياريت لو ما اتفرقنا ، قالت لي يا مها أنا بالجد زعلانه من نفسي بسبب العملناهو فيك ، ياريت لو ما سمعنا كلام ليلى ، بعدك الميتم بقى لينا شين و مسيخ ، بقينا ما بنتلم زي زمان ، انتِ كنتِ عامله لينا جو و حركه و فعاليات و ضحك و هظار ، بعدك بقى في صمت و ملل حاصل ، قلت ليها حصل خير يا سماح و أنا ما زعلانه ، رماح مش كانت عايزا تشتغل ؟ يعني غيرت رأيها و عرست ؟ قالت لي بابا حازم لقى ليها شغل بس ما اتوفقت فيهو و قالت ما بتقدر عليهو فـ شافت العرس أفضل ليها ، قلت ليها ايوااا ، ليلى وين ما شايفاها ؟؟
قالت لي بتكون طلعت ، في نفسي قلت لسه مباريه زولها القديم اب سكاكات الزي النعامه داك !!
المهم قعدت إتونست مع سماح شويه ، بعدها قلت ليها بعد دا حـ أمشي بس أكيد حـ أجي مره تانيه ، قالت لي ما معروف يمكن دا يكون آخر لقاء ، ممكن المرهـ الجايه تجي و ما تلقينا لا أنا لا ليلى ، وقفنا على حيلنا ضمينا بعض مساااافه بعدها طلعت و هي معاي ، قلت ليها مصطفى ذاتو جا معاي و مشى يشوف الأولاد ، قالت لي بالجد ! خلاص أرح عايزا اسلم عليهو ، فعلاً مشينا حوش الأولاد لقيناهو قاعد مع أصحابو ، مشيت سلمت عليهم و سماح سلمت على مصطفى و قالت ليهو مشتااااقين يا اب راس !... قلت ليهم ناس هيثم وين ما شايفاهم !؟ واحد من الأولاد الصغار قال لي ناس هيثم في الشغل ، بقوا ما قاعدين يجوا هنا طوالي ، قلت ليهو خلاص لمن يرجعوا سلم لي عليهم ، قال لي طيب ، بعدها ودعناهم و مشينا .....
لمن وصلنا البيت لقينا يونس موجود ، دي أول مره يجي فيها بدري بس نهاااي ما سألتو الجابك بدري شنو ، قال لينا مشيتوا وين !؟... أنا ما رديت عليهو لكن مصطفى قال ليهو مشينا الميتم ....
المهم في نفس اليوم دا بليل و أنا بتصفح في الفيس لاحظت إني ما داخله قروبات كتيره ولا مصادقه ناس ، حسابي فاااااضي زي الصحراء ، مصادقه اتنين بس يلي هم يونس و حلا ، طوالي نشرت في قروب و قلت للبنات رايكم شنو نعمل قروب واتس و نبقى صحبات و ندعم و نقيف مع بعض ، الموافقه ترسل لي في رقم الواتس دا ....

🎭 رواياتي 📚 الوسام 2️⃣ 🎭

01 August 2024 12:29

#بطل_الحكايه13
مها حولي الزاكي

_ما جاسوسه

= خلاص اتأكدت ؟

_ايوه ، بس ما قادر اتأكدت من معلومة هل هي بتعرف الجماعه ديل و لا لا

=رسلها للتحقيق ... ما قلت لي ، ما عرفت الرسل ليك الرساله منو !؟

_للأسف ما قدرت أعرف

=شي يحير ، هم أو هو منو و ليه و على أي أساس رسل و قال ليك أحمي البت دي لأنها بريئه و ما ليها أي علاقه بالكلام دا و هي ما عارفه أي شي عن البحصل حوليها !

_ما عرفتو بس كلامو صحيح و هي ما ليها علاقه و هي حالياً مستهدفه بما إنو انهم استخدموها لمخططهم الهي ما عارفاها! ما عارف ليه صاحب الرساله دي خايف عليها و ما عايز شي يصيبها ، منو هو و علاقتو بيها شنو ، و أصلاً عرف دا كلو من وين !... أكيد هو واحد من الجماعه ديل!

=هو فعلاً واحد منهم و إلا ما كان عرف المعلومات دي ، بس علاقتو بيها شنو !؟....صراحة في زول خطر على بالي

_انا كمان خطر على بالي نفس الشخص دا بس لييييه هي تحديداً ! العلاقه أو صلة القرابه بيناتهم شنو! الشي المؤكد حالياً إنو في واحد من الجماعه ديل البت دي بتهمو و ما عايزها تتأذى

=برضو نعمل حسابنا ، يمكن دا فخ كمان !

_كل شي وارد

=اها حـ تطلقها ولا حـ تعمل شنو ؟

_ما عارف يا صديق ! الفتره دي بالءات راسي جايط و أموري كلها متوتره و جايطه !

______

المساء لمن يونس جا راجع أنا كنت بعمل في شاي لبن ، كبيت في كبايتين فقط و جيت طالعه بيهم ، قلت ليهو ود الخطاب كيفك ، قال لي تمام الحمدلله كيف أمسيتو !؟ قلت ليهو زي ما شايف ، مديت كباية الشاي لبن لـ مصطفى و قلت ليهو خلصها سرررعه و أمشي نوم عشان تصحى بدري للمدرسه ، قال لي عايز أحضر ، قلت ليهو طيب بس ماف سهر ، قعدت و بقيت أشرب في الشاي و اتكلم مع مصطفى و يونس كأنو ما موجود ، مصطفى قال ليهو انت ما عايز شاي !؟
قبل ما يرد قلت ليهو لا لا أكيد شربو ، طوالي يونس عاين لي بس ما قال حاجه ، بعد خلصنا رفعت الكبابي و قلت لـ مصطفى يلاااا على النوم بس لو عندك واجب منزلي لازم تخلصو أول ، قال لي لا ما عندي ، قلت ليهو متأكد ؟؟ قال لي والله ما عندي ! قلت ليهو طيب أمشي نوم ، قال لي اففف بتنومي الواحد غصب عنو ! هنا يونس ضحك و قال ليهو سياستها معاك دكتاتوريه ، مصطفى قال ليهو دي الدكتور أحسن منها ، هنا يونس ضحك شديد و أنا كنت حـ أضحك بسبب كلام مصطفى و عدم فهمو بس منعت نفسي ، قلت ليهو شايفاك بقيت قليل أدب شديد معاي ! اتعلمت دا من المـدرسه ولا في زول علمك ليهو !؟... قلت كدا و عاينت لـ يونس ، مصطفى قال لي خلاااااص ماشي أنوم و فعلاً مشى طوالي ، بعدها قعدت و شلت الريموت و بديت أقلب في القنوات لحد ما جبت القنوات السودانيه ، كنت بمر عليهم وحده وحده بس ما بقيف فيهم كتير ، فجأه يونس قال لي دقيقه دقيقه أرجعي لقناة السودان ، لمن رجعت ليها كان في أخبار باديه ، ملخصها إنو في إنتخابات حـ تحصل بعد 6 شهور و إنو كل حزب سياسي مجهز ليهو مرشح للإنتخابات و متأمل إنو يفوز فيها ....
بعدها طوالي غيرت القناة ، جبت قناة كدا كان فيها فلم ، يونس قال لي بالله غيري القناة دي ! الراجل دا انا ما بطيق أفلامو !.... أنا أصلاً كنت عايزا اغير القناة بس أول ما قال كدا خليتها و عليت الصوت كمان ، قلت ليهو أنا بحب أفلام الراجل دا و حـ أحضر الفلم دا ، ما اتكلم معاي ، عملت نفسي مستمتعه و مركزه مع الفلم ، فجأه كدا جابو لقطه ما تمام ، كعبه شديد ، ختيت يديني على خشمي و حسيت زي الصبت فيني مطره أو اتخشبت في مكاني ! لا قدرت اقوم و أمشي لا قدرت أمسك الريموت و أغير القناة ! و لسه اللقطه الما تمام شغاله ! اتمنيت لو إني غيرت القناة من قبيل ، يونس طوالي خطف الريموت من جنبي و غيرها ، قال لي ما اتوقعتك تحبي نوعية أفلام منحطه و تافهه و إباحيه زي دي !!
قلت ليهو والله انا ما بحضر حاجات زي دي !! قال لي واضح ، قلت ليهو والله..... سكت لحظه و قلت ليهو أساساً أنا ليه ببرر ليك !؟ ما عندك شغله بي !
قال لي دا كلام زعل ! قلت ليهو برضو ما يخصك ! قال لي المهم كـ نصيحه ليك ما تحضري الأفلام الزي دي !.... قلت ليهو يااااخي أنا ما قاعده أحضرها ! قال لي براك قلتي بتحبي أفلام الممثل العواليق القبل شويه دا !!
قلت ليهو ياخ بس قلت كدا تحدياً ليك عشان قلت لي غيري القناة بس عمري ما حضرت حاجات زي دي ، قال لي بحاول أصدقك ، قال ليهو عنك ان شاء الله ما تصدق !
خطفت منو الريموت و جبت CN بالعربيه ، قال لي ايييوه كدا أفضل ، خليك مع قنوات الأطفال دي ، طوالي غيرت و جبت Mbc Bollywood قال لي الهنود ديل ما بنفعوا معاي ! غيري و إلا حـ أشيل منك الريموت ! قلت ليهو انت أي شي ما بعجبك ! نفسي أعرف بتحضر شنو يعني !؟ ...

