🎭 رواياتي 📚 الوسام 2️⃣ 🎭

24 July 2024 13:33

#أنيس الروح #
(9)
بقلم : غزل وليد♥

ما كنت قادرة أستوعب حكاية إنو عرسي بعد شهر ـ لا كيف يعني! وكيف أنا وافقت! إتصلتة لبدور أختي وحكيت ليها الحاصل كلو ـ إتفاجئت أكتر مني ـ قالت لي دة كلوو حصل في الفترة البسيطة دي ـ بس طالما استخرتي تاني م تفكري وإتوكلي على الله ـ قلتة ليها أها حتجو العرس ـ قالت لي كييف دة كلامك أكيد حنجي انتِ ناسية انك اختي? .....
جابو لي الشيلة والشبكة وحاجات الحبسة وكل حااجة م خلو شي م جابوهو ـ والله ي جماعة عزوني عز ـ عمري م اتخيلتة انو في يوم شيلتي تكون كدة ـ أمي قالت الشيلة م نوريها الا للناس القريبين شديد خايفة من العين وكدةـ المهر حقي اديتو لأمي وابوي يتصرفو بيهو على راحتهم ـ من تصليحات البيت للأثاث ـ حاجات كتيرة كانت محتاجة تترب وتتظبط ....
أما أنا ابتديت اتحبس ـ نزلتة دخان ـ وحاولتة اجتهد شوية في نفسي عشان يكون عندي نورة العروس ....
الأيام كانت جارية سريع بس الحمد لله انجزنا كتير ـ نون صحبتي وبنات جيرانا ابدا م كانو مقصرين معانا والله ـ خدموني خدمة عمري م أنساها ليهم ♥
.......
نون : أها ي بت العريس اتصل عليك ?
بنان : امممم تخيلي لا ...
نون : جادة!
بنان : اي والله للآن م اتصل علي ....
نون : غريب! ـ باقي للعرس أقل من 10 يوم وللأن م حكيتو مع بعض ...
بنان: م عارفة بس حاسة انو مجبور ع العرس دة ...
نون : لالا ي بت مستحيل يكون مجبور ـ وبعدين الزمن دة ماف راجل بجبروه ع العرس ...
بنان : اممممم ....
نون : آحتمال خجلان هههههه ...
بنان : هه خجلان قلتي لي ....
نون : اها بدور حتجي متين ...
بنان : في اليومين الجاية ـ قبيل كنت بتكلم معاها وقالت احتمال حتجي بعد يومين تلاتة كدة ...
نون : اهااا كويس ـ تصل بالسلامة .....
.........

أها ي أيمن حتسافر معانا عرس اختي ...

ي ريت والله لكن ماف طريقة ـ مع الشغل صعب اقدر امشي ـ والايام دي السوق ماشي معاي كويس شديد ..
(أيمن بعد م رجع من الدهب فتح ليهو بوتيك كبير بتاع كريمات وعطور ـ سبحان الله ربنا فتحها عليهو وشغلو بقى ماشي كويس شديد وظروفو اتحسنت جدااـ بدا يصين بيتو واشترى اثاث جديد ـ المهم امورو بقت ظابطة ـ وحتى للعرس اشترى لبدور توبين ولأولادو أي واحد فيهم لبستين ـ واشترئ توب هدية لنسيبتو وجلابية لنسيبو وفستان هدية لبسمة ـ وتوب عروس راقي ل بنان ـ وقال لبدور توديها ليهم )...

خلاص تمام احنا لبعد بكرة ان شاء الله حنتحرك ـ عشان تقطع لينا التذاكر ...

طيب تمام بقطعها ليكم .....

.........

سوسن : مؤمن اتصلتة لعروستك?
مؤمن : لا
سوسن : ي ولد بتبالغ ـ عرسكم خلاص م باقي ليه شي وللآن اتصال ساي م اتصلتة عليها!
مؤمن : أمي انتِ مش عايزاني اتزوج ـ ياهو حتزوج ـ تاني رجاء م تضغطي علي أكتر من كدة الفيني مكفيني..
سوسن : هووي ي ولد على شرف علمك بت الناس الحتعرسها دي إياك تعاملها معاملة م كويسة ...
مؤمن : خلاص بدينا! ـ طيب كالأتي العرس دة لما يتم علاقتي بيها انا حر فيها ـ وماف انسان يتدخل ـ طالما غصبتوني على العرس يبقى البحصل بعدو بخصني لوحدي ـ والطريقة البعاملها بيها انا البحددها أعتقد ...
وقام طلع .... سوسن بقت خايفة انو ولدها م يقدر يتفق مع البت وحياتهم من بدايتها تكون مشاكل ـ لكن هي عندنا ثقة إنو بنان حتكون ليهو الزوجة المناسبة وحتقدر تسعدو وتغير فكرو عن الزواج ....
.....
بدور سافرت مع اولادها و وصلو بالسلامة ـ كانت متحمسة شديد لعرس اختها ومن لحظة وصولها م قعدت ساي اليوم كلو بتكون شغالة واي حاجة ناقصة بتحاول تتمها وتظبطها .....
بدور : يعني خلاص بعد يومين حتبقى مرت راجل ...
بنان : تخيلي بس ـ والله حاسة اني زي البحلم ي بدور والبحصل دة م حقيقي ...
بدور : طبيعي تحسي كدة ـ انا برضو ايام عرسي كنت حاسة بنفس الشعور دة ـ بس اهم حاجة خليك ِ رايقة وان شاء الله كلو حيعدي على خير ...
بنان : ان شاء الله ي رب ...
بدور : بالنسبة للوصايا بعدين بالليل ح أوريك ليهم ...
بنان خجلت وسكتت ...
بدور : ههههههه خجلانة قلتي لي ـ اي كملي الخجل كلو اسي عشان بعد العرس حينعدم هههههه...
بنان : بدور يخخخ ..
وفعلا بدور ورت اختها اي حاجة و وصتها ـ تعمل شنو من أول ليلة وتتصرف كيف ـ حاجات كتيرة ورتها ليها ـ بنان كانت مقلعة عيونها بس وبتسمع ـ وشايفة كلام اختها دة وهمي وهمي ـ ابتدت تحس بقلق وتوتر وخوف ـ كل م تغمص عيونها وتتذكر كلام بدور النوم بطير من عيونها .....

........
الايام عدت سريع وخلاص بدت مراسم العرس ـ العرسان أواب ومؤمن عملو ليهم حنة العرس في صالة ـ والمعازيم كانو كتااار ـ ومعظمهم طبقة هاي كلاس (برجوازيين وكدة) ـ طبعا النسوان تحت تحت بتكلمو عن العروس ـ وبقولو سوسن مشت اختارت لولدها بت غريبة ومسكينة عشان تقدر تتحكم فيها وبتبرمجها ع كيفها ـ اقاويل كتيرة اتقالت واي زول ونظريتو ...

🎭 رواياتي 📚 الوسام 2️⃣ 🎭

24 July 2024 13:33

بقيت بفكر وراسي قرب يطق من التفكير ..... تاني يوم قلتة اتصل لمدام سوسن واوريها اني م موافقة م عايزة اعشمها واخليها تنتظر ....
الو مدام سوسن كيفك
تمام الحمد لله انت كيفك ..
الحمد لله بخير ...
اممم بصراحة بخصوص موضوع امس امممم ـ كنت مترددة وم عارغة ابدا كيف ...
احكي ي بتي سامعاك ...
امممم ـ صراحة مدام سوسن انتِ انسانة طيبة ولطيفة جدا ـ تعاملك معاي حلو شديد ـ وبحترمك جدا والله ـ وبالجد ممنومة لكل حاجة حلوة قدمتيها لي .... بسس كمان م بقدر اوافق على عرض الزواج دة وبتمنى م تزعلي مني ....
ليه ي بتي ـ سبب رفضك شنو ـ احكي لي بكل شفافية ومن دون خجل وخوف ـ هل عندك زول في حياتك?
امممم ـ الموضوع م كدة ـ بس بصراحة يعني ...
قولي ي بنان م تترددي ..
ااا ـ يعني ـ ليه اخترتيني انا من دون كل البنات ـ وفالنفرض وافقت البضمن شنو انو علاقتنا انا و ولدك م تنجح أو احتمال م يتقبلني وقتها حتكون مشكلة ـ انا في نظري يعني لو خليتيهو يختار الانسانة البحبها او انسانة من اختيارو هو لوحدو بكون افضل صح ....
طيب ي بتي ـ اول حاجة ولدي هو الطلب مني افتش ليه عروس يعني اي بت بختارا ليهو هو موافق + ليه اخترتك من بين كل البنات ـ لانك مميزة ـ مميزة في كل حاجة انا قستهم في وجهة نظري ـ بالاضافة لانو عايزاك تكوني للتوأم زولة في مقام امهم ـ وعشان اكون معاك صريحة اكتر ولدي معتبر اولاد اخوه المتوفى زي اولادو وعايز الزولة الحيتزوجها تكون ليهم ام كمان ـ وبصراحة حسيتك انتِ الوحيدة الحتكوني قدر المسؤولية دي ـ انتِ الوحيدة الحتحبيهم وتعتبريهم زي اولادك ـ الحنية الجواك الكنت بتتعاملي بيها معاهم خلتني احس انك افضل انسانة تكون شريكة حياة لولدي ـ ف ارجوك ارجوك بنان وافقي على الزواج دة ـ وافقي تكوني زوجة لولدي وام لأحفادي ـ مستعدة اعمل كل شي عايزاه ـ اطلبي اي طلب ـ بس المهم عندي توافقي ـ عليك الله اجبري بخاطري وخليني انبسط باقي عمري الفضل دة ـ خليني اشوف اولادكم انت ومؤمن ولدي قبل م أموت .....
سوسن كانت بتحاول بكل الطرق عشان تخلي بنان توافق ـ بنان بقت مشوشة شديد وم عارفة تعمل شنو ـ في جواها في صوتين صوت بقول لي لا م توافقي لانو دي مخاطرة وم معروف مستقبلك مع الانسان دة حيكون كيف ـ وفي صوت بقول ليها اتوكلي و وافقي عشان خاطر التوأم وحبك ليهم ـ بعد صرااع من التفكير قررت تستخير وتشوف البحصل شنو .... صحت نص الليل صلت ركعتين قيام الليل و وركعتين استخارة ـ بعدها حست براحة كدة غرييبة وحلمت انها قاعدة مع جود وجواد وهما في حضنها ومبسوطين ومعاهم راجل جمبهم بتونس معاهم ـ هنا حست انو الموضوع فيه خير بالنسبة ليها وقررت توافق وتتوكل على الله ....
بنان كلمت امها وابوها ب إنها حتتوكل وتوافق ـ انبسطو بقرارها وقالو ليها نحنا داايما معاك في كل قراراتك ـ اتصلت على اخوها الفي ليبيا وكلمتو بالحاصل ـ رحب بالموضوع وقال ليها ربنا يقدم الفيهو خير ـ بعد تلاتة يوم ام بنان اتصلت على مدام سوسن وكلمتهم بخبر موافقتهم ـ وانو بتهم برضو وافقت ـ مدام سوسن قربت تطير من الفرح وحددت ليهم اليوم الحيجو يتقدمو ليها رسمي من ابوها ومنها يحددو مواعيد العرس ـ وفي اقرب جمعة جوهم في البيت ـ مدام سوسن زوجها واختها سهى واعمام مؤمن برضو بس مؤمن م جاء معاهم ـ جابو ليهم قولة خير الحلة كلها بتتكلم عنها ـ البشوفها بقول شيلة م قولة خير تبارك الله ....بعدها حددو العرس يكون بعد شهر فقط عشان عايزين يعملوه مع عرس اواب ود اخت سوسن ـ اعتذرو لضيق الوقت بس ضروري العرسين يتعملو سوا ـ اهل بنان وافقو وقالو ماف مشكلة وحيحاولو يظبطو اي حاجة في فترة الشهر دي ان شااء الله ....
.......
لما عرفتة العرس حيكون بعد شهر واحد فقط ـ حسيت انو الموضوع دة لعب لعب وم حقيقة ـ نون صحبتني طبعا وريتها كل شي من قبل م يجو يتقدمو لي ـ كانت محمساني شديد ومبسوطة لي ـ كنت بقول ليها ي نون دة عرس شنو وانا للان م بعرف العريس ولا هو بعرفني ـ وفجاة تجي امو تقول عايزاني ليهو ـ عليك دة م كلام غريب ـ قالت لي م تفكري كتير وزيجات كتيرة حصلت بنفس الطريقة دي ومعظمها زيجات ناجحة الحمد لله ـ اتفاءلي ي بت وخليك مبسوطة انتِ عرووووس ♥
نون الله يخليها لي ع طوول بتخفف عني وبتهديني في عز خوفي م انحرم منها ي رب♥....
.......
طبعا اهل اواب اتقدمو ل البت العايزها قبل م يتقدمو ل بنان و وافقو ♥ ...
........

مالك ي مؤمن الايام دي ماا على بعضك ـ انت كويس?

مؤمن كان سرحاان وم جايب خبر لشي ...

مؤمنننن بتكلم معاك شارد ويين ...

اااا قلتة شنو م سمعتك ....

مالك ي زول ليك فترة انت م على بعضك ....

اخخخخ ي معتصم م عارف اقول ليك شنو ولا شنو بس الحمد لله ....

احكي ياااخ نحن اصحاب على شنو لو م حكيت لي همك ....

مؤمن جر نفس وحكي ل صحبو الحاصل كلوو ...
يعني اسي عرسك بعد شهر?

تخيل بس!

🎭 رواياتي 📚 الوسام 2️⃣ 🎭

24 July 2024 13:33

اليسوي وفي لحظة زعل قال ليها مش العرس الناقين لي فيهو دة ومطلعين عيني عشانو دة موافق اعرس م عندي مشكلة ـ بس ختي في بالك ي إمي انا لاعندي بت في حياتي ولا بحب لي بت ولا بتربطني علاقة حب ب بت ـ امو قاطعتو وقالت لي لو على البت هيينة انا بفتش ليك احسن بت ـ رجع قال ليها بس لعلمكم انا لو عرستة بس ح اعرس عشان ارضيك م أكتر ولقدام لو حصلت اي خلافات مع الانسانة الحتزوجوني ليها دي م تلوموني خالص وأهم نقطة تختوها في بالكم انو عندي أولادي أهم شي في الدنيا دي فلو تعاملها معاهم م عجبني صدقيني ح اطلقها وارميها ليكم في الشارع ..... مؤمن قال الكلام دة وهو بتنفس زي التنين من الزعل وطلع خلاهم ....
سوسن وسهي بقو بعاينو في بعضهم وساكتين ـ أول مرة مؤمن يعصب للدرجة دي ويتكلم ب أسلوب زي دة قدام أمو... سهى قالت لسوسن اها عندك ليهو عروس جاهزة! ـ سوسن سكتت وبقت بتفكر بعد مسافة قالت ليها بالنسبة للعروس في بالي في وحدة معينة ومتأكدة انها الزولة المناسبة لمؤمن ـ سهى قالت ليها بعرفها انا? سوسن قالت ليها لا م بتعرفيها بس البت مؤدبة ومحترمة وباين عليها من اسرة محافظة وملتزمة ـ سهى قالت ليها حمستيني اعرفها ـ اها احكي لي بتعرفيها من وين ? سوسن بقت بتتكلم مع اختها وحكت ليها عن البت العايزاها لمؤمن وكيف اتعرفت عليها .....
...........

عدت فترة تلاتة شهور وأيمن لسة م رجع من الدهب ـ بس المطمن بدور انو بتصل ليها ع طول ـ في الاسبوع مرة أو مرتين ـ بس اخر اسبوعين أيمن م اتصل ليها وهي قدر م تتصل ليه بديها التلفون مغلق والحاجة دي خوفتها شديد وقلقت بيها ـ اليوم كلو بتبكي وبتقول اكيد ايمن حصلت ليهو حاجة لأنو دي م من عوايدو انو يختفي وم يتصل عليها الفترة دي كلها ـ بقت بتتخيل إنو البير حق الدهب وقع فيهو ـ او حصل ليهو حادث ـ بقت بتخت إحتمالات سوداوية ل إختفاء أيمن ... عرفة وزوجها تعبو شديد وهما بحاولو يهدوها ويقنعوها انو أيمن كويس وان شاء الله حيتصل ليها ـ بس هي خاالص م قادرة تقتنع بكلامهم وخلاص ختت انو أيمن دة ي مات ي حاصلة لي حاجة م كويسة ... عدت فترة وايمن لسة م منو خبر وبدور خلاص شوية وتجن ....
بالمساء كدة بدور كانت قاعدة برة في الحوش وراقدة في السرير ـ بتفكر اذا فعلا ايمن مات حتعمل شنو وحتقدر تعيش كيف هي واولادها ـ افكار كتيرة كانت بتدرور في عقلها ـ في الأثناء دي في زول دق الباب ـ واحد من الشفع جرى فتح باب الشارع ـ وبقو بكوركو بابااا جاء بابا جاااء ـ في اللحظة دي بدور قامت بهجمة وبقت بتعاين تجاه الباب ـ أول م شافت أيمن قعدت في الواطة ختت التوب في وشها وبقت بتبكي زي المات ليها زول ـ أيمن أول م شافها مشى قعد جمبها في الارض وحضنها عليه ـ بدور بقت شاداه من جلابيتو وختت راسها في صدرو ولسة بتبكي ـ ايمن بقى بهدي فيها وبقش ليها في دموعها اعتذر منها انو خوفها ـ قال ليها انو تلفونو اتسرق عشان كدة م قدر يتصل ليها ـ واصحابو المعاه م عندهم تلفونات ـ بعد تعب حتى سكتت وانتبهت لروحها انها في حضنو واولادهم وناس البيت واقفين بعاينو ليهم ـ هنا حست بالخجل وزحت منو ـ اولادو اترمو في حضن ابوهم وبقو بتونسو معاهم ـ شوية شوية الاجواء بقت سعيدة ورجعو مبسوطين ـ عرفة جهزت الغداء ورصت الصينية للرجال براهم وهما اتغدو مع اولادهم ـ عرفة قالت ليها مش كلمتك ايمن كويس بس انتِ جرسة وخوافة ـ بس م بلومك الحب بعمل اكتر من كدة هههههه ـ بدور قالت ليها والله لو كنتِ مكاني كان عملتي اكتر من كدة يختي وبقو بضحكو ....
عرفة : هيي يختي بما إنو راجلك جاء قومي اتجيهي قاعدة ليها شنو ـ تعالي اولع ليك حفرة الدخان تقعدي فيها ...
بدور: لالا ماف داعي ي عرفة ...
عرفة : انتِ عويرة ولا شنو ـ م شايفة روحك غبشاء كيف ـ قومي قومي شوية وبجهز لي الحفرة ـ ع فكرة بكون مشتاق ليك فما ظريفة م تتجيهي ليه وغمزت ليها
بدور: عرفة يخخ بطلي تشغيلاتك دي ....
..... بدور خشت الحمام شالت جسمها بالحلاوة واتنضفت ـ ولقت عرفة مجهزة ليها حفرة الدخان جااهزة ـ اتمسحت بزيت الدخان وقعدت مسافة لمن الدخان شال فيها تماام ـ واتدلكت ....
بالليل عرفة خلت أولاد بدور ينومو مع اولادها في غرفة واحدة عشان تخلي أيمن وبدور ياخدو راحتهم لوحدهم ....
أيمن لما جاء خاشي الغرفة بدور غمضت عيونها وعملت فيها ناايمة ـ مشي رقد جمبها وباسها في خدها ...
أيمن : عارفك صاحية حبيبتي ـ فتحي عيونك الحلوين ديل وعايني لي ...
بدور فتحت عيونها وقبلت عليهو ـ كانت ساكتة وبتعاين ليهو من دون م تتكلم ....
أيمن : عارف روحي خوفتك علي شديد وقلقتة بيك ـ بس حقك علي ـ اعفي لي ي روحي انتِ ...
بدور: ( جرت نفس) أيمن تاني م تسافر وتبعد عني ـ ارجوك ودموعها نزلت ...
أيمن حضنها عليهو شديد وقال ليها بوعدك م ابعد عنك من بعد اليوم ي قلبي انتِ ♥عاين ليها في عيونها نظرات كلهاا حب ورغبة وباسها في شفايفها وبعدها حصل الحصل ♥ بكل لهفة وشوق شديد♥
......
يتبع ....

