🎭 رواياتي 📚 الوسام 2️⃣ 🎭

12 May 2024 09:19

ذاتك ما تقعد يا ناصر ، اسمع الكلام و أبقى مارق ، براك شايف الوضع كيف ماشي للأسوأ ، البلد دي تاني ما بتنقعد ، قال ليهو ان شاء الله يا عمي ... كنت حاسه بنظراتو علي بس خالص ما عاينت ليهو لحد ما العربيه إتحركت ، طبعاً كل الشوارع خاليه ، كل البيوت باهته ، الناس الكانوا لسه صامدين و قاعدين بعد الحصل أمبارح و بعد تأكيد خبر استيلاء الدعم السريع على معسكر الإحتياطي المركزي كل الناس طلعت من الصباح و في ناس من أمبارح مرقت رغم دناءة الوضع ، في القصف الإستمر أمبارح لحد الساعه 9 بليل الناس بالفي و بالمافي طلعت ، بعد مشينا بعيد شويه إتلفت وراي و شفت ناصر من بعييد لسه واقف جنب باب البيت ... قلبي لحظتها كان بعتصر من الألم بس للأسف برضو ما بكيت ، و نحنا طالعين الطياره كانت بضرب يمين و شمال و رشا خاته يدينها على أضنيها و بتبكي و أمي حاضناها و بتهدي فيها و هي دموعها نازله ، سارا إتلفتت علينا و قالت لي تعالي أقعدي جنبي هنا ، لمن مشيت و قعدت جنبها ختت راسي على كتفها و بقت ضاماني عليها ، هي و أمي رغم الفيهم و رغم وجعها و جرحهم النازف إلا انهم مع ذلك كانوا بواسونا أنا و رشا و هم ما لاقين زول يواسيهم ، رغم حرقة قلبهم على أمهم إلا انهم كانوا بحاولوا يطفوا حرقة قلبنا ، أمي و خالتي سارا صمدوا و أظهروا ثبات ما عادي ، صبروا و اتماسكوا عشانا أنا و رشا ، لمن مشينا بعيد بقينا نشوف في الطيران و هو بضرب و شايفين الصواريخ البتطلع زي شرارة النار ، رشا دي كانت بتبكي لحد ما طلعنا من الخرطوم ، طبعاً لاقينا إرتكازات دعامه ، ما عارفه قالوا شنو أو الحصل شنو ، كنت في عالم تاني ، مع الضهريه كدا نحنا وصلنا مدني ، بتنا هناك و تاني يوم طوالي اتجهنا على بورتسودان ، لمن وصلنا هناك تاني ركبنا عربيه وصلتنا لحد بيت كدا ، أول ما نزلنا لقينا خالي إيهاب في وشنا ، كل الصمود و كل الثبات الكان جوه أمي و خالتي إتلاشى لمن شافوا أخوهم ، خالي إيهاب ضماهم عليهو الإتنين و هو يبكي و هم يبكوا ، رشا ذاتا بقت تبكي معاهم و أصواتهم بقت عاليه لدرجة إنو ناس الحي جوا مارقين و باب البيت الكنا واقفين منو إنفتح و جات ندى مرت خالي طالعه و معاها راجلين و 3 نسوان ، جوا عزونا و دخلونا جوه و أمي و سارا لسه ماسكين في خالي إيهاب و ببكوا ، دخلهم جوه و إتكلم معاهم و حاول يهديهم شويه و هو بمسح في دموعو ، لمن إتلفت شافني خلاهم و جاني ، ضماني و أنا حاسه بدموعو في كتفي بس برضو ما بكيت ! حسيت قلبي إتحجر عديل ، كان صعب علي إستوعب إنو حبوبه ماتت و أنا أصلاً ما شفتها جنازتها فكيف حـ أصدق ، دخلني جوه و هو شغال لي دي إرادة ربنا نحنا ما بيدنا شي غير الدعاء ... شويه كدا الجيران جوا و البيت إتملا ناس ، ناس أمي طلعوا برا عشان الناس جوا يعزوهم و أنا قعدت جوه براي ، شويه كدا ندى جاتني داخله ، قعدت جنبي و قالت لي ربنا يصبركم على فراق حبوبه إخلاص ، والله لمن سمعنا ما صدقنا ، والله إيهاب دا لحد اللحظه دي ما مصدق ، ما تشوفيهو واقف على حيلو و بستقبل المعزيين والله هو من جوه منهار شديد ... اتكلمت معاي شويه و طلعت ، طبعاً البيت بيت خالها ، هي و خالي كانوا في سنار مع أهلها لأني في شهرها الأخير تقريباً ، لمن سمعوا بالحصل سبقونا و جوا بورتسودان و خال ندى هو الأصر إنو ننزل في بيتو لحد ما نسافر ، طبعاً كل معارفنا الفي بورتسودان جونا في نفس اليوم و لسه في ناس جاين من باقي الولايات عشان كدا أبوي أجل السفر شويه لحد ما يعملوا الفراش و يجوا الأهل يشوفونا و يعزونا بعدها حـ نسافر .....

"‏رحلُوا وما أبقى الرَّحيلُ متاعا
تركُوا الحنينَ معَ الأنينِ مشاعا

يا ليتهم قبل الرَّحيلِ تريَّثوا
حتَّى نُعانِقَ أو نقولَ وداعا "

بعد يومين :

_والله قالوا إنها ما كانت معاهم في البيت ، مشت لـ بيت واحده كانت جارتها و سكنت بعيد منهم ، مشت مع بناتها عشان يسلموا عليهم و لمن بت جارتها إتوجعت و كانت حـ تولد الحبوبه قالت حـ تقعد معاهم يومين لحد ما البت تولد ، فـ بناتها و بتهم رجعوا و خلوها ، اها يوم القصف دا قالوا بس هي في الحوش و داخله جوه بس سمعت ليها صوت شفع في الشارع ، لمن فتحت الباب شافت شافين في نص الشارع ، الصغير قاعد على الأرض و ببكي و أخوهو بحاول يقوم فيهو عشان يجروا بيتهم طبعاً أصوات الضرب كانت مسموعه ، اها هي نادتهم و قالت ليهم تعالوا داخلين ، الكبير شويه قال ليها أخوي دا خايف أبى يقوم ، طوالي طلعت ليهم و ساقت الولد من يدو و قالت ليهم بيتكم وين و ليه أهلكم يخلوكم تطلعوا في وضع زي دا ! قال ليها كنا بايتين في بيت عمتي و هسي طالعين راجعين البيت و بيتنا نهاية الشارع ، قالت ليهم ارحكم ادخلوا معاي البيت و لمن الضرب يقيف بوديكم بيتكم ، المهم ساقت و مشت بيهم على الباب و هم ماشين قدامها أول ما دخلوا كدا في قذيفه وقعت في واحد في الشارع و الرايش جاها هي فـ طوالي إتصابت و وقعت ميته في مكانها داك و الشفع ما جاتهم حاجه لأنو هي كانت وراهم ، و سبحان الله في نفس

🎭 رواياتي 📚 الوسام 2️⃣ 🎭

10 May 2024 11:29

الان روايه #حب_في_ظروف_غامضه حصريا علي 📚رواياتي الوسام 3

/channel/+QWl6saM-SrXQyJV0

حلقات يوميه #اكرر حلقات يوميه

🎭 رواياتي 📚 الوسام 2️⃣ 🎭

10 May 2024 11:27

لمتابعه الجزء الثاني حلقات يوميه اكرر حلقات يوميه قيد الكتابه



/channel/hatrshat/22886

🎭 رواياتي 📚 الوسام 2️⃣ 🎭

10 May 2024 11:25

ماسكه في أبوي و بدعي في سري و رشا واقعه في حضن أمي بترجف من الخوف و زيدان أخوي ماسك يدها و بحاول يهدي فيها ، سارا قالت ليها أصبري يا رشا بعد شويه الوضع حـ يهدى و ربنا يحفظنا كلنا بس للأسف الوضع ما هدى ، من بداية الحرب دا اسوأ يوم مر علينا ، لحد الضهر الطيران دا بضرب و الأبواب بتضرب بعض ، طبعاً لا قدرنا نعمل شاي لا فطور و كل ما واحد مننا يقيف و يقول طالع بنقعدوا ، كنت بنتصل على حبوبه بس ما بترد ، زيدان قال لينا حـ أمشي اشوفها ، أمي قالت ليهو لا لا أوعك تطلع ما شايف انت ! خلي بعد الوضع دا يروق شويه ... طبعاً ما عرفنا بالحاصل و بخطورة الوضع إلا لمن دخلنا الفيس و عرفنا إنو الدعامه بحاولوا يستولوا على الإحتياطي المركزي و إنو الطيران دا بضرب من الجبل لـ المدرعات و كانوا أكتر من طياره ، أبوي لحد آخر لحظه كان بقولوا مستحيل يستولوا الإحتياطي المركزي ، والله الليله يوم موتهم ، الدعامه حـ يبقوا لحمه مفرومه ، لمن جات الساعه اتنين زيدان ما سمع من زول و طوااالي طلع ، لمن جا راجع قال إنو هنا ماف إصابات بس لحد الكلاكله اللفه الوضع صعب شديد ، أمي جاطت فيهو و قالت ليهو تاني أوعك تطلع ، ما تجنني يا ولد الفيني مكفيني !
طبعاً حبوبه للزمن داك ما كانت بترد و زيدان حالف يمشي يشوفها و ناس أمي كل مره يقولوا ليهو أصبر شويه ، بس في الآخر قال ما بقعد أكتر ، أمي ماسكاهو من يد و أبوي ماسكو من اليد التانيه ، سارا قالت ليهو قول يا زيدان عليك الله ما تتهور ، مالك قايم فينا فجأه كدا و حالف تمشي ليها ! أمي كلنا مقلقين و خايفين عليها بس حالياً لا نحنا بنقدر نمشي ليها لا هي حـ تقدر تجي ، اصبر شويه و أنا ذاااتي بمشي معاك نجيبها و نجي ... طبعاً كأنو ما بنتكلم معاااهو ، بالقوه اتفكى من أمي و أبوي و مشى و أبوي مشى وراهو و أمي دي قعدت في الأرض و بقت تبكي و خالتي سارا تصبر فيها و رشا أصلاً من قبيل داخله في حاله تانيه و أنا ما عارفه أواسي منو و اطمن منو و أنا في نفسي ما متطمنه ، شويه سمعت صوت تلفوني كان جوه ، لمن مشيت شلتو لقيتو ناصر و الخط فصل ، طبعاً انتبهت إنو متصل علي كتير و من قبيل ، لمن تاني رجع اتصل فتحت الخط و أنا يدي بترجف ، قال لي بلهفه مها طمنيني عليك انتِ كويسه و أهلك كيف ، سمعت إنو في قصف حاصل في الكلاكلات ، ان شاء الله انتوا كويسين ... قلت ليهو بصوت راجف الوضع كعب ، كعب شديد يا ناصر و للآن الطيران حايم ، حاسه إنو دي نهايتنا ، بس الكويس إنو كلنا حـ نموت سوا ، قال لي مجنوونه انتِ ! عليك الله ما تقولي كلامك دا تاني ! لحظات و بإذن الله القصف دا حـ يقيف ، قلت ليهو اليوم دا ما زي الأيام الفاتوا ، و شكلو الجاي أكعب ... انفعل فيني و قال لي للسبب دا أنا كنت عايزك تسافري مع أهلك ، للسبب دا كنت بحاول اقنعك و أقنع عمي إنو لازم تسافروا في أسرع وقت ، ماف شي مضمون ، دي حرب ما لعب ياخ .... طبعاً دموعي نزلت و بقيت أبكي ليهو و قلبي شغال دق دق لأني حسيت إنو دي النهايه ، قلت ليهو لكل أجل كتاب و أنا عارفه إنو كلنا حـ نموت في النهايه بس ما اتخيلت إنو حـ اموت موته زي دي ، يمكن الحاجه المطمناني شويه إنو كلنا قاعدين في حته وحده ، يعني لو وقعت فينا دانه أو قصفنا طيران حـ نموت كلنا و ماف واحد حـ يتوجع أو يحس بفارق التاني .... جاط شديد و قال لي ما تقلقي بي و هسسس ياخ كفايه ما تقولي شي تاني ، كل حاجه حتكون تمام بإذن الله ، قلت ليهو بصوت مبحوح ناصر أنا ما طلبت منك الطلاق إلا لمن حسيت انك قنعان مني ، يمكن أنا ما بعني ليك أي شي بس انت بالنسبه لي كل شي ، عارفه انو موتي أو غيابي ما حـ يفرقو معاك ، يمكن تزعل يوم يومين و بعدها تعيش عادي و.... قاطعني و قال لي بإنفعال ياخ كفايه قلنا ، ما تخليني اضرب بالتلفون دا الحيطه ، قلت ليك كل شي حيكون تمام فـ ماف داعي لكلامك دا كلو و بعدين منو القال ليك أنا قنعان منك ؟؟ مع إنو دا ما وقتو بس خليك عارفه إني لو إتخليت عن كل الناس مستحيل أتخلى عنك ، و على فكره أنا لمن قلت ليك حـ اطلقك و حـ يحصل العايزاه كنت بمشي فيك ساي ، عشان تقفلي الموضوع دا ، و لأنك بالجد زهجتيني! بس الأكيد إني مستحيل أطلقك حتى لو انتِ أصريتي و ألحيتي علي ، لا انتِ لا الظروف لا أهلي لا أهلك ماف شي أو كائن بقدر يضغط علي عشان أطلقك ، الحصل بيناتنا سوء تفاهم و مشاكل عاديه بتحصل بين أي متزوجين ، بس ما أي خلاف معناها النهايه ، و ما أي مشكله أو سوء تفاهم معناها لازم نلجأ للطلاق !... أنا عارف انك ما عايزا الطلاق ، و عارف إنك قلتي كدا عشان زعلانه مني و عتبانه علي و فعلاً أنا استاهل و عارف نفسي مقصر بس لو اتفقتي معاي على نقطة إنو حالياً اهم شي سلامتك و سلامة أهلك و إنو انتوا لازم تطلعوا برا السودان عشان تكونوا كويسن و آمنين تلقائياً حـ نلقى مشاكلنا دي كلها إتحلت ، أنا بس عايزك تفهميني ، و ما عايزك تفسري كلامي و تصرفاتي على انها تخلي عنك ، أنا ماف شي بهمني غيرك حتى نفسي ، فلمن اقول ليك سافري

🎭 رواياتي 📚 الوسام 2️⃣ 🎭

10 May 2024 11:25

طويله ، حـ نتكلم فيها بجديه ، و بـ رضا ناصر أو عدمو الطلاق دا حـ يحصل ، و بعدها كل واحد حـ يمشي على إتجاه ، بس قبل ما أقول حاجه جاني صوت بت قالت آلو ! كان نفس صوت البت الردت علي قبل كدا !
حسيت بمراره في حلقي ، تااااني نفس البت !! أخدت نفس و قلت ليها بصوت مبحوح : ناصر وين ؟
قالت لي ناصر في الحمام ! أقول ليهو منو لمن يطلع ؟؟ قلت ليها ما تقولي شي ، و طوالي قفلت الخط في وشها و أنا مستغربه هي جايبه الجراءه و الوقاحه و قوة العين دي من وين !؟ ليه التطفل و الحشريه دي كلها ! ناصر لو ما كان مديها ضوء أخضر ما كانت ردت على تلفونو ، لو كان بحاسبها على انها بترد على تلفونو ما كانت اتجرأت و ردت على مكالماتو ! ليه مشاركاهو التلفون ؟؟ ليه متدخله في خصوصياتو !؟ منو هي أساساً و بصفتها منو ردت على تلفونو !!
دخلت الفيس و طوالي لقيت نفسي بكتب في صفحتي :

أعطيني دواء ينسيني حبك ، صف لي طريقاً لا يقودني إليك ، دلني على حياة أستطيع فيها العيش دونك ، لقّني دروساً تعلمني كيف اجتازك ، كيف امضي ولا ألتفت إليك ، كيف لا اتعثر بك ، كيف اتحدث ولا أذكر اسمك ، كيف أطرد طيفك و كيف أمحي صورتك من ذهني ، أرجوك علمني كيف أنساك !

ما عارفه كيف الكلمات دي طلعت معاي بالسهوله و السلاسه دي ، يعني كأنو في زول كان بمليني الكلام دا و أنا بكتبو ، كل كلمه كتبتها كانت صادقه و نابعه من جوه قلبي ، أنا ناصر دا ما لقيت منو غير الشقى و وجع القلب 💔
ما قعدت كتير في الفيس ، أصلاً بقيت ما بدخلو كتير ، القصص و الأخبار الفيهو عن الضرب و تساقط القذائف و الدانات ، بقى يوترني ، و بحسسني إنو البلد دي خلاص ما حـ تمشي لـ قدام ، رغم إنو دي وظيفتي و دي مهنتي ، تغطية و معرفة و نقل الأخبار بس آخر فتره بقيت أحس بتعب و فتور من كل شي !

لمن اتذكرت إنو زيدان يمكن يشوف البوست حقي طولي مشيت حذفتو ، حـ يقول بعد الكلام السمعتو ليها لسه جاريه ورا ناصر و لاصقه فيهو !
فجأه كدا ناصر إتصل علي ! بقيت أعاين للشاشه مسااافه و قلبي واجعني و دموعي زي المطر ، اتصل و فصل كم مره و لسه كان بتصل ، مسحت دموعي و فتحت الخط ، قال لي قبل كل شي الردت عليك قبل شويه دي أخت رياض ، كنت بعيد عن التلفون و هي لمن شافت التلفون برن كتير ظنت إنو في شي حاصل عشان كدا ردت عليك ... قلت ليهو ما مهم ، بخصوص الموضوع داك قررت شنو ؟؟
قال لي أي موضوع و بعدين ليه لمن اتصل عليك ما بتردي علي ! اتصلت عليك كتير و رسلت ليك في الفيس و الواتس بس بدون رد ! ليه بتعملي فيني كدا ؟ عايزا توصليني لـ وين ؟
قلت ليهو أرد عليك بصفتك منو ؟؟
قال لي كيف يعني بصفتي منو !؟
قلت ليهو على فكره أنا معتبراك طليقي ! منتظره بس تفتح خشمك و تقول لي انتِ طااالق !
سكت مسافه بعدها قال لي اتغيرتي شديد !؟ حاسس إني ما بتكلم مع مها البعرفها ! ليه قسيتي قلبك للدرجه دي !؟
قلت ليهو حـ تطلقني متين ؟؟
قال لي أنا متفهمك و عارف إنو معاك حق ، و إني غلطان و مقصر معاك شديد ، و عارف إنو بقى في شي ما مفهوم بيناتنا ، بس كل العايزو منك يا مها إنو حالياً ما تجيبي سيرة الطلاق ! لا المكان لا الوضع لا الظرف بسمح إنو نتخذ قرار مصيري زي دا ، أشتميني ، نبذيني ، و قول العايزاه و طلعي كل غضبك و زعلك مني فيني بس ما تجيبي سيرة الطلاق ، ما تاخدي قرار ممكن تندمي عليهو بعدين ، كلنا مضغوطين و نفسيتنا داقه الواطه بس مع ذلك قاعدين و صابرين !
طبعاً كلامو أوحى لي إنو اتفق معاي في نقطة الطلاق دي بس شايف إنو هسي دا ما الوقت المناسب ! يعني حـ يطلقني بس ما هسي !
طبعاً دموعي بقت زي الماسوره ، ايوه انا عايزا الطلاق و أنا الألحيت و أصريت عليهو بس أنا ما لجأت للطلاق إلا لمن حسيت إنو ناصر قنعان من الزواج دا ، و إني ما فارقه معاهو ، يعني هو أول سبب خلاني أطلب الطلاق ، كل مره أنطق فيها كلمة طلاق بحس بوجع في قلبي ، بس هو عكسي ! على الأقل يحسسني إنو زعلان و إنو ما بيدو ! أقلاها يبرر لي حتى لو كان تبريرو كذب و تمثيل !
قال لي آلو ، معاي انتِ ؟
قلت ليهو ايوه و سمعت العايزا اسمعو ، و أتمنى الطلاق دا يكون في أقرب وقت ، قال لي حـ يحصل العايزاه و حـ أطلقك عشانك ، بس خليك عارفه إنو دا قرارك انتِ ، و اتمنى انك ما تندمي بعدين ، قلت ليهو اتطمن ما حـ اندم ، قال لي تمام ، معناها اتفقنا ، بعدها قفلت الخط و حسيت الدنيا دي لافه بي ، ما اتخيلت إنو الموضوع يكون بالسهوله دي ، بالبساطه دي ! البحب مستحيل يتخلى بالساهل ، البحب حتى لو اتخلى بتخلى هو مجبور و هو مكسور بس ناصر عكس كدا ، يمكن الوجعني أكتر إني طلعت بالجد ما بعني ليهو شي !... لو كان بحس ولو بذرة حب ناحيتي ما كان وافق بالسهوله دي ، ما كان نفذ القلتو ليهو مهما أصريت و ألحيت عليهو ، بس يبدو إنو دي النهايه و إنو دا الخيار الأفضل ، نحنا ما لينا مستقبل مع بعض و أنا مهما كانت الحقيقه دي مره علي لازم أتقبلها و أطوي صفحة ناصر إلى الأبد ....