🎭 رواياتي 📚 الوسام 2️⃣ 🎭

01 August 2024 12:29

قال لي الكلام دا انا قلتو ليك مية مره ! يعني ما معقوله كل مره لازم أثبت ليك إني ما ندمان على زواجي منك و إنو حبي ليك زي ما هو ما اتغير و بالنسبه لـ إشهار زواجنا فـ قلت ليك أكتر من مرهـ إنو حالياً أخوي و زوجتو برا السودان و لمن يرجعوا حـ أكلمهم و أساساً دي حياتي و أنا حر فيها يعني هم لو عرفوا أو لا ما بهمني ! قلت ليهو بس دا زواج ما شي تاني عشان تدسو من الناس و تقول أنا حر ! و هم من حقهم يعرفو و أنا كان بإمكاني اكلم حلا في كل مره ترسل لي فيها بس كنت بتراجع و بقول ديل أهلك فالأفضل تكلمهم انت ، بس شكلك ما ناوي تكلم زول ، مسح وشو بـ يدو و قال لي بديت أصدع بسبب اننا في كل مـره بنتناقش في نفس الموضوع و كل مره أنا مطالب بـ تبريرات !
قلت ليهو شايف عيوني ؟؟؟ شايف السواد التحتهم ولا لا ؟؟ ملاحظ لـ لوني البقى باهت ولا لا ؟! حصل جيت سألتني مالك ؟؟ حصل اهتميت بي أو حسيت بي !؟ أكيد لا لأني ما بهمك ... قال لي أنا ... قاطعتو و قلت ليهو جاوب بصراحه ، حاسي انو حياتنا كدا ماشه صح ؟؟ حاسي انك ما مقصر و قايم بكل واجباتك و إنو دي حياة اتنين متزوجين !!؟
سكت مسافه بعدها أخد نفس و قال لي ما حـ تتعاد تاني ، أخدني في حضنو بس زحيت منو و قلت ليهو ما طفله أنا عشان كل مره تحضني و تسكتني ، قلت ليهو الكلام دا و أنا ببكي رغم اني حاولت اتماسك و اتظاهر بالقوهـ و ما أبكي ليهو بس ما قدرت ، قلبي كان مليان وجع و عيوني مليانه دموع !!
طوالي قمت من مكاني و دخلت جوه مسحت دموعي ، وقفت قدام المرايه و لميت شعري و مسحت الدموع الجات نازله للمره التانيه ، جا لاحقني و لفتني عليهو ، مسح لي دموعي و قال لي ما متخيل إني جرحتك للدرجه دي ! متضايق من نفسي لأني سبب في دموعك دي ، قرب مني و خت يديهو على أكتافي و قال لي فعلاً أنا مقصر ، بس كنت حاسس انك ما جاهزه و عايزا وقت ، طبعاً كنت بعاين ليهو بإستنكار !! قرب علي أكتر و فك شعري و قبل ما يتصرف أي تصرف تاني لزيتو و قلت ليهو دا الطلعت بيهو من كلامي و دموعي دي كلها !؟
معقوله دا التقصير الإنت فهمتو ! يعني عشان دموعي جاي تأدي واجبك ! قايلني بشحد فيك ولا قايل إنو دا سبب مشاكلي و بكاي ! انت عارف مشكلتنا شنو ؟؟
انك دائماً شايف تفكيرك صح ، ما شايف انك مقصر و طبعاً ما قصدي التقصير الفي بالك ، بتغلط و ما بتشوف غلطك أو بتشوفو بس بتعمل فيها عميان ! انت عارف و فاهم الحاصل بس عامل رايح ! ياخ أنا ليل على نهار ببكي بسببك و انت ولا على بالك !! أنا مصدومه فيك !! ما قادره استوعب انك طلعت انسان أناني و قلبك حجر !
ياخ ما معقوله يكون في زول بالقساوه دي ! ياخ بني آدم انت !؟ طيب ليه ما بتحس !؟
قال لي بزهج اعمل شنو طيب ! قولي لي بس اعمل لي الحاجه الفلانه عشان على الأقل أفهم انتِ عايزا شنو !!
قلت ليهو ريح نفسك ، ما عايزا منك شي غير الطلاق و إذا ما طلقتني ذاتو ما ضروري ، أصلاً دا زواج كلو لعب في لعب و ما ضروري إذا اتطلقت أو لا ، المهم إني حـ أمشي من هنا ، قال لي ما تجني !!
قلت ليهو لو قعدت هنا أكتر حـ أجن بالجد ، شايف الشنطه ديك !؟ ... بس منتظره مصطفى يجي و بعدها ثانيه ما حـ أقعدها هنا ، بقى يعاين لي بس ، ما قدر يقول حرف واحد ، شال نفسو و طلع برا ، قعدت على السرير و بقيت أبكي و قدر ما حاولت أسكت نفسي ما قدرت ، كل ما أمسح دموعي بتجي نازله ، كل ما أقول خلااااص حـ اسكت و ما حـ أبكي ألقى نفسي لسه مواصله ، كنت مقهوره شديد و حسيت دموعي البتنزل على خدودي دي قصادها في دم بنزل على قلبي ، بكيت بكيه ما بكيتها في حياتي كلها ، عيوني بقت عباره عن ماسوره و إنفتحت ، بعد ربع ساعه من البكى مسحت دموعي لمن سمعت صوت مصطفى ، قلت بس مصطفى جا و تاني دقيقه وحده ما بقعدها هنا ، هديت نفسي شويه بعدها طلعت برا عشان أنادي مصطفى بس ما لقيتو في الهول ! لا هو لا يونس !! فتشت الغرف كلها حتى المطبخ بس ما لقيت ليهم أثر ! طلعت الحوش برا برضو ما شفتهم و لمن ما لقيت عربية يونس فهمت إنو ساق معاهو مصطفى بس مشى وين !!؟
دخلت جوه شلت تلفوني و بقيت اتصل عليهو بس ما كان يرد علي ، قلقت شديد و ما عرفتهم مشوا وين ، اتصلت كتير بس بدون فايده !
قريب للمغرب كدا جوا داخلين الإتنين ، طوالي مشيت وقفت قدام يونس و إنفعلت فيهو و شاكلتو قدرتي و قلت ليهو انت منو عشان تسوقو معاك ، قال لي أنا الزول الإتكفل بيهو و المسؤول عنو ، يعني في مقام أبوهو ! 😊
جريت مصطفى من يدو و قلت ليهو أمشي غير ملابسك بسرعه عشان نتخارج من هنا ، سحب يدو مني و مشى وقف ورا يونس !!
كنت بعاين ليهو بإستغراب !! قلت ليهو مصطفى سرعه أمشي غير ملابسك و إلا حـ أسوقك بيهم !! قال لي أنا ما ماشي ، قاعد هنا ، قلت ليهو ما على كيفك ، هنا قاعد مع منو ؟؟ بتعرفو من متين انت عشان تقول عايز تقعد في بيتو !؟ قال لي انتِ ذاتك مش قعدتي في بيتو !!