🎭 رواياتي 📚 الوسام 2️⃣ 🎭

24 July 2024 13:32

مدام سوسن حكت ل بان كل القصة وهنا ي داب فهمت انو الراجل القبل شوية دة بكون عمهم اخو ابوهم وهو في مقام أبوهم وحتى إنو بقولو ليه بابا من كترة تعلقهم بيه ...
.........
بعد مدام سوسن حكت لي كل القصة والله م قدرتة امسك دموعي ـ فراق ولدها وزوجتو مؤثر عليهم جدا ـ قلبي كان مقطوع على التؤام ـ احساس انك تفقد امك وابوك دة اصعب احساس في الدنيا وخاصة اذا فقدتهم في سن صغير 💔💔💔...
الراجل أو بالأصح عمهم جاء وقال لي خلاص راقو بتقدري تمشي تواصلي معاهم الحصة ـ قلتة ليه تمام ومشيت عليهم ـ حاولتة الطف ليهم الجو و واصلنا دراسة عادي لحدي م خلصنا الحصة ....
لما كنت طالعة لقيت عمهم قاعد برة في حديقتهم جمب حوض السباحة وشغال بتلفونو ـ رفع عينو شافني ورجع نزلها في تلفونو ـ أبو تقلة دمك ـ قلتها في سري ـ حرفيا نهائي م هضمتو وشو العابس دة ....طلعتة مشيت البيت ....
...........

أيمن سافر الدهب ـ وقبل سفرو بيوم ساق مرتو و وأولادو وداهم بيت أخوه هناك ـ رحبو بيهم ـ مرت اخوهو زولة طيبانة وبشوشة ـ قالت ليهم اعتبرو البيت بيتكم ـ بعدها أيمن مشى وتاني يوم سافر ... بدور كانت مقلقة بخصوص سفر زوجها للدهب والبقلق بيها اكتر إنو هناك الشبكة كعبة شديد ومهما تتصل على ايمن رقمو م بخش معاها إلا اذا هو اتصل عليهم ـ لأنو بركب في حتة عالية عشان يلقط الشبكة ....
مرت اخو راجلها إسمها عرفة ـ كانت بتقول ليها خففي من قلقك شوية وان شاء الله زوجك برجع ليك بالسلامة... بعد كم يوم كدا بدور بدت تتألم مع القعدة معاهم وحتى اولادها كانو مبسوطين مع اولاد عمهم ـ اليوم كلو بلعبو مع بعض ... اما بدور وعرفة داقنها ونسة ومتموضعين مع بعض .....
.......

يمة قالت لي بدور اختك دي طولنا م اتكلمنا معاها كدي اتصلي عليها اديني النسلم عليها ـ قلتة ليها حاضر يمة ـ اتصلتة عليها واديتها اتكلمت مع امي وابوي وبسمة واخر حاجة اتكلمتة معاها انا ـ وطبعا كالعادة ونستي معاها بتجر شديد ـ شمارات الدنيا كلهاا بنقولها هههههه ـ حكيت ليها عن التوأم وقدر شنو حبيتهم واتعلقتة بيهم ـ المهم م خلينا شي م قلناه ـ حتى انها حكت لي قدر شنو هي مبسوطة مع عرفة ومقضنها جبنات ساي وحوامة هههههه ـ قلتة ليها اياامك انبسطي سااي ...
بعد م خلصنا مكالمتنا طلعتة ملابس البيت كلها غسلتهم ـ بعد جفو ولعتة مكوة الفحم وبديت اكوي .... نون صحبتي جات لقتني شغاالة مكوة ـ قمتة سلمتة عليها بشووق ـ قالت لي المختفية مشتااقين والله شنو نسيتيني كدة يختي ـ قلتة ليها ي قلبي انت بتتنسي والله بكرة الجمعة كنت جاياك اقيل معاك عدييل ـ ي زولة تجي برضو م معناها اذا جيتك اليوم بكرة م حتجي ـ قلتة ليها هههههه حااضر ـ المهم اتونست معاي شوية وقالت لي نتلاقى بكرة نتم باقي ونستنا تمام ـ قلتة طيب حااضر ـ دعتني ومشت .....
يتبع ....

🎭 رواياتي 📚 الوسام 2️⃣ 🎭

24 July 2024 13:32

احسن تقعدي مع اخوي ومرتو ـ هما طيبين وبحبوك...
طبعا الكلام دة م عجبني بالزات اني اقعد معاهم في البيت بس سكتة م عرفتة اقول شنو ....
م تخافي حبيبتي ان شاء الله حتتسهل ـ انت بس ادعي لي ـ وان شاء الله لو ربنا فتحها لي سريع خلال شهرين تلاتة شهور بالكتير ح أرجع ان شاء الله...
م عارفة اقول ليك شنو بس ربنا يسهلها عليك ...
اميين ـ انت بس كتري من الدعوات دي ...
اها وحتسافر بعد كم يوم ...
الاسبوع الجاي ان شاء الله يوم السبت ..
يعني بعد 4 يوم لانو اليوم التلاتاء ...
اي ان شاء الله ....
..........

تاني يوم مشيت الدرس في نفس مواعيد امس و وصلتة مع الزمن ـ مونا فتحت لي الباب ـ جابت لي موية وقالت لي اتفصلي على غرفة الحصص والاولاد أسي بجو ـ سألتها عن مدام سوسن قالت لي قاعدة في غرفتها ومشت تاني م قالت شي ...
جود وجواد جوخاشين سلمتة عليهم وبديت ادرسهم ـ طبعا بديت ليهم من الحروف والأرقام بالانجليزي كمراجعة لانهم اخدوها من لما كانو في الروضة وقلتة ليهم بكرة ح اديهم فيها تِست والبقفل الاختبار حتكون عندو هدية ـ حسيتهم اتحمسو لما قلتة ليهم كدة ....
بعد م خلصنا دراسة وطلعتة لقيت مدام سوسن قاعدة في الصالة وماسكة تلفونها بتتكلم بيه ـ لوحتة ليها ب أيدي سلام وكدة ـ عملت لي حركة بيدها بمعني دقيقة م تطلعي ـ خلصت مكالمتها سريع وسلمت علي ـ سألتني عن اليوم كيف ـ قلتة ليها كلو تمام والله والاولاد م شاء الله جادين ووملانين حماس ـ قالت لي كدة طمنتيني الحمد لله ـ لو لقيتي صعوبة في اي شي معاهم كلميني تمام ـ قلتة ليها حاضر مدام ـ بعدها استأذنتة منها وطلعتة عشان امشي .... لما فتحتة باب الشارع وعايزة اطلع صادفتة راجل عايز يخش البيت برضو ـ قلتة السلام عليكم براحة وزحيت من قدام الباب سمحتة ليه يخش بالأول ـ رد على السلام وخشة ـ بعدها طلعتة انا..
طبعا مع الاستعجال م شفتو كويس ولا ركزتة بكون منو ـ بس قلتة اكيد حيكون أبو التوأم ـ وانا ماشة في الشارع بقيت بفكر في أم الاطفال ديل وين ـ للآن م شفتها ـ م اشتغلتة بالموضوع كتير وقلتة ي بنان دة شي م بخصك ركزي في شغلك وبس ....

..... مساء النور أمي السمحة ..

امو عاينت ليهو وسكتت ـ عرفها زعلانة من نقاش امس ـ مشى قعد جمبها باس ايديها وحاول يراضيها بكلمتين حلوات لحدي م فصلت ورجعت عادي تتونس معاه ...
صح ي أمي عايز أسألك ـ قبل شوية لما كنت خاشي البيت صادفتة واحدة غريبة طالعة من البيت ...
قاصد ست العباية السوداء?
اي تقريبا ياها ...
ايواا ـ دي زاتا مدرسة جود وجواد الجديدة ...
الشافعة دي?
هههههه بالغتة ي ولد م للدرجة دي ...
جادي ي أمي ـ متأكدة دي أستاذة?
البت خريجة جامعية ـ وم شاء الله باين عليها شاطرة وحتى الاولاد اندمجو معاها وحبوها ...
غريب ـ بس م باين عليها خريجة جامعية البشوفها بقول بت ثانوي ...
اي فعلا تحس ملامحها اصغر من عمرها ـ بس عموما البت كويسة ...
اهاا لالا تمام ....
الاولاد لما شافو عمهم جو جاريين ...
بابااااا
عيوون البابا ...
وبقى بحكى معااهم ومشاغلات ـ وحكو ليهو عن الحصة الاخدوها ـ قالو ليهو انو الاستاذة قالت ليهم بكرة عندهم اختبار والبقفلو عندو هدية ـ مؤمن قال ليهم يلااا انتو قدرها حبايبي ـ اجتهدو كويس عشان تاخدو الهدية تماام...
حاااضر بابا ....
......
*** بنان زي عارفين عمرها 26 سنة بس ملامحها بتبين إنها اصغر من كدة ـ البشوفها بقول عمر18 أو بتقرا في الثانوي م خريجة جامعية ـ متوسطة الطول ـ لونها أسمر على قمحي ـ ملامحها عادية بس في نفس الوقت جذابة ـ ـ مش في ناس ملامحهم بتكون عادية بس فيهم حاجة جذابة فيهم قَبول كدة ـ يلا بنان من النوع دة ـ ضحكتها حلوة شديد وعيونها حلوين ـ مايلة للنحافة بس جسمها حلو ـ بحيث إنو مناطق الأنوثة عندها باينة شديد ...أحلى حاجة فيها شعرها ـ النوع السبيبتو ناعمة طويل وكثيف .... يلا بنان من النوع الما عندها اهتمام كتير بروحها ـ وحكحة البنات والمسوح والحاجات دي م عندها ليها حاجة ـ م بتجتهد انها تبرز جمالها عشان تعجب الناس ـ زولة على طبيعتها .... معظم لبسها عبايات ـ ومحتشمة جداا ـ طرحتها دي م بتخليها تقع من شعرها بالغلطـ ....

يتبع ....

🎭 رواياتي 📚 الوسام 2️⃣ 🎭

24 July 2024 13:32

السعودية شغالة دكتورة هناك ونادرا ما تجي السودان ....
....يتبع ....

🎭 رواياتي 📚 الوسام 2️⃣ 🎭

24 July 2024 13:32

#أنيس الروح #
(4)
بقلم : غزل وليد ♥

كلمتة أمي بحكاية الشغل الجابتو لي نون وشرحتة ليها الحاصل ـ حسيتها م متطمنة من حكاية إني أمشي وأشتغل في بيت ناس غريبة وكدة ـ قالت لي ي بتي الشغل في بيوت الناس دة مشاكلو كتييرة والزمن بقى صعب و و ـ المهم من صيغة كلامها حسيتها متخوفة ـ بس حاولت أطمنها وقلتة ليها إن شاء الله م بتجيني عوجة ـ والناس الحأشتغل عندهم ديل أهل نهلة جارة نون صحبتي ـ انتِ بس أدعي لي وادعى كمان الراتب يكون كويس عشان اقدر أساعدكم ولو شوية يمة ـ قالت لي ربنا بفتحتها عليك فتوح العارفين ويسهلها ويسخرها عليك ويحفظك ويحميك ي بتي ـ آمييييين يمةةةة ♥
الساعة 3 م لما جات إستحميت ـ سرحتة شعري وكويت عبايتي الحأمشي بيها ـ كنت متحمسة بس في نفس الوقت خايفة ـ اتوكلتة على الله وطلعتة عشان امشي ـ طبعا مشيت كداري لحدي م وصلتة المسجد الوصفتو لي المرة أمس وبقيت بتذكر في الوصف القالتو لي ـ وفعلا لقيت البيت ع حسب الوصف الوصفتو لي و وقفتة قدامو ـ البيت تحلف تقول قصر م شااء الله ـ قدامو شجرة بان طويلة ـ دقيت الجرس مرتين بعدها جات وحدة فلبينية فتحت لي الباب ـ قلتة ليها دة بيت مدام سوسن ـ قالت لي ايوة اتفضل ـ أول م خشيت بقيت فاتحة خشمي ـ البيت من برة كلو نجيلة خضرااء وزهور بشتى أنواعها وأشكالها وعصافير ملونة في كذا قفص ـ وكمان فيها حوض سباحة وسيييع وحواليه سراير كدة غريبة زي حقات التصييف ديك البشوفها في المسلسلات ـ وحاجات كدة م عرفتها دي شنو ومهمتها شنو ـ بعدها فضلتني جوة في صالة الضيوف وقعدتة ـ انا كنت بعاين مخلوعة من الشافتو عيني ـ ي ناس بيت لكن م بيت عادي ـ بيت بشبه بيوت الأحلام البشوفها في التلفزيون ديك في المسلسلات والأفلام ـ بيوت الأتراك الفخمة والرهيبة يلا زيوو ـ الأثاث والديكور حكااية براها ـ كنت حاسة إني في حلم وخالص م حقيقة ـ وحسيت ب برودة كدة شديدة ـ وكمان م شايفة مكيف والمروحة م شغالة ـ طيب الهوا البارد دة جاي من وين? ( تكييف مركزي وزولتنا م عارفة الحاجة دي) بقيت بتلفت بس ومبهورة ونسيت انا جيت لشنو اصلا هههههه ـ شوية كدة جات خاشة مرة سمحة سماحة تبارك الله ـ كبيرة نوعا ما في العمر تحسها في نهاية الخمسينات بداية الستينات كدة بس من النوع المحافظـ وم بظهر عليه تقدم العمر ـ صحتها كويسة رااكزة كدة ـ وشها دة يلمع من الراحة تبارك الله و الحناء م تديك الدرب سوداء لااامعة ولابسة ليها خاتمين دهب كبااار ـ وماسكة ليها أيفون كبير فيهو 3 كميرات ـ بالجد عز زي العز ـ جوا قلبي شغالة أقول م شاء الله تبارك الله خايفة أدي المرا عين والله هههههه
جات ب بشاشة سلمت علي سلام حلو التقول بتعرفني ـ صراحة حبيتها شديد بعد الطريقة السلمت علي فيها ـ عارفين ليه ـ لأنو غالبا النسوان البكونو مستواهم الطبقي عالي بكونو شايفين روحهم ومفتريين ـ بس دي مبدئيا حسيتها طيبانة كدة ـ الفلبينية الشغالة عندهم جابت لي موية وعصير ـ مدام سوسن قالت ليها نادي الأولاد خليهم يجوني هنا ـ قالت ليها حاضر مدام ...
شوية كدة جو نازين ولد وبت حلااة الدنيا عليهم ـ حلوين حلا وكيوتين شديييد ـ مدام سوسن قالت ليهم سلمو على أستاذتكم الجديدة ـ سلمو علي وبوستهم في خدهم حبيتهم جدا والله ـ بس البت الصغيرة عملت حركة خلتني اتحسس شوية ـ لما بستها في خدها مسحت خدها بإيدها وكأنها اتضايقت من حركتي ـ ومشت قعدت جمب حبوبتها ـ قلت لروحي عادي م كل الاطفال بحبو يحتكو بالناس الغرباء من البداية ....
مدام سوسن نادت مونا دي الفلبينية الشغالة عندهم وقالت ليها تودي الشفع غرفة التدريس تبعهم ـ جات وساقتهم ـ قبل م امشي عشان ادرسهم قالت لي بالنسبة للراتب حابة يكون شهري ولا أسبوعي? ـ قلتة ليها بفضل يكون أسبوعي ـ قالت لي طيب تمام ـ والمبلغ حيكون في حدود (..) أسبوعيا ـ ولو ضربتيها شهريا حيكون (..)اها مناسب معاك? ـ طبعا لما قالت رقم المبلغ ـ أصابني ذهول وبقيت م مصدقة ـ المرة دي جادة ولا بتهظر? مبلغ زي دة عمري م حلمتة بيه ـ بقيت سرحانة وم مصدقة ـ قالت لي مالك ساكتة م مناسب معاك شايفاه بسيط? ـ فقتة من سرحي وقلتة ليها لالالا ابدا ابدا مناسب شديد وابدا م عندي كلام ـ قالت لي طيب حلو ـ يلا مونا حتجي تسوقك وتوديك غرفة الدراسة وطوالي باشري معاهم الدراسة ـ قلتة ليها حاضر مدام..
والله عقلي عمل ايرور عديل كدة ـ والفرحة م سايعاني
ومن جواي بقول الحمد لله الحمد لله سهلتها وسخرتها علي ي رب ♥ ...
مونا ودتني الغرفة الحأدرس فيها الأطفال ـ كانو قاعدين في كراسي ب أدراج خشبية مريحة ـ ولقيت سبورة بيضاء واقلام ماركر ودرج عالي فيهو كتب الانجليزي الحأدرسها ليهم وقلم حبر احمر للتصحيح ـ احساس فصل عديل ـ بالجد مبهورة من نظامهم دة ـ فعلا ناس هاي كلاس ...

🎭 رواياتي 📚 الوسام 2️⃣ 🎭

24 July 2024 13:32

#أنيس الروح#
(3)
بقلم : غزل وليد♥

أبوي حالتو الصحية بدت تتحسن بصورة ملحوظة الحمد لله ـ حتى انو نزل السوق وبدأ يسترزق لينا من أول وجديد ♥
بالجد ي جماعة بعد م شفتة ابوي بدأ يتعافى حسيت براحة نفسية شديدة والضغط الكنت حاسة بيه خف شديد ـ وجود الأب ضروري جدا في الحياة والله ـ الفترة البسيطة الكان راقد فيها دي امورنا جاطت شديد بس الحمد لله حاليا الأمور تحت السيطرة ....

.... كنت بغسل في العدة حقت الغداء نون صحبتي جات خاشة بيتنا ـ باب الشارع كان فاتح م مقفول ـ قالت لي ي بت قوومي خلي العدة الفي يدك دي جايبة ليك خبر ظاااابط شديد ـ طبعا من الحماس غسلتة ايديني من الصابون سريع سريع ومشيت قعدتة جمبها ههههه ـ زولتكم بتموت في الشمارات ...
نون: طبعااا لقيت ليك شغلل ...
بنان : جااادة ـ كيف و وين ...
نون : نهلة جارتي مش بتعرفيها?
بنان : ااي مش دي الساكنة في الناصية وبيتها فاتح علي الظلط?
نون : بسسس ياها ـ يلا امس مشيت ليها عشان اشرب معاها القهوة ولقيت مقيلة معاها مرت حماها ـ مرة مبحبحة ي يمة والدهب م يديك الدرب ـ عاد دهب زي دهبها دة عمري م شفتو ...
بنان : اها انجزي سريع وين الشغل في الموضوع!
نون : اصبري ي بت ماشة ليك في الموضوع ـ المهم خلال ونستها قالت بتفتش ليها أستادة انجليزي شاطرة لأحفادها تدرسهم حصص خاصة يعني تجيها في البيت وتدرسيهم ـ يلا طوالي نطيت وقلتة ليها عندي صحبتي استاذة انجليزي وشاطرة م شااء الله ممكن أكلمها ليك ـ وافقت وقالت لي خلاص اكلمك بالموضوع وادتني رقمها ـ قالت لي اذا بقيتي ع الموضوع تتصلي ليها في اقرب وقت عشان تتفق معاك طبعا فرصة زي ي جاتك في يدك مستحيل تضيعيها صح ..
بنان : العرض كوييس والله ـ لو ظبط معاي حتكون حاجة حلوة ـ بس انتِ قلتِ شرطها امش ليها في البيت صح ـ يعني الحصص حتكون في بيتها ـ والحاجة دي محتاجة مني مواصلات وكدة ـ وخايفة بيتها يكون بعيد واضطر اركب اكتر من مواصلات واحدة ـ ف دي براها ميزانية ....
نون : ي زوولة انت بالاول اتصلي ليها وافهمي الحاصل وساكنة وين بالضبط ـ م تتسبقي الحوادث ـ احتمال الحتة الساكنة فيها قريب وم يحتاج منك تركبي مواصلات زاتو +اذا حتدفع ليك مبلغ حلو حيغطي ليك حق المواصلات زاتو ...
بنان : امممم تمام ـ طيب اديني رقمها إتصل عليها اسسسي ...
نون ملتني الرقم واتصلتة على الرقم ـ المرة الأولى م ردت ع التلفون ـ تاني رجعتة اتصلتة عليها بعد جرسين ردت علي ....
السلام عليكم ورحمة الله ..
وعليكم السلام ورحمة الله ..
اهلين مدام كيفك ـ معاك بنان عاطف استاذة الانجليزي الحكت ليك عنها صحبتي نون ..
اهليين حبيبتي كيفك ـ صح فعلا حكت لي عنك وكنت منتظرة تلفون منك ..
والله اول م حكت لي بالموضوع طوالي اتصلتة عليك ...
تسلمي ان شاء الله ـ المهم عندي احفادي اتنين توأم بت و ولد اعمارهم 7سنوات وعايزاك تدرسيهم الانجليزي لانهم ي دااب في طور مبكر وعايزة البيزك حقهم يكون قوي وبما انو حاليا مؤجزين فقلتة احسن يستفيدو من زمنهم ـ عشان كدة كنت محتاجة لي استاذة شاطرة وحمولة تقدر تتعامل مع الاطفال ـ وبالنسبة للسعر ان شاء الله نتفق فيه ...
ان شااء الله ي مدام ماف مشكلة ـ وبتمنى أكون قدر المسؤوليه دي ان شااء الله ـ وبالنسبة للحصص كم يوم في الاسبوع ـ والزمن البناسبكم متين? والدراسة حنبداها متين ...
من بكرة اذا م عندك مانع ـ والحصص تكون الاسبوع كلوو عدا الجمعة والسبت اخديهم راحة ليك و للأطفال ـ انا ساكنة حي ال (...) جمب جامع (..) بتعرفيه صح?
ايواا ـ اي بعرفو ...
حلوو ـ بعد م تصلي الجامع بس اول عشرة ع يمينك تالت بيت قدامو شجرة بان طويلة كدة ...
ايواا تمام فهمت الوصف ...
حلو ـ والحصة تبدا 3ونص ...
خلاص تمام لبكرة ان شاء الله ي مدام ...
طيب ان شاء الله يلا مع السلامة ...
الله يسلمك ي رب ـ وع كدة خلصت المكالمة ....
قلتة لنون المرة ساكنة في () والحي دة م بعيد شديد مننا ـ هو م قريب بس برضو م بعيد شديد ـ يعني برجليني عادي ممكن امشي ـ قالت لي برجلينك دي م صعبة شوية ـ قلتة ليها مضطرة بدل اخسر القروش في المواصلات استفيد منها واطلع بدري شوية من البيت عشان احصل مع الزمن ـ قالت لي ظاابط ربنا يوفقك حبيبتي ... حضنتها علي شدييد وقلتة ليها شكرا ليك كتييير ي قلبي ـ لولاك م كان لميت في الفرصة دي ....
صراحة كنت متحمسة وفي نفس الوقت خايفة ـ م عارفة خايفة من شنو بالضبط ـ امكن عشان تجربة جديدة وكدة ـ دعيت الله إنو يسهلها علي ويجعلها فاتحة خير وبركة في شغلي ....
.......