🎭 رواياتي 📚 الوسام 2️⃣ 🎭

10 May 2024 11:25

قلت ليهو عليك الله انت مالك يا زيدان ! و ما تقول لي ماف شي ، أنا متأكده إنو في شي ! ابتسم و قال لي ماف شي ! قلت ليهو يعني دا بسبب نفسيات الحرب ! قال لي شبه كدا !!... طبعاً كلامنا عن عرس سارا و رشا و حسام ذكرني بحاجه ! قلت ليهو انت يا زيدان مش كان في بت في حياتك و كنت رافض تورينا هي منو ! تقريباً أنا حاسه إنو هي السبب في حالتك دي !!
قال لي لا ما... قاطعتو و قلت ليهو بعد نظراتك الإتبدلت فجأه دي لمن جبت ليك سيرتها اتأكدت إنو هي السبب ، بس انا نفسي أعرف هي منو ؟؟ أنا بعرفها ؟؟

" نكبر ويكبر فينا الصمتُ ، و تستولي علينا الرغبةُ في العُزلةِ.
يصبحُ حديثُ المرءِ لداخلِه أكبرَ مما يتفوَّه به مع الناسِ من حوله.

يوقنُ أنَّ مساحاتِ الاختلاطِ تؤذي أكثرَ مما تنفعُ
و أنَّ نفسَه لا تتحمَّلُ أذىً إضافيًّا ليجاهدَ فيه ويصبرَ عليه
و أن يكفيه دائرتُه التي يأمنُها ويرتاحُ لها،
و أنَّ عليه نفسَه و خاصتَه..

نكبر ولا تكبر معنا الدوائر ، بل تنكمش

ليدركَ الإنسانُ أنَّه لا شيء يساوي بابًا مُغلَقًا عليه بجوارِ أحِبَّتِه، لا يعلمُ شيئًا عن العالمِ ولا يعلمُ عنه العالمين شيئًا "🖤

*•••••••••••••••••••••••••••••••••••••••••••••••••••••••••••*
*★★يتبــــــــــــــــــــــــــــــــــــــــــــع★★*

🎭 رواياتي 📚 الوسام 2️⃣ 🎭

10 May 2024 11:25

سكت مسافه بعدها قال لي الظروف هي السبب ، قلت ليهو شوف ليك حجه تانيه ، قال لي رياض ما بس صحبي ، رياض زي أخوي و مواقفو معاي كتيره و أمو في مقام أمي والله ، بعرفهم من سنوات ، صدقيني حتى لو رياض ما وصاني عليهم و بالصدفه عرفت انهم براهم و أخوهم مختفي كنت حـ أمشي عليهم ، قلت ليهو خلاص ماف داعي توريني قدر شنو هم غالين عليك ، قال لي بس ما أغلى منك ، قلت ليهو بقيت أزهج من الكلام دا ! صدقني أنا بقيت أفهمك كويس ، بتغلط و لمن تجي تبرر غلطك بتحاول تستعطفني ، قال لي تمام كان مفروض أعمل شنو ؟؟ أخليهم و أمشي كأني ما بعرفهم أو كأنو صحبي ما وصاني عليهم ؟؟ قلت ليهو السؤال الأهم هو انك حـ تقعد معاهم لمتين ؟؟ فرضاً صحبك ما ظهر و الحرب دي استمرت سنه أو سنتين ، كل المده دي حـ تقعدها معاهم ؟؟...قال لي ما معروف يمكن اسبوع اسبوعين رياض يظهر و يطمنهم عليهو و يقنعهم إنو يطلعوا من الخرطوم ، قلت ليهو و طبعاً انت الحـ تطلعهم ، طيب افترض انك طلعتهم لأي ولايه و شفت ليهم بيت و سكنتهم حـ تجيب ليهم راجل من وين عشان يحرسهم ؟؟ مش قعادهم براهم هو الخلاك تمشي ليهم ؟ طيب لمن يمشوا الولايات مش برضو حـ يقعدوا براهم ولا مفكر تسكن معاهم بالمره ؟؟
قال لي الولايات وضعها بختلف عن الخرطوم ، أفهمي يا مها إنو كل بقعه في الخرطوم حالياً مليانه دعامه و أصحاب النفوس الكعبه كتار و كونو أخليهم براهم و هم ناس أنا بعرفهم حق المعرفه ما حلوه في حقي ، قلت ليهو و أنا ؟؟
قال لي على عيني و راسي و قلبي ! قلت ليهو ناصر الكلام دا بقى ما بسلك معاي ، أنا بالجد مليت و زهجت من الحاله دي ، نحنا لا في البعد الممكن يخلينا نتجاوز بعض لا في القرب الممكن يخلينا نكمل مع بعض ، نحنا واقفين في حته ما مفهومه ! نحنا مستقبلنا مع بعض ضبابي ! ما قادره اتخيل إنو حـ يجي يوم من الأيام و يجمعنا تحت سقف واحد مره تانيه ، لحد هنا و خلاص انا ما قادره استحمل تاني !
قال لي مها ما تعقدي الأمور ! قلت ليهو بالعكس أنا بحاول أحلها ! خت نفسك مكاني يا ناصر ! ليه ما قادر تقدر لي الجيه دي ! أنا قطعت المسافات و الإرتكازات دي كلها مع أهلي و خاطرت بحياتنا كلنا و جيت عشان أشوفك و انت مستكتر علي اتصال واحد بس ! في الوقت الأنا و أهلي شايلين همك و خايفين عليك انت شايل هم غيرنا و خايف عليهم !
قال لي حقك علي ، أنا فاهمك و حاسي بيك و.... قاطعتو و قلت ليهو ماف داعي للكلام دا كلو ، طلقني بس يا ناصر ، أديني حريتي و أمشي أعمل العايزو ، قال لي مها اسمعيني ، أنا ... قاطعتو و قلت ليهو بالنسبه لي الموضوع دا ما قابل للجدال ! طلقني و بس !
طوالي قفل الخط في وشي ، حضنت التلفون و قعدت أبكي على ألف وجع و وجع ، ما عرفت أبكي على شنو و أخلي شنو ،
في نفس اليوم دا سارا جات و قالت لي عايزا اتكلم معاك في موضوع ، طبعاً كانت متوتره شديد و في نفس الوقت مبسوطه ، قلت ليها خييير قولي !!
قالت لي متذكره سلطان الكان حكيت ليك عنو !؟ قلت ليها أكيييد عاد نسيبنا بتنسي ! ضحكت و ضربتني على كتفي ، قلت ليها اهااا قولي أنا متحمسه ! فجأه حبوبه جات داخله ، قالت لينا أنا و سهام ماشين لناس عوضيه بالجبنه ، سارا قالت ليها ايييك بيتهم بعيد يا أمي و بعدين الوضع مخيف و حذر شديد ! قالت ليها بري والله ما بعيد شديد ، المهم لو ماشات معانا أرح و لو قاعدات ما تنسي يا مها تعملي لأبوك و أخوك الجبنه ، قلت ليها طيب ، طبعاً رشا ذاتا ماشه معاهم ، المهم بعد ما مشوا قلت لـ سارا اهااا مالو سلطان ؟؟!
قالت لي قال عايز يتقدم لي ! قلت ليها بالجددد 😍 حب في زمن الحرب ! واااي فرحت ليك شديييد والله يا سرو ! قالت لي هسي منتظرني أديهو رقم إيهاب عشان يفاتحو في الموضوع ! قلت ليها أديهو الرقم طوااالي 😍 بس العرس حـ يتعمل وين ؟؟ ولا حيكون عقد ، انتِ في مكان و هو في مكان ؟؟!
قالت لي طبعاً هو كل أهلو سفرهم برا السودان و هو ذاتو سافر و الأسبوع الفات جا بورتسودان مخصوص عشان الموضوع دا ، قال ما عندو مانع يجينا في أي مكان نحنا قاعدين فيهو عشان العقد ، و بعدها لمن أسافر معاهو برا السودان ممكن نعمل حفلة عرس هناك مع أهلو ... ضميتها و قلت ليها واااي يا سرو يعني حـ أفارقك ! بس المهم إني آخيراً حـ أشوفك عروس و أحلى عروس في العالم دا كلو !
قالت لي إن شاء الله ، مفروض أكلم ابوك و ناس أمي لكن متوتره و ما عارفه أبدا ليهم كيف خاصة في الوضع النحنا فيهو دا !
قلت ليها ما تشيلي هم أنا بكلمو و طوالي قمت من مكاني و مشيت ليهو في الهول لقيتو براهو ، قلت ليهو زيدان مشى وين ؟ قال لي طلع ، قلت ليهو هو مااالو بقى ما بقعد في البيت ! و أصلاً بطلع بمشي وين في ظروف زي دي ؟! قال لي ما عارفو والله ليهو فتره متغير و دائماً سرحان و لمن اسألو بقول لي ماف شي ! قلت ليهو بعدين حـ اتكلم معاهو ، قعدت و قلت ليهو عايزا اتكلم معاك في موضوع مهم جداً جداً جداً !!

🎭 رواياتي 📚 الوسام 2️⃣ 🎭

10 May 2024 11:25

للأبد ، لحد هنا و كفايه ، ما حـ أعرض حياة أهلي للخطر عشانو و تاني ما حـ أعمل أي شي عشانو ...
قمت من مكاني و طلعت لـ ناس أمي ، لقيت أبوي بتكلم بالتلفون و من كلامو عرفت إنو بتكلم مع ناصر ! أدى التلفون لـ أمي ، سلمت عليهو و اتكلمت معاهو مسااافه ، بعدها أمي أدت التلفون لـ رشا ، بعد اتكلمت معاهو قالت ليهو هاك مها و طوالي مدت لي التلفون ، عشان ما احسسهم إنو في حاجه شلت التلفون و أول ما إتحركت من جنبهم قفلت الخط ، وقفت مسافه و جيتهم راجعه نظام إني كنت بتكلم ، أديت التلفون لـ أبوي و قلت لأمي زيدان وين ؟؟ قالت لي طلع من قبيل و ما جا راجع ! قلت ليها مشى وين !... طوالي اتصلت عليهو ، رد علي و قال لي أنا جاي على البيت ، قلت ليهو طيب ، المهم رجعت غرفتي و ما فتحت الموضوع مع أهلي عشان ما يقولوا إنو ناصر هو الإقترح علي فكرة الطلوع من البلد ، عشان ما يظنوا إني بتجاهل كلامهم و ما بسمع غير كلام ناصر ! طبعاً بعدها بدا ضرب شديد ، كلنا دخلنا جوه و أمي دي بس خاته يدها على قلبها و بتقول زيدان لسه ما جا ، أبوي قال حـ يشوفو ، حاولنا نمنعوا بس ما سمع مننا ، بقينا عايشين في خوف و قلق كدا لحد ما هم جوا راجعين ، طبعاً الأصوات كانت عاليه و الأبواب بتهتز ، لحد آخر الليل الإشتباكات دي ما هدت ، رشا قالت لي ياريتنا ما جينا ، واي ما قادره استحمل ، حاسه إنو في أي لحظه حـ يجي برميل أو دانه واقعه فينا ! ... بعترف إنو اليوم داك من اسوأ الأيام المرت علينا من جينا راجعين ، ضلام و سخانه و ضرب من كل الإتجاهات و أصوات صواريخ بتجي طايره فوقنا و خوف و رعب مبالغ ، كان في أصوات حاجات بتتوقع و الأرض بتهتز ، في الليله ديك ما ظنيت اننا حـ نشوف الصباح ، الليل كان طويل و النوم غلبنا ، لمن أصبحنا ، جانا عم عبد العزيز عشان يتفقدنا و عرفنا منو إنو في بيوت وقعت فيها دانات ليلة امبارح و في كذا نفر اتوفوا ، أبوي قال ليهو لا ياخ بعد ما قلنا خلاص الوضع ماشي يتحسن ! عم عبد العزيز قال ليهو والله يا اخوي الحرب دي شكلها لسه مطوله و الوضع دا ماشي الأسوأ عشان كدا قررت أطلع أولادي ، خليتهم هسي بجهزوا في شنطهم ، طبعاً هو جا عشان يودعنا ، ليله واحده من أكعب الليالي خلت الكم نفر من ناس الحي الكانوا موجودين ينزحوا ، فيهم المشى الولايات و فيهم النزح لمكان أخف قدراً في الخرطوم ، بقينا قاعدين نحنا بس في الحي ، الشارع بقى بخوف ليل على نهار ، ماف أي زول في الشارع و الضرب بقى عنيف و الدانات بتتوقع زي المطر ، قعدنا يومين بعد الليله ديك و ضقنا الويل ، عشان كدا أبوي قرر نسافر بورتسودان و المره دي بدون تراجع و أصلاً دا الكنت عايزا أقولو ليهو لأنو لو حصل لواحد منهم شي أنا الحـ أكون السبب ، جهزنا شنطنا و بقينا قاعدين و منتظرين الضرب يخف عشان زيدان يمشي و يشوف لينا عربيه نطلع بيها ، طبعاً عرباتنا خليناهم في الرهد ، ما كان في طريقه عشان نجي بيهم ، المهم و نحنا قاعدين كدا تلفوني رن ، المتصله كانت سارا خالتي ، لمن شفت اسمها فرحت لأنو لينا فتره بنحاول نتصل عليها ، فتحت الإسبيكر و قعدنا نتكلم معاها هي و حبوبه ، طبعاً المفاجأه كانت لمن قالوا لينا انهم اليوم جوا راجعين الكلاكله ! أمي جاطت و قالت ليهم الجابكم شنو ما كان تجوا راجعين و نحنا ذاتنا طالعين و و و ....الخ ، سارا قالت ليها اتطمني حالياً الكلاكله آمنه و كل جيرانا موجودين ....
رجوع ناس حبوبه أخر سفرتنا ، طلعنا كلنا و مشينا ليهم في الكلاكله ، طبعاً ظنيت إنو أبوي عمل كدا عشان أمي أصرت تشوف أمها و أختها قبل ما تسافر بس اكتشفت انو هو من جواهو ما عايز السفره دي و نفسو يقعد في بيتو ، والله كلنا السفر برا السودان ما راكب راسنا عشان كدا بنماطل ، طبعاً في الكلاكله الوضع كان أخف قدراً ، بحكم إنو الكلاكله واقعه في النص كنا بنسمع أصوات ضربات قويه و هزات أرضية من تلات إتجاهات ، كنا محاصرين بس عشان ما كان في دعامه ظاهرين الناس شبه كانت متطمنه ، رغم إنو من الشمال في المدرعات و من الشرق جبره و الذخيره و من الجنوب الجبل و معسكر طيبه و معسكر جيش و من الغرب بحر !
قعدنا معاهم 3 أيام و ماف زول فينا جاب سيرة السفر ، أبوي من الناس الكانوا حاسين و متيقنين إنو الحرب دي خلاص في نهايتها و الوضع الفي الكلاكله أكد ليهو الحاجه دي ، لأنو رغم الحذر الشديد إلا إنو الناس كانت متحركه و الشباب بطلعوا يلعبوا كوره في الميدان ، يوم جونا جارات ناس حبوبتي بالجبنه و قعدوا يتونسوا معانا ، وحده قالت لينا عاد ما شفتو يوم ضربة الذخيره الحصل شنو ، قلت ليها سمعنا بيها ، قالت لي السمع ما زي الشوف ، النار دي أكتر من أسبوع مولعه و الدخان دا كثيف طلع فوق و إلتحم مع السحاب و السماء دي بقت حمرااااء و لهيب الغاز لمن يولع بمشي فوق و بعمل إضاءه في السماء ، غيتو داك كان يوم الحمدلله بس ! وحده تانيه قالت ليها اخوي ساكن جنب المستودعات والله في اليوم داك جوا جاريين برجلينهم لحد اللفه و هم ما واعين على نفسهم و