🎭 رواياتي 📚 الوسام 2️⃣ 🎭

01 August 2024 12:29

بعد مسافه كسرت الصمت و قلت ليهو في شنو يا يونس ؟؟
صلح قعدتو و قال لي خير في شنو ؟؟
قلت ليهو أنا السألتك جاوب ! قال لي ما فاهم في شنو !!؟
قلت ليهو ما ملاحظ يعني !؟ ما شايف انك متجاهلني شديد كأني مزهريه ! لو طالع ما بتقول طالع و لو حـ تتأخر ما بتتصل تقول لي أنا حـ اتأخر ، ياخ ساي ما بتتصل علي عشان تشوف يومي ماشي كيف !! مديني إحساس إنك إنجبرت على العرس دا !! لو حاسي بالندم فـ لسه ما فات الأوان و بتقدر تنسحب ماف مشكله 😊
قام من مكانو و جا قعد جنبي ، مسك يديني الإتنين و قال لي ما قاصد !! آسف لو وصلك إحساس سيئ بسببي ، بس صدقيني من دون قصد ! الفتره دي بالذات أنا منشغل شديد عشان كدا معظم يومي بكون برا البيت ، قلت ليهو ياخ حتى لمن تجي راجع بتحسسني كأني ما موجوده ! باس يدي و قال لي حقك علي ، ما حـ تتكرر تاني ، قلت ليهو بالجد لو حاسي بالندم أو إنو الزواج دا حـ يسبب ليك مشاكل خاصة مع أهلك قولها لي في وشي و أنا صدقني بهدوء حـ أمشي من هنا ، بس ما تتصرف معاي كدا يا يونس ، ما تتجاهلني بالطريقه دي و تخلي وجودي ما ليهو قيمه !... ضماني عليهو و قال لي آسف آسف ما كنت منتبه لتصرفاتي و ما عارف انها زرعت جواك شعور ما كويس للدرجه دي ! ، صدقيني أنا ما ندمان و مستحيل أندم و قبل كدا قلت ليك لمن أصر على حاجه معناها إني مقتنع بيها .... مسحت دموعي و قلت ليهو انت ما عارف انا اتوترت و قلقت قدر شنو بسببك ، و من شدة الهم حسيت قلبي بقى تقيل ، قال لي معليش معليش و ما حـ تتكرر تاني .... لمن سمعنا صوت مصطفى طوالي زحينا من بعض ، جا جاري و قال لـ يونس تلفونك هسي رن ، فجأه التلفون تاني رن فـ يونس شالو و طلع بيهو.....

إفتكرت إنو بعد اليوم دا علاقتنا حـ تتحسن و حـ نعيش زي أي إتنين متزوجين بما إنو يونس عرف غلطو و وعدني ما يتكرر تاني بس طلع كلام خشم ساي !
ماف شي اتصلح و بقيت أحس علاقتنا كل يوم ماشه تتعقد أكتر و كل يوم بحس اننا بنبعد عن بعض أكتر ! يونس ما اتغير و ما بطل الكان بعملو ، بطلع الصباح و برجع المساء من دون ما يتصل أو يبرر و لمن يحس إني متضايقه منو بجي يعتذر و يكرر نفس السيناريو و يعيد نفس الوعود بس من دون تنفيذ ! كنت بعديها ليهو و بصدق كلامو و بخت ليهو ألف عذر بس هو إتمادى و الوضع زاد عن حدو ، حسسني زي الكأنو عرف غلطو و ندم على العرس دا و ما قادر يواجهني ، زي الياداب وعى على نفسو و عرف حجم الكارثه العملها لما عرس وحده مجهولة الأبوين و دا بفسر ليه هو لحد الآن ما كلم أهلو بي ، ببساطه لأنو خجلان و ما قادر يقول حقيقة البت العرسها لـ زول 💔
أنا بالجد مليت و قلبي دا من شدة الألم حسيتو حـ ينشق و عيوني ديل من شدة بكاهم كل ليله أندفنو عديل ، الليل كلو بقضيهو بكى و بصحى الصباح حالتي بالبلا ، عيوني وارمه و في هالات تحتهم و لوني شاحب و يونس ما قادر يشوف دا كلو ! ياخ حتى مصطفى لاحظ لي و سألني إذا عيانه أو لا ! طيب يونس ليييه ما شايف حالتي الوصلني ليها دي !؟ ليه ما قادر يحس بي ؟! ليه بقيت ما بهمو !؟
يوم و أثناء ما أنا قاعده مهمومه عيني في الشاشه و بالي في حته تانيه تلفوني رن ، كانت حلا المتصله ، رديت عليها و سألتها و سألتني عن حالي ، قالت لي انتِ عيانه ولا شنو !؟ قلت ليها لا ، قالت لي حاساك ما تمام !!.... في نفسي قلت حلا الما ساكنه معاي في نفس البيت من صوتي حست إني ما تمام ، طيب يونس دا عميان ولا بستهبل !؟
قلت ليها أنا كويسه ما تشغلي بالك ، إتونست معاي شويه بعدها قفلنا من بعض ...
في كل مره حلا تتصل أو ترسل لي بظن إنو يونس حكى ليهم عني و هي متصله عشان تتأكد مني إذا فعلاً أنا و يونس عرسنا ! بس شكلو ما ناوي يكلم زول ، شكلي حـ أفضل سر في حياتو ، حأكون خلف كواليسو و ممنوع الناس تعرف إني زوجتو !!💔
لما دخلت الفيس لقيت يونس منزل صوره ليهو مع أصحابو ، و ظاهر إنو مبسوط و مروق آخر روقه !!!
و تحت البوست حقو مباشرة لاقاني بوست مكتوب فيهو :
"البضمن وجـودك في حـياتو عمـرو ما حـ يجـتهد عـشان يحـافظ عـليك "
فعلاً دا الحاصل ، يونس ضامن وجودي و عشان ملاحظ إني سامحتو أكتر من مرهـ و اتجاوزت تصرفاتو المزعجه ظن إني في كل مرهـ حـ أغض نظر ، في كل مرهـ حـ أقبل إعتذارو و اتصرف معاهو عادي كأنو ما عمل شي !!... أنا خلاص اقتنعت إني كنت تحدي لـ يونس و كان عايز يفوز و بس ! اتذكرت كلام حلا لما كانت بتحكي لي يوم عن يونس كـ محاوله منها عشان تقنعني بيهو ، قالت يونس ما حصل جرى ورا بت ! يونس أي حاجه بختها في بالو بعملها و بحصل عليها ! يعني هو بس كان عايز يصلني ما عايز يفوز بي ! شخصيتو النرجسيه ما قدرت تتحمل فكرة إني أرفضو فـ أخد الموضوع كـ تحدى 💔