م شااء الله ي بدور توبك رااقي عديل وحلوو...
تسلمي ي رب عيونك الحلوين ...
اشتريتيه بكم ...

🎭 رواياتي 📚 الوسام 2️⃣ 🎭

24 July 2024 13:32

#أتيس الروح#
(2)
بقلم : غزل وليد♥

حابة إنو البيبي الأول نسميه منو ...
امممم لو بنوتة نسميها مِنة♥ ولو ولد نسميه يوسف♥
ي سلاام إختيارك راقي للاسماء ...
من ذوقك ي روحي ...
وشهر العسل حابة يكون وين ..
بصراحة ي ريت لو نمشي عمرة ح انبسط شديد والله...
عيوني ليكِ ـ انتِ تأمري والعايزاه كلو ببقى♥
قبيل كنت متابع تشطيبات بيتنا وخلاص م باقي كتير ـ ان شااء الله بالكتير 3 او اربعة شهور والبيت حيكون جاهز ـ صح م سألتك لون البوماستك حق البيت حابة نعملو ياتو لون ...
في رأيي تكون ألوان هادية ـ مثلا رمادي وابيض ـ او سماوي وبني فاتح ...
طيب حلوو ـ اذا حابة ممكن بكرة اجي اسوقك وتشوفي البيت ولو في اي اضافات حابة نعملها عشان توريني ..
خلاص تمام ماف مشكلة ....


....... بنان بنان ي بتتتت بتكلم معااك ...
بنان : أأيوة معاك ي بسمة ـ بسم الله مالك بتكوركي ...
بسمة: سرحانة وين قدر دة من قبيل بنادي فيك وم سامعاني ...
بنان: بري م سرحانة في شي ـ بس كنت بفكر في حاجة شاغلة بالي ...
بسمة : ايواا ـ المهم عايزة أقول ليك إني عايزة قروش الشهر ـ قبيل قربتة انطرد ـ الاستاذة قالت لي لو بكرة م جبتي القروش م تجي المدرسة ....
بنان : دة كلام شنو كمان ـ المشكلة انو اليومين دي حق الأكل بنلمو بعد تعب ـ قروش الشهر دي نجيبها من وين
بسمة: طيب والحل?
بنان : كلمي الاستاذة انو تصبر عليك شوية ـ يومين تلاتة وحتدفعيها...
بسمة: بري والله اخير لي اقعد في البيت لحدي م القروش تتوفر ...احسن لي من أتذل قدام البنات ..
بنان : خلاص انا بكرة بمش معاك المدرسة وبحكي مع الاستاذة ...
بسمة : طيب تمام ...
تاني يوم مشيت معاها المدرسة وقابلتة استاذتهم وحكيت معاها بلطافة شرحتة ليها ظروفنا وتصبر علينا شوية لحدي م ربنا يفرجها علينا ـ سبحان الله الاستاذة ردت علي رد حلو وقالت لي مامشكلة وقت م نلقى قروش تجي تسددهم وحتى لو م قدرتو تدفعوها م مشكلة ح أعتبر بسمة حالة خاصة ومعفية من الرسوم ♥
انبسطة شديد والله ـ قلتة الحمد لله اتسهلت ورجعتة البيت مبسوطة ....
........

مساء مساء ع الحلويييين ...
أولادو جو جاريين وإترمو في حضن أبوهم بعد م رجع من الشغل ـ اداهم مصاصاتهم ورجعو واصلو لعبهم ...
بدوري ♥
عيونهاا ...
كدي تعالي ...
بدور طلعت من المطبخ ومشت قعدت جمبو في السرير ـ أيمن فتح الكيس الكان في إيدو وطلع توب رهييييب بتطقيمتو ـ برنسيسة وشبط عالي .. بدور لما شافت التوب ختت ايدها في خشمها ومصدوومة ـ التوب دة بالزاات عاجبها شديد ومكسرها ونفسها تشتريه ...
إيمن انت جاااادي ـ اشتريت التوب دة لي اناااا ...
هههههه أمال لمنو غيرك ـ أكيد ليك إنتِ ي روحي♥
حضنتو وعينها دمعت ـ م عارفة اشكرك بالجد ـ م حصل طلبتة شي وانت م جبتو لي ـ بس انت عرفتة كيف انو التوب دة بالزاات عاجبني ...
يعني عجبك?
شديييييد ـ اصلا كنت اموت واشتريه ...
قبيل مشيت محل بتاع تياب وطلبتة منو يديني أرقى توب عندو ـ وقال لي التوب دة آخر صيحة ـ وعرض لي كذا لون ـ ف إخترتة اللون دة عشان عارفك بتحبيه ...
حبيبيييي م انحرم منك ي رب ...وباستو في خدو ...
تستاهلي كل حاجة حلوة لأنك حلوة♥
بدور م قدرت تمسك دموعها ...
اشششش الدموع ليه بسس .. وبقى بقش ليها دموعها ب أطراف أصابعو ...
أيمن بالجد أنا م عارفة أقول ليك شنو ـ بس من اليوم الاتزوجتني فيه وم حصل انا طلبتة شي وانت رفضتة تلبيه لي ـ احيانا بحس روحي أنانية لأنو طلباتي كتيرة ـ رغم آنو ظروفنا على قدر حالنا بس انت ابدا م محوجني شي ـ ولا محوج أولادك شي ـ ربي يحفظك لينا من كل شر ـ وحضنتو ♥ .....
أنا لو م أسعدتكم في الدنيا دي فايدتي شنو! أنا واجبني ألبي كل إحتياجاتكم وأبسطكم ولو بالبسيط♥
.....
* في مكان تاني *
الف الف مبرووك ي بووص على ربحك للقضية ...
الله يبارك فيك ي رب ....
اوووو بوصنا الف مبروووك ياااخ ...
الله يبارك فيكم ي رب ....
هالة من التبريكات إنهالت عليهو ....
زول بذكاءك وكفاءتك النجاح أكيد شبهوو
تسلمو كتيير ي بوصااات والله ....
....... القضية دي كانت تحدي كبير بالنسبة ليك والحمد لله كسبتها ـ انا كنت واثق إنك قدرها ...

الحمد لله دائما وأبدا ـ بالجد زي م قلت ي معتصم القضية دي بالزات كانت تحدي كبير بالنسبة لي ـ بس بحمد الله وشكره كسبناها ....

طيب بالمناسبة الظابطة دي اليوم أنا عاازمك ومن كل قوااي العقلية ....

ههههههه مستحييييل ...معتصم طه عبد الكريم شخصيااا عازمني انا ـ دة الليلة يوم السعد ....
ههههههههاي فرصة العمر ي صحبي ـ كلمة تانية وبلغي العزومة ....

لالا سكتة والله ـ لو فوتة الفرصة دي حتكون كاارثة يلا ارححح ..

..مؤمن احسن تلم لسانك عليك ....

بتذلني كمان! ـ بس مضطر استحمل ههههههه...

...... طلعو الاتنين مشو ليهم مطعم اكلو فيه وشربو قهوتهم ـ وقعدو اتونسو شوية ....
يلا ي فردة بعد كدة ح أمشي البيت ـ مصدع شدييد وعيني طالعة ...

قداام ـ اصلا اليوم كان ضاغط بالنسبة ليك ...

🎭 رواياتي 📚 الوسام 2️⃣ 🎭

24 July 2024 13:31

#أنيس الروح #
(1)
بقلم : غزل وليد♥

الوظيفة دي أنا في أمـَس الحاجة ليها والله ـ لو بالجد قبلوني فيها تاني م عايزة شي ....
.... إن شاء الله حيقبلوك فيها بس قولي ياارب ..
إن شااء الله ي رب دعواتك لي ي نون ..
... دعوااتي داايما معاك حبيبتي ـ يلا أنا ح أرجع البيت وراي كوم شغل ...
... مالك مستعجلة كدة يخخ ـ أقعدي شوية عليك الله ..
ي ريييت ـ بس غسالة الملابس ملااانة ملابس العيال ـ لبس عشان يلبسوه م عندهم ـ خليني أمش قبل م الكهرباء دي تقطع وأتسمبك ...
... ههههه خلاص عديلة ي زولة ـ يلا مع السلامة لحدي م نتلاقى ...
....... بعد م مشت بقيت بفكر هل حيقبلوني في الوظيفة دي ولا لا ـ وإذا م قبلوني أعمل شنوو ـ صراحة خاتة أملي كلوو في فرصة التوظيف دي ـ ظروفنا الفترة الأخيرة بقت صعبة شديد ـ خاصة بعد أبوي حاليا طريح الفراش و م قادر يمشي الشغل ـ شغلو كان باليومية ـ أمي بتبيع الفول والتسالي بتختهم قدام باب البيت وبتطلع منهم شوية مصاريف ـ بقيت بفكر في مصاريف دراسة أختي بسمة حنجيبها من وين ـ احنا تلاتة بنات و ولد ـ الكبيرة بدور ودي متزوجة عندها بت و ولد ساكنة في ولاية تانية غير الولاية الإحنا ساكنين فيها بعدها أنا بنان عاطف عمري 26 سنة خريجة تربية لغة إنجليزية ـ اتخرجتة لي سنتين ـ وللان م لقيت لي وظيفة ـ اشتغلتة استاذة في مدرسة خاصة فترة ستة شهور وبعدها مديرةالمدرسة استغنت عني و وظفت مكاني وحدة كدة بت أهلها ـ زي م عارفين الشغل بقى واسطات وكدة .... كل م ألقى فرصة توظيف بقدم ليها بس للاسم م بتظبط معاي ...
بعدي أخوي محمد ودة م خلص تعليمو بسبب ظروفنا الصعبة دي و وقف دراسة من لما كان في تالتة ثانوي ـ اسي سافر ليبيا ليهو قرابة شهرين برضو بخصوص يفتش ليه شغل ـ وأصغرنا بسمة ودي بتقرا أولى ثانوي ـ أبوي عاطف السماني رجل بسيط بشتغل اعمال حرة ـ وحاليا ليهو اسبوعين راقد بسبب المرض عندو ضغط وقلب ـ اما أمي عائشة ربة منزل وبتحاول تساعد ابوي في مصاريف البيت البتطلعهم من بيع الفول والتسالي ...
...... أثناء سرحاني أمي نادتني ...
بنان ي بتي تعاليني ساعديني ربطي معاي أكياس التسالي دي ...
حااضر يمة جااية ...
مشيت وبقيت بتونس معاها وبنربط في الأكياس ...
عائشة : الكهرباء قربت تخلص ي بتي وعشان نشتريها م عندي ولا قرش والله ـ ياهو البسيط العندي دة بنأكل وبنشرب منو ... وابوك زاتو عندو علاجات خلصت مفروض نجيبها ليهو ـ غيتو الحمد لله بس ...
بنان : م تشيلي هم يمة إن شاء الله بتتسهل ...
عائشة : إن شاء الله ي رب ..
...... بعد كلام أمي دة شلتة هم أكتر وبقيت بفكر نجيب قروش من وين ـ كمية من الحاجات محتاجنها بس الله كريم ـ الليل كلوو شلتو تفكير والنوم جافى عيوني ....
تاني يوم مشيت لنون صحبتي واتدينتة منها شوية قروش أمشي بيهو حالنا لحدي ما ربنا يفرجها علينا ..
نون دي م مقصرة معانا خالص والله ربنا يديها العافية ـ بين كل فترة والتانية بتجي تغمت لينا شوية قريشات وبتقول لأمي أعتبريني زي بتك وفي أي زمن احتجتو لشي كلموني طوالي وم تترددو ـ م بحب أتدين منها خالص إلا اذا اتعصرتة شديد لأنها بترفض تشيل القروش لما ارجعها ليها ـ والمرة دي قلتة ليها من اسي اذا حتتعاوري اني ارجعهم ليك وريني عدييل عشان م اتدين منك والحمد لله وافقت انها حتشيلهم لأنها عارفاني جادة في كلامي وم حأتراجع عنو ....
.....

أيمن عايزة لي توب عشان احضر بيه عرس أختك ـ تيابي القديمة كررتها كتير وعايزة اظهر بحاجة جديدة ...
م يغلي عليك حبيبتي ـ بس والله اليومين دي معصور شديد والشغل زاتو م ماشي ـ بس ان شاء الله بحاول ادبر ليك القروش واجيب ليك التوب العايزاه ...
عارفة لو عندك م حتبخل علي ـ وم تعصر على روحك ـ انا ح أشد من حنان جارتي توب من تيابها ...
لالا ي بدور انتِ عارفاني م بحب إنك تشدي أي حاجة من زول ـ اديني يومين تلاتة وبدبر ليك حق التوب ان شااء الله ...
طيب حبيبي م انحرم منك ي رب ...
ولامنك ي السمحة ـ يلا انا طالع ...
طيب مع السلامة ـ وجيب معاك شوية سلطة للغداء..
حاضر ....
بعد م زوجها طلع اتصلت على اختها عشان تتونس معاها شوية ....
بنان : هلا هلا مشتاقين ي بتت ويين مختفية كدة ...
بدور : والله تمام ـ طيب م تفقديني سااي ـ قولي عندي اخت خليني اتصل عليها واشوفها حية ولا ميتة ...
بنان : حقك علي ي اختي ـ والله في بالي اتصل اسلم عليك واتونس معاك ...
بدور : ي زولة خيير ـ اها طمنيني عنكم وامي وابوي وبسمة كيفهم ...
بنان: والله نحمد لله بخير. ـ وكلهم كويسيين ...
بدور : ليه صوتك حزين كدة الحاصل شنو ي بت ...
بنان : ماف شي بس ياهو الامور كلها معكسة ي بدور ..

🎭 رواياتي 📚 الوسام 2️⃣ 🎭

05 June 2024 23:37

تعملوا هي ، طبعاً ناصر قال ما عايز شاي و طوالي دخل جوه ، أنا قعدت معاهم شويه بعدها لحقتو ، لمن جيت داخله لقيتو خاتي لابتو قدامو ، ما رفع عينو و عاين لي ، مشيت قعدت جنبو و قلت ليهو ناصر انت زعلان مني ؟؟ ما رد علي ، قلت ليهو حاول تفهمني ! كيف يعني أنا عروس ياداب جيت البيت أقول ليهم عن اذنكم أنا قايمه أدخل غرفتي !! الموضوع ما بزعل والله يا ناصر !
برضو ما رد علي ، اتنهدت و وقفت على حيلي و أول ما إتحركت هو مسك يدي ، لمن إتلفت عليهو ابتسم و قال لي معقوله أزعل منك لسبب بسيط و سخيف زي دا ؟؟ قلت ليهو يعني ما زعلان ؟؟
ضحك و قال لي كنت بمثل عليك والله و كان عندي نيه اعمل ليك دراما و تراجيديا بس عشان عارفك بتاااعة حركات إتراجعت و قلت هسي بت الناس دي تقلب الهظار جد و تندمني على خفة دمي و اللحظه الفكرت اعمل فيها مقلب ، ضحكت و قلت ليهو والله ما شاء الله بقيت تخاف مني شديد ، وقف على قصادي و قال لي أنا بخاف من أي حاجه بحس انها ممكن تخلينا نفهم بعض غلط أو تزعلنا من بعض و تفرقنا ، حتى الهظار دا ما عايزو يزعلك مني ثانيه ، كفايه علينا الأيام و الشهور العشناها و نحنا بعيدين عن بعض ، ضماني و قال لي ما عايز أدي الأسباب فرصه عشان تفرقنا تاني ، ما عايز اي شي حتى لو كان صغير يخلق سوء تفاهم بيناتنا و يخلينا نبعد عن بعض مره تانيه ، أنا بدونك ولا شي ، انتِ بالنسبه لي كل شي ، غمضت عيوني و هو محاوطني بيدينو و قلت ليهو انتظرت اليوم دا كتير رغم إني في لحظات كتيره كنت بفقد الأمل و بقول ما حـ نرجع تاني ، قال لي حتى لو اتلاشت كل الأسباب و المبررات كنت حـ اخلق سبب و مبرر من ماف عشان أرجعك بيهو ، عشان نعيش اللحظه دي و الحياة البنستحقها و نحنا مع بعض ، عارفه قبيل لمن فتحت الفيس لاقاني اقتباس صغير كدا أول ما قريتو طوالي انتِ خطرتي على بالي الما بتفارقيهو لحظه ، قلت ليهو بقول شنو الإقتباس دا ؟؟
قال لي : "و انتِ التي تجعلين الدار مزهرة ، و انتِ التي تمنحين الورد ألواناً "❤️
قلت ليهو حبيييتو شديد ، قال لي كأنو انكتب ليك ، قلت ليهو على فكره انت حالياً مسجلني بشنو في تلفونك ؟؟ غيرت الإسم القديم مش ؟؟!
قال لي لا ، في الماضي و الحاضر و المستقبل انتِ " زهرة فؤادي " قلت ليهو و أنا قبل أيام سجلتك بـ فارس أحلامي ، قال لي يا زوله ! يعني الزمن دا كلو مسجلاني بناصر حااااف كدا ؟!ضحكت و قلت ليهو ايوه ! قال لي يااا بخيله ! زحيت منو و قلت ليهو على فكره أنا ما ناسيه انت وعدتني بشنو ! قال لي و أنا عند وعدي ! حصل وعدتك و ما أوفيت بالوعد ؟؟ قلت ليهو لااا بس حبيت أذكرك ... حج ...اثيوبيا... رواندا ... ضحك و قال لي مستحيل أنسى والله ، حـ نحج و نضحي و نعيد مع أهلنا و بعدها نسافر أثيوبيا المجنناني بيها و منها لـ رواندا ، قلت ليهو حـ أفلس بيك ، قال لي أنا مستحيل أبخل عليك بحاجه ، لو عايزا بلفلفك العالم دا كلو المهم انك تكوني مبسوطه ... قلت ليهو بري والله ما عندنا قروش نلف بيها العالم دا كلو 😂 عايزا أزور اثيوبيا عشان سمعت انها حلوه شديد و عايزا أمشي رواندا عشان أشوف كيف هي إتطورت بعد الحرب الحصلت فيها ، إنتشلت نفسها من القاع إلى القمه عشان كدا نفسي أزورها و أشوفها ، قال لي حااااضر من عيوني ، بس هسي خليني ندخل عالمنا الخاص و نعيش اللحظه ❤️❤️

"أرى في قربكَ الإكتفاء عن الناس ، أنتِ سعادتي و موطني و أشياء لا توصف ولا تُحكى ، أرى العالم جميلاً بكَ فلا شيء أجمل منك ولا شيء أسعد مني بك "❤️

النهايـه ....