🎭 رواياتي 📚 الوسام 2️⃣ 🎭

10 May 2024 11:25

في اليوم التالي صحينا بدري عشان نمشي ، خالتو ماجده حلفت إلا نقعد و نشرب الشاي ، أبوي قال ليها ماف طريقه والله ، الشارع ما مضمون ، أحسن لينا نطلع من الصباح بنلقى مواصلات قبل ما يحصل أي اشتباك ، المهم دخلت ودعت دعاء و جيت مارقه ، أبوي طلع قدامي ، خالتو ماجده كانت ماشه تقدمني لحد الباب و هي شغاله لي ربنا يوصلكم بالسلامه و سلمي على أهلك و ربنا يجمعنا في ساعة خير ، قلت ليها آمين يا رب ، قبل ما أطلع فجأه كدا ولدها مجتبى جا داخل ! أصلاً ملامح وشو كانت كلها ضيق و أول ما شافني ما عارفه مالو طوالي غضب و اتضايق أكتر و جا علي بإندفاع و أنا ما فاهمه شي!!
طبعاً لمن وصلني بقى يصرخ فيني و يقول لي الجابك هنا شنو و أمو شغاله ليهو عيب يا مجتبى البت ما عملت شي ! على حس الأصوات أبوي من الشارع جا داخل و قال خير يا جماعه في شنو !! طبعاً أنا ذاتي ما كنت فاهمه في شنو عشان أرد على أبوي ! عاينت لـ مجتبى و قلت ليهو بسم الله ! عملت شنو أنا مالك هايج فيني كدا !؟
قال لي ما كفايه العملو راجلك ! كمان جايه انتِ ! المره دي عايزين تبلغوا في منو ؟؟ عايزين تكذبوا في منو و تقولوا إنو دعامي !؟ راجلك الخايب أكل مع أخوي و أولاد الحي في صحن واحد و في الآخر مشى بلغ فيهم !! اخوي مات بسببو ، كان برئ ما ليهو ذنب في الحاصل دا كلو ، قولي لـ راجلك الخايب دا إلا ما تجي راجع تاني ، والله إلا كان يطير من البلد دي و أنا حق أخوي ما بخليهو ، عاجلاً أم آجلاً حـ آخدو ليهو...
طبعاً أنا بقيت مصدومه أكتر ! أبوي قال لي أطلعي ، طلعت و خالتو ماجده وراي ، قالت لي أمسحيها لي في وشي يا بتي ! مجتبى جا طالع و قال ليها كتلوا ليك ولدك و لسه بتقولي ليها بتي و طالبه منها السماح ! المات دا ولدك يا أمي ما فطيس و ما شوال بصل !
قلت ليهو ناصر مستحيل يعمل كدا ، و بعدين فرضاً إنو ناصر بلغ في أخوك ، مفتكر إنو أي زول بلغ في زول طوالي الطيران حـ يجي و يقصف عشان بس في مواطن قال إنو فلان داك دعامي ؟! و هل ناس غرفة العمليات و الطيار اتصلوا على ناصر أو رسلوا ليهو رساله قالوا ليهو أبقى مارق عشان بعد شويه نحنا حـ نقصف البيت الإنت قاعد فيهو دا !؟... عليك الله خليك منطقي شويه يا مجتبى !!... قال لي كلامي منطقي ، لأنو راجلك الغدار دا ما مواطن عادي ، دا أكيد استخبارات ... قلت ليهو إذا ناصر استخبارات زي ما قلت معناها فعلاً أخوك دعامي !
قال لي ناصر واحد كذاب و بلغ قبل ما يتأكد ! قلت ليهو أولاً شنو البخليهو يبلغ في أخوك و هو حسب كلامك ما دعامي ، تاني حاجه انت من وين عرفت إنو ناصر هو البلغ في أخوك ! قال لي أقنعيني إنو طلعتو في نفس لحظات القصف صدفه ! قلت ليهو اقنعني إنو دا سبب كافي عشان تتهم بيهو ناصر ! قال لي شوفي ما تكتري معاي ، و مهما حاولتي تقنعيني بعكس كدا ما حـ اصدقك ، أبوي قال ليهو شوف يا ولد الحلال نحنا ما جاين هنا عشان نقنعك أو تقنعنا و الكلام البتقولو دا نحنا اول مره نسمع بيهو! الحقيقه واضحه بعد دا تصدق أو لا دي حاجه بترجع ليك ، و خليني اسألك القال ليك إنو ناصر هو البلغ في أخوك ما كلمك ليه ناصر بلغ فيهو إذا حسب كلامك أخوك برئ ما دعامي ؟؟ ... ما منتظر منك رد و ما عايزنك تحاول تقنعنا ، الأهم إنو تقدر تقنع نفسك ... أبوي عاين لي و قال لي اتحركي قدامي ، خليناهم واقفين و مشينا و طبعاً كنت متغايظه لأنهم متهمين ناصر بحاجه هو ما عملها ....
طبعاً لمن وصلنا البيت أمي وقعت فينا اسئله ، الشوارع كيف و الحصل معانا شنو هناك و كيف لقينا البيت ، خليت أبوي يحكي ليهم و دخلت جوه و أنا في بالي اسئله كتيره ، أهمها دي منو البت الرد علي و علاقتها شنو بـ ناصر و ليه مجتبى كان متهم ناصر و متأكد إنو السبب في وفاة أخوهو !! و ليه ناصر ما برد علي و لا بتصل علي !!
بعد العصريه كدا ناصر اتصل علي ، طبعاً عاينت للإسم مرتين ، فتحت الخط و قلت ليهو آلو ! ... قال لي مها كيفك !؟ قلت ليهو كويسه !
قال لي صوتك متغير ! عيانه ولا شنو ؟
قلت ليهو لا ما عيانه ، طبعاً كنت مستغربه فيهو ! قلت ليهو شكلها الشبكه اليوم ياداب ظبطت معاك ! قال لي ايوه اليوم ماشي حالها ، اخبارك شنو و كيف ناس البيت ، قلت ليهو كلنا كويسين ، قال لي ماف جديد ؟ قلت ليهو مافي ... سكت مسافه بعدها قال لي ليه ما قلتي لي انكم جيتوا راجعين ؟؟ ليه لحد الآن ساكته و ما عايزا تجيبي لي سيره ؟؟!

"‏لا أعرف لِمَ تختار دائمًا
أن تغيب بهذه الطريقة
اللا إنسانية
فجأة لا أجدك
في كلّ مكان لا أجدك؛
لا تترك لي وسيلة لأطمئن عليك
لا خبرًا
لا رسالة
لا مقدمات لِغيابك
تمامًا كالطريقة
التي سكنت فيها قلبي
لا فُرص لديّ معك ، لا خيارات
تأتي فأحبك
تغيب فأفتقدك
تعود فأحبك أكثر"🖤

*•••••••••••••••••••••••••••••••••••••••••••••••••••••••••••*
*★★يتبــــــــــــــــــــــــــــــــــــــــــــع★★*

🎭 رواياتي 📚 الوسام 2️⃣ 🎭

10 May 2024 11:25

الزقاق و بقايا الولاده أحفري ليهم و أدفنيهم ، قلت ليها أدفنهم وين ، في الشارع !؟ بيتكم كلو سنتر لوك ! قالت لي مكان الشجر في رمله أدفنيهم هناك ، عملت كل القالتو لي ، طبعاً أبوي طلع ما عارفاه مشى وين ، دعاء قالت لي عمتي ماجده عندها سكري و بتجيها دوخه كدا ان شاء الله ما تكون جاتها و اغمى عليها في حته ، قلت ليها قاعدين انتوا الإتنين بس في البيت ؟؟ راجلك و منذر و ناس إسلام وين ؟؟
قالت لي إسلام عرست و سافرت مع راجلها و إيمان ما قدرت تستحمل الضرب الحاصل فـ مشت الشماليه مع ناس خالتها ، و منذر من يوم مشى القياده العامه ماف منو خبر تاني ، قلت ليها صحي ما سألت دا منو الإتوفى من أولاد خالتو ماجده ! سمعنا إنو واحد منهم مات في البيت الإتقصف ! ان شاء الله ما يكون حقيقي ! بتردد قالت لي مُبشر ، ما قدرت اسألها هل هو دعامي ولا لا لأني حسيت السؤال من أساسو ما عجبها ، بس براااها استعجلت و قالت لي هو ما دعامي و ذنبو الوحيد إنو قعد في البيت داك ، ناس الحي ديل معظمهم تابعين للدعم السريع بس مُبشر ما منهم !... طبعاً بعد كلامها دا و ملامح وشها اتأكدت إنو دعامي !... كأنها قرت أفكاري ، قالت لي ذاتو كيف يكون دعامي و أخوهو جياشي ! في سري قلت ليها عاااادي المشكله وين ! اصابع اليد ما زي بعض ! قلت ليها طيب مجتبى وين ؟؟ طبعاً مجتبى دا راجلها ! حسيتها اتضايقت لمن سألتها ، خجلت من نفسي و حسيت اني كترت الأسئله عليها و هي ياداب والده و أكيد تعبانه !
فجأه كدا سمعنا صوت الباب ! دعاء قالت ان شاء الله تكون دي عمتي ماجده ! طوالي جريت و فتحت الباب ، لقيت أبوي في وشي و معاهو خالتو ماجده ! كان واضح عليها التعب ، دخلت طوالي و هي شغاله لي دعاء الحصل ليها شنو ، بتتكلم معاي و هي ماشه بإستعجال و أنا ماشه معاها و شغاله ليها دعاء كويسه و ولدت الحمدلله ، طبعاً هي عشان كانت خايفه و مقلقه عليها ما استوعبت كلامي إلا لمن دخلت و شافتها بعيونها ! .. حسيتها كأنو كان في حمل و انشال من أكتافها ، قعدت تحكي لينا و قالت إنها مشت بيت الدايه بس ما لقتها لا هي لا ناس بيتهم ، و لمن كانت في الشارع جايه راجعه راسها لفى و جات واقعه من طولها ، طبعاً أبوي لمن طلع مشى يفتشها لحد ما لقاها واقعه في شارع من الشوارع ، طبعاً هو ما بعرفها ولا هي بتعرفو بس اتوقع تكون دي هي و لمن مشى ليها و خلاها تصحى وراها هو منو و جابها معاهو ، دعاء قالت ليها الحمدلله انك كويسه يا عمتي ، والله شلت ليك هم ، هسي بقيتي كيف ، قالت ليها أنا خليني انتِ الكيفك ! ... دعاء قعدت تحكي ليها من اللحظه الأنا و أبوي جينا داخلين فيها ليها ، خالتو ماجده قالت لي كأنو ربنا رسلك ليها ، الله يرضى عليك يا بتي ، قلت ليها ما عملت إلا الواجب رغم إني كنت خايفه شديد ، بعدها خالتو ماجده مشت عملت نشا دافي لـ دعاء و ضيفتنا أنا و أبوي و شكرتو و قالت ليهو انت و بتك ما قصرتوا معانا والله ، قلت ليها ما أنسى يا خالتو ماجده ان شاء الله البركه فيكم ، سمعنا بوفاة مُبشر ربنا يرحمو ، عيونها إتملت دموع ، قالت لي البركه في الجميع ان شاء الله ، طبعاً اتغيرت شديد ، بقت هزيله و ملامحها باهته و عيونها مليانه حزن ، ما خالتو ماجده الزمان ديك ، يا حليلها والله واحد من أولادها مات و التاني في القياده ماف منو خبر ، أكيد قلبها حارقها و واجعها عليهم الإتنين ربنا يربط على قلبها و على قلب كل أم قلبها مقطوع على ولدها ، ما حبيت أخوض معاها في التفاصيل لأني حسيت السيره دي بتضايقهم ، قلت ليهم ناس الحي كلهم نزحوا ؟؟
قالت لي ما كلهم بس القاعدين شويه ، و معظمهم مشوا سكنوا في الحي الورانا عشان ناسو أكتر من الناس الهنا ، دعاء قالت لي في شارعنا دا لو صرختي ماف زول بسمعك ، قلت ليهم هسي انتوا ما بتخافوا تقعدوا براكم ؟؟
قالت لي بنخاف لكن نعمل شنو مجبورين !!
خالتو ماجده قالت ليها أنا قاعده بسبب أولادي بس انتِ ماف شي جابرك ، أنا كلمتك و قلت ليك سافري لناس أمك و ألدي هناك بس ما سمعتي مني !! قالت ليها ولدك هو الرفض يوديني و أنا بعد ما شفت حالتك و منذر الما منو خبر دا ما قدرت أمشي و أخليك ، و وفاة مُبشر دي خلتني أشيل فكرة السفر من راسي و بعدين انا كنت في شهري الآخير و السفر كان حـ يتعبني ....
بعدها قعدت معاهم شويه و حكيت ليهم الحصل معانا و سألوني عن ناصر قلت ليهم إنو كويس و في بحري ، حكوا لي عن يوم القصف دا بس بشكل مختصر و ما نفوا أو أثبتوا إنو ولدهم دعامي ، بس خلاص فهمت و اتأكدت اكتر إنو دعامي ! قبل ما نطلع منهم خالتو ماجده قالت لـ دعاء كدي اتصلي على مجتبى دا و شوفيهو وين لو تلفونو خشى معاك ، دعاء قالت ليها أنا حالفه ما اتصل عليهو ، مفروض هو اليتصل و يجي يشوف أمو و الكلبه الخلاها ماده كرشتها دي الحصل عليهم شنو ! ياخ ما بخجل يطلع و يخلي اتنين نسوان براهم في وضع زي دا !!

🎭 رواياتي 📚 الوسام 2️⃣ 🎭

10 May 2024 11:25

المهم في اليوم التالي ما لقينا طريقه الوضع ما سمح و الشارع كان كعب شديد ، طلعنا اليوم البعدو و إتحركنا على أركويت ، أبوي هو المشى معاي رغم إعتراض زيدان و اصرارو إنو يمشي هو بس ما خليناهو لأنو من جينا من البلد و هو عيان ، طبعاً معظم البيوت مفتوحه و أثاثها مرمي برا البيت ! محلات منهوبه و مباني مكسره و شوارع وسخانه و حالها كان بالبلى ، البشوفها و هي خاليه بقول مهجوره ليها مية سنه ، سبحان الله الشوارع الكانت زحمه بقت خلا ! و الناس و العربات الكانت ماشه و جايه إختفت ! و الشجر ذاتو بقى باهت و ناشف ، تعاين في الظلط ما بتشوف زول بالغلط ! حتى الحيوانات ذاتا إختفت !
طبعاً الطريق ما كان ساهل ، مشاعر الخوف و القلق و الحزن كلها كانت ساكنه جوه قلوبنا ، يعني و العربيه متحركه بينا الواحد في نفسو بدأ يتخيل إنو فجأه كدا يظهروا لينا تاتشرات دعامه ، أو يضربوا العربيه رصاص أو دانه ، أو يجي طيران و يقصف العربيه الراكبين فيها ، كانوا معانا زي 5 أنفار في العربيه ، على بال ما نصل عشنا لحظات عصيبه و كل واحد خاتي يدو على قلبو و هو بدعي إنو ربنا يحفظو و يستر علينا ، المهم في الآخر وصلنا و بعدها لقينا بتاع كارو دخلنا معاهو لـ جوه لأنو ماف مواصلات ، بقيت أعاين في البيوت الخاليه و الشوارع الوسخانه ، كان في هدوء حذر و مخيف ، مشينا كدا لحد ما جينا مارين بالبيت الإتقصف ! شوفتو ساي خلتني أخاف و أحمد الله إنو ناصر طلع منها ! البيت كان عباره عن ركام طوب !
أبوي قال لي دي سلامه والله و الحمدلله إنو ناصر طلع قبل ما البيت ينضرب لكن هو المقعدو مع ناس مشبوهه أو دعامه عديل شنو !! قلت ليهو ما عارفه والله ، بس يمكن هو ما عارف انهم دعامه أو فيهم زول دعامي !!
لمن وصلت باب بيتي إتلفت و عاينت لـ بيت ناس خالتو ماجده ، بابهم كان فاتح بس ماف حركه ! خفت يكون سكنوا فيهو دعامه !
أبوي قال لي اها حـ ندخل البيت كيف ! قبل ما أرد عليهو سمعنا صوت صريخ جاي من بيت ناس خالتو ماجده !! قلبي إنقبض وقتها! مسكت ذراع أبوي و بقيت أعاين ليهو بنظره مليانه خوف !

"لم يُبكينا الألم ... أبكتنا الغصة التي حملناها في صدورنا ، أبكتنا تلعثُم ألسِنتنا بحثاً عن منفذ للكلمات ، لم يبكينا الألم ، أبكتنا الوحدة وشفقة جدران غرفتنا علينا ، أبكانا الهدوء الذي وصلنا إليه بشَق الأنفس ، أبكانا حالنا الذي نحنُ عليه وشعورنا بالعجز اتجاه كل شيء..لم يُبكينا الألم ، أبكتنا تلك التنهيدة التي تخنقنا ، أبكتنا السعادة التي لم نجد إليها سبيلاً "💔

*•••••••••••••••••••••••••••••••••••••••••••••••••••••••••••*
*★★يتبــــــــــــــــــــــــــــــــــــــــــــع★★*

🎭 رواياتي 📚 الوسام 2️⃣ 🎭

10 May 2024 11:25

صح إني قعدت أبكي و حسيت قلبي دا إنقسم نصين بس كان جواي إحساس قوي بقول إنو ناصر ما مات ، من الناحيه التانيه كنت سامعه أبوي قال لـ زيدان الكلام دا حصل متين !! زيدان قال ليهو أول أمبارح و قالوا دفنوهم في الحي نفسو لأنو ما قدروا يطلعوا بالجثامين عشان يدفنوها في المقابر ، قال ليهو إنا لله و إنا إليه راجعون ! لا حول ولا قوة إلا بالله ! ربنا يتغمدو بواسع رحمتو ! خبر صادم والله .. قدرت تتواصل مع عمك مدثر ؟؟ زيدان قال ليهو لسه ما اتصلت عليهم و ما اظن يكونوا عارفين ، قال ليهو فعلاً ما اظن يكون الخبر وصلهم و إلا كان حـ يصلنا قبليهم و مع إنو خبر الموت كان طلع ما بكون كذب لكن برضو اتأكد تاني يا زيدان من صحة الخبر دا عشان ما تخلع أهل الولد ساي ....
لغاية الساعه 8 أنا كنت قافله باب الغرفه علي و أمي و رشا برا بكوا قدرتهم و بعدها سكتوا و بقوا كل مره يجوا يدقوا لي الباب و يحاولوا يتكلموا معاي ، بس خالص ما فتحت لـ زول و ما دخلت شي في خشمي لا أكل لا شراب ، بعد قعدت مع نفسي ساعات طويله فتحت الباب و طلعت ليهم و أنا حالتي بطاله شديد ، لقيتهم متمحنين و كل واحد بعاين في إتجاهـ ، من دون مقدمات قلت ليهم بكرا أنا عايزا أرجع الخرطوم ... كلهم إتلفتوا علي ، أبوي وقف على حيلو و جاني و ساقني و قعدني و قعد و قال لي عايزا ترجعي عشان شنو ؟؟ سألنا تاني و اتأكدنا إنو ناصر دا فعلاً إتوفى ... دموعي جات نازله قلت ليهو ما اتوفى يااااخ ما تقول كدا يا أبوي ، ضماني عليهو و قال لي أهلو ذاتهم ما كانوا عارفين ، الخبر دا انتشر اليوم ، زحيت منو و وقفت على حيلي و بقيت أصرخ زي المجنونه و اقول ليهم ناصر مااا مات ما ماااات أفهمو يا عالم ، بقيت أبكي بأعلى حس عندي لحد ما كل الجيران جوا جاارين و لمن عرفوا قلبوهو بيت بكى ، قدر ما حاولوا يقنعوني إنو ناصر مات أبيت أقتنع ليهم ، أصريت أرجع الخرطوم و قلت لأبوي لو ما مشيت بنفسي و شفت قبرو و اتأكدت إنو بالجد مات ما حـ اصدق زول فيكم يا أبوي ، يا أرجع الخرطوم يا أموت هنا و ما حـ اسافر معاكم ، اتجننت فيهم و حلفت إلا أرجع الخرطوم و قلت ليهم لو انتوا ما عايزين ترجعوا ماف مشكله برجع براي ، زيدان قال لي لو جنيتي قولي لينا ! كيف يعني نخليك ترجعي براك ! قلت ليهم خلاص انا و زيدان نرجع الخرطوم و انتوا أمشوا بورتسودان و ممكن تسافروا و تسبقونا ، طبعاً أبوي كان ساكت سااااي و ما قال أي كلمه بس بعد يومين من الكلام دا قال لي جهزي نفسك بكرا أنا و انتي حـ نمشي الخرطوم و زيدان و أمك و رشا حـ يسافروا بورتسودان طوالي ، أمي قالت ليهو برري والله ما بسافر أخليكم ، رجلي برجلكم ، زيدان قال ليهو خليني أمشي معاها أنا يا أبوي ، أبوي قال ليهو لا بمشي أنا ... المهم قعدوا يتجادلوا كدا لحد ما في الآخر رسوا على بر و قرروا إنو نرجع كلنا سوا ، عشان ماف واحد بقدر يسافر و يخلي الباقين ، قالوا يا نمشي سوا يا نقعد سوا ... لمن لقيتهم جادين و مستعدين يرجعوا الخرطوم عشاني ، حسيت بالذنب و جاني إحساس إنو لو حصل أي شي لأي واحد من أهلي أنا الحـ أكون السبب ، المهم أهلي خاطروا و قرروا يرجعوا الخرطوم معاي ، تاني يوم طوالي إتحركنا و وصلنا كوستي و نمنا هناك ، طبعاً كنا مفكرين نمشي بطريق بارا عشان ندخل أمدرمان طوالي بس الطريق ما كان آمن و قالوا فيهو دعامه ، عشان كدا اخترنا نرجع بشارع الجبل رغم إنو حيكون لينا طويل لحد أمدرمان ، طبعاً معظم الشوارع كانت إرتكازات دعامه بس من النيل الأبيض و لحد الجبل كان في جيش فقط ، لمن عبرنا بوابة الجبل حسينا إنو الحرب دي خلاص على وشك الإنتهاء ، لأنو الأسواق كانت شغاله و الناس ماشه و جايه ، للحظات الأمل سكن جوانا ، نزلنا في سوق الجبل و من هناك ركبنا مواصلات الكلاكله اللفه الواقعه شمال الجبل ، و نحنا راكبين المواصلات كنا كل ما نمر بمنطقه يزداد الأمل جوانا ، رغم وجود دعامه إلا إنو شوفة الناس في الشوارع و الشباب بلعبوا كوره في الميدان طمنتنا ، أبوي قال ما شاء الله الحرب دي شكلها وقفت خلاص ولا المناطق دي الحرب ما وصلتها !؟ واحد من الركاب قال ليهو والله الحرب دي لسه مدوره و كل يوم في اشتباك و الطيران حايم فوق الناس لكن مع ذلك قاعدين ، واحد تاني قال ليهو هنا الضرب ما طوالي و لو حصل بحصل في الجبل أو المدرعات ، و المناطق الواقعه في نصهم دي الطيران صح بجي ماري بيها بس ما بضرب هنا لأنو ماف دعامه ، و نحنا بنتكلم كدا جينا مارين بمعسكر ، واحد قال لأبوي دا معسكر قوات أبو طيره كل يوم بحصل اشتباكات بينهم و بين تاتشرات الدعم السريع لمن يحاولوا يمروا من هنا عشان يمشوا بشارع الهواء أو شارع اللفه ، طبعاً مرورنا بمناطق الكلاكله بث روح الأمل و التفاؤل جوانا ، و أنا بشوف في شباب الأحياء بلعبوا كوره في الميادين جاني إحساس إنو لمن نصل بيتنا حـ نلقى كل الجيران جوا راجعين و حياتنا حـ ترجع طبيعيه ، المهم المواصلات نزلتنا في الكلاكله اللفه و ما شاء الله السوق كان عامر و الناس ماشه و