🎭 رواياتي 📚 الوسام 2️⃣ 🎭

01 August 2024 12:24

#بطل_الحكايه12
مها حولي الزاكي

مع العصريه كدا طلعت من الغرفه ، لقيت مصطفى نايم في الهول و الشاشه فاتحه ، عدلت ليهو رقدتو و وطيت صوت الشاشه ، مشيت استحميت و جيت شلت تلفوني على أمل ألقى مكالمه و لو واااحده بس من يونس بس ما لقيت !
اتصلت عليهو و رد علي في المكالمه التانيه ، قال لي أنا جاي على البيت عايزا حاجه ؟؟
قلت ليهو لا و قفلنا على كدا ! مكالمه جافه شديد !!
بقيت أسأل نفسي في شنو ؟!! الإتغير شنو يعني ! دخلت جوه و وقفت قصاد المرايه و بقيت أعاين لـ نفسي ! يونس قبل ما يعرسني كان بحسسني اني مميزه و إنو ميت علي و عايز متين نكون في بيت واحد و لمن أمنيتو اتحققت فجأه كدا اتغير ! يعني بالسرعه دي بقيت باهته في نظرو ! ولا هو بس كان معتبرني مزهريه عايز يزين بيها بيتو !!
يوم كدا طلعت ألواني و ورقي عشان أرسم ، شلت حاجاتي و مشيت السطوح ، كان في غرفه معاها مظله ، لما دخلتها كان فيها لوحات كتيييره و كل واحده أحلى من التانيه ، طبعاً ديل حقات يونس ، بقيت أعاين ليهم لوحه لوحه ، طبعاً إضاءة الغرفه ما كانت كافيه لأنو الشبابيك مقفوله و المظله قدام باب الغرفه فـ راميه الظل عليها ، و أنا واقفه قدام لوحه من اللوحات المعلقه على الحيطه ، حسيت بزول جا داخل و حالياً واقف وراي ، من دون ما أتلفت عرفتو ، من ريحة عطرو ، لما إتلفت عليهو رجع قفل الباب ، كان في طاوله عليها كرسيين أشر لي على كرسي ، ملامح وشو كانت ما بتتفسر ، ما عارفه مالو ، من جا صاري وشو ، قعدت على الكرسي و هو جا وقف جنبي و قال لي تجاوبي بالتي هي أحسن ولا استخدم معاك أسلوب تاني ؟!!... عاينت ليهو بإستغراب كدا ، قال لي انتِ عارفه إني عارف حقيقتك و ليه انتِ هنا فـ تعاليني من الآخر زي ما أنا جيتك من الآخر ، وقفت على حيلي و قلت ليهو بتقول في شنو انت ! قعدني بالقوه و قال لي مستعجله ماشه وين لسه ما بدينا ! طبعاً قلبي بقى شغال دق دق و أفكاري جاطت ! فجأه تلفوني رن ، فتح الخط و قال ايوه !.... ما عارفه المتصل قال ليهو شنو بس هو ما قال حاجه ، قفل الخط بس ، قال لي هااا حـ تجاوبي ولا استخدم معاك أسلوب تاني ؟؟ قلت ليهو اجاوب على شنو ، يونس في شنو مالك انت ؟؟ قال لي معناها حـ استخدم الأسلوب التاني ، في كسر من الثانيه قرب مني و باسني على خدي و أنا مستغربه و متفاجئه !! قال لي سؤالي : لييه حاسي بيك متغيره ؟؟...لو ما جاوبتي حـ استخدم معاك نفس الأسلوب القبل شويه ، طبعاً لسه ما كنت فاهمه شي و بعاين ليهو بإستغراب ، فجأه ضحك و قال لي ما قايلاك خوافه للدرجه دي !! يا بت الناس كنت بجس نبضك ! طلعتي خوافه و قلبك كبير ، ختيت يدي على قلبي لما حسيت براحه و طمأنينه ، بعدها قلت ليهو ما خفت ، قال لي يا زوله بعد دا كلو ما خفتي !!... قلت ليهو من البدايه عارفاك بتستهبل بس قلت أشوف نهايتك ، ضحك و قال لي كذااابه والله ، من شدة الخوف قربتي تبكي ، قلت ليهو أصلاً ماف شي بخوف ، قرب و خت يدو على جبيني و قال لي مصطفى قال لي انك عيانه !... في سري قلت ليهو ياداب جاي تسأل عني ! كتر خير مصطفى القال ليك و إلا لو شفتني واقعه قدامك ما حـ تقول لي الحاصل عليك شنو ، قلت ليهو ماف شي ، صداع و راح ، قال لي متأكده ! قلت ليهو ايوه !... طبعاً لسه كنت مصدعه و مرهقه و زهجانه بس إذا هو دا كلو ما قادر يشوفو و ما قادر يحس بي فـ ليه أعاتبو و اشكي ليهو شي واضح زي عين الشمس !
المهم بقى يتكلم معاي عن لوحاتي و كل لوحه وراني رسمها متين و اخدت معاهو كم يوم أو كم ساعه ، و هو بتكلم أنا كنت مركزه معاهو ، بعاين ليهو و نفسي أفهمو ، نفسي هو يقول لي ليه بتغابى و عامل فيها إنو ماف شي غريب !
تاني يوم تعبت أكتر من يوم أمبارح بس ما اتصلت على يونس ، هو الإتصل علي ، قال لي كيف ماشي يومك ؟ قلت ليهو تمام ، قال لي و مصطفى ؟ قلت ليهو برضو تمام ، قال لي انتِ كويسه صح ؟؟ قلت ليهو ايوه كويسه ، قال لي عارف اني مقصر بس والله مشغول و كل ما انتهي من موضوع يطلع لي موضوع جديد بس اليوم حـ أرجع بدري ، بعد ساعه حـ أكون في البيت ، قلت ليهو تمام ماف مشكله و قفلنا على كدا ، قلت في نفسي أنا ما عارفه طبيعة شغلو و يمكن بالجد ماري بضغوطات كبيره مخلياهو ما قادر يركز مع شي!...

_________

_خير في شنو ؟؟
=ساي كدا زهجانه فـ قررت أطلع برا و أعزمك
_يعني هسي متصله علي مية مره و معطله لي شغلي عشان بس أجي و تقولي لي زهجانه
= تمام قوم و أمشي ، غلطانه أنا الإتصلت عليك يا يونس ، آسفه شديد والله لأني عطلت شغلك المهم عشان سبب تافه و هو زهجي !
_ ليان في شنو ؟؟ مالك انتِ اخلاقك بقت ضيقه و بتعملي من الحبه قبه !