🎭 رواياتي 📚 الوسام 2️⃣ 🎭

05 June 2024 23:37

رسل لي ريكورد و قال لي : عشان ما تستعجلي ساي ، أول شي قولي لي الرسل ليك الصوره دي منو !؟ ماف زول غيرنا أنا و امي و اسرة رياض في البيت !
قلت ليهو ماف أي مشكله يا ناصر و أنا فهمت الحاصل ، خليها بس تصبر لي ، قال لي منو ؟؟
قلت ليهو بفهمك بعدين و طوااالي مشيت نكت الصور القديمه و شلت أسمح صوره لي أنا و ناصر ، استثنيت كل الناس إلا ولاء و أختها وجدان عشان ما تشك إني مخصصاها ليها هي و بس ، عملتها إستوري و كتبت عليها : امبارح كان أجمل يوم في حياتنا نحنا الإتنين ، و تاني ختيت صوره لـ ناصر و كتبت عليها : امبارح أثبت لي اني بالجد بعني ليك كتير و أثبت لكل الناس انك شاريني و ما بتقدر تعيش بدوني ... كنت عايز اخت استوريز أكتر بس قلت ما أتمادى و أبيخ الموضوع .... طبعاً هي جات ناطه و شافت الإستوري بس ما قالت شي ، مروا زي 3 دقائق كدا بعدها ردت و قالت لي ما شاء الله انتوا رجعتوا لبعض ولا شنو ؟
قلت ليها ايوه و العرس في الأسابيع الجايه ان شاء الله... طبعاً أخدت ليها صنه بعدها قالت لي ايوااا ربنا يتم ليكم على خير ... حالياً ناصر معانا بس ما جاب لينا سيره !
قلت ليها بكون إتلخم ، قبل شويه كنت بتكلم معاهو لو عارفه إنو ما كلمكم كنت ذكرتو و قلت ليهو كلمهم بس ماف مشكله أكيد انتوا معزومين للعرس ... قالت لي بالنسبه للصوره الأنا خاتاها إستوري ، الصوره عفويه ساي عشان ما تفهمي غلط ، قلت ليها لا لا ياخ البفهمني غلط شنو !؟ الصوره عاديه و ما فيها أي شي و أصلاً ناصر رسل لي كل الصور الإتصورتوها كلكم مع بعض ، ما شاء الله حلوين شديد .... طبعاً مع إني ما شايفه تعابير وشها بس حسيتها حـ تنفجر من الزعل ، تاني ما ردت علي خالص و عاد أنا إنبسطت شديد ، المتخلفه دي كانت عايزا تشككني في ناصر و تزيد الوضع سوء بيناتنا و هي ما عارفه إنو الميااااه رجعت لمجاريها ، أكيد عملت ليها وجع بطن و جلطه بسبب الكلام القلتو ليها ، تستاااهل عشان تاني ما تعاين لحاجه ما بتخصها ، طبعاً ياداب اتأكدت إنو دي هي الكانت بترد علي لمن اتصل على ناصر ، متأكدة هي عااارفه أنا منو و بتصل بصفتي شنو عشان كدا كانت بتتعمد ترد علي و أنا اشيييل و أزعل و قلبي يتحرق ....
بليل زي الساعه 10 كدا ناصر رسل لي و قال لي اها أحكي لي ، فطوالي فتيت ليهو الموضوع من بدايتو لنهايتو و قلت ليهو البت دي خاته عينها عليك عشان كدا كانت بترد علي لمن اتصل عليك و انت يا حليلك قايلها بترد بكل حسن نيه ! عرفت ليه أنا بضايقت لمن تجيب سيرة اخوات صحبك ديل ؟؟ شفت كيف احساسي طلع في محلو و ما خاب ظني !... ضحك و قال لي والله غيتو انتوا البنات ديل ! هسي عليك الله عرفتيها كيف و أنا ما حاسي بأي تصرف مريب من ناحيتها ! قلت ليهو نحنا بنعرف حركات و خساسات بعض !
قال لي غيتو حيرتيني و بقيت أخاف منك ، قلت ليهو خاف والله و اعمل حسابك ... قال لي ماف داعي اعمل حسابي ، انتِ معاي و حـ تتكفلي بتطفيش و تطير كل الفراشات الحوليني ، قلت ليهو صدقت والله ، من اليوم ما حتكون في حياتك غير إناث معينات ، أمك ، اخواتك ، و أنا ، فاهم ولا لا !؟ ضحك و قال لي و أنا بقدر أقول لا بعد كلامك دا ؟ حاضر عُلم يا ستي و كلامك على العين و الرأس و القلب ❤️
تاني يوم مباشرة ليك زيدان مرسل لي ، كاتب لي السمعتو صح ؟؟ طبعاً خفت و اتوترت مع إني ما بعمل في حاجه غلط ! غمضت عيوني و لمن فتحتهم كتبت ليهو ايوه ... كان خاشي فـ طوالي رد علي و قال لي و ليه ما كلمتيني ؟؟... قلت ليهو ورده و أبوي ما كلموك ؟!... قال لي كلموني بس كنت متمني اعرف حاجه زي دي منك انتِ.... طبعاً تاني ما عرفت أقول ليهو شنو ، طلعت برا الدردشه و أنا مزاجي مُعكر ، رسل لي ريكورد ، ما فتحتو إلا بعد دقيقه او اكتر ، قال لي أنا زعلان شديد منك و... فجأه جاني صوت ورده و هي بتقول ليهو حرام عليك البت بتكون خاته قلبها على يدها هسي و عايزا تبكي ، ما تشيلي هم يا مها ، والله أخوك دا مستهبل ساااي و عايز يمقلبك ، زيدان قال ليها يمقلب راسك دا هسي خربتي علي خطتي! ما حـ ارسل الريكورد دا ، قالت ليهو والله ترسلو رجاااله ، قال ليها يا بتي دا لي أنا ! قالت ليهو اييييوه ليك انت دا ذاتك !
طبعاً الريكورد خلص هنا و اظن في النهايه ورده مشّت كلامها عليهو و رسلت الريكورد 😂 طبعاً بالجد في البدايه خفت و إنخلعت ! اخخخ كلام ورده ريحني ! معناها زيدان اقتنع ، طوالي اتصلت عليهو مكالمة فيديو ، رد و كانت معاهو ورده ، انبسطت شديد بشووفتهم ، ورده قالت لي متصله فيديو عشان تتأكدي ولا شنو ! لا لا اتطمني دا أخوك ذاتو ، بما اني قلت ليك بقنعو يعني بقنعو ، زيدان قال ليها يا زوله انتِ ما ليك علاقه أنا اقتنعت براي و أصلاً سعادة أختي الأموره أكيد بتهمني ، طبعاً كمية السعاده الحسيت بيها ما كانت عاديه ، قال لي انتِ زعلانه مني ؟؟ قلت ليهو في البدايه زعلت منك و انصدمت فيك انت و امي و ابوي بس خلاص عذرتكم ، قال لي أنا والله ما اتصرفت كدا إلا عشانك ، قلت ليهو عارفه ، عارفه يا زيدان

🎭 رواياتي 📚 الوسام 2️⃣ 🎭

05 June 2024 23:37

_ من غير ممكن ، اسألي طوالي
= قلت انك جيت السعوديه قبل يومين ، طيب قضيتهم وين اليومين ديل ؟
_ كنت حـ اجي البيت طوالي ، بس أم رياض دي كانت تعبانه شويه و مرقده في المستشفى فـ اضطريت أمشي ليهم ، و تاني يوم طلعناها من المستشفى و تالت يوم ياهو جيت البيت
= اهاااا.... و انت عرفت من وين انها مرقده في المستشفى ؟؟
_ من رياض صحبي !... هم اتصلوا عليهو و كلموهو فـ لمن عرف إني جاي السعوديه وصاني أمشي عليهم و اطمنوا عليها !
=......
طبعاً قريت رسالتو و ما قلت حاجه ، كنت بفكر في الموضوع ، رسل لي ريكورد قال فيهو : نفسي اعرف انتِ خايفه أو متوتره من شنو ؟! يعني كل ما ينذكر اسم رياض أو اسرتو بحسك بتضايقي !
قلت ليهو لا لا مااااف أي شي ، قال لي معناها في شي !!... قلت ليهو لا مااااف !
قال لي بعد دا كلو ما واثقه فيني و خايفه إني افكر في وحده غيرك ؟؟ انتِ في زول مكذب عليك و قايل ليك إنو أنا بحب وحده من أخوات رياض ديل ولا شنو ؟😂
قلت ليهو صراااحة صراااحة أنا واثقه فيك بس ما واثقه في بنااات حواء ديل ، الواحده عااادي تخت عينها على راجل متزوج أو خاطب أو حـ يخطب و تحاول تصل ليهو بدون خجله !
قال لي لا لا ياخ انتِ ليه مُفكره فيهم كدا ؟؟ شفتي شنو من أخوات رياض ديل و بعدين يمكن انتِ لاقيتيهم مره وحده بس أو اتنين صح ؟
قلت ليهو برضو ما تضمن البنات !
قال لي غيتو انتِ !
قلت ليهو عارف في حاجه تاني خطرت على بالي ، قال ليها اها دي أي بت دي الحاسه انها بتتقرب مني أو بتحبني ، دي أي بت العايزا تتهميني بيها ، ضحكت و قلت ليهو لا لا ما كدا بس اتذكرت مصطفى صحبك الخسيس و ولد عمو الكتل الطالب عماد فخر الدين ، كنت بفكر انهم محظوظين و ما اتعاقبوا على الجريمه العملوها ، قال لي الذكرك بيهم شنو و بعدين هو ما صحبي ، ما تقولي لي صحبك تاني ، و الحاجه التانيه ربنا ما بظلم زول ، لو هو و أسرتو قدروا ينقذوا نفسهم من عقاب الدنيا ما حـ يقدروا ينقذوها من عذاب الآخره ، و على فكره مصطفى دا العرفتو إنو انضم للدعم السريع و أهلو و ولد عمو المجرم مشوا برا السودان بس الحرب دي خسرتهم أملاكهم كلها ، و عاجلاً غير آجل حـ يرجعوا السودان لأنهم على وشك الإفلاس ، ساعتها حـ يضوقوا الذل و الإهانه و يعيشوا عيشه عمرهم ما جربوها ، المهم ربنا ما بظلم و ما بنسى زول و كلو لخير ان شاء الله ....قلت ليهو فعلاً كلو لخير.....
المهم بعدها غيرنا الموضوع و بقينا نتكلم عن حاجات بتخصنا نحنا الإتنين و عن شكل حياتنا زمان و هسي و كيف حيكون في المستقبل ... طلعنا عيوب بعض و الأخطاء العملناها في زواجنا و كيف حـ نعالجها عشان ما نقع في نفس الحفره مرتين .... و نحنا بنتكلم كدا خطرت على بالي حاجه فـ طوالي سجلت ليهو ريكورد و قلت ليهو : عندي سؤال يا ناصر بما اننا جبنا سيرة بيتنا في أركويت ، أنا و أبوي لمن كان مشينا عشان نشوف البيت و دخلنا لـ ناس خالتو ماجده .......... الخ .... طبعاً أنا عارفه انك مستحيل تعمل كدا بس مجتبى ولد خالتو ماجده ليه يتهمك اتهام زي دا ! يعني عشان بس مشيت قبل ما الطيران و يقصف البيت الكنتوا قاعدين فيهو يطلعك استخبارات و يقول انت البلغت عن أخوهو !!
قال لي و ان شاء الله انتِ صدقتي إني إستخبارات ؟😂 قلت ليهو لو صدقت كنت جيت و قلت ليك انت في الإستخبارات من متين أو عملت نفسي رايحه !
قال لي يا ستي أنا والله ما لي علاقه بـ الحصل لمنذر ولد خالتو ماجده و برئ زي براءة الذئب من دم يوسف عليه السلام ، و الكلام دا قلتو أكتر من مره لـ مجتبى و لخالتو ماجده ذاتا و هي مصدقاني بس ولدها مجتبى هو المُصر إنو أنا البلغت عن أخوهو ، على أي أساس ما عارف والله ! و طلوعي لحكمه بس ، ربنا أراد لي اطلع في التوقيت داك و إلا كنت حالياً ميت معاهم ، و صدقيني حتى لو كنت متأكد إنو دعامي رغم كرهي الشديد للدعامه ما كنت حـ أبلغ فيهو إحتراماً للجيره و لوالدتو الخاله ماجده !
قلت ليهو والله العظيم أنا مصدقاااك يا ناصر ، أصلاً مستحيل انت تعمل كدا ، بعرفك أنا ، زول فاهم و واعي و حنين و قلبك مليان رحمه ... قال لي يا سلاااام أرح أرح و تاني ؟😂
المهم قعدنا نتونس شويه لحد ما نعست و نمت و خليت الشبكه فاتحه ...
لمن صحيت تاني يوم أول شي فتحت تلفوني لقيت نفسي في الدردشه ، أنا نايمه و هو كان بونس فيني ساي ، في النهايه قال لي شكلك نمتي لأنو ما معقوله تقري الرسائل و ما تردي 😂 المهم تصبحي لي على ألف خير ....
رسلت ليهو : ناصر صبااااح الخير ، امبارح نعست و نمت من دون ما أحس ...
طبعاً صحيت نشيييطه و مبتسمه و مزاجي رااايق و بالي مرتاح و قلبي برفرف من شدة السعاده ، و أهلي ديل يعاينوا لي ساي و المشكله كل ما واحد فيهم يعاين لي إبتسامتي بتزيد رغم إني بحاول أكون عاديه قدامهم بس والله ما قدرت و كانت ماسكاني ام فريحانه ، و نحنا بنشرب في الشاي رشا كانت قاعده جنبي فـ بقت تشغلها لي ، لكزتها براااحه و قلت ليها هوووس ياخ !

🎭 رواياتي 📚 الوسام 2️⃣ 🎭

03 June 2024 21:59

طبعاً كلام رشا دا طمني شويه و خلاني ارتاح من ناحية خالتو فريده ، قالت لي يلا يلا اطلعي برا كلهم منتظرنك ، نططت عيوني و قلت ليها شنووو ! عايزين مني شنو ؟! قالت لي عايزنك ترقصي ليهم ! يا بت انتِ هبله حيكونوا عايزنك لشنو يعني !
قلت ليها لا لا أنا ما طالعه و بعدين ما مظبطه نفسي ، ضحكت و قالت لي اطلعي ساي ، ناصر شافك في حالات اسوأ من دي ، شافك و انتِ صاحيه من النوم تاني في شنو !... قلت ليها قولي ليهم نايمه أو اي شي ، قالت لي شفتي دي الحركات الما بتنفع ، عارفاك متوتره و أي شي بس لازم تطلعي ، هسي أبوي يقوم يفهمك غلط و يقول انك ما موافقه !
طبعاً لمن قالت لي كدا خوفتني فـ طوالي لبست عبايتي و الطرحه و بقيت مارقه معاها ، طبعاً ماشه عليهم و أنا حاسه رجليني بضربوا في بعض ، نهاي ما عاينت لـ ناصر ، سلمت على أهلو و لمن جيت اسلم عليهو كنت منزله راسي ، المضحك إنو هم قايلين إني ياداب شفتو و ما عارفه إنو جا راجع و ما عارفين اننا قبييل شفنا بعض و صورنا حلقه كامله 😂
قعدت و أنا خجلانه و متوتره و الزاد توتري لمن خالتو فريده قعدتني جنبها ، طبعاً حست بي ، قالت لي اتطمني نحنا موافقين و ماااف أي زول عندو إعتراض ، أصلاً الأهل حيكونوا عايزين شنو غير انهم يشوفوا أولادهم مرتاحين و مبسوطين !... طبعاً هي بتقول كدا عشان تحاصر أهلي و تختهم في حته ضيقه و ما تديهم فرصه عشان يتعرضوا ، أبوي اتكلم معاي و حكى لي إنو ناصر جايب أهلو و جاي عشان يتقدم لي مره تانيه و قال لي القرار قرارك ، قال الكلام دا و هو بعاين لي جوه عيوني ... حسيت نفسي في حته ضيقه ، بقيت مره أعاين لـ أبوي و مره لـ ناصر البهز لي في راسو عشان أقول لأبوي موافقه ، خالتو فريده ختت يدها على كتفي و قالت لي جاوبي يا بتي ! أنا عارفه انك موافقه لكن خلينا نسمعها منك ، لو ما عايزا تتكلمي هزي لينا راسك بس !... طوالي اتذكرت زيدان و بعد مسافه قلت ليهم أنا ... أنا ...

" ولك ف قلــ♥️ـبي..
نبضة عشق
لا يحتويها أحد غيرك
و لك عهدا مني
أن لا ترى عيني أحد غيرك
ولك انت روحي
لن...ولا... ولا... تشتاق إلا لك
و لك انت وحدك حنين عشقي و نبضي
لن ينبض إلا لك "❤

يتبع....