🎭 رواياتي 📚 الوسام 2️⃣ 🎭

10 May 2024 11:25

*#زهرة~فؤادي~《02》*
*#الجزء~الثاني ~*
*#بقلم~مها~حولي~الزاكي*
*ــــــــ♡ــــــــ♡ــــــــــــــ♡ــــــــــــ❥ :00:00*‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‏
‌‌‌‌‌‌‌‌‌‌‌‌‌‌‌‌‏ ‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‏

طبعاً قعدنا فتره في قرية أهل أبوي في الرهد ، بعدها مشينا الرهد المدينه ، أبوي كان مخطط يسفرنا برا السودان بسبب إنو الدعم السريع بدا ينتشر في القرى و المدن المجاوره بس انا القرار دا ما كان عاجبني ، قلبي كان بنزف من شدة الوجع و ماف زول حاسي بي ، أيوه كلهم لاحظوا ذبولي ، و تدهور صحتي ، و أكلي البقى قليل بس افتكروا إنو دا بسبب نفسيات الحرب ، هو فعلاً الحرب كانت مؤثره علي و ما قادره استوعب إنو دا كلو حقيقه و حصل ، بس سبب حزني و اكتئابي الأساسي و الحقيقي هو إني ما كنت عارفه حاجه عن ناصر ، يعني من آخر مكالمه كانت بيناتنا لمن انتقلنا من القريه للمدينه ما إتواصلنا تاني ، ما قدرت أصل ليهو و اتطمن عليهو ، حتى إيهاب خالي و ناس حبوبه في الأبيض ما قدرنا نتواصل معاهم بشكل مستمر بسبب الشبكه ، كنت عايشه في جحيم و نار الخوف و القلق على ناصر كانت بتحرق فيني من جوهـ حرق و ما عارفه اسأل عنو منو أو أصل ليهو كيف ، وصلت مرحله كعبه شديد من الإكتئاب لدرجة اني خفت على نفسي ، و كنت بحاول أفرغ الشعور دا عن طريق البكى بس بدون فايده ، روحي كانت محرقاني شديد و كل يوم بسأل نفسي ناصر وين و حالو كيف ، كنت بدعي ليهو على طول و كل مره بمسك التلفون و بتصل بس الشبكه ما بتساعدني 💔
في يوم 6 مايو جا طيران و قصف تمركزات للدعم السريع ، كان في قصف في الرهد و أم روابه من ساعات الصباح الأولى ، داك كان يوم من أصعب الأيام المرت علينا ، و يوم 31 مايو عرفنا إنو الدعم السريع حرقوا قرية أم حميره و القريه دي قريبه شديد من قرية أهل أبوي الكنا قاعدين فيها ، طبعاً رشا خافت خوف شديد و قالت خلااااص معناها الدعامه حـ يجونا هنا كمان ، أمي و زيدان تعبوا شديد عشان يهدوها ، هي بتخاف شديد من حاجه إسمها دعامه ، تاني يوم طوالي حبوبتي أم أبوي و بنات أعمامي و عماتي و نسوانهم جونا مع واحد قريبنا ، اعمامي رسلوهم هنا و هم قعدوا في القريه يحرسوا بيوتهم ، طبعاً دخلت فينا حالة خوف و هلع كدا ما عاديه و حسينا اننا محاصرين من كل الإتجاهات ، يعني إحساس إنو المكان النزحت ليهو على أساس إنو مكان أمان فجأه كدا يبقى غير آمن ، كل واحد حس إنو راسو إنقطع ، و كل واحد جاهو إحساس إنو خلاص دي نهاية السودان ، و إنو الحرب حـ تعم ، بس بعد تلات أيام أعمامي جوا و ساقوا نسوانهم و بناتهم و رجعوا لـ بيوتهم ، و دا بعد ما إتحالفوا مع القرى و القبائل القريبه منهم و اتفقوا كلهم انو يتسلحوا و يحموا بيوتهم و مناطقهم من الدعم السريع ، أبوي قال لينا طوالي بعد بكرا نمشي بورتسودان و منها نسافر خارج السودان ، المره دي كان جادي شديد و قال لينا جهزوا نفسكم ، طبعاً ما قدرت أمسك نفسي من الإعتراض و ما قدرت أمنع دموعي ، قلت ليهو أبوي أنا ما ماشه أي مكان ، عايزا أرجع الخرطوم ، زيدان قال لي شوفي كلنا ما عاجبنا الوضع دا و كل الناس إنجبرت تخلي بيوتها و تمشي الولايات أو تسافر برا السودان ، أبوي قال لي الحرب دي ما معروف تقيف متين يا بتي و أنا معظم شغلي كان في الخرطوم و هسي مجبور أشوف مكان تاني أدير منو الشغل ، قلت ليهو بصوت مبحوح ما عايزا أسافر يا أبوي و بعد الجمله دي دموعي بدت تتساقط ، و ما أفلحت في إسكات نفسي ، زيدان قال لي مالك انتِ ممكن نفهم !! أمي جات ضمتني عليها و قالت لي ان شاء الله اول ما الحرب دي تقيف حـ نجي راجعين ، بس هسي مجبورين نسافر ، والله انا ما بقدر اتحمل الضغط دا كلو ولا بقدر على حرب الأعصاب دي ، والله لو سمعت صوت الباب دا ساي بقول ديل دعامه جوا داخلين علينا ، و بليل ما بنوم زي الناس ، الزمن كلو اتقلب و اتخلع لو سمعت صوت حركه ، والله خوفي كلو عليك انتِ و أختك ، رشا قالت لي أحسن نسافر يا مها ، والله انا خايفه شديد ، ما سامعه بعمايل الدعامه ، السودان بقى ما أمان ، انتفضت و قلت ليهم بزهج : ما عايزا أسافر يعني ما عايزا أسافر !! ...
أبوي إنزعج بسبب أسلوبي ، قال لأمي جهزوا شنطكم بكرا حـ نتحرك على بورتسودان ... قال كدا و مشى طوالي و زيدان وراهو و أنا دخلت في دوامة بكى ، قعدت على الأرض و بكيت كأنو مات لي زول ، أمي قالت لي يا بتي دا شنو الجن القام عليك فجأه دا ! قايله الموضوع صعب عليك براك ؟؟ قايله ساهل إنو الزول يطلع و يخلي بيتو و بلدو ؟!

🎭 رواياتي 📚 الوسام 2️⃣ 🎭

10 May 2024 11:25

بريحني و بكون خايفه كدا لحد ما تجي داخله و أشوفك ! رشا جات و قالت لي حتى و نحنا شايفنك على شاشة قناة الحدث أمي كانت خايفه و شغاله تقول ليك كفااايه ياخ أنهي كلامك دا و تعالي راجعه ! كأنك حـ تسمعيها 😂😂
قلت ليها أمي طوالي في حالة قلق ، قالت لي عايزاني أكون في حالة سكون و إسترخاء و نحنا في وسط الحرب و انتي برا البيت !! طبعاً قالت كلامها دا بإنفعال شديد ، قلت ليها خلاااص خلااااص آسفه يا ماما ، بعدها مشيت على غرفتي ، أول ما دخلت كدا الكهربه قطعت ، تاني ما بتجي إلا بعد أيام أو أسابيع ! قعدت على السرير و إتنهدت و أول ما رقدت و غمضت عيوني تلفوني رن !!... أول ما سمعت الرنه دي قمت مخلوعه و قلبي شغال دق دق ، التلفون كان جوه الشنطه ، خطفت شنطتي و أنا متلهفه و أول ما فتحت الشنطه و شلت التلفون أطرافي إرتعشت ، و دقات قلبي زادت و حسيت إني بحلم! رديت بسرعه و قلت ليهو ناصر !!... ناصر انت كويس ؟ طمني عليك ! كنت متأكده انك حي و إنو كل الإنقال كذب... طبعاً عيوني إتملت دموع و صوتي إتغير بسبب إني عايزا أبكي ، ياخ الإتصال دا انا لي قريب الشهر منتظراهو ، شهر و أنا عايشه في قوقعة خوف و قلق ما عاديه ، شهر و أنا قلبي بنزف دم ، شهر و أنا كل ليله دموعي بتملى المخده ، شهر و أنا كل ثانيه و كل دقيقه و أثناء و بعد كل صلاة بدعي انو ناصر يكون بخير وين ما كان و يرجع لي بصحه و عافيه....
لمن قال لي فعلاً أنا كويس انتِ كيفك و ناس البيت دموعي جات نازله ، طبعاً كان في تقطيع في الصوت بسبب الشبكه بس قدرت أعرف من صوتو إنو ما كويس ، قلت ليهو ناصر نحنا كويسين انت وين و ليه صوتك دا متغير كدا و أحكي لي بالتفصيل الحصل شنو ، قال لي أنا كويس بس عندي شوية إلتهاب و حالياً قاعد في بحري مع واحد صحبي ، قلت ليهو ناصر نحنا جينا راجعين ... بقى يقول لي آلو ، آلو ما سامعك كويس يا مها ، قلت ليهو نحنا رجعنا ، قال لي الصوت بقطع .. طبعاً هو ذاتو صوتو ما كان واضح شديد بالنسبه لي ، بعدها الخط فصل و لمن تاني حاولت اتصل أداني إنو الرقم لا يمكن الوصول إليه ، طبعاً من الزعل قربت أضرب التلفون في الحيطه عشان ما قدرت أتكلم مع ناصر كويس ، بس هديت و قلت الحمدلله إني قدرت أسمع صوتو و أعرف إنو كويس ، طوالي مشيت لـ ناس أمي و كلمتهم إنو ناصر اتصل ، أمي قالت لي الحمدلله اها قال ليك مرق وين ؟؟
قلت ليها ما طلع لسه قاعد و حالياً في بحري مع واحد صحبو ، قالت لي ما عارفه المقعدو شنو بس ربنا يحفظو و يغطي عليهو ، ما قلتي ليهو اننا جينا راجعين ؟؟
قلت ليها قلت بس ما سمعني بسبب الشبكه ، قالت لي ماف مشكله المهم إنو اتطمنا عليهو ، برضو أبوي لمن جا داخل كلمناهو إنو ناصر إتصل ....
طبعاً في اليوم داك بليل قعدت أتقلب في السرير يمين و شمال و أنا بسأل نفسي حالياً ناصر بعمل في شنو و الوضع عندهم كيف ، اتذكرت إنو قال عندو إلتهاب فـ قلقت عليهو زياده ، اتمنيت لو كنت معاهو ، لو كنا سوا ، لو إنو الحرب دي ما قامت ، لو كنا عايشين حياة طبيعيه و سعيدين ، منو الكان متوقع إنو يحصل كدا ! منو الكان متوقع إنو البلد تصل للحافه دي ! منو الكان متخيل إنو حـ يجي يوم كل الناس دي حـ تتفرق و تتشتت كدا !
لمن أقعد و أفكر في الموضوع بسرح بعيد و بحس إنو دا كلو كذب كذب ! امبارح كنا كيف و هسي كيف !
حقيقة أكتر إنسان أنا فاقداهو حالياً ناصر ، بقيت اتذكر في أيامنا المضت و ذكرياتنا الكويسه و الكعبه و كل ما اتذكر حاجه قلبي يوجعني و دموعي تنزل !
يمكن أصعب إحساس ممكن الواحد يمر بيهو إحساس الشوق ، و الشوق ذاتو أنواع ، في شوق بخليك تشتاق لزول و هو جنبك ، و في شوق بخليك تشتاق لزول قبل شويه كان معاك ، و في شوق بخليك تشتاق لإنسان بعيد ، بعيد شديد و بيناتكم كيلومترات و حرب ! على الأقل في حالة الشوق الأولى و التانيه انت بتكون متطمن لأنك بتشتاق لزول متواجد معاك ، قادر تشوفو و تسمع صوتو في أي وقت ، بس أصعب و أقسى شوق ، شوقك للبعيد الما قادر تصل ليهو و تكون معاهو ، بالجد
الشوق زي العطش الشديد ، بخليك تلهث كدا لحد ما تلقى مويه تبل بيها ريقك أو لحد ما تموت ، ما حـ استغرب لو جا زول و قال لي إنو في إنسان مات بسبب شوقو لـ إنسان ! لأني جربت و عرفت يعني شنو تحن و تشتاق لزول و ما تلقاهو ، تناديهو و ما يسمعك ، تبكي عليهو بالأيام و تحزن و هو ما عارف ، قلبك يوجعك و ماف زول حاسي بيك ...
فعلاً الشوق هو قاتل القلب ، بحرقك كدا لمن قلبك يبقى رماد ، الشوق نار مشتعلة بإستمرار و ما بتخمد إلا لمن تلاقي الإنسان الإنت مشتاق ليهو ، فـ اللقاء جرعة شفاء ، و اللقاء ضماد الروح و اللقاء دواء كل فراق ، فليت اللقاء يكون يقيناً و ليت الفراق حديث منام ..❤️

🎭 رواياتي 📚 الوسام 2️⃣ 🎭

10 May 2024 11:25

*#زهرة~فؤادي~《01》*
*#الجزء~الثاني~*
*#بقلم~مها~حولي~الزاكي*
*ــــــــ♡ــــــــ♡ــــــــــــــ♡ــــــــــــ❥ :00:00*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‌‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​

مرات كتيره كنت بحس إنو البكى ما كفايه ، و إنو ما كل وجع أو جرح بشفى و بطيب بالبكى أو مع مرور الزمن ، حتى الفضفضه و النوم ما كفايه ، فشلت في إني ألقى طريقه أهرب بيها من الواقع المرير و المميت ، فشلت في إني أشغل نفسي و ألقى وسيله أسكّن بيها وجعي بس كل المحاولات باءت بالفشل لحد ما في الآخر إتوصلت لـ إنو المواجهه هي أنسب خيار ، و إنو قعادي مُكتفه حـ يزيد إكتئابي ، و إنو أنا ما حـ ألقى أي اجوبه لإستفهاماتي ما لم أمشي و أبحث عنها بنفسي ....

و أنا واقفه و سرحانه بعيد ، لفت إنتباهي صوت لؤي و هو بقول لي يا مهااا بصوت عالي ! لمن رجع لي تركيزي ، عاينت ليهو و قلت ليهو ايوه ! قال لي سرحتي وين !! لحظات و حتكوني على الهواء مباشرة ! قلت ليهو تمام جاهزه ، ركبت السماعات و شلت المايك و هو عدل الكاميرا ، بعدها بلحظات جاني صوت ضحى زهيري مذيعة قناة الحدث و هي بترحب بي و بتسألني عن الوضع الحالي في السودان و عن حال المواطن ....

رديت ليها :
كما يعلم الجميع فقد شهد الشهرين الماضيين إشتباكات عنيفة بين الجيش و الدعم السريع ، بعد ما يقارب السنتين من ما يسمى بإنقلاب 25 أكتوبر ، أدى إلى ضرب مساعي و آمال الإنتقال المدني في السودان ، و منذ إندلاعها في الـ 15 من أبريل الماضي كل يوم تشتد وتيرة الحرب و يزداد وقودها ... رغماً عن ذلك مازال العديد من السودانيين يأملون أن تضع الحرب أوزارها في أي لحظة ، كل يوم تُرفع الأكُف متضرعة و القلوب متوسلة إلى الله عز وجل بأن يخمد نار هذه الحرب ...
كذلك شهدت بعض أحياء أمدرمان القديمه و بعض مناطق الخرطوم تدوين مدفعي ثقيل منذ الساعات الأولى لـ صباح هذا اليوم ... إلى الآن ليس لدي علم لا بعدد الجرحى ولا بعدد الموتى و أتمنى ألا يكون هناك جرحى أو موتى ، هذه أبرز أحداث اليوم ضحى

🎭 رواياتي 📚 الوسام 2️⃣ 🎭

12 May 2024 09:19

#زهرة_فؤادي6
الجزء الثاني
مها حولي الزاكي

_عارفها صعبه عليك ، و عارفك مخلوعه و ما قادره تصدقي بس لازم تصبري ، الموت سنة الحياة و لكل أجل كتاب ، هي سبقتنا باليوم بس و دعواتنا ليها حـ تكون مرافقاها ، ما حاجه ساهله إنو الواحد يتقبل حقيقة موت شخص قريب منو ، وفاة حبوبه إخلاص كسرتنا كلنا ، صدقينا كلنا ما كويسين و كلنا مصدومين زيك بس مجبورين نقوي نفسنا ، أنا قدامك و قدام الناس بحاول اتماسك و عشانك أنا مقوي قلبي و صابر ، و انتِ مفروض عشاني و عشان أهلك تحاولي تشدي حيلك و تقوي نفسك ، شوفي أمك هسي رغم الفاجعه الصابتها نست نفسها و بقت شايله همك انتِ ، شوفي خالتك سارا بتغمر و لمن تقوم بتجي جاريه ليك انتِ عشان تشوفك ، شوفي رشا أختك رغم حالتها البطاله الهي فيها بس مع ذلك خايفه عليك أكتر من خوفها على نفسها ، شوفي أبوك ، شوفي أخوك كيف بحاولوا يتظاهروا بالقوه عشان هم رجال و ما عايزين ينكسروا ، ما عايزين يضعفوا قدامكم عشان ما يضعفوكم معاهم ، مشوا دفنوا حبوبتك بـ يدينهم و مع ذلك صابرين ، شوفيني أنا طيب ! حاسي بالعجز ، حاسي نفسي مكتف لأني ما قادر أعمل ليك شي ، ما قادر انزع الوجع الجواك ، ما قادر اخفف عنك ، حاسي بإحساس مميت لأني شايفك في الحاله دي ، حاولي تبكي طيب !... أبكي عشان ترتاحي و تبردي قلبك ، أبكي عشان تصدقي إنو حبوبه إخلاص بقت في رحمة ربها ، أبكي عشان تقدري تدعي ليها ، عشان تقدري تثبتي و تصبري ...