🎭 رواياتي 📚 الوسام 2️⃣ 🎭

01 August 2024 12:24

بعد مسافه يونس وقف العربيه قصاد بيت كدا ، إتلفت عليهو و قلت ليهو يعني نحنا ما كنا ماشين بيتكم !قصدي البيت الكانوا فيهو ناس حلا !؟
قال لي داك بيت أخوي و دا بيتنا ، قلت ليهو تمام ناس حلا و الباقين عارفين ؟؟
قال لي لا بكلمهم في الوقت المناسب ، قلت ليهو مفروض يعرفو ! قال لي ما عندي حاجه إسمها مفروض ، أنا حر اتزوج وقت عايز و أكلمهم في الوقت البشوفو مناسب ، قلت ليهو بس ، عاين لساعة يدو و قال لي اتأخرت شديد ، نزل من العربيه فتح الباب واسع و جا ركب و دخل بينا جوه ، وقف العربيه و نزل فتح الباب الورا و شال مصطفى ، قلت ليهو كان تصحيهو بس ، هسي ما تقيل !! قال لي لا و دخل بيهو جوه ، كنت بتلفت ساي في البيت ، كان بيت سطوح بس شكلو حلو ، شلت حاجاتي و حاجات مصطفى و دخلت بيهم جوه ، البيت كان مليان أثاث و كلو مرتب و راقي ، يونس رقد مصطفى على السرير و جا قال لي كل شي جاهز و داك المطبخ لو إحتجتوا حاجه و دي الغرف ، بقيت أعاين ليهو و أنا ساكته ! قال لي في شنو عايزا حاجه ؟؟
قلت ليهو لا ، قال لي تمام ، يلا أنا مشيت و طوالي مشى و خلاني ما فاهمه شي !!
طلعت لفيت في حوش البيت و جيت داخله شفت الغرف ، كانوا صالون عندو بابين فاتح جوه و برا و مطبخ و 3 غرف فاتحين في الهول و فوق في السطوح في غرفه وحده مربوطه بمظله ، وقفت في السطوح عاينت للبيوت و الشوارع الحوليني بعد داك نزلت تحت لقيت مصطفى صحى ، قال لي دا بيت ناس منو ؟ و جابني هنا شنو ؟
قلت ليهو نمت في العربيه و يونس شالك و جابك هنا و دا بيتنا ! قال لي يعني تاني حـ نسكن هنا و ما حـ نمشي الميتم ؟؟ قلت ليهو حـ نمشي نزورو من فتره للتانيه ، قال لي أحسن هنا من الميتم ، عايني البيت و السرير دا سمح كيف ، لو رسيل كانت معانا كان أحسن ، قلت ليهو ياريت ، بعدها مشيت دخلت المطبخ ، لقيت أكل جاهز شلتو و جيت بيهو لـ مصطفى ، قال لي يا سلااااام الليله ارتحنا من العدس ، ضحكت و قلت ليهو تاني العدس دا ريحتو ما حـ تشمها 😂
المهم لحد المغرب يونس ما جا راجع و لمن اتصل عليهو ما برد ، قلت ان شاء الله ما يكون حاصله عليهو حاجه ، كنت في الحوش و بالي مشغول و مصطفى راكب فوق ، رفعت راسي و قلت ليهو بعد دا أنزل عشان ما تقع ! قال لي المكان هنا سمح ، تعالي أركبي و شوفي الشارع ، قلت ليهو لا لا أنزل ، دخلت جوه للشاشه بس في البدايه ما عرفت اشغلها كيف ، في الميتم عندنا تلفزيون و هنا شاشه ، قعدت اطبظ و أحاول فيها لحد ما شغلتها ، لما مصطفى جا نازل أديتو الرموت و قلت ليهو أقعد أحضر ، طلعت برا و للمره السابعه اتصلت على يونس و رغم إنو خاشي بس ما برد ! بالجد إتوترت و خفت عليهو ، في المره العاشره رد علي و قال لي مشغول و قفل الخط !!

أنا ما من نوع الناس البزعلوا بسرعه و ياخدوا موقف ، ما بحب اتسرع و دائماً بخت عذر بس حالياً ما لاقيه عذر لـ يونس ! يعني المانعو يتصل أو يرد علي من المكالمات الأولى شنو !و لما رد ما ردت زي الناس! ما عارفه بس من قبيل حاسه بغرابه و إنو في شي اتغير ! ما عارفه فيني أنا ولا في يونس ولا في الظروف ولا عشان كل شي جديد علي !!
بعد العشاء بمساااافه يونس جا داخل ، الوقت داك مصطفى نام ، جا لقاني قاعده في الهول بقلب في القنوات ، قال لي كيف أمسيتي !؟
قلت ليهو تمام ، بعدها دخل طوالي من دون ما يبرر لي ! كأنو ما بهمو ! عايزا أعرف في شنو !؟ الحصل شنو فجأه كدا !!
مشيت لحقتو جوه الغرفه لقيتو فاتح الدولاب بطلع ليهو في ملابس ، قلت ليهو يونس انت متضايق مني ؟؟
قفل الدولاب و قال لي بإستغراب لا ، ليه ؟؟
قلت ليهو حاسه كدا ! دا غير انك لا اتصلت علي لا رديت على مكالماتي و من طلعت ما جيت راجع تاني ، قال لي ثواني ، شال تلفونو و فتحو شاف المكالمات و قال لي تصدقي ديل ما شفتهم ! انتبهت بس لآخر اتصال منك و قلت ليك مشغول ، دا شغل شنو البخليك ما تتصل ! دا شغل شنو الما بخليك تنتبه على مكالماتي الكتيره ، قال لي تلفوني كان صامت ، آسف حقك علي ، قلت ليهو المهم انك بخير لأني كنت خايفه شديد عليك ، قال لي ما حـ تتكرر تاني ، قلت ليهو طيب أخت ليك تاكل !؟ قال لي لا شبعاااان والله ، عايز استحمى و آخد لي نومه لأني تعبان ، قلت ليهو تمام ، شال ملابسو و طلع برا مشى الحمام ، لمن جا راجع لقاني قاعده قدام الشاشه ، مشى شال المصلايه فرشها و بدا يصلي ، وطيت صوت الشاشه ، و بقيت مره مره أتلفت ورا و أشوفو ، بعد خلص و كان حـ يسلم طوالي عاينت قدامي عشان ما يقول من قبيل مركزه معاهو ، بعد مسااافه كدا و لمن ما سمعت صوت حركتو إتلفت ورا لقيتو راقد على السرير و شكلو نام !!
قلت ليهو يونس ! ما رد علي