🎭 رواياتي 📚 الوسام 2️⃣ 🎭

03 June 2024 21:59

قلت ليها :
مهما الحرب دي طالت الناس مصيرها ترجع ، صدقيني في كل الأحوال الناس دي حـ ترجع ، زي ما طلعوا من بيوتهم شويه شويه حـ يرجعوا ليها شويه شويه تحت أي ظرف ، ربنا يعجل بالنصر ، ربنا يحضرنا اليوم الحـ نرجع فيهو للسودان و نحتفل بالعوده ، ربنا يرجعنا تامين ولامين و ربنا ما يفجعنا في زول ، الرحمه و المغفره لكل شهيد و لكل زول اتفقد في الحرب دي ، ربنا يربط على القلوب و يثبتها و يرزقنا الصبر و الرضا بالقضاء و القدر ، نحنا صح طلعنا من السودان بس هو ما طلع مننا ، حـ نفضل منتظرين اليوم الحـ نرجع فيهو لـ بلدنا ، اليوم حـ تلمس فيهو رجلينا تراب الوطن ، اليوم الحـ نتنفس فيهو هواء السودان ، اليوم الحـ نلاقي فيهو كل أهلنا و جيرانا و كل أحبابنا ، يا رب نرجع و نتلم من تاني تحت سماء الخرطوم ، اشتقنا لـ رمضان و لمتو في السودان و، اشتقنا للعيد و بهجتو و للشوارع البتكون مليانه أطفال في اليوم داك ، للخريف و العربات لمن توحل في الطين ، للشتاء الببهجنا ، حتى للصيف البنشكي منو ، حقيقة مشتاقين لكل حاجه في السودان ، جربنا رمضان هنا بس رمضان أحلى في السودان ، لأنو بلدنا و لأنو كبرنا و إتربينا هناك ، و زي ما غنت هاجر محمد حسن و قالت :

و بيك حـ يرجع وطنا البريدو
بهمة أهلنا و حـ نقدر نعيدوا
و حلة مُلاحنا تخش كل بيوتنا
تسلم تلملم فرحنا و تزيدو
ملامح وطن بقامة حبيبه
ساحه في قلوبنا واسعه و رحيبه
نحدس ترابو الكون صفاتنا
و نمسح شكوك جوانا و نسيبا
سوداني فخراً

فـ ربنا يجبر خواطرنا الإتكسرت ، ربنا يشفي الجروح و يوقف شلالات دموعنا و ينزع إحساس الغربه و الشتات الإنزرع جوانا ، كلنا موجوعين ، كل كاسرانا الطريقه الطلعنا بيها من بيوتنا و من بلدنا ، كلنا بنتألم خاصة الناس مشوا و خلوا ناس وراهم حتى لو كانوا متوفيين ، يعني اتخيل تدفن زول عزيز عليك بجاي و تضطر تطلع و تمشي بلد غير الهو إندفن فيها ، ايوه هو ميت لا حـ يسمعك لا حـ يحس بيك بس الشعور مؤلم ، حبوبتي و صحبتي إتوفوا هناك في ظروف الحرب دي ربنا يرحمهم و أنا لليوم دا بحس نفسي موجوعه لأنو قبورهم بعيده ، بعيده شديد ، مرات كتيره بحس إنو حبوبه بتنادي علينا و بتقول لينا ليه مشيتوا و خليتوني براي ، ايوه عارفه انها ميته بس مع ذلك بحس إنو زيارتي لـ قبرها كانت حـ تخفف عني ، حـ ألمس التراب الهي تحتو و أحس كأني بلمسها هي ، أما رتاج للآن بحسها لسه موجوده في شرق النيل .... طبعاً هنا سكته و هم كمان سكتوا و ما قالوا شي و يارا دي خلاااص بقت ما قادره تمسك دموعها ... أخدت نفس و قلت ليها ربنا يصلح الحال و يرحم كل عزيز رحل عن دنيانا الفانيه و يجعلو من أصحاب اليمين....
مسحت دموعها و قالت لينا قبل ما تنتهي الحلقه دي عايزاكم تقولوا لي الدرس الإتعلمتوهو من علاقتكم دي ... ناصر قال ليها اتعلمت إنو الحب براهو ما كفايه و إنو الإهتمام هو البدفع العلاقه لـ قدام و هو البقويها ، قلت ليها أنا اتعلمت دروس كتيره ، أهمها إنو أي علاقه تكون مكشوفه قدام كل الناس و بكل تفاصيلها بتبوظ ، ما أي مشكله و ما أي كلام ينفع نشاركو مع الناس و نوريهم البحصل بيناتنا و ندخلهم في خصوصياتنا ، دروس كتيره اتعلمتها و فهمتها لدرجة اني وصيت بيها زوجة أخوي يلي هي ورده أخت ناصر ، نفس الأغلاط الأنا كان مفروض أتجنبها في زواجي نصحتها بيهم عشان ما تقع في نفس غلطي ، البيوت أسرار و سرك و خصوصيتك انتِ و زوجك ما تطلعيها للناس حتى لو كانوا أهلك ، قالت يا الله ! أنا بالجد مبسوطه بيكم و منبهره شديد و كل كلمه و كل حرف إنقال في الحلقه دي نزل على قلبي زي العسل ، اتمنيت الزمن يمشي ببطء و اتمنيت اتكلم و اتونس معاكم أطول فتره بس للأسف انتهى زمن الحلقه ، شكراً ليكم كتييير مها و ناصر شرفتوني و نورتو الإستديو بطلتكم دي ، ربنا يسعدكم و يوفقكم و ان شاء الله ما أسمع عنكم إلا كل خير ❤️
المهم في نهاية الحلقه يارا اتصورت معانا صور شخصيه و عبرت لينا عن فرحتها الشديده لمن ناصر أكد ليها إنو نحنا حـ نرجع لبعض .... بعدها اتصورنا مع طاقم العمل تبعها و طلعنا و يارا ذاتا طلعت معانا للباب و بعدها ودعتنا و رجعت لمن جاها إتصال ، ناصر مد لي يدو و قال لي بدايه جديده ؟؟
من دون تفكير لقيت نفسي خاته راسي على صدرو و دموعي نازله ، قلت ليهو ما مصدقه انك جيت ، قال لي جيت عشانك ، قلت ليهو لو ما كان جيت أنا... قاطعني و قال لي هوووس أنا هنا ، كفايه بكى ، بعدت منو شويه و قلت ليهو جيت متين انت ؟
مسح لي دموعي و قال لي الله يرضى عليك كفايه بكى ! .. أنا جيت أول امبارح ... قلت ليهو شنوو و ليه ما كلمت زول ؟ كنت قاعد وين!!؟ قال لي لو كلمت زول كانت حـ تبقى مفاجأه كيف !؟

🎭 رواياتي 📚 الوسام 2️⃣ 🎭

24 July 2024 13:33

هههههه والله مصدوم ـ م عارف اقول ليك مبرووك ولا اقول ليك شنوو ـ بس الخبر حلو اخيرا حتودع العزوبية وتكون زلمة متزوج ...

معتصم انت بتطعمج فيني!

ابدا ابدا والله ـ بس بعد كدة انت مضطر تتقبل الواقع الاتفرض عليك دة ـ وبعدين انت ليه متشاءم احتمال الزواج دة يكون فاتحة خير عليك ...

معتصم انا مااعايز اتزوج انت لييه م عايز تفهمني ...رغبتي في الزواج اتعدمت من بدري وانت عارف الشي دة ...

مؤمن انت لسة ناوي تعطل حياتك بسبب قصة حب قدييمة عدت عليها سنين طويلة ...

معتصمممم (قالها بعصبية) مش قلنا م نجيب سيرة الموضوع دة لانو اتقفل من بدررري + سبب رفضي للزواج م ليه اي علاقة بالموضوع داك ـ انا انسان مكتفي ذاتيا وم محتاج لأي انسانة في حياتي ـ وكفاية اني مبسوط بوجود اولادي في حياتي ـ هما مالين حياتي ربنا يحفظهم لي ....

معتصم سكت وم عرف يقول شنو ـ لانو عارف صحبو لما يكجن شي م بتفاهم فيه ......
يتبع .....

🎭 رواياتي 📚 الوسام 2️⃣ 🎭

24 July 2024 13:33

#أنيس الروح#
(8)
بقلم : غزل وليد ♥


كنت ناايمة نص النهار ـ صحيت بيد أمي وهي بتصحي فيني ـ قلتة ليها في شنو يمة ـ قالت لي في ضيفة منتظراك في البرندة ـ قلتة ليها ضيفة منو ـ قالت لي والله م بعرفها أول مرة اشوفها وزاتها مرة كبيرة في العمر ـ استغربتة وقلتة ي ربي دي منو ـ لبستة توبي وطلعتة عشان اشوفها ـ والمفاجأة كانت مدام سوسن! ـ كنت متحيرة الجاب مدام سوسن لحدي عندي في البيت شنو + عرفت بيتنا من وين? .... مشيت وسلمتة عليها ...
السلام عليكم مدام سوسن نورتينا كيفك ان شاء بخير ..
سلمت علي بالحضن وقالت لي كيفك ي بتي ان شاء الله كويسة ـ ليكِ وحشة والله ـ التوأم طوالي بسألوني عنك ...
والله الحمد لله انا تماام ـ وانا كمان فقدتكم والله ـ واشتقتة شديد ل جود وجواد ـ كيفهم وكيف مع المدرسة ...
والله الحمد لله كويسين م ليهم عوجة ....
أمي ضيفتها وقعدت معانا ...
عرفتهم على بعض وكدة ...
اتونسنا ونسة عامة وبعدها مدام سوسن قالت لأمي بصراحة ي أختي انا عندي موضوع وجيت اتكلم فيهو معاكم ....
امي قالت ليها اتفضلي طوالي ...
قبل كل حاجة حابة اثني على بتك وأقول ليكِ م شاء الله نعم التربية والادب والاخلاق ـ بنان غير انها انسانة طموحة وشاطرة عجبتني اخلاقها قبل كل شي ـ طريقة تعاملها مع احفادي كانت فريدة ـ كنت مراقبة كل حاجة ـ ف بالجد بنان انسانة يشار إليها بالبنان والله ...
تسلمي ي اختي ـ فعلا بتي زولة م شاء الله ـ من هي وصغيرة كدة ـ تعاملها لطيف مع كل الناس ـ وطيبة وحنونة ...
مدام سوسن وأمي بقو شغالين يمدحو فيني ساي ـ بقيت م فاهمة شي ـ وشغالة ليهم تسلمو تسلمو واتبسم زي العويرة ـ بقيت منتظرة مدام سوسن تخش في الموضوع الجات عشانو ...
صراحة ومن دون مقدمات جيت أطلب إيد بتكم بنان لولدي ـ عايزاها تكون واحدة مننا وفينا ان شااء الله ـ أولادي كلهم عرسو وباقي لي واحد بس م عرس ـ و ولدي دة الصراحة شوية مختلف عن باقي اخوانو في طباعو وفي حاجات كتيرة ـ وبما اني امو ف أنا أكتر زولة فاهماهو ـ ولي فترة كنت بفتش ليه علي عروس بس م لقيت لي وحدة حتناسبو ـ بس لما لاقيت بتك بنان واتعرفت عليها وخلال فترة الشهرين ونص دي درستها وصراحة حبيتها جدا وحسيت إنها العروس المناسبة لولدي ـ وانها الانسانة الحتقدر تفهمو وتتعايش معاه ان شاء الله ـ ف بتمنى انكم تدونا بتكم وحتكون على عينا وراسنا .....
أنا بعد سمعتة كلام مدام سوسن بقيت منططة عيونة ومخلوعة خلعة السنين ـ عايزاني عروس لولدها? كيف يعني ـ وليه انا بالزاات? لالا الموضوع اكيد فيو إن! وبعدين هما من طبقة برجوازية عايزين بي شنو! ـ الزيهم بعرسو لأولادهم بنات من نفس الطبقة الاجتماعية حقتهم ـ ليه انا بالزااات! .....
أمي قالت ليها والله ي أختي رغم اني م بعرفكم بس بما انك جيتينا عديل للبيت وطلبتي يد بتنا ف ما حنقدر نقول ليك لا ـ بس قبل كل حاجة خلينا ننتظر ابوها يجي وكمان نشوف راي البت كمان ....
مدام سوسن قالت ليها م عندكم اي مشكلة وفكرو على راحتكم وان شاء الله ح اكون في انتظار ردكم ـ وبتمنى بتمنى بنان تكون من نصيب ولدي ....
امي قالت ليها ربنا يجعل الفيهو خير ان شاء الله ـ بعد نتشاور مع البت وابوها بنديكم الرد بإذن الله ...
تمام ان شاء الله ـ يلا انا بعد كدة بستأذن ... اي صح ولدي شغال محامي كبير وصراحة هو انسان ما شاء الله مافيهو كلام ـ ومتأكدة هو بنان حيكون ثنائي حلو بإذن الله♥
امي حلفتها تقعد تتغدى بس مدام سوسن قالت مرة تانية ان شاء الله ـ وقبل م تطلع قالت لي يلا ي بتي مع السلامة وفكري في الموضوع وان شاء الله م يحصل الا الفيهو خير ....
عاينتة ليها وابتسمت ....
حرفيا ي جماعة الصدمة كانت كبيرة علي ـ أمي جات قعدت جمبي وبقت بتسألني خلال معرفتي ليهم هل هما ناس كويسين ورايك فيهم شنو وأسإلة الأمهات البديهية ديك .... قلتة ليها يمة العرض دة م موافقة عليهو واني اتزوج زول م بعرفو دي لايمكن تحصل ...
كيف يعني ي بتي ـ امو اختارتك انتِ من بين كل البنات ـ وحبتك ـ فما تستعجلي في الرد استخيري واتوكلي على الله ـ بعدين ابوك لما يجي بكلمو بالموضوع ...
يمة انا ما مواافقة وما محتاجة افكر اصلا ...
طيب ليه رافضة ـ سبب رفضك شنو ...
اول حاجة انا م بعرس زول م بعرفو ـ تاني حاجة حكاية انو الراجل امو تختار ليهو عروس دي م واقعة لي في راسي ـ اسي احتمال م اعجبو ـ او م نتفق ـ اها بعدين حنقدر نتعايش كيف ـ الحكاية تضريبات يمة ...
انا وأمي بقينا بنتكلم في الموضوع دة لحدي م ابوي جاء وامي حكت ليهو الحاصل ـ ابوي كان متفاءل وقال لي القرار قرارك ي بتي ـ اذا موافقة انا معاك واذا ما موافقة برضو معاك ـ المهم انا معاك في اي قرار عايزاه..

🎭 رواياتي 📚 الوسام 2️⃣ 🎭

24 July 2024 13:33

#أنيس الروح #
(7)
بقلم : غزل وليد♥

عدت فترة شهرين ونص والأولاد إجازتهم خلصت ونزلو مدارس ـ مدام سوسن قالت لي بعد كدة كورس الانجليزي حيقيف ونواصل فيه بعد يخلصو السنة ان شاء الله ـ يعني للإجازة الجاية إن شاء الله لأنو بعد كدة الأولاد حيكونو مشغولين بالدراسة ....قلتة ليها طيب ان شاء الله ـ ودعتتي ب بشاشة وآخر راتب كان فيهو زيادة قالت لي اعتبريه هدية بسيطة مني لأنو بصراحة كنتِ زولة ممتازة وتعاملك مع أحفادي كان حلو جدا بالإضافة لدورك كمعلمة كان ممتاز ♥ حرفيا كلامها خش قلبي وحبي واحترامي ليها زاد والله ♥ ...
كنت حزينة إني م حأشوف التوأم تاني قريب ـ بالجد اتعلقتة بيهم شديد وحبيتهم ـ وزعلتة برضو انو شغلي حيقيف ومعناها تاني ماف راتب ـ بس برضو كنت مبسوطة بالتجربة دي واتمنيت ربنا يكتب لي كل الفيه خير ....
رجعتة لروتيني الزمان مع الزهج والملل وماف موضوع ـ بس فكرتة افتح لي مشروع صغير ب باقي القروش الوفرتها من الراتب ـ اشتريت حافظة كبيرة وأكياس آيسكريم (داردمة) ـ وعصاير جافة بنكهات مختلفة عشان اشكل بيه الايسكريم .... وفعلا بديت تجارة الايسكريم لشفع الحلة ـ امي كانت بتخت الحافظة حقتي مع حاجاتها التسالي والفول ـ والحمد لله كل يوم الحافظة حقت الايسكريم بترجع فاضية ـ شفع الحلة بشتروها كلها ـ م كنت متخيلة انو تجارتي تنجح بس بقدرة الله اتسهلت ـ بقيت كل يوم بعمل ايسكريم وبديها لامي تبيعها لي مع حاجاتها .....
اخوي الفي ليبيا اتصل سلم علينا وقال انو لقى ليه شغل كويس مبدئيا وامورو ماشة تمام ـ ورسل لينا شوية مصاريف عشان نمشي بيها حالنا ♥ ...
............

ألو سهى كيفك ...

تماام والله الحمد لله ...

اخبارك شنو ي سوسن ..

والله نحمد الله بخيير ي أختي ...

إولادك كييف والتوأم اخبارهم شنو ...

والله كويسين م ليهم ـ ياهو نزلو مدارس ومدروشين ...

لالا الحمد لله طالما كويسين ـ مؤمن اخبارو شنو وأبوهو ...

كويس والله ـ ياهو بس مع شغلو بس ـ ابوهو كويس جاء من السعودية قبل كم يوم...

كويس والله ـ اها مؤمن لسة م لقيتو ليه عروس ..

بري انا دي قنعتة غيتو ـ الولد دة حالف وقال عرس م عايزو ـ قدر م نقيت في راسو بس م شغال لي ـ فسكتة خليتو ع راحتو يعمل البريحو ...

لالا ي زولة كلام زي دة ماف ـ انا زااتي جاية السودان قريب وبحاول اقنعو عشان نعرس ليه مع ولدي أواب سوا ...

أواب عايز يعرس?

ااي والله ي سوسن ـ اسي اتصلتة عشان اكلمك بخصوص الموضوع دة ـ طبعا اواب عندو وحدة كدة بعرفها وقال بحبها وعايز يعرسها ـ وهما في السودان ـ واسي انا وابوهو نازلين معاه السودان عشان نتقدم ليها ونعمل العرس مرة واحدة ويسوقها معاه الإمارات ....

الف الف مبرووووك والله دة يوم السعد والله ـ ربنا يتمم ليه على خير ان شاء الله ...

آميين ي رب ـ عشان كدة لازم نحاول نقنع مؤمن يفتش ليه عروس من اسي عشان نعرس ليه مع اواب ـ والمرة دة شاء ام رفض بنعرس ليه بنعرس ليه ـ الراجل كبر ي سوسن القدرو اسي ب أولادهم ....

دة نفس كلامي اليومي معاه بس ولا شغال بي ـ اسي حمستيني والله ي سهى ـ ان شاء الله ربنا يهديه ويوافق ـ اها وانتو جايين متين ...

الاسبوع الجاي ان شاء الله ـ حننزل عندكم والعرس حنعملو في بيتكم عشان العروس ساكنة في () (اللهي نفس الولاية الساكنة فيها سوسن ) ....

تشرفو طوالي ي اختي ـ منها العرسين نعملهم في حتة واحدة ...

ااي ان شااء الله .....

وبكدة المكالمة خلصت ....
......
مؤمن لما رجع البيت لقى امو راايقة ومبسوطة ـ حكت ليهو بموضوع عرس اواب ود خالتو وانهم حينزلو عندهم وحيعملو العرس ـ مؤمن قال ليها والله الف مبرووك ويشرفو البيت بيتهم ....سوسن قالت ليه أها وانت? ـ قال ليها انا مالي! ـ قالت ليهو حنعرس ليك معاه ـ قال ليها عفوا! ـ قالت ليهو السمعتو ـ حنعرس ليك مع اواب سوا والموضوع غير قابل للنقاش ...مؤمن سكت عشان عارف روحو لو آتكلم حيزعل أمو بالكلام ـ وطلع برة البيت ركب عربيتو وبقى حايم بيها سااي في الشارع م عارف روحو يمش وين وفي النهاية رجع البيت خش غرفتو قفلها عليهو ...
......
بعد اسبوع سهى وراجلها و ولدها الوحيد أواب نزلو السودان ـ سوسن وزوجها ومؤمن رحبو بيهم .... بعد م ارتاحو من تعب السفر سهى قالت لسوسن بعد كدة نادي لي مؤمن دة اتكلم معاه شوية ـ سوسن قالت لي ي ريت والله حاولي افتحي ليه راسو اليابس دة ـ وفعلا بالمساء مؤمن بعد م رجع من الشغل وارتاح شوية خالتو نادتو وبدت تتكلم معاه في موضوع العرس ـ وبتحاول تقنع فيه يوافق ـ مؤمن كان ساكت وبسمع في كلامها من دون م يعلق علي شي ـ سوسن جات لقت سهى بتتكلم و مؤمن ساكت زي الابكم ـ لمن غلبها قالت ليهو اسمعني ي ولد والله لو م عرستة مع ود خالتك أواب م عافية ليك لادنيا لا آخرة وأصلك ما ولدي ـ سوسن بعد م قالت كدة مؤمن قال ليها أمي دة كلام شنو إستهدي بالله ـ قالت ليهو دة آخر كلام عندي واصلو م بتراجع عنو ـ واذا طالب عفوي ورضاي توافق انك تعرس ـ مؤمن غلبو