طبعاً ناصر كان بتكلم معاي و هو ضاميني عليهو و محتويني بـ يديهو ، و أنا قاعده على الأرض و هو ذاتو قاعد معاي ، كان بتكلم معاي و أنا حاسه نفسي في عالم تاني ، من شدة الوجع و الخلعه الدخلت فيني ما كنت قادره اتكلم ، ما كنت قادره أتحرك أو أبدي أي ردة فعل ، رغم إني لاحظت للجرح العميق الفي يد ناصر و للخدشه العلى جبينو بس ما كان فيني حيل اسأل ، قلبي كان ميت و عقلي ما عارف يصدق شنو و يكذب شنو ! كل شي بالنسبه لي كان زي الحلم ، كل حاجه حصلت بسرعه و في لمح البصر حالنا إتبدل ، حتى جية ناصر دي و قعدتو و كلامو معاي كلو كنت شاكه إنو ما حقيقه ! للحظات إختلط علي الواقع و الخيال فما عرفت أفرزهم !
شويه كدا خالتي سارا جات داخله و هي ساكته و عيونها دي واقعه من شدة البكى ، قالت لينا أطلعوا بعد دا ، ناصر وقف على حيلو و وقفني ، قال لـ سارا طالعين دقائق بس ، بعدها هي طلعت ، ناصر قال لي حـ تتحركوا بعد دا ، ما معروف نتلاقى متين تاني بس حـ ألحقكم بإذن الله ، كل العايزو منك إنك ما تضعفي ، لازم تقوي نفسك و تشدي حيلك شويه ، و ختي في بالك إني أكيد حتى لو ما كنت معاك فأنا معاك ، في أي وقت و في أي زمان بتقدري تتصلي علي ، و أنا حتى لو انتِ ما إتصلتي حـ اتصل و أتطمن عليك ... لمن رفعت عيوني و عاينت ليهو قال لي أنا كمان ما هاين علي أخليك في الحاله دي ، ما هاين علي انتِ تكوني في مكان و أنا في مكان تاني ، بس كلو حيكون تمام و حـ ألحقكم ان شاء الله ، باسني على جبيني و ضماني عليهو مسااافه و هو بقول لي : ما أوصيك على نفسك ، إياك تهمليها ، و بطلي عناد و قوة راس ، و اسمعي كلام أهلك و ما تعذبيهم و تقلقيهم عليك لأنو الفيهم مكفيهم ... اتكلم معاي دقااايق و أنا ساكته ، بعدها بعد عني شويه و خت يدينو على أكتافي و قال لي لازم تصبري و تشدي حيلك و تقوي نفسك ، أنا بعرفك انتِ أقوى من كدا ... لمن ما رديت عليهو قال لي من هسي بديت أقلق عليك ! اتكلمي معاي ، ان شاء الله تقولي حرف واحد بس !
لمن برضو ما إتكلمت معاهو إتنهد و قال لي خلينا نطلع بعد دا ، شكلو اليوم دا حيكون اسوأ من يوم أمبارح ، ربنا يستر عليكم و يوصلكم بخير و سلامه ... طبعاً الوقت داك الساعه كانت 6 صباحاً ، أصلاً من أمبارح ماف زول فينا نام ، من الصباح بدينا نسمع أصوات ضرب الطيران و المضادات ، المهم ناصر شال الطرحه الكانت على السرير و لبسني ليها ، و شال لي شنطتي الكانت على السرير و أنا طوالي إتحركت و مشيت على باب الغرفه ، قال لي حتى وداع ما عايزا تودعيني ؟؟
ما إتلفت عليهو و ما رديت عليهو ، واصلت مشي لحد ما فتحت الباب و طلعت لـ ناس أمي ، كانوا بعاينوا لي لحد ما وصلتهم و أنا ساكته ، أبوي طوالي قال قوموا يا جماعه ماف وقت ، طوالي جات أمي ساقتني و طلعنا برا الشارع ، طبعاً مااااف ولا زول و الجيران الكانوا معانا طلعوا الصباح بدري ، في ناس شنط ما شالتها ، قاموا طالعين بالملابس اللابسنها ، لمن طلعنا الشارع زيدان قال لـ ناصر وين الزول دا ؟ ناصر قال ليهو : قال قريب ، دقيقه اتصل عليهو و فعلاً إتصل على بتاع العربيه و قال ليهو أنا في بداية الشارع و فعلاً ما تمينا دقيقه إلا و شفناهو واقف قدامنا ، نحنا ركبنا و أبوي و زيدان بقوا واقفين مع ناصر و بتكلم معاهم ، بعدها أبوي و زيدان جوا ركبوا بعد ما ودعوا ناصر ، قبل ما العربيه تتحرك ناصر جانا بالشباك ، قال لينا يلا يا جماعه ان شاء الله تصلوا بالسلامه ، أمي قالت ليهو بصوت مبحوح الله يسلمك ، أبوي قال ليهو و انت

🎭 رواياتي 📚 الوسام 2️⃣ 🎭

10 May 2024 11:27

رابط الجزء الاول

/channel/hobcanat/72461

🎭 رواياتي 📚 الوسام 2️⃣ 🎭

10 May 2024 11:25

مع أهلك افهمي إني بقول كدا من خوفي عليك ، ما عايزك تتواجدي في وضع صعب زي دا .... طبعاً و هو بتكلم أنا دموعي كلها خلصت ، طبعاً هو ذاتو صوتو بقى مبحوح و حسيتو زي العايز يبكي ، و دي أول مره أحس بنبرة ضعف أو خوف في صوتو ، قلت ليهو ما متطمنه يا ناصر .... قال لي اتطمني أنا معاك ... بعدها سألني عن ناس أبوي و قال قبيل اتصل عليهم و هسي لا أبوي لا زيدان ماف واحد فيهم برد عليهو فـ حكيت ليهو الحصل ، قال لي زيدان دا ليه متهور كدا ! قلت ليهو أنا خايفه عليهم شديد ، قلبي ما مريحني يا ناصر .... طبعاً بقى يحنسي و يواسي فيني و أنا أبكي ليهو ، قال لي ما تقفلي الخط خليك معاي ، قلت ليهو ناس أمي قاعدين في الهول حـ أمشي أقعد معاهم عشان لو.... قاطعني و قال لي ممكن ما تتشائمي كدا ؟! انت ما عارفه كلامك دا بضايقني كيف و بحسسني بخنقه !... قال لي تمام أطلعي ليهم و أديني أمك عايز اتكلم معاها ، قلت ليهو ماما مقلقه و خايفه شديد على أبوي و زيدان ، قال لي عشان كدا عايز اتكلم معاها ، قلت ليهو طيب ، طوالي طلعت و أديت التلفون لأمي و قلت ليها دا ناصر ، مسحت دموعها و بقت تتكلم معاهو ، بعدها سارا برضو شالت التلفون و اتكلمت معاهو و في الآخر رجعت لي التلفون ، قايلاهو قفل بس لقيتو في الخط ، قال لي بعد شويه حـ اتصل عليك تاني ، قلت ليهو طيب ، قال لي إياك تطلعي ، إياك تحاولي تصوري ، ما عايزك تتشالقي إذا ما القصف دا وقف الحوش دا ما تطلعيهو ، قلت ليهو طيب ، سكت مسااافه بعدها قال لي و إياك تفقدي ثقتك فيني و تظني فيني ظن السوء ، إياك تخلي الشك يدخل قلبك و يوهمك بإني قنعان منك ، إياك يخطر على بالك ولو للحظات إني ممكن اتخلى عنك في يوم ... طبعاً سكته ساي ، قال لي هاااا سامعاني ؟؟ قلت ليهو طيب ، قال لي تمااام شاطره ، يلا حـ اتصل عليك بعد شويه ، ما تبعدي عن تلفونك و حاجه تانيه لمن اتصل عليك ردي و ما تقلقي بي ، قلت ليهو طييييب !
المهم بعد قفلت منو حسيت نفسي أحسن ، كأنو كان في صخره كبيره على قلبي و إنشالت ، كلام ناصر طمني شديد و من كل النواحي ....
بعد صلاة المغرب لسه الطيران كان حايم و أبوي و زيدان ما بردوا على تلفوناتهم ، حبوبه ذاتا ما كانت بترد ، لمن ناصر اتصل علي قلت ليهو ناس أبوي لسه ما رجعوا يا ناصر ، خايفه عليهم شديد و المشكله إنو ما قادرين نعمل شي .... بقيت اتكلم معاهو و هو ساكت!
قلت ليهو ناصر ! معاي انت ؟! طبعاً للحظات شكيت و قلت إنو دي أخت صحبو الردت علي بس لمن قال لي ايوه معاك شكي زال بس صوتو كان متغير ، قلت ليهو في شي ؟! صوتك ما تمام !
لمن سكت أنا عقلي بقى يودي و يجيب ، قلت تكون حصلت عليهو حاجه ! قلت ليهو ناصر في شنو ما تدس مني ، صوتك دا ما طمني !
قال لي ما عارف اقول ليك شنو بس ... قال كدا و سكت فجأه ، كنت سامعه صوت أنفاسو و تلعثم لسانو و ترددو و جاني إحساس إنو دموعو حالياً نازله و إنو ما قادر يتكلم ، قلبي إنقبض و من شدة الخوف ما قدرت اسألو فـ بقينا ساكتين الإتنين لحد ما فجأه كدا جاني صوت سارا خالتي و هي بتصرخ فـ طوالي إنخلعت و التلفون وقع من يدي 💔

" أحبكِ مهما تمادى البعاد
أحبك مهما ابعدتنا الطرقات
احبك يا من لها في النبض لقاء
أحبك بتلك الهمسات
فإن فؤادي لك يشتاق
و أنا منتظر أن تلتقي بينا الطرقات
أحبك
بكل صدق الشعور و الأحاسيس
بقلب عاشق لك غريق
أحبك أكثر من نفسي
ياحب العمر
يا أجمل رفيقه ". . 🖤

*•••••••••••••••••••••••••••••••••••••••••••••••••••••••••••*
*★★يتبــــــــــــــــــــــــــــــــــــــــــــع★★*

🎭 رواياتي 📚 الوسام 2️⃣ 🎭

10 May 2024 11:25

قعدت في الغرفه مسافه طويله ، قضيتها بكى و زعل ، في الآخر مسحت دموعي و طلعت ، لقيت أمي و رشا جوا راجعين بس حبوبه ما كانت معاهم ، أمي قالت لي وين انتِ من قبيل لا شفتك لا سمعت حسك ! قلت ليها كنت نايمه ، قالت لي أنا ذاتي قلت كدا و إلا ما كان سكتي السكته دي ، طبعاً لقيت أبوي حكى ليهم بالعريس الجا لـ سارا خالتي ، طبعاً قدامهم كنت بتظاهر بالقوه و بحاول اخفف دمي ، طبعاً حبوبه ما جات معاهم عشان بت جارتها على وشك الولاده ، و لمن ناس أمي مشوا ليهم قالوا اتوجعت و كانوا قايلنها حـ تولد بس ما ولدت فـ حبوبه قعدت معاهم عشان ولادتها لو ما كانت اليوم حـ تكون بكرا ، قلت ليهم ياريت لو حبوبه جات معاكم عشان أشمر ليها ، عايزا أشوف ردة فعلها ، ما قادره انتظرها لحد ما تجي بكرا ، هي حـ تجي بكرا صح ؟؟ أمي قالت لي حسب موعد ولادة البت ، قلت ليها واااي ياخ ! رشا قالت لي اتصلي عليها ! قلت ليها فكره والله ، أمي قالت لي ما جاده ولا شنو خليها لمن تجي ، سارا قالت لي حسستيني كأني عمري 45 سنه و دا اول زول يجي و يتقدم لي ! غيتو أول مره أحس إني بايره ، قعدنا نضحك على كلامها ، المهم بعد صلاة العشاء ، أنا الموضوع كان واقف لي في حلقي ، و مصره إلا اتصل على حبوبه و أكلمها رغم إني ما زوله ما عندها صبر أو خشمها خفيف بس كنت عايزا أكلمها أول وحده و أفرحها ، طوالي شلت تلفوني و بقيت أتصل عليها ، لمن ردت قلت ليها والله مشتااااقين يا إخلاص ، مشيتي و خليتي لينا البيت شين ، قالت لي هوووي أنا متين مرقت منكن عشان تشتاقي لي ! قلت ليها غيتو أنا يا حجه إخلاص بشتاق ليك على رأس كل ساعه بس انتِ ما شغاله بي ، قعدت تضحك و قالت لي اها دايراني اجيب ليك معاي بسكويت ولا مصاصه !؟ قلت ليها حبوبه هوووي انتِ قايله عمري 6 ولا 7 سنوات ؟
قالت لي عارفاك كبيره لكن كمان عااارفه اتصالك دا ما ساي ، قلت ليها الله يسامحك ، غيتو الزمن دا ماف زول يتفقد زول أو يتصل يسأل عنو !
قالت لي اها قيلتو كيف ، ناس أمك سون ليكم الغدا ؟ قلت ليها اييي عملنوا لكن لسه ما اتغدينا ، قالت لي و ان شاء الله انتِ قبيل سويتي الجبنه لأبوك و أخوك ، قلت ليها سويييتها سويييتها يا حبوبه !
قالت لي اها زيدان قاعد ولا كالعاده برا البيت ، أنا كلمتو و قلت ليهو ما تطلع لأنو ماف آمان ، قلت ليها زيدان قاااعد يا حبوبه خلينا منو عندي ليك خبر سمح شديييد ، قالت لي و من قبيل منتظره شنو ، اها قولي لي خبرك السمح دا !.... قلت ليها بتك جاها عريس ، قالت لي بتي منو ! قلت ليها أجي يا حبوبه ! خلاص بقيتي تنسي ! قالت لي شغال شنو !.... طبعاً قعدت أضحك و قلت ليها والله عرفتك حـ تسألي السؤال دا ، قلت ليها شغال في المباحث و هو زول كووويس خلقه و أخلاق ، قالت لي شفتيهو وين و هي جابتو من وين !؟
قلت ليها الكلام كتييير يا حبوبه بعد تجي ، بس عشان ما قدرت انتظرك قلت إتصل و أسبقهم كلهم و أكلمك ، قالت لي خالتك الما فيها مخ دي ، رفضت الدكاتره عشان في الآخر تجيب لينا واحد شغال في المباحث ! قلت ليها و مالو العيب شنو ! أقول ليك شغال في المباحث في المبااااحث يا حبوبه ، قالت لي غيتو أنا غير الدكاتره ديل ما بشوف زول ، ضحكت و قلت ليها والله انتِ يا حبوبه زي العميان لمن يمسك ليهو في عصايه ، المهم يا حبوبه الراجل دا كويس والله و جايها بالباب ، عليك الله ما تعترضي ، نحنا ما صدقنا إنو سارا وافقت ليها على زول ، وافقي و خليها تعرس و تشوف حياتها ، مش دائماً بتقولي انك عايزا متييين تشوفيها عروس و في بيتها ؟! قالت لي خلااااص خلااااص بعد أجيكم ، قلت ليها حـ تجي بكرا ؟؟ قالت لي لحدي ما أشوف ولادة البت دي ، يمكن تلدي بكرا أو البعدو ، قلت ليها ربنا يسهل ولادتها و يحلها بالسلامه ....
المهم بعد قفلتها منها وريتهم إني كلمتها ، سارا قالت لي غيتو انتِ !... أكيد سألتك شغال شنو !... قلت ليها فعلاً بس اتطمني حـ تواافق حـ توافق ... طبعاً كنت بتكلم عادي و بضحك قدامهم و أنا جواي خراب ، إتمنيت أدخل جوه و اقفل باب الغرفه علي و آخد راحتي في الزعل و البكى من دون ما يجي زول يسألني مالك و يحاول يواسيني !
تاني يوم كان يوم السبت 24 يونيو ، من صباح الرحمن الأرض دي تهتز و كان في أصوات قويه و مخيفه ، أبوي قال ربنا يستر اليوم الإشتباكات من كل الإتجاهات ، زيدان قال ليهو دا ما اشتباك دا طيران عديل ، سارا قالت معناها الدعامه مشوا المدرعات تاني ، غيتو ربنا يستر ، أمي قالت ليهم أصلو طيارة أمبارح دي ما جات ساي ، الليل كلو لافه ...
طبعاً يوم أمبارح الجمعه كان في اشتباكات ، المهم لمن دخلت قروب وصف لي الكلاكله كل الناس كانت بتسأل في شنو و الطيران دا بضرب وين ، كنا مفتكرين إنو الطيران بضرب في الجبل و المدرعات بس لمن جات الساعه 6 صباحاً الوضع إختلف تماماً ، بدت بأصوات رصاص زي المطر ، كلها بدت في نفس الوقت بعدها بقى في أصوات براميل بتتوقع و مضادات طيران و فجأه كدا الحكايه جاطت ، كلنا دخلنا جوه و قعدنا على الأرض و أنا

🎭 رواياتي 📚 الوسام 2️⃣ 🎭

10 May 2024 11:25

*#زهرة~فؤادي~《05》*
*#الجزء~الثاني ~*
*#بقلم~مها~حولي~الزاكي*
*ــــــــ♡ــــــــ♡ــــــــــــــ♡ــــــــــــ❥ :00:00*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‌‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​