🎭 رواياتي 📚 الوسام 2️⃣ 🎭

01 August 2024 12:24

اسمع فيها صوتو ، قال لي آلوو سامعاني انتِ ؟؟ قلت ليهو ايوه معاك فـ قعد يحكي لي عن الكلام الدار بينو و بين بابا حازم ، في النهايه قال لي بكرا نتلاقى و نتفاهم في تفاصيل الزواج ... قلت ليهو و أهلك ؟؟...قال لي أهلي ما مشكله ولا حاجز ممكن يقيف بيني و بينك فما تشيلي هم ، قلت ليهو على فكره أنا ما عايزا قومه و قعده ، كفايه أهلك يكونوا موافقين و يتعمل عرس بسيط ، قال لي لا لا من حقك يتعمل ليك عرس كبير ... قلت ليهو ما عايزا يا يونس والله ما عايزا !!... قال لي تمام ، راحتك أهم .... تاني يوم لما إتلاقينا بعد خلصت دوام اتناقشنا في نفس الموضوع طبعاً هو حدد موعد لبابا حازم و قال ليهو الجمعه الجايه ، أنا كل همي كان أهلو ، قلت ليهو كلمتهم ولا لا ؟! قال لي أخوي و مرتو حالياً برا السودان ، قلت ليهو دا ما بمنعك تكلمهم ، أخد نفس و قال لي ليه انتِ عايزا تعقدي الموضوع ! قلت ليك أنا صاحب القرار معناها أنا صاحب القرار ! ... طبعاً حسيتو زهج بسبب كلامو ! لمن انتبه على نفسو قال لي آسف ما قاصد بس في الوقت البحاول فيهو أنا اتخطى و أتجاوز كل العقبات الفي طريقنا انتِ بتعقدي الموضوع ! يعني إذا غيرتي رأيك و شايفه إني ما مناسب ليك بتقدري تنسحبي بس ما تتحججي بأهلي !☺️
قلت ليهو والله ما قاصده كدا ، ما تفهمني غلط يا يونس ... بعدها سكتنا الإتنين ، كسرت الصمت و قلت ليهو ما حاسي إنو الموضوع دا غريب شويه ! يعني معقوله بعد 3 أيام حـ نعرس !...لما عاين لي ، قلت ليهو لا لا ما تفهم غلط ، كل القصه إني ما متعوده اتحصل على حاجه بسهوله ، عمري ما اتمنيت حاجه و اتحققت طوالي عشان كدا خايفه و متوتره ، قال لي أنا معاك اتطمني ♡
قبل ما نرجع قلت ليهو يونس ممكن طلب ؟! قال لي اتفضلي طوالي ، قلت ليهو بعد الزواج و كدا ممكن نتكفل بواحد من أطفال الدار !؟ هو ما أي واحد ، هو طفل بعتبرو أخوي والله ، مصطفى و رسيل أكتر اتنين قريبين من قلبي ، بحبهم شديد و بحس نفسي مسؤوله عنهم ، رسيل للأسف جات أسره و اتكفلت بيها و سافروا برا السودان ، فما عايزا يحصل نفس الشي مع مصطفى ... إذا ما عندك مانع يعني ...قال لي طلباتك أوامر يا ستي ، قلت ليهو بالجد ما عارفه أقول ليك شنو !! أنا محظوظه بيك ، قال لي والله أنا المحظوظ بيك و يا بختي فيك ♡
شفتو إحساس انك تحصل على حاجه كنت شايفها بعيده شديد و في نفس الوقت مستغرب كيف بقت ليك بالسرعه و السهوله دي ..دا كان إحساسي ، مشاعري كانت ملخبطه و أفكاري جايطه و حدثي بحذرني من خطر بس ما كنت فاهمه اي خطر و أي مصيبه الحـ تصيبني و أنا مع يونس ! رغم إني قفلت باب الحب و الزواج و الحاجات دي من زمان بس يونس فيهو حاجه مميزه ، ما أكذب إنو من أول مره لفت نظري بس كنت عارفه البي و العلي ، و ايوه فرحانه لأنو هو متمسك بي للدرجه دي بس يمكن خوفي من العلاقات و المجتمع الجديد الأنا داخله ليهو خلاني اخاف و اتنشن ، طبعاً البنات ما بطلوا حركاتهم و قطيعتهم و ليلى تشيل و تملى ليهم راسهم ، والله تصرفاتهم و نفوسهم الإتغيرت وحده من الأسباب الخلتني أتمنى اطلع من الميتم بأقصى سرعه ، بعد الحصل حسيت الميتم بقى غريب علي ، رسيل مشت ، منار مشت ، البنات اتغيروا ، لحد يوم الجمعه أنا في كميه من الأحاسيس مسيطره علي ، يونس كلم بابا حازم بخصوص مصطفى فـ جهز لينا أوراق الكفاله و قال لي دا كلو عشانك انتِ ، عارفك متعلقه بـ مصطفى قدر شنو ، يوم الجمعه أنا و يونس و بابا حازم و 3أنفار جوا مع يونس مشينا المحكمه ، طبعاً أنا ما عارفه الإجراءات المفروضه شنو و منو المفروض يجي مع العرسان بس اتمنيت اشوف ان شاء الله مراه واااحده من أهل يونس بس ما كان معاهو غير 3رجال ، ديك كانت أول مره أدخل محكمه و أول مره أعرف حاجه اسمها قسيمة زواج و شهود و توقيع و كلام زي دا ! رغم إنو كل مره بجي عريس للميتم بس ما عندنا خلفيه عن كيف بتتم إجراءات الزواج و كدا ، دي كلها حاجات بقوم بيها بابا حازم ، البت ما عليها إلا تجهز نفسها و تبقى مارقه مع راجلها لما يجي يسوقها ، لما خلصنا بابا حازم بارك لينا و قال إنو حـ يمشي الميتم قال لينا تعالوني هناك عشان نتم باقي إجراءات كفالة مصطفى و فعلاً سبقنا و مشى ، يونس مد لي يدو و قال لي مبروك لينا ، مديت ليهو يدي و أنا ساكته ، قال لي ليييه ليه عابسه كدا !؟... ابتسمت و قلت ليهو ماف شي ، المعاهو جوا باركوا لينا و مشوا ، بعدها نحنا ذاتنا مشينا الميتم ، مشيت مع يونس مكتب بابا حازم بعدها طلعت و مشيت للبنات ، طبعاً من جيتهم داخله قعدوا يعاينوا لي ، طبعاً الأسبوع الفات اختاروا فدوى و نور للعرس و رماح قالت المره دي ما عايزا عرس ، عايزا شغل ، المهم حاجاتي و حاجات مصطفى كانوا جاهزين ، شلتهم و طلعتهم برا جنب البوابه ، طبعاً مصطفى كان واقف جنب العربيه و شغال لي دي عربية منو ، لما يونس خلص و جا طالع من المكتب بابا حازم ذاتو جا طالع معاهو ، رجعت للبنات و قلت ليهم أنا ماشه ، جات رماح ضمتني و قالت لي والله حـ نفقدك ، ودعتهم و

🎭 رواياتي 📚 الوسام 2️⃣ 🎭

01 August 2024 12:24

#بطل_الحكايه11
مها حولي الزاكي

_لا انت أكيد جنيت يا ود الخطاب !! و هو ما عرفك ؟؟ بقيت ما قادر افهمك يا يونس يعني تهورك و فضولك وصلوك لدرجة تمشي و تشوفها جنب الدار لا و كمان تعرض عليها الزواج و تمشي تقابل المسؤول عن الدار و تطلبها منو !

=انت عارف بحركتي دي قدرت اتوصل لحاجه مهمه ! في إحتمال كبير المسؤول عن الدار دا و المعروف بـ حازم ما يكون عرفني لأنو أصلاً لا أنا بعرفو لا هو بعرفني ... دار إيمان و القائمين عليه متهمين بإنهم بستخدموا الأولاد لترويج المخدرات و البنات لـ بيوت الدعاره و هم كل مره بقدروا يبرؤا نفسهم ، أصلاً الشكوك دي ابتدت من سنه و نص أو أكتر بشويه، و بما إنو الناس ديل ببيعوا البنات في احتمال كبير البت دي تكون اتباعت و اشتغلت لصالح الزعيم ، يعني الزعيم و مجموعتو فقط هم الحيكونو عارفين بتفاصيل مهمتها

_ احتمال كبير والله ! المسؤولين عن الدار أول ما يبيعوا البت أو الولد و ياخدوا حقهم ما بكون عندهم علم و تفاصيل بالأغراض الحـ يتم استخدام البت أو الولد عشان ينفذها!بس برضو لو صدقنا الإحتمال دا فـ ليه هو يوافق انك تعرس بت هي في الأصل مبيوعه !و إذا هي اتباعت و شغاله لصالح الزعيم ليه لسه قاعده في الدار !

=.... يمكن هم عايزيني اكتشف الحاجه دي ؟؟ يمكن عارفين إني عااارف إنو هي جاسوسه و متابعها و لو كانوا عايزين يصعبوا علي الموضوع ما كانت حتكون قاعده في الدار!!

_اكيد خطر على بالك الشي الخطر على بالي !....هم قاصدين يعملوا كدا ! قاصدين يخلوك تمشي في الطريق الغلط و ورا البت الغلط ! قاصدين يشغلوك !

=دا معناه إنو لو هم مفكرين يرسلوا لي جاسوسه تانيه فـ حتكون يا إما دخلت حياتي يا بتحاول تدخلها !

_اها هسي مصيبتك دي حـ تعمل فيها شنو ؟! براك جوطت الحكايه و مشيت و قلت ليها عايز أعرسك ! طبعاً البت دي اشتغلت شغل صاااح و خلتك تصدق إنو هي الجاسوسه!

=خليني أفكر ...
_سلمها الإستخبارات يا يونس و ريحنا من الموضوع دا

=ما تخاف عاجلاً أم آجلاً حـ أسلمها ليهم ، أصلاً السجن هو مصيرها و مصير أمثالها

_... خير في شنو ؟؟...من منو الرساله دي ؟؟

=من ناس البيت ... حـ أمشي ... يلا سلام

_______

_شنووو شنووو شنووو !!....أصلو ما بصدق ! كيف يعني جابت ليها عريس !

= طلعت كاااتله حيلها ساااي و الزمن كلو شابكانا أنا شايله فكرة العرس دي من بالي ، أنا عايزا اشتغل ، أنا عايزا أطلع قروش ، أنا و أنا و أنا و في الآخررر مشت جابت ليها عريس !

° دي ما سبقها عليها زول ، في تاريخ الميتم كلووو ماف وحده مشت جابت ليها راجل و قعدتو لـ بابا حازم و قالت ليهو عايزاهو ! شفتو البت دي عشان مصلحتها بتعمل شنو !

""اختارت عريسها برااها و جابتو لبابا حازم ، نور شافتو و قالت سمح شديد و قالوا عندو عربيه !