🎭 رواياتي 📚 الوسام 2️⃣ 🎭

24 July 2024 13:32

#أنيس الروح#
(6)
بقلم : غزل وليد♥

تالت يوم تدريس قبل م أديهم الحصة الجديدة ـ اختبرتهم في الحروف كلها والارقام من 1 لحدي 20 وحسب وعدي ليهم البقفل الإختبار ليه هدية ـ حسيتهم كانو متحمسين للتِست ... بعد م خلصو جمعتة منهم الورق وبعدها باشرنا الحصة الجديدة ـ بعد م خلصنا صححتة الورق و وزعتو ليهم ـ جود قفلت الاختبار ـ وجواد ناقص درجة واحدة ـ حسيتو زعل وكان حيبكي ـ بس ابدا م أديتو فرصة يحس انو درجتو اقل من درجة اختو ـ بالعكس شجعتو وقلتة ليهو درجتك دي حلوة شديد واعتبر روحك قفلتة الاختبار كمان وانت كمان عندك هدية ـ حسيتو انبسط بعد قلتة ليه كدة ـ اليوم البعدو قبل م ابدا الحصة وزعتة ليهم الشوكلت الجبتها معاي بإعتبارها الهدية وبعدها واصلنا عادي ...
نهاية الاسبوع مدام سوسن ادتني الراتب حقي ـ كنت مبسوطة شديد والله ـ قبل م اصل البيت غشيت البقالة الجمبنا اشتريت بعض المؤون الغذائية الحنحتاجها في البيت ـ من زيت ـ بصل وصلصة ومرقة ـ بهارات وكم حاجة كدا ـ باقي القروش البسيطة الفضلت اديتها لأمي عشان لو في حاجة ناقصة تتمم بيها ـ في البداية رفضت تشيل مني القروش بس قلتة ليها يمة القروش دي حقتنا كلنا وزي م انت وابوي تعبانين عشانا خليني اساعدكم ولو بالبسيط .....
عدت فترة أسبوعين والحمد لله اموري كانت مرتبة ـ والشغل البمشي ليه غير روتيني ـ اتعلقتة بالتوأم شديد في الفترة البسيطة دي ـ تعاملي معاهم م مجرد استاذة وطلبتها ـ لا كنت شايفاهم زي اخواني الصغار والله ... مدام سوسن كانت ع طول بتثني على وبتقول لي الأولاد م شاء الله مستواهم ماشي تمام ـ ابوهم لما يجي يراجع ليهم بلقاهم فاهمين اي شي ـ ودة إن دل على شطارتك وإهتمامك بيهم ـ كلامها خش قلبي والله ♥ ...
....
Good evening Candies
(مساء النور ي حلوين)
Good evening teacher
(مساء النور ي استاذة)
How are you tody?
(كيف حالكم اليوم)
We are fine and you?
نحن بخير وانت?
Iam fine Candies
انا بخير ي حلوين ....
Todays lesson about family, say family..
درست اليوم عن العائلة ـ قولو العائلة ....
.....دة جزء بسيط من محادثتي معاهم في درس اليوم
والدرس عن العائلة ... بديت ليهم بالكلمات البسيطة ـ اب وام واخ واخت والجد والجدة ـ بالانجليزي طبعا ... وعشان يفهمو أكتر بديت أضرب ليهم امثلة ـ قلتة ليهم الاب بنقول ليهfather ـ طيب ي جواد انت اسم أبوك منو ـ قال لي مجد ـ قلتة ليهو so your name is jawad majd....
وانتِ ي جود أمك إسمها منو ـ سكتت ماردت علي ـ تاني رجعتة رددتة ليها السؤال ـ برضو م ردت كانت بتعاين لي وساكتة ـ استغربتة من سكاتها وعدم ردها ـ مشيت وقفتة جمبها وقلتة ليها الماما اسمها منو ـ طبعا انا زاتي جواي فضول عايزة اعرف امها اسمها منو وليه للآن م شفتها معاهم في البيت طيلة فترة الاسبوعين الكنت بجيهم ـ جواد قال لي بصراحة ماما وبابا ماتو من واحنا صغار شديد ـ طبعا لما سمعتة ردو جاتني صدمة كبيرة وخالص م اتخيلتة انو والديهم متوفين ـ حضنتة جود علي وقلتة ليها ربنا يرحمهم ان شاء الله ـ انا آسفة حبيبتي م كنت عارفة الحاجة دي ـ بقت بتبكي وجواد كمان بقى ببكي ـ اخدتهم في حضني وبقيت بهدي فيهم ـ انا زاتي م قدرتة امسك دموعي والله ـ في اللحظة دي جاء راجل خاشي علينا قال السلام عليكم ـ وشكلو كان مستغرب لما شاف الاولاد في حضني وباين انهم كانو ببكو ـ التوأم أول م شافوه مشو عليه وقالو ليه بابااا ـ انا بقيت م فاهمة شي ـ مش قالو انو ابوهم وامهم متوفين كيف دة ابوهم ـ ليه بقولو ليه بابا? وشكل الراجل دة م غريب علي تقريبا دة كان نفس الزول القبل كدة لاقيتو جمب الباب وكان خاشي البيت ...
بقى محتويهم وسألهم ليه كنتو بتبكو? الزعلكم منو? سكتو وم ردو عليه ـ تاني رجع سألهم بس برضو كانو ساكتين ـ الراجل بقى بعاين لي وكأنو بقول لي عملتي ليهم شنو ـ نظرة كدة مشكوك فيها ـ قلتة ليهو الحاصل ي أستاذ انو اليوم درسنا عن العائلة وطبعا بما اني استاذة بحب اضرب ليهم امثلة عشان يفهموني اكتر ف سألتهم عن أسماء والديهم وصراحة م كنت عارفة انهم متوفيين بعتذر وربنا يرحمهم ان شاء الله ... عاين لي وسكت م رد علي الجو كان مكهرب نوعا ما ـ م عرفتة اعمل شنو ـ قلتة ليه طيب انا ح اديكم بريك وح أرجع بعد شوية ـ طلعتة وخليتهم براهم مع البقولو ليه ابوهم دة ....
لما طلعتة الصالة لقيت مدام سوسن قاعدة قالت لي خلصتو خلاص ـ قلتة ليها لالا وحكيت ليها الحاصل ـ حسيت ملامحها اتغيرت وغلب عليها الحزن ـ قلتة ليها اسفة مدام اذا فتحتة عليكم المواجع والله م كنت عارفة بالشي دة ومحور الدرس هو الخلاني اتطرق اسألهم عن امهم وابوهم ....قالت لي لالا ولا يهمك ـ حال الدنيا ربنا يصبرنا على فراقهم ـ رغم انو فترة وفاتهم عدى عليها 5 سنة بس فراقهم مازال صعب شديد علينا وبالزات ع الاطفال ...

🎭 رواياتي 📚 الوسام 2️⃣ 🎭

24 July 2024 13:32

#أنيس الروح#
(5)
بقلم : غزل وليد♥

جهاد انت ماشي وين ..
جهاد اسمعني م تمشي تخليني المرة دي ..
انت ناسي انو عرسنا قرب ومفروض نشتري باقي حاجات بيتنا الناقصة ..
جهاد دقيقة م تمشي ـ م تمشي عليك الله ـ جهاااد ....
.......
بسم الله ي بتي اصحي اصحي ـ بقت بتحاول تصحيها عشان تخليها توعى من الكابوس دة ـ فتحت عيونها وكانت عرقانة شديد ـ أول م صحصحت ولقت امها جمبها دموعها نزلت ....
ي بتي بسم الله على قلبك حتى يهدأ ـ عارفة انك م قادرة تنسيه وأصلا صعب تنسيه بس قدر ربنا فوق كل شي ـ ادعي لي ربنا يرحمو ويغفر ليه ....
يمةةة انا م قادرة اتجاوز وفاتو ـ للآن حاسة انو م مات ـ حاسة انو حي يمةة ـ وبقت بتبكي ـ صح عدت على وفاتو سنتين بس والله م قادرة انساه ـ مات وشال عقلي وقلبي معاه يمةة...
أمها رقدتها في رجليها وبقت بتمسح ليها في شعرها وبترقي ليها لحدي م رجعت نامت.....
......
صحيت الصبح ولقيت روحي راقدة في رجلين امي وهي متكلة على الحيطة ـ حسيت بالذنب والله وزعلتة من روحي إني خليتها طول الليل قاعدة بالطريقة دي ـ رفعتة راسي من رجولها وصحيتها برااحة قلتة ليها يمة أعفي لي بسببي م قدرتي تنومي كويس ـ يلا استعدلي في نومتك ـ قالت لي الصبح اذن النقوم اصلي واولع الكانون اعمل الشاي لابوك عشان بطلع بدري للشغل ـ قلتة ليها انتِ بس صلي الصبح والشاي دة انا بعملو إنتِ ارجعي نومي شوية ـ قالت لي سمح ي بتي الله يرضى عليك .... صليت الصبح وقريت قران شوية ـ بعدها ولعتة الكانون ـ الغاز حقنا قاطع ليهو شهرين وعشان نعملاه م عندنا إمكانية ليهو فبقينا شغالين بالفحم ـ عملتة الشاي لأبوي وكبيت الباقي في السيرمس ـ بسمة اختي صحت بدري برضو قرت شوية ومشت المدرسة عشان عندهم حصة صباحية ـ بعدها مشيت الدكان اشتريت عدس للفطور ـ شديتو في باقي النار حقت الشاي ـ كنت خاتة بمبري جمب الكانون وسرحانة في الماضي ـ بقيت بتذكر في ذكرياتي السمحة ولحظاتي الجميلة لما كل حاجة كانت حلوة ...
....
**** قبل سنتين بالضبط بنان كانت مخطوبة لواحد من أولاد أهلها البعدين شوية وكانو على وشك يتزوجو بس شاءت الأقدار وخطيبها يتوفى قبل أربعة شهور من العرس ـ جاهو التهاب حاد في الدم ويرقان ـ رقد في المستشفى مايقارب الاسبوع وبعدها فارق الحياة للأسف ـ خبر وفاة جهاد كان صدمة كبيرة ليها وللأهل كلهم ـ في البداية م كانت قادرة تصدق وتستوعب انو خلاص جهاد مشى ومستحيل يرجع ـ كانت حاسة انو الحاصل دة كلو حلم ـ بس مع مرور الزمن عرفت انو وفاتو حقيقة وجهاد خلاص فارق الدنيا 💔💔💔
يعني الانسان الكنت مخطط انك تعيش معاه تفاصيلكم الحلوة ـ وتجهيزات عرسكم وفرحكم ـ وكيف حياتكم حتكون بعد الزواج ـ لدرجة اسماء اولادكم جهزتوها ـ وفجأة الانسان دة يختفى للابد ـ فدي شكلت صدمة كبيرة بالنسبة ليها ـ عشان كدة للأن م قادر تتجاوز وفاتو ...
جهاد وبنان اتولدت بينهم قصة حب قوية شديد لدرجة كل الاهل بضربو بيها المثل بس قدر الله فوق كل شي والحمد لله على كل حال .....
حتى الان بنان قلبها م دق لزول غير جهاد الله يرحمو وفكرة الزواج دي قنعت منها بتاتا وشبه شالتها من راسها ـ لانو في الفترة البعد وفاة جهاد اتقدمو ليها اتنين من اولاد اهلها بس هي رفضتهم ـ خافت نفس الحركة تتكرر ليها من جديد ـ م عايزة تعلق قلبها مع انسان تاني وفي لحظة تفقدو للابد ......
............

بدوري السمحة كدي تعالي عايزك في موضوع ...
احكي حبيبي سامعاك ...
اممم طبعا زي م عارفة الفترة الاخيرة دي شغلي بقى م ماشي زي زمان ـ وم مغطي لينا كل احتياجاتنا ـ والسوق كل يوم اسعارو زايدة والحاجات بقت غالية شديد م بتتهبش ـ ف فكرت افتح لي مشروع تجاري كبير شوية نقدر نغطي بيه معيشتنا ـ عشان كدة قررتة امشي الدهب اشتغل هناك والقروش البتطلع لي منها اجي هنا افتح بيها المشروع ....
سجمييي ـ عايز تمشي الدهب ي أيمن ...
اي ي بدور لأنو ماف حل غير كدة ...
لالا ي أيمن حكاية انك تمشي الدهب دي شيلها من راسك خاالص ...
ماف طريقة والله ي بدور ـ اصلا اتفقتة مع ناس ماشين الدهب وحجزو لي معاهم في العربية المسافرين بيها...
يعني انت مآخد قرارك من بدري ـ ورأيي م مهم اذن ...
لا ما كدة ياحبيتي الله يخليك ـ انا كل البعملو دة عشان أولادنا ومستقبلهم ـ وعشانك كمان♥ في الدنيا دي كلها ماف شي بهمني غيركم والله ـ عشان كدة عايز أعيشكم احلى حياة والله ♥ وخت ايدو من فوق ايدها..
عارفة انك تعبان عشانا والله ـ بس كمان م عايزاك تخاطر بروحك ـ وحكاية انك تمشي الدهب دة قلبي ما مرتاح ليها ...
بتتسهل م تشيلي هم ـ صح عايز اقول ليك برضو ـ في الفترة الحأسافر فيها دي حتمشو تقعدو مع أخوي أشرف في بيتو لحدي م أرجع من الدهب لأنو م حأقدر اخليكم تقعدو براكم في البيت ـ وكمان م حقدر اسفرك لناس امك عشان م عايز اتقل عليهم لأنو ظروفهم م بتسمح اني اجيب ليهم مسؤولية تاني + مكانهم بعيد والسفر مع العيال متعب وعايز ميزانية وللصراحة الايام دي حالي يعلم بيه الله ـ عشان كدة

🎭 رواياتي 📚 الوسام 2️⃣ 🎭

24 July 2024 13:32

قبل م أبدا ادرسهم سلمتة عليهم تااني وعرفتهم على اسمي ـ وطلبتة منهم يعرفوني على اسماءهم ـ الولد بدأ وعرفني بإسمو جواد والبنوتة اسمها جود ...
اتونستة معاهم شوية عشان ألطف ليهم الجو وبعدها بديت ادرسهم ... زمن الحصة ساعة واحدة ـ بس بعد نص ساعة من التدريس بديهم بريك ربع ساعة عشان م يزهجو ـ بونسهم شوية وبعدها بنواصل ...
إستيعابهم حلو جدا م شاء الله ـ بس البنوتة بحسها بتشرد شوية اثناء الشرح بس بطريقة لطفيفة بحاول أخليها تستعيد انتباها معاي ـ أما جواد مشاغب جدا بس زول أكتيف وبحب يشارك في الحصة ...
بعد خلصنا أول حصة مدام سوسن سألتهم اها الحصة كانت كيف ـ ردو عليها بإنو الحصة كانت حلوة وساهلة ـ صراحة ردهم كيفني ـ قالت لي أحفادي شكلهم حبوك ـ معناها حتتفقو هههههه ـ قلتة ليها إن شاء الله ـ هما زاتهم م شاء الله شاطرين ولطيفين ... قالت لي ممتاز ..
قلتة ليها يلا بعد كدة أنا ح أمشي ـ قالت لي خلاص تمام وبكرة إن شاء الله في نفس الميعاد من دون تأخير ـ قلتة ليها إن شاء الله ومشيت .....
بعد م وصلتة البيت جريت لأمي وحضنتها وقلتة ليها يمة انا مبسوطة شديد اليوم ـ قالت لي عساك داايمة مبسوطة ي بتي ـ اها اليوم الأول كان كيف ـ قعدتة وحكيت ليها كل شي من الالف للياء ـ ولما وريتها المرتب الحيندفع لي م صدقت والله لمن بكت ـ حضنتها وقلتة ليها يمة م تبكي ـ شفتي ربنا دة كريم كيف ـ قالت لي الحمد لله داائما وابدا ♥....
.........

مساء الخير أمي كيفك ...
الحمد لله ي ولدي ـ بدل ملابسك دي وتعال الحق الغداء ـ مونا رصت الصفرة جاهزة ...

خلاص تمام شوية وبجي ...

خش اخد ليه دوش سريع وغير ملابسو ومشى قعد معاهم في الصفرة ...

أولادي الحلوين كيفهم ... وبقى بشاغل فيهم وبتونس معاهم ....

طبعا اليوم جات الأستاذة حقت الإنجليزي وبدت معاهم دراسة ...

عليك الله ـ اها وان شاء الله الاولاد قدرو يتجاوبو معاها...

والله الاستاذة شكلها كويسة وحتى انهم حبوها وحبو طريقة تدريسها ...

اهاا كويس جدا ـ بعد كدة اجتهدو ي حلويين تمام ...

حااضر بابااا ...

بعد م خلصو أكل الاولاد مشو على غرفهم ومؤمن قعد يتونس شوية مع أمو ...
قبيل أبوي اتصل علي وقال إحتمال يجي السودان الاسبوع الجاي ...

امممم خير ـ جاي لشنو ...

كيف يعني جاي لشنو ي امي ...

مالو مخلي مرتو وجاي خليهو يقعد معاهم وم يجينا تاني عليك الله ...

عيب ي أمي تقولي كدة ...

اها سكتة ـ اصلا انت دايما في صف ابوك ..

أمي دة كلام شنو اسي ـ المهم عشان م انسى ـ سامر ود عمتو شادية عرسو الجمعة الجاية قال لي اكلمك ...

اي امو قبيل الصباح اتصلت وكلمتني ..

اهاا تماام ...

اقعد باري لي في اعراس الناس الصغار وانت قاعد بتتفرج ـ اصلا القدرك زمان عرسو بوليداتهم ...

تاااني ي أمي? ...

ااي تاني وتالت ورابع كمان ـ كبرتة وعجزتة باقي ليك سنتين ولا تلاتة وتخش الأربعين ولسة م عرستة ـ حيرتني معاك عديل والله ...

أمي لا آله إلا الله ـ انا عرس ومابعرس ـ اصلا اعرس لشنو? لو على الاولاد عندي جود وجواد اها تاني في شنو ....

اي اقعد لوك لي في نفس الرد الواحد دة ـ صح جود وجواد زي اولادك ـ بس برضو م من صلبك ـ جناك البكون من صلبك طعمو بكون مختلف ...

يا أمي جود وجواد اولادي وخلاص لهنا انتهينا ...
قام بزهج وخش غرفتو وخلى امو تتكلم سااي ....
.....
طيب اديكم فكرة عن العايلة دي ....
مدام سوسن إمراة عمرها في منتصف الستينات بس البشوفها بقول اربعينية خالص م ظاهر عليها تقدم العمر عندها 3 اولاد وبتين ـ اكبرهم مؤمن ودة عمرو 38 سنة ـ بعديه مجد ودة اتوفى قبل 5سنوات ودة بكون أبو جود وجواد! مستغربين صح! ـ طيب مجد وزوجتو رناد حصل ليهم حادث سير قبل 5 سنة وهما في طريقهم لعرس واحد من أصحاب مجد والاتنين اتوفو في نفس اللحظة للاسف ومن بعد وفاتهم الاولاد قاعدين من حبوبتهم ومؤمن معتبرهم زي اولادو ـ حتى انهم بقولو ليه بابا ـ زمن حادث امهم وأبوهم أعمارهم كانت سنتين فقط وقتها وقتها أمهم الله يرحمها خلتهم مع حبوبتهم عشان م حتقدر تسوقهم الاتنين معاها العرس الكانت ماشة ليه ـ ومن بعد وفاتهم مؤمن عمهم كرس حياتو في تربيتهم ومديهم كل الحنان الابوي وخالص م محسسهم انو م عندهم أب ـ قطع وعد على نفسو ب إنو م حيتزوج ابدا عشان م عايز اي مسؤولية غيرهم تشغلو في الحياة دي ....
بعد مجد الله يرحمو في مهاب ودة متزوج وعايش في البحرين ـ اما بناتها الاتنين برضو متزوجات ـ وحدة عايشة في ولاية تانية واصغر واحدة دي بيتها جمب بيت امها وعلى طول بتجيهم اسمها ميمنة...
زوج سوسن عبد الغفار ودة متزوج مرة تانية غير سوسن وساكنة في السعودية ودي ربنا م رزقها ب أولاد ـ مرتو بتكون بت عمو وابوهو الله يرحمو عصرو عشان يتزوجها ـ واتزوجها بناء على رغبة ابوه لأنو اصلا م كان راضي بزواجو من سوسن بسبب خلافات اسرية قديمة بين العايلتين ـ وياهو بسافر ليها السعودية بينرفترة والتانية بقعد معاها وبرجع السودان ـ مرتو الفي

🎭 رواياتي 📚 الوسام 2️⃣ 🎭

24 July 2024 13:32

والله صراحة اشتراهو لي أيمن شكل هدية وصراحة م سألتو عن السعر بس تقريبا في حدود ال () لأنو كان شايفة واحدة عارضة زيو في الفيس ...
ايواا ـ غالي بس الغالي بغلاتو ـ تلبسيه بالعافية ان شاء الله ♥♥♥
تسلمي ي أم محمد ع ذوقك الحلو ♥
الحفلة كانت راابة وبدور كانت خاطفة الأضواء ب أناقتها وجمالها ...
بدور بطبعها بتحب الجيهة ـ ونسابتها بحبوها شديد عشان زولة طيبانة ولطيفة وم بتتدخل في حاجة م بتخصها يعني بإختصار كافية خيرها عن شرها ـ وبعيدة عن كل المشاكل ...
أيمن زوجها إنسان طيب ومحترم وبحبها حب م بتتوصف ـ ليهم 5 سنين متزوجين بس حبهم لبعض كل يوم ماشي زايد ـ عايشين حياة بسيطة شديد بس بالرغم من دة كلو مبسوطين جدا وحابين البساطة العايشين بيها دي ... أهل أيمن ناس م شااء الله وضعهم الاقتصادي فوق الممتاز بس هو معتمد ع روحو ولا جنيه م شالو من أهلو ـ قال مسؤولية نفسو ومسؤولية أولادو هو بتكفلها من دون أي مساعدة من أهلو ـ الحاجة الماعارفنها عنو ـ إنو هو انسان مجتهد من هو وصغير ـ م بحب يعتمد ع زول ـ بحب يبني نفسو بنفسو ـ يعني بإختصار انسان طموح جداا....
........