لمن زيدان سكت و ما رد علي بقيت أحنس فيهو ، قلت ليهو أنا اجتهدت و عرفت سبب حزنك و زعلك ، ما باقي ليك إلا تقول لي البت دي منو يا زيدان ، عليك الله يا زيدان قول لي ، حلفتك بالله قووول ياخ !
قال لي صدعتي بي! أصلو ما معقول معاك ! قلت ليهو أرح قول لي هي منو سررررعه !... قال لي بزهج : ورده كدا إرتحتي !؟
طبعاً أنا كنت شغاله ليهو قووول لي ياخ ، قول لي ياخ و ما انتبهت إنو قال لي إسمها ، بس لمن إستوعبت قلت ليهو ورده منو ؟؟!
قال لي بتعرفي كم ورده انتِ ؟!!
نططت عيوني و قلت ليهو ورده مدثر !؟! أخت ناصر !... واااي يا زيدان من متين الكلام دا و ليه ماف واحد فيكم اتكلم !؟
قال لي اتكلم أقول شنو و لسه ما كان في شي واضح ! و صراحة بسبب عمايل ناصر و تصرفاتو معاك ، صورتها بهتت قدامي ، قلت ليهو زيدان انت مجنون !؟ هي ما ليها ذنب !!؟
قال لي كيف ما ليها ذنب ؟؟ أهلها خطبوا لراجلك بالدس و كانوا حـ يعرسوا ليهو بالدس !!
قلت ليهو ورده و وائل و عمي مدثر ما كانوا عارفين يا زيدان ، عمتي و نازك هم العملوا كدا ! ما تلومها على شي هي ما ليها ذنب فيهو !
قال لي عارفه أو لا في النهايه ديل أهلها و دي طباعهم و أكيد هي ما حتكون أحسن منهم ! قلت ليهو ما تظلمها يا زيدان ! قال لي أنا شفت العملو فيك أخوها ، رغم إني وصيتو عليك و ختيت فيهو كل ثقتي بس خان الثقه دي و ما صان الأمانه ! على قدر ما أنا مقهور منو مقهور منك ، ما عارف ازعل منك ولا أزعل عليك ! يعني بعد دا كلو لسه جاريه وراهو ! لسه بتبكي عليهو ! جايه من سقط لقط عشان تشوفيهو و تتأكدي إنو حي و هو مع ذلك ما مقدر ليك دا كلو ! مالو ما جا عشان يشوفك !؟ زي ما خاطرتي و قدرتي تجي مفروض يخاطر و يجي يشوفك ! بس عشان لاقيك راميه نفسك عليهو و كل ما يغلط بترجعي ليهو ، هاينك و ما شغال بيك و مع ذلك انتِ لسه كايسه دربو !
طبعاً كل كلمه منو كانت بتتغز في قلبي زي الدبوس ! خلعني بكلامو و صدمني ! حسيتو بهين فيني و نفسو يقول لي انتِ وحده رخيصه و ما عندك كرامه !
عيوني إتملت دموع ، ما قدرت انطق حرف واحد ! طوالي قمت و دخلت جوه و أنا بمسح في دموعي ، ما قادره أقول ظلمني بكلامو و في نفس الوقت ما قادره أقول إني غلطانه لأني لمن جيت راجعه الخرطوم ما جيت عشان إصرار قلبي ، حتى عقلي هو الخلاني أجي عشان ناصر !
بالنسبه لكل الناس أنا حأكون وحده عديمة كرامه ، و ماف زول حيقدر يفهمني ، علاقتنا أنا و ناصر يمكن تكون ما مفهومه للناس أو يمكن لينا نحنا كمان ما مفهومه ، بس أنا حتى لو اتطلقت من ناصر ما بقدر أنزعو من جواي ، كأنو إنزرع جواي و إسمو انحفر على جدار قلبي ، ناصر دا انا لو قادره اتخلص منو و أزيلو من جواي كان من زمااان اتطلقت منو ، من يوم جاب لي توته في البيت و ما كنت حـ انتظرو يغلط أكتر ، ياداب عرفت و فهمت يعني شنو مرارة الحب ، الشي الرابطني بـ ناصر زي المغناطيس ، بخليني مهما زعلت منو ، و مهما بعدت عنو أرجع ليهو مره تانيه ، و الحاجه دي ما جايبه لـي شي غير الذل و الإهانه 💔
كلام زيدان أثر علي شديد و حسسني إني رخيصه ! جرحني شديد بـ كلامو ! شلت تلفوني و إتصلت على ناصر و أنا بمسح دموعي ، في البدايه ما خش معاي ، بس تاني لمن حاول كان خاشي بس ما رد ، بعد تلات مكالمات الخط إنفتح ، سكت لحظات عشان أحرك لساني و أقول العندي و أنهي دا كلو و اقفل باب ناصر للأبد ! حسيتها حتكون مكالمه

🎭 رواياتي 📚 الوسام 2️⃣ 🎭

10 May 2024 11:25

صلح قعدتو و قال لي اها ؟!
قلت ليهو سارا جاها عريس ، قال لي عريس ؟؟! اها كويس والله !.. اها الزول دا منو و من وين و أصلو و فصلو شنو !
قلت ليهو اسمو سلطان شغال في المباحث ، هو و سارا كانوا شغالين سوا في قضية مقتل الطالب عماد الدين ، المهم عرفها من هناك و هسي لمن بقى جاهز كلمها و قال ليها عايز اتقدم ليك و أقابل أهلك ، المهم يعني هي عايزا تديهو رقمك و رقم إيهاب ، قال حـ يجيكم في أي مكان عشان يقابلكم ، قال لي ربنا يجعل الفيها خير لكن هو حالياً وين ؟؟
قلت ليهو حالياً في بورتسودان ، جا من برا السودان مخصوص عشان يقابلكم و يشوف رايكم ، قال لي خلاص خليها تديهو الرقم و بعدين حـ نتناقش في الموضوع دا مع حبوبتك ، قلت ليهو حبوبه اول حاجه حـ تقولها : شغال شنو !؟ ضحك و قال لي لو عرفت إنو ما دكتور حـ تعمل موضوع ، قلت ليهو لكن حـ تطنطن دقيقه دقيقتين و بعدها حـ توافق طوااالي لأنها عااارفه سارا دي ما بتعرس ليها بسهوله ، و أصلاً دا الكانت عايزاهو حبوبه ، من زمااان بتحنس سارا تحانبس عشان تعرس ، قال لي والله ان شاء الله يكون زول كويس ، و بستاهلها ، و بعدها ربنا يتم ليهم على خير ، قلت ليهو آمين يا رب ، قال لي سارا وين ولا خجلانه !؟ طوالي سارا جات طالعه و هي بتضحك ، قالت ليهو بتك سبقتني ، قلت ليها مش كنتِ متوتره و ما عارفه تقولي ليهم شنو ! قالت لي بررري اتوتر من شنو !؟ قلت ليها خلاص معناها بعدين براااك كلمي ناس حبوبه و اتصلي على إيهاب و قولي ليهو عايزا أعرس 🙂 أبوي قال ليها كدي تعالي أقعدي يا سارا و أحكي لي عن الزول دا ، قلت ليهو هسسي أنا يا أبوي مش حكيت ليك عنو ! قال لي انتِ خليك ساااكته و خليها هي تتكلم ! طبعاً سارا قعدت تضحك علي ...
المهم بعد صلاة الضهر عملت الجبنه و قعدنا نشربها نحنا التلاته ، زيدان جا داخل و قعد شرب معانا الجبنه ، أبوي قال ليهو انت مالك يا ولد الأيام دي !؟ قال ليهو ماف حاجه يا أبوي ! قلت ليهو بس ما تكون من زمان داخل مع الدعم السريع و هسي محتار تمشي معاهم ولا لا !؟ قال لي انتِ غبيه ! دعامة شنو عليك الله بلا يخمهم !
سارا قالت ليهو طيب مالك ؟! قال ليها قلت ليكم ماف حاجه !!... طبعاً سكتنا خليناهو و واصلنا ونستنا ، حكيت ليهو بـ العريس الجاي يتقدم لـ سارا ، قال ليها كويس والله ، سارا قالت لي خشمك أخف من الريشه !
بعدها أبوي طلع و سارا لملمت كبابي الجبنه و مشت غسلتهم و دخلت غرفتها ، بقينا قاعدين أنا و زيدان ، قلت ليهو ما مصدقه إنو سارا حـ تعرس ، يا حليلها والله حـ نفقدها ، قال لي البسمعك بقول حالياً هي لابسه الزفاف !
قلت ليهو من هسي فاقداها ! قال لي العرس حـ يتعمل وين ولا عقد و خلاص !؟ قلت ليهو لسه ما حددوا شي ، بس ياريت لو الوضع كان أحسن من كدا ، كنا حـ نعمل ليها عرس فخم و كبير !
قال لي المهم انها حتكون مع الإنسان العايزاه ، و الأهم إنو يكون ود حلال ، و زول شادي حيلو ، يحفظها و يصونها غير كدا ماف شي مهم ، طوالي اتذكرت ناصر ، سكت لحظات بعدها قلت ليهو باقي رشا ، صحي انت حسام مش متواصل معاك ؟؟ قال لي لينا فتره ما اتواصلنا ، قلت ليهو قولك بكون كسر حنك العرس و خلى رشا ؟؟ قال لي ما عارف والله ! قلت ليهو المشكله إنو هي بقت ما بتتكلم في الموضوع ، و ما بتحب زول يتكلم معاها فيهو ! يعني كأنها مسحتو من حياتها ! قال لي يمكن هو قال ليها أو لمح ليها إنو حـ يخليها !؟
قلت ليهو ما عارفه والله ! بس لو كان دا الحصل كانت حـ تتكلم أو على الأقل حـ تطلع الخاتم الفي أصبعها !... قال لي انتِ ليه ما بتصر عليها و تحاولي تعرفي منها الحاصل شنو ؟ أنا ما قاعد اسألها عنو لأنو احتمال كبير ما تاخد راحتها معاي و تحكي لي و دا شي طبيعي ، عشان كدا انتِ أو سارا اتكلموا معاها ! قلت ليهو أو يمكن هم الإتنين حاسين إنو دا ما الوقت المناسب ، و هو دا فعلاً ما وقت مناسب لأي شئ ، قال لي ما اختلفنا ، أنا ما مستعجل و عارف الوقت ما مناسب و مقدر الظروف أنا بس خايف إنو يلعب بيها و يقضي بيها زمن و في الآخر يخليها ! يعني مثلاً الحرب دي لو استمرت سنتين تلاته ، هم طول المده دي يكونوا مخطوبين بس و كل واحد في مكان !؟ يعني على الأقل حسام يحاول يشوف مخرج ، أو يرسل لي و يحسسني إنو لسه باقي عليها و إنو عند كلمتو بس يختفي بالطريقه دي حركه ما ظريفه منو ، قلت ليهو نحسن الظن ، يمكن متواصل مع رشا و بعدين هل انت رسلت ليهو و ما رد عليك ؟؟
قال لي قبل كدا اتصلت عليهو و رقمو ما خشى معاي فـ رسلت ليهو في الواتس بس ماف رد رغم إنو مستلم الرسائل !
قلت ليهو حاجه تحير ! لكن خلاص اليوم حـ اتكلم مع رشا في الموضوع دا و حـ أصر عليها تحكي لي ، قال لي تمام ، بعدها سكتنا مساااافه و أنا بعاين ليهو سااااي ! قلت ليهو زيدان ! قال لي نعم !

🎭 رواياتي 📚 الوسام 2️⃣ 🎭

10 May 2024 11:25

بناتو الإتنين جوا حفيانات ، حبوبه قالت ليهم حسبي الله ونعم الوكيل ، بركه الما حضرنا اليوم داك !...
و نحنا بنتونس كدا فجأه سمعت صوت تلفوني ، سارا نادتني من جوه و قالت لي ما سامعه تلفونك دا !... لمن دخلت جوه و شلت التلفون لقيت ناصر هو المتصل ، بقيت أعاين للشاشه مسااافه ، سارا قالت لي دا ناصر ولا شنو ؟؟ لمن عاينت ليها قالت لي عادي عادي ما تستغربي عرفت كيف و على فكره أمبارح لمن انتي مشيت مع بنات خالتو مقبوله البحر هو اتصل علينا و سأل عنك بس قلنا ليهو انك ما موجوده ... ردي ياخ قبل ما يفصل ! ..فصل و تاني رجع لي ، أصلاً ليهو كم يوم بتصل علي بس ما برد عليهو ، في الآخر أخدت نفس و فتحت الخط من دون ما اتكلم ، قال لي عارفك سامعاني ! المهم انتِ كيفك و أمبارح مشيتي وين ؟ ليه تطلعي في وضع صعب زي دا ؟ و عرفت من أبوك انكم مشيتوا الكلاكله ، الأفضل انكم ما تقعدوا أكتر يا مها ، سافروا برا السودان اسمعي مني ، أنا كلمت أبوك و قال لي لو الوضع زاد سوء و البلد بقت ما بتنقعد حـ نسافر ، بس انتوا ليه تنتظروا الوضع يبقى اسوأ ؟ اتكلمي مع ابوك يا مها ، متأكد إنو حـ يسمع منك ، الحرب دي شكلها ما حـ تقيف هسي لا في الشهر دا لا في البعدو عشان كدا الناس تسافر و تكمل حياتها ...
طبعاً أنا كل حرف منو بجرحني ! شكلو ما مفكر في علاقتنا عشان كدا قال لي سافري مع أهلك ، يعني البعاد و التخلي ساهلين عليهو للدرجه دي ؟؟ بقدر يعيش عادي من دوني و من دون ما يفكر فيني و في مستقبل زواجنا !
حسيت لساني إتربط و في غصه واقفه لي في حلقي ، كان حـ يتكلم أكتر بس قفلت الخط في وشو و أول ما مسحت دمعتي و رفعت راسي لقيت سارا في وشي !
قالت لي خير في شنو ؟؟... طوالي قعدت أبكي و أنا بحكي ليها ، قالت لي طيب انتِ سبب زعلك إنو ناصر قاعد مع أسرة صحبو ولا عشان قال ليك سافري مع أهلك ؟
قلت ليها أنا المزعلني إنو ما مهتم لا بي لا بـ أهلي ، ما أدى أي أهميه لـ جيتي دي ، يا سارا أنا خاطرت بحياة أهلي بس عشان أجي و أشوفو و هو ما كلف نفسو يتصل ، شال هم كل الناس إلا أنا ، أنا جيت عشانو و كنت متخيله إنو لمن يعرف حـ يجينا ، مع إنو لو كان يوم قال لي حـ اجيكم والله كنت حـ اقول ليهو ما تخاطر و تجي بس هو مجامله ساي ما قال لي حـ أجي و أشوفكم ، اتخيلي بعد دا كلو اتصل عشان يقول لي سافري مع أهلك !
قالت لي يمكن عشان خايف عليك يا مها ! قلت ليها تبريرات زي دي بقت ما بتنفع معاي ، لـ متين هو عايز يقعد في بيت صحبو و يحرس أهلو الأصلاً كانوا قاعدين براهم عادي ؟ ناصر شكلو عاجبو القعاد في بيت صحبو العندو تلات أخوات ، أصلاً هو واحد نسونجي و عينو طايره ، غلطانه أنا الما بتعلم من غلطي و بعيدو مية مره !... سارا اتكلمت معاي شويه بعدها طلعت ، طبعاً ما كترت كلامها لأنها ما قدرت تبرر تصرفات ناصر و تقول لي كلام مقنع ، في لحظات زعل و غضب مسكت تلفوني و اتصلت على ناصر ، أول ما رد علي قلت ليهو والله نحنا ما منتظرنك تتصل و تقول لينا سافروا ، و هو فعلاً نحنا حـ نسافر بس ما بأمر منك ، قال لي مها أنا.... قاطعتو و قلت ليهو قبل ما نسافر عايزا أطلب منك طلب .... هسي طلقني و ورقة الطلاق دي تصل وقت ما تصل ما مهم ، الأهم انك هسي تقول لي انتِ طالق و بـ التلاته كمان ... ما عايزا أي شي يربطني بيك تاني ، الأفضل كل واحد يمشي و يشوف حياتو....
سكت مسافه بعدها قال لي جاده ؟! شايفه اننا وصلنا لـ طريق مسدود !؟... قلت ليهو انت الوصلتنا للطريق دا و المره دي أنا العايزا الطلاق و صدقني ماف تراجع ، بعد تطلقني أعمل العايزو ، أصلاً أنا إنسان ما بقدر مشاعري و ما براعي لـ حتة إني خاطرت بحياة أهلي و جبتهم معاي الخرطوم عشانو ما بلزمني ، عارف اني ما اهتميت بالكلام الحـ يقولوا أهلي عني لمن قلت ليهم إني لو ما مشيت الخرطوم و شفتك ما حـ اتحرك شبر من البلد دي ، رغم عمايلك ، رغم إنك كنت خاطب من وراي و ناوي تعرس بالدس مع ذلك ما خجلت أبكي عشانك قدام أهلي و أقول انك ما مت و اني ما حـ اسافر لو ما اتطمنت عليك ، و كمان سقت أبوي معاي و مشينا أركويت على أمل إنو ألقاك هناك ! بفتش عليك زي الحاجه السمحه و انت ما بتكلف نفسك تعمل مسكول ، ليه بس و شنو الجابرني عليك ؟ أنا معاك وصلت الحد ، كل مره ابرر ليك و اتغاضى عن أغلاطك بتجي و بتعمل غلط أكبر ... قال لي دقيقه انتي جيتي راجعه الخرطوم مع أهلك عشاني ؟؟ قلت ليهو لا عشان اشتقنا لأصوات المدافع و لقطوعات الكهربه و للمويه الماف و للحال البطال !
قال لي والله ما عارف انك جيتي راجعه عشان بس تطمني علي ! و ليه خاطرتي و مشيتي أركويت و انتِ عارفه اني في بحري !... قلت ليهو غلطه و ما حـ تتكرر تاني !