*خليكم من دا بتكون ورتو حقيقتها ؟؟ يعني العرسان البجيبهم بابا حازم عارفين نحنا شنو لكن الجابتو دا عارفها!

_انتِ متخلفه ولا شنو يا سماح ، لو ما عارفها كيف حـ يجي الميتم و يطلبها من بابا حازم !

*طيب كيف رضى بيها ما قادره استوعب ! ما عندو أهل !

°كانت بتقول : أنا ما مقتنعه بالعرسان ديل ، كيف الواحد يخلي بنات الناس البرا و يجي يعرس من الميتم ! استنكرت الحكايه و في النهايه مشت جابت ليها راجل !

**انتوا عارفين كدا أثبتت لينا غيرتها ، صح كلام ليلى ، مها غيووره و حسوده ، غارت من منار بالتحديد عشان كدا طوااالي مشت جابت ليها واحد ، عشان تتساوى مع منار ، عرس و شغل ، ما قدرت تستحمل فكرة إنو وحده مننا تفوتها و تبقى أحسن منها !

° الزمن كلو شابكانا ماشه الشغل جايه من الشغل و هي اتاااريها بتشرك لأولاد الناس و نحنا ما جايبين خبر ، الله اعلم بتعمل شنو لما تطلع من هنا

"_معقوله تكون ما شغاله في مطعم و سايقانا بالخلا و القروش دي يمكن شالتهم من العايزا تعرسو دا !!... ليلى ! قولي حاجه !

+: أقول شنو البت دي شطبت كل الكلام الفي بالي ، من يومي عااارفاها خبيثه و مكااااره بس ما اتخيلتها للدرجه دي !

_والله كل كلمه قلتيها عنها يا ليلى طلعت صح و بعدين ليه بابا حازم يوافق ليها على الراجل الجابتو دا !! هسي لو كلنا فكرنا نعمل كدا حـ يرضى ! والله بابا حازم دا حرام عليهو

+: طبعاً عشان مها الدلوعه بتاعتو ، غيتو الله اعلم هي بتعمل ليهو شنو عشان يلبي ليها كل طلباتها...

طبعاً كنت واااقفه و سمعت كلامهم كلو و أنا دمي بغلي و في نفسي الوقت مكسوره من جوه لأني ما اتخيلتهم يصلوا للدرجه دي ، بعد آخر جمله قالتها ليلى طواالي جيتهم داخله توووش مسكت ليلى لفتها علي و لطشتها كف و عدلتها بالتاني و قلت ليها تفاهه زي دي موجوده بس في مخك المعفن دا ، عشان انتِ بتعملي لـ بكري العايزو و بالمقابل بفتح ليك الباب و يخليك تسرحي و تمرحي على كيفك مفتكره كل الناس زيك ...

🎭 رواياتي 📚 الوسام 2️⃣ 🎭

01 August 2024 12:24

وشو كلها استفهامات و ليهو حق طبعاً بعد ما عرف حقيقه زي دي !!
ما مشينا بعيد ، في مكان كدا مطعم أو شبه مطعم نزلنا و قعدنا فيهو ، كان بعمل سندوتشات فـ يونس قال لي عايزا سندة شنو ؟؟
طبعاً أنا استغربت فيهو !... قلت ليهو ولا شي ، طوالي قام و مشى جاب سندات شاورما و اتنين عصير طبيعي ، ختاهم و قال لي على فكره أنا جعان شديد و ما بعرف آكل براي ، قلت ليهو أنا ما عايزا شي !... قال لي و السبب ؟؟.... قلت ليهو انت عندك زهايمر ؟! قبل شويه أنا قلت ليك شنو ؟؟ ...قال لي حـ نتناقش في القلتيهو بس هسي خلينا في دا !!.... قلت ليهو عارفاك بتحاول تظهر لي إنو الموضوع عادي و ماف شي خطير و انت من جوه مصدوم شديد ، مد لي كباية العصير و قال لي اشربيها و شيلي السنده دي خلينا نملي البطون و كلام الخشوم هين ! قلت ليهو والله العظيم أنا ما عايزا يا يونس! قال لي تمام أشربي العصير !... شلت منو شويه و رجعت الكبايه و هو كأنو الوضع عادي و ماف أي شي ، كمل السنده و شرب العصير بعدها قرب كرسيهو و قال لي: يعني دا سبب رفضك ؟؟ هزيت ليهو راسي... قال لي طيب ليه من البدايه ما قلتي لي الحقيقه ؟؟ قلت ليهو كيف ممكن أجي و أقول ليك حقيقه زي دي و أنا أصلاً عارفه نهاية القصه حتكون شنو بعد ما تعرف ! أنا بت ميتم ، بت مجهولة الأبوين مش دا سبب كافي يخليك ما تقبل اسمك يرتبط بي ، و يخليني ما أعشم و أفكر في أي زول ؟؟
سكت مسافه بعدها قال لي يوم عرضت عليك الزواج قلت ليك شنو يومها لمن رفضتي ؟ .... قلت ليك أنا من نوع الناس الما بصر على حاجه إلا لو كنت بالجد باقي عليها و مصر اتقبلها بكل عيوبها و نواقصها ، ما حـ أكذب و أقول إني ما اتصدمت أو اتفاجأت بسبب كلامك لأنها حاجه ما بتخطر على البال ، لحظاتي الكنت ساكت فيها بعد ما قلتي لي حقيقتك كنت بسأل نفسي إذا دا سبب يخليني اتنازل عنك و أتراجع ، فـ لقيتو ما سبب كافي و ما أظن في أسباب ممكن تخليني انسحب و اتنازل عنك .... و لـ معلوماتك أنا زول عندي نظره بعيده ، بفكر في أي حاجه ألف مره قبل ما أعملها حتى لو كانت حاجه بسيطه ، و أكيد فكرة الزواج دي ما جاتني بين ليله و ضحاها و أكيد انتِ ما أول بت أشوفها ولا آخر بت ، من بين كل البنات إخترتك انتِ و أنا لمن أختار حاجه بختارها بقناعه تامه ...
و هو بتكلم دموعي كانت حـ تنزل بس كنت حابساها ، مشاعر كتيره حاوطتني في الدقايق الهو كان بتكلم فيها ، حسيت بالطمأنينه و الأمان و التميز و غيرهم من المشاعر الحلوهـ ، يعني اتقبلني حتى بعد ما عرف حقيقتي و دا الما كنت متوقعاهو !! غلبني الكلام و لساني حسيتو مربوط ، اتكلم مسافه و في الآخر قال لي مش ياهو السبب الخلاك ترفضيني ! ؟ يلا أنا ما عندي مانع و ما شايفو شي ممكن يقيف حاجز بيني و بينك ، قلت ليهو يونس بالجد الموضوع دا صعب و كبير و ما بتعلق بي و بيك بس ، ناسي أهلك ؟؟
على فكره أنا أهلي متوفيين ، قلت ليهو ربنا يرحمهم 💔
قال لي عشان كدا أنا صاحب القرار و أنا المسؤول عن نفسي ، قلت ليهو طيب و اخوانك و باقي أهلك و معارفك ! قال لي ما ليهم أي علاقه بي ، أنا زول كبير واعي و عاقل و عارف نفسي عايز شنو !
سكته و بقيت أفكر في الموضوع قطع تفكيري صوتو و هو بقول لي سبحان الله بعد ما فقدت الأمل في انك توافقي و ما اتخيلت إنو نقعد القعده دي في يوم بس ربك قادر !
قلت ليهو ممكن اسألك سؤال !؟
قال لي من دون ممكن ، اسألي !
قلت ليهو عاين وراك ، لمن عاين قلت ليهو شايف البت اللابسه بنطلون جينز ديك !؟ قال لي ايوه مالا ؟؟
قلت ليهو ما شاء الله شوفها رقيقه كيف ، الأناقه و الرقي ظاهرين عليها و واضح انها بت ناس مرموقه ، دا غير جمالها و شعرها الطويل الحريري و نضارة بشرتها و الميك اب الحلو العاملاهو ، يعني البت دي مُلفته ، و فيها كل الصفات الممكن تعجب الراجل ، يعني إذا أنا البت انبهرت بيها و عجبتني فـ انتوا الرجال حالكم حيكون كيف ؟!
قال لي اها !؟ ما فاهم شي ، يعني مناسبة الموضوع دا شنو و أساساً الدخل البت شنو !؟
قلت ليهو كذاب البقول بت زي دي ما بتعجبو ، كذاب البقول ما ممكن يعرس وحده زيها ، يعني أنا بس مستغربه انت ليه مُخلي البت دي و الزيها و جاي لي أنا الفوق دا كلو مجهولة أبوين !... ما تقليل من شأن نفسي و ما عدم ثقه مني ، بس الواحد لو خيروهو بين الأفضل و الأفضل شديييد حـ يختار الأفضل شديد ! و دا الشي الطبيعي !
قال لي اها و بعد داك ؟و على فكره بنطلونها نفس البنطلون حقك!
قلت ليهو يااااخي كلامي واضح و انت فاهمني !
قال لي هسي الفرق بينك و بينها شنو ؟؟
قلت ليهو ايوه شكرني و عزز ثقتي بنفسي لكن ما تباااالغ ، البت ما شاء الله نجفه و تحسها منحوته نحت !!

