Telegram-канал hatrshat - رواياتي 📚الوسام 2️⃣: Unsorted

رواياتي 📚الوسام 2️⃣

24 July 2024 13:36

في الميديا ـ خشيت الواتس نون اون لاين ـ طوالي رسلت لي ـ قالت لي ي بت بتعملي شنو هنا امشي شوفي حضن راجلك وين هههههه ـ انا م عرفتة أرد ليها بشنو ـ بس رسلتة ليها ايموجي ضحك وقفلتة الداتا ...عدى اليوم وزول فينا اتكلم مع التاني ماف ...
اليوم التالت بالمساء مؤمن إتصل على امو عشان تديهو التلفون يتكلم مع اولادو بس بديهو التلفون مغلق ـ بعدها اتصل على أبوه ـ سلم عليه وسألو عن امو وأولادو ـ واذا في البيت يديهم التلفون يسلمو عليه ـ أبوه كان متردد وزي الفي حاجة بس مخبي عن ولدو ـ بعدها قال ليه صراحة ي ولدي جود أمس تعبت و ديناها المستشفى وبايتين معاها من أمس ـ بس الحمد لله اسي احسن ولبعدين حيخرجونا من المستشفى ـ مؤمن لما سمع إنو جود مرقدة في المستشفى قرب يجن ـ وقال لأبوه ليه م ريتوني ـ مش قلتة ليكم لو أي حاجة حصلت لأولادي تكلموني ـ أسي لو م كان إتصلتة عليكم ما كان وريتوني و و و ـ كان هايج شديد ـ قال لأبوه مرقدة في ياتو مستشفى انا جاي عليكم ـ أبوهو قال ليهو لالا ماداعي تجي ي ولدي انت عريس ـ انا وأمك معاها م تخاف ـ مؤمن قال ليهو انت جادي ي ابوي بتي عيانة وانا أقعد مكتف يديني وم أجي اشوفها ـ مؤمن لبس سريع وطالع ع المستشفى ....
...... لما سمعتة المحادثة البين مؤمن وابوه عرفتة إنو جود عيانة ـ خفتة عليها شديد والله ـ بعد م مؤمن قفل التلفون مشيت جمبو وقلتة ليهو جود مالا ـ قال لي عيانة ومرقدة من امس في المستشفى ـ قلتة ليهو لا حولا ربنا يشفيها ويعافيها ـ انتظرني أمشي معاك المستشفى ـ في البداية عاين لي وسكت ـ بعدها قال لي طيب البسي سريع منتظرك ـ قلتة ليه تمام ـ لبستة لي فستان لونو هادي عشان م كان عندي عباية البسها وشبط وشلتة شنطة صغيرة ـ ومشينا المستشفى المرقدة فيها جود ـ لقيناها نايمة وموصلين ليها درب ـ مؤمن كان خايف عليها شديد حسيتو شوية ويبكي والله ـ مشى قعد جمبها وبمشى ايدو في شعرها ـ أول ما فتحت عيونها وشافتو جمبها قالت ليهو بابااا ومسكت ايدو ـ مؤمن باسها في خدها وقال ليها عيون البابا الف سلامة عليك ـ بقى بحكي معاها بلطافة وهي كانت مبسوطة ـ منظرهم مع بعض خلاني أتأثر شديد لمن دموعي نزلت ـ مدام سوسن ختت ايدها في كتفي وقالت لي إنتِ كويسة ي بتي ـ هزيت ليها راسي بمعني أي ومشيت تجاه جود وابوها ـ ختيت ايدي في خدها وقلتة ليها ربنا يشفيك ويعافيك حبيبتي ـ اسي حاسة بشنو والواجعك شنو ـ قالت لي اسي ماف حاجة واجعاني بس امس استفرغتة كتير وكان عندي صداع وحمى لكن اليوم احسن ـ قلتة ليها معليش حبيبتي بكرة حتبقى كويسة ... في الاثناء دي الدكتور جاء خاشي وطمنا عليها وقال لينا م تخافو البت حالتها كويسة وكتب لينا شوية أدوية عشان تاخدها وبعدها قال لينا عادي يخرجوها ـ اهم شي تأكل كويس ويكترو ليها من السوائل ـ مؤمن شال الروشتة ومشى صرف الدواء وبعدها ركبنا كلنا العربية ومشينا البيت ...
سوسن قالت لولدها بعد كدة انت اتطمنتة على جود ـ ف سوق مرتك وأرجعو الفندق اخدو ليكم كم يوم وبعدين أرجعو ـ مؤمن قال ليها ماف لينا رجعة تاني و مشى خلاها .....
كنت قاعدة مع جود في غرفتها وبونس فيها ـ مؤمن جاء خاشي قعد شوية وبعدها قال لي هو حيمشي الفندق يجيب شنطنا البيت عشان م حنرجع تاني ـ قلتة ليهو تمام ـ بعدها قام مشى......
مدام سوسن او خالتو سوسن ـ بقيت بناديها بخالتو عشان خلاص بقى في بينا نسب وماف داعي للرسميات القديمة ـ المهم جات خاشة وماسكة صينية فيها أكل وعصير ـ بقت بتأكل في جود وشربتها العصير ـ ادتها ادويتها ورقدت نامت ....
بعدها طلعنا وقعدنا في الهول ـ قالت لي معليش ي بتي
تعبناك معانا وانتِ عروس ـ قلتة ليها م تقولي كدة احنا عايلة وأهم شي انكم تكونو بخير ـ وأكيد م حنكون مرتاحين لو إحنا بعيدين وجود عيانة فعشان كدة افضل نكون جمبها ....
بعدها قالت لي أكيد حتكوني فترانة تعالي أوصف ليكم غرفتكم عشان تاخدي راحتك ـ قمتة مشيت وراها ودخلتني غرفة كبيييرة شديد وفخمة ـ فيها سرير دبل شدة م كبير يشيلنا كلنا ههههه والاثاث والديكور حكاية تانية ـ بقيت مقلعة عيوني بس وبشوف ـ معقولة دي كلهااا غرفتنا ....
قبل م تطلع مسكتني من ايدي وقالت لي كل حاجة تمام ي بتي ـ مبسوطة? استغربت من سؤالها وكأنها حست بإنو في شي غلط ـ ابتسمتة ورديت عليها بإني مبسوطة وكل حاجة تمام ـ قالت لي الحمد لله يلا حأطلع اخليكِ ترتاحي شوية ـ قلتة ليها طيب شكرا ...
بعد م طلعت انا بقيت حايمة في الغرفة وبعاين فيها ـ طلعتة طرحتي اللابساها والشبط وقعدتة في السرير ـ قلتة ارقد ارتاح شوية مسافة مؤمن يجي يجيب لي شنطتي وأغير ملابسي ـ شالتني نومة حلوة كدة ...