🎭 رواياتي 📚 الوسام 2️⃣ 🎭

10 May 2024 11:25

*#زهرة~فؤادي~《04》*
*#الجزء~الثاني ~*
*#بقلم~مها~حولي~الزاكي*
*ــــــــ♡ــــــــ♡ــــــــــــــ♡ــــــــــــ❥ :00:00*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‌‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​

قلت ليهو كويس والله ، شكلها شبكتك دي بتظبط مع ناس و بتخليهم يجيبوا ليك الشمارات و مع ناس تانيه لا !... قال لي الكلام دا عرفتو قبل يومين ، و صدقيني الشبكه ذاتا ما مساعده و تلفوني دا ذاتو بقى ما جايب حقو و بعلق كتير !
قلت ليهو ايوااا ... قال لي ما تتكلمي معاي كدا كأنك ما مصدقاني ! قلت ليهو تلفونك بقى يعلق لدرجة إنو يخليك تشوف مكالماتي و ما يسمح ليك ترد عليها ؟؟!
قال لي ما أصلاً أنا عشان كدا متصل عليك ! قلت ليهو إذاً شبكتك كانت كويسه و مع ذلك انت ما مكلف نفسك تتصل أو ترد علي ، لا و كمان عامل ليك سكرتيره عشان ترد نيابة عنك ، قال لي سكرتيره ؟؟
قلت ليهو انت تلفونك دا قاعد تأجرو لـ دعامه ولا شنو ! عرفناك ما بتشوف المكالمات ، كمان ما بتعرف منو الرد على تلفونك !...قال لي والله ما عارف ! الرد عليك منو ؟؟ قلت ليهو وحده كدا ما بعرفها و لمن سألتها انتِ منو قفلت الخط !...سكت مسااافه ، قلت ليهو معناها عرفت دي منو ، ناصر قول لي الحقيقه انت معرس من وراي صح ؟دي مرتك الردت علي مش ؟
قال لي دا كلااام شنو !... قلت ليهو طيب دي منو ؟؟
قال لي متذكره رياض عباس صحبي ؟ قلت ليهو ايوه متذكراهو مالو ؟؟
قال لي كان في القياده العامه و هسي مختفي ليهو قريب الشهرين ، قبل ما يختفي بأيام وصاني على أمو و أخواتو الفي بحري ، و قال لي في حال إنو الوضع زاد سوء طلعهم من الخرطوم ، ما عرفت إنو مختفي و ماف اخبار منو إلا لمن اختو اتصلت علي و سألتني إذا بعرف شي عنو ، فـ بس دا السبب الخلاني أمشي بحري و أكون معاهم ، حاولت أطلعهم بس رفضوا ، و أمو حلفت انها ما تطلع من الخرطوم بدون ولدها ، قلت ليهو و ليه هو يوصيك عليهم انت بالتحديد ؟؟ ما عندهم أهل و لا ما عندهم زول غيرك ؟؟
قال لي ما عندهم أهل ، أبوهم متوفي من زمان و ما عندهم اعمام أو قرايب ، أخوهم رياض هو الكان ساندهم و واقف عليهم ، قلت ليهو اها يعني حـ تقعد معاهم كدا لـ متين و الأهم قعادك معاهم حـ يغير شنو ؟؟ و هم من يوم أخوهم كان في القياده كانوا قاعدين كيف ؟؟
قال لي والله بما انك شايفه إنو قعادي مع أم و 3 بنات شابات قاعدين براهم و أخوهم في القياده بدافع عني و عنك حاجه ما منها فايده فأنا ما مجبور اشرح ليك و أعلمك كيف تحسي بالناس !
طبعاً كلامو وجعني جنس وجع! قلت ليهو تمااام أقعد أحرسهم و عليك الله عرس ليك وحده منهم و أسكن معاهم بالمره ...قلت ليهو كدا و قفلت الخط و أنا عيوني إتملت دموع ، واضح إنو ناصر بهتم بكل الناس إلا أنا ، براعي لـ مشاعر كل الناس إلا أنا ، مهتم بـ أسرة صحبو الأصلاً هم بوجودو معاهم أو عدمو كانوا عايشين ، و ما مهتم بي أنا و أسرتي الجينا راجعين عشانو !
رجع إتصل علي تاني بس ما رديت عليهو ، بالجد قنعت ، و هو كل ما أمشي خطوه ناحيتو برجعني خطوتين لـ ورا ، افتكرت اننا اتجاوزنا كل خلافاتنا و مشاكلنا بس في الحقيقه نحنا ما خطينا خطوه وحده لـ قدام ، ظنيت اننا حـ نرمي كل الزعل و سوء التفاهم ورانا و نمشي لـ قدام بس ما حصل كدا ، و ناصر في كل مره بشككني فيهو ، كل ما أبرر ليهو بكرر نفس الغلط ، أنا خلاص شبه إقتنعت إنو العلاقه دي ما حـ تمشي لـ قدام ، أنا و ناصر مستحيل نتفاهم و نعيش تحت سقف واحد ، أصلاً كنا حـ نفترق و جات الحرب دي و شكلها حـ تفرقنا

🎭 رواياتي 📚 الوسام 2️⃣ 🎭

10 May 2024 11:25

دعاء قالت كلامها دا و قعدت تبكي ، طبعاً ما عرفتهم مالهم و مجتبى مشى وين و ما حبيت اسأل اكتر عشان كدا استأذنت و قلت ليهم ماشه أشوف بيتي ، فجأه جا صوت زول بقول ناس البيت السلام عليكم ! طبعاً التلاته عاينا لبعض بخوف ، أبوي كان قاعد برا في الصالون ، طوالي قمت طالعه ليهو و وراي خالتو ماجده ، لقينا معاهو واحد كدا ما بعرفو ، خالتو ماجده أول ما شافتو أخدت نفس و قالت ليهو قطعنا قلوبنا يا مهدي ! ضحك و قال ليها معقوله ما عرفتي صوتي يا خالتو ماجده ! قالت ليهو بسبب الخوف الحاصل و الوضع النحنا فيهو دا مرات صوتي ذاتو ما بفرزو ، ضحك و قال ليها جيت أشوفكم ، أمي بتسأل عنكم ساي ، قالت ليهو أمك بتسأل من بعيد لشنو ما تجي و تشوفنا ولا المسافه بعيده ! قال ليها لا ما كدا ! قالت ليهو مشيتوا سكنتوا قدام و نسيتونا ، قال ليها لا لا ياخ ما كدا والله يا خالتو ماجده ..... طبعاً بعدها أنا و أبوي طلعنا و خليناهم بتكلموا ساي ، مشينا وقفنا جنب بيتي و بقينا نعاين ليهو ساي ، قلت لأبوي ما عارفه حـ نفتح الباب كيف بس مفكره أنط بالحيطه ! قال لي شنووو يعني ما معاك مفتاح ! أنا والله قايلك ماشه و عندك شي تفتحي بيهو البيت ، راح عن بالي اسألك كيف حـ ندخل البيت ! قلت ليهو بقدر أنط بالحيطه !
قال لي انتِ ضامنه جوه في شنو !؟ و لو وقعتي انكسرتي ! ... خليهو حـ انط أنا و انتِ خليك هنا !.... طبعاً أنا النقطه إنو حـ نفتح البيت كيف دي ما راحت عن بالي بس كنت عايزا أجي هنا بأي طريقه و أشوف بيتي ان شاء الله من برا ساي ، و عشان في إحساسي جواي قال لي احتمال تلقي ناصر رجع و قعد في البيت !
قلت لأبوي لا لا خلاص ما حـ تنط انت ما معروف البيت فيهو شنو ، أثناء ما أنا و أبوي واقفين بنتكلم جانا الولد الخليناه مع ناس خالتو ماجده يلي اسمو مهدي ، طبعاً شكلو ما غريب علي ، واضح إنو من أولاد الحي لأني شفتو قبل كدا بس ما بعرفو و ما بعرف أهلو ، الناس البعرفهم هنا بتعدوا باليد الواحده ، لأني سنه ما تميتها في بيتي و لأني كنت مشغوله ، المهم سمعني لمن قلت لأبوي كان في نسخ من المفاتيح بس ما معاي ، الولد جانا و قال لينا عن إذنكم كدي زحوا لي شويه ، طلع من جيبو حاجه رفيعه كدا زي بينسة الشعر و دخلها مكان المفتاح ، أبوي قال ليهو انت حرامي ولا شنو !؟
قال ليهو عرفت كيف !؟ لمن عاينا ليهو بخلعه كدا ضحك و قال لينا بهظر معاكم ، طبعاً الباب ما انفتح رغم إنو الآله الدخلها كانت مناسبه مع فتحة المفتاح ! قلت ليهو أكيد متربس من جوه ، طوالي نط لينا في البيت و فتح لينا الباب ، اللحظه الدخلت فيها البيت داهمتني كل ذكرياتي فيهو مع ناصر ! في ثواني اتذكرت شريط ذكرياتنا في البيت دا انا و ناصر من أول لحظه ختيت فيها رجلي على عتبة الباب !
الولد فتح لينا باب الهول و طلع و مشى بعد ما أبوي شكرو ، لمن دخلت الهول لقيتو فاضي !! كل الأثاث الكان فيهو ما موجود ! طبعاً كنا مشغلين فلاش التلفون ، الوقت داك المغرب أذن ، أبوي قال لي ما يكون إنسرق ! قلت ليهو إلا كدا ! طبعاً زعلت شديد و قعدت أدعي على الحراميه و في الآخر قلت الحمدلله على كل حال ، أبوي قال لي لكن لو إنسرق ليه باب الشارع مطبول و متربس و ليه باب الهول مقفول ! قلت ليهو يمكن ناس الحي جوا و قفلوا البيت بعد ما إنسرق !
المهم لفينا في البيت مسافه بعدها قعدنا في الهول ، طبعاً ماف طريقه نرجع في نفس اليوم و ناس أمي عارفين كدا كلمناهم إنو حـ نبيت هناك ، أبوي قال لي ناس أمك قبيل اتصلوا علي ، قلت ليهو هسي كنت حـ اتصل عليهم و فعلاً اتصلت عليهم و طمنتهم علينا ، بعدها حاولت رقم ناصر لمن أداني إنو خاشي قلبي طار من الفرح ، طلعت برا بالتلفون ، كان برن و برن و أنا بدعي انو يرد علي ، فجأه الخط فتح و جاني صوت بت و هي بتقول آلو !... طبعاً أنا استغربت و خفت تكون حاصله عليهو حاجه ، قلت ليها سيد التلفون دا وين ؟؟ قالت لي قاعد يصلي ، قلت ليها و انتِ منو ؟؟ ما ردت علي طوالي قفلت الخط ! طبعاً مخي شطب و بقيت أفكر دي منو البت القاعده مع ناصر دي !! شويه كدا سمعت صوت الباب ، أبوي جا طالع و مشى فتحو ، كانت خالتو ماجده ، قالت لينا بعد تتفقدوا البيت تعالوا بيتوا معانا ، أبوي قال ليها ماف مشكله بنبيت هنا ، قالت ليهو لا لا عليكم الله تعالوا بيتوا معاي في البيت ، بعد إصرار منها قفلنا البيت و مشينا معاها ، اتوضينا و صلينا و بعدها هي جابت لينا أكل أكلنا ، و بعدها شربنا الشاي ، طبعاً أنا كل مره كنت بعاين للتلفون و منتظره اتصال من ناصر ، لمن ما رجع لي اتصلت عليهو كتير بس ما كان يرد ، لمن زهجت و يئست ختيت التلفون و نمت و أنا زعلانه ! ما عارفه ليه ما بتصل علي و ليه لمن اتصل عليهو ما برد علي !... معقوله يكون رجع لحركاتو القديمه ديك ! معقوله بقى ما شغال بي و ما بهمو يتصل علي !طيب البت دي منو ؟؟... ما بنكر إنو للحظات ، حسيت إنو معرس بالدس !

🎭 رواياتي 📚 الوسام 2️⃣ 🎭

10 May 2024 11:25

*#زهرة~فؤادي~《03》*
*#الجزء~الثاني ~*
*#بقلم~مها~حولي~الزاكي*
*ــــــــ♡ــــــــ♡ــــــــــــــ♡ــــــــــــ❥ :00:00*‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‏
‌‌‌‌‌‌‌‌‌‌‌‌‌‌‌‌‏ ‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‏

لمن صوت الصريخ اتكرر أبوي قال لي حـ أمشي أشوف الحاصل شنو ، و انتِ خليك هنا ، قلت ليهو لا لا بمشي معاك يا بابا ما حـ أخليك تدخل براك !....إتحركنا على بيت خالتو ماجده و دخلنا بحذر شديد ، تبعنا مصدر الصوت الكان جاي من جوه غرفه ، أول ما دخلنا اتفاجأنا بواحده واقعه على الأرض و ماسكه بطنها المنفوخه و بتصرخ ، لمن قربت منها و شفت وشها عرفتها ! لقيتها دعاء زوجة مُجتبى ولد خالتو ماجده الكبير ، قلت ليها دعاااء !! أبوي طوالي جا و رفعها معاي في أقرب سرير ، عرقها كان صابي و الوجع ظاهر في وشها ، ألمها كان بسبب انها على وشك الولاده ، ما عرفت أتصرف كيف ، حسيت راسي ضرب ، قلت ليها دعاء وين خالتو ماجده ! معقوله ماف زول في البيت ! قالت لي بصوت تعبان و متقطع : مـ مـشت تجيب الدايه !
أبوي قال ليها بيتها وين الدايه دي ؟ طوالي وصفت ليهو ، قال لي حـ أمشي أشوفها و أجي ، قلت ليهو طيب أعمل حسابك ، هو طلع بيجاي و أنا جريت على مطبخهم و بديت أسخن ليها مويه ، طبعاً كنت متوتره و صريخ دعاء من جوه الغرفه كان بزيد توتري ، بقيت بين المطبخ و بين الغرفه الهي موجوده فيها ، احترت و ما عرفت أعمل شنو ، و هي كانت بتتوجع شديد و ما قادره تصبر ، و ناس أبوي اتأخروا شديد ، لمن المويه بقت سخنه شلتها و وديتها الغرفه ، و دعاء دي من شدة الوجع بقت ما قادره تصرخ أكتر ، بقيت أقول ليها قوي نفسك و أصبري شويه يا دعاء ، خالتو ماجده و الدايه أكيد جاين علينا ، فجأه كدا سمعنا صوت الباب ، ارتحت و قلت ليها الحمدلله ديل هم جوا ، و طوالي جريت على الباب و لمن فتحتو لقيت أبوي في وشي و ما كان معاهو زول ! قال لي المره جات راجعه ؟؟
قلت ليهو لا انت ما مشيت بيت الدايه ؟؟ قال لي مشيت بس ما لقيت زول ! البيت فاضي !
قلت ليهو واي يا بابا هسي نعمل شنو البت بتتوجع ! ... لمن دخلنا ليها جوه حسيت روحها دي خلاص حـ تطلع ، قلقت و خفت خوف ما عادي ! أبوي قال لي ماف طريقه إلا تولديها انتِ ! قلت ليهو لا لا مستحيل ! ما بعرف يا أبوي هسي لو حصل ليها شي بسببي !
قال لي حـ تربعي يدينك و تقعدي تعايني ليها كدا !؟ شوفي ما بحصل إلا الكاتبو ربنا ، لو حصل ليها شي لا قدر الله ما عليك لوم لأنك عملتي العليك و حاولتي تعينيها .... بعد كلام ما طويل مع أبوي في الآخر اتشجعت و قررت أولدها رغم إني ما حصل اتختيت في موقف زي دا و ما حصل حضرت ولاده ! اتختيت أمام أمر واقع و أنا ما عندي شي غير شوية معلومات سبق و قريتها عن طريقة التوليد ! عارفه إنو الحـ أعملو ما حيكون ساهل و خطير شديد و لو البت دي حصل ليها حاجه بالنسبه لي ذنبها حيكون معلق في رقبتي ليوم القيامه ، بس ماف خيار تاني ! ما بقدر أخليها كدا و أقعد أعاين ليها و هي بتتعذب و تصرخ !... اتوكلت على الله و سمعت كلام أبوي و فتشت البيت لقيت مقص عقمتو كويس و جبت قطع قماش اتأكدت انها نضيفه ، و طشت صغير كدا لقيتو تحت سريرها ، أظنهم مجهزنوا ليها ، رفعت لحاف السرير الجنبي و ختيت الطشت تحتو و قومت دعاء و رقدتها فيهو ! للحظات اترددت و يديني كانوا برجفوا ، قالت لي بصوت رايح إلا تولديني يا مها ماف طريقه ! قلت ليها خايفه تحصل ليك حاجه بسببي يا دعاء أنا ما دايه ، قالت لي بس اعملي العليك واااي انا من شدة الوجع ، قفلت الباب و أبوي واقف لينا برا ، غسلت يديني و غمضت و فتحت عيوني ، قلت بسم الله و بديت أولدها و أنا ما عندي أدنى خبره ، هي تبكي و أنا أبكي معاها لحد ما طلع المولود ، شلت المقص و قطعت الحبل السري ، دعاء ياداب إرتاحت و قدرت تتنفس كويس ، قالت لي بصوت تعبان أربطي ليهو الصُره ، بقيت أعاين للبيبي و حجمو الصغير ، طبعاً خفت لمن مديت يدي عشان أربط ليهو الصُره ! ما بعرف بربطوها كيف و إذا بشدوها أو على الخفيف ! قلت ليهو أربطها عديل كدا يا دعاء !؟ ما بتوجعو !؟ قالت اي ما تخافي اربطيها عديل زي الحبل ، فعلاً عملت القالتو لي و ربطتو بحذر شديد و انا يدي ترجف ، بعدها قعدت في السرير القصادها بحيل ميت و أخدت لي بكيه كدا لمن قلت بس ، دعاء قالت لي الحمدلله يا مها عدت على خير ، قلت ليها ما مصدقه والله ، كنت حأموت من خوفي ، لو كان حصل ليك شي كنت حـ أحس بالذنب و ما حـ اسامح نفسي ، قالت لي الحمدلله ربنا حلاني بالسلامه و انتِ ما قصرتي والله ، ربنا جابك لي ، طبعاً ريحة الدم كانت ماليه المكان و بطني قلبت ، ما عرفت تاني أعمل شنو ! دعاء قالت لي أدفقي المويه دي ورا في