ويينك ي مان م شايفك جيت المحكمة ..
في الطريق انا بس زي م عارف الطريق زحمة ـ لكن قربتة اصل ..
يخخخ دي شنو الزحمة دي ـ ودق بوري للعربية القدامو بزهجج ـ م ممكن الانسان يطلع مروق ومبسوط من البيت فجاة مزاجو يتعكر بسبب الزحمة دي ـ ابو الشغلانة دي ياااخ ...
بعد م وصل المحكمة وبركن عربيتو ـ دخل مكتبو وكان زهجان شديد ـ صحبو معتصم جاء خاشي سلم عليه ...
مالك ي زول قالب خلقتك دي من الصباح ...
يخخ بلد فقر وناسها فقر كيف خلقتي م تكون مقلوبة ...
هههههه روق ي فردة ـ المهم هاك الملفات دي راجعها ـ والمحتاجة إمضاء امضيهم لي ...
طيب تمام ـ عليك الله كلم خالتي عايدة تجيب لي قهوة كااربة كدة اظبط بيها الراس دة ..
ههههه حاضر ـ وطلع ...
شوية كدة خالتو عايدة جات ودقت الباب جابت ليهو القهوة ـ بعد م شربها حس انو مزاجو اتعدل وبدأ يشتغل ...
حوالي الضهر كدة صحبو جاء وشالو منو الملفات حقت الصباح ....
تسلم ي بووص يلا بعد كدة انا طالع ...

ماشي وين بدري كدة الدوام لسة باقي ليه ساعة ويخلص ...

شغلي خلص وماشي ارتاح شوية عشان بعدين المدام عندها مناسبة وحأوصلها بالعربية ـ معتصم متزوج وعندو ولد حلات الدنيا عليه ...

ايواا تمام ...

بكرة انت م شغال صح

اي بكرة م شغال في المحكمة شغال في مكتبي الخاص

خلاص ي مان نتلاقى بعد بكرة ان شاء الله ...

بعد م صحبو مشى فتح تلفونو واتصل على امو ...
ألو أمي كيفك ..
تمام ي ولدي انت كيف ..
الحمد لله بخير ـ اها بخصوص استاذ الانجليزي تبع الاولاد عملتي فيهو شنو ...
اي صح ي ولدي امس كنت عايزة اكلمك بس نسيت ـ المهم لقيت لي واحدة قالو شاطرة واتكلمتة معاها ـ مفروض اليوم تجي وتباشر شغلها ...
كويس جدا ـ وحاولي راقبي تعاملها مع الاولاد برضو لانو في النهاية بتظل غريبة وم بنعرفها ...
م تخاف ي ولدي الاولاد تحت رعايتي ان شاء الله عوجة م بتجيبهم ...
طيب ي أمي يلا مع السلامة ....
بعد م قفل منها جات خاشة أنسة جميلة ومهندمة ...
مستر مؤمن فاضي ...
اتفضلي مِس رشا ...
صراحة عندي شوية ورق عايزاك تظبطهم لي ..
جدا ماعندك مشكلة ..
مشت وقفت جمبو وهو قاعد في الكرسي ختت ليه الورق وانحنت بتحاول توضح ليه بعض النقاط ـ كانت بتتعمد تقرب منو ـ اما مؤمن بحاول يخلي بينهم مسافة ـ وحاول يشرح ليها سريع سريع عشان تتخارج ـ بعد م خلص رجعت قعدت في الكرسي وبتحاول تفتح معاه موضوع ونسة ـ ف بقى يختصرها عشان تطلع بس لما لقاها لسة قاعدة وم ناوية تمشي قال ليها انو هو بعد كدة طالع وبدا يلم في الملفات والورق المبعثر في التربيزة ـ حتى بعدها طلعت ـ جر نفس وقال في سرو دي شنو اللصقة دي يخخ ........
......
يتبع ...

🎭 رواياتي 📚 الوسام 2️⃣ 🎭

24 July 2024 13:32

فعلا والله ـ وشكراا ع العزوومة الظابطة دي ي معتصم ـ بتمني تكتر منها ههههههه ...

ي زووول م تتعود ـ تاني إلا السنة الجاية ههههههه...
......

بعد كم يوم نتيجة التوظيف طلعت وللاسف برضو م قبلوني ـ بكيت بكاء وقنعتة من أي حاجة ـ كنت خاتة كل أملي في الوظيفة دي وللاسف م ظبطت ـ بس تاني قلتة كلو لخير ي بت ـ ورزقك ربنا حافظو ليك ♥ ...
بس والله أنا في امَس الحاجة لشغل ولو أي شغل ـ المهم حاجة أطلع بيها مصاريف ـ بقيت بفكر أعمل شنو وأشتغل شنو ـ مشيت ل نون صحبتي اتونستة معاها شوية ـ وقلتة ليها تفكر معاي لشغل اشتغلو واقدر أطلع منو شوية قروش ....فكرنا كتير بس م بقينا على شي محدد ـ رجعتة البيت وكلي حسرة ...
الليل كلوو شلتو تفكير ـ بس قلتة الكلام دة كلو حلو شي وااحد ركعتين في جوف الليل ♥ـ اتوضيت وصليت ودعيت ربنا بنية خاالصة إنو يفرجها ويسهلها علينا....بعدها حسيت براحة شديدة ورجعتة نمتة وكلي يقين ب إنو حتفرج وتتسهل ♥ ....
يتبع..

🎭 رواياتي 📚 الوسام 2️⃣ 🎭

24 July 2024 13:31

وبديت احكي ليها الحاصل ...
بدور : ي رييت لو بقدر اساعدكم ي أختي بس ياهو انتِ عارفة حالنا ـ وأيمن زاتو شغلو ماشي يتراجع ـ بس الحمد لله ـ واسي عرس اختو الجمعة وتوب زي الناس زاتو م عندي تيابي القديمة الناس حفظتها ...
بنان : لالا ي بت انا اصلا حكيت عشان افضفض ليك ـ وعارفة ظروفكم زاتها صعبة عاذرااك ي اختي ـ وبالنسبة للتوب م تشيلي هم ان شاء الله ايمن بجيب لي واحد جديد ...
بدور: ربنا يصلح الحال ويفتحها علينا ي رب ...
بنان : اللهم آميين ♥
..... بعد م حكيت مع اختي بدور حسيت براحة شوية ـ
هي م أختي وبس ـ هي صحبتي وبير اسراري ـ وابدا ابدا م بنخبي شي عن بعض ـ إتزوجت أيمن زميلها في الجامعة وعندهم احلى طفلين مروة ومحمد .....
........
يتبع ....

🎭 رواياتي 📚 الوسام 2️⃣ 🎭

07 July 2024 20:20

محتاجه بنات لشغل اونلاين شغل سهل وبسيط ومن تلفونك بس ارباحك في الشهر تطلع اكتر من 20 الف مصري او 400 الف سوداني او 10 الف ريال سعودي او 500دينار كويتي باذن الله كلام حقيقي وماكذب وبدون ماتدفعي ولا جنيه والله التدرييب و التسجيل مجاني جربي وماخسرانة شي والفرصة دي هتكون من اجمل فرص حياتك بعون الله🩷🤍✨ودة الرابط

https://chat.whatsapp.com/GNJZcYA1sGz1yQkiH2srVe

🎭 رواياتي 📚 الوسام 2️⃣ 🎭

05 June 2024 23:37

خلينا نقفل سيرة الموضوع دا لأنو فات و مات ، قال لي ربنا يسعدك و يتم ليك على خير .. و اسمعي تاني ما عايزين أي شكاوي ، فاااهمه ؟😂
ضحكت و قلت ليهو اتطمن ما حيكون في أي شكوى تاني ، قال لي ان شاء الله بس اكيد لو ناصر غلط عليك لازم تكلميني عشان اتصرف معاهو ، ورده قالت ليهو هييي هييي لاحظ إنو البتتكلم عنو دا أخوي يا أستاذ ! ضحك و قال ليها صحي نسيت انك أختو ! ضربتو ضربه خفيفه على كتفو و قالت ليهو بطل إستهبال ! طبعاً كنت بضحك عليهم ، بعدها ورده قالت ليهو بالمناااسبه انت ما شايف إنو بعد دا مفروض تتواصل مع ناصر تعتذر منو و ترجعوا زي ما كنتوا ؟؟!... قال ليها اتطمني دا حصل قبل يومين ، قالت ليهو بالجد !! و ليييه ليييه ما كلمتني ، قال لي فيها الآخر عرفتي ولا لا ؟!.... طبعاً أنا خلاص حسيت إنو حـ يغمى عليك من كمية السعاده دي !.... المهم اتكلمنا شويه و قفلنا من بعض و بقيت حاضنه التلفون و أنا مبتسمه و عيوني قلوب قلوب و طوالي اتصلت على ناصر و أكد لي حقيقة الكلام القالو زيدان و عرفت إنو ناصر هو الرسل ليهو بس في الآخر زيدان هو الإعتذر منو ، يعني ناصر دا كأنو قاعد جوه عقلي و عارفني بفكر في شنو ! حل المشاكل من كل اتجاه و راضى كل الأطراف !
المهم بعدها بدينا تجهيزات العرس الأصلاً موعدو كان قريب شديد ، عملناهو في حديقة البيت ، كنا عايزين عقد بسيط و معازيم محدودين ، في نفس اليوم العملنا فيهو العقد كانت خطوبة رشا و مروان ، عملوها بعد عقدنا مباشرة و الفرحه بقت فرحتين ، طبعاً في الفتره ديك كنت مكنصله كل اشغالي و مشغوله مع تجهيزات عرسي إلا المبادرات الخيريه كنت متابعاها ، أصلاً بديت فيها قبل 4 شهور ، عملت منظمه و مبادره لمساعدات النازحين في كل أنحاء السودان و المميز في المبادره أو المنظمه دي إنو كل الأعضاء الفيها أنا بعرفهم و واثقه فيهم ، اخترتهم بعنايه شديده ، بوصلوا المساعدات للأسر النازحه و اللسه في مناطق الحرب بكل أمانه و إخلاص من دون ما ينقص كيس واحد ، طبعاً سارا خالتي كانت متابعه معانا تفاصيل الزواج و حتى يوم العقد و خطوبة رشا كانت سامعانا و شايفانا صوره و صوت ، تعبت منها هي و ورده كل دقيقه تتصل وحده فيديو و تقول لي ألفتي التلفون للإتجاه الفلاني عايزا اشوف الحاجه الفلانيه و طبعاً كل الصور الإتصورناهم رسلناها ليهم ، خالي إيهاب ذاااتو ما قصر و كان متابع معانا ، طبعاً أخوات رياض جوا مع أمهم و هو ذاتو جا لأنو أمو مرضت شديد فـ جا يشوفها تاني و يتطمن عليهم و يرتب ليهم أوضاعهم ، ما عارفه حـ يرجع تاني أول لا ، طبعاً ولاء الغيره كانت ظاااهره فيها ، حسيت قلبها مولع نار ، طبعاً الحاجه العرفتها من ناصر إنو اختها الصغيره أصلاً لسه ما امتحنت و هي كذبت و قالت لي إنو اختها عايزا تغير و تقرا إعلام و دا كلو عشان تصل لي و تتكلم معاي و تخليني اسجل رقمها عشان توصل لي فهم معين وفشلت خطتها 💁
المهم يوم العقد ما ودوني بيت ناس ناصر طوالي ، مشيت تاني يوم ، جات خالتو فريده و معاها اتنين من جاراتنا السودانيات ، ساقوني البيت و هناك كانوا عاملين لي حفلة ترحيب بسيطه كدا ، أمي ذاتا كانت معاهم ، كلهم كانوا نسوان و الرجال في بيتنا نحنا ، كنت لابسه توب زيتوني فيهو اشكال بالذهبي و الإكسسوارات ذهبية و الهاي هيلز ذهبي ، و الميك اب كان هادي و رايق ، طبعاً القعده كانت طويله و النسوان طولوا معانا ، طبعاً ناصر رسل لي و قال لي أنا في البيت و في غرفتنا ، تعالي خليني اعرف ابارك ليك ، قلت ليهو شنووو ! لا لا ما بقدر أقوم و أصلاً اقول ليهم شنو ؟ عن إذنكم أنا داخله غرفتي ! لا لا مستحيل .. قال لي اتحججي ، قولي ماشه الحمام مثلاً ، قلت ليهو لا لا ياخ ، بعد يمشوا خالتو فريده براها حـ تتصرف و بعدين انت مش مفروض تكون في بيتنا ؟ قال لي كنت بس جابني الشوق ، يعني ما معقوله أمشي ليك هناك ألقاهم جابوك هنا ، اجيك هنا تقولي ما جايه تشوفيني ! قلت ليهو ناصر والله ما بقدر !! قرا رسالتي و ما رد علي ، فـ فهمت إنو زعل مني
المهم بعد صلاة المغرب النسوان طلعوا و مشوا بيوتهم و أمي ذاتا ودعتني و مشت ، بقينا قاعدين أنا و خالتو فريده ، قالت لي غرفتكم جاهزه ، تعالي أوديك ليها ، طبعاً خفت تدخل و تلقى ناصر قاعد و منتظر من قبيل ، بس لمن دخلنا لقينا الغرفه فاضيه ، قالت لي أدخلي غيري ملابسك و إرتاحي شويه ، قلت ليها طيب ... المهم دخلت و استحميت و بدلت ملابسي ، جات دقت لي الباب و قالت لي تعالي العشا ، قلت ليها طيب ، لفحت لي توب و طلعت ، كان في عمو مدثر و وائل ، سلمت عليهم و قعدت و أنا بفتش على ناصر بعيوني ، خالتو فريده قالت ناصر دا مشى وين !؟ وائل قال ليها قبل شويه شفتو جنب الباب هسي بجي ، فعلاً ما تمينا دقيقه إلا و هو جا داخل ، سلم علينا و قعد بس نهاي ما عاين لي لمن اتحسست ، لمن خلصنا عشاء ساعدت خالتو فريده و رفعت معاها الصحاني و غسلت العده رغم انها رفضت و قالت لي عروس ما تعملي شي ، كنت حـ اعمل ليهم الشاي بس هي رفضت و أصرت

🎭 رواياتي 📚 الوسام 2️⃣ 🎭

05 June 2024 23:37

قالت لي بصوت واطي انتِ عارفه إنو أنا مرات بتكلم من دون ما أركز صح ؟ ضيقت ليها عيوني و قلت ليها سرررعه قولي عملتي شنو ؟؟
قالت لي امبارح لمن كنت بتونس في المطبخ مع أمي من دون قصد مني قلت ليها إنو انتِ عاااارفه إنو هم ضغطوا على ناصر و أصروا إنو يطلقك !
قلت ليها شنووو ! قالت لي عشان كدا أمي من قبيل بتعاين ليك ساااي و اظنها كلمت أبوي عشان كدا مستغربين لأنك سكتي و ما قلتي ليهم شي و يمكن حاسين بالحرج !
فجأه كدا أبوي قال لينا انتوا بتوسوسوا بتقولوا في شنو دخلونا معاكم في ونستكم دي ! رشا قالت ليهو لا لا كلام بنات بس ... سكت مسافه بعدها قلت ليهو أبوي ، أمي ... لمن عاينوا لي ، قلت ليهم ايوه انا عارفه إنو انتوا أصريتوا على ناصر عشان يطلقني ... أنا حالياً ما متضايقه و ما زعلانه منكم لأنو لمن قعدت مع نفسي و فكرة من وجهة نظركم شبه اتفهمتكم و عذرتكم ، عارفه انكم بتخافوا علينا و عايزين مصلحتنا ، بس لأول مره أحس انكم استخدمتوا طريقه أو أسلوب غير رشيد ! المحيرني فيكم إنو لمن قلت ليكم إنو ناصر طلقني مثلتوا و عملتوا نفسكم متفاجئين و انتوا السبب في الطلاق دا ! عموماً أنا اتناسيت الحاصل ، ما بحب ألومكم ولا بحب أزعلكم أو أزعل منكم ، قلت كدا و طوالي مشيت على أبوي و بوستو على جبينو ، قال لي بتي الغاليه ربنا يحفظك لي و أعفي لي عليك الله ، والله عارف تصرفي ما صح بس ما كنت بفكر في شي غير مصلحتك ، قلت ليهو عارفه والله ، كل أهل بتمنوا الأحسن و الأفضل لأولادهم .... أمي قالت لي و أنا ؟ فاطاني و جاريه لأبوك طوالي !... ضحكنا عليها ، مشيت حضنتها شديييد و قلت ليها كنت مخليك تحليه في النهايه ...❤️
في نفس اليوم دا بعد العصر كدا ورده رسلت لي تنبذ فيني ساااي ، شغاله لي يا خسيييسه يا كلبه لييييه لييييه ما بتقولي لي أخبارك سمحه زي دي ! وااي فرحت ليكم شديد والله ، ربنا يسعدكم و يهنيكم ، مش قلت ليك حاسه انكم في يوم حـ ترجعوا لبعض ؟ لأنو انتوا ما ينفع إلا تكونوا لبعض ، والله مهما حاولت أوصف ليك إحساس السعاده الجواي ما بقدر ، ما حـ تتخيلي أنا مبسوطه قدر شنو ... قلت ليها أول شييي آمين يارب و ربنا يسعدك انتِ كمان ، صدقيني اخوك هو الإستعجل و في نفس اليوم الجا فيهو البيت ساق أهلو و جانا ، و أصلاً كنت عارفه رشا حـ تشمر ليك عشان كدا ما حبيت اسبقها و أخرب ليها الشمار 😂
قالت لي أحلى خبر و أحلى مفاجأة والله بس أكيد ما زي المفاجأه العملها ليك ناصر ، شفتيهو رومااانسي كيف ؟؟ طبعاً رشا حكت لي بموضوع البرنامج الإستضافوك فيهو و كيف ناصر ظهر ليك فجأه ، قلت ليها رشا دي شكلها ما خلت شمار رايح كدا و ما قالتو ليك ، قالت لي أحسن منك ، بتكلمني بكل التفاصيل و بتحسسني كأني معاكم ، ما زي بتجي تحكي لي بعد يومين أو تلاته !
قلت ليها أنا عشان بكون عارفه رشا حـ تجي و تحكي ليك بسكت ، المهم زيدان عرف ؟
قالت لي هو حالياً برا البيت ، ما عارفه إذا أبوك اتصل كلمو أو رسل ليهو أو لا ...بس ما تشيلي هم ، أنا بعرف كيف أقنعو ، ناصر أخوي ما فيهو ولاااا غلط ، و عريس ما بترفض ، قلت ليها عشان أخوك بتقولي كدا ، قالت لي أبداً والله صدقيني لو كان غريب كنت حـ اقول كلامي دا ، قلت ليها فعلاً هو كدا ، قالت لي عشان كدا يستاهلك ... المهم اتكلمنا مسافه و لمن لقيت رسايل من ناصر طلع من دردشتها و رديت عليهو ، قال لي ايوه أنا ذاتي قلت بتكون نامت ، المهم كيف كان يومك ؟؟
قلت ليهو حلوو شديد و انت ؟... قال لي كلو تمام و حالياً أنا برا البيت ، قلت ليهو مشيت وين ؟ قال لي أنا و الحاجه جينا زياره لأم رياض ، أمي أول ما عرفت انها كانت مرقده في المستشفى قالت إلا تجي و تشوفها ، قلت ليهو ايوااا ، قال لي ايواااا دي أصلو ما إتقالت لـ خير 😂 قلت احسن تسمعي مني عشان ما تزعلي لو عرفتي من زول غيري ، قلت ليهو لا لا ما زعلانه ... المهم اتكلمنا شويه و بعدها هو طلع من الواتس و أنا بقيت أشوف في الـ Stories واحده ورا التانيه لحد ما المفاجأه كانت لمن فتحت إستوري ولاء و لقيتها خاته صوره ليها هي و ناصر !! هنا حسيت عفاريت الدنيا دي كلها بترقص قدامي ، كاتبه عليها أحلى يوم !... حسيت دمي بغلي و للحظات زعلت شديد من ناصر ! هو فاهمني و عارف مشكلتي كويس يقوم يمشي و يتصور معاها !
شلت الصوره و طوالي رسلتها ليهو و معاها علامات إستفهام ، ما كان خاشي فـ طوالي اتصلت عليهو ، أول ما فتح الخط قال لي اشتقتي لي بالسرعه دي ! قلت ليهو ادخل الواتس و قفلت الخط ، دخل الواتس و بعد شاف الصوره قلت ليهو ممكن أفهم ؟ قال لي جبتي الصوره دي من وين ؟!! قلت ليهو ما مهم ، فسر لي !!
طوالي رسل لي صوره فيها هو و خالتو فريده و وجدان و أخواتها و مراه كدا أظنها أمهم ، قال لي دا شكل الصور الأنا إتصورتها ، ما عارف انتِ جبتي الصوره دي من وين !! طبعاً لمن دققت في الصوره الهو مرسلها لي لقيت الإسمها ولاء دي واقفه جنبو و فهمت إنها قاصه الصوره ...