🎭 رواياتي 📚 الوسام 2️⃣ 🎭

01 August 2024 12:24

#بطل_الحكايه10
مها حولي الزاكي

_اها و الخطوه الجايه شنو ؟
= حالياً بفكر يا صديق ... اتصلت على سعيد عشان نتلاقى بس لسه ما فضى لي !
_شوف لو البت دي جاسوسه ، هدفها تقتحم حياتك و تحاول تتحصل على موقع التلات أنفار الإنت حابسهم ، مفروض تكون مجهزه من كل النواحي ، مثلاً يكون عندها ام اب أسره بيت ، أهل و طبعاً كلهم حـ يكونوا مزيفين ، فـ ما قادر افهم ليه يرسلوا ليك جاسوسه من الدار الأصلاً بقت في شكوك بتدور حولينها !!
= دي النقطه الما قادر افهمها ، يمكن عايزين يلهوني بيها لوقت معين ، يمكن حسب مخططهم أول ما أنا أعرف إنو هي بت ميتم دورها حـ ينتهي و أكيد حيكون عندهم هدف من الحركه دي ، بس شنو ما قادر افهم !
_عشان كدا ما عايزك تمشي في طريق انت ما عارف نهايتو ، ما تباري البت دي لأنك ما عارف هم مخططين لشنو ، اعمل حسابك منها يا يونس و ما تضمنها
=اتطمن عامل حسابي

_______

أنا أكتر فكره قاهراني و واجعاني فكرة إني ما حـ أشوف رسيل تاني! في البدايه ما فقدت الأمل و قلت وين ما كانت حـ أمشي أزورها بس لما بابا حازم جا و اتكلمت معاهو في الموضوع و قلت ليهو عايزا أمشي و أشوف رسيل ، قال لي للأسف رسيل سافرت مع الأسره الإتكفلت بيها ... طبعاً ما كنت بعرف شي عن السفر ولا عن إجراءاتو ، لما قال لي كدا بكيت ليهو كويس و قلت ليهو يعني تاني ما حـ أشوفها !؟... قال لي ما معروف يمكن يجي يوم من الأيام و تتلاقوا ! هسي وين ناس سوزان ، وين تقوى ، وين سارا و هند مش ديل برضو كنتِ متعلقه فيهم لما كنتِ صغيره و كنتِ بتعتبريهم أخواتك الكبار ! مش في النهايه كلهم مشوا ؟! لأنو دا المفروض يحصل و لأنو ماف زول بدوم لـ زول ، دا حال الدنيا يا بتي ، رهافة قلبك دي حـ تخليك تبكي و تتعذبي في كل مره يمشي فيها زول من هنا ، لازم تكوني مرنه و يكون عندك قدره على التأقلم و التفهم و الأهم الرضا ! كلكم هنا مصيركم تفترقوا في الآخر لأنو لازم تمشوا من هنا عشان يجي غيركم و غيركم كمان حـ يمشي و يجي غيرو و هكذا ، زي ما زمااان كان في غيركم و في الآخر مشوا و جيتوا انتوا ... طبعاً كلامو بكاني زياده ، الوقت داك منار كانت بتجهز نفسها لـ عرسها و قطعت علاقتها معاي على الآخر و ليلى بقت أقرب وحده ليها ، طبعاً من اليوم داك و علاقتي بالبنات بقت نص نص ، ما بنتكلم إلا لو لزم الأمر ، كنت فاصلاهم و ما شغاله بيهم كتير ، من الدار للمطعم و من المطعم للدار ....
يوم و أنا في المطعم يونس جا داخل ، أول ما قعد مشيت عشان آخد طلبو لأني أصلاً كنت واقفه باخد طلبات أصحاب الطاوله القدامو ، قال لي مشتهي مره واحده بس تقولي لي صباح الخير !
قلت ليهو صباح الخير ... طلبك شنو ؟!
أخدت طلبو و مشيت المطبخ ، لما كل الطلبات جهزت بقينا أنا و جسار و فريال نوزعها على أصحابها ، لما مشيت ختيت لـ يونس طلبو قال لي اليوم انتِ بتشبهي لي الورده الذابله !... في شي ؟؟ قلت ليهو لا ... قال لي بس ملامحك بتقول غير كدا ؟؟ قلت ليهو بتقول شنو يعني ؟؟ قال لي بتقول إنو في شي مزعلك و مضايقك !
ما رديت عليهو و اتحركت و مشيت في نفس اليوم دا حلا رسلت لي في الواتس بتسأل عن أحوالي و كدا ، طبعاً ضفنا بعض في الفيس ، اتونسنا لحد الساعه 10م في الواتس و طبعاً كل ونستها عن يونس ! ما عارفه ليه هي لسه عشمانه فيني ، طبعاً لو اتصلت أو رسلت بـ تبدا لي كلامها بجملة :زوجة حماي!
في وقت وجيز علاقتي بيها بقت قويه و حسينا كأنو نحنا بنعرف بعض من زمان ، المهم بعد طلعت من الواتس بقيت اتصفح في الفيس لحد ما لقيت بوست لـ حلا كانت عامله شير لبوست قبل ساعتين و عامله تاق لـ راجلها و يونس ، طوالي دخلت صفحة يونس و بقيت لافه فيها ، بقرا بوستاتو و بشوف صورو ، طبعاً صفحتو كان فيها كميه من المتابعين ، ما عملت ليهو طلب صداقه بس عملت متابعه لحسابو.....
____

_لدوووونه يا عسل يا حبيبة خالتو تعالي اقول ليك دا
="سنو "؟
_انتِ مش بتقولي عمك يونس عريس ؟؟ طيب عروستو منو ؟؟
= عمو عريييييس
_ايييوه ايييوه عارفاهو عريس لكن العروس منو ؟ اقول ليك العروس منو ؟؟!.... العروس أنا ، يلااا قولي عُلا عروسة عمو
=عروسة عمو
_ يااااخي قوولي علا عروسة عمو !
=اووولا عروس عمو
_ايييييوه يا عسل ، لما عمك يونس يجي قولي ليهو عرس علا كويس يا عسل ؟؟
=كويث

•= بتقولوا في شنو انتوا ؟؟
_ولا شي بت بتتونس مع خالتها عادي !
•=المهم يا علا أنا و أمي ماشين لناس خالتو حنان ، ما حـ نتأخر ، خلي بالك من لدن دي عليك الله و ما تخليها تطلع الشارع و لو قلة أدبها و بكت ليها رجعيها البيت طوالي و أديها لأبوها ، ياسر خليتو قاعد في البيت و قال ما حـ يطلع
_طيب تمااام

_______