🎭 رواياتي 📚 الوسام 2️⃣ 🎭

10 May 2024 11:25

جايه ، عشان الزمن اتأخر قررنا نبيت في الكلاكله و الصباح نواصل طريقنا لحد أمدرمان ، لقينا بتاع بوكسي من ناس المنطقه كان ماشي لـ قدام شويه فـ ركبنا معاهو لحد القلعه ، نزلنا هناك و مشينا بيت حبوبه ، طبعاً متذكره و عارفه وين خالي إيهاب خت المفاتيح آخر مره ، حفرنا أكتر من حفره لحد ما لقينا المفاتيح ، شلناهم و فتحنا البيت ، طبعاً جيران ناس حبوبه المشوا جوا راجعين و نحنا أول ما دخلنا بيتها ناس الحي جوا سلموا علينا و إستقبلونا و ضيفونا ، كانوا مفتكرين إنو دي حبوبه و خالتي سارا جوا راجعين بس لقونا ديل نحنا ، طبعاً لقينا بيت حبوبه زي ما هو ما فيهو حاجه ناقصه ، نمنا هناك و تاني يوم طوالي قفلنا البيت و إتحركنا على أمدرمان لحد ما وصلنا البيت ، طبعاً الحي كان فاااضي و معظم الناس المشت ما جات راجعه تاني ، يعني حصل عكس الكنا متوقعنوا ، جيرانا الفاتحين علينا و الجنبنا كانوا موجودين و باقي البيوت فاضيه بس الشارع الورانا و الشارع البعدو ناسو قاعدين و دا الثبتنا و خلانا نتوقع إنو شويه شويه الناس حـ تجي راجعه و دا الخلى أبوي يأجل فكرة السفر دي شويه ، بعد 4 أيام من جيتنا اكتشفنا إنو ناصر حي و طبعاً دا بعد ما أهلو اتواصلوا مع أصحابو ، تلفون من هنا و تلفون من هناك لحد ما اتأكدوا إنو حي و إنو خبر موتو كان مجرد سوء فهم و وصلوا الخبر دا لـ أبوي ، الحصل إنو ناصر و كم نفر كدا من شباب الحي كانوا بقعدوا في بيت واحد من شباب الحي و كل واحد بدفع العندو أو بجيب حاجه متوفره في بيتو بفطروا بيها و بتغدوا هناك ، في اليوم داك كان في ضرب شديد بس مع ذلك ناصر طلع من الشباب و مشى يشوف ليهو طريقه يصل بيها بحري و فعلاً لقاها و مشى طوالي بحري ، ما عارفه الخلاهو يطلع في الزمن داك تحديداً و يمشي بحري شنو ، بس الحمدلله إنو طلع ، بعد طلوعو بربع ساعه أو أكتر جا طيران و ضرب البيت الكان قاعد فيهو مع الشباب ، فـ الناس ظنت إنو ناصر مات معاهم ، في الآخر قالوا إنو الشباب ديل كانوا دعامه ، طبعاً بعد اتطمنت و عرفت إنو ناصر حي و ما كان موجود في البيت الإتقصف بديت أسأل نفسي لمن اتذكرت انهم قالوا واحد من الناس الماتوا ديل ولد جيرانا المقاصدننا ! منو المات في أولاد خالتو ماجده ! معقوله يكون منذر !! بس منذر جياشي ما دعامي ! طبعاً ناس خالتو ماجده ديل الفاتحين علينا و نفسهم الكان دخلوني بيتهم لمن زعلت من ناصر و قررت أمشي بيت أهلي في نص الليل ، رغم اني ارتحت راحه ما عاديه و فرحت لمن عرفت إنو ناصر حي ، بس برضو حزنت على موت ولد خالتو ماجده ، ما عارفه المات أي واحد فيهم و ما متأكده إذا هو دعامي زي ما قالوا ولا في سوء تفاهم بس على كلٍ زعلت عليها ....
حالياً من جينا راجعين لينا أسبوعين .... المهم في اليوم البعدو كالعاده قاعدين زهجانين و الدنيا مسخنه ، فجأه كدا جات خالتو مسره مرت عمو عبد العزيز جارنا و معاها بناتها الإتنين ، جوا داخلين براااحه براحه و قفلوا الباب بهدوء ، طبعاً الشارع فاضي و الصمت فارض نفسو في الحي ، ماف زول بقطع يمين أو شمال ، جوا قعدوا معانا و شربنا الجبنه سوا و اتونسنا مسافه و فرقنا على بعض و حاولنا نتناسى الحرب ، بعدها بيومين كنت مقرره أقول لـ أبوي إني عايزا أمشي أركويت و أشوف بيتي بس خجلت والله ! يعني أنا و ناصر كنا على وشك الطلاق فكيف اقول لأبوي ماشه أشوف بيتي !!
فكرت كدا بعدها قلت ليهو أبوي مفروض بكرا أطلع و أصور ، قال لي هنا ولا وين !؟ قلت ليهو لا لا حـ نضطر نبعد شويه عشان نشوف باقي المناطق ، قال لي وين تحديداً ؟؟
بتردد قلت ليهو مثلاً حـ نمشي على الثورات و كل ما الأوضاع تهدأ نمشي أبعد شويه عشان التغطيه تكون شامله ، لمن قعد يعاين لي قلت ليهو خلاص ممكن نصور هنا و طوالي إتحركت من جنبو ، وقفت لمن قال لي تعاليني من الآخر و قولي لي ماشه أركويت ! إتلفت عليهو و أنا محرجه ! 😅
قال لي لمن الأوضاع دي تهدى شويه ، قلت ليهو يعني انت ما عندك مانع ؟؟ بتسمح لي أمشي ؟؟
قال لي عارفك عنيده و راسك ناشف و بتعملي الفي بالك ، لو حاولت أمنعك متأكد يوم من الأيام حـ تغفليني و تخاطري و تمشي أركويت براك ، قلت ليهو لا لا مستحييل يا بابا ! قال لي بتي و بعرفك ! أنا ما عايزك تعملي شي من وراي ، عايزك تكوني صريحه معاي و تجيني عديل و تحكي لي ... شربكت أصابعي و قلت ليهو والله خجلت أقول ليك ، ما عرفت حتقول عني شنو ، خاصة إنو أنا و ناصر كنا على وشك الطلاق !!
ضحك و قال لي بعد البكى البكيتيهو داك كلو ما بقدر اقول ليك شي تاني !!
طبعاً كلامو دا خجلني و في نفس الوقت حسسني بالإمتنان لأنو اتفهمني و حسسني براحه كبيره جداً ، مشيت بستو على راسو و قلت ليهو ربنا يحفظك لينا يا بابا ، قال لي بكرا لو في مشي بمشي معاك أنا ، قلت ليهو طيب...

🎭 رواياتي 📚 الوسام 2️⃣ 🎭

10 May 2024 11:25

كل الناس دي طلعت من بيوتها مجبوره و خلت وراها عمارات و عربات و قروش ، خلوهم و طلعوا لأنو الأمان زيو ماف ، فايدة قعادك في بيتك شنو إذا أنت ما حاسي فيهو بالأمان ، فايدة القعاد شنو إذا أنت لو جوا داخلين عليك الدعامه و أسرتك معاك ما حـ تقدر تحمي عرضك و تقيف في وش العواليق ديل ! حـ ينتهكوا أعراضك قدامك و يذلوك و يهينوك ، فايدة حراستك للبيت شنو إذا بصاروخ واحد انت و البيت حـ تتفرتكوا ! الأثاثات و العربات و حتى البيوت بتتعوض بس الروح ما بتتعوض يا بتي و الأمان ما بشترى بقروش ، الناس طالعه تفتش ليها حياة ، طالعه تلقى ليها لقمة أكل تقدر تعيل بيها نفسها و أسرها ، دي حرب ما لعب عشان الواحد يقوي راس و يقعد يحرس الدعامه و المصايب البتجي معاهم ، الله ما أمر بالهلاك !... بقيت أبكي ليها بس ، قالت لي مالك في شنو رافضه فكرة السفر دي كدا ؟!
قلت ليها ماف زول حاسي بالنار الجواي ، ماف زول فيكم ملاحظ إنو ماف أي أخبار عن ناصر ، أنا يا ماما ما بقدر أسافر و هو ما معروف قاعد وين و الحاصل عليهو شنو ... قلت كلامي دا بصوت عالي و رجعت أبكي تاني ، طبعاً على حس صوتي و بكاي أبوي و زيدان جوا راجعين و سمعوا الكلام القلتو ! ياداب هم كدا فهموا أنا مالي ! يعني كأنو ناصر دا كانو شايلنوا من حساباتهم ! ايوه كنا على وشك الطلاق بس دا برضو ما بمنعني أخاف و أقلق عليهو ، دا كلو ما خلاني أبطل أحبو و أمشي أخليهو وراي بكل بساطه ، ناصر دا حتى لو كان طلقني ما كنت حـ أقدر أنزعو من جواي و أديهو ضهري و أمشي... المره دي ما خجلت أبكي قدامهم و قلتها ليهم عديل إنو طول ما ناصر دا قاعد هناك مستحيل أسافر و أخليهو ، قلت الجمله دي و ما كان هاميني أهلي حـ يقولوا عني شنو ، لو عايزين يقولوا علي هبله خليهم يقولوا و لو عايزين يقولوا ما عندها رأيي و شخصيه خليهم يقولوا و لو عايزين يقولوا جاريه ورا واحد خطب بالدس و كان مفكر يعرس فيها برضو خليهم يقولوا ، ما كان هاميني شي غير أرجع الخرطوم و أشوف ناصر ، ما عايزا شي غير أكون معاهو ، طبعاً بعد عزيت كوووويس و أمي و رشا دخلوني جوه و سكتوني رشا قالت لي بالله البكى دا كلو عشان ناصر ؟ اتاريك داخله في حالة إكتئاب بسببو و نحنا قايلنها نفسيات الحرب ، يحليلك كنتي كاتمه جواك 😂
بعدها أبوي جا و قال إنو حـ يحاول يتصل على ناسو اللسه قاعدين في الخرطوم و إذا في طريقه يمشوا أركويت و يتأكدوا إذا ناصر موجود في بيتو ولا لا ، زيدان قال لي اول ما نتأكد إنو كويس حـ نسافر بورتسودان على طول ، طبعاً هنا قلبي وجعني ! تاني يوم زيدان شال تلفونو و طلع قال حـ يمشي يلف و يشوف مكان يلقط فيهو شبكه ، طلع و ما جا إلا قريب للمغرب ، أبوي كان موصيهو يتصل على ناس معينين موجودين هناك إذا لقط شبكه ، المهم لمن رجع قال كل الأرقام ما خشت معاهو حتى رقم ناصر ، إلا رقمين قدر يتواصل مع أصحابهم ، فـ المهم كلمهم و طلب منهم يصلوا لـ ناصر ، طبعاً أنا بقيت عايشه على أعصابي و منتظره متين زيدان أو أبوي يجوا و يقولوا حاجه عن ناصر ، انتظرنا اليوم الأول و التاني و التالت بس ماف خبر ! زيدان كان بشيل تلفونو و بمشي مسافات بعيده عشان الشبكه ، في اليوم الرابع زيدان جا داخل و هو وشو مضلم ، كنا قاعدين في المظله و بابها فاتح على باب الشارع ، أنا من شفت زيدان جا داخل قلبي قبضني و حسيت إنو في شي ، لمن وصلنا و دخل المظله أنا وقفت على حيلي و قلبي مرتعش من شدة الخوف ! أبوي قال ليهو خير يا زيدان في شنو !؟
عاين لي و نزل راسو ، أمي قالت اللهم اجعلو خير ! في شنو يا ولد وشك دا مضلم كدا ! أخد نفس و قال :
مبارك عمل زي ما طلبت منو و مشى لحد أركويت .... هنا سكت و عاين لي ، طبعاً أنا الوقت داك جسمي كلو كان برجف حتى قبل ما يتم كلامو !... المره دي واصل كلامو و هو بعاين لي : مبارم مشى و شاف بيتك و قال إنو في بيت جنبكم اتقصف ، و ماتوا 6 أنفار ، منهم واحد ولد جيرانكم المقاصدنكم و .... و ناصر منهم ! أبوي قال ليهو لا حول ولا قوة إلا بالله !! دا كلام شنو ! أمي ختت يدها على صدرها و قالت ما بصدق والله و رشا دموعها نزلت طوالي ، أما أنا فـ مع نهاية جملتو دي هبطت و قعدت على الأرض و مخي حسيتو بقى زي الخلاط ! انفاسي اتسرعت و دقات قلبي زادت ، بقيت أصرخ و أقول ليهم لاااا لاااا ناصر ما مات ، ما مات متأكدة أنا ، دا كلو كذب ، والله كذب ناصر ما مات 💔 أمي قعدت معاي على الأرض و ضمتني و بقت تبكي و هي شغاله لي ربنا يرحمو أدعي ليهو بس يا بتي ... انتفضت و زحيت منها و قلت ليها ناصر ما ماااات يعني ما مات ، قالت لي حاره والله عارفاها حاره لكن دي إرادة ربنا ... قمت منهم و مشيت دخلت جوه و قفلت الباب علي و هم برا بضربوا لي في الباب عشان أفتح ، زيدان قال لي افتحي الباب عايزا اتكلم معاك ، بقيت أبكي بصوت عالي و أنا بردد ناصر ما مات ، بقوا يضربوا في الباب كدا لحد ما أبوي قال ليهم خلوها براها شويه....

🎭 رواياتي 📚 الوسام 2️⃣ 🎭

10 May 2024 11:25

طبعاً كان في أصوات إشتباكات ، الكهربه قاطعه و الدنيا ضلاااام و ماف أي أصوات غير أصوات الرصاص و المدافع ، شويه كدا رشا جاتني داخله ، قالت لي جايه أنوم معاك ، أو خلينا نمشي و ننوم مع ناس أمي ، قلت ليها أمي نايمه في الهول ؟؟
قالت لي لا لا في غرفتهم ، قلت ليها طيب تعالي نومي معاي هنا ، قالت لي طيب و طوالي جات رقدت ... طبعاً من رجعنا رشا ما بتنوم براها ، مرات مع أمي و مرات مع أبوي لمن يكون نايم في الهول و مرات كلنا بنمشي ننوم في الهول ، طبعاً تاني اتصلت على ناصر أكتر من مرهـ بس بديني إنو خارج نطاق التغطيه ، بعد حكاية ربع ساعه كدا صحيت رشا و قلت ليها الجو بقى سخن شديد أرح ننوم في الهول ، قالت لي وااااي ننوم هناك برانا ؟ و بعدين هنا في سخانه و هناك في سخانه! قلت ليها الهول أوسع من الغرف و حيكون فيهو شوية تهويه ، أول ما فتحنا الباب و طلعنا من الغرفه لقينا أمي في وشنا ، طبعاً كنا مشغلين فلاشات تلفوناتنا ، أمـي قالت لينا أطلعوا نوموا معانا في الهول ، قلت ليها ايوه أصلاً كنا طالعين ننوم هناك ، المهم مشينا الهول و نمنا كلنا هناك وسط أصوات الحرب ....

" بيـني و بينك نبض لا يـهدأ و عـين لا تـنام و قلب لا يكف عن التغني بإسمك
بيـني و بينك حـب لا يـنتهي و حنين لا يـنطفئ و عشق لا يموت
بيـني و بينك حـكاية لا نهاية لها ، و قـصة انت بداية حروفها و أنا آخر نقطة فيها "🖤

*•••••••••••••••••••••••••••••••••••••••••••••••••••••••••••*
*★★يتبــــــــــــــــــــــــــــــــــــــــــــع★★*

🎭 رواياتي 📚 الوسام 2️⃣ 🎭

10 May 2024 11:25

_ نتمنى ذلك ، شكرا لك مراسلة الحدث مها من العاصمه السودانيه الخرطوم ...

بعد خلصنا لؤي قال لي خلينا نمشي بعد دا ، لأنو ما معروف يمكن فجأه كدا يبدا إشتباك في المنطقه دي ، قلت ليهو تمام و إتحركنا ، طبعاً الحي الكنا بنصور فيهو كان فاضي ، و كان في هدوء حذر ، منظر البيوت و الشوارع و هي فاضيه كان مؤسف شديد و كئيب ، للحظات جاني إحساس إنو البلد دي ما حـ تعمر تاني ، و إنو الناس الفاتت ما حـ تجي راجعه ، قلت لـ لؤي حاسي إنو البلد دي حـ تتصلح تاني ؟؟ حـ تبقى أحسن من الكانت عليه ؟؟ شايف بصيص أمل ؟؟
قال لي خليني أحكي ليك قصة دولة رواندا :
رواندا دوله صغيره ، و كانت من أفقر الدول الإفريقيه ، بعد نالت إستقلالها و بسبب العنصريه بدا فيها الصراع الداخلي بين "الهوتو "يلي هم الفلاحين و عامة الشعب و كانوا الأغلبيه ، و "التوتسي " يلي هم الأقليه ، كل ناس كانوا شايفين إنهم أحق بالحُكم من غيرهم ، في سنة 1962 الهوتو استولوا على الحكم بعد ما ثاروا على الملك التوتسي ، لكن حتى بعد إستيلائهم على السُلطه الصراع كان قائم ، لحد ما جات سنة 1994 ، السنه التم فيها قتل الرئيس الرواندي التابع لـ " الهوتو " و موتو كان نتيجة إستهداف الطياره الهو كان راكب فيها ، الهوتو وجّهوا أصابع الإتهام لـ التوتسي و قالوا إنهم وراء المؤامره دي ، و التوتسي وجهوا نفس الإتهام لـ الهوتو رغم إنو الرئيس الرواندي دا من الهوتو ... المهم ثار الهوتو على التوتسي و حصلت مجزره كبيره راح ضحيتها ما يقارب المليون شخص ، و معظمهم كانوا من التوتسي ، المهم جزو من المسلمين التابعين لـ الهوتو اتعاطفوا مع التوتسي ، فـ كانوا بدسوهم في بيوتهم أو في مساجدهم عشان ما يتم قتلهم ، و لمن الهوتو اكتشفوا إنو أبناء عرقهم بحموا التوتسي ذبحوهم في الشوارع بحجة إنهم خاينين ....
قلت ليهو و بعدها حصل شنو ؟؟ أنا سمعت بـ حرب رواندا دي بس ما كنت عارفه التفاصيل ، قال لي :
عندنا هنا في السودان لمن تحصل مشكله بين قبيلتين مش بتدخلوا ناس كدا من القبيلتين أو القبائل التانيه عشان يعقدوا جلسة صلح بيناتهم ؟
قلت ليهو ايوه بنقول عليهم أجاويد ..
قال لي ايوااا يلا دا الحصل في رواندا ، رغم الصراع الدامي بين الهوتو و التوتسي و قتلهم لبعض بدون رحمه ، إلا إنو في أقليه من الهوتو و التوتسي ما كان عاجبهم البحصل دا ، فـ اجتمعوا مع بعض ، و قرروا إنهم ينبذوا العنصريه و ينهوا الحرب الحاصله دي ، و يوقفوا سيل الدماء ، فـ سعوا لـ محاكمة كل شخص إتورط في الإباده دي ، و دعوا كل أبناء البلد الطلعوا منها بسبب الحرب انهم يرجعوا عشان يساهموا في بناء بلدهم ، و فعلاً دا الحصل ، و في سنة 2000 انتخبوا رئيس من التوتسي و الرئيس دا نهض بـ رواندا ، انتشل الدولة من القاع إلى السطح ، و خلال 20 سنه اتعمرت الدوله الروانديه و إنتقلت من دولة الحطام إلى دولة الإزدهار ، و اليوم رواندا من أغنى و أجمل دول العالم !
قلت ليهو سبحان الله ، من أفقر دوله في إفريقيا إلى أغنى دوله في العالم !!
قال لي خلاصة القصه إنو ماف حاجه اسمها البلد دي إنتهت و تاني ما حـ تنهض ! نحنا ما وصلنا لـ مرحلة رواندا في فترة حربها و ان شاء الله حربنا ما تكون زي حربهم ، نحنا لسه عندنا فرص ننهي الحرب ، و ننبذ العنصريه ، و نضع الوطن في حدقات العيون ، و يكون كل همنا نبني بلدنا و ننهض بيها ....
قلت ليهو كلامك حقيقه بس حرب رواندا دي طولت شديد ! يعني حربنا دي لو استمرت سنوات طويله ما .... قاطعني و قال لي ما مهم الحرب حـ تنتهي متين ، الأهم إنو هل نحنا اتعلمنا الدرس و جاهزين عشان نبني البلد ؟؟ جاهزين نخت كل شي على جنب و نساعد في نهضة السودان ؟؟
قلت ليهو بالعكس مهم جداً الناس تعرف البلد دي ماشه على وين و أقصى مده ممكن تاخدها الحرب عشان تنتهي ، يعني محتاجه سنه ولا سنتين ولا أكتر ! قال لي قولي الحرب دي انتهت هسي دي بس الناس ما اتعلمت الدرس ، و لسه النفوس زي ما هي ، و لسه في ناس طمعانه في السلطه و لسه في ناس بتخطط و بتكيد ، الحرب دي حـ تقوم تاني ولا لا ؟؟ وقت ما تنتهي الحرب تنتهي المهم انها تقضي لينا على كل الخونه و المندسين و تخلصنا من أصحاب النوايا السوداء ، الما عايزين الخير للسودان ، بعدها برانا حـ نتكاتف و نبني بلدنا ، قلت ليهو المهم عن نفسي جاهزه و مستعده أنضم و أدعم أي مبادره حـ تنفع البلد دي و تنهض بيها ، قال لي كلو حـ يهون بإذن الله ، و كلنا عندنا أمل كبير إنو البلد دي حـ ترجع أقوى و أفضل و أغنى دوله على مستوى إفريقيا أولاً ، و بعدها على مستوى العالم......
قلت ليهو ان شاء الله .... بقينا نتكلم كدا لحد ما وصلنا البيت ، أبوي كان خاتي ليهو كرسي برا و قاعد فيهو و كان معاهو عم عبد العزيز جارنا ، سلمت عليهم و طوالي دخلت و لؤي قعد معاهم ، لمن دخلت جوه إتلاقيت مع أمي في باب الهول ، قالت لي قلقتي بي ! من قبيل أدخل و أطلع زي أم العروس ، ضحكت و قلت ليها ما مشينا بعيد ، قالت لي والله لمن تطلعي الشارع دا قلبي ما

🎭 رواياتي 📚 الوسام 2️⃣ 🎭

10 May 2024 11:16

رابط الجزء الاول

/channel/hobcanat/72461