🎭 رواياتي 📚 الوسام 2️⃣ 🎭

05 June 2024 23:37

#زهرة_فؤادي17
الجزء الثاني
الآخيره
مها حولي الزاكي

موافقه ...
طبعاً لمن قلت كدا حسيت ناصر دا شويه كدا و حـ يقوم يبشر ليهم ! الفرحه الظهرت في عيونو خلتني أعرف كمية الوجع و الخذلان الكنت حـ أضوقو ليهو لو كان قلت لا ، و أصلاً أنا كيف أقول لا و أرفضو و هو نصفي التاني ! هو سعادتي و حبي و حياتي ، هو الإنسان الوحيد البلقى نفسي و سعادتي معاهو ، هو الوحيد المستعد يبيع الدنيا كلها و يشتري خاطري ، هو الإنسان الوحيد الحباني بالجد ، هو الإنسان الوحيد البقدر أسند نفسي عليهو و أنا مطمئنه ، مطمئنه إنو ماف واحده حـ تاخد مكاني في يوم ، ماف واحده حـ تلفت نظرو غيري ، ماف واحده حـ تستقر على عرش قلبو و تستولي على عقلو غيري ، مطمئنه لفكرة إنو هو ملكية خاصه ، خاصه بي أنا و بس ، هو الحاجه الوحيده الما بقبل أي زول يشاركني فيها ، الحاجه الوحيده البتمنى أدسها من الناس ، الحاجه الوحيده حـ احافظ عليها و أصونها و احتفظ بيها جواي ❤️
ما بنكر إنو للحظات خطر على بالي زيدان و كيف إنو هو ما كان راضي إنو أنا و ناصر نرجع لبعض ، هو الكان سبب في الطلاق دا و أمي و أبوي مشاركنوا في غلطوا دا ، فكرت للحظات و لقيت إنو ماف زول حـ يقدر يحس بينا أنا و ناصر حتى اقربهم لينا ، ماف زول عارف تفاصيل علاقتي بناصر ، ماف زول حاسي بكمية الحب و الود و الإحترام البنكنوا لبعض ، ماف زول فيهم حـ يقدر يتخيل لأي درجه نحنا متمسكين في بعض و ما بنقدر بدون بعض ... هم ما حاسين بينا ولا حـ يحسوا بينا فـ كيف اعمل الهم عايزنوا و أنا ضايقه و مجربه و عارفه يعني شنو أكون بعيده عن ناصر ، يعني شنو عذاب الفراق و نار الشوق ، أنا ما بعمل في حاجه غلط ، ولا ارتكبت جريمه عشان أخاف ، أنا كل العملتو إني رضيت بحاجه أنا عايزاها ، بإنسان مستحيل ألقى سعادتي مع غيرو ... طبعاً زيدان لحد اللحظه ديك ما كان عارف إنو أنا عرفت بالعملو و كيف هو و أمي و أبوي ضغطوا على ناصر عشان يطلقني ، هو حكى لـ ورده لمن ضغطت عليهو لأنها حست إنو هو ليهو يد في الطلاق دا ، طبعاً ما ورتو إنو هي كلمتني ، هي ذاتا في لحظات زعل بس رسلت لي ريكورد و كلمتني بس نهاي ما جابت سيره لـ زيدان و أصلاً أنا قلت ليها ما تكلميهو ....
المهم خالتو فريده قعدت تزغررررد و ضمتني و بقت تبارك لي و أنا بعاين لأبوي ، رشا ذاتا جات حضنتني و قالت لي ربنا يتم ليكم على خير و دا أحسن قرار انتِ اتخذتيهو ، ناصر حس بي و فهم نظراتي لـ أبوي فـ طوالي قال ليهو يا عمي انت عندك إعتراض ؟! ماف حاجه حـ تتم بدون رضاك اتأكد من الحاجه دي و كلامك على العين والراس ... طبعاً ناصر لمن قال كدا إتخلعت و بقيت أعاين ليهو بخلعه ! معنى كلامو إنو أبوي لو رفض هو حـ يسمع كلامو !... عمو مدثر اتكلم و قال يا جماعه أنا عن نفسي ما عندي أي إعتراض و مها زي بتي والله و الأهم إنو ناصر لسه باقي عليها ، والله من جا طوالي فاتحني في الموضوع و أصر إلا نجيكم الليله ، قلت ليهو يا ولدي اصبر شويه بس حلف ما يصبر و ياهو استعجلنا و جيناكم ، هو دايرهاو هي ما عندها مانع دي أهم نقطه ، نحنا ما من حقنا نعترض و أساساً الإعتراض ليه ؟ لو في زول عندو إعتراض معناها عندو سبب أو أسباب خلوهو يعترض !... قال كدا و عاين لأبوي و قال ليهو عايزين الصراحه بس ، انت معترض على شنو و ليه ؟؟
أبوي سكت مساااافه و عاين لأمي و بعدها عاين لي و قال ليهم لو هي مبسوطه و دا قرارها فأنا ما عندي اي مانع و ربنا يجعل الفيهو خير ... طبعاً لمن قال كدا حسيت بجبل من الهموم إنزاح مني ، حسيت كأنو ياداب أبواب السعاده إنفتحت في وشي ، ياداب دقت السعاده بابي من فتره طويله ...
أمي جات باركت لي و الرضا كان باين عليها ، المهم كلها باركوا و دعوا لينا ، رشا كانت بتصورنا فيديو و صور ، قالت حـ ترسلهم لـ ورده و تفاجئها ...
في نفس اليوم دا بليل ، ناصر رسل لي ، قلت ليهو لا عليك الله ما كان ترفع الحظر 😒
قال لي حااااضر جاري الحظر ، قلت ليهو احظرني لو تقدر ، قال لي فعلاً ما بقدر والله ، كفايه الحظر الحظرتك ليهو 😂 قلت ليهو اضحك كويس ! قال لي المهم خليك من دا ، منتظر متين يجي اليوم الحـ يتم فيهو العقد و بعدها نعيش تحت سقف واحد ، قلت ليهو كلها أسابيع ... عارف إني للآن ما مصدقه و حاسه نفسي بحلم !
رسل لي ريكورد بصوت الحلو داك و قال لي فيهو : حتى لو حلم ما عايزين نصحى منو ، انتِ ما عارفه أنا حالي كان كيف في الفتره البعدتنا فيها الظروف عن بعض و الطلاق و الفتره الكانت بعديهو ، عشت أيام سوده كان أحسن منها الموت بس الحمدلله حـ تهون بإذن الله .... قلت ليهو ناصر الله يرضى عليك ما تجيب سيرة الموت ، والله بتوتر و بحس بقلق و خوف من الفقدان ، قال لي حاضر ما حـ اجيب سيرتو ، قلت ليهو ناصر ممكن سؤال ؟

🎭 رواياتي 📚 الوسام 2️⃣ 🎭

03 June 2024 21:59

فجأه جانا صوت بقول نااااصر ! طبعاً من الصوت عرفتها ، كانت رشا ، عاينت ليهو بإستغراب و قالت ليهو جيت متين انت ؟
قال ليها أول شي سلمي بعد داك اسألي ، لمن جات سلمت عليهو قال ليها حـ نحكي ليك و نحنا في الطريق ....
المهم لمن وصلنا قلت لـ رشا ما تكلمي زول بجية ناصر ، خلينا نعمل نفسنا رايحين ، ناصر قال لي بعدين المساء بإذن الله حنكون معاكم ، قلت ليهو شنووو لشنووو ؟!!!... عاين لي جوه عيوني و قال لي تفتكري لشنو ؟؟ رشا قعدت تضحك و قالت لينا غيتو انتوا ديل ! عذبتوا نفسكم و جهجهتوا الناس معاكم ، عليكم الله اتلموا بعد دا و ريحونا و ريحوا نفسكم ، قال ليها أصلاً دا الحـ يحصل ، يلا خشوا لمن نجيكم بعدين المساء ، رشا قالت ليهو غيتو الليله أمك حـ تنخلع خلعه لمن تشوفك واقف قدامها ، قلت ليهو ما شفت حالتها كيف يا ناصر ، والله كل يوم عيانه و كل يوم ملامحها بتبقى باهته أكتر بسبب خوفها و قلقها عليك ، قال لي عارف والله و ربنا يعفي لي حقها ، بعدها نحنا دخلنا البيت و ناصر مشى بيتهم ، طبعاً أمي هي الفتحت لينا ، قالت لينا اتأخرتوا شديد ! رشا قالت ليها الحلقه كانت طويييله ، أمي عاينت لي و إبتسمت ، قالت لي اليوم شايفاك مروقه ، رشا قالت ليها كييف ما تروق!... لمن عاينت ليها و ضيقت ليها عيوني قالت ليها قصدي البرنامج كان ظريف و حلو و الحلقه كانت لطيفه عشان كدا هي مروقه ! المهم لمن دخلت غرفتنا أنا و رشا قالت لي سوووورعه أحكي لي بالتفصيل الحصل شنو ، قلت ليها أنا تعبااانه بحكي ليك بعدين ، أو انتظري الحلقه تنزلي و احضريها عشان تعرفي الحصل شنو ، قالت لي بتنزلي متين هي ما قادره اصبر ! قلت ليها يمكن يوم الجمعه ، قالت لي يعني هسي انتِ و ناصر حـ ترجعوا لبعض !؟ قلت ليها نشوف البحصل شنو ، قالت لي اوووعك المره دي تعملي حركات و ترفضي ، وافقي عليهو طوالي و عرسوا و عيشوا في ثبات و نبات بدل النفسنه العاملنها لـ روحكم دي ، قلت ليها خلاص طيب تمام ، قالت لي بالمناسبه ناصر قال جا قبل يومين طيب كان وين ؟؟
قلت ليها ما عارفه يمكن في بيت صحبو الكان مشى و قعد معاهو قبل ما يسافر ، قالت لي شكلو كان منتظر الحلقه دي عشان يفاجئك ، عشان كدا ما ظهر ...
طبعاً بعدها صليت الضهر و رقدت على السرير و بقيت حاضنه المخده و أنا مبتسمه و حاسه نفسي في عالم تاني ، كل ما اتذكر اللحظه الشلت فيها الشريط عن عيوني و شفت ناصر قدامي بجيني إحساس حلو شديد ، إحساس فريد من نوعو ... ضميت المخده علي و ختيت فيها راسي و غمضت عيوني و حسيت إني في مكان مليان زهور و نجيله و شجر و هوا بااااردو أنا راقده على مرجحانيه ، بتتحرك بي يمين و شمال في هدوء تام ، حسيت بالسكينه ، بالإنشراح و براحة بال ما عاديه ، كأنو كل الحزن الجواي إتلاشى ، كل الوجع الكنت حاسه بيهو إتبخر ، جية ناصر دي كانت بمثابة المسكن ، سكن كل آلامي و جروحي....مشيت بعيد بخيالي و إحساس السكينه و الطمأنينه كان مفارقني ... فجأه كدا اتذكرت إنو ناصر من جا راجع ليهو يومين و إنو احتمال كبير يكون قعدهم في بيت صحبو العندو تلات أخوات داك !!... طوالي فتحت عيوني و قمت من المخده ! طوالي اتذكرت لمن أخوات صاحب ناصر جوا زياره لـ خالتو فريده مع أمهم ، و قالوا إنو ناصر قعد معاهم كم يوم كدا قبل ما يسافر مع رياض أخوهم ، يعني قبل كدا قعد معاهم في بيتهم فـ شنو البمنعو يمشي و يقعد معاهم تاني !!
المهم في نفس اليوم دا ناصر جا و معاهو أمو و أبوهو و وائل ، طبعاً أنا من الغرفه ما طلعت بس كنت سامعه صوتهم و متوتره كأنو دي أول مره يجي ناصر و يتقدم لي فيها ، أطرافي كانت بارده من شدة التوتر و الخوف ، طبعاً لمن سمعت صوت خالتو فريده و هي بتضحك ارتحت شويه ، لأنو هي أكتر وحده كانت عايزانا ننفصل بس هسي بما انها جات معاهم و بتضحك كمان معناها راضيه و ما عندها أي مناع !!
شويه كدا رشا جاتني داخله و قالت لي يا العروووس ! لا لا ما تتوتري كلو تحت السيطره ، ما شاء الله عندك نسيبه ناااهره و قاااهره و قاااادره ، والله لو عليها تعرس ليكم اليوم قبل بكرا ، طبعاً ما أدت أي زول فرصه عشان يتكلم ، لا أبوي لا عم مدثر لا وائل ، سكتتهم كلهم و قالت خلاص أخدنا موافقتنا باقي نحدد يوم العرس 😂🤣 طبعاً أبوي لمن حاول يتحجج و قال ليها خلينا نشوف راي البت قالت ليهو البت موافقه و الولد مواافق و نحنا أكيد ما حـ نعترض مش في النهايه نحنا عايزين راحة و سعادة أولادنا !
غيتو خالتو فريده اليوم مبسوطه شديييد و ما عايزا أي زول يعترض على العرس دا أو يقيف في وشكم ، غيتو اليوم عجبتني و كيفتني ، أخيراً اقتنعت إنو ولدها دا ما بقدر بدونك و إنو لو ما عرسك حـ يرجع السودان تاني عشان كدا عايز تعرس ليكم سرعه سرعه و تقعدو معاها لكن والله عجبتني عجب 😂

🎭 رواياتي 📚 الوسام 2️⃣ 🎭

03 June 2024 21:59

الآخر يطلع عكس توقعاتهم و يخذلهم ، و أنا من هنا و بعد ما شفت ريدتكم و إخلاصكم لبعض حتى بعد طلاقكم حابه اطمن بنات حواء و أقول ليهم الدنيا لسه بخيرها و لسه في رجال ، رجال بالجد !❤️
واصلت كلامها و قالت لينا ننتقل لـ فقرة أحكي لينا عنك ، بس أنا عايزا كل واحد منكم بدل ما يحكي عن نفسو يحكي لينا عن الطرف التاني ، نبدا بمنو فيكم ؟!
ناصر قال لي يلا بطلي بكى و أبدي انتِ ، أخدت نفس عميق و قلت ليها أنا ما عارفه أقول شنو ، والله لسه منصدمه من المفاجأه العملتوها لي ، ناصر قال ليها شدة ما مصدومه ما قادره تتكلم بس ماف مشكله عارف انا شنو بالنسبه ليها ، خلوني اتكلم ليكم عنها شويه :
أول شي هي بكااايه شديد بس قلبها قوي ، عنيده بس رقيقه ، بتزعل و يتنفعل بسرعه بس قلبها لين ، دائماً بتقيف مع الحق حتى لو كل الناس وقفت ضدها ، بتمشي ورا قناعاتها طول ما هي صحيحه و ما بتخاف إلا من ربها ، عزيزة النفس ، قويه ، مثابره و صابره ، طموحه و محبه لوطنها ، ما بتحقد على زول ، ما بتحسد زول ، بتتمنى الخير لكل الناس ، قلبها عامر بالطيبه و المحبه ، معطائه ، متفانيه و مخلصها ... هي أكتر انسانه اتحملتني و صبرت علي ، اكتر انسانه أنا بحمد ربي عليها ، هي الوحيده الخلتني اسأل نفسي أنا شنو الحاجه الكويسه العملتها في الدنيا دي عشان ربنا يرزقني حبها ! المميز فيني شنو عشان هي تحبني للدرجه دي و تبكي بسبب بعدي عنها و في أشد لحظات زعلها و غضبها مني أول ما تحصل لي حاجه بلقاها جنبي أو متصله علي و هي بتبكي خوفاً علي ! أنا مهما اتكلمت و مهما وصفتها ما بوفيها حقها ، فـ ألف حمد و شكر على نعمة وجودها في حياتي .... يارا قالت يا سلاااام يا سلاااام على اللطافه و الكياته دي ، حاسه إنو الإستديو كلو بقى قلوب قلوب و في ريحه عطِره كدا بقت ماليه المكان !
طبعاً أنا فجأه كدا لقيت نفسي بقول :
و هو زول ما هين والله ، حنين شديد ، شهم ، وفي و صادق و قدر كلمتو ، لو وعد أوفى و لو حب أخلص ، بقول إني صبرت عليهو و اتحملتو و في الحقيقه هو الإتحملني ، هو الصبر على عدم تفهمي ، على زعلي و انفعالي السريع ، على تصرفاتي السخيفه الدائماً بعملها ليهو لمن أزعل منو ، أنا مهما اسأت ليهو مهما سمعتو كلام قاسي ما بتخلى عني و أول ما اقول اخخ بلقاهو اول واحد قدامي ، بالنسبه لي الحب كان عباره عن مجرد مشاعر لفتره مؤقته ، ما اتخيلت إنو في انسان ممكن يحب إنسان للدرجه دي ، ما اتخيلت إنو في اتنين حـ يتجاوزوا و يتخطوا المشاكل دي كلها و هم محافظين على الود و الريده و العشق و الهيام الجواهم ، أنا بعترف إني انسانه مدلعه و شديد كمان و نيه على قول حبوبه الله يرحمها بس مع ذلك ناصر اتقلبني و اتقبل كل تصرفاتي الساذجه ، حسسني كأني طفله ، مهما أغلط بسامحني و بقيف معاي ، ما برضى فيني ، هو يشاكلني و يناقشني و ينهرني عادي بس ما برضى زول يقرب مني أو يسألني ، ناصر ضحك و قال لي مع ذلك معذباني و ساله روحي !
يارا قالت لينا واي يا جماعه اتدردق ليكم هنا ! ياريت لو كانت الحلقه دي بث مباشر ، عشان البنات ينبسطوا و يتحمسوا و مشاعرهم تتكرفس زي ما اتكرفست مشاعري! بالجد الشي البيناتكم اكبر من إنو ينقال عليهو حب ، قادره أشوف الحاجه دي في عيونكم البتلمع كل ما تتكلموا عن بعض ، ربنا يرزق كل بت بالراجل الهين اللين الحـ يتمسك بيها و يحبها و يتقبلها في كل حالاتها و في كل الظروف ، ياريت لو كل الرجال زيك يا ناصر ، و لو كل البنات زيك يا مها ، يا بختكم ببعض والله ....
المهم بعدها استمرت فقرات البرنامج ، حسيت نفسي خفيفه و مع كل كلمه أو جمله من ناصر بحس بالإمتنان و الحب اتجاه ناصر ، يعني سبحان الله ما كنت متوقعه إنو يجي ، ما كنت متوقعه المفاجأه دي خالص و مستحيل كانت تخطر على بالي ، جا و هو مندفع و حابي يعبر عن مشاعرو و أحاسيسو حتى لو كانت قدام الناس و ما خجلان يقول الكلام دا في برنامج يمكن كل الناس تشوفو ، في خواتيم البرنامج اتكلمنا عن السودان فـ ناصر قال ليها :
أنا متفائل شديد و ان شاء الله الحرب دي قريباً حـ تنتهي و كل الناس حـ ترجع بيوتها ، الحرب دي شتت الناس و فرقتهم و زرعت جواهم خوف و وجع ، بس في الآخر حـ تنتهي ، بكرا تلتئم الجروح و تتطايب ، بكرا نمسح دموع الوجع ، و بكرا بإذن الله يتبدل حالنا للأفضل ، ربنا ينصر جيشنا و ينعم على السودان بالأمن و الإستقرار ، و السودان بإذن الله حـ يرجع أفضل من الأول بدعوات أمهاتنا و بحكمة آباءنا و بحماس و سعي شبابنا ، الحرب كانت مرحله لابد نمر بيها ، مطب لازم نتعثر بيهو عشان نمشي لقدام ، عشان نتعلم الدرس و نفهم يعني شنو وطن ، يعني شنو نتوحد و نكون يد واحده ، عشان نفهم إنو التفرقه و العنصريه ما بتجيب لينا غير البلا و المشاكل ، و راجعين بإذن الله ❤️